سوشي مطاعم in Cairo, Egypt

مطاعم

مكاني: سلسلة المطاعم الشهيرة بتقدم السوشي بوريتو في الدقي
اصدرت في: 19/04/2016

فات وقت طويل من أيام لما كنا نستغرب من أكلة السمك النيئ اللي بيقولوا عليها "سوشي"، ودلوقتي القاهرة فيها أعداد رهيبة مدمنة للسوشي. وعلشان حب السوشي بيزيد يوم بعد يوم، كثير من مطاعم القاهرة قررت تضيف السوشي لمنيوهاتها زي كاسبر أند جامبينيز وذا إدواردز على سبيل المثال. في كلام اتسرب من داخل كوكب السوشي الشقيق بيقول أن "مكاني" نزل حاجة جديدة وهي "سوشي بوريتو". فرع مكاني المكون من دورين على شارع ميشيل باخوم في الدقي موجود في نفس عمارة الست حسنية المشهور بأكلاته المصرية، والدور الأول من مكاني بيأخذ طابع القهوة شوية بألوان الأرضية والسقف البرتقالي والأخضر والبنّي مع الكراسي الخشب وبار السوشي اللي بتشعر فيه بالأجواء الياباني الهادئة والصواني الزجاجية على الترابيزات اللي بتسهل من طريقة التعامل مع السوشي. كل الكلام ده مفهوم وعارفينه، خلونا ندخل في المهم لو سمحتم! فكرة السوشي بورتيو ظهرت على يد بيتر ين صاحب سلسلة سوشيريتو اللي كانت بداية ظهورها في سان فرانسيسكو، وعمل وقتها خليط بين المطبخ الآسيوي واللاتيني. سوشيريتو بيقدم ثمانية أنواع من السوشي بوريتو تجمع بين الجواكامولي بالجنزبيل ورقائق الذرة الزرقاء والهالبينو مع مكونات من المطبخ الآسيوي. أما فكرة السوشي بوريتو هنا في مكاني فأبسط كتير، واللي قرروا يحافظوا على النكهة الآسيوية مع تقطيع رول السوشي لنصفين، من غير ما يقفلوا الجوانب وبعدين يلفوها زي البوريتو. الكريسبي شريمب سوشي بوريتو (74 جنيه) كان ملفوف في ورق أعشاب نوري Nori، ومحشي شريمب تمبورا وجبنة بيضاء وأرز وصوص ترياكي، لكن المشكلة أن صوص الترياكي ملهوش وجود وكمية الشريمب تمبورا القليلة حسستنا إننا بنأكل ساندويتش أرز وجبنة بيضاء. لفة البوريتو نفسها كانت سيئة، والتقديم كان في علبة خشب بسيطة، ونقدر نقول أن الموضوع عمومًا كان متواضع. نروح للسبايسي سوشي بوريتو (70 جنيه) اللي شكله كان أحلى من اللي قبله وتنفيذه كمان أحسن. صحيح طعم الزنجبيل المخلل كان قوي جدًا، بس طعم البوريتو عمومًا كان جميل بنكهة المانجو اللي عملت دويتو هايل مع الطعم السبايسي لصوص الفولكانو والواسابي، وكمان ماننساش أن السالمون كان طازة. إحنا طبعًا كنا متحمسين جدًا نجرب السوشي بوريتو من مكاني، لكن للأسف جودة الأكل ماكانتش على المستوى والموضوع مختلف تمامًا عن السوشي بوريتو "الأصلي"، لأنه من الأخر كان رول سوشي كبير مقسوم لنصفين. بس لو بصينا للجانب المشرق وهو السبايسي سالمون بوريتو، جايز الفكرة تنجح مع الناس.

...

ذا إدواردز: حكاية مطعم في كايرو فيستيفال سيتي
اصدرت في: 20/01/2016

وسط عدد كبير من المطاعم الممتازة المغرية في كايرو فيستيفال سيتي، مغامراتنا مستمرة في مول التسوق الموجود في القاهرة الجديدة ومطعمنا المرة دي هو ذا إدواردز - The Edward's اللي بـ يقدم أكلات عالمية منتقاة وسط أجواء مميزة. ديكورات المكان تشمل ممتلكات كثيرة خاصة بعائلة صاحب المكان -من الآلة الكاتبة بتاعة والده للجراموفون الخاص بجده ومطحنة القهوة الخاصة بجدته– وذا إدواردز يتميز في الحقيقة بأجواءه اللطيفة العتيقة بكنب أنتيكة وصور جرائد قديمة وموسيقى كلاسيك هادئة، المميز كمان هناك أن مساحة المكان الواسعة بـ تعمل جو هادئ خصوصًا مع ألوان الحوائط الهادئة والكراسي والترابيزات برسومات الورد، وده بـ يضفي على المطعم جو بسيط مميز كأنك قاعد في مكان تاريخي نوعًا ما. ندخل على المهم، المنيو هناك متنوعة وتشمل أصناف شوربة ومقبلات وسلاطات وأطباق آسيوية وسوشي وساندويتشات، وإحنا ما كذبناش خبر وطلبنا من المقبلات باربيكيو وينجز (42 جنيه) ومن الأطباق الرئيسية سلامون بيستو (115 جنيه) وإيطاليان برجر (69 جنيه). الباربيكيو وينجز بـ تُقدم في وعاء صغير ومعاها قفازات للاستعمال مرة واحدة، وكانت تتبيلتها ممتازة ومتحمرة صح الصح ومتغلفة بالسمسم وغرقانة صوص باربيكيو، كان ناقصها بس صوص الزبادي المشطشط أو صوص البافالو زي ما مكتوب في المنيو. قطعة البرجر في الإيطاليان برجر المتغلفة بين عيش طازج لذيذ كانت معمولة تمام وميزتها أنها طرية وعصارية ويغطيها جبنة جودة سايحة لذيذة ومعاهم قطعة جبن جودة مقرمشة مع صوص مارينارا تحفة علشان اللمسة الجمالية الأخيرة، الطبق كمان وصل معاه بطاطس مقرمشة تتبيلتها ممتازة. أما السلامون المشوي فلازم نحكي لكم عن تتبيلته الروعة وتسويته على نار هادئة وقوامه الطري، وكمان عليه بيستو فستق بس طعمه كان أقرب للريحان من الفستق، العيب الوحيد في الطبق كان البطاطس المهروسة اللي تحت السلامون، واللي صحيح كانت دسمة ومتماسكة بس طعمها كان غريب. بعد نظرة سريعة على قسم الحلويات في المنيو، احتارنا بين تارت الفستق (42 جنيه) والنوتيلا بيتزا (38 جنيه) و"فوفة" فوندو (38 جنيه) –والاسم ده على اسم واحدة من أفراد عائلة إدوارد– وPain Perdu بـ (34 جنيه)، وفي الآخر طلبنا الأخير. البين بيردو من الحلويات الفرنسية المكونة من قطعتين توست فرنسي مسكّر كبار ومتغرقين في الكريمة الإنجليزية الغنية بحيث التوست يطلع طري وفي نفس الوقت يحتفظ بقوامه، ومعاه بولة آيس كريم فانيليا كبيرة، وفوقهم كلهم صوص كراميل بـ يضيف طعم مميز للاختراع. بعدها قررنا نطلب شيشة عنب (48 جنيه) فطلعنا للقعدة الأوت دور وكان الجو ثلج بصراحة، بس بعد حوالي نصف ساعة قدموا لنا بطانيات صغيرة إحنا والناس الموجودين، ودي فعلاً كانت مبادرة لطيفة من المطعم، الشيشة نفسها كانت ممتازة وفضلت مكملة معانا بقية اليوم. خلصت أكلتنا اللذيذة بعصير ليمون نعناع هايل (22 جنيه) كان فعلاً مسك الختام، لو فيه حاجة ممكن ننتقدها أكيد هـ تكون الخدمة البطيئة، لكن مع جودة الأكل والموظفين الهايلين، كان من السهل نتغاضى عن المشكلة دي.

...

فويجو: مطعم جريل وسوشي متميز فى الجزيرة بلازا الشيخ زايد
اصدرت في: 11/10/2015

"فويجو – Fuego" يعتبر من أشهر الأماكن اللى بـ تذكر لما تيجي سيرة السوشي، وخاصة كمان لما تيجي سيرة All You Can Eat، القاهريين بـ يحبوه وعندهم ولاء له، وبالتالي ما كانش غريب علينا أننا نروح فرع الجزيرة بلازا فى الشيخ زايد ونلاقيه زحمة رغم أننا ما رحناش فى ويك إند. المكان قعدته مقسمة لجزئين: جزء Open Air والثاني داخلي فى التكييف، قعدنا جوه شوية منتظرين أول ترابيزة تفضى بره، وعقبال ما نطلع بره بصينا على المنيو اللى هـ تتوه من كثر أصناف السوشي اليابانية والـ Options اللى فيها، واللى هـ تلاقيه كمان أنها مش بس فيها أصناف سوشي، لأ كمان بـ يعملوا باستا وساندويتشات برجر وفراخ، وستيك وكمان أطباق فراخ وسي فوود. طلبنا من المنيو شوربة طماطم (18 جنيه) ومن منيو السوشي أخذنا 2 سلامون نايجيري (20 جنيه)، و2 تيمبورا نايجيري (22 جنيه)، ونصف كريسبي رول "4 قطع" (29 جنيه)، وجولدن برمودا رول Golden Bermuda Roll "5 قطع" بـ (59 جنيه)، ومن المنيو العادية قلنا نجرب فويجو برجر (56 جنيه). أول حاجة جاءت لنا الشوربة، كان قوامها مضبوط وسخنة وكميتها تكفى اثنين، بداية كويسة لزيارتنا هناك، بعد شويتين كده جاء لنا البرجر وبعده السوشي، البرجر كان عبارة عن بيف مشوي على الفحم مع بيف بيكون وبيض ومشروم وجبنة سويسرية وخس وطماطم مقدم معاها بطاطس محمرة، الصراحة البرجر ما عجبناش خالص مافيهوش عصارة ولا البيف كان له تتبيلة تحس منها بطعم مختلف، الموضوع كان محبط بالنسبة لنا لدرجة أننا مش هـ نغامر لو رحنا لفويجو ثاني ونطلب حاجة غير السوشي. على عكس البرجر، السوشي بقى كان مسيطر، أول حاجة السلامون والتيمبورا نايجيري كانوا رائعين، الأرز كان مستوي كويس، التيمبورا بـ تكون مقلية بس فى نفس الوقت ما فقدتش طعمها، الكريسبي رول كان طعمه أقوى وأفضل بالنسبة لنا، الجولدن برمودا عبارة عن رول سلامون وجمبري وجبنة كريمي ملفوفين فى Seaweed مع أرز السوشي، وبـ تتقطع 5 قطع بعد ما تتلف وتتحمر فى زيت غزير، وبـ يقدم معاها صوص Spice Lemon Soy Sauce، الحقيقة ما كانش ده نوعنا المفضل لأن فكرة أنه مقلى غطت على طعم المكونات وكمان كان فيه طعم حاجة فى المكونات ضايقتنا "شخصيًا" لكن لما حطيناها فى الصوص السبايسي كان طعمها أفضل. اللى كان مفضل بالنسبة لنا كان بقى الكريسبي رول، وده عبارة عن جمبرى تيمبورا وأفوكادو وأرز من جوه، وعليه من بره أرز كريسبي بـ يقدم مع صوص الترياكي، فكرة المزج بين القرمشة والأرز الطري كانت ناجحة جدًا وطعمها مع الصوص كان مضبوط، ده أكثر نوع استمتعنا به الصراحة فى زيارتنا. "فويجو" مسيطر فى فرعه بالشيخ زايد، ده غير أن مساعده عدم وجود مطاعم ثانية للسوشي هناك، بس حتى هو لوحده محتفظ بجودة أصنافه من السوشي، لكن باقي الأطباق العادية.. إحنا مش متأكدين!

...

وان أوك: عن السوشي والستيك وشوية حاجات كمان نتحدث من الشيخ زايد
اصدرت في: 08/09/2015

أنك تقدر تحافظ على مستوى أكلتين من مطابخ مختلفة –وهما السوشي والستيك في حالتنا– موضوع صعب، بس واضح أن "وان أوك - One Oak" عنده رأي ثاني، وان أوك موجود على اليمين بعد بوابة تيفولي دوم مباشرة، وهو واحد من الأماكن المحبوبة في المكان. دخلنا المطعم ورحب بنا الجرسون ووصلنا لأماكننا جنب الشبابيك الزجاجية المطلة على تيفولي، بعد ما استلمنا المنيوهات واختارنا طلباتنا، وصلت سلة فيها عيش ومعاها بسلة بصوص الصويا وحبة البركة، مع إضافة غريبة من القرفة والزبدة، الأخيرة كانت مقطعة شرائح رفيعة دائرية وعملت توازن هائل بين الطعم المسكّر والطعم الحادق لما تأكلها مع العيش، البسلة كانت مسلوقة وبـ تُقدم في قرن البسلة الخاص بهم بطريقة شيك أضافت شكل جمالي للطبق. ندخل على الثقيل، بدأنا مع المنيو واختارنا من المقبلات تشيزي كريسبي كامومبير (55 جنيه)، وهو عبارة عن 6 قطع من جبن الكامومبير مقلية كويس مع صوص سويت شيلي، قطع الجبنة كانت ساخنة لدرجة أنها كانت سايحة تمامًا، وصوص السويت شيلي كان له دور مهم في ضبط الطعم، طعم الجبنة كان روعة وكميتها كانت مناسبة، وبكده نكون جاهزين للأطباق الرئيسية. بالنسبة للأطباق الرئيسية، اختارنا تندرولين فيليه (120 جنيه)، وطبق سوشي مكون من بينك أوك رول وبيستو رول وسبايدر رول، طلبنا الستيك يكون مستوي Well-done، وهو ده اللي حصل؛ ناس كثير هـ تقول الستيك لازم يكون Medium-rare، بس الستيك في حالتنا كان طري ومستوي كويس وسهل المضغ، وده أكبر دليل على جودة اللحم عند وان أوك، وصل مع الستيك بطاطس ويدجز تتبيلتها وتسويتها ممتازين ومعاهم صوص ليمون بالزبدة لذيذ. نروح على السوشي وألوانه وحركاته، السبايدر رول (62 جنيه/ 6 قطع) عبارة عن شريمب تمبورا، سلامون تمبورا وصوص ترياكي، كان طعمه روعة، والتوازن في النكهة بين الجمبري والسلامون كان هائل، من الرولات الشهيرة في المطعم بينك أوك رول The Pink Oak Roll بـ (48 جنيه/ 4 قطع) عبارة عن سلامون، كابوريا-مايونيز، شريمب تمبورا، أفوكادو، خيار وسمسم، كان حجمه كبير بس المميز فيه الطعم المتغير مع كل قضمة، وكل حاجة من المكونات عملت إضافة للطعم، بعدها روحنا للبيستو رول (46 جنيه 4 /قطع) عبارة عن شريمب تمبورا، سلامون، أفوكادو، خيار، جبن أبيض وصوص بيستو، وكان طعمهم خليط من الرولات اللي فاتت من ناحية الطعم، بس صوص البيستو هو اللى عمل الفرق عن البينك أوك. بعد ما قضينا على كل فتفوتة في الأطباق، طلبنا كوكتيل وان أوك (33 جنيه) عبارة عن موز، بلو بيري، فراولة، كيوي، خوخ طازج وأناناس، وفعلًا كان لذيذ ومنعش زي أسماء مكوناته بالضبط، بس الفكرة أن الموز والبلو بيري طعمهم كان طاغي. وصلنا لمسك الختام، وهو تشيز كيك نوتيلا (33 جنيه)، التشيز كيك المدورة تكونت من قاعدة من البسكويت اللذيذ، مع الكريمة اللذيذة وطبقة خفيفة من النوتيلا على الوش، صحيح طعمها حلو، بس واضح أنها كانت لسه طالعة من الثلاجة وقدموها قبل ما برودتها تقل شوية، وعلشان كده كانت باردة ومتصلبة شوية. بعيدًا عن بعض العيوب، وان أوك بـ يقدم اللي وعد به، وهو مستوى أكل ثابت.

...

فيوجن: أطباق آسيوية في جو مودرن في أمريكانا بلازا الشيخ زايد
اصدرت في: 30/08/2015

أحلى حاجة في منطقة السادس من أكتوبر والشيخ الزايد أن المطاعم والمحلات بـ تتجمع في أماكن معينة، توصل لها ويبقى أمامك مجموعة من الاختيارات اللانهائية اللي تناسب أي ذوق؛ بعكس القاهرة اللي بالرغم من اختياراتها اللي ممكن تبقى أكثر، إلا أنها منتشرة في أنحاء القاهرة وبالتالي بينهم مسافات. من ضمن الاختيارات الكثيرة الموجودة في أمريكانا بلازا في الشيخ زايد، قررنا نزور فيوجن - Fusion . زي ما هو واضح من الاسم، المطعم بـ يقدم مجموعة أطباق من مختلف البلاد الآسيوية زي الصين، تايلاند، الهند وطبعًا اليابان -السوشي. بعكس باقي سلسلة مطاعم أمريكانا –اللي هو واحد منهم– واللي سمتها العامة بساطة المأكولات والجو العام، فيوجن بـ يتميز بجوه الراقي وأطباقه المختلفة، ديكوراته مستوحاة من الطابع الآسيوي، ولكن مبسطة بطريقة مودرن، أغلبها باللونين البرتقالي والأسود، وخصوصًا اللون الثاني اللي كان لون معظم الكراسي والترابيزات. بدخولنا المطعم استقبلنا الجرسون وسألنا هـ نأكل إيه، واللي على أساسه هـ تتحدد منطقة جلوسنا. فالأكل الصيني له مكان مخصص، والسوشي له البار المخصص له، أما التابانياكي فده حوار ثاني خالص، وهو عبارة ترابيزة مجهزة بمكان للطهي، بـ ييجي الشيف ويعمل لكم عرض حي وتشوف أكلك وهو بـ يتحضر. بما أننا اختارنا المطبخ الصيني، الجرسون قادنا للجزء الخاص به، وقدم لنا المنيو اللي بالرغم من أن شكله يوحي بأنه كبير، إلا أنه في النهاية معظمه أكلات حارة فلو أنت زيّنا مالكش في الحاجة السبايسي اختياراتك هـ تبقى نوعًا ما محدودة. من فواتح الشهية اختارنا Golden Prawn Bags وهي عبارة عن بؤج عجين مقلية ومحشوة بالجمبري (40 جنيه) معها صوص شبيه بصوص "نووك تشام" الفياتنامي بدون الثوم والفلفل، مكوَناته الأساسية العسل الأبيض والخل. الصوص كان رائع وطعمه مضبوط، أما فاتح الشهية فبالرغم من أن العجينة الخارجية ممتازة التسوية من حيث القرمشة وكونها خفيفة، إلا أن الجمبري كان ناقصه تتبيل من أي نوع، أو حتى وجود مكوّن آخر معه. من الأطباق الرئيسية اختارنا نودلز بالخضروات (32 جنيه)، وطبق جمبري سويت أند ساور (88 جنيه) واللي بـ ينزل معاه أرز أبيض كطبق جانبي. النودلز كانت خفيفة وتعتبر أحسن حاجة أكلناها في التجربة ككل، إلا أننا لاحظنا أن كلمة "خضروات" تقريبًا معناها في فيوجن "كل أنواع البصل" لأن الطبق ما كانش فيه غير البصل بأنواعه (أحمر، أبيض وصيني)، وعلشان نبقى حقانيين كان فيه معهم قطعة ذرة رفيعة وشريحة عيش غراب. الجمبري المقدم مع صوص السويت أند ساور وقطع الخضروات والأناناس كان طعمه عادي، توقعنا أن الجمبري المقلي يكون مازال محتفظ بقرمشة خفيفة ولكن للأسف وقت تقديم الطبق كانت الطبقة الخارجية تشربت الصوص بزيادة لدرجة أننا حسينا أننا بـ نأكل عجينة سميكة غير مطهية، الجانب المضئ للطبق كان الأرز الأبيض، واللي كان معمول زي ما قال الكتاب بالضبط. مع الأكل طلبنا عصير ليمون (19 جنيه)، واللي بالرغم من أنه ما كانش بارد، إلا أنه كان مضبوط وكميته مناسبة. بعد كل الكلام ده طلبنا الحلو، وهو آيس كريم شوكولاتة مقلي (33 جنيه)، كان أول مرة نتذوقه وتقريبًا مش آخر مرة لأنه كان ثاني أحلى حاجة في التجربة، المزيج بين العجينة السخنة والشوكولاتة الباردة كان رائع وجديد علينا، ده غير أن الحلو في مجمله بسيط ووازن تعقيد الأطباق اللي سبقته في معدتنا. إجمالًا، التجربة كانت ممتعة والخدمة كانت ممتازة –سريعة جدًا في يوم مزدحم زي يوم الجمعة- بالرغم من أن الأطباق كان عليها ملاحظات، لو أنت كييف مطبخ آسيوي هـ تحس أنه تجاري نوعًا ما بالنسبة للأماكن المنتشرة في أنحاء القاهرة، لكن لو المطبخ الآسيوي جديد عليك ممكن تبدأ به كنوع من التسخين.

...

موكاي: مطعم سوشي في القاهرة الجديدة محتاج مجهود لمنافسة الأسماء الشهيرة
اصدرت في: 02/03/2015

السوشي شهرته دائمًا بـ تسبقه وسط مطاعم القاهرة، ودلوقت أجدد مطعم ينضم للسباق هو "موكاي سوشي – Mokai Sushi" في كونكورد بلازا مول في القاهرة الجديدة. المنافسة في المنطقة دي على أشدها، في وجود سوشي باي، موري سوشي، مكاني وقريبًا افتتاح فويجو وكلهم قريبين جدًا من بعض. موكاي مش بـ يقدم سوشي بس، المنيو فيها كمان أكلات متنوعة بـ تشمل أكلات سريعة وأطباق رئيسية، وحتى الشيشة موجودة عندهم، مكان المطعم موجود خارج المول وبـ ينقسم لجزئين –لهم مدخلين مختلفين– منفصلين، واحد للسوشي والثاني للأكلات السريعة، مع منطقة خارج المطعم مجهزة بدفايات، شيشة وشاشات LCD. دخلنا السوشي بار واختارنا كنبتين أمام بعض وسط أنغام الموسيقى الياباني التقليدية في الخلفية. الديكورات البرتقالي المبهجة مع الإضاءة الخافتة والنقوش الياباني على الحوائط بـ تضفي على المكان أجواء هادئة وتضبيطة القعدة بـ توفر لك الخصوصية المطلوبة. بعد استكشاف المنيو، طلبنا من قسم المقبلات تمبورا مورياويز Tempura Moriawase‏ بـ (50 جنيه)، وهو عبارة عن تشكيلة نيجيري سوشي (10.50: 12 جنيه)، إيبي أوشي سوشي Ebi Oshi Sushi(34 جنيه/ 3 قطع)، سلامون ساشيمي (35 جنيه/ 4 قطع)، سلامون تيماكي (32 قطعة) وماكي رولز (23: 90 جنيه). أول حاجة وصلت كانت التمبورا مورياويز، عبارة عن طبق فيه سمك مقلي، سبيط وجمبري مع خضروات، الاثنين كان عليهم طبقة مقلية خفيفة ومقرمشة طعمها روعة خصوصًا مع صوص التمبورا، وصحيح كل الأكل كان طازج، لكن كمية الخضروات كانت أكثر بكثير من كمية السي فوود نفسه. بعد شوية، لاحظنا أن السوشي كان جاهز للتقديم؛ الفكرة أن مافيش جرسون ظهر لفترة والطبق فضل مكانه على بار السوشي، وطبعًا السوشي مش من الأكلات اللي ينفع تستنى كثير. أول حاجة جربناها من السوشي كان سينسي ماكي Sensei Maki (74 جنيه/ 6 قطع)، ويعتبر من لفائف موكاي المخصوصة. شكله نفسه كان رائع بإضافة السلامون، الكافيار والسمسم بطريقة جذابة، خصوصًا أن التونة مع الأفوكادو، الجبن الأبيض والسلامون طعمهم كخليط كان هائل. الفيلادلفيا رولز (34 جنيه/ نصف كمية) كانت عبارة عن جبن أبيض، أفوكادو وخيار، وكلهم ملفوفين في سلامون مدخّن وعليه صوص ترياكي؛ كوكتيل بسيط من المكوّنات قدر يقدم رول خفيف ولذيذ. سوشي ثاني بإمضاء موكاي، لكن مش على المستوى. الباراديس رول– تمبورا، جبن أبيض وأفوكادو، وعليهم سلامون مدخّن وصوص يوزو yuzu لذيذ كان ينقصه نكهة اليوزو وفي الآخر طعمه كان قريب جدًا من الفيلادلفيا رول. ثلاث قطع من الإيبي سوشي مكانهم كان في وسط الطبق؛ قطع من السوشي المضغوط عليهم قطع جمبري صغيرة جدًا. من ثاني، اللفائف كان ناقصها أي نوع من أنواع النكهة المميزة، وفي نفس الوقت السلامون ساشيمي كان فيه نفس المشكلة برغم أنه كان طازج، نفتكر أن الساشيمي المتبّل كان هـ يبقى اختيار أحسن كثير. بالنسبة لمخروط السلامون تيماكي فكان جامد زي شكله، مع حشو من كمية مناسبة من السلامون، الخس، الخيار والأفوكادو ومغطى بأرز وطحالب نوري nori اليابانية، فعلاً قدر يقدم طعم مميز وقوام متماسك على عكس توقعاتنا. أما النيجيري سلامون، فالسمك من ثاني كان ينقصه النكهة بالمقارنة مع النيجيري اللي جربناه في مطاعم سوشي ثانية في القاهرة. لو هـ نتكلم عن موكاي، نقدر نقول أنه لطيف كمكان، رغم أنك لما تقارنه مع أسماء أشهر زي موري وفويجو، هـ يكون فيه فوارق طبعًا، معظم اختياراتنا كانت مُرضية، لكن الحاجات الضعيفة كانت معلِّمة معانا أكثر من الحاجات الحلوة.

...

وان أوك: عالم الستيك والسوشي تحت سقف واحد فى تيفولى الشيخ زايد
اصدرت في: 01/03/2015

الموضوع فى المكان ده كبير.. وتفاصيله كثير، تخيل كل حاجة تعرفها عن الستيك وقطعياته المختلفة وتتبيلاته وصوصاته إلى جانب السوشي بكل أنواعه تحت سقف واحد، ده اللى هـ تلاقيه لما تروح "وان أوك – One Oak" فى تيفولى الشيخ زايد، حاجة كده كأنك دخلت "مدينة الستيك والسوشي". مكانه فى دور علوى فى مبنى أول ما تدخل على اليمين، ديكور المكان متفرد جدًا، على الحوائط مكتوب نظام المكان فى أطباق الستيك، الأول بـ تختار قطعية اللحم اللى بـ تحبها: Tenderloin، Rip-eye، T-Bone.. إلخ، وبعدين بـ تختار التتبيلة Marination ودرجة التسوية، الموضوع تفاصيله كثير، أول ما وصلنا قعدنا جنب الواجهة الزجاجية اللى بـ تطل على مدخل تيفولى زايد، أعطونا المنيو بعد فترة طويلة من وصولنا وحسينا شوية أنهم مش مركزين معانا يمكن علشان اليوم ده كام زحمة أوى وكان ويك إند، المنيو كبيرة عبارة عن ورقة مقواة طويلة وتفاصيلها كثيرة جدًا، ناحية للستيك والناحية الثانية لأنواع السوشي. قعدنا كثير جدًا مش فاهمين المنيو ومحتارين نأخذ إيه، وبـ ندور على جرسون يساعدنا بس برضه قعدنا كثير عقبال ما جاء لنا حد، بس للأمانة هما مهذبين ومتعاونين وصبورين جدًا وساعدونا نختار أطباقنا، أول حاجة اختارنا شوربة ميسو Miso بـ 28 جنيه، ومن منيو السوشي طلبنا ليمون رول (6 قطع 85 جنيه) عبارة عن رول كريسبي وجواه جمبرى وسلامون وأرز، ومن الأطباق الرئيسية قطعية تندرلوين فيليه (200 جرام 95 جنيه) بـ ينزل معاها طلب جانبي واحد اختارنا بطاطس محمرة وتسويته Mid-Well وعليه صوص بصل مكرمل، وصدور فراخ محشية بالسباراجوس والبيف بيكون (90 جنيه) اختارنا معاها بطاطس مخبوزة. أول حاجة نزلت لنا كانت الشوربة، الجرسون قال لنا أنها شوربة يابانى ومفيدة جدًا للدورة الدموية وصحية، مكونة من معجون الميسو والتوفو والواكامى ومعاها حلقات بصل أخضر.. حد فاهم حاجة؟ حجمها كان كبير جدًا فى بولة سوداء ممكن ثلاثة أشخاص يشربوها، الصراحة إحنا ما عجبتناش أوى الشوربة لأن ريحتها كانت مليانة زفارة، تحس أنها مليانة حاجات بحرية لسه طالعة من المياه، شربناها مرة واثنين وثلاثة علشان نقنع نفسنا بها خاصة أنها مفيدة بس صراحة مش قادرين نهضمها، يمكن حد ثاني تعجبه. ثاني حاجة نزلت لنا السوشي، شكل الرولز مع التزيين اللى كان معمول لها فتح نفسنا، وبـ ينزل معاها أبريق صغير فيه صوص حراق شوية مش عارفين اسمه، بـ تصبه فى طبق صغير علشان تذوقه مع السوشي وطبعًا عصيان السوشي الشهيرة علشان التجربة تكتمل، طعم الجمبري المقرمش مع السلامون والخضار اللى فيها كان رائع، كان مزيج مقرمش مع طرى متوازن كطعم وكمية.. بجد اتبسطنا به وكنا عاوزين منه ثاني. بعد حبة حلوين نزل لنا الأطباق الرئيسية، قطعة اللحم كانت تسويتها كويسة من جوه لكن قطعها من بره كان صعب شوية، الصوص كان رائع، والبطاطس المحمرة كانت عريضة وطرية وفيها قرمشة خفيفة من بره، والفراخ برضه كانت تسويتها كويسة وطرية، الحشو اللى جواها ما كانش كثير لكن كان طعمه رائع، فيه حاجة لازم ننوه عنها أن الأطباق هنا كميتها كانت قليلة، بمعنى أن الستيك والفراخ نزل معاها ديكور واحدة بروكلى وواحدة طماطم شيري، المكان Sophisticated أوى والأسعار غالية شوية طبعًا لأننا بـ نتكلم عن مكان متخصص فى ستيك وسوشي، البطاطس المخبوزة كانت حلوة ومستوية كويس لكن الـ Sour Cream اللى عليها من فوق كان محتاج يكثر شوية. بعد الأكل سألنا على الحلويات والمشروبات اللى كانت غير مذكورة فى المنيو خالص، عرفنا من الجرسون أن فيه منيو جديدة بصور هـ تنزل قريب وهـ يضاف لها التحلية والمشروبات، بالنسبة للتحلية الجرسون جاب لنا 3 أطباق فيها 3 أنواع حلوى منها تشيز كيك بالبلوبيري، وتارت بالموز والكريمة (35 جنيه) اللى اختارناه، بالنسبة للمشروبات فيه أنواع كثيرة فريش أو سموزى يا إما مشروبات غازية، أخذنا عصير كيوي (25 جنيه)، تارت الموز ده كان أخف وأطرى وأحلى تارت موز أكلناه فى حياتنا، أخذنا أول معلقة والباقى اختفى، عصير الكيوي كان منعش وسكره مضبوط وكميته كويسة. تجربتنا فى "وان أوك" استثنائية وجديدة، تصميم المكان والفكرة والخدمة كلهم 10/ 10، روح المكان ده مع حد عزيز عليك حابب أنه يفتكر خروجة غير تقليدية ويتبسط.

...

ساكورا سوشى: أقدم مطعم يابانى فى المعادى
اصدرت في: 15/01/2015

مافيش شك أن المطبخ الياباني يعتبر من أكثر المطابخ المهضوم حقها فى مصر، الموضوع أكبر من مجرد أكلة سوشى، لكن فى ظل تجميع كل المطابخ الآسيوية فى مطعم واحد بـ يقدم أكل تايلاندى، وكورى، وياباني وصيني، بـ تزيد صعوبة تمييز الفرق بينهم. "ساكورا سوشى - Sakura Sushi" هو واحد من أقدم مطاعم المعادي. فى أول زيارة لنا فى 2010، في عز موضة السوشي فى القاهرة، تجربتنا هناك كانت ممتازة، ومن هنا قررنا نعمل زيارة جديدة للمطعم الصغير جدًا فى شارع 231 –جنب ستافولتا– ونشوف السنين عملت إيه فى المطعم الياباني المحبوب. مافيش تغيير تقريبًا فى ديكورات المكان عن جو المطاعم العائلية العادي، لكن الجرسونات هناك محتفظين بروحهم اللطيفة زى زمان، ورتبوا لنا مكان بسرعة وعرضوا مساعدتنا فى الاختيار من المنيو. من بين اختيارات مثيرة من الشوربة، والسلاطات والمقبلات، المنيو كمان تشمل عدد من الأطباق الرئيسية اللذيذة منها تشيكن كاتسو وسلامون ترياكي، مع أرز، نودلز ومنيو للسوشي. علشان نأخذ فكرة عامة، طلبنا هانا كومبو (130 جنيه)، المكون من 24 قطعة سوشي مقسمة إلى 10 سوشي رولز، 8 كاليفورنيا رولز و6 ماكي رولز من اختيارك، بالإضافة لطبق بيف ترياكى (60 جنيه) وطلب أرز مقلي بالخضروات (10جنيه). وقت التحضير كان سريع نسبيًا والأكل كان شكله لذيذ لمّا وصل. أكثر حاجة مميزة من بين الهانا كومبو كانت الكاليفورنيا رولز المقرمشة والمكوَّنة من شريمب تيمبورا، كابوريا وصوص ترياكى لذيذ، وكمان الفيلادلفيا رولز، المكوَّنة من سلامون وكريمة الجبن. صحيح السوشي كان طعمه لذيذ، وكمان حجمه مناسب، لكن كل قطع السوشي كانت غرقانة فى صوص الصويا أو بـ تتفكك قبل ما توصل للفم. الترياكى بيف كان واحد من أحلى الأطباق من حيث إضافة الترياكي صوص اللى جربناها فى حياتنا. اللحم كان صعب المضغ شوية، لكن المشكلة الأكبر كانت كمية الأكل القليلة بالمقارنة بسعره (60 جنيه). بعيدًا عن أن الأرز المقلي كان إضافه هائلة للبيف، غالبًا ده أحلى أرز مقلي أكلناه فى أى مكان، ويقدر ينقذ أى طبق رئيسي مهما كان ضعيف. خلينا نتكلم كمتخصصين، إحنا كنا متوقعين أكثر شوية من ساكورا؛ زمان كان الجو غير المريح بشكل عام بـ يعوضه الأكل والخدمة الممتازين، وساكورا لسه محتفظ بالكلام ده، لكن ينقصه بس يضبط شوية حاجات بسيطة.

...

مكاني: أكلات خفيفة وسوشي في مول داون تاون القطامية بالقاهرة الجديدة
اصدرت في: 18/12/2014

بالرغم من أن مكاني مش من الأماكن الجديدة على خريطة المطاعم في القاهرة، إلا أننا نادرًا ما بـ يذكر ضمن المطاعم اللي بـ تقدم أكل ما تذوقتوش قبل كده. يحسب له استمراره بثبات حتى بعد تعديل المنيو من وقت مش بعيد، والدليل على الاستمرار أن مكاني - Makani فتح فرع جديد في مول داون تاون القطامية بالقاهرة الجديدة. بـ يميز الفرع الجديد أن فيه أماكن للجلوس داخل وخارج المطعم، الديكورات ما تختلفش عن الفروع الثانية؛ نفس مجموعة الألوان الترابية الفاتحة بالإضافة لمجموعة من البلاطات الملونة. استقبلنا الجرسون أول ما دخلنا، وقعدنا في منطقة الأوت دوور زي ماطلبنا. أثناء زيارتنا المكان كان نوعًا ما زحمة، ولكن من غير ما يضغط على أعصابك. بالرغم من تعديلات المنيو والاستمرار، إلا أن مكاني عيبه أنه بـ يقدم كل ما هو معتاد تقديمه في أي كافيه عادي. والاختيارات "الآمنة" دي بـ تشمل كل حاجة: أنواع الشوربة واللي أسعارها بـ تتراوح بين 24 جنيه و28 جنيه، سلاطات (من 35 حتى 52 جنيه)، ساندوتشات (24 – 47 جنيه)، وأطباق محدودة من الباستا والحلويات. أما السوشي فمكاني بـ يقدم مجموعة كبيرة من الساشيمي والرول المقلي زي النيجيري، تشيراشي وغيرهم. طلبنا من الجرسون –اللي جاء بسرعة علشان يأخذ الطلب- مجموعة من فواتح الشهية، أولهم سلاطة سيزار بالفراخ (45 جنيه)، سبرينج رولز بالخضروات (19 جنيه)، وسبرينج رولز بالجمبري (28 جنيه). طلبنا من جرسون الشيشة واحدة بالفراولة والكريمة (45 جنيه) واللي كانت أول حاجة تقدمت لنا، قبل بقية الطلبات اللي هي نفسها ما أخذتش وقت في الوصول. الشيشة كانت مسكرة بالنسبة لنا، ده غير أنها كانت ثقيلة جدًا لدرجة أننا تعبنا بعد فترة تدخين مستمر منها. أما السبرينج رولز فكانت مقرمشة ومضبوطة، مكوناتها وفيرة. السلاطة كانت خفيفة وفريش، ولكن حسينا أن ناقصها حاجة. الخدمة كانت مضبوطة وسريعة، حتى جرسون الشيشة كان متابع الولعة باستمرار، ولكن للأسف الموضوع اختلف تمامًا لما طلبنا الحساب؛ طلبناه حوالي 3 مرات وجاء به في المرة الرابعة. اللطيف أن كل مرة نقول له أننا طلبناه المرة اللي قبلها، ينكر تمامًا أن ده حصل. من الآخر مكاني مناسب لقعدة حلوة، الأكل والخدمة مستواهم جيد. يمكن ما يختلفش كثير عن الفروع الثانية فيما عدا الاستفادة من اتساع المكان وموقعه.

...

بوب سوشي: حجم كبير وأنواع متميزة وجديدة في الدقي
اصدرت في: 11/12/2014

كنا رحنا قبل كده في 2011 "بوب سوشي -BoB Sushi " في الدقي وكان في الوقت ده عنده ترابيزتين بس، ولما رحنا المرة دي الحقيقة الموضوع كبر وبقوا 4 ترابيزات، صحيح المكان صغير بس الطعم والجودة يستاهلوا أنك تروح له من آخر الدنيا. Bob- Sushi عنده 2 منيو، واحد لـAll you can eat وواحد للطلبات العادية، والحقيقة أنهم الاثنين متنوعين ومشجعين جدًا أنك تبقى عاوز تطلب كل حاجة، الأسعار عنده معقولة ومش غالية، كمان All you can eat بـ 170 جنيه بس. أكثر حاجة عجبتنا فيه أن حجم السوشي كان كبير مش زي باقي المحلات بـ يبقى أصغر، كمان بـ يحط لك في الطبق أول وآخر الرول اللي حجمه بـ يبقى أكبر من السوشي العادي، هـ يبقى صعب أنك تقسمها على قضمتين وصعب أنك تأكلها مرة واحدة، بس هي دي روح المغامرة أنك تتفنن تقسمها بالنص من غير ما توقع المكونات اللي جواها. الحقيقة أننا طلبنا منيوAll you can Eat وطلبنا حاجات كثيرة قوي، ومعظمها كان حلو جدًا بس قبل ما نبدأ لازم ننصحك أنك لما تحب تغامر وتطلب المنيو ده لازم تكون مش عيان ولا أكلت قبل ما تروح، لأن أي قطعة هـ تسيبها في الطبق هـ تتحاسب عليها زيادة والقطعة بـ 7:30 جنيه والحسابة بتحسب، فاطلب بعقل وخلص واطلب ثاني. أكثر الأنواع اللي عجبتنا كانت Crunchy Roll الرول 6 قطع، كان مقرمش ولذيذ ومتوازن في مكوناته وcrispy Roll كان تحفة وحراق وبـ يطرقع في الدماغ ومتبل ببراعة، وspider Roll كان تجربة متميزة بـ تحسسك بتذوق كل مكون على حدة بمزاج. أما Conafa Roll فكانت مقرمشة ولذيذة ومسكرة بس بلاش تأكلوها مع الترياكي صوص علشان هـ تبقى مسكرة قوي، كانت مقرمشة من بره وطرية من جوه زي ما بـ نحبها بالضبط. طلبنا كمان fried crunchy roll، بس خلي بالكم أنه بالبيض اللي كان طازة ومقرمش ولذيذ، وقلنا نجرب نوع جديد BoB Roll اللي كان مكون من أغلب الحاجات اللي بـ نحبها جمبري وجبنة وسلامون مدخن وترياكي صوص، وكان روعة. وجربنا pink lady roll بس للأسف ما عجبناش صوص السمسم مع صوص الكريب مايو، كانت حاجة طعمها سخيف جدًا بالنسبة لنا أشبه بالصوص اللي مالوش طعم. وعجبنا جدًا كمان الـ ،Fried crispy Roll with shrip الأرز كان متحمر تمام والجمبري كان طازة. والـMaki cheese كانت ممتازة وطازة هي والـ Nigiri shrim. بشكل عام كانت وجبة لطيفة وخدمة ممتازة، قدرنا نعرف أن أغلب زبائن بوب سوشي بـ يطلبوا دليفري، وممكن كمان تطلب طلبك وتيجي بعدها بنصف ساعة، تلاقيه مستنيك.

...

شاهد المزيد
مواضيع خاصة

النهارده في القاهرة: وجبة فنون كومبو.. إكسترا مسرح وأفلام

يوم جديد في كايرو. طبعًا فيه الروتين المعتاد من شغل ومشاوير وغيرهم. وحاجات ممكن تحسسك بشوية ملل. بس على مين؟ طول ما أجندتنا موجودة انسى إن الملل يعرف لك طريق. علشان ال