مأكولات سريعة مطاعم in المهندسين Cairo, Egypt

مطاعم

فلفلة: مطعم الأكل المصري الشهير وصل المهندسين
اصدرت في: 14/08/2014

"فلفلة" من المطاعم المشهورة جدًا اللي بـ تقدم الأكل المصري الصميم. لما عرفنا أنه فتح في المهندسين قررنا أننا نروح نشوف هل هـ نقدر نعتمد عليه لما تطلب معانا فول وطعمية "والذي منه"، أو هـ نستمر في اختياراتنا المعتادة اللي بقى لها فترة في المنطقة؟ مبدئيًا فلفلة المهندسين ديكوراته تختلف تمامًا عن أي فرع ثاني، يمكن بـ يحاول أنه يتواصل مع أهل المنطقة من خلال الواجهة الخشبية المليئة بالموتيفات المصرية الملونة، واللي في الوقت نفسه لها طابع حداثي. موضوع تفاصيل الديكور الكثيرة ما بـ ينتهيش عند الواجهة فقط، ده بـ يمتد للداخل بمجموعة من نفس الموتيفات، زائد جداريات –هي كلمة كبيرة- بس هي الوصف المناسب للرسوم اللي على الحائط من أوله لآخره. العيب الأساسي أن المطعم إضاءته مش كافية، فبالتالي أنت شايف أشكال وألوان كثيرة من غير ما تعرف تفسرها... يعني من الآخر دوّشة بصرية. المكان فيه عدد محدود من الترابيزات، داخل المطعم نفسه فيه بار على اليمين، وفي الوسط اثنين High Tables، ده غير ترابيزتين خارج المحل. الحقيقة أننا حاولنا نقعد داخل المحل، ولكن شكلهم كده كانوا بـ يحاولوا يخففوا الأحمال وبالتالي مش مشغلين تكييف، زود على كده الحرارة اللي خارجة من المطبخ... القعدة كانت مستحيلة. المهم... قررنا أننا نطلب ساندويتش فول (1.75 جنيه) العيش طازج والفول كطعم كان حلو جدًا، إلا أنه كان ملحه زائد عن المطلوب، ساندويتش الطعمية (1.75 جنيه) كان رائع، دائمًا مشكلتنا مع ساندويتشات الطعمية أن سلاطتها بـ تضيع قرمشة الطعمية نفسها، إلا أن فلفلة مشهور بأن مكونات السلاطة اللي بـ يضيفها مقرمشة زي الخس والكرنب، فبالتالي الطعمية فضلت مقرمشة... نقدر نقول أن ده أفضل ساندويتش طعمية جربناه. فلفلة يعني شاورما، فكان لازم نجربها، طلبناها كومبو (15.50 جنيه)، قبل ما ندخل في تفاصيل الساندويتش لازم نوّضح أن كل ساندويتشات اللحمة جانبها نجمة صغيرة بـ تشير لجملة مكتوبة في آخر المنيو: (لحم بلدي متجهز عندنا... نضمن لك أكل خالي من اللي بالي بالك.)، وبالفعل اللحم طعمه وتسويته كانت أكثر من ممتازة، مافيش داعي أننا نتكلم عن البطاطس لأنها مش Homemade –يعني مش عاملينها من الألف للياء- بالرغم من أنهم أضافوا بعض البهارات عليها... بس في النهاية هي مش مميزة. آخر ساندويتش وقع اختيارنا عليه كان السجق المصري الحجم العادي (7.00 جنيه)، كان نفسنا أننا نكتب رأينا فيه، بس للأسف إحنا ما لقيناش سجق علشان نتذوقه. الطلبات كلها كانت جاهزة في أقل من دقيقة... بلا مبالغة، عدا السجق، قلنا بقى هـ نأكل الساندويتش الأسطورة... بس للأسف هو كان أسطورة، لأن كل اللي أكلناه كان عيش وخس، قطعة السجق الوحيدة كانت واقعة في الكيس.. انتهيت القصة. الخدمة ممتازة وسريعة، المكان نظيف جدًا، غلطة السجق قاتلة، بس ده ما يمنعش أننا هـ نفكر في فلفلة لما تطلب معانا شاورما.

...

ذا ماستر شيف: أطباق عالمية بنَفَس ست بيت شاطرة فى المهندسين
اصدرت في: 15/04/2014

بالرغم من شهرة شارع سليمان أباظة بالمهندسين، إلا أن عادة بـ تكون الشوارع المتفرعة منه لغز كبير ومُحير بالنسبة لناس كثير. كل المطاعم اللي في الشوارع دي بـ تعتمد على الدعاية الورقية المُعلقة على أعمدة النور في الشوارع الرئيسية. "ذا ماستر شيف – The Master Chef" كان الاستثناء الوحيد، عرفناه بالصدفة لأننا كنا بـ نمشي في الشارع اللي هو فيه كنوع من كسر الملل. المطعم واجهته بسيطة بشكل جميل، بياض ناصع وواجهة زجاجية، تطلع له بسلالم جانبها حوض نباتات. غالبًا فيه أوت دوور، عبارة عن مساحة ضيقة بالكاد تتسع لترابيزة، إلا أنها كانت خالية تمامًا. الديكور الداخلي بنفس اللون الأبيض، بالإضافة للونين الأسود والأحمر اللي موجودين في الترابيزات الزجاجية، واللي كراسيها لما تتجمع حولها تكوّن مربع (وبمناسبة الكراسي، هي مش مريحة بالمرة ومش هـ يفرق معاها وزنك أو طولك... هـ تتعبك، هـ تتعبك). دخلنا المطعم، خالي تمامًا من أي حياة ماعدا سيدة في الخمسينات -اكتشفنا بعد كده أنها صاحبة المكان– تبادلت معانا من تحت نظارتها نظرات معناها: "هو الناس فين؟" فهمت نظرة الاندهاش فقامت دخلت وراء الكاونتر تنادي على شخص دلت ملابسه على أنه الشيف. قدم لنا منيو مليء بالأصناف لجميع الوجبات من إفطار: سندويتشات فول وطعمية (2.50 جنيه) والكريب بأنواعه (15 جنيه) وحتى السلاطات (20 جنيه). الشيف واضح أنه مش معتاد على وجود زبائن لأنه ما فهمش طلباتنا من أول مرة، لازم نشاور له على الصنف في المنيو. المنيو مكتوب فيها اسأل عن طبق اليوم، لما سألنا الشيف اندهش لوهلة بعد كده رد: "اللي موجود في المنيو هـ نقدمه"، يعني من الآخر وفّر على نفسك، واطلب اللي موجود وأنت ساكت! المهم، طلبنا عصير مانجو (10 جنيه)، وزي ما بـ يقولوا "أول القصيدة كُفر"، العصير كان واضح جدًا أنه مُعلب. جربنا من الأطباق الرئيسية فراخ سويت أند ساور (35 جنيه) وفيليه بصوص الفلفل الأسود (45 جنيه)، ومن الشوربة طلبنا شوربة الكريمة بالفراخ (12 جنيه). الحقيقة أن انطباعنا الأول مش ظريف، وعلى أساسه توقعنا جودة الأكل. ولكن الشوربة كانت هائلة، عارف لما يطلق على الأكل جملة "معمول بحب"، الفراخ والمشروم موجودين بوفرة، والكريمة مخملية كده وناعمة... يا مُسهل. الفراخ كانت رائعة، صحيح كمية البصل عليها كانت كبيرة، إلا أن الصوص مضبوط ومغطي كل القطع، البطاطس المحمرة كانت بيتي بشكل جميل وطازجة وكذلك الخضار السوتيه بتتبيلته المميزة اللي لا هو مهري ولا هو مقرمش كأنه نيء. الفيليه لحمُه كنوعية ممتاز، وكدرجة طهي جيد (بالرغم أن الشيف ما سألناش عن درجة طهيه) إلا أن تتبيلته كانت قوية، طغت على طعمه، وعلى صوص الفلفل الأسود طعم القرفة (لدرجة أن الطبق كان حراق). جربنا باستا بالصوص الأبيض وكانت أكثر من رائعة: كريمي والصوص بتاعها فيه نكهة خفيفة من الريحان: منعشة فعلًا (طبعًا ما تتوقعش أن الشيف يسألك عن نوع المكرونة، وأحمد ربنا أنه بـ يسألك عن نوع الصوص). قائمة الحلويات مملة جدًا وتفتقر الابتكار: جيلي (10 جنيه)، وكريم كراميل (12 جنيه) وما شابه. صاحبة المكان اقترحت علينا نجرب حلو جديد اسمه ماستر كيك (15 جنيه): طبقة من الكريم كراميل فوق كيكة إسفنجية بالشوكولاته، واللي من الآخر اسمها الحركي في مصر: قدرة قادر... ليه بـ يسموها كده؟ تفاصيل معقدة في عملية الطهي: كل المكونات بـ تتحط مع بعضها وتدخل الفرن تنفصل لوحدها لتكون الطبقتين المذكورين أعلاه. كانت حلوة ومكوناتها طازجة بس مسكرة بزيادة بعد أكل كميته كبيرة نسبيًا. التجربة فريدة من نوعها، المعاملة مش عدائية بس تحتاج جهد أكثر من كده. الأطباق مش مبتكرة، إلا أن التنفيذ أقل وصف له أنه رائع كأن ست بيت شاطرة هي اللي طابخة، والمكونات طازجة والشيف بـ يشتغل أول ما تطلب، ده غير النظافة.. يستحق الزيارة.

...

موروز تيك أواى: أكلات سريعة عادية فى المهندسين
اصدرت في: 31/03/2014

صناعة الأكل فى العموم زيها زى أى حاجة ثانية من ناحية المنتجات المستوردة والأفكار، والحقيقة أن الجو العام السائد فى مطاعم القاهرة لسه رايح ناحية مبدأ الفاست فوود لإشباع رغبات المصريين، وده هو السبب الأساسى أن كثير من المطاعم المحلية والسلاسل قادرة تنافس أسماء عالمية زى ماكدونالدز وغيره. على شارع سوريا فى المهندسين، "موروز تيك أواى - Moro's Take Away" إضافة جديدة من الإضافات المستمرة لمطاعم الأكلات السريعة فى القاهرة، بمنيو شاملة ترضى كل الأذواق، لأى وجبة طوال اليوم. صحيح الدعاية بـ تقول أنه مطعم تيك أواى بـ يوصل 24 ساعة، بس عندهم كمان مكان قعدة بسيط، عبارة عن بار أسود وكراسى عالية بمساند حمراء. طبعًا شكل الأكلات السريعة اللى كلنا عارفينه موجود، بس الجديد من موروز هو شوربة العدس (9.99 جنيه) وكريمة الفراخ (19.99 جنيه). المطعم كمان بـ يقدم ثلاثة أنواع من الكلوب ساندويتش: تونة (15.99 جنيه)، روست بيف (17.99 جنيه) وبيض بالجبنة (12.99 جنيه). احتمال أكثر حاجة تشدّك فى المنيو تبقى ساندويتش بيتزا فراخ (16.99/ 20.99 جنيه)، عبارة عن شرائح من الفراخ وقطع هوت دوج عليهم زيتون، وطماطم، وفلفل أخضر وجبنة موتزاريلا. رغم أن بخار الحرارة كان طالع من العيش الأبيض، خلطبيطة المكونات ما قدرتش تنسجم مع بعضها، مع الفراخ عديمة الطعم الغالب عليها طعم الجبنة المملح بزيادة. صحيح طعم كلوب ساندويتش البيض بالجبنة –اللى يعتبر أكثر حاجة صحية فى منيو موروز- فى المجمل كان معقول وقريب من أكل البيت، مع شرائح طازجة من الخس والطماطم، بس المشكلة أن استخدام شرائح الجبن المعالج كان مش موفق. حتى لو كانوا استخدموا جبنة شيدر عادية برضه كان يبقى أحسن. بالنسبة للمقبلات والأطباق الجانبية فمتنوعة: حلقات البصل (كبير 11.99 جنيه) وبطاطس محمرة (وسط 4.99 جنيه/ كبير 6.99 جنيه) والاثنين متحضرين بزيت زيتون طازة أضاف لهم قوام مقرمش وطعم خفيف، مع رشة من البهارات. رغم أننا كنا مستنيين نذوقهم بصوص المايونيز بالثوم (1.75 جنيه) المخصوص من موروز، الطعم كان كله مايونيز وبس، ومافيش أى نكهة للثوم. رغم أنه بـ يقدم أكلات سريعة مناسبة ومافيهاش تعقيد، موروز تيك أواى مش بـ يقدم أى ابتكار أو جديد –كلام كبير على مطعم فاست فود، مش كده؟- يقدر به يخطفنا من مطاعمنا المفضلة.

...

درويش: أكلات مصرية شعبية فى المهندسين
اصدرت في: 24/03/2014

مافيش شك أن شارع جامعة الدول يعتبر نوعًا ما وكر لمطاعم القاهرة. الشارع الزحمة فى المهندسين دائمًا بـ يجذب أهل القاهرة وغيرهم اللى بـ يفكروا يأكلوا سواء كان فى أشهر سلاسل المطاعم أو فى الأماكن الصغيرة اللى مش معروفة. "درويش" مطعم لسه فاتح قريب، متخصص فى الأكلات المصرية بأبسط صورها. المنيو سريعة وملخصة وده بـ يسهل عملية الطلب. بساطته مش دليل خالص على جودة الأكل، بس فى الحقيقة، الطباخين هناك قدروا يقدموا أكلات ممتازة. المطعم عبارة عن محل صغير وسط الشارع الزحمة، ومدخله المكشوف بـ يسمح لسحب الدخان تخرج من شوايتهم الجذابة. مع عدد محدود من القعدات داخل المطعم، فيه قعدات ثانية بره المكان بسيطة وجذابة من كراسى بلاستيك حمراء وترابيزات أسطحها من المعدن. صحيح درويش بـ يعمل ساندويتشات منها شاورما فراخ أو لحمة (5: 15 جنيه)، السحر اللى بجد بـ يظهر فى الوجبات الكاملة زى نصف فرخة مقلية مع ملوخية وأرز (22جنيه) أو فتة (25 جنيه). الطحينة والبابا غنوج (3 جنيه) عندهم قوامهم سميك وغنى بالنكهة، وبعيد كل البعد عن القوام السائل المنتشر فى كثير من المطاعم. كانت حاجة كويسة أن الأرز زيته قليل عن الموجود فى أغلب مطاعم القاهرة، ومع طعم الملوخية، كده أنت قدرت تكون أكلة مصرية بسيطة. طلبنا من الكفتة (104 جنيه/ للكيلو) كان طري وبـ يمضغ شوية، وقُدمت على فرش من الأرز وعليها حوالى ثلاثة أو أربعة أرغفة عيش، ومع واحدة أو اثنين سلاطة طحينة، كده الأكلة بقيت تمام. نصف فرخة درويش المشوية (22 جنيه) حجمها كان كبير ومشوية صح الصح، خصوصًا اللحم الغامق اللى طعمه كان لذيذ، والفضل يرجع للتبيلة والبهارات الرائعة. على الطريقة المصرية، قطعنا الفراخ لقطع صغيرة ورميناهم فى طبق الأرز والملوخية. بصفته مستجد فى منافسات جامعة الدول، وسباق المطاعم الصعب فى أغلب الوقت، جايز درويش مش بـ يقدم حاجة مبتكرة، بس على العموم، موقع المطعم الممتاز مع الأكلات السريعة المعروفة هـ تجذب كثير من الجعانين.

...

جست فلافل: متخصص الفلافل الشهير يحتل القاهرة
اصدرت في: 28/01/2014

حتى مع أرقى المطاعم المنتشرة فى القاهرة، الفلافل –أو الطعمية زى ما بـ نقول عليها – هى أكلة المصرى الأساسية. بعيدًا عن الناس اللى بـ تعانى من حساسية البقوليات، مافيش أى شخص خطى أرض مصر وما استمتعش على الأقل بساندويتش فلافل واحد. ومع الشهرة الرهيبة والسمعة المحفوظة لأكلة مصرية شعبية، ما كانش غريب أن المطاعم المصرية تهتم بها بكل شدة. مع تأسيسه فى الإمارات العربية فى 2007، "جست فلافل - Just Falafel" اسم بـ يهدف لتغيير شكل أكلة الفلافل التقليدية. بجانب ثلاثة فروع فى مصر، تقدر تلاقى جست فلافل فى تركيا، عمان، الأردن، لبنان وحتى فى المملكة المتحدة. فرع المهندسين صعب يفوتك بشعارهم المميز باللون الأخضر، ومكون من دورين. الدور الأول مخصص لكاونتر طلبات ضخم، أما الدور الثانى عبارة عن منطقة جلوس تقليدية تطل على شارع جامعة الدول. المنيو بـ تقدم تشكيلة مختلفة من ساندويتشات الفلافل منها ميكسيكان (13 جنيه) عبارة عن فلافل، جبن شيدر، خس، مخلل وصلصة طماطم ملفوفين فى خبز تورتيا، إيطاليان (12 جنيه) المكون من جبن موتزاريلا، طماطم، كمون وصوص بيستو فى خبز شياباتا بالأوريجانو. بإضافة 3 جنيه، تقدر تختار فلافل مشوية بدلاً من مقلية. المطعم بـ يقدم كمان عدد بسيط من الأطباق الجانبية منها فلافل بايتس (8 جنيه)، ويدجيز سبايسى (9 جنيه) أو حمص جست فلافل (9 جنيه) بالتوابل والهالوبينو. الصوص يشمل الريد شيلى، كوكتيل صوص وبيستو مايو (4 جنيه للواحد). طلبنا فلافل جابانيز مشوية فى خبز تورتيا (16 جنيه) وفلافل إنديان مقلية فى خبز بنى (15 جنيه). علشان نضيف نكهة أكثر، طلبنا صوص بيستو مايو وصوص إنديان. علشان الفلافل الجابانيز تكون مشوية، الطلب احتاج وقت أطول فى تحضيره عن المعتاد. الساندويتشين قُدموا على أطباق بلاستيكية، ملفوفين بإحكام وعليهم ستيكرات واضح عليها الأسماء. للأسف الشديد، ولا حاجة طعمها كان حلو زى شكلها.. صوص البسيتو مايو كان مجرد رشة بسيطة من البسيتو وده كان سبب أن الطعم يشبه المايونيز العادى، أما صوص الإنديان فكان طعمه قوى بزيادة، مشطشط وسيء المذاق. لسوء الحظ، بجانب الخضروات، صوص الإنديان كان واحد من المكونات الأساسية فى ساندويتش الإنديان، وكان مغطى على باقى الطعم. راب الجابانيز، على الناحية الثانية كان معاه خليط مميز من الأفوكادو الطازج، خس، طماطم، بذور السمسم، جنزبيل ومايونيز يابانى. صحيح لهم منا التقدير على ابتكارتهم، المكونات كانت زيادة شوية؛ ابتكار فرانكنشتين كان مش مضبوط خالص، وكمان المشمش صعّب الأكل، الاستمتاع أو حتى تمييز أى نكهة. صحيح الإشادة لازم تُقدم للشركة اللى أضافت تغيير رائع على أكلة فضلت ثابتة لأجيال متلاحقة فى القاهرة، لكن فى النهاية، الزبائن محتاجين نكهة أكثر من مجرد فكرة.

...

الطازج: ساندويتشات فراخ ووجبات فعلًا طازجة في فرع المهندسين
اصدرت في: 20/11/2013

لما كنا بـ نسمع عن مطعم "الطازج" ما كانش بـ يلفت نظرنا الاسم قوي لأن عادي كل المطاعم لما بـ تعلن عن نفسها أهم حاجة بـ تقولها أن الأكل كله طازة، لكن لما روحنا "الطازج" فرع المهندسين -عند سور نادى الزمالك أمام فندق أطلس- عرفنا أن الأكل الطازج مش مجرد أنه يكون سخن واتعمل أمامنا خاصة اللحوم. المطعم مش كبير قوي لكن كان فيه ناس كثير وكان من الواضح أن عليه إقبال كبير، وكمان لفت انتباهنا رائحة الأكل المشوي على الفحم اللى كانت مميزة جدًا. فى "الطازج" لما طلبنا الفراخ المشوية على الفحم اللى المطعم مشهور بها كنا متخيلين أننا هـ نأكل فراخ مشوية زى اللى بـ نأكلها فى أى مطعم، لما جاء لنا الأوردر الفراخ كان شكلها عادى مش مقدمة بشكل مختلف عن المطاعم الثانية لكن بصراحة كانت رائحتها مختلفة خالص، ولما أكلنا كان طعمها مختلف عن أى فراخ أكلناها قبل كده، لما سألنا الجرسون عن السبب قال أنهم لهم خلطة خاصة بهم بـ يتبلوا بها الفراخ، كمان الفراخ كانت طرية مش بـ تتمضغ كثير، وعرفنا بعد كده لأنها صابحة يعنى مذبوحة فى نفس اليوم مش متخزنة فى الثلاجة، وعرفنا كمان أن ده بـ يحصل على طول سواء فى الفراخ أو الحمام أو أى طيور، علشان كده اسمه "الطازج". المفاجأة أن الأسعار كانت مش غالية بالنسبة للمطاعم اللى فى المهندسين، يعنى وجبة نصف فرخة مع سلاطة خضراء وسلاطة طحينة وباكيت بطاطس وبيبسى (35 جنيه)، وبعض أصحابنا طلبوا أوردر أرز وكفتة فراخ وسلاطة خضراء وسلاطة طحينة (22.50 جنيه) والأرز كان بالخلطة وكان طعمه حلو جدًا وكان الطبق معقول مش صغير ومش كبير وفيه Option أننا نزود الأرز وكان سعر الطبق الصغير (5 جنيه) والطبق الأكبر شوية (7 جنيه) وكمان كان فيه أنواع سلاطات زي سلاطة الكول سلو كبيرة (6 جنيه) وسلاطة الثومية (3 جنيه) والسلاطة الخضراء (5 جنيه) والذرة المسلوقة (7 جنيه) وباكيت بطاطس كبير (6 جنيه). وكمان المنيو مش أطباق وبس، فيه كمان ساندويتشات ودي بقى مش عادية، لهم إضافات بـ تخلي طعم الساندويتش مختلف تمامًا، يعني مثلاً ساندويتش كفتة الفراخ متبلة بأعشاب بـ تخلي طعمها مختلف ورائحتها كمان حلوة جدًا (20 جنيه) ومعاه بيبسي وباكيت بطاطس صغير وساندويتش الشيش طاووك فيه موتزاريلا وشرائح زيتون أسود بـ تخلي الشيش مختلف عن أي شيش أكلناه قبل كده (25 جنيه) ومعاه بيبسي وباكيت بطاطس صغير. وكان فيه كمان وجبات للأطفال ومعاها هدايا، وكمان عندهم بانيه رومى ووجبات من الحمام والديوك الرومى بس ما جربنهاش وكانت برضه أسعارها فى المتناول. ممكن بعد الأكل تحلي فى أى محل من محلات جامعة الدول لأن المطعم قريب جدًا من فرغلي مثلاً ونحلي لو إحنا فى يوم ترفيهي. المكان مناسب جدًا لأي شخص فى دائرة المهندسين أو ميدان لبنان أو أحمد عرابي أو ميت عقبة وممكن توصل له بأكثر من طريقة، ممكن ميكروباص ميت عقبة من ميدان لبنان وممكن ميكروباص من ميدان سفنكس. لو معاك عربية ما تقلقش فيه مكان ممكن تركن فيه وأنت مرتاح وممكن لو طالب ساندويتشات تأكل فى عربيتك من غير ما حد يقول لك أنك شاغل الطريق، ولو أنت حابب تطلب دليفري اطمئن الأوردر هـ يوصل لك بسرعة وبرضه طازة وسخن من خلال 19018 وتكلفة التوصيل تقريبًا 3 أو 4 جنيه.

...

بسمتيو: مش بس ساندويتشات فى جامعة الدول بالمهندسين
اصدرت في: 06/11/2013

مطعم "بسمتيو – Basmatio" أكثر الدعاية اللى اتعملت عنه كانت عن الساندويتشات، لكنه فى الحقيقة بـ يعمل أطباق هائلة جدًا وأسعارها فى متناول الجميع على عكس المطاعم المجاورة له فى نفس الشارع.. شارع جامعة الدول العربية بجوار محل فرغلي بتاع العصير. إحنا وأصحابنا ما كناش قاصدين نتغدى فى بسمتيو بالتحديد لكن قولنا نجربه، أول ما دخلنا المطعم تفاجئنا أنه مش كبير ومش فيه ترابيزات بس فيه 2 بار للأكل، قعدنا وطلبنا المنيو وكنا متخيلين بصراحة أن كله أو أغلبه ساندويتشات، لكن تفاجئنا أن عندهم أطباق كثير مش بس كده، لأ وكمان أسعارهم حلوة جدًا، طلبنا بسمتى شاير تشيكن وكان عبارة عن طبق أرز بسمتي مع قطع الدجاج وصوص الشاير الكريمي (19.75 جنيه) و طلبنا طبق أرز بسمتي مع بيكاتا بقطع اللحم والمشروم وصوص المشروم (24.75 جنيه) وطلبنا 2 ساندويتش جونيور برجر مع البطاطس (15.75 جنيه). بصراحة لما طلبنا الأوردر هيأنا نفسنا أن الأكل مش هـ يكون قد كده لأن الأسعار كانت رخيصة جدًا، بس لما جاء لنا الأكل تفاجئنا أنه مُقدم بشكل شيك جدًا كأننا فى مطعم كبير والأكل نفسه شكله كان يفتح النفس بصراحة ورائحته حلوة جدًا وكثير، والأرز كان طعمه حلو جدًا لأنهم كانوا عاملينه بخلطة بهارات خاصة بهم، ولما لقينا الأكل كويس تشجعنا وطلبنا سلاطات: سلاطة ثومية (2 جنيه) وكول سلو (4 جنيه) والسلاطة كانت لا تقل جودة عن الأطباق، أكلنا وشبعنا جدًا وتبقى مننا أكل كمان. بعد ما أكلنا لقينا الجرسون بـ يسألنا عن رأينا فى الأكل، ولنا أى ملاحظات ممكن نكتبها فى دفتر الآراء، قبل ما نمشى قال لنا الجرسون أن فيه خصم النهاردة على طبق الفروت سالاد بـ 7 جنيه بدلاً من 10 جنيه، بالفعل طلبناه وكان فريش وحلو جدًا وممكن تضيف عليه كريم شانتي أو كراميل، طلبنا إضافة صوص الكراميل ودفعنا (3 جنيه) زيادة وكان الطبق حلو جدًا. لما خرجنا من المطعم كنا مبسوطين أن إحنا اكتشفنا مطعم رخيص وأكله حلو وجودته عالية، لكن بصراحة ما عرفناش نستمتع بالجلوس فيه لأن المكان مش كبير وكمان بـ نأكل على بار يعنى فيه ناس جنبنا فـ كنا بـ نتكلم بصوت منخفض جدًا مراعاة لهم، كمان كنا بـ نأكل بسرعة علشان ما نشغلش المكان كثير، بس بصراحة ما نخبيش عليكم إحساس التوفير كان جميل جدًا. لاحظنا أن المطعم عامل عروض خاصة للعائلات، يعنى مثلًا فيه أطباق الأرز بكل أنواع التشيكن سعرها (69.75 جنيه) وتكفى 6 أفراد، وأطباق الأرز بأنواع اللحم سعرها (79.75 جنيه) وأطباق الأرز بأنواع الأسماك سعرها (89.75 جنيه) وكمان تكفي 6 أفراد. يعنى ممكن أي أب يعزم أسرته فى الويك إند على الغذاء من غير ما تخاف من الفاتورة، ولو مش عاوز تحلي فى المطعم ممكن تحلي من عند فرغلي بتاع العصير لأن بسمتيو جنبه بالضبط يعنى ممكن تبقى خروجة كاملة من غير تنقلات كثيرة.

...

عبده تلوث: جنة اللحوم فى المهندسين
اصدرت في: 10/09/2013

وسط عدد كبير من مطاعم القاهرة المعروفة ظهرت ثقافة المطاعم العصامية اللى قدرت تحقق نجاح كبير بمجهوداتها. "عبده تلوث" يعتبر من الأمثلة الشهيرة، بدايته كانت عربيه أكل بـ تبيع ساندويتشات على رصيف فى مدينة نصر، وتوسعت إلى مش بس فرع واحد، دول فرعين فى القاهرة. هروبًا من زحمة شارع جامعة الدول، طلعنا على السلالم لمكان القعدة الخاص بفرع ميدان سفنكس. المساحة كانت أكبر بـ كثير من توقعاتنا، مع الترابيزات بشكلها المبهج وحجمها الكبير اللى يشيل مجموعات كبيرة، وبجد فعلاً كنا مرتاحين على الآخر. كل ترابيزة من الترابيزات بترتيبها المنظم عليها مجموعة من المنيوهات بـ تنده لك علشان تطلب الأكل اللى تحبه. ونظرًا لبداياته البسيطة، توسعه انعكس على المجموعة المتنوعة من الأطباق فى المنيو، وأغلى طبق فيهم أقل من 20 جنيه. مجموعة الساندويتشات التقليدية تشمل سجق إسكندرانى (5 جنيه)، كبدة (5 جنيه)، كفته مشوية (8 جنيه)، تشيكن كرانشى (12 جنيه) مع ابتكارات جديدة زى حلم عبده (8 جنيه)، عبده تلوث المخصوص (12 جنيه)، عبده تكساس (15 جنيه) ومشنكاح ليالى زمان (7 جنيه). شرح لنا جرسون لطيف أن الأخير عبارة عن ساندويتش سجق متحضر مخصوص، والطريقة هو أنه يغليه وبعدين يحمره، قبل ما يضيف له الصوص والبقدونس. حلم عبده عبارة عن خليط ممتع من السجق مع الخضروات والجبنة. عرفنا كمان أن ساندويتش عبده تلوث المخصوص (12 جنيه) عبارة عن رنجة ملحها أقل من المعتاد وعليها طحينة، أما عبده تكساس (15 جنيه) هو محاولة مصرية لتقليد التشيلى تشيز فرايز مع إضافة من اللحم المفروم. طبعًا احتارنا وسط مجموعة الاختيارات الكبيرة، وأخيرًا قررنا نطلب طبق تركيش باشا مع المكرونة (15 جنيه)، ساندويتشات سجق إسكندرانى وتركى (5 جنيه)، ومشنكاح ليالى زمان (7 جنيه). كنا عاوزين كمان نجرب المعجنات بالجبنة (10 جنيه) بس كانت خلصت وقت زيارتنا. وصلت الطلبات فورًا على أطباق سيئة الشكل من الفوم، قللت من عظمة الساندويتشات الفينو المحشية بكميات كبيرة. الحقيقة أن مجرد قضمة واحدة مسحت أى أخطاء؛ ساندويتش من العيش الطرى الطازج فيه لحم لذيذ بـ يكمله مجموعة من التوابل وكل ده ثمنه 5 جنيه بس! السجق الإسكندرانى والتركى على الرغم من طعمهم المختلف، كسبوا معانا برضه. مكرونة تركيش باشا كانت مستوية زيادة شوية، لكن أنقذها صلصة الطماطم وخليط اللحم اللى يمكن قوامه ملخبط شوية لكن الطعم كان رائع بالخلطة السرية. بالنسبة للحلو، اختارنا سكلانس 5x1 (8 جنيه). الساندويتش ده معمول أصلاً لاختبار أقوى بنكرياس فيكى يا بلد، علشان مليان حلاوة طحينية، وعسل، ومربى وقشطة وصوص شوكولاتة. واضح طبعًا من الكلام أنه لعشاق السكريات، بس كان ينقصه التوازن؛ أغلبه كان عبارة عن حلاوة، وما قدرناش نلاحظ طعم أى مكون ثانى. باختياراته المتنوعة بين التقليدى والمبتكر، عبده تلوث يقدر يشبع رغبات أى عاشق للحوم. لكل المكافحين النباتيين فى القاهرة، حاول تزور المطعم ده فى يوم أجازتك.

...

كينتارو: مطعم بداخل كهف في المهندسين
اصدرت في: 28/05/2013

الأكل الأمريكي معروف بشكله اللذيذ وطعمه اللذيذ وكمان بنسبة الدهون المرتفعة فيه، لكن بالرغم من كل ده مازال المطبخ الأمريكي مفضل بالنسبة لسكان القاهرة وإحنا بـ نحب دائمًا نجربه حتى لو كان ده هـ يكلفنا ساعتين في الجيم وجرعات من الشاي الأخضر علشان نقدر نخفض نسبة الدهون دي. قد إيه بـ نفتقد الشوارع الهادئة في القاهرة البعيدة عن طرق التكاتك ومزيكاتهم المعروفة والميكروباصات وسواقتهم اللي بـ تحسسنا كأنهم في سباق فورمولا 1، شارع عبد الحميد لطفي خلف مسجد مصطفى محمود في منطقة المهندسين من الشوارع الهادئة اللي بـ نحب نتمشى فيه من وقت للثاني، في آخر الشارع لمحنا مطعم شكله من الخارج غريب قوي عبارة عن صورة الزعيم الهندي "سيتنج بول" وحولها لون أحمر في لوجو كبير ومكتوب عليه "Kintaro" ما ترددناش أننا نجرب المكان الجميل ده اللي شبه الكهف من برة. دخلنا المطعم اللي عبارة عن أربع ترابيزات في الخارج وجانبهم شواية كبيرة وفي الداخل على اليمين المطبخ والكاشير وفي الشمال ثلاث ترابيزات حول كل ترابيزة كنبتين كبار يكفوا شخصين، استقبلنا جرسون ودود ومؤدب قوي وقال لنا "أن فيه مشويات ووجبات نصف فرخة معاها أرز وغيره برة المنيو" بعد ما أخذنا معلومته في الاعتبار بصينا في المنيو اللصغيرة والمليانة بالوجبات والصور اللي بـ تتقسم لوجبات برجر وساندويتشات والبيتزا ووجبات الفطار ووجبات المشويات، اختارنا "ميكس جريل كورس" (30 جنيه) و"كينتارو سيكس ميكس" (45 جنيه) وزجاجة مياه صغيرة (5 جنيه)، فترة انتظار حوالي 25 دقيقة وخلالها قاعدين بـ نتفرج على الديكور اللطيف الخشبي والأمريكي قوي والأنتيكات اللي متعلفة على حيطان المطعم زي الماسكات بتاعت أمريكا اللاتينية (مش عارفين إيه العلاقة) وكمان في السقف كان فيه لمبات كثيرة جنب بعضها كان شكلها لطيف قوي وحديث، رائحة المشويات والتتبيلة بدأت تجري ريقنا، وصل "كينتارو سكس مكس" وده كان عبارة عن شريحة توست تحتها قطعة من البرجر البقري عليه جبنة سايحة وتحتهم قطعة من صدور الفراخ المشوية وتحتهم شريحة توست تحتها قطعة ثانية من صدور الفراخ مع قطع من البسطرمة والجبنة والمايونيز وتحتهم القطعة النهائية من التوست مُقدمة مع بطاطس محمرة وفلفل ألوان، حسينا أننا داخلين على تحدي من تحديات برنامج Man VS Food، كنا بـ نحاول نخلصه لأخره؛ البرجر كان دسم قوي والجبنة أعطت له طعم جامد جدًا، أما صدور الفراخ المشوية كانت عادية مش مبهرة قوي لكن البرجر والبسطرمة والجبنة أعطوها طعم مميز، كمان العيش التوست كان طازج وطري. بعد كده وصل "ميكس جريل كورس" وده كان عبارة عن 3 صوابع كفتة مشوية مع 4 قطع من الشيش طاووق مع أرز وبطاطس محمرة ومشروم مشوي، الميكس جريل كان مشوي أمام أعيننا والتتبيلة في الكفتة والشيش طاووق كانت هائلة مع بطاطس محمرة كويس مش مزيتة لكن مش مقرمشة والأرز كنا حاسين أنه مش طازج وزي ما يكون متسخن مش لسه معمول. قضينا يوم جميل في "كينتارو" لكن الحرارة كانت مرتفعة في المكان بالرغم أن التكييف كان شغال إلا أن حرارة الصيف كانت شبه مسيطرة على المكان، المطعم أضاف 9.60 جنيه خدمة و4.80 جنيه ضريبة، نتمنى مطعم كينتارو يستمر على مستوى الأكل اللذيذ ويحافظ على المستوى الجامد ده من الخدمة ونشوف لهم فروع في كل مكان.

...

فرح: فتة شاورما ومشويات وطواجن في المهندسين
اصدرت في: 08/01/2012

المنافسة دائمًا صعبة في المهندسين في موضوع المطاعم والكافيهات، خاصة في شارع زي جامعة الدول العربية، مع كل نظرة يمين أو شمال عينيك هـ تقع على مطعم أو كافيه وكله بـ يحاول يخطف الأنظار بيافطة شيك أو أضواء أو اسم عجيب أو منيو مميز، ورغم الزحام الشديد في الشارع ده تقريبًا على مدار 24 ساعة إلا أننا بقينا نعرف نلاقي لنفسنا ركنة بالعربية (ومش صف ثاني) بالتعاون مع العدد المهول من السياس اللي مسيطرين على الشارع، ومش هـ يغلبوا أنهم يوقفوك أمام المحل اللي أنت عاوز تقعد فيه. قبل نهاية شارع جامعة الدول من ناحية شارع السودان وجنب عصائر «فرغلي» هـ تلاقي مطعم وكافيتريا «فرح» ناصب عربية شاورما كبيرة خارج المحل وعامل قعدة وترابيزات بلاستيك بسيطة على الرصيف، وبعد المحل بمحلين كمان هـ تلاقي محل ثاني مكتوب عليه «فرح» برضه وده من الداخل عبارة عن قهوة بلدي، والمساحة اللي أمام محلين فرح بالمحلين اللي في الوسط كلها مخصصة لترابيزات «فرح» وقعداته الخارجية، وطبعًا مافيش قعدات داخلية لأن المساحات صغيرة جدًا. الملفت أن «فرح» دائمًا زحمة، وبـ تزيد الأعداد بشكل ملحوظ في الساعات المتأخرة من الليل، وواضح أن معظم الموجودين من مرتادي المكان وحافظين المنيو تقريبًا، وإحنا ما ننكرش أننا كنا دائمي التردد على المكان لما نلاقي نفسنا في المهندسين وجعانين! المنيو فيه مشويات بأنواعها ومحاشي وكل أنواع الفتة والطواجن وساندويتشات لحوم وأسماك وبعض أنواع السلاطات والمشهيات. الكباب بـ 160 جنيه الكيلو والأنتركوت بـ 140 جنيه، الكفتة والطرب بـ 88 جنيه، والحمام المحشي بـ 28 جنيه الواحدة. من الأماكن القليلة اللي هـ تلاقي فيها شوربة كوارع (15 جنيه) وباقي أنواع الشوربة من 5 لـ 12 جنيه. ساندويتشات الشاورما في عيش الصاج بـ 14 جنيه وباقي أنواع اللحوم والدجاج بأسعار من 8 لـ 14 جنيه، والأسماك والجمبري من 15 لـ 28 جنيه الساندويتش. بدأنا بطبق تبولة (5 جنيه) وما كانش حلو للأسف وكان طعم البرغل فيه غريب، لكن صبرنا نفسنا بطبق الثومية والطحينة اللي بـ ينزل تحية من المحل على الترابيزة، ومن منيو (الفتة والصحون) زي ما هو مكتوب طلبنا طبق الفشنكاح (الاسم اللي بقى مستخدم زيادة عن اللزوم اليومين دول) وهو الطبق المشكل اللي فيه كل أنواع المحاشي والمشويات وقطعة دجاج بانيه وبطاطس محمرة وممبار (35 جنيه) ودي كانت أحسن طريقة نجرب بها كل مأكولات المحل تقريبًا. المحاشي حلوة قوي خاصة الباذنجان، ورق العنب كان فيه بعض وحدات مش مستوية كويس، الشيش طاووق والممبار من الآخر! أحلى حاجة في الطبق، الكباب والكفتة بقى كان عليهم كلام كثير، ناقصين توابل وناقصين تسوية ولولا الطحينة ما كناش قدرنا نأكلهم خالص. الطريف أن الطبق بـ يُقدم شكله ضخم جدًا ومليان أصناف، إنما اكتشفنا أن فيه في وسط الطبق طبق ثاني من الفويل مقلوب على وشه علشان يعمل شكل هرمي للطبق ويوحي أن كل الجبل ده من المحاشي واللحوم، لكن في النهاية الطبق كان شكله حلو، وطعمه فيه حاجات وحاجات. أجمل فتة شاورما في المهندسين هـ تأكلها هنا في «فرح»! سعرها 20 جنيه لحم أو دجاج، عيش محمص وأرز متشرب بالمرق وشاورما معمولة بحرفنة ومعاها طبق ثومية كبير، وجبة معتبرة ومش غالية وبـ نرشحه لك بعنف لو كنت في المكان. «فرح» بـ يعمل أطباق لفرد واحد (برسيون) من الجمبري والسكالوب والستيك والمخ البلدي بسعر 60 جنيه، وعنده مازليكا (كبد وقوانص) بـ 40 جنيه، وطاجن عكاوي (60 جنيه)، وتورلي (28 جنيه) وفيه كمان بط وأرانب بـ 50 جنيه الطبق، وجلاش ورقاق باللحم (20 جنيه)، يعني ممكن تأكل كأنك في البيت بالضبط وبعدها تطلب بيبسي أو عصير ليمون أو شاي من القهوة المنضمة للمكان. القعدة هناك مسلية وظريفة، بس بالليل في الشتاء الدنيا بـ تبقى ثلج (وأنت قاعد في الشارع) لكن ده ما يمنعش أن الجو في «فرح» يفتح النفس. وهـ تلاقي نفسك عاوز تروح ثاني.

...

شاهد المزيد
مواضيع خاصة

الأفراح في كايرو: 10 من أهم الأسماء في عالم التجميل لكل عرائس كايرو

الماكياج دلوقتي يعتبر نوع من أنواع الفنون، وطبعًا كل فن محتاج فنان يبدع فيه. بقالنا كام سنة بنشوف في مصر والشرق الأوسط زيادة في عدد خبراء التجميل زي العلامات التجاري