صيني مطاعم in المعادي Cairo, Egypt

مطاعم

جوي لاك: أكل صيني منعش وأصلي في المعادي
اصدرت في: 25/12/2014

اشتهرت كثير في القاهرة المطاعم الصينية، منها اللي بـ ينافس في الأسعار ومنها في الجودة والطعم، البعض نجح في توصيل الثقافة الصينية والبعض فشل، بس الأكيد أن أهم حاجة بالنسبة للزبون هي جودة وطعم الأكل وده اللي لقيناه في "جوي لاك – Joy luck" مطعم صيني أبًا عن جد. المكان صغير جدًا، ممكن لو أنت معدي بسرعة في دجلة في المعادي ما تشوفهوش، مجرد أربع ترابيزات والمطبخ. أول ما دخلنا لاحظنا أن مافيش ديكورات تدل خالص أن المكان صيني غير لوحة مكتوب عليها الأرقام بقلم فلوماستر، بس الحقيقة أن الإقبال على المحل كان غير عادي بالذات من الصينيين، أول ما وصلنا الأربع ترابيزات كانوا مليانين صينيين إلا ترابيزة واحدة يتيمة كان فيها أسرة مصرية. المنيو بتاعهم بسيط جدًا، ورق مطبوع في فايل شفاف داخل ملف جلد فيه خوص، علشان يحسسوك أنه صيني شوية، ودي الحاجة الصينية الوحيدة في ديكور المحل، لكن يمكن هم معتمدين على أنك بـ تشوف ناس صينية كثير جدًا في المحل ده، غير الطباخين والجرسونة اللي بـ تتكلم لغة إنجليزية ضعيفة، ده لدرجة أنها بـ تكتب الطلب بالصيني والفاتورة كمان بالصيني والمنيو بالصيني، تخيلوا.. وتحته بس شرح للمحتوى الصيني باللغة الإنجليزية. طلبنا دجاج Sweet and Sour بـ 38 جنيه، ودجاج kong pao ونودلز بالخضار بـ 20 جنيه وقلنا نجرب حاجة ما جربناهاش قبل كده وهي Fried Lettuce in Oyster Sauce بـ 20 جنيه. طريقة التقديم كانت بسيطة زيادة عن اللزوم لدرجة أنها ممكن تكون أقل من الطباق اللي بـ تأكل فيها في بيتك، مجرد أطباق بيضاء جواها الطلب بمنتهى البساطة. طبيعة عملنا بـ تخلينا نسعى دائمًا أننا نجرب الجديد، ده غير حبنا للمغامرة بالذات مع الأكل اللي ما نعرفوش ولكن في بعض الأحيان نتائج ده مش بـ تكون كويسة، وده اللي حصل مع طبق الـ Fried Lettuce in Oyster Sauce لأنه طلع مجرد خس متحمر بالصوص مالوش أي طعم الحقيقة. أما اللي كان مختلف فعلًا دجاج الـ Sweet and Sour رغم أنه ممكن يكون حلو زيادة عن اللزوم إلا أنه كان منعش ومعمول بطريقة مريحة لأنهم كانوا حاطينه بالصوص بس من غير الخضار اللي بـ يبقى معاه ودي الطريقة اللي إحنا بـ نحبها. أما التجربة الثانية واللي كانت متميزة برضه، هي دجاجkong pao لأنها كانت حارة وبالكوسة والجزر وطعمها شهي جدًا ويشجعك أنك تخلص الطبق كله اللي بالمناسبة كان حجمه كبير وبـ يشبع تمام. الخضار كان مستوي كويس جدًا، والدجاج كان مليان توابل مميزة. أما النودلز اللي بالخضار كانت عادية مش مميزة للدرجة من الطعم أو الجودة بس كويسة. لكن المفاجأة الحقيقة كانت في التحلية: البطاطا الحلوة بـ 22 جنيه، كانت أكثر من رائعة، لأنها كانت سخنة وطرية ومقرمشة في نفس الوقت. مطعم جوي لاك مناسب جدًا أنك تطلبه دليفري في آخر الويك إند، هـ تستمتع، بس نصيحة ما تسيبش الأكل لثاني يوم مش هـ تعرف تأكله خالص.

...

دراجون هاوس: أكل ثلاث بلاد في مطعم واحد في المعادي
اصدرت في: 04/09/2014

انتشرت في الفترة الأخيرة المطاعم الشرق أوسطية في القاهرة، واللي تختلف في تقديمها وفي أسعارها وجودة الأكل والمكان، لكن لما يكون فيه مكان بـ يجمع ما بين ثلاث بلاد قريبين من بعض في الثقافة والطعم مختلف حاجة بسيطة، يبقى لازم نجربه. "الصين وجمال الصين، تايلاند وحلاوة تايلاند، الهند وبهارات الهند، لسنا نعلم كيف تتجمع كل هذه البهارات ولا ينهار الناس ولا يحتارون". عزيزي الأكيل اللي مالوش في الأكل الحراق جدًا أو البهارات الكثير.. مكانك مش هنا يا كبير.. رحنا النهارده مطعم "دراجون هاوس – Dragon House" اللي بـ يجمع ما بين ثلاثة أنواع أكل.. الأكل الصيني والهندي والتايلاندي. والحقيقة أننا عملنا دماغ من توليفة تايلاندية هندية صينية. أول ما دخلنا المكان بـ تلاحظ الضوء الأحمر والديكور المتأثر بالثقافة الصينية والموسيقى الصينية 180% لدرجة أنك بـ تموت على نفسك من الضحك، وأنت بـ تتخيلهم "نياااو.. بو.. تش.. اااه" بـ ينطوا في الهواء بالحركات البهلوانية بتاعتهم، وناقص بس تلاقي أوشين جاية تأخد منك الطلب، بعد ما أوشين جات -نقصد الجرسون- واللي كان بـ يتأخر علينا في الطلبات شوية مش عارفين ليه.. طلبنا بعد حيرة طويلة كمقبلات سبرينج رولز بالدجاج (13.5 جنيه للقطعتين) وده من الأكل الصيني، وهو عبارة عن جلاش وجواه بصل وكرنب متبل مع الفراخ، الحقيقة أنه كان مقرمش جدًا ولذيذ. ولعشاق التجارب لازم تأكلوا Steamed Fried Dumpling بـ 15 جنيه للأربع قطع، ودي بقى يا سيدي الفاضل لها طريقتين طبخ، طريقة صينية وطريقة تايلاندية، وبما أننا تذوقنا قبل كده اللي بالطريقة الصينية، قمنا جربناها بالتايلاندية، ويا سعادة الأستاذ اللي مالوش في الأكل الصيني دي عبارة عن: عجينة زي القطايف بتاعتنا كده بس بدل ما بـ تتحمر بـ تستوي على البخار والحشوة طبعًا مختلفة تمامًا، وقُدمت في باسكيت خوص صيني، اللي استويت فيه على النار، علشان تحتفظ بحرارتها. بالنسبة لطعمها إحنا شخصيًا أكثر حاجة بـ نحبها العجينة اللزجة، اللي بـ تتزحلق في فمك أول ما تحطها فيه، بس الحشو كان كبير جدًا ومليان بصل زيادة عن اللزوم، كنا نُفضل لو يبقى أقل من كده علشان يتناسب مع حجم العجينة. المكان كمان بـ يقدم جزر وخيار مخلل مجانًا وشهادة الحق أننا حبيناه جدًا لاختلافه عن المخلل العادي بتاعنا باللسعان اللي فيه والحرقان الزيادة، وطبعًا اختلاف بهاراتهم عن بهاراتنا. بعد كده طلبنا نودلز بالفراخ والخضروات (29 جنيه)، كانت شهية جدًا وطازة وإن كان ناقصها الصوص بتاعها لأنهم جابوها بعد ما صفوه للأسف ودي طبعًا أكلة صيني معروفة. لكن جمال البهارات بقى اللي فرقعت في فمنا، وخلتنا في قمة السعادة كان فراخ بالكاري الأحمر والماسالا chicken madarass بـ 53.5 جنيه، واللي نقل حضارة الهند كلها من أول قضمة، تخيل معانا بقى التوابل الهندية بـ ترقص جوه فمك، وعيش لحظة الفرقعة، وده عبارة عن قطع فراخ في صوص أحمر وفيه توابل هندية كثير جدًا، منها الثوم والبصل والكاري والكمون وجوز الهند. وأول ما بـ تبدأ تأكلها بـ تيجي لك صدمة حضارية في البداية، لكن بعد ما بـ تضبط الملح بتاعك بـ تكتشف جمال وعذوبة التوابل وأنت بـ تتذوقها واحدة وراء الثانية، كمان الصوص كان كثير جدًا لدرجة أنك ممكن تشربه كأنه شوربة، ولولا كثرة التوابل اللي بـ تعطش قوي كنا عملنا كده. والطلب الثاني كان توفو دجاج حلو وحادق sweet and sour بـ 45.7 جنيه، وأرز بالخضروات (14 جنيه). توفو الفراخ اللي طبعًا صيني كان وهمي لأن طبقة التوفو المقرمشة اللي بـ تحمي توابل الدجاج خلته رائع ومقرمش من بره، وطري من جوه ومليان توابل. والأرز كان لذيذ ومش معجن. نيجي للحلو.. حد فيكم قبل كده جرب يأكل آيس كريم مقلي (22 جنيه)، إحنا جربناه، ولأننا مش من عشاق جوز الهند ما عجبناش قوي الصراحة، لأن الآيس كريم كان ملفوف بطبقة كبيرة جدًا من جوز الهند اللي خلى أول جزء منها بس اللي يتحمر وبـ تفضل طبقة ثانية مش متحمرة، وطبعًا ده نتيجة أنه ما ينفعش يسيبه كثير على النار، وكان معاه أناناس طازة وجميل. بس اللي أحلى منه بكثير الموز المقلي، اللي كان طازة جدًا وسخن قوي، مع آيس كريم فانيلا والعسل، إحنا الصراحة مش بـ نحب العسل بس العجينة اللي عملوا بها الموز مع العسل والآيس كريم كانت روعة.. مع أول قضمة تحس بسخونة وبرودة في نفس الوقت وتبقى مش عارف تعمل إيه في فمك غير أنك تصبر وتستمتع بالطعم الجميل. آخر حاجة شربناها كانت الشاي الصيني (15 جنيه)، واللي كان حجمه كبير جدًا وطعمه رائع مش زي أي شاي صيني بـ تطلبه جاهز، دي أعشاب طبيعية صينية صناعة عالمية، كمان المطعم عنده كورنر للأطفال لو عاوزين يلعبوا، وممكن تدخل تشوف المنيو من هنا وتطلب الأكل ييجي لك لحد البيت. تجربتنا في دراجون هاوس كانت مميزة وممتعة، مش بس علشان الأكل الجميل اللي من ثلاثة بلاد مختلفة، لأ أهم حاجة أنك تأكل مع ناس أنت بـ تحبها، وده اللي بـ يخلي المكان أحلى، لأنك بـ تغذي روحك بالحب ومعدتك بالأكل الحلو، وكلها أرزاق ربنا مقسمها.

...

مهراجا & زين زين: مكان متواضع وأكل هائل فى المعادى
اصدرت في: 11/08/2014

عدد المطاعم الهندى فى القاهرة مش كبير، والسبب للأسف جايز أن المطبخ ده شهرته فى القاهرة أقل من مطابخ ثانية. المقارنة بين المطاعم اللى بـ تقدم الأكلات الهندى صعب شوية، شوية منهم بـ يكون فى فنادق وشوية فى شوارع جانبية صغيرة، مافيش تصنيف واضح لهم. الأكيد فى الموضوع أن الأكل الهندى لذيذ، وللسبب ده قررنا نطلع على واحد من مطاعمنا المفضلة نشوف أخباره إيه. "مهراجا & زين زين - Maharaja & Zenzen" هو ناتج التعاون بين المطبخ الصينى مع كل الأكلات الآسيوية الثانية، يعنى أكل كورى ماشى، تايلاندى مافيش مشكلة، وطبعًا الأكل الصينى أساسى. كان لنا زيارة سابقة فى المطعم صاحب الألوان المطرقعة بمكانه فى ميدان الجزائر فى المعادى، أما الديكورات فأكيد غريبة، ومش مريحة، لكنك لحظة وصول الأكل، هـ تنسى كل الكلام ده. طلبنا فرايد دامبلنجز (12 جنيه) من بين المقبلات، بيف مع مشروم أسود (50 جنيه) وتشيكن ماكنى (48 جنيه) Chicken Makhani من بين الأطباق الرئيسية، ومعاهم أرز مقلى بالخضروات (21 جنيه). صحيح الدامبلنجز كانت كميتها قليلة، لكنها كانت مقلية بشكل ممتاز مع حشو لذيذ من الفراخ والخضار. البيف مع المشروم الأسود وصل فى صوص محار والبخار طالع من الطبق. البيف كان طرى وعصارى أما المشروم فكان كبير، كميته كبيرة وطعمه روعة. التشيكن ماكنى، أو الفراخ بالزبدة، كان استثنائى. ساخن بشكل رهيب، وقطع الفراخ كانت كبيرة، أما صوص الزبدة ف كان سميك ولذيذ بشكل مش طبيعى، كان بس ناقصنا نطلب عيش نان علشان نغمسه فى الصوص. كمل طعم الطبقين الرائع الأرز بالبيض اللى ختم الأكله اللذيذة المشبعة بشكل ممتاز، وفعلاً كانت تستحق كل جنيه. من الصعب لما تشوف شكل المحل بديكوراته الآسيوية والأرضيات المتسخة شوية تتوقع أن الأكل هـ يكون بالروعة دى. جايز يكون عندك أماكن كثير للخروج أو لمقابلات الشغل أجمد من هنا، لكن لو عمرك ما زرت "مهراجا & زين زين" يبقى فاتك كثير، وننصحك تروح أو حتى تطلبهم بالتليفون.

...

وك أند واك: أكل صينى تيك أوت فى المعادى
اصدرت في: 03/08/2014

فكرة التيك أوت الصينى كانت بعيدة عن مشهد الأكل القاهرى الراقى لفترة طويلة. الأكل الصينى عادة بـ يكون أرخص كثير من أكل أماكن ثانية من العالم، وعادة بـ يكون قائم على فكرة التيك أوت مش تجربة أكل فى مكان شيك والكلام ده. وسط منطقة الأكل والأكيلة، وهى المعادى طبعًا، وصول مطعم التيك أوت الصينى قوبل بحماس شديد. بعد افتتاحه فى آخر صيف 2013، "وك أند واك - Wok and Walk" قدر من وقتها يكوِّن مكانة كويسة وسط مطاعم ثانية في شارع 9. تصميم المطعم له طابع مريح مع مطبخ مفتوح يخليك تشوف مجهود الطباخين فى تحضير الأكل. اللون الأزرق فى مخرج المطعم عمل تباين مع حوائط الطوب الأحمر الموجودة داخل المكان، وفيه دكك صغيرة تقدر تنتظر عليها طلبك، أو تأكل هناك لو حبيت. وك أند واك بـ يقول على نفسه "مطعم تيك أوت صينى"، وعلشان كده قررنا نرجع البيت ونطلبهم من هناك علشان نعمل التجربة زى ما الكتاب بـ يقول. المنيو مقسومة ثلاثة أجزاء. أول حاجة بـ تختار واحد من بين ثلاثة أصناف من النودلز، أو واحد من ثلاثة أنواع من الأرز. بعدها، بـ تختار بين اللحم، أو الفراخ، أو الكاليمارى، أو جمبرى أو سى فوود. أخيرًا، بـ تضيف صوص واحد من تسعة أنواع. فيه كمان منيو ثابتة فيها نوعين من المقبلات. من هنا، قررنا نعمل تشكيلة لنفسنا. أولاً، أرز مقلى بالخضروات (14 جنيه) مع لحم (22.95 جنيه) وصوص محار (8 جنيه) وكده المجموع يكون 44.95 جنيه. بالنسبة للأطباق الثانية، طلبنا نودلز بالبيض (14 جنيه)، صدور فراخ (22.95 جنيه) وصوص ترياكى (8 جنيه) وبرضه المجموع 44.95 جنيه. طلبنا كمان سبرينج رولز خضروات من بين المقبلات الموجودة. الطلبات وصلت بعد حوالى ثلاثين دقيقة، البخار طالع منها وتعبئتها لطيفة فى علبهم الشهيرة- علب الأكل الصينى اللى لازم تشوفها فى أى فيلم أجنبى. السبرينج رولز، ومعاها صوص سويت أند ساور، كانت مقلية كويس ومقرمشة، لكن المشكلة أن حشوها قليل. أول وجبة، رغم أن كميتها كانت كبيرة، اللحم وصوص المحار كانوا على الوش فقط، وكده الأرز فى آخر العلبة كان جاف ونكهته ضعيفة. اللحم نفسه كان من نوعية كويسة، لكن ساعات مضغه كان صعب. صوص المحار طعمه غير ما توقعنا، وعلى حسب كلامنا السابق، ما قدرش يضيف جديد لطعم أكثر من نصف كمية الأرز. بشكل عام، تقييمنا أنه فوق المتوسط، لكن مش فوق قوى. نفس الكلام بالنسبة للوجبة الثانية، كمية كبيرة، لكن الطعم برضه محبط. طعم الترياكى مش مزز زى ما كنا عاوزين والفراخ مالهاش طعم. النودلز كانت طرية بشكل كويس، والسبب كان طبيعة الطبق نفسه مش من صوص الترياكى. وك أند واك مش بـ يقدم أكل صينى من الطراز الأول، لكن نرجع ونقول لا هو ولا أى مطعم تيك أوت صينى ثانى. بالنظر لكمية الأكل والأسعار المعقولة لوجبة غذاء أو عشاء، وك أند واك يستحق تجربة مرة أو اثنين لتجربة فكرة تصميم طبقك بنفسك. هل هـ تكون زبون دائم؟ ما نفتكرش.

...

تشاينا تاون: المزج بين المطبخ الهندي والصيني في المعادي
اصدرت في: 28/05/2014

مسألة أنك تخبط في مطعم فعلًا يبهرك في القاهرة أصبحت نادرة إلى حد ما، مين ما يحبش يجدد من وقت للثاني؟ وخاصة بتجربة مطابخ وأكلات مش بـ نأكلها في المعتاد؛ زي مثلًا المطبخ الهندي، واللي مافيش مطعم في مصر قدر يقدم أطباق البلد دي بالمهارة والجودة ما عدا "نواب - Nawab" و"بيجم – Begum" اللي موجودين في الزمالك والمعادي اللي شهرتهم واسعة بين محبي الأكلات الهندية في القاهرة، الأخير فتح مطعم شقيق في المعادي متخصص في الأطباق اللي بـ تمزج بين المطبخ الهندي والصيني واسمه "تشاينا تاون – China Town ". في الأصل فكرة المطبخ الهندي/ الصيني بدأت بمجموعة من الصينيين اللي كانوا عايشين في الهند، قرروا أنهم يدمجوا بين تقنيات المطبخ الصيني وتوابله مع الطعم الهندي المميز، وانتشر الهجين ده في جنوب شرق آسيا بمرور الوقت وأصبح مطبخ قائم بذاته، ووصل لنا مؤخرًا في المعادي. المطعم موجود في نفس مبنى مطعم "بيجم"، بالرغم من أن مساحته متواضعة نسبيًا، إلا أن الجو العام فيه دافيء والترحاب اللي بـ يقابلك به القائمين بالخدمة على المكان يفتح نفسك للأكل بجد. بعد عملية استكشاف في المنيو فكرنا أثنائها إيه الجديد اللي ممكن يقدموه، قررنا نختبرهم في الكلاسيكيات المفضلة لنا. طلبنا سبرينج رولز (18 جنيه)، فراخ سويت آند ساور (43 جنيه) وأرز مقلي بالخضروات (20 جنيه). السبرينج رولز كانت أول حاجة وصلت لنا، وبالرغم من أننا بـ نقدر سرعة الخدمة... إلا أننا أكيد مش بـ نقدر أن الأكل يُقدم لنا "متكروت"؛ للأسف السبرينج رولز كانت رطبة وغارقة في الزيت، وبالتالي العجينة فقدت هشاشتها، ولكن الحشوة سواء كانت الخضروات المكرملة أو فراخ كانت رائعة. السويت آند ساور كانت مفاجأة بالنسبة لنا، المرة دي كانت من أجمل المرات اللي أكلنا فيها الطبق ده. الصوص كان غني، وطعم الكاري كان مميز جدًا فيه. بالرغم من أن فيه مطاعم بـ تقدم الفراخ في الطبق ده مقلية ومقرمشة نوعًا ما، إلا أن الفراخ المرة دي كانت مستوية في الصوص... بس خذ بالك لأن الطبق حار. الأرز بالخضروات ما كانش بالجودة المطلوبة، طعمه كان عادي جدًا... بدون أي نكهة مميزة بالرغم من أنه المفروض متشوّح في الزيت مع الخضروات. فانتهى به الحال أنه ما فرقش عن الأرز المطهو على البخار، وما تسألناش عن الحلو... تشاينا تاون مابـ يقدمش أطباق حلو. التجربة في المجمل كانت ظريفة، وخصوصًا أننا جربنا مطبخ جديد مش معتادين عليه. ما فضلش غير أننا نوضح المطعم جديد وبالتالي لازم يأخذ فرصته في أنه يصحح الأخطاء بمرور الزمن.

...

جنكيز خان: أكل منغولى بأسعار معقولة فى المعادي
اصدرت في: 29/05/2012

أكيد مش حاجة عادية أنك تلاقى مطعم بـ يقدم أكل منغولى فى القاهرة. حصل مرة أننا شفنا برنامج عن السياحة بـ يتكلم عن الأكل المنغولى واكتشفنا أنهم بـ يأكلوا نوع من السناجب اسمه مارموتس Marmots. وعلشان كده كان نفسنا أن ده ما يكونش موجود فى «جنكيز خان - Genghis Khan» فى المعادى. المطعم مكانه فى شارع 233، والشارع ده فيه كثافة عالية من المطاعم الآسيوية ومحلات الحيوانات الأليفة، على فكرة إحنا مش بـ نلمح لحاجة خالص. واجهة المكان كلها عبارة عن زجاج، وده بـ يسمح بدخول ضوء النهار وتقدر تشوف الشارع من داخل المكان. فيه أربع ترابيزات أقصى عدد لكل واحدة خمسة أفراد. على الحائط شوفنا قطع فنية ملفتة وغريبة شوية ممكن نوصفها أنها فن آسيوى. المنيو مكتوبة بالعربى والمنغولي، حسينا بالراحة أول ما بصينا على المنيو علشان ما لقيناش سنجاب المارموتس. حاولنا نطلع إيه الأطباق اللى أصلها منغولى لكن ده كان صعب علشان أغلب الأطباق فى المنيو كانت أكلات صينية. أول ما تطلب الأكل هـ ييجي لك برّاد شاى أخضر. خلوا بالكم "جنكيز خان" كمان عنده مشروبات وبيرة هينيكن، ستيلا وسقارة. وإحنا بـ نقزقز السودانى المملح (15 جنيه) بصينا على المنيو وفى الآخر اختارنا فراخ سويت أند ساور (35 جنيه)، البيف مع البطاطس (35 جنيه)، توفو مع صوص الصويا (25 جنيه)، أرز بالبيض وشعرية بالجمبرى (18 جنيه). الأكل وصل بعد حوالى خمس دقائق وكل الأطباق كانت مليانة للآخر، خصوصًا أطباق الأرز وأطباق الشعرية، اللى تقدر بسهولة تشترك فيه مع اثنين أو ثلاثة كمان. التوفو بصوص الصويا للأسف كان محبط شوية، الصوص ما كانش له طعم والتوفو قوامه كان أسفنجى. على الناحية الثانية البيف مع البطاطس كان أحلى بكثير. قطع البطاطس المطبوخة كانت لها نكهة لذيذة أخذت منّا ثلاثة دقائق علشان نفترسها. البيف كان مملح شوية لكن ده ما يمنعش أن طعمه كان حلو بالإضافة إلى البطاطس، دول فى حد ذاتهم ممكن نعتبرهم وجبة كافية قوى. طبق السويت أند ساور كان برضه ضخم. قطع الفراخ كانت متشربة صوص متوازن قوى بين الطعم الحلو والطعم الحمضى. طبق الأرز بالبيض كان مش بطال بس طعمه ما كانش جامد قوى، رغم كده التماسك بتاع الأرز خلاه حلو لو اتحط عليه أى صوص. الشعرية كانت مش مطبوخة كويس ومالهاش طعم. نقدر نقول أن أقوى حاجة عند "جنكيز خان" كانت أطباق البيف والبطاطس. كميات الأكل كانت كبيرة وسعرها معقول، دفعنا 160 جنيه فى خمسة أطباق وشوية مشروبات. بالرغم من كده إحنا لسه بـ نسأل يا ترى الأكل المنغولى ده شكله إيه؟!

...

دراجون هاوس: مطعم آسيوي أصلي في المعادي
اصدرت في: 12/03/2012

في شارع 9 الشارع الأهم والأطول في المعادي هـ تلاقي مطعم «دراجون هاوس» قريب من «كوفي بين» في دور علوي فوق كافيه «كيوي» اللي كتبنا عنه من فترة. المطعم له يافطة ضخمة تليق باسمه (تنين بقى) باللون الأحمر، ومدخل المحل بـ يبقى من لفة جانبية ناحية اليمين وهـ تلاقي سهم بـ يوضحها قريب من يافطة المحل. عالم ثاني داخل المطعم، مش هـ تفتكر أنك في شارع 9 المزدحم إلا لو قعدت جنب الشباك وتفرجت على صورة الشارع من غير صوت. هدوء ورقي وموسيقى كلاسيكية صينية وترابيزات وكراسي خشبية ورسوم وكتابات على الجدران بالحروف الصينية، وإضاءة باللون الأحمر وشموع على الترابيزات ده غير الخصوصية الشديدة والأركان المخصصة للاجتماعات وأماكن منفصلة للمدخنين وساحة خاصة للأطفال. جو صيني أصلي من أول الديكورات لحد الشيفات الآسيويين اللي بـ تقابلهم وأنت داخل المكان، وساعتها تأكدنا أن التجربة هنا هـ تكون ممتعة وجديدة. المنيو مقسم لـ 3 أقسام: أكلات صينية وتايلاندية وهندية، وبما أن المنيو كان كبير قوي وأصناف اللحوم والدجاج والمأكولات البحرية والخضروات متوفرة بأشكال مختلفة من مطبخ للثاني، قررنا نستعين بمساعدة الجرسون المهذب اللي ما زهقش من كل أسئلتنا عن الأصناف ومكوناتها، خبرتنا معقولة عن الأكلات الصينية والهندية، لكن معلوماتنا شبه معدومة عن المطبخ التايلاندي، وعلشان طلبنا منه يرشح لنا طبق تايلاندي مميز. قبل ما نتكلم عن الأطباق الرئيسية نحب نعرفكم أن المقبلات والشوربات هنا رائعة وبمذاقات وتوابل فريدة. الشوربات الصينية زي الـ "وان تان" وشوربة الذرة الحلوة وشوربة الخضار الحارة بالمشروم والبيض بسعر 15 جنيه، وبـ نرشح الأخيرة لأنها تعتبر أيقونة الشوربات الصينية وفتحت نفسنا جدًا قبل الأكل، بس اطلب درجة الشطشطة اللي تناسبك. وممكن من المنيو التايلاندي تجرب لفائف الجلاش أو القطائف المحشوة دجاج أو شوربة البحريات بالريحان والأسعار من 15 لـ 22 جنيه. مع الشوربة نزل بعض المقبلات الآسيوية زي الخيار بالثوم وشرائح الكابوتشا الحمراء بالليمون، والظريف هنا أنك هـ تعرف تأكل بالعصيان الآسيوية (Chopsticks) حتى لو مش متعود تأكل بها لأنها بـ تكون ملتصقة ببعضها وممكن تفتحها وتقفلها بسهولة زي الملقاط! بعد الشوربة والمقبلات بوقت مش قليل نزل الأطباق الرئيسية والنودلز بالخضروات (19 جنيه) واللي كانت كميتها معقولة. طلبنا من المنيو الصيني باربكيو اللحم البقري بالبصل الأخضر والخضار (44 جنيه) وده بـ يُقدم على طبق معدني ساخن وبـ ينزل على الترابيزة واللحم لسه بـ يعمل صوت "طشطشة" داخل الطبق؛ نكهة خطيرة ومنظر شهي جدًا، تأخذ من اللحم بالصوص وتحط على النودلز المقلية وعيش أجمل إحساس. من المنيو التايلاندي رشح لنا الجرسون طبق الجمبري المقلي مع صوص جوز الهند (65 جنيه). إحنا كمان كنا رافضين مجرد الفكرة لأننا كمان مش بـ نحب طعم جوز الهند، لكن الجرسون قال لنا أن الموضوع مختلف وطعم الصوص مش زي ما إحنا متخيلين وجربوا وعلى ضمانة الشيف التايلاندي وقد كان. وحدات الجمبري بالحجم الكبير نصف مقلية ومقرمشة مغموسة في صوص أبيض من جوز الهند الحلو والكريمة والتوابل الخاصة والبصل الأخضر كانت أروع ما يكون، طعم مش ممكن يتنسي، تقريبًا أفضل طريقة طهي جمبري جربناها في حياتنا، وكان الشكر واجب للشيف التايلاندي، والجرسون اللي رشح لنا الطبق، وقال لنا أن نفس الصوص بـ يتعمل به البيف ومكعبات البط وشرائح الدجاج بأسعار من 50 لـ 66 جنيه. حلويات زي الموز والأناناس المقلي بالعسل أو بجوز الهند بأسعار من 16 لـ 19 جنيه، لذيذة وجديدة، وبلاش تستغرب المكونات أو طريقة التحضير لأن الناس دي عارفين هم بـ يعملوا إيه، وأهم حاجة أن المكونات فريش وفي منتهى النظافة. ما كانش فيه فرصة نجرب المطبخ الهندي النهاردة، وهو بالمناسبة جديد على المكان، لكن أكيد هـ نجربه في يوم من الأيام، ونقدر نقول لكم روحوا على «دراجون هاوس» بقلب جامد، الأسعار كويسة والقعدة أصلية وغير تقليدية والخدمة ودية وممتازة، يمكن اللي ضايقنا شوية الدخان اللي جاي من المطبخ وملأ المكان وغيم الدنيا، والصوت العالي لبعض زوار المطعم الأجانب، غير كده كل حاجة جميلة، وأكيد لنا زيارات ثانية.

...

المطعم الصيني جوي لاك: مطعم متواضع في المعادي
اصدرت في: 16/02/2012

«المطعم الصيني جوي لاك – Joy Luck Chinese restaurant» موجود في شارع 233 في المعادي وبـ يقدم أطباق لذيذة جدًا بأسعار معقولة. لكن المكان سهل قوي أنك ما تأخذش بالك منه وأنت ماشي في شارع 233، أمام المحل فيه يافطة بسيطة جدًا مكتوب عليها "Chinese Food Take Out". المكان يا دوب مافيهوش غير أربع ترابيزات، واحدة منهم أغلب الأوقات قاعدة عليها الست اللي بـ تأخذ الطلب بتاعك، وماسكة الحساب والتيك آواي. وفيه كمان هناك ثلاجة محطوطة لوحدها مخزن فيها كل الخضروات والفواكة اللي في المطعم. ابدأ وجبتك بشوربة الهوت أند ساور الحارة (5 جنيه)، ودي ممكن تبقى أعلى قيمة لأكل صيني بالفلوس دي في كايرو. الشوربة نزلت بـ تبقلل من السخونة وفيها الخليط المظبوط من الفلفل والخل علشان يخليها حارة ومنعشة. وغير كده كمان، كمية الأكل كبيرة لدرجة أنها ممكن تكفي فردين. ممكن كمان تحب تجرب طلب ست قطع من لفائف السبرينج رولز المحمرة (12 جنيه)، لكن حاول تتجنب صوص البسودو كاتشب اللي بـ ينزل معاه. الزلابية المعمولة على البخار (15 قطعة بـ 12 جنيه و25 بـ 20 جنيه) ممكن تبقى طبق مقبلات هائل مع صوص الصويا بالثوم المفروم. بما أنهم أغلب الأوقات بـ ينزلوا الأكل كله مع بعضه في نفس الوقت، فممكن تطلب أطباق المقبلات تنزل قبل الأطباق الرئيسية لو عاوز. المنيو الشامل بـ يقدم أطباق من أول الأرز المحمر العادي (7 و10 جنيه)، للأطباق المميزة زي الكابوريا المحمرة (48 جنيه). إحنا بـ ننصحك أنك تلتزم بالأطباق الرئيسية الأقل مغامرة. واطلبوا كذا طبق رئيسي مختلف للترابيزة كلها، لأن أصلاً كل طبق بـ يبقى فيه كمية من الأكل ما يقدرش شخص واحد يخلص عليها لوحده. طبق فراخ السويت أند ساور (30 جنيه) مضروبة ومغرقة بالصوص فيه حلاوة الأناناس لكن مش مغطي على طعمه. اختيار ثاني قوي جدًا هو النودلز بالبيق والتشيلي (15 جنيه) اللي فيها كمان كرنب طازج. وكمان الباذنجان المقلي بالبيف (20 جنيه) اختيار صحي من الفواكة واللحم. أما بالنسبة للنباتيين هـ ينبسطوا لما يعرفوا أن طبق التوفو المقلي بصوص التشيلي النصف حار (16جنيه) طبق ممتاز. رغم أن المطعم ده محتاج جدًا يجدد الديكور الداخلي، لكن مع ذلك بـ يعرفوا يقدموا شوية أطباق مقبلات لذيذة جدًا وفريدة. وما تنساش تطلب منهم تشوب ستيكس وتستمتع.

...

مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح