شرقي مطاعم in الزمالك Cairo, Egypt

مطاعم

يونايتد كبدة: ساندويتشات كبدة وسجق مالهاش حل في الزمالك
اصدرت في: 12/03/2015

كثرت الأماكن اللي بـ تقدم الأكلات الشعبية في الأحياء الراقية –زي الزمالك مثلًا- على أمل أنهم يسحبوا البساط من تحت العربيات والمحلات الموجودة في الأماكن الشعبية، واللي الناس بجميع خلفياتهم وطبقاتهم بـ يروحوا لها مخصوص، طبعًا بـ يبقى فيه فرق في الجودة والأسعار -بالذات الثانية والمبالغ فيها- ده غير الـ Packaging النظيف وديكور المطعم نفسه -شعبي/ مودرن- اللي بقى كليشيه من كثر ما المطاعم استخدمته. قبل ما نروح "يونايتد كبدة – United Kebda" في الزمالك كان في دماغنا كل اللي إحنا قلناه في أول المقال. بس لما رحنا، الموضوع مختلف تمامًا؛ المكان بسيط جدًا: ترابيزتين بلاستيك، وبار معدني لهواة الأكل على الواقف، أما المطعم نفسه واللي بـ تنزله بسلالم معتمد في ديكوره على اللون الأحمر وهو لونه الأساسي، وفيه عربية في المدخل بـ يتحضر عليها الساندويتشات. القائمين على الخدمة في منتهى الذوق والأدب، قدموا لنا المنيو ووضحوا لنا أن المطعم بـ يوصل الطلبات للزمالك والدقي، المنيو بسيط واختياراته محدودة بين أربعة أنواع من السجق، وزيهم للكبدة، بالإضافة لعدد من أطباق الباستا والأرز. وبما أن الأكل شعبي، فـ بالتالي الحلو شعبي، ومنحصر في ساندويتشات زي السكلانس، حلاوة بالقشطة والمربى بالقشطة. بعد 15 دقيقة انتظار -واللي كانت نوعًا ما طويلة بالنسبة لأننا كنا الوحيدين في المكان- بدأنا بساندويتش الكبدة بالبطاطس (11 جنيه)، ممكن تختار ما بين أنه يكون مقدم في عيش تورتيا أو فينو عادي. قررنا أننا نجربه بالتورتيا واللي كانت طازجة بعكس أماكن كثيرة بـ تقدمها ناشفة ومجلدة، نوع الكبدة ممتاز وتتبيلتها مضبوطة غير أن البطاطس المقلية أضافت كثير للساندويتش الممتاز، بس كان ناقصه حاجة واحدة: شوية صوص من الكبدة أو حتى طحينة تطري الموضوع شوية. ساندويتش الكبدة الإسكندراني (7.5 جنيه) كان ممتاز... "صغير بس يحير"، كمية الكبدة ممتازة بالطحينة الخفيفة اللي كانت مضافة عليها. وبما أننا بـ نحب السجق، جربنا السجق المشوي بالجبنة (7.5 جنيه). بنفس حجم اللي قبله، ونفس الكمية الوفيرة للمكون الأساسي، إلا أن الجبنة كانت مختفية في نصف الساندويتش وللأسف كان طعمها غير متجانس مع بقية المكونات (السجق وقطع الفلفل الألوان) لأنها جبنة مطبوخة وبالتالي بوظت الدنيا. لاحظنا أن جودة لحم السجق كانت أقل بكثير من الكبدة، لأن السجق كان مطاطي نوعًا ما، وغير كده بهاراته كانت أقوى لدرجة أنك ما تحسش بطعم السجق نفسه. للحلو طلبنا ساندويتش حلاوة بالقشطة (7 جنيه)، الساندويتش مكوناته كانت وفيرة، أما الطعم فكان مضبوط، وبعكس اللي توقعناه، القشطة كانت خفيفة وطعمها غير دهني بالمرة. بغض النظر عن التأخير في تحضير الأكل أو حتى الحجم الصغير للساندويتشات، "يونايتد كبدة" كمطعم كبدة وسجق ممتاز. الأسعار مناسبة جدًا مقارنة بجودة المكونات، كمية حشوة الساندويتشات ممتازة وطبعًا النظافة وجودة الأكل تخلينا نرجع له ثاني.

...

مولان روج: مطعم ديكوره مش بنفس جودة أكله فى الزمالك
اصدرت في: 13/08/2012

مطعم «راسبري» بفرعه فى المهندسين كان مكان مفضل لنا جدًا لو عوزنا نخرج ونأكل فى مكان حلو وكمان أكله حلو، رشحناه لكل أصحابنا، وقعداتنا كلنا كانت هناك، زرناه فى أيام عادية وفى شهر رمضان، لكن السنة دى كانت الصدمة الكبيرة لما عرفنا أنه قفل وبقى مكانه مطعم ثانى اسمه «ألتو بينو – Alto Pino»، المهم بقى فى الموضوع أن كل Staff راسبري انتقل لمطعم ثاني فى مطعم فى الزمالك اسمه «مولان روج – Moulin Rouge». شدنا الاسم جدًا، ولأننا عارفين مستوى أكل طاقم عمل راسبري ما ترددناش أننا نروح ونجربه فى رمضان، المطعم موجود فى العمارة اللى فيها موبينيل فى بداية شارع البرازيل وبـ تدخل له من مدخل العمارة على الجنب وفوقه علامة كبيرة حمراء مكتوب عليها اسم المطعم. وكمان قريبين من «نولا كب كيك». صدق اللى قال "الكتاب بـ يبان من عنوانه"، مدخل المطعم كان غريب، الديكور غالب عليه اللون الأحمر، وفيه ديكورات رمضانية فى كذا حتة والكنب قعدته غير مريحة خالص، ده غير أن فيه رسومات على الحائط تضايق ومش مريحة للأعصاب خالص، النور خافت والجو كئيب واللى أدهشنا وكان غريب جدًا أنهم كانوا حاطين ثلاجتين على الجنب وسط الكنب والقعدة الجرسونات كانوا بـ يعدوا عليها يأخذوا مشروبات ويمشوا! بجد كانت حاجة غريبة. فى رمضان المكان عامل نظامين: يا إما تختار من الـ Set Menu أو من المنيو العادية، الأولى عبارة عن شوربة لسان عصفور أو مشروب ومشروب رمضانى واختيار من الحلويات، وبعدها بـ تختار وجبة من 5 وجبات (معاها اختيارين جانبيين): ميكس جريل (64.95 جنيه)، شيش طاووق (44.95 جنيه)، نصف فرخة روستو 40.95 جنيه)، جريل فيليه وكانتري فيليه (65.95 جنيه) وميكس سي فوود (74.95 جنيه). وفيه منيو كمان للسحور عبارة عن طبق فول وطبق طعمية وبيض وجبنة وعيش وسلاطة وزبادي ومشروب رمضانى (بـ 29.99 جنيه). وفيه قسم أورينتال بـ يعملوا فيه أرز معمر وعكاوي وفتة باللحمة وبط ومسقعة وطواجن. ما تحمسناش قوي لمنيو رمضان وطلبنا من المنيو العادية تشيكن أنشيلادا (44.95 جنيه)، وجريلد فييل (66.95 جنيه) مع مقبلات سبرينج رولز بالخضار (25.95 جنيه) وشوربة كريمة بالفراخ (16 جنيه)، مع عصير قمر الدين (19.95 جنيه) والسوبيا (12.95 جنيه)، ونزل لنا زجاجة مياه صغيرة (4.95 جنيه). عصير قمر الدين كان مطبوخ (مهلبية قمر الدين) جاء لنا فى طبق مش فى كوباية، والطعم كان حلو هو والسوبيا اللى كان سكرها مضبوط وقوامها كمان، الشوربة كمان كانت عظيمة وسخنة، الأكل بصفة عامة ما يقلش عن جودة اللى كنا بـ نأكله فى "راسبري" ومخدوم كويس وطازج والكميات ضخمة لدرجة فيه أكل أخذناه معانا تيك آواي.. بس من الآخر مافيهوش غلطة، وده عوضنا شوية عن الإحباط اللى سببه لنا الديكور والجو العام. ما كانش فيه غيرنا فى المكان وقت الأفطار، بعدها جاءت شلتين للعب الطاولة والتفرج على التليفزيون، فحسينا أن المكان قلب قهوة.. فيه مشكلة فى تحديد هوية المكان سواء بسبب الديكور أو الخدمات اللى بـ تقدم فيه! يعني مثلاً عندهم تسالى رمضانية زي اللب والترمس وحمص الشام بـ 10.99 جنيه! وده مش حاجات ممكن تشوفها فى مطعم! الجرسون اللى كان معانا متعاون وكان مهتم برأينا فى الأكل، وكمان سألنا على رأينا فى المكان وقلنا له المشاكل من وجهة نظرنا بصراحة، ودي بداية كويسة، وإحنا بـ نحاسب كمان عملوا لنا خصم 10% وأعطانا الجرسون كارت خصومات ممكن تحصل من خلاله على نفس قيمة الخصم على كل الأماكن اللى موجودة على الموقع ده.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن