أحذية تسوق in Cairo, Egypt

تسوق

يونيسكس: أحذية وشنط على الموضة وبأسعار مناسبة في جراند مول المعادي
اصدرت في: 22/02/2016

من فترة وإحنا متابعين الحاجات اللي بـ تنزل المحلات وأسعارها والموضة في الجزم بالذات اللي بـ تختلف كل فترة، وبـ تنزل حاجات جديدة بـ تخلى البنات عندها رغبة أكبر في التسوق، ومن الموضة السنة دي البوت اللي بـ يبقى جزء من رقبته قماش بألوان مختلفة، وباقي البوت بـ يبقى جلد، ولاقينا أنواع مختلفة من النوع ده في يونيسكس – unisex فى جراند مول المعادى. أول ما دخلنا المكان لفت نظرنا من الفاترينة وجود أعداد كبيرة من الكوتشي المشجر، منها اللي برباط ومقلمة أبيض في أسود بخطوط عريضة عليها، ومنها المفتوح شوية من الأمام وبرضه قماش وفيه منه منقط فيروزي في أبيض أو روز في أبيض، ده غير بقى المفاجأة الكوتشي اللي بقماش الجينز وبدرجات مختلفة وكل ده بسعر واحد 150 جنيه. أما بقى أكثر حاجة عجبتنا هناك فكانت البوت اللي تكلمنا عليها قبل كده اللي كلها جلد لحد كعب الرجل وطرفها بـ يبقى خيط رفيع من قماش بألوان مبهجة، وكان فيه منها كل الألوان أسود وبني وكحلي وسعرها معقول (275 جنيه)، كمان كان فيه بوت أطول لحد قبل نصف الركبة، وكان فيه منها السادة واللي فيه شكل بسيط عليها زي خيطين جنب بعض (300 جنيه). برضه لفت نظرنا مجموعة سبدراي جلد سادة خالص كل الألوان (150 جنيه)، وكان فيه منها الأحمر والأزرق والأسود والبيج بدرجاته، بس أكثر حاجة بـ تميز المكان هي مجموعات البوت القصيرة اللي فيه منها شيمواه وجلد بألوان فاتحة زي الأزرق ودرجات البني والأسود، وسعرها بـ يبدأ من 265 لـ 400 جنيه، طبعًا في وقت زيارتنا كان فيه تخفيض على الباليرينات السادة واللي عليها حاجة بسيطة زي فيونكة من الوش كل الألوان، وسعر الواحد فيهم (75 جنيه). أما مجموعة الشنط فكانت عادية وأغلبها سادة، وفيه منها اللي جلد طبيعي، أكثر شنطتين عجبونا كانت شنطة سوداء مربعة كبيرة جواها شنطتين ثانيين أصغر حجمًا (275 جنيه)، وواحدة زيها بني بس مدورة شوية مش مربعة بنفس السعر. تجربتنا هناك كانت مختلفة كان نفسنا نشتري حاجات كثيرة من عندهم، لكن الميزانية لا تسمح بكل ده، تابعوهم هـ تلاقوا دائمًا عندهم كل جديد بأسعار مناسبة.

...

ميس توتي: لبس شتوي وفساتين سواريه في مكان واحد في المعادي
اصدرت في: 07/12/2015

كثير من البنات بـ يحبوا فكرة أنهم يلفوا على أكثر من محل بعد كده يختاروا هم هـ يشتروا إيه، والحقيقة أننا مش بـ نتبع الأسلوب ده قوي لو مقتنعين 100 % من اللي شوفناه وطلع علينا حلو، لكن ميس توتي – Miss Tutti هـ يوفر عليكم حيرة كبيرة بالتنوع اللي لاقيناه عندهم. مبدأيًا الأسعار هناك معقولة جدًا في كل حاجة، ممكن بس ما يبقاش فيه تعدد كثير في أنواع الفساتين السواريه، لكن التنوع في باقي الحاجات من بنطلونات جينز وسويت شيرت وجاكيتات خفيفة، كل الحاجات الأساسية موجودة، إحنا عجبنا هناك التنوع والأسعار، لفت انتباهنا بنطلون جينز خامته طرية جدًا مش زي الجينز العادي، ولونه ما بين الأزرق الغامق واللبني (150 جنيه)، وكان فيه منه كل المقاسات ودرجات الجينز المختلفة. عجبنا بلوفر مرسوم عليه دوائر ومثلثات بشكل هندسي فيه صفوف وكان فيه كل درجات البني والبيج، وكان بحوالي (220 جنيه)، وكان فيه منه اللون الأسود واللون الأزرق، كمان كان فيه بلوزة خفيفة طويلة لحد الركبة مدرجة بكل الألوان أصفر وبني وبرتقالي وأزرق وأبيض (175 جنيه)، برضه كان فيه مجموعة جاكيتات خفيفة لحد ما بعد الركبة، وكان مرسوم عليها شكل هندسي شبه السمبوكسة (245 جنيه)، وكان فيه منه كل الألوان البيج والأزرق والبرتقالي، ومعاه بلوزة طويلة خفيفة برضه لحد الركبة (145 جنيه). آخر حاجة عجبتنا كان جاكيت طويل قوي قبل الكعب بشوية ولونه بيج في بني غامق (225 جنيه) وكان مرسوم عليه بطريقة حلوة مثلثات صغيرة وخطوط بني، وبعدين فراغ كبير فيه سمبوكسة باللون البني برضه. "ميس توتي" مكان لطيف أنك تشتري منه أكثر من حاجة، بس أكيد مش كل الحاجات اللي أنت محتاجاها.

...

شو رووم: أرخص أسعار أحذية وشنط في سيتي ستارز
اصدرت في: 09/04/2015

محلات كثيرة وماركات معروفة جدًا بـ نحتار ما بينهم في مكان زي سيتي ستارز، ما بين الجودة والشكل والسعر وكل ده متوفر في محل "شو رووم – Shoe Room". مبدأيًا، كان عنده مجموعة شنط مميزة صغيرة مربعة ومستطيلة سادة وللسهر، بس أكثر حاجة عجبتنا كانت شنطة للظهر، مليانة زخرفة هندي وورود ملونة أحمر وروز وأزرق وأسود وأصفر في شكل صفوف كل صف لون، ده مقدمة الشنطة أو واجهتها، لكن النصف الثاني فيه زخرفة زرقاء على شكل ورود خفيفة بـ 200 جنيه. وكان فيه شنطة مربعة فضي وأسود وكل الألوان فيها خطوط من الأمام وتنفع لبعض الظهر، كمان كان فيه شنطة قماش كلها ألوان مبهجة وزخارف هندي وتنفع للبحر بـ 150 جنيه، وكان فيه مجموعة شنط صغيرة جدًا، فيها سوستتين من فوق ولها ذراع طويل ذهبي، ومنها كل الألوان وكانت بـ 185 جنيه بس أكثر لون عجبنا اللون الروز، وأغلب الشنط يبدأ من 150 وينتهي لـ 300 جنيه. أما مجموعة الأحذية، فأول حاجة لفتت نظرنا كانت أحذية عادية قماش مغطي نصف الرجل بـ 140 جنيه و فيه منها كل الألوان. ونوع زيها بس كله ألوان هندي نفس قماشة الشنطة خطوط وورود بكل الألوان بـ 140 جنيه برضه، وكمان كان فيه باليرينات عادية فيها فيونكة من فوق والقماشة بتاعتها جلد وفيها خيوط مخيطة فيها زي الجاكيت الجلد وكانت بـ 120 جنيه، ده غير السابوهات اللي بصوباع واللي كروس وكميات الباليرينا بأشكالها المختلفة واللي أسعارها مش غالية. كمان مجموعة باليرينا سادة، طرفها بس على شكل مثلث ذهبي في منها كل الألوان، بـ 130 جنيه. وعنده برضه مجموعة تالونات High Heels منها واحد مفتوحة من الأمام على شكل نصف دائرة صغيرة، وعليه سلسلة ذهبي على شكل ضفيرة كبيرة بـ 130 جنيه، وفي منها كل الألوان برضه. وواحدة ثانية عادية وعلى طرفها مثلث صغير جدًا ذهبي وبنفس السعر. أهم حاجة في محل الأحذية والشنط أن يكون أسعاره حلوة وذوقه حلو، وده متوفر في Shoe Room.

...

هاش بابيز: أحذية طبية وأشكال كلاسيكية في المعادي
اصدرت في: 01/12/2014

"هاش بابيز - Hush Puppies" ماركة عالمية أمريكية بـ تتميز أنها بـ تصنع أحذية طبية من جلود طبيعية تريح الرجل. أول ما بـ تدخل المحل بـ تجذبك بساطة تصميمات الأحذية وجمال جلودها وألوانها، الحقيقة أننا استمتعنا بمجموعة الشتاء اللي كانت أغلبها Boots سواء اللون الأسود أو البني لأنهم كانوا يتميزوا بالسلاسة والتصميم البسيط سواء في الحجم الطويل أو القصير. فتلاقي مثلًا بوت طويلة ومافيهاش غير حزام نفس لون البوت وفيه حتة معدن صغيرة بلون مختلف، أو حزامين بنفس الشكل واحد في الأول عند الكعب والثاني في الآخر، أو بوت شينوا كأنك تنيت الجلد كذا مرة بشكل مموج فأصبح شكله جميل، كمان كان فيه مجموعة للأحذية الرياضية والتقليدية اللي هي شبه الكوتشي بالضبط بس قماش أو جلد. وبـ تبدأ أسعارهم من 800 جنيه لحد 1.500 جنيه وده يعتبر رخيص بالنسبة لماركة عالمية، كمان عنده تشكيلة محافظ هائلة بـ 170 جنيه وشنط حريمي تبدأ من 500 جنيه. عجبتنا شنطة بني صغيرة فيها مربعات وأيديها طويلة مناسبة للحياة اليومية وكانت بـ 500 جنيه، وكان فيه شنط تانية كثير منها اللي عادية جدًا بس تقدر تميز جمالها في نوع الجلد لأنها مربعة وعلى الجنب عاملة شكل مثلث وكانت بنفس السعر تقريبًا، كمان عجبنا Half Boot أسود بسيط فيه فاتحة من الجنب على شكل حرف U مبطنة بأستيك أسود مطاط يريح الرجل. وكان عنده مجموعة باليرينا Ballerinas ، متنوعة بس ألونها قليلة للأسف، شوفنا الأسود والبني بس وأسعارهم تبدأ من 450 جنيه، وكان فيه Talons طولها 7 سم برضه كانت بسيطة جدًا منها لونين بس الأسود والبني بحوالي 700 جنيه. طبعًا كل تصميمات المحل بـ تعتمد على أنها تريح الرجل وما تتعبش الظهر فحتى التصميمات اللي فيها كعب بـ تبقى مصممة أنها ما توجعش الظهر وعلى حسب كلام البائع هو تصميم طبي 100%. طبعًا الـ Brands بـ يبقى لها زبائنها المخلصين اللي ما يقدروش يحسوا بجمال الحذاء أو جودته إلا لو كان ماركة مشهورة، بس ده مش بس بـ ينطبق على هاش بابيز، علشان هو كمان بيوفر لك موديلات أحذية ممتعة وطبية. لو حابين تعرفوا أكثر عن التصميمات ممكن تزوروا موقعهم من هنا أو صفحتهم على الفيسبوك.

...

إيجو: فرع جديد للبوتيك الفخم في فيرست مول بالجيزة
اصدرت في: 24/11/2014

طبيعي جدًا أن إيجو- Ego يفتح فرع ثاني في واحد من أفخم المولات في مصر وهو فيرست مول في الجيزة، لأنه تقريبًا المكان الوحيد اللي بـ يقدم للطبقة الراقية تجربة تسوق مختلفة بعرضه لعدد كبير من منتجات أشهر دور الأزياء في العالم. مش هـ نبالغ لما نقول أن الأسعار في إيجو فوق طاقة المتسوق العادي، لأننا ببساطة بـ نتكلم عن أسماء ماركات عالمية زي "أرماني"، "جيمي تشو"، "إيف سان لوران"، "كلويه" وغيرها. الفرع ده متخصص في الإكسسوارات فقط. أول ما دخلنا المحل، القائم على خدمة البيع رحب بنا بإسلوب بارد وفيه درجة كبيرة من الإرتياب، فعرفنا أننا في خلال جولتنا هـ نكون تحت المراقبة، وده اللي حصل بالفعل. أول جزء مخصص لحقائب السيدات، المحافظ والأحذية، غير مجموعة كبيرة من الإكسسوارات. لاحظنا أن بالرغم من أن القطع بـ تنتمي لماركات عالمية، إلا أن معظمها تفتقر الذوق الراقي. لفت نظرنا مجموعة كبيرة من حقائب "زاجلياني" المصنوعة من جلد الثعبان الملون، بوت طويل من "بالدان". عجبنا بوت من "سيرجيو روسي" من الجلد الناعم الرمادي، سعرهم وصل (10.000 جنيه). أما مجموعة "جيمي تشو" فهى كلاسيكية بأحذية معظمها كعبها عال ومدببة، أسعارها بـ تفوق (4000 جنيه). وسط المجموعة دي لاقينا حذاء High Top، وهو حذاء رياضي برقبة ومرصع بالألماظ –مش حقيقي أكيد- سعره (7700 جنيه). الجزء الثاني المخصص للرجال ما يختلفش في فخامة منتجاته عن الجزء الأول؛ لفت نظرنا حذاء شمواه أزرق، ومجموعة كبيرة من زراير القمصان والأحزمة والمحافظ والكرافتات. ده غير أن فيه عدد كبير من أحذية الأطفال، أسعارها بـ تبدأ من (1000 جنيه). قبل ما نلاقي على الهدية المناسبة اللي كنا بـ ندوّر عليها أثناء مهمتنا، القائم على خدمة البيع إرتاب فينا لمجرد أننا كنا بـ نستخدم الموبايل بصفة متكررة. دقائق وكان مديرة الفرع بنفسها بـ تراقبنا، بعد لحظات سألتنا بنفاذ صبر عن سبب إهتمامنا الزائد بمعرفة سعر كل قطعة. من غير شرح كثير، بعد موقف لا نحسد عليه تم اصطحابنا للخارج. بلا شك إيجو متميز، وإحنا ما نقدرش ننكر الموضوع ده. ولكن بالمنتجات والأسعار دي، من المتوقع أن الخدمة تكون أرقى من المستوى اللي شفناه. نصيحة أخيرة: إقفل موبايلك وما تسألش عن الأسعار بطريقة مبالغ فيها، علشان ما تخرجش بالقوة من المحل.

...

ديبنهامز: المتجر الإنجليزى متعدد الأقسام وصل كايرو فيستيفال سيتى
اصدرت في: 23/11/2014

يمكن لأنك نادرًا ما بـ تشوفهم وسط مشهد التسوق القاهرى الراقى، لكن يفضل حبنا للمتاجر متعددة الأقسام أبدى، ببساطة شديدة النوع ده من المحلات عنده القدرة على توفير حياة –وكمان تجربة تسوق– أكثر روعة وسهولة، عن طريق تقديم كل حاجة ممكن تحتاجها فى مكان واحد. مع فرع موجود بالفعل فى الإسكندرية، الاسم البريطانى المعروف "ديبنهامز -Debenhams"، وصل أخيرًا للقاهرة. المحل بـ يحتل مكان ضخم فى مول كايرو فيستيفال سيتى، ولما نقول كبير نقصد أن مساحته تساوى مساحة من 4: 5 محلات متوسطة الحجم. بإضائته المشرقة وألوانه الفاتحة البسيطة، المحل يتميز بديكورات معاصرة أنيقة، لاحظنا على طول ندرة البائعين بطريقة غريبة، وكل فين وفين لما نشوف بائع واحد. أول ما دخلنا لاقينا نفسنا فى قسم ملابس الأطفال، واللى بـ يعرض مجموعة متنوعة من الاختيارات الجميلة للأطفال من كل الأعمار، من الرضع لغاية 12 سنة. تحركنا من قسم الأطفال، ووصلنا لقسم الحمامات، وفيه مجموعة من مستلزمات الحمامات القطنية، من البشاكير لممسحة الأرضية. البشاكير موجودة بكل الأحجام (فوط اليد سعرها 110 جنيه وفوط الاستحمام 230 جنيه)، والألوان مافيش أكثر منها بعدد يوصل 42 لون متنوع. بعد كده وصلنا لقسم الرجالى، وفيه كنا وسط مجموعة من الأزياء الراقية من إمضاء عدد كبير من مصممى ديبنهامز الحصريين. بالنسبة للملابس الكاجوال المتينة، عندك ماركة Maine الرائعة، بتقديمها لحاجات منها قمصان كاروهات (400 جنيه) وبنطلونات كاكى (500 جنيه). لو عاوز حاجة أقرب شوية للملابس الرسمية، سمارت كاجوال يعنى، ماركة John Rocha عندها الحل، بـ تقدم حاجات منها جاكيت أسود أنيق (1100 جنيه)، وجاكيت رمادى أقل رسمية شوية فكرته مستوحاه من الكارديجان (770 جنيه). الجاكيتات السابقة ممكن معاها سترات برقبة V 320 جنيه من ماركات أسعارها معقولة شوية زى Thomas Nash. قسم الرجالى كمان يشمل قسم لملابس البيت والغيارات الداخلية. فى الوقت نفسه، قسم الحريمى كان مليان حاجات لكل المناسبات. الماركة الشهيرة Betty Johnson كانت أول حاجة نشوفها ولفتت انتباهنا منها توب شيفون أزرق مخضر (650 جنيه) وبليزر (1100 جنيه). بالنسبة للمقاسات الكبيرة، الاسم البريطانى الشهير إيفانز Evans بـ يقدم مجموعة ضخمة تشمل فستان أبيض برقبة دانتيل (650 جنيه) وكارديجان مريح وطويل (525 جنيه). نروح على ملابس السهرة الخلابة، وهى من تقديم اسم ثانى شهير فى عالم الموضة البريطانية، وهو Coast واللى بـ يقدم مجموعة من الفساتين المثيرة. أجمدهم كان فستان أخضر طويل لامع (2900 جنيه)، مع فستان قصير لونه برتقالى (2250 جنيه). لو المطلوب حاجة كاجوال أكثر، جينزات سكينى من Jasper Conran بـ 700 جنيه، كان شكلها مريح جدًا وعلى الموضة فى نفس الوقت، وهـ تكون رائعة مع شنطة اليد الأسود فى كريمى من Julien Macdonald بـ 800 جنيه. الخريطة الموجودة وسط الجينزات، واللى بـ توضح الفرق بين القصات كانت مفيدة وتعتبر إضافة ممتازة، عجبنا كمان خط Miss Selfridge بقطعه الصغيرة حجمًا، ووقعت أعيننا على بوت أسود (699 جنيه) وحذاء أحمر بكعب عالى (599 جنيه). بعدها جاء الدور على قسم معقول –إن لم يكن عادى– للماكياج والعطور، بـ يعرض منتجات تجميل من أسماء شهيرة منها شانيل، لانكوم ، YSL، Bourjois، كلارينس وجيفنشى وحاجات ثانية. ديبنهامز أكيد يعتبر إضافة مميزة لمشهد التسوق المصرى، ورغم أن بعض القطع أسعارها غالية، لكن واضح جدًا عليهم الجودة العالية مع ماركات كثيرة مش موجودة فى أى مكان ثانى. المحل يعتبر مكان هائل للتسوق لأصحاب الذوق الرفيع، وكمان بديل أفضل من الأسماء البريطانية اللى بدأت موضتها تتراجع زى توب شوب واحد من الإضافات الجديدة لكايرو فيستيفال سيتى وأقرانه.

...

سليدجرز: أحذية مريحة على الطراز الفرنسى فى مول العرب
اصدرت في: 09/09/2014

فى وقت ما سيل الماركات المشهورة مستمر فى الانتشار فى كل مكان من القاهرة، يوم عن يوم بـ يزيد احترام وتقدير الجودة والخامات المريحة اللى بـ تقدمها المصانع الكبيرة، الموضوع مش مجرد شعار مشهور وخلاص. الماركة الفرنسية "سليدجرز Sledgers" انضمت لكتيبة مول العرب بتقديمها "ستايل فرنسى مريح" من الأحذية للرجال والسيدات، مصممة خصيصًا بنعل مطاطى مريح لقدمك. بجانب تقديمهم لتشكيلة متنوعة للسيدات، المحل كمان مخصص قسم لأحذية Aerosoles، وهى ماركة أحذية حريمى عالية الجودة، وهناك بـ يعرضوا مجموعة منتجاتهم الكاملة. فى مكانه الموجود بين بوابة 18 و19، العرض الخارجى للمحل إضاءته جذابة بكشافات قوية صعب تفوتك. من الداخل، المحل مقسوم لقسمين، واحد فيهم بـ يعرض منتجات سليدجرز والثانى فيه منتجات Aerosoles. العرض المهبر داخل المكان مساحته كبيرة ومنظم بشكل أنيق، قدر يسهل من عملية الفرجة على التشكيلة المعروضة. تشكيلة Aerosolesالحريمى تبدأ من موسم الصيف لغاية موديلات الشتاء، ومن أحذية السهرة والحفلات، لصنادل الصيف وأحذية سادة بدون رباط، وكلهم معروضين بألوان متنوعة وتصميمات بسيطة. قطع بسيطة تشمل مجموعة كبيرة من صنادل صيفية مسطّحة (549 جنيه) مع صنادل بكعب عالى (649 جنيه) وصنادل بكعب قصير (599 جنيه) بمجموعة كبيرة من الألوان المرحة. تصميمات تقليدية ثانية تشمل أحذية مفتوحة من الأمام بدرجات من الرمادى مع كعوب ممتلئة (599 جنيه)، عليها رسومات ورد لطيفة، وصنادل كاجوال بكعب قصير (549 جنيه) بألوان من الأسود، والأبيض والكريمى. أكثر نوع منتشر فى العرض وقت زيارتنا كانت أحذية مناسبة للشغل؛ مريحة، بسيطة ومتينة. قطع ثانية استثنائية تشمل أحذية مسطحة عملية (549 جنيه) متوفرة بدرجات ألوان خفيفة، وكمان مجموعة أحذية شيك للمشاوير الرسمية بكعب متوسط الارتفاع (699 جنيه) درجات ألوانها هادئة. رغم أن Aerosoles بـ تقدم تشكيلة من شنط اليد، لكن الشنط المعروضة كانت قليلة -سعرها حوالى 599 جنيه– وشكلها عادى، بدرجات ألوان جذابة من الأزرق، والبرتقالى والأصفر، يعتبروا مناسبين جدًا لفصل الصيف. كل المتاح من أحذية سليدجرز الحريمى كانوا شكلين: باليرينا متعددة الألوان سعرها مبالغ فيه (999 جنيه) وواحدة كاجوال كعب عالى لونها سمنى (1199 جنيه). فى الناحية الثانية من المحل، أحذية سليدجرز الرجالى معروض منها مجموعة متنوعة من الأشكال والأذواق بجودة كويسة، وأحذية كلاسيك مع أحذية جلد مسطحة وطرية، أسعارهم بين 1099 جنيه لغاية 1499 جنيه. صحيح كل حاجة هنا غالية، لكن المجموعة الكبيرة من الأحذية بجودتها العالية تقدر تجذب الزبائن. لو كنت بـ تفكر فى حذاء بسيط، يعيش وجودته عالية، يبقى الموضوع يستحق السعر.

...

روكبورت: فرع جديد لمبتكر الأحذية خفيفة الوزن في جراند مول
اصدرت في: 24/06/2014

من سنة تقريبًا بدأت أحذية «روكبورت - Rockport» العالمية تظهر في مصر من خلال بعض المحلات داخل المراكز التجارية، لكن بدأت فروع مستقلة تفتح علشان تبيع موديلات روكبورت بس، وشوفناها في سيتي ستارز وداندي مول ومعادي سيتي سنتر ومؤخرًا في جراند مول المعادي الجديدة. المحل موجود في الدور الأول، مساحته مش كبيرة، المعروضات كمان مش كثيرة، حاجة غريبة جدًا لاحظناها في عدد كبير من محلات الأحذية والإكسسوارات مؤخرًا، بالذات الماركات المعروفة والعالمية، و«روكبورت» ما كانش استثناء للظاهرة دي، كان عارض موديلات محدودة جدًا من الأحذية الرجالي والحريمي، والـ New Arrivals أو موديلات الموسم الجديد كانت ما تزيدش عن 10 موديلات في كل قسم، لكن الميزة أنه كان عارض موديلات السنين اللي فاتت وعليها خصومات كبيرة بـ توصل لـ 30 % من سعرها، أخذنا جولتنا بين أرفف المعروضات وكان لنا الملاحظات التالية. روكبورت للي ما يعرفش متميزة بفكرة الوزن الخفيف للحذاء والنعل الصحي المرن المريح في المشي وفي نفس الوقت قوي ويستحمل الظروف المختلفة، يعني تقدر تقول أن دي النسخة الكلاسيكية والكاجوال من موديلات Crocs الرياضية المشهورة بخفة وزنها. روكبورت عملت موديل بـ ينزل بقى له سنتين تقريبًا اسم True Walk له نعل مميز فيه انحناءات معينة تساعد على المشي لفترات طويلة بدون ألم، وكمان بـ تعالج حالات الفلات فوت بمرور الوقت، كأنه حذاء طبي لكن بشكل مودرن وشيك. بمناسبة الشياكة الموديلات هنا فيها فلتات، حاجات حلوة جدًا مافيش زيها في محلات ثانية، وفيه موديلات كلاسيكية عادية زي اللي بـ نشوفها في محلات زي Geox وScarpa وبعض الموديلات الضخمة زي قريناتها في CAT وTimberland لكن زي ما قلنا الصفة المميزة للمعروضات هنا هي الوزن الخفيف، حتى لو النعل سميك، هـ تلاقيها وزن الريشة. في القسم الرجالي عجبنا هاف بوت فيه منه من الجلد الطبيعي اللميع (1100 جنيه) ونفس الموديل من الجلد المقلوب أو المشحم زي ما بـ يُقال عليه (900 جنيه) وده من موديلات السنة اللي فاتت، مناسب للملابس الكاجوال والكلاسيك. وفيه موديلات تقليدية جدًا، أحذية زي الكتاب ما بـ يقول، بأسعار من 750 لحد 850 جنيه، وطبعًا كان لازم يكون لهم نصيب من موديلات الأحذية الفلات المنتشرة اليومين دول وعملوا موديل واحد بالألوان الأسود والبني والكحلي بسعر 700 جنيه. ومافيش أي موديلات رياضية، هنا أحذية رجالي صريحة وصارمة. نفس الكلام بالنسبة للموديلات الحريمي، فيه أحذية سهرة كلاسيكية جدًا مناسبة للفساتين والملابس الرسمية بأسعار بـ تبدأ من 450 جنيه، وفيه موديلات أقرب للأحذية الرياضية وشكلها رجالي حبتين بأسعار من 500 لحد 800 جنيه. لكن ما حسيناش أن هنا المكان المثالي للأحذية الحريمي، إلا لو واحدة بـ تدور على الأحذية الخفيفة أو الـ True Walk اللي قولنا عليها هـ تلاقي منها بعض الموديلات هنا. الإكسسوارات محدودة، فيه أحزمة جلد رجالي بسعر غير منطقي هو 500 جنيه، مافيش أي مبرر للسعر ده، حتى موظفين البيع نفسهم كانوا مش مقتنعين به وهم بـ يقولوا لنا. الخدمة في الفرع ده معقولة، موظف البيع كان مكشر شوية بس كان بـ يساعدنا لما بـ نطلب المساعدة وبس وده في حد ذاته كويس، لكن بما أن الأسعار زي ما ذكرنا، يبقى لازم تبقى الخدمة على نفس مستوى الأسعار، لأن القرار هنا بـ يبقى صعب، يعني اللي هـ يشتري محتاج يأخذ ويدي مع نفسه ومع البياع كثير قبل ما يدفع 1400 جنيه في حذاء يبدو عادي، بس في النهاية روكبورت بـ يعمل حاجة مختلفة تستحق التجربة.

...

ستيف مادين: الماركة الأمريكية المشهورة دلوقت فى مول العرب
اصدرت في: 03/04/2014

مافيش دولاب فيكى يا مصر مش بـ يحب يتعلق فيه هدوم مصممين الأزياء المشهورين، وعلشان كده مشهد التسوق القاهرى لسه بـ يشوف إضافات عالمية من المحلات المشهورة. لكل عشاق الأحذية وشنط الجلد الشيك، ماركة الأحذية والإكسسوارات الأمريكية "ستيف مادين - Steve Madden" انضمت لحلبة تسوق 6 أكتوبر الضخمة مول العرب، قريب من بوابة رقم 2. وإحنا فى أواخر الشتاء، أوكازيون ضخم حصل فى المحل علشان يوسعوا مكان لمجموعتهم الصيفية الجديدة. فى الظروف العادية، منتجات ستيف مادين غالية نوعًا ما، بس وقت زيارتنا، كل حاجة فى المحل كانت بنصف سعرها. المحل بـ يغطى مساحة كبيرة، وواسع كفاية بحيث تقدر تتفرج على كل حاجة من غير توهان بين الستايلات المختلفة. على الناحية الثانية، الحوائط الوردى الفاقعة، الأصفر والأخضر كانت مشتتة شوية، بـ تأخذ تركيزنا بعيد عن مهمتنا الأساسية. وسط تدويرنا فى شباك العرض، لاحظنا مجموعة محدودة من شنط يد جلد، مع تشكيلة مختلطة من أحذية جلد إيطالي عالية الجودة. المعروضات الحريمى متنوعة بين أحذية بوت، وفلات، وكعب عالى وأحذية سهرة، أما الأحذية الرجالى كانت حوالى 20 زوج فى المحل كله. على الشمال أغلب الأحذية الكاجوال الفلات بألوان وأشكال وتصميمات مختلفة. باليرينا سوداء من الجلد المقلوب، سعرها كان فى الأساس 500 جنيه، وبعد التخفيض وصل 255 جنيه، مناسبة وعملية للوقت ده من السنة، متوفر منها لونين مختلفين. معروض فى نصف المحل مجموعة من أحذية بكعب عالى وصنادل، بأشكال وأحجام كعب مختلفة، المجموعة المعروضة كانت مزيج كبير من الأذواق الماشية مع الموضة؛ شوية منهم سادة وبسيط وشوية على أحدث طراز، ومجموعة ثانية لامعة وبراقة. مع شكلين بس من البوت الجلد القصير، كانوا هم الحاجة الوحيدة اللى بره الأوكازيون. البوت الإيطالى من الجلد المكشوط كان بلونين أسود وبنى مع كعب قصير (1399 جنيه). على يمين المحل مجموعة شنط يد بنى، وأسود، وأبيض وجلد ثعبان. كل الشنط أسعارها قريبة تبدأ من حوالى 700 جنيه وتنزل لغاية 200 جنيه. صحيح الأسعار بعد التخفيض مميزة، بس المعروضات كانت عادية من ناحية الشكل وتنوعها قليل. بشكل عام، كنا مبسوطين أن ستيف مادين بـ يقدم كل أنواع وأشكال الأحذية. وبما أن الأوكازيون لسه شغال، الأسعار المخفضة كافية أننا نعمل حملة تسوق ما حصلتش.

...

إيجل: ملابس رجالي بأسعار جيدة في مصر الجديدة
اصدرت في: 31/10/2013

محل جديد لفت نظرنا في مصر الجديدة، وبالتحديد في شارع النزهة قريب من أرض الجولف، هو محل «إيجل - Eagle» للملابس الرجالي الكاجوال والكلاسيك، ويمكن الكلاسيك أكثر شوية، من بعيد وأنت معدي أمامه مش هـ تشوف غير البدل الكاملة والسموكن والبليزرات، لما تدخل جوه هـ تلاقي مجموعة من الجينز والبول أوڤر والقمصان الكاروهات الشتوية. لكن التركيز الأكبر هنا وحتى البضاعة الجديدة اللي كان العمال في المحل منهمكين في رصها وتوزيعها على الأرفف وقت زيارتنا كانت كلها كلاسيك، وفيه مجموعة كبيرة من الإكسسوارات زي المحافظ والأحزمة الجلدية والكوفلينكس (أزرار القميص) وفيه عدد كبير من الأحذية الكلاسيكية، ومجموعة صغيرة من الأحذية الكاجوال والشامواه والموكاسان اللي شبه السبدرين. المحل مساحته مش كبيرة لكن المعروضات متنوعة وكثيرة بدرجة ملفتة، هـ تلاقي كل حاجة تقريبًا وكل الأذواق، والظريف أن الأسعار هنا قليلة بجد، يعني صف السويترات الجلد الموجود في منتصف المحل أسعاره من 300 لـ 400 جنيه، وقصته ظريفة (slim cut) وألوانه حلوة فيه منه البني والأسود والرصاصي، بس المشكلة أن أكبر مقاس في السويتر هنا اللي هو XXL في مقام اللارج العادي في أي محل ثاني، والتقفيل مش ممتاز لكن معقول بالنسبة للسعر. علامة «إيجل» التجارية موجودة على موديلات كثير من البليزرات والأحذية والجينز، لكن في الوقت نفسه المعروضات كلها مستوردة، من الصين وتركيا وغيره، لكن علامة إيجل اللي حاطينها بـ تبقى للتمييز مش أكثر. البليزر بأسعار من 350 لحد 500 جنيه وفيه مجموعة كانت بـ 900 جنيه وعليها خصومات 50 % لأنها من موديلات السنة اللي فاتت، قصتها كلها ومصنوعة من الصوف والكتان والقطن العادي، موديلاتها كاجوال بزيادة أو كلاسيك تقليدي، أذواق كثيرة موجودة هنا وألوان عجيبة زي النحاسي والأخضر، بس برضه مشكلة المقاسات موجودة وهـ تتعب على ما تلاقي المقاس لأنهم بـ يدوروا في المخازن واللي أنت فاكر أنه لارج بـ يطلع هنا medium فلازم تطلب أكبر من مقاسك بدرجتين ولا حاجة. الجينز بأسعار من 200 لـ 350 جنيه، وما ننصحش به خالص هنا لأن موديلاته عتيقة وقصاته وألوانه وواضح أنه جايبه المحل من باب أنه يبقى عنده كل حاجة وخلاص، لكن البدل الكلاسيك كانت خطيرة وتستاهل أنك تقضي كل وقتك داخل المحل بـ تتفرج عليها وبـ تقيس في موديلاتها المختلفة، وأسعارها من 1100 جنيه لحد 1600 جنيه، والأحذية بـ 350 لحد 500 جنيه وعجبنا جدًا بعض الموديلات الكلاسيك بلمعة وتصميم جذاب مش شبه الموجودة في أي مكان ثاني، والكوفلينكس بـ 100 جنيه والأحزمة والمحافظ الجلدية في نفس الحدود، وبالمناسبة هنا هـ تلاقي نوع معين من المحافظ مش بـ نلاقيه في أي حتة وهي المحفظة الكلاسيكية المعمولة مخصوص للبدلة، بـ تبقى طويلة كدة وفيها خانات كثير للكروت، وفيه طبعًا كرافتات وبابيون وشرابات وكل ما يلزم الملابس الرسمية للرجال. عجبنا محل «إيجل» وعجبنا أنه مش مبالغ في أسعاره، وعجبنا أن العاملين سايبينك تتفرج براحتك ومش بـ يقربوا إلا لو أنت سألت على حاجة.

...

شاهد المزيد
مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول