مشويات مطاعم in Cairo, Egypt

مطاعم

الست أمينة: توصيل سريع وجودة معقولة في المعادي
اصدرت في: 10/09/2015

في الفترة الأخيرة انتشر قوي مطاعم الطبخ المصري الأصيل، أو الأكل البيتي، خاصة أنه بـ ينقذ المرأة العاملة من عمل عزومة كبيرة، بـ تحتاج لوقت ومجهود، مش دائمًا بـ يبقى متوفر. ومن أوائل المطاعم اللي بدأت تكون سمعة قوية لأكلاتها الممتازة، كان مطبخ الست أمينة، اللي مكانه في المعادي وبـ يوصل لأي حتة في القاهرة، وكنا طلبنا منه أكل قبل كده في 2013. الست أمينة بـ يقدم كل أنواع الأكلات اللي ممكن تتخيلوها من شوربة وسلطات ومقبلات وطواجن ومحشي و أنواع لحمة مختلفة زي البيكاتا بالشامبنيون والفراخ الرستو ده غير اللحوم والدجاج المشوي. وسط كل ده قررنا أننا نجرب الطواجن اللي كانت مغرية جدًا، فـ طلبنا طاجن فريك باللحمة بـ 30 جنيه، وطاجن لسان عصفور باللحمة بنفس السعر، وسلاطة بطاطس بـ 6 جنيه، وكحلو طلبنا رز بلبن بـ 10 جنيه. الأكل وصل في أقل من ساعة، ودي حاجة تحسب لهم الحقيقة، خاصة مع التغليفة المتينة اللي خلت الأكل جاي سخن مولع، كارتونة كبيرة فيها طاجنين، كل طاجن عليه فويل وبلاستك يكفي شارع، المهم بدأنا بسلاطة البطاطس، وكانت حلوة جدًا ومضبوطة من غير توم زي ما بـ نحبها، مجرد مايونيز وبطاطس مسلوقة وفلفل. بعد كده بدأنا بطاجن لسان العصفور باللحمة، واللي كان سخن وجميل، صحيح كان معمول بالصلصة، وده غريب علينا، بس في الإجمال طعمه كان حلو، أما الغريب فهو طاجن الفريك باللحمة، لأن الخلطة بتاعته كانت نية شوية لدرجة أن لونها أبيض والخلطة نفسها لزجة وأشبه بالخلطة اللي بـ يحشوا بها الحمام مش بني زي المتعارف عليه، يعني ما تشجعناش خالص الحقيقة، ده غير أن شكل الطاجنين ما كنش مغري إطلاقًا، أنك تمد فيه الشوكة، بس الطعم انقذهم. وختمنا بالأرز بلبن اللي كان معقول بس ساح في الطريق تقريبًا، لأنه كان سائل زيادة عن اللزوم. بشكل عام ننصح بالست أمينة في العزومات الكبيرة للمحاشي والذي منه، بس في الطواجن مش قوي خليكم في المضمون.

...

مزمزة: أكل مصري صميم في مطعم بالمهندسين
اصدرت في: 28/10/2014

من كثر المطاعم والكافيهات في القاهرة، صاحب أي مكان بـ يحاول بقدر الإمكان تقديم الاثنين في بعض مرة واحدة. مش دائمًا الموضوع ده بـ ينجح، فبـ ينتهي الحال بك أنك تروح ما تبقاش عارف تحدد ده مطعم ولا كافيه كاجوال... الأكل اللي بـ يقدموه محتاج له جو معين، ومع ذلك أصحاب المكان متمسكين بجو الكافيهات بموسيقته العالية وشاشات الـ LCD الموجودة في كل ناحية لدرجة أنك تصاب بصرع، مزمزة – Mazmaza في المهندسين واحد من الأماكن دي. مزمزة محتل مساحة كبيرة في أول شارع الثورة من ناحية نادي الصيد؛ سهل جدًا أنك تأخذ بالك من وجوده بأضواءه وألوان الديكورات الزاهية اللي لها طابع مصري أصيل، كأنك قاعد في دوار عمدة مودرن: أبواب خشبية باللون الأزرق الزاهي، وترابيزات خشبها غامق بكراسي وكنب تنجيدهم منقوش بكل الألوان اللي خلقها ربنا، كل ده بشكل إيجابي ومتوازن. بدون الاستقبال المعتاد من المتر دوتيل –زي الترحيب أو السؤال عن عددنا- دخلنا وقعدنا؛ يمكن ده نوع جديد من الترحيب مش عارفين، عقبال ما الجرسون انتبه لوجودنا كنا أخذنا جولة سريعة في المنيو الملئ بالأكلات المصرية من أول شوربة الكوارع وحتى الملوخية بالأرانب. وبما أننا ما نقدرش نقاوم كبد الفراخ بدبس الرمان (35 جنيه)، اختارناها كطبق جانبي ومعها ورقة لحمة (57 جنيه) وفطيرة بالسجق (43 جنيه). بعكس ما توقعنا، الأكل تم تقديمه في سرعة مذهلة؛ كبد الفراخ كانت شهية، ميزتها أنها كانت ساخنة بعكس أماكن كثيرة زرناها، ولكن عيبها الوحيد كان نسبة الخل فيها أعلى بكثير من دبس الرمان. ورقة اللحمة كان عليها جدل، بالرغم من أن تتبيلتها ممتازة ومضبوطة إلا أننا توقعنا أن يكون فيه خضروات متنوعة أكثر، زي الفلفل الرومي والجزر، ولكن للأسف ما كانش فيها غير البصل والبطاطس. ده ما يمنعش أننا استمتعنا بالأكلة خصوصًا أن اللحم كان جيد التسوية. فطيرة السجق كانت للأسف دون المستوى؛ بالرغم من أن مكوناتها كثيرة، إلا أن طعم الزيتون كان طاغي على بقية النكهات، وبالتالي كانت الفطيرة مملحة جدًا. بعد الأطباق دي قررنا نختار البطاطا بالآيس كريم (20 جنيه)؛ فكرة الحلو في حد ذاته مبتكرة جدًا، ولكن التنفيذ يحتاج تعديل كبير، لأن الآيس كريم كان بطعم الزبادي –عارف طعم آيس كريم الزبادي بالتوت؟... هو بس من غير التوت- وبالتالي كان طعم الطبق ككل غير متجانس، كان محتاج إضافة نكهة ما تربط ما بين طعم الآيس كريم والبطاطا، زي الصوص الكراميل أو المكسرات، مش عارفين. مع الحلو طلبنا كابتشينو (19 جنيه) وسموزي ليمون بالنعناع (22 جنيه)، الأول مشكلته الأساسية أنه كان مُقدم في مج فخار، وبالتالي نكهة الفخار كانت موجودة في القهوة، الثاني كان ممتاز جدًا من حيث الطعم، إلا أن قوامه أخف من أنه يطلق عليه سموزي. مشكلتنا الأساسية في المكان كانت عدم تناسق الأكل مع الجو العام؛ وخصوصًا بكم أغاني فترة الثمانينات والتسعينات. إحنا مقدرين أن مسألة اختيار الأغاني يعتبر شخصي، ولكن ليه نسمع أغنية "لولاكي" بصوت عالي وإحنا بـ نأكل وكمان مش سامعين الشخص اللي بجانبنا بـ يقول إيه!

...

عنتر وعروس البحر: أكل حلو وسعره كويس يناسب العزومات في شارع فيصل
اصدرت في: 10/06/2014

حيرة كبيرة بـ نحس بها لما بـ نحب نروح مطعم، فيه شوية مميزات مجتمعة زي أن الأكل يكون حلو، التقديم بعد فترة مناسبة، السعر مش عالي، مكان الأكل يكون مريح ويساع العائلة من غير ضغط، أو شعور بالخنقة، معادلة تكاد تكون مستحيلة، المكان الواسع معناه سعر أوفر، والأكل الحلو معناه خدمة متأخرة، لكن مطعم "عنتر وعروس البحر" بـ يوفر كل ده وأكثر كمان. روحنا فرع المحل في آخر شارع فيصل، قرب المريوطية، طلبنا فراخ مشوية (الفرخة الكاملة 38 جنيه)، وشوربة (3 جنيه)، وأرز بالكبد والكلاوي (8 جنيه)، وأرز أبيض (3 جنيه)، السلاطات بـ تنزل تلقائي (الواحدة بـ 2 جنيه)، والتحضيرات كويسة، الأكل بـ ييجي بعد فترة بسيطة بطريقة كويسة. الفراخ كانت جميلة جدًا، والأرز بالكلاوي كان مميز جدًا، والشوربة رائعة، كذلك السلاطات فعلاً مميزة، يمكن الأرز الأبيض هو اللي ما حبيناهوش قوي، كان كأنه قديم شوية قبل الطبخ، الكلام ده كله ما كملش خمسين جنيه على بعضها، اتبسطنا من الجو الظريق، والمكيف. "عنتر وعروس البحر" مش مجرد مطعم عادي متوسط ومريح، فيه ميزة أنهم مطعمين، وبلافتتين، لكن لهم صالة واحدة، ورقم واحد، قسم اسمه " عروس البحر" بـ يقدم الأسماك بأنواعها، وقسم اسمه "عنتر" بـ يقدم المشويات، يعني بـ يوفر كل الأطباق تقريبًا، ولو أصحاب لهم رأيين مختلفين، جزء عاوز أسماك وجزء عاوز مشويات، يقدروا يقعدوا على نفس الترابيزة، في نفس المكان ويأكلوا أكل مختلف. الأسعار في المطعم ده بسيطة، والأكل طعمه حلو جدًا ومستواه كويس، ونظيف، وسخن، لكن فيه شوية عيوب تقنية، يعني مثلاً لما زرناه مرة ثانية بعد الأولى، والنور قطع، ما لقيناش كشافات كفاية أو إضاءة مناسبة في المكان أو مولد يشغل اللمبات لحد ما النور ييجي، ولما قولنا معلش هـ نقعد على ضوء الشموع نأكل قالوا لنا: "معلش مافيش سمك لأن النور قاطع، الطبخ كمان بـ يقف!" الحقيقة كانت حاجة عجيبة وغريبة، لكن على كل حال المطعم كويس، ننصحكم به، لو عاوزين تعزموا عزومة ما تكلفش جامد وتتبسطوا مع بعض كعائلة وتلاقوا أكلات كثير متنوعة ومميزة روحوا "عنتر وعروس البحر".

...

