مشويات مطاعم in مصر الجديدة Cairo, Egypt

مطاعم

شيش كباب عادل: الطعم الأصلي للسجق والكفتة  في مصر الجديدة
اصدرت في: 18/03/2013

شيش كباب عادل، أو عادل ملك الساندويتشات؛ من علامات مصر الجديدة، فاتح من سنة 1959، يعني تاريخ بجد، عرفنا أن آبائنا كانوا بـ يأكلوا من عنده من حوالي 45 سنة، وهو هو نفس الأكل تقريبًا، ساندويتشات الكباب والكبدة والسجق الشرقي والسجق الاسكندراني وشاورما اللحم والكفتة المفرومة. هو فعلًا كان عنده شيش كباب وشواية للكفتة، لكن مؤخرًا اكتفى باللحوم اللي بـ تتعمل على الجريل ولغى موضوع الشواية ده لأسباب أمنية! أصل موقع المحل مش طبيعي وأكيد الظروف المحيطة به مش طبيعية. «شيش كباب عادل» في مواجهة البوابة الرئيسية لقصر الإتحادية، نعتقد كدة السبب مفهوم. ومن بداية المظاهرات والاشتباكات عند القصر وهو بـ يفتح يوم أه وعشرة لأ، وكل ما الأمور تهدأ يبدأ يسترجع نشاطه بقوة ويستعيد أمجاده القديمة لكن بسرعة يحصل قلق ويبقى العمال مش عارفين يقفلوا المحل علشان الشواية اللي برة والكراسي والترابيزات، الله يكون في عونهم بصراحة. المهم أن موقع المحل "إللي كان مثالي في وقت من الأوقات" من أهم علامات تميزه، وأهل مصر الجديدة القدامى عارفين قيمة الساندويتش بتاعه، وفيه ناس بـ تجيله من آخر الدنيا.تقريبًا «ملك الساندويتشات» بـ يقدم أغلى ساندويتش رخيص لو جاز لنا التعبير، يعني الرغيف الفينو "الباتي بان" الصغير قوي فيه شوية حشو صغيرين من الكبدة أو السجق أو الكفتة المفرومة بـ يبقى بـ 4 أو 5 جنيه. يعني علشان تأكل وتشبع هـ تتطلب 4 ساندويتشات على الأقل، يعني 20 جنيه. كدة بقى إحنا خرجنا من منطقة الأكل الشعبي الرخيص اللي تأكله آخر الشهر وأنت مش معاك فلوس. بس الطعم والنظافة يستاهلوا، صحيح ما حسيناش بحاجة فريدة في طعم السجق البلدي والكفتة المفرومة، لكن حسينا بخبرة السنين الطويلة، ومذاق يوحي بالثقة "مش عارفين حسيناها إزاي دي" بس ثقة الويتر اللي هو نفسه الشيف اللي بـ يعمل الساندويتشات، اللي فهمنا من كلامه أنه صاحب المحل كمان، الثقة اللي بـ يتعامل بها والألاطة أحيانًا كان لها أثر قوي علينا وإحنا بـ ننأنا في الوجبات والساندويتشات اللي طلبناها وحسينا أنها أحسن ساندويتشات في الدنيا، مع أن أكيد فيه أحسن، بس الإيحاء كان أقوى من أي منطق وبدأنا نزود في الأوردر بتاعنا لحد ما جربنا كل الساندويتشات اللي في المحل تقريبًا. بس فاهيتا الدجاج كانت اختراع بجد، وماكانش إيحاء ولا حاجة، كانت حلو وفيها خلطة خطيرة خاصة بالمحل. الخيار المخلل هنا حكاية ممكن تأكله حاف، بس للأسف وقت زيارتنا ماكانش فيه كبدة اسكندراني، فأكتفينا بالسجق الشرقي "بالخلطة السرية" والسجق الاسكندراني والكفتة والشاورما. كله حلو وفي منتهى النظافة، ودي حاجة في حد ذاتها تستاهل الأسعار الغالية اللي اتكلمنا عليها. شيش كباب عادل أو ملك الساندويتشات لسة له رونقه وشخصيته المميزة، وهـ تحب قعدته وأكله لو تغاضيت عن شوية التناكة اللي في معاملة أصحاب المكان، الأصالة لها ثمن برضه.

...

كيلو كباب: مشويات مصرية على الفحم في سيتي ستارز
اصدرت في: 25/02/2013

كان أول مرة نشوفه في مول العرب في مدينة 6 أكتوبر، في ساحة الطعام اللي هناك ممكن ما تأخذش بالك منه وسط العدد المهول من المطاعم اللي حوله، لكن لما فتح في الفوود الكورت اللي في الدور الأرضي في سيتي ستارز واللي مساحته صغيرة بالمقارنة بمول العرب ومع وجوده في موقع مميز جنب مطعم «جبل لبنان» أصبح من السهل أنك تشوف مطعم «كيلو كباب» باللوجو المميز اللي عبارة عن خروف بلدي أصيل بقرون كبيرة بالألوان الأبيض والأسود"الحقيقة شكل اللوجو عاجبنا جدًا". المحل زي ما قلنا في موقع متميز في الفوود كورت الجديد في سيتي ستارز ولاحظنا وإحنا داخلين المرة دي أن معظم الناس اللي قاعدة وبـ تأكل في جميع أنحاءه كانت بـ تأكل كباب وكفتة وريش على عكس المعتاد في ساحات الطعام من ساندويتشات وبيتزا وأكلات صينية سريعة، يعني نقدر نقول أن «كيلو كباب» عمل نقلة نوعية في الذوق العام لرواد المولات وخلاهم يدوسوا في أكل مصري دسم وثقيل وسط جولات التسوق اللي بـ تتطلب وجبات خفيفة وسريعة. بس المفاجأة بعد ما جربناه لقينا أن أكلاته فعلًا خفيفة وسريعة، ومش غالية كمان، وعلشان يكتسب صفة الأكلات السريعة المميزة لمحلات الفوود كورت أضاف للمنيو نوعين من الساندويتشات الملفوفة محشوة بالكفتة والدجاج المشوي بسعر 13 جنيه. لكن المميز في «كيلو كباب» أنه فعلًا بـ يبيع بالكيلو، كفتة وكباب وريش ودجاج تندوري وشيش طاووق، الكيلو المشكل بـ 150 جنيه، ولو عاوز كيلو كباب وكفتة وريش بدل الدجاج هـ يبقى بـ 160 جنيه، وممكن تجيب 300 جرام اللي هو أقل من الـ 2/1 كيلو بشوية بسعر 50 جنيه، وفيه وجبات دجاج تندوري على الطريقة الهندية بسعر 30 جنيه وفيها نصف دجاجة مقطعة 6 قطع ومشوية بالصوص الأحمر التتبيلة الخطيرة. وكل طلب بـ تطلبه سواء قُدم على صينية لو هـ تأكل في المكان أو تيك آواي بـ يكون معاه كمية وفيرة جدًا من السلاطات: طماطم مخللة وزبادي وطحينة وخيار مخلل، صحيح علب صغيرة بس كثير وممكن تطلب زيادة بدون ما تدفع زيادة. جربنا الطبق المشكل اللي فيه كباب وكفتة وريش وشيش طاووق (نصف كيلو بـ 75 جنيه) وكميته معقولة جدًا لفرد واحد، أو فردين مش جعانين قوي، لكن المهم أن الطعم كان خيالي، خليط عجيب بين أصالة محلات الكباب العريقة وبين أكل المولات السريع الخفيف. شوفنا بعيوننا الشيفات وهم بـ يحطوا الأسياخ على الفحم وبـ يشووا اللحم ولا الرفاعي بتاع السيدة زينب، وأكلنا أحلى ريش ضاني مشوية ومقطعة بأحجام صغيرة ومستوية كويس قوي وبدون أي دهون مالهاش لازمة. نفس الكلام على الكفتة والكباب اللي عليهم صوص أحمر عجيب خاص بمحلات «كيلو كباب» أو خلطة سحرية ثانية علشان تخليك ترجع للمحل ثاني وثالث. وجبة الدجاج التندوري كانت خفيفة ولذيذة بس دي تطلبها برضه لو كنت مش جعان قوي، لأن القطع صغيرة. عصير ليمون كيلو كباب (8 جنيه) هو العصير الوحيد في منيو المحل بجانب المشروبات الغازية، بس مش أي ليمون بقى، ليمون مثلج وسكره مضبوط في كوب بلاستيك عملاق، فكرة عبقرية من المحل للترويج لمشروب بعينه بعد وجبة الكباب المتينة، "الليمون المثلج".. نعتقد الناس ممكن تيجي مخصوص محل «كيلو كباب» علشان تشرب الليمون ده.بعد ما استمتعنا بوجبتنا في «كيلو كباب» أكيد بـ نرشحه لكم بقوة، وهو بالفعل بقى على قائمة المفضلين بالنسبة لنا ضمن مجموعة مطاعم الفوود كورت في سيتي ستارز، ونتمنى نشوف له فرع كبير فيه صالة طعام خاصة خارج أبواب المولات.

...

مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح