إيطالي مطاعم in مدينة نصر Cairo, Egypt

مطاعم

كانديلا: كافيه عادي في سكون مدينة نصر
اصدرت في: 09/12/2012

شارع محمد حسن موسى شارع هادئ وشبه مظلم، موازي لشارع عباس العقاد في مدينة نصر، وفيه عدد من الكافيهات والمطاعم على نفس الصف اللي فيه الكافيه اللي بـ نتكلم عنه النهارده وهو كافيه "كانديلا". كافيه ومطعم مكون من دور واحد، وله قعدة خارجية فيما يشبه التراس، لكن القعدة داخل المحل هي الأساس، وهي كبيرة فعلاً وممتدة لمسافة طويلة بعمق المحل ولها مخرج من نفس البناية اللي فيها الكافيه لكن من الناحية الخلفية. تصميم ظريف ومساحة واسعة لكن كنا متوقعين أن يبقى فيه جزء مخصص لغير المدخنين لكن الحقيقة أنه مافيش. بدأنا ندور على مكان جلوس مناسب وعجبنا أكثر المساحة الخارجية المفتوحة والكنبات المرجيحة اللي تكفي 4 أفراد وفكرتنا بالموجودة في مطاعم تشيليز. وأنت قاعد خارج المحل مش هـ تبقى شايف أي معالم للكافيه لأن الإضاءة خافتة جدًا والقصد أنك تبقى شايف شاشات التليفزيون وبس، أو تتمتع بمساحة من الخصوصية لأنك بالكاد برضه هـ تبقى شايف الناس حولك. وبالتالي ما حدش هـ يبقى شايفك! بس بما أننا بـ نحب الحيوية أكثر في أي مكان بـ نروحه وبـ نحب النور المرتبط عندنا بالبهجة فحسينا بكآبة شوية في القعدة الهادئة في تراس "كانديلا".منيو كبير تقليدي فيه أطباق رئيسية من اللحوم والدجاج والبيتزا والمقبلات والساندويتشات، ده غير المشروبات الساخنة والباردة والميلك شيك والحلويات والشيشة. ولما شعرنا أن مافيش أي حاجة مميزة في منيو "كانديلا" وحتى لما سألنا الجرسون قال لنا أنه بـ يفضل أننا نطلب بيتزا، عرفنا أن المكان كافيه أكثر من كونه مطعم وتوجهنا فورًا للمشروبات بعد ما طلبنا بيتزا بالدجاج زي ما نصحنا الجرسون. البيتزا بـ 35 جنيه، وطعمها حلو وحجمها معقول تكفي فرد جعان أو فردين "نص بطن" كده وجاءت لنا بسرعة على غير عادة الكافيهات. وطلبنا معاها كوكتيلات فلوريدا (18 جنيه) وفورسيزونز (19 جنيه) الموجودة في كل الكافيهات برضه. فلوريدا فيه مانجو موز وفراولة وفورسيزونز فيه نفس الحاجات بالإضافة لعصير البرتقال. الفاكهة فريش والكأس العملاق شكله يفتح النفس. ما حبيناش نخوض في منيو المكان أكثر من كده واكتفينا بالبيتزا والكوكتيلات. وأصدقائنا خبراء الشيشة اللي كانوا معانا قالوا لنا أن الشيشة هنا مضبوطة والمذاقات كلها متوفرة وهي من أهم علامات تميز المكان.الخدمة مش لطيفة بالدرجة المطلوبة في المحل. بعض العاملين لازم تطلب منهم الحاجة أكثر من مرة علشان يعملوها لك. شيء من اللامبالاة لما بـ تبدي ضيقك من التأخير. هو الضغط كان كبير على الكافيه وقت زيارتنا بس ده مش مبرر أن يهمل طلبات بسيطة للزبائن زي زجاجة مياه أو فاتورة الحساب. بشكل عام المكان نظيف والقعدة ظريفة والمأكولات والمشروبات والشيشة حلوة. مش مطلوب أكثر من كده من "كانديلا" وأن كنا بـ نستسمحهم يكونوا مركزين شوية مع ضيوفهم.

...

لا كازيتا: مطعم أكلات إيطالية سمعته طيبة في مدينة نصر
اصدرت في: 10/04/2012

خلف جنينة مول موجود واحد من أقدم المطاعم الإيطالية وأشهرها على الإطلاق في مدينة نصر.. «لاكازيتا»، أصحابنا الأكبر مننا سنًا نصحونا نروحه وقالوا لنا أنهم من زمان وهما كانوا بـ يعتبروه قعدتهم الدائمة والمكان اللى بـ ينط فى دماغهم أول ما يفكروا يروحوا مطعم حلو.. ما دام كده.. ليه لأ؟ ما نجرب. الديكور من الداخل تحسه قديم وأغلبه خشبي وطبعًا بـ يغلب عليه اللون البني، عرفنا أنه ما تغيرش من فترة الثمانينات (تحديدًا 1985)، الإضاءة خافتة جدًا أشبه بإضاءة مطاعم "سبكترا"، والأغاني والموسيقى قديمة وهادئة. الجرسون اللى كان معانا ودود جدًا ومتعاون تحس من معاملته أنك فى مطعم غير عادي، لما بـ تقعد وتطلب بـ ينزل لك سلة عيش محمص بالثوم مجاملة من المطعم، ومعاها زجاجة مياه صغيرة (7.95 جنيه) المنيو مليان باختيارات كثير من أنواع المكرونة من أول الـ "بولونيز" لغاية الـ "أرابياتا"، ده غير اختيارات الأطباق الرئيسية الكثيرة من الفراخ واللحوم والأسماك، وكمان الأصناف الجانبية زى الأرز والمكرونة والسلاطات والبطاطس المسلوقة والمحمرة كمان، وطبعًا المشروبات والتحلية. طلبنا شوربة طماطم (22.95 جنيه) وجاءت لنا ساخنة وقوامها ثقيل وعليها من فوق مكعبات عيش محمص لذيذة، كانت حلوة قوي، وقلنا نفتح نفسنا فى السلاطات بفلانتينو سالاد (29.95 جنيه) ودي عبارة عن شرائح لحوم وفراخ مع الخس والصوص الأبيض معاها زيتون، كانت حلوة قوي وباردة وطعم الفراخ المستوية (أكثر من اللحمة) كان لحو قوي وبـ يذوب فى الفم، اللى ضايقنا بس أن الزيتون كان بالبذرة بتاعته فى السلاطة! جربنا فى الأطباق الرئيسية كانيلونى دي لا نونا (35.95 جنيه)، اللى مش عارف الكانيلونى هى لفائف عجين إيطالية بـ تكون محشية لحمة مفرومة، جاءت لنا بحجم كبير ومرشوش عليها جبنة موتزاريلا سايحة خلت تجربة قطم كل جزء منها استثنائية، بجد الجبنة أضافت كثير للوجبة واللحمة المفرومة كانت مستوية حلو وغنية، جربنا كمان فييل لا كازيتا (75.95 جنيه) وبـ تختار معاه طلب جانبى واحد أو Garnish زي ما هما مسميينه هناك، أخذنا بطاطس مهروسة مع شرائح اللحم بالصوص والليمون، كانت خرافية والصوص غنى وقعدنا نحطه على كل حاجة بـ نأكلها. "لا كازيتا" مكان مميز وله سمعة طيبة بقى له زمن، وإحنا عرفنا دلوقت سر بقاءه بالتميز والسمعة دى لحد دلوقت، خاصة أن محبى الأكل الإيطالى كثير فى مصر.

...

ديل فينتو: مطعم ممكن تعدي عليه بسرعة في جنينة مول بمدينة نصر
اصدرت في: 01/04/2012

لو كنت حافظ ومألوف بالنسبة لك شكل مناطق الطعام Food Courts فى أى مول فى وقت الغذاء أكيد مش هـ تستغرب من زحمتها ولا فوضتها فى الوقت ده. لكن على عكس العادة منطقة الطعام اللى فى جنينة مول مختلفة تمامًا عن باقى المولات لأنها بعيد عن الدوشة وهادئة علشان تختار براحتك مطعم من المطاعم الكثير الموجودة هناك، واحد من الاختيارات دي كان المطعم الإيطالي «ديل فينتو – Del Vento». المنيو هناك فيها ساندويتشات وسلاطات وبيتزا وباستا، المنيو فيها تنوع أكبر شوية فى قسم التحلية والمشروبات. سموزى الفواكة (14 جنيه)، الفرابيه (16 جنيه)، والمشروبات السخنة، كل ده بـ يخلى "ديل فينتو" كافيه ممكن تعدي عليه بسرعة على الرغم أنه مطعم. الديكور بألوان مزيج بين الخشبي والزيتونى، وطلبنا فى «ديل فينتو» كان بسيط وسريع، الأكل كمان كان معبأ بنظام لكن كان مش قوي لدرجة أنك ممكن تحط فيها حاجات كثير وتأخذها، وعلشان نجرب تجربة "ديل فينتو" على حق طلبنا المينى بيتزا اللي باسم المطعم (12 جنيه) مع الكاليماري المقلى كمقبلات (12 جنيه) وبانيني التشيكن موتزاريلا (17 جنيه)، على الرغم أن مكونات البيتزا ما كانتش موضحة فى المنيو لكن اتضح لما جاءت لنا أنها عبارة عن صوص طماطم وجبنة وشرائح هوت دوج وكان طعمها حلو كفاية أنه يخلى الطبق ده من المعالم المميزة للمطعم. الكاليماري المقلى كان ناقصه شوية نكهة أو طعم مميز، خلوا بالكم أحسن بـ ينزل معاه صوص حار زيادة. البانيني كان بجد من علامات الوجبات وبـ ينزل معاه بطاطس محمرة، طعم التشيكن كان عادي جدًا زيه زي أى فراخ وزي الكاليماري كان ناقصه ملح وفلفل. الأكل هناك يمكن محتاج شوية تضبيط وصنعة. بعد ما تخلص أكلك لازم تبص على المنيو فى جزء الحلويات علشان الاختيارات متعددة ومغرية، بداية من تشيز كيك البلوبيري (16 جنيه) لحد كريب النوتيلا والموز (13 جنيه) واختيارات متعددة من الميلك شيك. ويكفى أننا نقول لو عاوزين زيارتنا القادمة تكون مضمونة هـ نعدي علشان الحلويات بتاعتهم.

...

مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول