سوبر ماركت تسوق in Cairo, Egypt

تسوق

أوليو: مجمدات لبنانية وعالمية فى المهندسين
اصدرت في: 20/09/2014

في الفترة الأخيرة أكثر الزوجات خصوصًا الموظفات بقوا بـ يعتمدوا على الأطعمة المجمدة زي السوسيس والبرجر والبانيه لأنها وجبات سريعة التحضير خصوصًا بعد يوم مرهق في العمل وكمان لو فيه ضيوف فجأة بـ تكون الأطعمة دى شيء منقذ. وبما أن فريق العمل في كايرو 360 فيه متزوجات فبالطبع صادفنا "أوليو ماركت – Olio Market" للأطعمة اللبنانية المجمدة اللى موجود أمام مستشفى الصفا بالمهندسين، المكان مش كبير قوى لكن فيه منتجات كثيرة جدًا ومتنوعة وكلها لبنانية طبعًا، ما جربناهاش كلها بس جربنا أصناف كثير وكانت جيدة ولما تم طبخها كانت كأنها طازجة مش مجمدة، من الأصناف اللى جربناها: سبرينج رولز الخضار (40 جنيه) وده كان طعمه حلو جدًا ولذيذ بالنسبة للأطفال لأنهم مش بـ يأكلوا الخضار بسهولة، وفيه برينج رولز موتزاريلا وسبرينج رولز هوت دوج، وجربنا كمان سمبوسك اللحمة وكانت لطيفة جدًا وكمان سمبوسك ميكس جبنة (32 جنيه للكيلو) وجربنا كبة الخضار وكبة البطاطس وكروكيت الفراخ وفيه أصناف أخرى كثيرة. من مميزات "أوليو" أن كل أصنافه خفيفة على المعدة وجذابة بالنسبة للأطفال خصوصًا اللى مش بـ يأكلوا الخضار أو اللحوم، وفيه كمان وجبات تنفع للمدارس زى البطاطس الكروكيت، أما من ناحية الأسعار فـ نقدر نقول أنها معقولة، مافيش توفير فيها عن شركات ثانية، لكن أوليو بـ يعمل عروض كل شهر بس مش لصنف معين لمجموعة أصناف مع بعض، وبـ يكون فيه خصم على المجموعة كلها مش على صنف واحد، يعنى مثلاً فيه عرض على فيليه كريسبي، وممبار أرز، وكفتة أرز، وكبة ميني، وسمبوسك لحمة، وسمبوسك جبنة (115 جنيه) بس طبعًا الأوزان نصف كيلو وربع كيلو، وأحيانًا بـ تكون العروض دى مفيدة لكن مشكلتها أن مش شرط أى شخص يكون بـ يحب الأصناف دى كلها مع بعض، ونادرًا لما بـ يكون فيه عروض على أصناف مفردة لكن ممكن العروض دى تكون مفيدة في العزومات أو الرحلات. مش شرط أن أنت تروح فروع أوليو علشان تشترى، ممكن تتصل بالخط الساخن 16905 وممكن كمان تتعرف على العروض والأصناف من خلال صفحتهم على الفيسبوك، وكمان ممكن تطلب الأوردر من خلال الصفحة. وللناس النباتيين فيه منتجات نباتية في أوليو زى سمبوسك الخضار ومحشى ورق عنب بالزيت وكروكيت البطاطس وحلقات البصل المقلية وغيرها. وكل فترة أوليو بـ يعمل منتج جديد خاص به زى "سفيحة الجبنة" وده منتج مخبوز بشكل خاص وبداخله ميكس من أنواع مختلفة من الجبن مع الفلفل والزيتون. الاختلاف اللى ممكن نلاقيه في أوليو عن أي منتجات ثانية هى أنها مش لبنانية بالاسم فقط الطعم كمان لبنانى، وكمان دائمًا عنده جديد بـ يشدنا أننا نجربه.

...

صني سوبر ماركت: والله وبعودة في الزمالك
اصدرت في: 22/06/2014

بقى لنا كثير ما كتبناش عن سوبر ماركت، وبالذات في الزمالك؛ يمكن لأنها من المناطق اللي مش ناقصها سوبر ماركت كبير ثاني يفتح، وخصوصًا أن فيه أسماء كبيرة موجودة زي ألفا ماركت ومترو ماركت. إلا أن "صني – Sunny" –زي ما وهو واضح من عنوان المقال- كان فاتح في الزمالك من زمان، حتي قبل أيًا من الاسمين اللي ذكرناهم. بس عارف أنت نوعية المحلات اللي بـ تنزل عليها لعنة غريبة، فتفتح وتقفل عشرات المرات، وكل مرة لسبب مختلف... "صني" كان من نوعية المحلات دي. من سنة بدأت التجديدات، وبالفعل فتح السنة دي، بعد ما كان مغلق لمدة 10 سنين على أقل تقدير. وبما أننا عاصرنا المكان قبل الدراما اللي حكينا عنها، فالتجديدات والشكل الحالي للمكان فكرنا بالذي مضى، المساحة الواسعة نسبيًا -لمحل من دور واحد- مستغلة بشكل عملي، ولكن أيضًا بشكل مبالغ فيه. كمية المعروضات رهيبة، لدرجة أننا أخذنا وقت علشان نهدأ كده ونعرف إحنا فين بالضبط... ده كده وإحنا داخلين نأخذ فكرة، تخيل لو هـ نشتري؟ حقيقى أن الواحد يبقى حافظ أماكن الحاجة في السوبر ماركت اللي متعود عليها دي نعمة! على يمينك وأنت داخل قسم الخضروات والفاكهة. والحمد لله أنهم ثلاجتين صغيرين علشان واضح جدًا من شكل المعروضات أن السحب مش قوي. بعدهم أرفف القهوة والكاكاو سريع التحضير بأنواعهم، الجميل أن فيه أنواع لم يُر مثلها في البلاد... مستوردة يعني. في منتصف المكان موجود ثلاجات الجبن واللحوم الباردة، وزي أي سوبر ماركت الأنواع متوفرة وبـ يتم تقطيعها حسب الرغبة. وبما أننا بـ نتكلم عن الثلاجات، فيه ثلاجة ثانية كبيرة كلها أنواع المشروبات والعصائر اللي خلقها ربنا، ومجموعة من الوجبات سريعة التحضير والساندويتشات الخفيفة، اللي مش محتاجة سوى تسخين سريع، من ماركة اسمها "مرحبا"، بس شكلهم ظريف. بديهي جدًا أن أي سوبر ماركت كبيرة يبقى فيها منظفات وشامبوهات، إلخ، إلخ، إلخ... إلا أن وجود قسم للأدوات المنزلية حتى ولو صغير بقى حاجة مهمة، ده لأن أحيانًا الواحد مننا بـ يحتاج مج، معلقة، طاسة تقضي الغرض وتسعف... إزاي؟ ما نعرفش، بس بـ تسعف! أما المبهج فعلًا هو وجود سوشي بار تابع لـ جو سوشي – Jo Sushi، وله منيو مخصوص فيه رقم سريع للتوصيل... المنيو كمان مكتوب بالإنجليزية واليابانية، بالرغم من أنهم ممكن يجمعوا أي حروف آسيوية جانب بعضها، وإحنا مش هـ نحس بحاجة، بس ما علينا... الناس دي ما بـ تهزرش برضه. وبما أن شراء طلبات البيت عادة مهمة بـ تقوم بها ست البيت، وأحيانًا مزاج شخصي عند ندرة من الرجال، فموجود كوفي شوب صغير لكل اللي مجبرين أنهم ينزلوا نزولة طلبات البيت، فممكن تأخذ قهوتك عقبال ما البيه/ المدام يقضي/ تقضي الطلبات. اللي لفت نظرنا في المكان أن عربيات الأطفال –واللي بـ تعتبر وسيلة إلهاء ذهبية لأي أب أو أم- كبيرة بالنسبة لحجم المكان... فأنت وارد تدهس طفل اللي جانبك وأنت مش واخد بالك.

...

الرفاعي: جزارة وتجهيز لحوم بشكل مبتكر في عابدين
اصدرت في: 25/05/2014

مش فاكرين لو كنا كتبنا عن محلات جزارة قبل كدة على صفحات كايرو 360 لكن لاقينا أنه من الضروري نتكلم على المحل اللي اكتشفناه من فترة وبـ يعمل خدمة مميزة، مش مجرد جزارة وثلاجة لحوم وقورمة وساطور، لكن بـ يجهز أكلات ولحوم تأخذها على التسوية مباشرة، فكرة حلوة وممكن تعمم، بس «الرفاعي» سبق الكل وعمل الدعاية اللازمة وأصبح من أشهر محلات الجزارة اللي بـ تعمل الموضوع ده. جزارة «الرفاعي» موجود في بداية شارع الشيخ ريحان اللي فيه أحد أضلاع قصر عابدين العريق، بجواره عدد من محلات اكسسوارات السيارات والأدوات المنزلية، لكن سهل تشوفه بيافطته المضيئة والكراسي والترابيزات اللي راصصها قدام المحل، ده علشان لو حبيت تأكل عنده. هو صحيح مش مطعم بالمعنى المفهوم، لكن ممكن تقعد وتطلب حواوشي، الأكلة الوحيدة اللي بـ يحضرها ساخنة وبـ يعمل شوية سلاطات ومخللات. كل أنواع اللحوم موجودة، البقري الكندوز والبتلو والجملي والضاني، كبدة وممبار وغيره، مافيش أرانب أو طيور، لحوم وبس، أسعار الكيلو هي العادية لكن أعلى شوية من اللي هـ تلاقيها عند أي جزار في منطقة شعبية، البتلو بـ 70 جنيه والكندوز بـ 60 جنيه. وطبعًا بـ تنقي الحتة اللي انت عايز منها في الذبيحة، والخدمة هنا جيدة سريعة حسب ما جربنا أكثر من مرة، يعني ما تتوقعش أنك ممكن يتضحك عليك أو تأخذ حاجة مش زي ما أنت عايز، يعني حتى لو خبرتك قليلة في شراء اللحوم، هنا هم هـ يعملوا لك اللازم. نيجي بقى للجزء المتخصص عند «الرفاعي» وهو اللحوم الجاهزة للتسوية، ممكن تشتري كيلو كفتة متبلة وجاهزة على للسيخ على طريقة الحاتي (60 جنيه) والممبار النظيف على الحشو مباشرة بـ 23 جنيه، ولو مسلوق هـ يبقى بـ 30 جنيه. فيه كبيبة شامي جاهزة للقلي بـ يبقى عبارة عن طبق نصف كيلو بـ 24 جنيه، وكذلك السمبوسك باللحم بنفس السعر. السجق على طريقة محلات الكباب بـ يتباع جاهز بـ 35 جنيه، وفيه بطاطس محشية لحم وكفتة بطاطس بـ 17 جنيه الطبق النصف كيلو. وطبق نصف كيلو كفتة أرز بـ 27 جنيه، وأخيرًا فيه ورق عنب محشي وجاهز للتسوية طبق نصف كيلو بـ 16 جنيه. الحواوشي هو الأكلة الوحيدة اللي تأكلها جاهزة هنا، مش أي حواوشي كمان، حواوشي بالخضروات والجبنة السايحة أو حواوشي بالسجق، لحم بلدي من منتجات المحل وسهل أنك تعرف قد إيه هو فريش ونظيف بمجرد ما تشم الرائحة، قبل وبعد التسوية، الرغيف بـ 7 و بـ 9 وبـ 11 جنيه حسب الحجم والإضافات، والطعم خرافي، مش هـ نبقى بـ نبالغ لو قلنا أنه أحسن حواوشي شعبي في مصر، بـ يتعمل مخدوم ولا أروع، وممكن كمان تأخذه نصف تسوية وتكمل عليه في الميكروويف أو الفرن في البيت، ينفع تعمل به عزومة عشاء سريعة مش شوية بطاطس محمرة وسلاطات. الحقيقة «الرفاعي» عجبنا جدًا بعد ما رشحه لنا أحد الأصدقاء من سكان المنطقة، الجزارة العريقة دي قررت تعمل خدمة من نوع جديد كان لازم نسلط عليها الضوء في كايرو 360، والميزة المهمة كمان أنك تقدر تحدد طلبك بالتليفون وتروح تأخذه في ميعاد معين، لأنه بـ يتم تجهيزه فريش وحسب رغبتك في الإضافات وغيره. جربوا الرفاعي وعلى ضمانتنا.

...

فتح الله ماركت: وفر فى العملة واشتري بسعر الجملة في مدينة نصر
اصدرت في: 09/12/2013

فتح الله ماركت فرع صلاح سالم عنوانه ما يتوهش أبدًا موجود فى عمارات العبور بصلاح سالم، لما هـ تروحوا ممكن ما تأخذوش وقت فى الطريق قد ما هـ تأخذوا وقت فى التسوق داخل الماركت، وده لأن الأسعار والعروض مغرية جدًا للشراء بالنسبة لأى ست بيت. فتح الله ماركت بـ يتكون من عدة أقسام، فى كل قسم بـ يحتوى على سلع معينة وهـ يوفر لنا وقت كبير جدًا لأننا هـ نلاقى فيه كل حاجة وأسعاره هـ تشجعنا أننا نشترى كميات كبيرة بدل ما ننزل السوق كل يوم، كمان هـ نعرف من العاملين فى الماركت إزاى نحفظ الأطعمة والخضروات لفترات كبيرة وده هـ يساعدنا أننا نستغنى عن الأكل الجاهز ودائمًا كل ست بيت هـ تكون مستعدة لأى عزومة مفاجأة لأن ثلاجتها مليانة وخزين بيتها متوفر. أول ما ندخل هـ يقابلنا قسم المعلبات، كل الجبن والألبان والعصائر وبعدها قسم السلع التموينية زى المكرونات والأرز والسكر، فيه كل الأنواع حتى الأرز الدايت والمكرونة الدايت ومكرونات الأطفال الملونة، يليها قسم خاص بالمنتجات الورقية زى المناديل وفوط المطبخ وحفاضات الأطفال، وبعد كده هـ تلاقوا قسم للجبن والألبان اللى بـ تباع بالكيلو وكمان قسم كبير للحوم الطازجة والمغلفة زى منتجات البانيه الجاهز والبرجر والكفتة وكمان فيه قسم للأسماك الطازجة. وبعيد شوية هـ نلاقى قسم للأدوات الكهربائية زى المكانس والدفايات وحتى الأدوات الكهربائية الثقيلة. فتح الله ماركت بـ يرفع شعار "وفر فى العملة واشترى بسعر الجملة"، ده مش مجرد شعار دى حقيقة فعلاً لأن الأسعار أسعار جملة وكمان كل شهر فيه عروض وهدايا وفى المناسبات العروض بـ تكون مذهلة، يعنى مثلاً مع اقتراب رأس السنة فتح الله عامل عروض هائلة هـ تلاقوا مثلاً باكيت أرز من النوع الممتاز وزن خمسة كيلو بـ "21 جنيه" وفيه كمان فخدة ضانى سعر الكيلو "34 جنيه"، وممكن العاملين فى قسم اللحوم يقسموا لك الفخدة حسب ما أنت عاوزة، وفيه عروض على مساحيق الغسيل زي تايد أوتوماتيك "48 جنيه" بدلاً من 58 جنيه للباكيت الـ 3 كيلو وكمان فيه كيلو هدية، وعرض على الشامبوهات (بانتين شامبو + بلسم بـ "29 جنيه" بدلاً من "37 جنيه")، وطبعًا علشان الشتاء فيه عروض على الدفايات: دفاية 2 شمعة بـ "77 جنيه"، وطبعًا فيه شجر كريسماس وبأسعار وأحجام متفاوتة، وفيه كمان عروض كثيرة ومغرية فى المفروشات، فيه لحاف فايبر بخامات عالية الجودة بـ "99 جنيه"، كمان عروض على الكيك والتورتات المعلبة علشان نعمل أحلى كيك فى رأس السنة. فتح الله ماركت بـ يهتم بوقت العملاء جدًا علشان كده ممكن بـ يوفر العروض من خلال الإنترنت يعنى ممكن نستفيد من العروض ونطلب طلبات الشهر كله بالتليفون بعد ما نختار اللى إحنا عاوزينه من على صفحة فتح الله ماركت على الفيسبوك. ولو إحنا حابين نتسوق المكان مناسب تقريبًا لناس كثير وكمان فيه مكان نقدر نركن فيه لو معانا عربية وساعتها ما تشيلش هم الشنط الكثير. فى فتح الله ماركت الأسعار صحيح بسعر الجملة والعروض جيدة وبـ توفر لكن ممكن جدًا وإحنا بـ نحاسب على الكاشير نلاقى الفاتورة بمبلغ كبير جدًا وده لأن الأسعار مغرية لدرجة ممكن تخلينا نأخذ كل شيء رخيص بغض النظر عن احتياجاتنا علشان كده قبل ما نروح من الأفضل أننا نحدد طلباتنا علشان ما نتفاجئش بالفاتورة.

...

ألفا ماركت: المحتاجة هـ تلاقي فيه كل حاجة فى الزمالك
اصدرت في: 13/11/2013

"ألفا ماركت" فرع الزمالك موجود بالضبط فى 3 شارع الملك الأفضل، الزمالك منطقة هادئة جدًا وبـ يسكن فيها أجانب كثير، وألفا بالنسبة لهم حاجة عظيمة لأن فيه كل احتياجاتهم، لكن فى نفس الوقت مكانه مناسب جدًا لسكان الكيت كات وأبو العلا، وهو مش مجرد ماركت عادى لأنه ببساطة فيه كل شىء يخص البيت والأطفال، من أول الملح لغاية أجهزة المطبخ وإكسسوار البيت ولوازم أطفال من أول البامبرز لغاية البلاي ستيشن ومايوهات البحر. بـ يتكون ألفا ماركت من ثلاثة طوابق على مساحة كبيرة، أول ما بـ ندخل من الباب بـ نلاقى 2 كاشير علشان ما يبقاش فيه زحمة والناس بـ تحاسب على مشترواتها وبعد أمتار قليلة هـ نلاقى قسم الأغذية مقسم لعدة أركان ثانية، فهـ نلاقى فى الوش ركن خاص بالسلع التموينية زى المكرونة والسكر والأرز وهـ تلاقى كل الأنواع اللى تتخيلها وأنواع ممكن تكون جديدة وما تعرفهاش وكل حاجة فيه منها العادي والدايت. جنب السلع دى هـ تلاقي ركن المعلبات وبـ يضم كل المعلبات حلو وحادق وسلاطات وبرضه هـ تلاقي كل الأنواع وبعد كده هـ تلاقي ركن الجبن والألبان، وفى الركن ده ممكن تقف كثير لأنك هـ تلاقي كل الحاجات المميزة من الجبن والألبان واللى مش بـ نلاقيها بسهولة زى السمن البلدى والجبن القريش والجبن الرايب وبعد كده هـ نلاقى ركن المخبوزات، وفى الركن ده ممكن تأكل مخبوزات طازجة وسخنة وممكن تطلب أى منها يتعمل لك وأنت واقف لأن فيه فرن وبـ يعملوا كمان كل أنواع القراقيش والكحك والبيتي فور وممكن كمان يعملوا لك بيتزا، وكمان هـ تلاقي كل أنواع الخبز العادي والدايت. بعد كده هـ تلاقي ركن اللحوم، وفيه هـ تلاقي كل أنواع اللحوم من أول الضاني لغاية لحم النعام، وكمان "ألفا ماركت" بـ تعمل كل شهر عروض معينة على اللحوم ودي حاجة مهمة جدًا للسيدات لأن التوفير طبعًا مهم جدًا بالنسبة لهم، وبعد كده هـ تلاقى ركن الخضروات وفى الركن ده هـ تلاقي كل الخضروات المجمدة حتى الثوم هـ تلاقيه. على فكرة إحنا لسه فى الدور الأول.. هـ تلاقي جنب قسم الخضروات قسم الأسماك بعضها فريش وبعضها مجمدة، بعد كده هـ نلاقي ركن معزول شوية وده فيه الكتب والمجلات الخاصة بالكبار و الأطفال. بعد كده لما نطلع الدور الثانى هـ نلاقي جنب السلم ركن خاص بأدوات الكومبيوتر وفيه تقريبًا كل أنواع الكمبيوتر واللاب توب وإكسسوارتهم وقطع الغيار كمان. بعد كده هـ نلاقى ركن العناية الشخصية، وفى الركن ده كل أنواع الكريمات والشامبوهات والزيوت العالمية ودى كمان بـ يبقى عليها عروض كل شهر يعني ممكن نوع كريم بمبلغ وقدره تشتريه من "ألفا" بسعر مميز ودي حاجة تعجب البنات والسيدات جدًا. وبعد كده هـ نلاقي قسم أدوات المطبخ فيه كل شيء يخصه حتى الأدوات الكهربائية وده بـ يبقى فيه عروض هائلة جدًا خاصة فى عيد الأم. بعد كده ركن مهم جدًا خاصة (للمخطوبين) وهو ركن الهدايا وفيه بقى أشكال مختلفة وبصراحة فيه حاجات قيمة جدًا يعنى ممكن تلاقى حاجات هاند ميد بالخشب أو بالنحاس و الحاجات دى الواحد كان بـ يدور عليها كثير ولما نلاقيها بـ تبقى أسعارها غالية جدًا لكن فى "ألفا ماركت" هـ نلاقى الحاجات دي بأسعار حلوة مقارنة بأماكن ثانية. وفيه ركن كمان حلو جدًا و هو ركن "ويدنج ليست" وفى الركن ده الأدوات اللى ممكن تساعد أى بنت فى مطبخها زى الشوايات والساندويتش ميكر وحاجات ثانية هـ تعرفوها لما تروحوا. وجنبه ركن "حديثى الولادة" وفيه كل مستلزمات البيبي. وبعد كده فيه ركن لأكل الحيوانات زى الكلاب والقطط، وجنبه ركن المنظفات وده كمان بـ يبقى عليه عروض كل شهر. ولما نطلع الدور الثالث هـ نلاقى فى الوش على طول ركن خاص للأجهزة الرياضية وده قسم كبير بـ يضم أنواع كثيرة وبجواره ركن خاص بالملابس الرياضية والدراجات من أول دراجات الأطفال لغاية دراجات السباق. ومش هـ نبعد كثير وهـ نلاقى ركن خاص بأدوات الغوص وأدوات الصيد ودى حاجة حلوة لأن مش دائمًا بـ نلاقيها. وبعد كده هـ نلاقى ركن خاص بلعب الأطفال وفيه هـ نلاقى مستويات مختلفة من اللعب وأسعارها كمان مختلفة، إلى جانب ركن مستلزمات الحفلات فيه كل شيء ممكن نحتاجه فى الحفلات وده بـ يوفر علينا وقت كبير لو إحنا عندنا حفلة. ممكن اللى يعرف أن "ألفا" فى الزمالك يتخيل أن الأسعار هـ تكون عالية، لكن فى الحقيقة الأسعار هناك تناسب طبقات كثير لأن فيه حاجات غالية وحاجات ثانية أرخص، كمان "ألفا ماركت" بـ يعمل عروض وتخفيضات كل شهر يعنى ممكن تشترى منه حاجات أرخص من بره.

...

فافوريتو: أكل وتسوق راقى فى القاهرة الجديدة
اصدرت في: 20/10/2013

 "فافوريتو" مطعم ومحل راقى وسط منطقة القاهرة الجديدة الراقية، يحيطه أشكال كثير من المتعة والأفكار المثيرة للاهتمام. مكانه مستخبى وسط مول قطامية داون تاون غير المكتمل، وتحديدًا فى الدور الأرضى، أما منطقة الأكل فـ تشمل الدور الثانى وتمتد للحديقة الأمامية، ويزينها سور خشبى ونجيل صناعى. بالليل وقت زيارتنا لهم، كانوا بـ يقدموا غناء حى من مطرب لزبائنهم فى الحديقة على نغمات أجنبية شهيرة. الأثاث الخشبى الأبيض خلق إحساس من التحضر الأنيق، لكنه كان كاجوال زيادة شوية عن منطقة الأكل فى الدور الأول بطابعها الرسمي. ومع وجود السلالم فى مكان مخفي آخر المحل خالص، رواد المحل يقدروا يتفرجوا على المجموعة المنتقاة من المنتجات المحلية والمستوردة. سبورات مُعلقة بـ توضح أقسام مختلفة من البهارات، واللحوم الباردة، والفواكة المجففة، اللحوم الحمراء والبيضاء، الفواكة الطازجة والخضروات، وأكثر. بجانب الأقسام اللى فاتت، فيه كمان ركن خاص للساندويتشات والسلاطات (24: 40 جنيه) وفرن لعمل الكب كيكس (15 جنيه)، كيكات، خبز ومعجنات للأكل داخل المحل أو تيك أواى. طاولات عرض الفواكة المجففة (100: 240 جنيه) والمكسرات (150: 350 جنيه/ للكيلو) فعلاً مبهرة، بمنتجات معتادة وأخرى غير تقليدية؛ مقرمشات حارة، وموز مجفف، وحلقات أناناس وشرائح مانجو كلهم مثيرين للانتباه. عندهم كمان كميات كبيرة معبئة جاهزة متاحة للبيع. لاحظنا كمان مجموعة من الماركات العالمية بداية من توابل Colman لغاية مكونات طبخ صينية أصلية. المثير أن المحل بـ يقدم مجموعة أطعمة خالية من الجلوتين منها حبوب شوفان، دقيق، مسحوق بروتين، ولبن صويا أو أرز. الأسعار لسوء الحظ عرضها غير واضح على معظم المنتجات لكن فى المقابل موظفين المبيعات ودودين ومتعاونين. نكمل للدور الأول، اللى شد انتباهنا بديكوارته الأنيقة اللى تجمع بين التطور مع الشكل الكلاسيكى. مزيج بين اللونين الأبيض والرمادى مع الكراسى البنفسجية والحائط بلونه الأسود المخملى، وفى نفس الوقت زجاج بلورى منقوش بـ يسمح برؤية نسبية على المطبخ. كمان بـ يقدموا كوكتيلات طازجة ممتازة (16: 28 جنيه) ومشروبات غازية (10: 26 جنيه). الموهيتو (18 جنيه) كان مليان ثلج مجروش بزيادة، مع نكهة ليمون لاذعة لكنها منعشة أكيد. كوكتيل تروبيكال جرين (24 جنيه) كان لذيذ جدًا، مكون من خليط مدهش من الأفوكادو، بطيخ وكيوى لذيذ، مع شرائح ناضجة من الكيوى. منيو الأكل كبيرة صحيح لكن بعيدة كل البعد عن الركاكة، مع مجموعة من المقبلات (36: 38 جنيه)، سلاطات (38: 54 جنيه)، مقبلات إيطاليةantipastis (48: 68 جنيه)، مكرونات (48: 72 جنيه) وأطباق رئيسية تشمل لحوم، وفراخ وأسماك (62: 350 جنيه). نبدأ؟ ماشى؛ طلبنا سلاطة طماطم بالموتزاريلا (46 جنيه) مقسمة بالتساوى بين الصنفين. رغم أن كمية صلصة البلسميك كانت قليلة شوية، شرائح الطماطم الباردة مع قطع الموتزاريلا البقرى كانت مغطاة بصلصة ريحان (بسيتو) طازجة. بالنسبة للأطباق الرئيسية، وكبديل لفكرة الأطباق ألا كارت، كل زبون له حرية اختيار نوع لحم من الموجود. الجرسون بعدها قدم اقتراحاته، ورغم أن الأحسن بالنسبة للشرائح أنها تكون رفيعة، طلبنا قطعتين ستيك لحم (36.04 جنيه) معاهم إضافتين جانبيين من الخضروات والبطاطس المحمرة (30 جنيه). زى ما توقعنا اللحم كان طعمه لذيذ وصعب المضغ شوية، لكن من ناحية السعر فأكيد الموضوع يستاهل وكمان المرقة الغنية أضافت طعم مميز. طلبنا كمان سلامون فيليه (120 جنيه) اللى كان أكيد أجمد من الاثنين؛ تتبيلة البهارات الخاصة بلحم السلامون كانت قصة لوحدها، فيها طعم خفيف من زيت الليمون الحار واللحم يكون طرى. تزيين شكل الأكل تم بمجموعة لذيذة من الأفوكادو وطماطم صغيرة مسكرة، أما البطاطس المهروسة بالزبدة فكان عليها طبقة من السبانخ لذيذة. الجرسونات فى الوقت بين نهاية الأطباق الرئيسية ووقت طلب الحلو اختفوا فجأة، وفى النهاية طلبنا طبق كريم بروليه (25.50 جنيه)، ووصل فورًا. الطبق الغويط كان مليان بالحلوى بملمسها المخملى، الشبيهة بطعم الزبادى بالفانيليا اللطيف، وكانت دافئة من فوق فقط على طبقة محروقة رقيقة من السكر. فافوريتو بـ يقدم تجربة أكل/ تسوق أنيقة مريحة مع أكلات لذيذة من الطباخين المتمكنين. مع مجموعة متنوعة من الاختيارات والأسعار، فيه حاجة تناسب كل فرد، وإن كان المطعم مناسب أكثر لمناسبات الأكل العادية، غذاء سريع أو تطلب مخبوزات سريعة فى سكتك.

...

سوبر ماركت الهوارى: تسوق مع متعة التوفير في المهندسين
اصدرت في: 27/05/2013

فى منطقة زى ميدان لبنان مكدسة بالسكان ومحاطة بمستويات اجتماعية مختلفة لازم يكون فيه عدد كبير من السوبر ماركت علشان تلبى احتياجات السكان، وفى نفس الوقت تناسب مستويات الطبقات المختلفة اللى ساكنة فى المنطقة وفى المناطق المحيطة زى أرض اللواء وبولاق وغيرها، وبالفعل فيه سوبر ماركت كثير فى المنطقة لكن "الهوارى" له شعبية كبيرة بين سكان المنطقة والمناطق المحيطة. سوبر ماركت "الهوارى" بـ يتكون من طابقين، فى الطابق الأرضى هـ نلاقى قسم خاص بجميع أنواع المنظفات وقسم ثانى خاص بجميع السلع التموينية من جميع الشركات وكمان ركن خاص لجميع الأعشاب، يعنى ممكن نقول عطارة بس بشكل مختلف شوية ومكتب للإدارة ومكتب لخدمة العملاء. فى الطابق الثانى قسم كبير للفاكهة والخضروات، وفى القسم ده هـ تلاقى كل أنواع الخضار والفاكهة الموسمية و غير الموسمية، وبالجوار فيه قسم كبير لكل أنواع الدواجن واللحوم وكمان جزء خاص ببعض المأكولات الشامية والخليجية محفوظة أو مجففة. وقسم آخر مجاور للحلويات الشرقية والغربية وكمان الحلويات المحفوظة، وفيه قسم خاص للعطور وأدوات التجميل، وفى القسم ده فيه آنسات موجودة علشان تساعد المتسوقين فى اختيار أى شيء وهـ تلاقى كمان ماركات كثير عالمية ومحلية. وجنب قسم التجميل فيه قسم المنتجات الورقية اللى بـ يحتاجها البيت والمطبخ، وجنب الركن ده فيه ركن خاص بمستلزمات الأطفال زى البامبرز وعطور وشامبوهات الأطفال وبعض المنتجات البلاستيكية الخاصة بالأطفال. بعد ما عرفنا أنواع المنتجات هـ نرجع نوضح ليه سوبر ماركت الهوارى له شعبية كبيرة، وده لأنه بـ يقدم كل شهر عروض وتخفيضات مغرية جدًا وده بـ يناسب ناس كثير خصوصًا الموظفين لأن العروض بـ توفر كثير عليهم خصوصًا فى السلع الأساسية اللى لا يمكن الاستغناء عنها. وغير العروض الشهرية فيه عروض خاصة بالمواسم والأعياد بـ تكون مغرية أكثر خصوصًا على السلع الأكثر مبيعًا فى المواسم. وعلشان راحة العملاء سوبر ماركت الهوارى عامل صفحة على الفيسبوك بـ يعلن فيها عن العروض اللى بـ يقدمها كل شهر والعميل ممكن يختار السلع اللى هو عاوزها من البيت ويطلبها بالتليفون ومش بس كده ممكن كمان يرجع الطلب بالتليفون. وعلشان راحة العملاء فيه مندوبين من بعض الشركات اللى منتجاتها موجودة علشان يتلقوا أى شكاوى أو ملاحظات على المنتج مباشرة من العميل وده مهم لتطوير المنتج أول بأول. بالرغم أن سوبر ماركت الهوارى بـ يوفر قدر كبير جدًا من السلع والمنتجات اللى بـ يحتاجها أى بيت مصرى إلا أن مساحته مش كبيرة بما يتناسب مع كم المنتجات اللى بـ يعرضها وده ممكن يسبب زحام داخل الماركت خصوصًا فى المناسبات. وكمان الجراج المجاور للهوارى صغير وبالتالى لو معاك عربية الركنة ممكن تكون صعبة. لكن فى النهاية الخدمات اللى بـ يقدمها للمستهلك فيها قدر كبير من المراعاة والراحة.

...

أورجانيك أند مور: عناصر غذائية صحية فى الزمالك
اصدرت في: 19/01/2013

على مدار السنين اللى فاتت بدأ أسلوب الحياة الصحى يظهر وسط مشهد التسوق السائد فى القاهرة من خلال محلات الأكل الصحى، والمنتجات الأورجانيك، ومجموعة كبيرة من المنتجات المصنعة محليًا وحاجات ثانية كثير. وطبعًا الزمالك هى موطن كثير من المحلات دى ومن الواضح أن الموضوع مستمر فى التوسع لفترة مش قليلة.سوبر ماركت "أورجانيك أند مور - Organic & More" عبارة عن محل بقالة صغير موجود فى شارع أحمد صبرى. السوبر ماركت بـ يقع فى ممر ضيق والحاجة الوحيدة البارزة على الشارع هى لوحة خضراء صغيرة، وعلشان كده سهل جدًا تعدى أمامه بدون ما تأخذ بالك. علشان توصل له، ركز أنك تلاقى "موباكو كوتونز"، الباب بجانب الباب.أول ما تدخل هـ تحس فعلاً بمعنى كلمة ضيق، مافيش مساحة كبيرة تقدر تتسوق فيها. فى أول المحل هـ تلاقى مجموعة من الزيوت العطرية المنتجة محليًا زى زيت زهرة الياسمين، وعلى نفس الرف صابون وماسكات للوجه من زوجانون. ماسك منهم لفت انتباهنا، وطبقًا لكارت التعريف هو مكون من الريحان والطمى، ومُغلف بشكل شيك فى برطمان زجاجى بسعر 35 جنيه، وده ممكن يبقى هدية مناسبة لو الوقت سرقك أو لو عاوز حاجة تنعشك. تقدر تلاقى أرز بنى ومكرونة فى نفس المنطقة، سعر الاثنين كيلو من الأرز البنى 10 جنيه، وبعد ما طبخنا الأرز فى البيت نقدر نقول أنه كان صحى وطعمه لذيذ.السلم المؤدى لآخر المحل محاط بسجاد مصنوع يدويًا، وسلات قمامة وقصيص للزرع. أول ما تطلع السلم، هـ تلاقى مجموعة من المنتجات المجمدة منها ألبان عضوية وكفتة بصلصة الصويا كانت مفاجأة بالنسبة لنا. ما احتاجناش وقت طويل علشان ننبهر بتشكيلتهم من البهارات، وخلطات التوابل ومجموعة صوص التغميس الجاهزة؛ برطمان حجمه معقول من التوابل الهندية غارام ماسالا garam masala تكلفته 30 جنيه. الطماطم المجففة بالتشميس اللذيذة ممكن برضه تلاقيها على الرف.من الواضح جدًا أن مجموعتهم من الشاى كانت كبيرة لكن مافيهاش اختلاف عن الموجود فى باقى سلاسل السوبر ماركت المحلية. متوفر كمان بعد ثانى مجموعة من السلالم مجموعة من ملابس الأطفال المصنوعة من خامات أورجانيك. وقت زيارتنا كان موجود اثنين موظفين لطاف، رغم أنهم مش ودودين أو مساعدين بدرجة عالية.بوجه عام، سوبر ماركت "أورجانيك أند مور" أكيد بـ يوفر اختيار آخر للأكل الصحى والعناية بالصحة وعلشان كده ما نقدرش نشتكى.

...

سعودى: فاكهة مدهشة فى الشيخ زايد
اصدرت في: 17/07/2012

مع افتتاح فرعه الجديد فى بدايات السنة دى، فرع سوبر ماركت «سعودى» في الشيخ زايد مقسم لممرات منظمة أنيقة والمكان نظيف من جوه. تجربة التسوق فيه تعتبر لطيفة بالنسبة لسكان المنطقة، لكن مش ده المكان اللى تروحله مخصوص لو بـ تدور على مشتريات رخيصة. السوبر ماركت المكون من دورين مقسم لمنتجات الأغذية (الدور الأول) ومستلزمات وأجهزة منزلية، ومنظفات (الدور الثانى). عجبنا قوى نظام الأصانصير المصمم علشان تقدر تطلع وتنزل ومعاك عربة التسوق بتاعتك. أول ما تدخل، قسم كامل على يمينك مخصص للمنتجات الطازجة. معظم أنواع الخضروات والفواكة سواء طبيعية أو عضوية معروضة فى الثلاجات وعلى أرفف الفواكة، رغم كده جاء لنا إحباط علشان لاقينا بعض المنتجات مش طازجة عكس ما يبدو عليها، وعلشان كده لازم تسأل أو تتأكد من تاريخ الوصول. أحلى حاجة فعلاً كانت الأنواع المختلفة من الفاكهة المستوردة. الأسعار بـ تبقى غالية شوية، بس عندهم مجموعة منتجات مدهشة زى الفاكهة التايلاندية المعروفة باسم "باشون فروت" passion fruit (126 جنيه للكيلو)، والكريز (55 جنيه لـ 150 جرام)، والتوت البرّى (55 جنيه لـ 125 جرام)، وفاكهة المانجوستين (135 جنيه/ للكيلو). كمان أوقات بـ يبقى عندهم أنواع مختلفة من المشروم المستورد، وفاكهة "الدراجون"، وفاكهة صينية اسمها "ليتشى" lychee، وبطيخ أصفر بدون بذر، والتوت والبابايا. رغم أن العيش بـ يتخبز كل كام ساعة، بس فيه أنواع معينة بـ تكون موجودة دائمًا فى أى وقت. المخبز كمان عنده حاجات ثانية زى البيتي فور، والمعجنات الخفيفة (الاثنين سعرهم 70 جنيه/ للكيلو) وكمان باتون ساليه، وكيكات ومعجنات. كاونتر كامل فى آخر المكان مخصوص للقطعيات الباردة، واللحوم، والأسماك. كل صنف منهم فيه تشكيلة متنوعة وطازجة، والفراخ المجهزة بالبهارات والسلاطات اللى فيها جبنة برضه موجودين. الفراخ بالبهارات أو من غيرها هـ تكلفك 26 جنيه للكيلو، وقطعة شيش طاووق بالخلطة ثمنها 50 جنيه للكيلو. كل اللحوم محلّية وكمان لحم البتلو (106 جنيه للكيلو) والبيف (84 جنيه للكيلو) موجودين. بالنسبة للقطعيات الباردة، فيه تشكيلة متنوعة من المنتجات المحلية والمستوردة، زى جبنة الأمينتال الهولندي (60 جنيه للكيلو)، لانشون حلوانى مدخن (77.50 جنيه للكيلو) وسلامى (63 جنيه للكيلو). وعكس ما تعودنا من فروع سعودى الثانية أنها بـ تقدم أجود الأصناف، الفرع ده ما قدرش يوصل للسُمعة المعروفة عن باقى الفروع وكمان مختلف فى الجودة والقطعية. مجموعة من الممرات فيها تشكيلة من الأغذية المجففة المحلية والمستوردة، ضيف على كده مستحضرات تجميل، وشوكولاتات وحلويات. رغم أن الاختيارات المتاحة مش كثيرة، لكن طريقة العرض كويسة جدًا والموظفين مفيدين. قسم الأغذية المجمدة مش كبير زى باقى السوبر ماركت فى مناطق ثانية، بس التنظيم فيه أناقة وفيه حاجات مستوردة زى آيس كريم لندن. فى الدور الثانى، احتاجنا نمشى فى قسم كامل مخصوص لمستلزمات المطبخ والأجهزة المنزلية قبل ما نوصل لقسم المنظفات الموجود فى الآخر. مجموعة مستلزمات المطبخ بـ تتضمن حِلل، وقلّايات، وصوانى، وأطقم ملاعق وسكاكين، وتشكيلة متنوعة من الألعاب الصغيرة. تجربة التسوق كانت لطيفة بشكل كبير حتى فى وقت الزحمة، وصعب تلاقى نفسك واقف فى طابور طويل أو حد بـ يحشر نفسه علشان يخش قبلك على الكاونتر.

...

مزارع دينا: المزرعة المحلية بـ تجتاح السوبر ماركت فى الدقى
اصدرت في: 08/06/2012

إحنا بـ نشجع الشركات المحلية على قد ما نقدر والسوبر ماركت ده مش استثناء، فى سنة 1987 بدأت مزارع دينا بـ 1500 فدان لحد ما وصلوا لـ 4000. المحاصيل بـ تكون فواكة، ومحاصيل زراعية ومنتجات ألبان وحاجات ثانية. منتجات مزارع دينا سهل تلاقيها عند محلات كثيرة فى المدينة، لكن الفرع ده يعتبر سوبر ماركت متكامل عنده أشكال وألوان من المنتجات المختلفة، سواء من مزارعهم أو مستوردة. فى شارع أمين الرفاعى فى الدقى، المتفرع من ميدان المساحة، مزارع دينا بـ تُمثّل اختيار ممتاز لو كنت فى المنطقة وعاوز تهرب من الزحمة الشديدة فى ألفا أو مترو. الشَكل الخارجى اللطيف للمكان يعتبر إضافة جيدة لنظافة المكان من الداخل وتنظيمه. أول حاجة نحب نقولها أن المكان ده ما عندوش مشكلة في الشوكولاتة! أصناف الشوكولاتة المحلية والمستوردة متوفرة بزيادة، هـ تلاقى تشكيلة متنوعة من أصناف الشوكولاتة المستوردة بالأضافة للبراونيز والكيك. علبة كيك ميكس مستوردة من بيتى كروكر بـ 13.75 جنيه. على الشمال، هـ تشوف قسم منتجاتهم الممتازة بألوانها المبهرة. الوقت ده يعتبر موسم البطيخ وتكلفة نصف بطيخة مقطوعة 7.72 جنيه. التفاح الأخضر (15.95 جنيه للكيلو) كان شكله جذاب جدًا وكمان الجريب فروت والفلفل الرومى المُغلّف. منتجات مغلفة ثانية زى الطماطم، والخيار، والباذنجان والموز. كمان هـ تلاقى عدد كبير من المعلبات فى منتصف المكان مع منتجات مستوردة وشوية منتجات محلّية الصنع. مع أنواع الأرز الإيطالى المخصوصة، اللى منها أرز السوشى، سعره 23.50 جنيه للكيس الواحد. مربى "أطايب الريف" بـ تبدأ من 20 جنيه وبـ تتضمّن التين المجفف وزهر البرتقال المُرّ. بالنسبة لمنتجات ألبان دينا المعروفة، 16.95 جنيه هـ تجيب لك 30 بيضة بنى بأحجام مختلفة فى حين أن ثمن لتر اللبن بـ يكون بين 8: 10 جنيه. كمان هـ تلاقى جزارة كاملة وكاونتر طلبات للأكلات السريعة فى آخِر المكان وعنده تشكيلة متنوعة من قطع الفراخ واللحوم مغلّفة مُسبقًا، ساندويتش شرائح اللحم، والجبن وحاجات ثانية كثير. طبعًا لو مش لاقى الحاجة اللى بـ تدوّر عليها على الأرفف أو نفسك فى لحم مُقطعة طازجة قول للموظّف اللى على الكاونتر. الموظفين ودودين جدًا وبـ يستجيبوا بسرعة. ضيف على ده كله وجود قسم صغير -لكن متكامل- للمنظفات والأدوات المنزلية وبكده يبقى كله تمام. لو الموضوع بإيدينا كانت مزارع دينا هـ تتوسع لأماكن جديدة فى أقرب وقت ممكن.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن