برجر مطاعم in مصر الجديدة Cairo, Egypt

مطاعم

جوز داينر: مطعم أمريكي شكله كويس لكن أكله ضعيف في هليوبوليس
اصدرت في: 21/05/2016

صعب على أي واحد يقدر يتابع كل التطورات اللي بتحصل على ساحة الأكل العالمية، بس لاحظنا أن فكرة المطعم الأمريكي التقليدية راجعة وبقوة، النوع ده من المطاعم بيقدم تشكيلة هايلة من الأكلات الأمريكية وسط أجواء لطيفة وديكورات جذابة، والكلام ده ممكن تشوفوه في " جوز داينر - Joe's Diner" في هليوبوليس. سيبك من الحوائط المدهونة بلون أسود كئيب، والإضاءة البنفسجي والسقف بستايل المصانع، المهم أن جوز داينر بيقدم لك كل حاجة تخيلناها تكون موجودة في مطعم أمريكاني، من بلاط الأرضيات الأسود والأبيض على شكل طاولة الشطرنج، لكراسي جميلة باللون الأحمر والأبيض، وطبعًا اليافطات النيون والبوسترات، مافيش شك أن الأجواء هناك مالهاش حل. بدأنا مع طبق مقبلات سلوبي تشيز فرايز (39 جنيه)، أما الأطباق الرئيسية فطلبنا لويزيانا فرايد تشيكن (69 جنيه) وجوز سبيشال برجر (59 جنيه). نتكلم في الأول عن جوز سلوبي تشيز فرايز، بص يا سيدي، البطاطس كانت متحمرة تمام، بس كمية الجبنة والتوابل والشيلي صوص للأسف كانت قليلة، والبيكون محتاج يكون مقرمش شوية. استخدموا كمان البصل الأخضر بدل الثوم، بس الطعم طلع لذيذ في الآخر، عمومًا، البطاطس كانت لذيذة وعملت طبق مقبلات هايل. نروح على الثقيل ونبدأ مع اللويزيانا فرايد تشيكن اللي كان نجم اليوم بدون منازع، قطعتين فراخ مقلية طرية من جوه ومقرمشة من بره، وعليهم صلصة خفيفة من الكريمة والفلفل الأسود. وصل مع الطبق بطاطس مهروسة هايلة وعليها نفس الصلصة، ومعاهم أرز مكسيكي لذيذ، بس كان معجن شوية. كنا متحمسين أكثر إننا نجرب البرجر عند جوز داينر، أصل الداينر مايبقاش داينر من غير برجر خارق للعادة، ولّا إيه؟ السبيشال برجر من جوز كان عبارة عن قطعة برجر عصارية مستوية medium-wellصح الصح زي ما طلبنا وعليها جبن شيدر وبيكون طري وحلقات بصل مقرمشة. الحقيقة أن البرجر كان فيه مشاكل، يعني مثلًا الجبنة ما كانتش سايحة خالص، والعيش ما كانش طازة والإضافات كانت مش منظمة، وكمان مافيش مشروم وصوص باربيكيو زي ما مكتوب في المنيو. البرجر معاه كول سلو بخل التفاح طعمها لطيف، والبطاطس المحمرة كانت غريبة، أصل إزاي تكون باردة وطرية على عكس البطاطس الموجودة في طبق المقبلات! خلصت تجربتنا هناك مع ميلك شيك فانيليا (25 جنيه) وميلك شيك فراولة (25 جنيه) وشوكليت تشيب باي (39 جنيه). الفانيليا كان هايل وكمية السكر فيه مضبوطة، أما الفراولة فكان طعمه زي الآيس كريم الصناعي. الباي كانت عبارة عن كوكي محشية شوكولاتة وعليها آيس كريم وصوص شوكولاتة. طعمها كان غريب شوية وواضح فيها طعم الدقيق وطعم الشوكولاتة نفسها كان عادي، بس الآيس كريم كان تمام. جوز داينر بشكل عام مكان هايل، بس واضح أنهم ركزوا جامد على شكل المطعم وده كان له تأثير على جودة الأكل.

...

وايلد برجر: برجر لذيذ بأحجام ضخمة في مساكن شيراتون
اصدرت في: 07/02/2016

في الفترة الأخيرة فتحت محلات برجر كثير في القاهرة، بس مش أي حد نقدر نقول عليه محترف وبـ يقدم حاجات جديدة، وده اللي لقيناه في وايلد برجر – Wild Burger اللي أبهرنا بأحجامه الكبيرة اللي ممكن توصل لـ 1800 جرام للبرجر، لأنهم بـ يعملوا تحدي مين يأكل أكبر برجر في أقل من ربع ساعة، وسعر التحدي 300 جنيه. المكان صغير في فرع شيراتون لأنه دائمًا بـ يبقى زحمة برغم أن فيه ترابيزات جوه المكان وبره، فضلنا على قائمة الانتظار لحد ما فضي لنا مكان، وبعد كده احتارنا ما بين أنواع البرجر المختلفة، بالجبنة أو الباربكيو أو المحشي جبنة من جوه واللي كان نازل جديد في المنيو ساعتها. الموضوع بـ يتم على 3 خطوات، الأول بـ تختاروا حجم البرجر واللي أصغر حجم فيه كان كبير جدًا بالنسبة لنا، لأنه كان 250 جرام وعريض بحجم نصف طبق كبير تقريبًا، وبعد كده الأحجام بـ تكبر لحد ممكن 1800 جرام، أنت ومقدرتك بقى على الأكل، ثاني خطوة بـ تختار المشروب بتاعك ما بين بيبسي وسفن وميراندا، ثالث خطوة بـ تختار الصوص واللي بالمناسبة بـ يقدموه لك مع البطاطس والمشروب اللي بـ يكونRefill مع سعر الساندويتش العادي. لفت نظرنا كمان أن عندهم شوربة، وفي ظل الجو البرد ده قلنا نجربها، فـ طلبنا شوربة كريمة حجم صغير بـ 22 جنيه، وجاءت لنا على طول، والحقيقة أنها تفوقت على توقعاتنا لأنها كانت سخنة ودسمة ومليانة قطع دجاج ومشروم وذرة وفلفل، وده امتياز بالنسبة لمحل متخصص في ساندويتشات البرجر بس، ومن منيو البرجر طلبناWow Tornado Beef Burger بـ 48 جنيه، وحجمه 150 جرام، وقدم لنا معاه بطاطس ويدجز مقرمشة ولذيذة، البرجر نفسه كان مستوى Well Done وعصارى من جوه لدرجة أننا كنا شبعانين وبـ ناكل منه طفاسة، كان نفسنا نجرب البرجر اللي محشي جبنة من جوه بس ما كانش فيه مكان في بطننا، أو نجرب حتى الحلو عندهم بس فعلًا ما كانش فيه مكان خالص. تجربتنا هناك كانت غنية وممتعة، وأكيد مش هـ تكون زيارتنا الأخيرة، خاصة علشان نجرب الحاجات اللى ما ذقناهاش.

...

The Kiosk: برجر روعة في هليوبوليس
اصدرت في: 11/01/2016

النهارده موضوعنا عن "ذا كيوسك - The Kiosk"، وهو واحد من أجدد مطاعم البرجر في القاهرة المستخبية في منطقة ألماظة في هليوبوليس وقريب جدًا من تيفولي دوم وجنب مطعم شاتز - Schatz. ذا كيوسك يتميز بتصميمات مطرقعة شوية من النجف وصور الجرائد العتيقة لغاية الحمام نفسه اللي بـ يغطيه صور Justice League اللي هـ تبهر كل عشاق الكوميكس. أول ما وصلنا لترابيزتنا، رحبوا بنا وقدموا لنا منيو ورق وقلم، ودي واحدة من أفكار ذا كيوسك المطرقعة وهي أنك بـ تعمل دوائر على اختياراتك بدل ما تطلبها. مافيش عند ذا كيوسك أي أطباق مقبلات، وبالتالي دخلنا على البرجر وطلبنا مونسترس Monstrous بـ (48 جنيه) قطعة برجر 200 جرام عليها خس وطماطم وشرائح بصل مقرمشة وشريحة بيكون وبطاطا مشوية ومشروم وجبن سايح، والمفروض بـ يكون معاه بيض عيون بس إحنا طلبنا إلغائها، مع واحد رابشر Rapture بـ (47 جنيه) وده برضه قطعة برجر 200 جرام محشية جبن شيدر وقطع بيف بيكون وعليها خس كابوتشى وبصل وصوص جبنة سايحة وطلبنا معاه بطاطس موتشاتشو المحمرة (20 جنيه). نبدأ كلامنا عن المونسترس ونقول أن اللحم كان مستوي well-done –زي ما طلبنا– بس قدر يحتفظ بعصاريته بشكل كويس، والجبن السايح مع البصل والنكهات قدروا يضيفوا طعم مميز للساندويتش، كل اللي فات كوم والعيش نفسه كوم ثاني خالص، بصراحة العيش الطازج كان تحفة بقوامه الطري المميز وطعمه اللذيذ. أما الرابشر فوصل والجبن خارج من كل حته فيه، ومع أول قضمة انبهرنا من روعة النكهات المميزة وقطعة اللحم الطري، ومن ثاني لازم نجيب سيرة العيش الرائع، وطبعًا الجبن الخارج من كل مكان. نقدر نقول وضميرنا مستريح أن بطاطس الموتشاتشو كانت أجمد حاجة ممكن نطلبها مع البرجر؛ عليها قطع بيكون وجبن سايح رائع وصوص طعمه مزز نوعًا ما بس أضاف للجبن نكهة قوية. خلصت زيارتنا مع طبق أخير رائع وهو ذا هيفن سبونج The Heaven Sponge بـ (35 جنيه)، عبارة عن فرينش توست مسكّر محطوط في طاسة وعليه بولة آيس كريم فانيليا كبيرة ومتغرّق صوص بيبسي وكراميل، الفرينش توست كان مقرمش من بره وطري أسفنجي من جوه، وكمان بعد ما شرب كل الصوصات طعمه كان مسكّر، في الأول ما عرفناش ندخل في الآيس كريم، لكن بعد ما ساح شوية استمتعنا بكل قطعة من البولة اللذيذة؛ ودي كانت أحسن نهاية ليوم لطيف وأكلة لذيذة. بشكل عام، تجربتنا في ذا كيوسك كانت هايلة، يوم جميل مع ساندويتشين برجر من العيار الثقيل أكيد هـ يخلونا نرجع في زيارات ثانية قريب.

...

بولز برجر: مطعم جديد في مصر الجديدة بـ ينضم لسباق البرجر الجورميه في القاهرة
اصدرت في: 18/02/2015

"البرجر الجورميه"، أو البرجر المعمول من أجود المكونات وأغربها أحيانًا، بقى موضة من ضمن الموضات الجديدة الموجودة على ساحة المطاعم والكافيهات في القاهرة. بشكل عام البرجر الجورميه عادة بـ يبقى أغلى بكثير من البرجر المعتاد اللي ممكن تأكله من مطاعم الوجبات السريعة، وأجود لأن المطاعم الأخيرة دي ما بـ تقدمش أكل أصلًا! بولز برجر – Bulls Burger اللي فتح السنة دي أمام الباب الرئيسي لنادي الشمس في مصر الجديدة، هو الأحدث على الساحة. المطعم له مكان أوت دوور، ومساحة داخلية واسعة من دورين. الديكور صعب العين تستوعبه بكم الألوان الموجودة في تفاصيله؛ الحوائط لونها أخضر ليموني والأسقف لونها البرتقالي شبيه بدرجة لون الطمي، أما الأرضيات فلونها محايد. المنيو لحد ما معتاد، فيه مجموعة من فواتح الشهية المقلية. أما البرجر ففيه ستة أنواع من برجر اللحم التقليدية وعدد محدود من برجر الفراخ. ومع كل طلب بـ ينزل طبق سلاطة ممكن يتم إعادة ملئه من بار السلاطات الموجود في كل دور، وكذلك المشروبات الغازية والصوص من البار المخصص لهم. قطعة البرجر لها أربعة أوزان مختلفة: 150، 225، 300 أو 450 جرام. طلبنا طبق فاتح شهية منوع (55 جنيه)، My Burger 150 جرام (35 جنيه) والمونستر برجر – Monster Burger 225 جرام (42 جنيه). الجرسون اللطيف أخذ الطلبات ورجع بعدها بعشر دقائق بطبق فاتح الشهية، ومعاه مجموعة كبيرة من الصوصات اللي ممكن نغمس بها، بالإضافة لقفازات بلاستيك علشان نأكل براحتنا. طبق فاتح الشهية بـ يضم مجموعة من المقليات زي حلقات البصل المقلية، شرائح الفراخ المقرمشة وأصابع الجبنة الموتزاريللا، قطع الجبنة المتبلة بالفلفل الحار وأجنحة الفراخ الحارة. كل الحاجات دي –معاها صوص الرانش- كانت مقرمشة وساخنة. بار السلاطات فيه اختيارات كثيرة زي سلاطة البطاطس، والكول سلو، والتفاح والمايونيز، والمخلل، والصوص الأحمر الحار، والفاصوليا الخضراء، والمخلل مع الخضروات. كل مكونات السلاطات طازجة وخصوصًا سلاطة الفاصوليا الخضراء. بعدها نزل البرجر، واللي معاه بطاطس ويدجز (بطاطس مقلية قطعها سميكة) وذرة حلوة؛ تتبيلة الأطباق الجانبية ممتازة. My Burger، قطعة البرجر فيه سميكة عليها شرائح فلفل، جبنة تشيدر وحلقات البصل المقرمشة، أما العيش فهو محمص بالزبدة. المونستر برجر عليه قطعة موتزاريلا مقلية ومشروم وحلقات البصل المقلية. طبيعي أن الساندويتش الأخير يكون كبير ودسم. بالرغم من أن الأحجام بصفة عامة كافية جدًا، إلا أن قطع البرجر زائدة التسوية لدرجة أنها كانت نوعًا ما جافة وتتبيلتها غير كافية. بعكس فواتح الشهية والسلاطات، البرجر دون المستوى تمامًا؛ ممكن جدًا أنك تعمل برجر وتحط عليه كل المكونات اللي في الدنيا، إلا أن لو قطعة البرجر نفسها مش قد المستوى، الوجبة كلها هـ تبوظ للأسف. صحيح فيه حاجات كثيرة عجبتنا، إلا أن الطبق اللي المفروض بولز برجر متخصص فيه ما يقدرش ينافس أماكن ثانية أحسن بكثير.

...

بليز: مطعم وكافيه بروح مختلفة في مصر الجديدة
اصدرت في: 19/12/2013

هو إحنا بس اللي بـ نحس أن الكافيهات والمطاعم الموجودة في كل منطقة بـ تبقى لها طابع مميز مختلف عن المناطق الثانية؟ المهندسين غير المعادي غير مصر الجديدة غير وسط البلد؛ لدرجة أننا متخيلين لو غمضنا عيوننا وفتحناها داخل أي مطعم أو كافيه ممكن نخمن إحنا في منطقة إيه من غير ما نشوف الشارع اللي بره، ولا ممكن تكون دي الخبرة اللي اكتسبناها من شغلنا في كايرو 360؟ افتكرنا الموضوع ده لأننا في زيارتنا لـ «بليز – Blaze» الموجود في شارع النزهة في مصر الجديدة حسينا أول ما دخلنا أننا اتعزلنا عن أجواء مصر الجديدة، وحسينا بالتحديد كأننا في أحد كافيهات المهندسين، كافيهات المهندسين اللي لها طابع مميز ومشهورة بالصخب والشيشة والتجمعات الشبابية من الجنسين. «بليز» كده بالضبط، مساحة واسعة جدًا بمدخل كبير ببوابة خشبية وفيه تراس خارجي مغطى بالمشمع وطبعًا الجو فيه بارد جدًا لكن الدفايات منتشرة بين كل الترابيزات، وفيه قعدة داخلية مغلقة لكن كله مسموح فيه بالتدخين والشيشة اللي هي من أبرز سمات المكان، فالأفضل لغير المدخنين أنهم يقعدوا في المساحة الخارجية المتهوية شوية أحسن. ديكوات أنيقة وإضاءة ضعيفة جدًا بشكل متعمد، بالنسبة لنا ما كانتش رومانسية زي ما هم قاصدين قد ما هي كانت متعبة في قراءة المنيو "أو قراءة أي حاجة طبعًا" غير أن المكان صعب جدًا يبقى رومانسي بكمية الشيشة دي والإقبال الكبير من الشباب عليه، وأغلب التجمعات واضح أنهم من زبائن المكان لأن أي حد بـ يدخل بـ يسلم على كل الناس على كل الترابيزات تقريبًا، جو "كافيهات المهندسين" قوي بقى. الأهم من القعدة هنا هي منيو التكس – مكس الخطير اللي بـ يعمله «بليز»، بـ يعمل برجر وفاهيتا وستيك أمريكاني أصلي، وشوية رابس وكاسيديا مكسيكي بجانب الباستا وبعض أطباق الدجاج والسالمون والجمبري. إحنا المرة دي جايين وعارفين أنهم بـ يعملوا أكل كويس بعد ما شكر لنا فيه بعض أصدقائنا، وبالتجربة تأكدنا أن الشيفات هنا ممتازين، بـ يعملوا فاهيتا ميكس جمبري ودجاج ولحم Blaze Fajita زي ما بـ يسموها (72 جنيه) وبـ تُقدم مولعة على الجريل ومعاها كل مستلزمات الفاهيتا من Sour Cream وخلطة الطماطم والفلفل الحارة والجبن المفروم وعيش التورتيا والأرز بالبهارات علشان تعمل البوريتو المكسيكي بتاعك بنفسك، تتبيلة الفاهيتا عالمية والتسوية وطريقة التقديم وكل حاجة، الطبق ده ما ينفعش تيجي هنا وما تطلبهوش. جربنا كمان الـ Cow Boy Tenderloin ستيك (105 جنيه) وهو عبارة عن قطعة ستيك خالية تمامًا من الدهون وعليها شرائح بيكون بقري وحلقات بصل محمرة ومغطاة بصوص مشروم، لتاني مرة بـ ننبهر بالتتبيلة الرهيبة للحم نفسه والتسوية الـ Well Done الممتازة، والإضافات كلها فريش وغنية بالطعم، بس مزازة اللحم نفسه بجد معجزة، الكميات كويسة في الأطباق بالذات مع الأصناف الجانبية اللذيذة زي السوتيه والبطاطس البيوريه بالزبدة، وجبة رائعة بجد واكتملت بطبق مقبلات Blaze Mix بسعر (62 جنيه) اللي فيه دجاج تندر ولفائف الكاساديا بالخضار واللحم والبطاطس المسلوقة و3 أنواع من الـ Dips والبافلو وينجز أو أجنحة الدجاج الحارة اللي هي كانت أسوأ حاجة في وجبتنا لأن كان فيها رائحة زفرة مش لطيفة. لما سألنا عن منيو الحلويات الجرسون المهذب جاب لنا طبق كبير فيه قطعة من كل صنف من أصناف الحلويات اللي عندهم علشان نختار منها "لايڤ" وفعلًا عجبنا شكل البراون تشيز كيك (36 جنيه) وكان طعمها أجمد من شكلها كمان، يعني لا غبار على تجربتنا هنا من حيث مستوى الأكل خالص، كل المشكلة كانت فيه الدوشة والزحمة اللي في المكان، مع أنه ما كانش ويك إند ولا مناسبة ولا حاجة، بس زي ما قلنا لكم كل الموجودين هنا معتبرينه بيتهم تقريبًا. الخدمة سريعة ومحترفة والنظافة والنظام جيدين جدًا "باستثناء القطة اللي دخلت وأربكت الناس في التراس الخارجي" وفي النهاية «بليز» هـ يفضل واحد من الأماكن المميزة جدًا والمختلفة عن كل كافيهات مصر الجديدة.

...

أبل بيز: فرع جديد للسلسلة الأمريكية الشهيرة في سيتي ستارز
اصدرت في: 24/11/2013

اللي مايعرفش «أبل بيز – Applebees» بـ نقول له أنه واحد من أكبر المطاعم الأمريكية المشهورة والموجودة في معظم الدول العربية والأوربية وله أكثر من 2000 فرع حول العالم، وأن فرع سيتي ستارز مش أول فرع يفتح في مصر، لكن كان فيه فرع في مساكن شيراتون ولكن تم غلقه لعدم مطابقته للمواصفات، وفتح فرع ثاني في مركب بلو نايل الشهيرة، لكن الفرع الموجود حاليًا في الدور الخامس في المرحلة الأولى في سيتي ستارز نقدر نقول عليه أول "توكيل حقيقي" للمطعم في مصر وحق امتياز مطابق لكل المواصفات الخاصة بالسلسلة العالمية. الشكل هو الـ American Diner المعروف زي مطاعم «تشيليز» و «فدركرز»، الترابيزات الكبيرة باللون الخشبي الفاتح والكراسي المغطاة بالجلد المريحة جدًا، المكان حلو بجد وبعد لما تقعد هـ تحس أن المكان مألوف بسبب الترحاب والبساطة اللي بـ يقابلك بها الموظفين، وكلهم على درجة عالية من الثقافة والتخصص وواضح أن تم اختيارهم بعناية. دخلنا المكان واستعرضنا المنيو اللي جوعنا من أول صفحة من شكل الأطباق فيه والوصف الدقيق لكل وجبة. المنيو كانت مبهرة بمعنى الكلمة، وبعد شوية حيرة لجأنا للجرسون وطلبنا ترشيحاته، فقال لنا على طبق ستيك أوز اسيكليت الـ Sizzling أو اللي بـ يتقدم مولع زي الفاهيتا على الجريل (115 جنيه)، هو ده الكلام! طعم مختلف وتتبيلة ستيك ما حصلتش، مع أرز وسوتيه. قطعة لحم مشوية بدون دهون "حسب الاختيار" مع صوص المشروم وحلقات البصل والبطاطس المشوية، واختيارنا الثاني كان تريو الجمبري (119 جنيه) المكون من 3 أنواع من الجمبري، المشوي على السيخ والمطهي بطريقة الباترفلاي بالزبدة والليمون والأعشاب والمقلي العادي، بـ يُقدم مع أرز وسوتيه برضه، ولا كأننا في أحسن مطعم سي فوود في بحري! مذاق رائع وكل طعم مختلف وكأننا فعلًا طالبين 3 أطباق مش طبق واحد، لأن الكميات كبيرة بطريقة ملحوظة، وما قدرناش نخلص كل الأكل اللي نزل أمامنا، خاصة أننا كنا طلبنا طبق مقبلات متنوعة (Appetizer Sampler) الكبير بـ 82 جنيه اللي كان فيه ستيكس موتزاريلا وأجنحة الدجاج المخلية الحارة "حسب رغبتنا" وطبق الـ Spanish Dip اللي فيه مزيج من الخرشوف والسبانخ بصوص الكريمة مع مقرمشات الدوريتو والكاساديا المكسيكية الطازجة بالدجاج والبيكون البقري، الطبق ينفع وجبة متنوعة لوحده. ما خلصناش كل الأكل اللي أمامنا قاصدين علشان نسيب مكان للحلويات المغرية الموجودة في منيو مستقل على الترابيزة، وطلبنا كيك بلوندي الرهيب (44 جنيه) المكون من طبقة كيك من عجينة المكسرات، بـ تُقدم باردة على جريل ساخن، وبـ يتم صب سيرب الكريمة الخاص بها أمامك علشان يعمل صوت الطشطشة المثير ويندمج فورًا مع كل الكيك والمكسرات اللي في الجريل، اختراع مش هـ تلاقيه في أي حتة، والاهم أن الطعم خطير وفريد ممكن نيجي مخصوص علشان البلوندي اللذيذة. الخدمة في المكان ممتازة والموظفين زي ما ذكرنا محترفين ومهذبين، وما كانش بـ يفوت دقيقتين قبل ما يملأوا كوب البيبسي الـ Refill اللي أمامنا لو نقص، لا غبار على زيارتنا لمطعم «آبل بيز» وعلامة صح كبيرة بـ نحطها أمامه في قائمة "المفضل" اللي لحسن الحظ كبرت قوي عندنا الفترة الأخيرة.

...

وايلد برجر: برجر لذيذ فى هليوبوليس
اصدرت في: 28/08/2013

مطاعم القاهرة ووجباتها السريعة مستمرة فى التوسع، ومحلات البرجر على وجه الخصوص مازالت محتفظة برونقها. "وايلد برجر – Wild Burger" الموجود فى هليوبوليس حافظ على القاعدة، و بـ تشوف عادة طوابير من الزبائن الجائعين منتظرين على نار أى ترابيزة تفضى. على شارع أنقرة، وايلد برجر مكان صغير وعتيق إلى حد ما ومعظم القعدات منتشرة على الرصيف. تصميم الألوان المكون من الأصفر والأخضر غير واضح، أما مفارش الترابيزات المطاطية بلونها الأزرق الغامق صحيح عملية بس كئيبة شويتين؛ على العموم، سمعتهم البرجرية أكيد سابقاهم. المنيو بـ تقدم مجموعة من المقبلات المقلية (17: 60 جنيه) ولفائف (42 جنيه) مع مجموعة من ساندويتشات منها برجر فراخ (38: 49 جنيه) وبرجر لحم بتشكيلة من الإضافات البديعة. حجم الساندويتش اختيارى يبدأ من 3/1 باوند (39 جنيه) لغاية 2.5 باوند (61 جنيه)، دول حتى ممكن يضاعفوا الحجم لو تقدر عليه! بالنسبة للمشروبات مافيش مفاجآت، قائمة من الصودا، العصائر وكام نوع من المشروبات الساخنة. اختارنا صودا نملأها بنفسنا زى ما نحب (15 جنيه) كانت ساقعة ومنعشة، مع عصير برتقال (18 جنيه) محتاج شوية ثلج. بدأنا الأكل بكومبومقبلات (60 جنيه)، عبارة عن حلقات بصل مقرمشة لذيذة، ويدجز بالجبنة مغطاة بكمية كبيرة من الجبن الذائب، أجنحة دجاج مشطشطة بشكل رهيب، وأصابع موتزاريلا سيئة طعمها قريب من طعم السمك. بالنسبة للأطباق الرئيسية طلبنا وجبتين موفرينsuper saver؛ واحد وايلد برجر 3/1 باوند (43 جنيه)، وواحد ميجا برجر 2.5 باوند (48 جنيه)، وإضافة من التشيلى تشيز فرايز (23 جنيه). ومع اختياراتنا، قدرنا نختار من بار السلاطات بدون مقابل، والبرجر قُدم معاه قطع ويدجز مقلية طرية، تتبيلتها مميزة بكمية بسيطة من الفلفل الأحمر. الاختيارات المتاحة فى بار السلاطات للأسف كانت قليلة ورغم أن الخس كان خفيف والطماطم طازجة، سلاطة البطاطس طعمها كان غريب والصلصة حراقة بشكل خادع. أضف على كده أن مافيش أى دريسينج للسلاطة نقدر نتكلم عنه. ساندويتشين البرجر على الجانب الإيجابى كان طعمهم لذيذ، اللحم ممتاز والبرجر سميك، بغض النظر عن شوية تزييت. الجبن الشيدر على الوايلد برجر كان ذائب وطعمه لذيذ، أما الكمية البسيطة من اللحم المقدد فكانت ناشفة وصعبة المضغ. الجبن السويسرى والفلفل على الساندويتش الأكبر "ميجا برجر" كانت علامة فارقة بين الساندويتشين وحلقات البصل المقرمشة كانت إضافة رائعة. التشيلى فرايز كمان كانت لذيذة، مستخبية تحت كمية كبيرة من اللحم المفروم بالطماطم المشطشطة. بالنسبة للحلو، اختارنا من بين مجموعتهم من الكيكات والتارت قطعة كبيرة من التشيز كيك، مُقدم معاها كثير من صوص الشوكولاتة الدافئ (27 جنيه). صحيح طبقة البسكويت كانت رقيقة شوية، بس الكيكة عمومًا كانت سميكة بشكل مميز، وطعمها حلو ودسم. على الرغم من شكله الغريب، وايلد برجر بـ يقدم أكلات سريعة ممتعة، أما السؤال عن وصوله لمستوى محلات البرجر المفضلة زى جورميه برجر وبوتشرز برجر أو لأ، فده موضوع ثانى.

...

فاتبرجر: من أمريكا إلى عاصمة القاهرة..سيتي ستارز
اصدرت في: 29/05/2013

يوم السبت الموافق 25 مايو كان يوم الافتتاح، وبعدها بأيام قليلة كنا موجودين "كمحررين كايرو 360" داخل أول فرع يفتح في مصر من مطاعم «فاتبرجر – FATBURGER» والموجود طبعًا في في سيتي ستارز أو عاصمة القاهرة زي ما بـ يطلق عليه. «فاتبرجر» عمره أكثر من 50 سنة وأول فرع له فتح في ولاية كاليفورنيا بالولايات المتحدة، واكتسب شهرة عالمية وفتح في عدد كبير من دول العالم، وبـ نعتبر وصوله لمصر كان متأخر شوية خاصة أنه موجود في الشرق الأوسط من زمان في بلاد الخليج ولبنان وتونس وغيرها، لكن أن تأتي متأخرًا أفضل من ألا تأتي أبدًا، مش كدة ولا إيه؟ ووجبت الزيارة بعد افتتاحه بأيام قليلة علشان نعرف إيه الجديد اللي بـ يقدمه «فاتبرجر» كمنافس قوي لمطاعم البرجر الأمريكي اللي انتشرت مؤخرًا في مصر. المطعم موجود في الدور الأخير من المرحلة الأولى من ستارز سنتر، الباب في الباب مع مطعم «تشيليز»، ولو رحت اليومين دول هـ تلاقيه عامل دعاية وملصقات كبيرة في كل أرجاء المول، شكلها فعلًا ملفت ومغري أنك تجرب المكان ده. المطعم مساحته كبيرة وفيه جزء للجلوس داخلي وجزء خارجي للمدخنين، بديكورات الـ American Diners المعروفة وبعض الكنبات المنفوخة المريحة باللون الأحمر المبهج والترابيزات الخشبية الواسعة، عجبتنا القعدة جدًا وبدأنا نتفرج على المنيو المحدد والبسيط إلى حد ما؛ فيه برجر بـ 4 أحجام مختلفة، وجنبهم الإضافات اللي ممكن تحطها للساندويتش بتاعك، وعدد من الأطباق الجانبية والمقبلات وبعض ساندويتشات الدجاج وبرجر الخضار وأخيرًا وجبات الأطفال والمشروبات والميلك شيكس. لازم تقوم تروح للكاشير علشان تعمل الأوردر بتاعك، الويتر بـ يوصله لحد الترابيزة بس، وممكن يساعدك في الاختيار وشرح المكونات، وما تتخضش لما تروح تعمل الأوردر وتلاقي الكاشير بـ ينادي بصوت عالي على كل صنف أنت اختارته وباقي الويترز يرددوا وراه اللي هو قاله بصوت أعلى (صباح التشريد!). الموضوع مضحك بجد ولما سألناهم بـ يعملوا كدة ليه ما قالوش سبب مقنع بس واضح أنها من تقاليد المحل عالميًا، وبعد ما قعدنا شوية في المطعم ومع تكرار الحركة اتعودنا عليها ومابقيناش نضحك. أسعار الفاتبرجر بـ تبقى 39 و 49 و 59 و69 جنيه، من قطعة برجر واحدة في الساندويتش لحد 4 قطع، وكل إضافة بعد كدة بـ 5 جنيه، بيض أو جبن أو تشيلي صوص أو هالبينو أو بيكون، والمشروم بـ 7 جنيه، عايز تخلي الساندويتش كومبو هـ تدفع 23 جنيه زيادة وهـ تأخذ بطاطس رفيعة كرسبي أو سميكة مقلية، وبيبسي refill تعيد ملأه إلى مالانهاية. ممكن تجيب بوب كورن دجاج أو ناجيتس أو تشيلي دوج أو فات وينجز بأسعار من 20 لـ 25 جنيه على سبيل المقبلات، لكن إحنا راهنا أن الساندويتش هـ يبقى كبير ومش هـ نقدر نأكل حاجة جانبه. وطلبنا كينج فاتبرجر (أكبر حاجة) بالإضافات المختلفة والكومبو (حوالي 100 جنيه) والمفاجأة أنه ما شبعناش! صحيح اللحم طعمه رائع والدهون فيه قليلة جدًا الإضافات فريش، لكن حجم قطع البرجر صغير والعيش نفسه رقيق جدًا. المشروم سويس فاتبرجر (47 جنيه) كان صغير زي أي ساندويتش تجيبه من «هارديز»، طعمه حلو وله مذاق صغير لكن ثاني مرة مشكلة الحجم! مدير المطعم جاء لحد عندنا وسألنا باهتمام إيه أخبار الأكل، قولنا له ملاحظتنا على موضوع الكميات بعد ما أثنينا على المذاق الفريد للحم والتتبيلة، وقد إيه الساندويتش خفيف، وهو فسر لنا ده أن دي أحجام ثابتة عالميًا وما يقدروش يغيروها في أي فرع في أي بلد في العالم، واهتم أنه يجاوب على كل استفسارتنا ورحب بينا بشدة وإحنا بـ نقدر ده جدًا لما بـ نزور أي مكان وبـ نشوف المعاملة الراقية دي من القائمين عليه ووجب علينا أننا نذكرها في مقالنا ده. «فاتبرجر» اسم جديد بـ يضاف لعالم البرجر الأمريكي الأصلي في القاهرة، بـ ندعوكم لتجربة المكان ومقارنته بباقي المطاعم المشهورة بتقديم نفس المنيو زي «فدركرز» و«لوسيليز» وغيرها.

...

بافلو برجر: برجر أمريكي على الجريل في مساكن شيراتون
اصدرت في: 03/02/2013

دي مش أول زيارة لحد من فريق كايرو 360 لواحد من فروع «بافلو برجر»، مش بس كده؛ ده واحد من الأماكن المفضلة اللي بـ نطلب منها دليـﭭري وإحنا قاعدين في المكتب، بس الزيارة كانت واجبة بعد مرور سنة من أول زيارة لفرع مطبخ البرجر الشهير في ساحة طعام أواسيس في مساكن شيراتون، وبالتحديد داخل كافيه «فيج –fig» اللي بـ يحتضن كمان بالإضافة لبافلو برجر مطبخ «روما بيتزا تو جو» ده بجانب منيو الكافيه العادي، وطبعًا وأنت قاعد هناك لك حرية الاختيار بين المنيوهات الـ 3 وهـ تعجبك القعدة سواء اخترت المفتوحة اللي برة القريبة من النافورة واللي منها بـ تبقى شايف مربع ساحة الطعام الخارجي كله، أو اخترت مكان داخل المحل تجنبًا للبرد أو طلبًا لبعض الهدوء. المكان ظريف وشيك وهـ تحب تقضي فيه وقت وتستمتع بوجبتك ده أكيد.بـ تقعد في المكان وتتفرج على المنيوهات وتبقى مش عارف تختار إيه ولا إيه، برجر ولا بيتزا ولا أطباق رئيسية ولا سلاطات، لكن علشان إحنا رايحين مقررين ومتوجهين على البرجر اختارنا شيتاكي مشروم برجر حجم كبير أو الـ 250 جرام من اللحم (46 جنيه) وهو برجر من اللحم الصافي المحمر وعليه قطع من مشروم الشيتاكي الآسيوي مع الجبن السويسرية والمايونيز والخيار، والعيش المخبوز الرقيق والناعم جدًا المشهور به «بافلو برجر» والأحلى من الساندويتش نفسه المقبلات اللي بـ تنزل معاه في نفس السَبَت البلاستيكي من بطاطس ويدجز وجبن سويسرية بفلفل الهالبينو محمرة ومقرمشة وحلقات البصل المقلية، ده على ضمانتنا من أحسن الحاجات اللي ممكن تطلبها هنا وهـ تسمتع بها بجد، بس ممكن تطلب حاجة ثاني جنبها لو كنت جعان قوي لأن الكميات والأحجام هنا مش ضخمة زي محلات البرجر الثانية. علشان كده إحنا كنا بدأنا بطبق من رقائق الذرة المقرمشة وصوصات الباربكيو والهالبينو والمايونيز وكان اسمها في المنيو Baja Nachos وكانت كميتها كبيرة بس مافيهاش أي جبن ناتشوز وكان سعرها 22 جنيه. ساندويتش برجر ثاني من كلاسيكيات بافلو هو الهاواي وايكيكي 250 جم (46 جنيه) وهو شبه كثير الساندويتش الأول في مكوناته لكن بدون مشروم وزيادة عليه حلقة الأناناس اللي بـ تثبت أنه من هاواي، لكن الميكس كان هائل والطعم غني رغم أننا كنا متوقعين الطعم يكون سبايسي شوية لكن ماحصلش. عصير كيوي فريش (22 جنيه) بعد برجر هاواي، هو ده الاختيار الأمثل في رأينا، ده طبعًا بعد ما تكون شربت أي حاجة فيها كولا مع الأكل. فيه تشكيلة كبيرة من ساندويتشات البرجر ورابس الخس باللحم وبرجر الـ Old School والـ Animal Style التقليدي والحجم الصغير الـ 200 جم بـ يبقى بسعر 38 جنيه، وفيه عدد من المقبلات والسلاطات اللي ممكن تطلبها من منيو fig نفسه. لكن تجربة «بافلو برجر» في المحل كانت ممتازة خصوصًا مع الخدمة الجيدة والعاملين الودودين وإمكانية استخدام كارت الفيزا العظيم اللي بـ يحل لنا مشكلة آخر الشهر في الكاش.

...

بيكاديللي ستيشن: طابع إنجليزي وأكلات إيطالية في أواسيس شيراتون
اصدرت في: 04/09/2012

مش مجرد اسم مأخوذ من اسم أهم شوارع العاصمة الإنجليزية لندن، لكن ده كمان المكان عامل لنفسه Theme مميز جدًا استخدم فيه معالم من الشارع الشهير. تصميم المحل نفسه أشبه بمحطة القطار، والكراسي الخشبية الكلاسيكية المخصصة للانتظار، وعلى أبواب المطعم هـ تلاقي تمثالين بالحجم الطبيعي للحرس الملكي البريطاني بالزي الأحمر وغطاء الرأس الضخم باللون الأسود. لأول وهلة ممكن تفتكرهم حقيقيين من كثر ما هم معمولين بإتقان، ولأن الحرس الملكي بجد بـ يبقى ثابت مش بـ يتحرك زي التمثال. المكان شدنا من أول ما دخلنا ساحة طعام «أواسيس» وبدأنا نتجول بين الكافيهات والمطاعم المختلفة، ولاحظنا عدد من الأماكن الجديدة فتحت هناك، وفي المقابل فيه مطاعم أغلقت أبوابها بشكل نهائي. «بيكاديللي ستيشن» كان أحد الأماكن الجديدة اللي فتحت أبوابها لأول مرة في بداية شهر رمضان اللي فات، ورغم أنه أقرب لكافيه منه لمطعم إلا أنه كان عامل بوفيه مفتوح للإفطار فيه أكلات شرقية بجانب الأكلات الإيطالية والأمريكية اللي هو متخصص فيها. المكان مكون من طابقين، الطابق الأرضي فيه جزء خارجي مفتوح وجزء داخلي محاط بالزجاج، وفيه دور علوي مفتوح زي الرووف وده كان اختيارنا أننا نقعد فيه لأن الـ View من فوق ظريف من بعض الزوايا اللي بـ تطل على أواسيس من الداخل. وفيه شاشات تليفزيون وطول الوقت كانوا مشغلين في السماعات ألبوم محمد حماقي الجديد، رغم أننا كنا متوقعين أغاني إنجليزية لائقة على شخصية المكان.استعرضنا المنيو الأنيق اللي كان فيه أطباق رئيسية إيطالية وأمريكية وبرجر وبيتزا بجانب الشوربة والمقبلات والسلاطات، وفيه حلويات كثير وآيس كريم وكيك وتارت، وقهوة ومشروبات ساخنة وباردة وسموزي وكوكتيلات، وفيه شيشة بكل المذاقات.كومبو بيكاديللي هو البداية دائمًا، طبق المشهيات الخاص بالمكان (34 جنيه) واللي غالبًا مكوناته بـ تبقى واحدة في كل المطاعم، أصابع الموتزاريلا المقلية وشرائح دجاج تندر ورقائق الذرة المقرمشة مع جبن الناتشوز. الحقيقة الطبق كان بداية مبشرة والقرمشة اللذيذة اللي في كل أصنافه كانت دليل على أن مكوناته فريش وأن الصنعة حلوة في مطبخ المطعم. سألنا الجرسون اللي معانا (اللي بالمناسبة كان متعاون جدًا) إيه هي الأطباق المميزة في المكان لأننا حسينا أننا توهنا في المنيو الكبير بتاعهم، فرشح لنا طبق الدجاج المشوي مع الجمبري بصوص الكريمة (59 جنيه) وفعلًا جربناه مع الأرز والخضار السوتيه، وكان طبق تحفة مافيهوش غلطة، التسوية والمذاق والتوابل المضبوطة، حتى السوتيه كان مش مستوي قوي زي ما بـ نحبه، وكمان علشان يبقى صحي أكثر. وكنا محتارين نختار من الساندويتشات والبرجر الأمريكي المميز ولا بيتزا، وفي النهاية استقرينا على البيتزا (بيتزا بيكاديللي برضه) وكانت سوبريم فيها كل حاجة تقريبًا من لحوم وجبن وسي فوود، بس الطعم مضبوط وسُمكها ممتاز وسعرها كمان مناسب لحجمها (43 جنيه) وهي مشبعة جدًا لفرد واحد، وممكن اثنين مش جعانين قوي يأكلوها.دمرنا كل حاجة صحية عملناها في اختيارنا للوجبة الرئيسية بتارت الشوكولاتة التويكس اللي طلبناه بعد الأكل (19 جنيه) بس مش ندمانين لأن التارت كان لذيذ بزيادة، وحجمه معقول، مش كبير أو سميك لدرجة أنك تزهق منه وما تعرفش تخلصه، وطعم الشوكولاتة التويكس بقى مش عاوز كلام.الخدمة كويسة في «بيكاديللي ستيشن» وإن كان مع الصوت العالي والدوشة اللي موجودة في المكان ممكن الجرسونات ما يبقوش منتبهين لك قوي، بس غير كدة حسينا بألفة وجو ظريف في المكان، وديكوره المبتكر وفكرة محطة القطار أو الأوتوبيس عجبتنا وما عندناش مانع نروح مرة واثنين وثلاثة علشان نستمتع بقعدة الروف ومنيو الإفطار الصبح بدري مع فنجان القهوة المحترم.

...

شاهد المزيد
مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول