إيطالي مطاعم in وسط البلد Cairo, Egypt

مطاعم

بومودورو: فرع وسط البلد وتغييرات جديدة
اصدرت في: 12/03/2014

لو كنا تعلمنا حاجة واحدة من عدد المطاعم المهول فى القاهرة، الحاجة دى بـ تقول أن الأكل المصرى زى الفل، وأكيد طعمه لذيذ ومريح، بس ساعات كثيرة بـ يكون لازم تجربة حاجة مختلفة خالص، وزى ما بـ يقولوا، التغيير حاجة مهمة للعقل، والجسم والروح. "بومودورو - "Pomodoro أو الطماطم بالإيطالى، مطعم مريح مساحته صغيرة، تم تجديده من وقت قريب بمكانه فى قلب وسط البلد، ومطبخه بـ يقدم أكل حمضي، عصارى وغنى بالنكهة زى اسمه بالضبط. مع تخصصه الرئيسى فى أطباق السى الفوود المدهشة، المطعم كل ليلة بـ يبقى مليان على آخره بالزبائن، وصحيح المنيو اختيارتها محدودة وكلها عن الباستا، لكن السر فى جذب كل الناس دى هى أطباق السى فوود الخارقة. رغم حجم المكان الصغير، بومودورو بـ يعوضه عن طريق تقديم كميات أكل كبيرة، يعنى طبق واحد من السباجيتى مع اختيارك من السى فوود وصوص عطرى مميز يكفى فردين مستريح. رائحة الأكل وصلت لنا قبل حتى ما ندخل المكان، هو فيه بداية أجمل من كده؟.. المهم، نجحوا أنهم يثيروا شهيتنا وانتظرنا وصول الأكل على نار. ده مش مطعم من الدرجة الأولى فما تتوقعش خدمة سريعة. الحوائط الصخرية والكراسى الخشب الناشفة عاديين جدًا، لكن الفكرة أن الأطباق اللذيذة المميزة هى سر التركيبة السحرية. الأسعار غالية شويتين وزادت باستمرار على مدار السنين مع أطباق باستا سى فوود تبدأ من 50 جنيه للأطباق الصغيرة وتوصل لغاية 120 جنيه. لازم هـ يوصلك علبة مناديل والسبب أن الأكل محتاج تقطع جمبرى، كابوريا وجاندوفلى بنفسك، فنصيحة جهز نفسك للغوص. بومودورو بـ يتطور دائمًا وده واضح فى تجديداته المتكررة، وبالطريقة دى قدر يزود شهرته يوم بعد يوم فى كل القاهرة. وقت بدايته مكان القعدة كان محدود، ومن ساعتها بدأ يوسع شوية بشوية سواء قعدة من كراسى جلد مريحة أو كراسى خشب وترابيزات، على العموم، أحسن حاجة أنك تروح بدرى علشان المكان بـ يزدحم بسرعة بالليل. اوعى تفتكر أنهم بـ يقدموا سى فوود وخلاص، عشاق اللحوم لهم نصيب مع اختيارات تشمل مكرونة باللحم المفروم أو الفراخ مع فلفل ألوان، ومشروم وكوسا، أما بالنسبة لكل النباتيين يقدروا يجربوا طبق المكرونة بالخضروات. اختارنا أصغر طلب قيمته 50 جنيه، عبارة عن طبق سباجيتى بالسى فوود، ووصل بعد حوالى 20 دقيقة. رغم وقت الانتظار الطويل نسينا كل حاجة مع شكل الأكل الرائع، جبل من السباجيتى غرقان فى صوص الكريمة مع قطع الجمبرى، والكابوريا والجندوفلى. كل مكون من مكونات الطبق ساهم فى تقديم طعم متكامل ووجبة لذيذة. تقدر كمان تشرب مشروبات غازية أو عصائر علشان تبلع كل الأكل ده، وصحيح منيو بومودورو مافيهاش حلويات، بس الأكيد أن ضيوف المطعم بعد ما يأكلوا، مش محتاجين حاجة ثانية.

...

بومودورو: تقريبًا أحسن مكرونة بالمأكولات البحرية في وسط البلد
اصدرت في: 13/03/2012

إسباجتي بصوص المحار اللذيذ هو مجرد شيء بـ نتمناه في القاهرة، صح؟ في مطعم مستخبي في مكان غير واضح من باب اللوق بجانب "قهوة الحرية" وبـ يقدم أفضل مكرونة بالمأكولات البحرية. من سنتين فاتوا زارت كايرو 360 «بومودورو - Pomodoro» لما كان مطعم في شارع بلدي، لكن بعد كده المطعم تغير تمامًا لكن لسه بـ يقدم أحسن مكرونة بالمأكولات البحرية ممكن تأكلها في القاهرة. بعد ما بقى عنده مساحة أوسع، "بومودورو" قام بـ تغيير الكراسي البلاستيك الصغيرة وترابيزات القهوة بكراسي جلد شكلها جديد وعصري وترابيزات معمولة من الزجاج. اللون الغالب هو الأحمر والأسود، الجو العام للمكان بـ يعطي الإحساس بالدفء وكمان الرائحة الرائعة في المكان كل ده بـ يجتمع مع بعض وبـ يبقى حاجة زي أماكن البيتزا الراقية. فيه كلام بـ يُقال أن صاحب المطعم درس فنون الطهي في إيطاليا وكمان هو بـ يصر أنه يتولى أمر كل الأطباق اللي بـ تخرج من مطبخه، مش مشكلة الحقيقة لأن كل طبق بـ يخرج من المطعم بـ يبقى فيها انتباه لأدق التفاصيل وده بصراحة بـ يسعدنا جدًا. وطبعًا لأن فيه ازدهار في مشروع المطعم وتغيير فيه، فكان فيه تغيرات في المنيو والأسعار من السنتين اللي فاتوا، المنيو بسيط، فيه أطباق مكرونة مع إضافات المأكولات البحرية أو اللحوم وكمان فيه أصناف بسيطة للساندويتشات. طبق الباستا بالمأكولات البحرية أسعاره بـ تبدأ من 25 لغاية 50 جنيه بـ يعتمد على الأحجام وكمان اختيارك للمكونات زي الكاليماري، والجمبري، والمحار والكابوريا. إحنا طلبنا باستا بالجمبري بـ 35 جنيه وكانت سخنة وحارة وغنية بالجمبري، وبـ تيجي مع صوص الطماطم وأربعة أحجام مختلفة من الـ Crawfish. كميات الأكل كانت كبيرة، والأعشاب والبهارات والخضار الطازج حسسنا أننا في جنة من المأكولات البحرية. لو مش عارف تقرر تطلب أي نوع اختار سي فود كومبو وهـ ييجي لك كل أنواع المأكولات البحرية في طبق واحد. برضه هـ تلاقي باستا كومبو للفراخ واللحم بنفس الأسعار تقريبًا للناس اللي مش عاوزة تأكل أكل فيه سمك. وللناس اللي مش عاوزة أي نوع من أنواع اللحوم ممكن تطلب مكرونة بالخضار بـ 25 جنيه مكونة من الجزر، والبسلة، والكوسة، والبصل والطماطم. ولو حد عاوز أكلة أخف موجود ساندويتشات بالجمبري بـ 20 جنيه وساندويتشات الفراخ بـ 15 جنيه. كميات الأكل اللي كانت موجودة من سنتين في المطعم بـ 15 جنيه مش موجودة دلوقتي، لكن ده مش هـ يمنعك من أنك تزور "بومودورو"، ممكن تدفع فلوس أكثر بس مش هـ تأكل في الشارع أو تستخدم لبسك كمنديل لك. مع الجو العام المريح للمطعم ومناديل كثير والأهم مكرونة المأكولات البحرية الغنية "بومودورو" يعتبر أسطورة في المأكولات البحرية في القاهرة.

...

مواضيع خاصة

النهارده في القاهرة: سهرة ميكس مع كل ألوان الفن

رغم البرد اللي مخلي كل الناس عايزة تفضل متدفية في السرير، بس برضه أجندتنا مابتخلاش من الحفلات اللي هتخليك تصحصح وتفرفش، علشان تخرج تقضي ليلة سعيدة بعد الشغل. تعالوا