بيتزا مطاعم in Cairo, Egypt

مطاعم

كيه لاونج: فطار متأخر وملخبط فى ويست تاون هب الشيخ زايد
اصدرت في: 16/07/2015

من ساعة ما رحنا أول فروعه فى القاهرة الجديدة والافتتاح كمان وإحنا موهومين بـ "كيه لاونج – K. Lounge".. وعلشان اللى مش عارفينه كيه لاونج مطعم وكافيه امتداد لمحلات عبد الرحيم قويدر الشهيرة وأحد أهم محلات الحلويات في مصر، اختار حرف الـ K اللي بـ يعبر عن قويدر للاسم، وله فرع كمان فى داون تاون مول. فرع ثاني فى موقع متميز رحناه فى رمضان فى ويست تاون هب فى الشيخ زايد، قريب من كمبوند بيفرلى هيلز، المكان شيك جدًا ومبهج، ولأن تجربتنا الأولى كانت رائعة رحناه مرة تانية، لكن للأسف المرة الثانية كان فيها مشاكل! فى رمضان مافيش منيو مخصوصة لكن ممكن تطلب مشروبات رمضانية زي قمر الدين (18 جنيه)، المنيو متنوعة وأصنافها مغرية، وبما أننا مجربين كيه لاونج قبل كده كنا واثقين من نتيجة الطعم، اختارنا من قسم الشوربات شوربة تشيكن كورن (30 جنيه)، ومن السلاطات سلاطة حلومى بالفلفل والخضار المشوي (45 جنيه)، ومن الأطباق الرئيسية فراخ محشية جبنة موتزاريلا وعليها صلصة من فوق اسمها Chicken Ccciatore بـ (64 جنيه) وبيف ميداليون (115 جنيه) بصوص الفلفل، ودى الأصناف اللى طلبناها فى زيارتنا الأولى. قبل الفطار بـ ينزل على الترابيزة سبت عيش معاه صوص وزجاجة مياه، قبل الآذان بالضبط نزلت المشروبات والشوربة، الفكرة زي ما قلنا أننا زورنا المكان مرتين، المرة الأولى أكلنا جاء لنا فى وقت مناسب لكن ناس على ترابيزة ثانية اتخانقوا مع طاقم الجرسونات لأن أكلهم اتأخر أكثر من ساعة بعد الآذان (رغم أنهم جايين قبلنا)، فى زياراتنا الثانية بقى كنا إحنا الضحية! الأكل اتأخر علينا جدًا على الرغم أننا طالبينه قبلها بوقت كافى، اتأخر حوالى ساعة لدرجة أننا شبعنا من الجوع، وبعدها جابوا لنا أصناف غير اللى طلبناها، أو نيسوا يبدلوا الأصناف الجانبية زي ما طلبناها، شوية تأخير على شوية لخبطة ضايقتنا منهم، وكمان كل ما نشتكي أن الأكل اتأخر ما حدش بـ يرجع يرد علينا أو يهتم بنا. بالنسبة للأكل مافيهوش غلطة، شوربة الكورن بالفراخ كانت كريمية ورائعة، قطع الفراخ طرية وملح الشوربة ممتاز ومضبوط، بداية رائعة، العيش كان رائع وطازج وهش برضه، سلاطة الحلومى بالخضار المشوي رائعة، قطع الجبن رقيقة ومشوية مع تتبيلة مضبوطة والخضار فريش. الفراخ المحشية جبنة موتزاريلا كمان كانت مثالية، كانت فى رأينا أفضل كثير من البيف ميداليون، اللى كان الصوص بتاعها أثقل لكن برضه طعمها كويس، بعد الأكل كان فيه أصناف حلو كثيرة فى المنيو لكن للأسف اللى كان متاح منها مش كثير، وده غريب على مكان متخصص فى المقام الأول فى الحلويات، طلبنا المتاح وقتها كنافة نابلسية (23 جنيه) ودى بـ تكون محشية جبنة سخنة وسايحة ومرشوش عليها عسل من فوق، قوام الكنافة كان مش متماسك لكن ناعم والجبنة كانت مش سايحة أوى بس طعمها كويس. كيه لاونج مشكلته الأساسية فى التأخير، لكن لو جئنا لجزء الأكل مافيش كلام، جربنا من عندهم كمان السلامون ستيك بمكعبات الباذنجان وفيليه السمك بصوص الليمون وكانوا أكثر من رائعين، مش عارفين المشكلة دي مرتبطة برمضان ولا بالفرع ده بس.. بس نتمنى أنهم يحلوها فى أسرع وقت ممكن.

...

ميزون توماس: فرع المعادي لسلسلة مطاعم البيتزا المعروفة ناقصه كثير
اصدرت في: 25/05/2015

فكرة البيتزا الأصلية الحقيقية ظهرت على ساحة مطاعم القاهرة مؤخرًا، كان صعب على الناس تفهم إزاي البيتزا تكون رفيعة ومعتمدة على الصلصة مش الجبنة، وده لأن الشكل المحلي للبيتزا كان طاغي بشكل رهيب. قبل ما يظهر منافسين جدد على الساحة البيتزاوية، كان فيه مكان معروف بـ يقدم البيتزا اللي بحق وحقيق، وهو "ميزون توماس - Maison Thomas". صحيح مافيش حد ينكر أن أيام مجد ميزون توماس راحت، لكن السؤال المهم هو: إيه السبب؟ طيب، ممكن نبدأ الموضوع بأنهم ما عرفوش يجددوا من نفسهم، يعني مثلًا السلسلة الشهيرة مالهاش أي دعاية على مواقع التواصل الاجتماعي أو أي محاولة للوصول للأجيال الجديدة من الزبائن، طبعًا كل الكلام ده بعد جودة الأكل والأسعار الغالية. بدل الكلام الكثير، قررنا نروح فرع المعادي بنفسنا ونشوف الموضوع على حقيقته، في الدور الثاني جنب مترو ماركت، هـ تشوف ديكوراتهم بنفس درجات الأسود والسمني، تحس أن الديكورات بـ تجمع بين شكل كافيه لطيف وبار متواضع. عرفنا كمان من وقت قريب أن توماس بـ يقدم حاجات غير البيتزا، من هنا وبعد ما اتفرجنا على المنيو، طلبنا تشيز برجر (45 جنيه)، طبق ميلانيزا (69 جنيه) وبيتزا بولونيز (79 جنيه). صحيح وقت التحضير كان سريع، بس معاملة الجرسونات كانت سيئة، التشيز برجر المكون من 150 جرام من اللحم المفروم وعليه جبنة جودة دايبة كان معقول، لكن مش مبهر بأي حال من الأحوال. أما الميلانيزا وهو عبارة عن سكالوب لحم مقلي معاه بطاطس محمرة كان متوسط، صحيح طعم اللحم كان كويس، بس القشرة المحمرة كانت غرقانة زيت وقللت من طعم الأكل، نفس الكلام كان مع البطاطس المليانة زيت. أحسن حاجة كانت البيتزا بولونيز، صحيح كان عليها كمية مناسبة من الموتزاريلا والريحان والطماطم، مع طبقة لحم مفروم لذيذة تحتهم، بس مشكلتها كانت في نقص كمية صلصة الطماطم. واضح أن مشكلة ميزون توماس هي الغلطات البسيطة اللي بـ تقلل من جمال أطباقهم اللذيذة، في حالة الطبق الرئيسي، المشكلة كانت في التحمير، أما البيتزا فنرجوك فهمنا، إزاي الصلصة تكون قليلة؟! دي أهم حاجة يا ناااس.

...

لا بيتزا ألا فورنو: اختفاء طعم وجودة الأكل الإيطالي في سيتي ستارز مدينة نصر
اصدرت في: 29/03/2015

المطابخ الإيطالية كثرت قوي الفترة اللي فاتت، منها اللي نجح أنه يوصل الطعم الإيطالي الممتع ومنها اللي فشل في ده، بس "لا بيتزا ألا فورنو – La Pizza Alaforno" اللي كنا رحناها قبل كده في 2013، وكان مستواها جيد، صدمتنا بأنها فقدت المستوى اللي عودتنا عليه، برغم روح المكان اللي يحسسك أنك في إيطاليا والخدمة الجيدة إلا أن جودة الأكل ما كانتش كويسة إطلاقًا. أول حاجة طلبناها كمقبلات كانت Mussels Trio بـ 55 جنيه، وده عبارة عن بلح البحر مع صوص أحمر بالطماطم وبودرة الثوم وكان طعمه وهمي، صحيح كان دسم شوية بس فعلًا لو كنا نقدر نفضل نأكل فيه إلى ما لا نهاية كنا عملنا كده. المنيو مافيهوش اختيارات كثيرة للمكرونة بعكس البيتزا، واختيار واحد بس للرافيولي واللي هو Four cheese ولأننا مش بـ نحب الـ Blue cheese، طلبنا مكرونة Shrimp Fettuccini بـ 62 جنيه، والصوص كان قوامه خفيف لدرجة أنك تشعر أنك بـ تسبح مع الصوص، وكان فيه بعضها مش مستوى كويس، بس ما علينا مش مشكلة يمكن البيتزا تعوض، طلبنا بيتزا ماما ميا بـ 55 جنيه، كانت بالبيبروني المفروض، بس هو كان مستخبي جوه البيتزا في مكان ما، غير أن البيتزا كانت مفتقدة لكمية الموتزاريلا ومليانة جبنة شيدر اللي أفسدت طعمها للأسف. أما الصدمة الكبيرة بالنسبة لنا كانت في الـ Crème Brule بـ 26 جنيه، جمال طعمها كله يكمن في الوش اللي بـ يبقى مليان سكر ولازم يتحرق بدرجة حرارة معينة علشان لما تأخد أول معلقة تسمع صوت تكسير طبقة السكر اللي بـ يبقى لونها بني وجميل، واللي من غيره الطبق كله مالوش أي طعم، وللأسف لما جاء لنا الطبق كان شبه فيه دائرة صغيرة هي اللي مستوية والباقي لونه أصفر، ودي مش بس كانت خيبة أمل بالنسبة لنا، دي كانت قلة مزاج، كأنك عندك حاجة حلوة جدًا، وطعمها حلو، ودمرتها بتفصيلة صغيرة بس هي العامل الأساسي في الطبق. مع الأكل الدسم ده كنا لازم نشرب عصائر طبيعية، طلبنا عصير ليمون بالنعناع بـ 16 جنيه، وعصير برتقال بنفس الثمن، وكانوا كويسين وإن كان نفسنا فيهم سموزي وإن كان الجرسون قال لنا أنه مش متوفر. تجربة الأكل في لا بيتزا ألا فورنو ما كانتش أحسن تجاربنا، نتمنى أنهم يحسنوا الأخطاء دي، لأنهم عندهم كل الأدوات اللي تساعدهم، محتاجين بس إشراف، وحد يهتم بالتفاصيل الصغيرة في الطعم والشكل.

...

بيتزا لا بومبا: تحسن مستوى مطعم توصيل الطلبات فقط في القاهرة
اصدرت في: 26/03/2015

نعتقد أنه من الصعب جدًا تلاقي مطاعم وكافيهات في القاهرة بـ تحافظ على مستواها اللي بدأت به؛ أما بقى اللي شبه مستحيل أنك تلاقيه، هو مطعم بـ يحسن من مستواه. من ضمن المطاعم اللي حققت شبه المستحيل هو بيتزا لا بومبا، واللي بـ يقدم خدمة التوصيل للمنزل فقط لمنطقة المهندسين والزمالك. آخر مرة كتبنا مقال نقدي عن لا بومبا كان الموضوع شبه مأسوي، لاحظنا أن تقريبًا كل اللي جربناه كان عليه طبقة دهنية فصلتنا من طعم كل حاجة. الحقيقة أننا المرة دي ما تخيلناش أن الموضوع هـ يفرق كثير، بس قلنا نشوف يمكن يكون الموضوع تحسن؛ فطلبنا بيتزا مشروم (38.50 جنيه)، كالزوني (35 جنيه) وبرجر بيتزا ساندويتش (24 جنيه) وأخيرًا نوتيلا بيتزا ساندويتش (20 جنيه). أول حاجة عجبتنا هي الدقة في وقت التوصيل، بعد 45 دقيقة بالضبط وصل الطلب في Packaging حلو، والأهم من كده سخن ورائحته تجنن –بالذات بيتزا المشروم، واللي كان حجمها مناسب لثلاث أشخاص أكلتهم متوسطة. العجينة رفيعة زي البيتزا الكلاسيكية، وعليها صوص طماطم، مشروم، زيتون وجبنة مع رشة زعتر على كل ده. المكونات كلها كانت فريش وطعمها متجانس من غير ما طعم مكون يطغي على الثاني. عيب البيتزا الوحيد أن طرفها كان جاف جدًا، وكبير نوعًا ما مقارنة بحجم القطعة نفسها. الكالزوني يعتبر كان أسوأ حاجة في التجربة دي، أولًا لأنه ما جالناش بعجينة الحبوب الكاملة زي ما طلبنا، ثانيًا العجينة نفسها كان طعمها غريب وكأنها محروقة. حجم الكالزوني كبير نسبيًا ومكوناته مجموعة من الخضروات زي المشروم، البصل، الذرة الحلوة وزيتون وفلفل مع جبنة موتزاريلا و زعتر، بس للأسف كل اللي لاحظنا وجوده هو البصل، الزيتون والذرة بس وشوية جبنة موتزاريلا مفصولة عن بقية المكونات. البرجر بيتزا ساندويتش كان مميز فعلًا، ونعتقد أنه من هنا ورايح هـ يكون طلبنا المفضل من بيتزا لا بومبا. وهو عبارة عن عجينة بيتزا ملفوفة ومحشوة بالمكونات، حجمه مش كبير ويكفي شخص واحد، ولو أكلتك كبيرة ممكن تحتاج واحد كمان. بجانب المكونات زي صوص الطماطم والجبنة الموتزاريلا، البرجر طعمه مميز جدًا؛ تتبيلته مختلفة عن أي مكان ثاني. بعد كل اللي أكلناه ده، جاء وقت الحلو. وطبعًا بما أننا من عشاق النوتيلا أول حاجة تأكدنا منها أنهم يكونوا مستخدمين نوتيلا فعًلا مش أي بديل ثاني لها وخلاص، وفعلًا اطمأنينا ولكن توقعنا أن النوتيلا تكون سايحة أكثر من كده؛ فبالرغم من أن كميتها كبيرة إلا أنها كانت متكتلة بشكل غريب ولكن نعترف أنه مأثرش على الطعم. في المجمل كتحلية النوتيلا بيتزا ساندويتش حلو لو كانت العجينة أرفع شوية. إجمالًا، تجربتنا مع بيتزا لا بومبا المرة دي اختلفت كثير عن المرة اللي فاتت. صحيح المرة دي كان لنا بعض الملاحظات، ولكن بتحسن مستواه نقدر نقول أننا ممكن نأكل منه ثاني. ونعتقد أن لا بومبا ناجح بالنسبة لناس كثير بكم الـ Social Media اللي معمولة له على الفيسبوك، واللي نعترف أنها مغرية جدًا.

...

فينيز بيتزا: خدمة توصيل فقط جديدة لأفضل بيتزا فى القاهرة فى الزمالك
اصدرت في: 26/02/2015

من أحلى الأخبار اللى سمعناها مؤخرًا فى وسط العبث اللى إحنا عايشين فيه، "فينيز بيتزا – Vinny's Pizzeria" بقى له فرع فى الزمالك لخدمة التوصيل فقط، شكرًا يا رب. لما فتح فى المعادى رحناه واتبسطنا جدًا أن فيه حد أخيرًا يعرف يعني إيه بيتزا زي ما قال الكتاب، بس دس كمان عدت قواعد الكتاب بابتكارات مكونات البيتزا، اللى ممكن تدمر أى ترتيبات لدايت عند أى حد، زي اللى بالسبانخ (أكثر من رائعة)، واللى بالباذنجان والكوسة، وطبعًا الـ Trade mark الفراخ بالباربكيو. من الحاجات الحلوة فى فينيز أنك ممكن تطلب Slice من كذا نوع مش واحدة كاملة، وده اللى عملناه، أخذنا من كل بستان زهرة علشان نذوق أنواع كثيرة، حاجة لازم نقولها الشخص اللى بيرد على الخط الساخن عندهم قمة فى الأدب، حاجة كده آخر حلاوة، طلبنا Slice تشيكن باربكيو (14 جنيه) وفينيز فيجي (12 جنيه) اللى بالباذنجان والكوسة، وهاواى (14 جنيه) دي بالبيبروني والأناناس "أيوه أنت قريت صح"، وأخيرًا الرابعة بالفور تشيز (14 جنيه) (للأسف مش بـ يعملوا Slices من اللى بالسبانخ والسي فوود فقط) ومعاها أخذنا جريك سلاد (29 جنيه)، وللتحلية أبل باى (23 جنيه)، وخدمة التوصيل كانت قيمتها 7 جنيه بس. ريقك جري؟ طيب خليه يجري أكثر بصورهم اللى على صفحة الفيسبوك، المعروف عن فينيز أنهم بـ يعملوا بيتزا New York Style مش رفيعة ومش بان، كريسبي من بره وطرية من جوه، الصوص معمولة بطماطم بـ يستوردوها من إيطاليا ومتغطية بجبنة موتزاريلا غنية، وعندهم كمان قسم سلاطات وكالزونى، ومقبلات زي العيش بالثوم، ومشروبات غازية وتحلية، حتى الحلويات عندهم والكالزونى بـ تتعمل من عجينة البيتزا. وصل الطلب بتاعنا فى وقت لطيف جدًا، الـ Packaging رائع والأكل سخن والريحة يا روحي عليها، أكثر نوعين أثاروا فضولنا اللى بالباذنجان والكوسة، واللى بالبيبرونى بالأناناس، من الآخر مزيج رائع فى الاثنين، دى أول مرة بالنسبة لنا نأكل بيتزا فيها نوع فاكهة، العجينة عامة أكثر من رائعة والجبن الموتزاريلا، الباذنجان والكوسة كانوا خفاف جدًا ومتشوحين تشويحة خفيفة من المكونات اللى أضافت طعم قوي للبيتزا.. السلاطة كانت فريش ومكوناتها رائعة، مكعبات الجبنة اللى فيها كانت محتاجة تزيد شوية بس لأننا حسينا أنها سلاطة جرجير أكثر من أى مكون ثاني، وأخيرًا فطيرة التفاح كان شكلها عامل زي الكالزونى بس غنية بالمكونات قرفة وتفاح وسكر.. ختام رائع. لو عاوز تطلب بيتزا وأنت فى البيت (خاصة لو من سكان الدقى أو المهندسين أو الزمالك) وعاوز تضمن تأكل حاجة فى الجون اطلب "فينيز".. يا هناكم يا سعدكم.

...

بيتزا وان: أنواع بيتزا وساندويتشات مختلفة فى هايبر وان الشيخ زايد
اصدرت في: 17/02/2015

وأنت بـ تتسوق فى مول هايبر وان الشهير فى الشيخ زايد أكيد رجلك هـ توجعك وهـ تجوع، وجع الرجلين مالوش حل، لكن الجوع له ألف حل هناك، بكمية المطاعم وأماكن الأكل خاصة فى الدور العلوي، اللى إلى حد ما مش كثيرة لكنها بـ تفى بالغرض، منها اللى تابعة للمول ومنها اللى مشهورة زي دجاج كنتاكى وغيرها. من المطاعم دي "بيتزا وان – Pizza One" واللى مجاور لـ "آيس كريم وان"، ودول من الأماكن اللى تابعة للمول، المنيو فيه أصناف كثيرة جدًا ومتنوعة، المكان لأول وهلة تحس أنه متخصص فى البيتزا بس، لكن فيه كمان أنواع سلاطات فريش ولذيذة، وكمان ساندويتشات شاورما وهوت دوج وشيش طاووق وبرجر وحواوشي (عادى وكومبو) و3 أنواع مكرونة. البيتزا متاحة كـ Slice (سعرها بـ يتراوح بين 15 لحد 19 جنيه) أو حجم وسط (من 29 لحد 38 جنيه) والكبير (من 41 لحد 55 جنيه)، وفيه أصناف جانبية زي البطاطس (5.95 جنيه) وخبز بالثوم والجبنة (5.95 جنيه)، وجميع أنواع السلاطات (نفس السعر) منها البطاطس بالمايونيز والبسلة والبنجر والكول سلو.. إلخ. المكان جربناه كذا مرة، البيتزا عنده وهمية مافيش كلام، مكونات فريش ومشبعة حتى الـ Slice منها، عامة أى حاجة بـ تحمل علامة "هايبر وان" جودتها مافيش كلام عليها، جربنا كمان ساندويتش الشاورما "فرنساوي" (20.95 جنيه) وبـ ينزل معاها بطاطس محمرة وطرشي، وواحدة سلاطة بسلة خضراء، ومشروب غازى (3.50 جنيه)، الشاورما معمولة حلوة وكميتها كويسة والتسوية كمان، الطرشي بس كان مملح زيادة وقت زيارتنا والسلاطة كانت رائعة بمكوناتها الطازة. أكيد فى زياراتنا القادمة هـ نجرب المكرونة بتاعتهم والكالزونى، أحلى حاجة أن الأكل بـ يتعمل أمامك والخدمة سريعة ونظيفة، وفيه منطقة للأكل Food Court فيها كراسي علشان تقعد وتستمتع بأكلك، وتشحن طاقة علشان ترجع تواصل تسوقك فى المول ثاني.

...

بيتزينيا: بيتزا إيطالي أصلية تقدر تطلبها دليفري في المعادي
اصدرت في: 30/11/2014

الحقيقة أننا أول ما بـ نشوف كلمة بيتزا في أي محل غير متخصص لعمل البيتزا زي الكافيهات والمطاعم، بـ نحط أيدينا على قلبنا لأننا عارفين أننا لو طلبناها مش هـ تكون على قدر المستوى، ولفت نظرنا صفحة "بيتزينيا – Pizzinia" على الفيسبوك، وصورهم الحقيقة لأنه مطعم بـ يعتمد على خدمة التوصيل بس، قررنا نخوض التجربة ونشوف حظنا، يمكن يكونوا محترفين في شغلهم. فتحنا المنيو بتاعهم واكتشفنا أنهم بـ يعملوا مكرونة كمان بأنواع مختلفة وتقدر تنقي أي نوع مكرونة أنت عاوزه بِنا أو فيتوتشيني أو سباجتي. المنيو كان فيه أنواع مكرونة بس ومنها أنواع جديدة لفتت نظرنا زي Mexican Chicken, Shrimp Marinara and Chicken Shrimp Cajun وأنواع البيتزا العادية وتقدروا تشوفوها من هنا. طلبنا بيتزا فراخ بالباربكيو، واللي مكونة من فراخ وفلفل ألوان وزيتون وجبنة وصوص باربكيو وصوص بيتزانيا اللي كنا مشتاقين نعرف هو مكون من إيه؟ واللي فيها طبعًا ثلاثة أحجام صغير ووسط وكبير، إحنا طلبنا الحجم الكبير بـ 40 جنيه، ومكرونة Chicken Alfredo واللي مكونة من قطع فراخ وجبنة بارميزان ومشروم وصوص كريمة بـ 27 جنيه. واستغربنا جدًا لما الشخص اللي أخد مننا الطلب قال لنا أن ثلث ساعة والأكل هـ يوصل، في خلال نصف ساعة الأكل وصل. الأكل وصل مغلف بطريقة جميلة جدًا، عجبنا جدًا الحقيقة خاصة المكرونة، لأن العلبة بتاعتها كانت مُقسمة لثلاثة أجزاء جزء للمكرونة وجزء للصوص وجزء لعيش محمص بالزبدة والبهارات وكان طعمه روعة. الحقيقة أن المكرونة كانت حلوة قوي وبالذات قطع الدجاج كانت متبلة ببراعة ومشوية بالتوابل ومقطعة قطع طويلة بالطول لو عاوز تأكلها لوحدها. وكمية جبنة البارميزان كانت مناسبة وغنية مع قطع الطماطم، لكن الحقيقة الحاجة الوحيدة اللي أزعجتنا أن الصوص الأبيض كان قليل وخفيف جدًا، في حين أننا كنا متوقعين صوص أبيض سميك وغني. أما البيتزا بقى فكانت قصة حب من أول نظرة، الحقيقة أننا أعجبنا بها جدًا من أول العجينة الرفيعة لآخر الجبنة السميكة اللي كانت بـ تمط معاك وتسحرك.. بيتزا إيطالي أصلية، طبعًا أنتم عارفين مش كل من قال أنه محل بيتزا يصلح أننا نطلق عليه لقب محل بيتزا محترف، لكن بيتزينيا أثبت أنه يستحق اللقب ده عن جدارة وإن كان لسه في بدايته، الفراخ كانت متبلة برضه في البيتزا مع الفلفل وصوص الباربكيو وصوص بيتزاينيا الأحمر عملوا مزيج قوي من المتعة والطعم الجميل، كنا نتمنى لو يزودوا الصوص أكثر برضه، بس بشكل عام بيتزانيا فتحت نفسنا أننا نطلبهم في أي يوم ما نقدرش نطبخ ونحب نأكل أكل ممتع وصحي ومش مكلف. لازم نذكر أن بعد الأكل ما وصل بحوالي ساعة اتصل بنا المطعم علشان يتأكد من جودة الأكل ولما قلنا له أن الصوص كان خفيف وعدنا بأن ده مش هـ يتكرر المرة الجاية وده شيء أبهجنا جدًا لأنه دليل على سعى المكان أنه يبقى أحسن ونجاحه يستمر.

...

بيتزا مينوش: لما تحب تستمتع بأكل البيتزا في إسكندرية
اصدرت في: 12/11/2014

أكيد معظم الناس وبالذات الشباب بـ يحبوا يأكلوا البيتزا... فيه ناس كثير بـ تعملها في البيت لكن فيه ناس أكثر بـ تحب تأكلها بره.. وطبعًا كلنا بـ نحاول نختار أكثر مكان يكون بـ يعمل بيتزا حلوة ومميزة علشان نروح نأكلها عنده.. ومن الأماكن المعروفة جدًا في إسكندرية اللي بـ تعمل البيتزا مميزة هو مطعم "بيتزا مينوش" اللي يعتبر من أشهر مطاعم البيتزا في إسكندرية من زمان. مطعم مينوش موجود في منطقة رشدي على الناحية الثانية من البحر وده أقدم فرع للمطعم في إسكندرية، وبـ يطل على اثنين من أشهر الفنادق في إسكندرية هما فندق "سان جيوفاني" وفندق "أزور"... وإحنا داخلين المطعم بـ نطلع سلالم رخام معمولة بحديد فيرفورجيه على الجانبين ومُعلق عليهم زرع كثير... هـ نلاقي المطعم كله عبارة عن الترابيزات والكراسي ومساحته صغيرة شوية، هو مافيش سمة مميزة لديكورات المطعم لكن بـ يغلب عليه الستايل الخشبي في الشبابيك والأسقف والكراسي والترابيزات، وكمان فيه مجموعة أرفف مُعلقة لفوق وموجودة في ناحية من المطعم محطوط عليها حاجات لها طابع قديم زي الراديو زمان والوابور اللي كان بـ يتعمل عليه الأكل... برضه هـ نلاقي براويز مُعلقة على حوائط المطعم كله تقريبًا سواء لألعاب رياضية أو لأطفال صغيرين أو دول أجنبية. وبما أن المطعم بـ يطل على البحر ففيه ترابيزات بـ تبص على البحر وفيه ترابيزات لجوه.. وأكيد إحنا اختارنا أننا نقعد على ترابيزة بـ تبص على البحر واللي ساعدنا في كده أن المطعم ما كانش زحمة أوي. هو صحيح المطعم اسمه "بيتزا مينوش"، بس هو برضه بـ يقدم حاجات ثانية غير البيتزا، زي أطباق الباستا والأرز اللي بـ يعملها بأنواع كثير وبـ تتراوح أسعارها ما بين 8: 55 جنيه، وفيه أطباق رئيسية فراخ أو لحمة أو سمك بطرق مختلفة واللي بـ تبدأ اسعارها من 36: 68 جنيه، وبرضه بـ يقدم المطعم فطيرات كالزوني بأكثر من نوع وأسعارها بـ تبدأ من 13: 25 جنيه، ده غير أطباق السلاطات بأنواعها المختلفة. لكن إحنا قررنا أننا نطلب بيتزا، طبعًا بـ يعمل أنواع كثيرة منها وبمقاسات مختلفة: الصغير والوسط والكبير، واللي بـ تبدأ أسعارها من 12: 49 جنيه، وفي الآخر استقرينا أننا نأخذ بيتزا بالسي فوود، واللي مسميها عنده بنفس اسم المطعم "مينوش" واختارنا الحجم الوسط (43 جنيه)، وكانت مكونات البيتزا عبارة عن جمبري وأنشوجة وتونة ومشروم وزيتون وجبنة موتزاريلا، وكانت ميزتها أن العجينة مش سميكة أوي زي ما مطاعم كثير بـ تعملها، وكل المكونات اللي عليها محطوطة بكمية كويسة وكمان الجبنة كانت كثيرة فكانت بـ تشد جدًا، ودي طبعًا بـ تكون ميزة حلوة أوي في أي بيتزا، خاصة أنها جاءت لنا بسرعة بعد ما طلبنا تقريبًا بربع ساعة وكانت سخنة، لدرجة أن لساننا اتلسع أول ما بدأنا نأكلها... طلبنا معاها كمان طبق سلاطة مشكلة حجم وسط (14 جنيه) واللي كان عبارة عن طماطم وخيار مقطعين ومخلل جزر وليفت وليمون وطحينة وبابا غنوج وبطاطس مكعبات متبلة وعليها بقدونس، وجاء لنا طبق السلاطة بعد ما طلبنا بـ 10 دقائق بالضبط ومعاه سبت فيه عيش ريتش بيك متسخن، وبصراحة كان طعم السلاطة حلو أوي. لكن للأسف بعد ما خلصنا الأكل ما كناش قادرين نطلب أي حلو بعدها على الرغم أنه عنده أطباق حلو زي الكريم كراميل وموس الشوكولاتة وأم علي، بس أكيد هـ نجربها في زيارة ثانية للمطعم إن شاء الله.

...

لا فيه: بيتزا بنكهة الفطير الشرقي في المعادي
اصدرت في: 14/04/2014

أبراج بدر اللي في ظهر كارفور المعادي أصبحت منطقة حيوية مليانة محلات وكافيهات ومطاعم، وبقيت امتداد مهم للمعادي سيتي سنتر اللي الناس بـ تيجي له من كل المحافظات، وبقى سهل أن الناس تخرج من كافرور وتروح تتمشى في منطقة بدر وتقعد في كافيه أو تطلب وجبة سريعة أو تستسخدم أحد البنوك الموجودة في الأبراج، أو حتى يدخلوا فرع أديداس أوتلت الشهير اللي على مخرج الأبراج للطريق الدائري، واللي أصبح هو كمان من العلامات المميزة للمكان. كان فيه كافيه فتح من فترة في المكان وما حققش النجاح الكافي، فغير نشاطه أكثر من مرة لحد ما مؤخرًا استقر على فكرة وجود قعدة عادية أشبه بالقهوة أو الكافيتريا، وبجواره فرن صغير متخصص في الفطير والبيتزا الشرقي والإيطالي والباستا اسمه «لا فيه – La Vie». ممكن تقعد في الكافيه وتطلب الأكل اللي أنت عاوزه من الفطاطري، لكن علشان إحنا عارفين أن قعدة الكافيه لا تعبر عن الفطاطري تمامًا، فعملنا أوردر دليفري وجاء لنا لحد البيت. الأكل وصل بسرعة، في أقل من 30 دقيقة تقريبًا، ووصل بدون أي نواقص أو مشاكل، ودي كانت أهم حاجة بالنسبة لنا، لأن بقى العادي أن الأوردر ييجي لك فيه مشكلة. محل «لا فيه – La Vie» بـ يوصل في مناطق المعادي الجديدة وأبراج بدر والمعراج ونادي الصيد بالقطامية، ودي ميزة ثانية لأنه بـ يغطي منطقة مش أي محل بـ يحب يوصل طلبات فيها. طلبنا بيتزا سوبريم أو زي ما بـ يسموها هنا مشكل لحوم حجم كبير (45 جنيه)، وفطيرة شرقي محشوة بأنواع مختلفة من الجبن حجم صغير (25 جنيه) والحلو فطيرة شوكولاتة حجم صغير (18 جنيه). الأكل وصل ساخن وفي حالة جيدة، تغليف كويس وشكل الأكل يفتح النفس. بدأنا بالبيتزا اللي كانت شبه الفطير بشكل كبير من حيث الطعم، لأن السجق والبسطرمة هم اللي مسيطرين على الإضافات، مافيش ببيروني أو بيف عادي، والموتزاريلا كمان قليلة، الطعم حلو لكن مش مميز، وللأسف العجين كان سميك شوية، مش رفيع ومقرمش زي ما كنا متوقعين، لكن لو بـ تأكله وأنت مهيأ نفسك أنك بـ تأكل فطير شرقي عليه إضافات من فوق بدل الحشو، أكيد هـ تنبسط ومش هـ تحس بمشكلة، لكن هي بعيدة عن البيتزا اللي أنت عارفها ده أكيد. الفطيرة المحشوة بالجبن الرومي والكيري كانت لذيذة، بس كنا متوقعين كمية جبن أكثر من كده، واضح أن فيه ندرة في الموتزاريلا في المطعم ده. الفطيرة الحلوة كانت حلوة بجد، غرقانة في الشوكولاتة النوتيلا ومحشوة بالكريمة وعليها حبات كريز ومكسرات مبشورة، شكلها حجمها صغير لكن من كثر ما هي دسمة كانت تنفع وجبة لوحدها، وينفع يحلي بها 4 أفراد بعد وجبة حادقة عادية. فيه هنا باستا وسباجيتي بإضافات زي بتاعة البيتزا والفطير بالضبط، لحوم ودجاج وتونة وسي فوود ومشروم بأسعار من 15 لـ 25 جنيه. وفيه بطاطس محمرة (5 جنيه) وكانز بيبسي (6 جنيه). وفيه فطير مشلتت حسب الطلب، وزي ما قلنا المهم هنا أن التحضير سريع وخدمة التوصيل جيدة، مش فاضل غير أنهم يهتموا شوية بالمنتج نفسه من حيث المذاق والإضافات.

...

كراست: بيتزا على الحطب فى المعادى
اصدرت في: 25/02/2014

تعودنا من المطاعم الإيطالية فى القاهرة الوقوع ضحية لأمركة الأطباق؛ الحقيقة أن وصفة البيتزا الأصلية بـ تتكون من عجينة رفيعة وطبقة مناسبة من جبن الموتزاريلا، ومعظم المدعين بتقديم الشكل الأصلى من البيتزا بكل صراحة بـ يقولوا أى كلام. التزامًا بتقاليد البيتزا المتوارثة، بيتزا "كراست-Crust" بـ يوفر خدمة التوصيل، بغض النظر أن مافيش أحلى من تجربة الأكل فى المطعم. الديكور بسيط وشيك، بأفكار قعدة متنوعة؛ بعيدًا عن ترابيزات خشب البلوط المتينة بالكراسى المبطنة بنفس الشكل، كراست عنده مكان فى الهواء الطلق تقدر فيه تأكل وسط أشعة الشمس على ترابيزات ملحق بها دكك للجلوس. بالنسبة للناس اللى معاهم أطفال وعاوزين يفرحوهم ببيتزا على شكل أرنب (26جنيه) أو مينى سباجيتى (24جنيه) هـ يسعدهم وجود ساحة لعب يفرغوا فيها نشاطهم الزائد، خصوصًا لو كانوا جربوا الطاقة السكرية الناتجة من النوتيلا كالزون (23جنيه). الخدمة فى كراست سريعة بدون التضحية بجودة الأكل؛ فى الأوقات الهادئة نسبيًا، طلبك ممكن يوصل فى حوالى عشرين دقيقة. سلاطة الجرجير كانت روعة(31جنيه)، بمكوناتها من البصل المسكر، جبن الفيتا والبندق المُحلَى مع الخضروات الطازجة.صحيح مع وجود البندق والبصل ممكن الواحد يفترض أن السلاطة طعمها مسكر، لكن البهارات قدرت تعمل توازن، خصوصًا مع نكهة مكعبات الجبن الفيتا بملحها الخفيف والتتبيلة الفرنسية. كراست قدر يميز نفسه عن باقى مطاعم البيتزا باستخدامه لأفران خشبية. فكرة عدم تعرض العجينة لدرجات الحرارة العالية الموجودة فى النار المولدة بالغاز بـ يمنع نشفان العجينة. مع اختيار نوعية جبنة موتزاريلا كويسة، طعم البيتزا مش بس لذيذ، لكن قوامها كمان مميز. ما كانتش مفاجأة أن بيتزا السى فود (45جنيه)، المكونة من جمبرى، وكاليمارى وصلصة طماطم مخصوصة، قدموا سيمفونية رائعة من المأكولات البحرية. من بين قسم البيتزات الخاصة، عجبنا كمان طعم بيتزا بلانكو (36جنيه) مكونة من ثلاثة أنواع من الجبنة مع جرجير وبصل مسكر، ومغطاة بكمية كبيرة من صوص البيستو وصلصة الطماطم، صحيح أنها كانت مملحة شوية بالمقارنة ببيتزا السى فود، الصوص مع مزيج الجبنة العبقرى اتحدوا لتقديم خليط رائع. كراست بـ يقدم بيتزا إيطالية لذيذة بحق وحقيق بأحجام كبيرة، وده يخليها منافس قوى فى منافسات "أجمد بيتزا فى القاهرة" اللى دائمًا وأبدًابـ تعمل جدال عندنا فى المكتب.

...

شاهد المزيد
مواضيع خاصة

النهارده في القاهرة: سهرة ميكس مع كل ألوان الفن

رغم البرد اللي مخلي كل الناس عايزة تفضل متدفية في السرير، بس برضه أجندتنا مابتخلاش من الحفلات اللي هتخليك تصحصح وتفرفش، علشان تخرج تقضي ليلة سعيدة بعد الشغل. تعالوا