عالمي مطاعم in المعادي Cairo, Egypt

مطاعم

سي باستا: مكرونة لذيذة توصل لك لحد البيت في المعادي
اصدرت في: 21/04/2016

مافيش حد يقدر يقاوم سحر المكرونة، أكلة سهلة وسريعة وبتشبعك، إحنا شخصيًا بنعتبرها الحل الأسرع لما نكون جعانين، حتى لو الساعة 2 بليل، نخترع أي صوص في المطبخ وبتقضي الغرض. فلكم أن تتخيلوا فرحتنا بافتتاح مكان جديد بيعمل مكرونة بس وتوصل لك لحد البيت في المعادي، حاجة آخر مزاج. سي باستا - Si pasta لسه فاتح قريب في دجلة المعادي وقائم على التوصيل بس، المنيو كان شكله مغري جدًا بالديزاين اللي شبه ورق الجرائد القديمة والطربوش، تحس أنك رجعت بالزمن، مع اسم المكان اللي عامل خلطة بين سي السيد والمكرونة الإيطالية، كأنهم بيقولوا لك هتلاقي عندنا خلطة مش عند حد. وبرغم أن المنيو ما فيهوش اختيارات كثيرة إلا أنها خطوة كويسة من شباب لسه بيبدأ حياته العملية. لما كلمناهم عرفنا أن فيه نوعين بس مكرونة حاليًا وهي الفيتوتشيني والبنا، أما عن أنواع المكرونة فهم 3 أنواع بس ما بين مكرونة سي السيد بالـ Sea Food أو مكرونة أمينة بتتقدم بالسجق أو مكرونة جليلة بتتقدم بالفراخ. وأكثر من نوع صلصلة ما بين صلصلة حمراء أو بيضاء أو نجرسكو (في الفرن) أو روزية (خليط ما بين الصوص الأحمر والأبيض). طلبنا مكرونة سي السيد فيتوتشيني وصوص روزية بالـ Sea Food بـ 32 جنيه، ومكرونة جليلة بالفراخ نجرسكو بنا (28 جنيه) والتوصيل 15 جنيه!! الطلب وصل في ميعاده مغلف بطريقة كويسة، المكرونة السي فوود كانت رائعة عليها كابوريا وكاليماري وجمبري مع التوابل والصوص، كانت فعلًا رائعة، أما المكرونة النجرسكو فكانت أقل شوية بالنسبة لطعم الصوص كان قليل والفراج كانت جافة، نعتقد أنهم سابوها مدة طويلة في الفرن وهي كانت مسلوقة فاستوت زيادة عن اللزوم. طبعًا دي مش هتكون أخر مرة نجرب فيها سي باستا، ونتمنى أنهم يكثروا أنواعهم ويقللوا ثمن التوصيل شوية لأن 15 جنيه توصيل ده كتير جدًا!

...

أوجما: كافيه ومطعم وسوشي لطيف في كورت يارد المعادي
اصدرت في: 16/03/2016

المعادي من أهم المناطق في القاهرة المليانة والغنية بكل ملامح الترفيه، من أول المعارض وحفلات الأدب والفنون والموسيقى وأماكن الأكل الموجودة في أهم مناطق المعادي زي شارع النصر وشارع اللاسلكي ومنطقة دجلة وأكيد طبعًا العمدة الكبير أوي شارع 9. من المناطق اللي نورت المعادي بالقرب من شارع النصر وجنب مول بندر المعادي هو ذا كورت يارد - The Courtyard اللي بقى من أهم مراكز تجمع الكافيهات والمطاعم على اختلاف أنواعهم، يعني لك في أي نوع أكل غالبًا هـ تلاقيه هناك. أكيد طبعًا من ضمن أصناف الأكل هو السوشي، طبعًا ما حدش يقدر يقرب أو يفكر يفتح سوشي قريب من هناك بسبب وجود عملاق السوشي "فويجو - Fuego"، لكن تفاجئنا لما لاقينا فيه مكان تاني للسوشي وهو أوجما – Ogma، عبارة عن كافيه ومطعم في الدور الثاني في الكورت يارد. المكان كبير فعلًا وفيه منه جزء داخلي وجزء خارجي تبقوا شايفين الـ Courtyard كله، تقدروا تقعدوا بره في عز البرد عادي جدًا بسبب وجود الدفايات في كل حتة في الأوت دور، الديكور بسيط وهادئ والإضاءة معقولة مش عاملة دوشة، أما الكراسي التصميم بتاعها حلو مريحة وبسيطة. أوجما هو اسم شخصية أسطورية من التراث الإسكتلندي/ الأيرلندي وكان بيعتبر زي إله زمان، انزلوا بتوقعاتكم، المكان مافيهوش أكل أسكتلندي أو أيرلندي. منيو المطعم فيها من كل أنواع الأكلات والمشروبات وبأسعار متوسطة مقارنة مع غيرها من فئة المطاعم الـ International، لكنها تستحق التجربة، كمان فيه منيو للسوشي مختصرة وعبارة عن ورقتين فيهم كل أنواع "الماكي"، "الساشيمي"، "النيجيري" المتوفرة عندهم، كنا شايفين ممكن لو فيه صور هتساعد كثير وخصوصًا لو حد أول مرة يجرب سوشي. كنا مترددين شوية نجرب ناكل سوشي في مكان مش متخصص فيه، قولنا نجرب عرض All you Can Eat اللي موجود طوال أيام الأسبوع (حاجة جديدة) وبـ 150 جنيه (حاجة أجدد)، غير شاملة أنواع الساشيمي، وأكيد طبعًا مافيش مشاركة أو توصيل. حد من الـ Staff اقترح علينا تكون أول جولة هي عبارة عن تنوع من اللي بيقدمه مطبخ السوشي ونجرب، توقعنا تشكيلة بقى من النايجيري والماكي، لكن أول جولة كانت أنواع مختلفة من "الماكي" ما بين أنواع بالسلامون والكابوريا والسمك الأبيض ونوعين من المقلي، جودة الأكل كانت كويسة والمكونات طازجة لكنها مش أحسن حاجة والحجم متوسط، أما المقليات كانت مقرمشة وطعم المكونات كان واضح بس كان فيه طعم زيت شوية، ما كانش حاجة لطيفة خالص. طلبنا كمان عصير ليمون بالنعناع (250 مللي بـ 20 جنيه) كان جميل وفريش فعلًا وسكره مضبوط، دخلنا على الجولة الثانية اللي كان فيها قطع نايجيري أكثر مع قطع الماكي ملفوفة بالـ Sea Weed، قطع النايجيري كانوا سمك أبيض وجمبري وسلامون لكن الأنواع العادية جدًا من النايجيري وهما كانوا قطعتين من كل حاجة، وما شوفناهمش ثاني، أما قطع الماكي كانت كويسة جدًا والـ Sea Weed كان ناشف شوية ومجلد، لكن الأرز والمكونات (سلامون، تونة، جمبري، كابوريا.. غيره) كانت كويسة أوي. خلال انتظارنا للجولة الثالثة حد من Staff المطعم تقريبًا المدير أو حد مهم قعد يدردش معانا شوية بكل ذوق وروح خفيفة عن رأينا لغاية دلوقت في المطعم وفي السوشي وإيه عجبنا في الحاجات اللي جربناها، كمان اقترح علينا نجرب اختراعات أوجما الجديدة في السوشي، وماله ليه لأ؟ نأخذ التجربة كلها ونشوف. الجولة الثالثة كانت 4 أنواع من رولات الماكي، فيه منهم الأرز مقلي وفيه نوع ثاني ملفوف بخبز مقرمش ونوع كمان عليه كيوي وصوص حلو وسمسم ونوع ما قدرناش نوصل إيه الافتكاسة اللي فيه. خلصنا جولة الـ All You Can Eat وأكلنا وفكينا من جو الزهق والملل وفي نفس الوقت اكتشفنا مكان جديد، يوم ما نكون في وسط الشهر والحالة تعبانة نروح نضرب سوشي بسعر كويس، بالرغم أنه مش متخصص فيه بس لكن نقدر نقول أنه كويس أوي بالنسبة لمكان غير متخصص. "أوجما" مكان لطيف ومميز، شكله حلو والـ Staff بتوعه كويسين ومحترمين، لكنه زي أي مكان اختباره الحقيقي في الزحمة والطلبات الكثيرة.

...

كاسبر أند جامبينيز: أكلات متنوعة واحتراف غير عادي في كورت يارد المعادي
اصدرت في: 10/01/2016

كل مكان بـ نزوره كمحررين في كايرو 360 بـ يسيب أثر وذكرى جوانا، لأننا بـ نتعامل مع المكان كله كمنظومة، كل حاجة بـ تقدم لنا فيه ناس كثير تعبت لحد ما خرجته بالشكل ده، علشان كده بـ نفرح جدًا لما نعلن لكم عن منظومة ناجحة ومكان جديد مبهج حتى لو معروف، يهمنا أنه يفضل محافظ على مستواه، وده اللي حصل لنا في زيارتنا لمطعم كاسبر & جامبينيز – Casper & Gambini's اللي فتح قريب في كورت يارد المعادي. المكان كبير جدًا في كورت يارد، دورين غير المكان الخارجي اللي بره سواء في الدور الأول أو الثاني، وقت زيارتنا الجو كان برد جدًا، فـ قعدنا جوه، وخدنا المنيو اللي خضنا شوية في الأول بورقه الثقيل كأنه كتالوج، وفاجئنا أكثر بأنه أكله متنوع ما تقدرش تحدد له مطبخ معين آسيوي ولا أمريكي ولا صيني؟ طلبنا كبداية سلاطة Slim – Lim Chicken بـ 54 جنيه، وكنا محتارين جدًا في أنواع السلاطة المتنوعة هناك الحقيقة، المكونات كانت فريش، بس الصوص كان مايونيز فقط، كنا نتمنى أن يكون معاه خل أكثر أو دبس رمان كان هـ يبقى طعمها أخف، كمان طلبنا موكا كراميل لاتيه (25 جنيه)، وموهيتو بالرمان (30 جنيه)، والاثنين كانوا أحلى من بعض، خاصة أن الموهيتو بـ ييجي مش في كوباية عادية بـ يبقى جنبك زي زجاجة صغيرة تفضل تصب منها كل شوية، والنكهات كانت قوية وطبيعية وممتعة. بالنسبة للأكلات إحنا احتارنا كثير قبل ما نختار هـ ناكل إيه، برغم أن الاختيارات قليلة شوية في قسم الأطباق خاصة اللحوم، إلا أن عنده من كل مطبخ أكلة تقريبًا ما بين البيتزا والريزوتو واللازانيا والسوشي والأكلات الآسيوية، اختارنا Cashew Chicken بـ 65 جنيه، واللي كانت أحلى حاجة ذوقناها هناك، وده عبارة عن أرز مع قطع دجاج وخضروات وكاجو وصوص صيني نعتقد أنه أقرب لصوص الترياكي، مع زيت السمسم وبيضة مقلية من فوق، الطعم كان فعلًا مبهج بلا مبالغة، تركيبة التوابل مع بعضها كانت كويسة. كمان طلبنا Under a Brick بـ 93 جنيه، ودي عبارة عن قطعة دجاج مشوية مع خضروات وبطاطس بيوريه، بدلنا البطاطس بكمية خضار إضافية، تتبيلة الدجاج كانت هايلة، والجلد كان مشوي لدرجة أنه ذهبي ومقرمش، واختارنا معاهم صوص المشروم اللي كان حلو برضه، وتسوية الخضروات كانت كويسة، العيب الوحيد أن الكمية كانت قليلة، كمان كنا جربنا في زيارة سابقة لنا شوربة الطماطم اللي كانت رائعة وتعتبر وجبة متكاملة فعلًا مش بس شوربة من كثر التوابل اللي فيها، وجربنا لازانيا كانت حلوة قوي برضه بس كميتها صغيرة. نيجي بقى للكلام المبهج والكبير ألا وهو الحلو، من جمال الحاجات المعروضة إحنا ما كناش عارفين نختار إيه خالص، بس أول ما شوفنا الريد فيلفت الموضوع اتحسم بالنسبة لنا، فطلبنا Fruity Red Velvet بـ 41 جنيه. وكانت عبارة عن 3 طبقات من كيكة الريد فيلفت مع صوص وقطع توت بري، وما بين كل قطعة والثانية كريم شانتيه خفيف بـ يدوب في فمك، حاجة كده تنقلك لعالم ثاني مليان بهجة وسعادة. ما نقدرش ننكر أسلوب التعامل الراقي هناك، واللي بـ يكمل المنظومة الناجحة في كاسبر أند جامبينيز، نتمنى أنهم يفضلوا محافظين على مستواهم الجيد دايمًا.

...

كازلاك: أكل من اللي قلبك يحبه محترف ولذيذ في كورت يارد المعادي
اصدرت في: 27/12/2015

بـ نحب جدًا كمحررين لكايرو 360 أننا نشجع الأماكن اللي بـ يديرها شباب وأكلها حلو، فما بالكم بقى بمكان كل اللي فيه صنع بأيدي مصرية من أول الكراسي والأطباق، أول ما دخلنا المكان لفت نظرنا أن حجمه كبير، فيه مكان داخلي مش كبير قوي حوالي 5 ترابيزات، ومكان خارجي فيه عدد ترابيزات أكبر، بعد ما خلصنا واستمتعنا بأكلنا هناك، جاء لنا صاحب المكان بنفسه، وشرح لنا فكرته في أنه بـ يحاول يدعم الاقتصاد المصري ويعمل الحاجة اللي بـ يحبها وفي نفس الوقت بـ يساعد ناس ثانية حوله، فاشترى كل حاجة للمطعم من مصر، الكراسي والترابيزات و الديكور حتى الأطباق معمولة من فخار مصري، واللي تعاون مع ورشة مصرية كانت هـ تفلس لحد العقد اللي عمله معاها ومع شركة من الصين، والكوبايات معمولة من زجاج معمول برضه مع حد مصري بـ يعيد تدويره، فعمرك ما تلاقي كوبايتين زي بعض أو أبريقين نفس الشكل، وكل ده موضح في فيديو على صفحتهم على الفيسبوك. نيجي بقى للكلام الكبير، ألا وهو المنيو، متنوع بشكل مبهج، ما بين الشوربة والسلاطات والمقبلات والبيتزا وأطباق اللحوم والدجاج والمأكولات البحرية، وطبعًا الحلو اللي حيرنا كثير لحد ما قررنا هـ نطلب إيه، طلبنا كبداية سلاطة بالبط المدخن والكبد (47 جنيه) واللي قدمت لنا بعد حوالي 20 دقيقة، وكانت فعلًا أجمل بداية نبدأ بها تجربتنا، المكونات كانت فريش وصوص الدريسنج كان متناسب مع الطعم، صحيح بعض قطع البط كانت مستوية زيادة عن اللزوم وبـ تمط بس بشكل عام الطعم كان هائل وتقديمها كان مبهج بألوان السلاطة المتنوعة والطبق الفخار اللي قدمت لنا فيه. بعد كده قُدم لنا المشروبات اللي طلبناها وكانت موهيتو (24 جنيه) وسموزي كيوي وأناناس (33 جنيه) والاثنين كان طعمهم كويس، بس الموهيتو كان ناقصه سكر أكثر وذوبان للمكونات مع بعض أكثر، وبعد حوالي 20 دقيقة ثانية وصل الأكل واللي كنا منتظرينه على نار، وكنا طالبينDuck 2 ways بـ 110 جنيه، وBoneless chicken بـ 75 جنيه، نبدأ بالبط ولازم نعترف أننا بـ نعشق البط اللي مطبوخ حلو ولازم نعترف برضه أن الطبق ده كان من أجمل الأطباق الي أكلناها في حياتنا المهنية، الطبق بـ يكون عبارة عن نص بطة، الورك بـ يكون مطهو ببطء لدرجة أنه بـ يقدم لك بـ يدوب في فمك، والصدر بـ يبقى مقطع شرائح بدرجة السواء اللي تحبها مع صوص البرتقال والجنزبيل والبصل المكرمل وحبة توابل ثانية، إحنا من حلاوة الطعم افتكرنا البصل بطاطا أو بطاطس بس علشان كان بـ يقرمش عرفنا أنه بصل، بـ يُقدم معاهم سلاطة برضه ونيوكي حاجة مكونة من عينة البطاطس بتشبه طعم المكرونة بتاعتنا بس هي مش مكرونة، دي بـ تبقى قطع عجينة مقطعة دوائر وكان طعمها غريب شوية بس مش سيئة. أما بقى اللي معمول بخلطة حب سرية فكان طبق الدجاج المشوي بدون عظم، التتبيلة والتدخين كانوا باينين في كل قضمة، كمان طلبنا معاها بطاطس جراتان وخضار كانوا كويسين جدًا، برغم أن مش أي حد يضبط الجراتان إلا أنهم ضبطوها. بعد الأكلة الدسمة دي حرفيًا ما كانش فيه مكان للحلو، بس ما قدرناش نقاوم الحاجات الموجودة خاصة بعد لما اتحكى لنا عنها، بالذات السوفليه بالفراولة واللي بـ يقدم معاه زي عصير فراولة فوار بطريقة خاصة، بس حرصًا على معدتنا طلبنا Tarte Tatin بـ 39 جنيه، ودي عبارة عن فطيرة تفاح عليها قطع تفاح مقطعة كبيرة بـ تتحط في الفرن مع صوص كراميل ومعاها آيس كريم فانيليا بصوص كراميل مالح، عارفين لما تأكلوا حاجة وتعطيكم إحساس دفء البيت وحلاوة أكله، الطبق ده كان كده، بس كنا نتمنى أنه بدل لما يبقى في طبق مدور أنه يكون في طبق مستطيل وتكون العجينة أقل سمكًا من كده علشان نعرف نقطعها بمزاج، لكن فعلًا طعمها كان حكاية. تجربتنا في كازلاك كانت رائعة، أكيد مش هـ تكون زيارتنا الأخيرة، واللي نفسنا نجرب عنده كل أنواع مأكولاته.

...

أوجما: مكان لطيف وأكل محتاج لمسة احترافية في المعادي
اصدرت في: 24/11/2015

بالرغم من أن دي مش أول مرة نروح courtyard في المعادي، إلا أننا في كل مرة بـ نبقى متشوقين نزور أوجما – Ogma اللي في الدور الثاني، مش بس علشان مساحته الواسعة، لأ كمان لفت انتباهنا الديكور بتاعه. أول ما وصلنا المكان كان زحمة جدًا للأسف فما كنش فيه مكان جوه، واللي عجبنا قوي في ديكوراته النجف وشكل الكتب وهي مرصوصة في المكتبة بألوانها المختلفة؛ شكلها يحسسك بالدفء وكأنك قاعد في بيتك. فـ قعدنا بره والجو كان حلو، كمان المنظر من فوق حاجة ثانية، خاصة لو رحت هناك قبل الغروب، أو الصبح بدري. المنيو ما عجبناش شكله الحقيقة ونعتقد أنه خاص بالـ soft opening، لأنه كان مجرد ورق مطبوع عليه الأطباق والأسعار. وبرغم أنه كان متنوع ما بين فطار وأكلات مختلفة من اللحوم والدجاج، إلا أن التنوع في العصائر والحلويات ما كنش كبير زي الأكل، على عكس ما توقعنا. طلبنا في الأول فرابتشينو (27 جنيه)، وعصير هاوايان (28 جنيه)، ومن المقبلات طلبنا كنافة جمبري (55 جنيه)، وبعد كده طلبنا مكرونة ماما روزا (45 جنيه)، وساندويتش Chimichanga بـ 42 جنيه، وأخيرًا Molten cake بـ 40 جنيه. العصائر قدمت لنا بسرعة، الفرابتشينو طعمه كان حلو، والهاوايان كمان اللي كان غالب عليه طعم عصير الأناناس، وبعد شوية قدموا لنا الكنافة جمبري وكان أحلى حاجة أكلناها هناك، كان سخن وملفوف ومقدم مع صوص السويت أند ساور. بعد حوالي ربع ساعد جائت المكرونة واللي للأسف كانت مستوية زيادة عن اللزوم، بس الصوص كان كويس، وهي كانت مكونة من صوص كريمة وطماطم ممزوجين ببعض، أما الساندويتش بقى اللي كنا متشوقين نجربه، لأنه المفروض بصوص مكسيكسي ومكون من قطع دجاج وطماطم وفلفل أخضر، بس اللي جاء لنا كان غير كده خالص، بالرغم من أنه سخن ومعاه بطاطس محمرة كويسة ومش مزيتة إلا أنه كان عبارة عن رول فيه قطع دجاج محمرة وبصل وبس خلاص، مافيش صوص!! ولما قلنا للجرسون اعتذر وجاب لنا الصوص لوحده على جنب، واللي كان ملوش أي علاقة بالساندويتش مجرد صوص مايونيز مع مسطردة مخلوطين ببعض وطعمهم مش حلو. قلنا نجرب أخر حاجة وهي الـ Molten cake، واللي للأسف برضه ما كنتش فريش، وصوص الشوكولاتة جواها كان قليل جدًا. في المجمل أوجما مكان ظريف لمشروب خفيف وقعدة لطيفة، لكن كأكل مطاعم محترفة، محتاج شغل كثير، بالرغم من أن الخدمة عندهم كويسة، إلا أن الشيف محتاج يهتم أكثر بالتفاصيل.

...

لوسيلز: فطار مختلف ناقصه بعض الاحتراف في المعادي
اصدرت في: 09/11/2015

بقى لنا فترة مركزين على وجبة الفطار في المطاعم، فبرغم أن الأقبال عليها مش بـ يبقى كبير وسط أيام الأسبوع زي في الويك إند، إلا أن النهارده في زيارتنا لمطعم لوسيلز - Lucille's كان فيه عدد معقول لناس جاية مخصوص تفطر هناك وده طبعًا لشهرته في وجبات فطاره اللذيذة، واللي كنا كتبنا عنه مقال نقدي قبل كده في 2011. المنيو بتاع المكان تغير كثير طبعًا عن 2011، ما بقاش فيه أكلات مكسيكية كثيرة، بقى فيه وجبات عادية من اللحوم أو الدجاج واللي كنا جربناها قبل كده من قريب بس دائمًا كنا بـ نحس فيها أنها ناقصها حاجة، ما كناش بـ نلاقي الاحتراف أو الكمال اللي بـ ندور عليه في الوجبة، لو أنت من الناس اللي مش بـ تفرق معاها التفاصيل ممكن تنبسط هناك، لكن لو أنت من محبي الكمال ده أكيد مش مكانك. منيو الفطار بقى واللي منفصل عن المنيو العادي، مكون من كل أنواع البيض مع الإضافات اللي بـ تفضلها سواء بيكون أو سوسيس، أو حتى لحوم أو دجاج أو خضروات ومشروم. طلبنا A Southern Specialty بـ (74 جنيه) واللي مكون من بطاطس وبيض من اختيارك أومليت أو مقلي، وقطعة ستيك أو دجاج وتوست بني أو أبيض، اتخضينا شوية لما لقينا في الفطار لحمة أو دجاج، فـ قررنا نجربه، فاختارنا بطاطس مقلية وبيض أومليت وستيك لحمة مقلي وتوست بني. بعد حوالي نصف ساعة وصل طلبنا سخن وريحته حلوة، لكن للأسف الستيك كانت حالتها صعبة جدًا، لدرجة أن طبقة البقسماط والبيض انفصلت عن الستيك نفسه وكنا فاكرينها بيكون في الأول لحد ما ذوقناها، وكمان كانت مستوية زيادة عن اللزوم فبـ تشد معانا جامد وأحبطنا إحباط شديد، بالرغم من أن البطاطس كانت كويسة وكمان الأومليت، إلا أن التوست كان بايت ومش متسخن كويس. طلبنا كمان عصير برتقال كبير بـ 20 جنيه، كان مزز شوية بس ده لأنه عصير طبيعي، الحقيقة اللي ضايقنا أكثر كمان أن الملاحة اللي كانت موجودة جنبنا ما كانش فيها ملح والجرسون لأنه كان لوحده في المكان، لحد ما بـ يوصلنا أو نشوفه حولنا بـ يأخد فترة طويلة، وده ما شجعناش أننا نطلب أي حاجة إضافية، غير أن باقي الترابيزات الفاضية كان لسه عليها الشوك بطريقة غير منظمة. قلنا نختم الفطار بالبان كيك بـ 15 جنيه الواحدة، وكانت أجمل حاجة ذوقناها في اليوم، سخنة وخفيفة ومنعشة مع صوص المابل اللي كان سخن برضه، كانت فعلًا ساحرة، ولقينا الشيف شالها من الشيك علشان انزعاجنا من الستيك، حركة لطيفة ولو أننا كنا نفضل أننا نستمتع بستيك محترف من البداية. لوسيلز مكان مناسب لفطار خفيف بان كيك أو فرنش توست وبيض أومليت بس كأكل محترف، رأينا أنه تراجع كثير عن السنين اللي فاتت، ونتمنى أنه يصحح الأخطاء دي.

...

برانش & لانش: بيسترو مبهج مليان أكلات محترفة ولذيذة في المعادي
اصدرت في: 21/10/2015

دائمًا الأماكن اللي جمالها يلمس روحك مش بـ تلاقيها بسهولة، مش دائمًا تدخل مكان وتحس فيه بالدفء والبهجة، وده اللي حصل لنا أول ما رحنا برانش أند لانش – Brunch & Lunchفي شارع 9 في المعادي واللي لسه فاتح من حوالي شهر. جذبنا بألوان الكراسي الملونة المبهجة، واللوجو اللي كله ألوان واسمه كمان مختلف يشدك، لأن وجبة الـ Brunch في مصر مش معروفة قوي، تعتبر معروفة أكثر للأجانب وهي زي وجبة خفيفة كده بين الفطار والغداء، واللي أغلب المصريين في الشغل بـ يأكلوها وبـ تبقى في الأغلب دليفري، مش زي بره مصر بـ ياخدوا ساعة راحة يروحوا ياكلوا في المكان اللي يحبوه، وجبة الـ Brunch. ما علينا إحنا حبينا نجرب حاجة ثانية خالص ألا وهي الفطار هناك، لأن شارع 9 الصبح بـ يبقى هادئ وجميل، كمان الفطار عندهم في المنيو مغري جدًا ما بين البيض بكل أنواعه للجبن والتوست مع المربى، تقدر تختار اللي أنت عاوزه، أما طريقة عرض باقي الأكلات فـ عجبنا جدًا أنهم مقسمين في الصفحة الواحدة الاختيارات ما بين مقبلات ومعجنات خفيفة ووجبات عادية، حسينا كأن حد بـ يسهل عليك التفكير، اختار اللي تحبه وهم هـ يسهلوا الموضوع عليك، صحيح ما كانش فيه عدد وجبات كبيرة مختلفة لكن الحرفية اللي قدموها لنا في الفطار كفيلة أنها تضمن لنا جودة باقي الأكلات. طلبنا كبداية حاجة تفوقنا على الفطار، سموزي ليمون بالنعناع بـ 23 جنيه، وبان كيك بـ 23 جنيه برضه، وEgg benedict beef بـ 38 جنيه، ومن هنا تبدأ الحكاية، مبدئيًا قبل ما أي حاجة توصل بـ تيجي لك فوطة معقمة سخنة علشان تعقم بها أيديك وبعد كده قدموا لنا سموزي الليمون بالنعناع وكان قوامه مضبوط وطعمه مميز وبعد فترة جاء لنا الـ benedict، وهنا المفاجأة.. إحنا حسينا أننا دخلنا برنامج ماستر شيف لأن تقديم الطبق بـ يحتاج حرفية في تسوية البيض لأنه بـ يستوى بدرجة حرارة معينة تخليه يبقى مستوى وفي نفس الوقت الصفار نيء، وقد كان مع أول شوكة للتوست اللي عليه روزبيف وفي الآخر بعد البيض صوص الهولنديز الممتع، أكلنا وجبة ممتعة بكل معنى للكلمة خاصة أنه بـ يبقى فيه طلبين جانبيين: بطاطس ويدجز وحاجة ثانية من اختيارك وإحنا اختارنا سوسيس وبرضه كان درجة تسويته ممتازة، مافيش احتراف أكثر من كده، بعد كده جاء لنا البان كيك ومعاه صوص مابل اللذيذ وكان على الجانبين تفاح مقطع ساعدنا أنه يكسر طعم السكر القوي، الحاجة الوحيدة اللي ضايقتنا أن سُمك البان كيك كان تخين شوية كنا نتمنى أنه يبقى أرفع من كده. بشكل عام "برانش & لانش" مكان مميز تقدر تستمتع به هناك بوقتك مع عائلتك أو صحابك، بأكلة متميزة معمولة بحرفية وفن.

...

بن & فلورنتين: فطار شهي ومشروبات منعشة في المعادي
اصدرت في: 12/10/2015

ساعات كثيرة الواحد بـ يزهق من الفطار في البيت، وبـ يبقى نفسه في فطار مختلف وخفيف في نفس الوقت، وللأسف مع الشغل رفاهية الفطار بره مش متوفرة غير في الويك إند. وبطبيعة عملنا في كايرو 360 حبينا ننقل لكم تجربة الفطار في مكان جميل عنده تنوع كبير في المنيو بتاعه خاصة قسم الفطار. بن & فلورنتين – Ben & Florentine المطعم الكندي المعروف واللي له فرع ثاني في القاهرة الجديدة، فتح فرع جديد في شارع 9 في المعادي، المكان صغير مش كبير حوالي خمس ترابيزات كبيرة مطلة على الشارع، المنيو متنوع في المشروبات ما بين سخن وبارد وسموزي، وساندويتشات عادية وبرجر ومكرونة وبيتزا وحلويات، بس أكثر حاجة عجبتنا قسم الفطار اللي كان حوالي 3 صفحات ما بين بيض مقلي وعيون وأومليت بإضافات مختلفة ومتنوعة سواء بالبيكون أو اللحم المفروم أو الخضروات أو الجبن بأنواع مختلفة مع المشروم. البيض مقسم لـScrambled و3 Eggs Omelets واللي بـ يُقدم معاه بطاطس وتوست، ده غير قائمة الكومبو اللي بـ تختار منها مشروب سخن أو بارد مع نوع الفطار اللي تفضله، وبـ يختلف السعر على حسب الحاجات اللي بـ تختارها، كل ده غير طبعًا الوافل والكريب والبان كيك والفرينش توست، يعني علشان تحلي بمزاج، والأسعار معقولة مش مبالغ فيها. طلبنا في الأول كابتشينو بـ 18 جنيه، وبيض كلاسيك مع بيف بيكون بـ 28 جنيه، وعجبنا في المنيو كريب Three Musketeers بـ 48 جنيه. الكابتشينو القهوة فيه كانت أكثر من اللبن للأسف فما استمتعناش به قوي، بس عشاق القهوة أكيد هـ يستمتعوا به، والبيض كان مقدم معاه بطاطس مخبوزة في الفرن المشهور بها المكان وتوست عليه البيكون بس هو كان ناشف شوية، لكن أجمل حاجة تذوقناها هناك فعلًا كانت الـ Three Musketeers واللي هو عبارة عن 3 قطع سوسيس في الكريب مع جبنة شيدر وموتزاريلا وفاكهة على جنب وبطاطس مخبوزة، تسوية الكريب والسوسيس كانت حلوة جدًا وطعمهم يجنن، لكن البطاطس كانت ناشفة جدًا في طبق وطرية ومخبوزة كويس في طبق ثاني، كنا نتمنى أنهم يبقوا أطرى من كده. كنا لازم نختم اليوم بعد الأكلة الشهية دي بعصير منعش، فطلبنا Raspberry Mojito بـ 25 جنيه، وكان منعش جدًا لأنهم الحمد لله ما استخدموش سيرب للنعناع، فكان مجرد سفن أب مع سيرب التوت وقطع ثلج وليمون ونعناع طازج، الحقيقة كان نفسنا ما يخلصش أبدًا مننا، لأننا ببساطة ممكن نفضل عايشين عليه بـ نشربه بس وما نزهقش. آخر حاجة طلبناها كانت Cheese Cake بصوص الكراميل بـ 32 جنيه، وأخدناها تيك أواي بس أول قطعة جاءت لنا كانت سايحة ومكسرة اتخضينا لما شوفناها ولما علقنا عليها للجرسون اعتذر وبدلها بقطعة أحسن، بس الحركة نفسها ضايقتنا لأن مش معنى أن الحاجة تيك أواي أنك تقدمها أقل من المفروض يُقدم، وطعمها كان حلو جدًا ومضبوط، صوص الكراميل بس كان سائل زيادة عن اللزوم. بشكل عام الخدمة محتاجة تضبيط عندهم، سواء بناس فاهمة المنيو أكثر ومكوناته، أو شيف أكثر حرفية.

...

كونشيرتو: أكل إيطالي أصلي ومشروبات مختلفة في المعادي
اصدرت في: 21/09/2015

فيه مثل مصري بـ يقول الجواب بيبان من عنوانه، بس الحياة علمتنا أن ممكن حاجات كثيرة حلوة تفوتك لما تحكم عليها بالشكل بس، وده اللي حصل لنا في زيارتنا لمطعم كونشيرتو – Concerto اللي لسه فاتح في شارع 9، جنب كافيه نعناع اللي كنا كتبنا عنه قبل كده، وأمام توتي ماتي - Tutti Matti. المحل من بره شكله مش مغري خالص، خاصة بالمقارنة بألوان نعناع المبهجة، مجرد اسم المحل والحائط لونه أبيض، إحنا كنا فاكرين أن المحل عبارة عن الترابيزتين اللي بره بس، لحد ما دخلنا واكتشفنا أن المحل كبير من جوه على عكس توقعنا، الديكور بسيط جدًا بس الخدمة ممتازة والأكل حكاية. المنيو كان عادي ما بين البيتزا والمكرونة والساندويتشات والأطباق الرئيسية اللي كانت قليلة شوية، بس قائمة الحلو والمشروبات متنوعين جدًا، يعني أكيد لازم يغروك. في قائمة المعجنات ما صدقناش نفسنا لما لقينا رافيولي، لأننا عارفين كويس قوي أن مش أي حد يعرف يعمله، وكون أنه موجود في المنيو فده تحدي كنا لازم نقبله، وبالفعل طلبنا رافيولي بالمشروم والفراخ بـ 47 جنيه. ومعاه سموزي Caramel Cruch بـ 28 جنيه، واللي هو عبارة عن لاتيه بالكراميل، وفي أقل من نصف ساعة كان عندنا الرافيولي ودي كانت مفاجأة بالنسبة لنا، وكان كبير وعليه قطع دجاج ومشروم غير الحشو اللي جوه الرافيولي، وعلى عكس توقعاتنا طعمه كان حلو قوي، فعلًا مش طبيعي في حلاوته، خاصة مع الصوص الأبيض وقطع المشروم والدجاج على الوش، استمتعنا بكل قطعة فيه، وسموزي الكراميل كرانش برضه كان حلو، صحيح مرارة القهوة كانت قوية شوية، بس عشاق القهوة بـ يحبوها كده، إنما إحنا بـ نفضل اللبن يبقى طعمه ظاهر أكثر. بعد الافتتاح العظيم ده قلنا نجرب البيتزا، فطلبنا بيتزا Quattro fromage بـ 45 جنيه، وبرضه ما أخدتش وقت في التسوية وعجينتها كانت رفيعة جدًا بالطريقة الإيطالية اللي بـ نحبها وطعمها كان حكاية، الغريبة أن الشيف ما استخدمش صلصة طماطم جاهزة واكتفى بأنه يحط قطع طماطم بدلها، وكان طعمها حلو جدًا. قلنا نجرب حاجة ثانية من منيو المشروبات واختارنا سموزي ليمون مع صوص البلو كوراسو بـ 18 جنيه، ودي كانت أجمل حاجة شربناها هناك، مجرد لذاعة الليمون مع صوص البلو كوراسو اللي هو عبارة عن طعم قشر البرتقال المسكر زي ما الجرسون قال لنا، حاجة كده تنقلك لعالم خالي من التفكير لعالم متوازن وجميل. كنا لازم نختم التجربة دي بحلو مختلف، وتهنا وسط الأصناف ما بين البينا كوتا والوافل والكريب والتيراميسو، وكنا هـ نموت ونذوق البينا كوتا لأنها برضه مش أي حد بـ يعرف يعملها، بس لأننا كنا هناك على العصر كان لسه الشيف ما حضرهاش فرضينا بالتيراميسو بـ 36 جنيه وكان طعمها حلو، لولا بس أن الكريمة كانت ثقيلة شوية، واستخدم معاها شوكولاتة سوداء على الوش، كنا نفضل أنها تبقى شوكولاتة باللبن علشان تكسر مرارة القهوة. تجربتنا في كونشيرتو تجربة مميزة، أكيد مش هـ تكون زيارتنا الأخيرة، ونتمنى المرة الجاية نذوق البيناكوتا.

...

جربيس: أكل ممتع ومشروبات ممزوجة بالسعادة في شارع 9 بالمعادي
اصدرت في: 13/09/2015

شارع 9 بالنسبة لسكان المعادي خاصة، وباقي سكان القاهرة عامة، مكان مميز بـ يشمل كل أنواع المطاعم والكافيهات، يعني هم يوصلوا شارع 9 وبعدين يقرروا هـ يروحوا فين، بس بالنسبة لنا كمحررين لكايرو 360 ومن سكان المعادي، فإحنا حافظينه عن ظهر قلب، وفرحنا جدًا أول ما عرفنا أن جربيس - Grapes فتح من قريب هناك، واللي كنا منتظرينه من فترة لأن اللوجو بتاعه كان جاذبنا جدًا بألوانه الموف في أخضر أو بينك في أخضر على حسب الإضاءة. المكان كبير جدًا مقسم لثلاث أجزاء، جزء مطل على شارع 9 نفسه وجزء مستطيل جنبه، ودول مفتوحين وفيه بالداخل مكان مقفول مكيف، بس الصبح بقى سقفه بـ يتفتح والزجاج اللي على الجنب كمان بـ يتفتح فـ بيبقى المكان كله مفتوح، علشان تستمتع بالشمس والهواء المنعش الصبح بدري. أكثر حاجة عجبتنا في المكان أنه ألوانه مبهجة سواء ديزاين الكراسي اللي مليان ورود ملونة ومبهجة أو الورد المعلق على الحيطان غير التابلوهات طبعًا. المنيو شكله لطيف أول صفحتين معمولين من الخشب ومنحوت جواهم اسم المكان، واللي متنوع جدًا في وصفاته، ما بين الشوربة والسلاطة والمقبلات والمكرونة والبيتزا والأطباق الرئيسية. بدأنا من منيو المقبلات بـ Mussels Provencal بـ 49 جنيه، وده بلح بحر مع الزيتون وصلصة طماطم، كان طعمه حلو جدًا، بس بارد شوية كنا نتمنى يبقى أسخن. كمان طلبنا شوربة كريمة بالفراخ والذرة بـ 25 جنيه، وطعمها كان ممتاز صحيح القوام كان محتاج يبقى أكثر سمكًا بس الطعم لا يُعلى عليه. بعد حوالي نصف ساعة وصل الأطباق الرئيسية وكنا طلبنا Fillet Mignon بـ 96 جنيه وبـ يبقى معاه 2 أطباق جانبيه من اختيارك، طلبنا أرز وبطاطس معاه، الفيليه بـ يبقى عليه بـ يكون مع صوص بني خفيف بالعسل، وطعمه كان تمام جدًا مع التسوية الـ well done المضبوطة، قطعة اللحم كانت عصارية ومستوية تمام استمتعنا بكل قضمة فيها. الطبق الثاني اللي طلبناه كان Chicken Roll بـ 68 جنيه، وبـ يتقدم معاه مكرونة بصوص البيستو، إحنا حصل معانا وقف غريب بـ نتعرض له كثير وبـ يبين إذا كان المكان ده محترف والخدمة عنده ممتازة ولا لأ، أول ما الطبق وصل وذقناه، الفراخ كانت جافة جدًا والصوص سائل وخلطة البيستو خفيفة جدًا، فـ طلبنا من الجرسون يغيروا أو يشوف الطبق ماله! فغير لنا الطبق بالكامل وعمل واحد جديد صوص البيستو فيه ممتاز والفراخ ريحتها لوحدها كفيلة أنها تغير مودك، صحيح اتأخروا شوية في عمل ثاني طبق لدرجة أننا شبعنا بس طعمه كان مختلف وممتع. بالنسبة لنا من المعايير الأساسية أو التفاصيل الدقيقة اللي بـ تخلينا نعتبر المكان ده محترف ولا لأ غير طبعًا الخدمة والديكور، الحلويات والعصائر، ونقدر نقول أنهم نجحوا بجدارة مش بس علشان المنيو المتنوع جدًا ما بين مشروبات ساخنة وباردة وسموزي لأ ده كل حاجة عنده معمولة باهتمام وإتقان وحب، طلبنا من الكوكتيلات Margarita بـ 27 جنيه. وده عبارة عن سفن آب وليمون ومكعبات ثلج خاصة بالمارجريتا، وطعمه كان تحفة زي ما بـ نحبه بالضبط. كمان طلبنا سموزي مانجو بـ 20 جنيه، وكان أجمل سموزي ممكن تشربه في حياتك متوازن ومنعش بعد الأكلة الدسمة دي، بس أجمل حاجة أكلناها في اليوم فعلًا، كانت الـ Crème de la Meme بـ 35 جنيه، ودي زي الكريم بروليه بالضبط بس زيادة طبقة بسكويت من تحت، وكان طعمها حكاية ورواية تبدأ بطبقة السكر المحروق اللي أول ما تخبطه بالمعلقة تسمع أجمل صوت تكسير في الدنيا لطبقة زجاجية خفيفة، وبعد كده تدخل على طبقة الكريمة مع طبقة البسكويت الدايب اللي كنا نتمنى يبقى مقرمش شوية، بس كان طعمه ممتاز، يعني كان أجمل ختام لليوم. جربيس مكان لطيف جدًا للعائلة أو للأصحاب، أيًا ما كان اللي هـ تطلبه هـ تستمتع به أكيد، سواء أكل أو مشروبات، لأن كل حاجة بـ يعملوها بحب وشغف واهتمام ودي عوامل النجاح لأي مكان.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن