مأكولات سريعة مطاعم in مدينة نصر Cairo, Egypt

مطاعم

القليوبي: فطائر ومعجنات في مدينة نصر
اصدرت في: 15/01/2013

القليوبي ده اسم كبير في عالم الفطير والبيتزا الشرقي على فكرة، ما كناش نعرف المعلومة دي إلا لما لاحظنا عدد الفروع المنتشرة داخل القاهرة وخارجها، ومن ذكر اسمه أمامنا في أكثر من مناسبة لما تيجي سيرة أكل الفطير. شوفنا له فروع في الجيزة ومدينة نصر وحلمية الزيتون وجسر السويس، وعرفنا أن أصله في مدينة قليوب نفسها وله فرع كمان في الساحل الشمالي. زيارتنا كانت لفرع الحي السادس في مدينة نصر، وبالتحديد في امتداد شارع الطيران جنب محل ساندويتشات «أبو رامي» اللي كنا كتبنا عنه قبل كده. المحل حجمه مش كبير وفيه أماكن محدودة للجلوس بالداخل وعلى الرصيف المقابل للمحل، في الشارع يعني. وفيه عدد من القهاوي البلدي القريبة من المكان واللي الناس عادة بـ يعملوا الطلب بتاعهم ويقعدوا يأكلوا على أي منها. فطائر حادقة وحلوة، بحشو داخلي وخارجي "بيتزا شرقي" وفيه بيتزا إيطالي عادية وفطائر وبيتزا صيامي وفطير مشلتت بالسمنة البلدي وحواوشي إيطالي وكريب فرنسي وسلاطات ومقبلات. من كل صنف هـ تلاقي 3 أحجام، ودائمًا فرق السعر مش كبير بين الوسط والكبير، وبعض الفطائر فيه منها 4 أحجام. جربنا فطيرة السجق البلدي الحجم الصغير (20 جنيه) والحجم الوسط (25 جنيه) وكانت مشبعة جدًا وطعم السجق فيها حلو بس حار شوية ولونه أحمر بزيادة مش عارفين ده بفعل الفلفل الأحمر ولا لون اللحم نفسه. المهم أن مع أي أوردر بـ تطلبه السفرة أمامك بـ تتملي مقبلات من اللي قلبك يحبها واللي مشهور بها المحل زي البطاطس المخللة والجبنة القديمة بالطماطم والمخللات والطماطم المخللة، وكل طبق من دول ثمنه جنيه أو 2 جنيه، يعني هـ تدفع في آخر القعدة 5 أو 6 جنيه مقبلات. من اختراعات المكان جربنا الحواوشي الإيطالي الحجم الصغير (20 جنيه) وهو مش صغير خالص بالنسبة لفرد واحد وهو أقرب لفطيرة مقرمشة من الخارج ومغطاة بالسمسم ومحشوة باللحم المفروم والجبن والخضروات ومستوية في الفرن. طعمه حلو بجد وحجمه مثالي بالنسبة لسعره، وجدير ببراءة اختراع «القليوبي».بعد الأكل الحار والمشطشط هـ يلزمك فطيرة بالشوكولاتة والموز (25 جنيه) ودي تكفي 3 أو 4 أفراد علشان يحلوا بها بعد ما يكونوا تقريبًا شبعانين. الطعم حكاية وكمية النوتيلا والموز وفيرة، بس خلي بالكم من الزروطة واعملوا حسابكم في مناديل علشان المكان مش بـ يوفر مناديل على الترابيزات.الكريب هنا شكله معقول، بس مؤخرًا بقينا نفضل الأماكن المتخصصة فيه علشان سبق وكان لنا تجارب مش لطيفة مع الكريب بالذات. ممكن تحط إضافات زي ما أنت عاوز على فطيرتك أو بيتزتك بأسعار من 5 لـ 12 جنيه، وإحنا هنا بـ نرشح لك الجبن الكيري والمشروم على أي حاجة مملحة. «القليوبي» حببنا في أكل الفطير وإحنا قاعدين في الشارع، صحيح الخدمة بطيئة شوية نظرًا للإقبال الكبير وقلة عدد العاملين، لكن ما عندناش مانع نروح ثاني بس المرة دي هـ نأخذ أكلنا ونروح نقعد على قهوة قريبة علشان نلاقي مكان نغسل فيه أيدينا بعد الأكل.

...

بيستو: ساندويتشات وأكلات سريعة ووجبات في أرض الجولف
اصدرت في: 03/01/2013

موقع استراتيجي جدًا، في نهاية شارع النزهة من ناحية طريق النصر، أو بالتحديد في ميدان الساعة نفسه. لمحنا المحل أكثر من مرة في الفترة اللي بعد رمضان اللي فات مباشرة، واتضح فعلًا أنه فتح أبوابه لأول مرة في النصف الثاني من رمضان 2012. مطعم «بيستو – Pesto» في ظاهره متخصص في الأكلات السريعة والساندويتشات مع كومبو البيبسي والبطاطس، لكن لما دخلنا المكان لقينا أن فيه صالة طعام كبيرة نسبيًا فيها مش أقل من 8 ترابيزات، وممكن تقعد وتطلب أطباق رئيسية من اللحوم والدجاج والباستا والستيك فيليه كمان، بس يا ترى هو قد مسؤولية أنه يكون مطعم بـ يقدم أطباق من مطابخ عالمية إيطالية وفرنسية مش مجرد مطعم تيك آواي؟ بعد ما أخذنا مكاننا على أحد الترابيزات اللي بـ تطل على شارع النزهة الرئيسي وبدأنا نتأمل المحل من الداخل عجبنا أنه هادئ والخدمة فيه محترفة رغم قلة عدد العاملين فيه –تقريبًا واحد أو اثنين– وشاشات بـ تعرض كليبات عربية وأجنبية وفيه ثلاجة عرض بـ تعرض بعض الحلويات والعصائر والمثلجات، والنظافة ظاهرة في كل تفاصيل المكان. بدأنا نستعرض المنيو الورقي المطبوع مخصوص للتيك آواي وما كانش فيه منيو أقيم من كده لصالة الطعام من الداخل! المهم قررنا نجرب من الساندويتشات جمبري أستيري جريل الكومبو (32 جنيه) للحجم الكبير، وكانت أول ملاحظة أنه شبه ساندويتش الجمبري بتاع كوك دوور لحد كبير، وهو مشوي بخلطة بصل وفلفل ومسطردة العسل والمشروم وصوص التارتار، الحقيقة أنه كان طعمه حلو، والبطاطس المحمرة اللي قُدمت معاه كانت مش فارم فريتس، كانت أشبه ببطاطس بيتي عادية محمرة، بس برضه كانت لذيذة ومختلفة. كده «بيستو» براءة في الساندويتشات والكومبو، مع أن 32 جنيه مبلغ مش قليل بالنسبة لحجم الساندويتش، وفيه خدعة هـ تقابلك وهي أنه كاتب على زجاج المحل والمنيو "أرخص من أرخص كومبو في مصر" وكاتب أسعار الساندويتشات بطريقة توحي أنها أسعار الكومبو، ورقم 15.99 جنيه متكرر أكثر من مرة على المحل والمنيو، لكن الحقيقة أن أرخص كومبو هنا مش هـ يقل عن 20 جنيه. وما عجبناش أنه كاتب "جديد.. شاورما وكفتة في عيش بوري" مش عارفين هو قصده جديد بالنسبة للمحل ولا جديد في عالم الساندويتشات! من منيو الأطباق بدأنا بطبق مقبلات ميكس (15 جنيه) فيه حلقات بصل مقرمشة وبافلو وينجز معقولة وأصابع موتزاريلا نصفها مستوي ونصفها مثلج، وصوص تارتار علشان نغمس فيه كل الحاجات دي، الطبق ما كانش روعة بصراحة. بعد كده جربنا الدجاج الكرسبي مع المشروم (45 جنيه) من ترشيحات الجرسون اللي كان معانا، وهو عبارة عن صدور دجاج مقرمشة مغطاة بالمشروم والموتزاريلا واختارنا معاه باستا فيتوتشيني بالصوص الأبيض. طبق كويس والكمية فيه كبيرة مافيش كلام، عجبنا الطعم لكن حسينا أن الصنعة ينقصها بعض الخبرة، يعني هـ تأكل وتشبع بس مش هـ تنبهر، وإحنا بـ نحب ننبهر بصراحة. لذلك أعلنا أن «بيستو» مثالي للساندويتشات والكومبوهات السريعة، لكن موضوع الأطباق الرئيسية وخاصة الفيليه والريب آي عاوزة شوية مذاكرة علشان يقدروا ينافسوا المطاعم الثانية المتخصصة.ممكن بعد الأكل تشرب ميلك شيك أو عصير فريش (10 جنيه) بس وقت زيارتنا ما كانش فيه غير ليمون، فطلبنا ليمون ومن نفسهم أضافوا عليه شوية لبن، ما اعترضناش وشربناه لكن موضوع أنه كان دلِع وناقص سكر ده ما قدرناش نستحمله. كان نفسنا نجرب أي من أطباق الحلويات زي الآبل باي أو براوني الآيس كريم أو الأوريو مادنس (14 جنيه) لكن الليمون الماسخ خلانا مش متحمسين لوقت أطول في المحل.مافيش مانع خالص أننا نعدي على «بيستو» ونأخذ ساندويتش وحاجة ساقعة، أو وجبة أطفال معاها لعبة، الأسعار جيدة والخدمة سريعة وده المهم. لكن تجربة العشاء داخل المطعم بشكل كلاسيكي ما كانتش الأفضل بالنسبة لنا، وبسهولة هـ نفضل أماكن ثانية عنه.

...

أكشن: بيتزا وكريب على السريع في مدينة نصر
اصدرت في: 23/12/2012

محل صغير وفي حتة متدارية في شارع متفرع من عباس العقاد هو شارع أحمد قاسم جودة، بالضبط عند مستشفى التوفيقية. محل «أكشن» رغم أنه صغير وواضح أنه مش قاصد يلفت النظر بأي طريقة، يعني لا يافطة ضخمة ولا أضواء مبهرة ولا حتى ديكور مميز، إلا أنه بـ يقدم خدمة ممتازة، ومن غير فلسفة. هـ تحب البيتزا من عنده وده اللي يهمه في الموضوع، شيف شاطر وفرن كويس هـ يطلع لك أحلى معجنات ومخبوزات في أسرع وقت ممكن. هو ده اللي بـ يلعب عليه «أكشن». أنك تحب أكله ويبقى من خياراتك المفضلة لما تطلب معاك بيتزا أو كريب وأنت قريب من شارع عباس العقاد اللي فيه كل أنواع المطاعم والمطابخ، يعني المنافسة مش سهلة خالص. مافيش مكان للجلوس داخل المحل، بس ممكن تأخذ أكلك وتقعد على السور الخارجي اللي أمامه واللي كثير بـ يقفوا يأكلوا فيه ويشربوا حاجة ساقعة جنب الأكل، الشارع هادئ ويسمح أنك تقف وأنت أعصابك هادئة أو حتى تركن عربيتك وتقعد تأكل فيها. المنيو بسيط ومقسم لـ 3 أقسام: البيتزا (باللحوم أو الدجاج أو الأسماك أو بالخضروات والجبن) والكريب (الحادق أو الحلو) والتويستر وهو اختراع خاص بالمحل وهو شبه الكالزوني الإيطالي التقليدي بس بلمسة مصرية، وهو عبارة عن عجين محشو بالدجاج أو اللحوم أو الجبن ومخبوز في الفرن وبـ يُقدم ملفوف زي الساندويتش.البيتزا هنا كويسة جدًا، خفيفة وهشة وإضافتها فريش وغنية، موجودة بحجمين هما المتوسط والكبير، والأسعار من 15 لـ 25 جنيه للوسط، ومن 22 لـ 40 جنيه للكبير حسب الإضافات. بيتزا أكشن وهاواي بصوص الـ BBQ كانوا هائلين، والكبيرة منهم بـ 30 جنيه بس، ومشبعة جدًا لفردين وممكن أكثر. وممكن تطلب أي بيتزا تبقى محشوة الأطراف أو Stuffed Crust. الكريب بالجبن الكيري (12 جنيه) هو المفضل لنا هنا، وممكن تعمل أي إضافة له بـ 3 جنيه فقط، وكريب الفواكة (10 جنيه) مناسب جدًا للتحلية. ومبشكل عام الكريب هنا مخبوز كويس وبـ يبقى مقرمش حسب الطلب. التويستر حلو وكل حاجة بس ممكن تحسه دسم قوي لأن طعم العجين فيه ظاهر بقوة، والحشو بـ يبقى كثير مثلًا في تويستر السجق (16 جنيه) لدرجة أنك هـ تحاول تنقصه شوية علشان تعرف تستطعم الأكل، وممكن تعمل إضافة على التويستر بـ 4 جنيه.الشيفات أو بمعنى أدق خبير المعجنات اللي هنا شاطر جدًا، وهـ تحس بطعم وصنعة مميزة في كل الأكلات. والسرعة هي سمة المكان، يعني مش هـ تقف تنتظر كثير، والنظافة مضمونة وهـ تلاحظ ده بنفسك. يعني التجربة كلها هـ تبقى إيجابية وأهم حاجة أنها موفرة جدًا وعملية في آخر الشهر.

...

أبو رامي: ملك الساندويتشات في مدينة نصر
اصدرت في: 09/10/2012

إحنا مؤمنين أن مش جودة الأكل ولا الأسعار الكويسة والخدمة بس هم اللي بـ يعملوا اسم للمطعم وبـ يصنعوا شهرته، لكن فيه عوامل إلهية أو ممكن نقول عليها كده بركة دعاء الوالدين بـ تخلي مكان يوصل لسابع سماء (طبعًا بعد توافر الشروط الأساسية للنجاح وهي الجودة والسعر والكلام ده كله) وتخلي مكان ثاني في سابع أرض حتى لو هو ما يستحقش كده. مطعم «أبو رامي» من النوع الأولاني، اللهم لا حسد وربنا يزيده طبعًا، بس فيه حالة خاصة بينه وبين زبائنه بـ تفكرنا بمحلات زي البرنس في إمبابة وعمو حسني وبابا عبده وعبده تلوث وبيبو في شبرا، الحالة دي بـ تخليه دائمًا زحمة وترابيزاته مليانة وفيه قوائم انتظار كمان، ده غير التيك آواي والعربيات اللي واقفة حول المحل اللي واخد ناصية مهمة في امتداد شارع الطيران في الحي السابع في مدينة نصر. المطعم اشتهر بالساندويتشات في البداية، كبدة إسكندراني وسجق ولحم مفروم وسكالانس الحلاوة بالقشطة. لكن حاليًا هو مطعم متكامل وفيه صالة طعام مكيفة وبـ يقدم بجانب الساندويتشات مشويات ومعجنات وفتة ووجبات اللحوم والدجاج والأسماك وكل أنواع الشوربة والسلاطات.مش هـ نخبي عليكم إحنا من زبائن «أبو رامي» المخلصين، بس بـ نحب المنيو الأصلي بتاعهم، يعني كبدة وسجق وبيض بالبسطرمة وبلوبيف بالجبنة الرومي، الأسعار في القسم ده من 4 لـ 6 جنيه للساندويتش، رغيف فينو طوله حوالي 15 سم، الحشو فيه كميته معقولة جدًا والطعم حلو ومشطشط حتى لو أنت مش طالبه سبايسي، بس ده جزء من حلاوته، وممكن تحاول تصطاد الفلفل الحار من داخل الساندويتش، ساندويتش السجق البلدي بالجبنة الرومي هو المفضل بالنسبة لنا، وكفتة داوود باشا. 4 ساندويتشات من الأصناف دي ممكن يشبع فرد واحد، مع سلاطة البطاطس والطماطم المخللة اللي بـ تنزل (الطبق بـ 1.5 جنيه) والمخللات، بس بـ ننصحك بواحد حلاوة بالمربى بالقشطة بعدهم، علشان القفلة تبقى مضبوطة، وانسى الدايت هنا طبعًا.الشاورمة هنا مش قد كده، يعني الأحلى من فتة الشاورما هو الأرز المكسيكي بالدجاج والأرز بالكبدة الإسكندراني أو بالفاهيتا (16 جنيه) فيه أو أرز بالجمبري بالكاري (22 جنيه)، الأرز هنا فيه توابل تجنن وكميته كويسة. فيه كمان مكرونة بالسي فوود (22 جنيه) أو إيطاليانو بالصوص الأحمر واللحم أو الدجاج (16 جنيه) ودي من الحاجات اللي جربناها قبل كده وعجبتنا. ومن الوجبات ممكن تجرب الميكس جريل أو ورقة اللحمة (40 جنيه) أو وجبة كريسبي (26 جنيه) وكله بـ يُقدم مع أرز أو بطاطس وعيش وسلاطة. ولو عاوز تتعامل مع «أبو رامي» كأنه كبابجي عادي ممكن تطلب أطباق أو تيك آواي بالكيلو، ومشكل الكباب والكفتة هنا بـ 130 جنيه، والريش بـ 180 جنيه، والطرب بـ 100 جنيه. القعدة في المحل قعدة أكل وبس، ترابيزات وكراسي بلاستيك بسيطة في الهواء الطلق، بس الخدمة صاروخية والأكل هـ ييجي لك في غمضة عين. الصالة المكيفة عائلية شوية وممكن تتحمل تقعد فيها وقت أطول، ومجهزة بـ wi-fi وفيها طبعًا حمام. الساندويتشات هي سر تألق «أبو رامي»، أي ساندويتش هـ تلاقيه حلو ومخدوم كويس قوي، والجديد عنده هو ساندويتشات السي فوود اللي عاملة أحلى شغل مع زبائنه. «أبو رامي» اختيار مناسب جدًا لخروجات آخر الشهر والأسعار اللي في اللذيذ.

...

عبده تلوث: اسم مش على مسمى ومحل جديد في الحي السادس
اصدرت في: 26/09/2012

هو الاسم مش غريب على حد فينا طبعًا، لكن تفاجأنا بناس فاكرة أن الاسم ده مجرد تريقة أو لقب أطلقه الناس على عربيات أكل أو محلات من اللي اشتهرت بعدم النظافة أو عدم توافر أبسط قواعد الصحة في الأكلات اللي بـ تقدمها. لكن الحقيقة أن فيه «عبده تلوث»، وعم عبده شخصيًا موجود، طيب مادام هو "تلوث" والناس عارفة أنه "تلوث" أمُال بـ يروحوا له ليه؟ مش بس كده! دول بـ ييجوا له من آخر الدنيا وبـ يجيبوا أصحابهم معاهم كمان. الفكرة ببساطة أنه لا ملوث ولا قذر ولا حاجة وساندويتشاته مبتكرة ولذيذة واللي يجربها مرة بـ يلاقي نفسه عاوز يعدي من وقت للثاني علشان يأخذ له ساندويتشين كبدة في السريع. لكن الشكل العام للعربية اللي كان بـ يبيع عليها ساندويتشاته أول ما بدأ كان يوحي بعدم النظافة وخطورة المأكولات، لكن أكيد المحل كان هـ يتشمع والرجل كان هـ يتقبض عليه مع أول حالة تسمم تحصل بسببه. بـ نقول لكم المقدمة الطويلة دي علشان نوصل لكم حاجة واحدة.. ما تخافوش من الاسم.المحل اللي فتح جديد وبـ يحمل اسم «عبده تلوث» موجود أمام بوابة المدينة الجامعية لطلبة جامعة الأزهر في الحي السادس في مدينة نصر، قريب من مطعم ثاني بـ يقدم نفس الأصناف بتاعته وما يقلش عنه شهرة هو مطعم «أبو رامي» للساندويتشات. مش متأكدين إذا كان أصحاب الفرع الجديد ده هم أصحاب عربية عبده تلوث اللي كانت موجودة قبل كده بالقرب من فندق سونيستا في مدينة نصر ولا حد غيرهم بـ يستفيد بالاسم، لكن اللي يهمنا أن الأكل يكون لذيذ ويكون شبه اللي شفناه على العربيات اللي حملت الاسم العريق قبل كده.. "تلوث".المحل حجمه مش كبير لكن له يافطة عملاقة مكتوب عليها اسمه وتحتها يافطة رقمية بـ يُكتب عليها رسائل ترحيب والأصناف المميزة اللي بـ تُقدم في المكان، ولازم نعلق على اللوجو الظريف المطبوع على المنيوهات وواجهة المحل، اللي ثبت في دماغنا شكل معين لشخصية "عم عبده". فيه قعدة داخل وأمام المحل، ترابيزات بلاستيك بسيطة بس حالتها كويسة، جديدة بقى علشان الافتتاح كان قريب وكده. المنيو فيه ساندويتشات وبس، مافيش أطباق، بجانب الكبدة الإسكندراني والسجق الشرقي والمدخن وكفتة داوود باشا وكفتة الجريل، هـ تلاقي اختراعات عبده الجديدة زي كبسولة الرنجة بالبصل الأخضر والطحينة ودي بـ تُقدم في ساندويتش بـ 10 جنيه وجربناها وعجبتنا بجد، علشان كانت نظيفة جدًا، فيه كمان بيف مالديف وتشيكن تاهيتي (10 جنيه) اللي بـ يكون فيها صوص كريمة ومشروم بجانب شرائح اللحم أو الدجاج المشوية على الجريل، جربنا لكم ده كمان وطلع يستحق التجربة زي ما هم كاتبين على المنيو. ممكن تطلب كبدة أو مخ بانيه في عيش بلدي، بس ده ما كانش موجود وقت زيارتنا. ومن ضمن الاختراعات فاهيتا الكبدة وكبدة بالثوم والليمون (6 جنيه).السجق الشرقي بالجبنة اللي اسمه في المنيو "مشنكاح" كان أحلى حاجة أكلناها هنا، سجق ضاني مشوي وقطعتين جبنة شيدر، الواحد بـ 7 جنيه، 2 منه مع واحد "مكس تلوث" اللي فيه كبدة على سجق مفروم هـ يقوموا بالواجب. حجم الساندويتشات واحد، رغيف فينو طوله حوالي 15 سم والحشو فيه كثير ما تقلقوش. المفاجأة بقى كانت البرجر بالجبنة (10 جنيه) والعيش المقرمش بالسمسم اللي قُدم فيه، متمكن برضه عم عبده! وما تنساش تحلي بساندويتش سكلانس (6 جنيه) فيه حلاوة بالقشطة بالمربى.الخدمة كويسة وخاصة من ناحية مدير المحل اللي كان مهتم بالزبائن ومنتبه لهم جدًا وبـ يجامل الناس ويضبط لهم الطلب على قد ما يقدر. لدرجة أنه عمل لنا طبق سلاطة طماطم مخصوص لما طلبناها رغم أنها مش في المنيو. بـ نتمنى التوفيق لـ «عبده تلوث» ويفضل دائمًا مش اسم على مسمى.

...

ع الخفيف: ساندويتشات كبدة وسجق في مدينة نصر
اصدرت في: 23/04/2012

المطعم حديث نسبيًا، يعنى فاتح من 7 أو 8 شهور، موجود في عمارات الشرق في الشارع اللي فيه الحديقة الدولية المتفرع من عباس العقاد، جنب مطاعم «ماي كوين» و«شاورما الريم» و«وافلشيوس». المنطقة اللي أمام بوابة الحديقة الدولية دي بقت زي مجمع محلات أكلات سريعة، تركن عربيتك وييجي لك الجرسونات من كل محل من صف المحلات الموجود، أو ممكن تتمشى وتنزل تقعد على واحدة من الترابيزات المرصوصة على الأرصفة المقابلة. المهم أنك هـ تأكل أكل ساخن ولذيذ وبأسعار مهاودة. محل «ع الخفيف» اسم على مسمى، المنيو كله عبارة عن ساندويتشات مكوناتها بسيطة من اللحوم والدجاج والجمبري والحلاوة والقشطة والمربى، وفيه سلاطات وبطاطس محمرة وبيبسي علشان لو عاوز تخلي الساندويتش بتاعك كومبو. أخذنا مكاننا على ترابيزة في الشارع وقعدنا نتفرج على المنيو كثير واللي فيه كل الساندويتشات متوفرة بحجمين أو ثلاثة وبأسعار بـ تبدأ من 3 جنيه وآخرها 19 جنيه للساندويتش. وفي الآخر طلبنا من الجرسون يرشح لنا كام ساندويتش جامد من الحاجات الكثير اللي عندهم، ورده كان جاهز طبعًا؛ كبدة ع الخفيف (3 جنيه) هي كبدة مطبوخة بطريقتهم الخاصة، وشاورما البطاطس (4 جنيه) وده اختراع بـ يتم فيه تسوية البطاطس المحمرة على الجريل بالجبنة الموتزاريلا بطريقة ونكهة الشاورما ومش هـ تلاقيها معمولة بالطريقة دي في أي حتة ثانية. وفيه أصابع السجق الشرقي بالجبنة على الجريل (5 جنيه) وده كمان من ابتكارات المكان. وكفتة السيخ المستوية على الجريل (8 جنيه). بالنسبة للساندويتشات المميزة للمكان تقريبًا دي من المرات القليلة اللي نأكل فيها اختراعات من مكان لسه فاتح جديد وتعجبنا بالشكل ده. كبدة ع الخفيف المطبوخة بالبصل والثوم كانت خرافية، وشاورما البطاطس دي اختراع حقيقي، طعمها جديد وفريد والساندويتش مليان على آخره وبـ نقول لكم لازم تجربوه. علشان نجرب معظم الأصناف اللي في المحل طلبنا الحجم الصغير من كل ساندويتش وطلبنا الأصناف التقليدية زي الكبدة الإسكندراني والسجق التركي المفروم والسجق الإسكندراني المدخن (3 جنيه). كل الساندويتشات من العيش الفينو الطازج واللحوم كلها واضح أنها فريش ونظيفة، وبـ نقول الكلام ده لأن ناس كثير بـ تقلق من أكل الكبدة والسجق خاصة في الشارع، وما كانش فيه مخ وقت ما روحنا رغم أنه مكتوب في المنيو. ممكن تضيف 7 جنيه لأي ساندويتش وتخليه كومبو، وفيه سلاطة خضراء وطحينة ومخللات (3 جنيه للعلبة) وفيه طماطم مخللة بالثوم وبطاطس بالبقدونس وباذنجان وفلفل مقلي (4 جنيه العلبة) وإحنا جربنا الطماطم المخللة والبطاطس دول وبـ نقول لكم أن الطماطم تحفة والبطاطس مش قد كده. بعد الأكل ممكن تأخذ لك واحد سكلانس حلاوة على قشطة على مربى أو شوكولاتة نوتيلا بالموز والعسل (5 جنيه) علشان تقفل القفلة التمام. فيه ساندويتشات عادية لو مش عاوز تدخل في قصة الكبدة والسجق، زي البرجر بالبيض والجبنة والشيش طاووق والهوت دوج والشاورما والجمبري البانيه وكبدة الفراخ، وممكن تطلب كبدة ومخ بانيه بالكيلو (100 جنيه للكيلو المشكل). مطعم «ع الخفيف» أكله حلو بس الجرسون تأخر علينا شوية لحد ما جاب لنا طلباتنا، لكن ده ما يمنعش أن الخدمة كانت مرحبة ومحترفة وأننا حبينا المكان وقررنا يبقى من اختياراتنا المعدودة لأكلة خفيفة ورخيصة في آخر الليل.

...

بيسترو: مكان أكل مش غالي وأجواؤه دافئة في مدينة نصر
اصدرت في: 21/02/2012

في يوم من الأيام.. في مصر زمان.. الـ 50 جنيه دي كانت مبلغ وقدره، لكن النهارده المبلغ ده غير كافي بالمرة أنك تدفعه مقابل عشاء وتحلية في كثير من أماكن الأكل في كايرو، «بيسترو - Bistro» بقى قلب الموازين ولقى طريقة أنه يقف أمام القاعدة دي مع توفير وجبات عالية الجودة. موجود في شارع أبو داوود الظاهري في مدينة نصر، أسعاره متفاوتة، إحنا أخذنا مقبلات ووجبة رئيسية وتحلية وكل ده بأقل من 50 جنيه! المكان لطيف فيه مساحة للأكل فيها ترابيزات منظمة في مجموعات جنب بعضها لدرجة أن شخص واحد فقط ممكن يمر وسطها، وبالتالي قرب الترابيزات من بعضها بـ يخلينا أكننا قاعدين مع الناس اللي جنبنا وسامعين كل كلامهم. ننتقل لجزء الأكل.. بدأنا وطلبنا موتزاري لا ستيكس (8 جنيه) لكن للأسف كان بداية مخيبة للأمل، كنا فاكرين هـ نلاقي الحشو والمكونات من الداخل طرية وناعمة لكن للأسف بالعكس طلعت ناشفة. المنيو فيها أقسام: باستا، بيتزا وساندويتشات. من قائمة الباستا اختارنا البينا ألفريدو تشيكن باستا (25 جنيه) بـ يكون فيها مشروم وفراخ وصوص أبيض غني وزيتون، الباستا بشكل عام كانت جيدة ولكن كانت عيبها الوحيد أن الفراخ ما كانتش كميتها كبيرة. البيتزا متوفرة بثلاثة أحجام. للفرد الواحد طلبنا الحجم الصغير لبيتزا ألباتشينو (25 جنيه) بالتركي المدخن وجبنة البلو تشيز، البيتزا كانت مخبوزة بشكل جيد وسمكها كان كويس وكانت أفضل بكثير من الباستا. جربنا كمان ساندويتش المكسيكان تشيكن (23 جنيه) وكان بـ يتكون من شريحتين رفيعين من الفراخ عليهم خس وطماطم مقطعة وصوص شيللى وبصل وفلفل وصوص خلى الساندويتش "مندي"، بـ ينزل معاها سلاطة كول سلو وبطاطس محمرة ومخلل، الساندويتش عادي مافيهوش حاجة مميزة. وعلشان نرضي حبنا للحلويات طلبنا شوكولاتة ألا كريم لامور (9 جنيه). طبقة مقرمشة من فطيرة مخبوزة عليها جبنة كريمي وطبقة سميكة من الشوكولاتة الغامقة، الفطيرة دي كانت مسكرة قوي لدرجة أنك هـ تحتاج تأكل حاجة حاذقة علشان توازن الطعم في فمك. على الرغم أن الناقد مجنون شوكولاتة إلا أننا فضلنا الكراميل أبل لامور (9 جنيه) لأنها كانت أخف وسكرها أقل.

...

دجاجي: توصيل وجبات دجاج للمنازل في مدينة نصر
اصدرت في: 31/01/2012

مع انتشار محلات الأكلات السريعة في كل المناطق كل واحد بـ يحاول يطور من نفسه ويكون الأسرع في الخدمة وفي التوصيل للمنازل والأهم أن ساندويتشاته تكون الأفضل ودسمة أكثر. ومع ذلك عدد قليل من المحلات دي هو اللي نجح في ده وقدر يخلينا ما ننساش تجربتنا عنده بسهولة. «دجاجي» محل بـ يعمل توصيل للمنازل بس في منطقة مدينة نصر وبـ يعمل وجبات دجاج مقلي زي كنتاكي.فيه ميزة في أنك تعمل محل دليفري بس، هي أن المطبخ بـ يبقى شغال على طلبات التوصيل فقط فـ الأكل بـ ييجي لك أسرع، يعني مش هـ يعدي أكثر من 40 دقيقة والأكل يكون عندك في أي حتة في مدينة نصر. وبـ يوصل لك ساخن ومقرمش ومغلف بعناية.المنيو فيه ساندويتشات دجاج وسمك فيليه (8 جنيه)، لكن الأفضل أنك تدخل في المفيد على طول وتجرب الوجبات؛ الدجاج المقلي المقرمش والمغطى بالخلطة والتوابل. فيه "وجبة الأصدقاء" سعرها 65 جنيه وفيها 9 قطع دجاج واختياراتك من الأرز أو البطاطس وسلاطات وعيش. والوجبة الأكبر فيها 12 قطعة (76 جنيه) مناسبة لعدد أكبر من الأشخاص أو واحد بس جعان قوي!ممكن تتخض من طعم الليمون اللاذع في التشيكن فينجرز (9 جنيه) لكن بعد شوية هـ تحب طعم أصابع الدجاج المقرمشة. واحد من المقبلات اللذيذة الموجودة عند «دجاجي». وجبة شرائح دجاج اللي اسمها Lady Meal بـ 17 جنيه طعمها وتتبيلتها شبه وجبات الدجاج الهندية، وكذلك البطاطس المحمرة اللي معاها. الوجبة الاقتصادية هناك بـ 24 جنيه وكانت محبطة بالنسبة لنا، لأن الدجاج فيها كان طعمه تقليدي جدًا زي اللي ممكن تأكله في البيت، واللحم فيها كان قليل. الأرز بتاعهم كان خطير، مِبهَر كويس وفيه قطع دجاج صغيرة وفلفل أخضر مشوي.بشكل عام أنك تطلب من «دجاجي» دي تعتبر تجربة في حد ذاتها. من أول الجاونتي البلاستيك وجيل تنظيف اليد بعد الأكل اللي بـ ييجي مع الطلب لحد قطع الدجاج المتبلة المقرمشة اللذيذة بسعر كويس. المكان يستحق يكون معروف أكثر من كده لأنه يعتبر من أحسن أماكن التوصيل في كايرو، أو علشان الدقة؛ في مدينة نصر.

...

روكيز: مطعم أكل سريع جديد في مول وندرلاند بمدينة نصر
اصدرت في: 17/11/2011

مول وندرلاند في شارع عباس العقاد كان مشهور لحد وقت قريب علشان البارك الترفيهي اللي هناك. ولكن لحسن الحظ الموضوع تغير كثير بعد ما فتح كثير من المحلات والماركات في المول، ومنها «روكيز – Rocky’s» وهو سلسلة مطاعم أكل سريع موجود في مدخل المول. بالداخل فيه مكان قعود صغير فيه ثلاث ترابيزات معدن متماشية ألوانها مع لون الحوائط الأسود والأحمر وفيه شاشة تليفزيون صغيرة، من السهل جدًا أننا نصنف "روكيز" كمطعم تيك أواي، ولكن بسبب الوقت الكثير اللي بـ يستغرقه تحضير الأكل هـ تلاقي نفسك بـ تجر جرسي وتقعد. المطعم بـ يشترك مع «بريجو - Prego» في نفس الحائط، "روكيز" بـ يقال أنه عنده أفضل بطاطس محمرة في القاهرة، وبالفعل البطاطس عنده كانت طعمها حلو قوي، مقرمشة، والحمد لله مش مزيتة زي اللي موجودة في المطاعم الثانية، طيب وباقي المنيو أخباره إيه؟ من ضمن محتويات قائمة الطعام هـ تلاقي البرجر، والفراخ والأكلات البحرية، لكن تشيكن روكيز (17.50 جنيه) أكثر حاجة شدتنا في المنيو، عبارة عن شرائح تركي مدخن وجبنة شيدر محطوطين على تشيكن كريسبي وخس، كل الكوكتيل ده شدنا أننا لازم نجربه، كان نفسنا يبقى قدر السرعة في تحضيره قد ما كان شكله لذيذ، للأسف الطلب أخذ 40 دقيقة تقريبًا علشان يجهز على الرغم من أن المكان كان تقريبًا فاضي! بيتزا السوبر سوبريم الملفوفة (18 جنيه) كان ممكن تقعد وقت أكثر في الفرن وما كانتش ملفوفة، كانت محشوة بمكونات البيتزا من جوه، كان طعمها لطيف مع مكونات السلامي، والزيتون والفلفل والجبنة السايحة. البيتزات الملفوفة دي برضه متوفرة بهوت دوج مكسيكي (17 جنيه)، وتشيكن باربكيو (19 جنيه)، وميكس سي فوود (22 جنيه). المنيو فيها كمان كذا نوع سلطة وباستا زي سلطة التونة (10 جنيه) وباستا التشيكن ألفريدو بالمشروم (21 جنيه)، تقدر كمان تأخذ الباستا كطلب جانبي مع أي طبق تختاره بـ 6 جنيه فقط، أما منيو التحلية فمافيهاش غير 3 حاجات فقط: تشوكولت وتشيز كيك (7 جنيه)، ورول القرفة (8 جنيه). روكيز مش مطعم بـ يقدم ساندويتشات وخلاص زيه زي غيره إلى جانب الباستا والسلاطات والبيتزا الملفوفة، لأن شعارهم اللي مكتوب في المنيو "لكل المزاجات" اسم على مسمى، على الرغم من أننا بـ نقعد ننتظر وقت طويل عقبال ما الأكل يجهز لكن الأكل عنده يستحق الانتظار. ممكن المرة الجاية بعد ما نطلب نقعد نتمشى فى المول شوية عقبال ما أكلنا يخلص.

...

ماي كوين: مطعم أكلات مصرية سريعة شغال 24 ساعة في المهندسين
اصدرت في: 10/11/2011

وأنت ماشي متجه لشارع جامعة الدول العربية هـ تلاحظ أن الدنيا بـ تظلم أكثر وأكثر كلما رحت أكثر ناحية شارع السودان وبـ تبعد عن الزمالك والكورنيش وكل الأماكن اللطيفة اللي بـ نحبها لأنك ممكن تشم فيها نسيم الهواء، وأنت ماشي بـ تختلف رؤيتك بعد ما كنت بـ تشوف محلات معروفة هـ تلاقي نفسك بـ تشوف محلات أصغر حجمًا وأقل شعبية. ولكن في الآخر هـ توصل لمطعم «ماي كوين – My Queen» بلونه الأخضر الليموني الواضح جدًا ومنور المكان حواليه، المكان ده بـ يقدم أكلات مصرية سريعة ومقسم لمنطقتين كل واحدة ما تبعدش عن الثانية كام متر، المنطقة الأكبر فيها ستاند كبير علشان تقف تأكل عنده مع الراجل بتاع الشاورما، المكان الثاني أصغر وفيه كاونتر علشان طلبات التيك أواى، وفيه كمان هناك بار سلاطات ممكن تغرف منه. المنيو حجمها كبير، بـ تطير العقل. الكفتة (21.50 جنيه) كانت ممتازة ومخدومة كويس ومقطعة لقطع طرية مليانة بطعم غني، الخمس قطع كفتة كانت أكبر من توقعاتنا خالص. زي الكفتة كان الشيش طاووق (21.75 جنيه) في نفس التسوية والحلاوة، على الرغم من أنه كان ناقصه صوص شوية، ولكن حطينا ملح وفلفل قليلين وده ضبط الموضوع، ضيف على كده أن قطع اللحم المشوي بالفحم والبصل والفلفل الأخضر كانت حلوة. طبق المأكولات البحرية (27.50 جنيه) عبارة عن مزيج من الأسماك والجمبري والكاليماري مع أرز بسمتى بصوص مملح ومالوش طعم، على الرغم من أن الصوص كان لطيف وخليط المأكولات البحرية وفر طعم رائع بشكل كبير وغطى على طعم الأرز الناشف. الأكلة الوحيدة اللي خيبت أملنا هناك ساندويتش الستيك بالمشروم (17.75 جنيه) كانت في عيش فينو كبير مليان شرائح مقطعة رفيعة لحم بقري مع شرائح كبيرة من المشروم متغطيين بصوص المشروم، اللحم البقري كان مفتقر للطعم وكان كاوتشوكي شوية وإحنا بـ نقضمه وكان طعمه أشبه باللحم البقري اللي بـ نشتريه من السوبر ماركت أكثر ما منه طعم ستيك. كمان العيش ما كانش له طعم، وكان طعمه أبرد من المكونات اللي داخله. كل طبق بـ تطلبه بـ ينزل معاه اختيارك من الأرز الأبيض أو البسمتى وبطاطس محمرة مرطبة، واللى كانت مالهاش أي طعم. ما اضطريناش ننتظر كثير على الطلب بتاعنا، والجرسونات كانوا دقيقين وكانوا بـ يردوا على أي استفسار مننا على أسماء الأطباق الغامضة، الناقد كاتب الموضوع كان سعيد وهو بـ يدور في القائمة الكبيرة بتاعتهم على طبق مفضل، المكان مثالي لإشباع الرغبة المستمرة والاشتياق الجنوني للأكلات السريعة المصرية.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن