مصري مطاعم in القاهرة الجديدة Cairo, Egypt

مطاعم

شقرة تو جو: سلسلة أبو شقرة للتيك أواى دلوقت فى القاهرة الجديدة
اصدرت في: 15/10/2014

بعد رحلة طويلة بين جنبات المول، والتنقل من محل للثانى كأى مدمن محترم للتسوق، لازم فى النهاية تلاقى نفسك وسط الفوود كورت بـ تبحث عن أكلة سريعة تجدد نشاطك بعد يوم طويل مرهق، اختارنا نأكل أكلات صحية مشوية بحيث نحافظ على مقاسنا للملابس الجديدة. فى مكانه الموجود فى فوود كورت كايرو فيستيفال سيتى الكبير، تقدر تشوف مكانهم بمنتهى السهولة فى وجود شعار أبو شقرة الشهير. المكان بشكل عام يعتبر نموذج مصغر لمطعم أبو شقرة، بـ يقدم مشويات لذيذة متنوعة من أطباق أبو شقرة. أخذنا منيو من الموجودين بجانب الكاشير وبدأنا نستكشفهم، وما تراجعناش من منظر الطابور الطويل أمامه. المحل بـ يقدم كل أنواع ساندويتشات اللحوم والفراخ، منها شاورمة، وكفتة، وبانيه، مع وجبات كاملة تتكون من نوع لحوم وطلبين جانبيين من بين بطاطس محمرة، وأرز أو سوتيه، أو سلاطات زى الطحينة أو الثومية. لاحظنا كمان وجود مقبلات منها سمبوسك، وكبيبة، وورق عنب محشى ومكرونة. لما بدأنا نطلب وندفع الحساب، قالوا لنا أن تحضير الأكل بـ يستغرق حوالى 15 دقيقة؛ الحقيقة أننا انتظرنا أكثر شوية. شكل أكلنا كان واعد بتغليفه المميز وترتيب الأكل المنظم. وجبة الميكس جريل (50 جنيه) كانت مفاجأة فى الحقيقة، بحجمها القليل جدًا مع قطع صغيرة من الشيش طاووق، كباب وكفتة، بالنسبة لكمية الأرز كانت كبيرة، والخضار السوتيه كان مناسب. وجبتنا الثانية كانت شيش طاووق (30 جنيه) وكانت قريبة من الوجبة الأولى من حيث الحجم وطريقة التقديم. على غير عادة أبو شقرة، الأكل كان غير طازج. صحيح النكهة كانت معقولة والأكل شغال، لكن كان ينقصه التتبيلة، وطعم الأكل لا يمكن يكون خارج طازج من الشواية. الأرز كان مليان كبد فراخ وزبيب، وإحنا فى الحقيقة مش من عشاق الاثنين، والخضار السويته كانت مزيتة أكثر من اللازم. الخلاصة، بالنسبة للأسعار المنخفضة نسبيًا والمكان الصغير، جودة الأكل القليلة بالمقارنة بأبو شقرة الأصلى كانت متوقعة. على العموم، شقرة تو جو قدر يضيف نوع من التنوع للفوود كورت المليان أكلات سريعة غير صحية واللى بـ تعتمد فى الأساس على الأكل المقلى.

...

الدهان: أعرق كبابجي في مصر فتح في التجمع الخامس
اصدرت في: 06/05/2014

من أقل من سنة كتبنا أول مقال نقدي عن مطعم «الدهان» الكبابجي الشهير وكانت زيارتنا لفرع مصر الجديدة الموجود في شارع الميرغني، وكان واحد من أفضل المطاعم اللي كتبنا عنها وأخذ تقييم عالي وقتها وأشادنا بكل حاجة في المكان، من أول أناقة المطعم ومستوى الخدمة لحد المذاق المصري الأصيل للمشويات والطواجن، وقلنا ساعتها أن السمعة العظيمة اللي واخدها المطعم مش من فراغ وهو فعلًا جدير بها. المطعم العريق اللي عمره أكثر من 120 سنة فتح عدة فروع مؤخرًا بعد نجاح استمر حوالي 100 سنة في فرعه الأصلي في منطقة الحسين، في الرحاب والتجمع ومصر الجديدة وغيرها، كان لازم زيارة ثانية لواحد من الفروع الجديدة وبالذات في المناطق البعيدة عن قلب القاهرة لأن عندنا قناعة فيما يخص المطاعم المصرية الأصيلة أننا كل ما بـ نروح في ضواحي العاصمة كل ما الأصالة بـ تقل، وده كان الوضع في فرع القاهرة الجديدة، خلونا نحكي لكم عن التجربة. المطعم موجود في مول سيلفر ستار في التجمع الخامس، مدخل في الدور الأرضي لكن القعدة في الدور الثاني، شكله أنيق زي كل فروع الدهان في كل مكان، نفس الديكورات باللون الخشبي والأحمر، والأضواء الهادئة والموظفين بالملابس الرسمية، لكن مافيش شاشات تليفزيون في مكان الجلوس، فيه في مدخل المحل في الدور الأرضي ودي كانت حاجة مش مفهومة بالنسبة لنا. المنيو مقسم لمشويات وطواجن ووجبات ودجاج مشوي وحمام محشي وساندويتشات ومقبلات ومحاشي، وفيه منيو للحلويات والمشروبات لكن للأسف ما كانش موجود منه أي حاجة وقت زيارتنا، فطلبنا طبق مشكل كباب وكفتة (الكيلو بـ 142 جنيه) وطبق فيه جوز حمام مشوي ومحشي أرز (64 جنيه) وطبق بطاطس محمرة (6 جنيه) والسلاطات بـ تنزل مع الأوردر مجانًا، 3 أنواع وهي الطحينة وبابا غنوج وسلاطة خضراء وإحنا زودنا سلاطة زبادي (4 جنيه). الأكل تأخر شوية، مش قبل 20 دقيقة لما بدأوا ينزلوا لنا السلاطات اللي كانت معقولة بس مش روعة زي فرع مصر الجديدة، الطحينة كانت خفيفة والزبادي كان ساخن مع أن المفروض يبقى بارد، والسلاطة الخضراء نزلت لنا بعد ما خلصنا وجبتنا الأساسية تقريبًا، واضح أنها ما كانتش معمولة وجهزوا لنا طبق مخصوص، علشان كده ما كانش فيها طعم التتبيلة الشهيرة لسلاطة محلات الكباب والكفتة. ما رضيناش نخوض في الطواجن اللي أسعارها كانت ما بين 40 لـ 60 جنيه بالخضار واللحم والبصل، ولا المقبلات والممبار والسجق المشوي اللي جربناهم في فروع قبل كده. الكباب هو أحسن حاجة في وجبتنا، مستوي وطري ومتبَّل بحرفنة، الكفتة جيدة جدًا بس برضه في فرع مصر الجديدة كانت أحلى ولها نكهة أقوى، لكن اللحم هنا فريش ودي أهم حاجة. الحمام المحشي كان شكله يفتح النفس وحجمه كبير بطريقة ملفتة، لكن طعمه ما كانش بنفس الإبهار، فيه حاجة مش مضبوطة في النكهة وخلطة الأرز اللي جواه، مش سيء طبعًا وأكلناه كله، بس إحنا شاكين أن هو سبب التلبك المعوي اللي جاء للمحرر كاتب المقال بعد الوجبة. بس في المجمل الأكل عند الدهان تجربة لذيذة، بالذات لما تفكر أنك بـ تأكل عند الدهان مش في أي مكان، نتنمى بس أنهم يهتموا بكل الفروع علشان مافيش فرع ينتقص من سمعتهم العظيمة، وإلى الأمام يا «دهان».

...

الوادي: مشويات وأكلات بحرية في التجمع الخامس
اصدرت في: 28/11/2013

مول 7 Stars المشهور في التجمع الخامس بـ يلعب دور مهم في حياة سكان القاهرة الجديدة، لما بـ يحبوا يحسوا بالحياة والدوشة وأجواء وسط البلد بـ يتوجهوا فورًا بسياراتهم أو مشيًا على الأقدام لساحة المول المنورة والصاخبة دائمًا، وكثير مش بـ يهتم أنه يدخل مطاعم أو كافيهات لكن بـ يكتفي أنه يشرب عصير فريش من محل العصير الشهير اللي هناك. عرفنا أن المبنى المجاور لـ 7 Stars مول اسمه مارينا، والاثنين قريبين من مجمع محاكم القاهرة الجديدة للي مش عارف المنطقة كويس، وداخل مارينا مول لاقينا مطعم كبير بـ يحتل الطابق الثاني بالكامل اسمه مطعم وكافيه «الوادي» ومكتوب على اللافتة أنه متخصص في المشويات والأسماك، المستفز في اللافتة أنهم مستخدمين لوجو عبارة عن حرف W مكتوب بنفس طريقة لوجو ماكدونالدز أو حرف الـ M المعروف، يعني أخذوا لوجو ماكدونالدز وقلبوه! نعتقد ده كان سبب كافي أننا نأخذ انطباع سلبي عن المكان حتى قبل ما ندخله. مساحة كبيرة فعلًا من الداخل وترابيزات بأحجام مختلفة، وقعدات بكنبات كبيرة وكراسي خشبية مريحة، وشاشات ومكيفات في كل أركان المحل، القعدة بشكل عام جيدة والمنظر الخارجي اللي بـ يطل عليه المحل ظريف، لكن أول حاجة صدمتنا مع دخولنا للمكان هي رائحة كتمة غريبة كأن المكان مش بـ يتهوى أو يتنظف كفاية، مع أن شكله يوحي بغير كدة، لكن خليط من رائحة اللحم النيئ وزفارة السمك اللي جاية من المطبخ كانت لها أثر سيء ثاني علينا أول ما دخلنا المطعم. مع عمل المكيفات وفتح الشبابيك الموضوع بدأ يبقى أحسن، والكتمة راحت وبدأنا نستعرض المنيو المكون من مشويات وأطباق مصرية على سبيل المقبلات زي الضلمة والممبار والكشك والأرز المعمر ورقاق ومسقعة، وفيه منيو للطواجن وورقة اللحمة "اللي طلعت مش موجودة لما طلبناها" وفيه حمام ودجاج مشوي وبعض الأطباق العالمية زي البيكاتا والسكالوب، ومنيو الأسماك والجمبري ما حاولناش نتعمق فيه لأننا جايين نجرب المشويات والأكل المصري بشكل أساسي. سرفيس الضلمة والممبار المشكل (30 جنيه) طلبناه كأكلة افتتاحية ومعاه سمبوسك باللحم، كان معقول وتسوية الممبار جيدة، بس خلطة الأرز في المحاشي ناقصة كثير من التوابل والصلصة ولونها فاتح بزيادة، السلاطات الخضراء والطحينة وبابا غنوج والباذنجان والخيار المخلل (6 جنيه لكل طبق) كانت أحسن حاجة أكلناها في «الوادي» بجد، ولولاها كنا كتبنا أسوأ مقال نقدي كتبناه من شهور. طبق كباب وكفتة (135 جنيه للكيلو) اللحمة كانت تقريبًا مش مشوية، كأنها متحمرة على الجريل، الكفتة مافيهاش طعم الشواء خالص، والكباب كأنه لحم محمر في الزيت! مش عارفين بالضبط إيه اللي حصل في الطبق ده، الجرسون اعتذر لنا عن المذاق الغريب وقال لنا أن الشيف حط صوص غريب على اللحم بعد الشواء تسبب في الطعم والقوام الغريب ده، في النهاية هو ممكن يتاكل، بس هو مش كباب وكفتة زي ما إحنا فاهمين. طلبنا مسحب دجاج مشوي أو نصف دجاجة مخلية (33 جنيه) مع الأرز بالزبيب والقرفة والبطاطس المحمرة، كانت كويسة والكمية فيه كبيرة، لكن برضه مافيش أي حاجة مميزة في الطبق، مجرد فراخ مشوية زي أي محل عادي. حتى طبق أم علي (12 جنيه) اللي طلبناه قُدم لنا بارد وفي ورق فويل وواضح أنهم جايبينه من خارج المحل. ذوق العاملين مش سبب كافي أننا نعبر عن امتناننا بالتجربة، لأن فيه مشاكل كثير في المطبخ وجودة الطعام وفي القعدة ومستوى النظافة، وقبل كل حاجة اللوجو المسروق بدون مبرر! مش بـ نرشح «الوادي» لأي حد إلا قبل ما يعالج كل أوجه القصور اللي عنده.

...

أم محمد: أكل مصري ومشويات خرافية في التجمع الخامس
اصدرت في: 22/01/2013

حالة الانبهار اللي حصلت لنا بسبب الأكل في المطعم ده تستوجب كتابة مقال غير عادي، والبحث عن كلمات جديدة لوصف مدى روعة وعبقرية المذاق، والتفنن في كتابة جُمل اعتراضية بين كل سطر وسطر توضح مدى إعجابنا بكل تفصيلة هـ نذكرها. اعتبروا كل ده موجود وأنتم بـ تقرأوا السطور القادمة وهـ نحكي لكم تجربتنا في مطعم «أم محمد» الموجود في القاهرة الجديدة.المطعم داخل مول اسمه "سبير كار" أو موناليزا مول" في مجمع البنوك خلف شارع التسعين في التجمع الخامس، بالتحديد خلف بنك "بلوم مصر". مكان ديكوراته أشبه بالخيم الرمضانية بقماش الصوان الأحمر المميز على الجدران والأسقف ولمبات الإضاءة النحاسية بالمشربيات والكراسي الأرابيسك بالمساند الضخمة المريحة وفيه ركن بقعدة عربي وبوفات وشاشات التليفزيون حولك في كل مكان. دي أول حاجة عجبتنا، القعدة وديكورات المكان المعمولة بحرفية ولائقة تمامًا على منيو المطعم.مطبخ «أم محمد» متخصص في الأكل المصري ومش سايب أكلة مصرية مش بـ يقدمها تقريبًا. شوربات ومحاشي بأشكالها وكشك ومسقعة وطواجن لحم وخضار وعكاوي وكبدة جملي، وفيه حمام وبط وأرز معمر وفتة كوارع وأطباق بامية وتورلي وقلقاس وكرشة بالصلصة ومنيو كامل للمشويات وحلويات شرقية.ما بقيناش عارفين نختار إيه ولا إيه! كله حلو ومغري ولما لجأنا للجرسون اللي معانا علشان يرشح لنا الأفضل قال لنا بثقة أنه كله حلو، مافيش حاجة نص نص. بس كان فيه ركن للأكلات للأطباق المغربية في المنيو لسه مش شغال، بس مين محتاج أكل مغربي هنا! اللي جاي لـ «أم محمد» أكيد جاي للأكل المصري.طلبنا طبق ممبار (14 جنيه) مع سلاطة مشكلة (10 جنيه) كمقبلات، بداية رائعة وصنعة بيتي نادرة. ممبار مشطشط وسلاطة خضار فريش ومززة وزيتون أخضر مخلل وزبادي وطحينة مافيش أحلى من كده. من أطباق "أم محمد" الخاصة جربنا طبق فيه فردة حمام محشية بالأرز وقطع لحم بتلو محمرة وأرز بالمكسرات والصنوبر ومحشي كرنب وبطاطس محمرة ومعاه شوربة حمام وطبق ملوخية، وسعر الطبق 130 جنيه، هو صحيح الأصناف فيه كثير بس مش لدرجة المبلغ ده. المهم بقى الطعم، ممكن نتغزل في كل حاجة لوحدها بس، هـ نختصر ونقول لكم أن ده أحلى حمام محشي نأكله بره البيت من سنتين تقريبًا، واللحم والكرنب والأرز والملوخية هم ثاني أحلى حاجة ممكن تأكلها في حياتك بعد أكل الست الوالدة لو كانت من جيل الأساتذة اللي مش بـ يهزروا فيما يتعلق بالطبيخ. جربنا كمان المشويات المشكلة (الكيلو بـ 150 جنيه) فيه كباب وكفتة وطرب وريش وشيش طاووك وكبدة. كله مشوي على الفحم مش على الجريل، وعرفنا أن الصنايعي متخصص الشوي اللي عندهم من محل «الرفاعي» الشهير بالسيدة زينب، وهو اللي مطلع الأكل بالمستوى الرهيب ده. هنا أحلى كباب وشيش طاووك ممكن تذوقه في مصر. ما لقيناش في الأكل عيب فـ قولنا نقول أن الكفتة كانت حادقة شوية.يعني كان نفسنا نجرب كباب الحلة (38 جنيه) أو الأرانب المحمرة (65 جنيه) أو ورقة اللحمة (55 جنيه) بس ما كانش فيه مكان في معدتنا للأسف، يا دوب أخذنا عصير رمان (13 جنيه) وطبق قرع عسلي بارد بالمكسرات (20 جنيه) وتأكدنا أن الحلو هنا بنفس مستوى الأكلات الرئيسية. ممكن تيجي هنا الصبح بدري وتفطر فطير مشلتت (15 جنيه) مخبوز أمامك في فرن فلاحي عملاق، ومعاه عسل أسود وجبن قريش ومِش (10 جنيه) وتشرب شيشة بكل النكهات بعدها مع كوباية شاي أخضر ما حصلتش. المكان ده فعلًا اكتشاف وتجربتنا فيه كانت أقرب للمثالية، حبينا مستوى الخدمة والقعدة وأكيد طبعًا الأكل. تسلم أيد «أم محمد» ونتمنى نشوف فروع ثانية قريب.

...

كزبرة: توصيل أكلات ساخنة وكاترينج في القاهرة الجديدة
اصدرت في: 08/01/2013

وقعنا في صفحته بالصدفة على الفيسبوك، مطعم اسمه «كزبرة» بس عامل شغل حلو في اللوجو وشكل الصفحة ومكوناتها، المنيو بتاعه مصري وشرقي بنسبة كبيرة، بس فيه أطباق رئيسية وأكلات عالمية من بلاد كثير وحلويات ومشروبات. مكتوب على الصفحة أنه في القاهرة الجديدة، حاولنا نطلع العنوان بالضبط ما لقيناش أي معلومة مفيدة، فاتصلنا بهم وعرفنا أنه مش مطعم أو بمعنى أصح هو مطبخ فقط بدون صالة طعام متخصص في خدمة التوصيل وتحضير الوجبات الساخنة والكاترينج، ومافيش تيك أواي بالمعنى الحرفي للكلمة، لكن ممكن تتصل وتحدد الطلب بتاعك وتروح تأخذه من المكان بعد فترة من الوقت، أو تأخذه من عامل التوصيل من أقرب نقطة بينك وبين المكان. «كزبرة» مش بـ يوصل خارج التجمع الخامس والقاهرة الجديدة، ولو طلبِت معاك تأكل منه وأنت مش ساكن هناك، يبقى لازم تروح تستلم الأوردر بتاعك من التجمع بعد ما تتفق معاهم على ميعاد ومكان محدد داخل القاهرة الجديدة. وعادة بـ يجهز في خلال ساعة، مش أكثر من كده.المنيو ممكن تشوفه على صفحة الفيسبوك الخاصة بكزبرة وتشوف صور لأكلات تفتح النفس من مطبخهم. بـ يعملوا مقبلات وسلاطات وساندويتشات وباستا وطواجن وأطباق لحوم ودجاج وصواني بطاطس في الفرن بمكونات مختلفة وأكلات صحية للدايت زي الدجاج المشوي والبيكاتا بزيت الزيتون وساندويتشات الخضار المشوي، وفيه منيو لأكلات الصيامي منها السبانخ والبروكلي والكوسة على طريقتهم الخاصة. يعني تقريبًا كل حاجة موجودة في منيو «كزبرة».عملنا طلب من سلاطة بريزولا المكونة من طماطم شيري وجرجير وخس وشرائح لحم مدخن وجبن بارميزان وصوص ليمون (26 جنيه) وطاجن دجاج كزبرة (36 جنيه) وبيكاتا مشروم (48 جنيه) وتكلفة خدمة التوصيل 5 جنيه. الأوردر وصل لنا في الميعاد والمكان وكان محتفظ بحرارته، ده غير أن التغليف أكثر من ممتاز والعبوات والشنط اللي فيها الأكل أنيقة جدًا، وكلها عليها لوجو «كزبرة» المميز. الأكل نفسه معمول بحرفية كبيرة، شيف محترف يعني مافيش هزار، ومع ذلك هـ تحس بالنكهة البيتي في كل الأصناف والمكونات، خاصة في طاجن الدجاج بالصلصة والبصل وحلقات الفلفل، نصف دجاجة مطهية بطريقة عبقرية بـ تخليها طرية جدًا مع الصوص الأحمر المميز اللي بـ يتحط على الأرز الأبيض اللي بـ يُقدم معاها. البيكاتا بصوص المشروم كانت لذيذة وإن كانت قطع اللحم البتلو بـ تشد شوية، وبـ تُقدم مع أرز أبيض برضه. السلاطة بقى كان فيها خدعة مش لطيفة وهي استبدال شرائح اللحم المدخن المكتوبة في المنيو بشرائح بسطرمة، وده طبعًا خلاها طبق ثاني خالص غير اللي في خيالنا، لكن الخضروات نفسها كانت فريش والصوص اللي معاها لذيذ فعلًا. ووصل لنا مع الأوردر طبق خضار مشوي مع رقائق خبز مقرمش مش عارفين ده تبع أي طبق بالضبط، بس المهم أنه كان ممتاز وفيه مزازة ما حصلتش. لما حبينا نطلب تشيز كيك (17 جنيه) مع الطلب قالوا لنا أنهم هـ يبعتوا لنا الحلو كمجاملة من المكان، شكرناهم جدًا وفعلًا أرسلوا علبتين فيهم تشيز كيك وتشوكلت كيك وطلبوا مننا نحطها في الميكروويف 10 ثواني بس قبل الأكل مباشرة علشان تبقى في أحسن شكل وطعم لها. وفعلًا جربنا حلويات «كزبرة» اللي طعمها بيتي برضه بس لذيذة جدًا وغنية بالطعم بجد.تجربتنا مع «كزبرة» كانت ظريفة وخلت عندنا اختيار أننا لما نحب نعمل عزومة ويكون فيها أكل بيتي ممكن نعتمد عليه، خاصة مع دقة مواعيدها والتزامه بالأوردر بالضبط، وأحسن شوية كمان. تحفظنا بس كان على الكميات القليلة للأرز والعيش المقدم مع الأطباق الرئيسية، وكان المفروض يبقى أكثر شوية لأن دي خدمة توصيل ومافيش مجال أننا نطلب أي زيادات لو ما شبعناش أو أي أصناف جانبية كانت قليلة. لكن بشكل عام؛ المكان بـ يقدم خدمة على مستوى عالي جدًا ونتمنى أنه يوسع نشاطه ويبدأ يوصل خارج القاهرة الجديدة.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن