بيتزا مطاعم in مصر الجديدة Cairo, Egypt

مطاعم

فيج: كافيه وأكلات سريعة في أواسيس مساكن شيراتون
اصدرت في: 10/07/2012

مش عارفين هو ساحة "أواسيس" اللي في مساكن شيراتون دي مساحتها بـ تزيد ولا إحنا اللي بـ يتهيأ لنا! بس الأماكن اللي بـ نلاقيها فتحت جديد في المكان كل مرة بـ نزوره فيها بـ نبقى فعلًا مش عارفين دي كان فيه إيه في مكانها قبل كده، أو إذا مكانها ده كان ضمن مساحة المكان أصلًا ولا تم إضافته له. مش مهم، المهم أن المكان بـ يزداد حيوية وجمال كل مرة بـ نزوره فيها وده بـ يبقى على فترات مش قريبة. والمرة دي دخلنا في منتصف الساحة عند البحيرة الصناعية واختارنا قعدة خطيرة جنب الماء مباشرة وكانت القعدة دي تابعة لكافيه «فيج - f.i.g» اللي طبعًا له جزء مخصص في مكان مغلق مكيف، لكن القعدة على البحيرة الصناعية أكيد مغرية أكثر. «فيج» المكان اللي ممكن تأكل فيه (بافلو برجر) و(روما بيتزا تو جو) وأنت قاعد وبـ تستمتع بالمشروبات والكوكتيلات والحلويات اللي مش هـ تلاقيها في الأماكن المستقلة الخاصة بالمطاعم دي، وأكيد مش هـ تلاقي زي القعدة الساحرة دي ولا هـ تلاقي الشيشة المميزة اللي بـ يقدمها «فيج». المشروبات اللي في المنيو تزغلل العين، خاصة الكوكتيلات المفتكسة زي الكيوي بالتفاح بإضافات الكريمة، والزبادي المميز لـ «فيج» والسموزي والميلك شيك ومشروبات الشوكولاتة، والأسعار من 20 لـ 30 جنيه لأي مشروب. بس الصدمة كانت لما عرفنا أن على حظنا حصل عطل في الخلاط ومعنى كده أننا مش هـ نشرب أي كوكتيل أو أي مشروب مضروب في الخلاط. يعني ما كانش أمامنا غير عصير البرتقال الفريش (19 جنيه) اللي طلع مش حلو خالص لأن البرتقال صيفي زي ما قال لنا الجرسون، والمشروبات الساخنة زي القهوة والشاي، وعلشان كده قررنا نركز في المأكولات بعد ما طموحاتنا في المشروبات تحطمت، وطبعًا ما حبيناش نجرب أي برجر أو أطباق من «بافلو برجر» أو من «روما بيتزا» لأننا عارفينهم كويس، وإحنا موجودين هنا علشان نجرب مطبخ «فيج» نفسه اللي كان فيه بعض الأطباق العالمية زي الستيك والفيليه ومشويات برازيلية وبعض الأطباق المكسيكية والباستا والسلاطات والحلويات. جربنا الكاسيديا بالدجاج (42 جنيه) وهي رقائق عيش تورتيا مكسيكي محشوة بالدجاج بالصوص الأحمر ومع الطبق رقائق الذرة المقرمشة (زي الدوريتوس) وصوص الباربكيو والجواكمولي والطماطم والبصل الحار. المفروض أن ده طبق مشهيات، لكن إحنا استمتعنا به كطبق رئيسي وما قدرناش نطلب حاجة بعده لأنه كان مليان ويشبع فرد واحد. من منيو الحلويات اللي مليان كيك وآيس كريم كسرنا العادة وطلبنا أم علي (22 جنيه) وكان اختيار موفق جدًا، لأنها كان عليها كمية كاجو وفستق مش طبيعية وغرقانة في اللبن الحلو، ودي بقى مستحيل تخلصها بعد ما تكون واكل أكلة جامدة، فأكيد هـ تأخذها معاك تيك آواي زي ما إحنا عملنا. الشيشة هنا قوية جدًا، مع القعدة على ضفاف البحيرة بقى حاجة ما حصلتش، شيشة Blue Mist اللي بالعنب والنعناع والتوت (26 جنيه) نكهتها خطيرة ومميزة لأنها خاصة بالمكان. منيو الشيشة فيه طرق مختلفة لإعدادها زي ما بـ تتعمل في دول مختلفة، مصر والإمارات والمغرب وأمريكا كمان. يعني اطلب الشيشة بتاعتك حسب بلدك. الخدمة هنا جيدة جدًا، والعاملين ودودين وهـ يبقوا حريصين أنهم يكسبوك كزبون دائم للمكان، لأن زي ما أنتم عارفين اللي بـ يروح أواسيس ممكن يدور على أي قعدة حلوة على البحيرة وخلاص وممكن ما يركزش هو قاعد في أي مطعم أو كافيه. بس زيارتنا لـ «فيج» فعلًا كانت مميزة والتجربة كلها كانت ممتعة، بس نتمنى نيجي المرة الجاية والخلاط شغال.

...

بيتزاريللي: أطباق إيطالية وبيتزا في مصر الجديدة
اصدرت في: 12/06/2012

رغم انتشار المطاعم الإيطالية والعالمية اللي بـ تخصص جزء من المنيو بتاعها للأكلات الإيطالية إلا أننا مقتنعين أن مش أي مطعم يقدم نفسه على أنه إيطالي ويحط البيتزا والباستا ضمن الأكلات في المنيو يبقى مطعم إيطالي بجد ممكن الناس تروح تقعد فيه علشان تحس أنها في روما ولا نابولي وأن الشيف اللي بـ يطبخ جوه إيطالي الجنسية. الهدف من المقدمة دي أننا ننبه الناس لما ييجوا داخلين مطعم المفروض أنه إيطالي صِرف أن توقعاتهم ما تبقاش عالية قوي، لأن كم من الجرائم ترتكب باسم "المطابخ العالمية". بس الحمد لله ده ما كانش الوضع مع المطعم اللي زرناه النهاردة اللي حافظ بقدر الإمكان على "طليانته" وساعده في ده الشيف المصري اللي عاش فترات طويلة في إيطاليا وقرر ينقل خبرته من خلال أطباق وأكلات لذيذة في مطعم إيطالي اسمًا ومضمونًا وهو «بيتزاريللي» الموجود في شارع عثمان بن عفان في ميدان الإسماعيلية في مصر الجديدة. المطعم من الخارج شكله تحفة، لافتات مضيئة باللون الأحمر وإضاءات من اللمبات الشمع كبيرة الحجم على سور خارجي بـ يحيط بالجزء الخارجي من المحل المخصص لقعدة الكافيه والشيشة اللي أضيفت للمكان مؤخرًا، وداخل المحل كانت القعدة مريحة والمساحات معقولة والديكور شيك بألوان البيج والخشبي وفيه في منتصف المكان ثلاجة عرض كبيرة للمشروبات والأكلات الباردة، والترابيزات بأحجام مختلفة، ولاحظنا أن المكان مناسب لجميع أنواع الزبائن، عائلات أو شباب أو حتى للقعدات الرومانسية. أول ما قعدنا نزل أمامنا عيش البروسكيتا ووحدات باتون ساليه وزيتون أسود وأخضر مفروم في زيت الزيتون وده فتح نفسنا فعلاً وبعدها طلبنا شوربة لفتت نظرنا في المنيو وهي شوربة القرع بجوز الهند والكريمة (15 جنيه) وهي شوربة تبدو آسيوية أكثر في مكوناتها لكن طلعت إيطالية صميمة، وكانت لذيذة ودسمة جدًا وفكرتنا شوية بشوربة العدس المصرية بس الفرق أن دي كانت مسكرة شوية. من منيو السلاطات طلبنا سلاطة بطاطس إيطالية بالزبادي والمايونيز (15 جنيه) وكانت معقولة بس ناقصة شوية توابل. وبعد كده دخلنا في الأطباق الرئيسية وكان لازم نجرب البيتزا اللي عرفنا أن كلها حجم واحد كبير يكفي شخصين على الأقل. طلبنا بيتزا فواكة البحر (60 جنيه) وكانت ضخمة فعلاً وكمية الإضافات اللي عليها مهولة، جمبري كبير (بجزء من القشر بتاعه خللي بالك) وكاليماري ومحار وكافيار وطماطم مجففة وموتزاريلا. طعم البيتزا فعلاً مميز مش زي ما بـ تأكلها في أي مطعم أكلات سريعة أو محل بيتزا عادي، هنا فيه صنعة وحرفية ملحوظة. وعجبتنا قوي الطماطم المجففة الموجودة في كل الأطباق هنا تقريبًا والجرسون وعدنا أنه يجيب لنا برطمان صغير فيه طماطم من دي نأخذه وإحنا ماشيين كهدية من المحل. طبق رئيسي ثاني هو السباجيتي كونيل بولو (30 جنيه) بالدجاج المشوي والريجان. المكرونة لونها أخضر تمامًا من الأعشاب اللي عليها، والدجاج والطماطم المجففة طعمهم كويس، مشكلة الطبق ده أن ناقصه كثير من التوابل والبهارات، والمكرونة من غير أي صوص. يمكن هو الطبق كده وإحنا مش متعودين عليه، بس أكيد مش هـ نجرب الطبق ده ثاني. منيو كبير للمشروبات الساخنة والكوكتيلات بأسعار من 10 لـ 20 جنيه، وفيه فروت سلاد بس كحلويات. والشيشة متوفرة بنكهات كثيرة وفيه منيو للأفطار فيه كرواسون وكاروتسا وأروستي وحاجات كثير كده إيطالية مش فاهمين أسماءها بس نقدر نقول أن كلها معجنات لذيذة. وبأسعار من 15 لـ 20 جنيه بس، مع اللاتيه أو الكابوتشينو يبقى أفطار تمام. الخدمة جيدة بس لسه ناقصها شوية خبرة، والأكل بـ يتأخر إلى حد ما، بس الجرسونات ودودين وكسروا حالة الملل بسبب الانتظار. المكان نظيف والحمامات صغيرة بس أنيقة. التجربة كلها كانت شيقة في «بيتزاريللي» اللي في مصر الجديدة، وبـ نتمنى نشوف له فروع ثانية قريب.

...

روما بيتزا تو جو: أحدث مكان لتوصيل البيتزا في القاهرة
اصدرت في: 18/04/2012

واضح أن فكرة أنك تقرر إيه هي أحسن بيتزا في القاهرة ده بقى موضوع صعب جدًا، خاصة مع المطاعم المتميزة اللي بـ تفتح كل يوم. بعد ما اتوهمنا بالبرجر بتاع «بافلو برجر» وكتبنا عنه قبل كده، بـ نتكلم النهاردة عن المطعم الشقيق له المتخصص في البيتزا وهو «روما بيتزا تو جو – Roma Pizza 2 Go» اللي بـ يعمل خدمة توصيل وبس للبيتزا. تقريبًا بـ يوصل لكل مكان في القاهرة، وعلى غير عادة معظم المطاعم ممكن تطلب من هنا بالقطعة مش بالواحدة الكاملة.كان عندنا فضول نعرف كل أنواع البيتزا اللي عندهم وطعمها إيه، فطلبنا شرائح كثير من أنواع مختلفة علشان نتذوق براحتنا. قطعة المارجريتا بـ 13 جنيه وكانت جيدة جدًا، العيش اللي فيها رقيق وطري وبـ يقرمش وما كانتش غرقانة في الجبنة زي أماكن ثانية وعصير الطماطم اللي عليها كان فريش بس كنا نتمنى أنه يكثر شوية. أحبطتنا شوية قطعة البيتزا بالببيروني (18 جنيه) خصوصًا أن كان طعمه أقرب للسلامي العادي، كان سميك جدًا وصعب القضم. نفس الكلام لقطعة الفانـﭼـي (16 جنيه) اللي كانت مليانة زيتون أكثر من المشروم، يعني بقت بيتزا بالزيتون مش بالمشروم. لكن ده ما يمنعش أن طعم المشروم كان باين وكان فريش ولذيذ. قطعة ثانية بالسي فوود (21 جنيه) والمشكلة هنا أن طعم ورائحة السمك ظاهرين بقوة ودي حاجة مش مطلوبة طبعًا، وكان واضح أنهم مستخدمين سمك مجمد من فترة مش فريش كفاية. عليها إضافات كثير من الجمبري والكاليماري لكن تقريبًا ما كانش فيه أي طعم للقطعة. قطعة كمان بطعم الدجاج المقرمش (17 جنيه) كانت مشطشطة بسبب فلفل الهالوبينو اللي عليها، أي حد بـ يحب الأكل سبايسي أكيد هـ يحب البيتزا دي. وعلشان نتم تجربتنا بشكل مثالي طلبنا كمان شريحة بطعم شوكولاتة النوتيلا (12 جنيه) اسمها تشوكو بيتزا، تخيلها شكلها كده: قطعة عجين عليها برطمان شوكولاتة نوتيلا من فوق، لذيذة جدًا رغم سكريتها الزيادة، وخلصناها وإحنا مش مصدقين أننا ممكن نخلصها. ممكن تطلب بيتزا كاملة وفيه أحجام مختلفة زي الوسط والكبير والحجم العائلي. ولأصحاب الريجيم فيه بيتزا دايت اللي بـ تتخبز بالعيش البني بدل العجين الأبيض العادي. ممكن تطلب بيتزا محشوة الأطراف بالجبنة Stuffed Crust وكان نفسنا نجرب صوص المارينارا الموجود في المنيو لكن ما كانش موجود للأسف. صحيح «روما بيتزا تو جو» مش عنده أحسن بيتزا في كايرو، بس بموضوع الدليـﭭري في كل حتة ده وبسرعة التوصيل الملحوظة هـ يبقى من أكثر أماكن البيتزا شعبية في العاصمة.

...

لا تندا: مطعم إيطالي أنيق في مصر الجديدة
اصدرت في: 08/04/2012

لفت نظرنا من مسافة بعيدة وإحنا بـ نتمشى في منطقة أرض الجولف بمصر الجديدة، لافتة كبيرة باللون البرتقالي وواضح عليها الحداثة وهـ تقدر تميزها من بعيد، والاسم سهل وهـ يعلق معاك. «لا تندا» موجود في شارع النزهة عند بداية الكوبري الموجود في الشارع في الناحية المقابلة لمبنى الرقابة الإدارية. لما قربنا من المكان وقررنا نجربه اكتشفنا أنه مش مطعم واحد لكن مطعمين أو بمعنى أصح مطبخين في مكان جلوس واحد مكون من طابقين. المطبخين هم «لا تندا» للأكلات الإيطالية و«التكية» للأكلات المصرية اللي كتبنا عنه من فترة قريبة. من الداخل مافيش فصل في أماكن الجلوس بين المطعمين، لكن لمحنا مطبخين منفصلين على كل واحد منهم لوجو واحد من الاثنين: «لا تندا» و«التكية». المكان في منتهى الأناقة من الداخل –ومن الخارج طبعًا – وأكثر حاجة عجبتنا هي الإضاءة الهادئة والجلوس في الدور العلوي اللي بـ تشوف منه منظر حلو لشارع النزهة. اللون البني مسيطر على الديكور، لكن بـ يكسره الألوان الأبيض والأزرق في مواضع كثيرة، وبشكل عام المكان مريح نفسيًا. طلبنا منيو «لا تندا» اللي فيه كل أنواع الباستا والبيتزا والسلاطات والمقبلات الإيطالية زي فيردي والسيزر وميلانو والشوربات، لكن بالإضافة لكده فيه بعض الأطباق العالمية من فيليه اللحم البقري والدجاج والسي فوود بجانب الأطباق الإيطالية المشهورة. كالعادة بـ نجرب طبق المقبلات اللي على اسم المحل "لا تندا بلاتر" أو طبق لا تندا (50 جنيه) فيه لفائف سمك السلامون المدخن أو خبز البروشيتا المقرمش والكافيار وجمبري بالمايونيز. طبعًا الطبق بـ يقدم بارد، وكمية الكافيار لا تذكر، الجمبري لذيذ والسلامون كمان، لكن رائحته قوية جدًا وصعب تأكله من غير بروشيتا تكسر رائحته النفاذة. البيتزا رائعة عند «لا تندا»، سُمكها وكمية الموتزاريلا وحجمها اللي ممكن يأكل أكثر من فرد. طلبنا بيتزا فيرونا بالدجاج والروست بيف (38 جنيه) وكان عيبها الوحيد طعم شرائح الدجاج اللي عليها لأنها ما كانتش فريش كفاية. لكن في النهاية هي بيتزا إيطالية حقيقية وغنية بالمكونات. من منيو الأطباق طلبنا فيليه ألا فالينسيا (76 جنيه) وهو عبارة عن قطعة لحم بقري كبيرة ملفوفة على خلطة من الخضروات والموتزاريلا والمشروم وكلها بـ تُقدم في طبق التسوية وبـ تبقى لسه بـ تطشطش وهي أمامك على الترابيزة وهـ تشم رائحة الشواء واللحمة وهي لسه بـ تنضج أمامك، إحساس خطير والطعم كمان كان خطير خاصة مع الخلطة المشوية اللي ما شفناش زيها في أي حتة ثانية. الطبق ده بـ يُقدم مع خضار سوتيه واختيارك من الأرز أو البطاطس البيوريه أو المحمرة. أسعار الباستا من 25 لـ 40 جنيه والبيتزا من 30 لـ 50 جنيه وعجبنا من المنيو أطباق كثير زي أسكالوب كوردون بلو (73 جنيه) اللي مش موجود في أي حتة، والدجاج بمكرونة الجورجونزولا (52 جنيه) وطبق الريسوتو Risotto الإيطالي الأصيل بالسمك وجبن البارميزان (55 جنيه). مافيش منيو للحلويات داخل المطعم، الحلويات موجودة في منيو التيك آواي بس، لكن عرفنا وقت زيارتنا أن مافيش غير نوع أو اثنين بس من الحلويات الخاصة بـ «لا تندا» وباقي الحلويات هي الشرقية اللي خاصة بـ «التكية». لكن الحقيقة ما كانش فيه مكان لأي أكل بعد الوجبة المحترمة دي، وطلبنا الحساب ومشينا مبسوطين من التجربة. الخدمة ممتازة وسريعة وبمجرد ما قعدنا نزل أمامنا دورق صغيرمن الكركديه المثلج كمجاملة من المكان، والجرسون قدر يجاوب على كل استفساراتنا بخصوص الأطباق، ورشح لنا كمان أطباق بعينها وكانت اختيارات في الجول. «لا تندا» إضافة جديدة مهمة للمطاعم الإيطالية في مصر الجديدة.

...

مركاتو ايطاليانو: أكل إيطالي أصلي في سيتي ستارز
اصدرت في: 13/06/2011

أكل إيطالي يعنى بيتزا وباستا، ولو متابع هـ تقول لازانيا وكالزوني وكانيلوني، مش كل مطعم بـ يقول على نفسه إيطالي هـ تلاقي عنده كل الحاجات دي، بس المطعم اللي فعلاً عنده كل ده وأكتر هو السوق الإيطالي أو «مركاتو ايطاليانو Mercato Italiano -». ليه فروع في مدينة الرحاب والجامعة الأمريكية في التجمع الخامس وسان ستيفانو في الأسكندرية والفرع اللي جربناه كان في سيتي ستارز في مصر الجديدة. في ساحة الأكل في الدور الرابع في المرحلة الأولى في صالة المطاعم «زودياكZodiac - »، بين محلين «مان تشو واك – Manchow Wok» للأكل الصيني و«هارديز – Hardee’s». المحل زي كل المحلات في الفوود كورت (food court) أو ساحة المطاعم دي، عبارة عن كاونتر طويل والكاشير في أوله والأكل يا إما تيك آواي أو بتاخد الأكل وتاكل على الترابيزات اللي في الفوود كورت. الفرق بين ميركاتو ومحلات تانية إنك بـ تكون شايف كل الأكل قدام عينيك من ورا الإزاز على الكاونتر، كل المنيو تقريبا قدامك خاصة أنه محدد ومش كبير قوي. المنيو الموجود على خلفية المحل متقسم لـ (بيتزا – باستا – هاوس سبيشيال – سلاطات)، البيتزا هناك بالقطعة مش بالواحدة، وممكن تسأل مسؤول البيع عن مكونات أي حاجة هـ يشرحلك بالظبط. البيتزا اللي إخترناها كانت من أكتر الحاجات المميزة للمكان، وهي بيتزا «آلا مركاتو» المحشوة والشريحة كانت بـ 19 جنيه، وكانت شكل الفطيرة وشها مش عليه أي حاجة وكانت محشية بالبيبروني والسوسيس والمشروم والفلفل الرومي والموزاريلا وطعمها كان حلو بس ناقصة شوية توابل والقطعة الواحدة ممكن تشبَّع لو كنت مش جعان قوي،ولو أكتر من شخص هـ ياكل ممكن باخدوا الحجم المتوسطة وده بـ يكفي 3 أشخاص و عبارة عن نصف بيتزا وبـ50 جنيه والكاملة بـ تكفي 6 أشخاص وبـ 70 جنيه. وفي أنواع البيتزا المعروفة كلها في المنيو طبعاً. طلبنا كمان الأكلة اللي سموها الـ«سترومبولي» (على إسم بركان في إيطاليا) ودي معجنات شبه الكرواسان محشية قطع فراخ وجبنة سايحة وبروكلي (20 جنيه) ولما بـ تطلبها بـ تتسخن في الميكروويـف وكانت لذيذة برضه بس نفس مشكلة التوابل أو تحس أن فيه طعم ناقص والعجين فيها أكتر من اللازم، بس في النهاية هـ تحب طعمها عشان المكونات الطازة بتاعتها وحجمها الكبير. في منيو الأكلات الخاصة جربنا فراخ الـ «بارميـﭼان» ودي فيليه فراخ مقلي بانيه بالأعشاب والتوابل ودي كانت أجمل حاجة في اليوم، ممكن تاخد مع الفراخ رز أصفر بالخضروات والمشروم أو سباجيتي أو الـﭘنا بالخضروات وكلها إختيارات لذيذة وبـ تتعمل بحرفنة وتتبيلتها خطيرة. في منيو الأكلات الخاصة كمان فيه فراخ «ﭭيسوﭭيو» (على اسم بركان برضه) بصوص المشروم والجبنة، وسمك فيليه وبيكاتا. ومن الحاجات المميزة لـ«مركاتو» برضه كرات اللحم أو الـ«Meatballs» بصوص الطماطم اللي مشهور بيه المطعم أن كله عصير طماطم طبيعي مش صلصة معلبة، وهـ تحس قد إيه الأكل فريش وهـ تلاحظ الفرق بينه وبين المطاعم التانية. منيو السلاطات فيه كول سلو وسلاطة فواكه وسلاطة تونة وسلطة يوناني وسلطة سيزر الفراخ وعملنا طبق مشكل فيه كل حاجة (22 جنيه) وكان مثالي وحسينا بطعم كل حاجة لوحدها في الطبق رغم اللخبطة اللي فيه، ننصحك ماتاكلش هناك من غير ماتجيب أي سلاطة عشان تطري الأكل شوية بالذات مع كمية المعجنات دي. الخدمة كويسة جداً وسريعة والموظفين واقفين مركزين مع كل الزباين، وطريقة الخدمة عملية بإنك بـ تعمل أطباقك زي البوفيه المفتوح وتوصل للكاشير وتدفع مرة واحدة. لو انت في «سيتي ستارز – City Stars» ونفسك في أكل إيطالي ماتفكرش كتير وإطلع على «مركاتو ايطاليانو» على طول، ويبقى حظك حلو لو لقيت ترابيزة فاضية قدامه عشان ممكن تقوم كل شوية تزود حاجة على الوجبة اللي قدامك.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن