لبناني مطاعم in جيزة Cairo, Egypt

مطاعم

أيام زمان: إفطار لبناني لطيف على النيل في الجيزة
اصدرت في: 30/07/2013

في رمضان دائمًا بـ ندور على مكان إفطار/ سحور هادئ نظيف مريح ونقدر نتناول فيه وجبة الإفطار وإحنا مبسوطين، ما بين شوارع القاهرة المتوترة والزحمة قولنا نبعد شوية ونروح لحبيب الكل "النيل" اللي سواء كنت في مطعم 5 نجوم أو واقف على كوبري قصر النيل هـ تستمتع بنسماته وهواءه الجميل، اختارنا مطعم "أيام زمان" في مركب زون "جولدز جيم النيل"، المكان عبارة عن سلم نزول وقبل مدخل جولدز جيم هـ تلاقوا مطعمين روبي تيوزداي ومطعمنا "أيام زمان" اللي بـ يشتركوا في الساحة الخارجية ونفس طاقم العمل، اتصلنا الصبح وحجزنا ووصلنا في الساعة 6:30 (15 - 20 دقيقة قبل الإفطار) وكانت ترابيزتنا على النيل مباشرةً. الجرسون سألنا عن طلبنا بالرغم أن ده كان اتحدد على التليفون! بس ماشي لأننا أخذنا فرصة نفكر ثاني ونشوف هـ نأكل إيه من قوائم رمضان اللي بـ تختلف ما بين منيو الكفتة المشوية ومنيو الفراخ المسحب ومنيو الكباب ومنيو الميكس جريل، اختارنا منيو المكس جريل (110 جنيه) ومنيو الفراخ المسحب (85 جنيه)، منيو رمضان في المطعم عبارة عن شوربة من اختياركم مع مقبلات (ورق عنب، سلاطة طحينة، سلاطة خضراء، مخلل، طاجن بسلة باللحم الموزة، عيش سوري) مع الطبق الرئيسي (أرز بالخلطة وبطاطس محمرة) اللي بـ تكونوا مختارينه والحلو ما بين أم علي، ومهلبية، وأرز باللبن وطبعًا مع المشروبين الرمضانيين (التمر هندي، الكركاديه). قبل أذان المغرب قُدم لنا طبق فيه حوالي 10 بلحات تمر مع المشروبين الرمضانيين وبعدهم المقبلات كانت وصلت وملأت الترابيزة بتاعتنا، بعد شرب المياه والدعاء والتمرات بدأنا ننقنق مع المقبلات والشوربة اللي كانت زي ما تكون مش طازجة أو معمولة من قبل كده واتسخنت وورق العنب كان مزز شوية عن العادي والباقي كان كويس، أما طاجن البسلة باللحم الموزة كان رائع، اللحم طري وجميل والبسلة مطبوخة كأنها معمولة في البيت، بعد شوية وقت وصول الطبقين الرئيسيين في نفس الوقت، الميكس جريل كان عبارة عن 6 قطع من الكباب المشوي مع 3 صوابع من الكفتة المشوية متوسطة الحجم و4 قطع شيش طاووق مع الأرز بالخلطة والبطاطس المحمرة، كله كان مشوي كويس ومش ناشف والتتبيلة طعمها قوي والبطاطس حلوة مش مزيتة لكن الأرز كان ناشف شوية وكان زي ما يكون مش طازج أو متسخن مع الخلطة المميزة وحبة زبيب على الوش، أما الفراخ المسحب كانت رائعة عبارة عن نصف فرخة مخلية مشوية على الفحم بتتبيلة قوية ومميزة مع أرز بالخلطة وبطاطس محمرة، طوال الوقت كنا مستمتعين بطعم الأكل والكمية الكبيرة لكن لاحظنا أن فيه ضيوف كانوا مكسوفين ينضموا لنا وهم القطط اللي كانوا بـ يمارسوا هوايتهم في الدلع علينا والنونوة وإحنا عزمناهم لكن في الآخر زهقوا مننا ومشيوا بدري. بعد ما خلصنا الوجبة الدسمة دي كنا بـ نحاول نأخذ نفسنا ونهضم شوية الأكل الجامد ده، بعدها كانت آخر جولة في الإفطار الجميل ده وهي الحلو، اختارنا أم علي وأرز باللبن، الاثنين كانوا معمولين كويس لكن السكر ما كانش قد كده؛ يعني أم علي كنا بـ نأكل مكوناتها من غير سكر والحاجة اللي كانت حلوة هي قطع الزبيب اللي كانت بـ تكسر شوية (بالمقارنة مع أماكن ثانية متواضعة جدًا) ونفس الحال بالنسبة للأرز باللبن (من عند أي لبان هـ يبقى أحلى من كده). أيام زمان بـ يقدم إفطار رائع وأكل طعمه وطريقته مصري أكثر ما هو لبناني مع منظر هائل على النيل مباشرة، لكن فيه شوية ملحوظات بالنسبة لنسب الملح والسكر في الأكل نتمنى أنها تتعدل، وأكيد القطط اللي مش مزعجة قوي لكنها ممكن تروشكم.

...

لارين دوريه: ساندويتشات وأطباق وأكلات شعبية تيك أواي فى المنيل
اصدرت في: 21/11/2012

من وإحنا صغيرين بـ نحب الآيس كريم بتاعه وكان دائمًا أهلنا بـ يقفوا عنده علشان نختار من تشكيلة البولات اللذيذة بتاعته الموجودة فى كشك ألوميتال صغير مرفق بمحل الحلويات «لارين دوريه – La Reine Doree» الموجود فى شارع عبد العزيز آل سعود فى المنيل، ده غير أننا كنا بـ نتردد على المحل نفسه علشان نشتري أطباق حلويات شرقية أو تورتات لو عندنا مناسبة أو رايحين نزور حد عزيز علينا.الفكرة بقى أننا اكتشفنا من فترة أنهم فتحوا فى الكشك الألوميتال ده شباك ثاني جنبه وفيه ممكن تأخذ طلبات تيك أواي لساندويتشات شاورمة ولحوم وفراخ (مافيش مكان للجلوس كله ع الواقف أو فى عربيتك)، فيه يافطة حمراء كبيرة عند الشباك فيها أنواع ساندويتشات كثيرة بأسعارها اللى بـ تتراوح بين 4 للحجم الوسط و15 للحجم الكبير، لكن المفاجأة لما بصينا فى المنيو الورق لقينا أصناف كثيرة جدًا وأطباق فرنسية ومشهيات وطواجن وشوربات وأكلات شعبية زي شوربة الكوارع والفتة ولحمة الرأس وكمان طلبات بالكيلو، استغربنا جدًا إزاى الحاجات دى كلها بـ تجهز فى المكان الصغير ده، لكن حيرتنا راحت أول ما عرفنا أن لهم مطعم فوقهم فى الدور الثاني –بس مش واضح- فيه قعدة وممكن تطلب فيها الطلبات دي، يعني من الآخر الساندويتشات بـ تتجهز فى الكشك الصغير تحت والأطباق فوق.أسعار الساندويتشات والحلويات فى المنيو زي ما هى لكن لو طلبت من قائمة الأطباق بـ يتم إضافة 10% ضريبة مبيعات، طلبنا نجرسكو بالفراخ (12 جنيه) رغم أنها كانت فى الشيك بـ 13 جنيه، مش عارفين! شكل أسعار المنيو مش نهائية؛ فاسأل قبلها برضه احتياطى. وكمان أخذنا ساندويتش لارين (حجم وسط بـ 10 جنيه) وده عبارة عن تشيكن رول مع مايونيز وخس، وباكيت بطاطس (2.50 جنيه)، ومن الأطباق شدنا سكالوب ناتير بـ 35 جنيه (بعد إضافة الضريبة 38.50) وهو عبارة عن شرائح بتلو مع صوص المشروم، وفى الأطباق بـ تختار ينزل معاها ورق عنب ولا أرز ولا مكرونة ولا بطاطس فاختارنا ورق العنب، وللتحلية أخذنا أم على بـ 5 جنيه (قرع العسل والأرز باللبن والبودنج والكريم كراميل كلهم بنفس السعر).الأكل ما أخذش وقت كثير قوي فى التحضير، الساندويتش والبطاطس وأم على جاءوا أول حاجة وبعدها بشوية جاء لنا النجرسكو والسكالوب من المطعم اللى فوق. أخذنا الأكل وروحنا بيتنا والأكل مازال محتفظ بسخونته، النجرسكو كانت رائعة، البشاميل كان كريمي والفراخ مستوية كويس وسخنة ولقينا كمان مع الفراخ قطع مشروم بـ تقدم فى طبق ألومنيوم صغير، السكالوب ناتير كان مستوي كويس وكميته معقولة مع 8 أصابع ورق عنب، العيب الواضح في صوص السكالوب أنه كان مملح زيادة، أرز ورق العنب كان مستوي لكن الورق نفسه كان ناشف استعجلوا عليه شوية، ساندويتش التشيكن رول أو لارين كان حلو قوي، الرول كان مقطع حلقات وشكل الحشو من داخله يفتح النفس، الساندويتش كان حشوه كثير مع الخس الطازج، كان لطيف جدًا، البطاطس مقرمشة ولطيفة لكن العيب الأكبر اللى فى وجه المحل أنهم حطوا لنا أكياس كاتشب ملزقة بوظت لنا أيدينا ومش فاهمين من إيه، وشكل ده الطبيعي عندهم لأن وإحنا هناك كان الولد بـ يطلع زيهم من الكيس علشان يستعملهم، مش فاهمين إزاى كده!!أم على كانت على عكس ما إحنا متعودين باردة من الثلاجة مش ساخنة، بس سكرها كان مضبوط وكميتها كويسة، الخدمة مش محترفة قوي لكن الولد اللى حضر لنا الطلب لطيف ومهذب، ممكن بعد الأكلة الدسمة دي تقفل بآيس كريم من الشباك اللى جنبه، هـ تلاقى أصناف جامدة هـ يعجبك طعمها وسعرها، وخلى بالك فيه أماكن ثانية اسمها "لارين" بس المحل مالوش فروع ثانية.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن