أطفال تسوق in Cairo, Egypt

تسوق

تيرانوفا: فرع جديد لماركة الملابس الشبابية في شارع لبنان
اصدرت في: 03/12/2014

سكان المهندسين من وقت قريب كان لازم "يضربوا" مشوار للمولات الكبيرة زي سيتي ستارز في مصر الجديدة أو مول العرب في أكتوبر علشان يلاقوا محلات الملابس المشهورة كلها في مكان واحد. الموضوع بالنسبة لهم بقى أسهل لما مجموعة محلات زي مانجو، بول أند بير وبيرشكا فتحت في شارع جزيرة العرب؛ محل وراء الثاني وبدأت حمى المحلات تنتشر لغاية ما وصلت بطول شارع لبنان، بدأت بـ "إتش & إم"، وبعدها فتحت مجموعة من المحلات من ضمنها تيرانوفا - Terranova، واللي قررنا نكتب عنه مقال نقدي. تيرانوفا كان فاتح في شارع وادي النيل بعيد عن مجمع المحلات الحالي، ولكن الفرع ده قفل علشان يحتل المحل اللي جانب إتش & إم. الفرع الجديد أوسع كثير وفيه أقسام ما كانتش موجودة في القديم زي قسم اللانجيري وملابس البيت. أول دور بـ يحتله القسم الحريمي كما هو معتاد في محلات الملابس، أول قطعة لفتت نظرنا كانت جاكيت ثقيل مضاد للماء لونه زيتي (339 جنيه) وهو مناسب جدًا للأيام دي بما أن الشتاء دخل علينا. معروض مع الجاكيت مجموعة من القمصان الكاجوال (119 جنيه)، وبنفس سعرهم معروض في قسم لوحده مجموعة من البنطلونات الـ Skinny Jeans بألوان مختلفة منها الرمادي والأزرق الفاتح. أما البنطلونات القطنية واللي مناسبة للجيم أو مشوار سريع فالواحد بـ (149 جنيه) وألوانه كحلي بكتابة بيضاء على الرجل أو العكس. من البلوفرز عجبنا واحد بسيط جدًا برقبة مستديرة و3/4 كم سعره (149 جنيه) والألوان الموجودة منه الكحلي والأبيض. الملابس الحريمي كثيرة لدرجة أننا اكتشفنا أنها مش بس محتلة الدور الأول، ده كمان نصف الدور الثاني، ومعروض فيه مجموعة من الـ Sweatshirts اللي عليها رسومات كرتونية والمناسبة جدًا ليوم دافيء، وموجود برضه مجموعة من الـ Leggings واللي ممكن تناسبها. قسم اللانجيري مش كبير ولكن ممكن تطلعي منه بعرض مناسب وخصوصًا أن العرض الموجود حاليًا، واللي مستمر لمدة 10 أيام هو اشتري 2 وتحصلي على القطعة الثالثة بـ 9 جنيه، واللي ساري على معظم القطع من الأقسام المختلفة. من قسم اللانجيري لاقينا بيجامة لونها Powder Pink عليها رسمة بسيطة في القطعة العلوية. سعر القطعة العلوية (119 جنيه)، أما البنطلون فهو سادة وسعره (149 جنيه). لاحظنا أن الملابس الداخلية مش منوعة من حيث الأشكال والألوان ومعظمها من الألوان الأساسية زي الأبيض والأسود والبيج. قسم الأطفال موجود فيه العديد من الاختيارات للأولاد والبنات وعجبنا فيه جاكيت بناتي مضاد للماء عليه رسمة ورود سعره (199 جنيه)، ومعظم الملابس القطنية أسعارها بـ تبدأ من 49 حتى 119 جنيه. آخر جولتنا كانت في القسم الرجالي واللي موجود فيه مجموعة من البنطلونات الواسعة بألوان مختلفة منها حتى بطبعة كموفلاج الجيش، استغربنا أن فيه لسه محل بـ يبيع الطبعة دي لأنها انقرضت من زمان. التي شيرتات اللي بنص كُم موجودة بكثرة بالرغم من أن الدنيا برد، لفت نظرنا واحدة مطبوع عليها ورود بالكامل (119 جنيه)، بلوفر على صدره مجموعة من الرسومات المناسبة للكريسماس (219 جنيه)، و Coat قصير ألوانه الكحلي والرمادي سعره (519 جنيه). ما بـ نعتبرش تيرانوفا من المحلات اللي بـ تقدم ملابس جودتها عالية، صحيح سعرها مناسب بالنسبة لناس كثير، ولكن التجربة أثبتت أنها ملابس الموسم الواحد لأن عمرها قصير. فلو أنت من الناس اللي بـ تحب اللبس يعمر معاك، ننصحك بأنك تعلّي ميزانيتك وتشتري من مكان جودة ملابسه أعلى. أما لو أنت من الناس اللي بـ تزهق من شكلك في اللبس بسرعة ممكن تلاقي هناك اللي يناسبك.

...

ديبنهامز: المتجر الإنجليزى متعدد الأقسام وصل كايرو فيستيفال سيتى
اصدرت في: 23/11/2014

يمكن لأنك نادرًا ما بـ تشوفهم وسط مشهد التسوق القاهرى الراقى، لكن يفضل حبنا للمتاجر متعددة الأقسام أبدى، ببساطة شديدة النوع ده من المحلات عنده القدرة على توفير حياة –وكمان تجربة تسوق– أكثر روعة وسهولة، عن طريق تقديم كل حاجة ممكن تحتاجها فى مكان واحد. مع فرع موجود بالفعل فى الإسكندرية، الاسم البريطانى المعروف "ديبنهامز -Debenhams"، وصل أخيرًا للقاهرة. المحل بـ يحتل مكان ضخم فى مول كايرو فيستيفال سيتى، ولما نقول كبير نقصد أن مساحته تساوى مساحة من 4: 5 محلات متوسطة الحجم. بإضائته المشرقة وألوانه الفاتحة البسيطة، المحل يتميز بديكورات معاصرة أنيقة، لاحظنا على طول ندرة البائعين بطريقة غريبة، وكل فين وفين لما نشوف بائع واحد. أول ما دخلنا لاقينا نفسنا فى قسم ملابس الأطفال، واللى بـ يعرض مجموعة متنوعة من الاختيارات الجميلة للأطفال من كل الأعمار، من الرضع لغاية 12 سنة. تحركنا من قسم الأطفال، ووصلنا لقسم الحمامات، وفيه مجموعة من مستلزمات الحمامات القطنية، من البشاكير لممسحة الأرضية. البشاكير موجودة بكل الأحجام (فوط اليد سعرها 110 جنيه وفوط الاستحمام 230 جنيه)، والألوان مافيش أكثر منها بعدد يوصل 42 لون متنوع. بعد كده وصلنا لقسم الرجالى، وفيه كنا وسط مجموعة من الأزياء الراقية من إمضاء عدد كبير من مصممى ديبنهامز الحصريين. بالنسبة للملابس الكاجوال المتينة، عندك ماركة Maine الرائعة، بتقديمها لحاجات منها قمصان كاروهات (400 جنيه) وبنطلونات كاكى (500 جنيه). لو عاوز حاجة أقرب شوية للملابس الرسمية، سمارت كاجوال يعنى، ماركة John Rocha عندها الحل، بـ تقدم حاجات منها جاكيت أسود أنيق (1100 جنيه)، وجاكيت رمادى أقل رسمية شوية فكرته مستوحاه من الكارديجان (770 جنيه). الجاكيتات السابقة ممكن معاها سترات برقبة V 320 جنيه من ماركات أسعارها معقولة شوية زى Thomas Nash. قسم الرجالى كمان يشمل قسم لملابس البيت والغيارات الداخلية. فى الوقت نفسه، قسم الحريمى كان مليان حاجات لكل المناسبات. الماركة الشهيرة Betty Johnson كانت أول حاجة نشوفها ولفتت انتباهنا منها توب شيفون أزرق مخضر (650 جنيه) وبليزر (1100 جنيه). بالنسبة للمقاسات الكبيرة، الاسم البريطانى الشهير إيفانز Evans بـ يقدم مجموعة ضخمة تشمل فستان أبيض برقبة دانتيل (650 جنيه) وكارديجان مريح وطويل (525 جنيه). نروح على ملابس السهرة الخلابة، وهى من تقديم اسم ثانى شهير فى عالم الموضة البريطانية، وهو Coast واللى بـ يقدم مجموعة من الفساتين المثيرة. أجمدهم كان فستان أخضر طويل لامع (2900 جنيه)، مع فستان قصير لونه برتقالى (2250 جنيه). لو المطلوب حاجة كاجوال أكثر، جينزات سكينى من Jasper Conran بـ 700 جنيه، كان شكلها مريح جدًا وعلى الموضة فى نفس الوقت، وهـ تكون رائعة مع شنطة اليد الأسود فى كريمى من Julien Macdonald بـ 800 جنيه. الخريطة الموجودة وسط الجينزات، واللى بـ توضح الفرق بين القصات كانت مفيدة وتعتبر إضافة ممتازة، عجبنا كمان خط Miss Selfridge بقطعه الصغيرة حجمًا، ووقعت أعيننا على بوت أسود (699 جنيه) وحذاء أحمر بكعب عالى (599 جنيه). بعدها جاء الدور على قسم معقول –إن لم يكن عادى– للماكياج والعطور، بـ يعرض منتجات تجميل من أسماء شهيرة منها شانيل، لانكوم ، YSL، Bourjois، كلارينس وجيفنشى وحاجات ثانية. ديبنهامز أكيد يعتبر إضافة مميزة لمشهد التسوق المصرى، ورغم أن بعض القطع أسعارها غالية، لكن واضح جدًا عليهم الجودة العالية مع ماركات كثيرة مش موجودة فى أى مكان ثانى. المحل يعتبر مكان هائل للتسوق لأصحاب الذوق الرفيع، وكمان بديل أفضل من الأسماء البريطانية اللى بدأت موضتها تتراجع زى توب شوب واحد من الإضافات الجديدة لكايرو فيستيفال سيتى وأقرانه.

...

أكسيسورايز: إكسسوارات ساحرة فى كايرو فستيفال سيتى مول، القاهرة الجديدة
اصدرت في: 02/04/2014

وسط توجه الموضة الحالية ناحية الحلى المعبرة عن شخصيتك والإكسسوارات الملفتة للأنظار، التسوق فى القاهرة تحول أكثر ناحية الألوان المفعمة بالحيوية. بتجميعه لكل الحاجات الجميلة تحت سقف واحد، الماركة البريطانية "أكسيسورايز- Accessorize" فتح فرعه فى أكبر مولات القاهرة الجديدة، كايرو فيستيفال سيتى مول. باشتراكه فى نصف مساحة شقيقه "مونسون – Moonson"، أكسيسورايز مكانه واضح وظاهر فى الدور الثالث، بنافذة العرض اللامعة بالإكسسوارات الأساسية لكل بنت. ممكن تحسّى شوية بعدم الراحة مع الألوان الصارخة للمعروضات، خصوصًا أن كثير من المعروضات مش معروضة جنب بعضها، على سبيل المثال، الكوفيات وشنط اليد منتشرة فى أنحاء المحل. الموظف كان فى أغلب الوقت مشغول فى أماكن ثانية بحيث نقدر نتفرج على المعروضات براحتنا. مع شهرته بتقديم شنط يد جودتها عالية، وماشية على الموضة، المحل عنده مجموعة من التصميمات –كاجوال وسمارت– بألوان وأشكال وأحجام مختلفة؛ شنطة بحر من القماش كان سعرها 300 جنيه، وشنطة كبيرة جلد ثعبان سعرها 430 جنيه، أما مجموعة شنط كلاتش رائعة مناسبة للحفلات سعرهم يبدأ من حوالى 150 جنيه. بالنسبة للحلىّ فموجودة بمجموعة كبيرة من التصميمات، من الكاجوال، الأنيقة والرقيقة، لغاية قطع ضخمة ومعبرة. عبوة مكونة من تسعة أزواج من الحلقان سعرهم معقول (60 جنيه)، وفى نفس الوقت عقد ثقيل متماسك لونه فضى كان سعره 165 جنيه. أساور وخواتم أسعارها تبدأ من 100 جنيه بمجموعة من التصميمات تعجب كل الأذواق، لدرجة أننا شوفنا خاتم مبتكر على شكل شنب. إكسسوارات الشعر برضه كثيرة، منها الكاجوال والفورمال، تشمل كليبسات، وبنس، وكحك شعر، وقطع على شكل ورد، وحزام شعر (+40 جنيه) وشرائط للشعر (+20 جنيه). لاحظنا كمان مجموعة من كوفيات شيك برسومات ورد، 100% حرير، مع أشكال ثانية أثقل. كوفية طويلة رمادى فى أبيض عليها تصميم أزتيك سعرها 195 جنيه. عندهم كمان إكسسوارات ثانية من دفاتر ملاحظات وأقلام مزينة بالحلىّ، جرابات وموبايلات ملونة، ومحافظ، وأحزمة وعدد محبط من الأحذية بكعب. فى الركن البعيد الهادئ من المحل، لاحظنا تشكيلة بسيطة من ملابس البحر، منها شباشب سعرها معقول (+85 جنيه)، تي شيرت واسعة بزيادة لونها مرجانى (155 جنيه)، وفستان أبيض لطيف (330 جنيه)، مع قبعات شمس (+155 جنيه) وشكلين بس من المايوهات البيكينى (+250 جنيه). العدد القليل من المنتجات كان محبط شوية، بس نتوقع أنهم هـ يزيدوا مع وصول الصيف بحرارته الشديدة. قسم أطفال ظريف بـ يعرض مجموعات لطيفة من الأدوات المكتبية، ستيكرات وأختام (45 جنيه). شنط يد بناتى وأحذية لامعة لذيذة برضه متوفرة، منهم شنطة يد من الخوص على شكل قطة سعرها 85 جنيه. أكسيسورايز بـ يقدم نفسه كمحل فيه كل حاجة خاصة بالبنات، وصحيح هو مش أرخص محل فى العاصمة، بس التشكيلة المتنوعة فعلاً مافيش زيها.

...

نايس برايس: ملابس أطفال بأسعار مغرية في المعادي
اصدرت في: 14/12/2013

في واحدة من جولاتنا المعتادة في شوارع المعادي، وبالتحديد في شارع زهراء المعادي الرئيسي شوفنا محل كبير وأنواره ملفتة (لأن الشارع نفسه هادئ ومظلم إلى حد ما) وطريقة عرضه للملابس لطيفة، اسمه «نايس برايس – Nice Price» وافتكرناه في البداية مكون من طابقين لأنه كبير فعلًا، لكن قربنا منه واكتشفنا أنه دور واحد لكنه واسع كفاية من الداخل ومقسم لـ 3 أقسام. أول ما تدخل من الباب.. القسم الأول فيه ملابس الأطفال من سن سنة حتى 4 سنوات، على اليمين البناتي والشمال الولادي، منظم وواضح، وأحسن حاجة أن كل قسم بـ يشمل ملابس البيت والخروج والبحر في الصيف كمان زي المايوهات والبرنص، والأسعار هائلة جدًا "اسم على مسمى" ومناسبة لكل المستويات، يعني فيه حاجات من أول 35 جنيه لحد 150 جنيه، حسب الخامة والموديل. واللي عجبنا هنا أن موديلاته مش هـ تلاقي شبهها في أي مكان ثاني وخامتها نظيفة جدًا، جربنا واشترينا من هنا قبل كده ولاقينا كمان أنها مش بـ تبهت أو لونها بـ يتغير بعد الغسيل. والظريف كمان أن في القسم الأول فيه فساتين وبدل أفراح مناسبة للمرحلة العمرية دي لحد 5 سنوات. أما القسم الثاني فهو من سن 5 سنوات لحد 11 سنة وهو يعتبر في منتصف المحل وبرضه لبس بيت وخروج وشوية إكسسوارات للبنات وأسعاره معقولة وبـ يتضمن موضات وموديلات السنة دي طبعَا، لكن المختلف أن «نايس برايس» على طول فيه تخفيضات، على أي ستاند للملابس هـ تلاقي كلمة "تصفية" في الصيف أو في الشتاء أو في أوائل الربيع وطبعًا الأسعار بـ تبقى وهمية. أما القسم الثالث فهو ملابس حريمي، بيت وخروج بموديلات متنوعة وأسعار من أول 50 جنيه، وهـ تلاقي جميع المقاسات لكل الموديلات ودي ميزة ثانية. والغريب أنك ممكن تلاقي ستاند عارض حاجات مالهاش علاقة بطبيعة المحل زي ستاند عارض كورسيهات ولانجيري "بنفس الأسعار الرخيصة" لكن مش كثير ومقاساتها محدودة لكن خامتها جيدة جدًا. في النهاية التخصص الأساسي هنا هو ملابس الأطفال، وبعد ما بـ تجيب كل اللي تحتاجه بـ تحاسب على الكاشير في مكتب في القسم الثاني، وعجبنا أننا أول ما بـ ندخل المكان بـ يستقبلنا أحد الموظفين وبـ يساعدنا حسب احتياجنا طوال فترة جولتنا في المحل، وبـ يسهل علينا اختياراتنا وبـ يفرجنا على المقاسات المناسبة وبـ يتابع معانا لحد لما نوصل للكاشير ونستلم حاجتنا. وكل العاملين بالمكان ظراف جدًا وهـ يقابلوك بترحاب شديد كأنك زبون دائم للمحل، وصاحب المحل موجود باستمرار ومهتم بمعرفة تعليق الزوار على كل التفاصيل، وحريص على تطوير المكان بشكل دائم ودي حاجة تحسب له.

...

النيل ستوك: تسوق على الطريقة الكلاسيكية في وسط البلد
اصدرت في: 13/10/2013

من وقت للثاني لازم نعمل زيارة لمحلات «النيل ستوك» أو Nile Stock اللي فروعها منتشرة في كل أحياء القاهرة وخاصة الشوارع التجارية المعروفة. المحل له خصوصية فريدة لأنه بـ يجذب كل شرائح المجتمع، أسعاره القليلة عمرها ما كانت سبب في أن الجودة تكون قليلة، ومستوى الخدمة ومواقع فروع المحل الحيوية بـ تخلي الإقبال عليه من جميع الفئات العمرية والمجتمعية كبير جدًا، عنده ملابس رجالي وحريمي وأطفال وبعض الإكسسوارات، وقدر يكون واحد من المحلات المفضلة للمصريين في السنين الأخيرة ودي حاجة مش سهل على محل ملابس عادي أنه يحققها. فرع وسط البلد موجود في ممر بهلر اللي بـ يربط بين شارع طلعت حرب وشارع عماد الدين، مكانه مميز على ناصية واضحة وهو مكون من دورين، الدور الأول للملابس الحريمي والأطفال البنات، والدور العلوي للرجالي والأولادي. عنده ملابس خروج وبيت وملابس داخلية لكن مافيش أحذية. سهل تأخذ بالك أنه بـ يشبه محلات مصرية عريقة زي صيدناوي وعمر أفندي بعد تجديدهم، نفس التصميم ونفس أسلوب رص الملابس ونفس الخدمة، شكل كلاسيكي جدًا للتسوق لكنه مريح نفسيًا، والمهم أنه متطور في نفس الوقت ودائمًا هـ تلاقي موظف قريب منك علشان تسأله على أي حاجة عاوز تعرفها. للحظات ممكن تحس أن المكان ده تابع للحكومة من كثر ما هو كلاسيكي، لكن الحقيقة أنه قطاع خاص عادي جدًا، بس قدر يكون له شخصية مميزة. ميزة «النيل ستوك» اللي كل الناس عارفينها أن عنده ملابس قطنية ممتازة، وثاني حاجة أن أسعاره قليلة قوي، يعني في قسم الرجالي على سبيل المثال التي شيرت القطن السادة بـ 30 جنيه بس، وشكله وتقفيله كويس يعني ممكن يتلبس في الخروج عادي، فين ممكن تلاقي تي شيرت خروج بـ 30 جنيه دلوقت ويبقى بالجودة دي؟ الجينز هنا بأسعار من 70 لحد 120 جنيه، صحيح مش آخر موضة لكن بـ تؤدي الغرض وعملية، وفيه منها كل الألوان، ونفس الكلام على البنطلونات الجبردين والبولو شيرت. ولأن الشتاء داخل كان فيه عدد كبير للبول أوڤرات السادة بكل الألوان، أسعارها 150 جنيه، شكلها بسيط زي كل الموديلات الموجودة في المحل، لكن شيك وممكن ما تقدرش تقاومها وتجيب منها 2 أو 3 لأنها عملية فعلًا وسعرها كويس. فيه ملابس بيت وبيجامات وبنطلونات رياضية وسويت شيرتات للبيت بأسعار من 30 لـ 60 جنيه، وإحنا بـ ننصح أي حد عاوز يعمل عملية إحلال وتبديل لدولاب الملابس المنزلية ييجي على هنا ونوعدك أنك مش هـ تدفع كثير، وهـ تكون راضي عن الجودة والموديلات كمان. قسم الأطفال غني جدًا بالمعروضات رغم أننا في فترة بين موسمين الصيف والشتاء لكن هـ تلاقي كل اللي يناسب طفلك (أولاد أو بنات) خروج أو بيت، من أول البيجامة اللي بـ 10 جنيه بس بعد الخصومات لحد الجاكيت الجلد السميك اللي بـ 130 جنيه، لكن ما عجبناش عدد من المعروضات في قسم الأطفال المصنوعة من التريكو حسيناها قديمة جدًا ومش ملائمة لروح المحل ولا الزمن اللي إحنا فيه، وأحيانًا بـ يبقى فيه نقص في بعض المقاسات لكن أول بأول المحل بـ ينزل الموديلات والمقاسات المختلفة، يعني اللي مش هـ تلاقيه النهارده هـ تلاقيه بعد يومين بالكثير. ملابس البنات والسيدات هنا مش بنفس جودة ملابس الرجال والأطفال، أو بمعنى أصح مش مناسبة لطبيعة السيدات اللي بـ يدوروا على أحدث موضة مش مجرد ملابس عملية بسيطة، ومع ذلك إحنا عجبنا عدد من الفساتين والشيرتات الحريمي رغم بساطتهم وأسعارهم اللي ما زادتش عن 150 جنيه. محلات «النيل ستوك» علامة بارزة في عالم التسوق وله شعبية كبيرة في القاهرة، جولتنا السريعة هناك كانت للاطمئنان على مستوى الخدمة وجودة المعروضات ونشوف إذا كان لسه محتفظ بطبيعته الخاصة ولا لأ، والحقيقة أنه كان عند حسن ظننا وزيادة شوية.

...

كوتون بيبول أورجانيك: ملابس أطفال ومواد غذائية بمكونات صحية في المعادي
اصدرت في: 08/10/2013

نوع مميز من المحلات مش بـ نلاقي زيه كل يوم ولا في أي حتة، ومع ذلك «كوتون بيبول- Cotton People» له فروع في هليوبوليس ومدينة نصر والمهندسين والمعادي، وكانت زيارتنا لفرع المعادي اللي بـ يحمل اسم "البيت الصحي" والموجود في شارع 206 في منطقة دجلة، بالتحديد نهاية دجلة وأنت رايح ناحية جراند مول، وشوفنا فرع ثاني له في المعادي في شارع 231 في منطقة دجلة برضه مكتوب عليه "بيو شوب – Bio Shop". المنتجات مقسمة لنوعين في الداخل، مواد غذائية أورجانك (أو من مواد عضوية) خاصة للأطفال ووصفات أورجانك لعلاج الأطفال من البرد والحساسية وسوء التغذية وغيرها من الأعراض، والجديد هنا أن الوصفات مكتوبة ومطبوعة لاستشارة الطبيب قبل الاستخدام وكل المواد نباتات طبيعية، وده بالنسبة لقسم الأغذية أو المأكولات. أما نصف المحل الثاني فهو الجديد علينا تمامًا، فيه ملابس أورجانك، أول ما دخلنا المحل استغربنا جدًا كلمة "ملابس أورجانك" لكن بعد ما شوفنا خامات ملابس الأطفال من سن حديث الولادة وحتى 10 سنوات عرفنا المقصود بالكلمة وخاصة بعد ما شوفنا تجارب لاستخدام النوع ده من الملابس والخامات، وبعد ما عرفنا أن ألوانها الطبيعية دي مش بـ تتغير بعد الغسيل ولا شكل الملابس بـ يتغير. وبالنسبة للأسعار فهي حلوة جدًا؛ تقريبًا زي أي محل ملابس أطفال وخصوصًا ملابس حديثي الولادة، أسعارها مناسبة والأطفال اللي سنهم أكبر من 6 شهور لسنة لهم ملابس خروج وبيت لكن السن الأكبر من سنة له لبس بيت بس، كله قطن 100% وألوانه طبيعية. أسعار البيجامات بـ تتراوح بين 50 لحد 75 جنيه، حسب الموديل والمقاس وكوڤرتات للبيبيهات بـ 49 جنيه و60 جنيه و75 جنيه طبعًا حسب الموديل لكن الخامات كلها واحدة. فيه جميع مستلزمات الطفل اللي ممكن تستخدمها الأمهات وكلها من مواد عضوية صحية وتصميماتها هايلة وشيك جدًا. المسؤول عن المكان استقبلنا بترحاب كبير وعرفنا على كل المنتجات وشرح لنا كل الوصفات الموجودة للأغذية وتفاصيل معنى وفكرة أورجانك للملابس، وعرض لنا كل المنتجات الموجودة اللي تخص السن اللي كنا عاوزينه وعرفنا الموديلات اللي لسه هـ تتعرض الفترة القادمة، أكيد هـ تحبوا «كوتون بيببول» وفكرته، وفي انتظار أن الفكرة تتعمم ونشوفها أكثر في محلات القاهرة، وياريت تشوفوا الموقع الرسمي للمحل على الإنترنت.

...

أوكايدى: ملابس أطفال أنيقة فى صن سيتى، هليوبوليس
اصدرت في: 07/10/2013

نمو حركة التسوق فى القاهرة بـ يزيد يوم بعد يوم بدخول ماركات عالمية أكثر وأكثر لمصر. على الطراز الباريسى دلوقت فتح "أوكايدى – Okaïdi" ماركة ملابس فرنسية الأصل مخصصة للأطفال بين 3 سنين و14 سنة. المحل بـ يقدم مجموعة متنوعة من القطع المعاصرة بـ تشجع الأطفال على زيادة وعيهم بالموضة بحيث يقدروا يصمموا شكل مميز لأنفسهم. فى مكانه بالدور الثالث من مول صن سيتى، أوكايدى هو أكثر محل مضيء فى الدور كله، وسهل تميز لوجو المحل الروش من بين عدد لا نهائي من المحلات حوله. أرض المحل كانت مزدحمة بسبب نقلهم للبضاعة فى الوقت ده، وأقسامه –صحيح كانت واضحة– احتاجت مننا خطط علشان نوصل لها. مع نظام التسعير الموحد فى أوكايدى، عملية التسوق بـ تتم فى سهولة وبـ تضمن العدالة بين الجنسين. نروح على الجانب الأيمن من المحل، مع كام جزء من المنتصف، قسم البنات كان واضح أنه أكثر توسعًا من الولادى. من الحاجات المميزة عندهم فساتين رقيقة للاستخدام اليومي، وتنورات منقطة لطيفة (225 جنيه) وتنورات جينز روشة (259 جنيه)، أما أسعار التي شيرتات بـ تبدأ من 79 جنيه وبلوفرات خفيفة سعرها 169 جنيه. وزي كل الملابس فى أوكايدى، الجينزات منفصلة وأسعارها محددة حسب القصّة والسن. جينزاتSkinny سعرها 259 جنيه، وجينزات slim ثمنها 225 جنيه، وكمان treggings مريحة كان سعرها 169 جنيه. تماشيًا مع الذوق العام اللى لاحظناه فى قسم البناتى، شنط ظهر روعة على شكل قطة سعرها 169 جنيه. تشكيلة كبيرة من أحذية الباليرينا، أحذية بأبزيم وأحذية منقطة برقبة (225: 315 جنيه) كانوا معروضين بشكل منظم تحت الكوفيات المعلقة (25: 99 جنيه). قسم الولادي ماشي فى سكة واحدة ومش بـ يوحي بنفس الموضة المتجددة الموجودة فى قسم البناتى. شوفنا مجموعة كبيرة من الجينزات والأحذية الرياضية، قمصان كاروهات بألوان متعددة، جاكيتات لونها كاكي، قبعات بيسبول (115 جنيه) كاسكيتات الصيادينfisherman بسعر 89 جنيه. رغم نقص الأشكال والأذواق المثيرة للانتباه، عدد قليل من الموجود قدر يلفت نظرنا، زى روب منزلى طرى لونه عنابى (225 جنيه) وشنطة أنيقة زرقاء (199 جنيه). فلسفة أوكايدى تقوم على إتاحة الفرصة للأطفال يكوّنوا موضتهم المميزة بنفسهم، والتوفيق بـ يكون أصعب مع الألوان والملابس المتنوعة. يمكن الطرازات الموجودة فى المحل مش كبيرة، لكنه بـ يقدم ملابس بأسعاره معقولة تمشى مع الصغار والكبار، وده توازن مش كل محلات الأطفال تقدر تعمله.

...

كوتون: ماركة الملابس التركية الشهيرة فى سيتى ستارز بهليوبوليس
اصدرت في: 16/09/2013

لا صوت يعلو وسط مشهد التسوق القاهرى فوق صوت الملابس. ماركة الملابس التركية " كوتون-Koton" تفتخر بتقديمها أحدث الموديلات من الملابس الحريمى، الرجالى وكمان الأطفال. بعد توسعها فى السوق العالمية من كام سنة فاتوا، مصر فازت بفرعين مميزين، واحد منهم موجود فى سيتى ستارز. وقت زيارتنا، كوتون كان عامل تخفيضات قوية، مع قطع كثيرة عليها خصم يوصل 70% من السعر الأصلى. ممكن تحتاج وقت علشان تدور كويس وسط الرفوف، والسبب هو اللخبطة الشديدة فى ترتيب المقاسات وتصنيفها. الفرع ده تحديدًا بـ يقدم مجموعة محدودة جدًا من ملابس الرجال والأطفال، وأغلب المساحة الباقية تحتلها مجموعة كبيرة من ملابس السيدات. مع تركيزنا على قسم الحريمى، لاحظنا تشكيلة كبيرة من البنطلونات الصيفية مزينة بالورد، سعرهم قبل الخصم 399 وبعده 320 جنيه. جينزات Skinny بألوان فاتحة زى الفوشيا، البرتقالى، التركواز موجودين بسعر 170 جنيه، وبنطلونات ضيقة لونها أبيض سعرها 280 جنيه بدلاً من 399 جنيه. فساتين ماكسى بأشكال متنوعة أنيقة زى الورد، المقلم ومربعات بس أسعارهم غالية شوية حوالى 500 جنيه. متوفر كمان فساتين تقليدية طولها للركبة بمجموعة متنوعة من الألوان والأشكال (+235 جنيه). فستان لطيف بمربعات أسود فى أبيض سعره قليل جدًا (52 جنيه). صحيح أننا لاحظنا عدد بسيط من التنورات طولها للركبة منتشرة فى المحل، ده بغض النظر عن القطع الثانية بألوانها الخفيفة والمبهجة (250 جنيه)، لكن المجموعة الموجودة كانت محدودة جدًا. تنورة طويلة لونها برتقالى كانت مميزة وسعرها 369 جنيه. الجاكيتات كمان لها وجود معانا، وموجود منها بأكمام طويلة وقصيرة؛ واحد منهم لفت نظرنا سعره نازل من 770 جنيه لغاية 560 جنيه. تي شيرتات سادة وكمان تي شيرتات عليها تصميمات ورسومات بسيطة أسعارها تبدأ من 90 جنيه. سحرنا تونيك بدون أكمام، منقط، لونه بيج مبالغ فيه شوية بربطة عنق على منطقة الصدر، ومن ثانى بـ نؤكد أن سعره (399 جنيه) زيادة شويتين. عرض كوتون من الإكسسوارات مليان بكل أنواع المجوهرات، خصوصًا من القلادات، والحلقان والأساور، وكلهم معروضين بدون بطاقات سعر. شنط يد أسعارها حوالى 300 جنيه، محافظ سعرها 60 جنيه وأحزمة ثمنها 70 جنيه. حاجات ثانية متعلقة بموسم الصيف منها نظارات شمس، وشورتات قصيرة ومايوهات بيكينى كلها متوفرة فى المحل. مجموعتهم من أحذية الباليرينا عليها تخفيض كبير من 350 لغاية 179 جنيه، متوفر منها تصميمات ظريفة مقلّمة بألوان الأحمر والبيج مع ألوان ثانية منها الخفيف ومنها البراق. رغم أنهم عاملين أوكازيون، فيه بعض حاجات ما قدرناش نفهم سبب ارتفاع سعرها. على العموم، مع المجموعة المتنوعة من المعروضات والتشكيلة الأنيقة من الملابس الأساسية، كوتون بـ يوفر أساسيات مهمة بأسعار معقولة.

...

تومى هيلفيجر كيدز: ملابس أطفال أنيقة فى سيتى ستارز هليوبوليس
اصدرت في: 24/08/2013

التسوق فى القاهرة بحثًا عن ملابس أطفال مهمة مخيفة لحد كبير، بس مع "تومى هيلفيجر كيدز - Tommy Hilfiger Kids"، نفتكر أننا وصلنا للحل. ماركة تومى هيلفيجر معروف عنها الجودة، والتصميمات الشابة الكلاسيكية، ومن وقت افتتاحه سنة 1985 حصل توسع رهيب وقدر يفتتح أكثر من 1,000 فرع حول العالم. علشان يوسع نطاقه من مصمم حاصل على جوائز لأفضل الملابس الرجالى والحريمى، ماركة تومى توسعت لأكثر من مجال زى الأدوات المنزلية والأثاث، العطور، الملابس الرياضية وحتى ملابس الأطفال المعاصرة. ومع كل فروع تومى هيلفيجر المنتشرة بطول وعرض القاهرة، دلوقت سيتى ستارز الموجود فى هليوبوليس بـ يقدم تومى هيلفيجر كيدز. الواجهة اللى بـ تعكس شعار تومى المميز باللون الأحمر والأزرق الغامقين بـ تخطف العين بمجموعة أنيقة من ملابس أطفال راقية. تومى بـ يعرض مجموعة من ملابس الرضع وتشكيلة محدودة للأكبر سنًا؛ المقاسات بالمعايير الأوربية عملت لخبطة عند الزبائن، ده غير أننا حسينا بعدم الراحة لحدٍ ما بسبب نظرات الموظفين الغريبة. قسم الولادى مدمج مع قسم البناتى، والملابس فيهم مُعلقة ومطوية بشكل منظم، بس مافيش تصنيف واضح، بمعنى أنك ممكن تروح وتيجي فى المحل كذا مرة لو بـ تدور على حاجة معينة. الأساسيات أسعارها غالية بس فيها تنوع مميز، منها بنطلونات جينز ولادى بتقليمة خفيفة (650 جنيه)، بنطلونات قماش (895 جنيه) وجينز أحمر روعة (695 جنيه). قسم البناتى نفس الموضوع، بـ يعرض جينزات (695 جنيه)، جينزات بألوان فاتحة (750 جنيه) وبنطلونات stretchy leggings معاها حزام وردى مرن (250 جنيه). متوفر كمان مجموعة محدودة جدًا من سالوبيت للأطفال أسعارها تبدأ من 300 جنيه. مجموعة الصيف من تومى فيها مايوهات هاواى (550 جنيه) وشورتات لطيفة للأطفال لونها أزرق غامق مزينة برسم سمك قرش (850 جنيه)، مع فساتين مقلمة للمشاوير اليومية (750 جنيه)، وفساتين تونيك لونها أحمر صارخ (750 جنيه)، وكمان تنورات مقلمة (795 جنيه) للبنات. فى نفس الوقت، متوفر أشكال ثانية تشمل قمصان بولو موجود منها المقلم والسادة (550 جنيه)، قمصان بأكمام قصيرة (850 جنيه) وتوب بأكمام منفوخة عليه قلوب صغيرة فى كل مكان (595 جنيه). ملابس السباحة لها نصيب فى المعروض بمايوهات بكينى ألوانها مبهجة (450 جنيه) ومايوهات رجالى (280 جنيه). نقص المعروض من ملابس الشتاء كان طبيعى، رغم أن وقت زيارتنا كان متوفر تي شيرتات خفيفة بأكمام سعرها 750 جنيه، بلوفرات صوف (595 جنيه)، وسويت شيرتات بقلنسوة أثقل شوية (850 جنيه)، وجاكيتات مضادة للمياه سعرها 950 جنيه. قسم الإكسسوارات تقريبًا مش موجود اللهم إلا شوية قبعات (250 جنيه) وأحذية مناسبة لأى نوع ملابس؛ شباشب، أحذية برباط وباليرينات أسعارها تتراوح بين 350: 900 جنيه. شوفنا كمان لحاف مبطن لونه وردى فاتح مناسب لسرير أطفال، مع علب هدايا فيها مجموعة ملابس متكاملة، تشمل حذاء صوف وقبعة للأطفال حديثى الولادة (950 جنيه). تومى هيلفيجر كيدز بـ يقدم مجموعة راقية وأنيقة من ملابس الأطفال، ورغم أن معظم القطع الموجودة ألوانها مبهجة مع شبه لطيف جدًا من شخصية مينى- مى 'mini-me' من فيلم أوستين باورز، حسينا أن الملابس دى مش هـ يقدرها غير أباء عندهم تذوق للموضة. ملابس تومى يمكن ينقصها شوية حس فكاهى، بس الجودة مالهاش مثيل، وسعرها العالى صعب شوية يتفسر، خصوصًا مع سرعة نمو الأطفال.

...

كوكينو: لعب وملابس أطفال في التجمع الخامس
اصدرت في: 02/02/2013

عدة شروط لازم تتوفر في محلات مستلزمات الأطفال مؤخرًا؛ الإضاءة الساطعة، اللون البينك على 90 % من المعروضات، سبونج بوب على أي حاجة وكل حاجة، أحجام ملابس تفطس من الضحك، وأخيرًا أسعار خيالية لكل المعروضات اللي أكيد ما تستحقش الأرقام المبالغ فيها دي. يمكن محل «كوكينو- Kokkino» الموجود في الداون تاون مول في الدور الأول ما استوفاش كل الشروط دي علشان كده عجبنا وقررنا ندخل نأخذ فكرة. ما احتاجناش أكثر من 5 دقائق داخل المحل أن الشرط الأخير حاضر وبشدة، وأن الأسعار بـ تبقى خزعبلية أحيانًا خاصة لما نيجي جنب ماركات زي Chicco للعب والمستلزمات و Kokkino بالنسبة للملابس. لكن المعروضات كلها حلوة ومبتكرة مافيش كلام، والخدمة هنا كاجوال جدًا وماحدش هـ يقرب منك وأنت بـ تتفرج إلا لو أنت طلبت المساعدة، وبالمناسبة موظفين المحل لابسين يونيفورم لونه أخضر علشان تعرفهم بسهولة. المحل مش كبير قوي، مساحة مستطيلة وفيها ستاندات في وسط المحل معلق عليها الملابس وكله موضح عليه العمر المناسب لكل قطعة، من أيام لـ 3 شهور، 3 لـ 6 شهور، 6 شهور لعمر سنة وهكذا. موديلات شيك جدًا من السويت شيرت (150 جنيه) والجاكيت (180 جنيه) والجينز والبنطلون القطيفة المضلع (80 و100 جنيه) بالنسبة للأولاد، وفيه فساتين بناتي بأحجام متناهية الصغر، وقصات ونقشات جميلة بأسعار من 150 لـ 200 جنيه، ولفت نظرنا هنا أن مش كل ملابس البنات باللون البمبي ودرجاته زي المعروضات في باقي المحلات، لكن الموديلات اللي عليها لوجو «كوكينو» فيها ألوان بيج وبني ورمادي والقصات كمان كأنها قصات ملابس كبار عادي جدًا، وده علشان لو حد عاوز يجيب لأطفاله ملابس أنتيكة تخلي شكلهم آنسات كبار وأولادهم كأنهم رجال أعمال. بـ نحب الابتكار والتجديد خاصة في ملابس البيبيهات.على أيدك الشمال وأنت داخل المحل هـ تلاقي رف عملاق عليه كل حاجة تخطر "أو ما تخطرش" على بالك ممكن يحتاجها طفلك الرضيع أو الأم اللي عندها بيبي لسه مولود. تفاجئنا بموديلات وأشكال "التتينة" والسلاسل بتاعتها وتفاجئنا أكثر بأسعارها اللي بـ تتراوح بين 60 لـ 100 جنيه والسلاسل بـ 20 لـ 50 جنيه. فيه أطقم لرعاية البيبي وبشرته اللي بـ يبقى فيه كريمات وشامبو وفرشاة شعر ولوفة وشوية لعب زي الشخاليل والعضاضات، أنت ممكن تقف أمام الرف ده وتنبهر حتى لو ماعندكش أطفال أو مش متزوج أصلًا، خاصة لما تيجي عند الأحذية والكوتشي ومقاساتها وتصميماتها الدقيقة، بجد So Cute!زيارة أو اثنين لـ «كوكينو» وشراء كام قطعة من هناك ممكن تخليك تحكي بفخر لابنك أو بنتك لما يكبروا قد إيه أنت كنت مدلعهم وجايب لهم نجمة من السماء.

...

شاهد المزيد
مواضيع خاصة

النهارده في القاهرة: وجبة فنون كومبو.. إكسترا مسرح وأفلام

يوم جديد في كايرو. طبعًا فيه الروتين المعتاد من شغل ومشاوير وغيرهم. وحاجات ممكن تحسسك بشوية ملل. بس على مين؟ طول ما أجندتنا موجودة انسى إن الملل يعرف لك طريق. علشان ال