مصري مطاعم in المهندسين Cairo, Egypt

مطاعم

فلفلة: مطعم الأكل المصري الشهير وصل المهندسين
اصدرت في: 14/08/2014

"فلفلة" من المطاعم المشهورة جدًا اللي بـ تقدم الأكل المصري الصميم. لما عرفنا أنه فتح في المهندسين قررنا أننا نروح نشوف هل هـ نقدر نعتمد عليه لما تطلب معانا فول وطعمية "والذي منه"، أو هـ نستمر في اختياراتنا المعتادة اللي بقى لها فترة في المنطقة؟ مبدئيًا فلفلة المهندسين ديكوراته تختلف تمامًا عن أي فرع ثاني، يمكن بـ يحاول أنه يتواصل مع أهل المنطقة من خلال الواجهة الخشبية المليئة بالموتيفات المصرية الملونة، واللي في الوقت نفسه لها طابع حداثي. موضوع تفاصيل الديكور الكثيرة ما بـ ينتهيش عند الواجهة فقط، ده بـ يمتد للداخل بمجموعة من نفس الموتيفات، زائد جداريات –هي كلمة كبيرة- بس هي الوصف المناسب للرسوم اللي على الحائط من أوله لآخره. العيب الأساسي أن المطعم إضاءته مش كافية، فبالتالي أنت شايف أشكال وألوان كثيرة من غير ما تعرف تفسرها... يعني من الآخر دوّشة بصرية. المكان فيه عدد محدود من الترابيزات، داخل المطعم نفسه فيه بار على اليمين، وفي الوسط اثنين High Tables، ده غير ترابيزتين خارج المحل. الحقيقة أننا حاولنا نقعد داخل المحل، ولكن شكلهم كده كانوا بـ يحاولوا يخففوا الأحمال وبالتالي مش مشغلين تكييف، زود على كده الحرارة اللي خارجة من المطبخ... القعدة كانت مستحيلة. المهم... قررنا أننا نطلب ساندويتش فول (1.75 جنيه) العيش طازج والفول كطعم كان حلو جدًا، إلا أنه كان ملحه زائد عن المطلوب، ساندويتش الطعمية (1.75 جنيه) كان رائع، دائمًا مشكلتنا مع ساندويتشات الطعمية أن سلاطتها بـ تضيع قرمشة الطعمية نفسها، إلا أن فلفلة مشهور بأن مكونات السلاطة اللي بـ يضيفها مقرمشة زي الخس والكرنب، فبالتالي الطعمية فضلت مقرمشة... نقدر نقول أن ده أفضل ساندويتش طعمية جربناه. فلفلة يعني شاورما، فكان لازم نجربها، طلبناها كومبو (15.50 جنيه)، قبل ما ندخل في تفاصيل الساندويتش لازم نوّضح أن كل ساندويتشات اللحمة جانبها نجمة صغيرة بـ تشير لجملة مكتوبة في آخر المنيو: (لحم بلدي متجهز عندنا... نضمن لك أكل خالي من اللي بالي بالك.)، وبالفعل اللحم طعمه وتسويته كانت أكثر من ممتازة، مافيش داعي أننا نتكلم عن البطاطس لأنها مش Homemade –يعني مش عاملينها من الألف للياء- بالرغم من أنهم أضافوا بعض البهارات عليها... بس في النهاية هي مش مميزة. آخر ساندويتش وقع اختيارنا عليه كان السجق المصري الحجم العادي (7.00 جنيه)، كان نفسنا أننا نكتب رأينا فيه، بس للأسف إحنا ما لقيناش سجق علشان نتذوقه. الطلبات كلها كانت جاهزة في أقل من دقيقة... بلا مبالغة، عدا السجق، قلنا بقى هـ نأكل الساندويتش الأسطورة... بس للأسف هو كان أسطورة، لأن كل اللي أكلناه كان عيش وخس، قطعة السجق الوحيدة كانت واقعة في الكيس.. انتهيت القصة. الخدمة ممتازة وسريعة، المكان نظيف جدًا، غلطة السجق قاتلة، بس ده ما يمنعش أننا هـ نفكر في فلفلة لما تطلب معانا شاورما.

...

درويش: أكلات مصرية شعبية فى المهندسين
اصدرت في: 24/03/2014

مافيش شك أن شارع جامعة الدول يعتبر نوعًا ما وكر لمطاعم القاهرة. الشارع الزحمة فى المهندسين دائمًا بـ يجذب أهل القاهرة وغيرهم اللى بـ يفكروا يأكلوا سواء كان فى أشهر سلاسل المطاعم أو فى الأماكن الصغيرة اللى مش معروفة. "درويش" مطعم لسه فاتح قريب، متخصص فى الأكلات المصرية بأبسط صورها. المنيو سريعة وملخصة وده بـ يسهل عملية الطلب. بساطته مش دليل خالص على جودة الأكل، بس فى الحقيقة، الطباخين هناك قدروا يقدموا أكلات ممتازة. المطعم عبارة عن محل صغير وسط الشارع الزحمة، ومدخله المكشوف بـ يسمح لسحب الدخان تخرج من شوايتهم الجذابة. مع عدد محدود من القعدات داخل المطعم، فيه قعدات ثانية بره المكان بسيطة وجذابة من كراسى بلاستيك حمراء وترابيزات أسطحها من المعدن. صحيح درويش بـ يعمل ساندويتشات منها شاورما فراخ أو لحمة (5: 15 جنيه)، السحر اللى بجد بـ يظهر فى الوجبات الكاملة زى نصف فرخة مقلية مع ملوخية وأرز (22جنيه) أو فتة (25 جنيه). الطحينة والبابا غنوج (3 جنيه) عندهم قوامهم سميك وغنى بالنكهة، وبعيد كل البعد عن القوام السائل المنتشر فى كثير من المطاعم. كانت حاجة كويسة أن الأرز زيته قليل عن الموجود فى أغلب مطاعم القاهرة، ومع طعم الملوخية، كده أنت قدرت تكون أكلة مصرية بسيطة. طلبنا من الكفتة (104 جنيه/ للكيلو) كان طري وبـ يمضغ شوية، وقُدمت على فرش من الأرز وعليها حوالى ثلاثة أو أربعة أرغفة عيش، ومع واحدة أو اثنين سلاطة طحينة، كده الأكلة بقيت تمام. نصف فرخة درويش المشوية (22 جنيه) حجمها كان كبير ومشوية صح الصح، خصوصًا اللحم الغامق اللى طعمه كان لذيذ، والفضل يرجع للتبيلة والبهارات الرائعة. على الطريقة المصرية، قطعنا الفراخ لقطع صغيرة ورميناهم فى طبق الأرز والملوخية. بصفته مستجد فى منافسات جامعة الدول، وسباق المطاعم الصعب فى أغلب الوقت، جايز درويش مش بـ يقدم حاجة مبتكرة، بس على العموم، موقع المطعم الممتاز مع الأكلات السريعة المعروفة هـ تجذب كثير من الجعانين.

...

الطازج: ساندويتشات فراخ ووجبات فعلًا طازجة في فرع المهندسين
اصدرت في: 20/11/2013

لما كنا بـ نسمع عن مطعم "الطازج" ما كانش بـ يلفت نظرنا الاسم قوي لأن عادي كل المطاعم لما بـ تعلن عن نفسها أهم حاجة بـ تقولها أن الأكل كله طازة، لكن لما روحنا "الطازج" فرع المهندسين -عند سور نادى الزمالك أمام فندق أطلس- عرفنا أن الأكل الطازج مش مجرد أنه يكون سخن واتعمل أمامنا خاصة اللحوم. المطعم مش كبير قوي لكن كان فيه ناس كثير وكان من الواضح أن عليه إقبال كبير، وكمان لفت انتباهنا رائحة الأكل المشوي على الفحم اللى كانت مميزة جدًا. فى "الطازج" لما طلبنا الفراخ المشوية على الفحم اللى المطعم مشهور بها كنا متخيلين أننا هـ نأكل فراخ مشوية زى اللى بـ نأكلها فى أى مطعم، لما جاء لنا الأوردر الفراخ كان شكلها عادى مش مقدمة بشكل مختلف عن المطاعم الثانية لكن بصراحة كانت رائحتها مختلفة خالص، ولما أكلنا كان طعمها مختلف عن أى فراخ أكلناها قبل كده، لما سألنا الجرسون عن السبب قال أنهم لهم خلطة خاصة بهم بـ يتبلوا بها الفراخ، كمان الفراخ كانت طرية مش بـ تتمضغ كثير، وعرفنا بعد كده لأنها صابحة يعنى مذبوحة فى نفس اليوم مش متخزنة فى الثلاجة، وعرفنا كمان أن ده بـ يحصل على طول سواء فى الفراخ أو الحمام أو أى طيور، علشان كده اسمه "الطازج". المفاجأة أن الأسعار كانت مش غالية بالنسبة للمطاعم اللى فى المهندسين، يعنى وجبة نصف فرخة مع سلاطة خضراء وسلاطة طحينة وباكيت بطاطس وبيبسى (35 جنيه)، وبعض أصحابنا طلبوا أوردر أرز وكفتة فراخ وسلاطة خضراء وسلاطة طحينة (22.50 جنيه) والأرز كان بالخلطة وكان طعمه حلو جدًا وكان الطبق معقول مش صغير ومش كبير وفيه Option أننا نزود الأرز وكان سعر الطبق الصغير (5 جنيه) والطبق الأكبر شوية (7 جنيه) وكمان كان فيه أنواع سلاطات زي سلاطة الكول سلو كبيرة (6 جنيه) وسلاطة الثومية (3 جنيه) والسلاطة الخضراء (5 جنيه) والذرة المسلوقة (7 جنيه) وباكيت بطاطس كبير (6 جنيه). وكمان المنيو مش أطباق وبس، فيه كمان ساندويتشات ودي بقى مش عادية، لهم إضافات بـ تخلي طعم الساندويتش مختلف تمامًا، يعني مثلاً ساندويتش كفتة الفراخ متبلة بأعشاب بـ تخلي طعمها مختلف ورائحتها كمان حلوة جدًا (20 جنيه) ومعاه بيبسي وباكيت بطاطس صغير وساندويتش الشيش طاووك فيه موتزاريلا وشرائح زيتون أسود بـ تخلي الشيش مختلف عن أي شيش أكلناه قبل كده (25 جنيه) ومعاه بيبسي وباكيت بطاطس صغير. وكان فيه كمان وجبات للأطفال ومعاها هدايا، وكمان عندهم بانيه رومى ووجبات من الحمام والديوك الرومى بس ما جربنهاش وكانت برضه أسعارها فى المتناول. ممكن بعد الأكل تحلي فى أى محل من محلات جامعة الدول لأن المطعم قريب جدًا من فرغلي مثلاً ونحلي لو إحنا فى يوم ترفيهي. المكان مناسب جدًا لأي شخص فى دائرة المهندسين أو ميدان لبنان أو أحمد عرابي أو ميت عقبة وممكن توصل له بأكثر من طريقة، ممكن ميكروباص ميت عقبة من ميدان لبنان وممكن ميكروباص من ميدان سفنكس. لو معاك عربية ما تقلقش فيه مكان ممكن تركن فيه وأنت مرتاح وممكن لو طالب ساندويتشات تأكل فى عربيتك من غير ما حد يقول لك أنك شاغل الطريق، ولو أنت حابب تطلب دليفري اطمئن الأوردر هـ يوصل لك بسرعة وبرضه طازة وسخن من خلال 19018 وتكلفة التوصيل تقريبًا 3 أو 4 جنيه.

...

فول هاوس: أطباق فول عبقرية فى المهندسين
اصدرت في: 29/08/2012

زي ما هو واضح من الاسم، المطعم متخصص فى تقديم أطباق الفول. لكن أطباق الفول هنا مختلفة عن أى أطباق فول معتادة، المطعم الجديد فى شارع العراق الموجود فى المهندسين بـ يفخر أنه بـ يقدم أحسن فول فى المدينة، بيتى، وطازج وطعمه لذيذ. المحل الصغير بـ يشتغل على التيك أواى أو خدمة التوصيل، وبرضه عندهم مكانين على الجنب تقدر تأكل عليهم أو تستنى طلباتك عندهم. رغم كده، عملوا فى رمضان منطقة صغيرة للقعدة بالخارج بمجموعة كراسى وترابيزات صغيرة. ديكورات المكان بسيطة بألوان مبهجة، وفى آخر المحل باب أزرق عتيق بـ يميز المكان. داخل المكان هـ تشوف كاونتر على شكل عربية فول اللى بـ يتعمل عليها الفول، وكمان البطاطس البيتى والسلاطة. المنيو مليانة أطباق فول على الطريقة المصرية التقليدية، وكمان أطباق على الطريقة اللبنانى والسورى، وده طبعًا غير الخلطات الخاصة بهم. الأسعار بـ تبدأ من 2 جنيه لساندويتش الفول السادة لغاية 3.50 جنيه للخلطات المخصوصة، وتقدر تجيب علبة فول بأسعار من 6 إلى 10 جنيه. جربنا الفول السورى، اللى عليه حمص وزيت زيتون، والفول اللبنانى المخلوط مع سلاطة مليانة أوراق كزبرة خضراء وطعم ثوم بسيط، وكمان جربنا خلطة الخليج اللى بـ يبقى فيها حبات الفول كاملة، وثوم وصوص طماطم. طعم طبق الفول بالصلصة كان خرافى، ومعاه شرائح بصل وطعم لاذع لطيف، وده فعلاً كان طبقنا المفضل. الفلافل الشامى معمولة بالحمص، وكانت مقرمشة، وخفيفة وطعمها لذيذ قوى، وواخدة شكل دوناتس صغيرة فيها ثقب فى نصها. سعر الساندويتش الواحد 3 جنيه وسعر علبة فيها أربع قطع فلافل 5 جنيه. الساندويتش معمول فى عيش شامى طازج ومدور، ومليان سلاطة واختيارك من صوص الطحينة أو الحمص. ساندويتشات التيك أواى ملفوفة بشكل لطيف فى ورق ملون ومقفولة بورقة شيك مكتوب عليها الساندويتش ده فول ولّا فلافل. أطباق البيض الموجودة فى المنيو غير تقليدية زى طبق بيض مسلوق مع توابل أوريجانو سعره 5 جنيه أو مع الدقَة (توابل من خليط ملح مع فلفل وكمون) وطبق أومليت بالخضروات والجبنة سعره 4.50 جنيه، وده مش من العادى أنك تلاقيه فى أى محل فول. السلاطة كمان كانت هائلة، سلاطة البابا غنوج كانت ممتازة مع الثوم، والطحينة كانت طعمة جدًا وقوامها متماسك، وكمان الجبنة البيضاء بالطماطم كانت مميزة، وعليها فلفل من فوق. لو عاوز تأكل فول بيتى وكمان تجرب خلطات جديدة، يبقى هو ده المكان المناسب.

...

أتاتورك: أطباق تركية ومشويات في المهندسين
اصدرت في: 30/05/2012

في شارع جانبي من شوارع المهندسين وهو شارع الرياض المتفرع من شارع شهاب، وبالتحديد من عند الناصية اللي فيها "بنك المشرق" هـ تدخل يمين هـ تلاقي نفسك في شارع هادئ مالوش علاقة بالدوشة والزحمة اللي في كل شوارع المهندسين. وزي الشارع الهادئ هـ تلاقي مكان ديكوراته من الخارج باللون الخشبي الفاتح وشكله أنيق وبسيط زي الشارع اللي هو فيه وعليه يافطة مكتوب عليها بخط عربي مميز اسمه «أتاتورك». دخلنا المكان اللي كان فاضي خالص وقت زيارتنا وأخذنا ترابيزة بكنبة مريحة في أحد الأركان، المكان مش كبير قوي لكن المسافات معقولة بين كل ترابيزة والثانية. الديكور كله باللون البيج وكل الإضاءات والمفروشات كلاسيكية جدًا والأرضيات الخشبية (الباركيه) كانت مغطية المكان كله حتى في الحمامات. طبعًا واضح من الاسم أن المكان متخصص في الأكلات التركية، لكن كانت المفاجأة لما عرفنا أنهم مش بـ يقدموا الدونر التركي أو الشاورمة المشوية على الطريقة التركية وهي الأكلة الاشهر في تركيا، لكن قالوا لنا أن قريب هـ يكون فيه دونر في المطعم وأنهم بـ يعوضوا ده بطبق شاورما إسكندر اللي بـ تُقدم مع صلصة الطماطم والزبادي، يعني حاجة كده تركي برضه. القعدة هادئة وتقليدية جدًا ولولا التليفزيون كنا شعرنا بالملل، طلبنا من الجرسون يرشح لنا أحسن الأطباق اللي بـ يعملها المكان لكن قال لنا أنه لسه جديد واستعان بواحد من العاملين القدامى في المحل وللأسف ما كانش مفيد قوي برضه وفي الآخر قولنا نختار إحنا ونجرب حظنا من المنيو. المنيو فيه مشهيات وأطباق رئيسية وشوربات ومشويات وطواجن وبعض الساندويتشات. غالب على المأكولات الطابع التركي من حيث التسمية والمكونات، لكن كان فيه بعض الأطباق المصرية والشامية زي الكوارع والحمام المحشي وطواجن المسقعة والعكاوي. مجرد ما قعدنا نزل أمامنا رغيف عيش ضخم جدًا مخبوز بحبة البركة والينسون وكان لسه طالع من الفرن ولذيذ وبدأنا نسخن به مع طبق من المقبلات الساخنة هو الحمص بقطع الشاورما (14 جنيه) اللي فكرته حلوة لكن الحمص كان ثقيل قوي والشاورما كانت مليانة دهن. طلبنا كمان طبق فتوش (6 جنيه) وده كمان ما كانش معمول بزيت زيتون وما كانش له طعم مميز. المهم دخلنا في الأطباق الرئيسية وكان المنيو مليان أسماء زي الشركسية وورق عنب الباشا وكفتة أنقرة وطبق أتاتورك وشاورما أنطاكية وأرز حاجي بابا وكلها أطباق تركية المفروض لكن المكونات كانت كلها مألوفة بالنسبة لنا. طلبنا رول الفيليه العثمانلي (45 جنيه) وده عبارة عن لفائف لحم بقري محشوة بالخضروات وخلطة الدوكسيل التركية وبـ تُقدم مع أرز وسوتيه، طعم اللحم كان بيتي قوي والتوابل فيه قليلة، لكن الفكرة ظريفة والكميات مُرضية والتسوية ممتازة. الأرز والسوتيه أقل من العادي. طبق ثاني رئيسي هو دجاج توب كابي (40 جنيه) وهو الشبيه التركي للدجاج المخلي المحشي بالأرز بالفلفل الأسود، زيادة عليه بس الصنوبر اللي تقريبًا موجود في كل الأطباق هنا. التتبيلة أحلى شوية منها في اللحم، والكمية كمان أكثر من الطبق الثاني. فيه مشويات بالكيلو: الكباب (135 جنيه) والكفتة (80 جنيه) وشيش طاووق (85 جنيه) وممكن تطلب الأصناف دي بالبرسيون بأسعار من 30 لـ 45 جنيه. وفيه طبق كباب حلة تركي بالكمونية عاوزين نبقى نجربه المرة الجاية اسمه باباز يخني بـ 45 جنيه، وأطباق قليلة من الأسماك المحشوة بالجمبري (40 جنيه). منيو الحلويات والمشروبات محدود جدًا، مافيش غير مهلبية وأم علي وقرع عسلي (7.5 جنيه)، جربنا الأخير وطلع لذيذ، والمشروبات هنا غازية وبس. التجربة كانت مليانة إحباطات، من أول الجرسون الجديد اللي مش عارف يساعدنا لحد الأكل التركي اللي ما حسيناش أنه تركي قوي، إلا إذا كان الأكل التركي هو نفسه المصري وزيادة عليه شوية صنوبر. وآخر حاجة المكان محتاج شوية عناية بالنظافة. بس المفيد في التجربة أننا مش بـ نلاقي مطعم تركي كل يوم، نتمنى بس الاهتمام يزيد شوية ويعملوا دونر بقى.

...

خمسة وخميسة: مطعم جديد بـ يقدم خمسة مطابخ في المهندسين
اصدرت في: 29/03/2012

في محاولة علشان حد يكسب في المنافسة المتزايدة، الصراحة مفاهيم وأفكار المطاعم في القاهرة بقت نمطية جدًا وفيه منها بـ يبقى مثير وجديد ومنها اللى بـ يبقى سخيف جدًا. وفيه خط رفيع بـ يفصل ما بين الاثنين، المطعم الجديد في المهندسين «خمسة وخميسة» ماشي جنب الحائط. موجود أمام ميدان لبنان، بـ يطلق على نفسه "عالمي" بـ يقدم خمسة أنواع مطابخ: المقبلات، السلاطات، الأطباق الرئيسية، الحلويات والمشروبات من فرنسا، وإيطاليا، وتايلاند، ومصر والمغرب. المكان من الداخل عبارة عن خليط ألوان من الموف والبمبى على الحائط، وصورة كبيرة بـ تعبر عن كل مطبخ، شكله نادي ليلي أكثر من مطعم، بعد ما طلبنا الأكل من الجرسون اللي كان متلهف أنه يعرف الطلب بتاعنا، جاء لنا عيش رفيع مقرمش ومعاه خمسة أطباق للتغميس، كل طبق بـ ييجي من مطبخ مختلف، الطبق اللي بـ يمثل مصر كان غريب من الجزر والعسل وطعم النكهتين مع بعض كان صعب تميزهم. بابا غنوج المغربي والفلفل كان ناقصهم طعم حاد أو واضح وما كانش مميز. أما الثلاثة الآخرين كانوا أحسن. البصل الفرنسي والمايونيز كان كريمي وطعمه واضح وغمس التفاح والجنزبيل التايلاندي كان طازج ومميز، أما الاختيار الإيطالي كان غمس السبانخ، الخرشوف والريحان كان سميك وطازج وكل مكون كان طعمه واضح. كل ده جهزنا كويس للمقبلات: شوربة البصل الفرنسي بـ 19 جنيه ورول الجمبري التايلاندي بـ 55 جنيه. رغم أن الشوربة نفسها كانت رائعة، لكن العيش اللى على الوجه مع الجبنة عمل شوية مشاكل، كان صعب قوي أننا نكسره بملعقة الشوربة وفضل ينزل في قاع الطبق لغاية ما بقى بايش. أما القرمشة اللي في ملفوف الجمبري كانت حلوة، والجمبري كان مستوي كويس. وكويس جدًا أنهم جابوا تشيلي صوص مع الطبق لأن الجمبري كان من غير أي بهارات ومن غير طعم. لأن ملفوف الجمبري شجعنا فـ طلبنا الطبق الرئيسي من مطبخ التايلاندي كان فراخ كاري بجوز الهند بـ 52 جنيه. والأرز بالياسمين المطبوخ على البخار بـ 12 جنيه، الفراخ كانت مستوية قوي والصوص كان خفيف جدًا أكثر من الطبيعي. بس رغم ده الطبق كان طعمه حلو جدًا وفيه نكهة رائعة وأكلناه بسرعة. أما من القسم الإيطالي حجم طبق لحم سكالوبينا بـ 79 جنية كان عملاق. ثلاثة قطع كبيرة من لحم سكالوب المقلي جاء على الترابيزة ومعاه بطاطس ويدجز، اللحمة نفسها كانت طرية وكان مقرمش وده أحسن خليط. اللحم والويدجز كانوا محتاجين للتتبيلة والفلفل والملح. في العموم الطبق كان ناشف وده مش حاجة حلوة مع حجم الطبق الكبير. مافيش أنواع حلويات كثير في كل مطبخ فيه نوع واحد فقط، اختارنا الشوكولت فوندو من المطبخ الفرنسي بـ 32 جنيه، جاء معاه بولة آيس كريم، والشوكولت فوندو جاء لنا دافئ وطالع منه شوكولاتة دافئة. فكرة المطعم نفسها مشكلة شوية لأن إحنا شايفين أن "خمسة وخميسة" بـ يقدم مطابخ كثير لكن مش كويس في ولا واحد فيهم.

...

فرح: فتة شاورما ومشويات وطواجن في المهندسين
اصدرت في: 08/01/2012

المنافسة دائمًا صعبة في المهندسين في موضوع المطاعم والكافيهات، خاصة في شارع زي جامعة الدول العربية، مع كل نظرة يمين أو شمال عينيك هـ تقع على مطعم أو كافيه وكله بـ يحاول يخطف الأنظار بيافطة شيك أو أضواء أو اسم عجيب أو منيو مميز، ورغم الزحام الشديد في الشارع ده تقريبًا على مدار 24 ساعة إلا أننا بقينا نعرف نلاقي لنفسنا ركنة بالعربية (ومش صف ثاني) بالتعاون مع العدد المهول من السياس اللي مسيطرين على الشارع، ومش هـ يغلبوا أنهم يوقفوك أمام المحل اللي أنت عاوز تقعد فيه. قبل نهاية شارع جامعة الدول من ناحية شارع السودان وجنب عصائر «فرغلي» هـ تلاقي مطعم وكافيتريا «فرح» ناصب عربية شاورما كبيرة خارج المحل وعامل قعدة وترابيزات بلاستيك بسيطة على الرصيف، وبعد المحل بمحلين كمان هـ تلاقي محل ثاني مكتوب عليه «فرح» برضه وده من الداخل عبارة عن قهوة بلدي، والمساحة اللي أمام محلين فرح بالمحلين اللي في الوسط كلها مخصصة لترابيزات «فرح» وقعداته الخارجية، وطبعًا مافيش قعدات داخلية لأن المساحات صغيرة جدًا. الملفت أن «فرح» دائمًا زحمة، وبـ تزيد الأعداد بشكل ملحوظ في الساعات المتأخرة من الليل، وواضح أن معظم الموجودين من مرتادي المكان وحافظين المنيو تقريبًا، وإحنا ما ننكرش أننا كنا دائمي التردد على المكان لما نلاقي نفسنا في المهندسين وجعانين! المنيو فيه مشويات بأنواعها ومحاشي وكل أنواع الفتة والطواجن وساندويتشات لحوم وأسماك وبعض أنواع السلاطات والمشهيات. الكباب بـ 160 جنيه الكيلو والأنتركوت بـ 140 جنيه، الكفتة والطرب بـ 88 جنيه، والحمام المحشي بـ 28 جنيه الواحدة. من الأماكن القليلة اللي هـ تلاقي فيها شوربة كوارع (15 جنيه) وباقي أنواع الشوربة من 5 لـ 12 جنيه. ساندويتشات الشاورما في عيش الصاج بـ 14 جنيه وباقي أنواع اللحوم والدجاج بأسعار من 8 لـ 14 جنيه، والأسماك والجمبري من 15 لـ 28 جنيه الساندويتش. بدأنا بطبق تبولة (5 جنيه) وما كانش حلو للأسف وكان طعم البرغل فيه غريب، لكن صبرنا نفسنا بطبق الثومية والطحينة اللي بـ ينزل تحية من المحل على الترابيزة، ومن منيو (الفتة والصحون) زي ما هو مكتوب طلبنا طبق الفشنكاح (الاسم اللي بقى مستخدم زيادة عن اللزوم اليومين دول) وهو الطبق المشكل اللي فيه كل أنواع المحاشي والمشويات وقطعة دجاج بانيه وبطاطس محمرة وممبار (35 جنيه) ودي كانت أحسن طريقة نجرب بها كل مأكولات المحل تقريبًا. المحاشي حلوة قوي خاصة الباذنجان، ورق العنب كان فيه بعض وحدات مش مستوية كويس، الشيش طاووق والممبار من الآخر! أحلى حاجة في الطبق، الكباب والكفتة بقى كان عليهم كلام كثير، ناقصين توابل وناقصين تسوية ولولا الطحينة ما كناش قدرنا نأكلهم خالص. الطريف أن الطبق بـ يُقدم شكله ضخم جدًا ومليان أصناف، إنما اكتشفنا أن فيه في وسط الطبق طبق ثاني من الفويل مقلوب على وشه علشان يعمل شكل هرمي للطبق ويوحي أن كل الجبل ده من المحاشي واللحوم، لكن في النهاية الطبق كان شكله حلو، وطعمه فيه حاجات وحاجات. أجمل فتة شاورما في المهندسين هـ تأكلها هنا في «فرح»! سعرها 20 جنيه لحم أو دجاج، عيش محمص وأرز متشرب بالمرق وشاورما معمولة بحرفنة ومعاها طبق ثومية كبير، وجبة معتبرة ومش غالية وبـ نرشحه لك بعنف لو كنت في المكان. «فرح» بـ يعمل أطباق لفرد واحد (برسيون) من الجمبري والسكالوب والستيك والمخ البلدي بسعر 60 جنيه، وعنده مازليكا (كبد وقوانص) بـ 40 جنيه، وطاجن عكاوي (60 جنيه)، وتورلي (28 جنيه) وفيه كمان بط وأرانب بـ 50 جنيه الطبق، وجلاش ورقاق باللحم (20 جنيه)، يعني ممكن تأكل كأنك في البيت بالضبط وبعدها تطلب بيبسي أو عصير ليمون أو شاي من القهوة المنضمة للمكان. القعدة هناك مسلية وظريفة، بس بالليل في الشتاء الدنيا بـ تبقى ثلج (وأنت قاعد في الشارع) لكن ده ما يمنعش أن الجو في «فرح» يفتح النفس. وهـ تلاقي نفسك عاوز تروح ثاني.

...

أوتو ماركت: تيك آواي سريع في المهندسين
اصدرت في: 19/09/2011

في شارع جامعة الدول العربية هـ يلفت نظرك مكان كده لا هو محل ولا كشك ولا حتى عربية أكل، هو شبه عربية القطار أو الكرفان وفيه شبابيك ومدهون باللون الأبيض واليافطة بتاعته حمراء، ده محل «أوتو ماركت – Auto Market» للمأكولات السريعة والتيك آواي، ممكن تركن عربيتك أمامه وتطلب ساندويتشات أو وجبات بعد ما تنادي لواحد من الجرسونات التابعين للمحل الواقفين أمامه. طلبنا تيك آواي من «أوتو ماركت» وجالنا بعد حوالي 45 دقيقة، رغم أن المسافة مش بعيدة، وطلبنا كل الأكلات المميزة أو اللي اشتهر بها المطعم، وأولها طبعًا طبق الفشنكاح (55 جنيه) اللي بـ يكفي فردين، والاسم مشتق من أكلة عادل إمام في فيلم «التجربة الدنماركية» وهي المشنكاح اللي ما حدش عارف إيه هو، وفي «أوتو ماركت» الفشنكاح عبارة عن طبق كبير فيه محشي ورق عنب وممبار بقري وضاني محشي باذنجان وقطعتين من كل أنواع اللحوم والفراخ زي الكباب والكفتة والبانية والشيش طاووق والكبدة والسكالوب، وقطعة كانيلوني وبطاطس محمرة، طبق جبار ما يقدرش عليه غير الأكيلة، والطعم والصنعة حلوين بس مع التنوع الكبير ده لازم تلاقي حاجة وسط الحاجات دي مش واخدة حقها في التسوية أو في التتبيلة، لكن في العموم الطبق جامد وبـ يشبع، وهـ تحس أنك مش مشتاق لأي أكل ثاني لمدة 3 أيام بعدها، علشان أنت تقريبًا أكلت كل حاجة في "الفشنكاح". جربنا ساندويتش الفراخ البانية المضغوطة (14 جنيه) اللي سمكها بـ يبقى أقل وقرمشتها أكثر، كان أحسن من غيره العادي، والسوسيس (10 جنيه) كان مستوي زيادة بس لذيذ وحجم الساندويتش كان صغير، وتضايقنا بس أنه خلص بسرعة. الكبدة الإسكندراني (6 جنيه) كانت مولعة نار! فلفل كثير وما تطلبهاش إلا وفيه مياة ساقعة قريبة منك، بقنا ولع لدرجة أن عينينا دمعت، ومع ذلك عجبتنا وقررنا المرة الجاية نطلبها من غير فلفل، بس تبقى نفس مشكلة الحجم، الساندويتش الشامي كان نصف رغيف صغير قوي. طلبنا سلاطة بابا غنوج (أي نوع سلاطة بـ 6 جنيه) وكانت لذيذة وسميكة، وبطاطس محمرة (5 جنيه) وكانت مالهاش لازمة علشان طلع فيه بطاطس في الفشنكاح، وهي أصلًا مش حلوة قوي. المنيو غني وفيه أطباق مشويات كثير وحواوشي ومكرونات وأرز بالخلطات المختلفة ده بجانب كل أنواع الساندويتشات الموجودة في أي محل أكلات سريعة وأسعارها من 4 لـ 40 جنيه! أغلى حاجة الجمبري الكبير طبعًا. وعندهم شوربة كوارع ولسان عصفور، وأخيرًا مشروبات وكوكتيلات مختلفة (من 10 لـ 15 جنيه). الأكل وصل دافئ رغم التأخير البسيط، ومعرفتنا السابقة بـ «أوتو ماركت» بـ تخلينا نلجأ له في الطوارئ لما تختلف أذواق مجموعة من الأشخاص على الأكل، لأنه إلى حد ما بـ يرضي كل الأذواق وأسعاره في متناول الجميع، والأهم من ده كله أن مكانه في شارع جامعة الدول حيوي جدًا.

...

ألمظ: سهرة حلوة مع أكل شرقي
اصدرت في: 20/04/2011

موجود في فندق «سويس إن» في شارع الحجاز في المهندسين، مدخل المحل مش واضح قوي عشان الخشب الغامق اللي معمول بيه والمشربيات اللي مغطياه، واسم المحل نفسه مكتوب بزخرفة معقدة شوية وممكن ما تعرفش تقراه بسهولة. أدخل جوة هـ تلاقي الإضاءة ضعيفة جداً بشكل مقصود، والسقف واطي وقريب من راسك وفيه كونترخشب كبير على يمينك وترابيزات عالية وواطية على شمالك، والديكور شكله مألوف وتحس أنك شوفته في أماكن تانية قبل كده، يمكن عشان البلاط الرملي بألوانه الفاتحة مع المشربيات وإزاز الشبابيك الملون والكراسي اللي ظهرها عالي ومنقوش عليها نجمة «ستلا» من ورا. النجمة كمان مطبوعة على الحيطان بالـ "ستنسيل - Stencil " أو الكتابة بالرسوم، ووحدات الإضاءة على الحوائط المعمولة من المرمر بـ تعمل نور مريح للأعصاب، والكراسي ناعمة ولونها أزرق والترابيزات من الخشب. معظم المزيكا اللي شغالة بـ تبقى كلاسيكيات سواء غربي أو شرقي و أحياناً موسيقى الـ« Chill Out». الخدمة سريعة ومهذبة بس الواتير كان متردد شوية، يمكن عشان المكان لسة فاتح جديد. منيو الأكل شرقي وفيه مشهيات زي سلاطة الزبادي وعيش محمص بـ15 جنيه والشوربات بـ20 جنيه والمقبلات والمزَّات السخنة بـ تبقى بين 15 و 25 جنيه. طلبنا بصل محمر وجيه مقرمش من غير ما يفقد ملمسه الطري من جوة، بس صوص الطماطم اللي اتقدم معاه كان حار جداً وماعرفناش ناكله، ونفتكر كان أحسن لنا نطلب صوص تاني. طلبنا كمان قطايف مقلية بالجبنة وكانت مقرمشة وناشفة زيادة، و برضه كنا نفضلها طرية أكتر عشان يبان طعم حشو الجبنة أكتر. كبدة الفراخ طلبناها وكانت لذيذة جداً ونزلت على الترابيزة بسرعة مع سلة العيش البلدي الطري والمحمص اللي بـ تنزل تحية من المطعم، وقررنا يبقى ده إختيارنا كل مانروح المكان ده. لو عايز أطباق رئيسية «ألمظ» بـ يعمل أطباق متنوعة على الجريل بـ تبدأ من 70 جنيه، وكمان أطباق لحوم وفراخ. الأكل والشرب في المكان كله كويس، وأي حاجة ناقصة في الجو العام بتاعه أو متاخدة عليه كملحوظة أكيد هـ تتعدل الأسابيع إللي جاية لما المكان يتعرف كويس والعاملين فيه ياخدوا شوية خبرة. اللي مش هـ يتغير هو الديكور اللي فعلاً شبه أماكن تانية كتير في القاهرة، ومع ذلك ده ما يمنعش أنه مكان جديد لسهرة حلوة بالليل.

...

مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح