مأكولات بحرية مطاعم in المعادي Cairo, Egypt

مطاعم

جوة البحر: مأكولات بحرية مخدومة في المعادي
اصدرت في: 05/02/2014

عرفنا مطعم «جوة البحر» من إعلان كان منشور في جريدة المعادي المطبوعة اللي بـ تصدر كل أسبوع وبـ تتوزع مجانًا في المعادي وضواحيها، إعلان في الصفحة الأولى على مساحة كبيرة أعطى لنا الانطباع أن المكان كبير ومشهور وموجود في مكان حيوي وبالتالي أسعاره غالية، لكن لما ركزنا في العنوان لاقينا أنه أقرب لمنطقة صقر قريش بالقرب من طريق الأوتوستراد بالمعادي، وبالتحديد أمام مبنى الضرائب العقارية الشهير بين منطقة صقر قريش وأطراف المعادي. وطبعًا مساحته صغيرة وفي شارع هادئ أقرب للمناطق السكنية الشعبية، لكن نظافة المكان والاهتمام بأناقته خلتنا مستريحين للتجربة من بدايتها، ودخلنا صالة الطعام الصغيرة "والمكيفة" وبدأنا نتفرج على المنيو اللي مش بـ يفرق أي حاجة عن أي مطعم مأكولات بحرية 5 نجوم من حيث الأصناف، لكن أكيد بـ يفرق من حيث السعر، اللي بـ يبقى أقل بشكل ملحوظ، وما كانش فاضل غير جودة الطعام نفسه ومستوى الخدمة. صالة الطعام بسيطة وديكوراتها باللون السكري والأسود، فيها تليفزيون صغير وكاونتر كبير عليه أواني الشوربات والأرز اللي ما كانش بـ يستخدم وقت زيارتنا. القعدة مريحة، وروقان المحل وقت زيارتنا خلانا نحس أننا في عزومة في بيت وأن الشيفات بـ يطبخوا لنا الأكل مخصوص، بالذات مع الاحتفاء الزائد والضيافة المميزة، عملنا الأوردر بتاعنا وقعدنا ننتظر الأكل بفارغ الصبر. المنيو فيه وجبات جاهزة للتيك آواي زي مطاعم الأسماك الشعبية، أرز وفيليه وسبيط وجمبري بأسعار من 20 لـ 25 جنيه، وبـ يعمل ساندويتشات من 10 لـ 15 جنيه. لكن لو عاوز وجبة كبيرة ومحترمة ممكن تطلب أطباق من أي نوع سمك بطريقة التسوية المفضلة مع الجمبري الأكبر حجمًا والكاليماري بأسعار من 80 لـ 120 جنيه، وفيه مكرونات وأرز وشوربة وملوخية وسلاطات متنوعة. طلبنا سمك دنيس (الكيلو بـ 90 جنيه) مشوي بطريقة مبتكرة قال لنا عليها صاحب المكان اللي جاء يأخذ الأوردر بنفسه، وواضح أنه متخصص وله باع في عالم المأكولات البحرية، والتسوية بـ تبقى بنكهة ورق العنب مع الزيت والليمون. وطلبنا جمبري كبير (الكيلو بـ 160 جنيه) وشوربة كريمة بالسي فوود (25 جنيه) وأرز بالجمبري بالجبنة الموتزاريلا الحجم الوسط (15 جنيه) والسلاطات بـ تنزل كلها كده كده مع الأوردر وأي طبق سلاطة بـ 2 جنيه. الأكل تأخر كثير، والخدمة مش محترفة زي ما كنا متوقعين، لكن نسينا فترة الانتظار الطويلة لما الأكل بدأ ينزل وعرفنا أن الصنعة هنا حكاية، مذاق خطير وتتبيلة مخدومة لكل طبق، من أول الشوربة بالتقلية والزعتر والنعناع لحد الجمبري السويسي البلدي الغني باللحم، وتتبيلته الخطيرة بالطماطم والبصل والكرفس، والسمك الدنيس باللون الفضي المميز واللحم الأبيض الغرقان في مزازة ورق العنب والليمون، والأرز بالجمبري بالموتزاريلا السايحة عليه جوه الفرن وهو اختراع ظريف من «جوة البجر»، الحقيقة الأكل كان أكثر من رائع، التسوية مثالية والخلطات مخدومة بكمية كبيرة من الخضروات والتوابل، يمكن السلاطات بس هي اللي كانت عادية، لكن الباذنجان المخلل مشكلة لواحده، ممكن تقعد تأكل منه بالعيش لحد ما تشبع. «جوة البحر» يبدو مطعم سمك عادي في منطقة مش حيوية، لكن هو معتمد على خدمة التوصيل أكثر من خلال وجوده على صفحات مواقع توصيل الطلبات وصفحات المجلات والمطبوعة، واحنا أكيد بـ نرشحه أكثر في خدمة الدليڤري لأن الوصول للمطعم نفسه صعب شوية، والمكان مش مجهز لاستقبال الزبائن بالشكل الأمثل، والحمام ما كانش بالنظافة الكافية كمان. لكن تجربة الأكل هنا كانت مميزة بعد كل حاجة.

...

نيو جولدن فيش: تيك آواي مأكولات بحرية في المعادي
اصدرت في: 10/07/2013

اسم المحل مخادع شوية.. ممكن تتخيل أنه مطعم 5 نجوم موجود في مركب على النيل أو مطعم سياحي أو في فندق، خاصة لما تعرف أنه موجود بالقرب من ميدان الجزائر في المعادي الجديدة، لكن الحقيقة أنه مجرد محل صغير وفي شارع جانبي متداري شوية اسمه شارع 279 لكن المستفز أنه عامل دعاية لنفسه على أحد منتديات الإنترنت وحاطط صورة لمطعم شيك وكبير على أنه هو ده المطعم! طبعًا الدعاية ركيكة ورخيصة لأن المطعم نفسه أقرب لأن يكون مطعم شعبي، ومافيش مبرر لأسمه الإنجليزي بالمرة، ومع ذلك كانت لنا فيه تجربة هـ نقول لحضراتكم عليها حالًا. المطعم الصغير ده بـ يقدم وجباته وأسماكه تيك آواي ودليـڤري بس، وأمام المحل في Ice Tanks كثيرة فيها كل أصناف المأكولات البحرية ومن أسماك وكابوريا وجمبري بأشكال وأحجام مختلفة، ولحسن الحظ وقت زيارتنا كانت الأسماك دي لسه جاية طازة. طلبنا من أحد العاملين أنه يرشح لنا أحسن أصناف بـ يعملوها قال لنا طبعًا الجمبري المشوي بالخلطة والسمك السنجاري، وعليه اختارنا شوية جمبري بالحجم الكبير (الكيلو بـ 200 جنيه) وسمكة بوري تتعمل سنجاري مفتوحة (الكيلو 44 جنيه) وشوربة سي فوود مخلية (20 جنيه) وأرز سادة (5 جنيه) وشوية سلاطات وخيار مخلل (2 جنيه) وأخذنا دورنا في الانتظار اللي لحسن الحظ ما طولش وبعد حوالي 20 دقيقة أخذنا شنطتنا وتوجهنا لأقرب مكان ممكن نأكل فيه وبدأنا نستكشف اللي داخل الورق الفويل المولع والعلب البلاستيكية المغلفة بعناية. جمبري سويسي بلدي طعمه خرافة ومستوي بخلطة الطماطم والبصل بحرفنة، الميزان بتاعهم كريم قوي لأن الكمية كانت شكلها أكثر من النصف كيلو اللي طلبناه وكذلك السمكة المفتوحة كانت طازة ومليانة لحم كأنها 2 كيلو مش نصف كيلو! البركة حلوة برضه؛ ولقينا نفسنا أمام أكلة سمك تجنن ومخدومة زي الفل، بس في نفس الوقت لازم نقول أن الأسعار أغلى من أي محل سمك ثاني بنفس المستوى، يعني كل صنف سعره بـ يزيد في الكيلو من 5 لـ 10 جنيه، أكيد بسبب أنه موجود في منطقة راقية إلى حد ما في المعادي وله زبائن معينين. الشوربة حلوة بس مافيهاش جمبري تقريبًا، والأرز والسلاطات ممتازين. حبينا «جولد فيش» وأكلاته وسرعة الخدمة فيه، والمرة الجاية هـ نجرب الساندويتشات والمقليات اللي عنده، ونتمنى يبقى فيه مكان للجلوس أو يأخذ محل ثاني يخصص فيه صالة للطعام ويحط صورته الحقيقية على الإنترنت، لأنه بجد يستاهل.

...

فيش & فيش: أطباق بحرية مبتكرة في المعادي الجديدة
اصدرت في: 08/10/2012

إزاي ما شوفناش مطعم «فيش & فيش – Fish & Fish» قبل كده؟ أو حتى ما سمعناش عنه! مع أنه موجود داخل مبنى «أبو شقرة» في شارع النصر في المعادي وفي مبنى «أبو شقرة» اللي في شارع الميرغني في مصر الجديدة. بس الحقيقة أن هي أكبر مشكلة للمكان؛ أنه مغمور ومش عامل الدعاية اللازمة اللي تحطه في مكانته الطبيعية رغم أن عنده مطبخ مميز جدًا وشكل المكان شيك والخدمة جيدة لكن أسعاره غالية طبعًا. والأهم من ده كله أنه مرتبط بمحلات أبو شقرة اللي أشهر من نار على علم، يعني المفروض ينوبه من الحب جانب ويأخذ ربع الشهرة اللي واخدها أبو شقرة. ومع ذلك إحنا بـ نحاول نعرفكم به من خلال المقال ده، وننقل لكم تجربتنا هناك.الفرع اللي رحناه زي ما قلنا موجود في مبنى أبو شقرة في شارع النصر في المعادي الجديدة، مش هـ تبذل أي مجهود علشان تشوفه لأنه واضح وأنت في منطقة المطاعم اللي في بداية الشارع. هـ تدخل أبو شقرة وتطلع بالأسانسير للدور الثالث والأخير علشان تلاقي نفسك في داخل مطعم أسماك أنيق في منتصف المكان ماكيت كبير لمركب صيد وبداخلها بار السلاطات، والترابيزات منتشرة بأشكال وأحجام مختلفة وفيه أماكن حلوة بـ تطل على الشارع وأماكن ثانية هادئة في أركان المحل الداخلية. فيه ستاند لعرض الأسماك، ألقينا عليه نظرة بس ما تشجعناش قوي أننا نطلب من العرض لأن المعروض كان قليل وشكله مش فريش زي ما كنا متخيلين، فرجعنا ترابيزتنا واستعرضنا المنيو اللي فيه وجبات «فيش & فيش» الكاملة لكن مش فيه أي أسعار للكيلو من أي نوع. وده كان أريح بصراحة وقررنا نجرب أطباق المكان المميزة زي طبق "شبكة الصياد" اللي فيه سمكة دينيس مشوية بالزيت والليمون وواحدة كابوريا مسلوقة بالكمون والبهارات وجمبري كبير مشوي مع الخضار السوتيه، الطبق ده كان بـ 120 جنيه. وطبق ثاني اسمه ثلاثي الجمبري Shrimps Trio فيه شرائط الباستا الفيتوتشيني بالجمبري وصوص الكريمة ووحدات جمبري مشوي مع صوص الزبدة والليمون ووحدات جمبري كبير مفتوحة بالطول ومقلية في خلطة مقرمشة من اختراعات المكان. والطبق ده بنفس سعر الأول.قبل الأطباق الرئيسية ما تنزل جربنا شوربة سي فوود (25 جنيه) كان طعمها لذيذ لكن كمية الجمبري وفواكة البحر فيها مش كثير زي أماكن ثانية، وجربنا بوفيه السلاطات المفتوح (6 جنيه للفرد) وعجبنا فيه البنجر وبابا غنوج والثومية، لكن باقي السلاطات عاوزة اهتمام أكثر من كده.الأكل تأخر شوية لكن واضح أن ده لأن الشيف كان بـ يعمله بمزاج، الباستا بالجمبري تجنن وتستاهل تبقى وجبة لوحدها، الجمبري المقرمش العملاق طعم الخلطة بتاعته فكرتنا بالبسكويت من كثر ما هي مقرمشة وطعمها مسكر شوية، حلوة قوي. طبق شبكة الصياد كان طبق بحري متكامل عجبنا فيه طعم السمكة المشوية وطزاجتها رغم أن شكل الأسماك في العرض ما كانش يوحي بكده، وعجبنا كمان تتبيلة الكابوريا وقد إيه كانت غنية باللحم الأبيض ورائحتها هـ تحسسك أنك قاعد على البحر. يعني المهم أن الأكل هنا مخدوم قوي وفيه فكرة مختلفة عن مطاعم السمك الثانية.فيه أطباق كباب السمك والجمبري على السيخ وفاهيتا السمك وسمك حار مع الأرز بالشبت والخضروات وطبق مقليات فيه كاليماري وفيليه وجمبري بجانب أطباق تقليدية زي الملوخية بالجمبري وأنواع الأسماك المختلفة بالكيلو، والسعر بـ يتغير من يوم للثاني طبعًا.أي مشروبات أو حلويات هـ تبقى من عند أبو شقرة، لأن «فيش & فيش» بتاع سمك وبس. الأكل هنا حلو والقعدة حلوة بس الخدمة مش محترفة كفاية وبطيئة شوية، لكن شياكة المكان وهدوئه ونظافته خلتنا نتغاضى عن موضوع السرعة ده، وكمان اتبسطنا أنهم بـ يعرضوا مباريات الدوري الأوربي.«فيش & فيش» مطعم أسماك له منيو مميز وينقصه بعض الشهرة، نتمنى أنهم يشتغلوا أكثر على الدعاية، وأكيد هـ يبقى له شأن ثاني.

...

سي هورس كلوب: بوفيه مفتوح وأكل شرقي تقليدي في المعادي
اصدرت في: 05/08/2012

ناس كثير في رمضان بـ تفضل البوفيه المفتوح وقت الإفطار، وإحساسهم بالحرية والأريحية مع كميات الأكل اللانهائية اللي بـ تبقى متاحة، لكن لو المكان كان مزدحم جدًا ساعة المغرب هـ تبقى فيه مشكلة في الانتظار وهـ يتحول الأمر وكأنه حفل زفاف أو عزومة في بيت على بوفيه مفتوح والكلام ده ما ينفعش ساعة إفطار لو الواحد جعان ومش حابب ينتظر وقت طويل. لكن «سي هورس كلوب» حل المشكلة دي إلى حد ما بأنه سمح للزوار بأنهم يروحوا البوفيه قبل المغرب بوقت كافي، وكانت كميات بعض المأكولات وفيرة، وعدد من الشيفات والجرسونات بـ يساعدوا الموجودين لو كان فيه حاجة ناقصة، وفيه أصناف بـ تنزل على الترابيزات بواسطة الجرسونات زي المشروبات والعيش وبعض المشهيات وده بـ يوفر شوية وقت ومجهود. المطعم الشهير موجود على كورنيش النيل في المعادي قبل مطلع كوبري المعادي وأمام مستشفى النيل بدراوي مباشرة، المطعم أشبه بنادي فعلًا، مساحة كبيرة على النيل مقسمة لعدة قعدات، منها الرئيسية المفتوحة اللي قريبة جدًا من مياه النيل، وفيه قعدات مغطاة على الجوانب، فيه مكان عالي شوية وبعيد عن النيل، ولفت نظرنا وإحنا داخلين أن فيه فرن عيش بلدي وفلاحة قاعدة بـ تخبز العيش اللي بـ يتقدم للزبائن، وكانت رائحة الخميرة والخبيز جميلة ومالية المكان. تقدر تحجز بالتليفون في نفس اليوم اللي هـ تروح فيه، سعر الفرد 125 جنيه شامل الضرائب والخدمة. ومش هـ تحتاج تبقى هناك إلا قبل المغرب بـ 15 دقيقة فقط. الأجواء الرمضانية موجودة ومتمثلة في الديكورات والخياميات وأصوات الابتهالات والأدعية قبل وقت الآذان، والمكان عائلي جدًا ومناسب كمان لحفلات الإفطار الجماعي لزملاء في العمل، والقعدة على النيل تفتح النفس، خصوصًا قبل الغروب مباشرة لأن بعد كده الدنيا ظلام ومش هـ تشوف المياه أصلًا. البوفيه فيه مشهيات زي الثومية والفتوش وقطع الطماطم والخيار وباذنجان مخلل وسمبوسك وقطائف بالجبن، وشوربة كريمة الدجاج ولسان عصفور، وأرز بالقرفة والكبدة وأرز بسمتي بالكاري ومحاشي ولازانيا، ومسقعة وتورلي باللحم وكباب وكفتة ودجاج مشوي. على قد ما الأصناف كانت كثيرة ومتنوعة إلا أن ما كانش فيه الطبق المميز الخاص بالمكان، أو صنف معين فوق العادة يحسسك أنك جربت حاجة جديدة وممتعة. أكل غني وطعمه لذيذ بس بـ يفكرنا كثير ببوفيهات الأفراح والمناسبات، علشان مفتقد التميز اللي قولنا عليه. المهم أننا عملنا أطباقنا وشبعنا جدًا، لأن في النهاية الصنعة ممتازة والأكل مستوي كويس قوي خاصة المشويات، وأقوى صنف في البوفيه كان محشي الباذنجان وورق العنب، واللازانيا كانت فكرة ظريفة وسط كل المأكولات الشرقية الموجودة. بعد البوفيه الرئيسي جربنا بعض الأصناف من بوفيه الحلويات الشرقية، المهلبية في الفرن كانت الأفضل والزلابيا رائعة، وكان فيه بطيخ وكنتالوب مقطعين في أطباق ضخمة، وكان المفروض يكون فيه أنواع أكثر من الفاكهة. بوفيه الإفطار معاه مشروب رمضاني واحد وزجاجة مياه صغيرة، لكن بعد الإفطار لو حبيت تشرب شاي أو كولا هـ تطلبها بشكل منفصل. «سي هورس كلوب» خبرة طويلة في المأكولات، والقعدة على النيل هناك جميلة، لكن لازم نقولها بصراحة أن سعر الفرد في البوفيه المفتوح في رمضان كان ممكن يبقى أقل من كده بالمقارنة بأماكن ثانية بنفس المستوى في الأكل والخدمة والأسعار فيها أقل. لكن طبعًا إحنا مش ندمانين على زيارتنا للمطعم ده في رمضان.

...

طأطأ: مأكولات بحرية وكبدة ومخ في المعادي الجديدة
اصدرت في: 26/06/2012

عرفنا أن الفرع الأصلي للمحل هو الموجود في منطقة حلوان قبل ما يفتح فرعه الجديد المميز اللي في شارع النصر في المعادي الجديدة. المحل اسمه «أولاد طأطأ» وموجود في تقاطع شارع النصر مع شارع 263 أو علشان نسهلها عليكم جنب مطعم «شاورما الريم» ومحل أحذية «كروكس». المحل مساحته مش كبيرة وواخد ركن متداري شوية ممكن ما تشوفوش لو كنت ماشي بسرعة شوية بالعربية، له يافطة باللون الأصفر المضيء وعليها كلام كثير يغريك أنك تقف تقرأه وممكن الكلام وأصناف الأكل اللي على اليافطة تفتح نفسك وتخليك عايز تدخل المطعم. المطعم مكون من طابق واحد وفيه حوالي 12 ترابيزة حجمهم مش كبير، ولاحظنا ان الإقبال كبير على المكان لأن ماكانش فيه مكان للجلوس وقعدنا انتظرنا مكان يفضى علشان نقعد ونطلب الأكل. المكان من الداخل مبهجد بأنواره الشديدة وصخبه والصوت العالي للناس والعمال، بس اللي خلانا مش متضايقين من الدوشة أن المكان كان نظيف والخدمة سريعة ورائحة الأكل تجنن. من أهم أسباب زحمة المكان والدوشة اللي فيه هو أنه بت يقدم أطباق وساندويتشات الكبدة المقلية والمخ البانيه (الكيلو المشكل بـ 110 جنيه) اللي عليها إقبال غير عادي علشان أسعارها المعقولة وأكيد طعمها حلو، بس احنا ما جربنهاش المرة دي علشان كنا متوجهين للسمك والجمبري اللي سمعنا عنهم حكايات من أصدقائنا زبائن طأطأ الدائمين. المنيو بسيط ومش كبير، شوربة سي فوود مخلية أو لأ بـ 25 و30 جنيه، سلاطات أي نوع بـ 4 جنيه، أرز صيادية ومكرونة وسمبوسك وطواجن سي فوود وكل أنواع الأسماك والجمبري والكابوريا بالكيلو. الأسعار حسب النوع والحجم طبعًا بالنسبة للسمك والجمبري، البوري بـ 50 جنيه، وموسى والبربوني بـ 120 جنيه والوقار بـ 150 جنيه. الجمبري 4 أحجام، جامبو بـ 220 جنيه وكبير بـ 180 جنيه، وسط بـ 150 جنيه وعادي بـ 120 جنيه. الكابوريا بـ 85 جنيه زالسبيط بـ 100 جنيه. كده احنا تقريبا كتبنا المنيو كله. نيجي بقى للأكل اللي جربناه. سمك بوري مشوي بالردة والخلطة، مقفول مش مفتوح، فريش كانه لسة طالع من البحر، ولحمه الأبيض وعليه خلطة الطماطم والفلفل الأخضر الرهيبة. واضح أن الشواء هنا عالمي، لأن الجمبري المشوي بالخلطة اللي طلبناه كان تحفة، محطوط على أسياخ خشب زي بتاعة الشيش طاووق، كل سيخ فيه واحدة جمبري عملاقة مع أن ده كان الحجم الكبير مش الجامبو، لكن 3 وحدات ممكن يعملوا الصح مع الأرز والسلاطات. طاجن سي فوود تربو هو علامة مميزة للمكان، طاجن فيه جمبري وكاليماري وسمك فيليه وشرائح بطاطس مغطى بطبقة من كريمة الصوص الأبيض والموتزاريلا، سعر الطاجن 40 جنيه، ممكن تأكله لواحده بالملعقة، وممكن تأكله مع أرز، المهم أنه اختراع وطعمه خطير ووجبة بحرية متكاملة ولذيذة. السلاطات طعمها حلو بس الكمية قليلة في الأطباق، والأكل اتأخر شوية علشان زي ما قالولنا المشويات بـ تاخذ وقت أطول. بس استمتعنا فعلًا بوجبتنا في «طأطأ» وعجبنا أسعاره كمان وهـ نبقى نعدي نجيب ساندويتشات كمان بعد كده. ملحوظة أخيرة، أحد العاملين في المحل كان بـ يعمل دعاية سياسية لفصيل معين عن طريق فتح حوارات مع الزبائن بشكل ممنهج، بـ نقولهم ياريت تخليكم في مطبخكم الخطير وماتدخلوش السياسة في الأكل كمان.

...

جندوفلي: مأكولات بحرية خطيرة في المعادي
اصدرت في: 27/06/2011

فروعه المنتشرة في أحياء القاهرة بـ تأكد على نجاحه، مطعم بـ يقدم أشهى الوجبات البحرية المصرية بكل جدارة، بـ نتكلم النهاردة عن «جندوفلي». معظم رواد المطعم – ديكوره بالمناسبة بسيط وشيك جداً - زباين دائمين متعودين على أكل المحل والفرع اللي رحناه في المعادي الجديدة مش استثناء للقاعدة دي، وبـ ييجوا مخصوص عشان شوربة السي فوود الأسطورية اللي إشتهر بيها المطعم والجمبري المقلي والسمك القاروص الطازة وأكيد طبعاً طبق الجندوفلي اللي هو إسم المحل وده بـ يتقدم مسلوق ومعاه ليمون عشان تديها الطعم المِزز اللذيذ. لو انت من أكيلة السمك يبقى تروح وتشمر كمامك وبلاش تستخدم الشوكة والسكينة وانت بـ تفصص الجمبري الـﭼامبو، قريب هـ يثبتوا علميا ان أكل السمك بالأيد أطعم بكتير من الأكل بالشوكة والسكينة بالذات لو السمك معمول بطريقة بيتي . أحسن حاجة تبتدي بيها هي شوربة السي فوود المخلية،المرقة نفسها زي الكريمة وفيها قطع جندوفلي صغيرة وحبات جمبري وسمك فيليه متقطع وبتـ تقدم في براد كبير عشان يحافظ على حرارتها وقدامك طبق تصب فيه شوية بشوية. ولو طلبت واحد شوربة بس –وده سعره 24 جنيه بالخدمة – في الحالة دي الويتر بـ يعدي ببراد كبير قوي لونه فضي وبـ يغرف منه في الطبق اللي قدامك. الشوربة تحفة وهـ تبقى عايز تطلب تاني بس لازم تبقى شاطر وتمسك نفسك عشان تعرف تاكل الطبق الرئيسي اللي هـ تطلبه بعد كده. بـ ينزل مع الشوربة بقى بعد ما تعمل الأوردر سلاطات متنوعة؛ طحينة وتبولة وسلاطة رنجة وبصل وخيار مخلل حرَّاق، وعيش بلدي سخن وطبعاً مش هـ تقاوم وهـ تقعد تاكل من الحاجات اللي قدامك لحد ما تشبع وكل ده والطبق الرئيسي لسه مانزلش. لسه فيه مشهيات تاني ممكن تطلبها زي الطبق المشكل اللي فيه كاليماري مقلي ومحار وجندوفلي. الجمبري 3 احجام وكل حجم بسعر، ﭼامبو ﭼامبو بـ 250 جنيه الكيلو وﭼامبو بس بـ 225 للكيلو وسوبر بـ 180 جنيه الكيلو. الكاليماري بـ يكون على شكل صوابع سميكة متغطية بصوص منعش من الثوم والليمون والبهارات. الطبق الرئيسي حاجة مش قليلة، بـ يتقدم برضه مع سلاطات وخضروات لتزيين الطبق وصوص خاص به، زي طبق الفيليه المقلي اللي طلبناه. طبق سلمون مشوي على الجريل سعره تقريباً 40 جنيه لو السمكة حجمها متوسط، وبـ تبقى متبلة ومشوية تمام قوي. وللناس اكيلة السمك قوي بقى المطعم بـ يعمل سمك تعابين كمان، وده ممكن تطلبه مقلي أو يجيلك مسلوق في الشوربة بتاعته. مستوى الخدمة ممكن يتفاوت بس هـ يكون مختلف للأحسن لو أنت زبون دايم للمكان وهـ تلاقي الويترز بـ يضحكوا في وشك وبـ يرحبوا بيك وانت داخل المطعم. توقع فاتورتك تيجي حوالي 250 جنيه لفردين لو طلبتوا شوربة وطبق رئيسي فيه سمك مقلي أو مشوي ومشهيات.

...

مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح