مأكولات سريعة مطاعم in وسط البلد Cairo, Egypt

مطاعم

البنهاوي: عصير وساندويتشات سريعة في وسط البلد
اصدرت في: 27/12/2011

أمام صيدلية الإسعاف ودار القضاء العالي في وسط البلد وعلى ناصية كبيرة هـ تلاقي محلين عصير قصب جنب بعض، «البنهاوي» و«أولاد ناصر». طبعًا علشان دي تقريبًا أزحم حتة في مصر فالإقبال غير عادي على المحلين طول الـ 24 ساعة. لكن إحنا اختارنا نتكلم عن محل «البنهاوي» علشان هو عامل افتكاسة كدة جديدة من نوعها، وهي عربية ساندويتشات كبدة وسجق خاصة بالمحل، وحاطط ترابيزتين داخل المحل لأي حد عاوز يأكل بالداخل. الأكل هناك حاجة كده على ما قُسم؛ رغيف فينو رفيع بـ يتقسم نصفين والحشو عبارة عن كبدة أو لحمة مفرومة أو سجق أو بيض بالبسطرمة وبلوبيف وجبنة بيضاء ورومي، أو ساندويتشات حلوة زي المربى والحلاوة. الرغيف بـ 2 جنيه للحوم و 1.5 جنيه للجبن والمسكرات. ولو طلبت حاجة سبايسي اعرف أنها هـ تبقى مشطشطة قوي، بالذات الكبدة والسجق. جربنا الكبدة وكانت مش حلوة ومفتتة قوي ومليانة فلفل حامي، البيض بالبسطرمة كان حلو علشان مافيهوش أي اختراعات. زيه زي ساندويتشات الجبن والبلوبيف، أي حاجة معلبة بـ تبقى ظريفة لأن العيش طازج والحشو جاهز مش محتاج أي صنعة. هـ تأخذ طلبك في طبق فيه شوية مخلل وتقعد على واحدة من الترابيزتين حتى لو فيه ناس ما تعرفهاش قاعدة بـ تأكل، هـ تقول "سلام عليكم" وتقعد معاهم عادي، وبـ تكون دفعت الحساب قبل الأكل للكاشير اللي على باب المحل من الخارج. بعد ما خلصنا أكل طلبنا كوكتيل فواكة (2.5 جنيه) من المرصوص على الكاونتر المميز لمحلات عصير القصب، للأسف ده كمان ما كانش حلو والفاكهة واضح أنها مش فريش وعلشان كده الناس اللي كانت قاعدة بـ تأكل (واللي واضح أنهم زبائن قدام) ما حدش منهم فكر يطلب حاجة غير عصير القصب والتمر هندي (1 جنيه) مع الأكل ولو كنا نعرف كنا عملنا زيهم. كل عصائر الفاكهة موجودة بأسعار من 2 جنيه لـ 3.5 جنيه أقصى حاجة، صيف شتاء هـ تلاقي مانجو وبرتقال ورمان وعنب، دي ميزة ثانية لمحل البنهاوي بعد موضوع الساندويتشات ده. لو بـ تتمشى في وسط البلد وبالتحديد في شوارع طلعت حرب و26 يوليو وقربت من ميدان الإسعاف ومحطة مترو جمال عبد الناصر، جرب أكلة خفيفة كده وشوب عصير من «البنهاوي» وقول لنا رأيك.

...

مهنى: ساندويتشات وبيتزا في الحلمية الجديدة
اصدرت في: 01/12/2011

مش كثير مننا يعرفوا بالظبط فين الحلمية الجديدة، لازم تكون من سكان وسط البلد علشان تبقى عارف المناطق القريبة من التحرير ورمسيس زي الحلمية وباب اللوق والعتبة والدرب الأحمر وعابدين. في الحلمية الجديدة وبالتحديد في الميدان أمام قسم شرطة الدرب الأحمر هـ تلاقي محل واخد ناصيتين ومساحته كبيرة بالمقارنة بمساحة الميدان الصغيرة. مكتوب عليه بخط الرقعة بطريقة عتيقة «مهنى»، ورغم أن شكله لا يوحي بحاجة معينة إلا أننا اكتشفنا أنه من أهم محلات التيك آواي والأكلات السريعة في المنطقة، وحبينا نجرب بنفسنا. ما تركزش كثير على شكل المحل أو شكل العاملين فيه، الحاجات دي ما بـ تفرقش لما تكون في مناطق معينة، السمعة اللي بـ يأخذها المكان هنا بـ تبقى راجعة لمستوى الأكل نفسه وتميزه في أصناف معينة وبس. المنيو عبارة عن ساندويتشات لحوم وبيتزا فقط، والأسعار مغرية جدًا، تقريبًا مافيش ساندويتش بـ يعدي 10 جنيه، والبيتزا موجودة بـ 3 أحجام، الصغير بـ 15 جنيه والوسط بـ 23 جنيه والكبير 35 جنيه، ممكن تفرق 2 أو 3 جنيه زيادة أو أقل حسب حشو البيتزا ونوعها. الساندويتشات هي: شاورمة لحم وفراخ رول وفاهيتا وكبدة إسكندراني وبرجر وهوت دوج وشيش طاووك، مرصوصين في المنيو كده من غير ترتيب منطقي، لكن هو معتمد على زبائنه من المنطقة اللي عارفين إيه الحاجات الحلوة اللي بـ يعملها ومش بـ يستعرضوا المنيو أصلًا. عرفنا أن الشاورمة عنده مالهاش حل، ساندويتش كايزر صغير بـ 3.5 جنيه، لازم تأكل منه 5 ولا حاجة علشان تشبع، خطير بجد. ثاني ساندويتش عليه إقبال في المحل وغالبًا مش بـ نشوفه في محلات تيك آواي كثير هو التشيكن رول (7 جنيه) وحجمه متوسط والخلطة الموجودة داخل قطع الفراخ الملفوفة كانت عظيمة بس الساندويتش كله كان ثقيل شوية علشان الخلطة كان فيها جبنة كثير، وفكرتنا بالكوردون بلو! الفاهيتا (7 جنيه) كانت عادية مش زي الحاجتين اللي فاتوا لكن شغالة يعني. اللي كان فعلًا دون المستوى ومش بـ نرشحه لأي حد هو ساندويتش الكبدة الإسكندراني (3.5 جنيه) خاصة لو مش بـ تحب الأكل الحار، لأن كمية الفلفل الحار فيه كانت مش طبيعية وما قدرناش نكمله، كان المفروض يعرفنا قبل ما يعمله بالطريقة دي، بس حصل اللي حصل وأول قطمة كانت آخر قطمة. ماينفعش تروح لمهنى وما تجربش البيتزا، كل الإضافات موجودة من اللحوم والفراخ والأسماك، ده بجانب المارجريتا والجبنة، وممكن تختار أي عدد من الإضافات على أي بيتزا. جربنا بيتزا بابريكا الحارة وطلبنا من الشيف يعملها مش حارة قوي، ودي بـ يكون عليها إضافات بيبروني وفراخ وشاورمة وممكن تزود جبنة أو لحوم بـ 4 جنيه على الحجم الوسط، بيتزا نموذجية زي ما ممكن تطلبها في أي مطعم كبير متخصص، والأحجام بالنسبة للأسعار تعتبر ممتازة. مافيش سلاطات ولا مشهيات غير المخلل العادي، وهو حلو قوي بالمناسبة، ممكن بس تطلب باكيت بطاطس محمرة بـ 2.5 جنيه وفيه مشروبات غازية. «مهنى» الخدمة فيه سريعة وغالبًا بـ يبقى رايق يعني هـ تجيب طلباتك بسرعة، وممكن تقعد تأكل داخل المحل أو على الرصيف المقابل.

...

بيراميدز: تيك آواي ووجبات سريعة في القصر العيني
اصدرت في: 29/09/2011

بالصدفة وإحنا بـ نتمشى في الشوارع القريبة من وسط البلد وبـ ندوَّر على مكان نأكل فيه، رجلينا جابتنا لشارع القصر العيني وكانت خططنا أننا نأكل عند «كشري الصباح» أو مطعم «أبو شقرة» لو طلبت معانا لحوم ومشويات، لكن لفت انتباهنا محل صغير بعد محل الكشري الشهير له إضاءة زرقاء مميزة ويافطته كبيرة بما لا يتناسب مع حجمه الصغير من الداخل ومكتوب عليها «بيراميدز - Pyramids» للتيك آواي ولوجو المحل ظريف عبارة عن هرم باللون الأزرق. قررنا أن الأكل هـ يكون هنا النهاردة وأهو يعتبر اكتشاف جديد في الشارع الحيوي ده. المطعم عبارة عن مدخل مربع وترابيزات بار على اليمين والشمال، وكاونتر وكاشير في واجهة الباب، الشكل التقليدي لمطاعم التيك آواي والأكلات السريعة. مافيش سبب ممكن يخليك تقعد تأكل بالداخل إلا أنك تكون فاضي ومش وراك حاجة أو جعان ومش قادر تستنى، وده مش علشان المكان وحش، لكن علشان مافيش أي حاجة مميزة تخليك تحب القعدة جوة، ولا حتى هـ تعرف تتفرج على شارع القصر العيني المسلي لأنك هـ تبقى قاعد وظهرك له. المنيو فيه أصناف كثيرة، وجبات كاملة لحوم ودجاج وأسماك، بـ يكون معاها نوعين سلاطة (غالبًا كول سلو وثومية) وأرز بسمتي وبطاطس محمرة عيش شامي. المكس جريل هنا اسمه "وجبة بيراميدز" وسعره 32 جنيه، ووجبة الكباب بـ 29 جنيه وباقي الوجبات بـ 24 جنيه، لكن حظنا الكويس أننا وقت زيارتنا للمحل كان فيه عرض خاص على الوجبات وكانوا عاملين "فلاير" مخصوص للترويج لعرض التوفير اللي مستمر لفترة محدودة، والعرض هو نفس الوجبات الكاملة اللي قلنا عليها بأسعار بـ تبدأ من 11.5 جنيه لـ 18.5 جنيه حسب كمية اللحوم، يعني أقل حاجة ربع دجاجة أو قطعتين كفتة، وأكثر حاجة بـ تكون نصف دجاجة أو ما يعادلها من كفتة أو شيش طاووق أو بانيه أو سمك. ومن ضمن العرض أن أي ساندويتش كبير كان سعره 16 جنيه بقى بـ 15 جنيه. منيو الأرز والعجائن فيه فتة شاورمة (15 جنيه) ونجرسكو (6.5 جنيه) وأرز بالكبدة وأرز بالدجاج بالكاري وأرز بالشامبينيون (14 جنيه)، وفيه ساندويتشات دجاج ولحوم بأحجام وسط وكبير، الوسط من 9 لـ 12 جنيه والكبير من 11 لـ 16 جنيه؛ تشيكن كييف وسوبر كرانشي وكوردون بلو وفاهيتا، وستيك جريل مشوي وسكالوب بانيه بيف برجر وهوت دوج مشوي على الفحم، وطبعًا أغلى ساندويتش هو السوبر فياجرا والسي فوود بـ 18 جنيه. كميات الوجبات وأحجام الساندويتشات مشبعة جدًا، مع السلاطات وشوية بطاطس هـ تلاقي مش دافع فلوس كثير (20 أو 25 جنيه مثلًا) وواكل أكلة ظريفة فيها كل الأصناف والأهم من ده كله أنك أخذتها بسرعة. إحنا جربنا وجبة فيها نصف دجاجة مشوية وأرز بسمتي وثومية (18.5 جنيه) كانت تمام قوي، والتتبيلة لذيذة والشوي كان على نار هادئة والأرز كان كويس وكميته معقولة. جربنا كمان اللحوم في ساندويتش الستيك جريل المشوي بالحجم الكبير (15 جنيه) واستغربنا من كمية اللحم اللي جواه وقد إيه كانت قطعة اللحم سميكة، ستيك بجد زي ما بـ تأكله في مطعم متخصص في الأكلة دي، هو بس كان ناقصه شوية توابل وإضافات على الساندويتش. الكول سلو (3.5 جنيه) مش حلوة ويفضل أنك تكتفي بالثومية. فيه مشروبات غازية وأم علي وكريم كراميل (7.5 جنيه) لو حبيت تحلي بعد الأكل، وفيه وجبات مفرحة للأطفال بسعر 17 جنيه، وبـ يكون معاها عصير جهينة بدل البيبسي ولعبة هدية. محل جديد وخدمته سريعة وأسعاره رخيصة وفي شارع القصر العيني، يستاهل التجربة.

...

المَضيَفة: قهوة مميزة في وسط البلد
اصدرت في: 05/04/2011

لو بـ تدور على كوفي شوب مش مشهور وعالمي من عينة «ستاربكس» و«كوستا كوفي» يبقى مكانك الصح في وسط البلد. وسط البلد زي أي منطقة تانية فيها فروع للكافيهات العالمية، بس الأهم والمميز هو وجود عدد لا نهائي من القهاوي البلدي اللي كلنا بـ نحبها. المشكلة بقى لو خرجت مع أصحابك - من غير تخطيط - في وسط البلد ومحتاج قعدة مريحة وجوها مناسب للدردشة وفيه الخصوصية؛ «المَضيَفة» بـ تقدملك الحل. عارفين مقولة "ما تحكمش على الكتاب من عنوانه؟" ده ينطبق بالظبط على «المَضيَفة». في شارع عدلي في قلب وسط البلد، الديكور متهالك والمرايات متكسرة وفيه عواميد مش محطوطة في مكانها وقصريات زرع صناعي ومتربة زي اللي كانت بـ تبقى في أوضة الكرار في بيوت جدودنا زمان. ومع ذلك الكراسي كبيرة ومريحة وفيه كَنبْ كمان. القهوة دايماً فيها ناس كتير بس عمرها ما بـ تتزحم عالآخر، المكان مفتوح والتهوية كويسة وهـ تعرف تشم هوا نضيف بين كل نفس شيشة والتاني. أما المنيو فبسيط وده عجبنا جداً. فيه العصاير المعروفة والكوكتيلات والقهوة وفيه برضه موز باللبن جامد وفريش جداً (5.50 جنيه) وكوكتيل المضيفة بـ13 جنيه وده عليه بولة آيس كريم فراولة بـ تغطي عصير المانجو والفراولة اللي في الكاس. فيه الإختيارات العادية لأي كافيه تاني، السلاطات من 4 لـ6 جنيه والشوربات من 6 لـ8 جنيه وأطباق مشويات من 30 لـ40 جنيه. بحذر اعتقدنا ان البيتزا هـ تكون أحسن إختيار، والمفاجأة أنها كانت لذيذة جداً، وأسعارها كانت من 12 لـ20 جنيه وكانت معمولة بطريقة الـ« Deep Dish » اللي بـ تخلي البيتزا سميكة قوي وفي نفس الوقت مقرمشة، جربنا بيتزا الخضروات (14 جنيه) بالفلفل الأخضر والزيتون والبصل والطماطم، والكميات كانت معقولة ومفيش حاجة أكتر من التانية بالنسبة للخبيز والإضافات، لدرجة اننا ممكن نقول انها من أحسن البيتزات اللي كلناها في وسط البلد. الخدمة سريعة وممتازة والويترز متعاونيين وبـ يطمنوا كل شوية أن كله تمام ومافيش زبون ناقصه حاجة. الشيشة بـ3 جنيه بس ونكهة البرتقال كانت خطيرة والخدمة عليها مميزة برضه. عندهم قهوة تركي بـ7 جنيه وسحلب ما بـ يهزرش، الكوباية مليانة مكسرات وزبيب وجوزهند بـ7.50 جنيه، كان طبق حلو في حد ذاته. لو غاوي حلويات قوي ورايح مخصوص عشان كده هـ تلاقي آيس كريم وأم علي بـ12 جنيه. روح «المَضيَفة» لو عايز بديل للأماكن التقليدية في وسط البلد، وفيه هناك انترنت لاسلكي ( Wi-Fi ) لو عايز تخلص شوية شغل وانت هناك.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن