بيتزا مطاعم in مدينة نصر Cairo, Egypt

مطاعم

سيفن دايز: بيتزا لذيذة غنية بالطعم في مدينة نصر
اصدرت في: 22/10/2012

المحل ده مش هـ تشوفه لو كنت ماشي بسرعة في شارع أبو داوود الظاهري المتفرع من شارع مكرم عبيد وعلى ناصيته صيدلية أفريقيا، لأن المحل في الدور الأرضي في مبنى مكون من طابقين الدور العلوي فيه هو مطعم «أورينتال» للمشويات والأطباق الشرقية، وهو اللي يافطته ظاهرة ومميزة وهـ تشوفها من بعيد وأنت ماشي في أول الشارع. لكن «سيفن دايز – 7 Days» مظلوم شوية ويافطته اللي على مدخل المحل في الدور الأرضي مش باينة وممكن كلمة "7 أيام" نفسها تخدع وتتخيل أنها ناقصها كلمة 24 ساعة وتبقى وصف لمواعيد عمل لمطعم «أورينتال». لكن إحنا دققنا واكتشفنا أن ده محل شبه مستقل بذاته ومتخصص في البيتزا والباستا والبرجر. صحيح هو يعتبر جزء من المطعم اللي فوقه بدليل أننا بـ نجيب السلاطة من بار السلاطات اللي في الدور العلوي. لكن ما ينفعش تطلب بيتزا إلا وأنت في الدور اللي تحت وبالطبع الجلوس فوق للمشويات وأطباق أورينتال فقط.المكان هادئ وكلاسيكي وأنيق جدًا على غير عادة مطاعم البيتزا، مزيكا حلوة في الخلفية وشاشات بـ تعرض قنوات رياضية بدون صوت وجو عام مريح ويساعد على الاسترخاء. فى عمق المحل فيه ترابيزات مستديرة وكنبات مريحة حولها عجبتنا قوي قعدتها، احتلينا واحدة منهم وبدأنا نتصفح المنيو الكبير حجمًا القليل في محتوياته لحسن الحظ. سلاطات ومقبلات وبيتزا وباستا وبرجر، بس كده، وحتى البرجر طلع مش متاح وقت زيارتنا لسبب ما نعرفهوش. بس مش مهم لأننا كنا جايين متوجهين على البيتزا اللي هي العلامة المميزة للمكان علشان سمعنا عنها قبل كده من بعض أصدقائنا. البداية كانت عادية بطبق المقبلات المنوعة "ميكس ستيكس" (25 جنيه) اللي فيه سبرنج رولز بالخضروات وعيدان الموتزاريلا المقلية والبطاطس الودجيز المسلوقة ومحمرة من الخارج وقطع دجاج التندر المقلية وكل ده بـ يُقدم مع خليط المايونيز والكاتشب. نكهة زيت القلي ظاهرة في المكونات خاصة الرولز وكمان الأصناف كانت ناقصة شوية توابل. فقررنا نعوض الطبق ده بطبق سلاطة من بوفيه السلاطات (15 جنيه) والمفاجأة أنه كان فيه تبولة؛ لأ وتبولة حلوة كمان! ملينا طبقنا بها هي والليمون المعصفر وحبات الحمص والبسلة والزبادي، وفعلًا الطبق ده كان خير تعويض بعد طبق المقبلات النصف نصف.فيه هنا بيتزا محشوة الأطراف stuffed crust وفيه بيتزا رقيقة أو thin بجانب البان العادية، المحشوة والرفيعة بـ تبقى أغلى 4 أو 5 جنيه في الحجم المتوسط. وكل بيتزا فيه منها الأحجام الصغير والوسط والكبير. الأسعار بـ تتراوح ما بين 25 لـ 57 جنيه في كل الأحجام. وهـ تلاقي الأسماء التقليدية للبيتزا زي ميلانو وهاواي والتونة والجمبري، لكن السوبريم هنا بـ يبقى اسمها "سوبر ديلوكس" ودي اللي إحنا طلبناها محشوة الأطراف بالحجم الوسط (42 جنيه) وكانت تحفة بجد في الحجم والطعم والمكونات الطازجة وكل حاجة. دجاج وتركي مدخن وبيف وبيبروني، وكله بكميات وفيرة، والجبن اللي في الأطراف كمان كان كثير وطعمه حلو. بيتزا ثانية هي سوبريم السي فوود (38 جنيه) حجم وسط وعجينتها رفيعة ومقرمشة، شكلها مش بـ يبقى مقنع لأنها بـ تبقى رقيقة قوي، لكن كم الكاليماري والجمبري اللي عليها كفيل أنه يشبع فرد واحد جعان. ومرة ثانية العجين والخبيز هنا أكثر من رائع والمكونات فريش وطعمها لذيذ.في زيارة ثانية هـ نجرب الباستا ونقول لكم رأينا، وكمان يكونوا شغلوا "قسم البرجر" اللي بالمناسبة أسعاره كانت مغرية جدًا (من 14 لـ 25 جنيه). الخدمة سريعة ومهذبة، والمكان نظيف ومرتب بس الحمامات كانت محتاجة عناية أكثر من كده وقت زيارتنا.حبينا «بيتزا سيفن دايز» وبـ نقترح عليهم تغيير الاسم أو عمل يافطة أوضح شوية علشان هو يستاهل يتعرف أكثر من كده.

...

جوستو: مطعم وكافيه بستايل مميز في مدينة نصر
اصدرت في: 27/08/2012

الشارع اللي فيه المكان ده مغمور شوية، اسمه شارع ابن الهيثم وهو متفرع من شارع عباس العقاد، قبل نهايته بالقرب من شارع مصطفى النحاس. والكافيه واخد ناصية ومدخله على شارع اسمه محمد يوسف موسى متفرع من شارع الطيران. طيب بعد التوهان ده كله يا ترى المكان يستاهل؟ الحقيقة هو فعلًا يستاهل، الشارع الهادئ اللي هو فيه (اللي ظهر فيه عدد من الكافيهات والمطاعم مؤخرًا) أضاف الطابع الهادئ ده للمكان من الخارج. أضواء بيضاء أنيقة وديكورات مميزة في المدخل خلتنا نعرف من اللحظة الأولى من دخولنا للمكان أنه مش مجرد مكان تقعد فيه شوية وتأخذ ساندويتش وحجرين شيشة وخلاص، ده مكان ممكن بسهولة يبقى مكانك المفضل لو كانت ساكن في مدينة نصر أو قريب منها، وده لأن الجو العام مريح وأنيق بزيادة، وهـ تلاحظ كمان أن زوار المكان من طراز خاص وواضح أنهم من المترددين بكثرة على المكان وده باين من العلاقة الودية بينهم وبين العاملين في «جوستو – Gosto». المكان مقسم لـ 3 أجزاء: جزء خارجي مفتوح أشبه بحديقة وفيها ساحة لعب للأطفال ومراجيح، وجزء نصف مغطى ومحاط ببلاستيك شفاف لكنه مكيف، وجزء داخلي مقفول. كنا فاهمين أن الجزء الداخلي ده لغير المدخنين إنما طلع مافيش فرق وكل الأماكن مسموح فيها بالشيشة والدخان، لكن المساحات الواسعة والمسافات المعقولة بين الترابيزات والتهوية الجيدة هـ تخليك مش متضايق من الدخان وهـ تحب القعدة جدًا سواء بره أو جوه، وممكن تستخدم الإنترنت الخاص بالمكان (Wi-Fi) مجانًا. «جوستو» عنده منيو غني بالمشروبات والأطباق العالمية والباستا والبيتزا والمقبلات والساندويتشات والحلويات والآيس كريم، هـ تتعب شوية علشان تعرف تختار من بين كل الأصناف الموجودة، فهـ نحاول نسهل عليك المأمورية ونقول لك إحنا طلبنا إيه وعجبنا. شوربة كريمة بالمشروم والدجاج (17 جنيه) كانت ضرورية لفتح الشهية وكانت اختيار موفق جدًا والمشروم فيها كان مقطع بحجم كبير زي ما بـ نحب. مبدئيًا الباستا هنا تجنن، جربنا باستا كواترو فورماج (33 جنيه) اللي فيها 4 أنواع جبنة منها البلو تشيز الرائعة، وطلبنا جبنة إكسترا (6 جنيه) فبقى طعمها خيالي (طبعًا الكلام ده لعشاق الجبنة). طبق رئيسي بـ يحمل اسم "جوستو" أكيد هـ يبقى جامد، ميكس جوستو (70 جنيه) فيه قطعة دجاج بصوص الليمون وقطعة فيليه لحم بصوص المشروم البني ووحدات جمبري مقشر بصوص الكابوريا مع صنفين جانبيين من اختيارك. الطبق أقل ما يقال عنه أنه رائع، شكلًا وموضوعًا. استمتعنا بالـ 3 مذاقات للصوصات المختلفة وحسينا بالتناغم الموجود في الطبق رغم اختلاف المكونات، والبطاطس البيوريه والخضار السوتيه هـ يبقوا أحسن حاجة تطلبها من الطبق. واحد من أصدقائنا طلب طبق هو متعود يطلبه في كل زيارة للمكان وهو دجاج بالصوص الأبيض الحلو مع النعناع والريحان، اسم الطبق "دي مينتي" وسعره 53 جنيه. الطبق مشهور في بلاد البحر المتوسط ورغم النكهة القوية للنعناع والسكر الظاهر في الطعم إلا أن المذاق كان خطير ومميز، وطلع له حق يطلبه كل مرة. بعد الوجبة المحترمة كان عندنا فضول نشوف المشروبات والحلويات بنفس الجودة ولا لأ، وما خذلناش «جوستو» وقدم لنا أحلى ميلك شيك بالكراميل (23 جنيه) وتروبيكال آيس كريم بالفواكة (27 جنيه)، صحيح اتأخر علينا شوية قبل ما يجيب لنا الحلويات، لكن الموضوع كان يستاهل الانتظار. عرفنا أن البيتزا هنا حلوة وحجمها كبير، وفيه مقبلات شرقية وشامية، ومنتجات القهوة الساخنة والباردة كويسة، وفيه سموزي وعصائر وشاي وقهوة "Cold As Ice" أو شبه مجمدة، وطبعًا الشيشة هنا لها زبائنها المخلصين وسعر الشيشة الفاخرة بطعم العنب والخوخ والتفاح 18 جنيه واللي الطبي بـ 5 جنيه. حبينا المكان بجد والخدمة الجيدة وأناقة المكان وطعامة الأكل هـ تخلي رِجلنا تأخذ على المكان ده بسرعة ونحطه في قائمة "المفضل" وسط كل المطاعم والكافيهات اللي بـ نزورها. ننصحكم تجربوا «جوستو».

...

تايم جيت: تجربة مريرة في كافيه مغمور في مدينة نصر
اصدرت في: 11/07/2012

عاوزين نوضح حاجة قبل ما نبدأ نتكلم عن المكان اللي رحناه النهاردة، أن مش معنى أن تجربتنا كانت سيئة في المكان أنه بـ يكون بنفس المستوى طوال الوقت، إحنا مقتنعين جدًا بنظرية الـ Day Off أو الأيام اللي بـ يغيب فيها التوفيق بشكل ملحوظ، لكن إحنا كمان مقتنعين أن فيه حد أدنى من العناصر اللي لازم تتوفر لأي مكان بـ يقدم خدمة للجمهور. وعلشان نكون منصفين؛ الحد الأدنى كان متوفر في مطعم وكافيه «تايم جيت» اللي في شارع جانبي بـ يوصل بين شارعي عباس العقاد ومكرم عبيد في مدينة نصر، لكن واضح أننا اللي توقعاتنا كانت عالية بخصوص المكان خاصة لما شفناه من الخارج بتصميمه المتميز ومكانه الهادئ. لكن عرفنا بمجرد ما دخلنا أن أحلامنا مش هـ تتحقق هنا وأننا لازم ننزل بسقف المطالب شوية. «تايم جيت- Time Gate» أو بوابة الزمن عامل لنفسه Theme مميز واضح في كل الديكورات والمنيوهات وحتى في التصميم الخارجي للمحل، التصميم كله معتمد على فكرة البوابات الزمنية اللي بـ تفصل بين العوالم المختلفة في الكون، ومستخدم شعارات ورسوم في كل أركان المحل لإضفاء جو الخيال العلمي على المكان، لكن للأسف أفسد كل حاجة الديكور والمفروشات المتهالكة والأرضيات المغطاة بالسيراميك الرخيص والحمامات غير النظيفة بالمرة، يعني كأنهم عملوا الفكرة وافتتحوا المكان وبعد كده سابوا كل حاجة زي ما هي من غير عناية أو تطوير. المكان كبير جدًا وهو في دور علوي بـ تطلع له من سلم جانبي في العمارة، وفي الشكل هو أقرب للكافيه أو القهوة من كونه مطعم. أخذنا ركن بعيد عن الناس اللي بـ تدخن لأن مافيش مكان مخصص لغير المدخنين وبدأنا نتفحص المنيو. المنيو فيه كل حاجة تقريبًا، مقبلات وسلاطات وأطباق رئيسية من اللحوم والدجاج والمأكولات البحرية، وفيه ساندويتشات وبيتزا وباستا ومشروبات الكافيه المعروفة وبعض الحلويات والشيشة طبعًا. طلبنا طبق مقبلات مشكل فيه كبيبة وسمبوسك وأصابع موتزاريلا مقلية (20 جنيه) وطلبنا بيتزا تايم جيت (32 جنيه) اللي باللحمة المفرومة والسوسيس والدجاج وطبق رئيسي اسمه تشيكن سبيشيال (59 جنيه) فيه صدور دجاج مقلية وملفوفة وفيها حشو من المشروم والبصل ووحدات جمبري صغير وطبق نجرسكو بالجبنة (28 جنيه). الأكل بدأ ينزل أمامنا على الترابيزة بعد حوالي ساعة وربع من الانتظار، وده بعد ما طلبنا منهم أكثر من مرة أننا نلغي الطلب ونمشي لأن التأخير ده مش طبيعي، وقولنا لهم أن مافيهاش حاجة لو قالوا لنا أن الأكل هنا بـ يتأخر أو أنهم مش بتوع أكل أساسًا وأن المشاريب والشيشة هي الموضوع، لكن بعد اعتذارات كثير نزل الأكل وطبعًا تقدروا تتوقعوا معانا مستوى وطعم الأكل نفسه، المقبلات شبه نيئة، البيتزا مش بيتزا، فطيرة عليها شوية لحمة مفرومة ومن غير جبنة تقريبًا، المكرونة النجرسكو كانت بدون أي نكهة أو توابل، الدجاج بالجمبري ده اللي يعني كان حلو شوية مع الخضار السوتيه، لكن بعد طول الانتظار والمقبلات اللي مالهاش علاقة بفتح النفس كان صعب نستطعم أي حاجة ولو كانت حلوة. حاولوا يصالحونا بطبق فروت سلاط بالآيس كريم، الحقيقة هو كان لذيذ، علشان كده تأكدنا أن مشكلة المكان – بعيد عن الإهمال- هي الأكل، وأن معظم زائريه بـ يفضلوا المشروبات والشيشة والفرجة على التليفزيون. شكرناهم جدًا وخرجنا ندور على مكان ثاني نأكل فيه بعد اللي حصل فينا. وعرفنا أن تجربة الأكل في «تايم جيت» مش هـ تتكرر ثاني، بس جايز نفكر في موضوع زيارته ككافيه.

...

ديل فينتو: مطعم ممكن تعدي عليه بسرعة في جنينة مول بمدينة نصر
اصدرت في: 01/04/2012

لو كنت حافظ ومألوف بالنسبة لك شكل مناطق الطعام Food Courts فى أى مول فى وقت الغذاء أكيد مش هـ تستغرب من زحمتها ولا فوضتها فى الوقت ده. لكن على عكس العادة منطقة الطعام اللى فى جنينة مول مختلفة تمامًا عن باقى المولات لأنها بعيد عن الدوشة وهادئة علشان تختار براحتك مطعم من المطاعم الكثير الموجودة هناك، واحد من الاختيارات دي كان المطعم الإيطالي «ديل فينتو – Del Vento». المنيو هناك فيها ساندويتشات وسلاطات وبيتزا وباستا، المنيو فيها تنوع أكبر شوية فى قسم التحلية والمشروبات. سموزى الفواكة (14 جنيه)، الفرابيه (16 جنيه)، والمشروبات السخنة، كل ده بـ يخلى "ديل فينتو" كافيه ممكن تعدي عليه بسرعة على الرغم أنه مطعم. الديكور بألوان مزيج بين الخشبي والزيتونى، وطلبنا فى «ديل فينتو» كان بسيط وسريع، الأكل كمان كان معبأ بنظام لكن كان مش قوي لدرجة أنك ممكن تحط فيها حاجات كثير وتأخذها، وعلشان نجرب تجربة "ديل فينتو" على حق طلبنا المينى بيتزا اللي باسم المطعم (12 جنيه) مع الكاليماري المقلى كمقبلات (12 جنيه) وبانيني التشيكن موتزاريلا (17 جنيه)، على الرغم أن مكونات البيتزا ما كانتش موضحة فى المنيو لكن اتضح لما جاءت لنا أنها عبارة عن صوص طماطم وجبنة وشرائح هوت دوج وكان طعمها حلو كفاية أنه يخلى الطبق ده من المعالم المميزة للمطعم. الكاليماري المقلى كان ناقصه شوية نكهة أو طعم مميز، خلوا بالكم أحسن بـ ينزل معاه صوص حار زيادة. البانيني كان بجد من علامات الوجبات وبـ ينزل معاه بطاطس محمرة، طعم التشيكن كان عادي جدًا زيه زي أى فراخ وزي الكاليماري كان ناقصه ملح وفلفل. الأكل هناك يمكن محتاج شوية تضبيط وصنعة. بعد ما تخلص أكلك لازم تبص على المنيو فى جزء الحلويات علشان الاختيارات متعددة ومغرية، بداية من تشيز كيك البلوبيري (16 جنيه) لحد كريب النوتيلا والموز (13 جنيه) واختيارات متعددة من الميلك شيك. ويكفى أننا نقول لو عاوزين زيارتنا القادمة تكون مضمونة هـ نعدي علشان الحلويات بتاعتهم.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن