مكسيكي مطاعم in Cairo, Egypt

مطاعم

تابلا لونا: أطباق أمريكا اللاتينية المميزة وصلت ويست تاون هب
اصدرت في: 02/11/2015

بعد ما بدأ في المعادى وحقق نجاح كبير وسمعة كويسة، وكمان كان أحد الفائزين في جوائز اختيارات محرري كايرو 360 لعام 2015 طبيعي لازم يحصل انتشار لمطعم أمريكا اللاتينية الأكثر من رائع "تابلا لونا – Tabla Luna"، وثاني محطة وصل لها هي ويست تاون هب في الشيخ زايد. أول ما هـ تدخل من المدخل الرئيسي هـ تلاقيه أول مطعم على اليمين، باللوجو المميز بتاعه هـ يشدك، إلا أن ما كانش فيه منيو مطبوع نختار منه، المنيو عبارة عن سبورة كبيرة محطوطة في كذا مكان في المطعم وأنت بـ تختار منها، وطبعًا ده كان شيء غير مريح بالنسبة لنا شوية واضطر الجرسون أنه يقول لنا المنيو كله بالتفصيل، وبرضه فيه حاجات وقعت مننا بسبب أن صوت الموسيقى كان عالي في المكان، ده غير أن لما الدنيا تبقى ليل السبورة بـ تكون غامقة ومافيش إضاءة كافية وبالتالي الرؤية صعبة. بعد شرح الجرسون لنا كل المنيو -واللي لاحظنا أن فيها شوية أصناف جديدة مش موجودة في فرع المعادي- اختارنا منها تشيكن أنشيلاداChicken Enchilidas بـ (80 جنيه) ودي عبارة عن عيش تورتيلا محشي فراخ وجبنة وخضار ومخبوز في الفرن على الطريقة المكسيكية، وكمان Arroz Con Camaron بـ (110 جنيه) وده عبارة عن أرز بالجمبري بـ يقدم مع سلاطة عليها صوص مانجو وكمان شريحة مانجو للتزيين، و S. Con Pipanبـ (105 جنيه) وده 3 قطع من السلامون ستيك مقدمة على سويت كورن مهروس مع بعض القطع الصحيحة، وأخيرًا Lomo Saltado بـ (105 جنيه) وهو شرائح ستيك مقطعة مع البصل بـ تقدم مع البطاطس المحمرة. اللى لاحظناه في المنيو أو الأطباق هنا أنها معهاش طلبات جانبية بـ تختارها، وكمان مافيش أطباق خضار ولا حتى خضار سوتيه لأن دي طبيعة أطباق منطقة أمريكا اللاتينية، يعني تابلا لونا هـ يخليك تعيش التجربة الأصلية، عقبال ما يجهز الأكل شربنا ليمون مينت (20 جنيه) بـ يقدم في أبريق صغير زجاج وأنت بـ تصب الكمية اللى أنت عاوزها، العصير كان منعش جدًا وسكره مضبوط ونسبة الليمون للنعناع مضبوطة برضه، وكمان طلبنا طلب جانبي بطاطس محمرة (12 جنيه)، وسلاطة Ensalada de Casa بـ (35 جنيه) مكونة من بنجر وفاصوليا بيضاء وخس وطماطم مقطعة صغير، بس للأسف لما جاءت لنا ما كانش فيها فاصوليا بيضاء، بس كانت حلوة وفريش وطعمها جديد خاصة أن البنجر ما كانش مسكر أوي للناس اللى بـ تتضايق من سكره. ندخل بقى على الأطباق الرئيسية، أحلى طبق في رأينا ذقناه من الأربعة هو التشيكن أنشيلادا، الجبنة مع الفراخ مع الخضار مش هـ نعرف نشرح لكم حلاوتها، ممكن من وصف المكونات تحسوا أنها عادية بس هي محتاجة تذوقوها علشان تحسوا قد إيه طعمها كان حلو، الأرز بالجمبري كان حلو جدًا برضه، كنا حاسين بس أن كمية الجمبري قليلة بالنسبة للأرز، وفكرة شريحة المانجو اللى بـ تقدم مع السلاطة ومقطعة مربعات بحيث تأكلها من القشرة على طول جديدة وعجبتنا وأضافت لطعم الطبق الإجمالي، قطع السلامون كانت معمولة حلو إلا أننا حسينا أنها ناشفة شوية مافيهاش عصارة كافية، والسويت كورن المهروس معاها كان مزيج ناجح، أخيرًا شرايح البيف كانت طرية ومستوية كويس جدًا مع البصل والفلفل والبطاطس المحمرة تخينة شوية عن ما بـ نحبها لكن كانت مقرمشة من بره وطرية من جوه. مسك الختام بقى الحلو، قبل ما نروح هناك أصحابنا رشحوا لنا Torta de tres Leches بـ (40 جنيه) ودى عبارة عن سبونج كيك غرقانة صوص كريمي وعليها من فوق مارينج طري، إحنا لازم نعرف التورتا دي بـ تتعمل إزاي، دي أحلى مرة نأكل فيها كيك خفيف وسبونج أوي كده لأن كمان الصوص الكريمي ده خلاها أطرى من المعتاد، وطعمها مع المارينج خاصة أنه من فوق عليه سكر محروق كان روعة، وكمان شربنا Espresso double بـ (22 جنيه) كانت مضبوطة وضبطت دماغنا في آخر زيارتنا. استمتعنا بزيارتنا في "تابلا لونا"، كنا محتاجين بس يعيدوا النظر في موضوع "المنيو السبورة" بس إجمالًا حلوة تجربة أنك تأكل أصناف تحسسك أنك سافرت بلد ثانية جديدة ورجعت ثاني.

...

بليز: مطعم وكافيه بروح مختلفة في مصر الجديدة
اصدرت في: 19/12/2013

هو إحنا بس اللي بـ نحس أن الكافيهات والمطاعم الموجودة في كل منطقة بـ تبقى لها طابع مميز مختلف عن المناطق الثانية؟ المهندسين غير المعادي غير مصر الجديدة غير وسط البلد؛ لدرجة أننا متخيلين لو غمضنا عيوننا وفتحناها داخل أي مطعم أو كافيه ممكن نخمن إحنا في منطقة إيه من غير ما نشوف الشارع اللي بره، ولا ممكن تكون دي الخبرة اللي اكتسبناها من شغلنا في كايرو 360؟ افتكرنا الموضوع ده لأننا في زيارتنا لـ «بليز – Blaze» الموجود في شارع النزهة في مصر الجديدة حسينا أول ما دخلنا أننا اتعزلنا عن أجواء مصر الجديدة، وحسينا بالتحديد كأننا في أحد كافيهات المهندسين، كافيهات المهندسين اللي لها طابع مميز ومشهورة بالصخب والشيشة والتجمعات الشبابية من الجنسين. «بليز» كده بالضبط، مساحة واسعة جدًا بمدخل كبير ببوابة خشبية وفيه تراس خارجي مغطى بالمشمع وطبعًا الجو فيه بارد جدًا لكن الدفايات منتشرة بين كل الترابيزات، وفيه قعدة داخلية مغلقة لكن كله مسموح فيه بالتدخين والشيشة اللي هي من أبرز سمات المكان، فالأفضل لغير المدخنين أنهم يقعدوا في المساحة الخارجية المتهوية شوية أحسن. ديكوات أنيقة وإضاءة ضعيفة جدًا بشكل متعمد، بالنسبة لنا ما كانتش رومانسية زي ما هم قاصدين قد ما هي كانت متعبة في قراءة المنيو "أو قراءة أي حاجة طبعًا" غير أن المكان صعب جدًا يبقى رومانسي بكمية الشيشة دي والإقبال الكبير من الشباب عليه، وأغلب التجمعات واضح أنهم من زبائن المكان لأن أي حد بـ يدخل بـ يسلم على كل الناس على كل الترابيزات تقريبًا، جو "كافيهات المهندسين" قوي بقى. الأهم من القعدة هنا هي منيو التكس – مكس الخطير اللي بـ يعمله «بليز»، بـ يعمل برجر وفاهيتا وستيك أمريكاني أصلي، وشوية رابس وكاسيديا مكسيكي بجانب الباستا وبعض أطباق الدجاج والسالمون والجمبري. إحنا المرة دي جايين وعارفين أنهم بـ يعملوا أكل كويس بعد ما شكر لنا فيه بعض أصدقائنا، وبالتجربة تأكدنا أن الشيفات هنا ممتازين، بـ يعملوا فاهيتا ميكس جمبري ودجاج ولحم Blaze Fajita زي ما بـ يسموها (72 جنيه) وبـ تُقدم مولعة على الجريل ومعاها كل مستلزمات الفاهيتا من Sour Cream وخلطة الطماطم والفلفل الحارة والجبن المفروم وعيش التورتيا والأرز بالبهارات علشان تعمل البوريتو المكسيكي بتاعك بنفسك، تتبيلة الفاهيتا عالمية والتسوية وطريقة التقديم وكل حاجة، الطبق ده ما ينفعش تيجي هنا وما تطلبهوش. جربنا كمان الـ Cow Boy Tenderloin ستيك (105 جنيه) وهو عبارة عن قطعة ستيك خالية تمامًا من الدهون وعليها شرائح بيكون بقري وحلقات بصل محمرة ومغطاة بصوص مشروم، لتاني مرة بـ ننبهر بالتتبيلة الرهيبة للحم نفسه والتسوية الـ Well Done الممتازة، والإضافات كلها فريش وغنية بالطعم، بس مزازة اللحم نفسه بجد معجزة، الكميات كويسة في الأطباق بالذات مع الأصناف الجانبية اللذيذة زي السوتيه والبطاطس البيوريه بالزبدة، وجبة رائعة بجد واكتملت بطبق مقبلات Blaze Mix بسعر (62 جنيه) اللي فيه دجاج تندر ولفائف الكاساديا بالخضار واللحم والبطاطس المسلوقة و3 أنواع من الـ Dips والبافلو وينجز أو أجنحة الدجاج الحارة اللي هي كانت أسوأ حاجة في وجبتنا لأن كان فيها رائحة زفرة مش لطيفة. لما سألنا عن منيو الحلويات الجرسون المهذب جاب لنا طبق كبير فيه قطعة من كل صنف من أصناف الحلويات اللي عندهم علشان نختار منها "لايڤ" وفعلًا عجبنا شكل البراون تشيز كيك (36 جنيه) وكان طعمها أجمد من شكلها كمان، يعني لا غبار على تجربتنا هنا من حيث مستوى الأكل خالص، كل المشكلة كانت فيه الدوشة والزحمة اللي في المكان، مع أنه ما كانش ويك إند ولا مناسبة ولا حاجة، بس زي ما قلنا لكم كل الموجودين هنا معتبرينه بيتهم تقريبًا. الخدمة سريعة ومحترفة والنظافة والنظام جيدين جدًا "باستثناء القطة اللي دخلت وأربكت الناس في التراس الخارجي" وفي النهاية «بليز» هـ يفضل واحد من الأماكن المميزة جدًا والمختلفة عن كل كافيهات مصر الجديدة.

...

أبل بيز: فرع جديد للسلسلة الأمريكية الشهيرة في سيتي ستارز
اصدرت في: 24/11/2013

اللي مايعرفش «أبل بيز – Applebees» بـ نقول له أنه واحد من أكبر المطاعم الأمريكية المشهورة والموجودة في معظم الدول العربية والأوربية وله أكثر من 2000 فرع حول العالم، وأن فرع سيتي ستارز مش أول فرع يفتح في مصر، لكن كان فيه فرع في مساكن شيراتون ولكن تم غلقه لعدم مطابقته للمواصفات، وفتح فرع ثاني في مركب بلو نايل الشهيرة، لكن الفرع الموجود حاليًا في الدور الخامس في المرحلة الأولى في سيتي ستارز نقدر نقول عليه أول "توكيل حقيقي" للمطعم في مصر وحق امتياز مطابق لكل المواصفات الخاصة بالسلسلة العالمية. الشكل هو الـ American Diner المعروف زي مطاعم «تشيليز» و «فدركرز»، الترابيزات الكبيرة باللون الخشبي الفاتح والكراسي المغطاة بالجلد المريحة جدًا، المكان حلو بجد وبعد لما تقعد هـ تحس أن المكان مألوف بسبب الترحاب والبساطة اللي بـ يقابلك بها الموظفين، وكلهم على درجة عالية من الثقافة والتخصص وواضح أن تم اختيارهم بعناية. دخلنا المكان واستعرضنا المنيو اللي جوعنا من أول صفحة من شكل الأطباق فيه والوصف الدقيق لكل وجبة. المنيو كانت مبهرة بمعنى الكلمة، وبعد شوية حيرة لجأنا للجرسون وطلبنا ترشيحاته، فقال لنا على طبق ستيك أوز اسيكليت الـ Sizzling أو اللي بـ يتقدم مولع زي الفاهيتا على الجريل (115 جنيه)، هو ده الكلام! طعم مختلف وتتبيلة ستيك ما حصلتش، مع أرز وسوتيه. قطعة لحم مشوية بدون دهون "حسب الاختيار" مع صوص المشروم وحلقات البصل والبطاطس المشوية، واختيارنا الثاني كان تريو الجمبري (119 جنيه) المكون من 3 أنواع من الجمبري، المشوي على السيخ والمطهي بطريقة الباترفلاي بالزبدة والليمون والأعشاب والمقلي العادي، بـ يُقدم مع أرز وسوتيه برضه، ولا كأننا في أحسن مطعم سي فوود في بحري! مذاق رائع وكل طعم مختلف وكأننا فعلًا طالبين 3 أطباق مش طبق واحد، لأن الكميات كبيرة بطريقة ملحوظة، وما قدرناش نخلص كل الأكل اللي نزل أمامنا، خاصة أننا كنا طلبنا طبق مقبلات متنوعة (Appetizer Sampler) الكبير بـ 82 جنيه اللي كان فيه ستيكس موتزاريلا وأجنحة الدجاج المخلية الحارة "حسب رغبتنا" وطبق الـ Spanish Dip اللي فيه مزيج من الخرشوف والسبانخ بصوص الكريمة مع مقرمشات الدوريتو والكاساديا المكسيكية الطازجة بالدجاج والبيكون البقري، الطبق ينفع وجبة متنوعة لوحده. ما خلصناش كل الأكل اللي أمامنا قاصدين علشان نسيب مكان للحلويات المغرية الموجودة في منيو مستقل على الترابيزة، وطلبنا كيك بلوندي الرهيب (44 جنيه) المكون من طبقة كيك من عجينة المكسرات، بـ تُقدم باردة على جريل ساخن، وبـ يتم صب سيرب الكريمة الخاص بها أمامك علشان يعمل صوت الطشطشة المثير ويندمج فورًا مع كل الكيك والمكسرات اللي في الجريل، اختراع مش هـ تلاقيه في أي حتة، والاهم أن الطعم خطير وفريد ممكن نيجي مخصوص علشان البلوندي اللذيذة. الخدمة في المكان ممتازة والموظفين زي ما ذكرنا محترفين ومهذبين، وما كانش بـ يفوت دقيقتين قبل ما يملأوا كوب البيبسي الـ Refill اللي أمامنا لو نقص، لا غبار على زيارتنا لمطعم «آبل بيز» وعلامة صح كبيرة بـ نحطها أمامه في قائمة "المفضل" اللي لحسن الحظ كبرت قوي عندنا الفترة الأخيرة.

...

تشيليز: أكلات أمريكية ومكسيكية في تيـﭭولي دوم
اصدرت في: 15/02/2012

اتكلمنا قبل كده عن «تشيليز» لكن عن فروع ثانية في الزمالك وهليوبوليس، لكن زيارتنا المرة دي كانت بهدف الاستمتاع بساحة طعام «تيـﭭولي دوم» الموجودة في ميدان ألماظة في مصر الجديدة، واختارنا «تشيليز» دونًا عن كل المطاعم الموجودة هناك لأننا بـ نعتبره أيقونة الفوود كورت دي وبـ نحب اللوجو المميز بتاعه باللون الأحمر اللي واضح من آخر الشارع. ميزة الفرع ده من «تشيليز» أنه فيه كل أنواع القعدات، سواء الكراسي المرجيحة المميزة للمكان ودي موجودة في الجزء المفتوح خارج المحل، وفيه ترابيزات الأمريكان داينر المربعة العادية بالداخل اللي بـ تفكرنا بكراسي عربيات القطار اللي وراء بعضها ودي موجودة داخل المطعم. لكن الأجمل كان التراس الخارجي في الدور العلوي وده اللي إحنا قعدنا فيه علشان من هناك المنظر تحفة، وهـ تقدر تشوف تيـﭭولي كلها بالمساحات الخضراء والنافورات وباقي المطاعم وكمان الشارع الخارجي. يعني نقدر نقول أن أجمل حاجة في التجربة هو المنظر من تراس «Chili's» رغم أن الدنيا كانت برد شوية في التراس ده. المنيو هو أكبر منيو لأكلات التكس- مكس المعروفة أو أكلات الجنوب الأمريكي والمكسيك، واللي بـ تتنوع بين البرجر بأشكاله والستيك والفاهيتا والبطاطس والتاكو وخبز الكاسيديا وجبن الناتشوز وفلفل الهالوبينو وصوصات الطماطم الحارة. «تشيليز» غني عن التعريف عند ناس كثير مدمنين أكلاته وقعدته الحلوة، وأحيانًا بـ يروحوا مخصوص علشان يأكلوا حاجة حلوة زي الآيس كريم والبراونيز والعصائر الطبيعية والآستوائية والسلاش. علشان تقعد في «تشيليز» لازم تجرب الفاهيتا، طبق تريو الفاهيتا (79 جنيه) فيه 3 أصناف هم اللحم والدجاج والجمبري كلهم مقطعين شرائح ومشويين على الجريل مع الفلفل الأخضر والبصل وبـ ينزل معاهم طبق ثاني فيه مكعبات الطماطم على الطريقة المكسيكية والكريمة اللي من غير ملح (Sour Cream) والجبن المبشور مع الجزر، وهي دي إضافات الفاهيتا لكن بـ تيجي بشكل منفصل علشان تعمل أنت بنفسك لفائف الفاهيتا بعيش الكاسيديا الأبيض حسب رغبتك، ورغم أن تقريبًا مافيش ملح على اللحوم خالص، إلا أن الطعم الرائع والشواء الجيد خاصة للجمبري خلانا مش عاوزين نزود أي توابل واكتفينا بالكريمة والجبن المبشور. طبق ثاني من أيقونات تشيليز هو ستيك سولانو (94 جنيه) مع صنفين من اختيارك من البطاطس المحمرة أو الأرز أو الذرة أو البطاطس المهروسة أو الخضار السوتيه. (سولانو ستيك) فيه قطعتين لحم كبار (240 جرام) مشويين على الجريل بنكهة الأعشاب وتوابل الغرب الجنوبي الأمريكي مع رقائق لحم بقري وعيش الثوم المحمص. اللحم كان مستوي كويس وناقص ملح لكن برضه ما كانتش مشكلة لأنه فريش جدًا وهـ تحس أنك عاوز تأكله من غير أي إضافات والأرز المكسيكي المميز مع الذرة كان خطير. جنب الأطباق الرئيسية جربنا طبق مشهيات هو التكساس فرايز (39 جنيه) وهو عبارة عن بطاطس محمرة مغطاة باللحمة المفرومة بالصوص الأحمر والجبنة السايحة وحلقات فلفل الهالوبينو مع صوص الرانش الحار. وده ينفع وجبة لوحده لأنه كبير ولذيذ وبـ يشبع. ممكن تطلب أي صنف جانبي زي البطاطس البيوريه المغطاة بالجبن أو السوتيه بـ 10 جنيه فقط، ومع الفاهيتا لو طلبت صنف واحد بـ تأخذ 2 بسعر واحد. والبيبسي طبعًا ممكن تملأه أكثر من مرة وسعره 16 جنيه. بعد الوجبة الدسمة والخفيفة والصحية في نفس الوقت ما كانش فيه مكان لأي حلويات أو مشروبات، لكن عرفنا أن الشيك لو عدى 200 جنيه ممكن تأخذ خصم 10 % على قيمة فاتورة الزيارة التالية، فقررنا الزيارة القادمة تبقى لكيك الشوكولاتة والموكاتشينو وبس. الخدمة ممتازة وسريعة ومدير المطعم جاء لنا بنفسه علشان يطمئن أن كل حاجة تمام. «تشيليز» هـ يفضل دائمًا واحد من اختيارتنا المفضلة وسط الكم الهائل من المطاعم الأمريكية في مصر، خاصة فرع «تيـﭭولي دوم».

...

تاكو هت: أكل مكسيكي آخر شطشطة في مول العرب
اصدرت في: 21/11/2011

مول العرب بقى من المولات المهمة حاليًا لأنه بـ يضم المئات من المحلات والكافيهات والمطاعم والماركات العالمية (وقريبًا دور عرض سينما) فـ بقى مكان بـ يفضل يروحه كل الناس حتى البعاد عنه لأنهم هـ يلاقوا كل حاجة هما محتاجينها تحت سقف واحد.. حتى الأكل. في منطقة الطعام Food court في المول هـ تلاقي على الناحية الشمال وأنت داخل مطعم «تاكو هت – Tako Hut» جذاب بلونه الأحمر الساخن، أول ما قرأنا اسم "تاكو" عرفنا أنه بـ يقدم أكل مكسيكي، ولأننا بقالنا كثير ما أكلناهوش قلنا نخوض التجربة ونشوف بـ يقدموا إيه. المنيو حجمها مش كبير، يا إما بـ تختار من تشكيلة ساندويتشات "البوريتو" (دجاج، ستيك، أو مقرمشة) أو "التاكو" (دجاج، ستيك، رومي، لحم مفروم) أو وجبة من اثنين: فاهيتا اللحم أو فاهيتا الجمبري أو الماتشو ناتشو (وهي رقائق الناتشوز بالخلطة المكسيكية)، فيه كمان أطباق جانبية زي البطاطس المحمرة أو المهروسة، وسلطة التاكو، وحلقات البصل، بطاطس وشوربة التشيلي. ومافيش قائمة للتحلية ولا المشروبات. الغريب في المنيو أن الساندويتشات ما كانش مكتوب عليها أسعار، بس فهمنا بعدها أن تقريبًا سعرها موحد (21 جنيه)، جربنا في البداية تاكو التشيكن وبوريتو التشيكن لأن الستيك ما كانش موجود خالص وقت زيارتنا، عامة كل اللي ذقناه في زيارتنا كان فيه كمية فلفل وشطشطة مش طبيعية، حتى أن البطاطس البيوريه (12 جنيه) "واللي ما كانتش زي اللي في المنيو" كانوا حاطيين فيها زيتون مخلل وفلفل كثير. الفراخ طعمها حلو، مشكلة التاكو أنك لازم تأكله بالعرض وهو في الورقة الملفوفة (لأنه عبارة عن نصف دائرة) علشان الدنيا ما تزروطش منك من كل حتة، والبطاطس المهروسة كمان كانت حلوة ماعدا تجنب بس أنك تأكل الفلفل الكثير اللي فيها لو مالكش في الأكل الحريف قوي. طلبنا كمان سلاطة التاكو (16 جنيه) قلنا يمكن تهدئ الموضوع شوية لقيناها برضه فيها زيتون وفلفل أخضر مشطشط مغرق السلطة مع رقائق الناتشو والكريمة الحامضة والخس وصوص حار، السلطة كان طعمها حلو بس كان ممكن تبقى أحلى لو قل الفلفل شوية. جربنا كمان البطاطس المحمرة بتاعتهم لكن للأسف كانت مش حلوة قوي، شكلها حلو من بره لكن ناشفة من جوه ناقصة تحمير أو تجهيز. المطعم ده مناسب زي ما قلنا لهواة الأكل الحريف، ولو نفسك هفاك على أكل مكسيكي أكيد هـ تروح لـ "تاكو هت" علشان تستمتع به، كمان أنت ممكن تأخذ ساندويتشك التكس مكس المفضل مع بطاطس وبيبسي (كومبو) بـ 28 جنيه. كمان وجبة الأطفال بـ 13 جنيه عبارة عن: برجر دجاج أو ناجتس مع مشروب وبطاطس. وأخيرًا وجبة التوفير العائلية (87 جنيه) عبارة عن: 2 تاكو دجاج، و2 بوريتو دجاج، و2 ماتشو ناتشو، و2 بطاطس محمرة و4 مشروب بيبسي. وعندهم خدمة للطلبات الكبيرة للمجموعات والمناسبات Catering. "تاكو هت" لهم فروع كثيرة جدًا خارج مصر في الرياض والأحساء والدمام والظهران وجدة والمدينة.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن