تايلاندي مطاعم in Cairo, Egypt

مطاعم

تاى إيليفانت: مطعم تايلاندى غير مترابط فى فندق النيل بالزمالك
اصدرت في: 06/01/2015

عدد المطاعم الجديدة فى الزمالك بـ يزيد بمعدل منتظم؛ الفكرة هنا أن فيه مطاعم سهل تفوتك زى "تاى إيليفانت - Thai Elephant" –فى فندق النيل الزمالك– واللى يعتبر واحد من أقدم المطاعم الآسيوية فى المنطقة وأكله معقول مقارنة بأسعاره. ممكن توصل لتاى إيليفانت الموجود فى الدور الأول من داخل الفندق، أو من سلم خارجى. بعد ما وصلّونا لأماكننا، لاحظنا الطقطقة الموجودة فى الأرضيات الخشبية، الأثاث القديم والبار المترّب الموجود أمام تماثيل لأفيال ورسومات تايلاندية على الحوائط؛ الإهمال على مدار السنين كان واضح على المكان، المكان نفسه زى ما قلنا فى مقال سابق، بعيد تمامًا عن الشكل التايلاندى. بعد ما شوفنا المنيو الكبيرة، طلبنا من المقبلات شوربة Tom Yam Kung بـ (35 جنيه)، Chicken Green Curry Spring Rolls بـ (14 جنيه)، فرايد شريمب كيك بـ (32 جنيه)، وFried Sweet Corn Fritters بـ (12 جنيه). الأكل وصل بعد عشرين دقيقة، والبداية كانت مع الشوربة والمقبلات اللى وصلوا فى وقت معقول. الشوربة كانت ساخنة وفيها كمية معقولة من الجمبرى، ليمونية وخضروات؛ صحيح الطعم كان مشطشط بشكل لذيذ لكن نكهة الليمونية كانت طاغية شوية على طعم الشوربة. على الناحية الثانية، المينى سبرينج رولز كانت هائلة بقرمشتها اللذيذة، مكوناتها الطازجة ولمسة الكارى التايلاندى الأخضر. كيك الجمبرى تتكون من خمس قطع من الجمبرى المقلى بالزبدة مع البرقوق بنكهته الممتازة، صحيح إحنا استمتعنا بطعم الذرة المقلية المكونة من كرات مقلية من الذرة الحلوة، لكن مافيش أى نوع من الروح الآسيوية فى الموضوع. بالنسبة للأطباق الرئيسية، طلبنا كريسبى تشيكن بالصوص (30 جنيه)، فراخ بالكارى الأخضر مع حليب جوز الهند (36 جنيه)، لحم بالكارى الأحمر من غير حليب جوز الهند (35 جنيه) وطلب جانبى من الأرز المسلوق (7 جنيه). طبق الكريسبى تشيكن حجمه بالكاد يكفى أنه يكون ضمن المقبلات، مش طبق رئيسي؛ كميته كانت قليلة، وزى الذرة المقلية، كان ينقصه النكهة المميزة. من حسن حظنا أن الفراخ بالكارى الأخضر واللحم بالكارى الأحمر كانوا أحسن؛ الأطباق كانت ساخنة لدرجة أن رائحتها وصلتنا من بعيد، والأكل كان طرى وغرقان فى صوص الكارى السميك اللى أضاف كثير لطعم الأرز المسلوق. اختارنا من منيو الحلو المختصرة فرايد آيس كريم (20 جنيه). التركيبة البسيطة بين آيس كريم الفانيليا بالطبقة الخارجية المقلية المقرمشة كانت مغرية، رغم أنها كانت فى حاجة لإضافة صوص، يعنى صوص كراميل أو شوكولاتة كان هـ يبقى تمام. بعيدًا عن الشكل العتيق الساحر للمطعم غير المقصود، المكان محتاج شوية تجديدات؛ الميزة هنا أن الكلام ده مش مؤثر على النظافة. "تاى إيليفانت" يعتبر مكان بـ يقدم أكلات تايلاندية ممكن تكون مش مترابطة شوية، لكن المهم هنا أن الأسعار معقولة جدًا.

...

بوا خاو: مطعم تايلاندى متذبذب المستوى فى المعادى
اصدرت في: 01/10/2014

بعض المطاعم فى القاهرة بـ تنجح لمجرد تقديمها أكل كويس. انسى المكان بـ يطل على إيه، أو شكل الديكورات عامل إزاى. الموضوع كله عبارة عن أكل بجودة عالية. "بوا خاو -Bua Khao" واحد من المطاعم اللى بـ نتكلم عليها، لكن المطعم التايلاندى المحبوب فى الأيام الأخيرة مستوى أكله بـ يتغير. قررنا نشوف بنفسنا مستوى الأكل وصل فين، ومن هنا بدأت زيارتنا للمطعم الصغير فى شارع 151 المعادى. الديكورات العتيقة نوعاً ما محافظة على شكلها، ودرجات السلالم البسيطة بـ تنقلك للمطعم البسيط. طبعًا كلنا فاهمين أن باو خاو بـ يركز على الأكل، بعيدًا عن الشكل الجمالى، ومن هنا استقرينا على الترابيزة والجرسون بـ يعرض علينا المنيوهات. طلبنا شوربة Tom Ka Gaiبـ 32جنيه، وسبرينج رولز خضروات (20جنيه) من بين المقبلات. الشوربة المكونة من فراخ وبنجر وحليب جوز الهند، كانت دافئة وطعمها لذيذ مع طبقة كريمة خفيفة ناتجة من الحليب. السبرينج رولز للأسف مستواها أقل من زمان، بنكهتها العادمة شوية، والصوص المسكر عديم الطعم. بالنسبة للأطباق الرئيسية، جربنا كريسبى تشيكن بصوص الفلفل والثوم (48جنيه) من قسم فى المنيو اسمه "حاجة جديدة لازم تجربها". الأطباق الرئيسية على غير العادة بـ تنزل من غير أرز أو شعرية، فـ طلبنا Pad See-Ew Gai بـ 40جنيه، وهو عبارة عن أرز بالشعرية مقلى بالصويا صوص ومعاه فراخ وخضروات. الطبق الثانى كان بط بصوص الأناناس (75جنيه) ومعاه طلب جانبى من أرز بالياسمين (18جنيه). الكريسبى تشيكن يستحق لقب طبق اليوم. شطشطة معقولة، وقطع الفراخ مقلية وعليها طبقة حراقة مقرمشة قدرت تجمع بين القوام الطرى والقرمشة. الأرز بالرغم من طعمه اللذيذ، كان معجن شوية. الفراخ كانت قليلة جدًا، لكن مافيش مشكلة، مع طبق الكريسبى تشيكن، شبعنا واتبسطنا على الآخر. البط، وما أدراك ما البط، قصة ثانية خالص. البطة كانت عائمة وسط شوربة حريفة مع خضروات وأناناس، مليانة زيت، رائحتها سيئة وطعمها كأنها مش متنظفة كويس، لدرجة أننا طلبنا منهم يشيلوها من أمامنا. الأرز بالياسمين كان لطيف، لكن صعب أى حاجة تعوض تجربة البطة. بجد حاجة تزعل؛ بوا خاو له عندنا ذكريات وحنين لكن واضح أن جودة الأكل بـ تنهار يوم عن الثانى.

...

دراجون هاوس: أكل ثلاث بلاد في مطعم واحد في المعادي
اصدرت في: 04/09/2014

انتشرت في الفترة الأخيرة المطاعم الشرق أوسطية في القاهرة، واللي تختلف في تقديمها وفي أسعارها وجودة الأكل والمكان، لكن لما يكون فيه مكان بـ يجمع ما بين ثلاث بلاد قريبين من بعض في الثقافة والطعم مختلف حاجة بسيطة، يبقى لازم نجربه. "الصين وجمال الصين، تايلاند وحلاوة تايلاند، الهند وبهارات الهند، لسنا نعلم كيف تتجمع كل هذه البهارات ولا ينهار الناس ولا يحتارون". عزيزي الأكيل اللي مالوش في الأكل الحراق جدًا أو البهارات الكثير.. مكانك مش هنا يا كبير.. رحنا النهارده مطعم "دراجون هاوس – Dragon House" اللي بـ يجمع ما بين ثلاثة أنواع أكل.. الأكل الصيني والهندي والتايلاندي. والحقيقة أننا عملنا دماغ من توليفة تايلاندية هندية صينية. أول ما دخلنا المكان بـ تلاحظ الضوء الأحمر والديكور المتأثر بالثقافة الصينية والموسيقى الصينية 180% لدرجة أنك بـ تموت على نفسك من الضحك، وأنت بـ تتخيلهم "نياااو.. بو.. تش.. اااه" بـ ينطوا في الهواء بالحركات البهلوانية بتاعتهم، وناقص بس تلاقي أوشين جاية تأخد منك الطلب، بعد ما أوشين جات -نقصد الجرسون- واللي كان بـ يتأخر علينا في الطلبات شوية مش عارفين ليه.. طلبنا بعد حيرة طويلة كمقبلات سبرينج رولز بالدجاج (13.5 جنيه للقطعتين) وده من الأكل الصيني، وهو عبارة عن جلاش وجواه بصل وكرنب متبل مع الفراخ، الحقيقة أنه كان مقرمش جدًا ولذيذ. ولعشاق التجارب لازم تأكلوا Steamed Fried Dumpling بـ 15 جنيه للأربع قطع، ودي بقى يا سيدي الفاضل لها طريقتين طبخ، طريقة صينية وطريقة تايلاندية، وبما أننا تذوقنا قبل كده اللي بالطريقة الصينية، قمنا جربناها بالتايلاندية، ويا سعادة الأستاذ اللي مالوش في الأكل الصيني دي عبارة عن: عجينة زي القطايف بتاعتنا كده بس بدل ما بـ تتحمر بـ تستوي على البخار والحشوة طبعًا مختلفة تمامًا، وقُدمت في باسكيت خوص صيني، اللي استويت فيه على النار، علشان تحتفظ بحرارتها. بالنسبة لطعمها إحنا شخصيًا أكثر حاجة بـ نحبها العجينة اللزجة، اللي بـ تتزحلق في فمك أول ما تحطها فيه، بس الحشو كان كبير جدًا ومليان بصل زيادة عن اللزوم، كنا نُفضل لو يبقى أقل من كده علشان يتناسب مع حجم العجينة. المكان كمان بـ يقدم جزر وخيار مخلل مجانًا وشهادة الحق أننا حبيناه جدًا لاختلافه عن المخلل العادي بتاعنا باللسعان اللي فيه والحرقان الزيادة، وطبعًا اختلاف بهاراتهم عن بهاراتنا. بعد كده طلبنا نودلز بالفراخ والخضروات (29 جنيه)، كانت شهية جدًا وطازة وإن كان ناقصها الصوص بتاعها لأنهم جابوها بعد ما صفوه للأسف ودي طبعًا أكلة صيني معروفة. لكن جمال البهارات بقى اللي فرقعت في فمنا، وخلتنا في قمة السعادة كان فراخ بالكاري الأحمر والماسالا chicken madarass بـ 53.5 جنيه، واللي نقل حضارة الهند كلها من أول قضمة، تخيل معانا بقى التوابل الهندية بـ ترقص جوه فمك، وعيش لحظة الفرقعة، وده عبارة عن قطع فراخ في صوص أحمر وفيه توابل هندية كثير جدًا، منها الثوم والبصل والكاري والكمون وجوز الهند. وأول ما بـ تبدأ تأكلها بـ تيجي لك صدمة حضارية في البداية، لكن بعد ما بـ تضبط الملح بتاعك بـ تكتشف جمال وعذوبة التوابل وأنت بـ تتذوقها واحدة وراء الثانية، كمان الصوص كان كثير جدًا لدرجة أنك ممكن تشربه كأنه شوربة، ولولا كثرة التوابل اللي بـ تعطش قوي كنا عملنا كده. والطلب الثاني كان توفو دجاج حلو وحادق sweet and sour بـ 45.7 جنيه، وأرز بالخضروات (14 جنيه). توفو الفراخ اللي طبعًا صيني كان وهمي لأن طبقة التوفو المقرمشة اللي بـ تحمي توابل الدجاج خلته رائع ومقرمش من بره، وطري من جوه ومليان توابل. والأرز كان لذيذ ومش معجن. نيجي للحلو.. حد فيكم قبل كده جرب يأكل آيس كريم مقلي (22 جنيه)، إحنا جربناه، ولأننا مش من عشاق جوز الهند ما عجبناش قوي الصراحة، لأن الآيس كريم كان ملفوف بطبقة كبيرة جدًا من جوز الهند اللي خلى أول جزء منها بس اللي يتحمر وبـ تفضل طبقة ثانية مش متحمرة، وطبعًا ده نتيجة أنه ما ينفعش يسيبه كثير على النار، وكان معاه أناناس طازة وجميل. بس اللي أحلى منه بكثير الموز المقلي، اللي كان طازة جدًا وسخن قوي، مع آيس كريم فانيلا والعسل، إحنا الصراحة مش بـ نحب العسل بس العجينة اللي عملوا بها الموز مع العسل والآيس كريم كانت روعة.. مع أول قضمة تحس بسخونة وبرودة في نفس الوقت وتبقى مش عارف تعمل إيه في فمك غير أنك تصبر وتستمتع بالطعم الجميل. آخر حاجة شربناها كانت الشاي الصيني (15 جنيه)، واللي كان حجمه كبير جدًا وطعمه رائع مش زي أي شاي صيني بـ تطلبه جاهز، دي أعشاب طبيعية صينية صناعة عالمية، كمان المطعم عنده كورنر للأطفال لو عاوزين يلعبوا، وممكن تدخل تشوف المنيو من هنا وتطلب الأكل ييجي لك لحد البيت. تجربتنا في دراجون هاوس كانت مميزة وممتعة، مش بس علشان الأكل الجميل اللي من ثلاثة بلاد مختلفة، لأ أهم حاجة أنك تأكل مع ناس أنت بـ تحبها، وده اللي بـ يخلي المكان أحلى، لأنك بـ تغذي روحك بالحب ومعدتك بالأكل الحلو، وكلها أرزاق ربنا مقسمها.

...

لان تانيا: أكل تايلاندى أصلى فى فيرمونت تاورز هليوبوليس
اصدرت في: 12/06/2013

من بين مجموعة مطاعم القاهرة الأنيقة بـ يتضح يوم بعد يوم أنك صعب تلاقى أكل تايلاندى محترم. على العموم، لو القاهرة فيها مكان واحد مشهور بمطاعمه، أكيد هـ يبقى فيرمونت تاورز هليوبوليس، بـ يكمله فوود كورت صغيرة خاصة بالفندق على أعلى مستوى.الفندق واضح من على بعد، بواسطة إضاءة كثيرة معلقة على ارتفاعات مختلفة عند المدخل المكشوف، ومطعم "لان تانيا - Lan Tania" زى كثير من المطاعم بـ يمتد لغاية اللوبى، وضمانًا لخصوصية مستخدمى الترابيزات المصقولة، جانبي المكان محاطين بشجيرات عالية. تقدر تشوف أكلك وهو بـ يُحضر عن طريق الحوائط الزجاجية المطلة على المطبخ، بالإضافة للمشايات بلونها الأحمر الغامق فى ذهبي، والمفارش الجلد والورد اللى بـ يزين وسط الترابيزة كلها بـ تضيف شكل شيك وفى نفس الوقت غريب للترابيزة.جرسون مهذب قدم لنا فورًا المنيوهات المليئة بالأطباق التايلاندية الأصلية. ولشهرتهم بالأكل السبايسى، كل طبق مرسوم بجانبه رسم مختلف لقطعة فلفل بـ تشير كل منها لدرجة الشطشطة. البداية كانت مع طبق ساتاى مشكل Satay بسعر 85 جنيه ومعاها Ped Num Makham بسعر 160 جنيه –بطة بالبهارات– وطبق فراخ مقلية stir-fried chicken مع Gai Phad Med Mamuang بسعر 98 جنيه.منيو المشروبات شاملة تقريبًا كل حاجة: كوكتيلات، وأنواع من الصودا، الشاى والقهوة. الشاي الأخضر اللبناني المثلج (30 جنيه) كان اختيار جامد ومنعش بـ يترك طعم أقرب ما يكون للحلويات التركية. كمان كوكتيل فروتى فيرمونت (45 جنيه) كان لذيذ ومزيج رائع من الموز الطازج مع عصير أناناس مسكر، حليب جوز الهند وكمية بسيطة من الفانيليا.أول حاجة وصلت كانت قراقيش جمبرى مقرمشة لذيذة مع صوص شيلى تاى الدسم والشبيه بالمايونيز، وكمان اثنين كوكتيل جوز هند وأناناس للترحيب بنا كانوا تحفة وطعمهم لذيذ. طبق الساتاى المشكل كان ضخم، عبارة عن ستة أسياخ ضخمة من قطع الفراخ العصارية وقطع كبيرة من اللحم الطرى، وسط بهارات حريفة ومعاها صوص فول سودانى وسلاطة حلوة ولذيذة.بعدها، وصلت الأطباق الرئيسية واللى كانت برضه كمياتها كبيرة. الفراخ المقلية كانت عائمة وسط سويت شيلى صوص، مع خليط مناسب من نكهات الكاجو، البصل والطماطم، أما الأرز اللى مع الطبق فكان قوامه متماسك ومطبوخ كويس. القطع الكثيرة من البط فى الطبق الثانى كانت للأسف ناشفة جدًا، رغم أنها مُحضرة وسط كومة من الشعرية اللذيذة واللى كانت غرقانة وسط صوص التمر الغنى.نروح لمنيو الحلو، شدنا منها سبرينج رولز موز مقلية Deep fried Banana Spring rolls ودي سعرها 65 جنيه، بس ندمنا بعدها على الاختيار ده. العجينة المقرمشة كانت لسوء الحظ مالهاش طعم، ونفس الكلام بالنسبة للموز، حتى كمية العصير الموجودة ما قدرتش تنقذ الطبق. رحنا لحاجة ثانية وهى موس الفراولة المنفوش الغنى بالكريمة، وفروت سالاد طازج مع إضافة حلوة من آيس كريم فانيليا، كانوا المنقذ وقتها.يمكن الأكل مش مثالى، بس الأسعار المرتفعة يبررها تقديمهم لوجبات تايلاندية أصلية، ده غير أن تجربة الأكل نفسها بـ توفر جو من الرومانسية والأناقة، مع خدمة درجة أولى.

...

ساباى ساباى: مطعم تايلاندى حقيقى فى الزمالك
اصدرت في: 28/04/2013

أكيد صعب تلاقى أكل تايلاندى بجد وسط مطاعم القاهرة، و"ساباى ساباى - Sabai Sabai" بمكانه الجديد تحت مترو ماركت فى الزمالك أصبح محير شوية لكثير من سكان القاهرة. يفط كثير حول المبنى بـ ترشدك لمكان المطعم عند نافورة صغير بـ ترحب بك أمام أبواب المطعم. رغم أن افتتاحه كان فى آواخر 2012، لكن المطعم من كلام الناس أصبح من أشهر المطابخ التايلاندية فى القاهرة. سنة 2008 كان موجود فى مكان ثانى فى الزمالك -بس دلوقت فتح مكانه "تاى إيليفنت- Thai Elephant" وبعدها قفل الفرع ده وفتح فى أكثر من مكان فى المدينة. سحر المكان الصغير نابع من الديكورات المستوحاة من الروح التايلاندية باللون الأبيض، وده بـ يخليه مكان مناسب لكل الناس اللى تقدر توصل لمكان المطعم المستخبى. أول ما دخلنا قابلنا الجرسون اللى سلمنا منيو فيها اختيارات متنوعة من المقبلات، الأطباق الرئيسية والحلويات. أول طلب لنا كان Pia Pak (12جنيه) ودى عبارة عن سبرينج رولز خضروات مع شوربةKeaw Nam wanton (30 جنيه). السبرينج رولز كانت ملفوفة بإحكام، مقلية بشكل ممتاز وبـ يُقدم معاها تشيللى صوص للتغميس. الشوربة كانت خليط مميز من المكونات الطازجة زى عشب الليمون، وكزبرة ومشروم، كلهم وسط مرقة مع زلابية الجمبرى shrimp dumplings المغلفة فى لفافة wanton. رغم أن كان فيه فرق توقيت بين تقديم المقبلات والوجبة الرئيسية، لكن الجرسون انتبه لطلبنا، وبعد شوية وصلت أطباقنا الرئيسية ببخارها الكثيف. وبرغم إحباطنا من عدم وجود الفستق المطحون اللى دائمًا بـ يزين الطبق، لكن طعم الباد تاى (49 جنيه) بنكهة البندق أضافت لسعة لذيذة لصوص البرتقال الحلو والحادق. نزل مع الباد تاى كمية كبيرة من الفول النابت وجزر مقطع بمهارة على شكل وردة. طبق Hor Mok Talay (54 جنيه) برضه كان طازج، عبارة عن سلامون عائم على صوص كارى أحمر خفيف. مع أننا طلبنا الطبق عادى، لكن الصوص كان حراق. قدرنا نسامح الغلطة دى علشان تنوع النكهات الموجودة فى الطبق، والأرز بالياسمين قدر يقلل من الطعم المشطشط. بالنسبة للحلو، قررنا نستمتع بطبق Khao Niao Kaeo (30 جنيه)، أو أرز بالمانجو وBua Loi (22جنيه) أو كرات الأرز. عرفنا أن مافيش مانجو وبـ يقدموا مكانه شرائح طازجة من الموز. رغم أن مافيش حاجة تعدل طعم المانجو اللذيذ مع الأرز بس حسينا أن طعمه كان حلو رغم أنه كان جاف شوية. كرات الأرز العائمة وسط لبن بجوز الهند كانت تحفة. الطبق قُدم دافئ مع كرات أرز طرية عائمة فى لبن مسكر بجوز الهند. عرفنا أن "ساباى ساباى" جملة تايلاندية ترجمتها "مش عاوز حاجة من الدنيا"، وده تعبير عن الرضا والسعادة؛ جملة معناها قريب من إحساسنا بعد انتهائنا من الأكل. القعدة المريحة والمكونات الطازجة كلها عوامل أكيد ترجعنا هنا من جديد علشان نشبع رغباتنا من الأكل التايلاندى اللذيذ بأسعاره المعقولة فى قاهرة المعز.

...

تاى إيليفانت: أكل تايلاندى لطيف بأسعار لطيفة فى الزمالك
اصدرت في: 12/11/2012

دائمًا بـ تحصل لخبطة بين المطبخ الصينى والهندى داخل القاهرة. صعب تلاقى مطعم فى المدينة بـ يقدم الأكل الحقيقى الخاص بمدينة الابتسامات زى ما بـ يسموها أو بالإنجليزى land of smiles. «تاى إيليفانت – Thai Elephant» واحد من الأماكن دى، رغم أن ده مش بـ يخدم المكان بأى شكل.أغرب حاجة فى المطعم الموجود فى الزمالك أنه يشبه مطعم للأكلات الخفيفة أو بار، مش مكان بـ يقدم أكلات راقية وأطباق شهيرة. تكوين المكان من أرضيات خشب قديمة، وقعدات عادية متعبة، وأسقف عالية وأحيانًا أغانى فلامنكو طالعة من السماعات، كل ده بـ يعمل تركيبة غريبة شوية. فى آخر المكان فيه بار ممكن يبقى هائل مع شوية كوكتيلات مارجريتا بألوانها الزاهية مرصوصة عليه.رغم أن فيه مجموعة من فواتح الشهية المشوقة، بس الموجود منها كان قليل. طبق nue yang Ta khrai عبارة عن لحم مشوى متبل بعشب الليمون يعتبر فاتح شهية لطيف سعره 39 جنيه. قطع صغيرة من اللحم بـ تُقدم فى طبق مع شكل جمالى من الخضروات مع صوص غريب لونه بنى محطوط فى وعاء صغير. الصوص عبارة عن خليط مخفف من صوص الصويا، والخل والفلفل الأحمر، ويعتبر إضافة هائلة علشان تتبيلة الليمون كان صعب تميزها. اللحم نفسه كان مشكل، بعض القطع كانت مستوية زيادة، والقطع الأصغر والأرفع عليها طبقة ناشفة مقرمشة لذيذة.يعتبر دائمًا الباد تاى (29 جنيه) Pad Thai رهان مضمون وبعد تجربة الطبق الخاص بـ "تاى إيليفانت" تأكدنا فعلاً أنه واحد من الأماكن القليلة فى القاهرة اللى بـ تقدم توفو tofu جامد. التوفو المقطع كان كميته كبيرة فى الطبق مع الشعرية وقطع الخضروات المطبوخة كويس. رغم كده مش هـ تعرف تقدره بجد إلا لما تلاقى قطعة كبيرة.اختيارات الأرز فى تاى إيليفانت كثيرة. بـ 19 جنيه تقدر تستمتع بالأرز المقلى والبيض والخضروات اللى بـ ترسم شكل جميل لطبق khao pad pak make ومعاها تقدر تستمتع بالأطباق اللى فيها لحوم. طبق kang phed ped yang عبارة عن بطة محمرة بمرقة الكارى الأحمر وكريمة جوز الهند. المرقة نفسها طعمها حكاية؛ نكهة ممتازة مشطشطة وغنية بـ تضيف مذاق حلو على البط المخيب للآمال. رغم أن البط كان طعمه حلو ومطبوخ بامتياز كانت المشكلة أن فيه قطع كبيرة من الدهن فى كل قضمة. سعر الطبق ده 45 جنيه.اختيارات الحلويات برضه محدودة زى المقبلات. حاول الموظف أنه يعوض ضيقنا من أن مافيش الآيس كريم بالشاي الأخضر بأنه يرشح لنا آيس كريم جوز الهند (20 جنيه). كمية الحلويات كانت كبيرة وتستاهل ثمنها زى أغلب الأطباق الموجودة فى المنيو، وتعتبر أكثر من كافية لفردين. الآيس كريم كان خفيف، قوامه غنى ومليان جوز الهند، إلا أن كل فترة كنا بـ نلاقي بذر ما يتاكلش، بس دي كانت مشكلة طفيفة لحلويات ممكن نعتبرها ختام ممتاز بعد أكلة حراقة. حاجات قليلة فى تاى إيليفانت ممكن ننقدها. ما تحسش ببريق خاص بالمكان أو جو حماسى، بس مش فارقة قوى؛ مع الأسعار الممتازة، وخدمة التوصيل، تقدر تقول أن ده كل اللى أنت هـ تحتاجه من مطعم.

...

لازياتيك: لم الشمل مع أصحابك على أكلة سوشى فى الزمالك
اصدرت في: 10/10/2012

الغريب فى «لازياتيك – L’Asiatique» الموجود على مركب الباشا فى الزمالك أنه ما بـ يقدمش أى إضافة فريدة على ساحة المطبخ الآسيوى، ورغم كده هو عنده قدرة غريبة على جذب الناس. ممكن تحس أن ده كلام مكرر بس هى دى الحقيقة. بصفته واحد من أقدم المطاعم اللى بـ تقدم أكلات أسيوية فى القاهرة، مش بس الأكل اللى بـ يخلى الناس تيجى ثانى على مدار السنين، ده كمان سحر المكان التلقائي اللى بـ يخلى العشاء وسط المجموعة له طعم ثانى.مكانه فى الدور الأرضى من المركب أمام "بيكولو موندو"، لازياتيك مكان لطيف معظم ديكوره من الخشب، وبـ يزينه علامات لونها بنفسجى وأحمر غامقين. الإضاءة باهتة شوية وفيه إحساس بالهدوء والسكينة؛ معظم الترابيزات معدة لاستقبال مجموعة من أربعة أفراد أو أكثر، وكمان ممكن يضبطوا ترابيزات أصغر أو تختار أنك تقعد على البار.علشان إحنا كنا مجموعة أكبر، قعدونا على ترابيزة مبنية مباشرة على الأرض، بحيث تبقى قاعد فى مستوى الأرض. ورغم أن الفكرة هائلة بس أكيد هى مش أكثر طريقة مناسبة للخدمة المصرية –لما الجرسونات بـ ينزلوا علشان يقدموا الطلبات، بـ يبقوا مائلين قوى على مكان قعدتنا– أو للناس اللى ما عندهمش مهارة. بس مافيش كلام أن الابتكار ده ممكن يبقى ممتع.اختيارات السوشى عندهم كثيرة، طبق فيه 12 أو 24 قطعة سعره بين 100: 200 جنيه، ورغم أن السمك طازج والمكونات هائلة، لازياتيك وقع فى غلطة هى التقطيع لقطع كبيرة قوى.طبق الشريمب بونبون shrimp bonbon (52.90 جنيه) مقطع على شكل الطوفى، ومعجنات فيلو filo pastry ملفوفة على الجمبرى، ومربوطة بشريط من الطحالب البحرية وبـ تُقدم مع صوص حلو ولاذع. المعجنات كانت ناشفة، والجمبرى طرى والصوص مضبوط. طبق التونة تيمبورا tuna temura (63.90 جنيه) كان غالبًا هو أبرز حاجة فى الوجبة. قطع من التونة مع سطح خارجى خفيف مقرمش حافظ على طراوتها وبـ يُقدم مع صوص ليمون تحفة.باد تاى سبرينج رولز Pad Thai spring rolls(43.90 جنيه) بـ تيجى بكمية أكبر من المعتاد، ومغطاه بخليط من الصلصة الحلوة. الطبق مليان بالباد تاى، وإحساسك به محتاج وقت بسبب الطعم المسكر. بس مع القرمشة اللطيفة على الرول والحشو اللذيذ، سهل قوى يبقى من أطباقك المفضلة.الشعرية بالبيض مع الخضروات (24.90 جنيه) بـ تيجى بكمية مناسبة للمشاركة مع حد ثانى، ونكهتها مميزة ومتناسقة بحيث لا طعم الشعرية ولا طعم البيض يطغوا على بعض. البيف تيرياكى (72.90 جنيه) بـ يُقدم على شكل شرائح، وكان شبه التونة تيمبورا، كان محروق شوية بس طري، وكمله صوص التيرياكى بطعمه المسكر المميز.فيه كمان أطباق ثانية تستحق التجربة منها زلابية بالجمبرى shrimp dumplings (58.90 جنيه)، مكعبات باذنجان كمقبلات وسلاطة التاتاكى، ودى عبارة عن سلامون ساشيمى وأفوكادو مع صوص صويا خفيف.أخيرًا بس أكيد مش أقلهم، هى الحلويات. أحسن حاجة فى مركب الباشا دلوقت أنك تقدر تطلب من نفس منيو الحلويات بغض النظر عن المطعم. مون بلان Mont Blanc (27.90 جنيه) –عبارة عن قطعتين من المارينج محشية بكريمة مخفوقة وصوص أبو فروة– مش مناسب للى عندهم مشاكل فى القلب. مع طعم الجوز والكريمة مع شوية مضغ بـ يحصل بسبب المارينج، أكيد أملك مش هـ يخيب.تارت التمر (25.90 جنيه) بـ ييجى مع قطع تمر محطوطة على معجنات بيتى، سخنة ولسه طالعة من الفرن، مع بولة أيس كريم فانيليا محطوطة فوقها فعلاً طعمها خرافى. الدارك شوكليت براونى (24.90 جنيه) كانت برضه شهية، مقرمشة شوية من بره لحد ما توصل لقوام الشوكولاتة الناعم. النكهة الغنية التقليدية ماشية مع برودة آيس كريم الفانيليا وطعمها لا يقاوم.المرة الجاية لما يبقى عندك عشاء مع أسرتك، عيد ميلاد أو حتى قعدة شغل، «لازياتيك» دائمًا هـ يفضل اختيار كويس.

...

زو: مطبخ صيني وتايلاندي في مطعم أنيق في التجمع الخامس
اصدرت في: 13/09/2012

انتشرت مطاعم الأكلات الآسيوية بشكل ملحوظ في القاهرة في السنين الأخيرة، خاصة في ساحات الطعام والمراكز التجارية، وبقى ممكن تجيب وجبة كاملة من المطبخ الصيني أو الهندي بـ 30 أو 40 جنيه وتأكلها وأنت بـ تتمشى في جولة تسوق. لكن فيه فرق بين مطاعم التيك آواي الموجودة في أي فوود كورت وبين المطاعم اللي فيها أماكن جلوس وبـ تقدم الجو الآسيوي قبل ما بـ تقدم مذاقه، والأماكن دي بـ تبقى مناسبة جدًا لقعدة رومانسية أو عشاء عمل أو لخروجة عائلية هادئة، وده كان الوضع في مطعم «زو - Zo» الموجود في مول داون تاون في شارع التسعين في بداية التجمع الخامس. المطعم في الدور الأرضي وهو تابع لمجموعة مطاعم «مكاني» و«الست حسنية» و«برجر جوينت» ودائمًا هـ تلاقيهم جنب بعض في أي مول أو ساحة طعام. وكل مطعم منهم متخصص في أكلات معينة. دخلنا «زو» اللي مساحته صغيرة بالمقارنة بباقي المطاعم اللي حوله. إضاءة خافتة جدًا وديكور أنيق مش غالب عليه الطابع الآسيوي، إنما «زو» معوض ده في الأواني المستخدمة لتقديم الأكل اللي شكلها عجبنا جدًا، وخاصة لو فيه شوربة أو مرقة في الأطباق الرئيسية هـ تلاقي أطباق لها أغطية مصنوعة من الصيني والفخار شكلها مميز ويفتح النفس. موسيقى بوب عادية شغالة في المكان، وبما أننا كنا الزبائن الوحيدين وقت زيارتنا للمكان اختارنا المكان اللي يناسبنا والخدمة كانت سريعة ومركزة وبسرعة كانت بـ تتحقق لنا كل طلباتنا. المنيو فيه أكلات من الصين وتايلاند، أصنافه محددة ومش كثير، البيف والدجاج والأسماك، كل نوع لحوم فيه طبقين أو ثلاثة مش أكثر، وفيه أرز بالبخار وبالخضروات ونودلز بإضافات اللحوم والخضروات، وبعض أطباق المشهيات والسلاطات والشوربات اللي أغلبها تايلاندية، وفيه نوعين بس حلويات هم الموز المقلي والبطاطس الحلوة، والمشروبات غازية فقط.كان لازم نعمل مائدة عشاء فيها مزيج من الأكل الصيني والتايلاندي، فبدأنا بطبق مشهيات من الجمبري المقلي بالطريقة التايلاندية (33.5 جنيه) وهو أقرب لسبرنج رولز عادية ومحشوة بوحدات الجمبري الكاملة وبـ يُقدم مع صوص الصويا الحلو، مقرمش ولذيذ بس 4 وحدات بس في الطبق تأكلهم في ثانيتين! بصراحة حاجة مستفزة. من الأطباق الرئيسية جربنا طبق الدجاج بالصوص الحلو والفلفل الملون والبصل (48 جنيه) وكان طعم الدجاج والخضروات نفسها لذيذ وفيه قرمشة ظريفة، لكن الصوص المسكر كان كاتشب ومش أي حاجة ثانية! ما حسيناش بمذاق الصوص الصيني المميز، وعلشان كده كنا بـ نتفادى الصوص وإحنا بـ نلقط قطع الدجاج والفلفل. طبق تايلاندي من اللحم المغمور في صوص الكاري اسمه Beef Massaman وسعره 60 جنيه، صوص الماسامان فيه كاري ولبن جوز الهند ونبات الهال والقرفة، طعم الصوص مش مسكر ولا مملح لكن فيه نكهة جميلة ومذاق فريد هـ تخليك تشربه كله بالملعقة، قطع اللحم كانت مش مستوية كويس وكان حجمها كبير وطبعًا صعب تقطعها داخل الطبق المليان بالمرقة. علشان كده طلبنا أرز بالخضروات (16 جنيه) علشان نقطع عليه قطع اللحم ونأكل وجبة تايلاندية صميمة. ختمنا الوجبة بطبق الموز المقلي (28 جنيه) اللي فيه وحدتين موز مقلي في شربات العسل وبولتين آيس كريم فانيليا. اخلط الموز الساخن مع الآيس كريم المثلج واستمتع بإحساس "التششش" أمام عينيك وداخل فمك. بصراحة كانت تحلية غريبة بس خطيرة.زي ما ذكرنا الخدمة جيدة جدًا، وممكن تسأل عن مكونات أي طبق ومقترحات الجرسون بخصوص أفضل الوجبات والأطباق المميزة بالمحل. المكان راقي ومريح للأعصاب، وفيه حمام قريب داخل مطعم «الست حسنية» المجاور. عجبنا «زو» بس كنا متوقعين أفضل من كده في المذاق مش بس في الأناقة وشكل الأواني الفريد، جايز المرة الجاية يبقى أحسن.

...

بوا خاو: أكل تايلاندي لذيذ وبأسعار معقولة في المعادي
اصدرت في: 09/04/2012

كل يوم مطاعم جديدة بـ تفتح في القاهرة وكل منها بـ يوعدنا بتجربة فريدة ومطبخ أصلي لأكلات من كل الدنيا. لكن للأسف كثير من الأماكن دي مش بـ يعرف يسيب علامة مميزة نفتكره بها. لكن مطعم «بوا خاو» قدر يخلينا فاكرين كل تفاصيله وبقوة. المطعم موجود قريب من ميدان الحرية في المعادي، مطبخ تايلاندي أصيل معروف لكل سكان المعادي ومن دواعي فخرهم كمان. في نفس المبنى اللي فيه «سيلر دوور»، «بوا خاو» مكان شكله متواضع لكن له شعبية كبيرة. هـ تطلع السلم علشان توصل له. الديكور من الداخل مش مبهر خالص بالعكس شكله متهالك حبتين، لكن بعض اللمسات البسيطة في الديكور كانت ساحرة وبـ تضيف كثير للتجربة ككل. بعد ما اختارنا مكان نقعد فيه في نهاية المطعم جاء لنا المنيو واختارنا منه بسرعة المقبلات والشوربة وأطباق الكاري والنودلز. وعلشان كنا جعانين قوي اختارنا مبدئيًا سبرنج رولز بالخضروات (10 جنيه) وسلاطة البابايا (30 جنيه)، والدجاج بالكاري الأخضر لبن جوز الهند (25 جنيه) وباد تاي بالجمبري Pad Thai (35 جنيه) كأطباق رئيسية. وقبل الأكل روينا عطشنا بشاي تايلاندي مثلج (15 جنيه) وماء جوز الهند (17 جنيه). كان شكل الشاي باللبن العادي اللي بـ نشربه لكن مضاف عليه ثلج، وما كانش اختيار مثالي لحاجة نشربها قبل الوجبة بسبب سكره الزيادة لكن كان قوامه معقول. ماء جوز الهند كان هائل وخفيف لكن مسكر قوي برضه بس مش بشكل متعارض مع الوجبة بعد كده. على رأس المطبخ شيف تايلاندي بقاله سنين في المكان، والمكونات والخامات كلها مستوردة وجودتها ممتازة. 3 وحدات من السبرنج رولز بـ تُقدم مع صوص حلو، مقرمشة من الخارج وطري من الداخل، وخلصناها بسرعة جدًا. سلاطة البابايا (ثمرة البابايا وشرائح طماطم وفاصوليا خضراء مكسرات) كانت حارة قوي رغم أننا ما طلبناهاش كده لكن الحقيقة كانت لذيذة جدًا وخلصناها برضه. أخذنا وقتنا وزيادة في مزمزة أطباق المقبلات، وبعده الجرسون نزل أمامنا الأطباق الرئيسية. نودلز الباد تاي والجمبري كانت مستوية كويس وتم تقديمها بشكل شيك يفتح النفس. النودلز كانت ملزقة في بعضها شوية مش مفلفلة، لكن ده ما منعناش من أننا ننسف الطبق. صوص الكاري رائع كالعادة، بـ يُقدم في طبق صيني صغير بملعقة بنفس الشكل. الطعم كريمي لكن في نفس الوقت مش دسم وثقيل، والمزج بين الكاري وجوز الهند والتوابل كان مثالي، وقطع الدجاج مستوية قوي وممكن تقطعها بمجرد ما تلمسها بعصيان الأكل الآسيوية الشهيرة. ورغم أن المطبخ كان بـ يقفل تقريبًا، إلا أن الشيف تواجد مخصوص علشان يعمل لنا طبق الحلوى اللي طلبناه. وطلبنا كان من صميم المطبخ الجنوب شرق آسيوي؛ وهو الموز المقلي بالآيس كريم (25 جنيه). الموز كان خرافي وهو سخن والآيس كريم المثلج نازل عليه، ومرشوش عليه قرفة وكالعادة خلصناه في ثواني. «بوا خاو» شكله مش أكثر مكان ممكن تحب منظره أو ديكوره، لكن الخدمة الجيدة وجو الاسترخاء عوامل ثانية مهمة. ده غير جودة الأكل اللي تعتبر هنا من كام مكان يتعدوا على أصابع اليد المتخصصين في المطبخ ده وبأسعار أقل بكثير علشان كده بـ نعتبره من أحسن المطاعم في كايرو.

...

خمسة وخميسة: مطعم جديد بـ يقدم خمسة مطابخ في المهندسين
اصدرت في: 29/03/2012

في محاولة علشان حد يكسب في المنافسة المتزايدة، الصراحة مفاهيم وأفكار المطاعم في القاهرة بقت نمطية جدًا وفيه منها بـ يبقى مثير وجديد ومنها اللى بـ يبقى سخيف جدًا. وفيه خط رفيع بـ يفصل ما بين الاثنين، المطعم الجديد في المهندسين «خمسة وخميسة» ماشي جنب الحائط. موجود أمام ميدان لبنان، بـ يطلق على نفسه "عالمي" بـ يقدم خمسة أنواع مطابخ: المقبلات، السلاطات، الأطباق الرئيسية، الحلويات والمشروبات من فرنسا، وإيطاليا، وتايلاند، ومصر والمغرب. المكان من الداخل عبارة عن خليط ألوان من الموف والبمبى على الحائط، وصورة كبيرة بـ تعبر عن كل مطبخ، شكله نادي ليلي أكثر من مطعم، بعد ما طلبنا الأكل من الجرسون اللي كان متلهف أنه يعرف الطلب بتاعنا، جاء لنا عيش رفيع مقرمش ومعاه خمسة أطباق للتغميس، كل طبق بـ ييجي من مطبخ مختلف، الطبق اللي بـ يمثل مصر كان غريب من الجزر والعسل وطعم النكهتين مع بعض كان صعب تميزهم. بابا غنوج المغربي والفلفل كان ناقصهم طعم حاد أو واضح وما كانش مميز. أما الثلاثة الآخرين كانوا أحسن. البصل الفرنسي والمايونيز كان كريمي وطعمه واضح وغمس التفاح والجنزبيل التايلاندي كان طازج ومميز، أما الاختيار الإيطالي كان غمس السبانخ، الخرشوف والريحان كان سميك وطازج وكل مكون كان طعمه واضح. كل ده جهزنا كويس للمقبلات: شوربة البصل الفرنسي بـ 19 جنيه ورول الجمبري التايلاندي بـ 55 جنيه. رغم أن الشوربة نفسها كانت رائعة، لكن العيش اللى على الوجه مع الجبنة عمل شوية مشاكل، كان صعب قوي أننا نكسره بملعقة الشوربة وفضل ينزل في قاع الطبق لغاية ما بقى بايش. أما القرمشة اللي في ملفوف الجمبري كانت حلوة، والجمبري كان مستوي كويس. وكويس جدًا أنهم جابوا تشيلي صوص مع الطبق لأن الجمبري كان من غير أي بهارات ومن غير طعم. لأن ملفوف الجمبري شجعنا فـ طلبنا الطبق الرئيسي من مطبخ التايلاندي كان فراخ كاري بجوز الهند بـ 52 جنيه. والأرز بالياسمين المطبوخ على البخار بـ 12 جنيه، الفراخ كانت مستوية قوي والصوص كان خفيف جدًا أكثر من الطبيعي. بس رغم ده الطبق كان طعمه حلو جدًا وفيه نكهة رائعة وأكلناه بسرعة. أما من القسم الإيطالي حجم طبق لحم سكالوبينا بـ 79 جنية كان عملاق. ثلاثة قطع كبيرة من لحم سكالوب المقلي جاء على الترابيزة ومعاه بطاطس ويدجز، اللحمة نفسها كانت طرية وكان مقرمش وده أحسن خليط. اللحم والويدجز كانوا محتاجين للتتبيلة والفلفل والملح. في العموم الطبق كان ناشف وده مش حاجة حلوة مع حجم الطبق الكبير. مافيش أنواع حلويات كثير في كل مطبخ فيه نوع واحد فقط، اختارنا الشوكولت فوندو من المطبخ الفرنسي بـ 32 جنيه، جاء معاه بولة آيس كريم، والشوكولت فوندو جاء لنا دافئ وطالع منه شوكولاتة دافئة. فكرة المطعم نفسها مشكلة شوية لأن إحنا شايفين أن "خمسة وخميسة" بـ يقدم مطابخ كثير لكن مش كويس في ولا واحد فيهم.

...

شاهد المزيد
مواضيع خاصة

النهارده في القاهرة: سهرة ميكس مع كل ألوان الفن

رغم البرد اللي مخلي كل الناس عايزة تفضل متدفية في السرير، بس برضه أجندتنا مابتخلاش من الحفلات اللي هتخليك تصحصح وتفرفش، علشان تخرج تقضي ليلة سعيدة بعد الشغل. تعالوا