الكترونيات تسوق in Cairo, Egypt

تسوق

العجيل: إلكترونيات وأدوات كهربائية وإكسسوارات في مصر الجديدة
اصدرت في: 06/02/2014

أشهر من نار على علم، لكن عدى 4 سنين تقريبًا من عمر كايرو 360 من غير ما نكون كتبنا عنه، كان لازم نسلط الضوء على محلات «العجيل» الشهيرة ونعرف اللي مش عارف هي ليه اتشهرت وبقيت من أهم محلات بيع الإلكترونيات والأجهزة المنزلية وخصوصًا الكهربية، وغيرها من الرفايع اللي مش بـ تلاقيها في أي حتة، وآخر ما تزهق هـ تلاقي حد بـ يقول لك: طيب سألت في العجيل؟ وتروح وتلاقيها في العجيل. عملنا زيارة لفرع المحل اللي في شارع بغداد في الكوربة في مصر الجديدة، على نفس الصف اللي فيه محلات TBS وڤودافون، تحت البواكي العريقة المميزة لشوارع مصر الجديدة. واجهة المحل ومدخله صغير وعلى الجانبين فاترينات عرض كبيرة فيها كل الحاجات الملفتة والترفيهية زي أجهزة ألعاب البلاي ستيشن والـ xbox والساعات وماكينات الحلاقة الكهربائية وغيرها من الحاجات اللي مالهاش علاقة ببعضها، لكن العلاقة الوحيدة اللي بـ تربطها أنها موجودة عند العجيل، وهـ نعطيكم أمثلة على الحاجات دي. من الداخل المحل كبير فعلًا، لكن بمساحة طولية داخلية، ممكن تمشي فيها وتتفرج على المعروضات المتنوعة من الأجهزة المنزلية زي المكانس والسخانات والتليفزيونات والأفران والميكرويف، كل الماركات موجودة وفيه موديلات مختلفة من كل ماركة كمان. الحقيقة ما كانش تركيزنا على الأجهزة الكهربائية وقت الزيارة أولًا لأنها موجودة في أماكن ثانية كثير أكثر تخصصًا، وثانيًا لأن أسعار العجيل بشكل عام بـ تبقى أغلى بحاجة بسيطة من مناطق زي شارع عبد العزيز وباقي المحلات اللي بـ تبيع أجهزة منزلية وبس. فكان تركيزنا على الحاجات غير التقليدية والكماليات اللي قولنا عليها، واللي أغلبها ينفع يُقدم كهدايا، وفيه حاجات لهواة الاقتناء وأصحاب الهوايات الخاصة. موبايلات سامسونج وآي فون بكل موديلاتها، تقريبًا مافيش أنواع ثانية، وأجهزة بلاي ستيشن 3 معدلة بأسعار من 2500 لـ 3000 جنيه حسب الملحقات اللي معاها، وفيه xbox ومعاه وحدة الـ Kinect و5 ألعاب ومعدل برضه بسهر 3100 جنيه. ولسه فيها أجهزة بلاي ستيشن 2 بأسعار مميزة، بـ 890 جنيه تقدري تشتري واحد ومعاه 2 ذراع و10 ألعاب. وفيه مساحة كبيرة من الواجهة مخصصة لماكينات الحلاقة بالكهرباء من ماركات فيليبس وبراون وموسر الألمانية، من أول موديلات حلاقة الشعر العادية للـ Trimmer المخصصة للذقن وتضبيط الشارب والحاجات دي، فيه موديلات ألماني أصلي أسعارها بـ توصل لـ 1200 جنيه، وفيه موديلات مصنوعة في الصين أسعارها من 150 لـ 600 جنيه، مش وحشة برضه بس لازم تتأكد أنت بـ تدفع فلوسك في إيه. الساعات ماركة Guess و Alba هي المسيطرة على فاترينات «العجيل» وهي ساعات كوارتز أقرب للكلاسيكية، مافيش موديلات كثير معروضة لكن الموجود شيك فعلًا وأصلي، أسعار من 600 جنيه لحد 1300 جنيه، مناسبة جدًا للهدايا وللأناقة طبعًا. وفيه مجموعة من الكاميرات الديجيتال ماركة Nikon وSony بأسعار من 1500 لـ 3500 جنيه، وغالبًا هـ تلاقي عروض على كل المعروضات طوال السنة، والسعر مكتوب ومشطوب عليه ومكتوب السعر الجديد جنبه والحاجات دي، بس ما ننكرش أن الطريقة التسويقية دي ناجحة جدًا في مصر. هنا من الأماكن القليلة الللي ممكن تلاقي فيها نظارات مُعظمة (400 جنيه) وبعض معدات الصيد، وبايب وولاعات أنيقة وبعض الإكسسوارات المنزلية اللي ممكن تستخدمها كتحف أو ديكورات، ولو خطر في بالكم أي حاجة غريبة مش عارفين ممكن تلاقوها فين بـ ننصحك تسأل في أي فرع من فروع العجيل الموجودة في مصر الجديدة والمهندسين والعجوزة والتجمع الخامس ووسط البلد والمعادي، ولغاية دلوقت إحنا مش عارفين الفرق بين اسم "العجيل" و"رضوان العجيل" ومش فاهمين لو كان حق امتياز أو انفصال بين شريكين، لكن المهم أنهم بـ يبيعوا نفس الحاجات تقريبًا، وبـ يعملوا عروض تقسيط معقولة، لكن كل فرع له شروط مختلفة يفضل تسألوا عليها وأنتم هناك.

...

صالة عرض ياماها: جيتارات، أورج، مضخمات صوت وأكثر فى هليوبوليس
اصدرت في: 01/09/2013

أن محل يعرض ماركة واحد، فده مش معناه بالضرورة حاجة سيئة. رغم أن مافيش اختيارات متنوعة، صالة عرض ياماها Yamaha فى هليوبوليس بـ تعوض النقص ده بتقديمها موديلات مختلفة من أجهزة ياماها بأحجام وأشكال مختلفة. المحل بـ يعرض مجموعة من الجيتارات منها الإيقاعى ومنها الإلكترونى، وأسعارهم المرتفعة بـ تبدأ من حوالى 950 جنيه. كل ما تقدمت أكثر مع الصفوف المجاورة للحائط، كل ما المعروضات زادت إبهارها، وتشدك علشان تسمعها وتعزف عليها؛ أغلى الموديلات هى أكثرها جمالاً وفيها كل الإمكانيات، بـ تكلفك حوالى 4900 جنيه. base guitar أو اثنين مخفيين وسطهم، باختيارات محدودة.الأسعار تتراوح بين 2300: 3200 جنيه. زى كثير من محلات الموسيقى فى القاهرة، واضح أن الأولوية للأورج وأجهزة البيانو. ومرة ثانية، الأسعار بـ تبدأ غالية -من حوالى 1900 جنيه- لكن مثلاً في الجيتارات، حتى أرخص الموديلات تعتبر حاجه مناسبة. يمكن ما يكونش فيها مفاتيح ثقيلة أو صوتها رائع، بس أكيد هـ يكونوا أكثر من كفاية لاحتياجاتك الشخصية، أما لو بـ تدور على حاجة مترفة، هـ تحتاج تمشى شوية داخل المحل علشان تشوف مجموعة ممتازة من آلات الأورج (لغاية 9100 جنيه) بـ تشترك فى المكان مع مجموعة مبهرة من أجهزة البيانو الثابتة. جهز دفتر شيكاتك، لأن ثمنهم بين 15000-35000 جنيه. فى آخر المحل بـ نلاقى غرفة مليانة لحد السقف بمضخمات صوت تناسب كل الاحتياجات، من أجهزة شخصية محمولة لغاية أجهزة موسيقى عملاقة. بالنسبة للجودة، تقدر تختار أى حاجة بداية من موديل عملى رخيص نسبيًا لموديلات ثانية غالية جدًا. واضح أن غرفة العرض دى بـ تخدم المنتجين والفنيين بجانب الموسيقيين المستقلين، يعنى مثلاً جهاز أو اثنين من أجهزة المزج الموسيقى بنظام PA بحجم ضخم وتعقيد رهيب مستقرين فى الأركان البعيدة بأسعار مخيفة زى 160000 جنيه. طقم درامز إلكترونى وحيد موديل Roland DTX-500 بسعر 11000 جنيه يحتل ركن بجانب دولاب مخزّن فيه عصيان بأحجام مختلفة، خيوط للجيتار والكمان (إيقاعى، إلكترونى أو نيلون)، لسان مزمار ألة الساكسفون (رغم أن مافيش ساكسوفون بـ يباع فى المحل)، وصلات مضخم الصوت وهكذا؛ من الآخر كل مستلزمات الأجهزة الموسيقية بأسعار معقولة. موجود كمان بعض الأجهزة التكنولوجية، وبكده تقدر تعتبر المحل ده محل أجهزة أكثر من كونه محل أدوات موسيقية. لو مافيش عندك مانع تتقيد بماركة واحدة، "ياماها" اسم قوى سُمعته معروفة من ناحية الجودة والاستدامة. بعيدًا عن الاختيارات المحدودة تقدر تلاقى طلبك فى صالة العرض، وثق أنها هـ تعيش لفترة طويلة.

...

لابتوب لاند: محل نصب علني وتحوير فى المقطم
اصدرت في: 01/04/2013

تجربة أول مرة نتعرض لها خلال عملنا في موقع كايرو 360، قابلنا قبل كده محلات ملابس أو منتجات فيها عيب فى التصنيع بـ نكتشفه وبـ نرجع للمكان ثاني وعلى حسب.. يا إما بـ يتعاونوا ويبدلوه لنا بقطعة ثانية يا إما بـ يحاولوا يقنعونا أنها كويسة وأن اللى فى عيوننا ده خداع بصري، لكن أنك تروح مكان ويقنعك أنك تأخذ منتج أغلى من سعر السوق بأكثر من 3 آلاف جنيه يبقى ده اسمه إيه؟! "لابتوب لاند" موجود فى شارع 9 بالمقطم خلف مسجد النصر، أول مرة تروح هـ تلف وتدور على رقم العمارة لأن الموضوع متاهات شوية، أول ما توصل هـ تلاقى المكان محتل دورين داخل عمارة (دور تحت الأرض ودور أول)، أول ما تدخل هـ تلاقى غرفة فيها 3 مكاتب وفيها كمان عرض للمنتجات بتاعتهم، والدور اللى فوق الأرض فيه قسم الحسابات، المكان الواسع عارضين فيه منتجاتهم من لابتوب وتابلت وإكسسوارات الكمبيوتر زي السماعات والماوس والشنط والكوفرات، الأسعار مش ثابتة لأنهم كل شوية بـ يعملوا عروض على اللابتوبات والتابلت وممكن يبعتوها على إيميلك. معرفتنا بالمكان ده كانت من خلال شركة بـ تعمل عروض على بعض المنتجات اللى ممكن تشتريها وتأخذ بنفس قيمتها نفس المنتج مجانًا، بمعنى لو أشتريت من عندهم لابتوب هـ تأخذ واحد ثاني بنفس القيمة مجانًا، والقصة بدأت بمكالمات تليفونية من فترة علشان نعرف هل اللابتوب متوفر ولا لأ، وكانوا عاملين عروض تخفيضات بمناسبة عيد الأم، ولما عرفوا أننا تابعين للشركة دي بدأوا يتهربوا ويقولوا أن العرض ده غير متوفر مرة، ومرة ثانية يقولوا أن اللابتوبات خلصت كلها، حتى الموديلات الثانية! حاسينا أننا لازم نتقمص شخصية مفتشين المباحث ونطب عليهم فجأة، أول ما شافونا سألونا أنتم تابعين لشركة العروض دي ولا لأ، وأول ما عرفوا لقينا نفس ردهم أن المخزن مافيهوش لابتوبات ومافيش غير اللى معروض بس! وده لثاني مرة غير منطقي، ووعدونا أنهم هـ يتابعوا معانا بالتليفون اللى ما كانوش بـ يردوا عليه لأنهم حفظوا الرقم! لكن كان فيه واحد منهم متعاون بس كان بـ يبعث لنا إيميلات بقائمة الأسعار بعد تجديدها. بعد فترة من إرسال العروض المتوفرة عندهم بالإيميل -وما كانش فيها اللابتوب اللى كنا عاوزينه وشالوا منها كل الموديلات التابعة للعرض- رحنا لهم ثاني زيارة مفاجأة، استقبلتنا واحدة اسمها منى وسألنا على نفس اللابتوب وأكدت لنا أنه موجود، التعامل كان ودي وكانت بـ تنفذ لنا اللى كنا عاوزينه ورحنا بالفعل دفعنا ثمنه 5.900 جنيه (سعر السوق)، تحمسنا للحظة واعتقدنا أن الموضوع انتهى خلاص وهـ نستفاد من العرض المقدم لنا لكن مافيش كام دقيقة وصُدمنا برد فعل ثاني خالص عرفنا أن سبب تغييره وجود زبائن كانوا قاعدين أول ما وصلنا فما حبوش يعملوا مشاكل أمامهم، لكن أول ما مشيوا اكتشفنا أنهم بـ يطلبوا مننا ندفع مبلغ زيادة لأن ده مش ثمن اللابتوب!! اكتشفنا أن المكان عامل سعرين للابتوب، سعر غير تابع لشركة العروض بـ 5900 وسعر ثاني للناس اللى تابعة لشركة العروض (ثمن اللابتوب الواحد بـ 9.500 جنيه!) فى حين أن ده مش سعره بره فى السوق (بـ يتراوح من 5.900 إلى 6.200 جنيه)، أُمال فين اللابتوب الهدية؟ كأننا من الآخر دفعنا سعر الاثنين! طيب إيه اللى قدمه المكان لنا إضافى علشان نشتري من عنده ونيجي له من آخر الدنيا مخصوص؟ المشكلة أن المسؤول عن الحسابات مقتنع (أو عامل نفسه مقتنع) وبـ يحاول يقنعنا أن دى حاجة طبيعية وأنهم بـ يحددوا الأسعار بناء على سياستهم الخاصة مش بناء على السوق، تعصبنا لأننا مش مصدقين اللى بـ يحصل خاصة أن شركة العروض أكدوا لنا أننا مش أول ناس يحصل معاهم كده وفيه غيرنا اشتكوا منهم ومن الآخر هما بـ يحاولوا يتهربوا من الاتفاق مع الشركة دي، ده غير أن فيه موقع مشهور على الإنترنت بـ يعمل عروض تخفيضات لقينا الناس كاتبين فى التعليقات تحت العرض نفس الشكوى! ولما طلبنا منهم مقابلة المدير المسئول بـ يردوا علينا أنهم هما المسئولين فى المكان! الموضوع مش تهرب بس.. ده تحوير كمان، أكيد جهاز حماية المستهلك له وقفة مع الموضوع ده.. وإحنا كمان كموقع كايرو 360.

...

كومبيوتر شوب: كمبيوترات وإكسسوارات وحاجات ثانية فى الدقى
اصدرت في: 29/01/2013

فى رحلة شرائنا للاب توب جديد، قررنا نروح فرع كومبيوتر شوب الكبير فى الدقى، يمكن نلاقى عنده اللى بـ ندور عليه. تقدر تشوف اللون الأصفر البراق المميز للمحل الموجود فى شارع محيى الدين أبو العز من على بعد ميل.أول ما عدينا من الأبواب الأوتوماتيكية، قابلنا حائط عليه أحدث تليفزيونات سامسونج الذكية -اللى دائمًا إعلانه شغال على التليفزيون- بأحجام 23 و27 بوصة (2555، و3499 جنيه).قابلنا الموظف المسؤول عند الباب وأخذنا فوق عند قسم الكمبيوترات. طلبنا كان واضح وصريح، عاوزين أحسن وأحدث لاب توب موجود بس فيه نقطة مهمة.. لازم يبقى لونه وردى.كل الكمبيوترات الموجودة عليها بطاقة تعريف واضحة، وعليها لسته طويلة بالمواصفات جنب كل جهاز. وعلشان إحنا مش عارفين إيه الكمبيوتر الأسرع، أو إيه حتى اللى ينفع معانا، كل اعتمادنا كان أن الموظف يوصل لحل الموضوع علشان ما عندناش حل ثانى غير أننا نثق فيه.بدأت الرحلة مع الموديلين الوحيدين باللون الوردى عندهم؛ أول واحد سامسونج لونه وردى زاهى فى أسود موديل NP300 بسعر 3555 جنيه، واثنين سونى فايو زى بعض تقريبًا لونهم وردى فاتح (4995 جنيه و6495 جنيه). بعدها عرض علينا لاب توب نوعه ديل ألترا بوك سعره بـ يبدأ من 4299 لـ 6333 جنيه وممكن يتغير له جراب بـ 199 جنيه. رغم أننا اعترضنا بشدة على الموديل ده بالتحديد، خصوصًا أن مافيش جراب لونه وردى موجود، لكن هو أصر أنه موديل كويس وأننا لازم نشترى واحد منهم، أو الأحسن نختار واحد لونه أسود.صحيح أنه كان فاهم كويس هو بـ يقول إيه، لكن فكرة أنك تحارب علشان توصل لطلبك كانت مزعجة شوية، خصوصًا لما الموضوع يبقى فيه مبلغ مش قليل هـ يتدفع. وفى الآخر، الزبون دائمًا على حق، ولا إيه؟بجانب طرق البائعين فى الإقناع، الحاجة الثانية المهمة أن ولا كومبيوتر فيهم معاه نسخة مايكروسوفت أوفيس. كمبيوتر شوب بـ يبيع حزمة الأوفيس كاملة، بس هـ تكلفك 555 جنيه زيادة. لازم كمان تأخذ بالك أن مش كل الكومبيوترات معاها أحدث نسخة من ويندوز 8، علشان كده تأكد أن اللاب توب معاه نسخة جديدة.بعيدًا عن الاسم، كومبيوتر شوب عنده حاجات كثيرة غير الكومبيوترات وإكسسواراتها، فى الحقيقة بـ يقدم تقريبًا أى جهاز إلكتروني ممكن يخطر على بالك. بجانب الأجهزة السلكية واللاسلكية زى ماوسات الكومبيوتر (99 و300 جنيه) والكيبوردات (192 و492 جنيه)، فيه حائط كامل مخصص لشنط اللابتوب بمجموعة من الألوان والتصميمات، زى شنط مبطنة أنيقة ماركة بيلكن تقدر ترتب فيها كل متعلقات الكمبيوتر (374.99 جنيه). كملنا رحلتنا مع الأقسام المرتبة بشياكة، وشوفنا كل التليفونات السلكية واللاسلكية، والحبارات، والسماعات، والهاردات الخارجية، والسيديهات والديفيديهات الفاضية، وأجهزة الألعاب والتليفزيونات التقليدية.بـ يقدموا كمان عدد من إكسسوارات الـ iPhone والـ iPad زى الحوافظ، والأقلام، والأى ستيشنز وسماعات ماركة أى لوفiLuv تبدأ من 89 جنيه. السماعات القطنية اللى بـ تغطى الأذن سعرها 199 جنيه. معروض كمان عدد من أجهزة الأى باد للبيع، لكن للأسف مافيش أجهزة أى فون. ولسوء الحظ، كل أجهزة كومبيوتر شوب مقفولة وبكده ما تقدرش تجرب المنتج قبل الشراء.تقدر كمان تتفرج على منتجات كومبيوتر شوب أون لاين لكن ميزة الموظف فى المحل أنه يرشدك تشترى إيه، خصوصًا أنه بـ يفهم فى الكومبيوترات أكثر من أغلب الناس. أما بقى لو عندك مواصفات معينة فى دماغك، خليك حازم من الأول بخصوص طلبك علشان تقدر توصل للي أنت عاوزه.

...

لودنج: بيع وصيانة وتحديث البلاي ستيشن في مدينة نصر
اصدرت في: 01/12/2012

سوق جديد للإلكترونيات في الدور الأرضي في السراج سيتي مول في مدينة نصر، موبايل وكمبيوتر ومستلزماته وأجهزة ألعاب زي البلاي ستيشن والإكس بوكس والـ Wii. المكان بقى وجهة ناس كثير من زبائن التكنولوجيا، وممكن نشبهه بشارع عبد العزيز في العتبة شوية، لكن الفرق أن هنا المستوى أرقى حبتين، والمول المقفول برضه أحسن من الشارع، لكن في نفس الوقت الأسعار هي هي، وممكن دائمًا تفاصل وتوصل لسعر أحسن، وأنت وشطارتك.بـ نتكلم في المقال ده عن محل محدد بـ يقدم خدمة محددة داخل المول، لكن في نفس الوقت لازم نقول أن المحل ده مش متميز أو فريد بأي شكل بالنسبة لباقي المحلات اللي بـ تقدم نفس الخدمة في نفس المول، وأننا بـ نحكي عن تجربتنا معاه اللي متأكدين أنها كانت هـ تبقى هي هي لو كانت مع أي محل بـ يعمل خدمات في مجال الألعاب وأجهزتها. لأن في المولات والشوارع والممرات التجارية بـ تبقى الخدمة متشابهة بنسبة 90 % والفرق في الأسعار بـ يبقى طفيف أو مش موجود أصلًا، والموضوع كله بـ يرجع للراحة النفسية للزبون ومدى تفضيله لمكان دون الآخر، أو ممكن بـ يبقى الذهاب لشخص بعينه بـ يبقى بسبب السمعة أو الخبرات السابقة أو ترشيحات المعارف والأصدقاء. في النهاية إحنا عاوزين نقول أننا هنا بـ نتكلم عن الفكرة ونوع الخدمة مش عن محل بعينه.محل «لودنج» واحد من عشرات المحلات اللي بـ تبيع أجهزة بلاي ستيشن 2 و3 وأجهزة XBOX وغيرها من Consoles الألعاب. الأسعار هي العادية بالنسبة لأي محل في المول أو في شارع عبد العزيز، مثلًا بلاي ستيشن 3 بهارد ديسك داخلي 320 جيجا بـ 1900 جنيه، والـ 240 جيجا بـ 1750 جنيه وهكذا، لكن الفكرة أنه بـ يعمل التعديل الخاص بالأجهزة علشان تقدر تلعب عليها بالألعاب اللي بـ تحملها على الهارد ديسك الخاص بالجهاز وما تحتاجش تشتري الأسطوانات الأصلية للعبة أو الـ Blu-ray بأسعار خيالية بـ توصل لـ 550 جنيه للعبة الواحدة. بعيد عن موضوع ده قانوني أو لأ، الفكرة أنهم هنا محترفين في الموضوع ده، وبـ يعملوا نوعين من التعديل، تعديل software بمبلغ 150 جنيه وده بـ يتم من خلاله تحميل تحديث معين خاص بنظام التشغيل على بلاي ستيشن 3 وبعد كده تقدر تشغل كل الألعاب الحديثة لحد السنة اللي عملت فيها التعديل، بس بشرط أنك ما تدخلش باللعبة أونلاين علشان الجهاز ما يقومش بتحديث نظام التشغيل تلقائي وفي الحالة دي هـ يتم إفساد مفعول "التعديلة" اللي بـ 150 جنيه. وفيه تعديل ثاني Hardware (350 جنيه) بـ يتم من خلاله زرع شريحة معينة داخل الجهاز لتشغيل الألعاب، وده بـ يتعمل في حالة أن الجهاز يكون مُعدل قبل كده أو دخل عمل تحديث من الإنترنت زي ما قولنا، وهنا بـ يبقى لازم العملية الجراحية دي تتم وتُزرع الشريحة داخل الجهاز. مع كل تعديل من النوعين ممكن تأخذ 5 ألعاب هدية، في حين أن المحل بـ يبيع الألعاب بشكل منفصل بأسعار من 10 لـ 50 جنيه حسب حداثة اللعبة. ودي بـ يتم تحميلها على الجهاز أو تجيب له هارد ديسك خارجي يملاه على الآخر لو حبيت. الموضوع لا يخلو من المجازفة، وفيه احتمالات أن أثناء عملية التعديل يتم مسح ملفات معينة أو لا قدر الله الجهاز يبوظ خالص، لكن ده ما حصلش معانا في تجربتنا هناك، بس كنا عاملين احتياطتنا وعاملين Backup لكل حاجة مهمة على جهاز الـ PS3 الخاص بنا. وفعلًا خلال 4 ساعات اللي سيبنا فيها الجهاز هناك رجعنا ولقينا التعديل اتعمل، لكن اكتشفنا أن بعض الألعاب اللي أخذناها كانت مش شغالة، بس رجعنا وطلبنا تحميلها مرة ثانية وصاحب المكان ما كانش عنده مانع أنه يضبط لنا أي حاجة مش مضبوطة. تجربتنا في «لودنج» كانت عملية وسريعة وفعالة، وبـ نفكركم مرة ثانية أن المحلات هناك متشابهة في كل حاجة، شطارتك بس في أنك تعرف توصل لأحسن سعر وأسرع وقت تخلص فيه مهمتك.

...

الشمس: آلات موسيقية محلية وعالمية الصنع في المعادي الجديدة
اصدرت في: 24/11/2012

فروع محلات «الشمس» للآلات الموسيقية منتشرة في كل أنحاء القاهرة، في العباسية ومدينة نصر ووسط البلد وعرفنا أخيرًا أن فيه فرع فتح في المعادي الجديدة وبالتحديد في شارع اللاسلكي في نفس العمارة اللي فيها شركة "غاز تك". ورغم أن واجهة المحل على شارع اللاسلكي الرئيسي، إلا أن مدخل المحل من مدخل العقار اللي في الناحية الخلفية، يعني لازم تلف لفة طويلة علشان تدخل المحل وتطلع دور كمان لأن المحل في الدور الثاني.«الشمس» طول عمره مشهور بأنه بـ يعرض آلات موسيقية بصناعة محلية، أو من المصانع الخاصة به في مصر وفي الصين وعمل ماركة خاصة به سميت Ash وهو اختصار لكلمة "الشمس" ومن الآلات اللي عليها لوجو Ash كان الجيتار الأكوستك والباص جيتار والعود وبعض الآلات الوترية الثانية. دخلنا المحل وكانت المفاجأة أنه شيك جدًا، وواسع ومرتب بعناية رغم كثرة المعروضات، وده على غير عادة محلات الآلات الموسيقية اللي عادة بـ تبقى البضاعة فيها فوق بعضها واللي بـ تعاني فيها علشان تتفرج على الآلة اللي أنت عاوزها. هنا الوضع مختلف، وبسهولة هـ تقدر تميز كل ركن ونوع الآلات اللي فيه؛ الوتريات في الواجهة زي العود والجيتار الأكوستك والماندولين والتشيللو، جنبها آلات نفخ خشبية، وآلات الإيقاع والدرامز، وعلى اليسار بيانو ألماني ضخم باللون الخشبي الجميل، وأخيرًا الجيتارات الإلكتريك المعلقة ومغطية الجدار كله. الجديد في الفرع ده أنه عارض ماركات ثانية غير Ash في كل الآلات خاصة الجيتار الإلكتريك اللي لاقينا منه موديلات الفيندر المكسيكي (5000 جنيه) والفيندر Squire بـ 2000 جنيه، وموديلات الجيبسون والـ ESP المميزة زي الـ Sambora وغيرها. عرفنا من موظفي المحل أن فرع المعادي -على حد قولهم- هو الاستثناء الوحيد بين الفروع اللي بـ يعرض ماركات وموديلات غير ماركة "الشمس" نفسها. ودي طبعًا كانت حاجة كويسة جدًا بالنسبة لنا لأننا كان عندنا تحفظات شوية على موديلات Ash محدودة الجودة بالمقارنة بالماركات العالمية المعروفة في كل الآلات زي الياماها والـ Ibanez ومع ذلك لفت نظرنا باص جيتار من ماركة Ash شكله عجبنا جدًا وجربنا صوته كمان، كان سعره 1600 جنيه ولونه أحمر، وفيه 4 ميكروفونات Humbucker بـ تخلي الصوت أنقى وأقوى.في الدرامز لاقينا ماركة واحدة هي المعروضة وهي صينية أو فيتنامية مغمورة وصوتها أقل من المتوسط وسعرها 2700 جنيه ومع زيادة القطع والستاندات معاها بـ توصل لـ 3400 جنيه. طبعًا ما ننصحش بها غير المبتدئين اللي معاهم فلوس وعاوزين يجيبوا حاجة جديدة مش مستعملة. وبالمناسبة المحل مش بـ يشتغل في المستعمل نهائي. فيه درامز Premier 7 قطع لكن مش معروضة في المحل، سعرها قفز من 4400 لـ 8800 جنيه في أقل من سنتين، جنون أسعار الآلات الموسيقية المستوردة له علاقة بحالة البلد الاقتصادية والعرض والطلب. بس زيادة الضعف دي كانت صادمة بالنسبة لنا. وفيه درامز صغير للأطفال بـ 1200 جنيه. عدد من الأورجات من كل الماركات المعروفة زي Roland وKorg ورف كبير للإيقاعات الشرقية والبركشن اللاتينية، وإكسسوارات جيتار ودرامز. وعرفنا أننا ممكن نطلب أي آلة أو كماليات أو نحاسيات وإكسسوارات الدرامز وحتى لو مش موجودة هم بـ يجيبوها لنا بعد أيام قليلة. يعني عمرك ما هـ تطلب حاجة ويقولوا لك مش موجودة؛ ودي حاجة ثانية عجبتنا في فرع المعادي بالأخص.دلوقت لو بـ تدور على أي آلة موسيقية ومش عارف ممكن تلاقيها فين، بـ نقول لك روح بقلب جامد على «الشمس» فرع المعادي الجديدة، من أول الطبلة والكمان لحد الإكسيليفون واليوكوليلي البرتغالي.

...

بيتس & بايتس: إكسسوارات للموبايل واللاب توب في سيتي ستارز
اصدرت في: 31/10/2011

الدور الأرضي في سيتي ستارز مليان محلات إلكترونيات بـ تبيع كل أنواع الأجهزة والإكسسوارات. محل واحد لفت نظر الناقدة كاتبة الموضوع بشدة بإضاءته الخافتة والحوائط المرصوص عليها موبايلات وإكسسوارات. «بيتس & بايتس – Bits & Bytes» عنده تشكيلة مميزة من الإلكترونيات سواء للمحترفين ومحبي التكنولوجيا أو لأي حد بـ يدور على أي قطعة أو إضافة شكلية لتليفونه. المحل فيه اختيارات كثير للاب توب والكاميرات الديجيتال والكمبيوترات بشاشات باللمس وكمان منتجات شركة Apple بأسعار منافسة. فيه أجهزة آي باد 2 و3G بأسعار أقل من الموجودة في مصر بحوالي 400 جنيه، اللي سعته 64 جيجا سعره 5800 جنيه وعنده المنتج المنافس من شركة سامسونج وهو "جالاكسي تاب". الآيفون الوحيد اللي عنده كان iPhone 4 سعته 32 جيجا وكان مقفول على شبكة واحدة وسعره 5200 جنيه. الكاميرات الديجيتال الصغيرة موجودة بموديلات وماركات كثيرة، فيهCanon وGenius بأسعار بـ تبدأ من 300 جنيه. واضح أن ما عندهمش تنوع كبير في أنواع اللاب توب، لكن هـ تلاقي الموديلات الجديدة الأكثر شعبية وانتشارًا بأسعار كويسة لكن أغلى شوية من باقي محلات الكمبيوتر المتخصصة خارج المول. ممكن تتصل بالمحل وتعرف أي تفاصيل خاصة بموديلات الكمبيوتر وإمكانياته قبل ما تروح. أرفف وصفوف كثير مليانة إكسسوارات ملونة من البلاستيك للموبايل، وبأشكال غريبة ومبتكرة، وممكن تغير شكل الآيفون أو البلاك بيري أو أي تليفون ذكي وتخلي شكله مطرقع أو بـ يلمع باستخدام الأغلفة العجيبة بأسعار تبدأ من 15 جنيه. أكثر من ستاند في كل حتة في المحل عليهم شنط لاب توب، مصنفين حسب الحجم، من الصغير للكبير. وعندهم تصميمات وألوان حلوة وخامات جلد للناس المهمين. عجبنا شنطة لونها بمبي بناتي خالص وكان سعرها 100 جنيه وكان ملمسها ناعم وتقفيلها كويس. الحاجة العظيمة في «بيتس & بايتس» أنك ممكن تشوف كل حاجة معروضة في المحل وأنت واقف بره من خلال الزجاج. وممكن كمان تشوف بعض الأسعار قبل ما تدخل وتبدأ تسأل العاملين بالمحل عن تفاصيل المنتج. العاملين بالمحل محترفين جدًا وعارفين يجاوبوا على كل استفساراتنا وكانوا بـ يرشحوا لنا موديلات معينة من وسط كل المعروضات حسب احتياجاتنا وميزانيتنا، وخرجنا من المحل بزيارة مفيدة وتجربة جديدة ومش متعبة.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن