لبناني مطاعم in مصر الجديدة Cairo, Egypt

مطاعم

بيسترو تمارا اللبناني: وليمة إفطار غير عادية في سيتي ستارز
اصدرت في: 14/07/2013

وبعودة الأيام؛ لما بـ نقرر نروح نفطر في مطعم في شهر رمضان بـ يبقى في دماغنا أسئلة كثيرة عن جودة الطعام والتزامهم بتقديم وجبات الإفطار مع صوت المدفع بالضبط، ومستوى الخدمة وصحصحة العاملين في المطعم ومدى تأثير الصيام عليهم، وبـ نفكر كمان في الكميات وإذا كانت مناسبة للسعر اللي هم مخصصينه للوجبات ولا لأ، وإذا كانت القعدة حلوة بعد الإفطار وفيه مكان مخصص للصلاة، وفيه فرصة أنك تتابع برامجك المفضلة في التليفزيون ولا لأ، وعوامل ثانية كثير بـ تتدخل في تقييمنا للمكان اللي بـ نروحه وقت الإفطار في رمضان، ولحسن الحظ البداية كانت موفقة جدًا السنة دي بزيارتنا لمطعم «بيسترو تمارا اللبناني – Tamara Lebanese Bistro» وهو مطبخ لبناني أصيل وله صيت كبير كواحد من أفضل المطاعم اللبنانية في العاصمة، لكن في رمضان هو عامل منيو إفطار متنوع فيه أكلات لبناني ومصري وسعر الفرد فيه 170 جنيه غير شاملة 12 % خدمة. يا ترى ممكن تأخذ إيه قصاد المبلغ ده! هـ نقول لحضراتكم حالًا. أولًا لازم نقول أن «تمارا» هو واحد من أفضل وأشيك المطاعم اللبنانية في مصر، وفرعه الموجود في سيتي ستارز في الدور الأرضي بالقرب من سينمات الـ VIP شكله ملفت وديكوراته فريدة ومقسم لمستويين وغالب عليه الألوان الأبيض والبنفسجي الفاتح وقعداته فخمة ومريحة جدًا وعدد الويترز كبير بطريقة ملفتة ولهم زي موحد مميز بغطاء رأس شبه الطربوش المغربي، وهـ تحس أول ما تدخل المطعم قبل الإفطار بنصف ساعة أنك في خلية نحل، وكل العاملين بـ يتحركوا في كل اتجاه لتزويد الموائد بالأدوات والمشروبات والمأكولات. ووسط أجواء كلاسيكية أقرب من كونها رمضانية قضينا حوالي 30 دقيقة مستمتعين بكل تفاصيل المكان وفي انتظار لحظة الحقيقة، لحظة نزول الأكل على ترابيزتنا. الإفطار هنا منيو ثابت أو Set Menu فيه طبق رئيسي من المشويات على الطريقة اللبنانية فيه كفتة مشوية بخلطة طماطم وشيش طاووق وكباب، وتختار بين الأرز الأبيض أو الأرز بالخلطة والقرفة والبهارات، وطواجن خضروات زي البامية باللحمة والملوخية بالأرانب والتورلي باللحمة. وقبل ده كله بـ ينزل أطباق المقبلات اللبنانية الساخنة زي السمبوسك باللحم والجبن والسبانخ والباردة زي الفتوش والحمص والمتبل "بتنجان" والطماطم المخللة واختيارك من شوربة العدس أو لسان العصفور. قبل الوليمة دي بـ تختار بين عصير قمر الدين والتمر هندي وبعد الأكل بـ تختار بين بين الخشاف اللبناني بالمكسرات والقرفة أو القرع العسلي بماء الزهر والقرفة والمغطى بالقشطة. وليمة بمعنى الكلمة، ولأن وقت زيارتنا كنا فردين فنوعنا بين الأصناف الاختيارية وطلبنا كل حاجة موجودة في منيو الإفطار. مش هـ نطول في شرح التفاصيل لأننا مش هـ نلاقي كلمات إعجاب توصف كل صنف لوحده، الحقيقة «تمارا» أبهرنا بمنيو مصري/لبناني ما حصلش، مشاوي وعيش بوري ما حصلتش وطواجن خضار باللحوم ولا أجدع ست بيت مصرية، ومعجنات ومقبلات رائعة وأخيرًا حلويات غرقانة في العسل والمكسرات بمذاق رمضاني أصيل، وبالتالي أكيد مبلغ الـ 170 جنيه كان مناسب جدًا لكل حاجة في التجربة من أول القعدة الظريفة والمزيكا الحلوة اللي مشغلينها "سعاد ماسي" لحد الأطباق اللي قدموها ومستوى الخدمة الراقي، مع بعض تحفظاتنا على عدم الانتباه بسرعة لإشارتنا وطلباتنا لأن الضغط كان كبير فعلًا والمطعم كان مليان على آخره وقت الإفطار رغم أننا لسه في الأيام الأولي في رمضان اللي الناس المفروض بـ تتجمع فيه في البيوت في حفلات إفطار عائلية أكثر. بيسترو تمارا اللبناني قدم لنا تجربة إفطار رائعة بـ نرشحها بقوة لأي حد عاوز يجرب منيو شرقي محترم في مكان راقي، وبـ نفكركم أنكم ممكن تستغنوا عن منيو الإفطار الثابت وتطلبوا عادي من منيو «تمارا» التقليدي زي الأيام العادية.. إفطار جميل إن شاء الله.

...

دار القمر: أكلات شامية وتجديدات مبهرة في فرع مصر الجديدة
اصدرت في: 12/02/2013

من أقدم وأشهر المطاعم المتخصصة في الأكلات اللبنانية والسورية، واكتسب سمعته الجيدة بسبب الريادة أكثر من أي شيء ثاني، وكان طبيعي أننا نزوره من سنين طويلة والكتابة عنه كواحد من أشهر المطاعم المتخصصة في الأكل الشامي اللي فيها صالة طعام مش بس تيك آواي، لكن زيارتنا الأولى كان فيها كثير من الإحباطات وتركت لنا انطباع أن السمعة وموقع المكان مش كفاية علشان يعجب كل الزبائن، وأن المذاق ومستوى الخدمة هم العوامل الأهم لنجاح أي مطعم.الفرع اللي زرناه المرة دي كان في شارع الأهرام في مصر الجديدة على الصف المقابل لسينما نورماندي، مدخل المطعم هو نفس مدخل مول كمبيو مي للكومبيوتر والإلكترونيات. لو كنت من رواد المطعم في الماضي القريب، فبمجرد ما تعدي البوابة الزجاجية للفرع ده هـ تحس بالتغيير الكبير اللي طرأ على المكان "للأفضل طبعًا" والتحديثات اللي شملت كل التفاصيل من أول الديكور والإضاءة وحتى اليونيفورم بتاع الموظفين. حبينا الشكل الجديد جدًا واختارنا قعدة في ركن هادئ على ترابيزة ثنائية، لأن كل القعدات العربية على البوفات والطبليات المستديرة كانت محجوزة، وده دليل على الإقبال واستمتاع الناس بقعدات المطعم المميزة، وكمان المنظر الخارجي لشارع الأهرام العريق اللي هـ تشوفه من أي مكان داخل المطعم بسبب الجدران الزجاجية للمحل. وبعد ما تأملنا كل تفاصيل «دار القمر» الجديدة واتفرجنا على كل تابلوه وكل قطعة ديكور تحمل الطابع العربي الأصيل وبعد ما تأكدنا أن مكاننا مناسب في مواجهة واحدة من شاشات التليفزيون المعلقة، استرخينا وبدأنا نقلب في المنيو اللي كان مألوف لأقصى درجة، وتقريبًا كنا عارفين هـ نطلب إيه قبل ما نبص فيه.من المقبلات الساخنة اختارنا حاجة جديدة علينا وهي الحمص مع قطع اللحم البتلو المُشوحة في السمن وحبات الصنوبر ودي اسمها "القاورمة بالحمص" (22 جنيه) ورغم أن الكمية قليلة جدًا في الطبق لكن من كثر ما هي دسمة ما قدرناش نخلص الطبق، بس ما ننكرش أنها كانت معمولة حلو وطعمها جديد علينا وحبينا الخليط العجيب. دجاج مسحب (40 جنيه) مع اختيارك بين البطاطس المحمرة أو الأرز مع الخضار السوتيه والثومية، ده أول طبق طلبناه من غير تفكير لأنه بسهولة بـ يكشف جودة المطبخ الشامي أو ضعفه، الشواء على الجريل مش سهل، والنصف دجاجة المخلية اللي قُدمت لنا كانت آية في الروعة وجودة التسوية والتتبيلة اللي بـ تحس بها مع كل قطمة لما قطعة الدجاج تنزل العصير الخاص بها في الفم، مع البطاطس المحمرة والثومية والعيش الأبيض الشامي المولع كانت طبق الموسم بالنسبة لنا والسعر كان مناسب جدًار للكمية. طبق ثاني من منيو الأطباق الرئيسية وبالتحديد السي فوود، كان طبق جمبري دار القمر بالثوم والليمون مع الأرز والثومية (69 جنيه) وده طلبناه من باب تجربة طبق يحمل اسم المحل، وطبعًا ما خيبش ظننا وكان أمامنا واحد من أجمل أطباق الجمبري اللي ممكن تأكلها خارج مطاعم السي فوود المتخصصة، وتتبيلة فريدة من الكريم صوص بالثوم والليمون اللي بـ يتحط على الأرز البسمتي ويعمل أحلى ميكس مع وحدات الجمبري متوسطة الحجم ومقرمشة، ورغم الحجم الأقل من المتوسط للطبق ككل، إلا أننا استمتعنا بالمذاق جدًا وكنا فخورين باختياراتنا من المنيو وسط كل أطباق الشاورما والمشاوي والشيش طاووق. 3 بولات آيس كريم من اختيارنا (16 جنيه) وكأس ضخم من البينا كولادا بنفس السعر، الكرم زائد هنا في أطباق الحلويات والمشروبات، والطعم مضبوط فيما يخص الحلويات، بس ميكس جوز الهند والأناناس كان محتاج يتضبط أحسن من كده في البينا كولادا خاصة فيما يخص كمية السكر. تجربتنا هنا كانت جميلة لأننا حبينا أناقة المكان ومستوى الخدمة والنظافة المبالغ فيها في صالة الطعام وطريقة التقديم وفي الحمامات، يعني بقى لنا كثير ما شوفناش خدمة ونظافة بالطريقة دي، ومن هنا بـ نوجه شكر للقائمين على مطاعم «دار القمر» على حملة التجديدات والتطور الواضح في شكل ومضمون المطعم اللي نقدر نقول عليه "عريق".

...

أوليڤز: إفطار لبناني لذيذ لكن مستفز في سيتي ستارز
اصدرت في: 08/08/2012

ندخل في الموضوع على طول، مطعم «أوليـﭭز» مطعم لبناني أنيق بـ يقدم بعض الأطباق العالمية وموجود بالدور الرابع من المرحلة الثانية في سيتي ستارز، له فرع ثاني كنا كتبنا عنه قبل كده وهو الموجود في مجمع الـ Down Town في التجمع الخامس، وتجربتنا المرة دي مختلفة شوية لأنها في رمضان على مائدة الإفطار ولأن فروع المطاعم في سيتي ستارز بـ يبقى لها طابع خاص. المطعم عامل منيو ثابت للإفطار بسعر 99 جنيه للفرد غير شامل الضريبة والخدمة، يعني تقريبًا 125 جنيه للفرد، وممكن تضيف 23 جنيه علشان تختار من بعض الأصناف الأقيم شوية. بـ تتصل تحجز قبل ما تروح بساعتين على الأقل ولازم تختار الأوردر كله قبل ما تروح علشان يكون جاهز وقت الإفطار، علشان كده هـ نقول لك على الأصناف الموجودة اللي ممكن تختار منها علشان ما تضيعش وقت كثير في مكالمة التليفون. هـ تختار مشروب واحد من بين الكركديه والمانجو والجوافة وقمر الدين، واحد شوربة عدس أو لسان عصفور، نوع واحد من المقبلات الباردة من بين التبولة والحمص والفتوش والمتبل وسلاطة الجرجير والثومية، وبـ ينزل مع الوجبة طبق مقبلات ساخنة فيه سمبوسك وكبيبة وورق عنب وسبرنج رولز، ومن الأطباق الرئيسية المتاحة دجاج مسحب مشوي، ودجاج بالليمون، وبيف إيمانسيه، وشيش طاووق، وكفتة مشوية وفتة باذنجان وممكن تضيف الـ 23 جنيه وتختار من بين أطباق الميكس جريل والبيف فيليه بالصوصات المختلفة وطبق المأكولات البحرية والكباب المشوي. إذن هو ده المنيو اللي ممكن تختار منه بالمبلغ اللي دفعته، ومش من ضمنه أي طبق حلويات زي باقي الأماكن ما بـ تعمل في رمضان. حددنا الأوردر بتاعنا وقبل المغرب بدقائق بدأت أطباق المشهيات تنزل أمامنا ومعاها العصائر، لكن المشكلة أن الطبق الرئيسي تأخر جدًا، وكأن ده كان مقصود علشان نشبع شوية من كثر السوائل والمشهيات والعيش والشوربة لأن الكميات كانت قليلة جدًا خاصة في المقبلات الساخنة، ما ننكرش أن ورق العنب والرولز والكبيبة كانوا رائعين ومعمولين بصنعة ما حصلتش، لكن وحدات قليلة من كل نوع كأنه عاوزنا نذوق ونطلب ثاني. الفتوش والتبولة منتهى الجمال، والعصائر فريش وغنية بالطعم، الكركديه من غير سكر تقريبًا. الأطباق الرئيسية أخيرًا وصلت، الدجاج المسحب الشامي عبارة عن نصف دجاجة مشوية على الجريل، الطعم رائع والشواء ممتاز، الطبق الثاني فيليه اللحم بصوص المشروم، طلبنا اللحم مستوي على الآخر أو well done وكانت قطعة اللحم ضخمة وسميكة جدًا ومع ذلك مستوية بشكل مثالي وطعم الصوص وقطع المشروم كانوا خياليين. صنف جانبي واحد مع كل طبق رئيسي، بطاطس محمرة أو أرز أو سوتيه، جربنا السوتيه والبطاطس وكانوا تمام. رغم أن الكميات كانت تبدو قليلة أو هي فعلًا كده إلا أننا قومنا شبعانين بفضل السوائل والوقت الطويل بين نزول كل طبق والثاني. وعرفنا لما شوفنا أسعار الأصناف اللي أكلناها في المنيو العادي في غير أيام رمضان أن الأكل هنا مش رخيص وكل الأصناف أغلى من نظيرتها في مطاعم لبنانية وعالمية كثيرة. فعرفنا من تجربتنا هنا أن «أوليڤز» مطعم مطبخه خطير وأكله لذيذ وخدمته محترفة لكن كمياته قليلة وأسعاره غالية، علشان كده هو ينفع في أيام عادية وخروجات رومانسية وأكلات رقيقة بعد رمضان، لكن جايز إحنا علشان في رمضان بـ نحب نشوف أكل كثير أمامنا –حتى لو مش هـ نخلصه– وإحنا عارفين أن ده غلط، لكن «أوليـﭭز» بالنسبة لنا ما كانش المكان المثالي للإفطار السنة دي.

...

سيدرز: بوفيه مفتوح لأفطار شهي ومخدوم فى هليوبوليس
اصدرت في: 02/08/2012

تجربتنا الأولى له كانت فى شارع جزيرة العرب فى المهندسين من سنتين، فى زيارتنا المرة دي لتيفولى دوم مول لقيناه هناك فى دور علوي وديكوراته جذابة جدًا، ولأن تجربتنا فى المهندسين كانت حلوة جدًا ما ترددناش أننا ممكن نجربه فى رمضان. مطعم «سيدرز - Cedars» بـ يقدم مأكولات لبنانية على مستوى عالى، إحنا نفسنا أضفناه لقائمة المطاعم اللى بـ تقدم أكل لبنانى "من بتاع بلاده" زي ما بـ يقولوا زيه زي «بيسترو زيتونة اللبنانى» و«كركاس». المطعم موجود فى الدور العلوي بـ تطلع له من مدخل على الجنب وسلم طويل، المكان كلاسيكي جدًا، سواء فى ستايل النجف ولا الكنب والكراسي اللى لونها موف فى فضي، فيه منطقة داخلية للجلوس تحس أنها ضيقة شوية لأن "سيدرز" فى رمضان عامل بوفيه مفتوح، والبوفيه موجود فى منتصف القاعة والترابيزات والكنب بـ يحيط بها، وبالتالى وقت الأفطار بـ يكون المنطقة دي مزدحمة وممكن البعض ما يستريحش أنه بـ يفطر وفيه زحمة كثيرة أمامه لناس لسه بـ تأخذ أكلها، فيه كمان منطقة مفتوحة كاشفة كل تيفولى دوم من فوق وشكلها تحفة جدًا وفيه مراوح فى كل حتة لأن الجو دلوقت أنتم عارفين شديد الحرارة، أما بقى الجديد أن فيه منطقة ثالثة للجلوس مكيفة ولكنها بزجاج وبالتالى هى مفتوحة لكن مكيفة فى نفس الوقت، ودي أفضل أماكن الجلوس. لازم بـ تحجز قبل الأفطار، لما وصلنا للأسف ما كناش نعرف كده وسألنا المسئول عن الحجز لو فيه أماكن متاحة قال لنا فى الأول لأ، وبعدين لقيناه بـ يقول لنا فيه 3 أماكن اختاروا منها، ما فهمناش ليه عمل كده! المهم، البوفيه المفتوح بـ 150 جنيه للفرد (بدون الخدمة 12% والضريبة 10%) يعني إجماليًا هـ تلاقى نفسك دافع 180 أو 185 جنيه، بـ ينزل لك –كعادة كل المطاعم- زجاجة مياة كبيرة (9.95 جنيه) بـ يكون حسابها خارج قيمة الفرد. البوفيه ضخم ومتنوع، هـ تختار منه إما شوربة لسان عصفور كبداية تسخن بها بطنك أو مشروم بالفراخ، قبل الأفطار الجرسونات بـ ينزلوا مشروبات رمضانية على الترابيزات، السلاطات طبعًا متوقع أننا نلاقى التبولة والفتوش وسلاطة الحمص والطحينة والخيار بالزبادي، وفيه سمبوسك لحمة وفراخ، وبعدين بقى هـ تلاقى تشكيلة من الفراخ البانية والكفتة والمحاشي وورق العنب واللحمة بالفاصوليا البيضاء وخضار سوتيه وغيرها كثير. وكمان فيه مثلثات عيش بالزعتر والكمون وعيش ثانى رفيع شكله حلو زي طعمه تمام. الأكل مضبوط والشيفات مسويين الأكل تمام، مافيهوش غلطة، سخن وطازج والتقديم بتاعه ممتاز، السلاطات فريش والخضار كمان، النكهة اللبنانى واضحة فى الصنعة والكميات ضخمة والجرسونات متابعين أول ما صنف بـ يخلص بـ ينزلوا منه ثاني على طول. بوفيه الحلويات كان على الجنب صغير فيه أم على وكريم كراميل وشرائح بطيخ وكانتالوب وحلويات شرقية شبه الجلاش، أم على كانت ممتازة وسكرها زيادة شوية –زي قمر الدين برضه- لكن كانت جامدة كنا عاوزين نأخذ منها ثانى إلا أننا ما كناش قادرين. الأفطار فى سيدرز حلو والمنظر من فوق أحلى، الخدمة كويسة وسريعة، بـ نرشح المكان ده للناس اللى متعقدة أنها تخرج فى رمضان تفطر بره لأنها تعرضت لكذا موقف أن الأكل بـ يكون مش مضبوط قوي، لأن المكان ده تغلب على المشكلة دي وبحرفية.

...

بيروت إكسبريس: شاورما وأكلات لبنانية على طريق السويس في مصر الجديدة
اصدرت في: 03/07/2012

المطعم ده في حتة غريبة، أو بمعنى أصح حتة ما ينفعش تروح لها مخصوص، هو على الطريق السريع بين القاهرة والسويس، صحيح هو في أول الطريق من ناحية القاهرة وبالتحديد في شارع الثورة قريب من سينما ألماظة الصيفي، بس ما ينفعش تروح هناك إلا لو معاك عربية، وعلشان كده هم عاملين جراج خاص بالمكان أو تابع له ممكن تسيب فيه العربية من غير ما تدفع أي رسوم لو كنت داخل تأكل في المطعم. وممكن ما تحتاجش تركن خالص لو عاوز تقف أمام المحل والجرسون ييجي لك لحد عندك وتطلب وتأكل في العربية. بعد ما تعدي دار الإشارة ودار المدفعية على نفس الصف هـ تلاقي يافطة مضيئة باللون الأحمر مكتوب عليها «شاورما بيروت». وقفنا وبدأنا نستكشف المكان اللي كان أشبه بكشك زجاجي ضخم على جانب الطريق، وفيه ترابيزات أمامه على الرصيف الخاص به وفيه قعدات عربي داخل المحل نفسه. جربنا القعدة العربي داخل المحل المكيف شوية وبعدين تعبنا لأننا كنا قريبين من الأرض والوضع ده مش مريح في الأكل، ده غير أن التكييف مش قوي كفاية بالداخل، فغيرنا قعدتنا للترابيزة اللي بالخارج اللي بـ تطل على الطريق السريع. القعدة بره حلوة قوي، الهواء كان رائع لأن مافيش أي موانع والمساحات واسعة جدًا أمامنا، وفكرة أنك قاعد بـ تأكل على طريق سريع بـ تحسسنا أننا مش في القاهرة أصلًا أو كأننا قاعدين فى استراحة طريق سفر. المطعم متخصص في التيك آواي وده واضح من الزبائن اللي بـ تيجي تأخذ ساندويتشات وتطير أو تقعد تأكلها في العربية، لكن إحنا طلبنا أكل صعب نأكله وإحنا واقفين في السريع. طبق شاورما عربي (25 جنيه) وكبسة شاورما ميكس (27 جنيه) وطبق مشهيات لبنانية مشكلة (12 جنيه) وتبولة (8 جنيه). طبعًا المنيو هو التقليدي في أي مطعم لبناني أو سوري، فيه الشاورما هي الأساس لحمة أو فراخ، وفيه فراخ مشوية وشاورما بسطرمة وأطباق وساندويتشات جمبري وكبسات لحوم وجمبري بالإضافة للمقبلات الشامية زي الكبيبة وورق العنب والسمبوسك والسلاطات والفتوش والمتبل والحمص. الأسعار معقولة بالنسبة للساندويتشات الموجودة بـ 3 أحجام، بـ تبقى من 7 لـ 20 جنيه وممكن تعمل أي إضافة للساندوتش مجانًا من اختيارك من الثومية أو صوص التارتار أو دبس الرمان أو الطماطم، وفيه إضافات بـ 2 جنيه زي هريسة الشطة والجبن الشيدر والبطاطس والمكسرات، وللكومبو بـ تزود 6 جنيه. طبق المقبلات الكبير اللي نزل لنا كان فيه ثومية وزبادي وخيار مخلل وحمص وسلاطة خضراء، سلاطة الزبادي فيها نعناع زيادة والخيار مملح زيادة والتبولة دلعة زيادة، من الآخر فيه مشاكل في المقبلات، والحمص والثومية بس هم اللي ضبطوا الأمور. طبق الشاورما العربي عبارة عن ساندويتش في عيش سوري مُقطع كان طعمه حلو وميزة شاورما اللحم هنا أن مافيهاش أي دهون ومشوية حلو قوي لدرجة أنها بـ تبقى مقرمشة من غير ما تكون محروقة. طبق الكبسة شبه فتة الشاورما بالضبط بس من غير عيش محمص، مافيش أي صوص أو إضافات تحسسنا أنها كبسة، ومع ذلك كانت لذيذة وكميتها كويسة. الأطباق بـ تنزل متجملة ببطاطس محمرة ومسلوقة وحمص وثومية وسلاطة خضراء، يعني لو كنا نعرف أن الأطباق الرئيسية بـ تنزل كده كان ممكن ما نطلبش طبق السلاطات ده. بس عمومًا اتبسطنا من الأكل والخدمة المرحبة والأسعار وقبل ده كله القعدة الخارجية والهواء المنعش اللي يفتح النفس. وما عندناش مانع نأكل شاورما من «بيروت إكسبريس» أو "شاورما بيروت" كل مرة نكون معديين من هناك.

...

فتوش: أكل حلو وكميات مستفزة في سيتي ستارز
اصدرت في: 11/03/2012

كان نفسنا نأكل مناقيش وتبولة وفتوش اليوم ده، وبما أن الحياة دائمًا سهلة في سيتي ستارز وأكيد هـ تلاقي هناك الحاجة اللي نفسك فيها سواء أكل أو غيره، قعدنا نتمشى في الفوود كورت اللي فوق واللي تحت بـ نشوف فيه إيه مطعم لبناني ما كناش جربناه قبل كده، واكتشفنا أن أصلاً مافيش غير مطعمين بس متخصصين في الأكلات اللبنانية في المول كله، هم «جبل لبنان» و«فتوش»، والأخير موجود في الدور الرابع في الفوود كورت القديم. وله يافطة مميزة باللون الأصفر عليها شجرة الأرز اللبنانية باللون الأخضر هـ تقدر تميزها من بعيد. الكاونتر طويل علشان يستوعب أكبر كم من الزبائن، لكن الحقيقة أن الإقبال ما كانش عالي للدرجة دي، صحيح الأكل في الصور اللي في خلفية المحل شكله يفتح النفس، لكن واضح أن نفس السبب اللي خلانا نتضايق من تجربتنا في فتوش كان هو سبب عزوف الناس اللي مالية ساحة الطعام عن الأكل في «فتوش». المنيو لبناني تمامًا من غير اختراعات، مقبلات باردة وساخنة وسلاطات ومناقيش وساندويتشات ومشاوي وأطباق خاصة وفطائر حلوة وحادقة وصيامي وعصائر موسمية ومشروبات ساخنة. طلبنا مشكل مقبلات (33 جنيه) فيه 5 أطباق من اختيارنا، وكانت تبولة وفتوش ومتبل (بابا غنوج) وحمص بيروتي (حبيبات حمص) وزبادي بالثوم، وطبق مشاوي لبنانية مشكل أو مكس جريل (55 جنيه) وفتة شاورما باللحم والدجاج (32 جنيه) ومنقوشة زعتر وموتزاريلا (10 جنيه) وعرفنا أن طلبنا هـ يكون جاهز خلال 10 دقائق لكن المنقوشة مش قبل 20 دقيقة، ووافقنا ورجعنا ترابيزتنا وبعد ربع ساعة رحنا نأخذ أطباقنا وكانت المفاجأة لما شفنا طبق المشاوي اللي طلبناه والكمية المستفزة اللي لا يمكن تشبع شخص جعان أبدًا، وفيه قطع صغيرة من الكفتة والكباب والشيش طاووق ودجاج الباربكيو ومعلقتين أرز بسمتي وربع رغيف عيش سوري، ولما سألنا الجرسون اللي بـ يجهز لنا الأوردر إن كان هو ده فعلاً الطبق اللي طلبناه ودفعنا فيه 55 جنيه، وضح عليه الإحراج وما بقاش عارف يقول إيه! ولحسن الحظ أننا كنا طالبين منقوشة علشان تظبط الدنيا شوية جنب وجبة الأطفال دي. لكن ثاني مشكلة أن العامل اللي بـ يعمل المناقيش ما كانش موجود وانتظرنا أكثر من نصف ساعة قبل ما نأخذ منقوشة الإنقاذ، واضطرينا نبدأ أكل والطلب لسه ما كملش. المقبلات كانت حلوة وكمياتها كبيرة ومكوناتها طازجة خاصة التبولة والفتوش بدبس الرمان والسماق، والزبادي بالثوم وزيت الزيتون كان من أحسن منه في مطاعم كثير متخصصة. فتة الشاورما كانت كميتها معقولة ومغطاة بالثومية لكن كانت بردت من كثر ما انتظرنا الطلب يكمل وفي الآخر أكلنا قبل ما يكمل برضه. المشاوي رغم كل شيء كانت لذيذة ومعمولة بحرفية وتتبيلة مميزة، خاصة الشيش طاووق، لكن ده ما يشفعش للكمية المضحكة اللي في الطبق أبدًا. وبعد طول انتظار جاءت لنا المنقوشة ويمكن دي كانت أحلى حاجة أكلناها عند «فتوش» وفيها الموتزاريلا كثير وبـ تشد زي البيتزا والزعتر موزع كويس وهنا المنقوشة بـ تتقدم مدورة زي البيتزا مش ملفوفة زي أماكن ثانية. خلاصة تجرتنا في «فتوش» بـ تقول أن الصنعة حلوة والأكل لذيذ لكن الأسعار غير مناسبة للكميات في بعض الأطباق الرئيسية، يعني يا يكثروا الكميات يا يقللوا السعر. والخدمة بطيئة بدون مبرر لكن العاملين مهذبين ومتعاونين قدر المستطاع والمشروبات الفريش حلوة وأسعارها منطقية.

...

كرمالك: مناقيش ومقبلات لبنانية في مساكن شيراتون
اصدرت في: 06/03/2012

وإحنا في طريقنا للمطعم اللي بـ نتكلم عنه النهاردة وفي شارع أنقرة اللي فيه «مركز التنمية الرياضية» في مساكن شيراتون واللي موجود على أوله محل فول –كان عربية زمان– حمادة شيراتون أو حمادة الدولي، فوجئنا أن الشارع ده فيه عدد كبير من المطاعم والكافيهات اللي بـ تزيد يوم عن يوم، يعنى من آخر زيارة للمنطقة دي واللي كانت مش من وقت بعيد نقدر نقول أن المحلات كانت نصف الموجودة دلوقتي. يعنى باختصار هـ تلاقوا اليومين القادمين لنا تجارب كثير في أماكن جديدة في المنطقة دي. مطعم «كرمالك» موجود أمام سور مركز التنمية الرياضية بعد عدد من المحلات والكافيهات المضيئة وله يافطة ظريفة مكتوب عليها باللون الأحمر هـ تقدر تميزها وسط باقي المحلات. المكان صغير كأنه مخصص فقط للتيك آواي، لكن فيه 3 ترابيزات بالداخل والمكان مؤهل تمامًا لاستقبال المجموعات والعائلات الصغيرة. المكان جديد فاتح بقاله 20 يوم فقط، وواضح على الديكور والإضاءة أن كل حاجة لسه بشوكتها، لكن الديكور ملخبط شوية ومالوش شخصية محددة، لكن هـ تحس أنه مريح نفسيًا وده المهم. يمكن أكثر حاجة كانت غير ملائمة للجو هي الأغاني اللي كانوا بـ يشغلوها بصوت عالي قوي، وكان يبقى أفضل لو شغلوا أغاني لبنانية أو حتى موسيقى فقط. مناقيش لبنانية ومقبلات، ده كل الموضوع في «كرمالك»، لكن إحنا بـ نحب التخصص الدقيق، هم بس حطوا في المنيو 5 أنواع ساندويتشات بنفس الحشو بتاع المناقيش علشان لو حد راح مالوش فيها. موجود طبعًا المناقيش الأصلية بالزعتر واللحم بالعجين واللبنة وبالكشك والحلوم والسبانخ وأسعارهم من 10 لـ 16 جنيه. وفيه مناقيش كرمالك بحشو نوعين أو أكثر زي السجق أو الهوت دوج أو التركي مع الجبنة، أو 4 أنواع من الجبنة (كواتروفورماج) أو التونة ودول أسعارهم من 18 لـ 22 جنيه. وفيه منيو للمناقيش الخاصة (سبيسيال) زي الكفتة بالتتبيلة اللبنانية (مشروحة) بسعر 27 جنيه، أو دجاج كرمالك بالخلطة الخاصة بالمكان والمشروم والذرة والخيار المخلل والثومية والشطة (29 جنيه) والتونة سبيسيال بالحجم الكبير (26 جنيه). طلبنا من الجرسون يملأ لنا الترابيزة مقبلات لبنانية على مزاجه، وبعد 10 دقائق كان أمامنا ورق عنب بارد بزيت الزيتون (10 جنيه) وفتوش مع دبس الرمان اللذيذ (9 جنيه) ونقانق أو سجق لبناني (9 جنيه) وبطاطس محمرة (6 جنيه)، كل المقبلات كانت حلوة لكن كميتها قليلة، لكن حسينا برضه أن الشيف مش لبناني قوي! وفيه حاجات طعمها بيتي مصري عادي، خاصة السجق اللي ما كانش زي اللي أكلناه على يد شيفات لبنانيين في أماكن ثانية. جربنا منقوشة دجاج كرمالك الضخمة، شبه البيتزا بمكوناتها الملونة، لكن ملفوفة وساخنة جدًا، مشبعة ومميزة فعلاً مش شبه أي مكان ثاني. وجربنا فطيرة ثانية بالسبانخ المتبلة وكانت رائعة، وغيرت فكرتنا عن السبانخ. من منيو الساندويتشات جربنا برجر كرمالك (24 جنيه) بالعيش العربي، بـ يفكرنا كثير بماك أرابيا الموجود في ماكدونالدز وكان معقول، لكن زي ما قولنا التخصص كويس وخلينا في المناقيش. فيه 3 أصناف حلويات بس هم منقوشة النوتيلا بالموز وأم علي وتشيز كيك، والجرسون برضه رشح لنا التشيز كيك بالكراميل (15 جنيه) وطلعت خفيفة وسكرها وملحها مضبوطين. ميزة «كرمالك» الحقيقة في أن الأكل عنده خفيف جدًا، هـ تقوم من هناك شبعان بس مش حاسس أنك ثقيل وتعبان من كثر الأكل، ونفسنا بس الشيف الموجود يبقى لبناني علشان الحلو يكمل والصنعة تبان، وعلى رأي الشيف اللي في فيلم فول الصين العظيم "بيروت بـ تحب الطبخ؛ والطبخ يحب بيروت".

...

جبل لبنان: أكل لبناني أصلي في سيتي ستارز
اصدرت في: 10/07/2011

دائمًا الأكل اللبناني أو السوري بـ يكون من الاختيارات المطروحة لو كنت مع مجموعة كبيرة من الناس وكل واحد فكر في أكلة غير الثاني، وبما أن الاتفاق على أكلة ترضي جميع الأطراف حاجة صعبة وخاصة لما تبقى في مكان زي فوود كورت Food Court سيتي ستارز المغري جدًا بالتنوع الكبير في المطاعم الموجودة. «جبل لبنان» هو المطعم اللبناني الوحيد في ساحة الطعام في الدور الأول في سيتي ستارز في المرحلة الأولى، المحل موجود جنب «هارديز»، وله يافطة كبيرة باللون الأصفر عليها لوجو المحل المميز بجبلين وشجرة الأرز الخضراء. المحل طبعًا زي كل محلات الفوود كورت عبارة عن كاونتر عليه الكاشير والمنيو على الحائط الخلفي، بس هنا كمان كان فيه منيو مطبوع على غير عادة مطاعم المنطقة دي. المنيو ضخم جدًا، وممكن تأخذ وقت علشان تعرف تختار من أنواع الأطباق الموجودة. فيه مشاوي لبنانية وأطباق جبل لبنان الخاصة ومن ضمنها البيكاتا بالمشروم، والكبدة الإسكندراني (اللي المفروض مالهاش دعوة بلبنان خالص) وطبق الفلافل بالحمص والفتوش. فيه كمان ركن المأكولات البحرية بس ماحبيناش نجرب منه حاجة لأن مش ده الهدف من زيارة المطعم، وركن خاص بالفطائر الحلوة والحادقة والبيتزا الإيطالية والمناقيش، وفيه ركن اسمه «توربينو جبل لبنان» ودي أكلة خاصة بالمحل بس ماكانش فيه مكان في معدتنا علشان نجربه، يمكن نعمل ده في الزيارة الجاية. وركن للسندوتشات بالعيش اللبناني وعيش الصاج، وطبعًا المزات اللبنانية الشهيرة موجودة بوفرة، البارد منها والساخن، والسلاطات بأنواع كثيرة وأخيرًا الحلويات زي الزلابية وبلح الشام وأم علي، والمشروبات كلها غازية. جربنا طبق المشاوي اللبناني الشهير (ميكس جريل) وكان فيه طبعًا كباب وكفتة وفراخ مشوية مع أرز أصفر كان سعره 45 جنيه، بس اللافت للانتباه أن الكمية كانت قليلة جدًا وتأكدنا أول ما شفناه أنه مش ممكن يشبع شخص واحد، وأكيد هـ نطلب أكل ثاني، بس الطعم كان حلو والشواء نفسه كان هائل واللحمة والفراخ كانت طازجة وتتبيلتها خطيرة، طلبنا كمان فتة شاورما اللحمة والفراخ (29 جنيه) ودي كميتها كانت معقولة ومشبعة فعلاً، بس المشكلة أن كان فيه قطع دهن (ليّة) كثيرة وكبيرة وسط الشاورما، بس في النهاية الطعم كان جيد والشاورما كانت لذيذة وعليها ملعقة ثومية كبيرة من فوق. وفي المشهيات طلبنا طبق مشكل من السلاطات والمزات اللبناني (19 جنيه) اختارنا فيه 4 أنواع سلاطة هي اللبنة والفتوش والكول سلو والثومية وكلها كانت على المستوى المطلوب واستمتعنا فعلاً بغمس قطع المشاوي في كل الصوص ده، وما سيبناش فتفوتة فتوش من كثر ما هو خطير. الخدمة جيدة بس بطيئة شوية، بـ يأخذوا وقت على ما يحضروا الطبق خصوصًا لو فطائر أو مشاوي، وطبعًا أي حد عارف فوود كورت سيتي ستارز هـ يبقى عارف أنه بـ يكون زحمة جدًا في أوقات معينة منها الأجازات والويك إند بالليل. المطعم بشكل عام جيد وأكله حلو، بس لو ركز أكثر في الأصناف اللبناني الصريحة هـ يكون أحسن والخدمة بشكل عام هـ تبقى أحسن وأسرع، وهـ تسهل على الزبائن وهم بـ يختاروا من المنيو الكبير جدًا، وبـ تقلل احتمالات أنك تختار حاجة وتطلع مش حلوة. المحل له فرع في القاهرة في سيتي ستارز في مصر الجديدة، وفرع ثاني في «سينزو مول» في الغردقة، بس كده! واحنا متوقعين فروع ثانية تفتح قريب في القاهرة.

...

الركن الشامي: أكل سوري  تيك آواي في هليوبوليس
اصدرت في: 22/06/2011

مصر الجديدة وشوارعها مليانة محلات أكل وكثير منها أسعارها على قد الجيب زي محلات الكشري والفول والفلافل والفطير، بس مش بسهولة هـ تلاقي محلات فلافل وشاورمة سورية إلا لما الناس تعرفه وتبدأ تتكلم عنه. مزنوق بين محلات أكل كتير في شارع النزهة قريب من ميدان سانت فاتيما، «الركن الشامي» محل صغير من غير زيادات مالهاش لازمة، تيك آواي بس، بـ يقدم أكلات سورية بسيطة زي الفلافل والبطاطس والحمص والشاورمة. دور على محل اللوجو بتاعه على شكل تاج ملكي، هو ده «الركن الشامي». محترفين في الخدمة والمكونات، والمكونات دايماً طازة، كل العاملين بالمحل عارفين هم بـ يعملوا إيه، فيه ديلـﭭري بس بـ ننصحك تاكل هناك عشان الساندوتش يكون سخن وفريش، وممكن تحتاج تقعد تاكل جوة العربية قدام المحل عشان تتجنب دوشة الشارع حواليك. بـ 4 جنيه تقدر تشتري ساندوتش فلافل في عيش سوري ملفوف مليان على آخره وعليه إضافات سماق وحمص وشرائح خيار مخلل وطحينة مفرودة على العيش السوري الرقيق، النتيجة في الآخر ساندوتش خيالي ولذيذ. ورغم أن المحل من أحسن الأماكن اللي ممكن تاكل فيها فلافل سوري في مصر الجديدة ومشهور بكده، إلا ان الشاورمة كمان مِعدية. بتـ تعمل بنفس العيش السوري، وبـ تكون مستوية كويس بالذات شاورمة الفراخ، ومافيهاش دهن كتير والساندوتش مليان ثومية ومخلل والواحد منه مشبع جداً ومليان بروتين وسعره 11 جنيه بس. لما بـ نجوع بالليل غالباً بـ تطلب معانا ساندوتشات، بس مفيش مانع من شوية أطباق جانبية كده ومقبلات زي السمبوسك والكبيبة وورق العنب المحشي وأسعار الأطباق الجانبية دي بـ تكون بين 5 و 15 جنيه، وفيه وجبات أكبر شوية للأكيلة زي فتة الشاورمة وأطباق اللحوم. «الركن الشامي» إختيار هايل لو عايز أكل سوري خفيف ورخيص، وبما إن الأكل السوري عامل طفرة عموما في القاهرة وعليه إقبال غير عادي، جرب المطعم الفريد ده وقولنا رأيك.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن