مطاعم

عالماشي: أكلات سريعة بطابع سوري في الكوربة
اصدرت في: 14/03/2013

في كيلومتر مربع واحد في مصر الجديدة فيه عدد مهول من مطاعم الأكلات السورية والشاورما مش هـ يتسع المجال لذكرها. ورغم التكرار الواضح في نوع المطبخ في المكان نفسه، إلا أن ده جعل المنافسة على أشدها من حيث الأسعار أولًا، كله بـ يحاول يكون صاحب أرخص ساندويتش، وثانيًا من حيث الجودة طبعًا.مطعم «عالماشي» الموجود في شارع إبراهيم بجوار «ستاربكس» الكوربة، مسك العصاية من النصف، قدم نفسه على أنه مطعم سوري بـ يقدم الشاورما والعيش البوري والمقبلات الشامية، وفي نفس الوقت قدم وجبات عالمية من مطابخ مختلفة علشان يظهر كمحل متنوع عنده كل أنواع الأكلات السريعة. يعني في وسط المنيو هـ تلاقي دجاج مكسيكانو ودجاج وكبدة على الطريقة الصينية، وسكالوب وبيكاتا ودجاج زنجر حار وفاهيتا. ده بجانب الساندويتشات اللي من نفس أصناف الوجبات بالإضافة للبرجر والشاورما، وفيه طبعًا فتة شاورما وسلاطات وفتوش وتبولة وحمص ومتبل، والمميز في «عالماشي» أنه عنده منيو إفطار فيه جبنة حلوم ولبنة وزعتر وسجق وشوكولاتة مع الموز. المحل مساحته صغيرة ومافيش فيه صالة طعام، كام ترابيزة على الرصيف المقابل للمحل، كأنك قاعد على قهوة من قهاوي الكوربة، علشان كده معظم زبائنه بـ يأخذوا طلباتهم تيك آواي. لكن إحنا قعدنا على واحدة من الترابيزات وطلبنا وجبات دجاج مكسيكانو (30 جنيه) وفتة شاورما ميكس (22 جنيه) وطبق فتوش (8 جنيه). بعد ما طلبنا الأوردر بتاعنا الجرسون اللي معانا "المهذب جدًا" نزل لنا تحية من المحل عبارة عن أكواب سبرايت وأثناء الأكل طلبنا زبادي عيران (5 جنيه) اللي هو زي اللبن الرايب لكن مملح شوية وطعمه لذيذ وبـ يساعد على الهضم. لكن حتى ده صمموا ينزلوه لنا هدية من المحل وما تمش إضافته للفاتورة. خدمة ودودة ومحاولات مستمرة لإرضاء الزبون وإكساب المحل السمعة الطيبة وخلق زبائن مخلصين له. الأكل حلو، حلو بس مش رهيب، يعني الكميات معقولة والنظافة واضحة في كل التفاصيل، والمذاق جيد. لكن ما حسيناش بأي لمسة مميزة من شيفات «عالماشي»، فتة الشاورما كانت مجرد شرائح لحم كبيرة ورقيقة لكن طعم التتبيلة مش باين خالص، وتحت اللحم أرز بسمتي فقط مافيش أي عيش محمص زي ما المفروض يكون موجود في الفتة. بس الكمية كبيرة فعلًا رغم أن ده الحجم العادي، فيه الحجم الدوبل (30 جنيه) ودي ممكن تأكل أكثر من فردين تقريبًا. وجبة الدجاج بالطريقة المكسيكية كانت مشبعة لكن واضح فيها المشكلة اللي لاحظناها أول ما شوفنا المنيو، وهي عدم التخصص، الأكل المكسيكي والصيني والإيطالي عاوز تخصص ومش أي شيف يعرف يعمله بحرفنة ولا حتى على سبيل الأكلات السريعة. الطعم مش بطال لكن مش هـ نجرب أكلات عالمية ثاني من هنا، الشاورما والفتوش وممكن السجق يبقوا سبب زيارتنا لـ «عالماشي» بعد كده. والساندويتشات هنا حلوة ومليانة حشو، جربناها مرة "عالماشي" وعجبنا الفاهيتا والدجاج الكرسبي (15 جنيه) وفيه أطباق شاورما عربي بالمشروم (30 جنيه) وممكن تعمل كومبو من أي ساندويتش بإضافة 10 جنيه للحجم الكبير من البيبسي والبطاطس. في النهاية «عالماشي» إضافة جيدة لمطاعم منطقة الكوربة اللي تحولت لفوود كورت كبير.

...

وان شاورما: محل الصنف الواحد في قلب مصر الجديدة
اصدرت في: 20/01/2013

عربيتين أو ستاندين جريل خارج المحل واحد عليه سيخ شاورما لحمة والثاني شاورما فراخ، بس كده؛ ده كل اللي بـ يقدمه المحل، صنف واحد وعلشان كده تقريبًا اسمه "واحد" أو «وان – One» والمفروض أن له فروع في سوريا والسعودية وحقق نجاح في البلاد دي "هو أصله سوري طبعًا" وبعد كده قرر أنه يضارب في بورصة الساندويتشات المصرية واختار مكان مميز جدًا في شارع إبراهيم المتفرع من شارع الأهرام في مصر الجديدة، وبالتحديد جنب مطعم «عمو حسني» الشهير وانطلق نشاطه من أسبوع واحد بس.التجربة بسيطة جدًا، بمناسبة الافتتاح السعر موحد، ساندويتش الشاورما في العيش السوري الملفوف سواء لحمة أو فراخ بـ 7 جنيه الواحد. الحجم مش كبير، يعني ممكن تأكل 2 أو 3 ساندويتشات علشان تشبع منه، أو تأخذ واحد بس على سبيل النقنقة. وممكن تجيب طبق خيار مخلل بـ 2 جنيه، ومافيش قعدة داخل المحل، فيه كام كرسي كده باللون الأحمر تابعين للمحل ومحطوطين على الرصيف اللي أمامه. وممكن تركن عربيتك أمام المحل والجرسون يجيب لك الطلب من شباك العربية. الشاورما حلوة، مش رهيبة بس حلوة، لها طعم ورائحة نفاذة والتتبيلة مضبوطة، يعني الصنعة كويسة وما يخفاش على حد طبعًا أن الشيف سوري وبـ يعمل الشاورما بالطريقة السورية والعيش السوري هنا مقرمش وفريش ودي أهم حاجة فيه. الخيار المخلل مملح بزيادة وما عجبناش. وما عجبناش كمان أن الثومية قليلة في الساندويتش وأنهم مش بـ يقدموا أي مقبلات شامية ثانية.الجرسونات اللي واقفين على الباب طريقتهم ما عجبتناش برضه في محاولة جذب الزبائن من الشارع. واحد منهم بـ يمسك الناس من أيديهم ويدخلهم المحل بالعافية، طبعًا فيه شيء من الهزار والاستظراف، بس ده ممكن يبقى سبب أن الناس تنفر من المحل للأبد! وهو مش محتاج كل الكلام ده لأن فعلًا الأسعار كويسة والأكل كويس ولو استمر على سياسة الأسعار دي مش بس علشان الافتتاح هـ يحقق نجاح كبير وهـ ينافس بقوة في مربع المطاعم الشهير في قلب مصر الجديدة. بس يراعوا شوية التفاصيل اللي ذكرناها في المقال.

...

الضيعة الأردنية: فتة شاورما وساندويتشات لحوم في مصر الجديدة
اصدرت في: 18/12/2012

المكان حديث نسبيًا، ومع ذلك حسينا أنه قديم أو كأننا نعرفه من زمان، ما كناش عارفين سبب إحساسنا ده إلا لما قعدنا شوية حلوين نتأمل كل حاجة في المحل من أول اليافطة لحد المنيو الخاص به، وعرفنا ليه إحنا حاسين بكده، باختصار لأنه يشبه محلات «شاورما الريم» بنسبة كبيرة، في كل حاجة؛ من أول ألوان اللوجو اللي على يافطة المحل "باستثناء اللون الأصفر عند شاورما الريم" لحد المنيو المتخصص في الأكلات الأردنية. لكن محل «الضيعة الأردنية» قدر يكون له الشخصية المميزة اللي تخلي الناس تيجي له مخصوص، أو بـ معنى أدق قدر يربي زبون.المحل موجود في شارع الميرغني في مصر الجديدة، ملاصق لكافيه «آينشتاين» الصغير جدًا، و«الضيعة» نفسه صغير جدًا برضه. القعدة كلها بره على الرصيف اللي أمام المحل، كام ترابيزة وكام كرسي، والقعدات مشتركة بينه وبين كافيه «آينشتاين» وممكن تقعد بره وتطلب من أي مكان فيهم.المحل متخصص في الشاورما، وبالتحديد على الطريقة الأردنية، اللي إحنا مش عارفين إيه الفرق بينها وبين السورية أو المصرية بالضبط! بس المهم أنها حلوة، خاصة أنهم بـ يعملوها هنا بإضافة مميزة جدًا وهي الجبنة الموتزاريلا السايحة على وجه الطبق، طبعًا دي إضافة حسب رغبتك، لكن من الآخر كده إحنا بـ نقول لك تضيفها لأن هي دي الموضوع كله. طبق فتة الشاورما اللحمة بـ 21 جنيه، بـ تعمل إضافة الجبنة بـ 3 جنيه، وممكن تختار أرز بسمتي أو أبيض عادي، وفتة شاورما الدجاج أرخص بجنيه واحد. الفتة هنا لها طعم فريد، العيش المقرمش فيها قليل لكن غنية باللحم والمذاق والثومية اللي داخلة في تكوينها، بالإضافة إلى علبة الثومية اللي بـ تُقدم لوحدها جنب الطبق. والموتزاريلا على الوجه بـ تخليها شبه الباستا، بس الطعم حكاية. جنب أطباق الشاورما العظيمة اللي طلبناها باللحم وبالدجاج وميكس الاثنين على بعض، طلبنا طبق مقبلات ساخنة فيه كبيبة وسمبوسك (15 جنيه) كان المفروض يكون فيه ورق عنب لكن ما كانش موجود وقت زيارتنا. الطبق كان لذيذ بس الكبيبة كانت عاوزة تتحمر شوية زيادة. تضايقنا لما اكتشفنا أن مافيش أي مقبلات شامية باردة زي الفتوش والتبولة والحمص، هي الثومية والخيار المخلل بس، فطلبنا علبة شرائح خيار (2.5 جنيه) وكانت تحفة.ممكن تطلب ساندويتشات دجاج كريسبي وهوت دوج وبرجر وشيش طاووق، بأسعار معقولة جدًا بـ تتراوح بين 10 لـ 18 جنيه. وممكن تطلب وجبة شاورما عربي ودي بـ تبقى عبارة عن ساندويتشات شاورما دوبل في عيش سوري مقطع لأجزاء صغيرة، ومعاها بطاطس ومخلل وثومية (32 جنيه) بس دي لو كنت جعان قوي. وممكن تأخذ طلبات جانبية زي عيش الصاج (4 جنيه) أو البطاطس (7 جنيه) أو تعمل إضافات لحوم أو دجاج أو موتزاريلا على أي طبق أو ساندويتش بـ 3 و5 جنيه. الخدمة ممتازة وودودة ومهذبة، والأهم من ده أنها سريعة، لأنك لو قعدت كثير بره المحل هـ تتجمد من البرد في الوقت ده من السنة، علشان كده مهم جدًا أن الشاورما تنزل مولعة أمامك بسرعة، لأنها هـ تبرد بعد 5 دقائق.جرب «الضيعة الأردنية» في أول زيارة لك لمصر الجديدة واستمتع بوجبة شاورما ما حصلتش، ومش هـ تدفع كثير.

...

بيروت إكسبريس: شاورما وأكلات لبنانية على طريق السويس في مصر الجديدة
اصدرت في: 03/07/2012

المطعم ده في حتة غريبة، أو بمعنى أصح حتة ما ينفعش تروح لها مخصوص، هو على الطريق السريع بين القاهرة والسويس، صحيح هو في أول الطريق من ناحية القاهرة وبالتحديد في شارع الثورة قريب من سينما ألماظة الصيفي، بس ما ينفعش تروح هناك إلا لو معاك عربية، وعلشان كده هم عاملين جراج خاص بالمكان أو تابع له ممكن تسيب فيه العربية من غير ما تدفع أي رسوم لو كنت داخل تأكل في المطعم. وممكن ما تحتاجش تركن خالص لو عاوز تقف أمام المحل والجرسون ييجي لك لحد عندك وتطلب وتأكل في العربية. بعد ما تعدي دار الإشارة ودار المدفعية على نفس الصف هـ تلاقي يافطة مضيئة باللون الأحمر مكتوب عليها «شاورما بيروت». وقفنا وبدأنا نستكشف المكان اللي كان أشبه بكشك زجاجي ضخم على جانب الطريق، وفيه ترابيزات أمامه على الرصيف الخاص به وفيه قعدات عربي داخل المحل نفسه. جربنا القعدة العربي داخل المحل المكيف شوية وبعدين تعبنا لأننا كنا قريبين من الأرض والوضع ده مش مريح في الأكل، ده غير أن التكييف مش قوي كفاية بالداخل، فغيرنا قعدتنا للترابيزة اللي بالخارج اللي بـ تطل على الطريق السريع. القعدة بره حلوة قوي، الهواء كان رائع لأن مافيش أي موانع والمساحات واسعة جدًا أمامنا، وفكرة أنك قاعد بـ تأكل على طريق سريع بـ تحسسنا أننا مش في القاهرة أصلًا أو كأننا قاعدين فى استراحة طريق سفر. المطعم متخصص في التيك آواي وده واضح من الزبائن اللي بـ تيجي تأخذ ساندويتشات وتطير أو تقعد تأكلها في العربية، لكن إحنا طلبنا أكل صعب نأكله وإحنا واقفين في السريع. طبق شاورما عربي (25 جنيه) وكبسة شاورما ميكس (27 جنيه) وطبق مشهيات لبنانية مشكلة (12 جنيه) وتبولة (8 جنيه). طبعًا المنيو هو التقليدي في أي مطعم لبناني أو سوري، فيه الشاورما هي الأساس لحمة أو فراخ، وفيه فراخ مشوية وشاورما بسطرمة وأطباق وساندويتشات جمبري وكبسات لحوم وجمبري بالإضافة للمقبلات الشامية زي الكبيبة وورق العنب والسمبوسك والسلاطات والفتوش والمتبل والحمص. الأسعار معقولة بالنسبة للساندويتشات الموجودة بـ 3 أحجام، بـ تبقى من 7 لـ 20 جنيه وممكن تعمل أي إضافة للساندوتش مجانًا من اختيارك من الثومية أو صوص التارتار أو دبس الرمان أو الطماطم، وفيه إضافات بـ 2 جنيه زي هريسة الشطة والجبن الشيدر والبطاطس والمكسرات، وللكومبو بـ تزود 6 جنيه. طبق المقبلات الكبير اللي نزل لنا كان فيه ثومية وزبادي وخيار مخلل وحمص وسلاطة خضراء، سلاطة الزبادي فيها نعناع زيادة والخيار مملح زيادة والتبولة دلعة زيادة، من الآخر فيه مشاكل في المقبلات، والحمص والثومية بس هم اللي ضبطوا الأمور. طبق الشاورما العربي عبارة عن ساندويتش في عيش سوري مُقطع كان طعمه حلو وميزة شاورما اللحم هنا أن مافيهاش أي دهون ومشوية حلو قوي لدرجة أنها بـ تبقى مقرمشة من غير ما تكون محروقة. طبق الكبسة شبه فتة الشاورما بالضبط بس من غير عيش محمص، مافيش أي صوص أو إضافات تحسسنا أنها كبسة، ومع ذلك كانت لذيذة وكميتها كويسة. الأطباق بـ تنزل متجملة ببطاطس محمرة ومسلوقة وحمص وثومية وسلاطة خضراء، يعني لو كنا نعرف أن الأطباق الرئيسية بـ تنزل كده كان ممكن ما نطلبش طبق السلاطات ده. بس عمومًا اتبسطنا من الأكل والخدمة المرحبة والأسعار وقبل ده كله القعدة الخارجية والهواء المنعش اللي يفتح النفس. وما عندناش مانع نأكل شاورما من «بيروت إكسبريس» أو "شاورما بيروت" كل مرة نكون معديين من هناك.

...

أبو عمار السوري: شاورما وفتة ومناقيش في مصر الجديدة
اصدرت في: 15/01/2012

لو كنت من معتادي الأكل والتسكع في شوارع مصر الجديدة يبقى أكيد حفظت كل المطاعم والكافتيريات اللي ممكن تأكل فيها وجبة خفيفة أثناء رحلتك اللي بلا هدف، أو عارف فين ممكن تركن بعربيتك وييجي لك الجرسون تطلب منه ساندويتش أو عصير. علشان كده هـ نفترض أن المكان اللي هـ نتكلم عليه دلوقتي جديد عليك زي ما كان جديد علينا. رغم أن الاسم مألوف لأن له فرع مشهور في المهندسين، لكن كانت مفاجأة سارة بالنسبة لنا لما لاقينا أول فرع لـ «أبو عمار السوري» بـ يفتح في شارع إبراهيم في الكوربة في مصر الجديدة. المحل على نفس الصف اللي فيه «عمو حسني» اللي أمام «ستاربكس - Starbucks» فرع الكوربة. المطعم له واجهة صغيرة من الخارج ومش ظاهر غير اليافطة العملاقة اللي مكتوب عليها الاسم، وعربية الشاورما المميزة للمطاعم السورية، لكن اكتشفنا أن المطعم فيه مكان للجلوس في مدخل المحل في الدور الأرضي وفيه دور ثاني شبه مخصص للعائلات. طلعنا الدور اللي فوق اللي مساحته كانت صغيرة جدًا ومقسم لـ 4 أركان للجلوس فيها ترابيزات وكراسي وكنبات جلد ضخمة ومريحة، لكن فكرة أن الناس قاعدة قريب قوي من بعض ما كانتش مريحة. بس لحسن الحظ كان فيه تليفزيون وصوته عالي علشان يغلوش على أصواتنا وما حدش يركز مع حد! المنيو هو العادي لأي مطعم سوري مع زيادات بسيطة زي شوربة وفتة الكوارع المصرية الخالصة، وبعض الأطباق العربية. بدأنا بشوربة كريمة الدجاج والمشروم (9 جنيه) وكانت لذيذة وسميكة ومليانة مكعبات دجاج طازجة، لكن للأسف جاءت لنا باردة وكان لازم نخلصها بسرعة قبل ما تبرد زيادة. أخذنا طبق سلاطات سورية مشكلة (20 جنيه) فيه تبولة وزبادي ومتبل طماطم، والحقيقة الطبق كان كبير ويكفي 3 أو 4 أفراد رغم أن فيه الحجم الأكبر بـ 25 جنيه، وطعم السلاطات كان مؤشر جيد على مستوى الأكل عمومًا. عندنا قاعدة لما نقعد في مكان يكون عامل طبق أو مشروب باسم المحل أننا نطلبها وإحنا مغمضين لأنها أكيد بـ تلخص خبرة المكان ده وبـ يكون فيها المفيد لأن أكيد المكان مش هـ يجازف باسمه على منتج مش قد كده. علشان كده اختارنا من منيو "المطبخ السوري" طبق أبو عمار بالفتة (30 جنيه) وهو عبارة عن شرائح لحم أو دجاج أكبر حجمًا من الشاورما العادية مع أرز بسمتي وسمبوسك وورق عنب وسلاطة خضراء وحمص وثومية. الطبق ده حكاية! ولو كنا نعرف أن هـ يكون فيه كل المشهيات دي (خصوصًا ورق العنب البارد اللي بـ نحبه) ما كناش طلبنا طبق السلاطات اللي نزل لنا في الأول. والشاورما هي الأحلى في مصر الجديدة مؤخرًا، وده بشهادة ناس كثير من مرتادي مطاعم الأكلات السريعة في هليوبوليس، وقطعة الكبيبة كانت ضخمة جدًا ومقرمشة ولونها فاتح وجميل، ومليانة لحم وبرغل طازج، والسمبوسك كمان كبيرة وكانت محشوة بالجبنة. جربنا أكلات ثانية من «أبو عمار» زي شوربة العدس (7 جنيه) وفتة الشاورما (21 جنيه) والموزة البتلو بالفتة (30 جنيه) والمناقيش بالحلوم والزعتر (10 جنيه) والحقيقة أنه ما خيبش ظننا في أي حاجة طلبناها، والأكل كان أكثر من رائع وأي طبق فتة بـ يكون معاه طبق ثومية كبير. والكميات تعتبر مشبعة. من المطبخ السوري فيه أكلات زي المقلوبة (25 جنيه) والمسحب (52 جنيه) والشيخ المحشي (كوسة باللحم وزبادي مطبوخ) وفيه فلافل وباذنجان وحمص لو حبيت تأكل بميزانية محدودة. فيه ركن للمشويات بالكيلو والحمام المحشي والشيش طاووق والسكالوب وفيه فطائر ومعجنات قليلة ومكرونة فرن. وبعض الحلويات السورية زي الكنافة النابلسية بالجبنة والمكسرات (10 جنيه) والبسبوسة والأرز باللبن. الخدمة معقولة لكن ممكن تبقى أحسن من كده، لأن فيها نوع من الارتباك. يعني نقدر نقول أن المساحة الضيقة مؤثرة على كل حاجة في المكان، وهـ تحس أنك عاوز تخلص أكل بسرعة علشان تروح تقعد في مكان ثاني. «أبو عمار السوري» هو وجهتنا الجديدة في الفترة القادمة للأكلات السريعة والمطبخ السوري، أسعار جيدة وجودة عالية ومكان استراتيجي.

...

الركن الشامي: أكل سوري  تيك آواي في هليوبوليس
اصدرت في: 22/06/2011

مصر الجديدة وشوارعها مليانة محلات أكل وكثير منها أسعارها على قد الجيب زي محلات الكشري والفول والفلافل والفطير، بس مش بسهولة هـ تلاقي محلات فلافل وشاورمة سورية إلا لما الناس تعرفه وتبدأ تتكلم عنه. مزنوق بين محلات أكل كتير في شارع النزهة قريب من ميدان سانت فاتيما، «الركن الشامي» محل صغير من غير زيادات مالهاش لازمة، تيك آواي بس، بـ يقدم أكلات سورية بسيطة زي الفلافل والبطاطس والحمص والشاورمة. دور على محل اللوجو بتاعه على شكل تاج ملكي، هو ده «الركن الشامي». محترفين في الخدمة والمكونات، والمكونات دايماً طازة، كل العاملين بالمحل عارفين هم بـ يعملوا إيه، فيه ديلـﭭري بس بـ ننصحك تاكل هناك عشان الساندوتش يكون سخن وفريش، وممكن تحتاج تقعد تاكل جوة العربية قدام المحل عشان تتجنب دوشة الشارع حواليك. بـ 4 جنيه تقدر تشتري ساندوتش فلافل في عيش سوري ملفوف مليان على آخره وعليه إضافات سماق وحمص وشرائح خيار مخلل وطحينة مفرودة على العيش السوري الرقيق، النتيجة في الآخر ساندوتش خيالي ولذيذ. ورغم أن المحل من أحسن الأماكن اللي ممكن تاكل فيها فلافل سوري في مصر الجديدة ومشهور بكده، إلا ان الشاورمة كمان مِعدية. بتـ تعمل بنفس العيش السوري، وبـ تكون مستوية كويس بالذات شاورمة الفراخ، ومافيهاش دهن كتير والساندوتش مليان ثومية ومخلل والواحد منه مشبع جداً ومليان بروتين وسعره 11 جنيه بس. لما بـ نجوع بالليل غالباً بـ تطلب معانا ساندوتشات، بس مفيش مانع من شوية أطباق جانبية كده ومقبلات زي السمبوسك والكبيبة وورق العنب المحشي وأسعار الأطباق الجانبية دي بـ تكون بين 5 و 15 جنيه، وفيه وجبات أكبر شوية للأكيلة زي فتة الشاورمة وأطباق اللحوم. «الركن الشامي» إختيار هايل لو عايز أكل سوري خفيف ورخيص، وبما إن الأكل السوري عامل طفرة عموما في القاهرة وعليه إقبال غير عادي، جرب المطعم الفريد ده وقولنا رأيك.

...

دوميرا:  أحسن أكل سوري وخليجي في مصر الجديدة
اصدرت في: 05/05/2011

في ميدان الحجاز في مصر الجديدة   وعلى الناصية اللي قدام « عمرافندي» وقصاد مطعم « جاد » مطعم تاني لسه ماخدش حقه من الشهرة والتقدير. « دوميرا » اللي فرعه التاني في الأسكندرية بإسم مختلف هو « طربوش » بس له نفس المنيو ونفس المطبخ وطبعاً نفس الجودة . المكان إستراتيجي جداً وسهل أنك تشوفه من أي زاوية وأنت في ميدان الحجاز، كمان عشان الديكور لونه أحمر والإضاءة قوية واللوجو مميز والمحل نفسه عالي عن الأرض بـ 3 سِلمات . الديكور في منتهى الشياكة جوة مكان الجلوس اللي كله منطقة مفتوحة ومفيش جزء مغطى، فيه قصريات زرع ضخمة وشجر كتير بـ يحوط المكان وفيه زي جنينة صغيرة جوة ساحة الطعام دي وفيها إضاءة على شكل مشروم عملاق، والمساحة كلها على شكل مستطيل وعلى مستويين إرتفاع بـ فرق سلمتين ومحاطة بإزاز شفاف عشان وانت قاعد جوة تكون شايف بانوراما جميلة للميدان من برة، وتوزيع الإضاءة نموذجي في المكان . منيو « دوميرا » غني جداً، تقريباً بـ يعمل كل حاجة، بس التخصص الدقيق هو الأكل السوري زي ما مكتوب على الواجهة، بس برضه بـ يعمل أكل خليجي روعة وبيتزا إيطالي ومعجنات وساندوتشات وسي فوود . إخترنا الأطباق المميزة للمطعم وهي الفتة والمشاوي السورية، فتة الشاورما ميكس ( لحمة وفراخ )   بـ تكون متغطية باللوز والزبيب والبندق المتحمر والتومية، والرز بسمتي أو أبيض عادي وممكن نقول بقلب جامد أن دي أحسن فتة شاورما ممكن تاكلها في مصر ومفيش مطعم سوري تاني بـ يحط كمية المكسرات دي ولا شاورمته حلوة وفريش زي كدة، والكمية مشبعة جداً لفرد واحد . تاني حاجة هي طبق الدجاج المسحب أو المخلي المشوي على الفحم، ده بقى حكاية، نص فرخة مخلية ومتبلة تتبيلة عبقرية مشوية على الفحم وهـ تحس وهي بـ تِنزل عصيرها في بقك قد أيه هي طازة وقد أيه التتبيلة مِززة وجميلة، برضه مش أي فراخ مشوية، وبـ يتقدم معاها عيش صاج وتومية وبطاطس محمرة وخيار مخلل وكل ده بـ 25 جنيه بس . في مشاوي اللحوم جربنا الانتركوت المشوي ( الكيلو بـ 140 جنيه) وبـ يتقدم مع عيش صاج وبطاطس وسلاطات، والانتركوت للي مش عارف هو عرق لحم بتلو بـ يكون موجود في الجزء الخلفي للرقبة والضهر من فوق، طعمها زي الريش بس من غير عضم وبـ تتميز أنها خفيفة ومافيهاش دهن كتير، وكالعادة كانت ممتازة ومشوية حلو قوي والتتبيلة إياها برضه . الأكل الخليجي على طريقة « دوميرا » حاجة تانية، البخارى والبرياني والكبسة اللي بـتـ تقدم بالشاورمة السوري أو باللحمة أو الفراخ المحمرة ومعاها صوص الكبسة الحار، أطباق خرافية ممكن تدمنها وتروح مخصوص عشانها، طبق الكبسة باللحم بـ 30 جنيه وكمية المكسرات والحبهان والبهارات مش طبيعية وعصير الطماطم المشطشط بـ يولعها أكتر، تحية لـ « دوميرا ». السلاطات والمقبلات سورية جداً، فتوش وتبولة وحمص ولبنة وزيتونية وتومية وكبيبة وسمبوسك وورق عنب، طلبنا طبق مقبلات مشكل فيه قطعتين من كل حاجة سعره 18 جنيه وطلبنا " سوق الحميدية " وده عبارة عن 5 إختيارات من السلاطات بـ سعر 4 ، وكله كان لذيذ وفريش، بس ركز على اللبنة والزبادي بالخيار والكبيبة الشامي عشان دول كانوا فوق الوصف . في منيو خاص بالحلويات والمشروبات الفريش والآيس كريم، يعنى هـ تعمل كل اللي نفسك فيه في « دوميرا » ، طلبنا عصير برتقال 9) جنيه ( مع الأكل وكان لسه معصور حالاً وخطير، وبعد الأكل جربنا براونيز الآيس كريم 14) جنيه ( وكوكتيل » هاواين « فيه مانجو وكيوي وخوخ 12) جنيه ( ، ولازم نقول أن الكميات كبيرة فعلاً في كل حاجة وكنا شبعنا جداً بس مش قادرين نقاوم كل حاجة حلوة بـ يعملها المطعم . عنده مناقيش صاج وعجين وأطباق عربية عبارة عن عيش صاج فيه شاورمة أو جمبري أو فراخ بانيه متقطعة في طبق مع المخلل والتومية، وفي موزة بالفتة ولحمة فلتو وميكس جريل، وممكن تطلب مكرونة أو باستا بالموتزاريلا بإضافات مختلفة . الأكل خفيف ومش هـ تحس أنك " إتلكمت " ومش قادر تتحرك بعدها ودي ميزة تحسب للمطعم . الشيفات سوريين، وده السر أن كل حاجة معمولة على أصولها وعلى أعلى مستوى، الخدمة ممتازة وسريعة، المشاوي بـ تتأخر شوية بس تستاهل الإنتظار، في حمام واحد للرجال والسيدات بس أنيق، والمطعم نفسه مش زحمة قوي ومسموح بالتدخين عشان المكان مفتوح، ومفيش شاشات بس في سماعات وكانوا مشغلين « Nile FM » بصوت واطي .   الويتر شاطر جداً وجاوب على كل إستفسارتنا اللي ليها علاقة بالمنيو وطلبنا منه يبلغ إعجابنا للشيف وقالنا انه ممكن يجيلنا بنفسه عشان نقوله رأينا بس إحنا شكرناه، وراح قدم لنا إستمارة تقييم للمطعم عشان نقول رأينا . قريب هـ يكون للمطعم شأن تاني، لما كل حد يروح ويجرب ويقول لأصحابه ومعارفه عليه، وخلينا فاكرين أن « كايرو 360 » رشحته كواحد من أفضل المطابخ السورية في القاهرة .

...

مواضيع خاصة

دليل أحداث نهاية الأسبوع: حفل فرقة كايروكي ووسط البلد وإطلاق مجلة توك توك وعرض التنورة

كل آخر أسبوع، الواحد بـ يحتاج أنه يفصل ويغير جو، يشوف ناس جديدة، أماكن جديدة، يستغل وقته على قد ما يقدر قبل ما يرجع للشغل، أو يرجع للمدرسة، دخول المدارس والجامعات خل