ملابس رياضية تسوق in Cairo, Egypt

تسوق

ديبنهامز: المتجر الإنجليزى متعدد الأقسام وصل كايرو فيستيفال سيتى
اصدرت في: 23/11/2014

يمكن لأنك نادرًا ما بـ تشوفهم وسط مشهد التسوق القاهرى الراقى، لكن يفضل حبنا للمتاجر متعددة الأقسام أبدى، ببساطة شديدة النوع ده من المحلات عنده القدرة على توفير حياة –وكمان تجربة تسوق– أكثر روعة وسهولة، عن طريق تقديم كل حاجة ممكن تحتاجها فى مكان واحد. مع فرع موجود بالفعل فى الإسكندرية، الاسم البريطانى المعروف "ديبنهامز -Debenhams"، وصل أخيرًا للقاهرة. المحل بـ يحتل مكان ضخم فى مول كايرو فيستيفال سيتى، ولما نقول كبير نقصد أن مساحته تساوى مساحة من 4: 5 محلات متوسطة الحجم. بإضائته المشرقة وألوانه الفاتحة البسيطة، المحل يتميز بديكورات معاصرة أنيقة، لاحظنا على طول ندرة البائعين بطريقة غريبة، وكل فين وفين لما نشوف بائع واحد. أول ما دخلنا لاقينا نفسنا فى قسم ملابس الأطفال، واللى بـ يعرض مجموعة متنوعة من الاختيارات الجميلة للأطفال من كل الأعمار، من الرضع لغاية 12 سنة. تحركنا من قسم الأطفال، ووصلنا لقسم الحمامات، وفيه مجموعة من مستلزمات الحمامات القطنية، من البشاكير لممسحة الأرضية. البشاكير موجودة بكل الأحجام (فوط اليد سعرها 110 جنيه وفوط الاستحمام 230 جنيه)، والألوان مافيش أكثر منها بعدد يوصل 42 لون متنوع. بعد كده وصلنا لقسم الرجالى، وفيه كنا وسط مجموعة من الأزياء الراقية من إمضاء عدد كبير من مصممى ديبنهامز الحصريين. بالنسبة للملابس الكاجوال المتينة، عندك ماركة Maine الرائعة، بتقديمها لحاجات منها قمصان كاروهات (400 جنيه) وبنطلونات كاكى (500 جنيه). لو عاوز حاجة أقرب شوية للملابس الرسمية، سمارت كاجوال يعنى، ماركة John Rocha عندها الحل، بـ تقدم حاجات منها جاكيت أسود أنيق (1100 جنيه)، وجاكيت رمادى أقل رسمية شوية فكرته مستوحاه من الكارديجان (770 جنيه). الجاكيتات السابقة ممكن معاها سترات برقبة V 320 جنيه من ماركات أسعارها معقولة شوية زى Thomas Nash. قسم الرجالى كمان يشمل قسم لملابس البيت والغيارات الداخلية. فى الوقت نفسه، قسم الحريمى كان مليان حاجات لكل المناسبات. الماركة الشهيرة Betty Johnson كانت أول حاجة نشوفها ولفتت انتباهنا منها توب شيفون أزرق مخضر (650 جنيه) وبليزر (1100 جنيه). بالنسبة للمقاسات الكبيرة، الاسم البريطانى الشهير إيفانز Evans بـ يقدم مجموعة ضخمة تشمل فستان أبيض برقبة دانتيل (650 جنيه) وكارديجان مريح وطويل (525 جنيه). نروح على ملابس السهرة الخلابة، وهى من تقديم اسم ثانى شهير فى عالم الموضة البريطانية، وهو Coast واللى بـ يقدم مجموعة من الفساتين المثيرة. أجمدهم كان فستان أخضر طويل لامع (2900 جنيه)، مع فستان قصير لونه برتقالى (2250 جنيه). لو المطلوب حاجة كاجوال أكثر، جينزات سكينى من Jasper Conran بـ 700 جنيه، كان شكلها مريح جدًا وعلى الموضة فى نفس الوقت، وهـ تكون رائعة مع شنطة اليد الأسود فى كريمى من Julien Macdonald بـ 800 جنيه. الخريطة الموجودة وسط الجينزات، واللى بـ توضح الفرق بين القصات كانت مفيدة وتعتبر إضافة ممتازة، عجبنا كمان خط Miss Selfridge بقطعه الصغيرة حجمًا، ووقعت أعيننا على بوت أسود (699 جنيه) وحذاء أحمر بكعب عالى (599 جنيه). بعدها جاء الدور على قسم معقول –إن لم يكن عادى– للماكياج والعطور، بـ يعرض منتجات تجميل من أسماء شهيرة منها شانيل، لانكوم ، YSL، Bourjois، كلارينس وجيفنشى وحاجات ثانية. ديبنهامز أكيد يعتبر إضافة مميزة لمشهد التسوق المصرى، ورغم أن بعض القطع أسعارها غالية، لكن واضح جدًا عليهم الجودة العالية مع ماركات كثيرة مش موجودة فى أى مكان ثانى. المحل يعتبر مكان هائل للتسوق لأصحاب الذوق الرفيع، وكمان بديل أفضل من الأسماء البريطانية اللى بدأت موضتها تتراجع زى توب شوب واحد من الإضافات الجديدة لكايرو فيستيفال سيتى وأقرانه.

...

أوليمبس: أدوات وملابس رياضية في مدينة نصر
اصدرت في: 08/06/2014

في جولة صباحية نشيطة في شوارع مدينة نصر وقفنا أمام محل متخصص في الأدوات والأجهزة والملابس الرياضية اسمه «أوليمبس – Olympus» أو أوليمبس سبورت زي ما مكتوب على الكارت بتاعه. المحل موجود في شارع عباس العقاد بجوار محطة بنزين كالتكس مباشرة، واجهته مش كبيرة وتوحي أن مساحته صغيرة، لكن لما دخلنا لاقيناه مكون من طابقين ومساحته متوسطة، وكان الموضوع مغري بجد أننا نتفرج على كل حاجة مُعلقة على الحوائط وفي الستاندات، وحتى لو حد مش بـ يمارس أي رياضة ودخل هنا هـ يلاقي حاجة تشده وتخليه عاوز يستفسر عن سعرها ويجربها. الدور الأرضي مخصص للمعدات والأدوات لكل أنواع الرياضات، كرات قدم وسلة يد وطائرة وتنس وتنس طاولة، وشبكات ومضارب تنس وسكواش وتنس طاولة، وقفازات ملاكمة وواقي للركبة والساق والكوع لرياضات التزلج والباتيناج، وكل لوازم الألعاب القتالية من خوذات ودروع، وطبعًا دامبلز وأوزان مختلفة لتمارين الجيمانزيون ورفع الأثقال، مافيش حاجة تقريبًا جاءت في بالنا لها علاقة بالرياضة وما لاقيناهاش هنا، ده بس علشان تبقى عارف وأنت جاي هنا أنك بنسبة 90 % هـ تلاقي اللي أنت عاوزه. في نفس الدور فيه أحذية رياضية ماركة أديداس ونايك لكن مش أصلية، درجة تقليد معقولة وأسعارها من 150 لـ 190 جنيه، لكن لو مسكتها في إيدك هـ تحس أن التقفيل مش قد كده، بالذات الموديلات اللي فيها قماش كثير مش الجلد، فما بالك بأحذية كرة القدم اللي لازم تبقى قوية وعمرها أطول علشان تستحمل عنف اللعبة، ما حبيناش موديلات الأحذية المعروضة بصراحة، وإن كانت ممكن تبقى مناسبة للخروج لو ميزانيتك محدودة وأنت بـ تدور على كوتشي. على النقيض كان فيه أحذية أطفال وشباشب أصلية بموديلات خطيرة وبكل المقاسات من أول 3 سنين، أسعارها من 90 لـ 110 جنيه، وفيه كروكس بس برضه ده مش أصلي وألوانه محصورة بين الأزرق والأخضر، وأسعاره 35 و50 جنيه. وفيه مجموعة من الشباشب الرجالي الأنيقة لكن مش ماركة محددة بأسعار 70 و 80 جنيه. كرة قدم ماركة ميكاسا بـ 120 جنيه وفيه حاجات أرخص من كده من ماركات ثانية، وفيه كرات يد بكل الأحجام علشان تناسب اللاعبين الصغار والأطفال، وعندهم مايوهات سبيدو رجالي وبناتي للمحترفين، وكل معدات السباحة زي الزعانف وأغطية الرأس (30 جنيه) يمكن معدات الغطس مش متوفرة كلها بس ده مفهوم بما أننا مش في مدينة ساحلية. وهنا أسعار مضارب تنس الطاولة من أول 60 جنيه لحد 117 جنيه وفيه الجراب بتاعها كمان بـ 50 جنيه، ونفس الكلام على مضارب التنس والريشة الطائرة والأسكواش. كل أجهزة التمارين البسيطة موجودة زي الساندو وسوستة الضغط للأصابع وغيرها، والأسعار بشكل عام أقل منها في بعض محلات الأدوات الرياضية في المولات الكبيرة، يمكن قريبة من الموجودة في محلات التوحيد والنور والمحلات الموجودة في الأماكن الشعبية. الطابق العلوي للملابس الرياضية والتريننج سوتس، مش هـ تلاقي حاجة أصلية إلا فيما ندر، يمكن اللي عجبنا شوية تي شيرتات بولو مناسبة للتدريب والخروج بأسعار من 100 لـ 140 جنيه، وفيه شورتات للألعاب المختلفة وطبعًا بدل الألعاب القتالية زي الكاراتيه والتايكوندو. لاجظنا أن محل «أوليمبس» مش بس فيه رياضيين أو ممارسين للرياضة، لكن أسر عادية وسيدات وأطفال، يمكن لأن أسعاره مغرية فعلًا وعنده تنوع كبير في المعروضات حتى اللي مالهاش علاقة بالرياضة، هو محل مهم وموجود في منطقة حيوية وطبيعي يبقى عليه الإقبال ده، ده بالإضافة للخدمة الجيدة من الموظفين الموجودين ووجودهم وقت ما تحتاجهم وبس.

...

نايك: فرع مشتت الأركان في كونكورد بلازا مول بالقاهرة الجديدة
اصدرت في: 14/05/2014

التسوق في القاهرة أصبح تجربة مثيرة لأعصاب الواحد بسبب كم البشر المهول في المولات (وخصوصًا في الأجازات)، إلا أن الموضوع بـ يبقى أسهل في المولات الجديدة والبعيدة عن زحمة القاهرة المعتادة. من ضمن المناطق اللي في طريقها للازدحام نتيجة لتطورها المستمر هو شارع التسعين في القاهرة الجديدة، واللي فتح فيه فرع لـ "نايك - Nike" من ضمن المحلات في كونكورد بلازا مول. طبعًا الماركة معروفة جدًا وفي غنى عن التعريف، وأعتقد أنك سواء رياضي قديم أو من جمهور ثالثة شمال، أكيد حصل واشتريت منها أي شيء لمجرد مسايرة الموضة. المحل كبير ومكون من دورين: الملابس الرجالي في الدور الأرضي، والأطفال والحريمي في الدور الثاني. في كل زيارة لنا لاحظنا أن فيه تخفيضات تصل حتى 50%، طبعًا على عدد محدود من المقاسات والقطع، وبالرغم من كون القطع دي مهندمة سواء مُعلقة أو مطوية إلا أنها كانت مشتتة إلى حد ما. طبعًا القسم الرجالي له نصيب الأسد من حيث تنوع المعروضات، فيه كل الأنواع والأشكال اللي ممكن تتخيلها: أطقم التمرين واللي بـ يسميها البعض "الترينكات"، وأسعارها بـ تبدأ من 400 جنيه. كمان فيه مجموعة شورتات بألوان مبهجة، وتي شيرتات وبولوهات عليها شعار نايك من الأمام. لفت انتباهنا حائط كامل مُهدى لكل اللي غاوي رياضة كرة القدم أو كرة السلة، والحائط ده مليء بملابس فرق الأندية المشهورة المتعاقدة مع نايك، منها كابات عليها شعارات الأندية دي (139 جنيه)، جوارب وقفازات، وعدد محدود جدًا من حقائب الظهر (329 جنيه) والحقائب الرياضية. الأحذية الرياضية بالرغم من أشكالها المبتكرة وألوانها الفاقعة والمجنونة، إلا أنها ما أبهرتناش، ومعظمها مُصممة للجري أو لكرة القدم. أما الأحذية الأبسط من حيث التصميم والاستخدام، كان معروض منها زوج من القماش الأزرق عليهم الشعار الشهير باللون الأبيض (699 جنيه). للأسف قسم الملابس الحريمي لا يقارن بالقسم الرجالي، مش بس من حيث تنوع المعروضات، ده كمان نوعيتها واختيار أذواقها. انطباعنا السلبي ما منعش من أننا نعثر على كذا بنطلون رياضة (أكثرهم معمول لكونه مريح مش لممارسة الرياضة بجدية يعني) وسعرهم (300 جنيه). أما السويت شيرتات اللي بسوستة كان عليها تخفيض من (549 جنيه) لـ (439 جنيه). أما التي شيرتات البسيطة السادة فأسعارها ما بين (160 و229 جنيه). البنطلونات الليكرا كانت موجودة بس مشكلتها الوحيدة أنها واسعة عند منطقة الساق، بعكس الموضة اللي المفروض أنها تكون ضيقة في المنطقة دي. اللي هـ يزعج الرياضيات جدًا في قسم الحريمي أن مافيش مشدات صدر رياضية نهائي، مش بس كده، ده لا موجود شورتات أو باديهات... معظم التي شيرتات واسعة وعليها شعار نايك المشهور. الأحذية الرياضية الحريمي معظمها مخصص لرياضة العدو، التشكيلة ظريفة وألوانها تواكب موضة الألوان الصارخة، بس للأسف لا تقارن بتشكيلة الفروع الأخرى. كان موجود حذاء أسود بسيط عليه الشعار باللون الوردي، عليه تخفيض وسعره أصبح 999 جنيه. من ضمن التشكيلة مجموعة من شباشب الشاطيء، واللي أسعارها بـ تبدأ من 400 جنيه، ومنهم كان عليه تخفيض. قسم ملابس الأطفال فيه مجموعة مشابهة لملابس البالغين، أطقم جوارب (150 جنيه) ومجموعة أقل من الأحذية. بالتأكيد القائمين على الفرع لازم يعيدوا النظر في الشكل العام للمحل، والقطع المعروضة فيه. لأنه ضعيف جدًا مقارنة بمحلات الملابس الرياضية الأخرى في المنطقة.

...

النيل ستوك: تسوق على الطريقة الكلاسيكية في وسط البلد
اصدرت في: 13/10/2013

من وقت للثاني لازم نعمل زيارة لمحلات «النيل ستوك» أو Nile Stock اللي فروعها منتشرة في كل أحياء القاهرة وخاصة الشوارع التجارية المعروفة. المحل له خصوصية فريدة لأنه بـ يجذب كل شرائح المجتمع، أسعاره القليلة عمرها ما كانت سبب في أن الجودة تكون قليلة، ومستوى الخدمة ومواقع فروع المحل الحيوية بـ تخلي الإقبال عليه من جميع الفئات العمرية والمجتمعية كبير جدًا، عنده ملابس رجالي وحريمي وأطفال وبعض الإكسسوارات، وقدر يكون واحد من المحلات المفضلة للمصريين في السنين الأخيرة ودي حاجة مش سهل على محل ملابس عادي أنه يحققها. فرع وسط البلد موجود في ممر بهلر اللي بـ يربط بين شارع طلعت حرب وشارع عماد الدين، مكانه مميز على ناصية واضحة وهو مكون من دورين، الدور الأول للملابس الحريمي والأطفال البنات، والدور العلوي للرجالي والأولادي. عنده ملابس خروج وبيت وملابس داخلية لكن مافيش أحذية. سهل تأخذ بالك أنه بـ يشبه محلات مصرية عريقة زي صيدناوي وعمر أفندي بعد تجديدهم، نفس التصميم ونفس أسلوب رص الملابس ونفس الخدمة، شكل كلاسيكي جدًا للتسوق لكنه مريح نفسيًا، والمهم أنه متطور في نفس الوقت ودائمًا هـ تلاقي موظف قريب منك علشان تسأله على أي حاجة عاوز تعرفها. للحظات ممكن تحس أن المكان ده تابع للحكومة من كثر ما هو كلاسيكي، لكن الحقيقة أنه قطاع خاص عادي جدًا، بس قدر يكون له شخصية مميزة. ميزة «النيل ستوك» اللي كل الناس عارفينها أن عنده ملابس قطنية ممتازة، وثاني حاجة أن أسعاره قليلة قوي، يعني في قسم الرجالي على سبيل المثال التي شيرت القطن السادة بـ 30 جنيه بس، وشكله وتقفيله كويس يعني ممكن يتلبس في الخروج عادي، فين ممكن تلاقي تي شيرت خروج بـ 30 جنيه دلوقت ويبقى بالجودة دي؟ الجينز هنا بأسعار من 70 لحد 120 جنيه، صحيح مش آخر موضة لكن بـ تؤدي الغرض وعملية، وفيه منها كل الألوان، ونفس الكلام على البنطلونات الجبردين والبولو شيرت. ولأن الشتاء داخل كان فيه عدد كبير للبول أوڤرات السادة بكل الألوان، أسعارها 150 جنيه، شكلها بسيط زي كل الموديلات الموجودة في المحل، لكن شيك وممكن ما تقدرش تقاومها وتجيب منها 2 أو 3 لأنها عملية فعلًا وسعرها كويس. فيه ملابس بيت وبيجامات وبنطلونات رياضية وسويت شيرتات للبيت بأسعار من 30 لـ 60 جنيه، وإحنا بـ ننصح أي حد عاوز يعمل عملية إحلال وتبديل لدولاب الملابس المنزلية ييجي على هنا ونوعدك أنك مش هـ تدفع كثير، وهـ تكون راضي عن الجودة والموديلات كمان. قسم الأطفال غني جدًا بالمعروضات رغم أننا في فترة بين موسمين الصيف والشتاء لكن هـ تلاقي كل اللي يناسب طفلك (أولاد أو بنات) خروج أو بيت، من أول البيجامة اللي بـ 10 جنيه بس بعد الخصومات لحد الجاكيت الجلد السميك اللي بـ 130 جنيه، لكن ما عجبناش عدد من المعروضات في قسم الأطفال المصنوعة من التريكو حسيناها قديمة جدًا ومش ملائمة لروح المحل ولا الزمن اللي إحنا فيه، وأحيانًا بـ يبقى فيه نقص في بعض المقاسات لكن أول بأول المحل بـ ينزل الموديلات والمقاسات المختلفة، يعني اللي مش هـ تلاقيه النهارده هـ تلاقيه بعد يومين بالكثير. ملابس البنات والسيدات هنا مش بنفس جودة ملابس الرجال والأطفال، أو بمعنى أصح مش مناسبة لطبيعة السيدات اللي بـ يدوروا على أحدث موضة مش مجرد ملابس عملية بسيطة، ومع ذلك إحنا عجبنا عدد من الفساتين والشيرتات الحريمي رغم بساطتهم وأسعارهم اللي ما زادتش عن 150 جنيه. محلات «النيل ستوك» علامة بارزة في عالم التسوق وله شعبية كبيرة في القاهرة، جولتنا السريعة هناك كانت للاطمئنان على مستوى الخدمة وجودة المعروضات ونشوف إذا كان لسه محتفظ بطبيعته الخاصة ولا لأ، والحقيقة أنه كان عند حسن ظننا وزيادة شوية.

...

بنيتون أوتلت: منفذ بيع ملابس كاجوال بالمعادي الجديدة
اصدرت في: 29/05/2012

في شارع النصر في المعادي الجديدة وعلى الصف المقابل لمطاعم «مؤمن» و«جاد» فيه مبنى صغير مكون من 3 أدوار باللون الأبيض عليه من الخارج شعار «يونايتد كلرز أوف بنيتون» المعروف وكل لما كنا بـ نعدي من هناك كنا بـ نبقى فاكرينه مجرد فرع عادي من فروع بنيتون المنتشرة في أحياء ومولات القاهرة. لكن لما دخلنا المحل لأول مرة عرفنا أنه منفذ بيع لعدد من ماركات الملابس العالمية. وأنت أمام المبنى هـ تشوف في الدور الثاني ملابس وأدوات رياضية خاصة بالنادي الأهلي، أو (الأهلي ستورز) لكن لما دخلنا المحل عرفنا أن الأهلي ستورز أغلق أبوابه للأبد في المكان ده، وأصبحت كل المعروضات موجودة في الدور الأرضي فقط. منفذ البيع ده عنده مجموعة محدودة جدًا من التي شيرتات من ماركة Benetton كانت على ستاند على يمينك أول ما تدخل المحل، كلها باللون الرصاصي وعليهات طبعات ورسوم بسيطة من الأمام وبأسعار من 120 لـ 130 جنيه. أغلب المعروض بالمحل هو تي شيرتات ماركة US Polo باللون الأبيض طبعًا، وفيه بعض موديلات بألوان مختلفة وبأقلام رفيعة بالعرض، لكن الأساسي هو اللون الأبيض وعليه اللوجو الشهير للبولو شيرت من على الصدر. كل التي شيرتات هناك أصلية وهي نفس التشكيلة الجديدة تقريبًا الموجودة في فروع US Polo في سيتي ستارز وغيرها، لكن الفرق في السعر بـ يبقى كبير، يعني اللي هـ تلاقيه في الفرع الرئيسي بـ 800 جنيه، هنا ممكن تلاقيه بأسعار من 400 لـ 500 جنيه. هو في الحالتين غالي طبعًا، بس غالي عن غالي قوي يفرق. والأسعار هنا قليلة كده لأن المفروض أن ده زي منفذ البيع بسعر الجملة أو سعر المصنع، مش عارفين بالضبط، بس اللي متأكدين منه أن الخامات ممتازة والتصميمات شيك جدًا، وأن كل المقاسات موجودة. فيه معروضات قليلة من ماركة Zara وهي عبارة عن بنطلون جبردين بلون غريب جدًا هو خليط بين البرتقالي والبني، وعرفنا أن ده الـ New Collection الصيف ده، وسعره 250 جنيه بدل 500 في زارا. وفيه مجموعة قمصان بولو ومجموعة صغيرة من تي شيرتات Massimo Dutti بسعر 240 جنيه. الأسعار اللي هنا كلها ممكن تنزل لحد 50 % لو رحت وقت العروض والتخفيضات، بس مافيش غير عروض بسيطة على الملابس دلوقتي زي أنك تشتري 2 تي شيرت بولو وتأخذ خصم 10 % أو تشتري 5 تي شيرت وتأخذ واحد هدية. فيه بعض إكسسوارات وشنط سفر بأحجام كبيرة بسعر 650 جنيه بعد الخصم، وفيه كوتشي ماركة Crocs بأسعار من 300 لـ 400 جنيه وموجود بكل الألوان. وفيه صنادل وأحذية بناتي بأسعار 200 جنيه بعد الخصومات برضه. في قسم البنات هـ تلاقي نفس تشكيلة التي شيرتات الموجودة في القسم الرجالي وبنفس الأسعار ويمكن أقل شوية. وفيه مايوهات وملابس رياضية ورغم أن المعروضات في القسم ده قليلة إلا أنها جذابة وأنيقة جدًا. في نهاية المحل فيه قسم للأطفال ومعظم معروضاته من Benetton والأسعار معقولة جدًا. يعني ممكن تجيب أي بنطلون أو شورت بـ 70 جنيه، والتي شيرت والكوتشي من 50 لـ 150 جنيه. يعني في القسم ده بس هـ تحس أنك في منفذ بيع بأسعار خيالية مش في فرع عادي للماركات اللي ذكرناها اللي أسعارها غير عادية. منفذ بيع «بينيتون» عجبنا فيه التنوع في المعروضات والخدمة والحرية في الفرجة وتجربة الملابس، رائق ونادرًا لما تلاقي زحمة. المكان يستاهل زيارة.

...

أديداس أوتلت: ملابس رياضية بأسعار مخفضة في المعادي
اصدرت في: 08/03/2012

وأنت ماشي على الطريق الدائري في المعادي باتجاه القطامية وبعد مبنى كارفور بحوالي 200 متر، هـ تلاقي مَنزل من الطريق السريع على طريق بطيء ناحية اليمين وأول محل عينك هـ تقع عليه أول ما تنزل من الدائري محل «أديداس أوتلت – Adidas Outlet» أو Factory Outlet وهو منفذ بيع بيافطة سوداء كبيرة عليها لوجو أديداس، وعدد من لوجوهات ماركات ملابس رياضية ثانية. الحقيقة أن المنفذ ده مش لأديداس بس زي ما ناس كثير فاكرة، إنما فيه براندات ثانية ومش كل اللي فيه ملابس رياضية كمان إنما فيه ملابس كاجوال عادية وأحذية وإكسسوارات. تخفيضات طول العام، مكتوب كده على اللافتات داخل المحل وعلى الزجاج الخارجي بتاعه مكتوب خصم 50% ويصل لـ 70%، والفكرة أن المكان ده عامل عروض وتخفيضات طول السنة فعلاً لأن معظم الموديلات اللي بـ تعرض عندهم بـ تبقى أقدم شوية من المعروضة في باقي الفروع الخاصة بالماركة دي، وساعات الموديلات بـ تبقى أقدم سنة أو أكثر. علشان كده كل الكوتشي والأحذية والتي شيرت والترينينج سوت والبنطلونات الرياضية عليها 2 تيكيت للسعر، واحد الأصلي والثاني بعد الخصم. المشكلة هنا أن فيه معروضات سعرها حتى بعد الخصم ورغم قدم الموديل جدًا يعتبر لسه غالي. الماركات الموجودة هي أديداس، ريبوك Reebok، أحذية جيوكس Geox، تمبرلاند Timberland، كروكس Crocs وليـﭭايز Levi's وQuiclsilver. الدور الأرضي مخصص للملابس الرجالي والعلوي للأطفال والحريمي. الموديلات واحدة تقريبًا في كل الأقسام. تشكيلة ضخمة جدًا من الكوتشي والتي شيرت والسويت شيرت والجينز. في القسم الرجالي ممكن تقعد تلف أكثر من نصف ساعة علشان تتفرج على كل موديلات الكوتشي على وجه الخصوص، أديداس بورش ديزاين وzx 750 وسنيكرز ده غير موديلات خاصة بكرة القدم وكرة السلة وكرة اليد والتنس، والأسعار بـ تتراوح بين 300 لـ 600 بعد التخفيض، وفيه جيرسي فرق ريال مدريد وميلان الأصلية بسعر 300 جنيه وفرق ثانية من اللي بـ تلبس أديداس. ريبوك موديلاته هناك تحفة لكن أسعاره أغلى شوية. من أرخص الموديلات في المحل سنيكرز ليـﭭايز ستاندارد شبه الـ Converse Chuck Taylor بألوان الأسود والأبيض بسعر 250 جنيه، وبعض الموديلات البسيطة والمريحة من ليـﭭايز بنفس السعر. ولما نقول ليـﭭايز يبقى لازم نتكلم عن الجينز باللون الأزرق الأساسي ولكن بقصات مختلفة بأسعار من 260 لـ 500 جنيه، وده نادرًا لما بـ يكون عليه تخفيض لأن موديلاته معظمها أساسية جدًا. تمبرلاند ضيف مهم جدًا في «أوتلت»، تشكيلة الأحذية بالألوان البني والبيج المميزة برقبات طويلة ومتوسطة وبدون بأسعار من 500 لـ 1000 جنيه، لكن تجربتنا مع تمبرلاند بـ تقول أن دي أفضل حاجة ممكن تستحمل وتعيش معاك لحد ما تزهق منها. موديلات متنوعة رياضية وكاجوال من أحذية كروكس وجيوكس هـ تلاقيها على ستاندات متفرقة في المحل، أسعارها أقل كثير من أديداس وتمبرلاند. فيه شنط رياضية وكابات وأحزمة ومحافظ من كل الماركات اللي تكلمنا عليها، والأسعار طبعًا أقل من أي فرع ثاني للماركات دي. لازم تزور «أديداس أوتلت» قبل ما تقرر تشتري أي أدوات أو ملابس رياضية من أي فرع من فروع ماركتك المفضلة لأنك هنا ممكن تلاقي اللي أنت عاوزه وتوفر 200 أو 300 جنيه أنت أولى بهم.

...

سنتر بوينت: مول داخل مول سيتي سنتر المعادي
اصدرت في: 04/03/2012

تعودنا مؤخرًا نلاقي ماركات عالمية مش موجودة في أي حتة داخل مبنى معادي سيتي سنتر العملاق الشهير بـ «كارفور». آخر اكتشافاتنا كان مول داخل المول. «سنتر بوينت – Centerpoint» سلسلة محلات لها فروع في كل عدد من دول الخليج والشرق الأوسط، وأخيرًا بقى لها فرعين في مصر، واحد في الإسكندرية والفرع الوحيد في القاهرة موجود في كارفور المعادي. البداية كانت بفرع صغير في البحرين من حوالي 40 سنة وكان فيه ماركة واحدة بـ تُباع في المول وهي «بيبي شوب» بعدها بدأ في التوسع تدريجيًا لحد ما وصل للشكل اللي هو عليه دلوقتي وهو عبارة عن مول مكون من طابقين، بـ يضم 4 ماركات كل منها متخصص في نوع معين من الملابس والأدوات، والماركات الموجودة هي «بيبي شوب - Babyshop» لملابس الأطفال وأدواتهم و«سبلاش – Splash» للملابس الرجالي و«شو مارت – Shoe Mart» للأحذية الرجالي والحريمي والكوتشي و«لايف ستايل – Lifestyle» للتحف والإكسسوارات المنزلية. «سنتربوينت» فتح مكان «زارا - Zara» اللي كان موجود في نفس المكان قبل ما يقفل فرعه، المحل مساحته كبيرة وفيه الدور الأرضي مخصص للملابس والأحذية والدور العلوي فيه أدوات منزلية وأدوات أطفال. الـ 4 ماركات اللي ذكرناهم موزعين بشكل واضح في أركان المول وهـ تلاقي كل ماركة عاملة عروض وتخفيضات خاصة بها بشكل مستقل عن مظلة «سنتربوينت». فيه بعض ماركات ثانية واخدة أركان في المحل زي «دي إن إم – DNM» للأحذية والإكسسوارات و«أديداس» و«بوما». المكان هـ يفكرك كثير بمحلات «إتش & إم – H&M» و«ماكس – Max» اللي سبق وكتبنا عنهم في كايرو360، نفس موديلات الملابس والأسعار وحتى طريقة توزيع المعروضات وطريقة تعامل موظفين البيع. وفيه سمة مميزة للمكان هي أن غالب عليه الطابع الخليجي في بعض موديلات الملابس، لكن في نفس الوقت هـ تلاقي كل التصميمات والأذواق بس هـ تتعب شوية في البحث لأن الأرفف والأركان كثير فعلًا. عجبنا بشكل خاص موديلات «سبلاش» الرجالي الكاجوال (مافيش في المول ملابس كلاسيك) والأسعار كانت مغرية جدًا. بول أوﭭر صوف خفيف بألوان مختلفة بسعر 250 جنيه، والجينز بأسعار من 200 لـ 350 جنيه، وفيه قسم للملابس الداخلية والإكسسوارات الرجالي من «سبلاش» وبما أنه عامل تخفيضات بـ توصل لـ 50 % بـ نرشح لكم زيارة القسم ده لأن الموديلات حلوة والأسعار ممتازة. في «بيبي شوب» في الدور العلوي هـ تلاقي بجانب الملابس وأدوات الأطفال الأساسية فيه أثاثات وتجهيزات الحضانات ونوادي الأطفال، وبرضه فيه خصومات كبيرة يا ريت تلحقوها. «لايف ستايل» فيه ديكورات منزلية وفواحات وشموع شيك جدًا وإكسسوارات وتابلوهات وشنط هدايا ومكياج هدايا لكل الأعمار خاصة من سن 16 لـ 21 سنة. مش هـ ينفع نتكلم عن أسعار كل حاجة في «سنتربوينت» العملاق، لكن يكفي أننا نقول أنك ممكن تعمل جولة تسوق كاملة داخل المكان وما تحتاجش تروح أي محل ثاني، وأي كانت ميزانيتك ممكن تلاقي حاجات على قدها. هـ يلفت نظرك في المكان كمية اللافتات اللي عليها كلمة (Sale) باللون الأحمر، وكأن المكان فتح بس علشان يعمل تخفيضات. لكن ده طبعًا في صالح المستهلك في النهاية. «سنتربوينت» دلوقتي في كايرو، إضافة جديدة لسلاسل المتاجر العملاقة في العاصمة، منتظرين فروع أكثر في المستقبل، وبـ نقول لكم أن المكان بجد يستحق الزيارة.

...

ماكس: ملابس متنوعة بأسعار خطيرة في مصر الجديدة
اصدرت في: 21/09/2011

ممكن نقول عليه مول صغير، أو محل ملابس عملاق، لأنه واخد أول دورين في عمارة ضخمة شيك جدًا أمام البوابة الرئيسية للميريلاند في شارع الحجاز في مصر الجديدة، «ماكس» بـ يفكرنا بمحلات «عمرافندي» في الملابس زمان و«H&M» حاليًا في سيتي ستارز. صاحب سلسلة المحلات هندي الجنسية، وبدأ المجموعة بفرع رئيسي في دبي وبعد كده إنطلق بفروع في معظم الدول العربية زي الأردن والكويت والسعودية وقطروالبحرين ولبنان والسودان وآخيرًا مصر، وبسهولة هـ تلاحظ الطابع الخليجي للمحل خاصة لما تسمع الإذاعة الداخلية للمحل باللهجة الإماراتية المميزة، ولما تشوف بعض موديلات اللبس غير المألوفة في مصر واللي بـ نشوفها أكثر على الخليجيين لما بـ يكونوا في مصر. المحل منظم جدًا، كل ركن مخصص لحاجة معينة، وبشكل عام الدور الأرضي للملابس الرجالي والدور العلوي للسيدات، وفيه جزء خاص لملابس الأطفال ومستلزماتهم في الدور الأرضي. القسم الرجالي فيه كل حاجة ممكن تتخيلها، من أول ملابس البيت والبيجامات الكلاسيكية (أسعارها من 80 لـ 100 جنيه) والملابس الرياضية، مرورًا بالجينز بكل موديلاته وتفصيلاته وألوانه، ولازم نقول أن «ماكس» مميز بتشكيلة الجينز اللي عنده، وسهل تدخل المحل للفرجة بس تطلع وانت شاري بنطلونين أو ثلاثة، أولاً لأن الأسعار مغرية جدًا وبـ تبدأ من 80 جنيه (مافيش محل بـ يبيع جينز محترم بـ 80 جنيه دلوقتي) وأحدث موديلات عنده آخرها 160 جنيه وبعد الخصومات اللي هـ تكون لسة شغالة وقت نشر المقال ده بـ توصل لـ 114 جنيه، يعني يا بلاش. التي شيرتات كثير قوي وأشكال وألوان، من أول البولو شيرت العادي لحد التي شيرتات الواسعة بتاعة مغنيين الراب وفيه طبعًا الموديلات العادية بكل الألوان، والخامات كويسة جدًا والأسعار بـ تتراوح بين 50 لـ 100 جنيه وبرضه ممكن تنزل عن كده في التخفيضات (مكتوب هناك "تنزيلات"..خليجي بقى). في آخر الممر في الدور الأرضي ركن الملابس الرسمية والبدل والقمصان الكلاسيكية، البنطلون القماش بـ يبدأ من 110 جنيه وموجود بكل الألوان الوقورة زي الأسود والرمادي والبني والكحلي، وبـ يكون فيه أقلام طولية رقيقة وخامته جيدة جدًا، والقمصان بـ 130 جنيه والكرافتات بين 30 لـ 50 جنيه ولاقينا الموديلات الرفيعة بأسعار أقل من أي محل تاني. فيه ستاند كبير عليه أشكال وألوان من القمصان طويلة وقصيرة الأكمام، وفي «ماكس» الكاروهات بكل أشكالها واخدة حقها بزيادة، بس الخامات والتفصيلات ظريفة وتليق على كل الأجسام والأحجام. الدور العلوي هو بإختصار مكان لازم أي بنت عايزة تعمل دعم كامل لدولابها تروح عليه، من غير تفاصيل كثير هو فيه كل ما له علاقة بالملابس الحريمي سواء للبيت أو للخروج، موديلات بنطلونات وباديهات كثير جدًا، أي حاجة بـ تشوفي حد لابسها ومش عارفة دي بـ تتجاب منين روحي على «ماكس» وهـ تلاقيها، والأسعار كالعادة أقل من أي محل في أي مول كبير وإن كانت الجودة مش أقل كثير. الملابس الكلاسيكية كمان متوفرة في القسم الحريمي بس الخامات ممكن تكون مش الأفضل. ولفت نظرنا الملابس الرياضية والترينينج سوت الـ 3 قطع بألوان وموديلات تحفة، وسعره كان حوالي 250 جنيه، لكن كل قطعة ممكن تتباع لوحدها. الأطفال ليهم عالم خاص من الملابس في «ماكس»، حتى عربيات ولعب البيبي موجودة، بـ نرشح قسم الأطفال لأي أب وأم عايزين يجمعوا أكبر قدر من الملابس والأدوات لأولادهم من مكان واحد، ودائمًا نضع في الإعتبار موضوع الأسعار مقارنة بالجودة، وهـ نلاقي «ماكس» بـ يحقق المعادلة دي على طول الخط. الأحذية والكوتشيات والشنط والأحزمة هي نقطة ضعف المكان، موديلات عجيبة وألوان مهجورة وأسعار مش منطقية، يستحسن ما تضيعش وقتك قدام ستاندات أي حاجة بـ تتلبس في الأقدام. يمكن الإكسسوارات البناتي والمشغولات والأعقاد حلوة شوية (من 30 لـ 50 جنيه) إنما بشكل عام «ماكس» مش بتاع إكسسوارات. الخدمة جيدة وموظفين المحل لابسين تي شيرتات لونها أحمر ومنتشرين عند كل الأقسام وهـ يساعدوك في موضوع المقاسات والتدوير على حاجة مش لاقيها. «ماكس» لسة ما أخذش حقه من الشهرة والإعتمادية، صحيح رواد مصر الجديدة بقوا عارفينه كويس، لكن المحل يستاهل يكون له زبائن من مصر كلها، لأن النوع ده من المحلات بـ يوفر وقت ومجهود وفلوس، ولو أذواق الحاجات هناك عجبتك هـ تلاقي نفسك زبون دائم وبـ ترشحه لكل معارفك.

...

نايكي: منفذ بيع ملابس رياضية بأسعار رخيصة في الهرم
اصدرت في: 28/08/2011

اللي غاويين يشتروا الحاجات اللقطة بـ يبقوا عارفين كويس منافذ بيع الملابس اللي أسعارها رخيصة في البلد، لكن منفذ بيع «نايكي» في شارع فيصل بالهرم ممكن يبقى فلت من رادارات الناس. وسط دوشة الشارع دائم الزحام، واضح أن محل «نايكي» قرر أنه يفرض نفسه ويظهر بأي طريقة وحط لافتة كبيرة فوق المحل مكتوب عليها "تنزيلات حتى 50%". العرض نازل على تي شيرتات كثيرة جدًا، من أول الموديلات السادة وعليها علامة "الصح" بتاعة «نايكي» بألوان متعددة من أول 99 جنيه وأنت طالع، ولغاية الأشكال الملعبكة أكثر بعلامات «نايكي» وتي شيرتات الكرة تبدأ من 169 جنيه. بنطلونات التريننج موجود منهم كثير، رغم أننا وقت ما رُحنا لقينا موديل منهم بـ 149 جنيه، لكن عادةً هما بـ يبقوا أغلى من كده هناك، ما بين 209 و299 جنيه. رغم كمان أن فيه تشكيلة كبيرة من الأحذية مرتبة بالمقاس، لكن أغلبهم للأغراض الرياضية. ممكن تختار منهم حذاء للجري أو للچيم ما بين 199 جنيه و599 جنيه. وكل ما تلاقي جزمة سعرها أقل من كده، كل ما هـ تلاقيها غريبة وسيئة. وتحس أصلاً أن أغلب الأحذية كانت نتاج رفض من تجارب سيئة، وخصوصًا في القسم الحريمي. لاعبي الكرة ممكن يختاروا حذاء ما بين 239 جنيه و599 جنيه، وفيه منهم تشكيلة واسعة أشكال وألوان من الموديلات والتصميمات: المرصعة، اللي فيها سنون، وأحذية الجري على النجيلة. ده حتى كمان متوفر منهم ألوان فاقعة زي الأصفر الفوسفوري، الأخضر، والأحمر والأبيض لكل الأولاد الشيك اللي غاويين كرة. وعلى عكس أغلب العاملين في محلات كايرو، البائعين في «نايكي» بـ يبقوا سايبينك براحتك وبـ يعطوك الحرية الكاملة أنك تتفرج وتقلب في المحل من غير ما يلاحقوك في كل خطوة. ده مش معناه أنهم مش بـ يساعدوك، بالعكس دول سريعين وبـ يجاوبوا على أي استفسار أو سؤال عندك، ومؤدبين ولطفاء. ده بـ يساعد أكثر لمّا تبقى بـ تقيس الأحذية، لأنك ساعات كثيرة بـ تضطر تجرب كذا حذاء وتبعته ثاني لو مش مناسبك، وهما مش بـ يبقوا متضايقين. لكن من تجربتنا، إحنا حسينا أنهم غالبًا بـ يبقوا منتظرين مكافأة منك على خدمتك. المشكلة في منافذ البيع الرخيصة للمحلات أنها مسألة حظ. مع البواقي القديمة، فغالبًا بـ يبقى مزيج من ده على ده وحاجات غريبة. لازم يبقى نفسك طويل شوية علشان تتسوق في مكان زي ده، لأنك غالبًا هـ تلاقي حاجة مناسبة جدًا لك وسعرها هـ يجننك، وفي الآخر هـ تلاقي أن مش متوفر منها غير المقاس الأصغر خالص، أو الـ X-Large. ما تخليش عندك عشم، وغالبًا هـ تلاقي حاجة لُقطة هناك.

...

التوحيد والنور: سلسلة المتاجر الضخمة في أنحاء القاهرة
اصدرت في: 07/06/2011

طبعاً غني عن التعريف، حتى لو ماصادفش انك دخلته أكيد عديت على واحد من فروعه المنتشرة في كل أحياء القاهرة، مصر الجديدة والجيزة والدقي وعين شمس والمقطم ومدينة نصر وفروع تانية كتير. المهم أنه دايماً موجود، ودايماً قريب من أي حد في أي حتة، والأهم أنه بـ يبيع كل حاجة ممكن الأفراد أو البيت يحتاجها؛ من الإبرة للصاروخ فعلاً. هـ ناخد جولة داخل فرع «التوحيد والنور» في الدقي. موجود في ميدان الدقي تحت كوبري الجيزة، هو نفسه صَرْح مش محتاج أي علامات، مبنى ضخم من 6 أدوار، بالليل بـ يكون منوَّر أنوار بيضاء ساطعة. الواجهات كلها إزاز وفيها معروضات، وفي الدور الأرضي بـ يبقى مكتوب على الإزاز كل العروض والخصومات اللي معمولة في الوقت ده بقلم ألوان فلوماستر بطريقة بدائية جداً، بس أصبحت من العلامات المميزة للمحل والظريف أن العروض والتخفيضات دي ما بـ تقفش طول السنة، عشان كده دايماً مكتوب بالألوان على الواجهة. بـ تدخل من البوابة الكبيرة وتسيب أي شنطة كبيرة معاك في الأمانات وتاخد بيها كوبون. قاعات العرض كبيرة وعلى شكل مستطيل وكل قسم واخد كاونتر وراه موظف بيع والمعروضات مرصوصة وراه على الحيطان وفي الأرفف، وفيه عواميد ضخمة في وسط المبنى عليها معروضات برضه تبع القسم اللي هي قريبة منه. الإضاءة عبارة عن "سبوت لايت" متركب في السقف باللون الأبيض، والمكان عموماً شكله مش فخم أو شيك خالص بس نضيف ومرتب. كل دور متخصص في معروضات وبضائع معينة، الدور الأرضي فيه أدوات وملابس رياضية ومشايات وأجهزة تدريب وركن خاص للإكسسوارات، وملابس رجالي للبيت والخروج. الدور التاني فيه ملابس الأطفال وسيدات وركن "البيبي" للوازم المواليد ولعب الأطفال، وفيه كاونتر مخصوص للجينز، صحيح الموديلات مش جديدة أو شيك قوي بس الخامات متينة وأغلى بنطلون مش هـ يعدي 100 جنيه. وعرفنا أن فيه مصانع ملابس بـ تعمل ماركات حصرية للتوحيد والنور بس زي ماركة «شيب – Ship»، وده بـ يفسر الأسعار المنافسة اللي بـ يقدمها المول. الدورين اللي بعد كده (الثالث والرابع) متخصصين في الأدوات المنزلية والمفروشات وتجهيز العرائس زي ما مكتوب على اليافطة الإرشادية اللي على السلم وانت طالع، وبالمناسبة مفيش أسانسير بس السلم مش متعب قوي. الألكترونيات موجودة بكل أشكالها بس ممكن تلاقي ماركات مش معروفة أو منتشرة قوي زي ماركة «نور» للغسالات العادية والسخانات، وماركة «مور» في الخلاطات والأفران الصغيرة، بس الميزة في الحاجات دي أن عمرها طويل وصيانتها سهلة. بإختصار «التوحيد والنور» بـ يبيع منتجات عملية ومن غير فلسفة أو كماليات فارغة وبأسعار رخيصة، وواضح أن دي سمة أساسية للمحل في كل معروضاته. فيه كمان موبيليات – مودرن وكلاسيك – في الدور الرابع، وقسم خاص للأدوات البلاستيكية زي الأطباق والستاندات والجزامات البلاستيك وأي حاجة تفكر أنك محتاجها في بيتك ومش عارف تجيبها منين، كل حاجة هـ تلاقيها هناك معمولة من البلاستيك، وفيه ركن كامل لمنتجات «الهلال والنجمة الذهبية» البلاستيك المشهورة. الأذواق عامة ممكن ماتعجبش ناس كتير، فيه حاجات تعتبر نموذج للإنتاج المحلي بكل عيوبه ومشاكله في التقفيل، بس زي ما قولنا المحل إقتصادي بمعنى الكلمة، وكل حاجة ممكن تجيبها هـ تعيش معاك أطول فترة ممكنة حتى مع الإستخدام الشاق، وده مايمنعش إنك تلاقي فلتات أو قطعة موبيليا تحفة تليق على الفرش في بيتك، عشان كده مش لازم تحكم بالإنطباع الأول ولازم تاخد جولة كبيرة وبتركيز ولو مش لاقي الحاجة اللي بـ تدور عليها إسأل عليها عشان هي أكيد موجودة بس أنت مش واخد بالك منها. نظام الدفع معقد شوية، بـ تختار الحاجة أو تقيس الملابس – فيه بروﭭات ملابس – وبـ تاخد بيها إيصال من موظف البيع المختص، وبعدين تروح تدفع في الخزينة اللي جنب السلم وأنت داخل، وتاخد الفاتورة تروح شباك تالت تستلم منه طلباتك. سياسة الإسترجاع والإستبدال معمول بيها بشرط يكون معاك الفاتورة. «التوحيد والنور» له طابع إسلامي من الداخل، آيات على الجدران، وكل العاملين ليهم هيئة دينية والسماعات الداخلية دائماً بـ تشغل دروس دينية وقرآن، بس المهم أن ده بـ ينعكس على أسلوب الخدمة والتعامل مع الزباين من الموظفين بشكل إيجابي جداً. لا غنى عن زيارة «التوحيد والنور» لأي حد بـ يحاول يعمل جولة تسوق إقتصادية ومش بـ يلاقي الحاجة اللي بـ يدور عليها في أي حتة تانية.

...

شاهد المزيد
مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح