عالمي مطاعم in المهندسين Cairo, Egypt

مطاعم

كورنر إيلفين: أجواء لطيفة وأكل محبط في المهندسين
اصدرت في: 27/01/2015

أعداد مهولة من المطاعم والكافيهات بـ تفتح أبوابها في كل مكان من القاهرة، والمنافسة بينهم على آخرها لأن كل مكان جديد بـ يعمل المستحيل لتقديم أفكار وابتكارات ما حدش سبقه فيها. واحد من أجدد المطاعم والكافيهات فى المهندسين هو "كورنر إيلفين - Corner Eleven"، مع وصولنا رحبوا بنا ووصلونا سريعًا لترابيزتنا فى الدور العلوي الواسع، ديكورات المكان يغلب عليها البساطة، وأوقات بـ تحسها باهتة، لكن اللمسات المطرقعة والشكل العام الشيك بـ يقدر يحافظ على جمال المكان. المنيو الضخمة أبهرتنا بـ تقديمها مجموعة كبيرة ومختلفة من الاختيارات؛ من كريبات حادقة وبيتزا، لمكرونات، برجر وأطباق رئيسية شكلها مثير، اختارنا من المقبلات تكس مكس فرايز (31 جنيه) وناتشوز (36 جنيه)، وبعدها روحنا لساندويتش ستيك صب (37 جنيه)، برجر باربكيو تشيلى (40 جنيه)، بيتزا مارجريتا (35 جنيه) و Chicken Paupiettes مع إضافة جراتان البروكولي وبطاطس مهروسة (63 جنيه). أولاً، وصلت سلّة عيش ساخن ومعاها 3 أصناف صوص لذيذة؛ معجون الزيتون، بيكو دي جالو Pico de Gallo وكاتشب على مايونيز. بعدها وصلت بطاطس تيكس ميكس، عليها لحم مفروم، فلفل هالوبينو وجبن، لكن للأسف البطاطس كانت طرية بزيادة، وإن كان طعمها لذيذ. الأطباق الرئيسية وصلت بعد حوالي 30 دقيقة، وكان فيها الستيك صب محتاج وبشدة لشوية تتبيلة وموتزاريلا زيادة، حال البرجر كان أحسن بقطعة اللحم المشوية الرفيعة نسبيًا وعليها صوص تشيلي باربيكيو داخل عيش طازج، البيتزا كمان كانت بـ تعاني من نقص البهارات، يعني شوية ريحان ولّا بردقوش كانوا هـ يضبطوا الكلام. الأمل كان في Chicken Paupiettes يعوض الإحباط، لكن للأسف ما حصلش، الرولز كانت مليانة زيتون، مع كمية بسيطة من الموتزاريلا والبسطرمة، الفراخ كانت مطهية بزيادة، وبكده يكون العنصر الأساسي فى الطبق جاف جدًا رغم وجود كمية كبيرة من صوص المشروم، أما جراتان البروكلي، فكان عبارة عن شوية بروكلي صغيرين معمولين بالزبدة في البخار، أما البطاطس المهروسة فغالبًا كانت أحلى حاجة في الأكل، غنية بالنكهة وعليها صوص رائع. بعد شوية كان لازم ننبه الجرسون أن الناتشوز ما وصلتش، بعد عشرين دقيقة، وصلت المقرمشات عديمة النكهة وكان واضح أن كل مكوناتها مش طازجة. يمكن عيوب الأكل كانت مقبولة، لكن فعلاً شوية تتبيلة مع الاهتمام بالتفاصيل كانوا يفرقوا كثير، بالمقارنة مع محلات مشابهة، أسعار "كورنر إيلفين" معقولة جدًا؛ لكنهم مع إعلانهم عن قد إيه الأكل عندهم متنوع، لذيذ وعالي الجودة، الأكل من وجهة نظرنا كان بعيد عن كل التوقعات. الكافيه يتميز بحاجة وهي الجو العام اللطيف وأكيد هـ تتشد لمجموعتهم الكبيرة من ألعاب الطاولة.

...

ذا ماستر شيف: أطباق عالمية بنَفَس ست بيت شاطرة فى المهندسين
اصدرت في: 15/04/2014

بالرغم من شهرة شارع سليمان أباظة بالمهندسين، إلا أن عادة بـ تكون الشوارع المتفرعة منه لغز كبير ومُحير بالنسبة لناس كثير. كل المطاعم اللي في الشوارع دي بـ تعتمد على الدعاية الورقية المُعلقة على أعمدة النور في الشوارع الرئيسية. "ذا ماستر شيف – The Master Chef" كان الاستثناء الوحيد، عرفناه بالصدفة لأننا كنا بـ نمشي في الشارع اللي هو فيه كنوع من كسر الملل. المطعم واجهته بسيطة بشكل جميل، بياض ناصع وواجهة زجاجية، تطلع له بسلالم جانبها حوض نباتات. غالبًا فيه أوت دوور، عبارة عن مساحة ضيقة بالكاد تتسع لترابيزة، إلا أنها كانت خالية تمامًا. الديكور الداخلي بنفس اللون الأبيض، بالإضافة للونين الأسود والأحمر اللي موجودين في الترابيزات الزجاجية، واللي كراسيها لما تتجمع حولها تكوّن مربع (وبمناسبة الكراسي، هي مش مريحة بالمرة ومش هـ يفرق معاها وزنك أو طولك... هـ تتعبك، هـ تتعبك). دخلنا المطعم، خالي تمامًا من أي حياة ماعدا سيدة في الخمسينات -اكتشفنا بعد كده أنها صاحبة المكان– تبادلت معانا من تحت نظارتها نظرات معناها: "هو الناس فين؟" فهمت نظرة الاندهاش فقامت دخلت وراء الكاونتر تنادي على شخص دلت ملابسه على أنه الشيف. قدم لنا منيو مليء بالأصناف لجميع الوجبات من إفطار: سندويتشات فول وطعمية (2.50 جنيه) والكريب بأنواعه (15 جنيه) وحتى السلاطات (20 جنيه). الشيف واضح أنه مش معتاد على وجود زبائن لأنه ما فهمش طلباتنا من أول مرة، لازم نشاور له على الصنف في المنيو. المنيو مكتوب فيها اسأل عن طبق اليوم، لما سألنا الشيف اندهش لوهلة بعد كده رد: "اللي موجود في المنيو هـ نقدمه"، يعني من الآخر وفّر على نفسك، واطلب اللي موجود وأنت ساكت! المهم، طلبنا عصير مانجو (10 جنيه)، وزي ما بـ يقولوا "أول القصيدة كُفر"، العصير كان واضح جدًا أنه مُعلب. جربنا من الأطباق الرئيسية فراخ سويت أند ساور (35 جنيه) وفيليه بصوص الفلفل الأسود (45 جنيه)، ومن الشوربة طلبنا شوربة الكريمة بالفراخ (12 جنيه). الحقيقة أن انطباعنا الأول مش ظريف، وعلى أساسه توقعنا جودة الأكل. ولكن الشوربة كانت هائلة، عارف لما يطلق على الأكل جملة "معمول بحب"، الفراخ والمشروم موجودين بوفرة، والكريمة مخملية كده وناعمة... يا مُسهل. الفراخ كانت رائعة، صحيح كمية البصل عليها كانت كبيرة، إلا أن الصوص مضبوط ومغطي كل القطع، البطاطس المحمرة كانت بيتي بشكل جميل وطازجة وكذلك الخضار السوتيه بتتبيلته المميزة اللي لا هو مهري ولا هو مقرمش كأنه نيء. الفيليه لحمُه كنوعية ممتاز، وكدرجة طهي جيد (بالرغم أن الشيف ما سألناش عن درجة طهيه) إلا أن تتبيلته كانت قوية، طغت على طعمه، وعلى صوص الفلفل الأسود طعم القرفة (لدرجة أن الطبق كان حراق). جربنا باستا بالصوص الأبيض وكانت أكثر من رائعة: كريمي والصوص بتاعها فيه نكهة خفيفة من الريحان: منعشة فعلًا (طبعًا ما تتوقعش أن الشيف يسألك عن نوع المكرونة، وأحمد ربنا أنه بـ يسألك عن نوع الصوص). قائمة الحلويات مملة جدًا وتفتقر الابتكار: جيلي (10 جنيه)، وكريم كراميل (12 جنيه) وما شابه. صاحبة المكان اقترحت علينا نجرب حلو جديد اسمه ماستر كيك (15 جنيه): طبقة من الكريم كراميل فوق كيكة إسفنجية بالشوكولاته، واللي من الآخر اسمها الحركي في مصر: قدرة قادر... ليه بـ يسموها كده؟ تفاصيل معقدة في عملية الطهي: كل المكونات بـ تتحط مع بعضها وتدخل الفرن تنفصل لوحدها لتكون الطبقتين المذكورين أعلاه. كانت حلوة ومكوناتها طازجة بس مسكرة بزيادة بعد أكل كميته كبيرة نسبيًا. التجربة فريدة من نوعها، المعاملة مش عدائية بس تحتاج جهد أكثر من كده. الأطباق مش مبتكرة، إلا أن التنفيذ أقل وصف له أنه رائع كأن ست بيت شاطرة هي اللي طابخة، والمكونات طازجة والشيف بـ يشتغل أول ما تطلب، ده غير النظافة.. يستحق الزيارة.

...

أنتيك: مطعم الابتكارات فى الأطباق والديكور والخدمة فى الدقي
اصدرت في: 10/04/2014

عارفين إحساس لما تبقى مش قادر تتنفس من كثر الأكل؟ وخارج فرحان من الخدمة الممتازة والاختلاف فى كل حاجة حتى شكل الأطباق اللى أكلت فيها.. ده كان إحساسنا لما خرجنا من مطعم "أنتيك – Antique" الموجود فى شارع نادي الصيد بالدقى. عرفنا المكان من صفحتهم على الفيسبوك، المكان فى شارع نادي الصيد أمام مكتبة خضير على الجهة الأخرى، الواجهة خشبية واسمه بالإنجليزي Antique "Orienty & more"، لهم موقع على الإنترنت حاطين فيه خريطة علشان لو مش عارف المكان فين، واللطيف كمان أنهم حاطين المنيو على صفحتهم على الفيسبوك علشان تعرف الأسعار وطبيعة الأكل إيه. الديكور مختلف حتى الواجهة من بره فيه أطباق كبيرة طالع منها نار بـ تشتغل وقت الليل وكمان نافورة عند الواجهة الزجاجية، بقى لهم 4 شهور فاتحين وردود الفعل الإيجابية على صفحتهم شجعتنا أننا نروح، الديكور الداخلى بـ يغلب عليه الستايل الخشبي مع الحجرى مع فواصل لطيفة جدًا فيها إضاءات ومياه فيها فقاعات هواء، المكان متخصص فى الأكلات الشرقي والغربي أو العالمي، بـ يقدم لك أول ما توصل اثنين iPad واحدة عليها المنيو الشرقي والثانية الغربي، الصور والابتكار فى الأطباق خلانا فترة طويلة محتارين مش عارفين نختار إيه، وشد انتباهنا أنهم بـ يعملوا تونة ستيك جريلد أكيد هـ نجربها فى زيارة ثانية لنا، وده اللى هـ تشوفوه من لينك المنيو. استقرينا أخيرًا، قررنا نجرب الاثنين منيو، طلبنا من المنيو الشرقي فتة لحمة بصوص الماما (وسط 55.75 جنيه) ودي فتة شامي معمولة بالزبادي وعليها لوز محمص (طشة اللوز بالسمن البلدي اتعمل أمامنا فى طاسة صغيرة وسبرتاية أول ما قدم لنا الطبق)، وشوربة حريرة 250 ملل (17.75 جنيه) المكونة من عدس بني مع قطع لحم وبقدونس وحمص وبصل، وفيه منها حجم أكبر 350 ملل بـ 26.75 جنيه، وجريلد فيليه جامبو (90.75 جنيه) طلبناها Well done بصوص الروزمارى ومعاه بطاطس مهروسة عليها صوص بني وخضار سوتيه (أنت اللى بـ تختار صوص كل حاجة)، وزجاجة مياه صغيرة (7.75 جنيه). بعد ما طلبنا بدأت الابتكارات: الجرسون جاب لنا حاجة صغيرة فى حجم المارشميلو كده ومعاه كوز زي بتوع السلطان زمان ودلق على الحبة البيضاء الصغيرة دي مياه سخنة والسحر بدأ! لقيناها بـ تنفش وتكبر وفى الآخر اكتشفنا أنها فوطة صغيرة بـ تتمدد بالسخونة وهو بـ يعقم الفوطة علشان نمسح أيدينا قبل ما نأكل.. حركات جامدة قوى! بعد كده نزل لنا فى بولة كبيرة من الفخار الملون كمية وأنواع عيش كبيرة مع 3 تغميسات من طحينة وجبنة بمكونات مش فاكرينها لأننا هجمنا على العيش اللى كان يجنن من الحلاوة والطراوة والطعم، وفيه أنواع عيش كان عليها ألوان أحمر وأصفر (غالبًا كركم مش عارفين)، بس طعمها كان حلو أوى، تحذير العيش لو أكلته كله هـ يملأ بطنك والثقيل لسه جاى ورا! بعد شوية جاء لنا الشوربة، الأطباق عندهم غير تقليدية مش البيضاء اللى فى أغلب المطاعم، كلها فخار بأشكال وألوان مختلفة، الشوربة كانت تجنن وسخنة، طعم الحمص مع باقى المكونات كان عالمي والكمية تكفى اثنين مش واحد بس، ومش قادرين نتخيل أن فيه حجم أكبر من كده كمان. قعدنا وقت كثير شوية لحد ما نزل الأطباق الرئيسية، الجرسون كان بـ يحضر على الجنب طاسة سيح فيها الزبدة البلدي اللى حمص فيها اللوز وحطها على الفتة أمامنا، طعم الزبادي مع الأرز واللوز كان حلو قوى، وهما بـ يقولوا أن الفتات الشامى عندهم تجنن وكمان عاملين افتكاسة طبق مقسم لـ 3 أجزاء كل جزء فيه فتة بمكون مختلف، الفيليه كمان كان معمول حلو وصوص الروزمارى أضاف للنكهة بتاعته حلاوة، الطبق ما كانش فيه غلطة عامة، والكمية كانت خرافية، وده سبب أننا فطسنا من الأكل زي ما قلنا فى أول المقال، ما كناش عاوزين نسيب باقى فى الطبق، على الرغم أننا أخذنا باقى الفتة تيك أواى وبرضه مش متخيلين أن فيه حجم لها أكبر من كده! لسه ما أخذناش نفسنا اقترح علينا الجرسون أننا نختار حاجة نشربها (اختارنا ليمون منت سموزى بـ 13.75 جنيه) فى حين أن الحلو هو هـ يقده لنا كـ Compliment من المطعم علشان دي أول زيارة لنا، كانت مفاجأة حلوة جدًا لنا، واللى فرحنا أكثر لما اكتشفنا هى إيه، Banana & Brownie (29.75 جنيه) شكلها احتفالى ومهيب، جبارة بمعنى الكلمة: 3 بولات آيس كريم مختلفة عليهم 3 صوصات و2 قطعة موز عليهم مربعات كيك البراونيز وكريم شانتى كمان، اللى عاوز يتخن الطبق ده بـ نرشحه جدًا، لكن بصراحة كانت ختام رائع لقعدتنا، الطبق ده برضه مافيهوش غلطة ويحسن موود أى حد متضايق، السموزى كمان كان منعش ورهيب بطريقة جامدة. الجميل اللى فى الموضوع كمان أنهم بس بـ يحسبوا Cover بـ 8.75 جنيه ومافيش خدمة ولا ضريبة، الأكل حلو، الخدمة ممتازة والقعدة كمان، والأسعار معقولة جدًا جدًا، إحنا اتبسطنا أن القاهرة بقى فيها مطعم زي "أنتيك".. منطقة الدقى والمهندسين.. خلوا بالكم الوحش فى المنطقة!

...

ستيك كلوب: مطعم وكافيه هادي فى المهندسين
اصدرت في: 03/04/2014

فى شارع عبد الحميد لطفى فى المهندسين مطاعم وكافيهات كثيرة، لقينا مكان لطيف وشكله مختلف اسمه "ستيك كلوب كافيه –Café Steak Club" قلنا نجربه ونشوف هل الشكل الجميل ده مضمونه جيد برضه ولا لأ! مؤخرًا ظهرت أماكن كثيرة متخصصة فى الستيك، لكن هل المكان ده هـ يكون من أفضل الأماكن؟ ده اللى هـ نحكيه لكم.. المكان بقى له من أسبوع Soft opening، مكون من دورين والمدخل بتاعه تحت مستوى الشارع، بـ تنزل كام سلمة هـ تلاقى المطبخ وكام ترابيزة، وبعدين بـ يأخذك الجرسون للدور اللى فوق تختار أنت حابب تقعد فين، فيه ترابيزات كثير بـ تطل على الشارع ومكشوف لأن الواجهة كلها زجاج، ما كانش فيه غيرنا ومجموعة أصدقاء كمان وقت زيارتنا، الدور اللى فوق عامة أوسع كثير من اللى تحت. إحنا مش عارفين هو مسمي نفسه ليه كافيه وهو تخصصه ستيك، بس ما علينا، الجرسونات محترمين ومتعاونين، المنيو فيها كل الأقسام العادية لأى منيو، والجزء بتاع اللحم فيه أنواع وتصنيفات مختلفة، مقسمة على جزئين باللغة الإنجليزي والعربي، بس لما جينا سألنا على حاجة فى الجزء العربي الجرسون قال لنا أن المنيو الإنجليزي هى اللى صح! ده سبب لنا شوية من الربكة ولما جئنا طلبنا الحلو برضه. طلبنا بيف ستراجانوف (64 جنيه) وبيف تاندرولين (78 جنيه) مع شوربة طماطم (13 جنيه) كبداية، الأطباق الرئيسية بـ ينزل معاها 2 طلب جانبي اختارنا سوتيه وبطاطس مهروسة، الطلب ما أخذش وقت كثير فى التحضير، الشوربة أول حاجة جاءت لنا وكمان نزل لنا سلة عيش متنوعة ومربعين زبدة، العيش كان شكله يهبل، بس يا فرحة ما تمت، أول ما جئنا نقطم منه لقيناه ناشف أوى وبـ نشد فيه بالعافية، على الرغم أنه كان سخن، تحليلنا أن تقريبًا حطوه فى المايكرويف علشان يسخن ولما طلع تحجر، كمان أول مرة نشوف زبدة جاءت لنا ساقعة لسه مطلعينها من الثلاجة، وما كناش عارفين نفردها على العيش بسهولة، بالنسبة للشوربة كميتها حلوة وسخنة وطعم الطماطم كان قوي فيها وقوامها كمان حلو جدًا. الأطباق الرئيسية جاءت بعدها بشوية، شكل التقديم كان حلو والكمية برضه، الستيك كان قطعتين سميكتين حجمهم معقول، والتسوية بتاعتهم كانت كويسة، طعمها كان حلو بس للأمانة إحنا جربنا ستيك أقوى من كده فى أماكن ثانية، بس ده مش معناه أن الستيك هنا وحش، الستراجانوف كان كويس بس الصوص البني بتاعه كان ثقيل شوية وكمان خلانا مش حاسين بطعم اللحم، السوتيه كان حلو والبطاطس المهروسة كانت كريمي وطرية جدًا بطريقة حلوة أوى. بعد ما خلصنا أكل طلبنا كريب نوتيلا (19 جنيه) وسموزي خوخ (18 جنيه)، بعد ما طلبنا حصل حاجة غير متوقعة.. النور قطع فى المكان! حاجة خارجة عن إرادة المكان ومصر كلها بـ تعانى منها لكن كانت غير متوقعة بالمرة، الجرسون جاء اعتذر لنا واعتذر أن السموزى هـ يتأخر لما النور ييجي يا إما نأخذه عصير خوخ عادي بمكعبات الثلج، وافقنا لأننا مش عارفين الموضوع هـ يطول لإمتى! صاحب المكان كمان جاء اعتذر لنا عن الفصل البايخ ده، كانت حاجة محترومة منه ومن طلقم المطعم، الكريب أكلناه فى الظلمة لكن طعمه كان قوي جدًا، بالنوتيلا والكريم شانتيه وبولة آيس كريم فانيليا والمكسرات، الطعم كان وهمي وما كناش عاوزينها تخلص، عصير الخوخ كان عادي عبارة عن Syrup بطعم الخوخ مافيهوش أى حاجة مختلفة. "ستيك كلوب" لهم صفحة على الفيسبوك، المكان فيه حاجات محتاجة تضبيط، معلش علشان لسه Soft opening وأكيد فيه حاجات هـ تقع، بس بعد كده محتاجين تركيز لأن المطاعم والكافيهات اللى حوله كثيرة، والناس لها حرية الاختيار!

...

موروز تيك أواى: أكلات سريعة عادية فى المهندسين
اصدرت في: 31/03/2014

صناعة الأكل فى العموم زيها زى أى حاجة ثانية من ناحية المنتجات المستوردة والأفكار، والحقيقة أن الجو العام السائد فى مطاعم القاهرة لسه رايح ناحية مبدأ الفاست فوود لإشباع رغبات المصريين، وده هو السبب الأساسى أن كثير من المطاعم المحلية والسلاسل قادرة تنافس أسماء عالمية زى ماكدونالدز وغيره. على شارع سوريا فى المهندسين، "موروز تيك أواى - Moro's Take Away" إضافة جديدة من الإضافات المستمرة لمطاعم الأكلات السريعة فى القاهرة، بمنيو شاملة ترضى كل الأذواق، لأى وجبة طوال اليوم. صحيح الدعاية بـ تقول أنه مطعم تيك أواى بـ يوصل 24 ساعة، بس عندهم كمان مكان قعدة بسيط، عبارة عن بار أسود وكراسى عالية بمساند حمراء. طبعًا شكل الأكلات السريعة اللى كلنا عارفينه موجود، بس الجديد من موروز هو شوربة العدس (9.99 جنيه) وكريمة الفراخ (19.99 جنيه). المطعم كمان بـ يقدم ثلاثة أنواع من الكلوب ساندويتش: تونة (15.99 جنيه)، روست بيف (17.99 جنيه) وبيض بالجبنة (12.99 جنيه). احتمال أكثر حاجة تشدّك فى المنيو تبقى ساندويتش بيتزا فراخ (16.99/ 20.99 جنيه)، عبارة عن شرائح من الفراخ وقطع هوت دوج عليهم زيتون، وطماطم، وفلفل أخضر وجبنة موتزاريلا. رغم أن بخار الحرارة كان طالع من العيش الأبيض، خلطبيطة المكونات ما قدرتش تنسجم مع بعضها، مع الفراخ عديمة الطعم الغالب عليها طعم الجبنة المملح بزيادة. صحيح طعم كلوب ساندويتش البيض بالجبنة –اللى يعتبر أكثر حاجة صحية فى منيو موروز- فى المجمل كان معقول وقريب من أكل البيت، مع شرائح طازجة من الخس والطماطم، بس المشكلة أن استخدام شرائح الجبن المعالج كان مش موفق. حتى لو كانوا استخدموا جبنة شيدر عادية برضه كان يبقى أحسن. بالنسبة للمقبلات والأطباق الجانبية فمتنوعة: حلقات البصل (كبير 11.99 جنيه) وبطاطس محمرة (وسط 4.99 جنيه/ كبير 6.99 جنيه) والاثنين متحضرين بزيت زيتون طازة أضاف لهم قوام مقرمش وطعم خفيف، مع رشة من البهارات. رغم أننا كنا مستنيين نذوقهم بصوص المايونيز بالثوم (1.75 جنيه) المخصوص من موروز، الطعم كان كله مايونيز وبس، ومافيش أى نكهة للثوم. رغم أنه بـ يقدم أكلات سريعة مناسبة ومافيهاش تعقيد، موروز تيك أواى مش بـ يقدم أى ابتكار أو جديد –كلام كبير على مطعم فاست فود، مش كده؟- يقدر به يخطفنا من مطاعمنا المفضلة.

...

جست فلافل: متخصص الفلافل الشهير يحتل القاهرة
اصدرت في: 28/01/2014

حتى مع أرقى المطاعم المنتشرة فى القاهرة، الفلافل –أو الطعمية زى ما بـ نقول عليها – هى أكلة المصرى الأساسية. بعيدًا عن الناس اللى بـ تعانى من حساسية البقوليات، مافيش أى شخص خطى أرض مصر وما استمتعش على الأقل بساندويتش فلافل واحد. ومع الشهرة الرهيبة والسمعة المحفوظة لأكلة مصرية شعبية، ما كانش غريب أن المطاعم المصرية تهتم بها بكل شدة. مع تأسيسه فى الإمارات العربية فى 2007، "جست فلافل - Just Falafel" اسم بـ يهدف لتغيير شكل أكلة الفلافل التقليدية. بجانب ثلاثة فروع فى مصر، تقدر تلاقى جست فلافل فى تركيا، عمان، الأردن، لبنان وحتى فى المملكة المتحدة. فرع المهندسين صعب يفوتك بشعارهم المميز باللون الأخضر، ومكون من دورين. الدور الأول مخصص لكاونتر طلبات ضخم، أما الدور الثانى عبارة عن منطقة جلوس تقليدية تطل على شارع جامعة الدول. المنيو بـ تقدم تشكيلة مختلفة من ساندويتشات الفلافل منها ميكسيكان (13 جنيه) عبارة عن فلافل، جبن شيدر، خس، مخلل وصلصة طماطم ملفوفين فى خبز تورتيا، إيطاليان (12 جنيه) المكون من جبن موتزاريلا، طماطم، كمون وصوص بيستو فى خبز شياباتا بالأوريجانو. بإضافة 3 جنيه، تقدر تختار فلافل مشوية بدلاً من مقلية. المطعم بـ يقدم كمان عدد بسيط من الأطباق الجانبية منها فلافل بايتس (8 جنيه)، ويدجيز سبايسى (9 جنيه) أو حمص جست فلافل (9 جنيه) بالتوابل والهالوبينو. الصوص يشمل الريد شيلى، كوكتيل صوص وبيستو مايو (4 جنيه للواحد). طلبنا فلافل جابانيز مشوية فى خبز تورتيا (16 جنيه) وفلافل إنديان مقلية فى خبز بنى (15 جنيه). علشان نضيف نكهة أكثر، طلبنا صوص بيستو مايو وصوص إنديان. علشان الفلافل الجابانيز تكون مشوية، الطلب احتاج وقت أطول فى تحضيره عن المعتاد. الساندويتشين قُدموا على أطباق بلاستيكية، ملفوفين بإحكام وعليهم ستيكرات واضح عليها الأسماء. للأسف الشديد، ولا حاجة طعمها كان حلو زى شكلها.. صوص البسيتو مايو كان مجرد رشة بسيطة من البسيتو وده كان سبب أن الطعم يشبه المايونيز العادى، أما صوص الإنديان فكان طعمه قوى بزيادة، مشطشط وسيء المذاق. لسوء الحظ، بجانب الخضروات، صوص الإنديان كان واحد من المكونات الأساسية فى ساندويتش الإنديان، وكان مغطى على باقى الطعم. راب الجابانيز، على الناحية الثانية كان معاه خليط مميز من الأفوكادو الطازج، خس، طماطم، بذور السمسم، جنزبيل ومايونيز يابانى. صحيح لهم منا التقدير على ابتكارتهم، المكونات كانت زيادة شوية؛ ابتكار فرانكنشتين كان مش مضبوط خالص، وكمان المشمش صعّب الأكل، الاستمتاع أو حتى تمييز أى نكهة. صحيح الإشادة لازم تُقدم للشركة اللى أضافت تغيير رائع على أكلة فضلت ثابتة لأجيال متلاحقة فى القاهرة، لكن فى النهاية، الزبائن محتاجين نكهة أكثر من مجرد فكرة.

...

كوي: مطعم ولاونج مبهج بخدمة ممتازة وأكل يجنن فى المهندسين
اصدرت في: 15/01/2014

الطلة الأولانية اللى بـ تستقبلك وأنت داخل أى مكان سواء مطعم أو كافيه أو حتى محل بـ تفرق كثير أنها تخليك تكون انطباع عن المكان، ولما دخلنا مطعم ولاونج "كوي – Koy" الموجود فى شارع النخيل بالمهندسين كانت طلته الأولانية كافيه جدًا أنها تحسسنا أننا داخلين على تجربة استثنائية.. في كل حاجة. الديكور ألوانه مبهجة وبـ يغلب عليه لون أخضر فاتح مريح للأعصاب، تعامل الجرسونات كان محترف ومهذب، فيه شاشات تليفزيون فى كل كام سنتيمتر ومستواهم منخفض جنبك وأنت قاعد وبـ يعرضوا حوالى 3 أو 4 قنوات مختلفين، المنيو مطبخها عالمي وتفاصيلها مش مزعجة ومش زحمة، الأطباق لوحدها مع الحلو، وفيه منيو ثانية للمشروبات بأنواعها، طلبنا فى البداية شوربة طماطم (18 جنيه)، ومن الأطباق الرئيسية فيليه بصوص البلو تشيز (87 جنيه) وفيه 3 أنواع صوص ثانية ممكن تختارها كل واحدة بسعر مختلف، وفاهيتا فراخ (61 جنيه) بـ ينزل معاها عيش تورتيلا وSour Cream وسلاطة فلفل ألوان مقطعة صغير ونوعين جبنة مبشورين، وطلب جانبي منفصل خضار سوتيه (10 جنيه)، وكمان نزل لنا مياه صغيرة (7 جنيه). أول حاجة جاءت الشوربة بعد وقت مش طويل أوى، أول مرة نشوف بولة شوربة لها غطاء وكانت حاجة لطيفة جدًا علشان تحافظ على السخونة، ومحطوط مكعبات العيش جنبها، الشوربة كانت هائلة ومزازة الطماطم مع البهارات والليمون والملح تمام مضبوطة، بس الكمية دي تكفى اثنين ممكن يعملوا Share فيها. بالنسبة للأطباق الرئيسية الـ Setting بتاع الفاهيتا مع صوت الشواء اللى بـ يزغزغ إحساسك ومعدتك الجعانة كان وهمي والكمية برضه كانت كبيرة، والبيف كان مستوي كويس وصوص البلو تشيز كان مش تقيل كعادة أى مطعم، الخضار السوتيه كان حلو جدًا بس إحنا ضيفنا ملح عليه، والبيوريه اللى كان نازل مع البيف كان كريمي وطعمه حلو أوى، الأكل كله كان ممتع وما كناش عاوزينه يخلص. بعد ما أخذنا استراحة شوية دخلنا على الحلو وأخذنا شوكليت فوندو (32 جنيه)، تحضيره ما أخذش وقت كثير ومع أول قطمة ورؤيتنا لصوص الشوكولاتة السايح جواها بـ يخرج من الكيك قلبنا ساح معاها، نقدر نقول أن دى أول مرة نذوق شوكليت فوندو خفيفة كده، والكيك طازة وخفيفة كمان زي الصوص. المكان بـ يضيف 12% خدمة و10% ضريبة، كان لازم نروح للجرسونات فى الآخر ونقول لهم قد إيه اتبسطنا من قعدتنا ومن الأكل ومن كل حاجة، وهما كمان اتبسطوا، هما صراحة يستحقوا، وأكيد "كوي" هـ يكون على قائمة الأماكن اللى نحب نروحها، وكمان الأماكن اللى نرشحها لأصدقائنا لو عاوزين يخرجوا فى نطاق المهندسين.

...

بون بيني: مطعم وكافيه محتاج تجديد في المهندسين
اصدرت في: 31/10/2013

دائمًا وإحنا متجهين لمسجد مصطفى محمود نلاقيه على اليمين في شارع سليمان أباظة ويشدنا ونقعد نردد اسمه "بون بيني – Bon Bini" خاصة أنك تحس أنه أقرب للبونبوني، وكمان تميزه فى تماثيل عازفى الجاز والترومبيت اللى موجودين أعلى مدخل المطعم وتعدد الألوان. قررنا ندخله أخيرًا.. المكان مكون من دورين، أول ما تدخل هـ تلاقى قعدة فى الهواء الطلق بـ تطل على الشارع والعربيات بـ تعدي من جنبها، المنطقة الداخلية فى الدور الأول فيها قعدات بأشكال ومناطق وحتى مستويات مختلفة، مافيش واحدة شبه الثانية، الدور العلوي مش بـ يكون مفتوح دائمًا، وقت زيارتنا كانت الساعة 6:30 وكانوا لسه فاتحين الدور اللى فوق اللى قعدنا فيه، وبرضه فيه منطقة مفتوحة بـ تطل على الشارع بمنظر لطيف من فوق، ومكان للجلوس بالداخل، المكان فيه تماثيل عازفى الجاز الضخمة فى كل مكان وفى الدور العلوي على الحائط محطوط بوسترات وأفيشات لأفلام هوليوودية قديمة وحديثة نوعًا ما لكنها باهتة وألوانها رايحة، بشكل عام من الوصف الديكور حلو جدًا لكنه للأسف محتاج عناية، الكنب لونه باهت وقديم وبعضهم فيه طفيات سجائر أو مهترئ. الجرسون اللى كان معانا كان فاهم شغله كويس، وفاهم المنيو وكان بـ يساعدنا، المنيو زيها زى أى مكان، وفيها قسم للشيشة، نزل لنا زجاجة مياة صغيرة (9.95 جنيه)، وشوربة طماطم (17.95 جنيه)، من قسم البيتزا اختارنا فيرونا بيتزا (48.95 جنيه) ودي مكونة من فراخ وروزبيف وزيتون وطماطم عليها جبن موتزاريلا، وعامة تحمسنا لاختيارها لما عرفنا أن عندهم شيف مخصوص للبيتزا، ومن اللحوم طلبنا فيليه شيف (74.95 جنيه) وده فيليه محشو بالمشروم والروزبيف وعليه صوص بالزبدة من فوق ومعاها طلبين جانبيين اختارنا سوتيه وبطاطس مهروسة، البيبسي كان بـ (11.95 جنيه) ومن المقبلات اختارنا فرايد تكساس (18.95 جنيه) وهي عبارة عن بطاطس محمرة صوابع عليها لحم مفروم وصوص جبن الشيدر. الشوربة جاءت لنا أول حاجة مع الفرايد تكساس، الاثنين كانوا سخنين جدًا وقعدنا فترة عقبال ما بردنا الشوربة علشان نعرف نشربها، بـ ينزل معاها عيش محمص مكعبات وعليها صوص كريمة من فوق، كانت حلوة أوى والكمية لطيفة جدًا، الفرايد تكساس كانت برضه حلوة أوى وخفيفة رغم أن كان عليها جبنة. جاءت لنا البيتزا والفيليه بعد شوية، كمية الاثنين كانت كثيرة أوى لدرجة أخذنا باقى البيتزا تيك أواى، تنفع لفردين، الفيليه بالصوص كان وهمي بمعنى الكلمة، التسوية مضبوطة وطعم الصوص فى الفم كان حكاية، السوتيه والبطاطس المهروسة لا يقلوا جودة، والبيتزا كان سمكها حلو والطعم مع المكونات جامد، وجبة مشبعة بزيادة وممتعة. لأن بطننا كانت على آخرها أخذنا التحلية معانا تيك أواى، عندهم حاجة اسمها كريب فروت كولد (19.95 جنيه) عبارة عن كريب فيه فاكهة وعليه صوص نوتيلا من فوق، الفواكة كانت تفاح وموز والكريب مش ملفوف كالعادة، محطوط فى طبق دائرى والفواكة من فوقه كأنها زي فطيرة التفاح، طعمها كان خفيف وحلو والفاكهة كانت طازجة. "بون بيني" بـ يضيفوا خدمة وضريبة، فى رأينا المكان حلو جدًا من ناحية الأكل، لكن المطعم محتاج تضبيط واهتمام فى الديكورات وفرش الكنب، علشان خسارة نبوظ الطبخة على حبة ملح، نتمنى أنهم يهتموا به علشان العين بـ تشوف وتختار المكان قبل ما البطن بـ تأكل!

...

تريو: كافيه ومطعم هاديء بمستوى عادي فى المهندسين
اصدرت في: 13/02/2013

بعد أول يمين من مطعم "لا بيترا – La Pietra" هـ تلاقى مطعم وكافيه "تريو – Trio" بلوجو أصفر كبير واضح، لكن لأن المكان موجود بالداخل شوية فى الشارع فمش سهل أنك تلقطه بعينك وأنت سايق أو ماشي فى شارع الحجاز بالمهندسين.أول ما وصلنا ودخلنا من المدخل اللى عبارة عن طوب بـ يتخلله زرع أخضر استقبلنا واحد سنه كبير ومش لابس اليونيفورم اللى لابسه باقى الجرسونات لدرجة أننا افتكرناه فى البداية من رواد المكان، المكان عبارة عن دورين، الدور اللى فوق مثبت بأعمدة خرسانية ومساحته أصغر شوية من اللى تحت وبالتالى شكله كأنه بلكونة بـ تبص على المنظر من فوق، لما سألناهم على إمكانية الجلوس فى الدور العلوي عرفنا أنه مش بـ يفتح قبل الساعة 6 مساءً لأن الناس ما بـ تجيش قبل الوقت ده!المهم اختارنا مكان فى الدور اللى تحت، أحلى حاجة أن سقف المكان معمول مشمع شفاف وبالتالى ضوء الشمس بـ يتخلله بس للأسف محتاج يتنظف لأن فيه حاجات مخليه الرؤية له مش مريحة وده بسبب أن باقى المبنى عمارة، الكنب لونه بيج والمكان عامة بـ يسوده الديكور الخشبي والسقف بتاعه عالى، المنيو مش قيمة خالص، عبارة عن ورق أبيض مطبوع وفقير معمول بسلك زي الكراسات أم سلك بتاعة المدرسة، وداخلها منيو ثانية بتاعة الكريب والوافل معمول عليها لوجو "تريو" ومطعم "داتشيز - Dutchess" اللى يبدو أنهم بـ يستعينوا به فى الحلويات، إلى جانب أن المكان بـ يقدم شيشة.المنيو عادية فى أقسامها وشكلها قفلنا شوية، اختارنا طلبات تقليدية زي شوربة طماطم بالكريمة (16 جنيه)، وجريلد فيليه بصوص الليمون (68 جنيه) يتعمل Well done، الجرسون اللى كان معانا كان لطيف، بس كان فيه مشكلة أننا كنا قاعدين فى الركن وبالتالى علشان تلفت انتباه أحد وتنادي عليه كانت بـ تستغرق وقت، الشوربة جاءت لنا الأول سخنة والكمية كبيرة طعمها لطيف لكنها كانت عادية جدًا مافيهاش أى مذاق مخصوص ينسب للمكان، كانت محتاجة بهارات أو نكهة مخصوصة، بعد شوية جاء لنا الفيليه المشوي بصوص الليمون ومعاه بطاطس بيوريه عليها صوص Gravy وخضار سوتيه (لك اختيارين جانبيين)، الفيليه كان تسويته مضبوطة بصوص الليمون والسوتيه كان كميته كبيرة وطعمه حلو، البيوريه كمان كان لطيف وما كانش ينفع من غير صوص الجريفى.فى قائمة المشروبات اللى كانت اختياراتها مافيهاش أى اختراعات غير فى أنواع السموزي طلبنا سموزي ليمون بالنعناع (Lemon Mint Smoothie) (21 جنيه) كانت منعشة جدًا بالثلج المجروش ومزازة الليمون اللى ما ضايقتناش، مشروب مضبوط جدًا.نيجي بقى لقائمة الوافل والكريب من "داتشيز" اللى كانت ملخبطانا شوية وما فهمناش إزاي نضيف مكونات الوافل من صوص أو فاكهة أو قطع شوكولاتة، لحد ما استعاننا بالجرسون وعرفنا أنك بـ تختار الأول عاوز كريب ولا وافل (سهلة دي) وبعدين تختار نوع الصوص اللى عاوزه عليها وبعدين أى إضافة زيادة مع الصوص هـ يضاف 7 جنيه، المنيو كان محتاج تنسيق أكثر من كده لأن كلمة "اضف 7 جنيه" دي كانت فى آخر الصفحة مش واضحة. المهم أخذنا وافل بصوص الـ Kinder (25 جنيه) مع إضافة بولة آيس كريم فانيليا (7 جنيه)، الوافل كانت أحسن خاتمة لزيارتنا، العجينة مضبوطة وصوص الكيندر طلع حلو مع الآيس كريم اللى دائمًا بـ يلعب دور تخفيف دسم الصوص اللى بـ نضيفه.الطلب بتاعك بـ يضاف عليه 12% خدمة و10% ضريبة، وممكن تزوروا صفحتهم على الفيسبوك علشان تتعرفوا أكثر على المكان واللى بـ يقدمه، بعد ما عدت الساعة 7 (مش 6 مساءً) قدرنا نطلع فوق نتفرج على الدور العلوي قبل ما نمشي واللى بـ يتسم بهدوء أكبر من اللى تحت وكمان دورات المياه فيها. المكان لطيف لكن محتاج اعتناء بالتفاصيل أكثر علشان يقدر ينافس، والمنافسة فى عالم المطاعم والكافيهات شرسة.. العبرة للى يقدر عليها.

...

أوسكار: مطعم جديد بأكل كمياته كبيرة فى المهندسين
اصدرت في: 31/12/2012

من قبل رمضان وهما بـ يجهزوا وبـ يخلصوا تشطيبات المكان.. كل شوية نعدي من جنبه وعندنا فضول نعرف الشكل النهائي للمطعم الضخم المكون من طابقين فى شارع عبد المنعم رياض فى المهندسين لكن كل مرة ما بـ تخلصش والفضول والحماس عمالين يزيدوا، حتى أن إعلاناته نزلت فى الشارع فى حين أنه كان لسه حاطط غطاء كبير على الواجهة. لحد من كام يوم فاتوا لقيناه افتتح المكان أخيرًا، شكله جذاب من بره ومن الأول كانوا معلقين إعلان أن فيه منطقة متاحة للعب الأطفال، قررنا أننا فى يوم لازم نروح نرضي فضولنا ونجرب الأكل فى المكان اللى شدنا من البداية باسمه اللى مش مرتبط بالمرة بعالم المطابخ أكثر من كونه مرتبط بالسينما.. "أوسكار – Oscar". مطعم أوسكار زي ما قلنا مكون من طابقين، أول ما تدخل هـ يستقبلك مدير المكان بوجه مبتسم وهـ يفرجك على المكان علشان تقرر عاوز تقعد فين، المكان فيه منطقتين للمدخنين وغير المدخنين، المكان بـ يقدم شيشة وبالتالى هـ تلاقى الجزء المفتوح مخصص لها، السقف مش مفتوح قوي لأن فيه زي تندة وروح المكان كله غالبة عليها أيقونات شريط السينما وعلامة الأوسكار وشعار "Award your taste" و"Dine like a star". المكان مصروف على ديكوراته بشكل كبير جدًا لكنها مش مبهرة قوي من وجهة نظرنا، الحمام كان أول حاجة قفلتنا من المكان بسبب الفوضى غير المفهومة اللى كانت فيه، مناديل ورق واقعة فى كل حتة وحول سلة الزبالة بشكل تحس أن كان فيه حد هرجل المكان وجري، لدرجة أن سيدة راحت لفتت نظر الجرسونات ودخلوا سيطروا على الموضوع. فيه نوعين من المنيو بـ يقدمهم المكان، الأولى فيها أطباق عالمية عادية والثانية منيو شرقية، الأسعار غالية شوية بالمقارنة بأماكن ثانية واللى كانت واضحة قوي فى قسم السلاطة والمقبلات. لاحظنا كمان أن كمية الجرسونات فى المكان رهيبة، كل شوية نشوف وجوه جديدة ومنتشرين فى كل المكان رايحين جايين، فيه شاشات بـ تعرض النيل للرياضة وقت زيارتنا، والخدمة هناك لطيفة لكنها برضه مش الأفضل وإحنا عاذرينهم لأنهم لسه فى البداية. لكن أهم شيء أنهم مهذبين. طلبنا من المنيو العادية ميكس جريل (99.99 جنيه)، ومن المنيو الشرقية شوربة الخضار (19.99 جنيه) ومن المقبلات الرقاق باللحم المفروم (36.99 جنيه)، وطاجن كوسة بالبشاميل واللحمة المفرومة (64.99 جنيه)، أول ما بـ تطلب بـ ينزل لك سبت عيش فيه أنواع عيش ورقائق بحبة البركة والسمسم لكن اكتشفنا أنها مش هدية من المكان فى الآخر وأنها بـ 4.99 جنيه، بـ ينزل لك زجاجة مياه صغيرة (7.99 جنيه) لما تطلب. الأكل تأخر شوية وطلبنا نزول المقبلات والشوربة على الأقل قبل الأطباق الرئيسية، جاءت لنا على طول وكان الأكل مفاجأة، حلو جدًا ومخدوم، شوربة الخضار كانت سخنة مولعة وفيها تنويعات خضار غير معتادة زي البروكلى والكمية كبيرة، والرقاق كان مخدوم حلو وطري مع قرمشة بسيطة اتبسطنا به جدًا بس فى رأينا أن الرقاق ما يعتبرش فواتح شهية لأنه ببساطة بـ يشبع ويلكم الواحد قبل ما الأكل ييجي، جاء لنا كمان الميكس جريل اللى طلبنا معاه أطباق جانبية بطاطس بيوريه وخضار سوتيه، اللحوم عامة كانت مستوية كويس وكمياتها كبيرة جدًا، كفتة فراخ وكفتة لحم وشيش طاووق ونصف فرخة، كلها كانت كويسة ماعدا كفتة اللحم حسينا أن طعمها فيه حاجة عاوزة تتضبط. اللى تأخر علينا شوية طاجن الكوسة اللى تفاجئنا بحجمه لما جاء لنا، الطبق كبير جدًا يكفى فردين مش واحد بس، لساننا اتحرق من سخونية الطبق ما كانش عاوز يهدأ خالص بس طعمه الجامد هو اللى كان بـ يشدنا كل شوية نذوق ونتلسع. علشان نهدئ النار اللى كانت فى فمنا شوية قررنا بعد ما خلصنا أكل واستريحنا شوية أننا نطلب حاجة نشربها، عيننا وقعت على كوكتيل آيس كريم بالصودا (26.99 جنيه) اللى عرفنا أنه عبارة عن آيس كريم وكريز بـ يصب عليهم صودا، وكمان طلبنا فرابيه كراميل (26.99 جنيه)، على عكس حماسنا الآيس كريم بالكريز جاء لنا لوحده وإحنا صبينا الصودا عليهم، الخليط أو الناتج النهائي للطعم ضايقنا وحسينا أننا بـ نشرب صودا فقط لأن الآيس كريم ما كانش عاوز يمتزج بها، ما بـ ننصحكمش به، الفرابيه كان لطيف لكن كان عاوز إعادة توزيع لأن الثلج كان مركز فوق وخفيف قوي من تحت. المكان فيه 12% خدمة و10% ضريبة، بالنسبة للدور الى فوق بصراحة كان حاجة غير متوقعة بالمرة، منطقة ألعاب الأطفال لها دور كامل مقسم لعدة حجرات وكل حجرة فيها نشاط مختلف بـ يعمله الأطفال خلال ساعة من الزمن وقيمتها 60 جنيه لأول ساعة وأى ساعة زيادة بـ 30 جنيه، المكان كان مبهر جدًا والبنوتة اللى مع الأطفال والمسئولة عن المكان وجهها بشوش، الأنشطة بـ تشمل Face painting وملعب كرة قدم صغير وأجهزة Xbox وبلاي ستيشن وكمان حجرة لسينما 3D لمشاهدة أفلام كارتون وكمان بـ يتعلموا يعملوا بيتزا بنفسهم ويأكلوها فى الآخر.. صراحة إحنا شبطنا فى المكان ده ونفسنا -ككبار- نستمتع به. مطعم "أوسكار" لطيف لو أنت معاك أطفالك وعاوز تستمتع بأكلة لطيفة فى هدوء وفى نفس الوقت هـ تكون مطمئن عليهم، لكن المكان هنا مش أفضل من حيث الأسعار.. والاختيار لك فى النهاية.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن