المعادي مطاعم in Cairo, Egypt

مطاعم

بيروت: أكل لبناني في المعادي أسعاره حكاية بس الحلو ما يكملش
اصدرت في: 10/08/2016

إحنا عادة من عشاق المطبخ اللبناني، وبنحب جدًا التوابل بتاعتهم وأن مطبخهم شبه مطبخنا المصري، من فترة فتح مطعم "بيروت" في شارع 9 في المعادي، المكان مش كبير المطبخ في المكان الداخلي وحوالي 4 ترابيزات بره مع كراسي ملونة. المنيو كان على شكل باسبور صغير وأزرق مختارين حاجات معينة من المطبخ البناني أقرب للتيك أواي ومليان مقبلات وسلطات برغم أن الوجبات الرئيسية قليلة ما بين فتة وشاورما ووجبات دجاج أو كفتة. اختارنا وجبة دجاج روستو مشوي (35 جنيه) ووجبة كفتة (28 جنيه)، وفتوش (12 جنيه). الأوردر جهز تقريبًا في ربع ساعة. ودي حاجة تحسب لهم أنك ممكن تتطلب طلبك وتاخدوا على طول أو تطلبهم دليفري. بس يا خسارة دايمًا الحلو ما يكلمش وجبة الكفتة كانت مكونة من رز أصفر وعيش و 2 صابع كفتة كبار بس للأسف كانوا تقريبًا محروقين ومافيش أي توابل لنكهة الكفتة خالص! خاب توقعنا جدًا على عكس وجبة الدجاج الروستو اللي كانت مقبولة بس برضه للأسف برغم أن قطع الدجاج كانت بتدوب في فمك ومستوية حلو جدًا إلا أنها ما كنش فيها أي طعم وماكانتش شاربة التوابل اللي فيها خالص، برضه الأرز كان من غير نكهة للأسف. الفتوش كان حلو جدًا على عكس باقي الطلبات الصوص بتاعه كان مليان توابل الحمد لله. كان نفسنا تقييمنا للمكان يكون أفضل من كده، بس نتمنى أنهم يحسنوا من جودة الأكل ويكونوا أحسن الزيارة الجاية.

...

بيسوناج: أكل صحي وعصائر لذيذة في شارع 9 في المعادي
اصدرت في: 03/05/2016

على قد ما بنفرح بافتتاح أماكن أكل صحي كثير في الفترة الأخيرة، على قد ما بنخاف تكون مقلب، بس إحنا النهارده في بيسوناج – Pisonaj تجربتنا كانت مختلفة عن أي مكان روحناه. إحنا كنا من أوائل الناس اللي اكتشفت افتتاح المكان حتى من قبل ما يفتتح رسميًا، مش عارفين الحقيقة ده من حسن ظنهم ولا سوء حظهم لأننا روحنا لهم حوالي 3 مرات في كل مرة يكونوا إما لسه ما فتحوش إما شغالين عصير بس، أو أن مكونات السلاطة خلصت، وأخيرًا وصلنا النهارده وعرفنا أن المكان بيفتح من الساعة 7 الصبح، وبيقدم عصائر ومشروبات ساخنة وكل الأكل الصحي والمشروبات الصحية زي الديتوكس بيقدمها برضه بس واخدها خطوة خطوة. مكونات السلاطة كانت متوفرة بس برضه مش كل حاجة في المنيو كانت موجودة لأنهم لسه في مرحلة الـ Soft opening فبالرغم من وجود أصناف كثير في الساندويتشات والسلطة زي السلمون المدخن والدجاج بأنواعه إلا أنهم كانوا لسه مش موجودين. فقررنا إننا نجرب حظنا وطلبنا سلاطة كبيرة (20 جنيه)، وعصير خوخ برتقال (11 جنيه) وبطيخ بالنعناع بنفس السعر. إحنا اللي كونا السلاطة بنفسنا وكل إضافة زي الجبنة أو اللحوم بتكون إضافة بـ 4 جنيه، فحطينا في السلاطة خس وطماطم شيري وجبنة حلوم مشوية وبرتقال وكيوي وجزر، ولما سألنا عن صوص الدرسينج اتفاجأنا أن مافيش غير نوع واحد بالمايونيز والخل والريحان، وبما أننا مش من عشاق المايونيز طلبنا صوص تاني، فعمل لنا خلطة بالخل وزيت الزيتون الريحان والزعتر وكان طعمها معقول بس الخل كان فيها كتير وبيلسع. نصيحة للمكان يا ريت يعملوا تنوع في الدريسنج لأن ده اللي بيفرق جودة مكان عن مكان. بشكل عام المكونات كانت كويسة كان فيه بس مشكلتين صغيرين، أولًا أن الجبنة الحلوم اتسخنت في توستر بتاع العيش المموج بدل واحد مستقيم، وكان حجمها رفيع جدًا فالجبنة ساحت بين الفراغات وماكنتش في أحسن حالة خالص، وثاني حاجة أن البرتقال ما كنش طازة يمكن علشان الشتاء خلص. أما عصير البطيخ بالنعناع كان سموزي وساقع ومنعش، برغم أن موسم البطيخ لسه ماجاش قوي، والخوخ بالبرتقال برضه كان حلو، بس كان محتاج سكر أكثر من كده ويضرب أكثر في الخلاط. بشكل عام أسعارهم حلوة جدًا ولو فضل طبق السلاطة الحجم الكبير ده بـ 20 جنيه بس، إحنا هنكون زبائن دائمين لأن نفس الحجم ده بيتباع في أماكن ثانية بـ 40 و60جنيه على الأقل.

...

روبي تيوسداي: سلسلة المطاعم المعروفة وصلت في كورت يارد المعادي
اصدرت في: 23/04/2016

سلاسل المطاعم في القاهرة بتعتمد في الأساس على سمعتها الكويسة، وطبعًا جودة اللي بتقدمه والأسعار والخدمة، بس هل يا ترى الفرع الجديد في كورت يارد المعادي لروبي تيوسداي – Ruby Tuesday قدر يحاقظ على جودته؟ أول ما وصلنا الكورت يارد كان واضح جدًا بالنسبة لنا مكان المطعم اللي يعتبر أول مكان بعد ما بتدخل على الشمال، الديكور بسيط مجرد جدًا ما يلفتش انتباهك، وبمجرد ما قعدنا جاء لنا الجرسون ومعاه المنيو، واللي كان متنوع ما بين المقبلات والبرجر وأصناف الستيك والدجاج والمأكولات البحرية برغم أن الأصناف نفسها كانت قليلة في كل قسم، خاصة الدجاج والستيك كان نفسنا الأنواع تكون أكتر من كده. طلبنا من قائمة المقبلات shrimp fondue وسعره 85 جنيه، ومن أنواع الستيك أختارنا Beef tenderloin & shrimp بـ 145 جنيه، ومن أطباق الدجاج اختارنا chicken fresco بـ 69 جنيه، ومن المشروبات اختارنا ruby runner بـ 30 جنيه، وليمون بالنعناع بـ 20 جنيه. أول حاجة وصلت بعد حوالي ثلث ساعة كانت الـ Shrimp fondue، ولازم نعترف أنه كان من أجمل الحاجات اللي كلناها هناك، وهو عبارة عن قطع جمبري صغيرة مقطعة مع طماطم وبقدونس ومتغرقة في الكريمة والجبنة، وبيتقدم معاها ناتشوز علشان تستمتع بالصوص الوهمي بتاعهم، صحيح عدد قطع الجمبري كان قليل بالنسبة للسعر، بس هي كانت بداية دسمة بدأنا بها وجبتنا. بعد كده وصل Beef tenderloin & shrimp وكنا طلبنا مكرونة بصوص الكريمة كطبق جانبي، وكان مقدم معاهم صوص ماشروم مضبوط، المكرونة كانت خفيفة وشهية وتحمسك تدخل على الستيك اللي كنا طلبنا تكون مستوية well done وللأسف قدمت لنا medium بس الجرسون رجعها للشيف على طول ورجعت مضبوطة. أما بالنسبة للطبق الثاني chicken fresco كنا طلبنا معاه بطاطس بوريه ورز أحمر بالخضروات، والدجاج معمول بخل بلسمك ووص الطماطم، الحقيقة تتبيلة الدجاج كانت هايلة لكن للأسف كانت مستوية زيادة عن اللزوم، وطعم الرز كان غير متناسق تمامًا لا مع الدجاج ولا مع بعضه البهارات كانت كتيرة وغير متناسقة. أما بالنسبة لـRuby runner فكان طعمه مضبوط ومنعش، لكن الليمون بالنعناع رغم أنه بسيط إلا أنه كان ناقصه سكر ومش متوازن، للأسف مش أي حد يعرف يوصل للخلطة المضبوطة بتاعته. كان لازم نختم اليوم بحلو لذيذ يعوضنا عن الأخطاء اللي فاتت فاختارنا New York cheese cake بـ 43 جنيه، واللي بتيجي جاهزة من خارج القاهرة هي وكل الحلويات اللي عندهم، وخدناها مع صوص البلوبري، وفعلًا كانت طرية ومضبوطة وممتعة مع كل قضمة بتبهجك وتعوضك عن أي خلل حصل في اليوم.

...

سي باستا: مكرونة لذيذة توصل لك لحد البيت في المعادي
اصدرت في: 21/04/2016

مافيش حد يقدر يقاوم سحر المكرونة، أكلة سهلة وسريعة وبتشبعك، إحنا شخصيًا بنعتبرها الحل الأسرع لما نكون جعانين، حتى لو الساعة 2 بليل، نخترع أي صوص في المطبخ وبتقضي الغرض. فلكم أن تتخيلوا فرحتنا بافتتاح مكان جديد بيعمل مكرونة بس وتوصل لك لحد البيت في المعادي، حاجة آخر مزاج. سي باستا - Si pasta لسه فاتح قريب في دجلة المعادي وقائم على التوصيل بس، المنيو كان شكله مغري جدًا بالديزاين اللي شبه ورق الجرائد القديمة والطربوش، تحس أنك رجعت بالزمن، مع اسم المكان اللي عامل خلطة بين سي السيد والمكرونة الإيطالية، كأنهم بيقولوا لك هتلاقي عندنا خلطة مش عند حد. وبرغم أن المنيو ما فيهوش اختيارات كثيرة إلا أنها خطوة كويسة من شباب لسه بيبدأ حياته العملية. لما كلمناهم عرفنا أن فيه نوعين بس مكرونة حاليًا وهي الفيتوتشيني والبنا، أما عن أنواع المكرونة فهم 3 أنواع بس ما بين مكرونة سي السيد بالـ Sea Food أو مكرونة أمينة بتتقدم بالسجق أو مكرونة جليلة بتتقدم بالفراخ. وأكثر من نوع صلصلة ما بين صلصلة حمراء أو بيضاء أو نجرسكو (في الفرن) أو روزية (خليط ما بين الصوص الأحمر والأبيض). طلبنا مكرونة سي السيد فيتوتشيني وصوص روزية بالـ Sea Food بـ 32 جنيه، ومكرونة جليلة بالفراخ نجرسكو بنا (28 جنيه) والتوصيل 15 جنيه!! الطلب وصل في ميعاده مغلف بطريقة كويسة، المكرونة السي فوود كانت رائعة عليها كابوريا وكاليماري وجمبري مع التوابل والصوص، كانت فعلًا رائعة، أما المكرونة النجرسكو فكانت أقل شوية بالنسبة لطعم الصوص كان قليل والفراج كانت جافة، نعتقد أنهم سابوها مدة طويلة في الفرن وهي كانت مسلوقة فاستوت زيادة عن اللزوم. طبعًا دي مش هتكون أخر مرة نجرب فيها سي باستا، ونتمنى أنهم يكثروا أنواعهم ويقللوا ثمن التوصيل شوية لأن 15 جنيه توصيل ده كتير جدًا!

...

أوجما: كافيه ومطعم وسوشي لطيف في كورت يارد المعادي
اصدرت في: 16/03/2016

المعادي من أهم المناطق في القاهرة المليانة والغنية بكل ملامح الترفيه، من أول المعارض وحفلات الأدب والفنون والموسيقى وأماكن الأكل الموجودة في أهم مناطق المعادي زي شارع النصر وشارع اللاسلكي ومنطقة دجلة وأكيد طبعًا العمدة الكبير أوي شارع 9. من المناطق اللي نورت المعادي بالقرب من شارع النصر وجنب مول بندر المعادي هو ذا كورت يارد - The Courtyard اللي بقى من أهم مراكز تجمع الكافيهات والمطاعم على اختلاف أنواعهم، يعني لك في أي نوع أكل غالبًا هـ تلاقيه هناك. أكيد طبعًا من ضمن أصناف الأكل هو السوشي، طبعًا ما حدش يقدر يقرب أو يفكر يفتح سوشي قريب من هناك بسبب وجود عملاق السوشي "فويجو - Fuego"، لكن تفاجئنا لما لاقينا فيه مكان تاني للسوشي وهو أوجما – Ogma، عبارة عن كافيه ومطعم في الدور الثاني في الكورت يارد. المكان كبير فعلًا وفيه منه جزء داخلي وجزء خارجي تبقوا شايفين الـ Courtyard كله، تقدروا تقعدوا بره في عز البرد عادي جدًا بسبب وجود الدفايات في كل حتة في الأوت دور، الديكور بسيط وهادئ والإضاءة معقولة مش عاملة دوشة، أما الكراسي التصميم بتاعها حلو مريحة وبسيطة. أوجما هو اسم شخصية أسطورية من التراث الإسكتلندي/ الأيرلندي وكان بيعتبر زي إله زمان، انزلوا بتوقعاتكم، المكان مافيهوش أكل أسكتلندي أو أيرلندي. منيو المطعم فيها من كل أنواع الأكلات والمشروبات وبأسعار متوسطة مقارنة مع غيرها من فئة المطاعم الـ International، لكنها تستحق التجربة، كمان فيه منيو للسوشي مختصرة وعبارة عن ورقتين فيهم كل أنواع "الماكي"، "الساشيمي"، "النيجيري" المتوفرة عندهم، كنا شايفين ممكن لو فيه صور هتساعد كثير وخصوصًا لو حد أول مرة يجرب سوشي. كنا مترددين شوية نجرب ناكل سوشي في مكان مش متخصص فيه، قولنا نجرب عرض All you Can Eat اللي موجود طوال أيام الأسبوع (حاجة جديدة) وبـ 150 جنيه (حاجة أجدد)، غير شاملة أنواع الساشيمي، وأكيد طبعًا مافيش مشاركة أو توصيل. حد من الـ Staff اقترح علينا تكون أول جولة هي عبارة عن تنوع من اللي بيقدمه مطبخ السوشي ونجرب، توقعنا تشكيلة بقى من النايجيري والماكي، لكن أول جولة كانت أنواع مختلفة من "الماكي" ما بين أنواع بالسلامون والكابوريا والسمك الأبيض ونوعين من المقلي، جودة الأكل كانت كويسة والمكونات طازجة لكنها مش أحسن حاجة والحجم متوسط، أما المقليات كانت مقرمشة وطعم المكونات كان واضح بس كان فيه طعم زيت شوية، ما كانش حاجة لطيفة خالص. طلبنا كمان عصير ليمون بالنعناع (250 مللي بـ 20 جنيه) كان جميل وفريش فعلًا وسكره مضبوط، دخلنا على الجولة الثانية اللي كان فيها قطع نايجيري أكثر مع قطع الماكي ملفوفة بالـ Sea Weed، قطع النايجيري كانوا سمك أبيض وجمبري وسلامون لكن الأنواع العادية جدًا من النايجيري وهما كانوا قطعتين من كل حاجة، وما شوفناهمش ثاني، أما قطع الماكي كانت كويسة جدًا والـ Sea Weed كان ناشف شوية ومجلد، لكن الأرز والمكونات (سلامون، تونة، جمبري، كابوريا.. غيره) كانت كويسة أوي. خلال انتظارنا للجولة الثالثة حد من Staff المطعم تقريبًا المدير أو حد مهم قعد يدردش معانا شوية بكل ذوق وروح خفيفة عن رأينا لغاية دلوقت في المطعم وفي السوشي وإيه عجبنا في الحاجات اللي جربناها، كمان اقترح علينا نجرب اختراعات أوجما الجديدة في السوشي، وماله ليه لأ؟ نأخذ التجربة كلها ونشوف. الجولة الثالثة كانت 4 أنواع من رولات الماكي، فيه منهم الأرز مقلي وفيه نوع ثاني ملفوف بخبز مقرمش ونوع كمان عليه كيوي وصوص حلو وسمسم ونوع ما قدرناش نوصل إيه الافتكاسة اللي فيه. خلصنا جولة الـ All You Can Eat وأكلنا وفكينا من جو الزهق والملل وفي نفس الوقت اكتشفنا مكان جديد، يوم ما نكون في وسط الشهر والحالة تعبانة نروح نضرب سوشي بسعر كويس، بالرغم أنه مش متخصص فيه بس لكن نقدر نقول أنه كويس أوي بالنسبة لمكان غير متخصص. "أوجما" مكان لطيف ومميز، شكله حلو والـ Staff بتوعه كويسين ومحترمين، لكنه زي أي مكان اختباره الحقيقي في الزحمة والطلبات الكثيرة.

...

كاسبر أند جامبينيز: أكلات متنوعة واحتراف غير عادي في كورت يارد المعادي
اصدرت في: 10/01/2016

كل مكان بـ نزوره كمحررين في كايرو 360 بـ يسيب أثر وذكرى جوانا، لأننا بـ نتعامل مع المكان كله كمنظومة، كل حاجة بـ تقدم لنا فيه ناس كثير تعبت لحد ما خرجته بالشكل ده، علشان كده بـ نفرح جدًا لما نعلن لكم عن منظومة ناجحة ومكان جديد مبهج حتى لو معروف، يهمنا أنه يفضل محافظ على مستواه، وده اللي حصل لنا في زيارتنا لمطعم كاسبر & جامبينيز – Casper & Gambini's اللي فتح قريب في كورت يارد المعادي. المكان كبير جدًا في كورت يارد، دورين غير المكان الخارجي اللي بره سواء في الدور الأول أو الثاني، وقت زيارتنا الجو كان برد جدًا، فـ قعدنا جوه، وخدنا المنيو اللي خضنا شوية في الأول بورقه الثقيل كأنه كتالوج، وفاجئنا أكثر بأنه أكله متنوع ما تقدرش تحدد له مطبخ معين آسيوي ولا أمريكي ولا صيني؟ طلبنا كبداية سلاطة Slim – Lim Chicken بـ 54 جنيه، وكنا محتارين جدًا في أنواع السلاطة المتنوعة هناك الحقيقة، المكونات كانت فريش، بس الصوص كان مايونيز فقط، كنا نتمنى أن يكون معاه خل أكثر أو دبس رمان كان هـ يبقى طعمها أخف، كمان طلبنا موكا كراميل لاتيه (25 جنيه)، وموهيتو بالرمان (30 جنيه)، والاثنين كانوا أحلى من بعض، خاصة أن الموهيتو بـ ييجي مش في كوباية عادية بـ يبقى جنبك زي زجاجة صغيرة تفضل تصب منها كل شوية، والنكهات كانت قوية وطبيعية وممتعة. بالنسبة للأكلات إحنا احتارنا كثير قبل ما نختار هـ ناكل إيه، برغم أن الاختيارات قليلة شوية في قسم الأطباق خاصة اللحوم، إلا أن عنده من كل مطبخ أكلة تقريبًا ما بين البيتزا والريزوتو واللازانيا والسوشي والأكلات الآسيوية، اختارنا Cashew Chicken بـ 65 جنيه، واللي كانت أحلى حاجة ذوقناها هناك، وده عبارة عن أرز مع قطع دجاج وخضروات وكاجو وصوص صيني نعتقد أنه أقرب لصوص الترياكي، مع زيت السمسم وبيضة مقلية من فوق، الطعم كان فعلًا مبهج بلا مبالغة، تركيبة التوابل مع بعضها كانت كويسة. كمان طلبنا Under a Brick بـ 93 جنيه، ودي عبارة عن قطعة دجاج مشوية مع خضروات وبطاطس بيوريه، بدلنا البطاطس بكمية خضار إضافية، تتبيلة الدجاج كانت هايلة، والجلد كان مشوي لدرجة أنه ذهبي ومقرمش، واختارنا معاهم صوص المشروم اللي كان حلو برضه، وتسوية الخضروات كانت كويسة، العيب الوحيد أن الكمية كانت قليلة، كمان كنا جربنا في زيارة سابقة لنا شوربة الطماطم اللي كانت رائعة وتعتبر وجبة متكاملة فعلًا مش بس شوربة من كثر التوابل اللي فيها، وجربنا لازانيا كانت حلوة قوي برضه بس كميتها صغيرة. نيجي بقى للكلام المبهج والكبير ألا وهو الحلو، من جمال الحاجات المعروضة إحنا ما كناش عارفين نختار إيه خالص، بس أول ما شوفنا الريد فيلفت الموضوع اتحسم بالنسبة لنا، فطلبنا Fruity Red Velvet بـ 41 جنيه. وكانت عبارة عن 3 طبقات من كيكة الريد فيلفت مع صوص وقطع توت بري، وما بين كل قطعة والثانية كريم شانتيه خفيف بـ يدوب في فمك، حاجة كده تنقلك لعالم ثاني مليان بهجة وسعادة. ما نقدرش ننكر أسلوب التعامل الراقي هناك، واللي بـ يكمل المنظومة الناجحة في كاسبر أند جامبينيز، نتمنى أنهم يفضلوا محافظين على مستواهم الجيد دايمًا.

...

كازلاك: أكل من اللي قلبك يحبه محترف ولذيذ في كورت يارد المعادي
اصدرت في: 27/12/2015

بـ نحب جدًا كمحررين لكايرو 360 أننا نشجع الأماكن اللي بـ يديرها شباب وأكلها حلو، فما بالكم بقى بمكان كل اللي فيه صنع بأيدي مصرية من أول الكراسي والأطباق، أول ما دخلنا المكان لفت نظرنا أن حجمه كبير، فيه مكان داخلي مش كبير قوي حوالي 5 ترابيزات، ومكان خارجي فيه عدد ترابيزات أكبر، بعد ما خلصنا واستمتعنا بأكلنا هناك، جاء لنا صاحب المكان بنفسه، وشرح لنا فكرته في أنه بـ يحاول يدعم الاقتصاد المصري ويعمل الحاجة اللي بـ يحبها وفي نفس الوقت بـ يساعد ناس ثانية حوله، فاشترى كل حاجة للمطعم من مصر، الكراسي والترابيزات و الديكور حتى الأطباق معمولة من فخار مصري، واللي تعاون مع ورشة مصرية كانت هـ تفلس لحد العقد اللي عمله معاها ومع شركة من الصين، والكوبايات معمولة من زجاج معمول برضه مع حد مصري بـ يعيد تدويره، فعمرك ما تلاقي كوبايتين زي بعض أو أبريقين نفس الشكل، وكل ده موضح في فيديو على صفحتهم على الفيسبوك. نيجي بقى للكلام الكبير، ألا وهو المنيو، متنوع بشكل مبهج، ما بين الشوربة والسلاطات والمقبلات والبيتزا وأطباق اللحوم والدجاج والمأكولات البحرية، وطبعًا الحلو اللي حيرنا كثير لحد ما قررنا هـ نطلب إيه، طلبنا كبداية سلاطة بالبط المدخن والكبد (47 جنيه) واللي قدمت لنا بعد حوالي 20 دقيقة، وكانت فعلًا أجمل بداية نبدأ بها تجربتنا، المكونات كانت فريش وصوص الدريسنج كان متناسب مع الطعم، صحيح بعض قطع البط كانت مستوية زيادة عن اللزوم وبـ تمط بس بشكل عام الطعم كان هائل وتقديمها كان مبهج بألوان السلاطة المتنوعة والطبق الفخار اللي قدمت لنا فيه. بعد كده قُدم لنا المشروبات اللي طلبناها وكانت موهيتو (24 جنيه) وسموزي كيوي وأناناس (33 جنيه) والاثنين كان طعمهم كويس، بس الموهيتو كان ناقصه سكر أكثر وذوبان للمكونات مع بعض أكثر، وبعد حوالي 20 دقيقة ثانية وصل الأكل واللي كنا منتظرينه على نار، وكنا طالبينDuck 2 ways بـ 110 جنيه، وBoneless chicken بـ 75 جنيه، نبدأ بالبط ولازم نعترف أننا بـ نعشق البط اللي مطبوخ حلو ولازم نعترف برضه أن الطبق ده كان من أجمل الأطباق الي أكلناها في حياتنا المهنية، الطبق بـ يكون عبارة عن نص بطة، الورك بـ يكون مطهو ببطء لدرجة أنه بـ يقدم لك بـ يدوب في فمك، والصدر بـ يبقى مقطع شرائح بدرجة السواء اللي تحبها مع صوص البرتقال والجنزبيل والبصل المكرمل وحبة توابل ثانية، إحنا من حلاوة الطعم افتكرنا البصل بطاطا أو بطاطس بس علشان كان بـ يقرمش عرفنا أنه بصل، بـ يُقدم معاهم سلاطة برضه ونيوكي حاجة مكونة من عينة البطاطس بتشبه طعم المكرونة بتاعتنا بس هي مش مكرونة، دي بـ تبقى قطع عجينة مقطعة دوائر وكان طعمها غريب شوية بس مش سيئة. أما بقى اللي معمول بخلطة حب سرية فكان طبق الدجاج المشوي بدون عظم، التتبيلة والتدخين كانوا باينين في كل قضمة، كمان طلبنا معاها بطاطس جراتان وخضار كانوا كويسين جدًا، برغم أن مش أي حد يضبط الجراتان إلا أنهم ضبطوها. بعد الأكلة الدسمة دي حرفيًا ما كانش فيه مكان للحلو، بس ما قدرناش نقاوم الحاجات الموجودة خاصة بعد لما اتحكى لنا عنها، بالذات السوفليه بالفراولة واللي بـ يقدم معاه زي عصير فراولة فوار بطريقة خاصة، بس حرصًا على معدتنا طلبنا Tarte Tatin بـ 39 جنيه، ودي عبارة عن فطيرة تفاح عليها قطع تفاح مقطعة كبيرة بـ تتحط في الفرن مع صوص كراميل ومعاها آيس كريم فانيليا بصوص كراميل مالح، عارفين لما تأكلوا حاجة وتعطيكم إحساس دفء البيت وحلاوة أكله، الطبق ده كان كده، بس كنا نتمنى أنه بدل لما يبقى في طبق مدور أنه يكون في طبق مستطيل وتكون العجينة أقل سمكًا من كده علشان نعرف نقطعها بمزاج، لكن فعلًا طعمها كان حكاية. تجربتنا في كازلاك كانت رائعة، أكيد مش هـ تكون زيارتنا الأخيرة، واللي نفسنا نجرب عنده كل أنواع مأكولاته.

...

 لافندي: أكل مصري برؤية مختلفة في المعادي
اصدرت في: 01/12/2015

فاكر بيت جدتك؟ دفء المطبخ المصري الأصيل في عمارات القاهرة القديمة، هو ده اللي هـ تشوفه وهـ تحس به لما تروح تزور مطعم "لافندي -La Fandi " في Courtyard في المعادي، مكان صغير في الكورنر اليمين مافيهوش غير عشر ترابيزات، لكن بـ يعطي انطباع بالراحة والأصالة بتاعة بيوت الستينيات، ديكور المطبخ العريق والراديو وبرطمانات المخلل على الرفوف وعدة القهوة مع الطراز القديم للكراسي والترابيزات والشبابيك الخشب القديمة عيشنا حالة بهجة مصرية جدًا. المكان مقسم لقسمين:Outdoor وIndoor بفاصل زجاجي، حبينا نقعد بره لأن الجو كان جميل والقعدة مميزة مع الأضواء وتنسيق المكان الخارجي لـ Courtyard، ولو روحتم بالليل بـ يكون فيه فرق موسيقية بـ تعزف في الساحة الخارجية وده بـ يكون لطيف جدًا أنك تأكل وتستمتع بالموسيقى والجو اللطيف. المكان مافيهوش عاملين كثير، لما وصلنا كان فيه مدير المكان وعامل الكاشير بس، المدير كان في منتهى الترحاب بنا، المنيو أكل مصري جدًا زي ما الشعار بتاعهم بـ يقول Eat like an Egyptian، فيه منيو خاصة بالفطار واللي بـ ينتهي تقديمها الساعة 11 صباحًا وهي مجموعة متنوعة من الساندويتشات البيتي زي الجبنة القديمة والبيض بالبسطرمة أو السجق الإسكندراني واللي بـ يكونوا محطوطين في عيشLa Fandi البلدي المخبوز خصيصًا له وكمان فيه عجةLa Fandi المعمولة بالخلطة السرية للمكان. وأكثر حاجة بـ يرشحها المكان للفطار هي باستا رومي ودي اختراع، عبارة عن شرائح الجبن الرومي المحشية بالبسطرمة ومتغطية بالبقسماط والدقيق ومحمرة في الخبز المخصوص مع الطماطم والجرجير والطحينة. بما أننا وصلنا المطعم على وقت الغداء فما لحقناش منيو الفطار، لكن منيو الغداء كانت متنوعة ما بين المقبلات أو "النأنأة" زي ما بـ يسموها والساندويتشات اللي مكوناتها نباتي والحواوشي بإضافات مختلفة وساندويتشات الكبدة والسجق في عيشLa Fandi أو العيش الصاج. طلبنا للمقبلات بطاطس ويدجز بالدقة المصرية بـ 10 جنيه، وكنا متشوقين نذوق الكبدة، مش أي مكان يقدر يعملها بالطريقة المصرية وبنظافة وجودة كويسة، فـ طلبنا كبدة إسكندراني في عيش الصاج (33 جنيه)، وما ينفعش نتجاهل الحواوشي طبعًا فـ طلبنا حواوشي بالليمون المعصفر (30 جنيه)، وكان آخر اختيار من قائمة الساندويتشات النباتية بتنجان مشوي بالطماطم والجرجير (15 جنيه). الأكل جاء بعد حوالي نصف ساعة وده كان وقت كثير على تحضير الساندويتشات لكن المدير قال لنا أنه بـ يتم تحضير الأكل طازة من أول خطوة مش بـ يُعاد تسخينه وإحنا شفنا أن دي نقطة إيجابية تعوض وقت الانتظار. الأكل وصل ملفوف في شكل لطيف وكل حاجة مكتوب عليها مكوناتها وجاهزة أنها تتاكل فورًا أو تتاخد تيك أواي، بدأنا بالبطاطس بالدقة واللي كانت عبقرية فعلًا، مقرمشة وذهبية من بره وطرية من جوه، فريش وخلطتها مضبوطة جدًا ومعاها خلطة عجيبة من الطحينة ودقة السمسم بتاعة زمان، حاجة فعلًا ما أكلناهاش غير فى بيت تيتة. بعد البداية المبهرة دي قلنا نذوق الحواوشي واللى كان طعمه مش زي الحواوشي التقليدي لكن يستحق التجربة، نوع اللحم المستخدم بلدي صافي وطعمه متميز جدًا والخلطة مش المعتادة لكن طعمها لذيذ مع الليمون المعصفر وأحسن حاجة أن نسبة الدسم والدهون فيه معقولة وحجمه ممتاز. وبعدين جاء وقت الكبدة، إحنا طلبنا كبدة إسكندراني في عيش صاج، الحقيقة كانت روعة، أكثر حاجة لفتت نظرنا كانت نظافة الكبدة لأنها كانت بلدي وفريش وطعمها باين في الساندويتش مش زي معظم الأماكن اللى بـ يطغى فيها طعم الخلطات على الكبدة، لكن بـ ننصحكم تطلبوها في عيش بلدي مخصوص هـ تكون أحلى كثير من العيش الصاج. وأخيرًا ختمنا بساندويتش البتنجان المشوي، للأسف كان سىء جدًا، البتنجان مالوش أي تواجد في الساندويتش لدرجة أننا فتحناه علشان نتأكد، هو كان مجرد عيش صاج ملفوف على شرائح طماطم وورق جرجير وشريحة بتنجان وجبن موتزاريلا، الجبنة مش لايقة تمامًا على البتنجان ومافيش أي نوع من التوابل ولا يتناسب مع سعره إطلاقًا، ما قدرناش نكمله. La Fandi بـ يقدم نوعين للتحلية: مهلبية بالمكسرات ودي للأسف كانت خلصت، وكسكسي بالسكر، طلبنا الكسكسي (12 جنيه) وبرضه أخذ ربع ساعة في التحضير علشان كده بـ ننصحكم اطلبوا الحلو مع الأكل مش بعده. الكسكسي كان معمول مضبوط مافيهوش سمنة كثير وبـ تطلب إضافة سكر حسب الرغبة، وفي الآخر نهينا قعدتنا بقهوة تركيilly الغنية عن التعريف (11 جنيه) بن فاتح مضبوط. خلاصة تجربتنا في La Fandi أنه مكان مصري جدًا برؤية مختلفة، انبسطنا هناك ونحب نروحه ثاني ونجرب السجق الشرقي المرة الجاية.

...

فات كاو: ألذ ساندويتش برجر ممكن تأكله في حياتك في المعادي
اصدرت في: 26/11/2015

بطبيعة شغلنا في كايرو 360 بقينا بـ نأخذ بالنا من التفاصيل الصغيرة، والحرفية في تقديم الأكل، واللي حولنا من زبائن عاديين لهم ذوق لزبائن متطلبين، ما يعجبناش إلا الحاجة الحلوة قوي، لو حاجة حلوة بس ما تعجبناش، وده اللي لاقيناه في زيارتنا لـ فات كاو – Fat Cow، واللي أخيرًا لقينا فيه المزيج المضبوط لساندويش البرجر. المكان صحيح صغير بالنسبة لمحل برجر في شارع 9 إلا أنه بـ يقضي الغرض، أما المنيو اللي عبارة عن ورقة صغيرة لونها بني وش وظهر، فـ كان بسيط وممتع في نفس الوقت، في الصفحة الأولى فيه اختيارات ما بين ساندويتشات برجر الدجاج أو الجمبري أو اللحم واللي كانت أنواعها في المنيو قليلة نسبيًا، أما في الوجه الثاني للمنيو فهو عبارة عن مكونات البرجر أنت بـ تختارها من أول نوعه سواء لحم أو دجاج أو جمبري لحد الصوص ونوع الجبنة والإضافات اللي تحبها، علشان تكوّن البرجر الخاص بك من الأول للآخر. أول برجر عملناه كان برجر لحم بـ 40 جنيه وعليه إضافة جبنة بروفلون بـ 7 جنيه، وبيض بـ 12 جنيه، و خيار مخلل بـ 2 جنيه، أما الساندوتش الثاني فـ كان برجر لحم برضه بـ 40 جنيه، ومعاه إضافة جبنة سويسرية بـ 7 جنيه، ومشروم بـ 12 جنيه، وصوص ستيك، يعني الساندوتش الواحد بـ يبقى في حدود 64 جنيه، على حسب إضافاتك. وطلبنا بطاطس بـ 12 جنيه، وبيببسي بـ 10 جنيه للواحد. الأكل وصل في حوالي 20 دقيقة، سخن ومغلف بطريقة مبتكرة، لأن الطبق اللي بـ يقدم لك فيه عبارة عن مربع بداخله مربع ثاني بس قابل أنك تفكه فـ يبقى مفرود، ده غير أن الصوص بـ يقدم لك مع الساندويتش تحط منه زي ما تحب. أول ساندوتش كان طعمه مش بس حلو، لأ ده كان فعلًا يأخذ العقل، طعم الجبنة البروفلون كان ساحر مع البيض اللي تفوّقوا على نفسهم في تسويته والخيار خلى البرجر طعمه تحفة، والنقطة الأهم واللي بـ تتعبنا في كل محل بـ يقدم برجر للأسف هي تسوية اللحم نفسها والحقيقة أنهم اتقنوا تسويتها فـ بقت مستوية وفي نفس الوقت أنت بـ تستمتع بطعم العصارة اللي في اللحم، معادلة صعبة كثير من المحلات المعروفة ما بـ يعرفوش يعملوها بس هم نجحوا فيها جدًا. أما الساندويتش الثاني فـ كان برضه حلو قوي بس عادي، كان نفسنا نزود عليه بايكون بس للأسف وقت زيارتنا ماكنش متوفر عندهم. أما بقى البطاطس فـ كانت سخنة ومستوية كويس بس للأسف كانت قليلة جدًا، إحنا حرفيًا اتخضينا من عددها، هي كانت سميكة جدًا أكثر من العادية بس مش لدرجة 5 بطاطسات في الطبق، وعلشان سُمكها ده التوابل مش بـ تبقى مقسمة بتوازن، نتمنى أنهم يخلوا سمكها أرفع عن كده، أو يزودوا عددها. تجربتنا في فات كاو كانت ممتعة لأقصى درجة، لأنهم فعلًا بـ يقدموا أحسن ساندويتشات برجر تذوقناها لحد دلوقتي، ونتمنى أنهم يستمروا ويعدلوا من الأخطاء البسيطة.

...

أوجما: مكان لطيف وأكل محتاج لمسة احترافية في المعادي
اصدرت في: 24/11/2015

بالرغم من أن دي مش أول مرة نروح courtyard في المعادي، إلا أننا في كل مرة بـ نبقى متشوقين نزور أوجما – Ogma اللي في الدور الثاني، مش بس علشان مساحته الواسعة، لأ كمان لفت انتباهنا الديكور بتاعه. أول ما وصلنا المكان كان زحمة جدًا للأسف فما كنش فيه مكان جوه، واللي عجبنا قوي في ديكوراته النجف وشكل الكتب وهي مرصوصة في المكتبة بألوانها المختلفة؛ شكلها يحسسك بالدفء وكأنك قاعد في بيتك. فـ قعدنا بره والجو كان حلو، كمان المنظر من فوق حاجة ثانية، خاصة لو رحت هناك قبل الغروب، أو الصبح بدري. المنيو ما عجبناش شكله الحقيقة ونعتقد أنه خاص بالـ soft opening، لأنه كان مجرد ورق مطبوع عليه الأطباق والأسعار. وبرغم أنه كان متنوع ما بين فطار وأكلات مختلفة من اللحوم والدجاج، إلا أن التنوع في العصائر والحلويات ما كنش كبير زي الأكل، على عكس ما توقعنا. طلبنا في الأول فرابتشينو (27 جنيه)، وعصير هاوايان (28 جنيه)، ومن المقبلات طلبنا كنافة جمبري (55 جنيه)، وبعد كده طلبنا مكرونة ماما روزا (45 جنيه)، وساندويتش Chimichanga بـ 42 جنيه، وأخيرًا Molten cake بـ 40 جنيه. العصائر قدمت لنا بسرعة، الفرابتشينو طعمه كان حلو، والهاوايان كمان اللي كان غالب عليه طعم عصير الأناناس، وبعد شوية قدموا لنا الكنافة جمبري وكان أحلى حاجة أكلناها هناك، كان سخن وملفوف ومقدم مع صوص السويت أند ساور. بعد حوالي ربع ساعد جائت المكرونة واللي للأسف كانت مستوية زيادة عن اللزوم، بس الصوص كان كويس، وهي كانت مكونة من صوص كريمة وطماطم ممزوجين ببعض، أما الساندويتش بقى اللي كنا متشوقين نجربه، لأنه المفروض بصوص مكسيكسي ومكون من قطع دجاج وطماطم وفلفل أخضر، بس اللي جاء لنا كان غير كده خالص، بالرغم من أنه سخن ومعاه بطاطس محمرة كويسة ومش مزيتة إلا أنه كان عبارة عن رول فيه قطع دجاج محمرة وبصل وبس خلاص، مافيش صوص!! ولما قلنا للجرسون اعتذر وجاب لنا الصوص لوحده على جنب، واللي كان ملوش أي علاقة بالساندويتش مجرد صوص مايونيز مع مسطردة مخلوطين ببعض وطعمهم مش حلو. قلنا نجرب أخر حاجة وهي الـ Molten cake، واللي للأسف برضه ما كنتش فريش، وصوص الشوكولاتة جواها كان قليل جدًا. في المجمل أوجما مكان ظريف لمشروب خفيف وقعدة لطيفة، لكن كأكل مطاعم محترفة، محتاج شغل كثير، بالرغم من أن الخدمة عندهم كويسة، إلا أن الشيف محتاج يهتم أكثر بالتفاصيل.

...

شاهد المزيد
مواضيع خاصة

النهارده في القاهرة: سهرة ميكس مع كل ألوان الفن

رغم البرد اللي مخلي كل الناس عايزة تفضل متدفية في السرير، بس برضه أجندتنا مابتخلاش من الحفلات اللي هتخليك تصحصح وتفرفش، علشان تخرج تقضي ليلة سعيدة بعد الشغل. تعالوا