مأكولات بحرية مطاعم in مصر الجديدة Cairo, Egypt

مطاعم

الحوت: أكلات بحرية سريعة في مصر الجديدة
اصدرت في: 11/06/2013

لو كنت من رواد مصر الجديدة وبالتحديد روكسي وشوارع ابراهيم اللقاني والأهرام يبقى أكيد لمحت محل الأسماك اللي حاطط بجعة كبيرة أمام الباب في مواجهة كافيه «أمفتريون» الشهير في شارع الأهرام، بجعة حقيقية عملاقة وحوض كبير فيه ترسة بحرية عملاقة برضه، من العلامات المميزة لمطعم «الحوت» المتخصص في ساندويتشات الجمبري والسمك ووجبات الأكلات البحرية السريعة، بإضاءة ساطعة ووموقع مميز بـ يغرينا كل مرة أننا نجربه ونشوف أخبار الأكل عنده إيه. بس في آخر زيارة عرفنا خبر مش كويس! البجعة اتسرقت! أيوه ده بجد.. حد جاء وفك البجعة المربوطة من رجلها وأخذها وهرب! مش هـ نسأل هو ممكن يكون سرق بجعة يعمل بها إيه! بس أهو ده اللي حصل.. كده مش فاضل لنا غير الترسة والأكل اللي هـ نجربه. مافيش جلوس داخل المطعم لأنه أشبه بكشك كبير بـ يتم تحضير الأكل فيه، والقعدات كلها على كراسي وترابيزات على الرصيف أمام الكشك ده. كنا فاكرين المطعم بـ يقدم ساندويتشات ووجبات أرز وفيليه بس، لكن لاقينا المنيو فيه كل أصناف السمك والجمبري بـ تتباع بالكيلو وفيه كمان تجهيز طواجن وصواني حسب الطلب وبـ يعمل طرق الطهي المختلفة. مش عارفين التنوع ده هـ يبقى في صالحه ولا لأ؛ لأن شكل المحل مناسب أكثر للوجبات السريعة، وإحنا ما جربناش في زيارتنا دي غير كام وجبة مع بعض أصدقائنا وكلها بـ تتكون من نوع أو اثنين من المأكولات البحرية المقلية مع الأرز والسلاطة والعيش وأسعارها بـ تبدأ من 12 لحد 35 جنيه، وكان فيه مكرونات بالسي فوود والموتزاريلا بأسعار من 15 لـ 32 جنيه وكثير من المقبلات والأصناف الجانبية. عملنا اختبار بسيط لمطبخ «الحوت» أننا طلبنا شوربة السي فوود المخلية (25 جنيه) واللي وصلت لنا ساخنة جدًا لكن بلا مذاق تقريبًا، وفيها فتافيت جمبري مش فريش خالص وقطع سبيط وفيليه قليلة جدًا، لأول مرة ما نقدرش نخلص طبق شوربة السي فوود وده معناه أنها كانت صعبة قوي. سيبنا الشوربة خالص وبدأنا في وجبة الجمبري المشوي على الشيش بخلطة الطماطم والفلفل والبصل (35 جنيه) والحقيقة الخلطة دي كانت أحسن حاجة في الموضوع، والجمبري كان متبَل كويس بس مملح زيادة، والأرز اللي معاه كان عادي جدًا والطحينة خفيفة والسلاطة الخضراء للأسف كانت كأنها عاوزة تحمض بره الثلاجة! كل دي أخطاء لا تغتفر، لأن ده محل متخصص في أكلة معينة ولو ما عملش كل تفاصيلها كما يجب يبقى يغير نشاطه أحسن. يمكن ساندويتشات الجمبري الحجم الوسط (15 جنيه) ووجبات الفيليه الصغيرة (17 جنيه) كانت أحسن حاجة من اللي جربناه هنا، وده بـ يأكد أن المطعم ده تأكل منه على السريع وبس، تحضير صواني وشوربات وسنجاري وطواجن مش مضمون بنسبة كبيرة، بس ممكن تجرب في مرة ويطلع حظك كويس، لكن الأكيد أنه مش هـ يقارن بأي حال بمطاعم الأسماك الكبيرة المتخصصة زي «البرج» و«بحري» و«قدورة»..لكن ممكن تقارنه بأسماك «تبارك» و«أبو قير» الموجودين في مناطق قريبة في مصر الجديدة ومدينة نصر. القعدة عند «الحوت» حلوة ودمها خفيف، كملها على خير بقى واطلب أكلات سريعة وساندويتشات، الأسعار كويسة والخدمة سريعة، وماتنساش تسألهم هـ يجيبوا بجعة ثانية إمتى.

...

أسماك أبو قير: اسم كبير ومحل صغير بطابع إسكندراني في مصر الجديدة
اصدرت في: 24/03/2013

من أقدم وأشهر محلات السمك في مصر الجديدة، موجود في ميدان تريمف بشارع النزهة، محل صغير وواخد ناصية، مافيش فيه أماكن جلوس أو صالة طعام، بس تيك آواي أو عربيات تركن أمامه وتأخذ علبة شوربة السي فوود المتينة على كام ساندويتش. ومع ذلك «أسماك أبو قير» يعتبر علامة من علامات مصر الجديدة ومافيش حد جربه إلا لما أدمن أي من مأكولاته. فيه سر في صنعته خلت الناس تيجي له مخصوص من كل حتة في القاهرة وتقف في طوابير أمام الكاشير وعلى الكاونتر اللي بـ يستلموا منه الأكل.أنت هنا جاي تأكل وبس، ما تبصش لشكل أو تصميم المكان، ولا حتى لمستوى خدمة أو أي إتيكيت، المطعم ده فكرنا بمطاعم السمك الشعبية المنتشرة في الإسكندرية اللي الناس بـ تقف أمامها زي محلات الفول والفلافل لكن علشان تأكل سمك وجمبري مقلي، قلاية كبيرة وشواية أكبر خارج المحل وجوه العمال هـ تحس أنهم سواحلية فعلًا، الخدمة سريعة ومنظمة مافيش كلام وكل واحد عارف هو بـ يعمل إيه، وثلاجات العرض فيها أشكال وألوان وأحجام من السمك والجمبري، ممكن تنقى اللي أنت عاوزه زي أي مطعم كبير فيه عرض وتسوية حسب الطلب. وقفنا أمام الكاشير اللي على الرصيف خارج المحل وبدأنا نتفرج على المنيو الكبير المعلق على الجدار واللي فيه كل أنواع الأسماك بالكيلو والأحجام المختلفة للجمبري وفيه كابوريا وسبيط. لكن أشهر حاجة في المنيو والإقبال عليها كبير جدًا هي الشوربات ووجبات السمك الفيليه والأرز بالجمبري. احتارنا شوية قبل ما نقرر نجرب إيه ولا إيه! مشوي ولا مقلي ولا مكرونة بالسي فوود (بـ يعملوها حلوة قوي هنا، جربناها زمان) وفي النهاية شكلنا وجبة من اختيارنا فيها سمك فيليه وربع كيلو جمبري مشوي "حجم متوسط" مع الأرز وسلاطة الطحينة وبابا غنوج والباذنجان المخلل "مافيش هنا سلاطة طماطم" الوجبة كانت عمولة بمعنى أنها مش موجودة في المنيو، وتكلفت 42 جنيه. وطلبنا سمكة بوري صغيرة مشوية سنجاري (الكيلو 40 جنيه) وطبعًا قبل كل ده علبة الشوربة المخلية (20 جنيه) وأخذنا دورنا في الطابور. نصف ساعة عدت لحد ما وصل الدور للرقم بتاعنا، وأخيرًا استلمنا وجبتنا مغلفة بإحكام ومتضبطة بشوية عيش وسلاطات زيادة، وممكن تتحكم في الموضوع ده عن طريق البقشيش اللي بـ تسيبه للموظف اللي بـ يأخذ منك ورقة الطلب. شوربة مخلية هي الأفضل في محلات تيك آواي الأسماك في القاهرة بشهادة ناس كثير، مليانة كابوريا مخلية وجمبري، مملحة شوية بس لذيذة وفيها بهارات كثير، دي أحسن بداية لما تروح «أبو قير». الوجبة كبيرة ومليانة قطع سمك فيليه مقلية ومقرمشة ولونها ذهبي يفتح النفس، والجمبري المشوي (الكيلو 80 جنيه) كان بخلطة بصل وفلفل وصوص خاص بأبو قير وكان مُقدم في طبق لوحده على جنب علشان تحط منه على الأرز حسب رغبتك. الأرز نفسه معقول بس مش مميز خالص، والسلاطات هنا كلها تجنن. البوري المشوي لا يُعلى عليه، بـ نطلبه في أي مكان عاوزين نحكم فيه على جودة الشواء والخلطات اللي بـ تستخدم فيه، جرب السنجاري هنا ومش هـ تندم. فيه هنا وجبات بسيطة بأسعار من 20 لـ 30 جنيه، وساندويتشات من 10 لـ 20 جنيه، وفيه طواجن وصواني أسماك وثعابين وجمبري بالبطاطس بأسعار من 60 لـ 130 جنيه، والجمبري الجامبو والستاكوزا بـ يوصل لـ 200 جنيه، والسمك المرجان والبربوني وموسى بـ يتغير سعره حسب اليوم. لكن كله موجود، وأي حاجة هـ تطلبها أكيد هـ تتعمل كويس. «أسماك أبو قير» مناسب جدًا لأكلة سمك محترمة بميزانية محدودة، ومناسب أكثر لو هـ تعمل عزومة سمك في البيت ومش عايز تطبخ ولا تصرف كثير؛ المطعم يعتمد عليه.

...

مانشاو واك: مأكولات صينية متوسطة الجودة في سيتي ستارز
اصدرت في: 14/07/2011

في فوود كورت (منطقة طعام) "زودياك" في الدور الرابع في سيتي ستارز سهل أنك تأخذ بالك من مطعم «مانشو واك - Manchow Wok» للأكل الصيني علشان الخط المميز المكتوب به على اليافطة، وهو شبه حروف الكتابة الصينية، المطعم واخد كاونتر مش كبير والمنيو على الحائط الخلفي مش كبير هو كمان، وكل الأكل معروض أمام الزبائن والخدمة سريعة وسهلة جدًا علشان زي ما قلنا الاختيارات مش كثير. الأكل عبارة عن وجبات محددة بـ تختار فيها أرز أبيض بالخضروات أو أرز أصفر بالخضروات أو نودلز، وبـ تختار معاهم أي أنواع من اللحوم أو الدجاج أو الجمبري مع قطعة سبرنج رولز، وبـ تأخذ الوجبة في طبق متعدد الخانات وتروح تقعد على أقرب ترابيزة وننصحك تكون قاعد قريب من المطعم علشان ممكن تحب تزود حاجة لو عجبتك وخلصت من أمامك. المنيو عبارة عن لحوم بالصوص الحار والصوص البارد وصوص الباربكيو ودجاج بصوص الصويا المميز ودجاج بالخضروات الحارة ودجاج بالصوص الحلو Sweet & Sour، وفيه جمبري بصوص الثوم الحار لكن ده بـ يتقدم في شكل طبق مستقل بدون أرز أو نودلز وسعره 55 جنيه، وفيه طبق سمك الماندرين (38 جنيه)، وده عبارة عن قطع سمك فيليه بصوص الماندرين المصنوع من صوص الصويا والثوم والبصل، وفيه بعض المشهيات الصينية زي شوربة المانشاو Manchow الحارة بالبصل الأخضر والخضروات وصوص الصويا (10 جنيه)، وفيه طبق الذرة الحلوة بنفس السعر، وأخيرًا طبق اللحمة بالبروكلي وهو من أجمل الأكلات في المحل. تقريبًا ده كل الأكل في المحل وممكن دائمًا تعمل الكومبو الخاص بك بإضافة أي من أنواع اللحوم أو الخضروات دي جنب الأرز أو النودلز، وهم عاملين أسعار موحدة لأنواع الكومبو حسب عدد أصناف اللحوم المطلوبة، كومبو 2 وكومبو 3 ده سعره 27 جنيه وفيه بـ تختار صنف واحد لحوم أو دجاج، كومبو 4 بـ تطلب فيه صنفين من اللحوم أو الدجاج ومعاه قطعة السبرنج رول المحشوة بالبصل والخضروات، وكومبو 5 معاه 3 أصناف بـ 37 جنيه، وكومبو 6 ده لأصناف السي فوود (45 جنيه) وآخر كومبو الجمبريPrawns Combo وده سعره 50 جنيه، ولو مش بـ تفضل اللحوم خالص أو كنت نباتي مثلاً ممكن تطلب طبق الخضروات المشكلةMix Vegetables بـ 19 جنيه بس. جربنا الدجاج بالصوص الحلو ودي بـ نرشحها أنها لازم تكون ضمن اختياراتك في الوجبات، وجربنا اللحمة بالصوص الحار والدجاج كمان؛ كان حار جدًا جدًا والفلفل الأحمر كان واضح وهو السبب في المعاناة دي، ده طبعًا لو مش بـ تحب الأكل حار بزيادة. شوربة المانشاو مش بطالة بس ممكن تبقى أحسن، والأرز حلو لكن النودلز كانت محتاجة شوية بهارات، وأحلى حاجة عجبتنا في الزيارة دي كانت السبرنج رولز، كانت فريش جدًا ومقرمشة، علشان مش كل مرة بـ تبقى كدة. الكميات مش كبيرة قوي، ده غير أن الأكل الصيني عمومًا خفيف – علشان صحي ومفيد طبعًا – وممكن تحس أنك جعان بعد ما تأكل بساعة ولا اثنين. جرب المطعم ده لو لسه محتاج تتعرف على الأكل الصيني، ولو عجبك هـ تلاقي نفسك بـ تدور على مطاعم صيني في كل حتة تروحها، وبـ تدور على مستوى أعلى وأصناف ثانية مبتكرة.

...

دولفن: سمك وجمبري في مصر الجديدة
اصدرت في: 16/05/2011

في شارع جسر السويس وقبل ميدان الألف مسكن على اليمين، هـ تلاقي على الرصيف يافطة إعلان كبيرة مكتوب عليها «دولفن» وخلفيتها عبارة عن ألوان علم مصر، ومكتوب عبارة "اللي يحب مصر..يعمر مصر، والسمك هو الحل". أسلوب ظريف في الدعاية إستجد بعد الثورة، بس شكل المحل من برة يغني عن أي دعاية. انت من برة شايف سفينة صغيرة بكل تفاصيلها، الهلب بتاعها مرمي على الرصيف وبوزها الحديد والجسم الخشبي والشبابيك الإزاز المدورة والأحبال حواليها، تحفة فنية فعلاً، من برة ومن جوة، عشان برضه الديكور الداخلي بـ يكمل الفكرة ومتعلق على الحيطان أصداف وقواقع حقيقية ومرصوص بعض التماثيل الرومانية ولوحات زيتية لخرائط وهياكل أسماك، بس المشكلة أن الإضاءة ضعيفة شوية ومش هـ تميز كل حاجة حواليك بـ سهولة، والأهم أنك مش هـ تميز الشوك وانت بـ تاكل السمك. مساحة «دولفن» مش كبيرة من جوة بس فيه حوالي 12 ترابيزة قريبين من بعض وفيه شاشتين تليفزيون صغيرين، الجو العام هادي وراقي بس واضح أن المحل له زباينه الدائمين واللي ليهم طابع خاص ممكن تميزوه لمّا تروحوا هناك، بس نقدر نقول أنهم مش على نفس مستوى المكان العريق نسبياً، ويمكن ده عشان أسعاره المنافسة اللي هـ نتكلم عليها دلوقتي. كل أنواع الأسماك والمأكولات البحرية موجودة من أول البوري لحد الإستاكوزا، مروراً بالباربوني والوقار والقاروص. بس المطعم عمل لنفسه تخصص بطبق شيش فيليه سمك الهامور على الفحم، وبـ يقدم السيخ فيه ربع كيلو صافي من السمك بـ 20 جنيه بس، وواضح أن عليه إقبال شديد عشان لما جينا نطلبه لقيناه خلص! إبتدينا بشوربة سي فوود مخلية (20 جنيه) وكانت مليانة جمبري وكاليماري بس مافيهاش جندوفلي خالص، ورغم أنها كانت دلعة ومفيهاش كريمة، بس كانت نضيفة جداً ومالهاش ريحة السمك الزفرة. بعد كده طلبنا سمك قاروص مشوي سنجاري (مفتوح والتوابل والصوصات عليه من فوق) وده الكيلو بـ 90 جنيه، وجمبري مشوي كبير بس مش ﭼامبو بـ 180 جنيه الكيلو. الصنعة حلوة قوي في المطعم ده بس واضح أننا ماروحناش في الوقت المناسب عشان الأسماك والجمبري كانوا واضح أنهم متخزنين مجمدين ومش فريش، بس شطارة الشيف والتتبيلة الرهيبة للسمك وخلطة البصل والفلفل على الجمبري المشوي – اللي كان حجمه كبير قوي بالمناسبة ومليان كاﭭيار من جوة – قللت من إحساسنا أن المأكولات البحرية مش جاية صاحية وبـ تلعب، مع سلاطة الطحينة اللذيذة والسلاطة الخضراء النص نص والرز بالكاليماري المقلي إستمتعنا بالوجبة والجو العام للسفينة اللي إحنا قاعدين فيها. المنيو كمان فيه طواجن الفسفور الشديدة زي ما ورقة دعاية المحل مكتوب فيها، ودي بـ يبقى فيها كابوريا وجندوفلي وكاليماري بالبصل والتوابل و"الذي منه". بس الطاجن يكفي لفرد واحد، وممكن تحلي بعد الأكل بسلاطة فواكه أو مشروبات تقليدية. رغم أن المكان ماكانش زحمة، الخدمة كانت بطيئة بس في نفس الوقت مهذبة جداً، والمكان نضيف والحمامات شيك، ومش هـ تلاقي الشخص اللي بـ يديك ليمون ومناديل لما تيجي تغسل إيدك في محلات السمك التانية، ودي حاجة ريَّحتنا جداً. لازم تروح عشان تقول أنك في يوم من الأيام دخلت المطعم ده، لو مش عشان الأكل يبقى عشان التصميم والديكور، بس إحنا متأكدين أن الأكل برضه هـ يعجبكوا عشان جايز وقت ما تروحوا يكون السمك فريش، مع الصَنعة الحلوة هـ تقضوا وقت رائع في «دولفن».

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن