ملابس رجالي تسوق in Cairo, Egypt

تسوق

زفير: كل حاجة بـ تتكلم عربي في محل الزمالك الشهير
اصدرت في: 23/08/2015

نعتقد أننا مررنا بمرحلة زمنية كانت أي حاجة لها علاقة بلغتنا أو ثقافتنا كانت بـ تعتبر غير مرغوب فيها، ووصلنا لأن كل حاجة في حياتنا من أول أكلنا، موسيقتنا وحتى لبسنا لازم يكونوا على الطابع الغربي، بعدها ظهرت مرحلة الاعتزاز بالتراث وكل ما هو شرقي عامة، ومصري على الأخص؛ زفير - Zafir في الزمالك من أول المحلات اللي ساعدت على انتشار الموجة دي بقوة وبشكل مختلف. مش عارفين بالضبط مرحلة الاعتزاز بثقافتنا بدأت إمتى وإزاي، يمكن بانتشار المراكز الثقافية المختلفة اللي أتاحت الفرصة لعدد كبير من فرق الأندرجراوند المصري أنها تظهر، مع انتشار المكتبات اللي معها انتعش سوق الكتب العربي والمصري، وبالتالي أصبح فيه ثقافة محلية معاصرة، بعدما كان فيه فجوة كبيرة بين واقع الشباب وأي حاجة لها علاقة بثقافتنا. بعيدًا عن تحليلنا الشخصي للموقف، "زفير" وظف الثقافة المحلية بشكل أقل جدية وقدر أنه يكوّن شعبية كبيرة عند الشباب بمجموعة تي شيرتات مختلفة تيماتها تنوعت ما بين استخدام الكلمات والخطوط العربية، والنوستالجيا وتوظيف رسومات مجموعة من الفنانين الشباب، بعد مرور سنين من أول زيارة لنا لزفير، لاحظنا تطور في المنتجات المعروضة، واللي ما بقيتش مقتصرة على التي شيرتات بس. على شمالك أول ما تدخل ستاند خاص بمجموعة من سيديهات موسيقى الأندرجراوند، لفت نظرنا منهم سي دي بـ يجمع عدد كبير من الأصوات النسائية المشهورة (35 جنيه). جنبهم مجموعة من الأرفف مرصوص عليها مجلات (35 جنيه) بتصميمات أنجح تي شيرتاتهم زي "سلاح التلميذ"، وهو عبارة عن صورة غلاف الكتاب المشهور ولكن مع الفرق أن الشخصيتين ماسكين أسلحة فعليًا. معروض كمان مجموعة من حاملي الأكواب المصنوعة من الكروشيه بألوان مبهجة (15 جنيه الواحدة)، وDream Catchers وهي عبارة عن معلقات مصنوعة بالخيوط، بـ تقول الأسطورة عند سكان أمريكا الشمالية الأصليين أنها بـ تجلب الأحلام السعيدة وتبعد الكوابيس، وأسعارهم بـ تتفاوت حسب الحجم (متوسطة 55 جنيه). الجديد أن زفير عارض مجموعة من المايوهات الحريمي، لو قطعة واحدة (100 جنيه) لو قطعتين (110 جنيه)، عامة هم مافيهومش تفاصيل كثيرة واعتمادهم الكلي على ألوانهم ونقشة القماش، ينفعوا في زنقة وسعرهم ممتاز بالنسبة للمحلات الثانية. بجانب الكاشير معروض إكسسوارات لـ Eman Designs اللي بـ تتميز بطابعها الشعبي، لفت نظرنا أنها مصنوعة بدقة وشكلها النهائي ممتاز وأسعارهم بـ تبدأ من 65 جنيه وبـ توصل لـ 200 جنيه. الدور الثاني فيه مجموعة التي شيرتات المشهورة (160 جنيه)، عجبنا منها واحدة لونها رمادي عليها رسوم فرعونية، لاحظنا أن عددهم قليل بالنسبة لزمان، ده غير أن معظمهم حجمه كبير والتصميمات مش كثيرة، زفير بـ يعرضوا ماركة الملابس المصرية ألاجا - Allaga، واللي برضه مستوحاة من التراث المصري، القطع مش كثيرة عجبنا منهم فستان قصير بدون أكمام لونه بني (400 جنيه). من ضمن الحاجات اللي زفير بـ يعرضها هي مجموعة من الخداديات اللي مصنوعة من أقمشة طابعها عتيق (زي اللي كنا بـ نلاقيها في بيت جدودنا)، ومنها حجمين الصغير (45 جنيه) والأكبر (65 جنيه). لو قعدنا نتكلم عن المنتجات المعروضة في زفير مش هـ يخلص المقال، لازم تروحوا تشوفوه لمجرد أنكم تأخذوا فكرة عن المكان، وحتى لو أنتم رحتوا هناك قبل كده، ننصحكم أنكم تعملوا زيارة ثانية لأنكم بكم المعروضات دي محتاجين كذا زيارة وراء بعض.

...

ريسيرفد: ماركة الملابس الأنيقة تفتتح أول فروعها في مصر داخل كايرو فيستيفال سيتي
اصدرت في: 07/03/2015

المنافسة الحاصلة وسط مشهد الأزياء المصري قوية جدًا، وسط عدد كبير من المولات والماركات الأجنبية اللي بـ تجتاح البلد، من الصعب أنك تلاقي ملابس تجمع بين السعر المعقولة والجودة المناسبة. لحسن الحظ، اسم شهير في عالم الأزياء هو "ريسيرفد - Reserved" افتتح أول فروعه في الشرق الأوسط في كايرو فيستيفال سيتي مول، مافيش كلام أنك من الصعب تجذب عشاق الموضة القاهريين في ظل وجود أسماء مشهورة، لكن مع تقديم ملابس أنيقة بأسعار مناسبة، ريسيرفد عنده القدرة على التواجد. ريسيرفد بـ يعرض ملابس للرجال، السيدات والأطفال، تشمل ملابس داخلية، ملابس كاجوال وسهرة، وملابس رسمية/ سمارت كاجوال، بالإضافة لأحذية، وكل ده تحت سقف واحد. وسط ديكورات المحل الأنيقة بألوان الأسود والأبيض، المحل يتميز بروح عصرية جذابة. من وقت دخولنا، كان معانا واحد من المبيعات بـ يسألنا إذا كنا نعرف أي معلومات عن الماركة، وشرح لنا معلومات أساسية عنها وبعدها سابنا نتمشى بحريتنا. قسم الحريمي، واللي بـ يحتل النصف الأمامي من المحل، مقسوم لقسم الملابس السمارت وقسم للكاجوال. الحاجات اللي شدّت انتباهنا شملت فستان كوكتيل باللون الأزرق النيون (299 جنيه)، بوت أسود بكعب (699 جنيه)، شنطة يد شيك (479 جنيه) وبلوفر طويل مضفر باللون الرمادي (459 جنيه). بعدها تمشينا شوية لحد ما وصلنا للنصف الثاني من المحل، وهناك تفرجنا على قسم الرجالي، واللي كان فيه تشكيلة من التي شيرتات بأكمام طويلة (139 جنيه)، تي شيرتات مطبوعة (150 جنيه)، بليزر أزرق سمارت كاجوال (480 جنيه)، جاكيت منفوخ بغطاء للرأس (459 جنيه) وبنطلونات نحيفة باهتة شوية (299 جنيه). بشكل عام، مسئول المبيعات كان مهذب وجاهز للمساعدة، لكن أوقات كنا بـ نحس الموضوع فيه إلحاح شوية. طبعًا إحنا بـ نقدر المساعدة، لكن عرضه لتقديم مقاسنا مع كل قطعة نلمحها ممكن يكون مربك شوية. من ناحية الجودة، الملابس الموجودة مش مبهرة للدرجة، لكن في الوقت نفسه المحل بشكل عام بـ يقدم منتجات متناسبة مع سعرها وكان واضح فعلاً أن الأسعار معقولة. المهم هنا أننا أكيد هـ نرجع لهم في زيارة ثانية في رحلة تسوق تحافظ على ميزانيتنا من التدمير.

...

ترندي: أذواق مختلفة وأسعار قليلة في المعادى
اصدرت في: 21/01/2015

طبعًا معروف رغبة البنات وهي بـ تتسوق في أي مكان أن هي بـ تشعر بسعادة وبهجة لا نهائية لما تلاقي قطعة فنية عجبتها وسط حاجات كثير ممكن ما تكونش حلوة لمجرد أن شكلها عجبها وسعرها مناسب، وتقول لك: "دي لُقطة".. وده اللي حصل لنا لما رحنا "ترندي – Trendy" المحل المستقل جنب سلسلة محلات متنوعة في شارع زهراء المعادي. أول ما دخلنا المحل لفت انتباهنا تنوع ملابس الأطفال وأحجامهم، وتنوع القسم الرجالي كمان، بس طبعًا إحنا اهتمامنا بالقسم النسائي. أول حاجة لفتت انتباهنا هي مجموعة مختلفة من البنطلونات اللي رجلها واسعة كأنها جيبة من الستان المناسب للخروج بالليل، وكان فيه منه ستان سادة وستان عليه طبقة ثانية نفس لون القماش بس مفرغة والواحد بـ 215 جنيه، كمان كان عنده مجموعة كبيرة من الجاكيت الخفيف القطن بكل الألوان بـ 70 جنيه. ده غير مجموعة الجاكيتات الكبيرة manteau، كان فيه جاكيت أسود سادة بـ جيبوب من الجنب، كان حلو جدًا لولا الفرو اللي في الياقة واللي المفروض أنه ممكن يتشال بـ 350 جنيه، أما الجاكيت اللي كان حلو فعلًا، جاكيت قماشته جلد وعليه خياطة كاروهات (نوع الجلد نفسه) العيب الوحيد فيه أنه كان لونه نبيتي، وما كانش فيه ألوان ثانية وكان بـ 250 جنيه بس. كان فيه مجموعة أخرى من الجاكيتات وأسعارها مش أكثر من 400 جنيه. الحقيقة أنه كان عنده مجموعة من السويت شيرت المتميزة واللي تنفع للبيت أو للنادي والتمارين الرياضية، عجبنا واحد أبيض سادة خالص عليه بس رسمة وش ميكي ماوس على جنب صغيرة من فوق وعلى الزاوية المقابلة لها على الجنب برضه واحدة ثانية وكان بـ 135 جنيه، وواحد ثاني نفس الخامة عليه رسمة كذا حذاء باليرينا ومكتوب عليهLove Girls وكان بنفس السعر، غير سويت شيرت خامتها أثقل ومرسوم عليها دباديب ملونة بـ 165 جنيه. هـ تلاقي كمان جنبهم مجموعة فساتين سواريه أو تنفع للخروج مساءً، عجبنا واحد فيهم بحمالات خفيف روز من فوق والباقي أسود بـ 290 جنيه، فيه فساتين ستان كثير منها المشجر ومنها الستان المفرغ، وأسعارهم مش أكثر من 300 جنيه. ده غير مجموعة البنطالونات الجينز بأشكالها المتنوعة بـ 180 جنيه، وبنطالونات قطن كمان للخروج مش للتمرين بنفس السعر وفيها كل الألوان اللي تناسب ذوقك. وآخر حاجة لفتت نظرنا على الباب مجموعة كوفيات سادة صوف كل الألوان، الواحدة بـ 35 جنيه، القسم الرجالي كمان كان متنوع ما بين السويت شيرت والجاكيتات والبنطلونات، ولبس البيت. "ترندي" أسعاره مناسبة وفيه احتياجات كل أفراد الأسرة المصرية، بالذات لو الأطفال صغيرين أقل من 6 سنين وإلا مش هـ يلاقوا مقاسهم.

...

أور: بداية موسم التخفيضات وملابس متنوعة ومريحة في المعادي
اصدرت في: 27/12/2014

مع بداية فصل الشتاء ومواسم الأعياد، تبدأ تخفيضات الأسعار اللي بـ تغري المتسوقين جدًا، بالذات لما بـ تبقى على مشتريات تستاهل. محل "أور –OR " لفت انتباهنا أنه عامل تخفيض بعد ما بـ تشتري مشتريات بألف جنيه يعطيك 200 جنيه هدية تشتري بها اللي أنت عاوزه، والحقيقة أن المجموعة اللي كان عارضها في قسم السيدات متميزة ومريحة. أول حاجة لفتت انتباهنا بلوزة مشجرة بورد صغير خالص، رقيقة جدًا بـ 160 جنيه، وجاكيت خفيف مشجر بس مش باين لأن لونه أسود وفيه منه الأزرق بنفس السعر، كمان كان فيه تي شيرت سادة فيها مربعات خفيفة وفيه منها الأزرق والروز بـ 180 جنيه. وبلوزة طويلة لحد الركبة فيها رسمة في النصف بورد مبهج متدرج ما بين الأصفر والأحمر، وعلى الجنب أسود يعني الرسمة كانت مربعة والأسود عامل زي حرف الـ U، وكانت بـ 300 جنيه. أما أكثر حاجة أبهجتنا هي مجموعة السويت شيرت اللي كانت عنده لأنه كان بـ يتميز بأنه عنده كل أنواعها وأشكالها وأحجامها طويل أو قصير، وشدنا جدًا أن كان فيه سويت شيرت طويلة لحد الركبة برضه ولونها أحمر ومكتوب عليها كلمة بسيطة تحت الياقة بس وبـ 300 جنيه. كان عنده مجموعة سويت شيرت متوفر منها اللون الأسود والرمادي والأزرق الغامق مكتوب عليها جملة: "I'm not a drama queen" أو "Don't talk to me on Sunday" وكانت بـ 330 جنيه. وسويت شيرت "it's finally winter" كان بـ 280 جنيه ولونه رمادي، وكان فيه واحدة سادة خالص لونها روز وفيها مربعات بسيطة ما تبانش إلا لما تدقق لأنها من نفس اللون بـ 330 جنيه برضه. كمان كان عنده مجموعة جاكيتات متميزة منها واحد صوف كبير مفتوح وواسع لونه رمادي وفيه منه الأحمر وكان بـ 360 جنيه، والحقيقة أنه كان شكله مغري جدًا ويشعرك بالدفء، لكنه ما يناسبش كل الأجسام لأن اللبس الواسع الكبير في الشتاء بـ يظهرك بمظهر أكبر بكثير من الحقيقة. ولو بـ تدوري على حاجة تنفع لمناسبة بعد الظهر كان عنده بلوزة أسود دانتيل فيها رسومات بسيطة بين المربعات والورود تنفع تتلبس تحت جاكيت وكان فيه منها ألوان مختلفة غير الأسود بـ 200 جنيه. كمان كان فيه جاكيتات فورمال عادية وطويلة بألوان مختلفة وأقمشة مختلفة، ما قدرناش نمشي قبل ما نبص على القسم الرجالي اللي كان فيه مجموعة سويت شيرت متعددة ومتميزة وبنطلونات رياضية مريحة وجاكيتات رياضية كمان. محل "أور" يتميز أنه فيه كل حاجة، تقدر فعلًا تشتري بالألف جنيه حاجات مفيدة ومتنوعة. وهـ ينزل الأسبوع الجاي حاجات ثانية جديدة للي حابب يروح يشوفها.

...

ستوك زون: ملابس بجودة عالية وأسعار مناسبة في المعادي
اصدرت في: 15/12/2014

معروف أن محلات الستوك بـ تبقى أسعارها أرخص من المحلات العادية لأنها بـ تبيع الملابس بواقي التصدير، بس الحقيقة أن "ستوك زون – Stock Zone" قدر يوفق بين جودة الملابس وبين أسعارها المناسبة. أول ما تدخل بـ تلاحظ أن المكان مقسم لثلاثة أقسام: قسم خاص بملابس الأطفال وفيه كل احتياجاتهم ولكل الأعمار من أول 0: شهرين لحد 6 سنين، وقسم رجالي، وقسم للسيدات. دخلنا القسم الخاص بالسيدات، واللي كان متنوع جدًا الحقيقة، أول حاجة لاحظناها كان جاكيت خفيف سادة مفتوح من الظهر على شكل ثمانية وتحته قماشة خفيفة من نفس لون الجاكيت بحوالي 170 جنيه، وجاكيت ثاني سادة خالص برضه فيه منه كل الألوان بنفس السعر، وفيه كمان نفس النوع بس منقط أو عليه رسومات فراشات صغيرة ملونة. أكثر حاجة عجبتنا أنه عنده تنوع في أشكال وألوان البنطلون الجينز بطريقة عجيبة، يعني ممكن تلاقي كل أشكال وأحجام وألوان الجينز وبحوالي 150 جنيه بس. عجبنا بنطلون جينز سادة خالص لونه أزرق فاتح وأجمل حاجة أنه مش Slim، لا كان عادي، كمان كان فيه بنطلون جينز فيه خيوط بيضاء عند الركبة بنفس السعر 150 جنيه. كمان كان عنده جاكيت جلد بسوستة على الجيب اليمين والشمال شكله لطيف وفيه منه الأسود والبني والبيج، وبحوالي 460 جنيه. كمان عنده قسم بيجامات وملابس مريحة للتمرين، عجبنا أكثر حاجة السويت شيرت بتاعته، علشان فيها أحجام متنوعة وأشكال بسيطة، كان فيه شكل وجه بـ يضحك وأسنانه باينة والأسنان فيها سوستة بـ تتقفل وتتفتح وخارجة لبره، السويت شيرت كأن الأسنان هي اللي خارجة بره وبـ يعطي مساحة أكبر لك. كان فيه شكل سويت شيرت سادة خالص ومجرد ورد صغير جدًا من فوق بس، وكان فيه سويت شيرت قماشتها أخف كلها عليها رسومات فراشات بـ 174 جنيه. كان فيه كمان بلوزات هاي كول عادية سادة خالص فيها كل الألوان اللي شبه الكارينة دي مع الاختلاف أنها واسعة ومريحة وقماشتها شتوي بـ تدفى وبحوالي 65 جنيه. أما عن قسم الأطفال، فالحقيقة أنه عجبنا جدًا، لأنه مهتم بالطفل من أول يوم ولادة بالشرابات الصغنونة بتاعته والفانلات والسلوبيت والقمصان والبنطلونات وفساتين للبنات، كل حاجة الطفل بـ يحتاجها وبأسعار معقولة جدًا. أهم حاجة أنه بـ يوفر لك الأساسيات بأسعار مناسبة والخدمة هناك ممتازة.

...

تيرانوفا: فرع جديد لماركة الملابس الشبابية في شارع لبنان
اصدرت في: 03/12/2014

سكان المهندسين من وقت قريب كان لازم "يضربوا" مشوار للمولات الكبيرة زي سيتي ستارز في مصر الجديدة أو مول العرب في أكتوبر علشان يلاقوا محلات الملابس المشهورة كلها في مكان واحد. الموضوع بالنسبة لهم بقى أسهل لما مجموعة محلات زي مانجو، بول أند بير وبيرشكا فتحت في شارع جزيرة العرب؛ محل وراء الثاني وبدأت حمى المحلات تنتشر لغاية ما وصلت بطول شارع لبنان، بدأت بـ "إتش & إم"، وبعدها فتحت مجموعة من المحلات من ضمنها تيرانوفا - Terranova، واللي قررنا نكتب عنه مقال نقدي. تيرانوفا كان فاتح في شارع وادي النيل بعيد عن مجمع المحلات الحالي، ولكن الفرع ده قفل علشان يحتل المحل اللي جانب إتش & إم. الفرع الجديد أوسع كثير وفيه أقسام ما كانتش موجودة في القديم زي قسم اللانجيري وملابس البيت. أول دور بـ يحتله القسم الحريمي كما هو معتاد في محلات الملابس، أول قطعة لفتت نظرنا كانت جاكيت ثقيل مضاد للماء لونه زيتي (339 جنيه) وهو مناسب جدًا للأيام دي بما أن الشتاء دخل علينا. معروض مع الجاكيت مجموعة من القمصان الكاجوال (119 جنيه)، وبنفس سعرهم معروض في قسم لوحده مجموعة من البنطلونات الـ Skinny Jeans بألوان مختلفة منها الرمادي والأزرق الفاتح. أما البنطلونات القطنية واللي مناسبة للجيم أو مشوار سريع فالواحد بـ (149 جنيه) وألوانه كحلي بكتابة بيضاء على الرجل أو العكس. من البلوفرز عجبنا واحد بسيط جدًا برقبة مستديرة و3/4 كم سعره (149 جنيه) والألوان الموجودة منه الكحلي والأبيض. الملابس الحريمي كثيرة لدرجة أننا اكتشفنا أنها مش بس محتلة الدور الأول، ده كمان نصف الدور الثاني، ومعروض فيه مجموعة من الـ Sweatshirts اللي عليها رسومات كرتونية والمناسبة جدًا ليوم دافيء، وموجود برضه مجموعة من الـ Leggings واللي ممكن تناسبها. قسم اللانجيري مش كبير ولكن ممكن تطلعي منه بعرض مناسب وخصوصًا أن العرض الموجود حاليًا، واللي مستمر لمدة 10 أيام هو اشتري 2 وتحصلي على القطعة الثالثة بـ 9 جنيه، واللي ساري على معظم القطع من الأقسام المختلفة. من قسم اللانجيري لاقينا بيجامة لونها Powder Pink عليها رسمة بسيطة في القطعة العلوية. سعر القطعة العلوية (119 جنيه)، أما البنطلون فهو سادة وسعره (149 جنيه). لاحظنا أن الملابس الداخلية مش منوعة من حيث الأشكال والألوان ومعظمها من الألوان الأساسية زي الأبيض والأسود والبيج. قسم الأطفال موجود فيه العديد من الاختيارات للأولاد والبنات وعجبنا فيه جاكيت بناتي مضاد للماء عليه رسمة ورود سعره (199 جنيه)، ومعظم الملابس القطنية أسعارها بـ تبدأ من 49 حتى 119 جنيه. آخر جولتنا كانت في القسم الرجالي واللي موجود فيه مجموعة من البنطلونات الواسعة بألوان مختلفة منها حتى بطبعة كموفلاج الجيش، استغربنا أن فيه لسه محل بـ يبيع الطبعة دي لأنها انقرضت من زمان. التي شيرتات اللي بنص كُم موجودة بكثرة بالرغم من أن الدنيا برد، لفت نظرنا واحدة مطبوع عليها ورود بالكامل (119 جنيه)، بلوفر على صدره مجموعة من الرسومات المناسبة للكريسماس (219 جنيه)، و Coat قصير ألوانه الكحلي والرمادي سعره (519 جنيه). ما بـ نعتبرش تيرانوفا من المحلات اللي بـ تقدم ملابس جودتها عالية، صحيح سعرها مناسب بالنسبة لناس كثير، ولكن التجربة أثبتت أنها ملابس الموسم الواحد لأن عمرها قصير. فلو أنت من الناس اللي بـ تحب اللبس يعمر معاك، ننصحك بأنك تعلّي ميزانيتك وتشتري من مكان جودة ملابسه أعلى. أما لو أنت من الناس اللي بـ تزهق من شكلك في اللبس بسرعة ممكن تلاقي هناك اللي يناسبك.

...

ديبنهامز: المتجر الإنجليزى متعدد الأقسام وصل كايرو فيستيفال سيتى
اصدرت في: 23/11/2014

يمكن لأنك نادرًا ما بـ تشوفهم وسط مشهد التسوق القاهرى الراقى، لكن يفضل حبنا للمتاجر متعددة الأقسام أبدى، ببساطة شديدة النوع ده من المحلات عنده القدرة على توفير حياة –وكمان تجربة تسوق– أكثر روعة وسهولة، عن طريق تقديم كل حاجة ممكن تحتاجها فى مكان واحد. مع فرع موجود بالفعل فى الإسكندرية، الاسم البريطانى المعروف "ديبنهامز -Debenhams"، وصل أخيرًا للقاهرة. المحل بـ يحتل مكان ضخم فى مول كايرو فيستيفال سيتى، ولما نقول كبير نقصد أن مساحته تساوى مساحة من 4: 5 محلات متوسطة الحجم. بإضائته المشرقة وألوانه الفاتحة البسيطة، المحل يتميز بديكورات معاصرة أنيقة، لاحظنا على طول ندرة البائعين بطريقة غريبة، وكل فين وفين لما نشوف بائع واحد. أول ما دخلنا لاقينا نفسنا فى قسم ملابس الأطفال، واللى بـ يعرض مجموعة متنوعة من الاختيارات الجميلة للأطفال من كل الأعمار، من الرضع لغاية 12 سنة. تحركنا من قسم الأطفال، ووصلنا لقسم الحمامات، وفيه مجموعة من مستلزمات الحمامات القطنية، من البشاكير لممسحة الأرضية. البشاكير موجودة بكل الأحجام (فوط اليد سعرها 110 جنيه وفوط الاستحمام 230 جنيه)، والألوان مافيش أكثر منها بعدد يوصل 42 لون متنوع. بعد كده وصلنا لقسم الرجالى، وفيه كنا وسط مجموعة من الأزياء الراقية من إمضاء عدد كبير من مصممى ديبنهامز الحصريين. بالنسبة للملابس الكاجوال المتينة، عندك ماركة Maine الرائعة، بتقديمها لحاجات منها قمصان كاروهات (400 جنيه) وبنطلونات كاكى (500 جنيه). لو عاوز حاجة أقرب شوية للملابس الرسمية، سمارت كاجوال يعنى، ماركة John Rocha عندها الحل، بـ تقدم حاجات منها جاكيت أسود أنيق (1100 جنيه)، وجاكيت رمادى أقل رسمية شوية فكرته مستوحاه من الكارديجان (770 جنيه). الجاكيتات السابقة ممكن معاها سترات برقبة V 320 جنيه من ماركات أسعارها معقولة شوية زى Thomas Nash. قسم الرجالى كمان يشمل قسم لملابس البيت والغيارات الداخلية. فى الوقت نفسه، قسم الحريمى كان مليان حاجات لكل المناسبات. الماركة الشهيرة Betty Johnson كانت أول حاجة نشوفها ولفتت انتباهنا منها توب شيفون أزرق مخضر (650 جنيه) وبليزر (1100 جنيه). بالنسبة للمقاسات الكبيرة، الاسم البريطانى الشهير إيفانز Evans بـ يقدم مجموعة ضخمة تشمل فستان أبيض برقبة دانتيل (650 جنيه) وكارديجان مريح وطويل (525 جنيه). نروح على ملابس السهرة الخلابة، وهى من تقديم اسم ثانى شهير فى عالم الموضة البريطانية، وهو Coast واللى بـ يقدم مجموعة من الفساتين المثيرة. أجمدهم كان فستان أخضر طويل لامع (2900 جنيه)، مع فستان قصير لونه برتقالى (2250 جنيه). لو المطلوب حاجة كاجوال أكثر، جينزات سكينى من Jasper Conran بـ 700 جنيه، كان شكلها مريح جدًا وعلى الموضة فى نفس الوقت، وهـ تكون رائعة مع شنطة اليد الأسود فى كريمى من Julien Macdonald بـ 800 جنيه. الخريطة الموجودة وسط الجينزات، واللى بـ توضح الفرق بين القصات كانت مفيدة وتعتبر إضافة ممتازة، عجبنا كمان خط Miss Selfridge بقطعه الصغيرة حجمًا، ووقعت أعيننا على بوت أسود (699 جنيه) وحذاء أحمر بكعب عالى (599 جنيه). بعدها جاء الدور على قسم معقول –إن لم يكن عادى– للماكياج والعطور، بـ يعرض منتجات تجميل من أسماء شهيرة منها شانيل، لانكوم ، YSL، Bourjois، كلارينس وجيفنشى وحاجات ثانية. ديبنهامز أكيد يعتبر إضافة مميزة لمشهد التسوق المصرى، ورغم أن بعض القطع أسعارها غالية، لكن واضح جدًا عليهم الجودة العالية مع ماركات كثيرة مش موجودة فى أى مكان ثانى. المحل يعتبر مكان هائل للتسوق لأصحاب الذوق الرفيع، وكمان بديل أفضل من الأسماء البريطانية اللى بدأت موضتها تتراجع زى توب شوب واحد من الإضافات الجديدة لكايرو فيستيفال سيتى وأقرانه.

...

توب شوب: ماركة الملابس البريطانية رجعت مصر فى كايرو فيستيفال سيتى
اصدرت في: 12/11/2014

التسوق فى القاهرة بـ يزيد رقيه مع افتتاح أسماء عالمية كل يوم والثاني. آخر ماركة تزور مدينتنا هى توب شوب - TopShop، واللي كانت قفلت من فترة فرعها فى المعادي بسبب عدم استقرار الأوضاع فى السنين الأخيرة. بمكانه الجديد فى كايرو فيستيفال سيتي، من أول نظرة، قدرنا نشوف أن توب شوب رجع بخطوط أزيائه العصرية المناسبة للأذواق الراقية. من الإضاءة المسلطة على المانيكانات لليافطات المضيئة المميزة لكل قسم من أقسام المحل، لازم تعيش بكل حواسك مع شكل المكان العصري الرائع. الملابس المعروضة بشكل عام تميل للفخامة. الموظفين كانوا ودودين، وفى نفس الوقت حماسهم مش زائد عن اللزوم. بـ يرحبوا بك ويطلبوا منك تنادي عليهم فى حالة احتجت أي مساعدة، ومافيش إصرار على التواجد طوال الوقت، وهي حاجة كانت فعلًا مريحة. بدأنا على طول فى استكشاف قسم الحريمى علشان نشوف بـ يقدموا إيه، والحقيقة أنهم كانوا عارضين عدد من القطع كفيلة بـ تحويلنا نجوم موضة. شد انتباهنا فستان jumpsuit بلون وردى فاتح (949 جنيه) مناسب للمناسبات الرسمية، مع فستان skater مقلم (519 جنيه) وjumper منفوش مريح (579 جنيه) كمان، المحل بـ يقدم خط أزياء مخصوص للأحجام الصغيرة، لكل السيدات الرفيعين. انتقلنا لقسم الأحذية والإكسسوارات، وهناك كان معروض عدد أكبر أكيد هـ يعجب عشاق التسوق فى القاهرة. أكثر حاجات عجبتنا كانت شنطة ظهر صغيرة من الجلد (549 جنيه)، بوت بكعب من الجلد السويدى (1349 جنيه)، شنطه يد قوية (719 جنيه) وأحذية مسطحة شيك (449 جنيه). نفس الكلام بالنسبة لخط الأزياء الرجالى، توب مان. شوفنا هناك بعض المعروضات منها سويت شيرتات (449 جنيه)، فانلة بحمالات (249 جنيه)، الجينز بكل قصاته (480: 600 جنيه) ومجموعة من التي شيرتات (319 جنيه). الرجالة من حقهم يستمتعوا بشوية إكسسوارات، ولا إيه؟ معروض مجموعة آيس كابات من التريكو (129 جنيه) مع كابات عادية (280 جنيه). كلنا بـ نحتاج شخص ينصحنا إيه يتلائم معانا، خصوصًا وقت ما تكونى لوحدك بدون أصدقاء أو والدتك فى رحلتك التسوقية، وهنا جاءت فكرة المحل المميزة فى صورة خدمة التسوق الشخصية الرائعة. بدون أي تكلفة إضافية، خبير الأزياء الخاصة بالمحل هـ يساعدك فى اختيار حاجة مناسبة أو تجميع طقم كامل من الصفر. بشكل عام، توب شوب بـ يقدم تجربة تسوق فريدة من نوعها. البائع كان بـ يساعدنا وفى نفس الوقت كنا على راحتنا، والخدمة الجديدة اللي بـ يقدموها أكيد هـ تغير من شكل اللعبة. الجانب السلبي الوحيد أن كثير من المعروضات أسعارها عالية، وبناءً على خبرتنا، الأسعار أعلى من جودة وتحمل المعروضات.

...

كوتون بول: تي شيرتات قطنية سادة في الزمالك
اصدرت في: 04/09/2014

فيه منتجات بالرغم من أنها بسيطة جدًا وبديهية الوجود إنما صعب تلاقيها. من المنتجات دي التي شيرتات السادة؛ ولو حصل ولاقيتها يا إما موديلاتها محدودة، أو مصنوعة من خامة صناعية غير مناسبة لجو مصر في الصيف. "كوتون بول - Cottonball" في الزمالك بـ يقدم لك مجموعة متنوعة من التي شيرتات السادة المصنوعة من القطن المصري الخالص. المحل ديكوراته الحداثية البسيطة ملائمة جدًا لبساطة المنتج، ده غير أن ألوان حوائطه الرمادية الفاتحة ووحدة العرض البيضاء الموجودة في منتصف المكان ساعدوا على إبراز منتجهم بشكل ممتاز، وخصوصًا أن ألوان التي شيرتات كثيرة ومتنوعة. وبما أن القطن المصري هو سيد الموقف، أصحاب المكان أطلقوا على كل موديل عندهم اسم محافظة من محافظات مصر؛ مثلًا موديل التي شيرت اللي رقبتها على شكل حرف "V" اسمه أسوان. أما دلتا فهو اسم موديل التي شيرت اللي رقبتها شكلها كذا.. وهكذا... الأسماء كثيرة لأن القصّات كثيرة ومختلفة، سواء لطول الكم أو التي شيرت نفسه أو قصّة الرقبة. بالرغم من تنوع الموديلات الرجالي وتعددها، إلا أن نصيب الأسد في التنوع للقسم الحريمي -طبيعي جدًا، الستات تفاصيلهم كثيرة- سواء من حيث الألوان والقصات اللي ممكن تساعد البنات اللي بـ يحبوا الـ Layering، يعني يلبسوا كذا حاجة فوق بعض. ده غير أن الألوان رائعة، عجبنا منها أخضر ليموني شبه نيون بس مش مزعج كعادة الألوان النيون، والوردي الزاهي. كوتون بول بـ يعرض كمان مجموعة محدودة من الإكسسوارات البسيطة المصنوعة يدويًا، المجموعة اللي شفناها كانت للعرض فقط لأن المكان لسه فاتح جديد. توقعنا أن الأسعار هـ تكون مبالغ فيها -بما أننا في الزمالك- ولكن الأسعار مناسبة جدًا وموحدة للحريمي والرجالي: اللي بكم طويل (135 جنيه)، نص كم (125 جنيه) والكَت (99 جنيه)، ده غير عرضهم الدائم أنك لو اشتريت 3 سعر القطعة هـ يكون (100 جنيه). بالرغم من بساطة فكرة التي شيرتات السادة، إلا أنها مناسبة جدًا للناس اللي بـ تفضل الملابس العملية والمريحة، حتى كمان للجيم والقعدة على الشاطئ.

...

جس: ماركة الإكسسوارات المميزة فى معادى سيتى سنتر
اصدرت في: 12/07/2014

مع زحف عدد كبير من الأسماء المشهورة على مشهد التسوق فى القاهرة يوم بعد يوم، أحيانًا ماركات أكثر شهرة بـ تغطى علي "جس – Guess". بعد افتتاحه لأول مرة فى مدينة النجوم بيفرلى هيلز فى أمريكا، شهرة جس سببها فى الأول كانت تصميماته المميزة من الجينزات. من ساعتها، قدر الاسم الشهير يتوسع فى إنتاج العطور، والساعات، والملابس والإكسسوارات رجالى وحريمى. مع امتلاكه لعدد من الفروع فى العاصمة، وأوكازيونات كثيرة فى كل المواسم، قررنا نروح فرعهم فى معادى سيتى سنتر. مكانه مميز أمام بوابة كارفور، بواجهة زجاجية حول ركن، معروض فيها مجموعة من شنط اليد والساعات يحتلوا الواجهة الزجاجية اللامعة. الأحسن أنك تتفرج من الخارج، ثلاث كبائن من الزجاج فيهم ساعات حريمى ورجالى، منهم حاجات أحلى من حاجات. المعروضات مختلفة، منها الأنيق الجذاب، ومنها الروش -ومنهم حاجات عليها قطع ألماس تقليد– ولاحظنا أسعار تزيد على 1500 جنيه. ساعة قوية ذهبى فى أسود لفتت انتباهنا سعرها كان 2160 جنيه. مع هيكل العرض الضعيف، ممكن تشعر أن المجموعة المعروضة مش مريحة؛ فى وجود الموظف الهادئ، جس يعتبر مكان مناسب للفرجة براحتك. صحيح أن موجود ساعات رجالى، باقى المحل بـ يركز على الحريمى، بس مافيش أى ملابس، إكسسوارات فقط. وقت زيارتنا، كان معلق على حائطين مجموعة شنط يد عليهم تخفيض، أما المجموعة الجديدة كانت موجودة برضه؛ على موضة "جس" الخاصة، معظم المعروضات يزينها طباعة على شكل حرف G الشهير، سحّاب على شكل حرف G، وطبعًا فيهم درجة من البريق واللمعان. المحافظ موجود منها كل الأشكال والأحجام، أسعارها تبدأ من حوالى 400 جنيه، شنط كلاتش بحوالى 700 جنيه، شنط سفر وكتف تبدأ من 1500 جنيه. من الأوكازيون، لاحظنا شنطة يد بأبزيم لونها صخرى من مجموعة باليرمو سعرها نزل من 1000 جنيه لغاية 732 جنيه. معروض كمان مجموعة صغيرة من الأحذية خارج الأوكازيون، منها أحذية باليرينا سوداء وعنابى، وزوج حذاء رمادى من الجلد السويدى (700 جنيه) كانوا أبرز المعروض من القطع اللى عليها إقبال. مجموعة أكبر من الأحذية داخلة فى الأوكازيون منها شباشب شيك، وصنادل وأحذية بكعب، كلهم عليهم 50% خصم. أسعار الحلىّ تبدأ من 200 جنيه، مع سلسلة مفاتيح روشة (165 جنيه)، وعطور، وأحزمة جلد وجلد ماعز (+400 جنيه) كلهم متوفرين. رغم أنه غير مناسب لكل الأذواق، لكل السيدات المهتمات بالماركات، جس أسعاره معقولة عن كثير من الماركات الثانية فى القاهرة. فرع المعادى أثبت أنه يملك تشكيلة كبيرة من الإكسسوارات، خصوصًا شنط اليد، والساعات والأحذية.

...

شاهد المزيد
مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح