مأكولات بحرية مطاعم in مدينة نصر Cairo, Egypt

مطاعم

أولاد طأطأ: مأكولات بحرية مصرية صحية في مدينة نصر
اصدرت في: 07/02/2013

افتتاح مطعم "أولاد طأطأ" في شارع مصطفى النحاس بمدينة نصر حمس سكان المنطقة وقالوا لنا: "لازم تجربوه".. وبالفعل جربناه.أي مكان هـ تروحوه في مدينة نصر هـ تلاقوا المشكلة الأساسية في أنكم تلاقوا مكان للركنة، وأولاد طأطأ مش مختلف في الحكاية دي، لحسن حظنا شباب خدمة التوصيل قرروا يوسعوا لنا علشان نقف فى المكان بتاعهم.المطعم مُقسم لدورين: الدور الأول صغير وهادي وهو الدور اللي المطبخ موجود فيه، الدور الثاني أكبر ومليان صخب وزبائن، اللون البرتقالي مسيطر بصورة كبيرة على ديكور المطعم، مع صور مُعلقة على الحائط لمخلوقات بحرية متنوعة.مجرد ما قعدنا جاب لنا الجرسون فوط ساخنة علشان ما نضطرش نروح للتواليت، تم تقديم عصائر لنا هدية من المحل مع سلة من الخبز الشامي الطازج، الخبز كان مخبوز مخصوص للمطعم وما تذوقناش قبل كده خبز طازج وطري بـ يذوب في الفم زيه.المنيو متنوعة مع اختيارات زيادة للمأكولات البحرية المصرية، طلبنا سلاطة طحينة (4 جنيه) وخيار مخلل (4 جنيه)، الطحينة كانت عادية بس لابد تبدأ بها مع الأكل البحري، اختارنا كفتة الجمبري (20 جنيه) اللي كانت فسفورية ولذيذة جدًا.أرز السي فود (8 جنيه) بـ يُقدم مع جمبري صغير ومكعبات الكاليماري، الكمية كان فيها كرم زيادة وتقدر تشاركها مع شخص آخر، بالرغم من أن الأرز يعتبر أساسي في الأكل البحري إلا أن مازال محتفظ بحقه في أنه يكون طبق مستقل بذاته، مكرونة السي فود بـ تكون ما بين البينا والسباجيتي مع صوص ألفريدو أو الأرابياتا، اختارنا البينا مع صوص ألفريدو (25 جنيه) وبـ تُقدم مع جمبري صغير ومكعبات الكاليماري، المكرونة كانت أفضل من الأرز.علشان نكمل استمتاعنا بالوجبة البحرية طلبنا 250 جرام سمك فيليه (الكيلو بـ 90 جنيه) 3 قطع من السمك كافيين قوي لشخص واحد، الفيليه المقلي كان واخذ طبقة لون ذهبي لكن المشوي كان متبل أحسن وأخف على المعدة.الجمبري سعره بـ يتراوح بين 120: 220 جنيه للكيلو ويعتبر من أغلى الاختيارات على المنيو وبرضه على حسب حجم الجمبري، طلبنا 250 جرام حجم متوسط مقلي (150 جنيه للكيلو) والكمية كانت تكفي شخصين، الجمبري طازج وكان متسوي كويس وواخذ اللون الذهبي الجميل، بس التتبيلة ما كانتش قد كده.وجاء الموعد مع بطل الأبطال، طلبنا ملوخية بالجمبري (15 جنيه) لو كنتم من مشجعي الملوخية أكيد هـ يعجبكم الاختراع ده، الشوربة كانت مطبوخة مافيهاش غلطة مع الجمبري الصغير اللي أضاف طعم لذيذ صعب يتنسي.مش بس جودة السي فود اللي هـ تخلينا نكرر الزيارة لأولاد طأطأ لكن تلبية الطلبات اللي هـ تطلبوها ومستوى الخدمة هـ يخلي أولاد طأطأ مكان مُفضل جديد في مدينة نصر.

...

جندوفلي: سمك وجمبري وتخصص جندوفلي في مدينة نصر
اصدرت في: 13/01/2013

في أهدأ وأرقى وأغلى بقعة في مدينة نصر وبالتحديد في منتصف شارع أبو داوود الظاهري موجود محل له باع في عالم الأسماك والمأكولات البحرية هو «جندوفلي»، كان لنا زيارة في كايرو 360 قبل كده من 3 سنين لفرع المعادي، وبعد الفترة دي قررنا نجرب فرع مدينة نصر اللي مش بـ يختلف كثير عن فرع المعادي الأنيق وإن كان الفرع هنا أقل في كل شيء، زيارتنا اللي استمرت قرابة الساعة ما كنتش شيقة زي ما كنا متوقعين، وكان عندنا عدد من التحفظات بخصوص الخدمة ومستوى الطعام.المكان من الداخل صغير بالمقارنة باللي تعودنا عليه في مطاعم السمك المعروفة اللي مساحتها بـ تبقى كبيرة بشكل مبالغ فيه، هنا الوضع مختلف والمحل مكون من طابقين الأرضي هو الأكبر وفيه حوالي 6 ترابيزات والدور العلوي "المغري أكثر للجلوس" كان خارج الخدمة وقت زيارتنا علشان الـ Staff كان مش كفاية على حد قول الجرسون اللي استقبلنا، فأخذنا مكاننا جنب أحد الشبابيك المطلة على الشارع الهادئ، وبدأنا نتأمل ديكور المكان اللي مش واضح معالمه من كثر زينة وإضاءات الكريسماس والعام الجديد اللي لسه موجودة في أركان المحل، ومع ذلك قدرنا نشوف أن الديكور بسيط بألوان خشبية هادئة وشاشات تليفزيون على الجدران بـ تعرض أفلام أجنبية بدون صوت والترابيزات لحسن الحظ مش عليها المشمع الكئيب الموجود في معظم مطاعم الأسماك، ودي كانت بادرة تفاؤل بالنسبة لنا أن فيه هنا حاجة مختلفة.ثلاجة عرض فيها كمية محدودة جدًا من الأسماك والجمبري، ما عجبناش فيها إلا سمك موسى (الكيلو 125 جنيه) بلونه الغامق من الخارج ولحمه الأبيض النقي من الداخل، ورجعنا لترابيزتنا نتفرج على المنيو اللي هو بالضبط أي منيو مطعم أسماك حتى بجملة "سعر الجمبري حسب اليوم" اللي بـ تخلينا نسأل شفويًا عن سعر كل جمبري حسب حجمه. شوربة السي فوود هي البداية الطبيعية في مطعم السمك، طلبناها مخلية (29 جنيه) وقُدمت لنا فريش بعد ما جاء الجرسون وغرفها أمامنا في الطبق من إناء معدني كبير كان في يديه، وكانت لذيذة وعامرة بالجمبري والكابوريا، لكن شوربتها كانت خفيفة مش كريمية وسميكة زي ما بـ نحبها. طلبنا طبق مشويات مشكلة (54 جنيه) فيه سمك فيليه ووحدات جمبري صغيرة وأصابع كاليماري وجندوفلي لذيذ ونظيف تمامًا تقززه زي اللب، وكفتة سمك ومعاه أرز بالجمبري، السمك فيه هو أحلى حاجة والكفتة فكرتنا بالطعمية الباردة بلونها الأخضر وطعمها الكاوتشوكي، لكن مع سلاطة الطحينة والطماطم (6 جنيه) وسلاطة الرنجة بالفلفل الملون (7 جنيه) كل حاجة ممكن تتاكل، خاصة مع المستوى المتميز للسلاطات عند «جندوفلي». طلبنا جمبري بالحجم الكبير (الكيلو 160 جنيه) معمول بطريقة الصينية بقشره مع صلصة الطماطم والفلفل الأخضر ودي كانت أحلى حاجة تتحط على ترابيزتنا اليوم ده، وممكن بعد ما تخلص الجمبري الفريش تحط الصوص بتاعه على الأرز أو تأكله بالعيش لحد ما تخلص الصينية المعدنية العملاقة اللي بـ يُقدم فيها. وما نسيناش نطلب سمكة موسى واحدة صغيرة أقل من ربع كيلو ونأكلها مقلية على سبيل التجربة بعد ما عجبنا شكلها في العرض وفعلًا كانت ألذ من أي نوع سمك ثاني ممكن نأكله وعرفنا أن الغالي ثمنه فيه وعرفنا ليه أكيلة السمك دائمًا بـ يحكوا ويتحاكوا عن سمك موسى الخطير. وجبة مشبعة لفردين كلفتنا حوالي 200 جنيه، مش بطال بالنسبة لمحلات الأسماك وأسعارها الخيالية، وبالنسبة للمطعم وموقعه اللي خلانا نتوقع أننا هـ ندفع مبلغ أكبر من كده، لكن في نفس الوقت الخدمة البطيئة والملولة كانت من أبرز سمات التجربة، وخلتنا عاوزين نأكل ونقوم بسرعة، وحسينا أن فيه حالة مش طبيعية من التأفف لموظفين المكان ومش عارفين ده كان وقت زيارتنا بس ولا ده سمة من سماتهم، وفي الحالتين ده أكيد بـ يأثر بالسلب على تقييمنا للمكان ككل، لكن ده ما يمنعش أن الأكل حلو عند «جندوفلي» مع وجود بعض الاستثناءات اللي ممكن تختفي لو عملت الطلب تيك أواي أو دليـﭭري مع انتقاء جيد لنوع السمك وطريقة التسوية.

...

سي فوود هاوس: أفطار في أحدث مطعم أسماك في مدينة نصر
اصدرت في: 24/07/2012

مطعم أسماك جديد فتح قبل أقل من شهرين في شارع عباس العقاد في مدينة نصر، «سي فوود هاوس» موجود فوق كافيه «ساعة لقلبك» وله مدخل جانبي وصالة الطعام الخاصة به كلها في الدور العلوي والدور الأرضي فيه ثلاجة عرض الأسماك والتيك آواي. نظرة بسيطة على المحل من الخارج واللافتات اللي عليه هـ تعرف أنك أمام مطعم شيك جدًا وأكيد أسعاره هـ تبقى على نفس مستوى أناقته. طلعنا درجات السلم القليلة قبل ما نأخذ مكاننا على ترابيزة صغيرة جنب التراس الجدار الزجاجي اللي بـ يطل على الشارع الحيوي. المكان كله مغلق ومكيف، وزينة وفوانيس رمضان كانت حولنا من كل ناحية وشاشات تليفزيون قريبة من كل الترابيزات. الديكور باللون الخشبي والبيج والإضاءات بيضاء ومريحة للعين، ولحسن الحظ ما كانش فيه "المشمع" الشهير الموجود على كل الترابيزات في مطاعم المأكولات البحرية. يعني المكان كان فعلًا أنيق في كل تفاصيله وقعدتنا كانت مريحة وحبينا المكان رغم أننا وصلنا بدري قبل آذان المغرب بحوالي ساعة ونصف لكن الوقت عدى بسرعة في «سي فوود هاوس». طبعًا بـ نحتاج نحجز لعدد الأفراد بالتليفون قبل ما نروح في رمضان ولو في نفس اليوم، وممكن تعمل الطلب كمان لو كنت عارفه، لكن لو حجزت ووصلت قبل أقل من ساعة من المغرب مش هـ يبقى أمامك غير المنيو الثابت أو الـ Set Menu الخاص بالأفطار واللي بـ يبقى فيه أصناف محددة. قبل ما نقعد تفرجنا على الأسماك والجمبري الموجودة في العرض وطلبنا منها جمبري جامبو (الكيلو بـ 280 جنيه) وحبينا نجرب المنيو الثابت للأفطار، وأسعاره 120 و140 و160 جنيه للفرد، السعر بـ يزيد بزيادة وحدات وحجم الجمبري ونوع السمك، يعني لو اخترت دنيس بدل البوري بـ يزيد ثمن الوجبة، وفيه أصناف ثابتة في الوجبة وهي الشوربة والأرز بالسي فوود والسمك الفيليه المقلي وكفتة السمك والكاليماري المقلي، و3 أنواع سلاطة من اختيارك ومشروب رمضاني وطبق حلويات شرقية. قبل المغرب بدقائق بدأت السلاطات والعيش الأبيض الطازج والمشروبات تنزل أمامنا، ولاحظنا الإقبال على المطعم في الأيام الأولى لرمضان واكتملت أجواء رمضان لحظة المدفع وشعرنا بجو ألفة مع العاملين بالمحل بسبب خدمتهم المتميزة وخفة ظلهم. وبدأنا نستكشف الأطباق اللي نزلت لنا. الوجبة كبيرة وغنية مافيش كلام، فيها الحلو وفيها اللي عليه ملاحظات من حيث الطعم، السلاطات والشوربة والفيليه والأرز والجمبري كانوا رائعين، السمك الدنيس المشوي بالزيت والليمون حسب رغبتنا كان واضح أنه مش طازج قوي ولحمه ناشف شوية، والكاليماري كمان مش طري بعد القلي وحجمه كان صغير قوي. قمر الدين كان لذيذ رغم أن سكره زيادة، لكن لما طلبنا عصير تمر هندي (8 جنيه) كان مافيهوش نقطة سكر ولا حتى تمر هندي أصلي، كان مجرد ماء مورد مثلج. أي نوع سلاطة بـ 5 جنيه، طلبنا سلاطة حارة من الطحينة والصلصة الحمراء خاصة بالمكان وكانت لذيذة ومميزة فعلًا. وأرز الصيادية السادة بـ 11 جنيه مفلفل وكميته كبيرة. لكن اللي كان اختيار موفق جدًا هو الجمبري الجامبو المشوي زي الفاهيتا على الجريل مع الخضروات والبصل ومحشو بخلطة من الزبدة والليمون، جمبري بترفلاي Butterfly زي ما عرفنا اسم طريقة التسوية، بـ يُقدم وهو لسه بـ يطش على حامل الجريل وورق الفويل، هـ تشوفه وهو بـ يستوي أمامك والرائحة هـ تجننك. وكل ما يكون حجم الجمبري أكبر كل ما هـ يكون أفضل في طريقة التسوية دي. طبق الحلو فيه وحدات قطائف وبلح الشام وكنافة، لذيذ بس مش زي محلات الحلويات الشرقية طبعًا، الخدمة رائعة والتوقيتات جيدة في تقديم الأطباق، والمكان نظيف ومريح، المنيو غني بأصناف الأسماك والجمبري والأستاكوزا والسعر بـ يتغير في العرض، يعني مش مكتوب في المنيو. وفيه بيتزا وآيس كريم للأطفال. سعداء أن تجربتنا في «سي فوود هاوس» جاءت في رمضان، وبـ نرشحه لكم لأكلة سمك محترمة السنة دي.

...

بحري: مأكولات بحرية مبتكرة في مدينة نصر
اصدرت في: 02/04/2012

بعد كده هـ نسمي مدينة نصر "أرض المأكولات البحرية"، عدد كبير من مطاعم الأسماك الكبيرة موجود في المولات والشوارع الكبرى للحي العملاق، يعني بعد "كاستن" و"البرج" و"أستاكوزا" وغيرهم، اكتشفنا مطعم جديد مهم جدًا ما كناش كتبنا عنه وهو مطعم «بحري» الموجود في شارع مكرم عبيد بعد شركة السلاب مباشرة وعلى نفس الصف. مكون من دورين، له يافطة مضيئة باللون الأبيض على خلفية حمراء مكتوب عليها (مطعم أسماك بحري)، المدخل في الدور الأرضي صغير لكن الدور العلوي واسع وله واجهة ضخمة بـ تطل على الشارع. أول ما بـ تدخل المطعم بـ تلاقي عرض للأسماك الطازجة على يمينك وبعد كده الكاشير ثم صالة طعام مكيفة في آخر الممر، والطابق العلوي مساحته أكبر بكثير وفيه أكثر من 20 ترابيزة بأحجام مختلفة، والديكور كله بألوان أبيض وأحمر وخشبي وكل الجدران والأرضيات والعمدان من الرخام اللامع، ولأول مرة ندخل مطعم سمك وما نلاقيش المشمع الكئيب على الترابيزات. لاحظنا أن المشمع ده بـ يبقى مكون رئيسي في ديكور مطاعم الأسماك مهما كان مستواها وشياكتها. باختصار مطعم «بحري» شيك جدًا ومريح نفسيًا –رغم الدوشة اللي كان عاملها بعض الأطفال وقت زيارتنا– وواضح كمان أن كثير من الموجودين في المحل زبائن دائمين. كل العاملين في المطعم كانوا بـ يتكلموا باللهجة الإسكندرانية، وده زود إحساسنا بالثقة في الأطباق اللي جاية بمنطق "ادي العيش لخبازه"، وبدأنا نستعرض المنيو متعدد الصفحات واللي مقسم لـ: أرز ومكرونات بحري، طواجن وجمبريات وقشريات، وأطباق بحري، وأسماك، والشوربة والسلاطات. الأسعار أغلى من أي مطعم أسماك ثاني من اللي إحنا ذكرناهم، وده كان له أثر مباشر على شكل رواد المكان. يعني كيلو سمك موسى بـ 135 جنيه، والوقار بـ 105 جنيه، والبوري بـ 50 جنيه والبربوني بـ 125 جنيه. والجمبري الكبير بـ 170 جنيه. التسوية حسب رغبتك طبعًا. وعجبنا منيو أطباق بحري اللي فيها أصناف متعددة من الكاليماري والفيليه البياض والجمبري وممكن تطلبها مشوية أو مقلية، وميزتها أنك هـ تقدر تجرب كل الحاجات وبسعر معقول. الطبق بـ 50 جنيه وكميته معقولة، وفيه أطباق مبتكرة زي الفيليه المحشي بالسي فوود والكانيلوني صينية البوري بالبطاطس بأسعار بين 40 و60 جنيه. شوربة السي فوود دي شيء أساسي، الحجم الكبير بـ 50 جنيه، غالية شوية بس تكفي فردين ومليانة جمبري وكابوريا مخلية، سخنا بها مع سلاطة الرنجة الرهيبة (10 جنيه) والطحينة والعيش الأبيض المقرمش، وبعد وقت بسيط نزلت أمامنا الأطباق الرئيسية وهي سمكة بوري مشوية وطبق بحري المشوي اللي فيه فيليه وجمبري حجم كبير وكاليماري بخلطة البصل والفلفل الملون. أحلى مرة نأكل فيها بوري مشوي في القاهرة، لأن التسوية خلت لحم السمك طري جدًا بـ يتفصل بمنتهى السهولة عن الشوك والقشر، والتتبيلة والخلطة مالهاش حل. طبق بحري زي ما قلنا معمول للي عاوز يجرب كل الأصناف، لكن مش لأكيلة السمك. من ضمن اختراعات المكان عصير الجمبري الساخن، طبعًا مش لأصحاب القلوب الضعيفة، كوباية جمبري مضروب في الخلاط، الموضوع مش سهل، بس القيمة الغذائية مش عاوزة كلام. الخدمة سريعة ومحترمة، ونظافة المكان (خصوصًا الحمامات) وشياكته كانت محل إعجابنا طول الفترة اللي قضيناها هناك. تجربتنا في «بحري» كانت جيدة جدًا، وبـ نرشحه كواحد من أحسن مطاعم الأسماك في القاهرة، سواء هـ تقعد في صالة الطعام أو هـ تأخذ واحد شوربة تيك آواي على السريع.

...

أستاكوزا: مطعم أسماك شيك في مدينة نصر
اصدرت في: 19/01/2012

مش عارفين بالضبط إيه سبب أن كثير من مطاعم المأكولات البحرية بـ تبقى ضخمة ومكونة من كذا دور وعدد لا نهائي من الترابيزات وأحيانًا ديكور شيك وأناقة وكلاسيكية مبالغ فيها، طبعًا إحنا مش متضايقين من ده لأنه في النهاية في صالح الزبون -اللي هو إحنا!- وتفسيرنا الوحيد أن ده ممكن يكون تم من باب المنافسة والتقليد بين أولاد الكار الواحد، خاصة أن المطاعم دي كلها لها طابع عام متشابه، لاحظنا ده في مطاعم زي «البرج» و«كاستن» و«بحري» وأخيرًا «أستاكوزا»، اللي شكله من الخارج حسسنا أنه شركة طيران أو سفارة السويد! مبنى زجاجي له واجهة باللون الأزرق وإضاءات موزعة بدقة، ويافطة مميزة باللون البرتقالي مكتوب عليها بطريقة فنية Estacoza ولولا الاسم ده اللي ما ينفعش يكون على أي محل غير مطعم سي فوود كان يبقى صعب نخمن أن ده مطعم أصلًا. المطعم موجود في شارع إسماعيل القباني المتفرع من شارع الطيران في مدينة نصر، ممكن توصل له من عند جنينة مول لو خليت المول في ظهرك على الشمال ومشيت مسافة 300 متر هـ تلاقيه على يمينك بعد أول ملف في أول شارع رئيسي. هـ تعرفه بسهولة من اللون الأزرق المميز من الخارج، ومن الداخل الوضع مش بـ يختلف كثير من حيث الأناقة والستايل الهادئ الراقي، الأرضيات الرخامية والأعمدة المغطاة بالجلد البني والمرايات، وطبعًا الرسوم البحرية ونوافذ الغواصات المميزة لمطاعم السي فوود، والطوب الحراري للجدران والإضاءة المثالية كلها حاجات قعدنا نتفرج عليها أول 10 دقائق بعد ما دخلنا المكان، واختارنا ترابيزة جانبية في الدور الأرضي، ولحسن الحظ المكان كان رائق والهدوء كان سيد الموقف. عرفنا أن المطعم أصله في مدينة دمياط وفتح فروع بعد كده في المنصورة والقاهرة وخرج بره الحدود وعمل فرع في مكة المكرمة في المملكة العربية السعودية، وطبعًا ده له دلالات كثيرة أكيد هـ نعرفها من المنيو. المنيو هو العادي زي مطاعم الأسماك المتخصصة، كتيب صغير فيه صفحات لكل نوع، الأولى للبطارخ أو الكاﭬيار؛ مملحة بـ 400 جنيه الكيلو ومشوية وطواجن بـ 300 جنيه، طبعًا هي والأستاكوزا (350 جنيه) الأغلى في المنيو مع الجمبري الجامبو اللي بـ 300 جنيه الكيلو. وثاني صفحة للسلاطات والأرز والمكرونة، أي سلاطة بـ 4 جنيه ماعدا سلاطة فواكه البحر بـ 15 جنيه، والأرز بالجمبري بـ 8 جنيه، وطبق أرز "استاكوزا" المخصوص اللي على اسم المحل بـ 25 جنيه، والسباجيتي بالجمبري بنفس السعر. بعد كده شوربات السي فوود العادية بـ 20 جنيه والمخلية بـ 25 جنيه، وفيه شوربة جمبري بـ 35 جنيه. وفيه أصناف جانبية زي كفتة السمك والكبيبة (35 جنيه) وأخيرًا صفحات لأنواع الأسماك والجمبري المختلفة وطريقة التسوية اللي بـ تفرق في السعر، فيه بوري ودنيس وقاروص بأسعار من 60 لـ 120 جنيه الكيلو، والوقار وموسى والبربوني والحنشان (ثعابين البحر) بـ تبقى حسب سعر اليوم. الجمبري من 140 لـ 300 جنيه حسب الحجم والكابوريا (80 جنيه) والسيبيا (السبيط) بـ 90 جنيه والبكلويز (أم الخلول) بـ 70 جنيه بأسعار من 70 لـ 300 جنيه. بدأنا بالشوربة المخلية الخطيرة المليانة كاليماري وكابوريا لكن كانت باردة شوية، وأكلنا سلاطات البنجر والطماطم والبابا غنوج وحبات حمص الشام على ما ييجي طلبنا وهو سمك قاروص مشوي مفتوح بالخلطة (سنجاري) وما كناش مصدقين هو إزاي حلو وطازج كده! بالخلطة الرهيبة من الجزر والبصل والطماطم والبهارات والأطراف المشوية المقرمشة اللي مش فيها أي جزء ملسوع أو لونه غامق زيادة، ده كان أحلى طبق في وجبتنا اختارنا من ثلاجة العرض الجمبري الكبير وأخذناه مشوي بالبصل والطماطم وجزء منه مستوي بطريقة مبتكرة خاصة بالمكان بـ يسموه "كوكتيل أستاكوزا" وهي أنه يتم سلق الجمبري وخلطه بمعجون من المايونيز ويقدم في كأس زجاجية زي الآيس كريم. الجمبري المشوي كان فريش ولذيذ، إنما الكوكتيل ده كان دسم جدًا من كمية المايونيز اللي عليه، وصعب أن حد يقدر يخلص الكأس ده إلا لو كان مدمن مايونيز. بعد ما طلبنا الأكل وبدأنا نأكل وكعادة مطاعم الأسماك الكبيرة قدم لنا الجرسون أطباق خاصة هدية من المحل، وهي الملوخية بالجمبري وكفتة السمك بالصلصة وطبق سمبوسك بالخضروات. عجبنا جدًا اللفتة دي خصوصًا أن الكميات كانت وافرة. لكن كفتة السمك كانت أقل حاجة في الجودة على ترابيزتنا. وبعد الأكل كانت ثاني تحية من المطعم وهي المهلبية بالجيلي، وكانت روعة. الخدمة هي الأسرع في مطاعم السي فوود، دقائق معدودة والمشويات والمقليات كانت أمامنا، والعاملين لطفاء جدًا ومهذبين، ومش هـ يظهروا أمامك إلا لما تحس أنك محتاجهم. الحمامات جيدة والجو العام ظريف وأنيق، وهـ تحس قد إيه المكان ده احترافي في كل حاجة بـ يعملها. شكرًا «أستاكوزا».

...

البرج: أهم مطعم أسماك في كايرو في مدينة نصر
اصدرت في: 01/11/2011

شهرته مش بس في شيفاته الأساتذة والسمك الطازج اللي بـ يقدمه ولا في القعدة الحلوة، إنما في ضخامة مبنى المطعم المكون من 3 أدوار والمكان الإستراتيجي في مدينة نصر على ناصيتين لاثنين من أهم الشوارع الرئيسية، واللوجو المميز اللي على جدران المبنى من الخارج. مطعم أسماك «البرج» نار على علم، أي حد له في السي فوود أو مالوش لازم يكون عدى عليه الاسم. اللي عرفناه في زيارتنا المرة دي أنه كمان بـ يقدم مشويات ولحوم مش بس مأكولات بحرية. وعمل منيو للعصائر والمشروبات المبتكرة. لكن مين هـ يفكر يروح البرج علشان يأكل حاجة غير السمك والجمبري! ولو اتوجد الشخص ده يبقى أكيد مش إحنا. بمجرد ما بـ تدخل المكان بـ تلاقي مساحة مفتوحة كبيرة فيها عدد قليل من الترابيزات وشوية بجع! أيوه أنت قرأت صح.. بجع حي وعمال يجري ويلعب ويتصور مع الزوار! وبعد كده بـ تلاقي على اليمين بوابة للمبنى وعدد من الترابيزات المجاورة للبوابة. الديكور بسيط وأنيق لكن بـ يعيبه زيه زي أي مطعم أسماك المشمع اللي على الترابيزات رغم أننا فاهمين أنه ضروري، لكن أكيد فيه بدائل ثانية أكثر شياكة، خاصة أن المكان فعلًا شيك والجرسونات بالزي الرسمي والقعدات مريحة وطريقة تقديم الأكل مبهجة. داخل المبنى المكيف وفي الدور الأرضي هـ تلاقي العرض المفتوح للأسماك والجمبري بأنواعها علشان تختار حسب رغبتك وتوزن الكمية ويتحط لك عليها تيكيت بالسعر علشان يضاف على فاتورتك، وبـ تختار طريقة التسوية وبعدين ترجع على الترابيزة علشان تختار من المنيو أي طلبات جانبية. المنيو فيه كل أصناف المأكولات البحرية بالإضافة لأنواع مختلفة من الأرز والمعجنات والطواجن. ميزة «البرج» عن مطاعم أسماك ثانية أنه مش بـ يقدم الأطباق بالكيلو فقط إنما ممكن تطلب (برسيون) أو طلب لفرد واحد فيه كمية معقولة من أي صنف في المحل وبأسعار مناسبة. الوقار وسمك موسى والباربوني هم أغلى حاجة في المنيو (125 جنيه الكيلو) وفيه سمك بوري وبلطي بـ 55 جنيه. الجمبريات حسب الحجم بأسعار من 280 جنيه للسوبر جامبو و240 جنيه للجامبو و200 جنيه للسويسي وفيه بـ 180 و160 جنيه وطاجن الجمبري بالصلصة بـ 120 جنيه. السيبيا أو الكاليماري الكيلو بـ 78 جنيه وأخيرًا الأرز والشوربات من 10 لـ 35 جنيه، والسلاطات المشكلة للفرد بـ 12 جنيه. طلبنا وجبة أسماك البرج الموجودة في المنيو (130 جنيه) ودي مكوناتها ثابتة؛ أرز أحمر بالجمبري وشوربة سي فوود وسلاطة خضراء وقطعة فيليه قشر بياض وقطعة وقار مشوي ومحشي بالجمبري والخلطة السرية للمطعم ووحدتين جمبري جامبو وقطعتين كفتة سمك، الوجبة أقل ما يقال عنها أنها خرافية، الشوربة هي الأحلى بين معظم مطاعم القاهرة، الأرز بالبصل والجمبري وشرائح السبيط كانت مفلفلة وجميلة، أما المفاجأة فكانت في الوقار المحشي والتتبيلة الغريبة اللي عليه، طلبنا الجرسون مخصوص وقلنا له يبلغ تحياتنا للشيف اللي عملها. كان لازم نجرب الجمبري الجامبو المشوي المشهور به المكان (ربع كيلو بـ 50 جنيه) وحلقات الكاليماري المقلي (ربع كيلو بـ 25 جنيه) وما عندناش كلام نوصف به الصنعة وقد إيه الأصناف كانت فريش على غير عادة مطاعم سمك كثير في كايرو. البرج فعلًا ضرب مثال ممتاز لكل ما يخص مطعم المأكولات البحرية، من أول الشوربة والسلاطات (بابا غنوج ورنجة وبنجر وكول سلو) مرورًا بالأرز والباستا، لحد القاروص والوقار المحشي الدسم جدًا. الخدمة جيدة لكن بعض الجرسونات (وهم كثير قوي بالمناسبة) كانوا مش ودودين كفاية مع بعض الزبائن حولنا، لكن المتر اللي بـ يأخذ الطلب كان محترف جدًا وظريف جدًا وقدم لنا أكثر من تحية خاصة من المطعم زي طبق الملوخية بالجمبري وأطباق فاكهة ومهلبية بعد الأكل. يمكن أكثر حاجة ضايقتنا في الخدمة هي أن الطلب بـ ينزل على مراحل؛ عيش أبيض ساخن وسلاطات وبعد كده شوربة وبعد كده أرز ثم المقليات وفي الآخر المشويات، وفي فرق الدقائق بين كل صنف والثاني مش هـ تقدر تقاوم أنك تأكل بالعيش الرهيب ده كل الحاجات اللي بـ تنزل لدرجة أننا شبعنا تقريبًا قبل ما الأكل الرئيسي ينزل. ما ينفعش تكون بـ تحب المأكولات البحرية وماتكونش زرت «البرج» مرة أو اثنين، أو بمعنى أصح ما تكونش زبون دائم هناك كل ما تطلب معاك أكلة سمك معتبرة.

...

كاريبيان: تجربة أكل صادمة في مدينة نصر
اصدرت في: 12/10/2011

الأكل في المطاعم بره مش مجرد قعدة أكل وخلاص. لما بـ نخرج نأكل بره أكيد بـ ندور على أكل لذيذ، خدمة ودودة، وجو مريح للأعصاب، ولكن لما تلاقى مطعم أكل مافيهوش أى عامل من العوامل دي اللي تشجعك تروحه هـ تتساءل هو إزاي شغال لحد دلوقت. «كاريبيان - Caribbean» مكان أشبه بالوكر عنه مكان للأكل، أول ما دخلنا جاء لنا إحساس على طول أننا عاوزين نلف ونمشى من المكان، الإضاءة في المكان خافتة بزيادة، والكراسي الرمادية اللون كانت مقطعة وباين الحشو اللى جواها. أول ما قعدنا لقينا فقط قائمة الطعام بتاعة المشروبات والتحلية، واضطرينا نسأل الجرسون مرتين على قائمة الأطباق الرئيسية، وفي الآخر جابوا لنا منيو واحدة لمجموعة من ستة أشخاص، فاضطرينا نسأله يجيب لنا ثاني على قدنا. المنيو كانت ملزقة وكان عليها آثار بصمات أصابع، وده خوفنا زيادة لأن طالما المنيو كده أُمال الأكل بتاعنا لما ييجي هـ يكون شكله عامل إزاى؟ كل اللي قدرنا نعمله قعدنا ندعي أن المطبخ يكون فيه اعتناء أكبر من اللي شايفينه أمامنا. وكانت غلطتنا الكبيرة أننا زرنا حجرة الاستراحة، كنا فاكرين أن الوضع هـ يكون مختلف وهـ نلاقي الدنيا نظيفة، لكن شكل آخر مرة نُظفت فيها كانت من سنين وإلا كان شكلها يبقى مختلف وقت زيارتنا. الخدمة في "كاريبيان" كانت بطيئة وخاملة جدًا، كنا قدرنا ده لو كان المكان مزدحم، ولكن إحنا كان حولنا خمس مجموعات بـ يخدموا في المكان، فالتأخير والبطء كده مالوش مبرر. طلبنا ساندويتش ديك رومي مدخن بالجبنة المولتن (27 جنيه) لأننا كنا جعانين جدًا، المفاجأة أن الجرسون جاء بعد نصف ساعة يقول لنا أن الساندويتش للأسف غير متاح في المطعم حاليًا، وبالتالي غيرنا طلبنا لساندويتش فراخ سبايسي مقرمشة (30 جنيه)، وفي الوصف بتاعه في المنيو كاتبين أنه عبارة عن فراخ سبايسي مقرمشة معاها ديك رومي مدخن وعليه جبنة شيدر في عيش باجيت فرنساوي، الساندويتش ما كانش فيه رائحة ولا وجود للديك الرومي، والجزء الكريسبي في الفراخ كان فيه دهن تحته. جربنا كمان ساندويتش التشيكن مشروم (28 جنيه) وهو عبارة عن: صدور فراخ، ومشروم، وجبنة موتزاريلا وصوص المايو في عيش باجيت فرنساوي برضه، والصراحة إحنا ممكن نحضر ساندويتشات في البيت أفضل وأطعم من كده بكثير. طلبنا كمان ساندويتش فراخ بارميزان (26 جنيه) وده كان الحاجة الوحيدة اللي كان طعمها جيد، جابوه لنا في طبق أبيض بورسلين كبير وكمية كبيرة من البطاطس المحمرة المقرمشة، ولكن في النهاية حجم الساندويتش مع البطاطس كان قليل قوي في الطبق الضخم ده فكان شكل الطبق أكنه فاضى. كمان طلبنا باربكيو تشيكن بيتزا، وكان حظنا حلو مع الطبق ده أخيرًا، محطوط على الساندويتش من فوق شرائح فراخ، فلفل أخضر، زيتون، مشروم، بصل وجبنة موتزاريلا، البيتزا ما كانش فيها حاجة مميزة لكن أخيرًا لقينا حاجة طعمها كويس نأكلها. كنا عاوزين نعطي «كاريبيان» فرصة ثانية، فطلبنا تحلية، ولكن الجرسونة قالت لنا بكل أسف أن مافيش تحلية متاحة، وكان كفاية كده، طلبنا الفاتورة ولكن الصدمات ما انتهيتش لأننا لقيناهم محاسبيننا على أربعة أطباق إحنا ما طلبناهاش! إحنا مش عارفين دي غلطة أثناء زيارتنا ولا ده المعتاد هناك، لكن اللي إحنا متأكدين منه أننا مش هـ نروح المكان ده ثاني علشان نعرف إجابة سؤالنا ده إيه.

...

كاريبيان: إعدام الأفكار الحلوة على مقصلة الإهمال!
اصدرت في: 05/04/2011

في حي مدينة نصر المنتعش بقى له 10 سنين، كل يوم شارع جديد فيه يبتدي يظهر على الخريطة، وفي شارع «حسن المأمون» فتح مطعم وكافيه جديد اسمه «كاريبيان - Caribbean» كاريبي بالعربي، من حوالي سنة. المطعم موقعه هايل دقايق من «سيتي ستارز» وفي وش النادي الأهلي. ده غير إنه تقريباً الوحيد من نوعه في الشارع. المطعم ديكوره من بره مُبشر، الديكور أسود والإسم بالروز، أنيق وجذاب، وخلى الكاتبة كل ما تعدي من جنبه كلها فضول تدخل تجربه. أول ما دخلنا المطعم، لفت إنتباهنا ألوان الديكور اللذيذة برضه، إسود وبترولي وبنفسجي، ورسوم فراشات ودواير على الحيطان. الستايل مودرن بكنب مريح فوق العادة وبين كل كنبتين ترابيزة سودا خشب، ده غير كام ترابيزة عالية في وسط المكان. المكان كمان سقفه عالي شوية زيادة، وفيه الشاشات المعتادة. بعد 3 ثواني من تأمل الديكور، شعرنا بدخان الشيشة الي مالي المكان، ريحته حلوة ومحبوبة، لكن مش مناسبة لمطعم، وده كان غرضنا الأساسي من الزيارة. الويتر كان عندنا بالمنيو في خلال الدقيقة الأولى من قعادنا. المنيو كان مبهر. يمكن من أكتر المنيوهات تنوعاً على الإطلاق. شوربة (الأنواع التقليدية وكلها بـ15جم)، فاهيتا، مأكولات بحرية، ساندويتشات، بيتزا، معجنات، بيرجر، ومنيو المشروبات والحلويات نفس النظام، فيه كل حاجة: كوكتيلات مغرية مخصوصة بالمكان (اسعارها بـ تلعب في العشرينات)، أيس كريم ومشروبات الكافيه بتشكيلتها الكاملة. منيو الشيشة كان عبارة عن ورقة واحدة سودا، ماشية مع الديكور، ومكتوب عليها بالذهبي أو الفضي، وفي ضهرها علامة الماريجوانا (علامة إنتشرت من غير فهم مؤخراً)! وكان فيه تنوع هو كمان بس غالي لحد كبير المعسل بـ 12 جنيه، النكهات العادية 15 جنيه، والمكس الفاخر بـ20 جنيه، أما النكهات الفاخرة اللي معمولة مخصوص لـ«كاريبيان» فبـ25 جنيه. أخدنا طبق عيش بالجبنة والسلامي عشان يفتح نفسنا. وكان فريش، بسيط وطعمه حلو. وللوجبة الرئيسية طلبنا فاهيتا فراخ «Caribbean Fajita» وطبق فراخ جورميه مقرمشة «Gourmet Chicken Crunchy» إللي رشحه لنا الويتر لما طلبنا منه يجيب لنا الطبق اللي بـ يميز المكان. الفاهيتا كان صابح وجميل متقدم بالطريقة العادية؛ عيش التورتيا المكسيكي كان أبيض وعليه زي نقشة كده، وهش وحلو قوي. ومع إن الفراخ كانت رائعة والعيش إللي معاها جميل جداً، إلا أن ماكنش نازل معاه صوص الجواكامولي (اللي معمول من الأڤواكادو) أو الجبنة اللي بـ تنزل أحياناً مع الفاهيتا وبـ تديلها طعم أحلى كتير. أما الفراخ الجورميه المقرمشة فكانت أبعد ما يمكن عن جورميه! الفراخ المقلية، اللي فعلاً مقرمشة، كانت معمولة معسلة، والقشرة رطبة من جوة وطعم الكورن فليكس (Corn Flakes) اللي الفراخ تقريباً إتغطت بيه بدل البقسماط واضح جداً، لأ ومعسل! كان أغرب فراخ مقلية مقرمشة في تاريخ الفراخ المقرمشة! فترة التحلية كانت كوميدية. طلبنا «سنداي كاريبيان – Sunday Caribbean» . فجالنا كيكة شوكولاتة وجنبها بولة أيس كريم ڤانيليا. فقلنا للويتر إننا طالبين سنداي، فرد علينا مصححاً المعلومة إن اللي قدامنا ده سنداي، قلنا ماشي يمكن المكان هو ده مفهومة عن السنداي وبصينا نتأكد من المنيو لقينا إن اللي جالنا ده فعلاً طبق تاني، وهو «كاريبيان ڤولكانو – Caribbean Volcano»! المهم، عديناها. الـ«كاريبيان ڤولكانو» ده المفروض إن كيكة الشوكولاتة تكون سخنة، على حسب ماقال المنيو، لكن الكيكة كانت ساقعة بس حلوة، وطعم الفانيليا في الأيس كريم ماكانش حلو، ده غير إن صوص الكراميل اللي كان مغطي الطبق كان بيتي بس مش معمول حلو أبداً. وعشان المكان كافيه كمان، جربنا «كاريبيان هوت نيوتيلا – Caribbean Hot Nutella» وده كان كاكاو سخن مافيهوش لا نوتيلا ولا أي حاجة مميزة. و«موكا أفتر إيت – Mocha After Eight»، إللي واخد تيمة الشوكولاتة المشهورة «أفتر إيت» (وبـ تكون شوكولاتة سودا بالنعناع) كانت جميلة ومنعشة، ومعسلة ومنعنعة. المكان ماكانش نضيف كفاية أبداً. وحمام السيدات كان كارثي، مافيش مناديل وقذر تماماً. مطعم «كاريبيان» عنده قابلية إنه يكون أحسن كتير لو القائمين عليه إهتموا به أكتر. ده غير إنه بالنسبة للخدمة المقدمة المكان غالي.

...

مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح