إيطالي مطاعم in الزمالك Cairo, Egypt

مطاعم

ميتسالونا: أكل إيطالي ومكان مريح في الزمالك
اصدرت في: 02/03/2014

مع الوقت اكتشفنا أن الأماكن اللي بـ تبقى مستخبية كده ومش ظاهرة بـ تكون من أحلى الأماكن للأكل والاستمتاع، علشان الهدوء اللي بـ تكون فيه، تخيلوا بقى لو كمان المكان ده كان بـ يعمل أكل جميل، مطعم وكافيه "ميتسالونا –Mezza Luna" مكان جديد فتح في شارع عزيز عثمان من شارع 26 يوليو في الزمالك، بـ يقدم أكل وحلويات إيطالي. اكتشفنا "ميتسالونا" بالصدفة وإحنا معديين من جنبه وشدنا هدوء المكان، كان مكون من دورين: الدور الأول مقسم لجزء مفتوح فيه تقريبًا 4 ترابيزات، وجزء داخل المكان فيه ترابيزة كبيرة في النصف وبار صغير للمشروبات السريعة، على الحائط كان مكتوب المنيو بخط كبير جدًا، أما الدور الثاني فهو دافئ وهادي جدًا، مكون من 6 ترابيزات بكراسي خشبية مريحة. قررنا نقعد وإحنا بـ نأكل في الدور اللي فوق وأول ما قعدنا جاء لنا الويتر بمنيو المشروبات والمنيو، الأكل اللي كان مكتوب بخط الأيد وللأسف الخط كان أغلب الكلام فيه مش واضح، تفحصنا المنيو كويس بمشروباته اللي بـ تتراوح من (9: 16 جنيه) والمقبلات والسلاطات (20: 27 جنيه) والمقبلات كانت عبارة عن 6 قطع من الخبز عليها أصناف ونكهات مختلفة زي الجبنة الموتزاريلا والصوص مع الخضروات، الباستا كانت من (30: 52 جنيه)، وفطائر الرافيول بالجبنة بنكهاته المختلفة (34: 42 جنيه). قررنا نطلب ميلك شيك بالشوكولاتة (16 جنيه) ومشروب صودا (10 جنيه)، بعد ما جاء لنا المشروبات في وقت سريع وكانت باردة ومنعشة قولنا ندخل على الأكل فــ طلبنا تشيكن بولو باستا بالوايت صوص (45 جنيه) وباستا سي فوود (52 جنيه) وباستا تونة (36 جنيه)، الأكل وصل لنا بعد 30 دقيقة وكان سخن ورائحته لذيذة جدًا وكمان الطعم كان أحلى بكثير من الرائحة، باستا التونة كانت بسيطة جدًا مع التونة والوايت صوص والزيتون، أما باستا السي فوود دي كانت عالم بحار في الطبق من الجمبري للسبيط والجندوفلي مع الصوص الأحمر اللذيذ، وكل طبق باستا كان معاه جبنة رومي مبشورة إضافية. الحلويات عندهم كانت من (21: 23 جنيه) زي الكريب بالشوكولاتة والتشيز كيك والهوم ميد تراميسو الإيطالية المشهورة بطعم الجبنة مع البسكويت والقهوة الذيذة. الخدمة في ميتسالونا لطيفة بس الويترز محتاجين يوزعوا نفسهم في المكان بحيث أن كل الترابيزات تشوفهم، إنما الأكل كان عال العال، ووجود حمام في المكان كانت حاجة لطيفة وما بـ تكونش موجودة في المطاعم الصغيرة كثير، آخر اليوم قررنا نقعد بره في الهواء علشان نستمتع بكل مكان في ميتسالونا.

...

بيتزا إلدي فينو: طعم جميل للبيتزا الإيطالي في الزمالك
اصدرت في: 17/02/2014

الزمالك.. مكان ممكن تلاقي فيه تنوع في كل حاجة من كافيهات لمطاعم لمحلات ملابس وإكسسوارات، أي حد دلوقت يقرر يفتح حاجة في الزمالك لازم يكون دارس الموضوع كويس جدًا، علشان المنافسة مش هــ تبقى سهلة أبدًا خاصة محلات الأكل، "بيتزا إلدي فينو–Il Divino Pizza" مكان جديد فتح في الزمالك في شارع أبو الفدا بـ يعمل بيتزا على الطريقة الإيطالية الأصلية. وصلنا لبيتزا إلدي فينو، المكان صغير عبارة عن دورين، الدور الأول عبارة عن مطبخ صغير مع فرن البيتزا الكبير المغطى بخرز بـ يلمع وشكله كأنه كرة ديسكو كبيرة جدًا شدتنا أول ما دخلنا، طلعنا الدور الثاني وكان مكان لطيف بالترابيزات الخمسة الصغيرينوديكوره اللي واخد الطابع الإيطالي. قعدنا والترابيزة كان عليها المنيوهات علشان ماننتظرش الجرسون ونختار على طول، المنيو كان مليان بأنواع كثير من البيتزا منها الخضروات والسي فوود واللحوم وطبعًا التشيكن وكل دول أسعارهم مابين (32: 68 جنيه) وكمان ممكن تحط أي حاجة من اختيارك على البيتزا بتاعتك من (5: 16 جنيه) على حسب الزيادات. طلبنا بيتزا نابوليتانا (52 جنيه) كان طعمها لذيذ ومضبوط بالتوابل والموتزاريلا والأنشوجة والزيتون وصلصة الطماطم، ومعاها بيتزا بولو بيستو (52 جنيه) عبارة عن موتزاريلا والبيستو صوص والتوابل وقطع الفراخ والطماطم، بيتزا البولو بيستو برغم طعمها الجديد لكن كانت مليانة بزيت الزيتون اللي كان مغطي على المكونات الثانية وخلانا محتارين في طعمها، كان فيه كمان سلاطات زي إلدي فينو سلاطة (38 جنيه) بمكونات التونة والخضروات اللذيذة، أما جزء الحلويات فكان عندهم فطيرة تفاح دولسي (35 جنيه) وكروستاتا الليمون (30 جنيه). الأكل جاء لنا بعد 20 دقيقة تقريبًا والمشكلة الوحيدة أن المكان فوق صغير جدًا فبالتالي الويتر بـ يفضل واقف جنبك علشان لو احتجت حاجة ودي حاجة ما كانتش مريحة شوية بالنسبة لنا، البيتزا في إلدي فينو إيطالية على حق وطعمها جميل والخدمة هناك لطيفة وسريعة.

...

ساشو بيسترو: عشاء بسيط فى الزمالك
اصدرت في: 23/09/2013

زى ما سيدنا الحسين دعا أمينة فى فيلم قصر الشوق، إحنا كمان نادت علينا منطقة الزمالك الهادئة بمطاعمها وكافيهاتها الأنيقة دائمة التطور، فى محاولة منهم لتقديم جو هادئ مميز. فى مكانه على شارع جانبى هو العادل أبو بكر، "ساشو بيسترو - Sasho Bistro" مطعم خلاب بـ يقدم منيو صغيرة -لكن متنوعة- للإفطار، الغداء والعشاء. المطعم الشبيه بالكافيهات صغير وجوّه مريح، بألوان هادئة، وشبابيك كبيرة وعدد من أصص الزرع الصغيرة على كل ترابيزة. حوائط من الطوب مع لوحات كلاسيكية وموسيقى الجاز الممتعة قدروا يخلقوا جو راقى مريح فيه نوع من البساطة. وعلى الرغم أن انطباعنا الأول عن المكان كان مميز، كان لازم نلاحظ عدد من اللوحات المكسرة. المنيو صغيرة وبسيطة تشمل سلاطات خفيفة (22.50 جنيه)، لفائف (25.50 جنيه: 35.50 جنيه)، مكرونات (26.50 جنيه: 42.50 جنيه) وأطباق رئيسية (52.50 جنيه: 79.50 جنيه)، وكمان اختيارات منفصلة للإفطار. زيارتنا كانت بهدف الحصول على إفطار متأخر شوية، وقابلتنا مجموعة من اختيارات الإفطار –أغلبها مطبوخة– العالمية والمصرية. من بين أطباق البيض، والفول والجبن، طلبنا ساندويتش أومليت ملفوف (32 جنيه) وفول (20 جنيه) عليه إضافة سبانيش (4.50 جنيه). طلبنا كمان من بين قسم الحلويات المحدود طبق من حبوب موزلى muesli cereal cup (24.50 جنيه) بالزبادى، الفواكة والعسل. من بين مجموعة المشروبات الساخنة والباردة، عصير البرتقال الطازج (16.90 جنيه) كان بالتأكيد منعش، وطعمه وسط، لا هو حادق زيادة أو مسكر زيادة. الخدمة كانت لطيفة، ولكوننا الزبائن الوحيدين، الأكل وصل بسرعة البرق. كمية الفول كانت مهولة وطعمه كان مميز بإضافة المزيج الأسبانى من الفلفل الحلو، والطماطم والبصل. بـ يقدموا معاه كمان خبز شامى طرى، دافئ مع ملح، فلفل وزيت زيتون بحيث نقدر نضبط التتبيلة على مزاجنا. ساندويتش الأومليت كان ألذ كمان؛ الخبز الأبيض كان مشوى من الخارج، مع إضافة ممتازة من الرومى المدخن، بيض مقلى وكمية كبيرة من الجبن السائح. الموزلى لسوء حظنا ما كانش صحى زى ما تخيلنا. قُدم بشكل لطيف فى كأس صغير مع قطعة من التفاح الأخضر غير الطازج، أما الزبادى فكان ينقصه الكمية المناسبة من العسل، وكمان قطع الموزلى نفسها كانت مش متنوعة وناشفة. الموضوع كان أسوأ بكثير لما لاحظنا بعد كام قضمة أن فيه حشرة حية فى وسط الأكل. ركزنا أكثر شوية، ومع الحشرة الثالثة نادينا بسرعة على الجرسون علشان يشاركنا اللحظة الغريبة. رغم اعتذارهم الشديد وقرارهم بأنهم يشيلوه من الفاتورة، فضل عندنا إحساس بالتوتر والضيق الشديد بخصوص التجربة كلها على بعضها. لولا الحشرات المخيفة العائمة وسط الزبادى والموسلى، كان زماننا بـ نقول أشعار فى حب ساشو بيسترو. بعيدًا عن الحشرات، الكافية البسيط بـ يقدم جو مريح يتميز بالهدوء والإفطار اللذيذ.

...

ماروني كوستا: كافيه هادئ فى مكان استراتيجي فى الزمالك
اصدرت في: 31/03/2013

مش عارفين ده نحس، ولا فيه حاجة غلط دائمًا فى تأسيس المكان ده! مكان الكافيه ده فى شارع إسماعيل محمد فى الزمالك وفى مكان استراتيجي جدًا أمام كليتي فنون جميلة وتربية فنية كان الأول اسمه "كافيه نوار - Café Noire"، وبعد كده بفترة مش طويلة بقى "سينزيو – Cinnzeo" ومؤخرًا بقى "ماروني كوستا – Marrone Costa" بشعار Caffee & Italian food وعرفنا بعد كده أنهم تابعين لنفس الشركة اللى مسؤولة عن سلسلة مطاعم "سينزيو" فى مصر. بديكور وزينة من على المحل بره هـ يشدك زي ما شدنا هـ تدخل هـ تلاقى حاجات من الديكور القديم ما تغيرتش منها السلم الحلزونى اللى موجود على يمينك أول ما تدخل وبـ يؤدي للدور اللى فوق، فيه بنوتة لطيفة استقبلتنا وكانت معانا وقت ما اختارنا هـ نأخذ إيه وشرحت لنا حاجات ما كانتش إجاباتها حاضرة لكن استفسرت لنا عليها. المنيو مكونة من قائمة للإفطار، والساندويتشات، والسلاطات، والبيتزا والباستا والحلويات والعصائر الفريش والساخنة والباردة. بدأنا قعدتنا باختيار ماروني بيتزا (44.90 جنيه) بـ تتعمل عندهم بطريقة جديدة لأنها عبارة عن طبقتين من عجينة البيتزا اللذيذة والموتزاريلا مع شرائح الدجاج والمشروم والتركي المدخن مع الزيتون والفلفل الألاون وصوص البيستو، وكمان طلبنا ماروني سلاد (37.90 جنيه) وهي سلاطة مكوناتها برضه جديدة من خس الكابوتشا مع شرائح الدجاج المشوي وشرائح التفاح الأخضر وطماطم الشيري مع الزيتون الأسود والجبن الريكفورد وعين الجمل وصوص الجبنة الريكفورد، وكل السلاطات بـ تقدم داخل طبق من عيش التورتيلا الكريسبي. الطلب بتاعنا أخذ وقت شوية لكن جاء لنا شكله يفتح النفس، السلاطة كانت عالمية، بس ما كانش فيها زيتون أسود وتم استبداله بزبيب (كمية كبيرة منه)، مزيج الطعم فى النهاية كان رائع لأن ملح الجبن الريكفورد كان بـ يعادله السكر الموجود فى التفاح، بس كان محتاج كمية الزبيب والجبن تخف شوية. البيتزا كانت جديدة علينا لأن من بره ما كانش عليها المكونات زي ما إحنا متعودين، المكونات كانت محشوة من الداخل فى الطبقتين وده خلى عندنا حب المغامرة والبحث فى اللى داخل البيتزا، الطعم رائع والكمية كبيرة واستمتعنا بها جدًا. كانز البيبسي بـ (10.90 جنيه)، و زجاجة المياه الصغيرة بـ (5.90 جنيه)، ومن الحلويات لقينا الاختيارات اللى فى المنيو كلها فيها آيس كريم فى مكوناتها، بينما لو رحت اتفرجت على اللى موجود فى ثلاجة العرض هـ تلاقى أصناف ثانية، عجبنا شكل الأبل تارت (19.90 جنيه) رغم انهم كانوا مقطعينها بطريقة غريبة وكان حجم الـ Slice صغير جدًا بالمقارنة بأماكن ثانية، لكن الطعم والعجين والسكر كان مضبوط فيها وكانت نهاية خفيفة لقعدتنا هناك. المكان لطيف نتمنى أنه يكمل وما يكونش مصيره زي اللى سبقوه.

...

بنيسيمو: مطعم إيطالى جيد افتتاحه قريبًا فى الزمالك
اصدرت في: 28/05/2012

«بنيسيمو - Benissimo» مطعم فى الزمالك جنب كافيه «كافيتشو» و«هارديز» لسه فى الـ Soft opening ما بقالوش كام يوم بـ يقدم أكل إيطالى وهـ يفتحوا على أول الشهر القادم رسميًا، المكان صغير يا دوب فيه كام ترابيزة وكرسي عاليين وعلى الجنب الثاني طولهم عادي، الكاشير فى الواجهة أول ما تدخل، والولد بتاع الكاشير هو نفسه اللى بـ يأخذ طلباتنا، وجنبه فيه حاجز بـ يخبي المدخل للمطبخ. أول ما قعدنا وطلبنا (بعد ما استشارنا الولد اللى معانا فى محتويات بعض الأطباق وكان متعاون جدًا) قدموا لنا طبق تحية (مجاملة) من المطعم فيه 4 قطع فواتح شهية اسمها "بروسكيتا" وهى عبارة عن عيش توست محمص عليه قطع صغيرة طماطم وزيتون عليها جبنة مبشورة من فوق، كان طعمها حلو بس للأسف المكونات وقعت علينا لأن الجبنة مش محطوطة بشكل كافى ومش سايحة علشان على الأقل تمسك المكونات اللى فوق العيش مع بعضها. المنيو عبارة عن ورقة كبيرة A3 مقواة فيها باستا وبيتزا وشوربات ونوعين سلاطة وكام طبق رئيسي داخل فيهم باستا ولاحظنا كلهم معاهم لحم مافيش أطباق فيها فراخ، ومافيش تحلية فى المنيو، طلبنا شوربة طماطم (14 جنيه) وسألناهم هل ممكن تتعمل بالكريمة، الحقيقة أننا طلبنا حاجات مخصوصة نضيفها على الأطباق ما كانتش موجودة وهما كانوا متعاونين جدًا، كمان أخذنا بنيسمو ستيك فيليه (48 جنيه) بصوص الريكفورد ومعاها باستا بالصوص الأبيض، وبيتزا بالببيرونى (28 جنيه). توقيت تحضير الأكل ما كانش طويل قوي، كان لنا ملاحظة صغيرة بس أن تجهيز الترابيزة محتاج شغل شوية لأن أبسط حاجة ما كانش عليها مناديل! بس باقى الـ Cover كان متاح وهـ تلاقى الخدمة مسمينها فى الإيصال الأخير لما حاسبنا Handling (9 جنيه)، وفيه كمان ضريبة (9 جنيه). البيتزا بدون كلام رائعة، حجمها كبير مش الحجم العادي اللى بـ يكون فى أى مكان، المكونات فريش والجبنة سايحة والببيرونى كان طعمه حلو قوي، امتياز.. وعلى الرغم من أن الكمية كانت كبيرة تأكل فردين إلا أننا اتطافسنا وأكلناها كلها لوحدنا! الستيك فيليه بالباستا والصوص الأبيض كانت حلوة برضه، صوص الريكفورد كان جامد جدًا وغنى بالطعم وكمان الستيك كان معمول Well done زي ما طلبنا. كمان شوربة الطماطم كانت حلوة وقوامها معقول وإضافة الكريمة عليها بجد عمل "إضافة" بس الكمية كانت كبيرة قوي ما كملناهاش علشان نقدر نأكل الأكل الباقى. «بنيسيمو» موجود فى شارع المنصور محمد، بس استغربنا جدًا لما جاء لنا الـ Receipt فى الآخر كاتبين العنوان فى شارع إسماعيل محمد! المكان لطيف ومريح للأعصاب خاصة أنك قاعد باصص على الشارع من خلال الواجهة الزجاج الكبيرة، والولد اللى معانا كان مهتم بنا وبرأينا فى الأكل وسمع تعليقاتنا، لو لك فى الأكل الإيطالى وحابب تروح مكان لطيف وأسعاره معقولة والخدمة كويسة روح هناك وشجعهم كمان قبل الافتتاح الرسمي.

...

لينوز: مطعم إيطالي على النيل في الزمالك
اصدرت في: 21/03/2012

شارع أبو الفدا في الزمالك شارع طويل وكبير جدًا على الرغم من مساحة جزيرة الزمالك الصغيرة، فلما نلاقي كمية مطاعم وكافيهات ومحلات في الشارع ده مش طبيعية فده أمر غير مفاجئ خالص. في نهاية أبو الفدا وجنب «كوفي شوب كومباني» هـ تلاقي المطعم الإيطالي «لينوز – Lino’s» واخد مساحة كبيرة بدورين وتحس أنه متشابك مع الثاني في السور الزجاج اللي بـ تشوفه أول ما تدخل من الباب، خاصة أنك هـ تدور عليه لأن مافيش أى إعلان عنه بالخارج غير يفط «كوفي شوب كومباني». المكان رائع جدًا فيه جزء فوق بـ تطلع له بسلم وبـ تشوف من فوق منظر للنيل والعمارات على الجانبين، والجزء اللى تحت فيه كذا مكان للقعود كله مفتوح ماعدا جزء صغير مقفول بس حوالين الزجاج فكأنك قاعد مع الناس اللي بره. الجرسون اللى كان معانا لطيف جدًا ولأن الأطباق إيطالية قال لنا لو محتاجين أى استفسارات عن محتويات الأطباق نسأله، وده بالفعل اللى حصل، أغلب الأطباق بيتزا وباستا بشكل أكبر، وكل أطباق الباستا معاها إضافات ثانية وأشكال وألوان والخضار هناك اللي بـ ينزل لك بـ يكون معمول مشوي على الطريقة الإيطالية وبـ يكون فلفل وباذنجان وخضار ثاني مش زي اللي بـ يكون في الخضار السوتيه. الأطباق الرئيسية هناك مالهاش اختيارين جانبيين، بـ ينزل لك زجاجة مياه صغيرة (8 جنيه)، وخدمة Cover (3 جنيه) وفي الآخر بـ يضاف 12% خدمة، رحنا وقت الصبح بدري كانت الشمس جامدة والجو يفتح النفس على الشغل لأي حد معاه اللابتوب بتاعه وعاوز يخلص شغله ويخرج في نفس الوقت. بدأنا قعدتنا على غير العادة بالمشروبات، طلبنا مشروب تيراميسو (19 جنيه) وزودنا عليه نكهة كراميل (5 جنيه) كان جامد جدًا وتقديمه مختلف لأن كل مكون من مكوناته كان منفصل عن الثاني فكان عامل طبقات ألوانها كثيرة ومتدرجة، كمان جربنا فروتينو برتقال (22 جنيه) عبارة عن برتقال بـ يضاف له بودر علشان يبقى قوامه سميك بـ يُضرب مع ثلج مجروش، ما فيهوش غلطة. بعد ما اشتغلنا واستريحنا شوية جاء ميعاد الغذاء، احتارنا كثير فى الاختيار والجرسون ساعدنا وأخذنا طبق سلاطة خضراء وده اسمه بالإيطالي Insalata Mista (25 جنيه)، مشكلتنا الوحيدة كانت فى فهم الأسماء، طلبنا مع السلاطة طبق دجاج مشوي واسمه Petto di Pollo alla griglia (65 جنيه) وده بـ ينزل معاه خضار مشوي لكننا استبدلناه بالبطاطس المحمرة، كان حلو جدًا والبطاطس مقرمشة ولذيذة. كمان ذقنا الفراخ المشوية مع المشروم وباستا بصوص أبيض اسمها Petto di pollo della Casa (75 جنيه). حسن الختام كان مع التحلية، المولتن كيك (25 جنيه)، كيك شوكولاتة خفيف داخله شوكولاتة سايحة وغنية وعليها بولة آيس كريم فانيليا، بجد قفلة رائعة ليومنا هناك.

...

ديدوس آل دنتي: بيتزا وباستا بأسعار معقولة في الزمالك
اصدرت في: 26/02/2012

لينا تجارب كثير مع أكثر من فرع من فروع «ديدوس آل دنتي - Didos Al Dente» الموجودة في هليوبوليس والنزهة والمعادي والدقي، لكن بـ يفضل عندنا معزَّة خاص لفرع الزمالك بمكانه المميز على ناصية شارعين بهجت علي وطه حسين باللون الأبيض ومساحته الصغيرة من الداخل، لأن الفرع ده هو الأصل ومافيش حد ساكن في الزمالك أو شغله أو كليته في الزمالك أو قريب منها إلا وكان «ديدوس» إختيار شبه يومي في واحدة من وجباته. المكان صغير جدًا من الداخل وفيه حوالي 6 ترابيزات حجمهم صغير برضه، ولو رحت في أي وقت بنسبة كبيرة هـ تلاقي المكان مليان على الآخر وهـ تنتظر 5 دقائق مثلًا علشان مكان يفضى. وخللي بالك لو كنت قاعد في الترابيزة اللي وراء باب الدخول مباشرة لأن مع كل مرة حد يحاول يفتح الباب هـ يخبط اللي قاعد وراءه، وطبعًا خللي بالك وأنت داخل أنك ما تخبطش حد قاعد وراء الباب. كراسي البار العالية سمة مميزة للمكان، لكن اللي يزعل أن الديكور الداخلي متهالك جدًا ومواضع كثيرة من الأثاث متكسرة ومخدوشة، لكن واضح أن ده مش بـ يأثر على شعبية المكان، لأن الناس هناك مستمتعة بالجو العام للمكان جدًا والموسيقى اللي شغالة – كانت أغاني سعاد ماسي وقت زيارتنا - ومش مركزين في أي حاجة غير أطباق المطعم اللذيذة. المنيو إيطالي وتقليدي جدًا، بيتزا وباستا ولازانيا وعدد من السلاطات بالأسماء الإيطالية اللي تفتح النفس. ابتدينا بسلاطة الجمبري اللي اسمها في المنيو (إن سالاتا دي جامبيريتو) ودي سعرها 22 جنيه، وفيها بـ يكون الجمبري بالحجم الصغير مسلوق فقط ودافئ وعليه خلطة رائعة من الكمون والكسبرة وزيت الزيتون والليمون، والكمية كانت وفيرة وممكن يبقى وجبة لواحده. طبعًا ممكن تطلب أي شكل من أشكال المكرونة سواء سباجيتي أو فوسيللي أو بينا أو سباجيتي وتختار الصوص الأبيض أو الأحمر، وفي منيو الأطباق الرئيسية هـ تلاقي دائمًا نوع باستا ومعاها لحوم أو دجاج أو أسماك، فيه طبق واحد بس فيه أرز بسمتي مع الجمبري والكاليماري. اختارنا طبق من (مختارات ديدوز) اللي في المنيو وهو طبق باستا مع الكوردون بلو (38 جنيه) وأضفنا صوص كريمة بـ 6.50 جنيه. الطبق ضخم ومشبع جدًا وقطعة دجاج الكوردون بلو كانت مقرمشة من برة وطرية ومليانة شرائح تركي من جوة، المشكلة في الطبق بس أنه كان ناقص توابل وأن المكرونة كانت كثير قوي لدرجة أن الواحد بـ يتعب من الأكل قبل ما يشبع! بيتزا البيبروني والموتزاريلا (33 جنيه) كانت معقولة لكن كان ممكن تبقى أحلى من كده والإضافات كميتها تزيد شوية. لكن العجين والنكهة كانت ممتازة. الخدمة سريعة جدًا بسبب الضغط على «ديدوس» وقائمة الإنتظار الموجودة على طول. فيه حمام واحد مشترك للرجال والسيدات، ودي حاجة مش ظريفة ده غير أنه دائمًا مشغول طبعًا. الجو العام للمكان منعش وشبابي والأسعار اقتصادية والأكل فريش ولذيذ.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن