برجر مطاعم in الزمالك Cairo, Egypt

مطاعم

مينس: مركز الهامبورجر فى الزمالك
اصدرت في: 18/09/2012

فى يوم من الأيام، فى أواخر القرن الـ 19، المهاجرين من مدينة هامبورج فى ألمانيا عبروا إلى شواطئ مدينة نيويورك. وسط المسافرين دول كان فيه أكلة مفضلة اسمها هامبورج ستيك (عبارة عن لحم مفروم عليه توابل). وعلشان يجذبوا الوافدين الجدد، موانئ نيويورك بدأت فى تقديم أكلات من بلدهم الأصلى عبارة عن لحم الستيك على طريقة هامبورج. والنهارده، وبعد مائة سنة، زود العيش، والكاتشب والبطاطس المقلية، واستقبل أحدث مولود من المطاعم فى الزمالك، جنة الهامبورجر «مينس – Mince».فى شارع أحمد حشمت جنب أرابيكا، مينس بـ يحقق كل أحلام عشاق الهامبورجر. مع الحديد المضلع والحوائط اللى من الطوب، والسقف المكشوف مع الواجهة الزجاج، تقدر تكتشف المكان الصغير والعملى فى الوقت نفسه. أول ما تدخل هـ يقابلك لوح كتابة كبير معلق مكتوب فيه كل الاختيارات المغرية اللى مستنياك تجربها.مع الشيف القادم من لندن، ممكن تحس فى الأول أن الاختيارات الموجودة غريبة شوية، بس بطريقة كويسة. بعيدًا عن الأنواع المعروفة من البورجر زى: بورجر مينس بالمشروم، أو الأشد شوية البورجر المدخن مع مربى التوت، والبصل المسكَر والجبنة المدخنة، تقدر تختار بين عدد كبير من الإضافات والصوص المختلفة.فلفل الهالوبينو الحار، واللحم المقدد (البيكون) والأناناس المشوى (5 جنيه) ممكن يضبطوا ساندويتشك، وكمان صوص الزبادى بالنعناع وصوص الصلصة ممكن يحلّوا البطاطس، ودى مش أى بطاطس، تقدر تختار من بين البطاطس المقطعة يدويًا والبطاطس المسكرة (سعر الحجم الكبير 12 جنيه) أو تغير كل ده وتطلب حلقات البصل (سعر الحجم الكبير 12 جنيه) واللي بـ تبقى مغلفة بطبقة خفيفة وهشة.بورجر فيجى Veggie burger (26 جنيه) من الحاجات اللى شدتنا علشان نبدأ بها. فيه أى مكان ثانى فى مصر بـ يعمله؟ طبقات مشروم، وكوسة مع الفلفل بـ يغطيهم جبن ماعز وبيستو، وعلشان ما كانش مفروم، فكان أقرب لساندويتش نباتى عن البورجر. رغم أن النكهة كانت لذيذة، بس مش هو ده اللى توقعناه. على الناحية الثانية، بورجر مينس (36 جنيه) كان فعلاً تحفة. معمول من لحمة مستوردة غير مجمدة، عليها مشروم طازج وجبنة سويسرى، والساندويتش كان مطبوخ تمام.بورجر الكاريبى Caribbean burger (28 جنيه) كان بالتأكيد أغرب اختيار نجربه. مع صوص المانجو والجبن الشيدر الطازج كطبقة على البورجر، استغربنا أن الساندويتش كان فراخ مش لحمة. بعد ما قعدنا دقيقة مستغربين، اكتشفنا أنه مكتوب فعلاً فى بند الفراخ الموجود فى اللوحة، اللى رغم أن شكلها مبهر وماشية مع ستايل المكان، كان فعلاً صعب أنك تقرأها. رغم كل ده، الفراخ كانت طرية بشكل ممتاز والمكونات كلها طازجة.بعيد عن السلاطات، زى سلاطة سيزر أو مينس، الكول سلو وسلاطة البطاطس بـ يُقدموا كأطباق جانبية سعرها 8 جنيه، والكول سلو خصوصًا شكلها وطعمها كان لذيذ وبيتى.كمان للتحلية تقدر تجرب الكوكيز البيتى اللى بـ تُقدم بنكهات: قطع شوكولاتة، وشوكولاتة دوبل، والبيكان المملح (10 جنيه). الكوكيز الطرية، والغنية بالشوكولاتة واللذيذة قوى كان لازم نأخذها معانا البيت. من حسن الحظ أن ممنوع التدخين داخل مينس، لكن برضه فيه قعدة فى الخارج علشان المدخنين ما يحسوش أنهم منسيين، أو يمشوا بسرعة بعد الأكل. الخدمة عند كاونتر الطلبات كانت محبطة شوية، السرعة والتركيز من أهم عوامل النجاح فى مكان فيه شغل كثير وعلشان مينس لسه فى الأول، الخدمة الفعالة عامل أساسى فى تحقيق النجاح. مينس بـ يقدم بورجر ممتاز مع إضافات فريدة وتنويعات مثيرة. ومينس هو الأول من نوعه ولازم نقول أننا فرحانين قوى بوجوده وسط مجموعة المطاعم الكبيرة فى الزمالك.

...

وينجز إن فلافورز: متخصص بافالو وينجز في الزمالك
اصدرت في: 02/07/2011

أخيراً فتح في كايرو مكان جديد بـ يقدم حاجة غير السوشي، الكَب كيك، أو النكهات الغريبة للشيشة. «وينجز إن فلافورز» أو (أجنحة بالنكهات) فتح في شارع طه حسين في الزمالك، ومتخصص في البافالو وينجز (أجنحة الدجاج) المقرمشة. لمّا تدخل المكان الضيق، هـ تلاقي سلم خشب ظريف، إطلع عليه. المطعم متقسم لـ 3 أقسام مختلفة، وكل واحد منهم الديكور بتاعه يختلف شوية عن الباقي. من ناحية التصميم، فـ «وينجز إن فلافورز» تصميمه حالم وخيالي شوية بحوائط من الخشب والأحجار، والسلاسل والمصابيح الشرقية متعلقين من السقف. وقت لمّا رُحنا، كان فيه شاشات مسطحة حول المكان بـ تعرض ماتش كرة، وكان فيه شاشات LCD بـ تعرض صفحة حساب التويتر الخاص بالمحل، يعني لو عملت مشاركة على الصفحة هـ تشوفها قدامك وانت قاعد. الترابيزات الخشب منخفضة شوية، وحولها كنبة أو قعدات مختلفة. طقم الملاحة والفلفل اللي واخدين شكل بيضة كانوا تقريباً أحلى حاجة شفناها في المطعم، كل ترابيزة عليها ديتول، لأن الإدارة هناك عارفين كويس أكل البافالو وينجز بـ يبهدل الدنيا إزاي. المنيو بتاع «وينجز إن فلافورز» فيه مقبلات زي الموزاريلا ستيكس (28 جنيه)، بطاطس الودجز الحارة (22 جنيه)، حلقات البصل (25 جنيه). فيه بار للسلاطات تقدر تعمل منه طبق فيه اللي انت عايزه بـ 30 جنيه. تقدر كمان تعمل البرجر اللي انت عايزه (46 جنيه) أو تطلب البرجر الشرير (Evil Burger) بـ 52 جنيه. إحنا أكيد طلبنا الأجنحة اللي «وينجز إن فلافورز» متخصصين فيها. طلبنا 9 قطع الأوريجينال (42 جنيه) ومعاه صوص عسل المسطردة (5 جنيه) والأورانج جليز (6جنيه). جربنا كمان الـ 6 قطع من أجنحة البلو تشيز (34 جنيه) والـ 6 قطع من أجنحة الترياكي (32 جنيه). الأجنحة الأوريجينال كانت حارة جداً جداً جداً، يعني لو مش لك قوي في الأكل الحار يبقى أطلب معاه صوص الأورانج جليز عشان يخفف الموضوع شوية. ولكل اللي بـ يحبوا البلو تشيز أو (الجبنة الروكفورد) يبقى لازم تجربوا أجنحة البلو تشيز. الصوص كريمي بس برضه باين فيه طعم الجبن الروكفورد، وأجنحة الترياكي جميلة جداً. الأجنحة كبيرة ولحمها مستوي وطري. كانوا متحضرين حلو واللحم بـ يطلع بسهولة من العظم والجلد طِعِم. تقدروا تختاروا من الـ 6 قطع، 9، أو 12 قطعة. إحنا كمان جربنا البطاطس المهروسة (15 جنيه) كطبق جانبي، وطعمه كان كويس بس مش فيه حاجة مميزة. للتحلية، جربنا «آيس كريم ويلي»، وده نوع متخصص من الآيس كريم الطبيعي بالنكهات المحلية المصرية. طلبنا بولة جوافة، كركديه، وفول سوداني (البولة 10 جنيه)، وكلهم كانوا حلوين جداً لدرجة أنهم يستاهلوا أنك تروح لـ «وينجز إن فلافورز» مخصوص عشانهم. وقت ما رُحنا، المزيكا اللي كانت شغالة هناك كانت عالية شويتين وكان صعب أن الواحد يعرف يتكلم مع اللي جنبه. بس ده كان يوم الإفتتاح، ونعتقد أنه أكيد هـ يبقى أهدى بعد كده. يعني لو انت في الموود لنوع جديد من الأكل برة، وعايز نكهات مختلفة، روح الزمالك وهات لك أجنحة وغرق نفسك.

...

مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول