عالمي مطاعم in جيزة Cairo, Egypt

مطاعم

كار كافيه كلوب: مطعم مبتكر على كورنيش الجيزة
اصدرت في: 23/10/2012

على كورنيش الجيزة، وبمدخل مستوحى من فن الخمسينيات، صعب تفوت «كار كافيه كلوب - Car Café Club». أول ما زقينا الباب اللى بـ يشبه أبواب الجراج، رحبت بنا ديكورات المكان المستوحاة من حلبة السباق.لوح أرقام عربيات، وكلاكسات، وكشافات وتذكارات ثانية خاصة بالعربيات بـ تزين المكان بإضاءته الخافتة، والحوائط بلونها الأبيض والأسود. التليفزيونات المسطحة المعروض عليها سباق عربيات بـ يوضح قد إيه هم بـ يعشقوا العربيات. لاحظنا أن عندهم مكان مجهز مخصوص بـ DJ وده أضاف جو شبابى نوعًا ما على محل الأكل الجديد.كان أمامنا اختيارات كثيرة ممتعة بالنسبة لمكان الجلوس؛ كبائن مدورة من الجلد وترابيزات، وكراسى عالية أو منخفضة أو عادية. اختارنا الأخير، وقدموا لنا منيو كبيرة بالعربى. لما سألنا عن منيو بالإنجليزى قالوا لنا أنها مش هـ تُطبع قبل شهر (رغم أن المطعم فتح أصلاً من 3 شهور).بالنسبة للمشروبات، قررنا بسرعة نجرب سموزى ليمون مع نعناع (20.95 جنيه) وآيس تى فانيليا (12.95 جنيه). سموزى الليمون مع النعناع كان عادى وتحس أنه ثلج رقيق أكثر منه خليط طازج من العصير طعمه بـ يلسع. الأيس تى كان نفس الكلام، ويمكن أسوأ شوية كمان. كلمة "مياه بطعم الفانيليا" ممكن يبقى اسم مناسب أكثر للعصير ده علشان ما شفناش فيه ثلج أو حتى شاى.بعد فك شفرة المنيو، لاحظنا أن الأطباق تم تسميتها بالضبط على أسماء عربيات. لفتح الشهية بدأنا بحاجة راقية شوية، وهى أصابع فراخ ليكسس Lexus chicken fingers (31.95 جنيه) مع صلصة المسطردة المسكرة. فاتح الشهية اللى تم تقديمه على شرائح بصل أحمر وجزر مقطعة ما كانش فيه حاجة مميزة، بس على الرغم من كده كان لذيذ. الكمية كانت كبيرة، وممكن تشاركه مع حد ثانى.اختيار الطبق الرئيسى كان صعب؛ أسماء العربيات مش بـ توصف الطبق كويس، علشان كده كان لازم نقرأ الشرح المطول. كمان فيه تشكيلة كبيرة من اللحوم: فراخ، ولحوم، ولحم عجل، ولحم خروف ومأكولات بحرية. قررنا نختار فراخ هيونداى المشوية (65.95 جنيه) وسلاطة تونة فيات (31.95).فراخ هيونداى بـ تُقدم مع اختيارك لاثنين من الأصناف الجانبية من بين خمسة، ده غير أنواع كثير من الصوص. كمية الفراخ كانت كبيرة، ومعاها صوص أبيض دسم طعمه تحفة، وبطاطس dauphinoise بالجبنة مع أرز أبيض سادة. سلاطة تونا فيات كانت بسيطة بس لذيذة، وخفيفة، وطازجة وحجمها كبير. السلاطة بـ تُقدم بشكل كويس فى وعاء زجاج عميق بـ يزينه شرائح ثقيلة شوية من الخبز بالثوم.مافيش قسم للحلويات فى المنيو، علشان كده طلبوا منا نروح على مكان عرض الحلويات علشان نختار من بين مجموعة الكيكات المزخرفة والمخبوزات. اختارنا قطعة تارت تمر لذيذة علشان ننهى احتفالنا. للأسف، عرفنا بعد شوية أن كل الحلويات الموجوده للعرض بس! الحلويات المفروض أنها تتوصل للمطعم، بس مافيش حاجة وصلت فى اليوم ده.عرضوا علينا بدل من التارت قطعة من تشيز كيك شوكولاتة (26.95 جنيه)، وعلشان إحنا متفائلين وافقنا على التغيير بس كان اختيار ندمنا عليه. التشيز كيك رغم أن شكلها مغرى، كانت دافئة ولاذعة، وده مش الطعم الحلو اللى كنا نتوقعه. «كار كافيه كلوب» أكيد عنده شخصية مختلفة، رغم أننا مشينا وإحنا محتارين هو فاضى علشان مش محبوب ولا مش معروف. المكان ده يمشى أكثر مع الجيل الجديد بتصميماته الروشة، قطع الأكل الخفيفة وموسيقى البوب، بس مش بـ نصنفه على أنه من المطابخ البارزة فى المدينة.

...

فرانكو كوفى: كافيه محتاج تضبيط كثير فى الهرم
اصدرت في: 07/05/2012

بقالنا كثير ما تضايقناش كده من مكان جديد رحناه، بس مش مشكلة، مش كل التجارب لازم تكون زي بعضها، وزي ما بـ يقولوا "يوم لك ويوم عليك"، للأسف تجربتنا المرة دي أكدت لنا فكرة مقتنعين بها، "شارع الهرم مش مناسب للكافيهات والمطاعم"! في شارع ناصر الثورة وأمام مطعم "مؤمن" هـ تلاقى كافيه من دورين كبير زجاجه أسود واسمه بالإنجليزي كبير «فرانكو كوفى – Franco Coffee» وكمان مكتوب أنه "Luxury Coffee Lounge"، المهم دخلنا بعد ما عرفنا من ناس أنه مكان لطيف، لكن تجربتنا فى المكان كانت عكس كده تمامًا. المكان كئيب من الداخل، الدور اللى تحت مقسم لكذا قعدة، فى أجزاء كنب وترابيزات صغيرة وفى أجزاء ترابيزات وكراسي عالية، الدور اللى فوق صاخب أكثر شوية وفيه سماعات وأجهزة علشان اللى حابب يغني كاريوكي، المكان نفسه بـ يغلب عليه اللونين الأحمر والأسود مع الإضاءة الخفيفة ولد لنا الإحساس الكئيب اللى حسيناه. قعدنا على الترابيزات والكراسي الطويلة اللى فى مدخل الكافيه. المكان بـ يقدم بيتزا ومشروبات باردة وساخنة و4 أطباق رئيسية فقط وأطباق باستا وساندويتشات بأنواع عيش مختلفة وبـ ينزل معاها بطاطس، الجرسون اللى كان معانا لطيف ومتعاون وسألناه إيه أسرع حاجة ممكن نأكلها لأننا كنا جعانين قوي فـ رشح لنا البيتزا والساندويتشات والباستا وأسرعها ألفريدو (23.99 جنيه) وطلبنا معاها كمان تشيكن سيزار سلاد (25.99 جنيه). أول ما قعدنا نزلوا لنا زجاجة مياة صغيرة (3.99 جنيه)، وسط الجو الكئيب والموسيقى العالية جدًا مر علينا وقت طويل جدًا لدرجة الزهق عقبال ما جاءت لنا السلاطة الأول، عبارة عن خس مقطع وعلى أطراف الطبق حلقات خيار وفرع كرنب أحمر كبير على طرف من أطرافه للزينة مع زيتون وفلفل أخضر مقطع صغير وقطع فراخ صغيرة ومرشوش صوص سيزر خفيف من فوق، على الرغم أن الطبق كان شكله حلو إلا أن قطع الفراخ بلونها الغامق قفلنا شوية، الخس ما كانش فريش قوي عادي والفراخ كانت جامدة شوية وناقصها صوص السيزر اللى كان ممكن يخفف نشفان محتويات الطبق، الكمية كبيرة لكن الطعم مش قوي. بعد فترة طويلة برضه جاء لنا الباستا ألفريدو، الصوص الأبيض كان حلو قوي وقطع الفراخ البيضاء المقطعة بحجم صغير كانت مستوية بشكل كويس لكن المكرونة كانت محتاجة زيادة تسوية. ما قدرناش نطلب حاجة زيادة الصراحة لأننا كنا قفلنا.. انتظار طويل.. أكل محتاج تضبيط.. جو كئيب.. وكمان تعبنا فى آخر قعدتنا لأن الكراسي كانت طويلة بزيادة ورجلنا كانت متعلقة طول الوقت.. المكان يحسب له أنه غامر وفتح فى شارع الهرم وأن تكلفة الخدمة فيه مش عالية (6.48 جنيه)، لكن المغامرة محتاجة استعداد.. والمكان محتاج تضبيطات كثيرة.

...

لو شاليه: أكل سويسري في الجيزة للشتاء في كايرو
اصدرت في: 01/01/2012

نفسنا راحت لأكل شتوي من بتاع زمان، بمناسبة فصل الشتاء وجو الأعياد. سويسرا كانت دائمًا معروفة بالتزحلق على الجليد، الساعات المذهلة، وإدارات تابعة الأمم المتحدة، والجبنة! كميات كبيرة من الجبنة! هما مش بس بـ يأكلوها، لأ دول كمان بـ يسيحوها، بـ يخلطوها مع النبيذ، ويغمسوا بها الأكل بتاعهم. مطعم «لو شاليه – Le Chalet» في الجيزة يعتبر علامة من علامات القاهرة من سنين. لو ماسمعتش عنه قبل كده يبقى ممكن تبقى عارف «لا تشيزا» في وسط البلد، «لو شانتيلي» بمصر الجديدة، أو «لو شاتو» اللي موجود فوق «لو شاليه»، وكلهم بتوع نفس الناس. المكان موجود على كورنيش الجيزة بجانب «أشاز» و«تشوب تشوب»، المكان سهل الوصول له والركنة مش صعبة. ديكور المطعم عامل بالضبط زي شاليه اللي ممكن تلاقيه في جبال الألب، الحاجة الوحيدة الناقصة فيه هي رف بره علشان تحط عليه زلاجات التزحلق بتاعتك. طلبنا أول حاجة سلمون مدخن وتوست (95 جنيه). وإحنا مستنيين طبق المقبلات، قُدم لنا أربع أنواع مختلفة من الخبز الساخن لسّه طالع من الفرن على طول. السلمون كان مُقدم معاه بصل أحمر، كبر، وخس. رغم أن عادة السلامون مش بـ يحتاج إضافات كثيرة، لكن الطبق كان طعمه ممل ومحتاج شوية تحابيش، لكن كمية السلمون كانت كثيرة. الـ "تشيز فوند" (179 جنيه) كانت مقدمة ساخنة وبـ تغلي. كان مقدم لنا قطع من الخبز المحمص علشان نغمس بها صوص الجبنة. رغم أن الـ "تشيز فوند" كان طعمه حلو، لكن ما عجبناش للدرجة دي. كان ممكن يبقى متحضر بكمية أكبر من النبيذ علشان طعمه يبقى أقوى. وبرضه تضايقنا لما ما نزلناش غير قطع خبز علشان نغمز بها الصوص، بالنسبة لسعره العالي كان ممكن يزودوا معاه مشروم، قطع أناناس، بروكولي أو قرنبيط. طلبنا كمان طبق اللي فيه "بيف ميداليون" بصوص الفلفل، "كوردون بلو" الدجاج، وسمك بصوص الليمون (93 جنيه). وده اختيار كويس لو مش عارف تختار إيه، علشان فيه حبة من كل صنف. إحنا عجبنا السمك الأبيض بصوص الليمون، لكن الـ "بيف ميداليون" ما عجبناش قوي. إحنا كنا طالبين أن اللحم تبقى نصف تسوية، لكنها كانت مستوية جدًا. كوردون بلو الدجاج كان طِعِم رغم أنه كان ممكن يحطوا فيه جبنة أكثر. أحلى حاجة كانت آخر جزء من وجبتنا، الـ "تشوكلت فوند" (30 جنيه). اللي نزل مع طبق صوص الشيكولاتة الساخن، فراولة، تفاح، موز، كانتلوب، بسكويت، وكريمة مخفوقة. «لو شاليه» مطعم جميل لكن أسعاره أعلى بكثير من اللي هما بـ يقدموه، زي صوص الـ "تشيز فوند" اللي بـ 179 جنيه كمثال.

...

«التوز بيسترو – Alto’s Bistro»: مطعم في سيزونس كانتري كلوب
اصدرت في: 21/12/2011

حلو في وسط زحمة القاهرة أنك تلاقي مكان رائع زي «التوز بيسترو-Alto’s Bistro » في «سيزونس كانتري كلوب – Seasons Country Club» يبعدك عن الزحمة ويخليك في جو راقي. هـ تلاقيه أمام «سيتي فيو» في طريق مصر الإسكندرية الصحراوي، النادي بـ يبعد 20 دقيقة بالعربية من الهرم، «التوز بيسترو» مفتوح لغير الأعضاء، ورغم أن أسعاره غالية لكن مطعم لازم كل الناس تجربه. المنيو متنوع جدًا فيه كل أنواع الأطباق العالمية، فيه تشكيلة كبيرة من أطباق السي فوود من أول المقبلات وأسعارها تتراوح ما بين 22 إلى 110 جنيه، إحنا بـ نوصي أنك تجرب محار تامبورا بـ 48 جنيه، حجم الطبق كان كبير وممكن تأكله مع حد ثاني، الخلطة نفسها كانت حلوة قوي. منيو المقبلات كان فيه برضه كليماري مقلي، جمبري بجوز الهند، وعجين بالجبنة البيضاء (براي) وبـ 110 جنيه هـ تلاقي أغلى نوع وهو محار التمبورا (تمبورا سكالوب). لازم تجرب الفطائر المحشية بط، رغم أن كان شكلهم وطعمهم زي السبرينج رولز لكن البط كان طعمه رائع بالبهارات اللي عليه وكان مِستوي ولونه بمبي. فيه أنواع كثيرة من السلاطة من أول 28 إلى 40 جنيه زي نوع الجريك والروكت وكمان كان فيه نودلز آسيوية ممكن تطلبها كطبق رئيسي خفيف وفيه تشكيلة من الجمبري والخضار ونودلز الأرز. برضه هـ تلاقي سي فود كثير في المنيو وفيه تشكيلة متنوعة من المحار وأسعاره بـ تتراوح ما بين 60 إلى 70 جنيه ومعاه أنواع صوص مختلفة زي السويت تشيلي، صوص الثوم الكريمي، أو صوص الكاري الهندي بالروم. اللحمة الأسترالية أو «الريب آي» سعرها غالي شوية بـ 190 جنيه لكن طعمها حلو جدًا وزي أي مكان بـ يقدم لحمة حلوة في القاهرة كانت مستوية أقل شوية عن ما طلبناها لكن كانت طرية ولذيذة. أما اللحمة الستراجنوف بـ 125 جنيه مش زي ما توقعنا، الصوص كان ثقيل وكانت اللحمة غارقانة فيه، لكن الصوص الكثير خلى كمية النودلز بالبيض اللي كانت مع الطبق أحلى. الطبق الرئيسي الثاني لحمة ضاني مطبوخة بـ 155 جنيه وطبق السي فود بـ 170 جنيه ومكرونة السي فود بـ 160 جنيه والسلامون الفيليه الطازج بـ 105 جنيه وطبق السمك والبطاطس بـ 70 جنيه. أصناف التحلية مش كثيرة لكن اللي عوض ده أن فيه أنواع كثيرة من نفس الأصناف. بـ 46 جنيه ممكن تطلب براوني بزبدة السوداني، وبـ 45 جنيه كيك التفاح بالعين الجمل لكن كانوا طريين قوي ما يستاهلوش ثمنهم. وكان فيه أنواع ثانية للتحلية زي فطيرة الخوخ بـ 30 جنيه وبسكويت بالفراولة بـ 32 جنيه، فطيرة بالليمون بـ 32 جنيه وتشيز كيك بالموكا بـ 36 جنيه. جودة في الأكل وكمان خدمة رائعة وديكور جميل وجو نادي سيزونز كانتري كلوب كافي أنك تزور «التوز بيسترو».

...

روبي تيوزداي: كل المنيو في بوفيه مفتوح على الأفطار
اصدرت في: 04/08/2011

موجود في مركب «زون - Zone» في شارع النيل بالجيزة، هـ تشوف علامة «جولدز جيم» على المركب على يمينك، المركب فيها 4 مطاعم هي «ﭘـيـﭘـي بيتزا» و«النوخذة» للمأكولات البحرية، و«أيام زمان» للأكل اللبناني، وأخيرًا «روبي تيوزداي – Ruby Tuesday» المطعم الأمريكي الشهير. في رمضان المطعم عامل الأفطار على شكل بوفيه مفتوح فيه كل محتويات المنيو تقريبًا مع مشروبات رمضانية وحلويات شرقية، سعر الأفطار للفرد 150 جنيه شاملة الضرائب والخدمة، وطبعًا مش محتاجين نقول أنك أكيد هـ تشبع وهـ تلاقي أكلات بـ تحبها جدًا في كل الصواني المرصوص فيها كل ما لذ وطاب من منيو «روبي تيوزداي» الخطير. المكان شيك شيك لأقصى درجة، القعدة قريب من الشباك بـ تخليك تشوف منظر رائع للنيل ومرسى اليخوت ولاعبي التجديف رايحين جايين، وعلى الجهة المقابلة من الكورنيش هـ تكون شايف فندق جراند حياة والفور سيزونز، والديكور داخل المطعم غالب عليه اللون البني وعلى الحوائط لوحات زيتية لصالة المطعم في أمريكا، والكراسي والكنب من الجلد ومريحة جدًا، لدرجة أننا رحنا في النوم وإحنا قاعدين مستنيين المدفع يضرب! من كثر ما الجو هادئ ومريح للأعصاب، وفيه موسيقى ظريفة شغالة معظمها بوب وفانك وكلاسيك روك، وشاشة واحدة مش سهل أي حد في أي ترابيزة يشوفها بس ما كانش حد مهتم بالتليفزيون ساعتها. قبل المغرب بـ 10 دقائق يبدأ الجرسونات ينزلوا كوبايات قمر الدين والكركديه المثلج، وطبق فيه تمر، ومع الآذان تقدر تروح تعمل أطباقك، وعدد غير محدود من الزيارات متاح لك، المشكلة فقط أن المشروبات والبيبسي كانت خارج البوفيه المفتوح وممكن تطلبها لوحدها بحساب منفصل. بدأنا بالشوربة، وكان فيه نوعين: لسان عصفور –من أجمل المرات اللي أكلناه فيها بره البيت في حياتنا– وشوربة كريمة المشروم، وبعد كده دخلنا على بار السلاطات وكان فيه كل أنواع السلاطات الشرقية والغربية، لكن اللي لفت نظرنا كان سلاطة المكرونة بالتونة والفاصوليا بالمايونيز، وكان فيه كمان شرائح التورتيا المقرمشة وصوص الطماطم المكسيكي الخطير، وبعد كده فيه بار للصوصات فقط مثل الزبادي والثومية والهالوبينو صوص وعسل المسطردة وحاجات ثانية كثير. المشهيات فيها حلقات الكاليماري المقلي وده عايز مقال لوحده! بجد خطير، وفيه سبرنج رولز بالسبانخ الحارة وسمبوسك السبانخ والجبنة واللحمة المفرومة وبافالو وينجز، رولز السبانخ مع صوص الطماطم المدخن كان طعمه خرافي، ننصحك تأخذ منه كثير. الأطباق الرئيسية فيها أرز بالخلطة وبطاطس مهروسة وباستا بالخضروات وسوتيه، واللحوم كانت ستيك بصوص البوافر وكباب حلة والفراخ كانت شرائح صدور بالمشروم والجبنة وقطع دجاج التندر المخلية المقرمشة مع الصوص الخاص بها، وأخيرًا كان فيه طبق (Bonus) من مطعم «النوخذة» الكويتي الموجود في نفس المركب والمتخصص في الأكلات البحرية، والطبق كان شرائح فيليه السمك المشوي مع خلطة البصل والطماطم، ونقدر نقول أن الطبق ده خلانا متحمسين جدًا أننا نخصص يوم لزيارة «النوخذة» عشان نجرب أصناف ثانية ونكتب عنه. المهم أن الأكل كان تحفة وبقينا خايفين نشبع قبل ما نجرب كل الأكل، ومافيش حاجة كانت نص نص، يمكن بس الستيك ما كانش مستوي على الآخر لكن يمكن علشان فيه ناس بـ تحبه Half Done ويشد شوية، وسمبوسك اللحمة المفرومة ما كانتش حلوة زي باقي المعجنات. بعد الأفطار فيه ركن خاص للحلويات كان فيه كنافة وقطائف وأرز باللبن وسلاطة فواكة، لكن ننصحك ما تشبعش من الحاجات دي وتوجه على طول لأم علي، الجرسون نفسه نصحنا بها وما قدرناش نقاومها وكانت أحسن تحلية بعد الأفطار. الخدمة ممتازة والعاملين ودودين ومتعاونين جدًا، وسألونا أكثر من مرة لو لنا أي ملاحظات على الأكل، وشرحوا لنا بعض مكونات الأكلات وكانوا دائمًا قريبين لما بـ نحتاجهم رغم أن المساحة واسعة وإحنا كنا قاعدين في آخر صالة الأكل. «روبي تيوزداي» من أماكن الأفطار الحلوة، جودة الأكل وروعة المكان وامتياز الخدمة، والأهم من ده كله أسعاره معقولة قوي بالنسبة لكل مميزات المكان، هـ تحتاج تتصل تحجز بس قبل ما تروح وممكن تحجز في نفس اليوم، واستمتع بعد كده بأفطار مثالي على النيل في مركب «زون».

...

مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح