برجر مطاعم in المعادي Cairo, Egypt

مطاعم

ذا باك يارد: برجر متوسط الجودة مستخبي في المعادي
اصدرت في: 04/02/2015

شارع 9، وما أدراك ما شارع 9، الكافيهات والمطاعم فيه بـ يتغيروا بسرعة أكثر من قدرتنا على المتابعة، وصعب حتى تتوقع مين فيهم يقدر يستمر وينجح، رواد الشارع بـ يكونوا من مراحل عمرية مختلفة، ووقت ما مجموعة من الأماكن بـ تحاول تخدم كل الأعمار، مجموعة ثانية بـ يتفوقوا في التعامل مع فئات معينة. لما تدخل من ممر صغير جنب وك أند واك، هـ تفهم سبب تسميته "ذا باك يارد -The Backyard"، مطعم مفتوح على طراز ضاحية بروكلين بجرافيتي مرسوم على الحوائط، نجيل صناعي وزبائن من الشباب الصغير، صوت الموسيقى كان عالي جدًا ومش مناسب لوجبة هادئة. قدرنا نلاقي مكان وسط الترابيزات والكراسي الخشبية اللي بـ تشبه أثاث الجنينة، ولما الجرسون شافنا، بدأ يوزع المنيوهات على الترابيزة. المنيو عبارة عن مجموعة اختيارات من المقبلات، البرجر والبطاطس، ومن هنا طلبنا برجر ذا بيكون (51.50 جنيه) وجواكامولي (47 جنيه) مع كيرلي فرايز (18 جنيه) وتشيلي فرايز كون كارني (23 جنيه) مع برجرهم المميز باك يارد برجر (59 جنيه)، طلبنا كمان من المقبلات كاممبرت بايتس Camembert Bites (20 جنيه). باك يارد بـ يقدم كمان أكلات للإفطار وعنده قسم للحلويات في مبنى منفصل الناحية الثانية من المطبخ، وفيه هـ تلاقي مجموعة لذيذة من الكيكات، الماكرونز وحلويات ثانية. أول حاجة وصلت كانت الكاممبرت بايتس بقشرة مقرمشة لذيذة مع ثومية، بعد وقت بسيط وصلت البطاطس مع البرجر، رغم أنهم ما سألوش عن طريقة طهي البرجر المطلوبة، لكن البيكون المكون من 160 جرام لحم وعليه خس وطماطم طازجة مع بيف بيكون لذيذ جدًا، مطبوخ بدرجة متوسطة مناسبة. بالنسبة للجواكامولي فكان مش مِستوي كويس، لدرجة أن قطعة اللحم كانت لونها وردي بدرجة مبالغ فيها، الجواكامولي اللذيذ وصوص الناتشو كانوا مميزين والطعم بشكل عام كان أكيد جامد. باك يارد برجر، والمكوّن من كمية كبيرة من اللحم، بيكون ومشروم في دوناتس –أيوه إحنا قلنا دوناتس– كان روعة بس المشكلة كانت صعوبة التحكم فيه علشان الدونات مش كبيرة زي العيش، الأكل الحادق لما يختلط مع طعم الدونات المسكّر ممكن يكون غريب عند ناس، لكن النتيجة النهائية كانت مُرضية. التشيلي فرايز رغم أن كميتها مش كبيرة، لكن كانت غرقانة جبن وطعمها لذيذ، يمكن مش مشطشطة على عكس اسمها، لكن عمومًا هي أجمد من أغلب التشيلي فرايز اللي جربناها في القاهرة، الكيرلي فرايز رغم أنها حاجة تقليدية، لكن طعمها يظهر عادي بعد ما جربنا التشيلي فرايز. بشكل عام الأكل هناك لذيذ، وصحيح صوت الموسيقى العالي والشباب الصغير ممكن يناسب بعض الناس، لكن مش لكل الناس. رغم أن باك يارد مش بـ يقدم كثير من ناحية الابتكار، لكن التجربة عمومًا مع جمهور المعادي الكبير من الشباب هـ تستمر هناك لفترة.

...

كونترى برجر: فاست فوود فى الرخيص داخل المعادى
اصدرت في: 10/12/2014

الحياة فى القاهرة بـ تغلى يوم بعد يوم، ومطاعم القاهرة أكيد مش استثناء. فى وقت معين من الشهر، بـ تلاقى نفسك فجأة محفظتك شبه فاضية وحسابك فى البنك بعافية شويتين. عمومًا، وأنت منتظر يوم قبض المرتب بفارغ الصبر، الأكل بـ يتحول لطريقة لإشباع معدتك أكثر منه طريقة للاستمتاع بلذّة الأكل. الفاست فوود كان هو الحل فى حالتنا، لكن حتى ماكدونالدز وأمثاله أسعارهم مش رخيصة للدرجة، يمكن الفكرة أنه بـ يشبع. آخر جولة وصلت بنا لتقاطع شارع النصر مع شارع اللاسلكى فى المعادى، وهناك قابلنا "كونترى برجر – Country Burger". المطعم كمكان مش مشجع على الدخول؛ الصوت عالى جدًا، وبصراحة المكان مش نظيف للدرجة. المكان ملتزم بالشكل التقليدى لمطاعم الفاست فوود بكاونتر للطلبات، وهنا دخلنا من الأبواب الزجاجية والقلق بـ يأكلنا. بعد نظرة على المنيو، الأسعار الرخيصة كانت مفاجأة بالنسبة لنا. كومبو برجر قطعة واحدة سعره 19.99 جنيه، أما التريبل سعره 36.99 جنيه، طلبنا كونترى بيف تشيز لوفرز (30 جنيه) وكنترى بيف مشروم (28 جنيه). زى أغلب مطاعم الفاست فوود، وقت التحضير كان قليل. التشيز لوفرز كان عبارة عن جبن إمينتال، موتزاريلا وجبن شيدر مع قطع فلفل حلو والإضافات التقليدية من خس، وطماطم وبصل. المشروم برجر بـ يستخدم نفس المكونات، ما عدا الإمينتال والموتزاريلا، بالإضافة لصوص مشروم بنى واضح أنه معمول من مشروم معلب. بالنسبة للطعم، الأكل كان مناسب لسعره. اللحم نفسه عادى جدًا، أما الحاجات البسيطة زى العيش القديم والمشروم المعلب فقدروا يقللوا من شكل البرجر الجميل على الورق بس. بلاش تضع آمال على البطاطس المحمرة اللى مع الكومبو؛ مزيتة بشكل غير آدمى. كونترى برجر مش من المطاعم اللى بـ تلعب على حاسة التذوق والاستمتاع بالأكل، وممكن تعتبره اختيار لما تحتاج أكلة سريعة، وهم بصراحة شاطرين فى الموضوع ده، لكن طبعًا صعب نقارنه مع أى مطعم ثانى للبرجر.

...

الليدو: أجمل وأرخص برجر بفرع جديد في المعادي
اصدرت في: 09/12/2014

أغلب مطاعم البرجر في القاهرة بـ تتنافس في الطعم والجودة والأسعار والخدمات الأخرى زي المكان وأنواع الأكل بس الحقيقى أن فرع "الليدو – El- Lido" اللي لسه فاتح في المعادي قدر يثبت أن الحاجات دي مش مهمة خالص طالما أن البرجر بتاعك طعمه حلو وسعره معقول. المكان مش كبير، فتح مكان مكتبة ديوان اللي كانت في شارع 9 وأمام Buffalo Burger اللي يعتبر منافس قوي له، خاصة أنه متنوع أكثر وأكبر، بس الليدو صاحب مبدأ "نحن نختلف عن الآخرون" تمامًا. المطعم عبارة عن مطبخ وترابيزة جنب الكاشير وأشبه بالبار وواحدة زيها بس مطلة على الشارع. لما بـ تدخل الليدو، بـ تلاقي المنيو معلق أمامك، وما تستغربش خالص أن المنيو كله عبارة عن: ساندويش برجر بـ 10 جنيه، ساندويتش سوسيس بـ 10 جنيه، باكيت بطاطس بـ 7 جنيه، مخلل بـ 1.5 جنيه، واختيارك من المشروبات الغازية بـ 5 جنيه، أو جرانيتا على حسب موسم الفاكهة بـ 7 جنيه. وتم بحمد الله، مافيش أي حاجة ثانية ولا حتى أنواع مختلفة من البرجر، والغريب بقى أن ده اللي بـ يميز الليدو، لأنهم معروفين بأن البرجر بتاعهم من أشهى أنواع البرجر في القاهرة. الحقيقة أننا طلبنا كل حاجة في المنيو إلا المخلل، بس مع أول قضمة في البرجر اللي زودنا عليه مسطردة بس، ذوبنا في التتبيلة الغنية والحيوية للبرجر، وطعم المسطردة عليه مع التوابل كان منعش ومبهج، كان أكثر برجر متبل ببراعة أكلناه في حياتنا، ومش عليه لا جبنة ولا خس ولا مايونيز، أنت بـ تختار ما بين ثلاثة صوص، كاتشب ومسطردة أو طحينة، ولأننا ذوقنا أنواع برجر كثيرة سواء من مطاعم محترفة أو غير محترفة، إلا أن البرجر ده فعلًا يستاهل أنه يبقى المحل قائم عليه، لأنها أكيد مش هـ تبقى المرة الأخيرة اللي نروح له فيها بعد ما حبينا ساندويتش البرجر بتاعه من أول قضمة، كمان البرجر والسوسيس مشويين على الجريل بدون أي دهون ودي ميزة صحية جدًا، برجر وهمي بـ 10 جنيه بس، لكن للأسف حجم الساندويتش كان قد كف الأيد، يعني مستحيل هـ يشبعك لو أنت جعان، علشان كده كنا متشوقين أننا نذوق ساندويتش السوسيس اللي كان شكله مغري جدًا، بس برضه للأسف تأتي الرياح بما لا تشتهي السفن، السوسيس كان ناقص تسوية وبـ يمط شوية، برغم التتبيلة الرائعة ما قدرناش نكمل الساندويتش اللي برضه كان قد حجم كف الأيد (نصف حجم قطعة سوسيس عادية). أما المزاج الحقيقي كان في باكيت البطاطس، بطاطس شيبسى مقطعة ما بين سميك ورفيع، الحقيقة أننا من عشاق البطاطس بكل أنواعها، فما بالكم وهي شيبسي، نوع البطاطس مناسب جدًا للبرجر خاصة أنها متنوعة قطعة طرية لسمكها وقطعة مقرمشة، وده اللي خلانا نستمتع بكل واحدة على حدة. طبعًا، مع الأكل ده لازم نشرب حاجة، ولما سألنا عن الجرانيتا الجرسون قال لنا أن كان فيه جرانيتا يوسفى وخلصت، وفيه حاليًا جرانيتا سوبيا، قلنا نجربها، والحقيقة أنها كانت ممتعة جدًا، بالذات مع جو الشتاء لما تشرب حاجة مثلجة بـ تنتعش وتزيد نشاط. للأسف خدمة التوصيل لسه ما اشتغلتش عندهم، بس هما وعدونا أنها هـ تشتغل في خلال أسبوعين، لأنهم لسه فاتحين من شهرين بس. نرجع ونقول استمتعوا بوقتكم في الأماكن اللي بـ تحبوها مع الأشخاص اللي بـ تحبوهم واحرصوا أنكم تبينوا لهم ده بالأفعال مش بالأقوال فقط. دمتم سعداء!

...

بافالو برجر: برجر لذيذ مع إطلالة رائعة فى المعادى
اصدرت في: 05/11/2014

تفتكر إيه أحسن من أكلة حلوة؟ أكيد أكلة حلوة وسط مكان رائع! عمرنا ما نقدر نقول لأ للبرجر، ولما كمان الموضوع يكون فيه برجر صحى، يبقى لازم نجرب. وسط مجمع مطاعم بلاتفورم المطل على نيل المعادى، "بافالو برجر – Buffalo Burger" بـ يقدم اختيارين للقعدة، إما فى الخارج أو أماكن محدودة داخل المطعم، الفكرة هنا، مين ممكن يترك منظر رائع للنيل ويقعد داخل المكان، مش كده؟ مع وصولنا، نقدر نقول أن المكان كان مليان على آخره، ومن هنا عرفنا إيه منتظرنا؛ الجرسون طلب مننا نجلس فى الداخل لحين توفر ترابيزة فى الخارج. بعد ما جلسنا، قدموا لنا منيو بافالو برجر ومعاها منيو FIG، المطعم الشقيق لبافالو. طبعًا كنا مقررين من الأول نستمتع بساندويتشات البرجر اللذيذة. البرجر هناك له ثلاثة أحجام: 150 جم، 200 جم و250 جم. برجر فراخ وبرجر أخف شوية موجودين بكل أنواع الإضافات. من وسط اللحوم، أكثر حاجة شدتنا كانت هاواى وايكيكى. مكوناته كانت جبن سويسرى، وصوص بافالو وحلقات الأناناس (28 جنيه – 37 جنيه على حسب الحجم). ساندويتش أنيمال تشيكن برجر (28 جنيه) كمان كان شكله لذيذ، عبارة عن صدور فراخ مشوية عليها جبن، وحلقات بصل وأنواع من الصوص. اضف من 10: 12 جنيه وحول ساندويتشك إلى كومبو حجم وسط أو كبير. طلبنا شوية حاجات أخف شوية، سعراتها الحرارية كانت مكتوبة فى المنيو، أصل لازم نريح ضميرنا برضه، ولا إيه؟ 200 جم من برجر بابى بوومرز (32 جنيه) كان أول حاجة تشد انتباهنا، ومعاه سكينى تشيكن برجر (28 جنيه). خلاص طلبنا اختيارات صحية؟ يبقى نطلبها كومبو ونستمتع بالبطاطس المقرمشة. بعد أقل من 20 دقيقة وصل أكلنا وكان سخن، فى انتظار رحلة افتراسه. ساندويتش بابى بومرز كان لذيذ، والعيش الطازج قدر يحافظ على قرص اللحم المشوى، وعليه مشروم ومايونيز لايت، ساندويتش سكينى تشيكن، المكون من صدور فراخ مشوية عليها جبن شيدر، كان عادى وينقصه التجانس بين النكهات وكمان كان جاف شوية. البطاطس فى الحقيقة كانت مفاجأة؛ كوكتيل ممتاز من البطاطس المحمرة، الشيبسى وحلقات البصل، بدون أى تزييت أو عجينة، الفكرة أن الكمية كانت قليلة، وكان نفسنا فى شوية زيادة. بشكل عام، بافالو برجر مكان ممتاز، بـ يقدم أكل لذيذ يناسب كل الأذواق مع منظر خلاب. المكان كان مزدحم جدًا وقت زيارتنا، لدرجة أننا فكرنا أن الأحسن نطلب الأكل من على كنبة بيتنا ونبعد عن الدوشة والزحام.

...

برجر فيول: أحلى مكان ممكن تأكل فيه برجر في المعادي
اصدرت في: 07/09/2014

دائمًا وأبدًا لما بـ يبقى فيه أماكن كثيرة بـ تقدم نفس المنتج في منطقة واحدة المنافسة بـ تبقى عالية، و المطعم بـ يحتاج أنه يقدم الأفضل، وفي حالتنا هنا في القاهرة، لازم تتميز. بل تبهر الزبون.. وهو ده اللي حصل بالضبط في "برجر فيول - Burger Fuel". المكان جميل وهادئ، هـ تلاقي مكان تقعد فيه على الشارع لو تحب أو جوه المطعم، المطبخ مفتوح على الطريقة الأمريكية، فبـ تبقى تقريبًا معاهم في المطبخ، الديكور شكله عصري وظريف. أول ما بصينا في المنيو، بسطنا جدًا تنوع أنواع البرجر سواء في قسم اللحوم أو قسم الدجاج، خاصة أن الدجاج بـ يبقى مشوي مش مقلي، كمان عنده برجر نباتي مطبوخ ومعتمد من جمعية النباتيين. ما قدرناش نقاوم أننا نشوف برجر بالمانجو وما نجربوش، طلبنا برجر بي.أف. مونستر (49 جنيه) اللي كان تحفة طبعًا، طعم البرجر نفسه مع صوص الأفوكادو والمانجو وشرائح البيكون والطماطم والخس.. كأنك أخذت قضمة من حتة نعيم أو أكلت سحابة صافية فيها مانجو وأفوكادو وبرجر، ومش حاسس بأي تناقض ما بينهم، كان ممكن نزود بنجر بس إحنا مش بـ نحبه فما طلبناهوش. أما البساطة والحلاوة كانت في تشوك رويال (28 جنيه) اللي عبارة عن برجر صدور فراخ مشوية وعليها بقى إيه.. أناناس مشوي وخس وطماطم.. مهما نوصف في الطعم الطازة الجميل مش هـ نعرف نعطيها حقها، وده طبعًا لمحبي الحلو والحادق مع بعض. لو أنت من هواة التجارب يبقى لازم تجرب موتو بايتس (29 جنيه) ودي عبارة عن ثماني قطع من: مزيج قرع العسل والجزر والحمص والزنجبيل مع صوص ريلش بالزبادي (طماطم بالزبادي).. دي بقى حاجة كده عاملة زي.. هي مالهاش زي الصراحة.. هي مزيج من كذا حاجة حلوة مع بعض مقلية تحطها في الصوص بقيت أحلى وأحلى.. أكلناها.. تلاقي كذا طعم بـ يخانق مع اللي جنبه علشان يبان وعملوا بوووم.. انفجار خفيف في فمك، وهـ تلاقي نفسك بـ تقول يااااام .. يا ولد أعطني كمان زيادة.. هي دي موتو بايتس. لكن الأجمل منها سباد فرايز (14 جنيه)، دي مش بس بطاطس محمرة ولا ودجز.. لا يا كبير.. دي أجمل بطاطس محمرة ممكن تأكلها في حياتك، حيث القرمشة من بره جدًا والطريان من جوه جدًا جدًا، علشان هي كبيرة وعريضة، يعني صباع البطاطس أتخن من صباع أيدك بحاجة بسيطة. آخر حاجة جربناها وكانت تحفة الميلك شيك اللي ما كانش لبن واستهبلوه فبقى ميلك شيك، لا ده ميلك شيك أبًا عن جد عن جدود الجدود. روحوا جربوه يا جماعة مش هـ تندموا وابقوا اطلبوا ساندويتش واحد كبير، علشان بـ يشبع جدًا وما تطلبوش حاجة ثانية جنبه إلا البطاطس لو أنتم مش جعانين قوي.

...

برجر جوينت: فرع المعادى الكلاسيكي اختلف شوية عن زمان
اصدرت في: 05/08/2014

آخر ثلاث أو أربع سنين قدروا يطّلعوا ناس كثير خارج الساحة. قدروا كمان يخرجوا مشروعات ووصّلوا ناس للإفلاس. وسط كل ده، مطاعم كثيرة قدرت تفلت، ومطاعم كبرت وازدهرت، أما إحنا فاهتمامنا كله موجه ناحية معرفة تأثير الكلام ده على جودة الأكل! "برجر جوينت - Burger Joint" المعروف بالفعل لأهل المعادى، كان لوقت طويل هو الوجهة الأساسية لكثير من الشباب الصغيرين لا يمتلكوا اختيارات واضحة للسهر. نقدر نقول أن سبب استمرار برجر جوينت طوال الوقت ده كان خلطه بين الموقع الممتاز وبساطة الأكل. المكان نفسه ما شهدش تغييرات كثيرة، أو مافيش تغييرات أساسًا. لسه محتفظ بمكان صغير مكشوف بكراسى خشب صعب تتحمل الجلوس عليها فى الصيف، ولطيفة فى الشتاء. طلبنا وورمان برجر (42.95 جنيه) ومعاه قطعة برجر إضافية (11 جنيه). طلبنا كمان ويدجز (10.50 جنيه) وحلقات بصل (13 جنيه). الويدجز كانت ساخنة، سميكة ومملحة، وطبعًا زى ما كل زبائنهم عارفين أنك تقدر تطلبها بدلاً من البطاطس فى وجبة الكومبو بدون أى تكلفة إضافية. حلقات البصل، المغطاة بعجينة مقلية سميكة، كانت لذيذة، لكن للأسف ينقصها شوية قرمشة. أما بالنسبة للورمان برجر، اللى عليه طماطم، خس ومايونيز، بالإضافة لبيف بيكون، مشروم، بصل مسكّر وصلصة حلوة، كان لذيذ فعلاً خصوصًا أنه عصارى بشكل هائل. رغم أن العيش والمكونات كانت طازجة، للأسف أغلب العصارة كانت ناتجة عن الإضافات مش من اللحم نفسه، اللى كان مطهى بزيادة ومفحم شوية. لاحظنا كمان أن اللحم مختلف عن زمان، صحيح برجر جوينت عمره ما كان متخصص فى برجر مطهى medium-well، لكن اللحم المطهى بزيادة وطعمه عديم النكهة كان فعلاً محبط كونه من أحد مشاهير المعادى. أكيد إحنا فى منتهى السعادة أن برجر جوينت مازال متواجد علشان يشبع حبنا للبرجر، لكن من المؤسف أننا نشوف مستوى أهم عنصر فى الموضوع بـ يتراجع –ألا وهو قطعة البرجر نفسها- خصوصًا مع ظهور منافس جديد فى كل شبر. هل يقدر الموقع وارتباط مجتمع المعادى به يساعدوا برجر جوينت على الاستمرار؟ سؤال يطرح نفسه.

...

برجركيو: برجر رائع جديد فى المعادى
اصدرت في: 01/07/2014

أكيد المنافسة فى سوق البرجر شديدة جدًا. ومع عدم وجود أى نقص فى عدد مطاعم القاهرة على اختلاف أنواعها وتدرج مستواها، الجدد على الساحة قصادهم حل من اثنين: تقديم خلطة سحرية جديدة على السوق، أو السقوط فى بئر النسيان. المعادى دائمًا وأبدًا بـ ترحب بالمطاعم الجديدة، "برجركيو - Burgerque" على شارع 6 الهادئ، هو أحدث إضافة لترسانة من اختيارات البرجر الجامد والمميز عن الموجود فى الأماكن القريبة من قلب البلد، وتحديدًا فى الزمالك. المطعم مكون من منطقة مقفولة للأكل بديكورات شيك مع حوائط خشبية خفيفة، ومطبخ مفتوح ومعزول عن مكان الأكل بزجاج، مع منطقة قعدة مكشوفة. أول ما توصل هـ يرحب بك الجرسونات بكل ود، بعدها يوصلوك لمكان مناسب ويسلموك المنيو. لو بـ تفكر تطلب أكلة خفيفة، يبقى برجركيو مش المكان المناسب. المكان أقرب لمركز للأكل الدسم، وإحنا بصراحة نعشق حاجة اسمها أكل دسم. مع العيش بجودته الممتازة والإضافات غير التقليدية ما بين التوت البرى وجبن البرىbrie ، ووصولاً للأفوكادو بالبيض والبيكون يكملهم أصناف جانبية من البافالو وينجز والبطاطس بالجبن، بجانب السلاطات، اللى تشمل سلاطة برجر مثيرة وسلاطة سلامون بجبن الريكوتا. تمام، كده يبقى خلصنا من تجهيز الأجواء الجامدة، ويتبقى ندخل على المنيو، من بين أصناف المقبلات، طلبنا بافالو وينجز (27 جنيه)، تشيز فرايز (19 جنيه) و"ذا وركس فرايز - The Works Fries" (33 جنيه). كل واحد منهم كانت كميته مناسبة، البافالو وينجز قُدمت فى طبق أبيض مستطيل، معاه صوص بلو تشيز وأعواد كرفس. صحيح طعم الفراخ كان لذيذ وطازج لحد كبير، صوص البافالو كان محتاج يتشطشط شوية زيادة، غير كده الموضوع كان لخبطة وممتع، الجانب الكويس من اللخبطة طبعًا. التشيز فرايز كانت طازجة وسميكة، قُدمت فى كأس معدنى كبير، وكانت غرقانة فى صوص شيدر لذيذ. مافيش كلام أن الفرايز تشيز عجبتنا ع الآخر، بس لازم تأخذ بالك من حاجة مهمة: هى برضه ثقيلة شويتين. ذا وركس فرايز، المقطّعة على شكل حلقات، كان عليها كريمة قشدة وبيف بيكون مقلى لذيذ، وفوق كل ده كمية إضافية من القشدة والكاتشب. النوعين المختلفين من البطاطس نجحوا فى إبهارنا كون البطاطس نفسها معمولة بحرفية ممتازة. من البرجر المتنوع طلبنا حاجة تقليدية، BGQ برجر (45 جنيه)، وحاجة مليانة إضافات علشان نجرّب الابتكار، "ذا بريت The Brit" (64 جنيه). الشيدر كان كثير جدًا فى BGQ برجر، بزيادة يعنى. الساندويتش احتوى على الإضافات المعتادة من الخس، والطماطم، والمخلل، واحتفظ بعصارة البرجر، اللى كانت هائلة مع الشيدر، وقدروا يثبتوا أن أحيانًا البساطة فى التنفيذ هى أحسن طريقة. ساندويتش ذا بريت على الناحية الثانية، اللى كان عليه خس، وطماطم، ومخلل، وأفوكادو، وبيض وبيف بيكون، طعمه كان روعة، بدون أى مبالغة. صحيح البيض والبيكون بـ يضيفوا كثير لأى برجر، الطماطم كانت شوية زيادة على الفاضى وعملت نداوة كثيرة فى الساندويتش. أضف كمان على كلامنا أن الأفوكادو ما كانش مطبوخ أو ناضج، وكان عليه بهارات، وده كان كثير على نكهة الأكل. لما نتكلم على البرجر، أغلب الأكيلة لهم أماكنهم المفضلة و هـ يفضل ولائهم لها. على العموم، برجركيو يستحق تغير عاداتك وتجرّبه.

...

برجر هاوس: برجر للتوصيل فقط فى المعادى
اصدرت في: 07/05/2014

لما تفكر فى كم مطاعم القاهرة اللى بـ تقدم ساندويتشات الهامبرجر بشكلها المعروف، وكمان وفرة المطاعم الجديدة على السوق، لازم الواحد فينا يسأل إزاى يختار برجر جامد؟ فى حالتنا، أنت مش محتاج تقرر. هو اللى يوصلك بنفسه. "برجر هاوس – Burger House" هو نتاج محاولات كثيرة محترفة فى رحلة تكوين مطبخ قائم على نظام التوصيل لكل أهل المعادى، فيه ناس ممكن تفتكر طاقم العمل والشيف من شغلهم قبل كده فى "ماستر برجر – Master Burger" و"لوسيلز - Lucille's"، ولو افتكرت أى اسم منهم، يبقى أنت أكيد عارف أنك فى انتظار برجر عظيم. صحيح إحنا دائمًا بـ نشجعكم على اختيار الأكل وطريقة الحياة بشكل صحى، خلينا نتكلم بصراحة شوية؛ مين فينا نفسه مش رايحة على أكل كثير وطعمه حلو؟ من وجهة نظرنا أن البرجر هو رقم واحد. علشان نجرب طعم كل المقبلات، طلبنا ستارتر بلاتر (115 جنيه) عبارة عن شرائح فراخ، وكاساديا بالجبنة، وحلقات بصل، ومشروم مقلى، وأصابع موتزاريلا وبطاطس بقشرها، كل ده بـ يُقدم فى علب منفصلة مع صوص باربيكيو وزبادى بالثوم. من بين الستة اختيارات –اللى يعتبروا وجبة كاملة– أكثر حاجة عجبتنا كانت شرائح الفراخ وقشر البطاطس. الطبيعى فى أى مكان أن الفراخ بـ يكون التزييت فيها بـ يؤثر على القرمشة، لكن هنا الوضع كان مختلف. طرية من جوه، ومقرمشة من بره، وحجمها مناسب جدًا، يعنى من الآخر لازم أى عاشق للفراخ يجربها. قشر البطاطس –المغطى بالجبنة، وقطع بيكون وشوية بصل أخضر– طعمها كان لذيذ مع صوص الزبادى بالثوم. من قسم البرجر، طلبنا باربيكيو بيكون برجر (43 جنيه). وصل البرجر فى علبة من الكرتون ومعاه بطاطس، أما الساندويتش كان عبارة عن 200 جرام برجر مع خس، وطماطم، وبصل ملفوف وكل حاجة فيهم لوحدها. طيب إيه يخلينا نقول على برجر أنه جامد؟ إحنا نقول لكم، فى البداية، البرجر وده طبعًا المكون الأساسى، لازم يكون عصارى، يعنى لازم يبلل يديك، لو مش كده يبقى جاف. ثانى حاجة، العيش لازم يتناسب مع حجم اللحم، عيش أكثر من اللازم يبقى أكيد أنت مخبئ مكونات درجة ثانية. إضافات ثانية غير الخس والطماطم والبصل لازم توفرها؛ يعنى مشروم، وصلصة، وحلقات بصل وكلام من ده. استخدم جبنة بجد –ابعد عن الجبنة البلاستيك- هـ تتكشف على طول! الباربكيو بيكون برجر كان قصة ثانية. اللحم كان عصارى، العيش من تحت كان غرقان فى نكهة البرجر، أما البيكون اللذيذ وحلقات البصل قدروا يتحدوا مع الجبنة لعمل طعم مختلف لطيف مع طعم اللحم؛ كل ده قدم برجر طعمه لذيذ بدرجة كبيرة. كمان، البطاطس كانت كويسة ومش ثقيلة. نفهم من كده أن المرة الجاية لما نفسك تروح على أكلة برجر ومالكش مزاج تضرب مشوار، كل اللى عليك ترفع تليفونك وسيب الباقى عليهم.

...

لورد أوف ذا وينجز: بافلو وينجز وبرجر في بلات فورم المعادي
اصدرت في: 03/03/2014

بعد حملة دعاية كبيرة ومشوقة شوفناها في الشوارع وعلى مواقع التواصل الاجتماعي، أخيرًا تم افتتاح أول فرع في مصر لسلسلة مطاعم «لورد أوف ذا وينجز – Lord Of The Wings» في ساحة طعام وألعاب "ذا بلات فورم - The Platform" أو الرصيف النهري الجديد اللي فتح أبوابه للجمهور من شهور قليلة فاتت على كورنيش المعادي. واللي محتاج موضوع طويل نتكلم فيه بالتفصيل عن روعته والكافيهات والمطاعم الموجودة فيه. المكان في الصف المقابل للمحكمة الدستورية العليا على كورنيش المعادي، وبـ ننصحك لو هـ تروح بعربية أنك توصل لبلات فورم وتأخذ أول ملف بعده كأنك راجع ثاني وتركن على الصف المقابل في ساحة الانتظار المخصصة لرواد المكان، لتفادي الزحمة الرهيبة على الصف اللي ناحية النيل. بمجرد ما تدخل من البوابة الرئيسية لبلات فورم هـ تنزل درجتين سلالم علشان تلاقي «لورد أوف ذا وينجز» على يمينك. في مكان داخلي مش كبير للجلوس، إنما القعدة الأساسية كلها في المساحة الخارجية المفتوحة بـ تبص على النيل مباشرة، بكراسي وكنبات أشبه بمطاعم الأمريكان داينر لأن هي دي طبيعة المطبخ الأمريكاني جدًا هنا. الديكور مبهج والمزيكا حلوة وسهل تتابع التليفزيون الموجود في كل مكان في البلات فورم كله وبأحجام مختلفة، المشكلة الوحيدة هنا أنك ممكن ما تستحملش البرد في الشتاء رغم الدفايات المتوزعة في كل حتة، لكن أنت هنا على النيل؛ مش هزار، أنت محتاج بطانية، أو مشروبات ساخنة طوال الوقت. المطعم أصله لبناني، بمعنى أن لبنان هي بلد المنشأ مش أنه بـ يقدم أكل لبناني، فتح فروع في دول كثير عربية وأجنبية وحقق نجاح وحصل عليه إقبال جماهيري، وده علشان تخصصه في حاجة مش منتشرة قوي في المطاعم العالمية وهي أجنحة الدجاج أو الـ Buffalo Wings بالصوصات المختلفة والتتبيلات العجيبة، ده بجانب البرجر اللي هو الأكلة الأساسية للمكان وبعض أطباق الستيك وساندويتشات الدجاج والسلاطات والمقبلات المكسيكية. المنيو ظريف ومبتكر أقرب لـ Check List بـ تعلم فيها على الأصناف اللي أنت عاوزها، فيه نوعين من الأجنحة، المخلية واللي بالعظام، فيه 3 أحجام لكل طبق من الأجنحة، أصغرهم بـ يبقى فيه 6 قطع والوسط 12 قطعة والكبير 24 قطعة، بأسعار بـ تتراوح ما بين 48 جنيه لحد 112 جنيه، والمذاقات هنا مرتبطة إلى حد كبير بمدى حرارة الأجنحة ونسبة الشطة والصوصات الحارة فيها، لكن فيه مذاقات مبتكرة زي الثومية مع جبن البارميجان والخلطة الكورية بالسمسم ودول اللي إحنا جربناهم لأنهم أكثر حاجة مش تقليدية بين الصوصات، والمذاق كان ممتاز في الثومية والجبن السايحة اللي بـ تغطي الأجنحة، والخلطة الكورية بالطماطم والسمسم التوابل كان ملحها زيادة لكن كان طعمها جديد علينا، ومش عارفين إزاي قدروا يعملوا الأجنحة فيليه كده وتبقى مليانة لحم بالمنظر ده! هي دي أجنحة فعلًا؟ الباقي كلها صوصات حارة بدرجات مختلفة، أطباق الوينجز بـ تتقدم مع ساور كريم وشرائح الخضار الفريش. جربنا البرجر 3x3 وهو ساندويتش عملاق فيه 3 قطع برجر مع صنف جانبي من اختيارنا (رقائق ناتشوز مع صلصة مكسيكي) وسلاطة كول سلو وسعره 74 جنيه. بما أن المكان متخصص في البرجر فأكيد البرجر من أحلى الحاجات اللي ممكن تأكلها هنا، اللحم بقري ومستوي كويس قوي، ملحه مضبوط، وإضافات الجبن الشيدر والهالوبينو بـ تخليه ولا أحسن مطعم برجر أمريكاني أصلي. جربنا كمان من المنيو ساندويتش برجر بـ نقوم بتجميعه من اختيارتنا المختلفة (Make your own) من نوع العيش واللحم والجبن والإضافات والتسوية، وده كان سعره 61 جنيه مع العلم أن فيه بعض الإضافات زي البيكون والبارميجان بـ تبقى بمبلغ مستقل غير ثمن الطبق اللي متحدد في منيو Make your own يعني خليك مركز وأنت بـ تختار الإضافات علشان ما تلاقيش الرقم كبر منك قوي. وما تنساش أن البيبسي هنا refill يعني اشرب براحتك، وسعره 22 جنيه. ومن بين 3 أصناف حلويات بس اختارنا التشيز كيك (36 جنيه) بالبلو بيري وكانت ظريفة لكن بدون تميز يذكر. المهم أن الطعم حلو والكميات كبيرة لدرجة أننا أخذنا كميات كبيرة من وجبتنا تيك آواي، ومشينا بدري بسبب البرد والرياح الشديدة اللي ما كانش نافع معاها دفايات، لكن أكيد «لورد أوف ذا وينجز» مكان فريد يستحق يبقى على خريطة المطاعم الأكثر تميزًا في القاهرة بسبب تخصصه وتمكنه الكبير من أطباقه، والخدمة المحترفة والسرعة في الأداء كانوا حاضرين في التجربة، ومن هنا بـ ييجي تقييمنا العالي للوافد الجديد على العاصمة.

...

روكس: مشويات وأطباق شرقية فى المعادى
اصدرت في: 26/02/2013

"روكس - Rocks" مطعم واخد فيلا من فيلات المعادى الجديدة التقليدية، وبـ يقدم أطباق مشوية أمريكية ومشويات شرقية، بجانب سلطات صحية وركن إيطالى خاص كجزء من المنيو. فى طريقنا للمطعم بعد الظهر كنا بـ نعشم نفسنا بوجبة فى حديقتهم المكشوفة، لكن للأسف "روكس" فشل أنه يستغل ميزة موقعه الرائع.يمكن المكان يعتبر عاطفى فى نظر أى واحد عاش فى المعادى، لكن التصميم فى النهاية كان غير مريح. تركيبة الحديقة افتقدت اللمسة الجمالية ولسوء حظهم أن على الساعة 3:30 العصر، كانت أشعة الشمس المباشرة اختفيت تمامًا. استقرينا على الترابيزة الوحيدة اللى فيها جزء قليل من الشمس، وبدأنا نتفرج على المنيو المتنوعة.بعد تفكيرنا فى الاختيار من بين الشوربة، والسلاطات، والمقبلات، والمشويات، والأطباق الرئيسية والمكرونات استقرينا على شوربة الكريمة بالمشروم (19 جنيه)، سلاطة الجرجير (27 جنيه) وتشيلى تشيز فرايز (25 جنيه) علشان نبدأ وجبتنا. البداية أولاً مع الشوربة اللى كميتها كافية لكن الكريمة كانت زيادة. رغم أننا فعلياً كنا الوحيدين فى المطعم السلاطة والبطاطس أخذوا وقت طويل جدًا لدرجة أننا كان لازم نسأل إيه اللى بـ يحصل.بعد ما أخيرًا وصلوا، السلاطة كانت مليانة مع المشروم الطازج رغم أن الجرجير كان قليل والخس كان بـ يملأ معظم الطبق. بساطة طبق السلاطة زادت من علامات الاستفهام، ليه كل الوقت ده فى تقديمها؟ التشيلى تشيز فرايز تعتبر وجبة كاملة مش مجرد طبق مقبلات، ورغم أن اللحم المفروم كان لذيذ لكن كانت خالية من أى نوع من الفاصوليا، وفى حين أن الجبنة السايحة كانت مرضية، وإضافة فلفل البابريكا كانت غير ضرورية.طبق ثانى بـ يعانى من نفس مشكلة البابريكا كان ساندويتش الجمبرى المشوى (39 جنيه). العيش المستخدم كان عيش بلدى مع الجرجير والطحينة، وطبعًا الفلفل الأحمر كان هو مصدر الإزعاج. بعيدًا عن اللى فات الجمبرى كان طازج رغم أن الساندويتش بشكل عام كان ناشف شوية. البطاطس المحمرة على الناحية الثانية كانت مقرمشة وطعمها ممتع بس للأسف برضه كانت فيها فلفل أحمر بكمية أكبر. الفراخ المشوية المخلية (55 جنيه) ومعاها أرز بسمتى وخضار مشوى كانت طرية ومطهية بامتياز؛ رغم أنها مش حاجة خرافية لكنها عمومًا كانت ممتعة.كميات الأكل فى روكس كبيرة، على الطريقة المصرية، وعلشان كده لو بـ تفكر تطلب الحلو لازم تعمل خطة استراتيجية لأكلك. الحلويات بـ تشمل أصناف ممتعة زى تشيز كيك قرع عسل (24 جنيه) ودى كانت أكثر الأصناف إثارة.الخدمة فى روكس لطيفة، رغم أنها بطيئة على الآخر. الشوربة قُدمت عشرين دقيقة على الأقل قبل المقبلات، وده جعلها وجبة تتصف بالعشوائية.روكس بـ يقدم مكونات أكل طازجة وسط مكان جلوس مفتوح مريح. وعلشان كده لو عندك وقت تستمتع بالوجبة ومش مستعجل ممكن "روكس" يكون مكان مناسب تقضى فيه السبت بعد الظهر. بس خلى بالك لو ما كنتش من عشاق التوابل اطلب أكلك بدون فلفل البابريكا.

...

شاهد المزيد
مواضيع خاصة

النهارده في القاهرة: سهرة ميكس مع كل ألوان الفن

رغم البرد اللي مخلي كل الناس عايزة تفضل متدفية في السرير، بس برضه أجندتنا مابتخلاش من الحفلات اللي هتخليك تصحصح وتفرفش، علشان تخرج تقضي ليلة سعيدة بعد الشغل. تعالوا