مأكولات سريعة مطاعم in مصر الجديدة Cairo, Egypt

مطاعم

مكروني أند تشيز: باستا ورابس في ركن هادئ في مصر الجديدة
اصدرت في: 25/03/2014

حاولنا نوصل لـ «مكروني أند تشيز- Macaroni & Cheese» مرة قبل كده في كام أسبوع وفشلنا، لفينا في الشوارع الجانبية بين تيفولي دوم وشارع النزهة لكن ما وصلناش، المرة دي ركزنا شوية وسألنا على شارع عبد المنعم حافظ اللي على ناصيته سوبر ماركت أوسكار ووصلنا أخيرًا. موجود في شارع هادئ فيه كافيه في الجهة المقابلة قبله بشوية اسمه "شاتز" مشهور إلى حد ما، ممكن توصل له الأول وبعدين تكمل شوية للأمام على اليمين هـ تلاقي مكروني أند تشيز. محل صغير بس منور وسط الظلام اللي حوله، وشكله جذاب وأنيق من الخارج، ومن الداخل مساحته صغيرة فيه ترابيزتين تكفي 8 أشخاص بالكثير جلوس، وفيه بار على الجانبين ممكن تأكل عليهم وأنت واقف، وفي نهاية المحل فيه الكاونتر اللي بـ ينزل عليه الأكل والكاشير.المطعم متخصص في المكرونة وبالتحديد حبات المكرونة القصيرة المضاف لها خليط من أنواع مختلفة من الجبن زي الشيدر والكريمي تشيز، بـ يتم طهيها كأنها صوص وبـ تضاف للمكرونة مع أي نوع من الإضافات زي الدجاج أو السلامي أو المشروم أو هوت دوج أو بالسي فوود، وبـ تُقدم في طبق بكمية صغيرة. فيه بجانب الباستا ساندويتشات أو رابس في عيش التورتيا فيها شرائح دجاج مقلية وهوت دوج ودجاج مكسيكي حار وساندويتش مميز اسمه لويزيانا فيه إضافات كثير أهمها خليط الجبن اللي قولنا عليه ودجاج وخضروات، وفيه مقبلات أشبه بالموجودة في مطاعم التكس مكس زي لفائف الكاساديا والبطاطس المحمرة بالصوص الحار والبيف والبافلو وينجز، وأخيرًا منيو السلاطات العادي اللي فيه سيزر سلاد وشوية سلاطات غريبة.طلبنا أصناف متنوعة من المنيو علشان نعرف أكثر عن التخصص الدقيق للمطعم، فجربنا الماك أند تشيز بالمشروم والدجاج (33 جنيه) والماك أند تشيز طبعًا هو الاسم المختصر للمحل ولكل أطباق المكرونة المعمولة على طريقتهم الخاصة، وأخذنا كمان ماك أند تشيز بالسلامي (38 جنيه)، الطبقين دول نسخة طبق الأصل، فرق الدجاج أو السلامي بس، ولأن كمية الإضافات كانت قليلة جدًا، فالطعم الأساسي اللي حسينا به كان طعم المكرونة بالجبنة، لذيذ مافيش مشكلة، بس مافيش أي طعم مميز، مجرد مكرونة فيها رائحة الجبن، والدهون أقل، الكمية كانت قليلة بالنسبة للسعر والإضافات، بالكاد لاقينا بعض السلامي أو الدجاج، واحتاجنا نزود ملح وتوابل على كل الأطباق.طبق ثاني مميز اسمه فرايد ماك أند تشيز (25 جنيه) وده اختراع بجد أول مرة نشوفه كان هنا في المحل، عبارة عن مكعبات من المكرونة محمرة في خلطة من الجبن المقرمش، بدون إضافات لحوم أو دجاج، الطبق فيه 10 مكعبات، ممكن تشبعك لو كنت مش جعان قوي، وبـ ينزل معاها صوص من اختيارك، مسطردة عسل أو مايونيز أو غيره. أخذنا أطباق جانبية من البطاطس المحمرة مع الجبن المبشور والدجاج (21 جنيه) لكن للأسف جاء لنا بالسلامي مش بالدجاج! ومعاه مسطرة العسل برضه، طبق مالوش معنى وغالي بدون سبب، وطبق جانبي ثاني هو البافلو وينجز (23 جنيه) لكن هنا هم قرروا يخلوا البافلو وينجز مش أجنحة، إنما قطع دجاج تندر مقلية ومغطاة بالصوص الحار، فكرة مش بطالة وطعمها كان كويس، لكن ليه سايبين اسمها بافلو وينجز بقى!تجربتنا في «مكروني أند تشيز» كانت أقل من المتوسط، ما حسيناش بأي انبهار لا في نوعية الأكل أو في القعدة أو في الأسعار، مجرد أكلة مكرونة في مكان هادئ وأنيق على سبيل التغيير، الخدمة المهذبة ونظافة المكان مش كفاية علشان تخلي الناس تيجي وتعتبر المكان من أماكنهم المفضلة، لازم يغيروا كثير من المنيو والمذاق وقائمة الأسعار.

...

شارلي فيلي ستيك: ساندويتشات الستيك بيف الأمريكية في سيتي ستارز
اصدرت في: 24/10/2013

ركن جديد كان بـ يتم تجهيزه في الفوود كورت اللي في الدور الأرضي في سيتي ستارز، بقى لنا فترة بـ نشوفه ومنتظرين نعرف هـ يبقى فرع إيه. لكن هو ما طلعش فرع لحاجة موجودة بالفعل، لكن هو بداية سلسلة جديدة من المطاعم اللي هـ تنتشر في مولات مصر قريب جدًا وهي سلسلة «شارلي فيلي ستيك – Charleys Philly Steaks» اللي اختارت سيتي ستارز كنقطة انطلاق في مصر، وأخذ المحل مكان مميز جدًا داخل الفوود كورت في ركن واسع لدرجة أنه له بار صغير وعدد من الكراسي الخاصة به أمام الكاونتر اللي بـ تشتري منه، ممكن تقعد هناك وتستمتع بوجبتك قريب من المطعم علشان لو حبيت تزود مشروب أو حاجة جنب الأكل. غير كدة المطعم له نفس خصائص كل مطاعم الفوود كورت، وبـ يتميز بالسرعة وتحضير الأكل وتقديمه بشياكة وبود ملحوظ من العاملين. المطعم فتح في شهر مايو اللي فات وهو متخصص في الأكلات السريعة وبالتحديد ساندويتشات الستيك والروست بيف على الطريقة الأمريكية، مغطاة بالبيكون البقري وإضافات المشروم والهالبينو والباربكيو صوص والجبن، وبـ يعمل ساندويتشات دجاج بصوص الترياكي والبصل وصوص الرانش، وفيه بعض الساندويتشات بالخضروات فقط للنباتيين وفيه كلوب ساندويتش وتركي بالجبنة السايحة. وبـ يعمل تشيلي فرايز بالجبن واللحم المفروم وفيه شوية سلاطات باللحم والدجاج. منيو بسيط فيه ساندويتشات ترضي أذواق مختلفة، والأسعار واحدة، اللحوم بـ 23 جنيه الحجم الوسط و34 جنيه الحجم الكبير، والدجاج بـ 22 جنيه و33 جنيه، وأي إضافة على الساندويتش بـ 3 إلى 5 جنيه، والبطاطس من 7 إلى 21 جنيه حسب الحجم وإضافات الجبن والبيكون، والسلاطات بـ 17 جنيه، ممكن تعمل كومبو بإضافة 12 جنيه لثمن الساندويتش. الساندويتش الكبير مش كبير قوي، بـ يُقدم مقسوم نصفين وشكله حلو، جربنا البيكون ثري تشيز اللي مليان جبنة شيدر وبوفلون وجبنة سويسرية على قطع الستيك، وطلبنا إضافة مشروم لكن هم حطوا لنا رقائق البيكون بدلاً منها، كبرنا دماغنا وما رجعناش ثاني رغم أننا كنا مأكدين أننا عاوزين مشروم، المهم أن الساندويتش كان لذيذ لكن رائحة الستيك كانت نفاذة شوية كأنه كان محتاج شوية تسوية على الجريل، جربنا كمان التشيكن ترياكي وكان أكثر من رائع، والغريب أنه كان أحلى من اللحوم اللي هي تخصص المكان، صوص الترياكي اللذيذ مع شرائح البصل والفلفل والجبن كانت عاملة شغل، ورغم أن حجم العيش مش كبير لكن الحشو هنا كان كثير ومشبع جدًا. جنب الأكل أخذنا تشيلي فرايز بالجبنة كانت اختار موفق أحسن من السلاطات اللي لاحظنا أن حجمها صغير، وفي النهاية كان لازم نجرب عصير الليمون بالمذاقات المختلفة اللي «شارلي» مش بـ يقدم غيره بجانب المشروبات الغازية، وجربنا ليمون بمذاق البرتقال الأزرق (9 جنيه) اللي إحنا مش عارفين إيه هو، لكن كان طعمه منعش وشبه الطوفي وحلوى الأطفال، وليمون بمذاق الفراولة وده كان مفهوم وطعمه حلو برضه. حبينا «شارلي فيلي ستيك» وفرحنا أن فيه مكان جديد زاد على مطاعم فوود كورت سيتي ستارز اللي محتاجة دم جديد أول بأول، وبـ ندعوكم لتجربته بقلب جامد، هـ يعجبكم.

...

أبو حيدر: ذكريات أحلى ساندويتش شاورما في روكسي
اصدرت في: 24/06/2013

من حوالي 20 سنة كنا بـ ننزل مع أهالينا نتمشى ونشتري ملابس المدرسة من محلات "ريموندس" اللي كانت موجودة في روكسي، وبعد الجولة الطويلة واللف على المحلات كنا نقف عند «أبو حيدر» نجيب ساندويتش شاورما صغير في عيش كايزر وكوباية عصير المانجو الزجاجية الملفوفة بالكلينكس. الموقف ده بكل تفاصيله حصل تقريبًا لكل سكان مصر الجديدة والمناطق القريبة منها في كل خروجة في روكسي، ومافيش طفل ما كانش بـ يحب ساندويتش الشاورما من «أبو حيدر» بعد فسحة "ملاهي أدهم" في نفس الشارع وممكن كمان الفرجة على فيلم في سينما روكسي العريقة. من وقت للثاني بـ نعدي نقف نفس الوقفة أمام محل «أبو حيدر» الموجود في شارع ابراهيم اللقاني ونأكل ساندويتش الشاورما التقليدي ونشرب المانجو "مش عارفين إيه علاقتهم ببعض بس المحل ده عودنا على كده" لكن في زيارتنا الأخيرة قررنا نغوص أكثر في تفاصيل المحل اللي كثير من الناس ما يعرفوش أن فيه مكان للجلوس وتناول الطعام في الدور الثاني، صحيح هو مكان صغير فيه 3 ترابيزات بس وبـ يبقى حر جدًا في الصيف رغم وجود المراوح لكن القعدة فوق بـ تعطينا فرصة أننا ندقق أكثر في المنيو ونشوف إيه ثاني ممكن نأكله من هنا. ساندويتشات كبدة إسكندراني وسجق وكفتة داوود باشا وبرجر وسوسيس ودجاج بانيه وجبنة رومي كله بـ يتقدم في عيش كيزر (5 جنيه) أو عيش سوري (16 جنيه) أو عيش فرنساوي كبير (من 20 لـ 25 جنيه) وفيه مكرونة بالبشاميل باللحم المفروم ومعاها تورلي (8.5 جنيه) وفيه كبيبة شامي (6 جنيه) والسلاطات والمخللات بـ 4 جنيه. ده كل اللي موجود في المطعم. أخذنا واحد شاورما كبير "هنا شاورما لحم بس، مافيش فراخ" وواحد كبدة إسكندراني وطبق مكرونة فرن وطبق طرشي، كان نفسنا نجرب السلاطات لكن عرفنا أنها بـ تأخذ وقت على ما تتعمل لأنها بـ تتحضر فريش على حد قولهم! وطبعًا ما ينفعش نيجي هنا من غير ما نطلب عصائر فريش لأن «أبو حيدر» بجد متميز فيها وله باع طويل في مجال المثلجات والآيس كريم. فطلبنا عصير برتقال فريش (6.5 جنيه) وعصير مانجو (7.5 جنيه). حد قبل كده جرب يأكل شاورما بالنعناع؟ خلطة الشاورما هنا فيها نعناع أخضر، عاملة نكهة رهيبة للحم مع الخل والثوم والطماطم، صحيح فيه شوية دهون زيادة في اللحم لكن حسينا بخبرة السنين في كل قطمة وفي العيش الفريش اللي معمول مخصوص علشان «أبو حيدر»، ونفس الكلام على الكبدة، لكن ما حبيناش طعم المكرونة باللحم المفروم مع التورلي وحسينا أنها "عك" شوية رغم أن أنها في المجمل مافيش مشكلة في طعمها لكن هي بالتأكيد مش الحاجة اللي تيجي مخصوص علشانها. المانجو هنا حاجة ثانية، دي بقى الحاجة اللي ممكن تيجي مخصوص علشانها، طعم وقوام غير عادي، مش عارفين بـ يعلموه بالروعة دي إزاي؟! والبرتقال الفريش كمان كان هايل، وواضح أنهم مش بـ يهزروا في موضوع العصائر ده. زيارة «أبو حيدر» والقعدة والأكل داخل المكان كانت ضرورية علشان نوصل لكم معلومة جديدة بخصوص واحد من أشهر مطاعم التيك آواي والأكل على الواقف في مصر الجديدة، الخدمة في الداخل سريعة ومنتبهة، لكن القعدة متعبة ومالهاش داعي إلا للمضطر، صحيح فيه حمام والمكان نظيف، لكن وقفة الشارع أحلى بكثير، وإحساسها مختلف أكيد.

...

الحوت: أكلات بحرية سريعة في مصر الجديدة
اصدرت في: 11/06/2013

لو كنت من رواد مصر الجديدة وبالتحديد روكسي وشوارع ابراهيم اللقاني والأهرام يبقى أكيد لمحت محل الأسماك اللي حاطط بجعة كبيرة أمام الباب في مواجهة كافيه «أمفتريون» الشهير في شارع الأهرام، بجعة حقيقية عملاقة وحوض كبير فيه ترسة بحرية عملاقة برضه، من العلامات المميزة لمطعم «الحوت» المتخصص في ساندويتشات الجمبري والسمك ووجبات الأكلات البحرية السريعة، بإضاءة ساطعة ووموقع مميز بـ يغرينا كل مرة أننا نجربه ونشوف أخبار الأكل عنده إيه. بس في آخر زيارة عرفنا خبر مش كويس! البجعة اتسرقت! أيوه ده بجد.. حد جاء وفك البجعة المربوطة من رجلها وأخذها وهرب! مش هـ نسأل هو ممكن يكون سرق بجعة يعمل بها إيه! بس أهو ده اللي حصل.. كده مش فاضل لنا غير الترسة والأكل اللي هـ نجربه. مافيش جلوس داخل المطعم لأنه أشبه بكشك كبير بـ يتم تحضير الأكل فيه، والقعدات كلها على كراسي وترابيزات على الرصيف أمام الكشك ده. كنا فاكرين المطعم بـ يقدم ساندويتشات ووجبات أرز وفيليه بس، لكن لاقينا المنيو فيه كل أصناف السمك والجمبري بـ تتباع بالكيلو وفيه كمان تجهيز طواجن وصواني حسب الطلب وبـ يعمل طرق الطهي المختلفة. مش عارفين التنوع ده هـ يبقى في صالحه ولا لأ؛ لأن شكل المحل مناسب أكثر للوجبات السريعة، وإحنا ما جربناش في زيارتنا دي غير كام وجبة مع بعض أصدقائنا وكلها بـ تتكون من نوع أو اثنين من المأكولات البحرية المقلية مع الأرز والسلاطة والعيش وأسعارها بـ تبدأ من 12 لحد 35 جنيه، وكان فيه مكرونات بالسي فوود والموتزاريلا بأسعار من 15 لـ 32 جنيه وكثير من المقبلات والأصناف الجانبية. عملنا اختبار بسيط لمطبخ «الحوت» أننا طلبنا شوربة السي فوود المخلية (25 جنيه) واللي وصلت لنا ساخنة جدًا لكن بلا مذاق تقريبًا، وفيها فتافيت جمبري مش فريش خالص وقطع سبيط وفيليه قليلة جدًا، لأول مرة ما نقدرش نخلص طبق شوربة السي فوود وده معناه أنها كانت صعبة قوي. سيبنا الشوربة خالص وبدأنا في وجبة الجمبري المشوي على الشيش بخلطة الطماطم والفلفل والبصل (35 جنيه) والحقيقة الخلطة دي كانت أحسن حاجة في الموضوع، والجمبري كان متبَل كويس بس مملح زيادة، والأرز اللي معاه كان عادي جدًا والطحينة خفيفة والسلاطة الخضراء للأسف كانت كأنها عاوزة تحمض بره الثلاجة! كل دي أخطاء لا تغتفر، لأن ده محل متخصص في أكلة معينة ولو ما عملش كل تفاصيلها كما يجب يبقى يغير نشاطه أحسن. يمكن ساندويتشات الجمبري الحجم الوسط (15 جنيه) ووجبات الفيليه الصغيرة (17 جنيه) كانت أحسن حاجة من اللي جربناه هنا، وده بـ يأكد أن المطعم ده تأكل منه على السريع وبس، تحضير صواني وشوربات وسنجاري وطواجن مش مضمون بنسبة كبيرة، بس ممكن تجرب في مرة ويطلع حظك كويس، لكن الأكيد أنه مش هـ يقارن بأي حال بمطاعم الأسماك الكبيرة المتخصصة زي «البرج» و«بحري» و«قدورة»..لكن ممكن تقارنه بأسماك «تبارك» و«أبو قير» الموجودين في مناطق قريبة في مصر الجديدة ومدينة نصر. القعدة عند «الحوت» حلوة ودمها خفيف، كملها على خير بقى واطلب أكلات سريعة وساندويتشات، الأسعار كويسة والخدمة سريعة، وماتنساش تسألهم هـ يجيبوا بجعة ثانية إمتى.

...

رأفت: ساندويتش له تاريخ في مصر الجديدة
اصدرت في: 20/05/2013

لو كنت من سكان مصر الجديدة في القاهرة أو كنت بـ تتردد عليها كثير أكيد جالك اليوم اللي عديت فيه على «رأفت» في ميدان تريومف، بالذات لما تكون الميزانية محدودة وعايز تخطف لك ساندويتشين، ولا رايح مشوار بسرعة ومش عايز تقف كثير تنتظر الأوردر في أي محل. المحل الشهير بيافطته اللي لونها أخضر ومكتوب عليها "رأفت" باللون لأبيض، واخد ناصية مميزة في الميدان في الجهة المقابلة لمطعم «مؤمن». كان لنا نصيب نعدي من قدامه من يومين ونقف نتفرج على المنيو بتاعه اللي متعلق على الحائط ونشوف يا ترى بقى يقدم إيه غير الكبدة والسجق والشاورمة اللي هم تخصصه الأصلي، لقينا أنه زود بعض ساندويتشات الدجاج البانيه والشيش طاووق والبرجر والهوت دوج وفيه كمان دجاج مشوي على الجريل شوية حلويات زي الأرز باللبن وأم علي ومشروبات غازية. التنوع مش وحش برضه، وبما اننا مجربين الكبدة والسجق والكفتة المفرومة من زمان من هنا اللي بـ تتقدم بـ 3 أحجام (4.75 جنيه للصغير، 7 جنيه للوسط، 11 جنيه للكبير) فنقدر نقول لكم دي تأخذوها وأنتم مغمضين، الصنعة هنا حلوة قوي والنظافة إلى حد ما مضمونة، ودليل على كدة الاستمرارية ونجاح المحل على مدار عشرات السنين. لكن أكيد أخذتم بالكم أن الأسعار مش قليلة، يعني لما ساندويتش الكبدة في عيش فينو أصغر حاجة يبقى بـ 4.75 جنيه تبقى حاجة غريبة تستدعي الدهشة، لو أكل الغلابة بقى بالأسعار دي! أومال الأكلات العادية اللي في المنطقة دي هـ تبقى بكام! واضح أن الدنيا بـ تغلى بشكل مرعب وإحنا مش واخدين بالنا. المهم..جربنا حاجات جديدة من منيو رأفت، ووقفنا نأكل أمام المحل مع طبق المخلل المتين وشوية بطاطس محمرة (4.5 جنيه). طلبنا ساندويتش شيش طاووق دوبل كبير بـ 17 جنيه في عيش فرنساوي كان مليان على الآخر بقطع الدجاج، وده لواحده ينفع وجبة غذاء مع الكومبو بتاعه من بطاطس وبيبسي، لكن لاحظنا أن الدجاج كان لونه غامق شوية داخل الساندويتش ومش شارب التتبيلة كويس، وده راجع لأن الدجاج ده مجمد بقاله كثير. ساندويتش تاني من دجاج زنجر الحار بالجبنة الشيدر بـ 15.5 جنيه للحجم الكبير وده بقى كان ساندويتش حكاية بجد. كل مكوناته فريش وواضح أن المقلي عند «رأفت» أحسن من الجريل، واستمتعنا بالطعم والحجم وكل حاجة. فيه برجر حجم كبير بأسعار من 8 جنيه لحد 12.5 حسب الإضافات، وواضح أن عليه إقبال رهيب علشان شوفنا عامل الجريل وهو بـ يحضر عشرات الساندويتشات وإحنا منتظرين الأوردر بتاعنا. أي حاجة غير الكبدة والسجق هـ تأخذها بعد 10 دقائق تقريبًا، لكن لو غمزت الراجل اللي بـ يعمل الساندويتشات بكام عملة معدنية وأنت بـ تديله البون هـ يتوصى بك في الأوردر بتاعك وهـ يحضروا أسرع كمان! إحنا ضد الموضوع ده تمامًا ما عملناش ولا هـ نعمل كدة، لكن حبينا نقول لكم الدنيا هنا ماشية إزاي. وفي الأخير ساندويتش «رأفت» بجد له تاريخ هـ تحس بده لما تقف تأكل قدام المحل وأنت بـ تتفرج على شوارع وعمارات وترام مصر الجديدة.

...

أسماك أبو قير: اسم كبير ومحل صغير بطابع إسكندراني في مصر الجديدة
اصدرت في: 24/03/2013

من أقدم وأشهر محلات السمك في مصر الجديدة، موجود في ميدان تريمف بشارع النزهة، محل صغير وواخد ناصية، مافيش فيه أماكن جلوس أو صالة طعام، بس تيك آواي أو عربيات تركن أمامه وتأخذ علبة شوربة السي فوود المتينة على كام ساندويتش. ومع ذلك «أسماك أبو قير» يعتبر علامة من علامات مصر الجديدة ومافيش حد جربه إلا لما أدمن أي من مأكولاته. فيه سر في صنعته خلت الناس تيجي له مخصوص من كل حتة في القاهرة وتقف في طوابير أمام الكاشير وعلى الكاونتر اللي بـ يستلموا منه الأكل.أنت هنا جاي تأكل وبس، ما تبصش لشكل أو تصميم المكان، ولا حتى لمستوى خدمة أو أي إتيكيت، المطعم ده فكرنا بمطاعم السمك الشعبية المنتشرة في الإسكندرية اللي الناس بـ تقف أمامها زي محلات الفول والفلافل لكن علشان تأكل سمك وجمبري مقلي، قلاية كبيرة وشواية أكبر خارج المحل وجوه العمال هـ تحس أنهم سواحلية فعلًا، الخدمة سريعة ومنظمة مافيش كلام وكل واحد عارف هو بـ يعمل إيه، وثلاجات العرض فيها أشكال وألوان وأحجام من السمك والجمبري، ممكن تنقى اللي أنت عاوزه زي أي مطعم كبير فيه عرض وتسوية حسب الطلب. وقفنا أمام الكاشير اللي على الرصيف خارج المحل وبدأنا نتفرج على المنيو الكبير المعلق على الجدار واللي فيه كل أنواع الأسماك بالكيلو والأحجام المختلفة للجمبري وفيه كابوريا وسبيط. لكن أشهر حاجة في المنيو والإقبال عليها كبير جدًا هي الشوربات ووجبات السمك الفيليه والأرز بالجمبري. احتارنا شوية قبل ما نقرر نجرب إيه ولا إيه! مشوي ولا مقلي ولا مكرونة بالسي فوود (بـ يعملوها حلوة قوي هنا، جربناها زمان) وفي النهاية شكلنا وجبة من اختيارنا فيها سمك فيليه وربع كيلو جمبري مشوي "حجم متوسط" مع الأرز وسلاطة الطحينة وبابا غنوج والباذنجان المخلل "مافيش هنا سلاطة طماطم" الوجبة كانت عمولة بمعنى أنها مش موجودة في المنيو، وتكلفت 42 جنيه. وطلبنا سمكة بوري صغيرة مشوية سنجاري (الكيلو 40 جنيه) وطبعًا قبل كل ده علبة الشوربة المخلية (20 جنيه) وأخذنا دورنا في الطابور. نصف ساعة عدت لحد ما وصل الدور للرقم بتاعنا، وأخيرًا استلمنا وجبتنا مغلفة بإحكام ومتضبطة بشوية عيش وسلاطات زيادة، وممكن تتحكم في الموضوع ده عن طريق البقشيش اللي بـ تسيبه للموظف اللي بـ يأخذ منك ورقة الطلب. شوربة مخلية هي الأفضل في محلات تيك آواي الأسماك في القاهرة بشهادة ناس كثير، مليانة كابوريا مخلية وجمبري، مملحة شوية بس لذيذة وفيها بهارات كثير، دي أحسن بداية لما تروح «أبو قير». الوجبة كبيرة ومليانة قطع سمك فيليه مقلية ومقرمشة ولونها ذهبي يفتح النفس، والجمبري المشوي (الكيلو 80 جنيه) كان بخلطة بصل وفلفل وصوص خاص بأبو قير وكان مُقدم في طبق لوحده على جنب علشان تحط منه على الأرز حسب رغبتك. الأرز نفسه معقول بس مش مميز خالص، والسلاطات هنا كلها تجنن. البوري المشوي لا يُعلى عليه، بـ نطلبه في أي مكان عاوزين نحكم فيه على جودة الشواء والخلطات اللي بـ تستخدم فيه، جرب السنجاري هنا ومش هـ تندم. فيه هنا وجبات بسيطة بأسعار من 20 لـ 30 جنيه، وساندويتشات من 10 لـ 20 جنيه، وفيه طواجن وصواني أسماك وثعابين وجمبري بالبطاطس بأسعار من 60 لـ 130 جنيه، والجمبري الجامبو والستاكوزا بـ يوصل لـ 200 جنيه، والسمك المرجان والبربوني وموسى بـ يتغير سعره حسب اليوم. لكن كله موجود، وأي حاجة هـ تطلبها أكيد هـ تتعمل كويس. «أسماك أبو قير» مناسب جدًا لأكلة سمك محترمة بميزانية محدودة، ومناسب أكثر لو هـ تعمل عزومة سمك في البيت ومش عايز تطبخ ولا تصرف كثير؛ المطعم يعتمد عليه.

...

شيش كباب عادل: الطعم الأصلي للسجق والكفتة  في مصر الجديدة
اصدرت في: 18/03/2013

شيش كباب عادل، أو عادل ملك الساندويتشات؛ من علامات مصر الجديدة، فاتح من سنة 1959، يعني تاريخ بجد، عرفنا أن آبائنا كانوا بـ يأكلوا من عنده من حوالي 45 سنة، وهو هو نفس الأكل تقريبًا، ساندويتشات الكباب والكبدة والسجق الشرقي والسجق الاسكندراني وشاورما اللحم والكفتة المفرومة. هو فعلًا كان عنده شيش كباب وشواية للكفتة، لكن مؤخرًا اكتفى باللحوم اللي بـ تتعمل على الجريل ولغى موضوع الشواية ده لأسباب أمنية! أصل موقع المحل مش طبيعي وأكيد الظروف المحيطة به مش طبيعية. «شيش كباب عادل» في مواجهة البوابة الرئيسية لقصر الإتحادية، نعتقد كدة السبب مفهوم. ومن بداية المظاهرات والاشتباكات عند القصر وهو بـ يفتح يوم أه وعشرة لأ، وكل ما الأمور تهدأ يبدأ يسترجع نشاطه بقوة ويستعيد أمجاده القديمة لكن بسرعة يحصل قلق ويبقى العمال مش عارفين يقفلوا المحل علشان الشواية اللي برة والكراسي والترابيزات، الله يكون في عونهم بصراحة. المهم أن موقع المحل "إللي كان مثالي في وقت من الأوقات" من أهم علامات تميزه، وأهل مصر الجديدة القدامى عارفين قيمة الساندويتش بتاعه، وفيه ناس بـ تجيله من آخر الدنيا.تقريبًا «ملك الساندويتشات» بـ يقدم أغلى ساندويتش رخيص لو جاز لنا التعبير، يعني الرغيف الفينو "الباتي بان" الصغير قوي فيه شوية حشو صغيرين من الكبدة أو السجق أو الكفتة المفرومة بـ يبقى بـ 4 أو 5 جنيه. يعني علشان تأكل وتشبع هـ تتطلب 4 ساندويتشات على الأقل، يعني 20 جنيه. كدة بقى إحنا خرجنا من منطقة الأكل الشعبي الرخيص اللي تأكله آخر الشهر وأنت مش معاك فلوس. بس الطعم والنظافة يستاهلوا، صحيح ما حسيناش بحاجة فريدة في طعم السجق البلدي والكفتة المفرومة، لكن حسينا بخبرة السنين الطويلة، ومذاق يوحي بالثقة "مش عارفين حسيناها إزاي دي" بس ثقة الويتر اللي هو نفسه الشيف اللي بـ يعمل الساندويتشات، اللي فهمنا من كلامه أنه صاحب المحل كمان، الثقة اللي بـ يتعامل بها والألاطة أحيانًا كان لها أثر قوي علينا وإحنا بـ ننأنا في الوجبات والساندويتشات اللي طلبناها وحسينا أنها أحسن ساندويتشات في الدنيا، مع أن أكيد فيه أحسن، بس الإيحاء كان أقوى من أي منطق وبدأنا نزود في الأوردر بتاعنا لحد ما جربنا كل الساندويتشات اللي في المحل تقريبًا. بس فاهيتا الدجاج كانت اختراع بجد، وماكانش إيحاء ولا حاجة، كانت حلو وفيها خلطة خطيرة خاصة بالمحل. الخيار المخلل هنا حكاية ممكن تأكله حاف، بس للأسف وقت زيارتنا ماكانش فيه كبدة اسكندراني، فأكتفينا بالسجق الشرقي "بالخلطة السرية" والسجق الاسكندراني والكفتة والشاورما. كله حلو وفي منتهى النظافة، ودي حاجة في حد ذاتها تستاهل الأسعار الغالية اللي اتكلمنا عليها. شيش كباب عادل أو ملك الساندويتشات لسة له رونقه وشخصيته المميزة، وهـ تحب قعدته وأكله لو تغاضيت عن شوية التناكة اللي في معاملة أصحاب المكان، الأصالة لها ثمن برضه.

...

عالماشي: أكلات سريعة بطابع سوري في الكوربة
اصدرت في: 14/03/2013

في كيلومتر مربع واحد في مصر الجديدة فيه عدد مهول من مطاعم الأكلات السورية والشاورما مش هـ يتسع المجال لذكرها. ورغم التكرار الواضح في نوع المطبخ في المكان نفسه، إلا أن ده جعل المنافسة على أشدها من حيث الأسعار أولًا، كله بـ يحاول يكون صاحب أرخص ساندويتش، وثانيًا من حيث الجودة طبعًا.مطعم «عالماشي» الموجود في شارع إبراهيم بجوار «ستاربكس» الكوربة، مسك العصاية من النصف، قدم نفسه على أنه مطعم سوري بـ يقدم الشاورما والعيش البوري والمقبلات الشامية، وفي نفس الوقت قدم وجبات عالمية من مطابخ مختلفة علشان يظهر كمحل متنوع عنده كل أنواع الأكلات السريعة. يعني في وسط المنيو هـ تلاقي دجاج مكسيكانو ودجاج وكبدة على الطريقة الصينية، وسكالوب وبيكاتا ودجاج زنجر حار وفاهيتا. ده بجانب الساندويتشات اللي من نفس أصناف الوجبات بالإضافة للبرجر والشاورما، وفيه طبعًا فتة شاورما وسلاطات وفتوش وتبولة وحمص ومتبل، والمميز في «عالماشي» أنه عنده منيو إفطار فيه جبنة حلوم ولبنة وزعتر وسجق وشوكولاتة مع الموز. المحل مساحته صغيرة ومافيش فيه صالة طعام، كام ترابيزة على الرصيف المقابل للمحل، كأنك قاعد على قهوة من قهاوي الكوربة، علشان كده معظم زبائنه بـ يأخذوا طلباتهم تيك آواي. لكن إحنا قعدنا على واحدة من الترابيزات وطلبنا وجبات دجاج مكسيكانو (30 جنيه) وفتة شاورما ميكس (22 جنيه) وطبق فتوش (8 جنيه). بعد ما طلبنا الأوردر بتاعنا الجرسون اللي معانا "المهذب جدًا" نزل لنا تحية من المحل عبارة عن أكواب سبرايت وأثناء الأكل طلبنا زبادي عيران (5 جنيه) اللي هو زي اللبن الرايب لكن مملح شوية وطعمه لذيذ وبـ يساعد على الهضم. لكن حتى ده صمموا ينزلوه لنا هدية من المحل وما تمش إضافته للفاتورة. خدمة ودودة ومحاولات مستمرة لإرضاء الزبون وإكساب المحل السمعة الطيبة وخلق زبائن مخلصين له. الأكل حلو، حلو بس مش رهيب، يعني الكميات معقولة والنظافة واضحة في كل التفاصيل، والمذاق جيد. لكن ما حسيناش بأي لمسة مميزة من شيفات «عالماشي»، فتة الشاورما كانت مجرد شرائح لحم كبيرة ورقيقة لكن طعم التتبيلة مش باين خالص، وتحت اللحم أرز بسمتي فقط مافيش أي عيش محمص زي ما المفروض يكون موجود في الفتة. بس الكمية كبيرة فعلًا رغم أن ده الحجم العادي، فيه الحجم الدوبل (30 جنيه) ودي ممكن تأكل أكثر من فردين تقريبًا. وجبة الدجاج بالطريقة المكسيكية كانت مشبعة لكن واضح فيها المشكلة اللي لاحظناها أول ما شوفنا المنيو، وهي عدم التخصص، الأكل المكسيكي والصيني والإيطالي عاوز تخصص ومش أي شيف يعرف يعمله بحرفنة ولا حتى على سبيل الأكلات السريعة. الطعم مش بطال لكن مش هـ نجرب أكلات عالمية ثاني من هنا، الشاورما والفتوش وممكن السجق يبقوا سبب زيارتنا لـ «عالماشي» بعد كده. والساندويتشات هنا حلوة ومليانة حشو، جربناها مرة "عالماشي" وعجبنا الفاهيتا والدجاج الكرسبي (15 جنيه) وفيه أطباق شاورما عربي بالمشروم (30 جنيه) وممكن تعمل كومبو من أي ساندويتش بإضافة 10 جنيه للحجم الكبير من البيبسي والبطاطس. في النهاية «عالماشي» إضافة جيدة لمطاعم منطقة الكوربة اللي تحولت لفوود كورت كبير.

...

أبو يوسف: كشري وفطير ومكرونة في مصر الجديدة
اصدرت في: 24/02/2013

مافيش حاجة في المحل ده غير اليافطة المضيئة باللون الأحمر المعلقة عليه من الخارج، شكلها ملفت فعلًا وتحسسك أنك داخل على محل من اللي هو، خاصة مع وجوده في مكان حيوي ومليان محلات أكل بأسماء من الكبيرة اللي يتعمل لها ألف حساب في عالم الأكلات السريعة، زي «أبو مازن» و«عم حسني» و«تيبستي» و«شاورما الريم» و«الشبراوي» وغيرها، مكان المحل بالتحديد في شارع إبراهيم اللي بـ يقطع شارع الأهرام بالقرب من الحرية مول، والمحل واخد دورين في واحدة من العمارات القديمة اللي المنطقة متميزة بها، والقعدة كلها في الدور العلوي وتحت بـ يبقى موجود المطبخ والكاشير وبس. المساحة فوق صغيرة والمحل مافيهوش ترابيزات كثير أصلًا لكن لو قعدت على واحدة من الترابيزات اللي جنب الشباك هـ تنبسط وأنت بـ تتفرج على الشارع من تحت. لأن مافيش حاجة تتعمل داخل المحل غير أنك تاكل وتتفرج على الشارع. المنيو كبير نسبيًا على محل كشري وفطائر، فيه تفاصيل كثير لها علاقة بالأحجام وأنواع الحشو بالذات في المكرونات بالصوصات المختلفة. الكشري هنا كويس، مش رهيب يعني بس كويس، الأحجام معقولة بأسعار من 5 لـ 10 جنيه، والإضافات عليه فريش والتقلية مقرمشة مش بايتة، وممكن تطلب إضافات لحوم أو سجق على الكشري زي ما إحنا عملنا وعجبنا طعم الكشري بالسجق البلدي، بس السجق لو كان لوحده ما كانش هـ يبقى حلو كده. وجنب الأكل اطلب طبق عيش محمص بجنيه واحد بس هـ يعجبك. جربنا كمان الحواوشي بالجبنة الموتزاريلا السايحة داخله (10 جنيه) وكان دسم شوية بس شغال، برضه حلو عادي يعني مافيش هنا حاجة مبهرة للدرجة، يعني هـ تأكل وتشبع وتقوم بس من غير أي انبهارات أو انطباعات تخليك تقرر تيجي المكان ثاني أو ما تجيش خالص. البيتزا بأسعار من 15 لـ 40 جنيه وصنعتها كويسة والإضافات عليها كثيرة، والمكرونة بالبشاميل بالسوسيس (13 جنيه) أو السي فوود (17 جنيه) من الحاجات اللي عجبتنا في المنيو، والسباجتي بصوص بالمشروم (18 جنيه) ومكرونة أبو يوسف بكل إضافات اللحوم والجبن بـ 25 جنيه.«أبو يوسف» داخل بقلب جامد في حاجات كثير، وقرر ينافس في مجال "القنبلة" اللي هي تخصص أصيل لحلواني الكرنك اللي في السيدة زينب، وعمل طبق القنبلة اللي هو أرز باللبن في الفرن مع البسبوسة والكنافة بالقشطة. جربنا الطبق وكان مالوش علاقة بصورة "القنبلة" اللي في دماغنا والأحسن أنك تأخذ فطيرة بالكاسترد والزبيب بعد الأكل (10 جنيه) أو فطيرة تفاح (13 جنيه).«أبو يوسف» حلو لما تكون بـ تدور على مكان أكله رخيص وعنده تنويعات تخلي المجموعات المكونة من أكثر من فرد كل واحد يلاقي حاجة تعجبه ويطلبها. بس الخدمة بطيئة وده لأنك معزول في الدور العلوي والجرسون مش متواجد باستمرار قريب من الترابيزات، فاطلب الأكل كله مرة واحدة علشان ما تتعذبش وأنت بـ تحاول تضيف حاجة على الطلب.

...

دار القمر: أكلات شامية وتجديدات مبهرة في فرع مصر الجديدة
اصدرت في: 12/02/2013

من أقدم وأشهر المطاعم المتخصصة في الأكلات اللبنانية والسورية، واكتسب سمعته الجيدة بسبب الريادة أكثر من أي شيء ثاني، وكان طبيعي أننا نزوره من سنين طويلة والكتابة عنه كواحد من أشهر المطاعم المتخصصة في الأكل الشامي اللي فيها صالة طعام مش بس تيك آواي، لكن زيارتنا الأولى كان فيها كثير من الإحباطات وتركت لنا انطباع أن السمعة وموقع المكان مش كفاية علشان يعجب كل الزبائن، وأن المذاق ومستوى الخدمة هم العوامل الأهم لنجاح أي مطعم.الفرع اللي زرناه المرة دي كان في شارع الأهرام في مصر الجديدة على الصف المقابل لسينما نورماندي، مدخل المطعم هو نفس مدخل مول كمبيو مي للكومبيوتر والإلكترونيات. لو كنت من رواد المطعم في الماضي القريب، فبمجرد ما تعدي البوابة الزجاجية للفرع ده هـ تحس بالتغيير الكبير اللي طرأ على المكان "للأفضل طبعًا" والتحديثات اللي شملت كل التفاصيل من أول الديكور والإضاءة وحتى اليونيفورم بتاع الموظفين. حبينا الشكل الجديد جدًا واختارنا قعدة في ركن هادئ على ترابيزة ثنائية، لأن كل القعدات العربية على البوفات والطبليات المستديرة كانت محجوزة، وده دليل على الإقبال واستمتاع الناس بقعدات المطعم المميزة، وكمان المنظر الخارجي لشارع الأهرام العريق اللي هـ تشوفه من أي مكان داخل المطعم بسبب الجدران الزجاجية للمحل. وبعد ما تأملنا كل تفاصيل «دار القمر» الجديدة واتفرجنا على كل تابلوه وكل قطعة ديكور تحمل الطابع العربي الأصيل وبعد ما تأكدنا أن مكاننا مناسب في مواجهة واحدة من شاشات التليفزيون المعلقة، استرخينا وبدأنا نقلب في المنيو اللي كان مألوف لأقصى درجة، وتقريبًا كنا عارفين هـ نطلب إيه قبل ما نبص فيه.من المقبلات الساخنة اختارنا حاجة جديدة علينا وهي الحمص مع قطع اللحم البتلو المُشوحة في السمن وحبات الصنوبر ودي اسمها "القاورمة بالحمص" (22 جنيه) ورغم أن الكمية قليلة جدًا في الطبق لكن من كثر ما هي دسمة ما قدرناش نخلص الطبق، بس ما ننكرش أنها كانت معمولة حلو وطعمها جديد علينا وحبينا الخليط العجيب. دجاج مسحب (40 جنيه) مع اختيارك بين البطاطس المحمرة أو الأرز مع الخضار السوتيه والثومية، ده أول طبق طلبناه من غير تفكير لأنه بسهولة بـ يكشف جودة المطبخ الشامي أو ضعفه، الشواء على الجريل مش سهل، والنصف دجاجة المخلية اللي قُدمت لنا كانت آية في الروعة وجودة التسوية والتتبيلة اللي بـ تحس بها مع كل قطمة لما قطعة الدجاج تنزل العصير الخاص بها في الفم، مع البطاطس المحمرة والثومية والعيش الأبيض الشامي المولع كانت طبق الموسم بالنسبة لنا والسعر كان مناسب جدًار للكمية. طبق ثاني من منيو الأطباق الرئيسية وبالتحديد السي فوود، كان طبق جمبري دار القمر بالثوم والليمون مع الأرز والثومية (69 جنيه) وده طلبناه من باب تجربة طبق يحمل اسم المحل، وطبعًا ما خيبش ظننا وكان أمامنا واحد من أجمل أطباق الجمبري اللي ممكن تأكلها خارج مطاعم السي فوود المتخصصة، وتتبيلة فريدة من الكريم صوص بالثوم والليمون اللي بـ يتحط على الأرز البسمتي ويعمل أحلى ميكس مع وحدات الجمبري متوسطة الحجم ومقرمشة، ورغم الحجم الأقل من المتوسط للطبق ككل، إلا أننا استمتعنا بالمذاق جدًا وكنا فخورين باختياراتنا من المنيو وسط كل أطباق الشاورما والمشاوي والشيش طاووق. 3 بولات آيس كريم من اختيارنا (16 جنيه) وكأس ضخم من البينا كولادا بنفس السعر، الكرم زائد هنا في أطباق الحلويات والمشروبات، والطعم مضبوط فيما يخص الحلويات، بس ميكس جوز الهند والأناناس كان محتاج يتضبط أحسن من كده في البينا كولادا خاصة فيما يخص كمية السكر. تجربتنا هنا كانت جميلة لأننا حبينا أناقة المكان ومستوى الخدمة والنظافة المبالغ فيها في صالة الطعام وطريقة التقديم وفي الحمامات، يعني بقى لنا كثير ما شوفناش خدمة ونظافة بالطريقة دي، ومن هنا بـ نوجه شكر للقائمين على مطاعم «دار القمر» على حملة التجديدات والتطور الواضح في شكل ومضمون المطعم اللي نقدر نقول عليه "عريق".

...

شاهد المزيد
مواضيع خاصة

النهارده في القاهرة: وجبة فنون كومبو.. إكسترا مسرح وأفلام

يوم جديد في كايرو. طبعًا فيه الروتين المعتاد من شغل ومشاوير وغيرهم. وحاجات ممكن تحسسك بشوية ملل. بس على مين؟ طول ما أجندتنا موجودة انسى إن الملل يعرف لك طريق. علشان ال