الدهان: أعرق كبابجي في مصر فتح في التجمع الخامس
اصدرت في: 06/05/2014

من أقل من سنة كتبنا أول مقال نقدي عن مطعم «الدهان» الكبابجي الشهير وكانت زيارتنا لفرع مصر الجديدة الموجود في شارع الميرغني، وكان واحد من أفضل المطاعم اللي كتبنا عنها وأخذ تقييم عالي وقتها وأشادنا بكل حاجة في المكان، من أول أناقة المطعم ومستوى الخدمة لحد المذاق المصري الأصيل للمشويات والطواجن، وقلنا ساعتها أن السمعة العظيمة اللي واخدها المطعم مش من فراغ وهو فعلًا جدير بها. المطعم العريق اللي عمره أكثر من 120 سنة فتح عدة فروع مؤخرًا بعد نجاح استمر حوالي 100 سنة في فرعه الأصلي في منطقة الحسين، في الرحاب والتجمع ومصر الجديدة وغيرها، كان لازم زيارة ثانية لواحد من الفروع الجديدة وبالذات في المناطق البعيدة عن قلب القاهرة لأن عندنا قناعة فيما يخص المطاعم المصرية الأصيلة أننا كل ما بـ نروح في ضواحي العاصمة كل ما الأصالة بـ تقل، وده كان الوضع في فرع القاهرة الجديدة، خلونا نحكي لكم عن التجربة. المطعم موجود في مول سيلفر ستار في التجمع الخامس، مدخل في الدور الأرضي لكن القعدة في الدور الثاني، شكله أنيق زي كل فروع الدهان في كل مكان، نفس الديكورات باللون الخشبي والأحمر، والأضواء الهادئة والموظفين بالملابس الرسمية، لكن مافيش شاشات تليفزيون في مكان الجلوس، فيه في مدخل المحل في الدور الأرضي ودي كانت حاجة مش مفهومة بالنسبة لنا. المنيو مقسم لمشويات وطواجن ووجبات ودجاج مشوي وحمام محشي وساندويتشات ومقبلات ومحاشي، وفيه منيو للحلويات والمشروبات لكن للأسف ما كانش موجود منه أي حاجة وقت زيارتنا، فطلبنا طبق مشكل كباب وكفتة (الكيلو بـ 142 جنيه) وطبق فيه جوز حمام مشوي ومحشي أرز (64 جنيه) وطبق بطاطس محمرة (6 جنيه) والسلاطات بـ تنزل مع الأوردر مجانًا، 3 أنواع وهي الطحينة وبابا غنوج وسلاطة خضراء وإحنا زودنا سلاطة زبادي (4 جنيه). الأكل تأخر شوية، مش قبل 20 دقيقة لما بدأوا ينزلوا لنا السلاطات اللي كانت معقولة بس مش روعة زي فرع مصر الجديدة، الطحينة كانت خفيفة والزبادي كان ساخن مع أن المفروض يبقى بارد، والسلاطة الخضراء نزلت لنا بعد ما خلصنا وجبتنا الأساسية تقريبًا، واضح أنها ما كانتش معمولة وجهزوا لنا طبق مخصوص، علشان كده ما كانش فيها طعم التتبيلة الشهيرة لسلاطة محلات الكباب والكفتة. ما رضيناش نخوض في الطواجن اللي أسعارها كانت ما بين 40 لـ 60 جنيه بالخضار واللحم والبصل، ولا المقبلات والممبار والسجق المشوي اللي جربناهم في فروع قبل كده. الكباب هو أحسن حاجة في وجبتنا، مستوي وطري ومتبَّل بحرفنة، الكفتة جيدة جدًا بس برضه في فرع مصر الجديدة كانت أحلى ولها نكهة أقوى، لكن اللحم هنا فريش ودي أهم حاجة. الحمام المحشي كان شكله يفتح النفس وحجمه كبير بطريقة ملفتة، لكن طعمه ما كانش بنفس الإبهار، فيه حاجة مش مضبوطة في النكهة وخلطة الأرز اللي جواه، مش سيء طبعًا وأكلناه كله، بس إحنا شاكين أن هو سبب التلبك المعوي اللي جاء للمحرر كاتب المقال بعد الوجبة. بس في المجمل الأكل عند الدهان تجربة لذيذة، بالذات لما تفكر أنك بـ تأكل عند الدهان مش في أي مكان، نتنمى بس أنهم يهتموا بكل الفروع علشان مافيش فرع ينتقص من سمعتهم العظيمة، وإلى الأمام يا «دهان».

...

تتبيلة: طواجن وأكلات شرقية رائعة في المعادي
اصدرت في: 27/04/2014

على خطى البرنس بتاع إمبابة –وبتاع مدينة نصر كمان غير التابع له– وبيبو بتاع شبرا والمدينة المنورة اللي في وسط البلد، بقى عندنا «تتبيلة» في المعادي، موجود في عمارات الأمل القريبة من مساكن نيركو في منطقة دجلة، في شارع هادئ كعادة شوارع المعادي، والمحل كمان شكله من الخارج أنيق ومنور بنور أبيض ساطع ومش بسهولة تقدر تخمن نوع الأكل اللي بـ يقدمه، وعلشان كده كاتبين بكل وضوح على اليافطة اللي بره أنهم بـ يعملوا طواجن ومشويات، كل ده وإحنا لسه مش فاهمين نوع الطواجن لأن شكله لسه مش معبر كفاية عن المطبخ الشرقي اللي هو متخصص فيه. دخلنا صالة الطعام المربعة الصغيرة، فيها حوالي 6 ترابيزات، نظيفة وشيك وفيها شاشات تليفزيون يمين وشمال، الصالة مش مبهرجة قوي بس بـ تؤدي الغرض، وعجبنا البدلة الكاملة اللي لابسها المتر دوتيل وعجبنا ضيافتهم لنا واهتمامهم اللي من القلب، يعني القعدة طلعت ظريفة ومش فاضل إلا الأكل نفسه. منيو «تتبيلة» شبه محلات الأطباق الشرقية اللي ذكرناها أعلاه، بس زيادة عليه المشويات وبعض أطباق البرياني والكبسة الخليجي والفخذة الضاني، وده لأن المحل متخصص كمان في الكاترنج وتجهيز الولائم. طواجن بامية وملوخية ومسقعة باللحم، وموزة بتلو وعكاوي، بأسعار من 30 لحد 65 جنيه، وفيه برياني باللحم والدجاج بـ 40 جنيه، والمشويات بالكيلو، وكيلو الكباب بـ 140 جنيه والكفتة بـ 95 جنيه والطرب بـ 100 جنيه، وفيه فراخ مشوية وحمام وسمان محشي بأسعار من 40 لـ 50 جنيه، والمقبلات هنا شرقية جدًا وأحيانًا شامية، سلاطة خضراء وطحينة وبابا غنوج (5 جنيه) وتبولة وفتوش (7 جنيه) وفيه مقبلات ساخنة زي طبق الأورينتال ميكس الخاص بتتبيلة (45 جنيه) بـ يبقى فيه كبدة وكلاوي بلدي وسجق جريل و3 حبات كبيبة وسمبوسك، وممكن تستبدل أي حاجة في الطبق بصنف ثاني زي ورق العنب والبوم فريت والممبار. وممكن تطلب أطباق الكبدة الإسكندراني والسجق واللحم المحمر والفتة العادية بأسعار من 20 لـ 30 جنيه للطلب. طبق المقبلات المتنوعة كان اختيار كويس خلانا نجرب أصناف كثير، عجبنا جدًا طعم الكبدة البلدي وخلطة السجق بالفلفل الملون، والكبيبة كانت موود مختلف عن الطبق وما كانتش بنفس جودة باقي الحاجات، بس الطبق كميته كويسة وينفع طبق رئيسي مشبع. جربنا طاجن العكاوي (65 جنيه) بالبصل، وهو أقرب لطاجن شرائط بصل فيه 4 قطع عكاوي، العكاوي اللي هي ذيل الذبيحة، لازم تتسوى وتتبل كويس كده علشان ما يبقاش فيه أي مشكلة في الطعم والرائحة، ولحسن الحظ الشيفات هنا شاطرين جدًا واستمتعنا بعكاوي ما تتخيرش عن الموجودة في برنس إمبابة، الأكيلة بالذات هـ يقدروا الموضوع ده هنا. كفتة مشوية ممتازة وطرب مقبول، المشويات هنا ممكن تبقى أحسن لو اهتموا بالتسوية نفسها، لكن الأكيد أن «تتبيلة» شاطر في التتبيلة، ودي حاجة لاحظناها في كل المطاعم اللي بـ تجهز حفلات وكاترنج، الشيفات بـ يبقوا على مستوى عالي والمذاق بـ ييجي قبل أي حاجة، شكل الأكل أو الخدمة أو القعدة، ومطعم تتبيلة مش استثناء للقاعدة دي. السلاطات كانت خرافية ودي سمة ثانية من سمات المطاعم من النوع ده، وختمنا وجبتنا بأرز باللبن بالمكسرات (8 جنيه) مش محتاجين نقول قد إيه كان لذيذ، وكان ممكن نطلب أم علي لو كان عندنا استعداد ننتظر 15 دقيقة كمان علشان تتحضر فريش. تجربتنا عن «تتبيلة» كانت جيدة جدًا على مستويات كثيرة، الخدمة والسرعة والنظافة وجودة الأكل وشكل المكان وموقعه المتميز، قريب هـ يبقى له شأن كواحد من أهم مطاعم منطقة المعادي وما حولها.

...

تيستي بيستي: مأكولات بحرية ومشويات في شارع جانبي في مدينة نصر
اصدرت في: 07/04/2014

من وقت للثاني بـ نحاول نتفادى الشوارع الرئيسية الكبيرة اللي مليانة محلات ومطاعم، وندخل في شوارع جانبية هادئة أثناء رحلات بحثنا عن الجديد اللي ممكن نكتب عنه، وبنسبة كبيرة بـ تبقى جولاتنا موفقة وبـ نقع في أماكن مميزة، وبـ تبقى الإضافة الحقيقية للتجربة أننا بـ نكون سبب في أن الناس تعرف الأماكن دي وتقرأ عنها، لأنها عادة بـ تبقى مغمورة ومتدارية وما حدش يعرفها غير سكان المنطقة. آخر جولاتنا كانت في شارع جانبي متفرع من شارع عباس العقاد في مدينة نصر، اسمه شارع أحمد قاسم جودة، قريب من توكيل بيجو اللي هناك، ولاقينا مطعم اسمه «تيستي بيستي – Tasty Besty» متخصص في السي فوود والمشويات، لكن كمان بـ يعمل بيتزا وساندويتشات ومعجنات وطواجن وكبسة وحاجات ثانية كثير، من الآخر هو أقرب لمطبخ متكامل، لأنه قائم بشكل كبير على الكاترنج والدليفري، علشان كده صالة الطعام كانت مش قد كده، صغيرة والترابيزات مرصوصة بشكل عشوائي، مافيش أي اهتمام بالديكور أو التصميم الداخلي، لكن أهم حاجة أن المكان كان نظيف، والخدمة ودودة من صاحب المحل شخصيًا اللي كان أخذ الأوردر بنفسه واهتم أنه يرشح لنا بعض الأطباق، وجاب الشيفات لحد ترابيزتنا واللي واحد منهم متخصص في الأسماك والثاني في المشويات، وكل منهم وعدنا أن الأكل هـ يعجبنا، وعلشان كده كان لازم نجرب من المنيوهين الموجودين في المكان. نصف الوجبة سي فوود والنصف الثاني ميكس جريل! الأوردر أخذ وقت مش قليل علشان يجهز، لولا الشوربة والسلاطات اللي نزلت في الأول كنا قومنا مشينا من الزهق، لكن المفاجأة كانت في المذاق الخرافي لكل طبق نزل أمامنا، من أول سلاطة الطحينة لحد طاجن الجمبري، الشيفات فعلًا أساتذة وكل واحد وفى بوعده تمامًا، وبقينا مش مصدقين أن مجرد صدفة في محل مغمور زي ده ممكن تسبب لنا السعادة دي في وجبة أقل ما يقال عنها أنها ممتازة، نتكلم عليها شوية بالتفصيل. شوربة سي فوود مخلية (25 جنيه) بالكريمة والزعتر والكمون والسمك الفيليه، كمية وفيرة تكفي شخصين، وإضافات فريش وملح مضبوط، سمكة بوري صغيرة معمولة سنجاري (17 جنيه) بالخلطة السويسي والصوص المتشبع بالتتبيلة علشان تحطه على أرز الصيادية، وطاجن جمبري من الحجم الوسط (50 جنيه) وبالتحديد ربع كيلو جمبري كبير بـ 40 جنيه و10 جنيه لتحضير الطاجن بالطماطم والبصل والفلفل، ولا أجدع مطعم سمك في إسكندرية، والكاليماري المقلي (الكيلو بـ 80 جنيه) كان زي الفرايز اللي تسلينا بها جنب الأكل، بجد برافو شيف الأسماك هنا! طبق ميكس جريل بـ 57 جنيه فيه 4 قطع كباب وكفتة وربع فرخة مشوية وأرز أبيض، الكمية صغيرة شوية بس إحنا كنا شبعنا جدًا من السي فوود، لكن طعم الكباب اللي يجنن خلانا نأكله من غير عيش مع الطحينة والسلاطة الخضراء، الكباب مستوي قوي وبـ يذوب في الفم علشان اللحمة نفسها فريش، والمشويات كلها مغطاة بدبس الرمان وحاجة معتبرة، لا بجد استمتعنا هنا بوجبة غير متوقعة بالمرة، وكان نفسنا يبقى منيو الحلويات شغال علشان نجرب أم علي ولا الأرز المعمر باللبن، لكن الحلويات وبعض الأطباق الثانية بـ تبقى شغالة أكثر في الكاترنج. مطعم «تيستي بيستي» بـ يعمل طلبات خاصة زي الديك الرومي والفراخ الروستو والحمام والمحاشي والفخدة الضاني، وبالمستوى اللي جربناه هنا، نقدر نقول اعتمد عليه وأنت مطمئن لو عندك عزومة أو وليمة، وما تترددش أنك تدخل المطعم تطلب أكلة سريعة حتى لو المكان شكله مش محمس قوي من الخارج، المهم الصنعة، ونتمنى أنهم يهتموا شوية بالشكل الظاهري للمكان علشان الحلو يكمل.

...

العربى: مشويات مصرية فى العجوزة
اصدرت في: 11/02/2014

على الرغم من ظهور مطاعم متخصصة فى كل أنحاء العاصمة، إحنا بطبعنا شعب أكّيل لحوم، و كمان غالبية مطاعم القاهرة معندهاش أى مشكلة فى تقديمها. اللحوم المشوية هى واحدة من العناصر الأساسية فى المطبخ المصرى، وتقدر تلاقيها فى أى مكان، من فنادق القاهرة الفخمة، لغاية أصغر شوارع المدينة. العربى مطعم مشويات مضمون فى العجوزة، معروف عند أهل البلد وكمان الأجانب بأكلاته المصرية عالية الجودة.بأجواء شعبية مصرية، المطعم مكون من ديكورات شرقية ومكان جلوس واسع. مع دخولنا، رحب بنا المدير المهذب، ومع جلوسنا سلمنا المنيوهات والجرسون الخاص بنا. المنيو تشمل مجموعة من الأطباق المصرية منها فتة بالموزة (50جنيه)، ممبار (13جنيه)، حمام محشى أرز (29جنيه) وأكلات ثانية كثير. الاختيارات المشوية تشمل كباب (140جنيه للكيلو)، كفتة (118جنيه للكيلو) وطرب (118جنيه للكيلو) مع ريش بتلو أو ضانى (150جنيه للكيلو) مع أصناف أخرى. طلبنا كمقبلات طبق محشى (13جنيه) مع سلاطة خضراء وباذنجان، طحينة وبابا غنوج. من بين الأطباق الشهية، طلبنا نصف كيلو كباب وكفتة (65جنيه)، ربع كيلو طرب (29.50جنيه) وربع ريش بتلو (29جنيه) علشان تلعب دور أطباقنا الرئيسية. وصلت سريعًا سلة عيش لترابيزتنا لتكملة المتعة مع السلاطات والصوص، بس للأسف كانبارد. علاوة على كده، سلاطة الباذنجان كانت سيئة، ينقصها الطعم الحادق المميز، الناتج عن تتبيلة الزيت أو الثوم. على الناحية الثانية، سلاطة الطحينة الخفيفة كانت لذيذة، أما السلاطة الخضراء كانت مكونة من قطع خيار طازجة، وطماطم، وبصل وبقدونس،كلهم ساهموا فى تقديم نكهة ساحرة مع رشة منالخل. رغم توقعنا أنه يكون من المقبلات، المحشى قُدم مع أطباق اللحوم.اللحم كان فوق صوانى كبيرة من الستانلس، وعليها فرش من البقدونس المبشور. رغم أن اللحم كان طعمه روعة، الشوى الزيادة للأسف تسبب أنه يكون ناشف وصعب المضغ. الكفتة كانت طرية وشوى الفحم ورائحة الشوى اللذيذة واضحين فيها، أما الريش فكانت مشوية بامتياز ونكهتها تحفة. خوفنا شوية من احتمالية وجود دهون كثيرة فى الطرب –دهن ضانى محشي لحم مفروم وكلهم بـ يتم شوائهم– لكن المفاجأة أن الطبق الخاص بالعربى كانت دهونه قليلة، وحافظ فى نفس الوقت على الطعم والقوام. حلويات العربى تشمل كريم كراميل ومهلبية (03.5 جنيه الطبق). مع كميات الأكل الكبيرة بالمقارنة بأسعاره، الكريم كراميل وصل فى طبق أما المهلبية بـ تُقدم فى وعاء بلاستيك صغير، والاثنين كانوا ساقعين وطعمهم حكاية. مع أكل مصرى شهى، طاقم موظفين مريح وأسعار مناسبة، مطعم العربى يتمتع براحة نادرًا ما نشوفها فى القاهرة،ويتعبر واحد من الأماكن اللى تقدر تزورها مع سائح لتجربة أكلة مصرية متطورة.

...

أبو صلاح: مشويات ولحوم محمرة وطواجن في مصر الجديدة
اصدرت في: 10/12/2013

المحل مشهور جدًا بين سكان مصر الجديدة، قديم وموجود في حتة متدارية ما يعرفهاش إلا السكان الأصليين للمنطقة، أو اللي بـ ييجوا مخصوص علشان يأكلوا من عنده، لكن عمره ما هـ يبقى من المحلات اللي هـ تشوفها بالصدفة وأنت معدي، وتقرر تدخل تجرب أكلها، كفاية العنوان بتاعه المعقد "8 شارع تحتمس كامل المتفرع من شارع محمد عدلي كفافي – خلف بنك مصر في ميدان سانت فاتيما" يعني لو حد قاصد يتوهك هـ يقول لك على عنوان أسهل من ده شوية. علشان توصل لـ «أبو صلاح» أوصل لفرع بنك مصر اللي قبل ميدان سانت فاتيما وأمام محل ساندويتشات "علاء" المعروف وادخل الشارع اليمين اللي فيه البنك، هـ تلاقي يافطة كبيرة مضيئة بالألوان الأصفر والأحمر على اليمين، هو ده «أبو صلاح» والمحل مش محل واحد، لكن محلين متقابلين، واحد منهم عامل قعدة على الرصيف اللي أمامه "متخصص في المشويات" والثاني قعدة داخلية صغيرة "بيت الكبدة" لكن مناسبة جدًا للهروب من الجو البارد وقطط الشوارع. مطعم «أبو صلاح» له طبيعة خاصة، أنه مطعم شعبي في قلب الحي الراقي، وشعبي بجد مش بـ يدعي "الشعبية". يعني قعدة الشارع وأباريق المياه المثلجة والمنيو اللي عبارة عن ورقة وش وظهر وقبل ده كله نوعية الأكلات نفسها طبعًا. كفتة وطرب وكباب وشيش طاووق وممبار وطواجن خضار باللحم وعكاوي ومنيو خاص للمحمرات على طريقة البرنس "وبالمناسبة اللوجو بتاع المحل هنا نفس شكل لوجو مطعم البرنس في إمبابة.. على سبيل البركة" والمحمرات هي الكبدة والكلاوي والسجق والقلب غيره، وممكن تطلب أرز بالمكسرات وفتة بالصلصة ومكرونة فرن وسلاطات. قعدنا داخل المطعم وطلبنا أصناف متنوعة من كل حاجة بكميات قليلة، كفتة وطرب (الكيلو 110 جنيه) وشيش طاووق (الكيلو 100 جنيه) طبق سجق بلدي محمر (25 جنيه) وفتة سادة (15 جنيه) وسلاطة خضراء وطحينة ومخللات (الطبق بجنيه واحد) وما ينفعش الأكل هنا من غير كوكاكولا صاروخ (3 جنيه) اللي بقيت نادرة شوية في المحلات والأكشاك. وجبة خطيرة والكميات كبيرة بجد، الكيلو بخيره لدرجة أننا سألنا مرة ثانية علشان نتأكد أن دي إرباع كيلو مش أكثر من كده. بـ ينزل مع الطلبات عيش بلدي طازة واخد شوية تسخين على الشواية، وكان نفسنا نجرب الطواجن (أسعارها من 25 لـ 35 جنيه) لكن الأكل أمامنا كان كثير فعلًا. كفتة وطرب رائعين، هم علامة المكان وأحسن أكلة تطلبها من هنا، بالكيلو أو ساندويتشات، صنعة ممتازة وشكله في التقديم يفتح النفس، وما ننساش أنه في الآخر شعبي أصلي، يعني مافيش حسوكة ولا أي إضافات مالهاش لازمة، الشيش طاووق ممتاز وتسويته وتتبيلته مضبوطة، السجق المحمر كان عادي، ده غير أننا مش متأكدين من كونه لحم بلدي بجد، معمول بخلطة البصل والفلفل، لكن مش وهمي زي ما بـ نأكله في أماكن ثانية، بس إضافة ظريفة لطبق الفتة بالصلصة، رغم استغرابنا من الشعرية اللي في الفتة وكنا نفضلها أرز أبيض بالعيش والثوم والصلصلة وبس. السلاطة الخضراء ضعيفة جدًا ومش طازة، والطحينة حلوة وقوامها كويس، وصاروخ الكوكاكولا بـ يبقى له طعم ثاني مع الأكلة دي. الخدمة سريعة بطريقة ملفتة، أكيد مش خمس نجوم بس إحنا هنا مش محتاجين أكثر من السرعة والنظافة، والحاجتين كانوا متوفرين. ولحسن الحظ في حوض لغسيل الأيدي وحمام صغير. حبينا تجربتنا في «أبو صلاح» واستغربنا أنها تأخرت كل السنين دي، لكن أخيرًا ممكن تعرفوا أكثر عن المطعم من خلال صفحات كايرو 360.

...

الوادي: مشويات وأكلات بحرية في التجمع الخامس
اصدرت في: 28/11/2013

مول 7 Stars المشهور في التجمع الخامس بـ يلعب دور مهم في حياة سكان القاهرة الجديدة، لما بـ يحبوا يحسوا بالحياة والدوشة وأجواء وسط البلد بـ يتوجهوا فورًا بسياراتهم أو مشيًا على الأقدام لساحة المول المنورة والصاخبة دائمًا، وكثير مش بـ يهتم أنه يدخل مطاعم أو كافيهات لكن بـ يكتفي أنه يشرب عصير فريش من محل العصير الشهير اللي هناك. عرفنا أن المبنى المجاور لـ 7 Stars مول اسمه مارينا، والاثنين قريبين من مجمع محاكم القاهرة الجديدة للي مش عارف المنطقة كويس، وداخل مارينا مول لاقينا مطعم كبير بـ يحتل الطابق الثاني بالكامل اسمه مطعم وكافيه «الوادي» ومكتوب على اللافتة أنه متخصص في المشويات والأسماك، المستفز في اللافتة أنهم مستخدمين لوجو عبارة عن حرف W مكتوب بنفس طريقة لوجو ماكدونالدز أو حرف الـ M المعروف، يعني أخذوا لوجو ماكدونالدز وقلبوه! نعتقد ده كان سبب كافي أننا نأخذ انطباع سلبي عن المكان حتى قبل ما ندخله. مساحة كبيرة فعلًا من الداخل وترابيزات بأحجام مختلفة، وقعدات بكنبات كبيرة وكراسي خشبية مريحة، وشاشات ومكيفات في كل أركان المحل، القعدة بشكل عام جيدة والمنظر الخارجي اللي بـ يطل عليه المحل ظريف، لكن أول حاجة صدمتنا مع دخولنا للمكان هي رائحة كتمة غريبة كأن المكان مش بـ يتهوى أو يتنظف كفاية، مع أن شكله يوحي بغير كدة، لكن خليط من رائحة اللحم النيئ وزفارة السمك اللي جاية من المطبخ كانت لها أثر سيء ثاني علينا أول ما دخلنا المطعم. مع عمل المكيفات وفتح الشبابيك الموضوع بدأ يبقى أحسن، والكتمة راحت وبدأنا نستعرض المنيو المكون من مشويات وأطباق مصرية على سبيل المقبلات زي الضلمة والممبار والكشك والأرز المعمر ورقاق ومسقعة، وفيه منيو للطواجن وورقة اللحمة "اللي طلعت مش موجودة لما طلبناها" وفيه حمام ودجاج مشوي وبعض الأطباق العالمية زي البيكاتا والسكالوب، ومنيو الأسماك والجمبري ما حاولناش نتعمق فيه لأننا جايين نجرب المشويات والأكل المصري بشكل أساسي. سرفيس الضلمة والممبار المشكل (30 جنيه) طلبناه كأكلة افتتاحية ومعاه سمبوسك باللحم، كان معقول وتسوية الممبار جيدة، بس خلطة الأرز في المحاشي ناقصة كثير من التوابل والصلصة ولونها فاتح بزيادة، السلاطات الخضراء والطحينة وبابا غنوج والباذنجان والخيار المخلل (6 جنيه لكل طبق) كانت أحسن حاجة أكلناها في «الوادي» بجد، ولولاها كنا كتبنا أسوأ مقال نقدي كتبناه من شهور. طبق كباب وكفتة (135 جنيه للكيلو) اللحمة كانت تقريبًا مش مشوية، كأنها متحمرة على الجريل، الكفتة مافيهاش طعم الشواء خالص، والكباب كأنه لحم محمر في الزيت! مش عارفين بالضبط إيه اللي حصل في الطبق ده، الجرسون اعتذر لنا عن المذاق الغريب وقال لنا أن الشيف حط صوص غريب على اللحم بعد الشواء تسبب في الطعم والقوام الغريب ده، في النهاية هو ممكن يتاكل، بس هو مش كباب وكفتة زي ما إحنا فاهمين. طلبنا مسحب دجاج مشوي أو نصف دجاجة مخلية (33 جنيه) مع الأرز بالزبيب والقرفة والبطاطس المحمرة، كانت كويسة والكمية فيه كبيرة، لكن برضه مافيش أي حاجة مميزة في الطبق، مجرد فراخ مشوية زي أي محل عادي. حتى طبق أم علي (12 جنيه) اللي طلبناه قُدم لنا بارد وفي ورق فويل وواضح أنهم جايبينه من خارج المحل. ذوق العاملين مش سبب كافي أننا نعبر عن امتناننا بالتجربة، لأن فيه مشاكل كثير في المطبخ وجودة الطعام وفي القعدة ومستوى النظافة، وقبل كل حاجة اللوجو المسروق بدون مبرر! مش بـ نرشح «الوادي» لأي حد إلا قبل ما يعالج كل أوجه القصور اللي عنده.

...

بدوية: أكلات عربية ومشويات في سيتي ستارز
اصدرت في: 14/11/2013

بعد حملة الدعاية المكثفة في وسائل الإعلام المسموعة والمرئية ماكانش فيه مفر من أننا نروح مطعم «بدوية» اللي فتح جديد في سيتي ستارز، من حوالي أسبوعين بس كان الافتتاح، في الدور الرابع اللي فيه مجموعة من المطاعم المتنوعة، وعرفنا أن الإدارة هي نفسها المالكة لمطاعم «أم حسن» في شارع عباس العقاد المتخصصة في الأكلات المصرية واللي سبق وكتبنا عنها من شهور. السؤال اللي بـ ييجي في بالنا كل ما نيجي رايحيين سيتي ستارز! هو لسة فيه مطاعم جديدة تقدر تفتح هناك؟ بـ تبقى فين المساحات دي ومستخبية فين؟ أكيد فيه محلات بـ تقفل وبـ يفتح مكانها حاجات جديدة، بس بسرعة ودقة بـ تخلينا مانخدش بالنا من حالة الفراغ اللي بين إغلاق محل وافتتاح آخر. والمرة دي المفاجأة كانت قوية لما اكتشفنا أن محل «بدوية» مساحته كبيرة فعلًا، فيه منطقة مقفولة داخلية بـ يبان فيها طابع المكان العربي أو البدوي، لكن مكاناش زي ما إحنا متخيلين، يعني مش قعدة عربي وبوفات وصواني نحاسية كبيرة والجو ده، لكن كان ترابيزات خشبية عادية وقعدات مريحة وكراسي عملاقة، والديكورات هي اللي عربية زي السجاد المعلق على الجدران وصور الجمال والطبيعة الصحراوية والملابس البدوية لبعض العاملين اللي بـ يبقوا في استقبال ضيوف المحل وبـ يقدموا لهم التمر والقهوة العربي، الحقيقة المكان ظريف ومريح نفسيًا والمساحة الكبيرة داخل المحل والمفتوحة خارجه اللي بـ تطل على طرقات سيتي ستارز فيها خصوصية ومناسبة لجميع أنواع الزبائن. لكن استغربنا أنهم مشغلين قناة روتانا خليجية طول الوقت للإمعان في توصيل الشعور العربي أو الخليجي في حين أن الموضوع مش كدة، لأن ده فيه ربط بين فكرة "البداوة" و"الخليج" وده مش المقصود من فكرة المطعم. المنيو فيه كل أصناف الأرز البرياني والمندي والكبسة والمقلوبة والفتة، ومشويات ضاني وطواجن حمام بالفريك وبامية وملوخية وبطاطس، وممكن تجيب صواني من كل الأصناف دي زي الوجبات العائلية وبـ يبقى فيها اللحوم بالكيلو، أو دجاج مقطع، وفيه منيو ولائم وعزومات ممكن تجيب منه تيس أو خروف كامل بكل الأصناف الجانبية والحلو هنا كنافة بالقشطة والمشروبات طبعًا لبن عيران أو لبن الماعز الجبلي وفيه شوية عصائر فاكهة فريش. بعد شوية دردشة مع الويتر الخبير في الأصناف البدوية اللي ماكناش عارفين الفرق بينها، رشح لنا صحن الأوزي المشوي مع الأرز البرياني (99 جنيه) وعليه إضافات مكسرات وصنوبر (15 جنيه) والطبق الثاني كان كبسة الروبيان أو الجمبري (99 جنيه) وأخذنا طاجن ملوخية (19 جنيه) وسلاطات طحينة وزبادي ودقوس (5 جنيه) والدقوس هم الطماطم المعصورة مع خلطة الثوم والتوابل اللي بـ تضاف للكبسة. البرياني هو الأرز البسمتي الأصفر بحبات الخضار، والمندي هو الأرز الأبيض اللي فيه بعض حبات الأرز الأصفر المحمرة، والكبسة هو الأرز الأحمر بالفلفل الأسود، دي الفروق بين نوع الأرز اللي عرفناها هنا. الأوزي المشوي هو قطعة زند مغطاة باللحم المشوي بتوابل بدوية خطيرة ومش هـ تحس فيها بأي دسامة، بالعكس خفيفة وشهية جدًا، مع "حلة الأرز" اللي بـ تتقدم فيها وإضافات المكسرات مش هـ تصدق نفسك، وهـ تحس أنك فعلًا أمير عربي قاعد وسط حاشيته وبـ يأكل بلا حساب، الكميات مهولة والطعم رهيب. نفس الكلام على الكبسة بوحدات الجمبري الكبيرة، مش مجرد أرز عليه جمبري، فيه مذاق فريد بـ يتميز به «بدوية» وشخصية واضحة للشيفات في كل صنف بـ تأكله. الملوخية بشوربة الدجاج كانت ولا أجدع ملوخية بيتي، والسلاطات والدقوس كانوا زي الكتاب ما بـ يقول. وجبتنا هنا كانت درب من الخيال لاننا مفتقدين المطاعم العربية الجيدة في القاهرة، ولاقينا ضالتنا في «بدوية» اليوم ده. بعد الأكل بـ ننصحك بلبن العيران المهضم (5 جنيه) اللي بـ يبقى مملح شوية زي اللبن الرائب، ولازم تجربوا الكنافة بالقشطة (25 جنيه) على طريقة المحل، وتصب الشربات بنفسك عليها علشان تسكرها حسب رغبتك. فعلًا استمتعنا بزيارة «بدوية» ولاحظنا أن مش إحنا بس اللي مبسوطين لكن الإقبال الكبير على المطعم وقت زيارتنا والرضا اللي شوفناه على وجوه زبائن المحل ومستوى الخدمة المتميز للعاملين خلانا متأكدين أن المطعم يستاهل التقييم العالي اللي هـ نعطيه لمطعم «بدوية».

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن