عالمي مطاعم in مصر الجديدة Cairo, Egypt

مطاعم

كارما: مطعم بيجمع بين الفخامة والبساطة في سيتي ستارز
اصدرت في: 09/04/2016

أوقات بتعدي علينا أيام بنحتاج ندلع نفسنا بأكلة فخمة، وفي نفس الوقت مش عاوزين نضيع وقتنا في شكليات، وعلشان كده بنقدم لكم كارما – Karma الموجود في الدور الأول من مول سيتي ستارز عند بوابة سينما VIP، مش فريد من نوعه أو مميز بحاجة معينة، لكن الكنب والكراسي المريحين والحوائط المعمولة بالكابتونيه، وكمان الأجواء الهايلة حققوا إحساس مريح للمكان. جرسون لطيف قدم لنا المنيوهات وسابنا نختار من المنيو الكبيرة على راحتنا، المميز في منيو كارما بعيدًا عن أقسام المقبلات والسلاطات والساندويتشات التقليدية أنهم بيقدموا أكلات عالمية ومنها أطباق إيطالي وآسيوي. قررنا نطلب ترياكي بيف (58 جنيه) من المقبلات، وهو عبارة عن شرائح لحم صغيرة مشوية Well Done ومتغطية بصوص الترياكي المسكّر والسبايسي في نفس الوقت. بعدها على طول وصلت أطباقنا وهي سويت أند ساور تشيكن (67 جنيه) وسكيليت تشيكن (82 جنيه)، السويت أند ساور تشيكن قُدمت في طاسة كبيرة وفيها فراخ مقلية ومعاها جزر وفلفل ألوان وأناناس، ومرشوش عليهم صوص سويت أند ساور ومعاها طبق فيه أرز مقلي بالبسلة والجزر والذرة الحلوة، الفراخ كانت مقلية تمام التمام، وصوص السويت أند ساور كان ممتاز وحافظ على قطع الفراخ من أنها تتزيت، أما الأرز فكان هايل وأضاف طعم مختلف كان محتاجه الطبق. أما السكيليت تشيكن يكفي فردين، وهو عبارة عن أربع قطع فراخ كل قطعتين منهم محطوطين فوق بعض وبينهم جبنة موتزاريلا وبيف بيكون وفلفل ألوان، والأطباق الجانبية كانت بطاطس مهروسة وخضار سوتيه، الممتع في الطبق كان التوازن بين الشوي وبين المحافظة على قطع الفراخ طرية وعصارية، وكمان الإضافات عملت نكهة جميلة من غير ما تطغى على طعم الفراخ. الحلو يا جماعة لو سمحتم، طلبنا كان شوكليت فوندو (45 جنيه) ومعاها بولة آيس كريم فانيليا وكلهم متغطيين بخطوط من صوص الكراميل اللذيذ، لقطة اليوم كانت لما ضربنا المعلقة في الكيك الأسفنجي، وفجأة خرج منها فيضان شوكولاتة سايحة غرقت الطبق الأبيض كله، مافيش كلام أنهم عملوه باحترافية صعب نشوفها في القاهرة. نقدر نقول أن زيارتنا لكارما كانت ممتازة وصعب نشتكي من حاجة معينة، وصحيح الأسعار ممكن نشوفها غالية شوية، بس الكميات الكبيرة بتعوض الأسعار وهنا تظهر نقطة تفوق كارما على المطاعم من نفس فئته، كارما بيركز على تقديم خلطة سحرية ما بين الأكلة الكاجوال البسيطة والأكلة الفخمة.

...

كوكو: منيو متميزة وتنفيذ متواضع في هليوبوليس
اصدرت في: 01/03/2016

مافيش شك أن هليوبوليس من أهم المناطق في القاهرة اللي بتقدم كل يوم مطاعم وكافيهات جديدة بجانب 6 أكتوبر والقاهرة الجديدة، طلعنا زيارة لمطعم وكافيه "كوكو - Coco" الموجود في ألماظة جنب سوبر ماركت أوسكار والحقيقة أنه ما قدرش يبهرنا خالص. منطقة الأوت دور في كوكو صغيرة وهادئة، أما ديكورات المكان نفسه فبتجمع بين اللمسة الكلاسيكية والمودرن، بكراسي وكنب مريح باللون الأخضر وكراسي بيدين مخططة بالأبيض والأسود ونجف بكريستالات صغيرة. بعد ما استقرينا في أماكننا داخل كوكو، قدموا لنا منيوهين مغلفين فيهم اختيارات هايلة منها ذيل أستاكوزا مشوي Broiled Lobster Tail بـ (233 جنيه) وسلامون فارفالى Salmon Farfalle بـ (70 جنيه)، بعد تفكير عميق قررنا نطلب كوردون بلو مشوي بصوص مسطردة (73 جنيه) وسي فوود فيتوتشيني (61 جنيه). ندخل في الموضوع ونتكلم على الكوردون بلو المكون من قطعتين صدور فراخ طرية حجمهم متوسط وعليهم صوص هوني مسطرد –مش صوص مسطردة زي ما قالوا– لكن مافيش أي نوع من أنواع الشواء ظهر على الفراخ، الغريب أنها ما كانتش مقلية حتى، اللي وصل لنا في الحقيقة كان فراخ لونها أبيض ونرجوكم ما تسألوناش عملوها إزاي، النتيجة كانت فراخ عديمة الطعم ولا النكهة ومحشية قطعة مشروم واحدة وقطع لحم مدخن صغيرة ومافيش وجود لنكهة الجبنة، الجانب الإيجابي الوحيد في الطبق كان البطاطس المحمرة بتتبيلتها الرائعة والخضار الطازج المعمول بالزبدة وزيت الزيتون. المعاناة استمرت مع الطبق الثاني، السي فوود فيتوتشيني المكونة من جمبري ولحم كابوريا وكاليماري مع المكرونة كانت مستوية كويس، بس المشكلة كانت في الصوص الأبيض، وزي ما قولنا قبل كده على مشكلة طعم الجبنة في الكوردون بلو، طعم المكرونة كان ضعيف وقوامها عامل زي الشوربة. بعد ما خلصنا الأكل، كان نفسنا الموضوع يكون أحسن مع الحلو، وعرفنا من الجرسون أنه مش موجود في المنيو، الموجود وقتها كان أطباق حلو تقليدية منها براونيز وشوكليت لافا كيك، بس إحنا طلبنا تشيز كيك (34 جنيه)، والمفاجأة أنها طلعت مش تشيز كيك خالص واللي وصل لنا كانت حاجة أقرب للتشيز مادنيس بتاعة سبيكترا. على العموم، الكيكة كانت عبارة عن طبقة رفيعة من البسكويت والجبنة، ووسطهم كمية آيس كريم كبيرة، بس مافيش كلام أن صوص الفراولة مع طبقة البسكويت والآيس كريم فانيليا المنعش وشوية الجبنة عملوا طعم رائع يستحق التقدير. هضمنا كل اللي فات بشيشة كيوي على مانجو هايلة وفضلت مكملة معانا طوال الوقت. رغم أن نهاية اليوم كانت لطيفة، بس مشينا من هناك وكل اللي بيدور في عقلنا إزاي المطعم هـ يقدر يستمر وسط المنافسة القوية الموجودة، لما تشوف المنيو هتفتكر أنك على موعد مع أكلة هايلة لكن الحقيقة حاجة ثانية خالص، المشكلة الحقيقية كانت في تحضير الأكل ودي حاجة أكيد لها حل.

...

أروما لاونج: مطعم مناسب للعيلة في سيتي ستارز
اصدرت في: 24/02/2016

وإحنا بـ نتمشى في سيتي ستارز فى المرحلة الأولى، عدينا على مطعم أروما لاونج – Aroma Lounge الموجود فى الدور الثالث، المكان شدنا من بره خصوصًا أننا بـ نحب ستايل الكراسي والديكور الـVintage اللي بـ يدعو للروقان وهدوء الأعصاب فـ قررنا ندخل ونجرب المكان. من الحاجات الحلوة في المكان وجود 3 مستويات مختلفة للقعدات: المستوى الأول هو الجزء الموجود جوه المول وده قعدته تقدر تعيش فيها أجواء سيتي ستارز زي درجة الحرارة فيه والدوشة على حسب فيه حفلة ولا لأ.. بعد كده بـ تدخل على مستوى وسط جوه شوية وفيه بانوراما زجاج كبيرة بعرض المكان كله ودى بـ تكون درجة حرارتها متوسطة وواسعة ومريحة، أما المستوى التالت فهو Open Air تمامًا وبـ تدخل له الشمس وبـ يفصلك تمامًا عن جو المول. بصفة عامة الخدمة في المطعم كويسة، عدد العمالة مناسب، أول ما بـ تقعد المنيو بـ تنزل على طول، طلبك بـ يتاخد بدقة ومش بـ يتأخر والأكل بـ ييجي سخن والناس كانوا بـ يستجيبوا بسرعة كل ما بـ نطلبهم. طلبنا Banana Berry Smoothie بـ (27 جنيه) وكان حلو جدًا مثلج وطعمه طازة وطبيعي ما حسيناش فيه بطعم النكهات الصناعية أو الألوان، والكريمة المخفوقة عليه كانت مضبوطة تمامًا ومش مسكرة قوي ودي مش دايمًا بـ تكون مضبوطة في الكافيهات. وطلبنا كمان شوربة طماطم بالكريمة (30 جنيه) كانت حلوة برضه ومضبوطة.. وختمنا بطلب بيتزا مارجريتا (40 جنيه) ودي ما كانتش أحسن حاجة بسبب أن صوص الطماطم بتاعها كان قليل أوي مع أن المارجريتا أساسها الطماطم والجبنة. المنيو كويسة جدًا وتفتح النفس بصراحة، التصميم بتاعها حلو ومنظمة والأكل متصور فيها بشكل محترف جدًا، وهما رافعين نسخة منها على صفحتهم على الفيسبوك فـ تقدروا تتفرجوا وتاخدوا فكرة قبل ما تروحوا المكان. الأسعار مش رخيصة أوي تعتبر قريبة من أسعار مطعم تيدز – Ted's فى نفس المول واللي بـ نعتبرها عالية نسبيًا، لكن هما بـ يتبعوا سياسة استخدام المكونات الغالية والأصلية وده باين في طعم الأكل وبالذات الـBanana Berry Smoothie على سبيل المثال. من الحاجات اللي حبيناها في المكان ده السوشيال ميديا، أول ما اتصورنا في المكان وعملنا Check In رحبوا بنا على إنستجرام واتمنوا لنا يوم سعيد بعدها بدقيقة، كمان بـ يهتموا بالرد على عملائهم وتعليقاتهم على الفيسبوك.

...

AMPM: عن السلاطات والساندويتشات والأطباق الصحيّة وغيرهم نتحدث في سيتي ستارز
اصدرت في: 13/01/2016

بصراحة كده المطاعم بـ تصعَّب علينا أننا ناكل بطريقة صحيّة وسط كمية الأكل المقلي اللي أصبح أسرع وأسهل أكل في القاهرة، إحنا معاكم أن فيه مطاعم كثيرة متخصصة في تقديم أكلات صحيّة في القاهرة، بس بعيدًا عن السلاطة مش هـ تقدر تلاقي اختيارات كثيرة، والمشكلة دي لها حل عند AMPM. AMPM هو مكان هادئ في المرحلة الثانية من سيتي ستارز بـ تتميز بقعدة شيك وبـ يعتمد على فكرة الأكل المُحضر مسبقًا واللي بـ تضمن تقديم وجبات طازجة لكل عملائهم وفي نفس الوقت خدمتهم بسرعة، AMPM فعلًا مناسب لكل الأذواق بـ تقديمه مجموعة كبيرة من السلاطات منها سلاطة كينوا (45 جنيه) وتكس ميكس تاكو (49 جنيه)، وأطباق رئيسية زي أوسّو بوكو أند كوسكوس Osso Bucco and Couscousبـ (79 جنيه)، وتشيكن بيكون أند مشروم (65 جنيه)، وبكده أكلهم ينفع كل الناس من الأكيلة الجامدين لغاية مدمني الجيم والرياضة. نبدأ؟ يلا بنا، أول حاجة طبعًا كانت المقبلات، واختارنا منها تاي سلاد (35 جنيه) وناتشوز (10 جنيه)، ومعاهم أورانج شوكو ميلك Orange Choc Milk بـ (15 جنيه) وبيتش كوكتيل Beach Cocktail بـ (15 جنيه). البيتش كوكتيل كان خلطة منعشة من الخوخ والبرتقال والتوت الأحمر، أما كومبو البرتقال والشوكولاتة –وهو من أكثر الحاجات اللي مش واخدة حقها– فكان ممتاز؛ الطعم المزز للبرتقال مع سكّر الشوكولاتة عمل توازن هايل للطعم، المهم أن السكّر في المشروبين كان مضبوط. في الأول حسّينا أن التاي سلاد بشرائح الجزر وقطع الكرنب والفول "الحراتي" مش مميزة من ناحية النكهة والطعم لكن لما دخلنا على الفراخ المشوية بامتياز والنولدز اللذيذة والفول السوداني ومرشوش عليهم صويا صوص، نقدر نقول بكل ثقة أنها فريدة من نوعها، الناتشوز كانت أبسط شوية بس برضه لذيذة؛ صوص الجبن كان لذيذ والصلصة لها نكهة مميزة مع شوية شطشطة. فكرة الأكل المُحضر مسبقًا كانت مناسبة مع السلاطات، بس خوفنا شوية لما دخلنا على الأطباق الرئيسية، قررنا نطلب بط مدخن بالشعرية Smoked Duck with Vermicelli بـ (65 جنيه) وسلامون آسيوي Asian Salmon بـ (79 جنيه) وإحنا متوقعين ناكل بطة ناشفة وسلامون مش مستوي، بس اللي حصل فعلاً أن الأكل طلع روعة. السلامون اللذيذ الطري كان عليه سمسم محمص وفوقهم ترياكي صوص، أما الطلب الجانبي وهو النودلز –ومعاه فلفل رومي وذرة ومشروم– فكان ممتاز. صحيح السلامون كان هايل، بس البط المدخن سحب البساط من تحت الكل، عبارة عن شرائح بط رفيعة طرية ومستوية تمام، أما الشعرية اللي فيها قراصية ولوز مطحون فأضافت كثير للطعم خصوصًا مع نكهتها المسكّرة، الطبق كمان معاه شوية مكعبات بطاطس وبصل مقرمش، وصحيح طعمهم كان لطيف، بس مش ماشيين مع الطبق وما كانش لهم لزوم. خلصنا الأكل في AMPM بواحدة براوني (18 جنيه) عليها شوية كراميل وصوص شوكولاتة، وكل اللي نقدر نقوله أنها بـ تذوب في فمك من جمالها، وطعم الشوكولاتة واضح في كل قضمة. نقدر نقول أن تجربتنا في AMPM بشكل عام كانت ممتازة، المضحك أن اختياراتنا كانت مناسبة أكثر للوجبة الفري مش لأكلة سعراتها قليلة، وكمان الأطباق الحادقة كانت مسكّرة أكثر من المشروبات والحلويات، الحاجة الأكيد أن معاناتنا أننا نلاقي مكان يجمع بين الأكل اللذيذ والصحّي لسه مستمرة، بس لو كنت عاوز أكلات صحّية مش مقلية وطعمها لذيذ، أكيد AMPM اختيار مناسب.

...

 تي جي أي فرايدايز: مشروبات لذيذة وأكل مقبول في سيتي ستارز
اصدرت في: 18/11/2015

من فترة للثانية بـ نحب نرجع للأماكن اللى زورناها قبل كده، وكانت عزيزة على قلبنا، ومن الأماكن دي تي جي أي فرايدايز - T.G.I. Friday's واللي نقل في سيتي ستارز من الدور الرابع للدور الأرضي. طبعًا إحنا مش محتاجين نتكلم عن المنيو اللي متنوع كثير ما بين المشروبات اللي مغرية جدًا أو منيو الأكل اللي اتزود له أكثر من حاجة مؤخرًا، وده شىء أسعدنا، لكن للأسف فيه بعض الأخطاء خيبت أملنا للغاية. طلبنا كمقبلات موتزاريلا ستيكس بـ 37 جنبه ومن الأطباق الرئيسية Chop House fillet بـ 132 جنيه، ومكرونة ألفريدو بـ 45 جنيه الحجم الصغير، طبعًا من منيو المشروبات الحجم الكبير منBerry Mojito بـ 44 جنيه وسموزي توت الحجم الصغير بـ 36 جنيه. أول حاجة قدمت لنا كانت العصائر واللي كانت حلوة جدًا ومضبوطة بالرغم أن سعرها يعتبر غالي، للأسف كمان المقبلات جاءت لنا متأخرة جدًا قبل ما نخلص أكل بحاجة بسيطة، وده شيء طبعًا غير مقبول، لكن كان طعمها حلو جدًا والجبنة كانت سخنة وسايحة ولذيذة. أما بالنسبة لطبقنا الرئيسي Chop house Fillet فبرغم أنه قُدم بطريقة كويسة مع بطاطس مهروسة بالجبنة الشيدر (كان أحلى حاجة في الطبق) وخضار سوتيه، والجرسون طلب مننا قبل ما يمشي نتأكد أنها مش حمراء من جوه، إلا أن طعم الستيك للأسف كان مستوى زيادة عن اللزوم بالرغم من أن صوص البصل اللي فوقه كان طعمه تحفة، كمان كان مضاف على السوتيه ثوم، وده اكتشفناه بالطريقة الصعبة مش السهلة إطلاقًا، ولما اعترضنا للجرسون طلب يبدله بواحد ثاني بس للأسف كان مستوي أقل من اللزوم، ما عرفناش نقوله إيه الحقيقة.. فسكتنا. أما مكرونة ألفريدو كانت كويسة وخفيفة، ما نقدرش نقول عليها حاجة، بس خاب أملنا من التأخير في الطلبات والأخطاء اللي ممكن أغلب الناس تشوفها بسيطة، بس بالنسبة لأسعار المكان وسمعته دي مش أخطاء بسيطة خالص. نتمنى أنهم يصلحوا الأخطاء دي بسرعة، وهم فعلًا عندهم اهتمام براحة الزبائن وجودة الطلبات، يا ريت يعتبروا نقلهم للدور الأرضي في سيتي ستارز بداية جديدة لسلسلة المطاعم المشهورة بجودتها.

...

جابيز: أكل مميز للمطعم المحبوب في سيتي ستارز
اصدرت في: 27/10/2015

إحنا في الطبيعي بـ نهرب من أي مكان موجود في سيتي ستارز، أصل أكيد الأكل في مول مش مريح والسبب هو الدوشة الرهيبة، لكن زيارتنا لمطعم "جابيز - Gaby's" كانت هايلة من كل الجوانب، مكانه أمام سينما VIP في سيتي ستارز، وجابيز مكوّن من دورين بديكورات بسيطة مستوحاة من جو البيوت اللطيف وفي نفس الوقت قدروا يحافظوا على حيوية وجمال المكان. بدأنا مع طبق مقبلات عملاق هو بتس أند ديبس Bits and Dips بـ (110 جنيه) عبارة عن بلح بحر وكريسبي بون بون وسمبوسك سجق وأجنحة دجاج سبايسي وناتشوز، ومعاه عيش من القمح الكامل وباتون ساليه وصوص جبنة، تتبيلة بلح البحر كانت هايلة وطعمه متوازن بطريقة ممتعة، أما الكريسبي بون بون –عبارة عن كرات بطاطس مقلية محشية سبانخ وجبن شيدر وموتزاريلا– فكانت طرية وغنية بالنكهة اللذيذة. إحنا أصلًا من عشاق السجق ومن عشاق السمبوسك، فطبيعي أننا نتوقع السمبوسك سجق يكون اختراع، الطبقة الخارجية كانت مقرمشة وخفيفة ومغطاة بصوص باربيكيو، وقدرت تعمل طعم هايل مع حشو السجق المهروس بطعمه اللذيذ، وكملت التركيبة مع الخضروات الموجودة في الخلطة السحرية، أجنحة الدجاج السبايسي للأسف ما كانتش مشطشطة زي ما كان نفسنا، بس كانت طرية ولذيذة مافيش كلام. رغم كميات الأكل الموجودة في طبق المقبلات كان لازم نجرب الأطباق الرئيسية، ومن هنا طلبنا تشيكن بورتوبيلو رول (95 جنيه) وستيك & فرايز (129 جنيه)، والأول كان عبارة عن أربع قطع رول فراخ محشية مشروم وجبنة سويسري ذايبة وعليهم صوص فلفل أسود، الطبق معاه بطاطس ويدجز وشيبسي وبروكلي، والكلام ده أضاف للطبق شكل يفتح النفس للأكل، نكهة صوص الفلفل كانت معقولة وما كانتش طاغية على أي من مكونات الطبق، أما المشروم فكان قصة ثانية خالص، وأضاف للفراخ الطرية أصلًا عصارة إضافية لذيذة، الملحوظة الوحيدة على الطبق أنه محتاج جبنة سويسري زيادة. طبق الستيك & فرايز هو واحد من طبقين ستيك موجودين في المنيو، وهو عبارة عن ثلاث شرائح رفيعة من اللحم، ومعاهم صوص مشروم لذيذ وطلب جانبي من البطاطس المهروسة، التسوية كانت زيادة شوية لأننا طلبناها medium، فكان صعب مضغ اللحم شوية، بس التتبيلة كانت لذيذة والصوص قدر يصلح شوية من الطعم. مشروبات جابيز كان لها نصيب معانا، طلبنا كراميل فريز (30 جنيه) وهو كوكتيل من عصير الأناناس والموز الطازج وصوص كراميل مع آيس كريم فانيليا، طعم الموز والكراميل كانوا طاغيين على العصير، أما الأناناس فكان خفيف وأضاف النكهة اللاذعة المناسبة، مشروبنا الثاني كان بلودي ليموناد Bloody Lemonade بـ (24 جنيه) بس طعمه ما كانش متوازن، الكوكتيل بسيط جدًا، ليمون ورمان، بس المشكلة أن الرمان كان قليل وبالتالي الطعم كان غريب شوية. طبق اليوم فعلًا كان الشوكليت سوفليه العظيم (45 جنيه)، مستوية تمام ومعاها بولة آيس كريم فانيليا والشوكولاتة السايحة طالعة من قلب الكيكة ورايحة على الآيس كريم في سيمفونية من الطعم الساخن والبارد. بعيدًا عن أخطاء بسيطة أثرت على الأطباق الهايلة، خرجنا من جابيز وإحنا مبسوطين ومتفاجئين شوية، رغم أنه داخل مول، بس قدروا يعملوا أجواء مميزة خاصة بهم.

...

ماي كايند أوف بليس: إفطار رمضاني ظريف في فيرمونت هليوبوليس
اصدرت في: 13/07/2015

لما بـ نحب نخرج نفطر أو نتسحر بره بـ يكون أمامنا أشياء كثير نضعها في الاعتبار، زي نختار بوفيه مفتوح ولا قائمة محددةSet Menu ولا نختار من اختيارات المكان اللي إحنا رايحينه، اختيار المكان نفسه ده يعتبر حوار لوحده لأن الأماكن في رمضان كأن بـ يصيبها تعويذة سحرية، يعني مثلًا ممكن تلاقي مطعم هائل في الأيام العادية أما في رمضان تلاقيه عكاك والعكس صحيح (ده مش كثير لكنه موجود). علشان نريح دماغنا من الحوارات والأفلام بتاعة المطاعم والكافيهات والزحمة والهرجلة اللي موجودة عند 80 % منهم، قررنا نختار مطعم في فندق وأبراج فيرمونت هليوبوليس، وهو مطعم "ماى كايند أوف بليس -My Kind OF Place " اللي بـ يقدم إفطار بوفيه مفتوح بسعر 260 جنيه غير شامل الضرائب والخدمة، ولازم تتصل قبلها علشان تحجز. وصلنا قبل آذان المغرب بحوالي نصف ساعة، قدرنا نركن بكل راحة في جراج الفندق الضخم الموجود في ثلاثة أدوار تحت الأرض وبمساحة الفندق كله، أكيد طبعًا مش محتاجين نكلمكم عن الديكور والشكل وغيره وغيره من فخامة فنادق فيرمونت المتعودين عليها سواء كان في نايل سيتي أو حتى خارج مصر. المطعم موجود بالقرب من الريسبشن وكان سهل الوصول له، بـ يقابلك موظفين وموظفات مهذبين ومبتسمين وفي منتهى الأدب والاحترام بـ يوصلوك لترابيزتك، الترابيزة بـ يكون موجود عليها طبق فيه عدد من تمرات البلح وزجاجات مياه على حسب عدد الموجودين على الترابيزة وCan مياه غازية برضه على حسب الموجودين. الأصناف الموجودة متنوعة ومتقسمين نوعين شوربة: خضروات وعدس، والسلاطات ودي كانت كثيرة ومنوعة وشاملة كل أنواع السلاطات والمخللات ومن المقبلات كان موجود قطايف بالجبنة وكبيبة، الأصناف الرئيسية كانت بيكاتا بالمشروم ولحم روستو مع أرز بالخلطة ومشويات (فراخ، شيش، كفتة) وجلاش باللحمة المفرومة مع مومبار محشي أرز ومكرونة باللحم المفروم بالصوص الأحمر وأرز أبيض وكان فيه سمك فيليه، كمان قسم كبير للفواكة زي البطيخ (الأحمر، الأصفر) والخوخ والكنتالوب وسلاطة الفواكة، أما الحلو كان أصناف مش كثيرة لكنها منوعة زي أم علي وأرز باللبن وزلابية وبسبوسة وقطايف وكنافة، كمان كان فيه ثلاث مشروبات رمضانية وهم عرقسوس (ممتاز)، كركادية (معقول) قمر الدين (ممتاز جدًا)، تنوع جيد في الأكلات والأصناف والمشروبات. الأكل سواء كان الحادق أو الحلو كله كان ممتاز وجودته رائعة وكله طازج وسخن، كمان الشيفات كانوا منظمين ومتعاونين جدًا، وكل صنف بـ يخلص كانوا بـ يجيبوا مكانه بمنتهى السرعة من غير ما تأخذوا بالكم.

...

ستيك أوت: مستوى ضعيف لفرع ستيك أوت فى هليوبوليس
اصدرت في: 05/05/2015

أوقات كثير، كل اللي بـ تكون محتاج له علشان تنسى يوم طويل كله تعب هو مطعم ستيك كويس، طلبنا كان مطعم مافيهوش لف ودوران كثير، ومن هنا قررنا نطلع على المكان المثالي. بعد ما عملوا سمعة لنفسهم وانتشروا في العاصمة، "ستيك أوت – Steak Out" بـ يقدم لكل المصريين أجواء لطيفة، بس يمكن الموضوع ماشي بنفس الشكل في كل الفروع من غير أي تغيير، مع أكل كويس وكميات مناسبة جدًا. فرع هليويبوليس أمام تيفولي دوم عبارة عن نفس الألوان البني الغامقة/ السوداء والأحمر مع قعدات مريحة زي باقي الفروع، بالنسبة لناس كثير، فكرة الشكل الواحد لكل الفروع حتى في الديكورات يعتبر جزء من سحر المكان. أول ما قربنا من الباب، واحد من الجرسونات فتح لنا ورحب بنا بابتسامة، طلبنا منه نقعد في منطقة التدخين وفي ثواني كان أمامنا المنيوهات وزجاجة مياه. بعد رحلة من التفحيص والتمحيص في المنيو، طلبنا شوربة كريمة فراخ (15.90 جنيه) مع كانتري تشيكن سيزار سلاد (44.90 جنيه) علشان نبدأ بهم، نروح على المفيد، الأطباق الرئيسية كانت بيف فيليه بالبيبر صوص (81.90 جنيه) وستيك أوت فرايد تشيكن (64.90 جنيه). بعد وقت بسيط وصلت الشوربة والسلاطات، طعم الشوربة ما كانش ولابد، صحيح كان فيها نكهة قوية بس من غير أهم عنصر في الشوربة؛ المرقة. نروح على السلاطات بكميتها الكبيرة والمكونة من خس، عيش محمص وقطع من فراخ مقلية وعليها دريسينج لطيف بس مش واو يعني، الملخص أن الطعم كان أكيد لطيف، بس مش حاجة ممكن نفكر فيها كثير. انتظرنا وصول الأطباق الرئيسية على أمل نغير رأينا، بعد شوية، وصل الجرسون ومعاه الأطباق وبدأ يفضي الترابيزة قبل ما ينزل الأكل. رغم أننا طلبنا الفيليه يكون medium، بس للأسف كان medium well، وبكده اللحم كان صعب المضغ من بره، بس قلب اللحم نفسه أحمر لون الدم. الطلبات الجانبية من البطاطس المحمرة والسويت كورن كانت معقولة. نفس الكلام بالنسبة لمستوى الفراخ المقلية، المكونة من قطعتين صدور فراخ محشية سبانخ وجبن موتزاريلا، كان واضح جدًا أن الفراخ مجمدة، والحشو مش ماشي مع الفراخ أصلًا. من وجهة نظرنا أن جبن الريكوتا كانت اختيار أنسب، طلب الأرز البسمتي كان عادي جدًا. بصراحة، الموضوع كان محبط بجد، إحنا جربنا ستيك أوت في كذا فرع، وكان واضح جدًا أن مستوى الفرع ده بعيد تمامًا عنهم، بـ ننصحهم يهتموا بموضوع المستوى الثابت، وكمان يا ريت يا جماعة تعملوا حاجة في الأطباق الجانبية، أصل مافيش فيها اختراع يعني!

...

كريف: إفطار بدرجة امتياز في تيفولي دوم مصر الجديدة
اصدرت في: 21/07/2014

عودناكم كل سنة في رمضان أننا نروح "نشيّك" على كريف. يمكن علشان بـ نحبه، فبـ نحب نطمئن على أداءه الرمضاني بصفة سنوية... ربنا ما يقطع لنا عادة. من أول رمضان وإحنا بـ نحاول نحجز في كريف - Crave الزمالك، ولكن محاولاتنا كلها كانت فاشلة تمامًا، مرة ما يردوش على التليفون، مرتين يردوا ويقولوا أن الحجز عندهم مكتمل، فقررنا أننا نجرب حظنا مع فرع تيفولي دوم اللى فى هليوبوليس، نظام الحجز في رمضان عند كريف معقد أكثر من أي مطعم ثاني، الحجز مش مجرد بالتليفون، ده لازم يبقى فيه Deposit مدفوع، أو تتفضل توصل قبل الإفطار بساعة ونصف! الحقيقة أن الاختيارين أصعب من بعض. قلنا نعمل اللي علينا ونشوف لو كريف مستاهل فعلًا أننا نمر بكل الإجراءات التعسفية دي علشان وجبة إفطار فيه. كريف بـ يقدم نفس النظام الرمضاني الخاص به كل سنة: بوفيه مفتوح للشوربة والسلاطات فقط مقابل (55 جنيه)، وتطلب بعد كده اللي تعوزه من المنيو. الجديد السنة دي أنه بـ يقدم مع الإفطار مشروبات رمضانية زي الكركديه وقمر الدين. بالرغم من أن المطعم العدد فيه كان مكتمل، إلا أن قبل الإفطار بخمس دقائق كل شيء تقريبًا كان جاهز؛ المياه والمشروبات الرمضانية على الترابيزات، والبوفيه كان مفتوح بوقت كافي، فبالتالي الشوربة والسلاطات كانوا جاهزين كمان. في رأينا نوعين الشوربة اللي كانوا في البوفيه مناسبين تمامًا لجميع الأذواق؛ شوربة لسان العصفور للكلاسيكيين واللي نفسهم يبدأوا الإفطار بحاجة دافئة بس خفيفة، أو شوربة كريمة بالمشروم لمحبي الشوربات السميكة. والاثنين كانوا ممتازين، خصوصًا الثانية، واللي ميّزها عن أي شوربة مشروم ذقناها في أي مكان ثاني هو طعم حبوب المسطردة المطحونة، واللي كانت بالنسبة لنا مكوَن جديد أول مرة نتذوقه. السلاطات كلها كانت فريش وشكلها شهي؛ عجبنا منها سلاطة الجرجير بالمشروم، ونفس الموضوع مع سلاطة البطاطس. من المشروبات الرمضانية جربنا الكركديه، للأسف ما كانش يرقى لمستوى أعلى من أنك تتذوقه، ما يعجبكش فتحطه مكانه. وبما أن الكركديه كان أسوأ ما في التجربة فهـ نتعمد أننا ننساه. من المقبلات الجديدة على المنيو جربنا تشيكن بونبون (29.95 جنيه) وهي عبارة عن حبات على شكل بؤج من العجينة الرقيقة المُغلفة لمكعبات فراخ متبلة، بـ ينزل معاها صويا وتشيلي صوص. التتبيلة الآسيوية للفراخ كانت رائعة جدًا، وممكن تأكل الطبق بدون الصوص من غير ما تحس أن فيه حاجة ناقصة. ولكن سُمك العجينة الرقيق كان لازم يؤخذ في الاعتبار أثناء عملية القلي، لأن فيه كذا واحدة أخذت أكثر من وقتها في الزيت وبالتالي كانوا رطبين جدًا. من الأطباق الرئيسية أخذنا Veal Parmesan بـ 78.95 جنيه وهو عبارة عن لحم مغطى بطبقة من الجبنة البارميزان وفتات العيش الياباني، وبـ يقدم معه إسباجتي بصوص الطماطم. اللحم كان أكثر من رائع سواء درجة التسوية أو جودتها، الطبقة الخارجية للحم كانت ذهبية ومقرمشة، الأسباجتي بطراوتها عادلت هشاشة طبقة اللحم الخارجية. وبالرغم من أن مافيش أسهل من الإسباجتي بصوص الطماطم، إلا أنها كانت شهية جدًا. الطبق الثاني كان Chicken M.C.M بـ 59.95 جنيه وهو عبارة عن قطعة صدور فراخ مقلية ومغطاة بالبصل والموتزاريلا والمشروم، ومعاها بطاطس مقلية وخضار سوتيه. قطعة الفراخ حجمها مناسب جدًا، وبالرغم من أنها سميكة إلا أنها مضبوطة التسوية، وجود البصل ما كانش مرغوب فيه بالنسبة لنا، ولكن كمية الموتزاريلا المحترمة عوضت لنا العيب ده. لاحظنا برضه أن مافيش مشروم على قطعة الفراخ، بس تم تعويض المسألة دي بوحدات من المشروم المقلي جاءت مع الطلب... وإحنا بـ نقبل العوض. أكثر شيء أسعدنا في الطبق ده أن البطاطس المقلية كانت معمولة في المطعم... من أول رمضان وإحنا بـ ندوّر على مكان يحترم آدميتنا وما يقدمش بطاطس ممكن نشتريها من السوبر ماركت. الخضار السوتيه كان منوّع، من أول البسلة وحتى القرع العسلي، وكل الأنواع كانت ممتازة التسوية. ما ينفعش أننا نروح كريف من غير ما نطمئن على أدائهم في أكثر حلو بـ يميزهم وهو الـ Chocolate Fondant بـ 36.95 جنيه، وهو عبارة عن قالب كيك شوكولاتة متوسط، في منتصفه حمم بركانية من الشوكولاتة السايحة –تحمست؟- وعليهم بولة آيس كريم فانيلية مع صوص الكراميل والشوكولاتة... هي تحلية ثقيلة بعد الإفطار، لكن ده ما يمنعش أننا نخلصها للآخر، وخصوصًا أن بكرة فيه يوم صيام جديد ولازم نجهز له كويس. إحنا قلنا أننا بـ نحب نطمئن على كريف من وقت للآخر، وبما أننا اطمأنينا نحب نطمئنك: كريف في رمضان يستحق فعلًا عناء إجراءات الحجز المعقدة. مش بس من حيث الأكل وجودته، الخدمة كانت ممتازة جدًا بالرغم من اكتمال العدد في المطعم.

...

يوود: كافيه فى هليوبوليس مريح لكن الجودة فيها كلام
اصدرت في: 06/04/2014

مع وجود منافسة شرسة فى مدينة مليئة بالمطاعم والكافيهات زى مدينة القاهرة، أى مكان جديد بـ يحاول أنه يكتسب شخصية متفردة تساعده على الظهور بين الكم الرهيب الموجود من الأساس. "يوود - Yood" تم افتتاحه فى صيف 2013، اختار الأخضر النيون كماركة مسجلة تميزه بها بين مبانى شارع عمار بن ياسر. الواجهة الخارجية والأوت دوور تميزت بالمظهر الحداثى المستخدم فيه المعدن اللامع والألوان الساطعة. أما من الداخل فغلب على الجو اللونين الأصفر والبرتقالى، الألوان زاهية لدرجة تصيبك بعدم اتزان للوهلة الأولى. اختارنا الأوت دور، و هو عبارة عن بلكونة تطل على الطريق، وهو نفس مكان تقديم الشيشة (10.50: 28.95 جنيه). وزى معظم كافيهات ومطاعم القاهرة، المنيو كبيرة وفيها أصناف تناسب كل الأذواق. السلاطات (7.95: 32.95 جنيه) والشوربة (11.95: 15.95 جنيه) المأكولات الخفيفة (8.95: 21.95 جنيه) الساندويتشات (17.95: 36.95 جنيه). ده غير العصائر الطبيعية الكثيرة (11.95: 27.95 جنيه) ومجموعة كبيرة من الكوكتيلات (18.95: 20.95 جنيه) والسموثيز (17.95: 19.95 جنيه) والمشروبات الساخنة (8.95: 19.95 جنيه) وطبعًا المرطبات العادية. من الكوكتيلات، جربنا White Goose cocktail إجمالاً طعمه رائع وخفيف فى نفس الوقت يغلب على الكوكتيل طعم الأناناس مع طعم خفيف جدًا من الكيوى (20.95 جنيه). طلبنا سلاطة يونانى (24.95 جنيه) التقديم كان أكثر من رائع، بالرغم من كمية الأعشاب المهولة المكملة للشكل الجمالى للتقديم. المكونات كانت طازة ومقرمشة. وبالرغم من وفرة الجبنة الفيتا فى التقديم، إلا أن الجبنة الفيتا كان طعمها يفتقر لطعم الفيتا الأصلى، كانت لزجة أكثر من اللازم. جربنا شوربة البصل (15.95 جنيه) وللأسف كانت رديئة جدًا، طعمها كان أشبه بطعم المياه الراكدة، لدرجة أننا اضطرينا أننا نبدلها بشوربة طماطم وكانت فكرة جيدة. جربنا الفراخ البانيه (45.95 جنيه)، مستواها كان جيد إن لم تكن ممتازة. الطبق عبارة عن قطعتين من الفراخ المقلية بعمق للون الذهبى الغامق، ومضاف عليهم جبنة مبشورة. الباستا بالصوص الأبيض كانت هائلة، المكرونة تسويتها كانت مضبوطة والصوص كان متماسك وقشدى. بالنسبة للحلو، فبالرغم من أن المنيو تعج بأصناف الحلويات، إلا أن الأنواع الموجودة فعلاً محدودة. طلبنا تشيز كيك الفراولة (23.95 جنيه)، لطيفة فى المجمل إلا أن طعم الجبنة والصوص الأخير بالرغم من جودة طعمه إلا أنه صوص صناعى موجود فى الأسواق غطوا على طعم طبقة البسكوت الموجودة بالتشيز كيك وهى من الأساس لا ترى بالعين المجردة. إجمالاً يوود من الأماكن الظريفة لخروجة كبيرة، بالرغم من أن الأكل مش رائع إلا أنه متوسط المستوى والخدمة ظريفة وسريعة.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن