أثاث ومستلزمات منزل تسوق in Cairo, Egypt

تسوق

صراط: ديكورات منزلية أذواقها رائعة وبأسعار كويسة وتوصل لك لحد البيت
اصدرت في: 21/12/2015

الأماكن اللي بـ نشتري منها أونلاين كثرت جدًا في الفترة الأخيرة، وفيه منها اللي تشوف صورتها وتيجي لك حاجة ثانية خالص، وفيه اللي فعلًا بـ يقدم لك الحاجة اللي في الصورة بجودة كويسة، وده اللي حصل لنا في تجربتنا مع صراط فريمز – Serat Frames. اتعرفنا على صفحة صراط من إعلان على ويب سايت ثاني بـ يعلن عن حاجات كثيرة للبيع منها الديكورات والأكسسوريز، وبعد كده لما تواصلنا مع النمرة الموجودة على الواتس أب عرفنا صفحتهم على الفيسبوك اللي مليانة حاجات مبهجة وبأسعار معقولة، صراط بـ يعرض براويز بأشكال مختلفة مبهجة ومخدات وباف وسجاجيد وحاجات كثيرة ألوانها جميلة وتصميمها مميز بـ نحتاج نزين بها البيت، أو نشتريها هدية لحد لسه بـ يوضب بيته. أول حاجة لفتت نظرنا كانت صورة لعلبة مفاتيح مُربعة مكتوب عليها "اللهم بارك هذا البيت" ولما سألناهم عن سعرها عرفنا أنها بـ 300 جنيه، كمان شفنا سجادة صغير بتصميم عمارة إسلامية، وتقدري تغيروا ألوانها زي ما تحبوا بـ 250 جنيه. كمان كان فيه 3 تابلوهات مكتوب على واحد في النصف آيه: "ومن يتق الله يجعل له مخرجًا" وجنبها تابلوهين حجم أصغر مرسوم عليهم ورد في شكل دائرة ألوانه حلوة، وواحد زيه، وتقريبًا نفس مقاساته بس ألوانه زرقاء مدرجة مكتوب عليه: "صلوا عليه وسلموا تسليمًا" والتابلوهين اللي جنبه مرسوم جواه ورد في دوائر مرسومة بطريقة هندسية مبتكرة، وسعرها 400 جنيه، صراط بـ تقدم حاجات كثير مميزة فعلًا بتصميماتها وألوانها وجودتها، وهم بـ يوصلوا حاجتهم عن طريق محلات بـ تبيع حاجات زيهم في الزمالك ومدينة نصر، أو بـ يبعتوها لحد البيت من خلال شركة شحن. إحنا حبينا نجرب نشتري منهم حاجة علشان التجربة توصل لكم كاملة، والحقيقة برغم أننا بـ نخاف جدًا من فكرة الشحن فاختارنا علبة المفاتيح المربعة البني، واللي للأسف كانت خلصانة من المحلات ولازم تتشحن لنا، وخوفنا ده كان بناء على تجربة سيئة من صفحة ثانية لأن اللي في الصورة بـ يبقى غير الواقع خالص، إلا أننا لما استلمنا حاجتنا كانت فعلًا ممتازة وزي الصورة وأفضل ومقاساتها مضبوطة، وخدمة الشحن تكلفتها 40 جنيه أو على حسب المكان طبعًا برضه. "صراط" من الأماكن القليلة اللي بـ تقدم منتجات مبهجة تستحق المبلغ اللي هـ تدفعه فيها، وتقدر تختار من منتجاتهم هدية بسيطة وحلوة وبسعر معقول.

...

تيوليب: فرع جديد وكبير لمحل المستلزمات المنزلية في المهندسين
اصدرت في: 14/12/2015

بالرغم من أننا ما عندناش بيت نأسسه أو محتاجين حاجة معينة للبيت، إلا أن دخول محلات الأدوات المنزلية بـ يكون له متعة خاصة، ونعتقد أن فيه ناس كثير بـ تشاركنا الشعور ده، توليب - Tulipe من أشهر الأماكن اللي ممكن تجيب منها حاجة ناقصة في البيت، من أول أدوات التنظيف حتى أواني الطهي. بعكس فروع كثيرة لتيوليب، فرع المهندسين -واللي موجود في شارع عبد المنعم رياض- كبير ومعروضاته مقسمة على مساحة دورين، وبالتالي ما حسيناش بالإحساس اللي معتادينه في الفروع الثانية وهو أننا هـ نأخذ حاجة في طريقنا ونوقعها وإحنا بـ نلف وسط المعروضات، بالرغم من أن المعروضات الموجودة في الدورين متشابهة لحد كبير حتى في تقسيمتها، إلا أن كل المعروض مرتب ومريح للعين. أول مجموعة قابلناها كانت أواني الطبخ واللي منها أنواع، وأحجام واستخدامات مختلفة، فيه الأواني الـ Stainless Steel العادية بلونها الفضي بـ تختلف القطعة حسب الحجم؛ أصغر قطعة قطرها 18 سم سعرها (250 جنيه)، أما الأكبر فقطرها 26 سم وسعرها (350 جنيه)، أحلى حاجة في النوع ده أنه شكله كلاسيكي وبالتالي موضته مش هـ تروح وفي نفس الوقت أغطية المجموعة دي شفافة فشكلها مش عتيق. أما بالنسبة لأدوات المائدة، فمنها مجموعات كثيرة ومناسبة لكل الأذواق؛ ما بين اللي تصميمها بسيط واللي فيها تفاصيل كثيرة، عجبنا منهم طقم بورسلين مكون من 24 قطعة (6 قطع من الأطباق عادية وأطباق للشوربة وأطباق للحلو وواحد كبير للتقديم)، الأطباق تصميمهم يشبه لحد كبير التصميمات الأندلسية سعرهم (750 جنيه)، تيوليب عنده برضه قطع نقدر نعتبرها للاستهلاك اليومي، وهي مصنوعة من البلاستيك وماركتها Zak!، بـ تباع بالقطعة الواحدة شوفنا منها طبق للحلو فوشيا قطره 20 سم (25 جنيه). تيوليب عنده مجموعة كبيرة من الإكسسوارات المصنوعة من الكريستال والزجاج، وطبعًا مش محتاجين نقول أن المنتجات دي أسعارها غالية مقابل أسعار المعروضات البلاستيكية؛ يعني على سبيل المثال فيه مجموعة مكونة من قطعتين لحوامل شموع صغيرة ماركة Nachtmann سعرها (120 جنيه)، وطفاية سجائر صغيرة من الزجاج سعرها (80 جنيه). مجموعة أدوات المطبخ لوحدها محتاجة مقال لوحده، لأن المحل فيه كل حاجة تقريبًا من أول أدوات قوالب الخبز والآيس كريم المختلفة، علب حفظ الطعام وحتى الأدوات الصغيرة، عجبتنا مجموعة قوالب الآيس كريمPopsicles molds واللي مكونة من 6 قطع سعرها (70 جنيه)، لأن معاها مجموعة للوصفات المختلفة. من الحاجات اللي أول مرة نكتشف أن تيوليب بـ يبيعها هي الأجهزة المنزلية البسيطة اللي هـ تقضي غرض وخلاص، زي غلايات المياه وأجهزة تحميص التوست، من الأخيرة كان فيه واحد سعره (450 جنيه) وماركته اسمها Smart، وماكينة صنع قهوة ماركة Guzzini بـ (1200 جنيه)، مش عارفين ليه بس عن نفسنا إحنا ما سمعناش عن الأسماء اللي شفناها وبالتالي ما نقدرش نقول أننا واثقين من مدى جودة الأجهزة، اللي معتمدة بشكل أساسي على عنصر التصميم الخارجي الملون. تيوليب مشهور بمجموعة أدوات حفظ الطعام سواء في المنزل أو خارجه، من ضمن مجموعة حفظ الطعام خارج المنزل والمفيدة جدًا في السفر عجبنا شنطة ماركة Pack It من الداخل بمادة حافظة للحرارة، وتستوعب عدد كبير من الأطعمة سعرها (230 جنيه). زي ما قلنا في الأول تيوليب ممتع جدًا حتى لو مش هـ تشتري، أما لو ناوي تشتري فأكيد هـ تلاقي اللي أنت عاوزه هناك.

...

جاليري ألف: سلطنة زمان في الزمالك
اصدرت في: 24/11/2015

الفن: مش كل جاليري بـ يقدم تحف تتعلق وبس.. مش كل جاليري علق مجموعة لوح يبقى اسمه جاليري.. مش لحاجة نقدر نقول عليها فن.. قبل ما نتكلم عن المكان لازم نقول أن الفن حالة مختلفة.. حالة بـ تخليك تحس بكل حاجة حولك.. وتشوفها من منظور ثاني.. تشوفها بعين الروح.. يعني الفن الحقيقي هو اللي له 3 علامات: يجدد روحك ويحسسك بالسعادة، يقدم معنى قايم على قيمة حقيقية، يكون فيه جديد للعين والعقل والقلب.. حتى لو مستوحى من التراث. الجاليري: يا ترى يعني إيه جاليري؟ واشمعنى الاسم ده انتشر الفترة الأخيرة في حياتنا الفنية والثقافية؟ مش هـ نطول عليكم إحنا جرينا على عم جوجل وسألناه.. إيه الموضوع.. فقال لنا: الجاليري هو البهو اللى فيه أعمدة.. أو صالة عرض لبيع الآثار الفنية.. والجاليري يا سادة.. مع أنه اسم أجنبي لكنه بالفعل متماشي جدًا مع الحالة اللى بـ نتكلم فيها.. هو بـ يجمع بين فكرة البهو (الصالة الواسعة في القصور) واللى فيها أعمدة فنية.. وبـ يجمع كمان فكرة صالة بيع الآثار الفنية.. وفكرة المعرض.. يعني كلمة فنية من ساسها لراسها.. وعلشان كده بـ نحاول نشوف ألف بـ تعمل إيه فى الفن. ألف: صالة واسعة جدًا ومكان أصلًا عبارة عن تحفة.. جنب بوابة دخول فندق هيلتون في الزمالك.. من أول باب الجاليري هـ تحس أنك انتقلت لعالم مختلف تمامًا، عالم كده فيه حالة من "السلطنة" بتاعة زمان.. داخل المكان هـ تلاقي اختصار للجمال والفن.. في كل ركن مستخدمين حاجة.. في كل حتة هـ تشوف جمال اللوح والسجاد والتحف بأشكالها المختلفة وكمان بعض الأثاث المنزلي.. لكنه مش زي أي أثاث دي حالة كده بـ تقول إحنا مش بـ نعمل أي حاجة.. إحنا عاوزين نقدم الفن على أصوله.. صراحة هـ تنبهر من جمال التحف هناك.. كل حاجة معمولة بمقاس محدد وبشروط جمالية واضحة جدًا والناس كمان هناك مهذبين جدًا.. عارفين أن اللى بـ يدخل المكان عاشق للفن في المقام الأول.. علشان كده بـ يعاملوه بشكل مهذب ومحترم وبـ يجاوبوا على كل الأسئلة.. ألف معرض تاريخي بصورة معاصرة.. فكرته قايمة على تقديم المشروعات الفنية الجاهزة.. وكمان التصميم الداخلي للشقق والمنازل والفنادق والبوتيكات بحثًا عن البصمة التاريخية... وعندهم فريق من المخططين والمهندسين المعماريين ومصممي الديكور الداخلي، وهدفهم صناعة صيغة فنية مستوحاة تاريخيًا علشان يعملوا حالة من النهضة الثقافية.

...

جاليرى أشرقت: جاليري الفكرة بصناعة يدوي في الزمالك
اصدرت في: 16/11/2015

الفكرة: "إحنا مش تجار إحنا صحاب فكرة".. دي أول جملة سمعناها من مدام أشجان بدير صاحبة المكان.. إحنا روحنا سألنا عادي عن الجاليري لما شدنا شكله.. وقررنا ندخل نتفرج عن المكان ونكتب عنه.. طب إيه الفكرة؟ الفكرة بقى أنهم بـ يعيدوا تشكيل التراث.. كل التراث المصري يطلع بشكل جديد.. وكمان يطلع بره مصر علشان يتعرفوا على التراث المصري الأصيل. أشجان وماريان: مدام أشجان هي صاحبة المكان وهي محامية أصلًا لكنها عاشقة للتراث.. واشتغلت مصممة ملابس واتخصصت فترة في العبايات الخليجي وشغل الخيامية.. ومن هنا تطور الموضوع معاها علشان تعمل جاليري بصبغة إسلامي وعربي واخدة من التراث روحه.. ومن الفن العصري الخامات والتقنية الحديثة.. يعني شغل حديث بطابع التراث والمهم أنه مصري أصيل. ماريان بقى هي مديرة الجاليري اللى تخرجت من كلية الفنون الجميلة وفاهمة كل حتة في المكان.. وعارفه تاريخها واتعملت من إيه وبـ ترجع لأي عصر من العصور، وكمان اتعملت إزاي. أشرقت: المكان واسع من جوه وفي المدخل فيه حديقة صغيرة معمولة بشكل حلو.. والشكل من بره كله عبارة عن شغل أرابيسك.. وتقريبًا كل حاجة في المكان معمولة يدوي.. وتعالوا نشوف المكان: هـ تلاقوا لوح للمستشرقين مرسومة بأيد مصريين، وسفرة معمولة أرابيسك.. هما بـ يبيعوا فكرة مش منتج.. يعني بـ يبيعوا لشخص هـ يعيش التراث ويرتبط بالتاريخ أكثر.. هو مزج بين المودرن والعربي، هناك هـ تشوفوا إزاي ممكن تجهزوا بيتكم بتحف وتعيشوا معاها وكمان بخامات عالية.. فيه كمان مطبخ كله معمول من الخشب وشغله هايل ومساحته جيدة جدًا.. وفيه سفرة معمولة برسومات على الخشب.. وكراسي وخداديات.. وطبق فخار ملون معمول من الطين الأسواني وكمان مدهون بمادة طبية علشان لما يدخل الفرن يبقى الأكل صحي وغير ضار..أما الترابيزات هناك.. فمعمولة من طبق نجمي معمول يدوي ودي حاجة عبقرية من الفن الإسلامي بـ تتركب جزء جزء لحد ما يعطيك الشكل الهندسي الإسلامي.. وكمان هـ تلاقوا هناك أطباق زجاج مطعمة بالنحاس.. والبراويز كمان معمولة صناعة يدوي بالحفر على الخشب.. وفيه سحارات وكنب عربي بشكل جديد.. غير النجف اللي معمول إما على شكل مشكاة عربي أو فانوس عربي.. وممكن كمان تكتب عليه آية أو اسمك واسم اللي تحبه.. وفيه بقى غير اللوحات.. معلقات اسمها فن الكف.. فيها رسومات يدوية برضه لبيوت وأولاد وبنات من النوبة.. تنفع تزين بها بيتك.. من الآخر المكان حلو ومحتاج زيارة.

...

أفريكانو جاليري: محل إكسسوارات بيت وهدايا من بلاد بعيدة في الزمالك
اصدرت في: 01/11/2015

من ضمن الحاجات اللي بـ تميز القاهرة عن أي مدينة ثانية في مصر-واحتمال كبير عن أي مدينة ثانية في العالم كله- أنك هـ تلاقي فيها كل حاجة. تقريبًا ما بقاش فيه حاجة مش موجودة في العالم مش موجودة هنا في القاهرة. من أول مطاعم المطابخ الغريبة ومحلات الملابس وحتى محلات إكسسورات البيت؛ من ضمن النوعية الأخيرة من المحلات صادفنا أفريكانو جاليري - Africano Gallery في الزمالك. موقع المحل وشكله الخارجي الغريب هو اللي شدنا أننا ندخله؛ المحل موجود في الدور الأول بمجموعة سلالم جانبية منفصلة عن مدخل المبنى الرئيسي، أما فاترينة العرض الكبيرة، فمعروض فيها مجموعة كبيرة من التحف المتنوعة ما بين الستايل الأفريقي، الهندي وحتى الكلاسيكي. أما ديكور المحل من الداخل بسيط –المكوّن من مستويين بـ يفصل ما بينهم مجموعة من السلالم- لأنه معتمد في الأساس على غرابة المعروضات الموجودة فيه. المستوى الأول من المحل مخصص بشكل أساسي لعرض الهدايا والإكسسوارات الحريمي والرجالي، فعلى ترابيزة في الركن معروض بشكل عشوائي مجموعة من الأعقاد الهندية المصنوعة يدويًا من الخرز الملون بألوان زاهية (110 جنيه)، ومن نفس الخامة والبلد مجموعة من الأساور القماش (85 جنيه) –واللي بالصدفة شفناها في جاليري ثاني في الزمالك بـ تتباع بـ 350 جنيه. أما الإكسسوارات الرجالي واللي تنوعت ما بين سلاسل معلق فيها أشكال معدنية –زي الجماجم وخلافه- (15 جنيه)، وسلاسل مفاتيح مصنوعة من أنياب بلاستيكية (10 جنيه)، فدول وبلا منازع أسوأ حاجة شفناها في المحل، مش بس لأن جودتها سيئة، ده لأن حتى ذوقها عجيب. في المستوى الثاني من المكان فيه التحف وقطع الديكور؛ لفت نظرنا مجموعة من المعلقات الهندية، واللي بـ تشبه لحد الكبير الـ Dream Catchers، ولكن في صورة سلاسل من الأفيال والأجراز الصغيرة، عجبنا الصغير منهم (65 جنيه)، ومجموعة Wind Chimes خشبية -اللي بـ تطلع أصوات بمرور الهواء فيهم - مصنوعة في تايلاند وأسعارها بـ تختلف حسب الحجم (الصغير منهم بـ 125 جنيه). أفريكانو جاليري عارض مجموعة كبيرة من الأباجورات أغلبها مصنوعة من الخشب والنحاس؛ من الخامة الأولى عجبنا أباجورة من تايلاند، منحوتة على شكل رأس فيل (275 جنيه)، لدقة النحت وفي نفس الوقت القطعة محتفظة بلون خشبها الخام. أما الأباجورات النحاس فهي تشبه الأنتيك، ولكن للأسف في نسخته الرخيصة؛ من ضمن المجموعة دي وحدتين -الواحدة فيهم عبارة عن تمثال لحاملة شعلة- سعر الاثنين مع بعض (350 جنيه). على قد ما انبهرنا بالشكل العام للمحل، ما ابهرتناش المعروضات اللي كان فيه مجموعة كبيرة منهم منتشرة في محلات الهدايا؛ زي الماسكات الأفريقي والـ Wind Chimes. ولكن ما ننكرش أن وسط عدد كبير من المعروضات الكليشيه هـ تلاقي حاجة أو اثنين مختلفين بجد.

...

هوم سنتر: مول قائم بذاته لمستلزمات البيت داخل داندي مول
اصدرت في: 15/09/2015

من فترة كبيرة، كان فيه مجموعة دعاية كبيرة لافتتاح هوم سنتر – Home Centre في داندي مول؛ كثير كنا بـ نمرّ عليه من غير ما ندخله معتقدين أنه مجرد محل كبير فيه مجموعة من الإكسسوارات المنزلية وخلاص، ولكن لما دخلناه أخيرًا عرفنا أن الموضوع أكبر مما نتخيل، لأن هوم سنتر ببساطة عبارة عن مول مصغر لجميع مستلزمات البيت من أول الإكسسوارات لحد الأثاث. أول حاجة لاحظناها أن المكان مرتب جدًا، الإكسسوارات في منطقة، وحدات الإضاءة، إلخ... وقيس على كده كل حاجة ممكن البيت يحتاجها. مجموعة الساعات هي أول حاجة لفتت نظرنا، موجود منها كل الأحجام والأنواع، من ساعات الحوائط عجبنا واحدة طويلة مكونة من 3 ساعات لتوقيت ثلاث مدن مختلفة (999 جنيه) وواحدة ثانية دائرية شكلها عتيق بإطارها البرونزي المعدني سعرها (499 جنيه) كان متوفر منها حجم أصغر ولكن بإطار فضي سعرها 299 جنيه، من الساعات اللي ممكن تستخدم كقطعة ديكور كان فيه واحدة معدنية مربعة لها ستاند ثلاثي يشبه حامل الكاميرات سعرها كان (899 جنيه). المحل بـ يتميز أنه عنده Range أسعار واسع ممكن يناسب أي ميزانية؛ وده لاحظناه في مجموعة الأباجورات اللي أسعارها بدأت من 390 جنيه ووصلت حتى 1049 جنيه، طبعًا فيه فرق في الخامة والحجم والطراز، يعني مثلًا الأرخص كانت عبارة عن أباجورة صغيرة من المعدن المفرغ، أما الأغلى فكانت مودرن، حجمها كبير وتنفع لحجرة استقبال ضيوف، مغطاة بقطع فضية لامعة والشابوه لونه أسود من القطيفة. من ضمن الحاجات اللي لفتت نظرنا كانت مجموعة التابلوهات المختلفة المعروضة، بالرغم من أنها مش أفخم حاجة ممكن تشتريها في حياتك، لكنها ممكن تسند في غرفة معيشة، أو حجرة نوم شبابية لأنها كلها عن مدينة لندن وصور مختلفة معتمدة على الـ Pop Art بشكل عام، الأسعار بـ تختلف حسب الأحجام والخامات، أغلى حاجة صادفناها كان تابلوه 50 X 70 سم من خامة الكانفاس سعره (240 جنيه)، أما أرخص حاجة لها علاقة بالمعلقات كانت مجموعة من الكلمات المشكَلة من المعدن المذهب عجبنا فيها بساطتها وخصوصًا أنهم مختارين كلمات لطيفة زي الحب والسلام، والأحلى أن المجموعة منها نفس الكلمات بالعربي أو بالإنجليزي (79 جنيه). عيبها الوحيد أنها بـ تعمل أثر لاحتكاك المعدن بالحائط، فلو اشتريتها اختار مكان واحد وعلقها فيه للأبد. وكأنه بـ بحفزك أنك تشتري من عنده كل حاجة –وده في حد ذاته ذكاء- هوم سنتر عنده من نفس الموديل أو المجموعة اللونية كذا منتج يليقوا على بعض؛ يعني إكسسوارات الحمام كلها من أول المناشف لحد حوامل فرش الأسنان لها نفس الموديلات والمجموعات اللونية، لاحظنا أن أسعار القطع المختلفة غالية جدًا يعني حامل أكواب فرش الأسنان كان بـ 99 جنيه، وحاملة علب المنديل بـ 299 جنيه... تخيل علشان تشتري مجموعة كاملة ممكن تدفع كام، ده غير أن خاماتهم كانت متوسطة المستوى لحد كبير وفوق ده وده أسعار الإكسسوارات أغلى من مجموعة المناشف اللي لايقة عليها؛ يعني البشكير (119 جنيه)، فوطة عادية (79 جنيه) أما فوط اليد (59 جنيه). كل اللي فات ده عبارة عن قطع تقدر تأخذها وتحاسب عليها وأنت خارج. أما الأثاث، فالموضوع مختلف تمامًا بـ تختار القطعة اللي عاوز تشتريها وتوصل لك من المخزن في خلال أسبوعين أو شهر. معظم القطع شبابية ومودرن، فلو لك في الكلاسيك أو عاوز خامات فخمة ما نعتقدش أنك ممكن تلاقي اللي ينفعك هناك. من الآخر، هوم سنتر مفيد جدًا لأي عروسين جداد محتاجين يأسسوا بيتهم، على الأقل يأخذوا فكرة عامة عن الحاجات اللي ممكن يحتاجوها؛ ده غير أن الأسعار هناك متنوعة وتناسب تقريبًا مختلف الميزانيات، ولكن لازم نقول أن فيه حاجات معروضة بـ تخاطب محبي الاستسهال، سعرها وجودتها مش أحسن حاجة في العالم بس بـ تشتريها بالمرة، نصيحة، فيه أماكن كثير ممكن تشتري منها "الرفايع" دي بجودة أحسن ونفس السعر، إذا ما كانش أقل.

...

ذا كورنر: فساتين سواريه وإكسسوارات للبيت بمحل واحد في المعادي
اصدرت في: 20/06/2015

كثير ممكن ندخل محلات متخصصة في الملابس السواريه وتعجبنا، بس أنه يبقى محل سواريه وإكسسوارات بيت في نفس الوقت هو ده الجديد، وده اللي لقيناه في ذا كورنر –The Corner في زهراء المعادي. المحل له واجهة زجاجية طول ما أنت ماشي في زهراء المعادي تقدر تشوف تصميماته الجديدة اللي بـ ينزلها كل فترة، وجنب التصميمات دي بـ يبقى فيه بعض قطع الديكورات، مدخل المحل من العمارة نفسها، للأسف مالوش دخلة خاصة به. أول ما بـ تدخل بـ تلاقي الإكسسوارات المنزلية أمامك، وعلى أيدك الشمال، جانب آخر فيه الفساتين والعبايات. الحقيقة أن ما كانش فيه فساتين سواريه كثيرة، أو تصميمات مختلفة أو مبهرة، بس أنتِ ممكن تختاري التصميم اللي أنتِ عاوزاه وهم ينفذوه لك. عجبنا فستان لونه روز بأكمام طويلة ومقفول وطويل وتفصيلته مستقيمة، وعليه زي شال واسع متخيط فيه فـ يخبي منطقة الصدر والبطن لو ضيقة، وكان بـ 1350 جنيه. كمان كان فيه فستان لونه لبني فاتح كت ومن فوق لحد الصدر عليه قماشة مشغولة بالترتر واللولي وكان بنفس السعر تقريبًا. والغريب أنهم كان عندهم مجموعة عبايات كمان، بس ذوقها خليجي شوية أو جدًا، ما بين عبايات بالترتر وعبايات واسعة بس تيجي حاجة تبوظها لك كلها من مجرد تفصيلة صغيرة، لفتت نظرنا عباية سوداء وعلى أكمامها زخرفة بسيطة بني، كان شكلها لطيف وسعرها 800 جنيه. كمان هم بـ يأجروا فساتين أفراح من أول 2000 جنيه للمستعمل لحد 5000 جنيه للفستان اللي أول لبسة. أما عن الجانب الآخر للمحل، لفت نظرنا قطعة شمع مستطيلة جواها دائرتين فوق بعض منحوت عليهم "القلب قد أضناه عشق الجمال والصدر قد ضاق بما لا يقال" وجواها لمبة علشان تنور، وسعرها 450 جنيه. وكان فيه أباجورات عادية بس ما كانش مكتوب أسعارها، وقطع فنية صغيرة لتماثيل، بس أكثر حاجة عجبتنا الجزء اللي كان فيه قطع زينة عربية نحاس لأبريق شاي وتحته طبق كله زخرفة إسلامية، وسعره 550 جنيه، وكمان مبخرة بنفس الزخرفة بـ 220 جنيه. وكان فيه زي كوفر مثلث بـ يتعلق على اللمبة نحاس مخرمة دوائر صغيرة بـ تعمل شكل إضاءة مختلف، وسعرها 350 جنيه للواحدة. أما أكثر قطعة فنية خدتنا ثلاث فازات مدورين نصفهم لونهم أبيض والنصف الثاني أزرق وفي الجزء الأبيض مرسوم ورد خفيف بالأزرق، كانوا تحفة فنية ونازل عليهم تخفيض، فالثلاثة سعرهم 550 جنيه. تجربة "ذا كورنر" كانت مختلفة، تدخل عاوز تشتري فستان تلاقي نفسك خارج بحاجات للبيت لمجرد أنها عجبتك، بس ننصحهم ينوعوا في الموديلات شوية لأنها كانت قليلة.

...

مليكة: إكسسوارات منزلية على كل شكل ولون في العجوزة
اصدرت في: 04/05/2015

لو أنت من أهالي منطقة العجوزة وحافظ شوارعها الجانبية كويس، ممكن تكون مريت على محل مليكة هوم أكسسوريز - Malika Home Accessories الموجود في شارع طنطا الهادئ؛ وبما أن الشارع مافيهوش محلات ثانية غير صيدلية، فالموضوع هـ يبقى سهل عليك لو أنت أول مرة تروح هناك. محلات إكسسوارات المنزل عادة بـ تبقى مليئة بالتفاصيل والمعروضات مهما كانت مساحتها. وبالرغم من أن المحل مساحته متوسطة، إلا أنك لو بـ تتجول فيه هـ تلف مرة واثنين قبل ما تحدد إيه أكثر حاجة عجبتك. وعلى عكس محلات كثير زرناها، طريقة العرض في المحل مريحة بالرغم من كثرة وتنوع المعروضات، وخصوصًا أن فيه مساحة ممكن تمشي فيها من غير ما تحس أنك هـ توقع حاجة وتكسرها. أول حاجة عجبتنا كانت مجموعة من المشغولات الزجاجية الملونة بألوان مودرن زي الفوشيا والموف، من ضمنهم مجموعة من كنكات القهوة (75 جنيه) ومعاها فناجيل بأطباقها سعر الواحد (50 جنيه)، ومجموعة من الأواني بألوان مختلفة زي الفوشيا، والوردي الفاتح والتركواز (45 جنيه). المنتجات الخزفية موجود منها مجموعة كبيرة، عجبنا منها طبق زينة منقوش باللون الأصفر والأبيض (300 جنيه) ومجموعة من طفايات السجائر على شكل نصف أبريق (45 جنيه) واللي موجود منها ألوان قوية كثيرة زي الأحمر، الأصفر والأخضر الفاتح والأسود. على صينية خشبية معروض مجموعة كبيرة من المجات اللي مطبوع عليها جمل زي My Daddy is a Superman (أبويا سوبرمان)، ورسومات الكوميكس. عجبنا منهم مج لبات مان كان شوفناه على صفحتهم على الفيسبوك ، لكن للأسف ما كانش متوفر في المحل، بس القائمة على البيع وضحت لنا أنه ممكن نطبع عندهم الصور اللي عاوزينها أو نعمل للمج اللي عجبنا أوردر، وفي خلال أسبوعين نستلمه. سعر المج الواحد (60 جنيه). على حوائط المحل معروض مجموعة كبيرة من المرايا المستديرة اللي بـ تستخدم للزينة، واللي حسب الطلب ممكن تلون الإطار الخاص بهم؛ الأحجام بـ تختلف والأسعار بـ تتراوح من (800 : 500 جنيه). ده غير مجموعة من المرايات الكبيرة، واللي عجبنا منها واحدة مستطيلة، إطارها ذهبي ستايلها نيو كلاسيك وسعرها 900 جنيه. أحسن حاجة معروضة في المحل مجموعة الأبليكات ووحدات الإضاءة، بالرغم من أن عددهم مش كبير إلا أن فيه مجموعة من النجف المعروض واللي ستايله متنوع ما بين المودرن والـ Vintage أو العتيق. من الستايل الثاني عجبتنا واحدة من المعدن الأسود على هيئة دائرة ملفوف حولها مجموعة من الحبال (2000 جنيه). أما من الأبليكات، عجبتنا واحدة مكونة من لمضتين، معدنها شكله النهائي كأنه صدأ (800 جنيه أو 890 باللمض) عيبها الوحيد أن اللمض شكلها مميز، وبالتالي لو احترقوا صعب تلاقي زيهم ثاني. للمحل فرع ثاني في شارع عمان في الدقي، وفيه كمية أكبر من قطع الأثاث، واللي ممكن ينفذوا لك أي قطعة تحبها سواء من صورة من عندك أو كتالوجاتهم، نعترف أننا مالناش في جو الديكور والإكسسوارات المنزلية، ولكن المحل ده مختلف عن المحلات الثانية وخصوصًا أن معروضاته ما شوفناهاش في مكان ثاني.

...

شابي شيك شوب: إكسسوارات منزلية وأثاث لمحبي الطراز العتيق فى الزمالك
اصدرت في: 28/01/2015

ستايل الخمسينات العتيق أو الـ Vintage له محبين كثير، لأنه بـ يتميز بتفاصيله الكثيرة وألوانه الباستل الفاتحة زي الوردي والزهري، ده غير أنه مشهور بنقشة الورود والـ Polka Dots. محلات كثير للديكور بدأت في عرض قطعة أو اثنين لمحبي الستايل ده، ولكن أغلب القطع بـ تبقى منفذة بشكل عصري. شابي شيك شوب – Shabby Chic Shop في الزمالك متخصص في الطراز ده من الألف للياء. بالرغم من أن قطع الأثاث المعروضة محدودة، إلا أن المحل على أتم الاستعداد أنه ينفذ للعميل أي قطعة هو عاوزها، يكفي أنك تقدم لهم صورة وتختار اللون وهم هـ يعملوا الباقي. من ضمن القطع المعروضة سرير حوالي 2X2 متر ظهره تصميمه بسيط فيه حلية على الجوانب ومدهون باللاكيه الأبيض (7100 جنيه)، كونسول عريض لونه أخضر فاتح، مقابضه لونها ذهبي (5500 جنيه)، جسم الكونسول له درجين كبار، وودرج ثالث عبارة عن لوح خشبي ممكن يستخدم كمسند للكتابة. غير أن شكل الأثاث الخارجي ممتاز، التنفيذ والاهتمام بالتفاصيل واضح في القطع المختلفة. من ضمن القطع الأخرى، واللي شكلها كان غريب بالنسبة لنا نصف كونسول معلق على الحائط، ممكن يستخدم كرف لو هـ يتعلق أعلى من مستوى الترابيزات، لونه أخضر فاتح وفيه درج صغير في وسطه (1700 جنيه). المحل بـ يعرض مجموعة كبيرة من الخداديات المنقوشة بنقشات مختلفة أغلبيتها للورود. وهي نوعين: الأول مربع مقاسه حوالي 30X30 سم، قماشه مصري وسعره (169 جنيه) أما النوع المستورد فحجمه أعرض حوالي 25x50 سم وسعره بـ يوصل لـ 550 جنيه، وده كان سعر واحدة عليها صورة مجموعة من البنات بملابس البحر، النوع الثاني قماشته كانت أنعم نوعًا ما، ولكن فضلنا النوع المصري لأن نقشات قماشه كانت أحلى. شابي شيك شوب بـ يعرض الأقمشه المصري المستخدمه في الخداديات دي، وأغلبها من القطن، سعر المتر منها (200 جنيه)، واللي ممكن تستخدم كمان في أي قطعة أثاث يحب يعملها العميل. شابي شيك شوب عنده مجموعتين من ورق الحائط: الأول نوعه كلاسيكي واللي بـ يحتاج المادة اللاصقة الخاصة به وسعر الرول منه (350 جنيه)، أما النوع الثاني فهو من الفينيلVinyl وهو بـ يبقى عامل زي الستيكر وأسهل في التركيب سعره (358 جنيه) للرول الواحد. مجموعة الأطباق والأكواب كلها ماركة دنماركية اسمها Greengate، وبلا شك ده السبب أن سعر أي قطعة غالي جدًا عن أي مكان ثاني، مثلًا الفناجيل الصغيرة سعرها بـ يتراوح بين 129: 149 جنيه للقطعة الواحدة، عجبنا منها أخضر منقط بالأبيض. أما المجات اللي حجمها أكبر فكانت بـ (194 جنيه)، سعر الطبق المتوسط في الحجم (220 جنيه). طبعًا بلا شك خامتهم وشكلهم ممتاز ولكن أسعارهم مبالغ فيهم جدًا. شابي شيك شوب مكان مجتمع فيه كل اللي تحتاجه علشان تعمل ركن عتيق خاص في البيت، ومش بس كده ممكن كمان تضيف لمستك على الستايل وكل حاجة هـ تتعمل على مزاجك.

...

صندوق الدنيا: كل ما هو أنيق وعتيق في الزمالك
اصدرت في: 11/01/2015

كتابة مقال نقدي عن محلات الأنتيكات فكرة مرعبة بالنسبة لنا؛ بـ يتهيأ لنا دائمًا أننا هـ نكسر حاجة هناك وإحنا بـ نتفرج. يمكن علشان معظم محلات الأنتيكات في مصر بـ تبقى فيها المعروضات –اللي عادة بـ تبقى غالية- متكتلة جانب بعضها، ومستنية كوعك يخبط فيها علشان تقع وتتكسر. بس عمر ما خوفنا وقفنا أننا نقوم بواجبنا تجاه أصحاب مزاج الأنتيكات في القاهرة، وعلشان كده قررنا أننا نروح صندوق الدنيا في الزمالك. صندوق الدنيا كان فاتح قبله جاليري فني مشهور اسمه خان المغربي؛ واللي ما زارش المكان ده قبل كده المحل موجود تحت الأرض بـ تنزله بمجموعة سلالم. وعلشان ما تعملش زيّنا وتخض المسؤولة عن البيع، رن الجرس اللي موجود على الشمال قبل ما تحاول تفتح الباب المعدني بنفسك لأنه مقفول. المهم بعد سلسلة اعتذارات عن تسببنا في خضة، أخذنا جولة في المكان واللي لحسن حظنا مرتب بالرغم من حجمه الصغير نسبيًا –هو عبارة عن حجرتين مفتوحين على بعض- على الحوائط مُعلقة مجموعة من اللوحات اللي تنوعت بين خامة الزيت وحتى الحفر. بالرغم من أننا لاحظنا أن فيه عناية في اختيار اللوحات، لأن معظمها مميز، إلا أننا لاحظنا أن فيه لوحتين بالألوان المائية للفنان الكبير الحسين فوزي بـ تصور سيدات ريفية أهميتها الوحيدة هي إمضاء الفنان الراحل، لأنها مافيهاش أسلوبه اللي اشتهر به. من ضمن المعلقات برضه مجموعتين من أطباق البورسلين، طريقة عرضهم مغرية أنك تأخذهم كلهم وأنت مروح. معظمهم مرسوم عليهم باللون الأزرق المشهور، أو عليهم رسوم نباتية عتيقة؛ الوحيد اللي تميز فيهم هو طبق إنجليزي الصنع مستخدم اللون البني المائل للرمادي في رسم منظر طبيعي عليه (350 جنيه). من المعروضات الموجود منها بكثرة هي النجف؛ من ضمن المجموعة الكبيرة اللي معظمها من النحاس والنحاس المتأكسد لفت نظرنا اثنين اختلفوا عن الباقي. الأولى كانت من الخشب الغامق شكلها بسيط وحجمها صغير (2500 جنيه)، وبنفس سعرها الثانية اللي أجزاءها الرئيسية مصنوعة من البورسلين الملون بالأخضر والبرتقالي. الأباجورات عددها قليل نسبيًا، إلا أن أكثر واحدة مميزة فيهم من النحاس، والشابو لونه أحمر مزخرف باللون الأصفر (2500 جنيه). آخر قطعة عجبتنا كانت قطعة أثاث إنجليزي قديمة عبارة عن ستاند خشبي له ترابيزة مثبت فيه مرآة وسعره (3000 جنيه). أجمل حاجة في صندوق الدنيا هو العناية الشديدة في اختيار القطع، واللي معظمها مش بس قيمتها في شكلها الجمالي أو قدمها، ده كمان في جودة حالتها.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن