ترفيه تسوق in Cairo, Egypt

تسوق

هارلي دافيدسون: المكان الأنسب لمحبي الموتوسيكلات في الزمالك
اصدرت في: 10/05/2014

بانتشار موضة اقتناء الموتوسيكلات بين أهل كايرو، بل وتكوين مجموعات بين أصحاب الهواية نفسها، كان لازم نزور محل "هارلي دافيدسون – Harley Davidson" في الزمالك، لأنه أكيد عنده كثير يقدمه لمحبي الموتوسيكلات. محل ماركة الموتوسيكلات الشهيرة مليء بأشهر موتوسيكلاتهم الكلاسيكية وأحدثها بإكسسواراتها وقطع غيارها؛ ده غير خط إنتاج للملابس اللي بـ تتماشى مع جو الموتوسيكلات (افتكر كده عمرو دياب في فيلم آيس كريم في جليم). ولمحبي التميز، هارلي دافيدسون بـ تقدم لهم الفرصة أنهم يعدلّوا في الشكل الخارجي للموتوسيكل لإضافة شكل مميز له. المحل مجهز بمجموعة من الترابيزات العالية والكراسي اللي تشجع على إقامة حوارات لطيفة على الماشي بين محبي الدراجات. وبما أن عالم الموتوسيكلات ده متشعب وعميق، ومليء بالأنواع والفئات المختلفة، هارلي دافيدسون سخرت الدور الأول لعرض الأنواع المختلفة من الموتوسيكلات علشان اللي ناوي يشتري يتفرج ويعرف أنسب موتوسيكل له، وده بمساعدة المسئولين عن البيع، واللي كانوا غاية في اللطف، وعلى أتم الاستعداد للرد على أي استفسار. أصغر وأسهل موديل في التحكم اسمه The Sportster بمحرك سعة 883 سي سي، واللي سعره (10.000 :70.000 جنيه). والموديل ده فيه منه لونين: الأسود والبيج المموه (زي ملابس الصاعقة، فاكر الموضة دي؟). أشهر الفئات وأرقاها اسمها Dyna من ضمنها موديل Fat Bob بلونه الأبيض اللؤلؤي، محركه سعة 1585 سي سي، وكمان موديل Wide Glider بلونه الأسود المميز برسوم شُعلة اللهب، وأسعارهم (110.000 :190.000 جنيه). تخيل لما قوة هارلي دافيدسون وبورشا تتحد في صورة مجموعة VRSC، ومن ضمنها موتوسيكل Night Rod برتقالي وأحمر بمحرك سعة 1250 سي سي (نفس سعة محرك سيارة صغيرة، تخيل!)، وموتوسيكل V-Rod باللون الذهبي مع رسوم للهب أسود، وأسعارهم (205.000 :209.000 جنيه). من الموتوسيكلات الكلاسيكية الموجودة فئة اسمها Soft – Tail Family معروفة بشكلها الأنيق. معروض منها موديل Springer بمحرك سعة 1700 سي سي، وموديل Black Fat Boy (اسم عنصري!) بمحرك 1700 سي سي، أسعارهم بـ تصل حتى 200.000 جنيه. أكثر الفئات اللافتة للانتباه هي The Touring اللي سعة محركها تصل لـ 1700 سي سي، منها موديل Road King ونفس الموديل، ولكن المستعمل منه، وأسعارهم تصل حتى 200.000 جنيه. الدور الثاني من المحل مخصص للملابس الرجالي، والحريمي وللأطفال. وبـ يضم مجموعة من الخوذات، والبوتات والجاكيتات الجلد، ده غير التي شيرتات والقفازات (لازم تسوق وأنت شيك برضه). الخوذات لها أنواع، النصفي (الشبيهة بخوذة جندي الجيش) سعرها (1200: 2000 جنيه)، اللي بـ تغطي معظم الرأس (1800: 2300 جنيه)، والخوذة الكاملة اللي لها واقي أمامي (2000: 3500 جنيه). البوتات اللي رقبتها عالية (2000: 2500 جنيه) واللي رقبتها أقصر (1400: 1800 جنيه). القفازات (500: 1000 جنيه)، والنظارات (1300 جنيه)، الشنط (960 جنيه). ده غير أن بـ يباع شمع لتلميع الموتوسيكل. الجاكيت الجلد الشتوي (4000: 5000 جنيه)، أما الصيفي (2000 جنيه). في المجمل، التجربة ممتعة وبالذات لو أنت من محبي الموتوسيكلات، وهـ تنبسط أكثر لما تعرف أنهم بـ يقدموا تجارب قيادة مجانية للموتوسيكلات.

...

جوهرة الفن: آلات موسيقية وإكسسوارات في وسط البلد
اصدرت في: 09/04/2014

الاسم معروف لكل المزيكاتية اللي في مصر تقريبًا، لأنه بجانب أن فرعه الأصلي موجود في شارع محمد علي، معقل الفنانين والآلاتية من 120 سنة تقريبًا. «جوهرة الفن» موجود قريب من ميدان العتبة في بداية شارع القلعة "محمد علي سابقًا" وله فرع ثاني بجوار النادي الأهلي في مدينة مصر، لكن زيارتنا كانت للفرع الأصلي اللي فيه كذا ميزة تخلينا نرشحه لكم للزيارة حتى لو كنت قريب من مدينة نصر، أولًا هنا المخازن والمصانع والورش الخاصة بالشركة، يعني اللي مش هـ تلاقيه معروض في المحل هـ يجيبه لك في دقائق، وفرصتك في الفرجة هـ تبقى أكبر علشان ممكن تتفرج على المعروضات في أي من الأماكن دي، ثانيًا هنا بس هـ تلاقي أكبر تشكيلة من الآلات الإيقاعية وخصوصًا الدرامز والإكسسوارات الخاصة بها، ثالثًا لأنك في النهاية في شارع محمد علي، يعني لو ما لقيتش اللي أنت بـ تدور عليه هنا في المحل ادخل المحل اللي بعده على نفس الصف، هنا أكبر سوق للآلات الموسيقية في مصر، والأسعار من الآخر، من الآخر يعني أرخص من أي مكان ثاني، لكن ده مش معناه أن مافيش فصال! حاول دائمًا تأخذ أحسن سعر، بالذات لو هـ تشتري حاجات كثير. بنسبة كبيرة كل الآلات الموسيقية موجودة هنا، جيتار أكوستك وإليكتريك وباص جيتار وعود وكمان وتشيللو وأورج واكسليفون وطبول وآلات إيقاعية أفريقية وهندية ودرامز ونحاسات وآلات نفخ خشبية ونحاسية، ده بالإضافة للوازم الصوت ومعدات الحفلات من ميكسرات وسماعات وميكروفونات وأمبلفاير، يعني من الآخر حاجات قليلة قوي اللي مش هـ تبقى موجودة هنا، والمشكلة هـ تواجهك بس لما تكون بـ تدور على نوع أو موديل معين من أي آلة، لأن هنا هم بـ يبيعوا الأساسيات والحاجات اللي تناسب المبتدئين بشكل كبير، أكيد فيه حاجات احترافية، لكن لاحظنا تردد مدرسين الموسيقى اللي بـ يشتغلوا في مدارس جايين يأخذوا آلات بالجملة أثناء وجودنا في المكان، وناس داخلة تشتري آلات موسيقية كهدايا لأولادها، يعني المكان مش غالب عليه الطابع الاحترافي أو المتخصص، لكنه بـ يؤدي الغرض كويس جدًا طالما كنت عاوز سوق آلات موسيقية متنوع وبأسعار معقولة. بـ يبيع جيتار ماركة Cort بأسعار من 400 لـ 1000 جنيه، أكوستك وسيمي أكوستك، وفيه جيتار ماركة Fitness وسوزوكي بـ 300 لـ 500 جنيه، والإلكتريك بـ يبدأ من 1000 جني لحد 2000 جنيه، الماركات دي حصرية عند جوهرة الفن، ونفس الكلام في الدرامز ماركة Mapex اللي يعتبر المستورد الوحيد له في مصر، ودي سعرها 3600 جنيه من غير أي نحاسات، لكن «جوهرة الفن» واخد توكيل ثاني لماركة Sabian العالمية المتخصصة في نحاسات الدرامز، واللي بـ فيها موديلات الـ sbr اللي الطقم بتاعها بـ 1200 جنيه لحد الـ B8 Pro اللي بـ 2400 جنيه، وكل فترة بـ ييجي للمحل موديلات أحدث من الدرامز والنحاسات لكن بـ تخلص أول بأول. وفيه درامز Power Beat بـ 2000 جنيه، وطقم آلات إيقاع لاتينية بـ 700 جنيه. الكمان أو الفيولين فيه منها كل المقاسات، واللي بـ يلعبوا مزيكا عارفين أن فيه أوكتافات ونغمات مختلفة لكل مقاس، بأسعار من أول 200 جنيه لحد 2000 جنيه، والأكسليفون الخشبي الكبير بتاع المدارس ده بـ 135 جنيه، وفيه موديلات صغيرة بس مستوردة وصوتها أجمل بـ 140 جنيه. يمكن أضعف قسم هنا هو الخاص بالأورج اللي فيه موديلات صينية مجهولة وبأسعار من 500 لـ 1000 جنيه، صحيح صوتها مش بطال، بس مش عارفين عمرها الافتراضي ممكن يبقى قد إيه، شكلها ما يشجعش، حتى الموديلات الياماها اللي هنا صيني مش زي الموجودة في توكيل ياماها في مصر الجديدة. ممكن تتصل بالمحل وتسأل عن حاجة معينة موجودة ولا لأ قبل ما تروح، وزي ما وضحنا غالبًا لو موجودة هـ تبقى في فرع العتبة. العاملين في المحل مهذبين وهـ يساعدوك من قلبهم، بس ما تنساش تدفع بقشيش كويس للشخص اللي ساعدك بعد ما تخلص جولة مشترياتك، وخد بالك أن الإدارة هنا مش ودودة زي العاملين، هـ تحس أنهم ساكتين وخلقهم ضيق طوال الوقت، فحاول تتفاداهم لحد لحظة دفع الفلوس، وبالمناسبة ماكينة الفيزا كارد موجودة لكن ساعات بـ تبقى عطلانة، فما تعتمدش عليها قوي، ونتمنى لك جولة موفقة في شارع المزيكا، شارع محمد علي.

...

كريبتونايت: جنة هواة الكوميكس والأبطال الخارقين في سيتي ستارز
اصدرت في: 25/09/2013

في الدور الرابع من المرحلة الثانية في سيتي ستارز فتح فرع جديد لمحلات «كريبتونايت – Kryptonite» اللي كان فتح في البداية في شارع السبكي في مصر الجديدة، وده الفرع الجديد للمحل الفريد من نوعه والمتخصص جدًا والمبهر لأقصى درجة. مش هـ نقدر نداري إعجابنا وانبهارنا بـ «كريبتونايت» طول ما إحنا بـ نكتب المقال ده، ولولا الأسعار المرعبة أحيانًا لبعض المعروضات كان هـ يأخذ الـ 5 نجوم بدون فصال. تعالوا نتكلم شوية عن التخصص غير المألوف للمحل، وبالتحديد غير المألوف في مصر. كريبتونايت طبعًا هو العنصر المادي اللي بـ يطلع من كوكب كريبتون اللي جاء منه "سوبرمان" زي الحدوتة الخيالية ما بـ تقول. ولأن دي الحدوتة الأشهر في عالم الكوميكس Comics اختار المحل المتخصص في بيع القصص المصورة وتماثيل الأبطال الخارقين وشخصيات أفلام الأكشن العالمية اختار لنفسه الاسم ده. هنا هـ تلاقي كل كتب ومجلدات الـ Marvel وهي الشركة اللي ابتكرت كل الـ Super Heroes المشهورين زي سبايدر مان وكابتن أميركا وإكس مِن وآيرون مان وثور وغيرهم، وفيه كوميكس شركة DC Comics الشهيرة زي باتمان وسوبرمان وجرين لانتيرن وذا فلاش. طبعًا الأسعار مدونة على كل الكتيبات بالدولار، وكلها بـ تتراوح بين 15 لـ 20 دولار، حولها للجنيه المصري بقى وأنت تعرف أن أي كتاب من دول مش هـ يبقى سعره قليل. لكن المهم أنها أصلية ونادر أنك تلاقيها في أي مكان ثاني، والإصدارات حديثة وبـ تيجي أول بأول وده المهم. الجانب الثاني الأكثر إبهارًا في المحل هو التماثيل أو الـ Figures المعروضة للبيع! مصنوعة من خامات مختلفة، جبس وفيها حلي من المعدن والفايبر، بأحجام توصل لـ 60 سم طول وبتصميمات غاية في الدقة، تقريبًا مافيش غلطة، لما تشوف تمثال شخصية الجوكر شرير كوميكس باتمان أو تمثال الرجل الأخضر Hulk أو جرين لانتيرن أو الرجل الحديدي Ironman أو Seth من مجموعة حرب الكواكب بأسعار من 1000 لحد 3000 جنيه ما تستغربش وما تستكترش الرقم! التصميمات خيالية وهـ تحس أنك فجأة تحولت لمدمن تماثيل أكشن وعاوز تقتني كل حاجة بـ تشوفها هنا، تمثال شخصية Terminator لأرنولد شوارزنيجر كان تحفة فنية، وكذلك روبن وهو على موتوسيكل باتمان الشهير (3200 جنيه) وغيرها من التماثيل ولعب الأطفال أو الشخصيات الأصغر حجمًا (20 لـ 30 سم) لكل الأبطال الخارقين وG.I Joe والمتحولون Transformers وشخصيات من ديزني وهوليوود بأسعار من 200 لحد 600 جنيه. شكل المحل مغري أنك تقضي فيه وقت طويل علشان تتفرج على كل حاجة بتمعن، والقائمين على المكان متخصصين ومحترفين جدًا وبـ يحبوا عالمهم الخاص جدًا في «كريبتونايت» وعندهم إجابة لكل سؤال. حبينا المحل جدًا وحتى لو مش هـ نقدر نشتري بالأسعار دي ممكن نروح كل يوم علشان نتفرج.

...

بت & إيكي: إكسسوارات ومستلزمات طبية للحيوانات الأليفة فى سيتى ستارز
اصدرت في: 29/06/2013

خريطة التسوق فى القاهرة دائمة التوسع، ودائمًا بـ تقدم أفكار جديدة لشوارع مصر. من ناحية إكسسوارات الحيوانات فالموضوع مش منتشر بالدرجة، بس طالما أنت عاوز تضبط نفسك، ليه تنسى حيوانك الأليف؟ فى أعمق أعماق سيتى ستارز، مستخبى بجانب الجراج، "بت & إيكي - Pet & Equi" بواجهته الزجاجية بـ يعرض مجموعة من مستلزمات الحيوانات مرتبة كويس فى محاولة لإشباع متطلبات عشاق الحيوانات الأليفة بمجموعة من الإكسسوارات الشيك وفى نفس الوقت جودتها عالية مخصصة للقطط، والكلاب وكمان الخيل. "بت & إيكي" زى أى محل من محلات الحيوانات الراقية فى القاهرة مش بـ يبيع حيوانات، بس ممكن يرشدك لمربى حيوانات أو ملجأ لو حبيت. على يمين المحل هـ تلاقى أوعية الأكل موزعة على الأرض ومش سهل توصلها، رغم أن فيه مجموعة معقولة من الألوان والأحجام؛ الأحجام تبدأ من الصغير لإكسترا لارج، منها المعدن (55.50: 152 جنيه) أو البلاستيك (21: 70 جنيه). اختارنا واحدة صغيرة لونها وردى باهت لها يد ستانليس ستيل على جانبها (55.50 جنيه). عندهم كمان أجهزة آلية لتعليف الحيوانات (1700 جنيه) بـ تطلع كمية محددة من الأكل على فترات معينة، وكمان جهاز مياه محمول للسفر (35 جنيه). عندهم كمان مجموعة متنوعة من سراير الحيوانات منها مخدات كبيرة (+300 جنيه)، كراسى بذراعين ومخدات وابتكارات ثانية مش تقليدية؛ على سبيل المثال، كرسى مرتفع من الجلد الأسود، كنبة على شكل بدوار boudoir بمخدات قابلة للتغيير (2466 جنيه) وبيت بلاستيك لطيف على شكل رأس قطة (1700 جنيه). بـ يبيعوا كمان بيوت كلاب تقليدية من الخشب (1700 جنيه). مستلزمات الكلاب من سلاسل وأطواق كثيرة ومتعددة، من الجلد القوى والسلاسل لغاية حبال رفيعة للتدريب وألجمة. حبال للتحكم فى كلبك طولها متغير سعرها يتراوح بين 170 جنيه و360 جنيه على حسب الماركة وحجم الحيوان. حائط كامل مخصص لعرض ألعاب الكلاب، بمجموعة لا تضاهى من الأشكال والأحجام، منها أطباق طائرة، وكرات، وأحذية، وفراخ بلاستيك لها صوت حاد وأنفاق يجروا فيها تشبه الموجودة فى السيرك (106 جنيه). عمود خشبى تخربش فيه القطة برضه متاح (+100 جنيه)، مع أو بدون عشب للقطط، وده بـ يساعدك تحافظ على عفش بيتك من أظافرها الحادة. شوفنا كمان كميات ضخمة من أكلات حلوة مخصصة للكلاب والقطط، من قطع بسيطة تمضغ وعظم لأكلات ثانية، لو حبيت طبعًا! أكيد عندهم تشكيلة عالية الجودة من الأكل المجفف من ماركات مشهورة متوفرة على شكل شنط بأحجام صغيرة، متوسطة لغاية أحجام عملاقة. "بت & إيكي" بـ يقدم كمان كل الأدوية اللى محتاجها حيوانك الأليف، مع عدد من الشامبوهات، سلة قمامة، ومخدات، ومستلزمات ما بعد الجراحة (220: 260 جنيه) وحتى العطور علشان تحافظ على نظافة ورائحة حيوانك الأليف بين كل حمام. قسم ثانى على شمال المحل له نفس العمق والتنظيم، مخصص لإكسسوارات الخيل، وفيه كل حاجة بداية من الملابس الخاصة بالفروسية والسرج، لغاية مستلزمات تزيينها، بخاخات طبية وكريمات مضادة للبكتريا. طبيعى أن ملابس الفروسية مش رخيصة؛ بنطلون بجودة عالية يبدأ من 800 جنيه، أما حذاء بوت أسود هـ يكلفك 600 جنيه وخوذة ناشفة كبيرة سعرها 800 جنيه. أدوات ركوب الخيل بـ تتراوح بين السروج، وبطانة السروج (220 جنيه)، لجام (+360: 1000 جنيه)، وحمالات الأرجل، وحدوة خيل ومستلزمات طبية. نقدر نقول فى المجمل أن "بت & إيكي" محل منظم، بـ يبيع مستلزمات القطط والكلاب بمعايير عالمية. الأغرب من كده أن عنده مجموعة كبيرة -لها جودة عالية وإن كان سعرها غالى– من مستلزمات ركوب الخيل، وده بـ يميزه عن باقى منافسيه.

...

فيرست كيرلز: أول ستوديو متخصص في تصوير الأطفال
اصدرت في: 28/05/2013

ماحدش فينا بـ يقدر يقاوم أنه يتفرج أو يعمل share لـ صور البيبيهات الصغيرين خصوصًا لو كانت الصورة مميزة وفكرتها جديدة. عادة بـ تطلع معظم الصور في الآخر مش متصورة في مصر، لكن دلوقتي بعد إنشاء ستوديو First Curls بقى فيه فرصة إننا نصور أولادنا الصور إللي بـ نشوفها طول عمرنا وبـ تعجبنا. ستوديو «فيرست كيرلز – First Curls» هو مشروع متكامل أسسته فنانة التصوير الفوتوغرافي والوسائط المتعددة كوكلا رفعت. المشروع هدفه تصوير الأطفال من أول عمر يوم ولحد بداية مرحلة المراهقة. المشروع يتضمن ستوديو في مصر الجديدة وإمكانية التصوير في بيت الطفل، وكمان تصوير الأطفال في الـEvents المختلفة اللي بـ يشاركوا فيها. بالنسبة للستوديو فالتصوير فيه بـ يكون بالإتفاق المسبق بين العميل وكوكلا وده لأن جلسة التصوير بـ يكون لها فكرة محددة بـ يتم التجهيز ليها وكمان لازم المكان يكون مهيأ ومجهز على حسب عمر الطفل إللي هـ يتصور وإحتياجاته المختلفة. الجميل في الستوديو أنه عبارة عن شقة وده بـ يخلي العيلة إللي رايحة تتصور حاسين إنهم في بيتهم وبـ يخلق جو من الألفة. أكثر وقت كوكلا بـ تنصح العملاء أنهم يصوروا البيبي فيه هو أول أسبوعين بعد الولادة وده لأنهم بـ يكونوا نايميين معظم الوقت وعضلاتهم مرنة وبالتالي بـ ينفع يتصوروا بأوضاع كتير مختلفة وبـ يبقى تنفيذ الأفكار أسهل لأنه مافيش مقاومة من البيبي. الستوديو كمان بـ ينصح الأم والاب أنهم يصوروا البيبي بحاجاته الشخصية أو الهدايا المهمة إللي جت للبيبي لأنه ده بـ يخلق جو من الحميمية في الصورة وبـ تفضل ذكرى حلوة. في نفس الوقت الستوديو عنده Props كثير للتصوير ممكن الأم والاب يختاروا منها. الجميل أن الستوديو مجهز لاستقبال الأطفال ومراعي كل حاجة هما محتاجينها زي مثلًا وجود دفاية علشان التصوير في الشتاء وتكييف قوي للتصوير في الصيف، وجود حمام ممكن الأم تستخدمه عشان تغير للبيبي، مساعدة بـ تلعب مع الأطفال وبـ تسليهم وتساعدهم يلبسوا لحد ما يجي وقت التصوير، الهدوم كلها بعد كل جلسة تصوير بـ تتبعت الغسيل الجاف تتغسل عشان ما يحصلش أي انتقال للعدوى وكمان كل طفل بـ يجيب الفوطة الخاصة بتاعته معاه وده برضه لأسباب صحية. وقت الجلسة المطلولة بـ يكون حوالي 3 ساعات وده لأنه بـ يتخلل الجلسة وقت الأم بـ تحتاج فيه أنها تغير للبيبي أو تأكله وده بـ يستهلك وقت طويل. من أكثر الأوقات اللي الستوديو بـ ينصح أن الأطفال يتصوروا فيها هي عند الولادة، الشهر الثالث، الشهر السادس، سنة. وده لأن كل فترة منهم هي مرحلة جديدة بـ يصاحبها تطورات مختلفة بـ تعمل روح حلوة في الصورة وكمان بـيبقى حلو لو البيبي اتصور في المراحل دي واتعمل بالصورة Collage كبير. الستوديو بـ يقدم Packages أو باقات أسعار كثيرة (تتراوح بين 800 لحد 3000) ممكن الآباء يختاروا ما بينها. جلسة تصوير البيبي المولود حديثًا New born package من أكثر الحاجات إللي بـ تطلب منهم. كمان جلسة تصوير عيد الميلاد الأول Smash cake ودي بـ يكون فيها ديكور عيد الميلاد وكيكة حقيقية وملابس وبالونة هيليوم ومدتها ساعتين ونصف. فيه كمان Packages تانية بـ يبقى فيها كذا جلسة تصوير من أول الولادة ولحد عيد الميلاد الأول، وأسعار الجلسات بـ يكون على حسب نوع الـpackage وعدد الصور.

...

لابتوب لاند: محل نصب علني وتحوير فى المقطم
اصدرت في: 01/04/2013

تجربة أول مرة نتعرض لها خلال عملنا في موقع كايرو 360، قابلنا قبل كده محلات ملابس أو منتجات فيها عيب فى التصنيع بـ نكتشفه وبـ نرجع للمكان ثاني وعلى حسب.. يا إما بـ يتعاونوا ويبدلوه لنا بقطعة ثانية يا إما بـ يحاولوا يقنعونا أنها كويسة وأن اللى فى عيوننا ده خداع بصري، لكن أنك تروح مكان ويقنعك أنك تأخذ منتج أغلى من سعر السوق بأكثر من 3 آلاف جنيه يبقى ده اسمه إيه؟! "لابتوب لاند" موجود فى شارع 9 بالمقطم خلف مسجد النصر، أول مرة تروح هـ تلف وتدور على رقم العمارة لأن الموضوع متاهات شوية، أول ما توصل هـ تلاقى المكان محتل دورين داخل عمارة (دور تحت الأرض ودور أول)، أول ما تدخل هـ تلاقى غرفة فيها 3 مكاتب وفيها كمان عرض للمنتجات بتاعتهم، والدور اللى فوق الأرض فيه قسم الحسابات، المكان الواسع عارضين فيه منتجاتهم من لابتوب وتابلت وإكسسوارات الكمبيوتر زي السماعات والماوس والشنط والكوفرات، الأسعار مش ثابتة لأنهم كل شوية بـ يعملوا عروض على اللابتوبات والتابلت وممكن يبعتوها على إيميلك. معرفتنا بالمكان ده كانت من خلال شركة بـ تعمل عروض على بعض المنتجات اللى ممكن تشتريها وتأخذ بنفس قيمتها نفس المنتج مجانًا، بمعنى لو أشتريت من عندهم لابتوب هـ تأخذ واحد ثاني بنفس القيمة مجانًا، والقصة بدأت بمكالمات تليفونية من فترة علشان نعرف هل اللابتوب متوفر ولا لأ، وكانوا عاملين عروض تخفيضات بمناسبة عيد الأم، ولما عرفوا أننا تابعين للشركة دي بدأوا يتهربوا ويقولوا أن العرض ده غير متوفر مرة، ومرة ثانية يقولوا أن اللابتوبات خلصت كلها، حتى الموديلات الثانية! حاسينا أننا لازم نتقمص شخصية مفتشين المباحث ونطب عليهم فجأة، أول ما شافونا سألونا أنتم تابعين لشركة العروض دي ولا لأ، وأول ما عرفوا لقينا نفس ردهم أن المخزن مافيهوش لابتوبات ومافيش غير اللى معروض بس! وده لثاني مرة غير منطقي، ووعدونا أنهم هـ يتابعوا معانا بالتليفون اللى ما كانوش بـ يردوا عليه لأنهم حفظوا الرقم! لكن كان فيه واحد منهم متعاون بس كان بـ يبعث لنا إيميلات بقائمة الأسعار بعد تجديدها. بعد فترة من إرسال العروض المتوفرة عندهم بالإيميل -وما كانش فيها اللابتوب اللى كنا عاوزينه وشالوا منها كل الموديلات التابعة للعرض- رحنا لهم ثاني زيارة مفاجأة، استقبلتنا واحدة اسمها منى وسألنا على نفس اللابتوب وأكدت لنا أنه موجود، التعامل كان ودي وكانت بـ تنفذ لنا اللى كنا عاوزينه ورحنا بالفعل دفعنا ثمنه 5.900 جنيه (سعر السوق)، تحمسنا للحظة واعتقدنا أن الموضوع انتهى خلاص وهـ نستفاد من العرض المقدم لنا لكن مافيش كام دقيقة وصُدمنا برد فعل ثاني خالص عرفنا أن سبب تغييره وجود زبائن كانوا قاعدين أول ما وصلنا فما حبوش يعملوا مشاكل أمامهم، لكن أول ما مشيوا اكتشفنا أنهم بـ يطلبوا مننا ندفع مبلغ زيادة لأن ده مش ثمن اللابتوب!! اكتشفنا أن المكان عامل سعرين للابتوب، سعر غير تابع لشركة العروض بـ 5900 وسعر ثاني للناس اللى تابعة لشركة العروض (ثمن اللابتوب الواحد بـ 9.500 جنيه!) فى حين أن ده مش سعره بره فى السوق (بـ يتراوح من 5.900 إلى 6.200 جنيه)، أُمال فين اللابتوب الهدية؟ كأننا من الآخر دفعنا سعر الاثنين! طيب إيه اللى قدمه المكان لنا إضافى علشان نشتري من عنده ونيجي له من آخر الدنيا مخصوص؟ المشكلة أن المسؤول عن الحسابات مقتنع (أو عامل نفسه مقتنع) وبـ يحاول يقنعنا أن دى حاجة طبيعية وأنهم بـ يحددوا الأسعار بناء على سياستهم الخاصة مش بناء على السوق، تعصبنا لأننا مش مصدقين اللى بـ يحصل خاصة أن شركة العروض أكدوا لنا أننا مش أول ناس يحصل معاهم كده وفيه غيرنا اشتكوا منهم ومن الآخر هما بـ يحاولوا يتهربوا من الاتفاق مع الشركة دي، ده غير أن فيه موقع مشهور على الإنترنت بـ يعمل عروض تخفيضات لقينا الناس كاتبين فى التعليقات تحت العرض نفس الشكوى! ولما طلبنا منهم مقابلة المدير المسئول بـ يردوا علينا أنهم هما المسئولين فى المكان! الموضوع مش تهرب بس.. ده تحوير كمان، أكيد جهاز حماية المستهلك له وقفة مع الموضوع ده.. وإحنا كمان كموقع كايرو 360.

...

كوكينو: لعب وملابس أطفال في التجمع الخامس
اصدرت في: 02/02/2013

عدة شروط لازم تتوفر في محلات مستلزمات الأطفال مؤخرًا؛ الإضاءة الساطعة، اللون البينك على 90 % من المعروضات، سبونج بوب على أي حاجة وكل حاجة، أحجام ملابس تفطس من الضحك، وأخيرًا أسعار خيالية لكل المعروضات اللي أكيد ما تستحقش الأرقام المبالغ فيها دي. يمكن محل «كوكينو- Kokkino» الموجود في الداون تاون مول في الدور الأول ما استوفاش كل الشروط دي علشان كده عجبنا وقررنا ندخل نأخذ فكرة. ما احتاجناش أكثر من 5 دقائق داخل المحل أن الشرط الأخير حاضر وبشدة، وأن الأسعار بـ تبقى خزعبلية أحيانًا خاصة لما نيجي جنب ماركات زي Chicco للعب والمستلزمات و Kokkino بالنسبة للملابس. لكن المعروضات كلها حلوة ومبتكرة مافيش كلام، والخدمة هنا كاجوال جدًا وماحدش هـ يقرب منك وأنت بـ تتفرج إلا لو أنت طلبت المساعدة، وبالمناسبة موظفين المحل لابسين يونيفورم لونه أخضر علشان تعرفهم بسهولة. المحل مش كبير قوي، مساحة مستطيلة وفيها ستاندات في وسط المحل معلق عليها الملابس وكله موضح عليه العمر المناسب لكل قطعة، من أيام لـ 3 شهور، 3 لـ 6 شهور، 6 شهور لعمر سنة وهكذا. موديلات شيك جدًا من السويت شيرت (150 جنيه) والجاكيت (180 جنيه) والجينز والبنطلون القطيفة المضلع (80 و100 جنيه) بالنسبة للأولاد، وفيه فساتين بناتي بأحجام متناهية الصغر، وقصات ونقشات جميلة بأسعار من 150 لـ 200 جنيه، ولفت نظرنا هنا أن مش كل ملابس البنات باللون البمبي ودرجاته زي المعروضات في باقي المحلات، لكن الموديلات اللي عليها لوجو «كوكينو» فيها ألوان بيج وبني ورمادي والقصات كمان كأنها قصات ملابس كبار عادي جدًا، وده علشان لو حد عاوز يجيب لأطفاله ملابس أنتيكة تخلي شكلهم آنسات كبار وأولادهم كأنهم رجال أعمال. بـ نحب الابتكار والتجديد خاصة في ملابس البيبيهات.على أيدك الشمال وأنت داخل المحل هـ تلاقي رف عملاق عليه كل حاجة تخطر "أو ما تخطرش" على بالك ممكن يحتاجها طفلك الرضيع أو الأم اللي عندها بيبي لسه مولود. تفاجئنا بموديلات وأشكال "التتينة" والسلاسل بتاعتها وتفاجئنا أكثر بأسعارها اللي بـ تتراوح بين 60 لـ 100 جنيه والسلاسل بـ 20 لـ 50 جنيه. فيه أطقم لرعاية البيبي وبشرته اللي بـ يبقى فيه كريمات وشامبو وفرشاة شعر ولوفة وشوية لعب زي الشخاليل والعضاضات، أنت ممكن تقف أمام الرف ده وتنبهر حتى لو ماعندكش أطفال أو مش متزوج أصلًا، خاصة لما تيجي عند الأحذية والكوتشي ومقاساتها وتصميماتها الدقيقة، بجد So Cute!زيارة أو اثنين لـ «كوكينو» وشراء كام قطعة من هناك ممكن تخليك تحكي بفخر لابنك أو بنتك لما يكبروا قد إيه أنت كنت مدلعهم وجايب لهم نجمة من السماء.

...

هدايا شلبي: إكسسوارات ولعب وهدايا في الكوربة
اصدرت في: 31/12/2012

بـ نكتب عن المحل ده من منطلق أننا لما نلاقي مكان بـ يبيع حاجات مش عارفين هي ممكن تكون بـ تتباع فين، وبـ نكتشف مكان بـ يبيعها بالصدفة بـ نحب نعرفكم به. يعني مثلًا منين ممكن تشتري لوازم تدخين زي "البايب" وولاعات أنتيكة بأشكال مبتكرة وفلاتر؟ منين ممكن تشتري هدايا غير تقليدية بأسعار معقولة؟، والأهم من ده كله لوازم وزينة المناسبات المختلفة، وبما أننا زرنا المكان ده وقت احتفالات السنة الجديدة، فالمكان كان مغطى باللون الأحمر وكل فاترينات المحل مليانة لعب وعرائس لبابا نويل وغيرها من التحف والإكسسوارات الخاصة بالمناسبة.بوتيك صغير في شارع إبراهيم في منطقة الكوربة في مصر الجديد، اسمه «هدايا شلبي» وهو مش جديد بالمناسبة، بالعكس هو قديم ومعروف جدًا لكن سكان المنطقة والمناطق القريبة من مصر الجديدة. صحيح حجمه مش كبير لكن التنوع الغريب في نوعية المعروضات اللي عنده اكسبته سمعة كويسة كواحد من البوتيكات الكلاسيكية القليلة، وممكن نسميه محل "خردوات" كمان؛ نوعية المحلات دي اللي في طريقها للانقراض، لكن لما يكون الكلام عن «شلبي» يبقى أكيد دي حاجة باقية ومرتبطة ببقاء مصر الجديدة نفسها، وهـ يفضل علامة مميزة مرتبطة بالمكان.من المعروضات اللي لفتت نظرنا المرة دي لعب الكريسماس اللي دمها خفيف بجد وما شفناش زيها في أي مكان ثاني زي عفريت العلبة اللي بـ يخرج منها رجل الجليد، مصنوع من القطن والبلاستيك بجودة عالية، وبـ تبدأ من حجم كف اليد، بأسعار من 30 لـ 75 جنيه حسب الحجم، وعرائس لشخصيات بابا نويل بـ 30 جنيه، وبيوت خشبية وماكيتات لرحلة العائلة المقدسة بـ 60 جنيه، وأطباق هدايا عليها رسوم الكريسماس من 20 لـ 40 جنيه. وغيرها من لعب الأطفال والبالونات بأسعار لا تذكر.قسم أدوات التدخين مبهر بجد، رغم أننا ضد التدخين بشكل عام، لكن حبينا نشتري منه بعض الإكسسوارت على سبيل الاقتناء كتحف وأنتيكات، زي الأشكال المختلفة للبايب، اللي فيه منه موديلات مصنوعة في الصين بأسعار من 60 لـ 80 جنيه، وموديلات مصنوعة في تركيا بـ يوصل سعرها لـ 120 جنيه، الفرق بـ يبقى في نوع الخشب، وقد إيه بـ يستحمل درجة حرارة عالية وعمره يطول معاك. ولاعات Zippo وماركات ثانية على شكل طبنجات حقيقية وغيرها من الموديلات اللي تنفع هدايا، وطبعًا فيه توباكو وفلاتر دخان وطفايات وكمان سجائر إلكترونية للناس اللي بـ تحاول تبطل تدخين ومش عارفين يجيبوها منين. وعجبنا قوي مجموعة أنتيكات لشيشات بحجم صغير جدًا، لكن ممكن تستخدم كشيشة حقيقية. ومن الحاجات اللي «شلبي» متميز فيها فعلًا هي المحافظ المصنوعة من الجلد الطبيعي أو القماش وتصميماتها خطيرة وعمرها طويل مش بـ تتقطع أو شكلها بـ يقدم وده عن تجربة. وأسعارها من 40 لـ 100 جنيه حسب الماركة.هـ تلاقي هنا كمان الحاجات اللي ممكن تلاقيها في بازارات الحسين وخان الخليلي، من لعب فرعونية وتماثيل صغيرة وميداليات مفاتيح وأعلام وقصافات أظافر بتصميمات أنيقة وسكاكين سويسرية مقلدة، تقريبًا كل حاجة بـ تدور عليها في باب "الرفايع" والمستلزمات الضرورية اللي بـ تبقى مش فاكر اسمها حتى ولا عارف تجيبها منين هـ تلاقيها هنا عند «هدايا شلبي». بوتيك يستاهل الزيارة مخصوص.

...

لودنج: بيع وصيانة وتحديث البلاي ستيشن في مدينة نصر
اصدرت في: 01/12/2012

سوق جديد للإلكترونيات في الدور الأرضي في السراج سيتي مول في مدينة نصر، موبايل وكمبيوتر ومستلزماته وأجهزة ألعاب زي البلاي ستيشن والإكس بوكس والـ Wii. المكان بقى وجهة ناس كثير من زبائن التكنولوجيا، وممكن نشبهه بشارع عبد العزيز في العتبة شوية، لكن الفرق أن هنا المستوى أرقى حبتين، والمول المقفول برضه أحسن من الشارع، لكن في نفس الوقت الأسعار هي هي، وممكن دائمًا تفاصل وتوصل لسعر أحسن، وأنت وشطارتك.بـ نتكلم في المقال ده عن محل محدد بـ يقدم خدمة محددة داخل المول، لكن في نفس الوقت لازم نقول أن المحل ده مش متميز أو فريد بأي شكل بالنسبة لباقي المحلات اللي بـ تقدم نفس الخدمة في نفس المول، وأننا بـ نحكي عن تجربتنا معاه اللي متأكدين أنها كانت هـ تبقى هي هي لو كانت مع أي محل بـ يعمل خدمات في مجال الألعاب وأجهزتها. لأن في المولات والشوارع والممرات التجارية بـ تبقى الخدمة متشابهة بنسبة 90 % والفرق في الأسعار بـ يبقى طفيف أو مش موجود أصلًا، والموضوع كله بـ يرجع للراحة النفسية للزبون ومدى تفضيله لمكان دون الآخر، أو ممكن بـ يبقى الذهاب لشخص بعينه بـ يبقى بسبب السمعة أو الخبرات السابقة أو ترشيحات المعارف والأصدقاء. في النهاية إحنا عاوزين نقول أننا هنا بـ نتكلم عن الفكرة ونوع الخدمة مش عن محل بعينه.محل «لودنج» واحد من عشرات المحلات اللي بـ تبيع أجهزة بلاي ستيشن 2 و3 وأجهزة XBOX وغيرها من Consoles الألعاب. الأسعار هي العادية بالنسبة لأي محل في المول أو في شارع عبد العزيز، مثلًا بلاي ستيشن 3 بهارد ديسك داخلي 320 جيجا بـ 1900 جنيه، والـ 240 جيجا بـ 1750 جنيه وهكذا، لكن الفكرة أنه بـ يعمل التعديل الخاص بالأجهزة علشان تقدر تلعب عليها بالألعاب اللي بـ تحملها على الهارد ديسك الخاص بالجهاز وما تحتاجش تشتري الأسطوانات الأصلية للعبة أو الـ Blu-ray بأسعار خيالية بـ توصل لـ 550 جنيه للعبة الواحدة. بعيد عن موضوع ده قانوني أو لأ، الفكرة أنهم هنا محترفين في الموضوع ده، وبـ يعملوا نوعين من التعديل، تعديل software بمبلغ 150 جنيه وده بـ يتم من خلاله تحميل تحديث معين خاص بنظام التشغيل على بلاي ستيشن 3 وبعد كده تقدر تشغل كل الألعاب الحديثة لحد السنة اللي عملت فيها التعديل، بس بشرط أنك ما تدخلش باللعبة أونلاين علشان الجهاز ما يقومش بتحديث نظام التشغيل تلقائي وفي الحالة دي هـ يتم إفساد مفعول "التعديلة" اللي بـ 150 جنيه. وفيه تعديل ثاني Hardware (350 جنيه) بـ يتم من خلاله زرع شريحة معينة داخل الجهاز لتشغيل الألعاب، وده بـ يتعمل في حالة أن الجهاز يكون مُعدل قبل كده أو دخل عمل تحديث من الإنترنت زي ما قولنا، وهنا بـ يبقى لازم العملية الجراحية دي تتم وتُزرع الشريحة داخل الجهاز. مع كل تعديل من النوعين ممكن تأخذ 5 ألعاب هدية، في حين أن المحل بـ يبيع الألعاب بشكل منفصل بأسعار من 10 لـ 50 جنيه حسب حداثة اللعبة. ودي بـ يتم تحميلها على الجهاز أو تجيب له هارد ديسك خارجي يملاه على الآخر لو حبيت. الموضوع لا يخلو من المجازفة، وفيه احتمالات أن أثناء عملية التعديل يتم مسح ملفات معينة أو لا قدر الله الجهاز يبوظ خالص، لكن ده ما حصلش معانا في تجربتنا هناك، بس كنا عاملين احتياطتنا وعاملين Backup لكل حاجة مهمة على جهاز الـ PS3 الخاص بنا. وفعلًا خلال 4 ساعات اللي سيبنا فيها الجهاز هناك رجعنا ولقينا التعديل اتعمل، لكن اكتشفنا أن بعض الألعاب اللي أخذناها كانت مش شغالة، بس رجعنا وطلبنا تحميلها مرة ثانية وصاحب المكان ما كانش عنده مانع أنه يضبط لنا أي حاجة مش مضبوطة. تجربتنا في «لودنج» كانت عملية وسريعة وفعالة، وبـ نفكركم مرة ثانية أن المحلات هناك متشابهة في كل حاجة، شطارتك بس في أنك تعرف توصل لأحسن سعر وأسرع وقت تخلص فيه مهمتك.

...

الشمس: آلات موسيقية محلية وعالمية الصنع في المعادي الجديدة
اصدرت في: 24/11/2012

فروع محلات «الشمس» للآلات الموسيقية منتشرة في كل أنحاء القاهرة، في العباسية ومدينة نصر ووسط البلد وعرفنا أخيرًا أن فيه فرع فتح في المعادي الجديدة وبالتحديد في شارع اللاسلكي في نفس العمارة اللي فيها شركة "غاز تك". ورغم أن واجهة المحل على شارع اللاسلكي الرئيسي، إلا أن مدخل المحل من مدخل العقار اللي في الناحية الخلفية، يعني لازم تلف لفة طويلة علشان تدخل المحل وتطلع دور كمان لأن المحل في الدور الثاني.«الشمس» طول عمره مشهور بأنه بـ يعرض آلات موسيقية بصناعة محلية، أو من المصانع الخاصة به في مصر وفي الصين وعمل ماركة خاصة به سميت Ash وهو اختصار لكلمة "الشمس" ومن الآلات اللي عليها لوجو Ash كان الجيتار الأكوستك والباص جيتار والعود وبعض الآلات الوترية الثانية. دخلنا المحل وكانت المفاجأة أنه شيك جدًا، وواسع ومرتب بعناية رغم كثرة المعروضات، وده على غير عادة محلات الآلات الموسيقية اللي عادة بـ تبقى البضاعة فيها فوق بعضها واللي بـ تعاني فيها علشان تتفرج على الآلة اللي أنت عاوزها. هنا الوضع مختلف، وبسهولة هـ تقدر تميز كل ركن ونوع الآلات اللي فيه؛ الوتريات في الواجهة زي العود والجيتار الأكوستك والماندولين والتشيللو، جنبها آلات نفخ خشبية، وآلات الإيقاع والدرامز، وعلى اليسار بيانو ألماني ضخم باللون الخشبي الجميل، وأخيرًا الجيتارات الإلكتريك المعلقة ومغطية الجدار كله. الجديد في الفرع ده أنه عارض ماركات ثانية غير Ash في كل الآلات خاصة الجيتار الإلكتريك اللي لاقينا منه موديلات الفيندر المكسيكي (5000 جنيه) والفيندر Squire بـ 2000 جنيه، وموديلات الجيبسون والـ ESP المميزة زي الـ Sambora وغيرها. عرفنا من موظفي المحل أن فرع المعادي -على حد قولهم- هو الاستثناء الوحيد بين الفروع اللي بـ يعرض ماركات وموديلات غير ماركة "الشمس" نفسها. ودي طبعًا كانت حاجة كويسة جدًا بالنسبة لنا لأننا كان عندنا تحفظات شوية على موديلات Ash محدودة الجودة بالمقارنة بالماركات العالمية المعروفة في كل الآلات زي الياماها والـ Ibanez ومع ذلك لفت نظرنا باص جيتار من ماركة Ash شكله عجبنا جدًا وجربنا صوته كمان، كان سعره 1600 جنيه ولونه أحمر، وفيه 4 ميكروفونات Humbucker بـ تخلي الصوت أنقى وأقوى.في الدرامز لاقينا ماركة واحدة هي المعروضة وهي صينية أو فيتنامية مغمورة وصوتها أقل من المتوسط وسعرها 2700 جنيه ومع زيادة القطع والستاندات معاها بـ توصل لـ 3400 جنيه. طبعًا ما ننصحش بها غير المبتدئين اللي معاهم فلوس وعاوزين يجيبوا حاجة جديدة مش مستعملة. وبالمناسبة المحل مش بـ يشتغل في المستعمل نهائي. فيه درامز Premier 7 قطع لكن مش معروضة في المحل، سعرها قفز من 4400 لـ 8800 جنيه في أقل من سنتين، جنون أسعار الآلات الموسيقية المستوردة له علاقة بحالة البلد الاقتصادية والعرض والطلب. بس زيادة الضعف دي كانت صادمة بالنسبة لنا. وفيه درامز صغير للأطفال بـ 1200 جنيه. عدد من الأورجات من كل الماركات المعروفة زي Roland وKorg ورف كبير للإيقاعات الشرقية والبركشن اللاتينية، وإكسسوارات جيتار ودرامز. وعرفنا أننا ممكن نطلب أي آلة أو كماليات أو نحاسيات وإكسسوارات الدرامز وحتى لو مش موجودة هم بـ يجيبوها لنا بعد أيام قليلة. يعني عمرك ما هـ تطلب حاجة ويقولوا لك مش موجودة؛ ودي حاجة ثانية عجبتنا في فرع المعادي بالأخص.دلوقت لو بـ تدور على أي آلة موسيقية ومش عارف ممكن تلاقيها فين، بـ نقول لك روح بقلب جامد على «الشمس» فرع المعادي الجديدة، من أول الطبلة والكمان لحد الإكسيليفون واليوكوليلي البرتغالي.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن