مدينة نصر مطاعم in Cairo, Egypt

مطاعم

أنس الدمشقي: مطعم أكل سوري مميز في مدينة نصر
اصدرت في: 19/05/2016

حالة التزايد الكبير والمستمر للمطاعم اللي بتقدم أكل سوري وصلت لمعدلات مش طبيعية! والزحمة اللي بقت موجودة في المساحة دي خلت مفهومنا حتى عن المطعم السوري اتغيرت، وخلتنا بقينا نفكر ألف مرة قبل ما ندخل أي مطعم بيقول على نفسه سوري لحد ما نتأكد أننا فعلًا هنعدي بتجربة مميزة وأكل مختلف في طريقة العمل والمكونات وطريقة التقديم وكل حاجة، مش مجرد اختلاف أسماء وشوية شكليات! "أنس الدمشقي" من المطاعم القليلة جدًا اللي قادرة تحافظ على سمعتها الجيدة كمطعم بيقدم أكل سوري بجودة مقبولة جدًا جدًا.. ولما رحنا في زيارتنا الأخيرة كنا مشحونين سلبيًا تجاه المطاعم السورية شوية للسبب اللي قلناه، وبالتالي ما كانش هيبقى لطيف خالص أن المطعم كمان يكمل علينا ويخيب آمالنا.. كالعادة أول ما وصلنا حطينا اسمنا في الويتينج ليست لأن صالتين المطعم ضيقين جدًا وسعتهم محدودة وحتى الترابيزات المتاحة برة قدام المكان مش كتير خالص، وبالتالي فغالبًا أول ما بتروح لازم هتضطر تقف شوية لأن ضغط الزوار على المكان أكبر بكتير من سعته.. بعد حوالي ربع ساعة جه دورنا ودخلنا قعدنا في واحدة من القاعتين بتوع المطعم، وعلشان نعرف نقيم تقييم كويس قلنا نحط في بالنا أنه الطبق الرئيسي يكون منوع قدر الإمكان، والمنيو ما خلاناش نحتار كتير الحقيقة لأنه وجبة "أنس" (40 جنيه) هي وجبة مشكلة، شاورما فراخ مع كبيبة مع تشيكن كريسبي مع شيش فراخ مع الرز والتومية والعيش والمخللات، وطلبنا معاهم منقوشة لبنة وزعتر (11 جنيه)، وطلبنا من قائمة المقبلات صنف من الأصناف الجديدة في المنيو وهي سلطة الذرة (12 جنيه). وصل أول طبق بعد خمس دقايق بس تقريبًا! لكن المفاجأة أنه ما كانش طبق المقبلات، لأ كان الطبق الرئيسي! الوجبة، والمنقوشة.. ما علينا.. المنقوشة كانت عجينتها طرية ولذيذة وكانت مقدمة سخنة وريحتها طالعة لكن لونها ما كانش محمر أوي زي العادة فتحس لأول وهلة أنها مش مستوية كويس، وطعم الجبنة بالزعتر كان حلو جدًا والأحلى أن الحشو كان مالي المنقوشة فالطعم فضل موجود لحد آخر قضمة.. أما بالنسبة لعينات اللحوم المختلفة في وجبة أنس فجميعها تقريبًا كان بيتشارك في شيء واحد: مستوي كويس، والتحضير جيد جدًا والطعم ممتاز، لكن ماكانش سخن بالدرجة الكافية فكنا حاسين أننا بناكل شيء بايت ويادوب متسخن عالسريع كده علشان يتقدم! نيجي بقى لسلطة الذرة اللي وصلت متأخرة عن الأكل بحوالي عشر دقايق، وفي الواقع كانت هي أجمل وأطعم شيء نزل على الترابيزة! السلطة عبارة عن ذرة مسلوقة نص نص، وعليها صوص مايونيز خفيف، ومن فوق متغطية بشرائح جبنة شيدر طرية رفيعة، وعلى الوش رشة ورق نعناع عملت ريحة وطعم حلوين جدًا جدًا للطبق، والحقيقة أن الطبق على بساطته كان مميز جدًا لأنك تحس أن كل حاجة فيه متحضرة صح ومحطوطة بنسبتها المضبوطة. في نهاية زيارتنا بصينا على قائمة الحلو لاقيناها كلها عبارة عن معجنات بتتحضر بنفس الشكل لكن بتختلف بس في الحشو، طلبنا يكون الحشو نوتيللا بالقرفة (10 جنيه)، ووصلت بعد حوالي خمس دقائق. العجينة كانت نفس عجينة المنقوشة تقريبًا لكن الاختلاف أنها كانت سخنة أكتر ومحمرة أكتر ومقرمشة شوية من الأطراف، والحشو برضه كان ماليها وبالتالي الاستمتاع كان مضمون للآخر. في النهاية نقدر نقول أن المكان كان مرضي جدًا جدًا لينا وانبسطنا من طريقة تحضير الأكل وتقديمه والخدمة كانت جيدة جدًا مع الأخذ في الاعتبار الكم ملحوظة اللي قلناهم في أثناء المقال.

...

كلاسيك روك كوفي كو: كافيه أمريكاني مستخبي في سيتي ستارز
اصدرت في: 18/05/2016

مكملين معاكم جولتنا المثيرة وسط مطاعم القاهرة، وصحيح في مطاعم محلية بتحاول تنافس بأفكار جديدة، كل يوم بنشوف ظهور قوي لسلاسل عالمية بتدخل على الساحة وتغير من خريطة مطاعم القاهرة. من الأماكن دي كلاسيك روك كافيه كو، وهو كافيه أمريكاني موجود داخل مطعم اسمه "الجراج" في سيتي ستارز. زي ما قولنا، كلاسيك روك كوفي كو بيشترك في المكان مع مطعم الجراج جنب مكتب حجز تذاكر سينما سيتي ستارز في الدور الخامس، وشكل الديكورات هناك يغلب عليه صور الدراجات، مرسومة بالجرافيتي على الحيطان، وأول لما تدخل بتقابلك دراجة حقيقية عند المدخل، أما الموسيقى فكانت روك هادئة، والمنيوهات مرسوم فيها صور للجيتار. طبعًا أنتم عارفينا كويس، لازم نستكشف المكانين ونشوف بيقدموا إيه، وعلشان كده قررنا نطلب الأكل من الجراج ونجرب مشروبات كلاسيك روك أند كو. بعد جولة استكشافية في منيو الجراج، اللي تشكيلة أطباقها من مطابخ عالمية زي البرجر والبيتزا وأكل صيني وإيطالي، حسينا بخوف شوية لأن المطعم مش متخصص في نوع معين من الأكل، فقررنا نخلي الموضوع بسيط ونفتح شهيتنا بنينجا فينجرز (39 جنيه) وبالنسبة للأطباق الرئيسية طلبنا جراج برجر (39 جنيه) ورويال ستار برجر (39 جنيه) ومعاه كوكتيل بطاطس الجراج (19 جنيه لكل طبق). النينجا فينجرز عبارة عن أربع قطع ستربس فراخ مقلية وطرية مقرمشة ولذيذة من بره، لكن أول ما تدخل على الفراخ نفسها فالطبقة المقرمشة بتتكسر وكمان بتقع من على الفراخ لو فكرت تغمسها في صوص الهاني ماسطرد. شوية صغيرين ووصل البرجر والبطاطس. كوكتيل البطاطس كان عبارة عن طبق بطاطس صغير، تقدر تقول أنه طبق تشيلي تشيز فرايز، متغطية بالجبنة مع كمية قليلة جدًا من اللحم المفروم، والحقيقة إننا ماشوفناش الفاصوليا الحمراء كأن الشيف مش عايزنا نجربها. الطبق عمومًا كان عادي جدًا. طعم الجراج برجر المكون من قطعة برجر كبيرة محشية جبنة موتزاريلا وعليها خس وطماطم ومخلل وصوص مخصوص على حسب كلام المنيو ماكانش لطيف، ومافيش أصلًا أي وجود للموتزاريلا، وحتى العيش كان عادي جدًا. أما الرويال ستار برجر فكان عبارة عن قطعتين برجر ومعاهم نفس إضافات الجراج برجر وطلبنا منهم يضيفوا بيف بيكون علشان يعمل طعم مميز للساندويتش. المشكلة أن طعم البرجر كان سيء زي اللي فات بالضبط ومافيش حاجة ممكن تصلحه. لحسن حظنا وصل الميلك شيك من كلاسيك روك كوفي كو علشان يلحقنا. الشوكولاتة بزبدة الفول السوداني (26 جنيه) كان لوحة فنية بصراحة، والطعم الجميل لبولة الآيس كريم شوكولاتة مع نكهة زبدة الفول السوداني اللذيذة عملوا تركيبة خرافية مالهاش حل. نروح على Purple People Eater (26 جنيه) المنعش خصوصًا مع الطعم اللاذع المميز للبلو بيري مع الموز اللي عملوا طعم رائع للعصير. خلصت الحكاية مع Full Tank of Sundae (36 جنيه)، وهو عبارة عن ثلاث بولات آيس كريم فانيليا وشوكولاتة وفراولة كانوا هايلين رغم أنهم وصلوا من غير صوص الشوكولاتة/الكراميل اللي قالوا عليه في المنيو. عمومًا، تجربتنا مع ساندويتشات برجر الجراج كانت سيئة، والمكان من وجهة نظرنا محتاج وقت علشان يرفع من جودة أطباقه ويحددوا شكل معين للمكان. لو بعدنا عن روعة الميلك شيك والحلويات عند كلاسيك روك كوفي كو – وهي السبب الحقيقي لزيارتنا – نقدر نقول أنهم قدموا نكهات مميزة قدرت تنقذ يومنا هناك وأكيد هنرجع لهم في زيارة ثانية قريب.

...

سيتي كريب: ملك الكريب في مدينة نصر
اصدرت في: 05/04/2016

مش كل حاجة مشهورة لازم تكون كويسة، خلال جولاتنا في مطاعم وكافيهات القاهرة، لاقينا أن ممكن يكون أحسن واحد بتاع سمك (زي ما بـ يقولوا) يطلع مش أحسن حد، نروح لأحسن واحد بيخترع بيتزا وفطائر يطلع برضه فاكس، علشان كده بقينا نقلق من أي مكان مبالغ في شهرته لأن للأسف الإحباط بيكون كبير. ليه تأخذ من وقتك وحياتك 90 دقيقة قاعد في البيت أو على القهوة بتتفرج على ماتش؟ ده اللي فكرنا فيه يوم ماتش الكلاسيكو (برشلونة وريال مدريد) وبالرغم من أننا لاعيبة كورة جامدين جدًا ومشجعين برضه بس كنا زهقانين من جو ماتشات الكورة والحماس والتشجيع، قولنا ننزل نتمشى شوية في مدينة نصر (اللي كانت متربسة زحمة عربيات) بس كانت رايقة جدًا من الناس (لأن كلهم بيتفرجوا على الماتش). رجلنا أخذتنا على شارع مكرم عبيد اللي مليان محلات أكل صحيح مش كثير لكنها متنوعة، إزاي نكون هنا وما نعديش على أكثر واحد مشهور في المنطقة، اللي سمعنا عنه أساطير وأنه ملك الكريب والزحمة عنده طوابير وبتاع، طيب يالا بينا! في شارع متفرع من مكرم عبيد في نهايته هتلاقوا محل سيتي كريب، محل بسيط جدًا عبارة عن حوالي 10 عيون (ماكنة عم الكريب) وترابيزات لعمل الكريب، ووراهم مطبخ فيه المكونات اللي بتُضاف على الكريب، صحيح أن شكل المحل بسيط وممكن ما يكونش شيك وخالي من البهرجة والديكورات الحديثة، إلا أن زي ما شوفنا نظيف جدًا، خصوصًا في أماكن تجهيز الكريب، كل واحد بيشتغل هناك لابس جوانتي وفي منتهى النظافة، فيه صالة للعائلات موجودة جنب محل الـ Take Away، تأثير الماتش الحمد لله كان ظاهر في الإقبال على المحل والحمد لله كان فيه 11 واحد منتظرين الطلبات بتاعتهم قبلنا. بصينا في المنيو الظريفة اللي عبارة عن ورقة واحدة من وجهين، فيها كل أنواع الكريب اللي بيقدمها حلو وحادق وفيها كمان كل فروع سيتي كريب بأرقام التليفونات. فيه تقسيمات ظريفة قوي في المنيو زي (كريب على كيف كيفك) و(الميكس) و(اكسترا) و(كريب الطاقة) وجواها حاجات مليانة اختراعات وانبهارات وهجوم نووي شامل على أصحاب النفوس الضعيفة اللي في دايت أو بيجهزوا علشان فورمة الساحل، طلبنا كريب الوحش سادة (18 جنيه) وده عبارة عن فراخ بانيه وفراخ كرسبي وفراخ كاتيوشة (مشطشطة شوية) وهوت دوج كمان، طلبنا ميكس جبنة (14 جنيه) ده عبارة عن مجموعة من الجبن الموجودة (شيدر – فلامنك – موتزاريلا – رومي) ومن الحلو كريب نوتيلا سادة (11 جنيه). حوالي 10 دقائق وكان حد بينادي على رقم الطلب بتاعنا وأسئلة زي (كاتشب ومايونيز؟ سبايسي ولا عادي؟) وبدأ التجهيز للكريب، المكونات بـ تيجي من جوة من المطبخ في طبق وبعدها بتترص على الكريب ويبدأ التكوين، لازم تكونوا واقفين قريب علشان لو عاوزين تضيفوا حاجة زي شطة زيادة مايونيز كاتشب زيادة. أول كريب خرج كان ميكس الجبن، بقالنا كثير ماكناش أكلنا جبنة من اللي بتشد زي إعلانات البيتزا في التسعينات، عجينة الكريب رائعة مش معجنة ولا ناشفة مظبوطة بالمللي، الجبنة كانت عاملة خلطة كده مافيهاش إلا سعادة وطعم حلو كده في قلب بعضه مع الكاتشب والمايونيز، الكريب حجمه كبير لدرجة أنه يكفي 3 أشخاص، بعدها وصل الوحش وهو وحش فعلًا! والحمد لله أننا ما طلبناش الصاروخ (23 جنيه) ولا حبيشة (27 جنيه) كنا هنتعب جامد، ميكس الفراخ البانيه بأنواعها سواء كانت العادية أو المقرمشة أو المشطشطة مع شوية الموتزاريلا مع البهارات وشوية شطة خفيفة كده يخلوكم مبسوطين ومفيش إحساس بالذنب خالص لو متابعين الدايت أو Plant Based، كل ده بينهار مع أول قطمة. كريب النوتيلا، يمكن من الأماكن القليلة جدًا اللي شوفناها بتحط نوتيلا (حقيقية) في أكلها، بالرغم أن فيه محلات بالاسم كبيرة وبتستخدم أنواع مقلدة من النوتيلا وللأسف ما يعرفوش أن أي واحد هيعرف الفرق وبكل سهولة، الكريب رائع وكمية النوتيلا كثيرة و (بتبظ) من كل حتة ورائعة. خلاص كفاية كده.. كفاية كده، كان نفسنا نأكل ثاني بس خلاص مافيش مكان وكنا محتاجين نتمشى شوية علشان نأخذ هدنة من الحرب اللي بدأناها على معدتنا، سيتي كريب فعلًا من أحسن الأماكن اللي بتعمل كريب في القاهرة ويستحق الشهرة اللي واخدها، بمكونات نظيفة وعجين مضبوط وتسوية مضبوطة وتعامل ظريف من الشباب اللي شغالين هناك. الماتش كان بدأ يخلص وبدأنا نشوف بدايات زحام من اللي كانوا بيقولوا عليها جاية على المحل، بس الحمد لله كنا أكلنا وانبسطنا وخلاص ماشيين.

...

كاستن: مطعم سمك عادي وغالي في مدينة نصر
اصدرت في: 29/03/2016

أيام نهايات الأسبوع بقيت تعدي من هنا وتروح من هنا ولا تحسوا بها والوقت فيها بيطير بطريقة مش طبيعية، بقى لنا فترة بنسافر بره القاهرة نغير جو ونفصل شوية من الزحمة والزهق، الأسبوع ده قولنا نرتاح شوية وننزل نغير جو في القاهرة. بقى لنا كتير ما أكلناش سمك بره البيت، وإحنا بنقلب في اليوتيوب شوفنا حلقة من برنامج صاحبة السعادة للفنانة إسعاد يونس وحلقتها مع صاحب سلسلة محلات "كاستن" وفزاع، شكل الأكل وكلام أصحابنا في بورسعيد عنه خلانا متحمسين لأكلة سمك شكلها هتكون أسطورية، روحنا على فرع مدينة نصر في شارع أبو داوود الظاهري، كان وقتها مباراة مصر ونيجيريا في تصفيات كأس أمم أفريقيا، شكلنا هننبسط بالسمك والماتش. كنا محظوظين ولاقينا ركنة أمام المطعم على طول وفيه عامل تبع المطعم بيساعد الناس في الركنات، شكل المطعم ظاهر قوي ومميز باليافطة الخضراء الكبيرة وعليها اللوجو والاسم، الديكور بسيط وتقليدي، نفس شكل مطاعم السمك في إسكندرية وبورسعيد، المفروض أنه مكيف (ده ما كانش مشكلة، لكن مع حرارة الأكل والسمك التكييف بيكون ضروري أوي). فضلنا قاعدين شوية كويسين كده ما حدش جاب منيو ولا عارفين أي حاجة، بعد كده قومنا علشان نختار السمك، اختارنا 4 سمكات دنيس مقلي بالطريقة البورسعيدية (الكيلو 120 جنيه)، وسمكتين وقار سنجاري (الكيلو 150 جنيه) وسمكة وقار مشوي ردة (الكيلو 150 جنيه)، وكيلو جمبري مقلي (الكيلو 140 جنيه)، واختارنا شوربة فواكة البحر مخلية (35 جنيه) وواحد أرز بالجمبري (15 جنيه) وسلاطات (7 جنيه) تشمل بابا غنوج وطحينة وبطاطس مهروسة وطماطم مخللة. "هو أنتم ماعندكمش منيو؟".. سؤال لما حسينا أن الموضوع ماشي طبيعي وما حدش بيحاول يساعدنا أو يفيدنا بأي حاجة، "لو سمحت ممكن منيو" السؤال ده تكرر ثلاث مرات وأخيرًا المنيو وصلت، اللي فهمنا ليه ما حدش بيطلبها، منيو مالهاش لازمة مافيهاش أي حاجة لأنه مطعم سمك تقليدي ما عندوش اختراعات، بعد ما كنا اختارنا بالحس السمكي من غير منيو، زودنا على الطلب (استعانة بالمنيو) طبق "حنشان مشوي على الفحم" (الكيلو 180 جنيه) الحنشان هي ثعبان البحر أو الـ Eel. النتيجة صفر، صفر والدقيقة 38 فى الماتش وإحنا جعانين ومافيش حاجة وصلت، في نهاية الشوط وبدأ الستوديو التحليلي للماتش وبدأت تهل علينا السلاطات والعيش والشامي الطازة اللي كان طعمه حلو أوي. وصلت الشوربة اللي كانت ظريفة، قوامها خفيف وفيها قطع من السمك الفيليه والجمبري والسبيط المخلي، وصل السمك الدنيس ومعاه طبق الأرز اللي كان مليان وعليه قطع من الجمبري، تسوية الدنيس كانت حلوة والسمك كان مقرمش والتتبيلة بتاعته حلوة، أما الأرز كان عادي ما كناش شايفين فيه أي جديد غير اللون بس والجمبري اللي عليه ما كناش فاهمين هو مسلوق ولا مقلي ولا إيه. بعدها وصل السمك المشوي السنجاري، كان رائع تتبيلته قوية وطعمه رائع وده كان نفس الحال للمشوي ردة اللي كان برضه رائع وخفيف والسمك نفسه كان طري ومتسوي حلو أوي، الجمبري المقلي كان بقشره، مقرمش وطعم التتبيلة قوية وهايل، بس القشر بصراحة كان أكثر شوية صغيرة من الجمبري نفسه. بعد ما خلصنا الأكلة دي، طلبنا ليمون بالنعناع (10 جنيه) وده كان رائع، فريش وسكره مضبوط، كنا 4 أفراد دفعنا حوالي 1200 جنيه، لكن للأسف كنا ممكن ندفع أقل من كده بكثير وننبسط أكثر بجودة أكل واختراعات جديدة. رأينا أن كاستن محل سمك تقليدي لكنه كعادة أغلب الأماكن في مصر شهرة على الفاضي وبالتالي أسعاره غالية بناء على أنه من أحسن محلات السمك في مصر.

...

بلتازار: مطعم بـ يثبت أن الأكل في مول مش لازم يكون سيء في سيتي ستارز
اصدرت في: 22/02/2016

المول مش دايمًا المكان المفضل للأكل عند معظم الناس، لكن فيه مطاعم كبيرة استقرت في مولات زي سيتي ستارز في هليوبوليس، وإحنا بدورنا قررنا نطلع زيارة لمطعم بلتازار – Baltazar. بلتازار موجود أمام السينما في الدور الأرضي جنب موري سوشي – Mori Sushi وتمارا - Tamara وجابيز – Gaby's، لكنه يتميز بشكله وتصميماته المطرقعة، المكان متوازن بين الطابع الكاجوال والفخم، بحوائط على شكل مربعات بالأسود والأبيض وأرضيات خشب بألوان خفيفة، المهم، وصلنا ترابيزتنا الموجودة في الدور الثاني من المطعم بتصميمه الشبيه ببلكونة بـ تسمح لك تتفرج على الناس في المول. بدأنا رحلتنا مع طبق مقبلات مميز وهو بلتازار فرايد بولز Baltazar Fried Balls بـ (30 جنيه) أو كرات بلتازار المقلية، أما بالنسبة للأطباق الرئيسية طلبنا وايلد بيف فيليه مع باستا بنّا فواجرا (175 جنيه) وبيف فيليه معاه بطاطس محمرة وبطاطس مهروسة وصوص مشروم (130 جنيه)، كرات بلتازار المقلية كانت عبارة عن خمس كرات من البطاطس المهروسة المحمرة محشية جبنة، وسطحها الخارجي كان مقرمش ومن جوه خلطة البطاطس مع الجبنة كانت هايلة؛ أكيد فتحنا نفسكم، صح؟ نروح على الأطباق الرئيسية –اللي وصلت بعد وقت طويل شوية– والبداية كانت مع الوايلد بيف فيليه، البيف المعمول Well-Done كان ناشف شوية بس الصوص البنّي عمل توازن، وكان معاه مشروم مشوي لذيذ وشوية توابل عملوا طعم ممتاز، كل اللي فات كوم والبنّا فواجرا كوم ثاني، وفعلًا قدرت تنقل الطبق نقلة نوعية بطعمها المميز، طبق ثاني وهو البيف فيليه وصل Medium-Well رغم أننا طلبناه Well-Done، وحتى لما رجعناه ثاني للمطبخ فضل برضه مش مستوي ولا عصاري، أما البطاطس المهروسة فكانت لذيذة والبطاطس المحمرة كانت تحفة ومقرمشة وتتبيلتها رائعة. هضمنا الأكل بعصير بلاك ليموناد بيتشر Black Lemonade Pitcher بـ (24 جنيه)، بـ يُقدم في علبة خشب كبيرة مليانة ثلج واحتلت مساحة كبيرة من الترابيزة، نهاية المهرجان كانت مع شوكليت نوتيلا كيك (40 جنيه) لذيذة فيها شوكولاتة وتحتها عين جمل ونوتيلا، لكن الفكرة أنها قُدمت في وعاء صغير وكان صعب أننا ناكل الكيك السايح على أطرافه. في ختام اليوم، نقدر نقول أن زيارتنا لمطعم بلتازار كانت لطيفة جدًا وجودة الأكل كانت هايلة، بس طبعًا كان فيه ملاحظات منها كميات الأكل القليلة لو هـ نقارنها بالأسعار العالية، بعيدًا عن شوية الأخطاء البسيطة، بلتازار يعتبر من أحسن المطاعم في سيتي ستارز.

...

باستا كورنر: مكان لعشاق المكرونة وبس في شيراتون مدينة نصر
اصدرت في: 24/12/2015

عشق المكرونة مالوش زي في كل مكان في الدنيا، صحيح الأكلة دي إيطالية وطبعًا طعمها في إيطاليا أحلى من مصر مليون مرة، لكن في الجو ده بالذات مافيش أجمل من طبق مكرونة سخن البخار طالع منه وريحته تدخل البهجة عليك وتدفيك وتبهجك، وده اللي لاقيناه في "باستا كورنر - Pasta corner". باستا كورنر واخد جزء من محل الساندويتشات المعروف "ميجا – Mega"، وبـ يقدم مكرونة بس، أيوة زي ما قلنا مكرونة فقط، المنيو عبارة عن ورقة صغيرة فيها ثلاث خطوات: أول خطوة تختار نوع المكرونة: سباجتي، فيتوتشيني، بنا، ريجاتا، وثاني خطوة تختار نوع الصوص: أحمر ولا أبيض ولا حراق، وثالث خطوة هي الإضافات: ما بين جمبري وتونة ودجاج ولحم سواء مفروم أو قطع صغيرة، أو خضروات، أو جبنة بأنواعها كل حاجة لها سعرها. طلبنا مكرونة سباجيتي بكرات اللحم الصغيرة مع صوص أحمر وجبنة فلامنك (30 جنيه)، وطعمها كان حلو جدًا، خاصة أن الصوص اللي معمول به مش بس بالطماطم، هو كان بالطماطم والكريمة، فكان غني وسخن، كمان طلبنا مكرونة بالجمبري والمشروم والبروكلي والصوص الأبيض (34 جنيه)، صحيح الصوص كان خفيف شوية، والبروكلي كان نيء، بس كانت معقولة، مش تحفة بس مش سيئة، لكن أكثر حاجة لفتت نظرنا أنها بـ تتطلب كثير هناك، ومن شكلها واضح أن طعمها يجنن هي باستا تشيكن ألفريدو واللي بـ تتعمل بمكرونة فيتوتشيني وصوص أبيض مع قطع فراخ، ننصحكم تجربوها أكيد. كان نفسنا المنيو يبقى أكبر من كده ويبقى فيه أصناف ثانية ممتعة أو حلويات، بس للأسف هم متخصصين في المكرونة بس، ولو حبيتم تشربوا حاجة مع الأكل بـ تطلبوه من ميجا الشركة الشريكة لهم وبـ تضاف كأنها من عندهم. بصفة عامة باستا كورنر مكان لطيف لأكلة سريعة غنية وسخنة وكبيرة، من باب التغير.

...

ماندرين قويدر: بـ يمتعنا بحلو ممتاز وأكل منعش ومشروبات مبهجة في سيتي ستارز
اصدرت في: 14/09/2015

المنافسة قوية جدًا بين محلات الحلويات في القاهرة ما بين الأصناف المبتكرة والجودة وطبعًا الأسعار، بس ماندرين قويدر من حوالي سنتين عمل لنا مفاجأة، وبقى بـ يقدم منيو مطعم متكامل بجانب الحلويات وتميز فيه كمان، واللي كنا كتبنا عن فرع القطامية بتاعه مقالة في 2012. زيارتنا لفرع سيتي ستارز كانت مبهجة جدًا، مش بس علشان المكان كبير وواسع، لأ كمان المنيو متنوع جدًا، ما بين مشروبات ومكرونة وبيتزا ووجبات رئيسية وحلو. كالعادة الحاجة الوحيدة اللي بـ تضايقنا من الأماكن المفتوحة أن مش بـ يبقى فيها فصل للمدخنين وغير المدخنين، فـ بنضطر نشم ريحة الشيشة اللي بـ تخنقنا، بس نتمنى أن المحلات تراعي غير المدخنين في الفترة الجاية. أول ما استقرينا على مكان بعيد عن نسبيًا عن المدخنين، كنا عطشانين جدًا فـ قررنا نبدأ بالعصائر، فـ طلبنا Green Mandarin بـ 27 جنيه، وده عبارة عن سفن آب بالليمون والنعناع وصوص الماندرين، وكان طعمه تحفة، لولا أن Syrup النعناع اللي استخدموه أشبه بالبونبوني، ولطبيعة شغلنا فلأسف السيرب ده منتشر بين المطاعم والكافيهات ولازم يغيروه لأن فعلًا طعمه مش حلو. طلبنا كمان كوكتيلTropical Flyer بـ 26 جنيه، وده عصير مكون من برتقال وليمون ومانجو، وكان مبهج جدًا ويخليك حاسس بالانتعاش تمامًا. بعد كده احتارنا جدًا في منيو الأكل، ما بين المشويات والمقبلات، والأطباق الرئيسية، فـ قررنا نبدأ بـ Mozzarella Sticks بـ 34 جنيه، وكانت مضبوطة تمام وساخنة وبـ تذوب في فمك، مقدمة مع صوص الباربكيو، بعد كده طلبنا مكرونة Penne Alfredo بـ 49 جنيه، وطعمها كان رائع برضه، الصوص كثيف زي ما بـ نحبه، بس بعض قطع الدجاج جافة شوية وقطع ثانية مضبوطة، بس بشكل عام الطبق حجمه كبير يشبعك جدًا لو جعان. كنا لازم نجرب الحلو اللي عندهم، واللي كنا محتارين فيه جدًا، لأن الحلو ده لعبتهم الأساسية اللي مشهورين بها، وكان في كريب ووافل وتيراميسو وطبعًا الحلويات الشرقية اللي لا يُعلى عليها، لحد ما لاقينا أكثر حلو بـ نحبه واللي بـ يختلف اسمه من مكان للثاني، وهنا كان اسمه جبل لبنان بـ 27 جنيه، وفي أماكن ثانية ممكن يبقى اسمه عروس لبنان أو غزل بنات، وده بـ يبقى عبارة عن حلاوة شعر لبناني مع آيس كريم مستكة وفستق، وبرغم أن حجمه كان صغير شوية، إلا أنه طعمه يخطفك لجزيرة مهجورة مافيهاش غير طعم الحلاوة الشعر اللي ما لهاش زي مع طعم الآيس كريم اللي بـ يكسر الحلاوة الزائدة دي مع الفسدق، عمرنا ما هـ نزهق من الحلو ده أبدًا، واللي قُدم لنا ببراعة. ماندرين قويدر، مكان مناسب جدًا لخروجات العائلات أو الأصحاب، واللي بـ يناسب كل الأذواق سواء في الأكل العادي أو الحلويات، أكيد مش هـ تكون زيارتنا الأخيرة.

...

ويليز كيتشن: برجر ضخم وشهي وأجمل أنواع التحلية في مدينة نصر
اصدرت في: 06/09/2015

كل يوم والثاني، يطلع لنا محل برجر جديد، بأسماء مختلفة ومتعددة ما بين الكويس واللي خسر تحدي الجودة والطعم من أول قضمة، بس النهارده وسط المنافسة الكبيرة، ويليز كيتشن – Willy's Kitchen كسب التحدي وقدر يحقق معادلة البرجر الصعبة، نكهة جديدة بجودة كويسة وسعر معقول، أول معرفتنا بالمكان كان عن طريق صفحته على الفيسبوك، بعد كده عرفنا أن برنامج الأكيل زارهم وعجبه جدًا، فـ قلنا لازم نخوض التجربة كاملة حتى لو المكان بعيد بالنسبة لنا. أول ما بـ تدخل المكان هـ تلاحظ أنه صغير جدًا مش مبالغة، هو فعلًا صغير قوي، مجرد ترابيزتين داخل المحل وترابيزتين ثانيين خارج المحل، رغم أن فيه مكان في الخارج لأكثر من ترابيزة ثانية. أخذنا المنيو واحتارنا من بين الأصناف الكثيرة المغرية جدًا، ساندويتشارت برجر دجاج ولحمة، بـ تختار حجمهم 200 ولا 250 أو 300 جرام، ومنها أنواع حراقة وأنواع عادية بالمشروم والبيكون والبيض، والبلوتشيز وكل اللي قلبك يحبه، ده غير أنواع الأطباق الجانبية زي البطاطس بصوص التشيلي والجبنة والبطاطا المقلية ومشروم مقلي محشو جبنة ووافل فرايز وسلاطات متنوعة، أما الحلو بقى فلك الاختيار بين فطيرة تفاح وتوست بالنوتيلا والموز أو زبدة الفول السوداني وصوص التوت. طبعًا وسط الحاجات دي كلها كنا لازم نحتار، بس قلنا لازم ننجز ونطلب علشان كنا جعانين الحقيقة، وبالفعل طلبنا ساندويتش برجر Cheese Lava بـ 43 جنيه، والكومبو بـ تزود 22 جنيه، واللي بـ نختار منهم حاجة من الأطباق الجانبية مع عصير أو مشروب غازي، ولأن العصير كان خلص طلبنا مشروب غازي، وبطاطس بصوص التشيلي والجبنة وسعرها ضمن الكومبو بس لو لوحدها بـ 22 جنيه برضه فـ ننصحكم بالكمبو. إيه حكاية الساندويتش ده بقى؟ ده حضرتك برجر جواهم جبنة جودة، يعني أنت تأخذ قضمة تسيح الجبنة في فمك على طول وتمط، ومعاها خلطة المكان وخس وخيار وطماطم وزودنا عليها إكسترا مشروم بـ 5 جنيه، وإكسترا بيكون بنفس السعر، طعمه معاهم كان تحفة لا مثيل له برغم أنهم حطوا لنا 3 قطع مشروم بس تقريبًا، إلا أن طعمه كان تحفة، وكنا نتمنى بس أن الأطراف ما تبقاش نية أو فيها قطع حمراء، وده حصل على حسب كلامهم علشان الجبنة ما تتحرقش فـ يبقى تسويته Medium. أما البطاطس بصوص التشيلي والجبنة الشيدر، فأقل ما يُقال عليها أنها وهمية من جمالها، صوص التشيلي الحراق مع اللحمة المفرومة والصلصة عمل توازن مع دسم الجبنة والبطاطس، ودخلونا في عالم ثاني جميل وممتع. طلبنا كمان ساندويتش J Poopers بـ 49 جنيه، وده عبارة عن برجر مع هاليبنو محشي جبنة وهاليبنو عادي وجبنة شيدر، يعنى هـ تطير من الحرقان ما ننصحش به الناس اللي بـ تتعب من الأكل الحار، وكان مضبوط جدًا بالرغم من أننا لقينا بعض الأجزاء مش مستوية برضه بس قليلة، وطلبناه برضه كومبو مع بطاطا حلوة مقلية، برضه لو لوحدها سعرها هـ يبقى 22 جنيه، وكانت حلوة قوي ومضبوطة. أما أجمل حاجة أكلناها هناك يا جماعة وننصح بها أي حد يختم الأكل الدسم الجميل ده، هي ستافد فرينش توست بالنوتيلا والموز بـ 19 جنيه. بجد أجمل حاجة ممكن تأكلها وما تشبعش منها لأنها خفيفة جدًا، ومنعشة، ودي عبارة عن توست أبيض مفرود وجواه شوكولاتة نوتيلا سخنة وموز مهروس، طعمها يجنن من حلاوته. تجربتنا في ويلز كيتشن كانت ممتعة جدًا، أكيد مش هـ تبقى آخر زيارة لنا، والخبر الجميل أنه كمان بـ يوصل، تقدروا تتواصلوا معاه مباشرة.

...

تيدز: أحسن وأحدث مطاعم سيتي ستارز مول
اصدرت في: 21/04/2015

مجمع مطاعم "موزاييك" في سيتي ستارز بـ يجمع عدد كبير من المطاعم المختلفة اللي بـ تقدم أطباق جورميه. من حوالي شهر انضم تيدز - Ted's لمجموعة المطاعم بمفهوم جديد يرضي أي حد بـ يحب الأكل. فبجانب الاختيارات المتنوعة الموجودة في المنيو، تيدز عنده غرفة مخصصة للجبن بأنواعها المختلفة مستوردة أو محلية. ومش بس كده، ده كمان عنده ركن للمخبوزات الفرنسية سواء حلو أو حادق. المكان واسع جدًا وملئ بالديكورات المجنونة زي مجموعة الكراسي الغريبة والمريحة في الوقت نفسه. بعد جولة سريعة في المنيو، قررنا أننا نطلب من فواتح الشهية كرات الماك أند تشيز (32 جنيه) والبرجر (58 جنيه). أما كأطباق رئيسية، أخذنا سباجيتي (54 جنيه). بالنسبة لمنيو البيتزا، فهو مقسم لجزئين: Rossa (أحمر) وBlanca (أبيض). الجرسون شرح لنا الموضوع ببساطة شديدة وهو الآتي: الجزء الأول هو البيتزا التقليدية واللي عليها صوص طماطم. أما الجزء الثاني فالبيتزا مش بـ يبقى عليها صوص طماطم، ولكن في المقابل بـ يكون عليها مجموعة مختلفة من الجبن، من النوع الأول طلبنا سان سيرو (52 جنيه)، ومن النوع الثاني طلبنا فورماجي (55 جنيه). نزل لنا سلة عيش الفوكاشيا بالزيتون –واللي كان فريش- مع غموس جبن الريكوتا بالزعتر. بعدها وصلت المشهيات، الماك أند تشيز كان عبارة عن ثلاث كرات من الباستا الكريمي بالجبنة وعليها طبق سميكة من الصوص الأحمر، الطبق كان وهمي بجميع المقاييس. أما البرجر، صحيح ما كانش بالكمية اللي تمنيناها، إلا أنه كان شهي جدًا وخصوصًا أن المكونات كلها فريش. كان طلبنا أن تسوية البرجر تكون متوسطة/ نيئة، ولكن للأسف كان كامل التسوية. البطاطس اللي جاءت مع الطبق كانت مقرمشة ولذيذة من غير ما تكون دهنية، تتبيلتها كانت ممتازة بمجموعة الأعشاب اللي كانت مرشوشة عليها. توالت الأطباق الرئيسية بعد المشهيات، السباجيتي كانت مقدمة في بشكل جميل في وعاء ملون صغير، والحقيقة أننا وقعنا في حبها من أول شوكة، الباستا كانت Al Dente –يعني مش مستوية بالكامل لدرجة أنها تفقد تماسكها- أما قطع الفراخ فكانت ممتازة التسوية مع كمية مثالية من الصوص الكريمي بنكهة الريحان. كل الجمال ده كان مقدم عليه جبن بارميزان وحبات الصنوبر. نوعين البيتزا اللي طلبناهم كانوا ممتازين، واللي معمولين على الطريقة التقليدية الإيطالية المشهورة بالعجينة الرفيعة. النوع الأول سان سيرو كان عليها صوص طماطم، جبنة موتزاريلا، مشروم وشرائح رفيعة من التركي المدخن. أما الفورماجي البيضاء، فكان عليها كل أنواع الجبنة اللي ممكن أي إنسان يتخيلها: موتزاريللا، بيكورينو، جورجونزولا، بري، بارميزان، كريمة وماسكربوني. من غير كلام كثير طعمها مختلف عن أي حاجة ممكن تتذوقها، بس ده ما يمنعش أنها دسمة جدًا وثقيلة نوعًا ما. للحلو، طلبنا بودينج البلح (40 جنيه)، واللي جاء لنا في صورة كيك شوكولاتة بالبلح والمكسرات، وعليه طبقة من صوص الكراميل المملح وآيس كريم الفانيليا... تخيل أنت الطعم! التجربة في مجملها كانت رائعة، الخدمة أكثر من ممتازة والجو العام مبهج، ده غير الأطباق الشهية وأحلى بيتزا ممكن تأكلها، "تيدز - Ted's" عندهم كل مفاتيح النجاح لأي مطعم، وده يخليه منافس قوي على ساحة مطاعم القاهرة.

...

طبلية: أكل مصري مختلف في سيتي ستارز في مدينة نصر
اصدرت في: 01/04/2015

كثرت في الفترة الأخيرة المطاعم اللي بـ تقدم الأكلات المصرية، سواء نجحت في ده أو قربت تنجح، مطعم "طبلية" في سيتي ستارز اللي هـ نتكلم عنه النهارده، واللي مالوش أي علاقة بمطعم طبلية اللي في جنينة مول، وبـ يقدم نفس الأكل المصري، وله نفس الديكور إلا أن المنيو مختلف تمامًا، وهم مالهمش أي علاقة ببعض غير تشابه أسماء. المهم أول ما بـ تدخل مطعم طبلية، هـ تحس أنك دخلت حقبة زمنية كلاسيكية، من أول الكراسي والتابلوهات القديمة، لحد أغاني أم كلثوم وسلطنتك معاها. المنيو مليان أكلات مصرية مغرية جدًا، من أول المقبلات لحد أطباق المشويات والملوخية والشركسية، وأم علي والأرز باللبن. أكثر حاجة جذبتنا في المنيو كان كشري بالجمبري، طبعًا قلنا ده ما يتفوتش، بس لما سألنا الجرسون قال لنا أنه طبق كشري عادي، وجنبه طبق جمبري، وتفاجأنا أنه كان بـ 80 جنيه، فما تشجعناش أننا نأكل كشري عادي بالمبلغ ده الحقيقة. طلبنا كمقبلات طبق كبدة طبلية مالكية بدبس الرمان بـ 42 جنيه، وطبق ملوخية بعد نصيحة الجرسون لنا به، واللي مكون من ملوخية وأرز ونص فرخة مشوية بـ 55 جنيه، وميكس جريل بـ يُقدم مع أرز بالخلطة وبطاطس محمرة وبـ 85 جنيه، وطاجن أرز معمر باللحمة بـ 60 جنيه. ومع الأكل طلبنا عصير خروب بـ 16 جنيه وسوبيا بنفس السعر. كانت حركة حلوة قوي من الجرسون كعادة المحل، أنه جاب لنا دقة (توابل مكونة من كمون وسمسم وملح وفلفل)، وعصير ليمون، ومِش (جبنة قديمة بالطماطم)، وأجمل عيش شامي ممكن تأكله وهو سخن وجميل. الحقيقة أن دي كانت أول مرة في حياتنا نأكل مِش، هو طبعًا مش زي اللي بـ يتعمل في البيت بس طعمه كان وهمي مع التوابل والليمون حاجة كده تطرقع في مخك وتمزجك وتخليك عاوز ثاني لولا أننا خفنا نشبع. وبعدين الأكل كله جاء مع بعضه، بعدها بحوالي نصف ساعة، الميكس جريل كان حلو ومضبوط إلا الكفتة نوع اللحمة كان سيء جدًا وكانت مفككة، لكن الأرز بالخلطة كان حلو قوي فاجئنا، بس البطاطس المحمرة كانت باردة للأسف. بس مش مشكلة أكثر حاجة ضايقتنا، كانت طبق الملوخية بالفراخ، واللي كنا متشوقين له جدًا، الملوخية جات ويا ريتها ما جات، كانت تقريبًا مش متخرطة كويسة، ومن غير أي نكهة إطلاقًا، ولما قلنا للجرسون بدلها لنا بواحدة ثانية كانت ألطف بس برضه النكهة ما كانتش مضبوطة، وللأسف الفراخ كان طعمها مسلوق وناشفة جدًا، ما عرفناش نأكلها برضه. لكن اللي كان حكاية ورواية طبق الكبدة المالكية اللي بدبس الرمان فعلًا طعمه كان حلو جدًا، وطاجن الأرز المعمر باللحمة البتلو، كان متبل حلو قوي برضه، ومليان قطع لحمة، أما السوبيا والخروب كانوا تمام التمام وما عليهمش كلام. طبعًا بعد كل الأكل ده ما قدرناش نطلب حلو، لكن الأكل بشكل عام كان لطيف إلا طبق الملوخية وطبق الكفتة، نتمنى طبعًا أنهم يصلحوا الأخطاء البسيطة دي، لأنهم يستاهلوا فرصة ثانية، خاصة كمان أن فرع سيتي ستارز ده فرعهم الوحيد.

...

شاهد المزيد
مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح