مصري مطاعم in مدينة نصر Cairo, Egypt

مطاعم

البرنس: نسخة غير مبررة من المحل الشهير تفتح أبوابها في مدينة نصر
اصدرت في: 30/04/2014

بالنسبة لنا لغز الألغاز، ما حدش عارف ليه ولا إزاي يفتح مطعم ثاني في حي ثاني بـ يحمل نفس الاسم والشعار للبرنس ملك الكبدة الشهير الموجود في إمبابة، ويبدو للجميع وكأنه فرع ثاني للمحل في حين أن هو مش كده، بل والمطعم الأصلي يتبرأ منه على صفحات الجرائد ويقول "ليس لنا فروع أخرى" وأنه بـ يلاحقهم قضائيًا وأنه "لا برنس إلا البرنس" الموجود في شارع طلعت حرب في إمبابة. لكن يستمر محل «البرنس» الجديد في مدينة نصر في تقديم وجباته بنفس المنيو ونفس الأسعار ونفس الديكورات تقريبًا الموجودة في المحل الأصلي، ويبقى اللغز، ويزداد الأمر تعقيدًا لما تحاول تسأل أي من الموظفين هنا عن الموضوع وتلاقيه بـ يرد يقول أي كلام. لكن الجزء الأهم بالنسبة لنا كان الأكل نفسه، المطبخ، اللي هو سر تميز البرنس الأسطورة اللي خطف قلوب القاهريين وخلى القعدة هناك من ضمن طقوسهم لسهرات العشاء للأكيلة ولوجبات الإفطار والسحور في رمضان، وقبلة مهاويس الكبدة والفتة والطواجن، يا ترى قدر محل مدينة نصر أنه يوصل للمكانة دي أو يجبر الناس أنها تعترف به كمنافس قوي للملك في إمبابة؟ بعد تجربة وحيدة في «البرنس» ممكن نبدو قاسيين عليه حبتين في النقد، لكن الفكرة أن بعد الدعايا الكبيرة اللي عملها لنفسه والموقف غير المفهوم لاستخدام نفس الاسم والشعار كان لازم يبقى جدير بالتحدي والضجة اللي عملها على الأقل ولو على مستوى الأكل والمطبخ، لكن بعد ما طلبنا معظم الأصناف المشهور بها البرنس في زيارتنا الأخيرة حسينا بالإحباط والغيظ الشديد، هناك فرق.. الطعم غير والصنعة غير وشكل الأكل نفسه غير، المطعم هنا للأسف حسسنا أنه مسخ غير مكتمل لمطعم إمبابة، شبهه كثير في الديكور والتصميم وألوان الجدران والترابيزات، حتى شبهه في الخدمة وطريقة الموظفين العاملين، الطابع الشعبي الرسمي لو صحت لنا التسمية، حتى لحد ما نزلت لنا السلاطات كنا مبسوطين وحاسين بالمذاق الفريش للخضار والبابا غنوج، لكن مع ظهور الأطباق الرئيسية الموضوع اختلف كثير. طلبنا ربع كيلو من كل حاجة: كبدة جريل (38 جنيه) سجق جريل (38 جنيه) لحمة أميرية (45 جنيه) اللي شرائح اللحم الكندوز المقطعة زي الستيك ومعاها أرز بالشعرية بالكبد والكلاوي، وطاجن فتة باللحمة والعيش المحمص والصلصة (34 جنيه). طبعًا فيه ورقة لحمة وطواجن البامية والملوخية والعكاوي ومكرونات وأرز باللحوم والكبدة ومخاصي وحواوشي وكل الحاجات اللي ممكن تلاقيها في أي "برنس" وأسعار الأطباق عمومًا بـ تتراوح من 30 لـ 60 جنيه. الكبدة والكلاوي على الجريل هي أحسن حاجة ممكن تأكلها هنا، مخدومة كويس ومستوية كويس، السجق كان غريب وشكينا أنه مش لحم بلدي، عليه كمية طماطم مش طبيعية والتوابل والبصل قليل، وما كانش له الرائحة الجذابة المشهور بها السجق الشرقي على الجريل. الفتة باللحم كانت الأسوأ على ترابيزتنا، الصلصة اللي عليها كأنها حامضة أو مركونة من زمان، والأرز معجون مع العيش مش مفلفل وفريش، لكن الملفت أن كمية اللحوم كانت كبيرة فعلًا في كل الأطباق. طبق اللحم الأميرية أو الستيك الشرقي كان كويس وشرائح اللحم رقيقة جدًا ومستوية تمام، وزي ما قلنا في البداية السلاطات كانت جيدة جدًا. من طبقين حلو هم الأرز باللبن والكريم كراميل طلبنا أرز باللبن (7 جنيه) بـ يُقدم في طاجن فخار وطعمه كان رائع، واستعدينا للمغادرة بعد ما تأكدنا أن مش أي برنس يبقى برنس. المطعم في مجمله مش سيء، لكن المشكلة أنه أثار جدل كبير بظهوره خلت عليه العين وتوقعات الناس زادت من ناحيته، فالغلطة هنا بعشرة، لكن لو عاوز تأكل طواجن وكبدة ومكسل تروح إمبابة ممكن تتعامل في مدينة نصر، وهو بالمناسبة مش في عباس العقاد كمان زي ما هو كاتب في العنوان، لكن موجود في شارع داخلي موازي لعباس العقاد لما تدخل يمين من بعد ماكدونالدز اللي هناك، ودي غلطة ثانية.

...

تيستي بيستي: مأكولات بحرية ومشويات في شارع جانبي في مدينة نصر
اصدرت في: 07/04/2014

من وقت للثاني بـ نحاول نتفادى الشوارع الرئيسية الكبيرة اللي مليانة محلات ومطاعم، وندخل في شوارع جانبية هادئة أثناء رحلات بحثنا عن الجديد اللي ممكن نكتب عنه، وبنسبة كبيرة بـ تبقى جولاتنا موفقة وبـ نقع في أماكن مميزة، وبـ تبقى الإضافة الحقيقية للتجربة أننا بـ نكون سبب في أن الناس تعرف الأماكن دي وتقرأ عنها، لأنها عادة بـ تبقى مغمورة ومتدارية وما حدش يعرفها غير سكان المنطقة. آخر جولاتنا كانت في شارع جانبي متفرع من شارع عباس العقاد في مدينة نصر، اسمه شارع أحمد قاسم جودة، قريب من توكيل بيجو اللي هناك، ولاقينا مطعم اسمه «تيستي بيستي – Tasty Besty» متخصص في السي فوود والمشويات، لكن كمان بـ يعمل بيتزا وساندويتشات ومعجنات وطواجن وكبسة وحاجات ثانية كثير، من الآخر هو أقرب لمطبخ متكامل، لأنه قائم بشكل كبير على الكاترنج والدليفري، علشان كده صالة الطعام كانت مش قد كده، صغيرة والترابيزات مرصوصة بشكل عشوائي، مافيش أي اهتمام بالديكور أو التصميم الداخلي، لكن أهم حاجة أن المكان كان نظيف، والخدمة ودودة من صاحب المحل شخصيًا اللي كان أخذ الأوردر بنفسه واهتم أنه يرشح لنا بعض الأطباق، وجاب الشيفات لحد ترابيزتنا واللي واحد منهم متخصص في الأسماك والثاني في المشويات، وكل منهم وعدنا أن الأكل هـ يعجبنا، وعلشان كده كان لازم نجرب من المنيوهين الموجودين في المكان. نصف الوجبة سي فوود والنصف الثاني ميكس جريل! الأوردر أخذ وقت مش قليل علشان يجهز، لولا الشوربة والسلاطات اللي نزلت في الأول كنا قومنا مشينا من الزهق، لكن المفاجأة كانت في المذاق الخرافي لكل طبق نزل أمامنا، من أول سلاطة الطحينة لحد طاجن الجمبري، الشيفات فعلًا أساتذة وكل واحد وفى بوعده تمامًا، وبقينا مش مصدقين أن مجرد صدفة في محل مغمور زي ده ممكن تسبب لنا السعادة دي في وجبة أقل ما يقال عنها أنها ممتازة، نتكلم عليها شوية بالتفصيل. شوربة سي فوود مخلية (25 جنيه) بالكريمة والزعتر والكمون والسمك الفيليه، كمية وفيرة تكفي شخصين، وإضافات فريش وملح مضبوط، سمكة بوري صغيرة معمولة سنجاري (17 جنيه) بالخلطة السويسي والصوص المتشبع بالتتبيلة علشان تحطه على أرز الصيادية، وطاجن جمبري من الحجم الوسط (50 جنيه) وبالتحديد ربع كيلو جمبري كبير بـ 40 جنيه و10 جنيه لتحضير الطاجن بالطماطم والبصل والفلفل، ولا أجدع مطعم سمك في إسكندرية، والكاليماري المقلي (الكيلو بـ 80 جنيه) كان زي الفرايز اللي تسلينا بها جنب الأكل، بجد برافو شيف الأسماك هنا! طبق ميكس جريل بـ 57 جنيه فيه 4 قطع كباب وكفتة وربع فرخة مشوية وأرز أبيض، الكمية صغيرة شوية بس إحنا كنا شبعنا جدًا من السي فوود، لكن طعم الكباب اللي يجنن خلانا نأكله من غير عيش مع الطحينة والسلاطة الخضراء، الكباب مستوي قوي وبـ يذوب في الفم علشان اللحمة نفسها فريش، والمشويات كلها مغطاة بدبس الرمان وحاجة معتبرة، لا بجد استمتعنا هنا بوجبة غير متوقعة بالمرة، وكان نفسنا يبقى منيو الحلويات شغال علشان نجرب أم علي ولا الأرز المعمر باللبن، لكن الحلويات وبعض الأطباق الثانية بـ تبقى شغالة أكثر في الكاترنج. مطعم «تيستي بيستي» بـ يعمل طلبات خاصة زي الديك الرومي والفراخ الروستو والحمام والمحاشي والفخدة الضاني، وبالمستوى اللي جربناه هنا، نقدر نقول اعتمد عليه وأنت مطمئن لو عندك عزومة أو وليمة، وما تترددش أنك تدخل المطعم تطلب أكلة سريعة حتى لو المكان شكله مش محمس قوي من الخارج، المهم الصنعة، ونتمنى أنهم يهتموا شوية بالشكل الظاهري للمكان علشان الحلو يكمل.

...

باباي: الوجه الآخر لملك الأكلات الشعبية في مدينة نصر
اصدرت في: 13/11/2013

مافيش حد ساكن في مصر الجديدة أو مدينة نصر وماعداش عليه اسم «باباي»، لازم يكون طلب من عنده فطار مرة وهو رايح الشغل أو المدرسة، أو عمل منه أوردر علشان الدليڤري المشهور أنه بـ ييجي بسرعة الصاروخ، أو حتى وقف على البار المميز لمحلات الفول والفلافل وأخذ ساندويتش الحبشتكنات الشهير اللي هو عبارة عن كل حاجة على حاجة، فول على بيض على بتنجان على فلافل، بس شهادة حق «باباي» هو أحسن حد يعمل الميكس ده، وهو من أوائل الناس اللي عملوه وأطلقوا عليه اسم "حبش" للتسهيل وبعد كدة كل المطاعم التانية بدأت تقلدهم. النهاردة الزيارة كانت لسبب تاني وهي اكتشاف منيو الوجبات والمشويات اللي بـ يقدمها باباي واللي ماتقلش في جودتها عن منيو الشرقيات الأصلي. زرنا فرع مدينة نصر الموجود في شارع مصطفى النحاس، فيه مكان للجلوس في مساحة جانبية من المحل أشبه بتراس طولي محاط بجدران زجاجية، لأول وهلة يبدو ظريف وهادئ، لكن بعد ما بـ تدخل بـ تكتشف أنك تقريبًا قاعد في الشارع، وفيه قطط حواليك ومافيش الخصوصية اللازمة اللي هـ تحتاجها وأنت قاعد في أي مطعم. المهم أخذنا مكان هادئ إلى حد ما وطلبنا المنيو وكانت تاني مفاجأة أن مافيش منيو مطبوع لأسعار الأكلات وأنواعها داخل الصالة، فيه المنيو المخصص للتيك آواي اللي مش فيه الوجبات، وحتى أسعار الساندويتشات أقل من اللي الأسعار اللي بـ تتقدم بها في صالة الطعام، وقالوا لنا أن المنيوهات خلصت وده المتاح، ورغم أن الويتر ظريف ومهذب إلا أنه مش عارف تفاصيل كثير من اللي سألناه عليها فيما يخص الوجبات، وبقى يروح يسأل الشيف ويرجع لنا، وفي النهاية قررنا ما نرهقش أنفسنا ولا نرهقه ونطلب السهل وخلاص وقررنا نجرب الميكس جريل (50 جنيه) ووجبة الدجاج الكرسبي الحارة (25 جنيه) وحواوشي باباي المميز على سبيل المقبلات (11 جنيه) وبس كدة. الوجبة بـ تنزل مع أرز بسمتي وسلاطة خضراء وسلاطة طحينة وطرشي بلدي وعيش، يعني مش هـ تحتاج حاجة جنبها تقريبًا، الميكس جريل استبدلنا فيه ربع الدجاجة اللي بـ ييجي معاها بالكفتة المشوية، وكان فيه معاها كباب وشيش طاووق. الطبق كبير والكمية فيه كبيرة على غير عادة المطاعم اللي بـ تقدم ميكس جريل، الشيش طاووق نص نص والكفتة حلوة والكباب هايل، رغم اننا كنا متوقعين أن الآية تبقى مقلوبة، لأن الكباب بالذات محتاج صنعة وتخصص. وجبة الكرسبي المشطشطة كانت عادية، صدور دجاج مقلية بخلطة مقرمشة حارة، لكن ناقصها توابل وملح، والدجاج نفسه واضح أنه كان مجمد بقى له فترة. السلاطات لذيذة والأرز مفلفل وحلو، والحواوشي معقول بس مش بنفس الجودة اللي اتعودنا عليها من باباي أو زي ما كنا بـ نأكله من أكثر من 5 سنين فاتوا. كان لازم نطلب الشيك ونقوم بسرعة قبل ما القطط تشاركنا باقي وجبتنا، طلبنا نأخذ باقي الأكل تيك آواي واستخدمنا الحمام النظيف داخل المطعم وده مش موجود زيه في كل فروع باباي. تجربتنا هنا أكدت أنه يفضل أنك تأخذ أكلك تيك آواي من باباي وأن الوجبات الكاملة مش بحلاوة "الحبشتكنات" ومشتقاتها من العدس والبصارة.

...

مُصعب: مشويات رائعة مع ضيف غير متوقع في مدينة نصر
اصدرت في: 09/06/2013

مدينة نصر تعتبر من أهم الأماكن التجارية والترفيهية في القاهرة، والنشاط الترفيهي والتجاري "ما شاء الله" كل يوم بـ يزيد عن الثاني فيها وما بقاش مركزه في سيتي ستارز وجنينة مول والشوارع الرئيسية زي مكرم عبيد وعباس العقاد بس، لأ ده امتد لمناطق ثانية هادئة شوية زي شارع أحمد فخري اللي زورنا فيه مطعم "مصعب - Mossab"، لكنها مسألة وقت عقبال ما هـ يختفي الهدوء في المناطق دي وتنضم للكتلة الضوضائية في مدينة نصر. إحنا وأصحابنا في كل أماكن القاهرة دائمًا بـ نبحث عن مكان جديد مش تقليدي ويستحق التجربة، أصدقائنا في منطقة مدينة نصر رشحوا لنا مطعم "مُصعب" وقالوا لنا أن المشويات لها طعم مختلف وتستحق التجربة، ما كذبناش خبر وجهزنا نفسنا للزيارة وقابلنا ضيف غير متوقع وجوده في أي مطعم هـ نقول لكم عليه حالًا. في 7 شارع إبراهيم نوار "الهادئ" المتفرع من شارع أحمد فخري "الأكثر هدوءً" هـ تلاقوا مطعم له عدد من السلالم وبلوجو أحمر كبير يلفت نظرك من أول الشارع تحت اسم "مُصعب – Mossab"، دخلنا المحل النظيف جدًا وبديكوره البسيط اللي مسيطرة عليه ألوان البرتقالي والأحمر والأصفر عدد من الترابيزات على اليمين والشمال والكاشير في الوجه ومن خلفه المطبخ، اختارنا ترابيزة بالقرب من المطبخ وكنا قادرين نشوف المطعم كله ونستكشفه أكثر. بصينا في المنيو الكبيرة والبسيطة والواضحة في نفس الوقت ومُقسمة إلى وجبات ((Super – Mix – Mini والساندويتشات (العادية والراب والسوري) (من 11.50: 25 جنيه) وتقدروا تخلوها كومبو بإضافة 8 جنيه، وفيه كمان أطباق الأرز بأصناف مختلفة ما بين الكفتة والكبدة وكمان أطباق الفتة السوري سواء كان فراخ أو لحم (11: 23 جنيه). اختارنا من المنيو اللطيفة دي من وجبات السوبر وجبة تشيكن فيليه (38 جنيه) لكن الكاشير قال لنا أنها مش موجودة واختارنا بدل منها وجبة شيش طاووق (38 جنيه) ودي بـ تضم أرز وشيش طاووق ومشروب غازي مع سلاطة كول سلو وخبز سوري مع بطاطس وثومية، كمان اختارنا من وجبات السوبر برضه وجبة الستيك (35 جنيه) مع نفس الإضافات اللي قولنا لكم عليها مع اختيار ما بين البيبر صوص والمشروم، إحنا اختارنا البيبر صوص، بعد حوالي 20 دقيقة انتظار وصلت الطلبات والرائحة كانت خطيرة، لسه هـ نبدأ ووصل الضيف اللي ما كناش متوقعين أننا نشوفه في أي مطعم وهو صرصار متوسط الحجم بـ يتمشى على الحائط اللي جانب الترابيزة بتاعتنا، بعد التخلص من الضيف غير المرغوب فيه بضربة قاتلة، بدأنا في وجبتنا القوية والضيف غير اللطيف ما قدرش يفسد شهيتنا. خلينا نتفق أن البطاطس والخبز السوري والثومية وسلاطة الكول سلو وكمان الأرز كانوا كويسين بجودة أي مطعم ثاني، البطاطس ما كانتش مزيتة ومقرمشة ولونها ذهبي رائع والأرز حلو مبهر وطعمه جميل، أما الشيش طاووق كان متبل حلو وطازج، الستيك ده بقى كان حكاية، متسوي كويس وطازج وطعمه جامد مع البيبر صوص اللي أضاف طعم رهيب. قضينا وقت جامد في مصعب مع وجبة لذيذة ونظافة كويسة قوي في المكان باستثناء الضيف غير المرغوب فيه "الصرصار" اللي للأسف وجوده كان سبب في تقليل تقييم المطعم، بس ده "احتمال الواحد في المليون" زي ما بـ يقولوا، وأكيد ده مش ناتج عن إهمال أو كده بس هو فعلًا الغلطة اللي مافيش حد معصوم منها، جربوا "مصعب" وابعثوا لنا عن تجربتكم فيه.

...

إسكندراني: أحلى ساندويتشات كبدة وسجق في مدينة نصر
اصدرت في: 30/04/2013

ساندويتشات الكبدة والسجق أفضل مكان لها أنك تأكله من على عربية كبدة وسجق لكن مستوى النظافة في العربيات دي يقلق شوية، بس الكلام ده مش مع معدة الشعب المصري العظيم اللي تقدر تهضم الزلط (ما شاء الله)، في الوقت اللي إحنا عمالين ندور فيه على مطاعم جديدة لفت نظرنا إعلان مطعم على الفيسبوك اسمه "إسكندراني" وبـ يقول شعاره أنه بـ يقدم "أكبر ساندويتش كبدة في مصر"، كمان أنه بـ ينظم مسابقة لأكثر واحد يأكل أكبر عدد من الساندويتش ده هـ يفوز بموبايل سامسونج جلاكسي ميني 2 (هـ تكون آخر جولاتها يوم 1 – 5 – 2013)، تعالوا نشوف الكلام بجد ولا إيه؟ في مدينة نصر في شارع محمد حسنين هيكل المتفرع من شارع عباس العقاد خلف الجامعة العمالية هـ تلاقوا مطعم إسكندراني اللي له سلالم صغيرة ويافطة كبيرة باللون البرتقالي وعليها لوجو المطعم وفلفلتين شطة لونهم أحمر، أول ما تدخلوا هـ تلاقوا ترابيزتين على اليمين وثلاث ترابيزات أمام الباب والكاشير بجانبهم، الديكور بسيط خالص باللون البيج والأخضر على الحوائط وكان فيه أغاني سامي يوسف شغالة بصوت معقول. بصينا على المنيو الصغيرة اللطيفة اللي مقسمة إلى ساندويتشات الكبدة والسدق (السجق) والسدق بالصلصة (السجق برضه)، وفيه قسم الأطباق اللي بـ يحتوي على أطباق مكرونة بالكبدة الإسكندراني ومكرونة بالسدق الإسكندراني ومكرونة بالصوص الإسكندراني، وفيه الطلبات اللي عبارة عن طبق كبدة (14 جنيه) مكون من 250 جرام كبده مع خبز شامي وليمون، وطبق السدق (25 جنيه) بـ يتكون من 250 جرام سجق بالبصل والفلفل الأخضر والطماطم مع خبز شامي، كمان فيه الأصناف الجانبية زي المخلل (2 جنيه) أو البطاطس المقلية (6 جنيه) أو علبة طحينة (2 جنيه) وغيره. من المنيو اللطيفة دي على طول فكرنا في اللي إحنا جايين علشانه.. أكبر ساندويتش في مصر، اختارنا ساندويتش كبدة الجمرك كبير (20 جنيه) وساندويتش سدق مشوي الجمرك (28 جنيه) وكلمة الجمرك معناها أن الساندويتش بـ ييجي مع الطحينة والبطاطس وفي حالة السجق المشوي بـ يكون مع الفلفل والطماطم والبصل، الطلب أخذ وقت حوالي نصف ساعة لكن بسبب أن ما كانش فيه عدد كبير في المكان قدرنا نستنتج أنهم بـ يعملوا أكل بكمية قليلة لكن لو كان هـ ييجي سخن ومضبوط يبقى تمام. وصل أكبر ساندويتشين في مصر مع 3 ليمونات مقطعين أنصاف، الكبدة الجمرك كانت جامدة عليها طحينة مش قليلة وبطاطس محمرة كويس على الوش، الخبز كان طري ويذوب في الفم وقولنا نعصر ليمون على الكبدة ونجرب لكن الصراحة طعمها يستحق تجربوه، أما السجق المشوي كان كويس جدًا الفلفل والطماطم والبصل مع الكمية المعقولة من الطحينة أعطت له طعم لذيذ قوي غير البطاطس المحمرة، بس تجربة الليمون المرة دي ما كانتش قوي، كمان طلبنا 2 مشروب غازي (2.5 جنيه للواحد). كنا حابين نجرب أطباق إسكندراني زي طبق مكرونة بالسدق الإسكندراني الأنفوشي (20 جنيه) لكن أكبر ساندويتش في مصر بجد كان قفل أمامنا الاختيار ده، لكن المرة الجاية أكيد هـ يكون لهم نصيب في التجربة بتاعتنا، بالتوفيق لكل المشاركين في المسابقة.. "ربنا معاكم" يا وحوش.

...

طبلية: مطعم مغمور خاص بجنينة مول في مدينة نصر
اصدرت في: 06/03/2013

تخيل أن مركز جنينة مول التجاري الشهير له مطعم خاص به؟ مطعم في الدور الأول أمام المدخل الرئيسي مباشرة، اسمه «طبلية» ومكتوب تحت اسمه بخط صغير "المطعم الشرقي". يعني ده المطعم الخاص بالمول وفتح معاه من حوالي 14 سنة، طيب يا ترى حد راح المكان ده قبل كده؟ ولا الناس كلها بـ تروح هناك وتطلع في الأسانسير مباشرة على الدور الثالث اللي فيه الفوود كورت علشان تقعد في «سبكترا» أو تأكل في «كوك دور»؟ إحنا بصراحة كنا بـ نعمل كده لحد ما لمحنا المحل ومدخله الأنيق في الدور الأول وقررنا نستكشفه أكثر. بجانب باب المطعم هـ تلاقي المنيو محطوط على ستاند علشان تقرر أنت ممكن تأكل هنا ولا لأ. أكلات شرقية مصرية هي المسيطرة على المنيو، وبعض المشويات والساندويتشات. دخلنا من البوابة الصغيرة للمطعم لكن فوجئنا أن المكان كبير من الداخل وفيه صالة طعام أشبه بتراس طويل وفيه دور علوي ملحق بالمطعم. ديكورات المكان كلاسيكية لأقصى درجة، والإضاءات بسيطة والترابيزات مغطاة بالمفارش القماشية التقليدية، والموظفين لابسين ملابس رسمية. جو قديم شوية بس الرقي والهدوء بـ يبقى مطلوب أحيانًا، شكل المكان لائق على المنيو بتاعه جدًا، والهدوء اللي هنا هـ ينسيك أنك في المول أصلًا. وأكثر حاجة عجبتنا في شكل المكان التابلوهات والأعمال الفنية المعلقة على الجدران، أعمال مقلدة لفنانين مصريين معروفين وكلها من صميم البيئة والمجتمع المصري، كانت تسليتنا الوحيدة أثناء فترة انتظار الأكل اللي طولت شوية.لازم تجرب المقبلات الشرقية في مكان زي ده، طبق فيه وحدات من السمبوسك والسبرنج رولز والممبار وورق العنب (15 جنيه) كان المذاق فيه أكثر من رائع خاصة الرولز والسمبوسك، لكن ورق العنب كان واضح أنه بارد ومتسخن، لكن البداية مبشرة والشيف هنا ما بـ يهزرش. بوفيه السلاطات (16 جنيه) فيه كل أنواع السلاطات الشرقي بالإضافة للكول سلو، كله فريش وعجبنا شرائح المشروم المقطعة مع الطماطم والبصل. رغم زحمة الأطباق الرئيسية والطواجن والكباب والحمام والملوخية بالأرانب، حسينا أننا مش عاوزين نغامر بأكلات ممكن ما تتعملش بالإتقان الكافي لو مطعم مش متخصص أو مغمور نسبيًا. طلبنا بيف فيليه بصوص الريكفورد مع البطاطس والسوتيه (67 جنيه) ودجاج مطهي بتوابل الماسالا الهندية مع الأرز بالخلطة (55 جنيه) وعجبنا فكرة أن فيه أكلات هندية في المنيو، باعتبارها "شرقية" برضه، وعجبنا أكثر أنها اتعملت بحرفية شديدة، وعجبنا جدًا طبق الدجاج بصلصة الطماطم مع توابل الماسالا وشرائح البطاطس والجزر والبصل، وقطع الدجاج فيه كثيرة لكن مش مخلية، فيها أجزاء من العظم. الصوص مش حار لكن مذاقه فريد، لو حطيته على الأرز الغني بالمكسرات وشرائح جوز الهند هـ تستمع بالوجبة وهـ تتفاجئ من مستوى الشيفات هنا. طبق الستيك فيليه كان مخدوم كويس والسوتيه عندهم رهيب، لكن اللحم كان بـ يشد شوية، وهم ما تأخروش لما طلبنا منهم تسوية زيادة للحم لكن برضه النتيجة ما تغيرتش وده لأن اللحم ما كانش فريش كفاية. طبق أم علي (14 جنيه) هنا حكاية، هـ تخلصه وتطلب واحد كمان "علشان حجمه صغير"، وطلبنا عصير مانجو بجوز الهند "مانجو كولادا" (18 جنيه) لكن جاء لنا سموزي مانجو باللبن، سجلنا ملاحظتنا عند الجرسون المهذب، لكن ما طلبناش تصحيح الطلب واكتفينا بوجبتنا اللذيذة والتحلية الأحلى في «طبلية» وبدأنا نستعد للرحيل.الخدمة جيدة ومحترفة، بطيئة شوية لأن العمال قليلين، والإقبال كمان قليل لأن الدعاية والتسويق للمكان شبه معدومة، ما حدش يعرف المطعم ولا سمع عنه لا من خلال إعلانات ولا مطبوعات ولا من صفحات التواصل الاجتماعي، رغم أن مطبخه متميز فعلًا وأكلاته خطيرة، صحيح الأسعار مش قليلة، لكن بالتأكيد أفضل من اللي بنفس مستواه خارج المولات. تجربتنا كانت جيدة في «طبلية» والمرة جاية هـ نجرب المشويات بعد ما اطمأنينا على المستوى.

...

أم حسن: طواجن ومحمر ومشوي في مدينة نصر
اصدرت في: 18/02/2013

في العنوان استخدمنا الكلمات المكتوبة على المنيو وكذلك المستخدمة في حملة الدعاية المسموعة لمطعم «أم حسن» اللي بقت مغرقة الراديو في إذاعاته العامة والخاصة على أنغام أغنية "سلامتها أم حسن" لأحمد عدوية لكن هنا المغني بـ يتغزل في "أكلات أم حسن" والمحمر والمشمر والمشويات والطواجن و"الأنارب" بالملوخية. ما ننكرش أن الإعلان كان عامل جذب قوي بالنسبة لنا أننا نروح ونجرب المطعم المصري الجديد اللي فتح في قلب شارع عباس العقاد في مدينة نصر، ورغم تحفظنا على موضة أسماء المطاعم اللي فيها أسماء سيدات وأمهات وكثرت بزيادة زي «أم محمد» و«الست حسنية» و«الست أمينة» وأخيرًا «أم حسن» وكأن الأكل ما يبقاش مصري وبيتي إلا إذا كانت "أم فلان" هي اللي بـ تطبخ، وحتى لو دي حقيقة أن "النَفَس" الأنثوي في الأكل لا يعلى عليه، إلا أن التكرار وتشابه الأسماء بـ يفقد الفكرة كثير من رونقها. المطعم مكون من طابقين، الدور الأرضي مخصص للتيك آواي وفيه مكان صغير للجلوس أو الانتظار، والدور العلوي فيه مساحات كبيرة للجلوس وترابيزات بأحجام مختلفة. المكان شكله عائلي قوي، دائمًا المنيو بـ يحدد نوع الزبائن للمطاعم، الأكل المصري بـ يجذب الأسر ورجال الأعمال في عشاء العمل، ده كان واضح أول ما دخلنا وشوفنا شكل رواد المحل. الإضاءة ساطعة وبيضاء والديكورات بسيطة لكن شيك وباين عليها الحداثة (الافتتاح كان من مدة قريبة) والنظافة من سمات المكان اللي مافيش خلاف عليها، مش فاضل غير المأكولات اللي هـ تكمل الصورة الحلوة اللي كنا شايفينها.منيو ورقي عملاق مفرود أمام كل فرد على الترابيزة بدل الـ Cover التقليدي ومقسم لأعمدة فيها الأصناف المختلفة من المقبلات والمحاشي للطواجن والمكرونات، وركن للمشويات والوجبات الكاملة والحمام والبط وورقة اللحم، وفي نهاية المنيو أسعار تجهيز الحفلات وتسويات الخروف والزند والفخذات البتلو وغيره. فيه وجبة اسمها شواية أم حسن (135جنيه) فيها كيلو ونصف كباب وكفتة وشيش طاووق مع الأرز والسلاطات، ممكن تطلبها وتبقى موفرة جدًا لأنها تكفي فردين أو ثلاثة، لكن إحنا حبينا نجرب الأكلات المصرية المختلفة الموجودة في المنيو، فطلبنا طبق مقبلات متنوعة (70 جنيه) وهو عبارة عن سيرفيس كبير فيه رقاق باللحم المفروم ومحاشي مشكلة وممبار، الحقيقة السعر مناسب للكمية اللي تكفي 5 أشخاص تقريبًا بجانب أطباقهم الرئيسية، وطعم الرقاق الطري الغرقان في الشوربة والسمن البلدي كان خرافي، بيتي بجد بـ يفكرنا بوجبات عيد الأضحى مع الأسرة، وكذلك الممبار وورق العنب، الطبق ده كان شهادة اعتماد «أم حسن» عندنا وعرفنا أن المذاق والجودة وقبل أي حاجة "النظافة" هم عنوان للمطعم ده، وقعدنا مترقبين باقي الأطباق.طاجن فريك باللحم (40 جنيه) وطبق ميكس جريل 375 جم مع أرز وسلاطة خضراء وطحينة (55 جنيه) وفردة حمام محشية بالفريك (34 جنيه) ووجبة كفتة مشوية (40 جنيه) وطاجن فتة كوارع (50 جنيه) وما حدش يتخض لأننا كنا 5 أفراد وقت زيارتنا للمكان، وكانت فرصة عظيمة أننا "كمحررين كايرو 360" نجرب كل المذاقات دي من مطبخ «أم حسن». عجبنا جدًا الفريك باللحم بصلصة الطماطم، الفريك كانت طري وسخن مولع، وقطع اللحم البتلو كثير جدًا داخل الطاجن الفخار، والمذاق مش بس بيتي لكن فلاحي كمان. المشويات كلها لذيذة ومستوية كويس، بس مش أحسن حاجة تأكلها في المطعم، ده غير أن الكميات في الوجبات مش كبيرة ومش مشبعة قوي للفرد الواحد. فردة الحمام كانت أقرب لعصفورة صغيرة، لذيذة صحيح بس كثير عليها 34 جنيه، حتى لو متحمرة في السمن البلدي. الكوارع على وش الفتة بالعيش المحمص كانت من أجمل الأطباق اللي ممكن تأكلها هنا، وزي ما قلنا، هنا النظافة قبل الطعم، والطعم جميل برضه. السلاطات روعة لكن كمياتها قليلة. كان فيه اقتراح أننا نطلب بطة كاملة محمرة مع الأرز (125 جنيه) أو ملوخية بالـ "أنارب" زي ما بـ يقولوا في الإعلان (75 جنيه) ودي ممكن تكفي الكل، لكن استقرينا على الوجبات الفردية ونفعنا جدًا طبق المحاشي الكبير اللي ساعد في تحقيق الشبع للجميع. وختمنا وجبتنا بـ "فروتس أم حسن" اللي هو قطع الفاكهة المقطعة في عصير مانجو (10جنيه) وكان طعمه حلو والفاكهة فريش. مطعم «أم حسن» بـ يعمل حواوشي وصواني رقاق وطواجن عكاوي ومكرونة بالكبدة والسجق ودجاج محمر مع أرز بشعرية وتورلي وكمان فطير مشلتت مع العسل الأبيض، بـ يحاول قدر الإمكان أنه يعيشك في أجواء مصرية بيتية محببة. وريفية كمان لو أمكن. والخدمة جيدة وإن كان ينقصها بعض الخبرة اللي هـ يكتسبها العمال مع الوقت. حبينا المطعم وزيارتنا هـ تتكرر على فترات علشان نشوف هـ يحافظ على المستوى ده ولا لأ، وهـ نعرَّفكم طبعًا.

...

حسني: أكلات مصرية وأسماك في مدينة نصر
اصدرت في: 29/01/2013

مطعم كبير مكون من طابقين أمام مول السراج سيتي في شارع عطية الصوالحي في مدينة نصر. تقريبًا هو أكثر حاجة هـ تلفت نظرك أول ما تعطي ظهرك للمول، بمساحته الضخمة والإضاءات الساطعة باللون الأحمر، ولو قربت شوية هـ تشم روائح المشويات والأسماك والإغراء هـ يزيد أنك تدخل وتكتشف المطعم من الداخل.الدور الأرضي مخصص للكاشير والمطبخ وفيه ثلاجة كبيرة لعرض الأسماك، ورغم أن شكل الأسماك والجمبري وطريقة العرض كانت ممتازة، إلا أننا قررنا نجرب المنيو الشرقي والمشويات اللي ياما سمعنا عنها عند «حسني»، وبالمناسبة هو مالوش علاقة بمطاعم «عمو حسني» الشهيرة اللي بـ تعمل أكلات سريعة وساندويتشات. مطعم «حسني» اللي بـ نتكلم عنه النهارده فيه صالة طعام كبيرة بديكورات كلاسيكية وكراسي وترابيزات "ستيل" وإضاءات هادئة والجرسونات والمترات لابسين الملابس الرسمية. فيه عدد من الترابيزات بـ تطل على الشارع من الخارج، قعدتهم حلوة ومريحة والمسافات معقولة هـ تعطى لك قدر من الخصوصية، وممكن تتابع التليفزيون من أي زاوية في قعدات المكان.أطباق رئيسية من الأكلات الشرقية المتينة زي الموزة بالفتة والكوارع والريش وطواجن البامية والتورلي والحمام المحشي، وفيه منيو كامل للمشويات على الفحم، وواحد ثاني للأسماك والجمبري. المقبلات على كل شكل ولون، سلاطات شرقية ومزات ساخنة ومحاشي وشوربات من أول اللسان عصفور لحد شوربة السي فوود. وأخيرًا منيو محترم للحلويات والمشروبات. ما احتارناش كثير وتوجهنا على المفيد على طول؛ طبق مشويات مشكلة (الكيلو 126 جنيه) وطبق فتة مع موزة بتلو محشية باللحمة المفرومة "اختراع" وده كان بـ 65 جنيه، ومعاهم طبق محاشي مشكل حجم صغير بـ 15 جنيه، والسلاطات هنا بـ تنزل مع الأكل بسعر ثابت للفرد مع الكوفير بـ 4 جنيه وبـ تبقى سلاطة خضراء وطحينة وبنجر وزبادي ومخللات. كده السفرة اكتملت؟ نقول لكم على المذاق والخدمة بقى.. الأكل جاء بسرعة جدًا، 7 دقائق تقريبًا كانت كل حاجة أمامنا، والغريب أنها كانت باردة مش ساخنة مولعة زي ما توقعنا، وكأنهم بـ يطلعوا المشويات ويركنوها شوية، لكن الموزة المحمرة في الفرن كانت ساخنة وشكلها يفتح النفس، باقي الأكل ما كانش ساخن كفاية. طبق مشويات عظيم فيه كباب وكفتة وريش، ما كانش فيه طرب وقت زيارتنا، بس مش مهم لأن الطعم كان أكثر من رائع رغم برودة الأكل، الشواء والصنعة ممتازين، وشكل التقديم كان ظريف مع شرائح الفلفل الملون المشوية والطماطم. طبق الموزة البتلو المحشوة باللحم المفروم أو الملفوفة على لحم مفروم بـ تُقدم مع فتة بالصلصة الحمراء أو أرز بالخلطة، أكيد الفتة أحلى، وبـ يبقى تحت الموزة شعرية مسلوقة ومحمرة ومع الطبق بطاطس محمرة، بجد طبق خطير في كل حاجة، طعمه وسعره وكميته، واللحم البتلو كان خفيف ومستوي كويس مش دسم أو مليان دهون زي اللحم الضاني اللي له عشاقه طبعًا، لكن إحنا فعلًا استمتعنا بالطبق ده لأقصى درجة. مع طبق المحاشي اللي فيه ممبار وكوسة وورق عنب وباذنجان والسلاطات الفريش كانت وجبة مثالية في واحد من المطاعم العريقة أو اللي هـ تبقى عريقة في يوم من الأيام. وجربنا الجيلي بالفواكة (7 جنيه) بعد الأكل وعجبنا جدًا، رغم أن كان فيه أم علي وبروفيترول ومهلبية بس كنا عاوزين أخف حاجة على المعدة بعد الوجبة الدسمة اللذيذة.الخدمة جيدة جدًا، والنظافة في صالة الطعام مقبولة، لكن ممكن تبقى أفضل من كده في الحمامات، والأسعار بشكل عام معقولة، والأسماك مش بـ يبقى عليها سعر في المنيو فلازم تسأل بنفسك عن السعر اللي ممكن يتغير كل يوم. الأكل في مطعم «حسني» كان تجربة جيدة أكيد هـ نكررها، ولو مش في القاهرة هـ يبقى في فروع مطروح والإسكندرية.

...

القليوبي: فطائر ومعجنات في مدينة نصر
اصدرت في: 15/01/2013

القليوبي ده اسم كبير في عالم الفطير والبيتزا الشرقي على فكرة، ما كناش نعرف المعلومة دي إلا لما لاحظنا عدد الفروع المنتشرة داخل القاهرة وخارجها، ومن ذكر اسمه أمامنا في أكثر من مناسبة لما تيجي سيرة أكل الفطير. شوفنا له فروع في الجيزة ومدينة نصر وحلمية الزيتون وجسر السويس، وعرفنا أن أصله في مدينة قليوب نفسها وله فرع كمان في الساحل الشمالي. زيارتنا كانت لفرع الحي السادس في مدينة نصر، وبالتحديد في امتداد شارع الطيران جنب محل ساندويتشات «أبو رامي» اللي كنا كتبنا عنه قبل كده. المحل حجمه مش كبير وفيه أماكن محدودة للجلوس بالداخل وعلى الرصيف المقابل للمحل، في الشارع يعني. وفيه عدد من القهاوي البلدي القريبة من المكان واللي الناس عادة بـ يعملوا الطلب بتاعهم ويقعدوا يأكلوا على أي منها. فطائر حادقة وحلوة، بحشو داخلي وخارجي "بيتزا شرقي" وفيه بيتزا إيطالي عادية وفطائر وبيتزا صيامي وفطير مشلتت بالسمنة البلدي وحواوشي إيطالي وكريب فرنسي وسلاطات ومقبلات. من كل صنف هـ تلاقي 3 أحجام، ودائمًا فرق السعر مش كبير بين الوسط والكبير، وبعض الفطائر فيه منها 4 أحجام. جربنا فطيرة السجق البلدي الحجم الصغير (20 جنيه) والحجم الوسط (25 جنيه) وكانت مشبعة جدًا وطعم السجق فيها حلو بس حار شوية ولونه أحمر بزيادة مش عارفين ده بفعل الفلفل الأحمر ولا لون اللحم نفسه. المهم أن مع أي أوردر بـ تطلبه السفرة أمامك بـ تتملي مقبلات من اللي قلبك يحبها واللي مشهور بها المحل زي البطاطس المخللة والجبنة القديمة بالطماطم والمخللات والطماطم المخللة، وكل طبق من دول ثمنه جنيه أو 2 جنيه، يعني هـ تدفع في آخر القعدة 5 أو 6 جنيه مقبلات. من اختراعات المكان جربنا الحواوشي الإيطالي الحجم الصغير (20 جنيه) وهو مش صغير خالص بالنسبة لفرد واحد وهو أقرب لفطيرة مقرمشة من الخارج ومغطاة بالسمسم ومحشوة باللحم المفروم والجبن والخضروات ومستوية في الفرن. طعمه حلو بجد وحجمه مثالي بالنسبة لسعره، وجدير ببراءة اختراع «القليوبي».بعد الأكل الحار والمشطشط هـ يلزمك فطيرة بالشوكولاتة والموز (25 جنيه) ودي تكفي 3 أو 4 أفراد علشان يحلوا بها بعد ما يكونوا تقريبًا شبعانين. الطعم حكاية وكمية النوتيلا والموز وفيرة، بس خلي بالكم من الزروطة واعملوا حسابكم في مناديل علشان المكان مش بـ يوفر مناديل على الترابيزات.الكريب هنا شكله معقول، بس مؤخرًا بقينا نفضل الأماكن المتخصصة فيه علشان سبق وكان لنا تجارب مش لطيفة مع الكريب بالذات. ممكن تحط إضافات زي ما أنت عاوز على فطيرتك أو بيتزتك بأسعار من 5 لـ 12 جنيه، وإحنا هنا بـ نرشح لك الجبن الكيري والمشروم على أي حاجة مملحة. «القليوبي» حببنا في أكل الفطير وإحنا قاعدين في الشارع، صحيح الخدمة بطيئة شوية نظرًا للإقبال الكبير وقلة عدد العاملين، لكن ما عندناش مانع نروح ثاني بس المرة دي هـ نأخذ أكلنا ونروح نقعد على قهوة قريبة علشان نلاقي مكان نغسل فيه أيدينا بعد الأكل.

...

أبو رامي: ملك الساندويتشات في مدينة نصر
اصدرت في: 09/10/2012

إحنا مؤمنين أن مش جودة الأكل ولا الأسعار الكويسة والخدمة بس هم اللي بـ يعملوا اسم للمطعم وبـ يصنعوا شهرته، لكن فيه عوامل إلهية أو ممكن نقول عليها كده بركة دعاء الوالدين بـ تخلي مكان يوصل لسابع سماء (طبعًا بعد توافر الشروط الأساسية للنجاح وهي الجودة والسعر والكلام ده كله) وتخلي مكان ثاني في سابع أرض حتى لو هو ما يستحقش كده. مطعم «أبو رامي» من النوع الأولاني، اللهم لا حسد وربنا يزيده طبعًا، بس فيه حالة خاصة بينه وبين زبائنه بـ تفكرنا بمحلات زي البرنس في إمبابة وعمو حسني وبابا عبده وعبده تلوث وبيبو في شبرا، الحالة دي بـ تخليه دائمًا زحمة وترابيزاته مليانة وفيه قوائم انتظار كمان، ده غير التيك آواي والعربيات اللي واقفة حول المحل اللي واخد ناصية مهمة في امتداد شارع الطيران في الحي السابع في مدينة نصر. المطعم اشتهر بالساندويتشات في البداية، كبدة إسكندراني وسجق ولحم مفروم وسكالانس الحلاوة بالقشطة. لكن حاليًا هو مطعم متكامل وفيه صالة طعام مكيفة وبـ يقدم بجانب الساندويتشات مشويات ومعجنات وفتة ووجبات اللحوم والدجاج والأسماك وكل أنواع الشوربة والسلاطات.مش هـ نخبي عليكم إحنا من زبائن «أبو رامي» المخلصين، بس بـ نحب المنيو الأصلي بتاعهم، يعني كبدة وسجق وبيض بالبسطرمة وبلوبيف بالجبنة الرومي، الأسعار في القسم ده من 4 لـ 6 جنيه للساندويتش، رغيف فينو طوله حوالي 15 سم، الحشو فيه كميته معقولة جدًا والطعم حلو ومشطشط حتى لو أنت مش طالبه سبايسي، بس ده جزء من حلاوته، وممكن تحاول تصطاد الفلفل الحار من داخل الساندويتش، ساندويتش السجق البلدي بالجبنة الرومي هو المفضل بالنسبة لنا، وكفتة داوود باشا. 4 ساندويتشات من الأصناف دي ممكن يشبع فرد واحد، مع سلاطة البطاطس والطماطم المخللة اللي بـ تنزل (الطبق بـ 1.5 جنيه) والمخللات، بس بـ ننصحك بواحد حلاوة بالمربى بالقشطة بعدهم، علشان القفلة تبقى مضبوطة، وانسى الدايت هنا طبعًا.الشاورمة هنا مش قد كده، يعني الأحلى من فتة الشاورما هو الأرز المكسيكي بالدجاج والأرز بالكبدة الإسكندراني أو بالفاهيتا (16 جنيه) فيه أو أرز بالجمبري بالكاري (22 جنيه)، الأرز هنا فيه توابل تجنن وكميته كويسة. فيه كمان مكرونة بالسي فوود (22 جنيه) أو إيطاليانو بالصوص الأحمر واللحم أو الدجاج (16 جنيه) ودي من الحاجات اللي جربناها قبل كده وعجبتنا. ومن الوجبات ممكن تجرب الميكس جريل أو ورقة اللحمة (40 جنيه) أو وجبة كريسبي (26 جنيه) وكله بـ يُقدم مع أرز أو بطاطس وعيش وسلاطة. ولو عاوز تتعامل مع «أبو رامي» كأنه كبابجي عادي ممكن تطلب أطباق أو تيك آواي بالكيلو، ومشكل الكباب والكفتة هنا بـ 130 جنيه، والريش بـ 180 جنيه، والطرب بـ 100 جنيه. القعدة في المحل قعدة أكل وبس، ترابيزات وكراسي بلاستيك بسيطة في الهواء الطلق، بس الخدمة صاروخية والأكل هـ ييجي لك في غمضة عين. الصالة المكيفة عائلية شوية وممكن تتحمل تقعد فيها وقت أطول، ومجهزة بـ wi-fi وفيها طبعًا حمام. الساندويتشات هي سر تألق «أبو رامي»، أي ساندويتش هـ تلاقيه حلو ومخدوم كويس قوي، والجديد عنده هو ساندويتشات السي فوود اللي عاملة أحلى شغل مع زبائنه. «أبو رامي» اختيار مناسب جدًا لخروجات آخر الشهر والأسعار اللي في اللذيذ.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن