سوري مطاعم in Cairo, Egypt

مطاعم

الجناني: مطعم أكل سوري أصلي في 6 أكتوبر
اصدرت في: 22/12/2015

مع وفود عدد كبير من أهل سوريا للبلد، بدأت المطاعم السورية في الانتشار بشكل سريع، وبما أننا كان نفسنا نفطر فطار سوري، قررنا نروح الجناني –Al Jinani ، وهو مطعم مشهور في الحي السوري في 6 أكتوبر. الحي السوري موجود في واجهة مسجد الحصري، وهو شارع زحمة وكله مطاعم بـ تقدم الأطباق السورية التقليدية زي الشاورما، والفتة والكباب الحلبي، وبجانب عدد المطاعم الكبير، فيه محلات بـ تبيع منتجات سورية زي الجبن، والمكسرات وزيت الزيتون، بالإضافة للحلويات السورية المشهورة زي الكنافة النابلسية وحلوى الجبن، زي معظم مطاعم الحي، الجناني عنده مجموعة من الكراسي والترابيزات البسيطة كقعدة خارجية على الرصيف، فقعدنا علشان نستمتع بالشمس وهواء الصبح. بعد مجموعة من الاقتراحات اللطيفة اللي الجرسون اقترحها علينا، طلبنا طبق فول سوري (الحجم العادي 8 جنيه)، وفول باللبن (8 جنيه)، فلافل (5 جنيه)، تسقيًة (10 جنيه)، ومسبحة (7 جنيه) –اللي هي حمص سوري- وكل اللي طلبناه قُدم معاه طبق مخلل. الفول المطبوخ مع الحمص وقطع الطماطم مع رشة زيت زيتون كان طعمه مميز وخصوصًا أن كمية الثوم والبقدونس مع الليمون كانوا مضبوطين، الفول باللبن كان مليء بالنكهات أكثر من الطبق الأول، لأن عليه زبادي وطحينة واللي بـ نعتبرهم مكونين أساسيين في نجاح الطبق. بعكس الفلافل المصرية المعمولة من الفول، الفلافل السورية مصنوعة من الحمص وبالتالي لونها الأخضر أفتح؛ كانت سخنة، مقرمشة وطعمها رائع، استمتعنا بالمسبحة المصنوعة من الحمص، واللي قوامها يشبه إلى حد كبير الطحينة، خفيفة وفي نفس الوقت كريمي. التسقية بقى كانت أفضل طبق في التجربة، مكونة من حمص، وبقدونس وطماطم وطحينة، معاهم عيش مقرمش وسمنة على الوجه، طبعًا هي كانت دسمة، ولكن ده ما يمنعش أننا استمتعنا بها، في المجمل تجربتنا كانت ممتعة، بالرغم من أننا بـ نعز فطارنا المصري الأصيل، لو أنت من عشاق الأكل السوري، لازم تجرب الجناني.

...

باب توما: أكل سوري أصلي من الآخر في هليوبوليس
اصدرت في: 16/11/2015

صعب جدًا أنك تزهق لما تتكلم عن مطاعم القاهرة، اللي بـ تقدم عدد رهيب من المطابخ العالمية الراقية وكل يوم بـ نجرب عندهم أكلات جديدة ومبتكرة، بعد توصيات من ناس كثيرة كان لازم نطلع على باب توما في هليوبوليس، وهو مطعم سوري بـ يقدّم أطباق سورية أصلية وحلويات من المطبخ الشامي. باب توما مكانه أمام تيفولي دوم، بـ يتميز بمساحته الواسعة بالقعدات المودرن ومنطقة مفتوحة خارج المطعم؛ الفكرة أنك صعب من الشكل العام تقول أنك داخل على تجربة أكل سورية. باب توما كمان بـ يقدم مجموعة متنوعة من الأطباق تشمل جبن ومناقيش سبانخ أو لحم (25: 40 جنيه) فتة سورية وطواجن وبيتزا وحاجات ثانية رائعة، فكده إحنا وقعنا في مشكلة، وهي إزاي نختار من بين كل الكلام ده! بالنسبة للأطباق الرئيسية طلبنا ساندويتش شاورما فراخ (35 جنيه) وطبق فولدوستينا - عبارة عن فراخ محشية ببيروني ومشروم ومعاه أرز أبيض أو أي طلب جانبي تختاره (60 جنيه). طلباتنا وصلت بسرعة، وكل طبق نزل معاه مخلل وشوية بطاطس محمرة روعة، ساندويتش الشاورمة فراخ الملفوف كان مقطع قطع صغيرة وغرقان صوص ثوم مع شوية نعناع طازج، وطعمه كان لذيذ وتتبيلته هايلة؛ المشكلة بس أنه كان مزيّت شوية. نروح لطبق فولوستينا المكوّن من أربع قطع رول فراخ متّبلين حلو جدًا وغرقانين في صوص أبيض كريمي غني وخفيف في نفس الوقت، وقدر يعمل خلطة سحرية مع الفراخ، الفراخ كانت مضبوطة جدًا، لا هي ناشفة أوي ولا رطبة بزيادة والسر كان التسوية الهايلة، وفعلاً ده كان طبق اليوم من وجهة نظرنا. بعد كده وصلنا للحلو، ووقعنا في حيرة بين حلاوة الجبن وهي عبارة عن جبنة مسكّرة في ماء ورد وMaple syrup وبين الغزل السوري وهو عبارة عن كيكة من الغزل الأبيض ومعاها آيس كريم، وفي النهاية قررنا نطلب الأخير. نوصفها لكم أكثر؛ هي كيكة مدوّرة طرية بـ تذوب في فمك بمنتهى السهولة، ومزينها غزل البنات الرائع وفوق كل ده بولة آيس كريم فانيليا، وفعلاً الغزل السوري كان سيمفونية من الجمال والطعم الرائع، يمكن بس كان محتاج بولة آيس كريم أكبر شوية علشان تناسب حجم الكيك. مسك الختام كان مع شيشة كيوي ومانجو (40 جنيه) وفعلاً عملوا كوكتيل رائع وفضلت مكمّلة معانا لآخر اليوم. مجمل الموضوع أن تجربتنا في باب توما كانت هايلة، صحيح ساعات المكان بـ يكون دوشة وزحمة خصوصًا بالليل، بس أكيد دي كانت من أحسن المرات اللي نجرّب فيها الأكل السوري.

...

خيرات الشام: مطعم سوري يغير قواعد اللعبة في المعادي
اصدرت في: 10/03/2015

خلونا نتكلم بصراحة يا جماعة؛ لو بصيت في منطقتك، هـ تلاقي على الأقل ثلاثة مطاعم بـ تقدم شاورما. مافيش كلام أننا بـ نعشق الشاورما الكويسة، ومطاعم الشام عمومًا، لكن فيه عدد كبير من المطاعم المتدنية المستوى بـ تدمر سمعة الأكل السوري القوية. الحكاية مش حكاية لحم أو فراخ، الفكرة في الحاجات البسيطة زي الثومية، عيش الصاج والخلطة، هي دي فعلًا العناصر اللي بـ تعمل أكلة جامدة، لو واجهتك مشكلة أن كل الأكل السوري اللي بـ تجربه له نفس الطعم، الخبر اللي معانا هـ يفرحك علشان عمرك ما هـ تصدق المطعم ده جامد لأي درجة. في آخر شارع 233 في المعادي، خيرات الشام مطعم مساحته بسيطة جدًا بـ يشتغل على التيك أواي والدليفري. اوعى يخدعك حجم المكان، أو بساطته، علشان طعم الأكل فعلًا مش طبيعي. المنيو بـ تقدم ساندويتشات شاورما، وجبات وفتّات، مع اختيارات مشوية بـ تُقدم كوجبات أو ساندويتشات تشمل شيش طاووق، مسحّب (فراخ مخلية)، كفتة وكبّة، المقبّلات تشمل فتّوش، تبّولة، كبّة ودبس الرمان. طلبنا وجبة شيش طاووق (31 جنيه) مع فتة شاورما لحم (31 جنيه) وطلب إضافي من الأرز البسمتي الأصفر (7 جنيه)، كول سلو (8 جنيه) وساندويتش كفتة (19 جنيه). وجبة الطاووق كانت عبارة عن سيخين من مكعبات صدور الفراخ متبّلة كويس، والتتبيلة تشمل دبس الرمان، وبصراحة ده أحسن شيش طاووق أكلناه في القاهرة كلها. صحيح البطاطس المحمرة مستواها متوسط والكول سلو معقولة، الثومية كانت عالمية، وإضافتهم كلهم في عيش الصاج عمل طعم لا يقاوم. فتة الشاورما لحم كانت هائلة برضه. من ثاني، الكمية كانت كبيرة، قطع الشاورما كانت مناسبة والأرز البسمتي المستوي كويس قدر مع العيش المقرمش والثومية يعمل خلطة سحرية. ساندويتش الكفتة، المكوّن من بقدونس، طحينة، بصل ومخلل برضه كان روعة، والفضل يرجع للطحينة الرائعة والكفتة اللذيذة المتسوّية بشكل ممتاز لدرجة أنها بـ تتقطع لوحدها قبل حتى ما نمسكها. طلب الأرز البسمتي الأصفر والكول سلو، واللي كنا طلبناهم خوفًا أننا ما نشبعش، فاجئونا بكميتهم اللي تكفي لغاية ثلاثة أفراد. صحيح مافيش مكان للأكل في فرع خيرات الشام في المعادي، لكن أكلة حلوة زي دي ممكن تستمتع بها أكثر في البيت، إحنا جربنا مطاعم سوري ولبناني كثير جدًا، حتى أصحاب المستوى الراقي من ناحية شكل تقديم الأكل والمكان نفسه، لكن قليل منهم اللي بـ يقدم أكل جامد في مستوى خيرات الشام.

...

دار ورد: مطعم قادم رأسًا من قلب سوريا إلى أركان مول الشيخ زايد
اصدرت في: 10/09/2014

من فترة كتبنا لكم مقال نقدي عن مطعم "فاطمة - Fatma" فى أركان مول، المرة دي رحنا جاره المجاور له مطعم "دار ورد – Dar Ward"، أول ما شفنا المطعم ده من فترة اختلط علينا الأمر وجاء لنا انطباع من أول وهلة أنه مكان لبيع الكتب أو أنك ممكن تقرأ كتاب مع قهوتك المفضلة، لكن لما ركزنا وقرأنا الشعار لقينا أنه مطعم حلبي (من سوريا).. وبالتالى خصصنا له يوم لازم نروح نجربه وخاصة ان المطبخ ده مش منتشر فى مصر. المطعم أصله كان موجود فى قلب المدينة القديمة فى حلب، وده كان خان قديم من القرن الثامن عشر، عبارة عن قصر سابق للملكة ضيفة خاتون أحد ملوك حلب القدماء، تم ترميمه وقتها علشان تكون تحفة فنية كبيرة تعبر عن عدد من الأزمنة والثقافات المختلفة بنقوشه وزخارفه الشرقية وبـ تطل على قلعة حلب الشامخة، وكان مطعم ناجح جدًا فى حلب، لكن للأسف دوام الحال من المحال، بعد الأحداث المؤسفة اللى فى سوريا المطعم هناك تم إغلاقه وجاء إلى مصر ليفتتح أول فروعه فى أركان مول الشيخ زايد وبقى له سنة وشوية لحد دلوقت ناجح ومستمر بقوة. المنيو فيها على كل الصفحات اليمين صور وسيرة ذاتية لفنانين أو مشاهير ولدوا فى حلب بسوريا زي صباح فخرى وسعد يكن وميادة الحناوى وصبري مدلل ومصطفى العقاد، وكمان صور لجوامع وكنائس فى حلب، وأخيرًا صورة لمبنى مطعم دار ورد اللى كان فى حلب. أما الصفحات الشمال فيها أقسام المنيو اللى بعض أصنافه كانت معروفة بالنسبة لنا وحاجات ثانية مبتكرة، الجرسونات هناك ودودين ومتعاونين وبـ يشرحوا لك مكونات الأطباق بصدر رحب، وبـ يرشحوا لك أفضل ما عندهم كمان، طلبنا سلاطة دار ورد (32 جنيه) ودى عبارة عن طماطم شيري وجرجير وفلفل ألوان وخيار ومن فوق خرشوف، ومن المقبلات بطاطا مع كزبرة وثوم (24 جنيه)، نروح للأطباق الرئيسية اللى رشح لنا منها الجرسون معجوقة حلبية (70 جنيه) وهى عبارة عن لحم رفيع معمول زي الرغيف محشو من جوه مشروم وصنوبر وجبنة ومقطع لأربعة أرباع، وكمان لحم جدى بالزيت (73 جنيه) بـ ينزل معاه خضار سوتيه وأرز أبيض ورشح لنا الجرسون معاه لبنة خيار (18 جنيه). أول حاجة السلاطة جاءت لنا مش بعد وقت طويل أوى، السلاطة خفيفة وطعم المكونات مع بعض كان رائع مع رشة زيت الزيتون وكمان الخرشوف أضاف لها مع أنه ما كانش كثير، كان نفسنا يكون زيادة، كمان البطاطس بالكزبرة والثوم كانت لطيفة، البطاطس مقرمشة وواضح فيها طعم الكزبرة لكن الثوم لأ، وإحنا من محبي الثوم جدًا، لما علقنا على الموضوع ده الجرسون قال لنا أنهم بـ يقصدوا ما يزودوش الثوم علشان فيه ناس بـ تتضايق منه. جاءت لنا الأطباق الرئيسية، المعجوقة دي كانت حكاية، اللحم رفيع قوي تسويته وطعمه مع الصنوبر والمشروم مع الجبنة كان رائع، مش عارفين معمولة إزاى بس أكيد هـ نحاول نعرف سرها، لبنة الخيار كانت أقوى حاجة فى السلاطات، مزازة اللبنة مع الخيار ضيف عليهم طعم الزعتر اللى كان فيه روعة، تقريبًا الطبق ده اتمسح لحد آخر حتة فيه، لحم الجدي بالزيت مع الخضار والأرز كان برضه حلو جدًا وأهم حاجة أن تسويته كانت تمام ومافيهوش دهن، وده اللى بـ يميز مكان عن الثاني. بعد ما خلصنا أكل فاجأنا الجرسون بشاي حلبي أصيل، شاي بعيدان القرفة بالنعناع، أول مرة نذوقه فى حياتنا ومش هـ تكون آخر مرة، عجبنا جدًا المزج بين النكهتين فى الشاى، حتى الشاي نفسه كان طعمه مختلف، بعدها جاءت لنا المفاجأة الثانية: قطايف بالقشطة ومرشوش عليها من فوق قرفة برضه، وعليها شراب سكر خفيف أوى، ودى هدية من المكان علشوا عرفوا أننا أول مرة نيجي، كانت حلوة جدًا ومش تقيلة أو سكرها لاذع.. بجد ختام رائع لزيارتنا.. إحنا الصراحة نحب نتدلع!

...

أفاميا الشام: مطعم سورى جديد فى المعادى
اصدرت في: 04/08/2014

انضم "أفاميا الشام" لعدد المطاعم السورى الكبيرة فى القاهرة، وفتح أبوابه لكل زائريه على طريق النصر فى المعادى. مع اسمه المستوحى من مدينة أباميا التابعة لإمبراطورية سلوقيون، أفاميا الشام بـ يقدم كل الأطباق الكلاسيكية الشامية اللى تشمل مناقيش، وفتّة، ومشويات من اللحوم والفراخ، بالإضافة لمقبلات باردة وساخنة منها اللبنة، والتبولة، والحمص والمحمرة. تصميم المطعم نفسه كان روعة بدرجات ألوان قوية من البيج والبنى، يحليها اللون التركواز. مع حوائط من الحجر فى المدخل وديكورات بسيطة ملفتة للانتباه، المطعم جذاب ويعتبر مكان مريح للأكل. عند دخولك، هـ يرحب بك الجرسونات المهذبين ويوصلوك لترابيزتك، وبعدها يسلموك منيو كبير بجد فيه نبذة عن تاريخ أباميا من زمن قدماء اليونان، وخلال حقبة الهلنستى ووصولاً لإمبراطورية سلوقيون. من بين اختيارات المقبلات، طلبنا حمص باللحم (22 جنيه) عبارة عن طبق عميق من الحمص المطحون ومعاه شاورمة لحم فى وسط الطبق. صحيح الطعم المختلف ما بين الحمص والشاورمة الدسمة كان هائل، ممكن بعض الناس تشوف أن الطبق زيته زيادة شوية أو ثقيل، لكن ده يختلف من واحد للثانى. من الأطباق الرئيسية، طلبنا وجبة كفتة (40 جنيه) وشيش طاووق (35.5 جنيه). الناس اللى جربت المشويات الشامى عارفين أنها تختلف شوية عن المشويات المصرية، الحقيقة أن الموضوع يعتمد على تتبيلة اللحم، لكن بالنسبة للطيور الموضوع كله عبارة عن لحم أبيض أو لحم أحمر، وأغلبية المصريين بـ يستخدموا الأخير. الوجبتين بـ يُقدم معاهم اختيارك من البطاطس المحمرة أو الأرز، ومعاهم عيش سورى، سلاطة صغيرة وصوص ثوم. بالنسبة لوجبة الكفتة، هـ يوصل لك أربعة أسياخ من اللحم اللذيذ والدسم نوعًا ما، عليهم رغيفين عيش سورى بالبهارات. البهارات الموجودة فى العيش هى نفس الطعم الموجود فى العرايس؛ طبق شبيه بالحواوشى لكن فيه تتبيلة فى العيش تشمل طماطم، وبصل، وثوم وبقدونس، الخليط ده قدر يعمل ساندويتشات كفتة رائعة مع البطاطس المحمرة وصوص الثوم. وجبة الطاووق للأسف كانت بعيدة خالص عن المنافسة، صحيح كل عناصر النجاح للطبق كانت موجودة، نكهة الفراخ كانت بعيدة عن المفروض تكون عليه. الطاووق تتبيلته ثقيلة جدًا وساعات الطعم بـ يكون حراق شوية، لكن فى حالتنا للأسف، مستواه كان أقل من الطبيعى. صحيح التجربة بشكل عام كانت لطيفة، المنافسة الصعبة الموجودة معناها أن أفاميا الشام -بمستواه الحالى- ممكن يضيع وسط القطيع المفترس، الحل أن المطعم يقدر يكوِّن نوع من ثبات مستوى الأكل.

...

أبو صلاح السورى: تيك أوت معقول فى الزمالك
اصدرت في: 24/06/2014

الموضوع مش دائمًا مرتبط بالبذخ فى الأكل والمصاريف فى القاهرة، ساعات كثير بـ يكون إزاى تمشى يومك. لما نفكر فى مطاعم أسعارها معقولة فى الزمالك، عدد قليل منهم بـ يخطر على بالنا، والسبب غالبًا هو ارتفاع أسعار الإيجارات فى مكان زحمة زى الزمالك، وبكده تكون المطاعم مضطرة تعلّى الأسعار. كنا فرحانين جدًا بمطاعم زى ساندويتش علشان بـ يقدم منيو 5 جنيه، بس قدرنا نلاقى جوهرة ثانية من جواهر الزمالك، مطبخ صغير اسمه أبو صلاح السورى، أغلى حاجة عنده فى المنيو سعرها 30 جنيه. علشان نقدر نستوعب المنيو، قررنا نطلب مزيج من الوجبات مع الأرز والساندويتشات. ساندويتش لبنة بالزيتون والزعتر فى عيش صاج (5 جنيه)، ساندويتش جست برجر (8 جنيه) وطبق أبو صلاح بالشاورمة (23 جنيه). الأكل وصل بعد 40 دقيقة مغلف بشكل شيك. ساندويتش الصاج كان ملفوف فى ورق فويل ومتوصّف، أما الوجبة كانت فى طبق مغطى وملفوف بالفويل. صحيح أن فى الطبيعى المكونات دى بـ تكون مناسبة جدًا مع بعضها، لكن ساندويتش اللبنة كان للأسف عديم المذاق. مافيش أى نكهة زيتون، والحاجة اللى ممكن تضبط النوع ده من الساندويتشات –زيت الزيتون– ما كانش موجود. البرجر على الناحية الثانية كان طعمه لذيذ. كاتشب، ومايونيز، وشوية خس ملفوفين فى عيش صاج، جست برجر بالنسبة لسعره يعتبر هائل. طبق أبو صلاح تكوّن من أرز بسمتى أصفر عليه شاورمة لحم وطحينة، ومعاه كمان طبق بطاطس محمرة بالبهارات، قطعة سمبوسة جبنة، وقطعة كبيبة شامى واثنين ورق عنب. كمية كبيرة من الأرز كانت مضبطة كويس وقدرت تخلق طعم مميز مع الطحينة والشاورما، بس لو كانوا أضافوا قطع عيش محمص الموضوع كان اختلف. البطاطس بتتبيلتها القوية، كانت للأسف معجنة شوية، بس على أى حال، قدرت تخلق نكهة لذيذة لما تتغمس فى الثوم، والغريب أنه كان أجمد من باقى الموجود، الكبيبة الشامى رغم أنها صغيرة شوية، كانت غنية بالطعم، تعتبر مشروع ساندويتش هائل، صحيح السمبوسك فيها قرمشة خفيفة، لكنها ما قدرتش تبهرنا، ولا تحبطنا فى نفس الوقت. ورق العنب كان حادق شوية، لكن مش سيء. عمومًا، الموضوع يساوى تكلفته، إحنا معاك الأكل مش روعة، فى نفس الوقت استخدام مكونات رخيصة ما كانش كارثى. بالنظر لنقص اختيارات الأكل المعقولة فى الزمالك، الاحتياج لمطابخ صغيرة زى أبو صلاح بـ يزيد يوم بعد يوم.

...

شام شريف: مطعم سوري ضايع وسط المنافسة فى مول العرب
اصدرت في: 28/04/2014

منطقة النافورة فى مول العرب بالقاهرة مليانة مطاعم وكافيهات كثيرة جدًا.. قرار أنك تروح مكان معين فيهم صعب من كثرهم، لكن اللى هـ يخليك تقرر بسهولة لو لك خلفية عن المكان إما من خلال صديق راحه، أو كايرو 360 كتبت عنه مقال نقدي، ولأننا أخذنا انطباع سيء عنه عمرنا ما هـ ندخل ثاني المطعم السوري "شام شريف – Sham Sharif". موجود قريب من بوابة 19 وأمام النافورة الراقصة، اسمه بالبرتقالى هـ يشدك من بعيد، الديكور والقعدة شكلها لطيف، والجرسونات مرحبين جدًا ومهذبين لكن غير محترفين وواقعة منهم حاجات عاوزة تتضبط هـ نحكي لكم عليها، الديكور خشبي أكثر والمنطقة المفتوحة أكبر من الداخلية المغلقة وبـ يفصل بينها زجاج فكنا شايفين الكاشير والمطبخ من بره. المنيو مش مغرية ومش جذابة خالص، على الرغم أن فيها أصناف مختلفة ما كناش متحمسين لأى منها، يمكن كمان لأن مافيش وصف لأسماء الأطباق الغريبة، ومافيش حتى صور، المنيو كئيبة مش مشجعة خالص، بعد فترة حيرة اختارنا أخيرًا شوربة التربية (30 جنيه) وسلاطة فتوش (25 جنيه) وطبق رئيسي ورق عنب (65 جنيه) عليه قطع لحم، وكمان ميكس جريل (85 جنيه) كباب وكفتة وشيش وبـ ينزل معاها أرز أو بطاطس، أهم حاجة لاحظناها أن الأطباق مافيش معاها طلبات جانبية وده كان غريب جدًا لأن الأكل الشامي أو اللبنانى عامة بـ يكون أغلبه نواشف، مافيش حتى خضار سوتيه أو أى حاجة، وده سبب أننا طلبنا سلاطة الفتوش. نزل لنا سبت فيه عيش أبيض، والمكان قدم لنا هدية من عنده سلاطة المحروقة وسلاطة الثومية، العيش كان فريش وحلو جدًا وطري، سلاطة المحروقة كان باين من لونها وشكلها واسمها أنها مشطشطة، وده اللى كان، ما عرفناش نأكل منها فتفوتة وطلبنا من الجرسون يشيلها، الثومية كانت رائعة، طعم الثوم باين فيها، وكريمي وغنية. بعد شوية جاءت لنا الشوربة، عبارة عن كريمة فيها جزر وخضار ثاني مش متذكرينه الصراحة، طعمها حلو وسخنة وكميتها تكفى شخصين، سلاطة الفتوش كانت فريش وحلوة برضه لكن كان فيها شطشطة خفيفة ضايقتنا، قعدنا فترة كثيرة شوية عقبال ما الأكل جاء لنا، ورق العنب وصل الأول، وبعد شوية لقينا الجرسون جاى من بعيد معاه طبق الميكس جريل ووقف اتكلم شوية مع زميله وهو ماسك الموبايل، وبعدين قربوا مننا ووقفوا ثاني يرغوا ولا كأننا منتظرين أكل متأخر! ورق العنب كان كويس بس مش أحسن حاجة، ذوقنا أحسن منه فى أماكن ثانية، واللى كان غريب أن عليه 3 قطع لحم صغيرة على الوش! وده ضايقنا جدًا وقولناه للجرسون، الميكس جريل كان أفضل حاجة لحد دلوقت، والبطاطس عادية، ده غير أنهم نسيوا ونزلوا لنا أرز بس فى الآخر قدموا الاثنين لنا عادى. بعد ما خلصنا أكل طلبنا من الحلو حلاوة بالجبنة (35 جنيه) ودى على حسب وصفهم عجين عليها سكر شربات من بره وقشطة (المفروض جبنة) من الداخل، جاءت لنا فى وقت قصير، 4 قطع من الحلاوة عوضتنا شوية عن الأطباق اللى فاتت وخلت ختام قعدتنا كويس، الحلاوة دي اختراع لطيف وكانت خفيفة وطعمها حلو قوى. "شام شريف" لو كمل بنفس الطريقة وسط المنافسة الكبيرة لمنطقة النافورة والفوود كورت القريبة منها هـ يضيع فى النص، محتاج يهتم بتفاصيل كثيرة والجرسونات تركز أكثر، لأن على الرغم أن الحلاوة بالجبنة كانت ختام كويس لكن فى النهاية إحنا مشينا مش مبسوطين!

...

صاج وشاورما: شاورما سوري ع الواقف في الزمالك
اصدرت في: 13/04/2014

"مصائب قوم عند قوم فوائد".. ليه؟ علشان ببساطة محل الشاورما، أو بمعنى أصح ركن الشاورما ده كان تابع لكافيه بيور اللي كان فاتح السنة اللي فاتت، وقفل. وفضل ركن الشاورما بتجهيزاته كاملة، واستغله اثنين من سوريا علشان يقدموا لنا "صاج وشاورما - Saj & Shawerma". زي أي مطعم أكل سريع في الدنيا، عندك أوت دوور: تأكل في الشارع وأنت ساند على أي عربية، أو إن دوور: تأكل جوه عربيتك. بس لازم تعرف أن الاختيار الأول أسهل لأن الشارع ضيق وما يستحملش أنك تركن عربيتك صف ثاني أمام المطعم. هـ تعرف المطعم لو كنت تعرف كافيه بيور، ولو ما تعرفوش هـ تلاقي يافطة سوداء كبيرة عليها اسم المحل على اليمين بالبرتقالي ولوجو شركة بطاطس نصف مقلية مشهورة (واللي لسبب ما حجمه أوضح من لوجو المطعم نفسه). استقبلنا شباب سوري بترحاب شديد جدًا، وبمجاملات ظريفة حببتنا في الأكل قبل ما نطلب، طلبنا منيو ورقي نقرأ منه بمزاج، بس للأسف كانت خلصت كلها. المهم أن فيه منيو مُعلق جيبنا منه المفيد: المنيو مناسبة جدًا لحجم وإمكانيات المكان. معظمها ساندويتشات: طبعًا شاورما لحم صغير (13 جنيه) كبير (15 جنيه). شاورما دجاج (10 جنيه) و(18 جنيه)، ساندويتش كبيبة (9 جنيه) وفلافل سوري (6 جنيه) وكله مُقدم في العيش الصاج. الشيء الوحيد اللي ممكن يقدم بالواحدة هي الكبيبة (3 جنيه). تحمسنا جدًا للفلافل والكبيبة، بس للأسف سمعنا الجملة المشهورة: "كان فيه وخلص"، وانحصرت اختياراتنا في الشاورما بنوعيها، طلبنا شاورما لحم، ووجبة شاورما فراخ (18 جنيه)، لازم نوضح هنا أن الوجبة مكونة من بطاطس وساندويتش بس، ولا عزاء للناس اللي بـ تحب تبلع بمشروب. نصيحة مهمة جدًا: لو عندك مشوار في الزمالك وأوردرك كبير، خلص مشاويرك وارجع لهم، لأننا انتظرنا ساعة إلا ربع علشان الأكل يجهز. صحيح أنهم أمطرونا باعتذارات وعينات أكل مجانية، بس دي ساعة إلا ربع على ثلاثة ساندويتشات ووجبة والمحل مافيهوش غيرنا. شاورما اللحم هي ببساطة أحسن شاورما أكلناها في حياتنا، العيش طري مش مجلد كعادة المطاعم السوري، واللحم كان رائع سواء كنوعية أو كطهي، شرائح الطماطم مع البقدونس والطحينة معمولين بفن. ولكن شاورما الفراخ كانت سيئة بمعنى الكلمة، الثومية كان طعمها واضح وده اللي أفقد الفراخ طعمها تمامًا، يعني لو غمضت كده وأكلت قضمة مش هـ تحس غير بطعم الثومية والخيار المخلل. البطاطس كانت بـ تنافس بجدارة على سوء الطعم، بسبب خطأ بسيط جدًا: أن البطاطس مقلية من فترة، وبالتالي كانت هي كمان مجلدة. التجربة في مجملها كانت سلبية للأسف، من أول المنيو الصغير اللي نصف الأصناف فيه مش موجودة، مرورًا بالتأخير غير المبرر وجودة الطعم. الشيء الإيجابي هو المعاملة الجميلة، والنظافة وشاورما اللحم.

...

حلب جريل: أكلات سورية سريعة في التجمع الخامس
اصدرت في: 27/03/2014

بقى لنا كثير ما كتبناش عن المطاعم السورية، كثير ده بمعنى ٣ أسابيع أو شهر مثلًا، لأن المعدل اللي بـ تفتح به المطاعم السورية في القاهرة يستحمل أننا نكتب عنه مرة أو مرتين كل أسبوع، الحقيقة رغم شطارة الشيفات في معظم المحلات السورية اللي بـ ندخلها، إلا أن ساعات المستوى بـ يبقى أقل من المتوقع، وبـ تبقى مفاجأة غير سارة لنا لأننا دائما توقعاتنا في السماء حتى لو المكان على قد حاله. لحسن الحظ تجربتنا كانت ظريفة في «حلب جريل» اللي وقعنا فيه بالصدفة أثناء جولة استكشافية عن أي مكان فتح جديد في التجمع الخامس، وبالتحديد خلف سوبر ماركت سعودي ومحطة بنزين موبيل، وبالمناسبة المكان ده من أكثر البقع حيوية في القاهرة الجديدة، وفيه عدد كبير من القهاوي والمطاعم الشعبية والسوبر ماركت، وكلها بـ تسهر لوقت متأخر، وهـ تنسى للحظات أنك في التجمع الهادئ أو التجمع الخامس. مطعم «حلب جريل» مساحته صغيرة من الداخل، اعتماده الأكبر على التيك أواي والناس اللي بـ تأكل على القهاوي والكافيهات القريبة منه، لكن فيه برضه مساحة للجلوس أمام المحل فيما يشبه الحديقة الصغيرة اللي فيها عدد محدود من الترابيزات والكراسي البسيطة. عملنا الأوردر من عند الكاشير اللي داخل المحل، وفهمنا أن صاحب المحل هو نفسه اللي قاعد على الخزينة، كان مهذب جدًا وبدأ يشرح لنا حاجات في المنيو ما كناش فاهمين أسمائها، زي المعجوقة اللي طلعت عبارة عن لحم مفروم بالموتزاريلا بالخضروات، أكلة سورية صميمة على حسب وصفه. المهم طلبنا وجبة المعجوقة (35 جنيه) بعد ما قال لنا أنها هـ تعجبنا أكيد، وبما أن مظهره يوحي بالثقة فما كانش عندنا خيار ثاني، وطلبنا كمان طبق حلب جريل اللي هو ميكس جريل (35 جنيه) ومعاه طبق تبولة (16 جنيه) وكان لازم نجرب الشاورما السوري اللي هي في نظرنا عنوان أي مطعم سوري، وطلبنا شاورما دجاج (14 جنيه) في عيش سوري. قضينا وقت مش قليل في انتظار تحضير الأكل، وفجأة جاء لنا صاحب المطعم واعتذر لنا أن المعجوقة طلعت مش حلوة أو مش متماسكة زي ما كان هو حابب أنها تتقدم، وبـ يعرض أنه يبدلها لنا بأي وجبة ثانية، احترمنا صراحته ورغبته أننا ما نأخذش فكرة مش كويسة عن المطعم، وبدلنا الوجبة بطبق كباب أزمرلي (35 جنيه) من ترشيحاته، وهو أقرب للكفتة العادية لكن فيها حبيبات جبنة موتزاريلا برضه وخلطة شامية ما قدرناش يميز مكوناتها. نزل الأكل أمامنا مرة واحدة، التبولة أكثر من رائعة وكميتها كبيرة جدًا، المكس جريل معاه أرز بسمتي وبطاطس محمرة وثومية وخيار مخلل وعيش شامي مدهون بصلصة الطماطم على الطريقة الشامية، كمية الوجبة معقولة وطعم المشويات والأرز خطير، بالذات قطع الدجاج المشوية الصغيرة، يمكن الكفتة بس اللي كان فيها طعم زي البيض اللي واضح أنه داخل في مكوناتها بقوة. الكباب الأزمرلي اللي طلع كفتة في الآخر كان لذيذ بس مش زي المشويات الثانية، أو مش زي الشاورما اللي أكلناها في ساندويتش مع وجبتنا الكبيرة في "حلب جريل"، كانت معمولة بحرفنة والحشو كثير، يعني نقدر نقول أن المكان أخذ شهادة الاعتماد كمطعم سوري محترم من خلال الشاورما دي. هـ تلاقي في المنيو أصناف كثير منها ساندويتشات عادية زي البرجر والفاهيتا والشيش طاووق، وهـ تلاقي أكلات شامية صرف زي كفتة الخشخاش الكباب أورفللي وكباب الباذنجان والمحمرة بالجوز والزيت والكبة الطرابلسية والشقف. حبينا الأكل والقعدة البسيطة في «حلب جريل» وفي المرات الجاية حابين نجرب الأسماء الغريبة اللي في المنيو، ونضيف لرصيد معلوماتنا فيما يخص الأكلات السورية.

...

زيت وزعتر: مطعم سوري له مستقبل كبير في المعادي
اصدرت في: 09/01/2014

فتح من سنة تقريبًا في شارع مصر حلوان الزراعي قريب من أبراج عثمان اللي على كورنيش المعادي، مكان حيوي وأصبح وجهة ناس كثير بـ تدور على مطاعم وأماكن للخروج في المعادي والمناطق القريبة منها، كلمة "زعتر" في اسم المحل كانت كفاية أننا نعرف أن فيه أصول سورية للطعم، مطعم "زيت وزعتر" صغير الحجم كبير العطاء وغزير الإنتاج، سهل أنك تخمن أنه ناجح ومتميز بعد ما تقف أمامه 5 دقائق وتشوف إقبال الناس عليه. شكله ما يفرقش كثير عن أي مطعم شاورما سوري فتح مؤخرًا، تقريبًا مافيش في شكله أي حاجة مميزة، عربة الشاورما الكبيرة على أبواب المحل، وفرن كبير للمناقيش والبيتزا، وكام ترابيزة للجلوس على الرصيف المقابل للمحل، ولحسن الحظ الشارع واسع كفاية أن الناس تقف أمامه بالعربيات وتعمل الأوردر بتاعها. مطعم "زيت وزعتر" بـ يعمل بجانب الشاورما والفتة أطباق ووجبات متنوعة من التشيكن رول والمسحب والشيش والمشويات بأنواعها، وبـ يعمل كبسة وأرز بالجمبري وباستا وبيتزا إيطالي عادية، وبعض أنواع الشوربة والمقبلات الشامية. من الأكلات المشهورة هنا الحواوشي الإسكندراني بالخضروات (19 جنيه) اللي عليه إقبال غير عادي، تقريبًا الناس بـ تطلبه جنب أي أوردر تعمله كأنه مقبلات، نفس الكلام للمناقيش بالزعتر والحلوم والسبانخ (15 جنيه) بـ يعملوها حلوة قوي، وما يخفاش على حد أن الشيف هنا سوري طبعًا والمذاق لا غبار عليه. ولما عرفنا أن الشيف الثاني اللي بـ يعمل البيتزا كان من ضمن الشيفات اللي اشتغلوا في فندق الفور سيزونز، وبعد ما الجرسون اقترح علينا البيتزا كواحد من أفضل الأصناف اللي بـ يعملوها في المطعم، اختارنا وجبة متنوعة ومالهاش علاقة ببعض، عبارة عن وجبة دجاج مسحب مكونة من نصف دجاجة مشوية وأرز وبطاطس محمرة وثومية وعيش بوري (40 جنيه) وطلبنا بيتزا بشاورما اللحم "علشان نبقى جربنا الشاورما برضه" الحجم الكبير (40 جنيه) وجنب الأطباق الرئيسية جربنا التبولة (10 جنيه) اللي بدأنا بها وجبتنا وكانت ممتازة وكميتها وفيرة جدًا وتنفع وجبة لوحدها للنباتيين. المسحب تتبيلته خطيرة ولحم الدجاج نضر وشكله يفتح النفس، والبطاطس المحمرة هي الأفضل في أي محل أكلات سريعة زرناه من شهور. البيتزا المفروض أنها أكبر حجم ومع ذلك كانت صغيرة بطريقة ملفتة، حلوة جدًا ومخدومة بكمية كبيرة من الجبن والشاورما والخضروات، لكن حجمها الصغير كان مش مفهوم، ومش فاهمين الحجم الصغير والمتوسط ممكن يبقى قد إيه! لكن ده ما يمنعش أننا استمتعنا بوجبتنا في "زيت وزعتر" رغم قعدتنا في الشارع والخدمة الأقرب للمستوى الشعبي، لكن أدب العاملين ووجودة الخدمة خلونا سعيدين بالتجربة، وكان نفسنا نجرب منقوشة العسل باللبنة ونحلي بها بعد الأكل بس بجد شبعنا جدًا وما كانش فيه مكان.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن