السادس من أكتوبر مطاعم in Cairo, Egypt

مطاعم

باستا سيتا: مطعم إيطالي قدر يدهشنا في الشيخ زايد
اصدرت في: 27/03/2016

ويست تاون هب من ساعة ما ظهر على الساحة وأصبح من أهم الأماكن اللي بتقدم تنوع مطاعم كبير في منطقة الشيخ زايد و6 أكتوبر عمومًا، بس ويست تاون أكيد مش المكان الوحيد في بيفرلي هيلز اللي بيقدم مطاعم حلوة، قدر باستا سيتا - Pasta Città الموجود في قلب The Walk في بيفرلي هيلز أنه يعمل شعبية كبيرة والسبب مكونات أكلهم اللي بيعملوها بنفسهم. باستا سيتا مطعم بسيط عنده قعدة أوت دوور فيها كراسي وترابيزات معدن، أما المطعم نفسه فتصميمه بسيط بنشوف فيه المواسير ظاهرة على الحوائط والإضاءة متعلقة على ارتفاع قريب. صحيح باستا سيتا بيقولوا أنهم مطعم إيطالي، لكن المنيو الكبيرة لها رأي ثاني، وهتلاقي فيها أطباق كثيرة مش إيطالي، عندك مثلاً أطباق سويسري منها كوردون بلو فراخ، وبيف ستروجانوف صاحب الأصول الروسية، وكمان كانتري فرايد تشيكن من أمريكا، وأخيرًا قسم خاص للفطائر، عمومًا المنيو فيها أصناف إيطالي زي الباستا والبيتزا والريزوتو وغيرهم. من بين مجموعة كبيرة من الأطباق قررنا نمشي على كلامهم ونطلب أكلات إيطالي منها بيتزا فراخ (45 جنيه) وباستا بنّا ألفريدو (55 جنيه)، ومعاهم طبق مقبلّات تشكين كريسبرز (35 جنيه). نتكلم الأول عن طبق المقبلات المكون من خمس قطع صدور فراخ مقرمشة طرية طعمها لذيذ، والطعم كان أحلى وأحلى لما غمسناه في صوص المسطردة بالعسل بطعمه الحلو واللاذع في نفس الوقت. أول حاجة وصلت كانت البيتزا بالفراخ –اللي طلبناها بجبنة زيادة وعجينة سميكة– وطعم الإضافات اللي عليها كان ماشي مع بعضه ومتوازن، طعم الفراخ المشوية كان روعة، أما الإضافات الثانية زي الطماطم ومعاها المشروم والزيتون فقدروا يسيبوا نكهة رائعة حتى بعد الأكل. نتكلم بعدها عن الألفريدو باستا بطعمها اللذيذ والمكرونة الفريش وخلطة الفراخ والمشروم بتتبيلتها الروعة وكمان صوص الألفريدو الأبيض المميز، والحقيقة أننا عمرنا ما نشبع منها. كان لازم نشرب حاجة نبلّع بها الأكل، فطلبنا What a Beautiful Dayبـ (25 جنيه) عبارة عن كوكتيل برتقال وليمون وجوافة وعسل معLife is Beautiful بـ (28 جنيه) عبارة عن كوكتيل فواكة من التفاح والخوخ والمانجو والفراولة. لما وصلنا للحلو، الجرسون طلب يختار طبق على ذوقه وإحنا وافقنا بدون تردد، الجرسون بعدها طلع على المطبخ، وبعد دقائق قليلة رجع ومعاه أطباقنا. نبدأ مع أول طبق وهو وافل بالشوكولاتة البلجيكي وعليه صوص شوكولاتة (35 جنيه)، وفعلاً الوافل كانت بيتي ومعمولة فريش وصوص الشوكولاتة الخفيف أضاف نكهة رائعة. طبقنا الثاني كان أوريو مادنيس (30 جنيه) عبارة عن قطع أوريو مطحونة عاملة ساندويتش ووسطه آيس كريم فانيليا وصوص توت أحمر لاذع، والحقيقة أنه كان مزيج هايل بين الطعم المسكّر واللاذع. آخر حاجة قبل ما نودعهم كانت من قسم المشروبات الساخنة وهي هوت شوكليت (25 جنيه)، طعم الهوت شوكليت كان حلو والشوكولاتة الذايبة كانت لذيذة وطعمه المسكّر الجميل بيفضل موجود حتى بعد ما خلصناه؛ نهاية ولا أروع ليوم لطيف. صحيح في الأول كنا خايفين شوية من المنيو الملخبطة، لكن الخدمة مع جودة الأكل كانوا روعة وباستا سيتا أكيد يستحق يكون منافس قوي للمطاعم المعروفة، أكيد هـ نرجع لهم في زيارة ثانية قريب.

...

دكان عزيز: فطار بيتي لطيف بنكهة شامي في ويست تاون هب
اصدرت في: 10/03/2016

ويست تاون هب فى الشيخ زايد من الأماكن اللى بنحب نروحها دايمًا سواء الصبح أو بالليل، لكن الصبح له إحساس خاص كده عندنا لأن المكان مفتوح ودايمًا مشمس والهوا يجنن، فما بنصدق نروحه علشان نبدأ يومنا البداية الصح. من الأماكن اللى ممكن تروح تفطر فيها دكان عزيز – Dukkan Aziz المعروف بأنه بيقدم أكلات شامية ولبنانية لكن عنده جزء خاص بالفطار، المكان ألوانه مبهجة وكل قعدته فى الهواء الطلق وقريب من النافورة. فى المنيو كانوا كاتبين فى أول صفحة سبب تسمية المكان باسم "دكان عزيز" وقصة صاحب المكان ورحلة كفاحه وسفره الدائم فى ظروف صعبة وعشقه للطبخ، استوقفنا غلطات إملائية كثيرة فى المنيو كانت غريبة جدًا بس مش ده هدفنا من الزيارة، لكن نرجع ونقول أن التفاصيل بتفرق وبتميز مكان عن الثانى. فى الجزء الخاص بالفطار واللى كان عبارة عن نصف صفحة بس، عندك اختيارين: إما إفطار كامل (رقم 1) وده عبارة عن فول وفلافل وجبنة بالطماطم وبيض حسب اختيارك مع عيش، وإفطار (رقم 2) عبارة عن معجنات وفلافل وبطاطس (الفطار الكامل 50 جنيه)، اختارنا الفطار رقم 1، فيه كمان أصناف منفصلة زي حمص، وفول شامى، وفلافل شامى.. إلخ، بس إحنا طلبنا زيادة على الفطار الكامل طبق بطاطس محمرة (13 جنيه)، وكمان طلبنا من العصاير الفريش ليمون باللبن (22 جنيه) وأناناس بالكيوي (24 جنيه)، ومياه معدنية (صغيرة بـ 12 جنيه مش عارفين ليه!). تحضير الفطار ما أخذش وقت طويل، نزل لنا سبت عيش شامى شكله يفتح النفس، وبعدها طبق البطاطس المحمرة اللى كان لونها أصفر بزيادة وبعد كده اكتشفنا أن محطوط عليها Powder أصفر مش متأكدين هو إيه الصراحة هو سبب اللون، وكمان طبق سلاطة خضراء وباقى الأطباق على التوالى. البطاطس المحمرة كانت مقرمشة من بره وطرية من جوه، الفلافل كان باين فيها أوى طعم الكمون ومعمولة كمان من الحمص والسماق (عامة السماق والكمون كانوا على كل حاجة حتى السلاطة)، كانت حلوة جدًا ومقرمشة وقوامها غني. الجبنة بالطماطم كانت كويسة وعليها عود نعناع للتزيين بس تعليقنا عليها أن كمية الطماطم المقطعة فى الجبنة كانت أكثر من كمية الجبنة نفسها، كان نفسنا المكونات تكون متوازنة شوية فيها، البيض طلبناه "أسبانى" يعني بالبصل والطماطم والفلفل الأخضر وكان طعمه كويس شبه اللى بناكله فى البيت، اللى أحبطنا خالص كان الفول، كان ناشف جدًا ومافيهوش صوص أو حتى عليه زيت علشان يطريه، ده غير أن كان ناقصه ملح شوية. اللى عجبنا جدًا بقى هناك العصاير الفريش، الليمون باللبن كان مضبوط فى مكوناته وكمان قوامه كان تمام، اللى اختراع بقى الأنانس بالكيوي، مهدئ للأعصاب جدًا والحلاوة أو السكر اللى فى الأناناس عمل تعادل مع المزازة اللى فى الكيوي، ده اكتشاف بالنسبة لنا، كمان عندهم عصير جوافة بالنعناع ممكن نبقى نجربه فى زيارة ثانية. زيارتنا لـ "دكان عزيز" كانت لطيفة كتجربة فطار، المنيو مليانة أصناف ثانية ممكن نبقى نجربها فى زيارة بعد فترة، لكن عامة لو عاوز تاكل فطار بيتي بنكهة شامى روح هناك.

...

مانشو ووك: أكل صيني بأسعار معقولة في ويست تاون هب الشيخ زايد
اصدرت في: 29/02/2016

شوفنا في الكام السنة الأخيرة ظهور أكلات جديدة ومختلفة على ساحة مطاعم القاهرة عمرنا ما شوفناها قبل كده، لما نتكلم تحديدًا عن الأكل الصيني هـ نلاقي أن فيه عدد معقول من المطاعم في العاصمة اللي بـ تقدم الأكل الصيني، لكن فضلت المشكلة الحقيقية وهي أنك تلاقي مكان عنده أكل صيني بجد تكون جودته عالية، وهنا كانت زيارتنا لمطعم مانشو ووك - Manchow Wok في ويست تاون هب الشيخ زايد علشان نشوف إيه الكلام. أول حاجة هـ نتكلم عنها هي مكان المطعم في بيفرلي هيلز بديكوراته البسيطة والمميزة في نفس الوقت، يعني عندك لوحات صينية، وكلام منقوش باللغة الصينية أو "الماندرين"، وصور تنين، وغيرها من اللمسات المميزة للمكان. بعد جولة استطلاعية في المنيو، قررنا نفتح نفسنا بشوية شوربة سي فوود (27 جنيه) ومعاها بيف دامبلنجز (18 جنيه)، أما الأطباق الرئيسية فقررنا نجرب طبق جمبري حار (68 جنيه). شوربة السي فوود بـ تتقدم في طبق شوربة عادي ومعاها ملعقة الشوربة الصيني المعروفة وعليها كرنب وجزر، مع شوية جمبري في قاع الطبق، والمميز في الشوربة أنها غنية بالتوابل الآسيوية اللذيذة. نطلع على البيف دامبلينجز اللي كانت مترتبة على شكل هرم صغير وعجينتها طرية ومليانة لحم مسلوق برضه طري، بس المشكلة أن قلب الدامبلينجز كان بارد شوية وتتبيلة اللحم مش على المستوى؛ وهنا يظهر دور صوص السويت أند ساور والصويا صوص والسبايسي صوص الموجودين على الترابيزة، اللي فعلًا قدروا يحسنوا من الطعم العام للطبق. أما طبق الجمبري فكان أحسن بمراحل، نتكلم عن الجمبري نفسه ونقول أنه طري بـ يذوب في الفم وكان مغطى بالخضروات مع نكهة الثوم اللاذعة وشوية صلصة محار وسمك أضافوا طعم مميز للأكل، نقدر نقول بكل ثقة أنه أحلى حاجة جربناها يومها. مانشو ووك مكان هايل للناس اللي عاوزة أكل صيني لذيذ بأسعار معقولة، جايز هـ تشوف أماكن أفخم بـ تقدم أكلات صينية في القاهرة بس مافيش عندنا مشكلة نرجع في زيارة ثانية ونجرب أطباق جديدة. *المقال ده كتبه عبد الرحيم عمرو –أو بودي- بمساعدة فريق عمل كايرو 360، وهو بـ يتواصل مع الموقع بصفته أكيل وكاتب ناشئ.

...

كاشيمبا: أكل شرق أوسطي لذيذ مع لمسات راقية في جاليريا 40 الشيخ زايد
اصدرت في: 04/01/2016

لما نتكلم عن المطبخ الشرق أوسطي، أول حاجة بـ نفكر فيها هي النكهات المتنوعة وكميات الأكل الكبيرة، أو على الأقل هو ده الحال في مطاعم القاهرة، "كاشيمبا - Cachimba" الموجود في جاليريا 40 الشيخ زايد بـ يضيف لمسة من الرقي والأناقة على النوعية دى من الأكل. الفكرة دي كانت ظاهرة على شكل المكان، كاشيمبا بـ يقدم شكل مودرن راقي، مع استخدامهم للألوان البرتقالي والأحمر في الديكورات والمكان الخشبي الكبير المليان نكهات شيشة، وطبعًا القعدة الـ Outdoor المريحة. واحد من الجرسونات المميزين وصلّنا لترابيزة فى المنطقة الخارجية، وعلى طول قدموا لنا ماء ديتوكس لذيذ منعش مجانًا فيه شرائح ليمون وخيار وورق نعناع. من الحاجات المميزة لكاشيمبا تشكيلة الأطباق المتنوعة الشرق أوسطية –ومنها أطباق التاباس والباييا الباردة والساخنة وحاجات ثانية– وطبعًا لازم نتكلم عن اختياراتهم المميزة من أطباق السي فوود والفراخ واللحوم. قررنا نختار من تشكيلة أطباق مطبخ الشرق الأوسط، وطلبنا كان تشيكن طاووق راب (55 جنيه) وكفتة أندلسي راب (45 جنيه). الطاووق كان ملفوف في عيش بلدي وتتبيلته كانت ممتازة وكمان صوص الليمون أضاف للطعم نكهة لاذعة مميزة ومعاه شوية خضروات، بس المشكلة أن فيه جنب من الراب كان محروق. نروح لراب الكفتة وحوله الحمص والخضروات المطبوخة صح، وصحيح الكفتة كانت طرية وعصارية، لكن نكهتها كانت مش على المستوى بسبب نقص التتبيلة والبهارات، والنتيجة كانت راب طعمه ضعيف، الاثنين قُدموا في طاسات ومعاهم بطاطس محمرة مقرمشة لذيذة. بعد ما خلّصنا على الراب، طلعنا على الحلو، كان أمامنا 4 اختيارات وهم قطايف (35 جنيه) وشوكليت بيت كيك chocolate beet cake بـ (35 جنيه) –كيك شوكولاتة بالبنجر– وهوت آبل جينجر كيك (30 جنيه) –كيك الشوكولاتة بالزنجبيل الساخن– وأخيرًا شوكليت فوندو (40 جنيه)، وطبعًا إحنا اختارنا الأخير، أصل خلينا نتكلم بصراحة، مين فينا يقدر يقاوم إحساس أنك تدخل المعلقة في الكيك وتشوف بركان الشوكولاتة الرائع وهو بـ ينفجر؟ المهم أن طلبنا وصل من الفرن مباشرة ومعاه بولة آيس كريم فانيليا، والحقيقة أن الشوكليت فوندو كانت مخبوزة صح من بره، بس المشكلة أن حشو الشوكولاتة ما كانش سائل زي ما كنا نتوقع، وعمومًا أكيد طعمها لا يقاوم مافيش كلام. خلصنا أكلتنا مع فنجان قهوة تركي معمول بمزاج (20 جنيه) وشيشة عنب (38 جنيه)؛ فعلاً أحلى نهاية لأكلة لذيذة. نقدر نقول أن تجربتنا مع كاشيمبا كانت مُرضية جدًا، واستمتعنا بالأكل وأجواء المكان، وأكيد المنيو الشرق الأوسطية المتنوعة هـ تخلينا نرجع في زيارة ثانية قريب.

...

تاكو هت: أكل مكسيكي محافظ على جودته فى مول العرب
اصدرت في: 03/01/2016

من 4 سنين رحنا "تاكو هت – Tako Hut" اللى موجود فى الفوود كورت فى مول العرب وكتبنا عنه مقال نقدي، ولأن شغلتنا بـ تحتم علينا مش بس تقييم المطاعم والكافيهات، لا لازم كمان نعيد زيارتنا للمكان ده بعد فترة علشان نشوف هو لسه محتفظ بجودة أكله وخدمته ولا لأ.. وكانت تجربتنا كالتالى: أول حاجة فيه عروض كل شوية بـ تنزل على صفحتهم على الفيسبوك، بالنسبة للمنيو المرة اللى فاتت لما رحنا ما كانش فيه مشروبات غير غازية بس، الجديد بقى أنك ممكن تضيف 15 جنيه –لما تطلب من قائمة التاكو أو البوريتو أو الساندويتشات- وتاخد وجبة مكسيكية مكونة من مشروب مكسيكي (موهيتو أو سانجريا) مع طلب جانبي كمان (تشيزي ناتشوز أو بطاطس تكساس اللى بـ يكون عليها جبنة ولحم مفروم مشطشط)، ده غير أن المنيو شكلها اتغير وتصميمها حلو أوى يفتح النفس وكل حاجة مكتوب عليها سعرها على عكس المرة اللى فاتت كانوا مش كاتبين أسعار. طلبنا من قائمة الأطباق الخاصة كاساديا فراخ (27 جنيه) ومن التاكو اختارنا تاكو ديلوكس تشيكن (32 جنيه) وضيفنا 15 جنيه وأخذناها كومبو (بطاطس تكساس ومشروب)، وسلاطة خضراء (19 جنيه) وللأسف مافيش أى أصناف تحلية. لازم نقول أن تاكو هت ما خذلناش أبدًا، كل الأصناف اللى طلبناها كانت مضبوطة ومستوية وكويس، سخنة وطعمها حلو، السلاطة كانت فريش وعليها Sour Cream من فوق وقطع هالوبينو اللى ممكن تشيلوها لو مالكمش فى الشطشطة ومحطوطة فى بولة من العيش المقرمش ودى السلاطة المفضلة لنا لأننا بـ نقعد ناكل الطبق/ العيش المقرمش مع الخضار، التاكو كانت رائعة، واللى بـ يكون معاها جبنة مع خس وطماطم وطعم العيش بتاع التاكو يجنن ويشبع، البطاطس كانت حلوة أوى برضه لكن العصير كان وهمي، عصير ليمون مع نعناع مضبوط ومنعش وهـ يخفف الشطشطة لو أنت طالب أكلك حراق (ممكن تطلبه من غيره عادي)، اللى كان طعمه حلو لكن لنا عليه تعليق كان الكاساديا، الصوص اللى معمول به الفراخ كان زيادة لدرجة خلى العيش مبلول وبالتالى مش ماسك نفسه والمكونات بـ تقع من كل حتة، مع أن المفروض الكاساديا بـ تكون ناشفة. تاكو هت Tako Hut، وروما واى Roma Way، وكانتون Canton كلهم تبع إدارة واحدة، وبما أن المؤشرات كويسة مع تاكو هت أكيد هـ نروح نزور باقى الأماكن دي واللى موجودين جنب بعض فى مول العرب علشان نقيمها، انتظروا المقالات قريب جدًا.

...

ووك تو جو: نودلز ممتعة ونكهات آسيوية مميزة في مول العرب
اصدرت في: 29/12/2015

بطبيعة حبنا للأكل وشغلنا في كايرو 360 بـ نجرب أماكن مختلفة، بس مش دايمًا بـ ننبهر بأماكن الأكل السريع، بس المكان اللي جربناه النهارده عجبنا جدًا، لأنه عنده الخلطة السرية اللي بـ نحبها وسرعة في تقديم الأكل وطعم جميل، أول ما دخلنا "ووك تو جو – Wok to go" في الفوود كورت في مول العرب، عجبنا جدًا المنيو اللي بـ يقدم أكل مختلف عن أي محل أكل آسيوي شوفناه، لأنه بـ يقدم ساندويتشات فراخ ولحم بنفس النكهات اللي بـ تتعمل مع النودلز أو الأرز، وكمان فيه وجبات خاصة للأطفال معاها لعب، وده طبعًا عامل جذب رهيب لهم. المنيو فيه الوجبات العادية بتاعة الأكل الآسيوي من دجاج سويت أند تشيلي، وماسلا بالكاري وبالفلفل الأسود غير الساندويتشات اللي فيه منها بالجمبري أو الدجاج أو اللحم بالتوابل الآسيوية المعروفة بكثرتها وأن فيه منها حار بزيادة. إحنا طلبنا 3 أطباق نودلز بالدجاج، ولازم نعترف كبداية أن طعم النودلز كان من أحلى الحاجات اللي استمتعنا بها، كانت مستوية تمام ومليانة صوص، أول طبق نودلز كان تروبيكال صغير (23 جنيه)، وتتبيلة التروبيكال عبارة عن تتبيلة حارة للدجاج بـ يُتبل فيها قبل ما يتقلي بدون أي صوص مع بصل وخضروات، الحقيقة أنه ده يعتبر أقل طعم صادفناه هناك لأن طعمه ما كانش قوي زي الباقيين، كمان طلبنا سويت أند تشيلي وسط (33 جنيه) وطعمها كان لطيف لولا أن تتبيلة الفراخ كانت ضعيفة شوية كانت محتاجة تشرب الصوص أكثر من كده، أما الحكاية والرواية واللي كان فعلًا طبق اليوم، هو الترياكي نودلز (38 جنيه) كبداية لازم نعترف أننا من عشاق الترياكي صوص لكن لما سألنا الشخص المسئول، قال لنا أنه مش معمول بس بالترياكي صوص لكن بإضافة صوص ياباني ثاني، وطعمه كان أقل حاجة تُقال عليه أنه رائع، بس الخضار كان محتاج يستوى زيادة عن كده خاصة الفاصوليا. تجربتنا في ووك تو جو كانت لطيفة جدًا خاصة أن الأكل اتجهز لنا في حوالي 10 دقايق، ومناسب للعائلة والأطفال أنهم يجربوا أكل أقرب لأكل البيت ومش مضر قوي زي باقي الأكل الجاهز وكمان معاه لعبة شكلها حلو.

...

جوبيل: أكل لبنانى معمول بمزاج فى كابيتال بيزنس بارك الشيخ زايد
اصدرت في: 28/12/2015

بقى لنا فترة بـ نشوف لهم صور على صفحتهم على الفيسبوك، وبـ نتغزل فى صور الأكل خاصة الكبيبة الشامي، وبقى لنا فترة برضه عاوزين نروح نزور ونستكشف كابيتال بيزنس بارك – Capital Business Park اللى فى الشيخ زايد وعلى نفس الصف بتاع جاليريا 40 بس قبلها بشوية، وعلشان نضرب عصفورين بحجر واحد شدينا الرحال ورحنا المطعم اللبنانى جوبيل – Jubail اللى مكانه مميز جدًا هناك. قبل ما نتكلم عن تجربتنا مع جوبيل لازم نشيد بفخامة وحلاوة كابيتال بيزنس بارك، المكان كمباني وأماكن مطاعم وكافيهات مريح نفسيًا وعجبنا جدًا لدرجة ممكن نروحه كل يوم، جوبيل موجود فى آخر الصف اليمين وأنت داخل والجرسونات بـ يستقبلوك بترحاب وبـ يسألوك لو أول مرة تزور المكان، والسؤال ده كان وراه دلع كبير من المكان لنا. المنيو فيها كل ما لذ وطاب من المأكولات اللبنانية والمقبلات الباردة والسخنة، اختارنا شوربة عدس (20 جنيه)، ومن السلاطات تبولة (24 جنيه)، ومن الأطباق الرئيسية فتة دجاج بالزبادي (65 جنيه) وكفتة باللبن (80 جنيه) بـ يقدم معاها أرز أصفر (الفتة بس هى اللى بـ تتعمل بأرز أبيض). أول حاجة نزلت لنا كان سلة فيها قراقيش عيش، وسلة ثانية فيها عيش أبيض سخن، ومعاهم لبنة للتغميس، طعم اللبنة كان حلو وغني وكريمي مع العيش الفريش، بعد وقت قصير جات الشوربة، وراها التبولة ووراها أول هدية مجاملة من المكان وهى فتوش جوبيل. الشوربة كان طعمها حلو جدًا، بس التكة اللى فيها أنك فى الأول بـ تحس طعم عدس وبعدين طعم حاجة حلوة ثانية مش عارفين هى إيه، ولما سألنا الجرسون أكد لنا أنها معمولة من العدس بس، التبولة كانت حلوة جدًا وفريش بس لذاعة الليمون كانت واضحة فيها بزيادة، وكان تعليق الجرسون أن دي طبيعة الأكل اللبناني والناس بـ تحبها كده، اللى كانت حلوة أوى فتوش جوبيل اللى كان العيش فيها عبارة عن رول عيش صغير مع مكونات الفتوش العادية عليها دبس الرمان وكمان عسل اللى زود من حلاوة وسكر السلاطة. بعد شوية من النقنقة جات لنا الأطباق الرئيسية، شكل فتة الفراخ لوحدها يخلى اللى مش جعان يجوع، قطع فراخ طرية عليها زبادي طعمه حلو جدًا وأرز مستوى كويس وعيش مقرمش فى آخر طبقة، الطبق ده حجمه كبير وكل مكوناته أحلى من بعض، خاصة طعم الزبادى اللى رفع من مذاق المكونات بدرجة كبيرة، الكفتة باللبن برضه كان طعمها حلو وتسوية الكفتة كانت مضبوطة، وأهم حاجة تتبيلتها اللى كانت مميزة، بس كان نفسنا يكون معاها أرز أبيض مش أصفر، بس الصراحة فتة الفراخ تكسب لو قارنناهم ببعض. بعد الأكل أخذنا لحظة راحة وطلبنا المنيو ثاني علشان نشوف الحلو والشرب، طلبنا لاتيه بالبندق (22 جنيه)، ومن الحلويات كنافة بالجبنة (38 جنيه)، برضه طلبنا ما أخذش وقت طويل وجاء لنا معاها هدية كمان مهلبية، إحنا كنا بـ نتدلع آخر دلع فى زيارتنا، ودي ميزة أنك تزور مكان لسه فاتح جديد وتكون دي أول زيارة لك عندهم! اللاتيه كان طعمه ثقيل شوية بس لطيف، والكنافة كانت طرية والجبنة اللى فيها مش محشية فى النص لكن كانت آخر طبقة فى الكنافة، ودي أول مرة نشوفها بـ تتعمل بالطريقة دي بس طعمها كان حلو وسكرها معقول، اللى كانت حكاية بقى المهلبية، لازم نعترف أننا مش من عشاق المهلبية خالص ومش بـ ناكلها لكن طعم المستكة اللى كان فيها خلانا مش قادرين نوقف أكل، معمولة بحرفية وجمال مش طبيعي، ختامها مسك. فى آخر زيارتنا أعطانا الجرسون منيو التيك أواى، وكارت تخفيض 10% لفترة محدودة للزيارة الجاية لنا، أكيد هـ نروح ثاني خاصة لو معانا ناس صحابنا وعاوزينهم يتبسطوا فى مكان إحنا ضامنيين جودة أكله وخدمته، وهـ يتدلعوا كمان!

...

الجناني: مطعم أكل سوري أصلي في 6 أكتوبر
اصدرت في: 22/12/2015

مع وفود عدد كبير من أهل سوريا للبلد، بدأت المطاعم السورية في الانتشار بشكل سريع، وبما أننا كان نفسنا نفطر فطار سوري، قررنا نروح الجناني –Al Jinani ، وهو مطعم مشهور في الحي السوري في 6 أكتوبر. الحي السوري موجود في واجهة مسجد الحصري، وهو شارع زحمة وكله مطاعم بـ تقدم الأطباق السورية التقليدية زي الشاورما، والفتة والكباب الحلبي، وبجانب عدد المطاعم الكبير، فيه محلات بـ تبيع منتجات سورية زي الجبن، والمكسرات وزيت الزيتون، بالإضافة للحلويات السورية المشهورة زي الكنافة النابلسية وحلوى الجبن، زي معظم مطاعم الحي، الجناني عنده مجموعة من الكراسي والترابيزات البسيطة كقعدة خارجية على الرصيف، فقعدنا علشان نستمتع بالشمس وهواء الصبح. بعد مجموعة من الاقتراحات اللطيفة اللي الجرسون اقترحها علينا، طلبنا طبق فول سوري (الحجم العادي 8 جنيه)، وفول باللبن (8 جنيه)، فلافل (5 جنيه)، تسقيًة (10 جنيه)، ومسبحة (7 جنيه) –اللي هي حمص سوري- وكل اللي طلبناه قُدم معاه طبق مخلل. الفول المطبوخ مع الحمص وقطع الطماطم مع رشة زيت زيتون كان طعمه مميز وخصوصًا أن كمية الثوم والبقدونس مع الليمون كانوا مضبوطين، الفول باللبن كان مليء بالنكهات أكثر من الطبق الأول، لأن عليه زبادي وطحينة واللي بـ نعتبرهم مكونين أساسيين في نجاح الطبق. بعكس الفلافل المصرية المعمولة من الفول، الفلافل السورية مصنوعة من الحمص وبالتالي لونها الأخضر أفتح؛ كانت سخنة، مقرمشة وطعمها رائع، استمتعنا بالمسبحة المصنوعة من الحمص، واللي قوامها يشبه إلى حد كبير الطحينة، خفيفة وفي نفس الوقت كريمي. التسقية بقى كانت أفضل طبق في التجربة، مكونة من حمص، وبقدونس وطماطم وطحينة، معاهم عيش مقرمش وسمنة على الوجه، طبعًا هي كانت دسمة، ولكن ده ما يمنعش أننا استمتعنا بها، في المجمل تجربتنا كانت ممتعة، بالرغم من أننا بـ نعز فطارنا المصري الأصيل، لو أنت من عشاق الأكل السوري، لازم تجرب الجناني.

...

ديرى كوين: أكلات سريعة وتشكيلة آيس كريم تجنن فى فرع مول العرب
اصدرت في: 13/10/2015

ديرى كوين – Dairy Queen مش محتاجين نكتب مقدمات طويلة عنه لأنه أكيد مألوف لناس كثيرة جدًا، خاصة فى الفوود كورت، كتبنا عنه قبل كده فى فرع سيتى ستارز من كام سنة، بس عامة للى ما يعرفوش هو مشهور أوى بحرفين DQ ومكتوب كمان على اليافطة Chill & Grill لدرجة ممكن تتلخبط هو مين اسم المكان! ديرى كوين لهم صفحة على الفيسبوك ممكن تعرفوا منها طبيعة الساندويتشات اللى بـ يقدموها، بس هما مشهورين جدًا بالتنوع اللى مش طبيعي فى تشكيلة الآيس كريم خاصة البليزارد، اللى بـ يُقدم لك بالمقلوب "عند الكاونتر فقط" ولو وقع تاخده مجانًا، وهما هنا بـ يثبتوا لك أنهم بـ يقدموا آيس كريم متماسك وغنى مافيهوش هوا ومملى على آخره، وأنت اللى بـ تختار المكون اللى فى الآيس كريم الفانيليا من: أوريو، إم أند أمز، سنيكرز .. إلخ. أول حاجة لازم نقولها –واللى قالها لنا الرجل على الكاونتر- أن الساندويتشات حجمها واحد، لكن الأحجام فى البطاطس والمشروب، أخذنا ساندويتش دوبل تشيز برجر (17 جنيه) وتشيكن جريل (23.54 جنيه) وطلبناها كومبو فزاد على سعر الساندويتش (2 كولا بـ 9.10 جنيه) و(2 بطاطس بـ 9.08 جنيه)، وطبعًا طلبنا أوريو بلايز Oreo Blizz بـ (الحجم الصغير بـ 19.09 جنيه). الساندويتشات بصفة عامة مخدومة كويس، المكونات فريش، الساندويتش ممكن يكون صغير شوية بالمقارنة بأماكن أكلات سريعة ثانية، والبطاطس المحمرة عندهم رفيعة جدًا عاملة دايت، بس كانت محتفظة بقرمشتها من بره وطراوتها من جوه. الآيس كريم بقى.. يا روحي عليه.. إحنا ممكن نعيش باقى حياتنا نتغذى على الآيس كريم ده، طعمه غنى وبـ تحس بالانتعاش مع كل قضمة منه، بجد رائع، الفكرة بس أن الحجم الصغير ببالضريبة عامل 21 جنيه فكثير طبعًا، بس الجودة برضه شفيعة له. "ديري كوين" يمكن مش واخد شهرة باقى أماكن الأكلات السريعة، يمكن علشان مش بـ يعمل دعايا كثيرة زيهم، ولأن برضه هـ نقول مش بنفس قوة أماكن ثانية، بس هو مكان لطيف فى فوود كورت كذا مول هـ يسد جوعك بأكل كويس وتشكيلة آيس كريم تجنن.

...

بوترى كافيه: ابدأ يومك بفطار منعش في ويست تاون هب الشيخ زايد
اصدرت في: 17/09/2015

لما نحب نروح مكان هادي ولطيف في الشيخ زايد، "ويست تاون هب – Westown Hub" أول مكان بـ ينط في دماغنا، هو و"جاليريا 40 – Galleria 40"، وكل مرة لما كنا بـ نروح ويست تاون هب كنا بـ نشوف Roll-up على مدخل "بوترى كافيه – Pottery Cafe" أنهم بـ يقدموا فطار مميز.. قلنا لازم نجربه لأننا دائمًا لما بـ نروح هناك بـ نجرب الأطباق الرئيسية والتحلية وما جربناش الفطار عندهم قبل كده.. وقد كان. رحنا قبل الساعة 10 علشان قبل ميعاد شغلنا، للأسف كانوا لسه بـ ينظفوا ويوضبوا المكان، الجرسون كان مهذب وما رضيش يقول لنا نمشي فـ قعدنا جوه لحد ما يخلصوا تنظيف بره في المنطقة الـ Outdoor لأن الشمس كانت مشجعة أننا نقعد في مكان مفتوح. أخذنا المنيو ودخلنا على قسم الفطار على طول اللى مكون من 7 أنواع فطار وقسم للمخبوزات والكرواسون السادة وبالجبنة أو التركي.. إلخ، اختارنا منها أومليت (30 جنيه) عبارة عن أومليت معمول مع فلفل أحمر ومشروم وبصل أحمر وكسبرة خضراء وتوابل، ومكتوب في المنيو مقدم معاها عيش بالزبدة والثوم، وإحنا كمان زودنا إضافة جبنة بارميزان عليها من فوق (8 جنيه) وفطار الخواجة (47 جنيه) عبارة عن 2 بيضة أنت بـ تختار طريقة تحضيرها وإحنا اختارنا طريقة Scrambled eggs ومعاها بـ ينزل زبدة ومربى وسوسيس إيطالي وبطاطس مكعبات بالأعشاب وبرضه معاها عيش بالزبدة والثوم. من المشروبات كمان اختارنا عصير برتقال (22 جنيه) وشاي (19 جنيه) عليه إضافة لبن (7 جنيه)، الجرسون قال لنا أن التحضير هـ يستغرق نصف ساعة، وبعد فترة طلعنا قعدنا بره في القعدة الـ Open Air بره. أول حاجة جاءت لنا هي العصير، البرتقال رغم أنه مش الموسم بتاعه كان طعمه مقبول وفريش بالمقارنة بأماكن ثانية بـ يبقى طعمه مر وما يتشربش، الشاي باللبن جاء لنا بدري عن الأكل فاضطرينا نسأل الجرسون أنه يسخن المياه ثاني علشان نقدر نشربه مع الفطار لما نزل وكان متعاون ومؤدب جدًا. ندخل بقى على الكلام الكبير، الأومليت كان حلو أوي، طعم الجبنة البارميزان مع البيض والخضار الفريش اللى فيه فتحت نفسنا وأنعشتنا في بداية اليوم، وكمان الـ Scrambled Eggs كانت معمولة مضبوط مع مكعبات البطاطس المقلية بقشرها (القشرة بـ تضيف طعم حلو أوي لها وكمان قيمتها الغذائية بـ تكون فيها) كمان مع السوسيس كانوا ميكس مثالي، بس أحبطنا جدًا أن العيش (شرائح توست مقطعة رفيع) اللى نازل مع الطبقين ما كانش بالثوم والزبدة، كان سادة! بعد ما خلصنا فطار كان لازم نختم زيارتنا بالبان كيك (30 جنيه) اللى مكتوب في المنيو أنها 2 قطعة بان كيك رقيقة تقدم مع الفواكة الطازة وصوص الشوكولاتة أو الـ Mable Syrup المشهور به، طلبنا الفاكهة اللي معاها موز اللى اتفاجئنا أنها مكتوبة في الـ Receipt إضافة موز (7 جنيه)! المفروض دي مش إضافة، دي حاجة في مكون البان كيك، عامة البان كيك كانت أكثر من رائعة، هشة، العجينة رائحتها تجنن وصوص المابل كان خفيف وعامل ثنائي حلو مع الموز، استمتعنا به لحد آخر قضمة. ختمنا قعدتنا بلاتيه كراميل، اللى برضه لقيناه في الـ Receipt مكتوب لاتيه (24 جنيه)، وإضافة أكسترا كراميل (7 جنيه)، مش فاهمين ليه "إكسترا"! وعلى الرغم من كده اللاتيه ما حسيناش فيه بطعم الكراميل أوي، بس كان لطيف. فطارنا في بوتري كافيه كان منعش، طعمه حلو ويفتح نفس الواحد أنه يبدأ يوم عمل شاق بصدر رحب، بس اللي ضايقنا أن العيش ما كانش فيه زبدة وثوم، والأصناف اللى حاسبينها أنها "إكسترا" أو كـ "إضافة"، لأن في النهاية مش منطقي أن شخصين يروحوا يفطروا يدفعوا 225 جنيه! أمال في الغداء هـ ندفع كام؟.. بس كانت بداية حلوة لليوم.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن