مجوهرات تسوق in Cairo, Egypt

تسوق

جيبسي جيمز: متجر إلكتروني للإكسسوارات المبتكرة والأحجار الكريمة الطبيعية
اصدرت في: 01/08/2015

البيع عن طريق تطبيق إنستجرام بـ ينتشر بصورة رهيبة وقدر يغير خريطة التسوق الإلكتروني تمامًا، الواحد يقدر يشتري أي حاجة مستوردة كانت أو محلية من ملابس، أحذية وشنط يد لغاية الإكسسوارات والماكياج عن طريق واحد من أكبر المتاجر الإلكترونية اليومين دول. الأختين هبة وعلياء عماد أصحاب مشروع "جيبسي جيمز - Gypsy Gems" اللي بـ يبيع حلّى غير تقليدية أغلبها مطلي بالفضة مع قطع من الأحجار الكريمة الطبيعية، من دلّايات على شكل رصاصة لخواتم وعقود شكلها مبتكر، جيبسي جيمز بـ يقدم كل أنواع الإكسسوارات الجذابة والميزة فيها أنها مش منتشرة، الموضوع عبارة عن مشروع خاص بهم وده بـ يظهر في حب الأختين للإكسسوارات البوهيمية. من الحاجات اللي عجبتنا عقد على شكل مجرّة داخل شكل هلالي (140 جنيه)، وخاتم عقيق (120 جنيه)، وعقد من حجر الجيود الكريم (160 جنيه) وعقد من حجر الكوارتز المطلي بالتيتانيوم (80 جنيه)، مع دلّايات ملونة على شكل رصاصة (130: 150 جنيه). طلبنا دلّاية من الحجر الرملي (150 جنيه) عن طريق رسالة مباشرة على حسابهم، عندك حلين للتوصيل، يا طلبك يوصلك خلال يوم أو اثنين وتدفعي 30 جنيه زيادة أو تستلمي طلبك في مكان متفق عليه، قدرنا نحدد معاهم ميعاد واستلمنا الطلب بعدها بكام يوم. العقد كان تقريبًا بنفس الشكل الموجود في الصورة، والدلّاية كانت فخمة بلونها البنفسجي في أسود مع حبيبات لامعة، العقد نفسه كان أقصر شوية من المتوقع بس مش مشكلة. بشكل عام، فى رأينا أن أفكار جيبسي جيمز في الإكسسوارات لطيفة جدًا، وطبعًا خدمتهم لا يُعلى عليها، الأسعار كمان تعتبر معقولة لحد كبير نظرًا لأن أغلب المجوهرات المستخدمة من الأحجار الطبيعية.

...

بوهو جاليري: مقتنيات فريدة من نوعها في بوتيك الزمالك المبتكر
اصدرت في: 27/07/2015

فيه مشكلة بـ تزيد كل يوم وهي أماكن التسوق الرئيسية في القاهرة، يعني مثلاً سلاسل وماركات المنتجات المستوردة الكبيرة، والأماكن المحلية اللي ماشية على نفس النهج. أغلب الحاجات المعروضة عندهم بـ تكون عامة وبـ تنتج بكميات كبيرة، والنتيجة مئات الناس لابسين نفس الحاجات، ودي حاجة مش لطيفة طبعًا، من هنا احتلت بوتيكات الملابس اللي بـ تقدم قطعة أو اثنين بالكثير من كل تصميم مكانة خاصة في قلوب الباحثين عن التميز. بوهو جاليري في الزمالك بـ يقدم مجموعة مميزة من الملابس المستوردة وكمان المصممة محليًا من مصممين مصريين شباب، ميزة المحل أن أجواءه المريحة، والديكورات البسيطة جدًا بـ تظهر الملابس والإكسسوارات المعروضة، كان فيه مقالة سابقة عن فرع بوهو جاليري هليوبوليس بـ تشكر في تشكيلة المنتجات المتنوعة هناك وأسعارها المعقولة، فـ قررنا نروح يمكن الكلام ده يكون في فرع الزمالك كمان. بوهو بـ يقدم كل أنواع الملابس الحريمي، وأي واحدة تقدر تجمّع أطقم كاملة من المحل الظريف ده، من شورتات جينز مرصعة بالجواهر، لملابس سهرة، لفساتين أنيقة، لشنط يد، لإكسسوارات، لملابس بحر، لسنيكرز، لكيمونو وجلابيات، فعلاً المعروض هناك يكفي وزيادة. مجموعة شنط يد من زام ZAAM معروضة في ركن من المحل شدت انتباهنا، تشمل شنط bucket bags سادة (450 جنيه). نروح على قسم الصديري والكيمونو، وعجبنا فيه صديري قصيرة عليها أشكال ورد (400 جنيه)، وكيمونو أسود وأبيض من تصميمات آيه أشرف (290 جنيه)، وكيمونو ماكسي أبيض دانتيل من تصميمات مدني (500 جنيه)، وكيمونو مدهش متحدد باللون الوردي من ندى كرم (330 جنيه) وبشكير بحر أبيض دانتيل (380 جنيه). شوفنا في وسط المحل ترابيزة عليها كل أنواع المجوهرات المطلية ذهبي تشمل حلقان، أساور وسلاسل، أكثر حاجة عجبتنا كانت أساور الذراع (700 جنيه). طول ما إحنا هناك الموظفين كانوا معانا بس من غير ضغط، بحيث نقدر نتفرج براحتنا وفي نفس الوقت يساعدونا لما نحتاجهم. بوهو جاليري من الأماكن اللي تحب تزورها وتتسوق منها، عجبنا جدًا المفهوم الجديد اللي بـ يتبعه المكان والموظفين الرائعين، ما كانش ينفع نمشي من غير ما ندلع نفسنا بواحد من عشرات الكيمونو الجميلة المعروضة هناك.

...

هلال: محل فضة متميز وأسعاره معقولة في شارع 9 في المعادي
اصدرت في: 12/05/2015

كل مكان جديد بـ نروحه بـ يختلف عن اللي قبله بحاجات كثيرة منها الذوق والجودة والسعر، وده كله متوفر في محلات الفضة اللي في شارع 9 بالذات محلنا النهارده "هلال – Helal".. محل صغير في أول شارع 9 بعد محطة المعادي، وجنبه أكثر من محل فضة، بس إحنا اختارناه هو بالذات علشان كانت الواجهة بتاعته منورة ومبينة منتجات الفضة مش زي الباقيين مش واضحة وضلمة. أول ما دخلنا لفت نظرنا الخواتم جدًا، لأننا لقينا تشكيلة أكثر من رائعة ومتنوعة جدًا، طبعًا بالنسبة للأسعار ده بـ يختلف من حجمها وسعر الجرام في الوقت اللي سألت فيه، لأننا أول مرة رحنا الأسعار كانت أرخص من ثاني مرة نروح. عجبنا خاتم حلو قوي مربع وجواه كلمة "حب" مزخرفة، وكان فيه واحد زيه بس مدور سعره بـ يبدأ من 90 جنيه على حسب وزنه، وواحد ثاني نفس الحجم مكتوب عليه كلمة "مودة". كمان كان فيه خاتم حلو قوي على شكل سمبوكسة أقرب للمربع شوية مكتوب عليها كلمة "صحة" ومزخرفة بأسلوب أقرب لعزة فهمي، والحقيقة أنه كان حلو قوي برضه وبـ 150 جنيه تقريبًا. كمان كان فيه خاتم على شكل مربع كبير مكتوب عليه "ومازال للحب بقية"، وهو حجمه كبير يعنى تقريبًا بـ 250 جنيه. ولفت نظرنا برضه خاتم مربع مكتوب عليه "فالله خير حافظًا" بحوالي 150 جنيه. طبعًا الخواتم العادية كانت موجودة اللي مكتوب عليها "سبحان الله" و"الحمد لله" و"ما شاء الله" بأشكال مربعة ومدورة ومستطيلة. وكان فيه خواتم مرصعة بالأحجار الكريمة الزرقاء والخضراء وسعرها بـ يتحدد على حسب الحجم والحجر الكريم. وعلى الجانب الآخر كان فيه حلقان فضة صغيرة حلوة قوي بأشكال متنوعة تبدأ من 50 جنيه على حسب حجمها طبعًا، والدلايات العادية برضه كانت كويسة، وطبعًا ما نقدرش ننسى الميداليات اللي كان فيها أحجام كبيرة وصغيرة، أكثر واحدة عجبتنا كانت ميدالية فيها مثلث صغير نازل منه ثلاثة ملثاث صغيرة أو دوائر مكتوب فيها كلمات زي "فالله خير حافظًا" أو " من ينصره الله فلا غالب له" أو "سبحان الله" و"الحمد لله" أو أي حاجة عاوز تكتبها، وكانت بحوالي 250 جنيه، كمان كان متوفر ميداليات مربعة عليها آيه قرآنية أو مفرغة ومجرد الكلام بس على شكل دائرة أو مثلث، وممكن برضه تكتبوا فيها اللي أنتم عاوزينه، ولما بـ تطلبوه حاجة تكتبوها مخصوص بـ تستلموها في حوالي 4 أيام. محل هلال تقدر تعتبره بيتك الثاني اللي لما تتزنق في هدية تلاقيها عنده بسعر معقول، ومعاملة الناس لك لطيفة جدًا.

...

ديبنهامز: المتجر الإنجليزى متعدد الأقسام وصل كايرو فيستيفال سيتى
اصدرت في: 23/11/2014

يمكن لأنك نادرًا ما بـ تشوفهم وسط مشهد التسوق القاهرى الراقى، لكن يفضل حبنا للمتاجر متعددة الأقسام أبدى، ببساطة شديدة النوع ده من المحلات عنده القدرة على توفير حياة –وكمان تجربة تسوق– أكثر روعة وسهولة، عن طريق تقديم كل حاجة ممكن تحتاجها فى مكان واحد. مع فرع موجود بالفعل فى الإسكندرية، الاسم البريطانى المعروف "ديبنهامز -Debenhams"، وصل أخيرًا للقاهرة. المحل بـ يحتل مكان ضخم فى مول كايرو فيستيفال سيتى، ولما نقول كبير نقصد أن مساحته تساوى مساحة من 4: 5 محلات متوسطة الحجم. بإضائته المشرقة وألوانه الفاتحة البسيطة، المحل يتميز بديكورات معاصرة أنيقة، لاحظنا على طول ندرة البائعين بطريقة غريبة، وكل فين وفين لما نشوف بائع واحد. أول ما دخلنا لاقينا نفسنا فى قسم ملابس الأطفال، واللى بـ يعرض مجموعة متنوعة من الاختيارات الجميلة للأطفال من كل الأعمار، من الرضع لغاية 12 سنة. تحركنا من قسم الأطفال، ووصلنا لقسم الحمامات، وفيه مجموعة من مستلزمات الحمامات القطنية، من البشاكير لممسحة الأرضية. البشاكير موجودة بكل الأحجام (فوط اليد سعرها 110 جنيه وفوط الاستحمام 230 جنيه)، والألوان مافيش أكثر منها بعدد يوصل 42 لون متنوع. بعد كده وصلنا لقسم الرجالى، وفيه كنا وسط مجموعة من الأزياء الراقية من إمضاء عدد كبير من مصممى ديبنهامز الحصريين. بالنسبة للملابس الكاجوال المتينة، عندك ماركة Maine الرائعة، بتقديمها لحاجات منها قمصان كاروهات (400 جنيه) وبنطلونات كاكى (500 جنيه). لو عاوز حاجة أقرب شوية للملابس الرسمية، سمارت كاجوال يعنى، ماركة John Rocha عندها الحل، بـ تقدم حاجات منها جاكيت أسود أنيق (1100 جنيه)، وجاكيت رمادى أقل رسمية شوية فكرته مستوحاه من الكارديجان (770 جنيه). الجاكيتات السابقة ممكن معاها سترات برقبة V 320 جنيه من ماركات أسعارها معقولة شوية زى Thomas Nash. قسم الرجالى كمان يشمل قسم لملابس البيت والغيارات الداخلية. فى الوقت نفسه، قسم الحريمى كان مليان حاجات لكل المناسبات. الماركة الشهيرة Betty Johnson كانت أول حاجة نشوفها ولفتت انتباهنا منها توب شيفون أزرق مخضر (650 جنيه) وبليزر (1100 جنيه). بالنسبة للمقاسات الكبيرة، الاسم البريطانى الشهير إيفانز Evans بـ يقدم مجموعة ضخمة تشمل فستان أبيض برقبة دانتيل (650 جنيه) وكارديجان مريح وطويل (525 جنيه). نروح على ملابس السهرة الخلابة، وهى من تقديم اسم ثانى شهير فى عالم الموضة البريطانية، وهو Coast واللى بـ يقدم مجموعة من الفساتين المثيرة. أجمدهم كان فستان أخضر طويل لامع (2900 جنيه)، مع فستان قصير لونه برتقالى (2250 جنيه). لو المطلوب حاجة كاجوال أكثر، جينزات سكينى من Jasper Conran بـ 700 جنيه، كان شكلها مريح جدًا وعلى الموضة فى نفس الوقت، وهـ تكون رائعة مع شنطة اليد الأسود فى كريمى من Julien Macdonald بـ 800 جنيه. الخريطة الموجودة وسط الجينزات، واللى بـ توضح الفرق بين القصات كانت مفيدة وتعتبر إضافة ممتازة، عجبنا كمان خط Miss Selfridge بقطعه الصغيرة حجمًا، ووقعت أعيننا على بوت أسود (699 جنيه) وحذاء أحمر بكعب عالى (599 جنيه). بعدها جاء الدور على قسم معقول –إن لم يكن عادى– للماكياج والعطور، بـ يعرض منتجات تجميل من أسماء شهيرة منها شانيل، لانكوم ، YSL، Bourjois، كلارينس وجيفنشى وحاجات ثانية. ديبنهامز أكيد يعتبر إضافة مميزة لمشهد التسوق المصرى، ورغم أن بعض القطع أسعارها غالية، لكن واضح جدًا عليهم الجودة العالية مع ماركات كثيرة مش موجودة فى أى مكان ثانى. المحل يعتبر مكان هائل للتسوق لأصحاب الذوق الرفيع، وكمان بديل أفضل من الأسماء البريطانية اللى بدأت موضتها تتراجع زى توب شوب واحد من الإضافات الجديدة لكايرو فيستيفال سيتى وأقرانه.

...

ف. سعد الله: مجوهرات من الأحجار الكريمة في مول العرب
اصدرت في: 05/06/2014

منذ إطلاق أول مجموعة لها سنة 2007 وفاتن سعد الله بـ تضيف بُعد جديد لصناعة الحلي والمجوهرات في القاهرة. ولعها بالقيمة التاريخية والرمزية للأحجار الكريمة وعشقها لصناعة الحلي بشكل عام واضح من خلال التصميمات اللي بـ تقدمها. بالرغم من أن المحل موقعه في مول العرب سهل أنك تفوّته وأنت بـ تتجول، إلا أن تصميمات "ف. سعد الله – F.Sadallah " سواء المصنوعة من الذهب، أو الفضة أو الأحجار الكريمة، مش هـ تمر بجانبها من غير ما تشد انتباهك. فاتن سعد الله من الناس اللي بـ تؤمن أن الأحجار الكريمة لها قدرات ميتافيزيقية، وبالتالي انعكس الإيمان ده على تصميم ديكور المحل بشكل كبير... الحوائط لونها بني غامق، بينما الأثاث بلون الذهب، الديكور في مجمله وصل لنا الإحساس بأهمية وتأثير الأحجار الكريمة مع الحفاظ على الجماليات المطلوبة لديكور محل مجوهرات. بالرغم من أن المجموعة الموجودة فعليًا في المحل كبيرة ومتنوعة، إلا أن عدد الحلي المعروضة قليلة نسبيًا، الباقي مُحتفظ به في دواليب مخصوصة. المعروضات تتضمن: حلقان، وخواتم وأساور بالإضافة للمسبحات، وكلهم مصنوعين من المعادن الثمينة المُطعمة بالأحجار الكريمة. طلبنا من العامل بالمحل –واللي كان ظريف جدًا- أنه يعرض لنا مجموعة من الخواتم اللي لفتت نظرنا، المدهش أن المجموعة كلها مميزة، تحيّر أي شخص ناوي يشتري. المجموعة فيها كل ما تتخيل: ذهب، وفضة، وخواتم مُطعمة بأحجار كريمة أو حتى بموتيفات الخط العربي، أسعارهم بـ تترواح ما بين (300: 900 جنيه). بالنسبة للأعقاد، فالتصميمات تميزت بتعدد الأحجار اللي لها ألوان مبهجة في العقد الواحد، طبعًا فيه منهم معمول بنوع واحد من الأحجار، ومعظمهم له دلاية ذهب. الأسعار (400: 2000 جنيه) بحسب نوع الأحجار وعددها. لفت انتباهنا مجموعة الأساور بأشكالها الحداثية والمجنونة، فمنها مجموعة مُستخدم فيها الجلد، مع وجود الوحدة الجمالية الأساسية في المنتصف، وهي عبارة عن مربع من الذهب. معظم الأساور من النوع ده بـ تعتمد على موتيفة الخط العربي... أسعارهم (500: 550 جنيه). من الحاجات النادر وجودها في مصر، واللي اكتشفنا أنها موجودة في المحل، الأباجورات المنحوتة من ملح جبال الهيمالايا (650 جنيه)، شيء عجيب وساحر، وعلشان خيالك ما يروحش لبعيد، طبعًا الحجر مش بـ ينوّر لوحده، الحجر بـ يكون مجوّف من الداخل، وبـ يوضع لمبة داخل التجويف فـ ينعكس لون الحجر من خلال خروج شعاع النور، كان فيه منها لونين: البرتقالي المائل للإحمرار و الأزرق المائل للإخضرار. إجمالًا المحل مناسب جدًا لكل الأذواق والميزانيات، مش بس كده... ممكن يعدّلوا في التصميمات لو بـ تحب التفرد أو نفسك تهدي شخص مهم شيء مميز.

...

مجوهرات أمين السرجانى: عائلة الجواهرجية فى الزمالك
اصدرت في: 20/05/2014

الحياة فى القاهرة ماشية بسرعة البرق، بس ثقافة وتاريخ المدينة العريق شاهدين على شغلانات مستمرة من قديم الأزل. فى قلب الزمالك، مجوهرات أمين السرجانى يعتبر واحد من أقدم محلات الجواهرجية اللى لسه فاتحة لوقتنا ده فى مصر. صحيح السرجانى شغال من سنة 1776، المحل الموجود فى الزمالك بـ يخص أمين السرجانى، بعد ما استقل بنفسه فى 1977. أمين السرجانى مميز بين الجواهرجية، ومتخصص فى حرفة الذهب الخالص، الماس بجودة عالية والأحجار النادرة. بعد توليهم المسؤولية عن شغل والدهم، بناته دينا ونيرفانا السرجانى –الاثنين خبراء معتمدين فى الأحجار الكريمة– يتمتعوا بالإبداع فى عمل تصميماتهم الخاصة وكمان تعديل الطلبات المخصوصة، للتأكد من أن كل قطعة تكون متفردة. رغم أن المحل مساحته صغيرة، تحس فيه بجو من الشياكة والرقى. معروض تشكيلة من الحلقان، والخواتم، وخواتم الخطوبة، ودلّايات، وعقود وأساور. صحيح القطع المعروضة بسيطة وهادئة، حاجات ثانية بـ تشمل الماس وأنواع مختلفة من الأحجار. خاتم من الذهب الأبيض مطعم بحجر ياقوت أزرق، وحوله ألماس من كل جانب سعره كان 3500 جنيه. روعة الحجر الأزرق النادر صعب تقاومها حتى وإن كان حجمه صغير. كثير من القطع الموجودة بـ تكون على هيئة أطقم، وواضح فعلاً المجهود والاهتمام بالتفاصيل الموجودين فى التصميمات المنفذة يدويًا. الطقم المعروض كان عبارة عن حجر زبرجد جميل بـ يزين دلّاية، مع ألماس على الأطراف (5000 جنيه). مع الدلّايات، معروض حلقان كلاسيكية مناسبة لكل الأعمار فيها نفس حجر الزبرجد (3500 جنيه). وقت زيارتنا كانت المصممة نيرفانا السرجانى موجودة فى المحل، وبكل ود وفخر كشفت عن مجموعة من حلقان فخمة مش موجودة ضمن العرض. شد انتباهنا أنواع نادرة من الأحجار بين خواتم من الذهب الأبيض والأصفر. حجر من الياقوت الأصفر الجميل مغروس فى خاتم أبيض وأصفر (8000 جنيه)، ويمكن الياقوت الأزرق شكله كان أكبر شوية، التصميم ككل كان له طابع ملكى لو صح التعبير. خاتم مبهر ثانى من الذهب الأبيض بلؤلؤة سوداء (7000 جنيه). الخاتم كان محكوم بقطع ألماس صغيرة، اللى قدرت تبرز الؤلؤة أكثر؛ عشاق المجوهرات هـ يحبوا القطعة دى تحديدًا نظرًا لندرة اللؤلؤ الأسود. القاهرة مش بـ تعانى نقص فى عدد الجواهرجية، بس ذهب أمين السرجانى يتمتع بصنعة وتصميمات هائلة، باستخدام أعلى جودة مجوهرات.

...

تى بى هوم أكسيسوريز: لمحة من خان الخليلى فى المعادى
اصدرت في: 07/05/2014

صحيح كلنا شايفين فيضان الماركات العالمية اللى مغرق السوق المصرى، الأماكن المحلية بـ تظهر بنفس المعدل تقريبًا. فى مكانه المستخبى وسط شوارع المعادى الصغيرة، سهل يفوتك "تى بى - Tee Pee." صعب جدًا تخمن المحل كبير قد إيه، لازم تقرب من الشباك الزجاجى؛ بعدها الباب هـ يفتح ويقابلك جو هادئ خفيف وعدد كبير من مستلزمات البيت. أى حاجة تخطر على بالك أنها موجودة فى أى بازار مصرى تقليدى، وحاجات أكثر كمان، معروضة هناك. المحل مليان إكسسوارات، وده معناه شوية تشتيت، أو ممكن تكون حاجة رائعة، وده طبعًا يختلف على حسب درجة إدمانك للتسوق، الإضاءة هادئة ومريحة، والمعروضات كثيرة وتجربة التسوق هناك ممتازة. الفكرة أنه مش بازار بالمعنى التقليدي، صحيح أنه مكان هائل لشراء هدايا أو تذكارات لعائلتك أو أصحابك، لكنه أجمد كثير من ناحية قدرته على تحويل غرفة كئيبة لحاجة مثيرة ومبتكرة. أول ما تدخل هـ تشوف علب مزخرفة ومجوهرات بأحجام مختلفة، قاعدة أكواب عليها جمل عربى لطيفة وكل أنواع المجوهرات الفرعونى زى العقود، والأساور، والحلقان وحاجات ثانية وكلهم أسعارهم بين 10 و100 جنيه. عندهم كل أنواع أجهزة الكمبيوتر المحمولة والتابليت، شوية منهم جلد، وشوية كانوا مدهشين من الورق الخفيف المعاد تدويرة سعره حوالى 110 جنيه. متفرقات ثانية زى طبلة صغيرة مزخرفة، ماراكاس وصاجات أسعارها بين 60 و150 جنيه. تقدر كمان تلاقى حاجات من فن البوب وأشكال مبهرجة فى صورة بوسترات وصور حائط حجمها أصغر، بأسعار بين 25 و200 جنيه. لو مشيت شوية، هـ تشوف أشكال مختلفة من نجف حائط معدنى، شوية منهم تصميمه معقد بزجاج ملون بأسعار بين 150 و850 جنيه. ادخل شوية كمان فى الغويط، فى آخر المحل فيه قسم صغير يعرض شنط قماش بتصميمات مختلفة، وإيشاربات وكوفيات، منها بألوان سادة ومنها بأشكال متنوعة. قطع ثانية منها أباريق زجاجية، صوانى تخزين وأطباق، حوامل للشمع، خرز لعشاق صناعة الحلى. الحلو فى "تى بى" أنك بـ تكون براحتك من غير أى تدخل من الموظفين، على عكس اللى بـ نشوفه فى تجاربنا مع التسوق المصرى. بدل كده بـ يخلونا تتفرج براحتنا على الكم الكبير من المعروضات، وفى نفس الوقت كل حاجة سعرها واضح وبالتالى مافيش داعى للمقاطعة. المشكلة الحقيقية فى "تى بى"، أنك لما تقارن بين بازارات ومحلات خان الخليلى، هـ تلاقى الأسعار أغلى شوية فى كل حاجة. لو كان لك قدرة على تنظيم رحلة وسط الزحمة لقلب العاصمة، يبقى المكان ده مش مناسب لك، أما لو مافيش عندك مانع تدفع شوية زيادة وتنقذ نفسك من الزحمة والطرق، لازم تروح.

...

أكسيسورايز: إكسسوارات ساحرة فى كايرو فستيفال سيتى مول، القاهرة الجديدة
اصدرت في: 02/04/2014

وسط توجه الموضة الحالية ناحية الحلى المعبرة عن شخصيتك والإكسسوارات الملفتة للأنظار، التسوق فى القاهرة تحول أكثر ناحية الألوان المفعمة بالحيوية. بتجميعه لكل الحاجات الجميلة تحت سقف واحد، الماركة البريطانية "أكسيسورايز- Accessorize" فتح فرعه فى أكبر مولات القاهرة الجديدة، كايرو فيستيفال سيتى مول. باشتراكه فى نصف مساحة شقيقه "مونسون – Moonson"، أكسيسورايز مكانه واضح وظاهر فى الدور الثالث، بنافذة العرض اللامعة بالإكسسوارات الأساسية لكل بنت. ممكن تحسّى شوية بعدم الراحة مع الألوان الصارخة للمعروضات، خصوصًا أن كثير من المعروضات مش معروضة جنب بعضها، على سبيل المثال، الكوفيات وشنط اليد منتشرة فى أنحاء المحل. الموظف كان فى أغلب الوقت مشغول فى أماكن ثانية بحيث نقدر نتفرج على المعروضات براحتنا. مع شهرته بتقديم شنط يد جودتها عالية، وماشية على الموضة، المحل عنده مجموعة من التصميمات –كاجوال وسمارت– بألوان وأشكال وأحجام مختلفة؛ شنطة بحر من القماش كان سعرها 300 جنيه، وشنطة كبيرة جلد ثعبان سعرها 430 جنيه، أما مجموعة شنط كلاتش رائعة مناسبة للحفلات سعرهم يبدأ من حوالى 150 جنيه. بالنسبة للحلىّ فموجودة بمجموعة كبيرة من التصميمات، من الكاجوال، الأنيقة والرقيقة، لغاية قطع ضخمة ومعبرة. عبوة مكونة من تسعة أزواج من الحلقان سعرهم معقول (60 جنيه)، وفى نفس الوقت عقد ثقيل متماسك لونه فضى كان سعره 165 جنيه. أساور وخواتم أسعارها تبدأ من 100 جنيه بمجموعة من التصميمات تعجب كل الأذواق، لدرجة أننا شوفنا خاتم مبتكر على شكل شنب. إكسسوارات الشعر برضه كثيرة، منها الكاجوال والفورمال، تشمل كليبسات، وبنس، وكحك شعر، وقطع على شكل ورد، وحزام شعر (+40 جنيه) وشرائط للشعر (+20 جنيه). لاحظنا كمان مجموعة من كوفيات شيك برسومات ورد، 100% حرير، مع أشكال ثانية أثقل. كوفية طويلة رمادى فى أبيض عليها تصميم أزتيك سعرها 195 جنيه. عندهم كمان إكسسوارات ثانية من دفاتر ملاحظات وأقلام مزينة بالحلىّ، جرابات وموبايلات ملونة، ومحافظ، وأحزمة وعدد محبط من الأحذية بكعب. فى الركن البعيد الهادئ من المحل، لاحظنا تشكيلة بسيطة من ملابس البحر، منها شباشب سعرها معقول (+85 جنيه)، تي شيرت واسعة بزيادة لونها مرجانى (155 جنيه)، وفستان أبيض لطيف (330 جنيه)، مع قبعات شمس (+155 جنيه) وشكلين بس من المايوهات البيكينى (+250 جنيه). العدد القليل من المنتجات كان محبط شوية، بس نتوقع أنهم هـ يزيدوا مع وصول الصيف بحرارته الشديدة. قسم أطفال ظريف بـ يعرض مجموعات لطيفة من الأدوات المكتبية، ستيكرات وأختام (45 جنيه). شنط يد بناتى وأحذية لامعة لذيذة برضه متوفرة، منهم شنطة يد من الخوص على شكل قطة سعرها 85 جنيه. أكسيسورايز بـ يقدم نفسه كمحل فيه كل حاجة خاصة بالبنات، وصحيح هو مش أرخص محل فى العاصمة، بس التشكيلة المتنوعة فعلاً مافيش زيها.

...

بيبر كلوزيت: ماركات عالمية بأسعار قليلة فى الزمالك
اصدرت في: 21/08/2013

حتى مع كل الظروف الاقتصادية الصعبة فى أيامنا الحالية، لسه فيه ناس عندها الشجاعة أنها تفتح مطاعم، وكافيهات ومحلات فى القاهرة. دائمًا فيه اختيارات لا نهائية لما نتكلم عن محلات الملابس الحريمى، رغم أن كثير من المحلات بـ تعرض نفس الحاجات، وبكده التنوع بـيبقى قليل فى السوق. مكان "بيبر كلوزيت -Pepper Closet" مستخبى فى شارع محمد مظهر فى الزمالك، وبـ يقدم لكل عشاق الموضة مجموعة مختارة من الماركات المحلية والعالمية. البوتيك يحتل مكان صغير وفى الوقت نفسه منظم يشبه دولاب البنات. البضاعة الموجودة من ماركات ومصممي أزياء معروفين وبـتُباع بأقل من سعرها الأصلى. مى عز الدين شابة بـ تملك المكان، فاهمة كويس الموضة وبـ تقابلك بترحاب شديد؛ على طول عرضت تساعدنا فى اختيار أكثر حاجة تناسبنا وقالت لنا رأيها بصراحة طوال المدة الطويلة فى تجربة الملابس. لما لاحظت أن واحد من الفساتين مقاسه مش مضبوط، مى علشان تساعدنا قالت لنا على ترزى ممكن يضبطه. الأقسام كلها منظمة بدقة، ومع بداية جولتنا وسط صفوف الملابس المبهجة، لاحظنا أسماء شهيرة، وكمان ماركات باريسية، معظمها مش متوفر فى مصر. توبات خفيفة مناسبة للصيف بمجموعة من الألوان، الأشكال والتصميمات سعرها يبدأ من 110جنيه لغاية 250 جنيه، وفى نفس الوقت تي شيرتات بالدانتيل من فيلا Vila كان سعرها 220جنيه. شوفنا توب كريمى خفيف مزين بجماجم ذهبية صغيرة سعره 250جنيه وتيشيرتات بدون أكمام لها تطريز على شكل سلسلة حول الرقبة (180جنيه). بلوزات أتموسفير Atmosphere بزراير مقفولة سعرها كان 120جنيه وسويتر جميل من الصوف لونه مرجانى من باندوليراBandolera ثمنه 250جنيه. علشان تكمل مجموعتك المميزة، شوفنا رف منظم بشكل أنيق عليه مجموعة من الجينزات، بنطلونات سكينى leggings وبنطلونات haram pants مريحة، منهم على سبيل المثال جينز أبيض فى أسود مقلم من Miss Anna بسعر 150 جنيه. نروح على صف الفساتين اليومية، وفيها لاقينا أكثر من حاجة تنفع تتلبس لمناسبة رسمية أو عادية. فساتين كثيرة منها الماكسى، المتوسط أو القصير، ومتوفر منها ألوان وخامات كثيرة. شدينا فستان صيفى خفيف (780) من مجموعة كارين ميلن، سعره الأصلى 1700جنيه. لو عاوزة فستان سهرة ما حصلش، بيبر كلوزيت ممكن يبقى المكان المناسب للزيارة. الأسعار تبدأ من سعر بسيط هو 250جنيه، وبالتالى ممكن تلبسى حاجات شكلها تساوى ملايين الدولارات بشوية جنيهات بسيطة. فساتين مطرزة بترتر سعرها كان 450جنيه وفى نفس الوقت فستان أسود قصير شكله ثمين من Andrea Jovine والمفاجأة أن سعره كان 350جنيه. وزى ما هو متوقع، الأسعار بـ تزيد على حسب الماركة. فستان طويل رائع لونه أخضر زمردى من لابلانكا La Blanca كان بـ يباع بسعر مخفض (1700جنيه بدلاً من 3000 جنيه). فستان على طراز الـbandage أسود أصلى من مجموعة Hervé Léger بتطريز ذهبى من الأمام ثمنه فى العادى 4000جنيه، بس ثمنه هناك كان 2500جنيه. عندهم كمان مجموعة كبيرة تقدرى تختارى من بينها، منها الأحذية والصنادل (110جنيه: +180جنيه)، كوفيات حرير (40جنيه)، قبعات للشمس (100جنيه)، مايوهات (+150جنيه)، شنط يد (+250جنيه)، محافظ ومجوهرات أنيقة (+60جنيه)؛ شنط يد مستعملة من أشهر مصممى الأزياء، رغم أنك صعب تقدرى تطلعي الفرق. إصدار محدود من شنط يد دولتشى & جابانا كان ثمنه 5000 جنيه، وكمان حذاء بكعب من كريستين ديور كان سعرها 1400 جنيه. تقدر تلاقى كمان شوية حاجات من محلات شهيرة ومصممين محليين مميزين، منهم دكان بلدى، آية دينا وداليا حافظ. بيبر كلوزيت عنده تنوع هايل، وعادة القطعة الواحدة مش بـ تتكرر؛ وعلشان كده مش بس بـ يقدم اللى تحتاجه أى واحدة بأى ميزانية، ده كمان بـ يضمن أن مافيش حد ثانى يلبس نفس الحاجة.

...

الحرية: الثقافة المصرية الأصيلة تندمج مع الموضة الحديثة فى فيرست مول
اصدرت في: 26/02/2013

علشان هو مشهور بأنه بـ يجمع كثير من البوتيكات الشيك أخذنا جولة فى فيرست مول الموجود فى الجيزة يمكن نلاقى حاجة فريدة من نوعها. شد انتباهنا محل صغير فى الدور الأول واجهته زجاجية بدون اسم واضح. بعد فترة عرفنا أن اسمه "الحرية"، وهو غير أى بوتيك ثانى تقليدى ممكن تقابله. الألوان والأذواق المستخدمة فى تشكيلة الحرية من الملابس، والمجوهرات، وشنط اليد وكمان الإكسسوارات المنزلية كلها بـ تعكس الذوق المصرى؛ كل قطعة عندهم مصنعة محليًا ونسبة من الأرباح بـ تروح مباشرة للأعمال الخيرية.جاكيت جلد مش تقليدى شكله تحفة بتطريز لامع متعدد الألوان على الظهر مع رسمة فهد من الخرز. مافيش شك أنه مصنوع من جلد ثقيل وجودته عالية وده انعكس على السعر (2400 جنيه). لو دققت أكثر هـ تلاحظ أنه من غير حاجة تقفله بها من الأمام، ومعنى كده أنه كان مفتوح ومُعلق بطريقة غير عملية. جاكيت جينز (990 جنيه) عليه علامات تشبه حروف لغة الأزتيك على جيب الصدر شكله جديد تمامًا فى حين أن سديرى جلد بشراشيب كان سعره 450 جنيه.شوفنا بجانب الجاكيتات عدد من التي شيرتات المبتكرة، وعبايات، وشيلان وفساتين. تي شيرت بنفسجى غامق عليها قطعة من الماس على مقدمتها سعرها 490 جنيه. فستان ماكسى لونه أخضر زمردى مع حلقة معدنية للزينة حول الرقبة سعره كان 1200 جنيه، فى حين أن بذلة جميلة قطعة واحدة مكشوفة شوية عليها تطريز فضى مبهج على الجزء اللى فوق الركبة هـ يكلفك 1800 جنيه.الكميات المعروضة من كل منتج محدودة جدًا ومافيش ضمان أن مقاسك يكون متوفر عندهم. يمكن الموضوع ده محبط شوية، لكن أحيانًا ده بـ يضيف للملابس نوع من الحصرية. الحرية بـ يقدم مجموعة متواضعة من قطع مجوهرات بـ تمثل رموز، يعنى مثلاً حلقان على شكل فوانيس رمضان (120 جنيه)، وأساور روشة لليد (460 جنيه)، وعقد فضى راقى (460 جنيه)، وخواتم كلاسيكية ضخمة واحد منهم على شكل رأس ذئب (280 جنيه) وواحد ثانى على شكل طائر (740 جنيه).تشكيلتهم من شنط اليد قليلة شوية، لكن عندهم شنط كبيرة من البلاستيك بأشكال ورود، وعدد من الشنط الحريمى بدون يد منها الأسود أو الذهبى اللامع بالترتر (450 جنيه)، وشنط كتف مصنوعة من الجلد (1200 جنيه) مزينة برسوم متعرجة على طراز الخيامية وده طراز مشهور فى تصميم خيام رمضان.إكسسوارات ثانية بـ تشمل بطاطين، وشنط لاب توب، وشنط ماكياج وقواعد أكواب خشبية، بالإضافة لمخدات بأحجام كبيرة، ومتوسطة، وصغيرة (150: 280 جنيه). الحرية بـ يبيع تقريبًا كل حاجة، ونظرًا لفكرهم القائم على الجمع بين الأصول الثقافية مع الموضة لازم هـ تلاقى حاجة مختلفة.

...

شاهد المزيد
مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح