فرنسي مطاعم in مصر الجديدة Cairo, Egypt

مطاعم

تري بون: مطعم عالمي بتصميم راقي في مصر الجديدة
اصدرت في: 29/08/2013

من أكثر من سنة كان لنا زيارة لفرع «تري بون - Trés Bon» الموجود في تيڤولي دوم في مصر الجديدة، ومن كام يوم مرينا من جنب الفرع الثاني الموجود في شارع غرناطة بالكوربة وعجبنا شكله من الخارج وشد انتباهنا أكثر من فرع تيڤولي، أولاً لأنه في شارع هادئ تمامًا ومافيش أي محلات ثانية جنبه، وثانيًا علشان اللون الأبيض لديكورات المحل وإضاءته الخارجية الساطعة اللي بـ تخليه ظاهر بقوة وسط الظلام والهدوء اللي حوله. ولأننا روحنا قبل وقت حظر التجوال بساعتين بالضبط، عرفونا أن المكان بـ يقفل قبل الحظر بساعة ونصف، يعني كان أمامنا نصف ساعة بس نأكل ونشرب فيها ونستكشف المكان، لكن الغريب أننا بعد ما قعدنا شوية لاقينا ناس كثير بـ تيجي بعد الميعاد اللي هم قالوا هـ يقفلوا فيه وقاعدين وبـ يطلبوا عادي جدًا ومش باين أن المحل بـ يستعد للإغلاق ولا حاجة، ففهمنا أن هم بـ يقولوا أنهم هـ يقفلوا بدري كإجراء احترازي علشان لو حصل حاجة، إنما بالفعل هم ممكن يقعدوا ساعات أطول شوية. فيه مساحة خارجية كبيرة للجلوس، كلها شيشة ودوشة وزوار المكان أغلبهم من سكان هليوبوليس والأماكن المحيطة، واضح من الأريحية والبساطة اللي بـ يتعاملوا بها مع المكان، ولاحظنا الإقبال الكبير على الشيشة والكوكتيلات والأسبريسو، يعني الناس بـ تتعامل مع الجزء الخارجي من المحل ده على أنه كافيه وبس تقريبًا. داخل المحل مساحة معقولة مكيفة مكونة من طابقين، قعدات فخمة ومريحة وموسيقى بوب وروك ظريفة طوال الوقت وشاشات تليفزيون وديكور باللون الأبيض والبني واضح عليه الحداثة والعناية بالتفاصيل. مطبخ عالمي يميل للطابع الفرنسي في نوعية الأكلات وأسمائها وطريقة تقديمها، والمنيو متنوع وتقليدي إلى حد كبير، فيه أطباق اللحوم والدجاج والأسماك وفتات ومقبلات غربية وشرقية وسلاطات وساندويتشات وباستا وبيتزا وكل مشروبات الكافيه العادية بالإضافة للحلويات والشيشة طبعًا. هـ نرشح لك الوجبة اللي إحنا طلبناها بالضبط لأننا مش أول مرة بـ نزور ومتأكدين أن اللي إحنا طلبناه كان من أجمل الأكلات في المحل، واستمتعنا به لأقصى درجة. طبق شيف سلاد (38 جنيه) فيه أصابع الروست بيف والدجاج المدخن والشيدر مع الخس والخيار والجزر الزيتون ودريسنج الخل، هـ يفتح نفسك تمام، وممكن يشبعك كمان لو مش جعان قوي قوي بـ تعمل دايت. طبق السوبر فياجرا (72 جنيه) هو طبق سي فوود متنوع فيه جمبري وكاليماري وسمك فيليه كله مقطع لقطع صغيرة ومعمول بخلطة حارة ومالحة شوية ومغطى بالجبنة الموتزاريلا، وممكن تطلبه مع الباستا أو صنفين جانبين من اختيارك، إحنا اختارنا الأرز الأبيض والسوتيه وكان طبق لذيذ جدًا، مافيش عليه ملاحظات غير الملح الزيادة في خلطة السي فوود. لفت انتباهنا طبق الساشوان بيف (69 جنيه) الصيني الموجود في منيو اللحوم، حبينا نجربه ولحسن الحظ طلع أكثر من رائع، قطع اللحم البتلو مقطعة قطع صغيرة مع الفلفل الملون والبصل والمشروم وصوص الصويا، معمول بحرفنة ولا أجدع مطعم صيني متخصص، مع البطاطس البيوريه المشوية كان طبق مثالي نعتقد أنه من أفضل الحاجات اللي ممكن تأكله هنا وتنبسط. بعد الأكل ممكن تأخذ كوكتيل فلوريدا الشهير (18 جنيه) بالمانجو والفراولة والجوافة أو أي ميلك شيك، الفواكة هنا فريش والعصائر سكرها مضبوط، وجربنا كمان الآيس كريم (27 جنيه) اللي فيه 3 بولات وواضح أنه جاهز مش معمول داخل مطبخ «تري بون» بس المهم أنه كان حلو. الخدمة سريعة بجد، كل حاجة طلبناها نزلت أمامنا بعد 10 دقائق أو أقل، والجرسونات محترفين ومركزين تمامًا، والمكان معتنى به ونظيف وما كانش فيه حتى هفوات من طاقم العمل، انبسطنا بتجربتنا جدًا في «تري بون» المرة دي، وقدر يغير فكرتنا بعد تجربة أقل في الجودة في فرع تيڤولي دوم.

...

سولت: مطبخ فرنسى فاخر فى هليوبوليس
اصدرت في: 11/09/2012

مكانه زى ما يكون خزنة سرية فى فندق جابريل اللى فتح جديد فى مول صن سيتى الموجود فى مساكن شيراتون، ولسه جديد لدرجة أن الأمن ومكتب الاستعلامات ما يعرفوش أن فيه مطعم فتح أصلاً فى الدور الرابع من شهرين، مطعم "سولت" عامل زي ما يكون وكر مخصص لزعيم عصابة قديم والمساعدين بتوعه.المكان عبارة عن غرفة من غير شبابيك وفيها كنب ضخم قماشه قطيفة أزرق، وكراسى جلد منقطة لونها عاجى، ومرايات متكررة، مع نجف كريستال ومسلّات، وحوائط مزخرفة لونها بنفسجى شاحب، تمثالين منحوتين لفينوس دى ميلو وجرسون لابس هدوم الساقى المعتادة وبابيون لونها نبيتى وكمان حمالات حمراء علشان تمشى مع جو المافيا الموجود فى المكان.بكل صراحة، الديكور مبهرج شوية، بس لو الإضاءة خفتت شوية وحطوا أغطية ترابيزات بيضاء، مع وجود كشافات إضاءة "سولت" ممكن يبقى واحد من أحسن الأماكن فى المدينة اللى الناس تقدر تتجمع فيها وبأسعار معقولة. وجبة فرنسية ممتازة لشخصين فيها سمك، ولحم خروف، وبط وفوا-جرا كل ده بسعر أقل من 500 جنيه تقدر تقول عليه وليمة كاملة.الشيف برونو كونتريراس، المهاجر الفرنسى اللى قبل ما ييجى القاهرة بستة أشهر كان بـ يدير مطعم منتجع خمس نجوم فى جزر المالديف بـ يقدم لحاسة تذوقنا منيو محدودة للعشاء فيها 6 أنواع من المقبلات، وستة أطباق رئيسية وكمان ستة أنواع من التحلية. فى البداية، تشكيلة من العيش قُدمت كمجاملة على لوح كان طعمها ممتع ومعاها زيت زيتون وملح البحر. أكثر حاجة عجبتنا هى فطيرة التمر وعيش البطاطس، بس الباقى كلهم يستحقوا أنك تجربهم (وخصوصًا أنهم ببلاش).بالنسبة للمقبلات، اختارنا صدور البط (75 جنيه) مع الفوا-جرا (85 جنيه). الصدور كانت متشفية ومقطعة على عيش بجبن البارميزان باللوز مع مربى التين وبنجر مقطع، أما الثانى كان عبارة عن كبد الأوز مقطعة ترنشات كبيرة على قطعتين من خبز البريوش. قطعة ثالثة كانت ضرورية جدًا. أما الأطباق الرئيسية فيها قطع شهية من الكتف الضانى (87 جنيه) متّبلة ببهارات الكفتة والكمون حول كومة من البطاطس المهروسة الدسمة بـ يزينه غصون من الزعتر ونبات الهليون، وقطعتين من سمك red snapper (73 جنيه) مع الأرز الأسود والينسون والخرشوف، المزيج ده كان طِعم جدًا بس مزيت شوية زيادة. السمكة كانت رقيقة وجلدها كان مقرمش، أما لحم الخروف كان ممكن يبقى دسم أكثر شوية لكن لو كنت بـ تفضل الأكل الخفيف، دى أكلة مناسبة.بالنسبة للحلويات، عملنا قرعة بين panna cotta (34 جنيه) والكريم بروليه (34 جنيه). لكن علشان نحافظ على الليلة الفرنسية، قررنا نجرب الكريم بروليه.عادة، طبقة خفيفة من السكر بـ تتحط على قاعدة من الكسترد. لكن مع طريقة سولت بـ يأخذ الطبقة دى ويقلبها فى الجو العادى ويجمدها على شكل شلال ثابت من الحلويات اللامعة. ولو ده مش كفاية أنك توصل لأقصى استمتاع بالأكلة، الشيف برونو بـ يبهرنا بتنويعات مختلفة من الكريمة: ثلاث بولات من الليمون، والشوكولاتة البيضاء والروزمارى- وزي ما الفرنسيين بـ يقولوا c’est vachement bonأو "إنه لأمر جيد فعلاً!"التقديم والخدمة فى سولت أحسن من المتوقع بكثير. بوجه عام وصفات الشيف برونو بـ يبرز جوهر ونكهة وقوام المكونات النقية وبـ يقدمها فى شكل منيو بسيطة ومباشرة. سولت هو المكان المناسب اللى تروحه فى القاهرة للاستمتاع بالأكلات الفرنسية المضبوطة.

...

تري بون: مطعم وكافيه عادي داخل تيـﭭولي دوم في مصر الجديدة
اصدرت في: 30/04/2012

بـ نحب قعدة تيـﭭولي دوم أو ساحة طعام تيـﭭولي الموجودة في ميدان ألماظة في قلب مصر الجديدة، البحيرة اللي في المنتصف والكافيهات اللي حواليها في الأدوار العليا والأرضية. ومن أول يوم تم فيه افتتاح ساحة الطعام دي وإحنا في كايرو 360 بـ نكتب عن كل مطعم وكافيه على حدة رغم أن الأماكن في الداخل متشابهة إلى حد كبير في التقسيمة والديكور وأماكن الجلوس. تجربتنا في «تري بون – Trés Bon» كانت مجرد تجربة في تيـﭭولي دوم، فيه أماكن جلوس داخلية وخارجية على البحيرة، بمجرد ما تقعد خارج المحل مش هـ تحس بأي فرق بين كل مطعم أو كافيه والثاني. علشان كده اختارنا نقعد في الداخل لسببين، أولهم اكتشاف طابع المحل المميز، وثاني حاجة علشان الجو كان بارد في الخارج. المكان من الداخل هادئ وقعدته مريحة وديكوراته وإضاءاته بألوان فاتحة، وممكن تشوف المنظر من الخارج من الجدران الزجاجية في كل مكان، فيه شاشات تليفزيون ومزيكا هادئة، وطبعًا الجزء الداخلي مش مسموح فيه بالتدخين ولا الشيشة اللي بـ يقدمها «تري بون». المنيوهات اللي جاءت لنا حالتها متهالكة جدًا وصفحاتها مفككة من بعضها، وأنهينا مهمة الاختيار بسرعة علشان المنيو ما يتقطعش في أيدينا زيادة. المطبخ هنا متنوع وإن كان أكثر تركيزه على الأكلات الإيطالية والبيتزا، مع بعض أطباق الفيليه والدجاج والساندويتشات التقليدية. كل أطباق اللحوم بسعر واحد هو 65 جنيه، وكل أطباق الدجاج من 46 جنيه تقريبًا والأسماك والجمبري بنفس السعر وكل طبق رئيسي معاه خضار سوتيه واختيارك من الأرز بالخلطة أو البطاطس البيوريه أو البطاطس المحمرة. الساندويتشات زي البرجر الديلوكس والفاهيتا والهوت دوج بأسعار من 17 لـ 25 جنيه. وفيه عدد كبير من المقبلات والسلاطات من كل مطابخ العالم. كنا شلة كبيرة في المكان فـ طلبنا أطباق كثيرة ومتنوعة علشان نجرب مع بعض كل حاجة في المكان، من المقبلات طلبنا شيف سلاد (32 جنيه) بقطع الروزبيف والدجاج والخضروات ودريسنج الخل والمسطردة وكانت معقولة بس كمية اللحوم فيها قليلة جدًا بالمقارنة بالخضروات. وطلبنا طبق الناتشوز (30 جنيه)، الجبنة طعمها حلو إلا أن رقائق الذرة المقرمشة كانت ملسوعة شوية في التحمير والكمية في الطبق قليلة برضه وعرفنا أننا لو جئنا هنا ثاني عمرنا ما هـ نطلب الناتشوز دي. علشان كنا كثير كان أمامنا أطباق رئيسية كثير، هـ نقول لكم عليها كلها ونقول لكم أفضلهم. فيليه بوافر بإضافة مشروم كان أحسن طعم للحم البقري ممكن تأكله هنا. بعده من حيث المستوى طبق دجاج كلورادو اللي بـ يُقدم مع باستا بالصوص الأبيض والمشروم (49 جنيه) وهو أفضل أطباق الدجاج في المطعم وفيه قطع صدور الدجاج المقلية بخلطة لذيذة من الأعشاب والبيض، لكن ما ننصحكش به لو مش بـ تحب طعم البيض في الأكل. فيليه الريكفورد كان حلو والجبنة الريكفورد مش ظاهرة قوي في الطبق زي مطاعم ثانية وده عجبنا جدًا. الأقل من حيث الطعم والكمية وكل شيء كان طبق االلحم البقري المشوي Grilled Veal لأن اللحم نفسه كان واضح أنه منقوع في تتبيلة ليمون ومسطردة لفترة طويلة غيرت من طعم اللحم وخواصه. الأرز بالخلطة مش حلو لأن القرفة فيه زيادة عن اللزوم، وكذلك البيوريه والسوتيه طعمهم عادي جدًا. ممكن نقول باختصار أن الأكلات الرئيسية هنا أحسن من الجانبية والمشهيات. البيتزا هنا حلوة قوي وغنية بالمكونات الفريش لكن حجمها صغير، يعني البيتزا المايتي السوبريم (39 جنيه) كان حجمها زي الوسط في أي مطعم بيتزا ثاني. فيه عصائر وكوكتيلات وحلويات وآيس كريم وشيشة لو عاوز تخلي قعدتك خفيفة في «تري بون»، وفي الحالة دي هـ تقعد في المساحة الخارجية. الخدمة جيدة وسريعة وممكن تحب تقضي وقت طويل في المكان لأن مافيش حاجة تخليك عاوز تمشي.

...

مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح