ياباني مطاعم in Cairo, Egypt

مطاعم

زو: مطعم آسيوى مقلب في الزمالك
اصدرت في: 16/10/2014

في الفترة الأخيرة انتشرت المطاعم الآسيوية في القاهرة، وده ناتج عن حب الشعب المصري للتوابل الصينية بالأخص والآسيوية عامة، لكن المشكلة بقى لما المطعم يأخذ الأكل من الصين ويحطه زي ما هو من غير ما يراعي أذواق المصريين، وبرغم أن شكل المطعم من بره مغري جدًا ويطمنك أن مستوى الأكل زيه إلا أننا للأسف تجربتنا مع "زو المطعم الآسيوي – Zo Asian Restaurant" كانت سيئة للغاية. أول ما بـ تدخل بـ تكتشف أن المكان دورين تحت المطبخ وفوق المطعم، المكان كان صغير حوالي خمس ترابيزات، بس أسوأ حاجة أن المكان للمدخنين فقط، يعنى هـ تشم السجائر هـ تشمها، ده لو ما موتش مخنوق من الريحة لو عندك حساسية لأن المكان مقفول. المهم قلنا نطلب، للأسف المنيو الاختيارات فيه كانت محدودة جدًا، فـ قررنا نطلب dim-sum اللي الجرسون قال لنا أنه مش موجود، فـ طلبنا Crispy Bags بـ 18.30 جنيه، واللي كانت عبارة عن عجينة مقرمشة وجواها جزر وبصل وبسلة مع التشلي تاي صوص اللي بـ يبقى حار شوية، والحقيقة أنها كانت مقرمشة وسخنة، لكن أجمل حاجة فيها أن البصل جواها كان كثير، لأن تقريبًا الشيف قرر اليوم ده يتخلص من كل البصل اللي في مطبخه في أطباقنا، وكأنه رفع شعار البصل للجميع وعلى المتضرر عدم الأكل. لحسن حظنا أننا بـ نحب الأكل الآسيوي ومتعودين نأكله في أكثر من مكان، لكن اللي شفناه هناك كان ممكن يخلينا نقاطع الأكل الآسيوي للأبد، ده إحنا جربنا الثلاثة أنواع علشان نعطيهم فرصة، اللحوم والدجاج والمأكولات البحرية وللأسف خرجنا منزعجين وجعانين. مبدأيًا كده، حجم الأطباق كانت خدعة، أول ما الأطباق نزلت لنا فرحنا طبق كبير وجميل، لسه بـ نحط الشوكة اكتشفنا الخدعة البصرية، الطبق يبان أنه غويط (سلطانية كبيرة)، تبدأ تأكل تلاقي أنه مسطح والدائرة اللي تحت دي مجرد شكل بس.. وبالتالى الكمية كانت صغيرة. نبدأ التجربة بـ Beef with bamboo shots بـ 50 جنيه، والحقيقة أن الصوص بتاعها كان حلو إلا أنها للأسف كانت مستوية زيادة عن اللزوم وبـ تمط جدًا. خدنا معاها vegetarian Fried rice بـ 38 جنيه، واللي كان مطبوخ كويس بس تنقصه النكهات تمامًا، لازم تحط صوص اللحمة عليه علشان تعرف تأكله. طلبنا كمان shrimps Bamboo shots بـ 85 جنيه، طعمه كان حلو لكن للأسف برضه كان فيه ملح زيادة عن اللزوم، غير أن كمية الجمبري كانت قليلة جدًا. قلنا مش مشكلة، جئنا نجرب النودلز vegetables chow Mein بـ 38 جنيه، ويا ريتنا ما جربناها، كانت حاجة كده لا لها طعم ولا لون ولا رائحة، نودلز مع بصل وخس وجزر، هو ده الخضار ماشي مش مشكلة يمكن دي طبيعتها، المشكلة بقى أن البصل كان مستولى على نص الطبق، يعني لازم تأكله مع أن مافيش نكهة توابل، الموضوع كان صعب، تحس أن حد بـ يضربك على وشك علشان تخلص الطبق وأنت مش قادر. طلبنا كمان Stir-fried chicken ginger بـ 45 جنيه، والحقيقة أنها كانت حلوة ومتبلة كويس ومستوىة تمام لا زيادة ولا قليل، كمان الـ Chinese beef noodles بـ 40 جنيه، كانت مستوية كويس، فيه فعلًا خضار مش مجرد بصل، لكن بشكل عام كمية البصل كان مبالغ فيها في الأطباق. والخدمة ما كانتش كويسة لأن الجرسون كان ما بين فوق وتحت، حتى ما سألناش عن جودة الأكل إلا قبل ما نطلب الحساب بحاجة بسيطة. آخر حاجة قلنا نختم بها لعلنا نشبع، كانت Fried bananas with ice cream بـ 28 جنيه، واللي الشيف عملها بحجم الموزة كلها بدل ما يقطعها قطع صغيرة والعجينة تبقى رفيعة، هو عمل العكس حط حجم الموزة الكبير مع عجينة رفيعة بدل سميكة، فكانت قليلة للغاية وبرضه مافيهاش نكهة، والآيس كريم هو الحاجة الوحيدة اللي صبرتنا. للأسف تجرتنا هناك ما كانتش سعيدة بالمرة، نتمنى أنهم يصلحوا الأخطاء دي وإلا هـ يفقدوا عدد أكبر من زبائنهم.

...

الركن الآسيوي: أكلات صينية وهندية وسوشي في مصر الجديدة
اصدرت في: 03/06/2014

المطبخ الآسيوي وجد لنفسه مكانة متميزة عند القاهريين اللي بـ يحبوا الخروج والأكلات غير المعتادة، ما بقاش فيه مول كبير أو ساحة طعام مافيهاش مطعم أو اثنين بـ يقدم أكلات من الصين وتايلاند والهند وأحيانًا كوريا كمان، ناهيك عن السوشي اللي بقى منتشر زي محلات الكباب والكفتة، كان طبيعي أننا نبدأ نشوف مطاعم آسيوية بـ تفتح فروع جديدة وبـ تخرج بره نطاق المولات والفوود كورت، وكان آخرها فرع مطعم «الركن الآسيوي – Asian Corner» اللي فتح في ميدان الإسماعيلية في مصر الجديدة. المطعم موجود خلف محل "السلام شوبنج سنتر" الشهير في الميدان، في شارع هادئ مش فيه محلات كثير، علشان كده هـ تلاقي لافتات دعاية إرشادية عن المكان في بداية الشارع من ناحية الميدان. دخلنا المطعم المكون من طابق واحد، مساحته متوسطة وأنيق جدًا، له واجهة زجاجية بـ تطل على الشارع، ومن الداخل ديكوراته مودرن باللون الخشبي الفاتح والإضاءة موزعة بشكل احترافي، والجدران مزينة بصور لبوذا وبعض الرسوم الآسيوية، وفيه قعدات متنوعة؛ ترابيزات وكنبات كبيرة وقعدة بار ظريفة، ومزيكا Chill Out حلوة في الخلفية، يعني الجو العام للمكان ممتاز ومختلف تمامًا طبعًا عن شكل فروع «الركن الآسيوي» الموجودة في سيتي ستارز وغيرها من المولات، والمنيو كمان شكله مختلف ومكوناته مختلفة، يعني الشيء الوحيد اللي بـ يثبت أن ده هو المكان نفسه هو الاسم واللوجو المشهور لـ Asian Corner. المنيو داخل المطعم عبارة عن Chick List تعلم فيها على الأصناف اللي أنت عاوزها وترجعها للويتر، ومقسم لأطباق الدجاج واللحوم والكاليماري والجمبري والسمك، وصفحة ثانية للشوربة والمقبلات والسلاطات وأطباق الخضار والـ Sizzling أو المشويات على الجريل اللي بـ تتحضر أمامك، وفيه قائمة للنودلز والأرز والبط، وأخيرًا الحلويات والمشروبات. السوشي له قائمة منفصلة وتفاصيل كثير وما كانش جزء من تجربتنا في أول زيارة لنا للفرع ده، وقررنا نركز على المطبخ الآسيوي فقط ونشوف التطور اللي طرأ على المكان بعد افتتاح الفرع الكبير الشيك ده. الأكل بدأ ينزل بعد حوالي 15 دقيقة من تحديد طلباتنا، وبدأنا بطبق مقبلات فيه 4 وحدات جمبري بالكنافة (39 جنيه) وهو طبق تايلاندي بالمناسبة، والكنافة بـ تبقى عبارة عن شعيرات مملحة بـ يتم لفها على وحدات الجمبري الكبيرة وبـ تُقلي في الزيت، وبـ تقدم مع صوص الثوم والكسبرة، طبق رائع لو بـ تحب تجرب الحاجات الغريبة، وأحسن افتتاحية لوجبة آسيوية أصيلة. بعدها بدأت تنزل الأطباق الرئيسية وهي الـ Yaki Tori أو الدجاج بصوص الترياكي (44 جنيه) البيف بالبطاطس الحارة (45 جنيه) وجربنا معاها النودلز بالخضار على الطريقة الصينية (20 جنيه) والأرز بالبيض والخضار وحبات الجمبري أو الـ Nasi gorng الأندونيسي الشهير (32 جنيه). البيف بالبطاطس كان قطع اللحم فيه مقطعة شرائح صغيرة مع خلطة الفلفل الأخضر والبصل والكرنب وصوص الصويا وعليه مكعبات بطاطس مسلوقة، حار بدرجة متوسطة. الطعم ممتاز لكن اللحم كان محتاج تسوية زيادة شوية. الدجاج بصوص الترياكي عجبنا جدًا لكن ممكن ما يعجبش أي حد مش بـ يحب الحلو على الحادق، لأن صوص الترياكي هنا معمول بضمير لدرجة أنه يشبه "المفتقة" المصرية الأصيلة، فيه عسل وسمسم وصويا حلوة، لكن هي مكونات صوص الترياكي الياباني برضه. صدور الدجاج فيه مقطعة شرائح كبيرة وتسويتها جيدة والطعم رائع لو كنت من محبي الـ Sweet & Sour أو المطبخ الآسيوي عمومًا، والطبق ده تحديدًا معمول بحرفية عالية جدًا. الـ Nasi goreng اللي معناه حرفيًا "الأرز المقلي" من أحسن الحاجات اللي ممكن تأكلها هنا، الطبق ينفع وجبة لوحده بسبب كمية الجمبري وقطع البيض المقلي والبسلة اللي فيه. النودلز بالخضروات طبق مناسب للنباتيين، فيه كمية معقولة من النودلز المخلوطة بالفلفل الملون والكرنب المسلوق، الملح بـ يبقى قليل في الأكل عمومًا علشان تضبطه حسب الرغبة. فيه أطباق بيف ودجاج بالماسالا الهندي والكاري وفيه تمبورا الجمبري الياباني والبط المحمر مع البان كيك. الحلويات الآسيوية كلها مقلية، موز وأناناس وآيس كريم مقلي وفيه قرع عسلي على الطريقة اليابانية، أسعار الحلو من 17 لـ 25 جنيه، وفيه مشروبات عادية باردة وساخنة بجانب الشاي الأخضر الصيني وشاي الياسمين (8 جنيه). حبينا المكان وحبينا الكميات الكبيرة في الأطباق والخدمة المهذبة، لكن كان نفسنا يعملوا وجبات جاهزة فيها أرز وصنف أو أكثر لحوم زي ما تعودنا نشوفها في فروع الفوود كورت، أكيد ناس كثير هـ تبقى جاية بـ تدور على ده، وهـ يحتاروا لما يلاقوا كل صنف بـ يُقدم لوحده وبسعر أعلى من المعتاد.

...

تسونامي سوشي: أكل ياباني جديد في الزمالك
اصدرت في: 25/12/2013

الزمالك ممكن تكون أكثر منطقة اشتهرت بمحلات السوشي في مصر، يمكن السوشي اتشهر كمان علشان أكلة جديدة وطعمها غريب وإحنا بـ نحب التغيير، "تسونامي سوشي – Tsunami Sushi" مطعم سوشي جديد فتح في الزمالك في 26 يوليو في الشارع اللي على ناصيته مكتبة ديوان. المكان من بره بمدخل شكله شيك ونظيف، هو مكان صغير وتقريبًا عدد الترابيزات فيه ما يكملوش ثلاث أو أربع ترابيزات بس مريح جدًا، وإحنا قاعدين شايفينهم وهما بـ يعملوا السوشي أمامنا لأنهم واقفين وراء بار صغير عبارة عن زجاج شفاف، ولابسين اللبس الياباني المعروف الروب الطويل مع البنطلون الواسع. أول ما وصلنا وقعدنا الجرسون جاء لنا ورحب بنا بطريقة لطيفة وقدم لنا مشروب ترحيبي من المكان، كنا أول مرة نأكل سوشي وأول ما جاء لنا المنيو طلبنا منه يساعدنا علشان أسماء الأطباق كانت غريبة بالنسبة لنا وعلشان نعرف أحسن حاجة في المنيو أو هو ممكن يرشح لنا إيه، وفعلاً ساعدنا ورشح لنا طبق اسمه هوت دايناميت شريمب (50 جنيه) وقال لنا أن هما متخصصين في الطبق ده، وهو 8 قطع عبارة عن جمبري وكريمي تشيز وأفوكادو وفريش سلامون ملفوفين بأعشاب بحرية، طعم الكريمي تشيز مع الجمبري كان لا يوصف، طلبنا معاهم طبق فيلادلفيا رول (55 جنيه) 8 قطع من جبنة الفيلادلفيا مع والخيار والأفوكادو ملفوفين بسلامون مدخن، اختيار الجبنة مع الأرز مع السلامون له طعم لذيذ جدًا للسوشي، وكل دول كان معاهم الصويا صوص وديناميت شريمب صوص. طلبنا كمان طبق مقبلات اسمه تمبورا موري (50 جنيه) كان فيه قطعتين جمبري وقطعتين كاليماري مع قطع خضار (باذنجان، بصل، طماطم، كوسة) مقليين بطريقة خفيفة ولذيذة معاهم صوص التامبورا، بعد ما أكلنا كنا عاوزين نجرب الحلو بس كنا شبعنا وما كانش فيه مكان لأكل ثاني. الخدمة في تسونامي كانت ممتازة والترحيب كان لطيف جدًا، وطعم السوشي مع مزيكا فرانك سيناترا والمكان المريح خلانا مش عاوزين نقوم منه، بالنسبة لنا كانت أول تجربة مع السوشي وكانت في المكان المناسب وأكيد هـ نرجع ثاني.

...

جويا سوشي جابانيز هاوس: مطعم سوشى جديد فى الزمالك
اصدرت في: 21/11/2013

مما لا شك فيه أن السوشي لا ينافس كرمز للأكلات العالمية وسط مطاعم القاهرة. مع افتتاح "جويا سوشي - Goya Sushi" حديثًا فى الزمالك، قدر سريعًا يضيف روح جديدة لهوس المدينة بالأكلات العالمية. ديكورات المكان الأنيقة تشمل صورة زيتية كبيرة كجدار نفذها فنانين محليين، مع مصابيح إضاءة شيك لها سلك، معلقة فوق الترابيزات الخشبية. المكان واسع، لكن فى الوقت نفسه بـ يحافظ على إحساسك بالراحة. بعد جلوسنا مباشرة، سلموا لنا منيو مليئة بأنواع السوشي المحببة لنا منها نيجيرى nigiri بأسعار من 9 لـ 12 جنيه للقطعة، ساشيمى (33: 87 جنيه)، تيماكى temaki بـ 23 جنيه وتشكيلة كبيرة من اللفائف اللذيذة. المنيو كمان تشمل مجموعة كبيرة من أصناف الشوربة، والسلاطات والأطباق الرئيسية (58: 95 جنيه)، أما أطباق الكومبو تشمل 14 قطعة (140 جنيه)، 28 قطعة (250 جنيه) و40 قطعة (370 جنيه). المميز فى جويا أن الأطباق معاها صنف واحد من المقبلات، طبق حلو ومياه غازية أو معدنية. طلبنا كومبو 40 قطعة يشمل 3 لفائف مخصوصة، 8 قطع نيجيرى رول و8 قطع ساشيمى رول، وكمان طلب من هوت جويا رول Hot Goya rolls بسعر 69 جنيه. بالنسبة للمقبلات طلبنا سبرينج رولز جمبرى وخضروات (33 جنيه)، مع جويا بنانا رول للحلو. بعد شوية، وصل طبقنا المكون من أربع قطع سبرينج رولز مع صوص سويت شيللى للتغميس. اللفائف المقدمة بشكل أنيق على فرش من قطع الجزر كانت مقرمشة وطازجة، وأعجبنا على وجه التحديد اختيار الطباخ أن العجينة تكون رفيعة. وصلت الهوت جويا رولز –كوكتيل دافئ من السلامون، والجمبرى، وسمك الثعابين، والمشروم، وجبن فيلاديلفيا وسمسم- مع كمية كبيرة، لكنها غير طاغية على مذاق الأكل، من صوص التيرياكى اللذيذ. طبق الكومبو وصل بعد فترة بسيطة، مرتب بشكل جذاب على سطح رخامى. ننصح وبشدة اختيار كلٍ من السلامون، أوناجى unagi، جمبرى وتونا نيجيرى. السلامون تاتاكى ساشيمى salmon tataki sashimi كان غرقان فى صوص الأوزو uzu الشهي، ويقدم معاه صوص أبيض من الثوم المشوى. اختياراتنا من Dancing Shrimp، كايرو، هالويين، كريسبي، بارادايس وجويا سبيشال رولز كانت بالفعل اختيارات ممتازة. رغم إحساسنا بالقلق شوية من المزيج الغريب بين الجمبرى والنعناع فى الباراديس رول، اكتشفنا أنه فى الحقيقة ابتكار لذيذ. بالنسبة للكريسبي رول، طعمها كان مقرمش آخر حاجة ولذيذ جدًا، أما الهالويين رول كانت استثنائية من حيث شكل تقديمها المبدع، والخلطة المدهشة بين الجمبري المقلي والتونة الحارة. مجموعة من الحلويات التقليدية تشمل موز مقلى (25 جنيه)، تفاح مقلى (25 جنيه) وجويا بانانا رول (33 جنيه). الأخير كان عبارة عن شريح من الموز المقلى، ملفوف فى فطائر أرز مقرمشة ومغطى بصوص الشوكولاتة والكاجو. منيو حلويات منفصلة تعرض ثلاث حلويات 'Ahd'؛ Salted Caramel Chocolate Fondant بسعر 38 جنيه و Chocolate Chip Pan Cookie بسعر 50 جنيه. أقل ما يقال عن الأول أنه ممتاز. لوح الفانيليا الغريب –بقوامه اللي يجمع بين الكيك والبسكويت- تم تحسينه بواسطة شرائح السوداني بالزبدة وعليها صوص شوكولاتة بالبندق. الطبقين قُدم معاهم بولة من آيس كريم جويا المخصوص. بالنسبة للمنافسة المحلية، أكيد جويا سوشي منافس شرس. كل عشاق السوشي فى كل أنحاء المدينة لازم يجربوا المكان ده، ولو تحت ظروف معينة التجربة كانت غير مرضية، الحلويات تقدر تخطف قلب أى واحد.

...

وابى سابى: مطعم سوشى مش عادى فى هليوبوليس
اصدرت في: 08/04/2013

"وابى سابى – Wabi Sabi" مطعم صغير مشهور بتقديمه للسوشى، مكانه فى شارع الميرغنى المزدحم دائمًا. الديكورات المعاصرة اللى تقدر تشوفها من خلال الزجاج الأمامى تقريبًا قريبة من ديكورات فرعه فى أبراج نايل سيتى، الإحساس بالروح الشرقية الأصيلة نابع من الحوائط المزينة ببلاط صخرى، ومفارش البامبو والكراسى الخشب. رغم أن فرع هليوبوليس شكله لطيف، كان واضح أن القعدات مش مريحة مع عدم وجود أى مزيكا شغالة أو زبائن موجودين، الجو العام كان مش مشجع ومريب لحد كبير. لما دققنا أكثر، لاحظنا أن الزجاج الأمامى محتاج يتمسح ضرورى وأجزاء من بلاط الأرضية الخشب كانت متآكلة. طبعًا لما شوفنا الوضع والمكان الفاضى افتكرنا أن الخدمة هـ تبقى عظيمة؛ بس اللى حصل أننا احتاجنا ننادى على الجرسون أكثر من مرة وسط الأكل. كل أملنا كان أن إدعائهم بأنهم "ملوك السوشى" يترجم للواقع عن طريق الأكل نفسه. المنيو بـ تقدم مجموعة كبيرة متنوعة من السوشى والساشيمى، وكل حاجة منهم مكتوب عليها السعر لكل قطعة، لكل 10 قطع و8 قطع- بس هم بـ يقسموا الكمية للنصف لو مش عاوز تطلب عدد كبير. مافيش أنواع أكل ثانية عندهم غير كام صنف من الشوربة والسلاطة. بالنسبة للمشروبات، المتاح هو مشروبات الصودا والمياه، لكن مافيش أى منيو مخصوصة للمشروبات. اختارنا 4 قطع من 'blue bay' بسعر 22 جنيه فيهم سلامون وكابوريا و avocado ura maki وعليهم صوص كينج كونج، ومعاهم 4 قطع من "تشيزى سلامون" (29 جنيه) المكونة من لفائف السلامون، وجمبرى مقلى، وأفوكادو وفيلادلفيا مخصوصة، وعليهم سلامون مدخن وسمسم أسود. جربنا كمان 4 قطع من deep fried California rolls بسعر 24 جنيه وكانت عبارة عن: لفائف محشوة سلامون، جمبرى مقلى، أفوكادو وجبنة بيضاء، ومعاهم 5 قطع ثانيين من سلامون ساشيمى (31 جنيه). وفى نفس الوقت واحد من مجموعتنا طلب من منيو الحلويات -اللى فيها ثلاثة اختيارات بس- شوكليت فوندو، وأكد عليهم تنزل فى نفس الوقت مع السوشى. وصل طبق السوشى سريعًا، متحضر بشكل أنيق والسوشى كان وسط كومة كبيرة من الزنجبيل وكمية بسيطة من الواسابى. جائزة أحسن أكلة قررنا تكون من نصيب السلامون ساشيمى؛ سميكة، وطازجة، وغنية بالمذاق لدرجة ما تقدرش معاها تبطل أكل. السوشى على الناحية الثانية ما نقدرش نقول أنه سيء، بس فى نفس الوقت ما يستحقش الإشادة، ويمكن ده ينعكس على الأسعار اللى بـ تتراوح من المتوسطة للغالية. كل السمك الموجود كان طازج وملفوف وسط أرز طرى منفوش. صوص الكينج كونج على سوشى 'blue bay's' عبارة عن صوص حراق لونه وردى، وطعمه غطى على طعم السوشى نفسه، أما جبن الفيلاديلفيا الموجود فى لفائف "تشيزى سلامون" المخصوصة كان عنيف شوية، وبرضه طعمه كان مغطى على مزيج الخضروات مع السمك. بالنسبة لأكثر أكلة محبطة، فكانت هى deep fried California roll بطعمها المعجن، البعيد تمامًا عن الطعم المقرمش الحراق اللى كنا نتوقعه. بعد ما أشبعنا رغبتنا من السوشى، كان لازم نسأل عن مصير الشوكليت فوندو. الغريب أن لغاية الوقت ده، الجرسون ما عرفناش أن الطبق مش موجود أصلاً، وعلشان كده خلصنا أكلتنا أسرع مما كنا نتوقع. خلاصة الموضوع أن "وابى سابى" بـ يقدم وجبات سوشى سريعة معقولة مع إمكانية عمل تغييرات كثيرة، غالبًا هـ نعمل لهم زيارة ثانية، والسبب الوحيد هو الساشيمى الرائع.

...

لازياتيك: لم الشمل مع أصحابك على أكلة سوشى فى الزمالك
اصدرت في: 10/10/2012

الغريب فى «لازياتيك – L’Asiatique» الموجود على مركب الباشا فى الزمالك أنه ما بـ يقدمش أى إضافة فريدة على ساحة المطبخ الآسيوى، ورغم كده هو عنده قدرة غريبة على جذب الناس. ممكن تحس أن ده كلام مكرر بس هى دى الحقيقة. بصفته واحد من أقدم المطاعم اللى بـ تقدم أكلات أسيوية فى القاهرة، مش بس الأكل اللى بـ يخلى الناس تيجى ثانى على مدار السنين، ده كمان سحر المكان التلقائي اللى بـ يخلى العشاء وسط المجموعة له طعم ثانى.مكانه فى الدور الأرضى من المركب أمام "بيكولو موندو"، لازياتيك مكان لطيف معظم ديكوره من الخشب، وبـ يزينه علامات لونها بنفسجى وأحمر غامقين. الإضاءة باهتة شوية وفيه إحساس بالهدوء والسكينة؛ معظم الترابيزات معدة لاستقبال مجموعة من أربعة أفراد أو أكثر، وكمان ممكن يضبطوا ترابيزات أصغر أو تختار أنك تقعد على البار.علشان إحنا كنا مجموعة أكبر، قعدونا على ترابيزة مبنية مباشرة على الأرض، بحيث تبقى قاعد فى مستوى الأرض. ورغم أن الفكرة هائلة بس أكيد هى مش أكثر طريقة مناسبة للخدمة المصرية –لما الجرسونات بـ ينزلوا علشان يقدموا الطلبات، بـ يبقوا مائلين قوى على مكان قعدتنا– أو للناس اللى ما عندهمش مهارة. بس مافيش كلام أن الابتكار ده ممكن يبقى ممتع.اختيارات السوشى عندهم كثيرة، طبق فيه 12 أو 24 قطعة سعره بين 100: 200 جنيه، ورغم أن السمك طازج والمكونات هائلة، لازياتيك وقع فى غلطة هى التقطيع لقطع كبيرة قوى.طبق الشريمب بونبون shrimp bonbon (52.90 جنيه) مقطع على شكل الطوفى، ومعجنات فيلو filo pastry ملفوفة على الجمبرى، ومربوطة بشريط من الطحالب البحرية وبـ تُقدم مع صوص حلو ولاذع. المعجنات كانت ناشفة، والجمبرى طرى والصوص مضبوط. طبق التونة تيمبورا tuna temura (63.90 جنيه) كان غالبًا هو أبرز حاجة فى الوجبة. قطع من التونة مع سطح خارجى خفيف مقرمش حافظ على طراوتها وبـ يُقدم مع صوص ليمون تحفة.باد تاى سبرينج رولز Pad Thai spring rolls(43.90 جنيه) بـ تيجى بكمية أكبر من المعتاد، ومغطاه بخليط من الصلصة الحلوة. الطبق مليان بالباد تاى، وإحساسك به محتاج وقت بسبب الطعم المسكر. بس مع القرمشة اللطيفة على الرول والحشو اللذيذ، سهل قوى يبقى من أطباقك المفضلة.الشعرية بالبيض مع الخضروات (24.90 جنيه) بـ تيجى بكمية مناسبة للمشاركة مع حد ثانى، ونكهتها مميزة ومتناسقة بحيث لا طعم الشعرية ولا طعم البيض يطغوا على بعض. البيف تيرياكى (72.90 جنيه) بـ يُقدم على شكل شرائح، وكان شبه التونة تيمبورا، كان محروق شوية بس طري، وكمله صوص التيرياكى بطعمه المسكر المميز.فيه كمان أطباق ثانية تستحق التجربة منها زلابية بالجمبرى shrimp dumplings (58.90 جنيه)، مكعبات باذنجان كمقبلات وسلاطة التاتاكى، ودى عبارة عن سلامون ساشيمى وأفوكادو مع صوص صويا خفيف.أخيرًا بس أكيد مش أقلهم، هى الحلويات. أحسن حاجة فى مركب الباشا دلوقت أنك تقدر تطلب من نفس منيو الحلويات بغض النظر عن المطعم. مون بلان Mont Blanc (27.90 جنيه) –عبارة عن قطعتين من المارينج محشية بكريمة مخفوقة وصوص أبو فروة– مش مناسب للى عندهم مشاكل فى القلب. مع طعم الجوز والكريمة مع شوية مضغ بـ يحصل بسبب المارينج، أكيد أملك مش هـ يخيب.تارت التمر (25.90 جنيه) بـ ييجى مع قطع تمر محطوطة على معجنات بيتى، سخنة ولسه طالعة من الفرن، مع بولة أيس كريم فانيليا محطوطة فوقها فعلاً طعمها خرافى. الدارك شوكليت براونى (24.90 جنيه) كانت برضه شهية، مقرمشة شوية من بره لحد ما توصل لقوام الشوكولاتة الناعم. النكهة الغنية التقليدية ماشية مع برودة آيس كريم الفانيليا وطعمها لا يقاوم.المرة الجاية لما يبقى عندك عشاء مع أسرتك، عيد ميلاد أو حتى قعدة شغل، «لازياتيك» دائمًا هـ يفضل اختيار كويس.

...

زو: مطعم آسيوي جديد في الزمالك
اصدرت في: 02/11/2011

بعد تجربتنا غير الموفقة في فرع «زو - Zo» في التجمع الخامس، كنا قلقانين من زيارة الفرع الجديد اللي فتح في شارع 26 يوليو في الزمالك، قريب من مطعم «مكاني» الآسيوي في نفس الشارع. شبه «مكاني» كثير؛ دورين والدور الأرضي فيه مطبخ مفتوح ممكن تشوف فيه الشيف وهو بـ يعمل الأكل أمامك، والدور العلوي فيه مكان للقعود وعدد قليل من الترابيزات. الحوائط مدهونة بالألوان الأحمر والبنفسجي وممكن اللي بـ يقرأ يحسه مؤذي للعين لكن الحقيقة أنه كان مبهج وشيك. قطع الديكور محدودة واللمسات الآسيوية مش كثير. المنيو مركز جدًا على البلد اللي جاي منها كل طبق، يعني ممكن تعرف معلومات جديدة بخصوص المطابخ الآسيوية وأكلات كل بلد. اختارنا طبق الساتاي مكس Satay Mix (24 جنيه) كمشهيات مع طبق الجمبري على الطريقة التايلاندية (33.5 جنيه). الساتاي هو المفروض خليط من اللحم والدجاج، لكن اللي جاء لنا كان دجاج وبس، وكان مشوي كويس وحار شوية، والصوص اللي معاه كان لذيذ وسميك وحار برضه ودافئ مش بارد. انبهرنا بطبق المشهيات الخطير، وانبهرنا أكثر بالجمبري المقلي الملفوف بعجين الفيلو وبـ يقدم مع الصوص الحار. يمكن ده كان أبسط أكلة في المنيو لكن ساعات البساطة بـ تبقى هي كل شئ. للطبق الرئيسي بـ نرشح لك طبق اللحم البقري المشوي مع شرائح البصل (52 جنيه). اللحم كان مشوي ومتبل بحرفنة وحامي حبتين، مع الطعم المسكر شوية للبصل عامل طعم خرافي. طبق الجمبري مع أوراق نبات البامبو (85 جنيه) كان أحلى من الطبق الأولاني كمان. كمية الجمبري كانت كبيرة في الطبق، والصوص كان غني وقوامه ممتاز، بـ نرشح الطبق ده كمان بقوة. جربنا طبق النودلز بالخضروات (24 جنيه)، وهو طبق جانبي مخصص للنباتيين. النودلز مخلوطة بالفلفل الملون والكوسة وحبات الذرة والمشروم. وبسعرها ده كانت أرخص نودلز في المنيو، كل الأنواع الثانية من النودلز بأسعار بـ تبدأ من 40 جنيه. وقبل ما نطلب أي حاجة من منيو الحلويات، الجرسون قدم لنا طبق من البطاطس الحلوة المميزة بالمحل. البطاطس بـ تتقدم مع القرفة ولبن جوز الهند، ومن أول قطمة قررنا أننا مش هـ نأكل طبق الحلو ده وأنه ما عجبناش، لأن طعم البطاطس وقوامها كانوا طاغيين على طعم الإضافات الثانية في الطبق الغريب علينا. الخدمة جيدة والعاملين كانوا متعاونين لكن واضح أنهم لسه في مرحلة التدريب. في النهاية «زو» مكان يستحق الزيارة لو كنت في الزمالك ونفسك في أكل آسيوي.

...

موري سوشي & جريل: طعم سوشي رائع في المهندسين
اصدرت في: 20/07/2011

مافيش نقص في عدد مطاعم السوشي في القاهرة، المدينة بقت مليانة بهم وبقي موضة في آخر عشر سنين. «موري سوشي & جريل –& Grill Mori Sushi» هو واحد من أقدم مطاعم السوشي في القاهرة وأشهرهم وله فروع كثيرة في المدينة ومنافذ صغيرة في سيدي عبد الرحمن، مارينا، والجونة. فرع المهندسين مختلف عن الفروع الثانية لأن فيه قسم المشويات وإحنا زرنا الفرع ده. هـ تلاقيه موجود في شارع جزيرة العرب فوق محل «فيسيس Faces»، المطعم تصميماته حديثة بس لها طابع آسيوي. فيه مطبخ مفتوح في آخر المطعم ورف كتب مليان مجلات وكتب وجنبها ترابيزات للقراءة. قسم المشويات فيه أنواع كثيرة من الأكل الياباني زي أطباق الترياكي وشوربة الشيتاك بالمشروم. الناقد جرب شوربة الكاري الساخنة بـ 39 جنيه وبـ يجي معاها نودلز مطبوخة كويس، ومشروم، وفراخ وخضار مقرمش. طعمها كان حلو جدًا وحار بس ما كانش حار قوي لدرجة أنك تشرب لتر مياه وعينيك تدمع. رغم أن الشوربة مكتوبة في قائمة المقبلات بس هي تكفي وجبة كاملة. إحنا جربنا سلاطة أسبراجس (نبات الهليون) الخضراء بـ 32 جنيه وكانت رائعة. كانت مغمورة جوة صوص بلسمي، السبارجس كان هش ومقرمش وصوص الهليون كان على وش السلاطة بطريقة مظبوطة قوي. للطبق الرئيسي طلبنا نيويورك ستريب ستيك بـ 125 جنيه بصوص الثوم البلسمي وعسل، والطبق الجانبي كان سبانخ بالكريمة. الستيك كانت سِواها متوسط زي ما طلبنا وكانت طرية أكنك بتقطع قطعة زبدة بالسكين. اللحمة نفسها ما كانتش محتاجة صوص لأنها كانت مظبوطة في سِواها. بس صوص البلسميك كان مسكر مع طعم بسيط من المرارة، وطبق السبانخ الجانبي كان فيه كريمة كثيرة. السوشي كان بدون عيوب وطعمه حلو وفريش. احنا جربنا نيجري أيبي بـ 9 جنيه، ولفافة التونة وعليها جمبري كانت حلوة بـ 18 جنيه والأفوكادو كاتيربيلار رول بـ 39 جنيه. للتحلية إحنا بـ نوصي بـ شوكولات فوندو بـ 35 جنيه، الكيك سخن مليان صوص الشوكولاتة الرائع رغم أنه غني قوي بس صعب أنك تأكله بعد وجبة ثقيلة. العاملين بمطعم «موري» ودودين جدًا وبـ يساعدوا الزبائنـ بـ يلبسوا لبس ياباني مع طابع مودرن، حاول تقعد في مكان جنب الشباك علشان المنظر بره بـ يسلي جدًا، هو الأكل هناك بثمنه بس بـ تأخذ مقابل قيمة الفلوس سوشي فريش، لحمة لذيذة وسلاطة طعمها رائع.

...

موري سوشي: السوشي كما أُنزل.. في الزمالك
اصدرت في: 28/06/2011

السوشي من أنواع الأكل اللي يمكن كتير من المصريين إما أخدوا قرار واعي أنهم مستحيل ياكلوا "السمك النَيّْ" ده، أو جربوه بعد ما أخدوا قدر لا بأس به من حبوب شجاعة. واللي جربوه يا بـ يدمنوه، يا بـ يجروا على الحمام بعد أول قطمة! لكن في جميع الأحوال محبيه كتير، ومن أحسن مطاعم السوشي في مصر إن ماكانش الأحسن على الإطلاق هو «موري سوشي – Mori Sushi». «موري» موجود في كذا حتة، المهندسين، الزمالك، مصر الجديدة، المعادي، «داندي مول» و«تيڤولي دوم»، وكمان في الساحل الشمالي. دليل على نجاح حقيقي! رحنا «موري» اللي في الزمالك. المطعم ديكوره مودرن، يغلب عليه اللون الأسود، كراسي جلد، وترابيزات زجاج، مرايا وصور لشخصيات يابانية على الحيطان والسقف بـ تكمل حبكة جو المكان الشيك قوي، ومفعم بالطابع الياباني اللي بـ يميزه. المنيو معمول من الـ بليكسي جلاس Plexiglas ولونه أصفر، والسوشي متصور حلو قوي، يجري الريق! السوشي للي مايعرفش هو عبارة عن رز ملفوف بالأعشاب البحرية (النوري)، مع سمك أومأكولات بحرية مختلفة نية. أنواع السوشي هي: «نيجري سوشي»، «ماكي سوشي»، «أوشي سوشي»، «جيراشي»، و«ناري سوشي» (النوع التقليدي، وبـ يتعمل بالسمك المدخن)، والأنواع دي الإختلاف بينها عادة بـ يكون في طريقة لف نفس المكونات. وبالرغم من إن «موري» في مصر، وكمان مش ياباني أصلي (المطعم مملوك لشركة برازيلية)، إلا أن عنده أصناف سوشي جديدة ومبتكرة، بهرت حتى الناقدة، اللي بـ تعتبر نفسها خبيرة سوشي درجة أولى. مع إنه قد يكون تحمس زيادة شوية في إستخدام جبنة الكريمة في السوشي؛ الشيف كان خالط النكهات بطريقة إستثنائية، خاصةً الجمبري المقرمش ورول الأفوكادو، اللي كان متغطي بالرز المسكر، ومرشوش بصلصة قريبة من الـ «تيرياكي». حتى الـ«ماكي» الكلاسيكي كان طازة وبسيط، وبـ يوضح الخبرة الهايلة للشيف وجودة المكونات. ومع ذلك ما بـ ننصحش ببعض التجارب بتاعة المكان، منها رول الـ«أورا» اللي إسمه في المكان «بينك بانثر – Pink Panther»، الصنف ده في معجون الكابوريا، مش حلو أبداً. الحلو عندهم مافيهوش هزار. فونضام الشيكولاتة السويسري «Swiss Chocolate fondant» اللي بـ يتقدم بأيس كريم فانيليا أكثر من رائع، عصاءر الكوكتيل كمان حلوة قوي،بس بـ ثمن وجبة صغيرة في أماكن كثير. بس للأسف «موري» مش رخيص أبداً. عشان تاكل وتشبع هـ تدفع ما بين 150 و200 جنيه! القائمين على الخدمة في المكان مهذبين جداً، شهادة جدارة للمكان إن حتي «سيكويا - Sequoia» بـ يقدم السوشي بتاعهم.

...

مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح