الدقي تسوق in Cairo, Egypt

تسوق

صراط: ديكورات منزلية أذواقها رائعة وبأسعار كويسة وتوصل لك لحد البيت
اصدرت في: 21/12/2015

الأماكن اللي بـ نشتري منها أونلاين كثرت جدًا في الفترة الأخيرة، وفيه منها اللي تشوف صورتها وتيجي لك حاجة ثانية خالص، وفيه اللي فعلًا بـ يقدم لك الحاجة اللي في الصورة بجودة كويسة، وده اللي حصل لنا في تجربتنا مع صراط فريمز – Serat Frames. اتعرفنا على صفحة صراط من إعلان على ويب سايت ثاني بـ يعلن عن حاجات كثيرة للبيع منها الديكورات والأكسسوريز، وبعد كده لما تواصلنا مع النمرة الموجودة على الواتس أب عرفنا صفحتهم على الفيسبوك اللي مليانة حاجات مبهجة وبأسعار معقولة، صراط بـ يعرض براويز بأشكال مختلفة مبهجة ومخدات وباف وسجاجيد وحاجات كثيرة ألوانها جميلة وتصميمها مميز بـ نحتاج نزين بها البيت، أو نشتريها هدية لحد لسه بـ يوضب بيته. أول حاجة لفتت نظرنا كانت صورة لعلبة مفاتيح مُربعة مكتوب عليها "اللهم بارك هذا البيت" ولما سألناهم عن سعرها عرفنا أنها بـ 300 جنيه، كمان شفنا سجادة صغير بتصميم عمارة إسلامية، وتقدري تغيروا ألوانها زي ما تحبوا بـ 250 جنيه. كمان كان فيه 3 تابلوهات مكتوب على واحد في النصف آيه: "ومن يتق الله يجعل له مخرجًا" وجنبها تابلوهين حجم أصغر مرسوم عليهم ورد في شكل دائرة ألوانه حلوة، وواحد زيه، وتقريبًا نفس مقاساته بس ألوانه زرقاء مدرجة مكتوب عليه: "صلوا عليه وسلموا تسليمًا" والتابلوهين اللي جنبه مرسوم جواه ورد في دوائر مرسومة بطريقة هندسية مبتكرة، وسعرها 400 جنيه، صراط بـ تقدم حاجات كثير مميزة فعلًا بتصميماتها وألوانها وجودتها، وهم بـ يوصلوا حاجتهم عن طريق محلات بـ تبيع حاجات زيهم في الزمالك ومدينة نصر، أو بـ يبعتوها لحد البيت من خلال شركة شحن. إحنا حبينا نجرب نشتري منهم حاجة علشان التجربة توصل لكم كاملة، والحقيقة برغم أننا بـ نخاف جدًا من فكرة الشحن فاختارنا علبة المفاتيح المربعة البني، واللي للأسف كانت خلصانة من المحلات ولازم تتشحن لنا، وخوفنا ده كان بناء على تجربة سيئة من صفحة ثانية لأن اللي في الصورة بـ يبقى غير الواقع خالص، إلا أننا لما استلمنا حاجتنا كانت فعلًا ممتازة وزي الصورة وأفضل ومقاساتها مضبوطة، وخدمة الشحن تكلفتها 40 جنيه أو على حسب المكان طبعًا برضه. "صراط" من الأماكن القليلة اللي بـ تقدم منتجات مبهجة تستحق المبلغ اللي هـ تدفعه فيها، وتقدر تختار من منتجاتهم هدية بسيطة وحلوة وبسعر معقول.

...

ثريدز: Dream Catchers بأشكال وأنواع مختلفة للبيع على أنستجرام
اصدرت في: 12/11/2015

من ضمن الحاجات اللي القاهرة مهووسة بها الأيام دي هي الـ Dream Catchers أو مصيدة الأحلام؛ ولو أنت ما تعرفش هي إيه، هـ نشرح لك الموضوع ببساطة: مبدأيًا، هي عادة بـ تبقى دائرة رئيسية ملفوف حولها مجموعة من الخيوط المتداخلة بأشكال هندسية مكونة شبكة بـ تتقابل في المركز، ومعلق في الدائرة مجموعة من الأصداف والريش بأطوال مختلفة. ده الجانب التشريحي للـ Dream Catcher. أما وظيفتها بقى فهي الآتي: في التراث الخاص بالسكان الأصليين لقارة أمريكا، الـ Dream Catcher بـ تتعلق في أي مكان حُر فيه هواء (طبعًا في القاهرة ممكن تعلقها فوق السرير عادي هـ تشتغل، لأن أي حتة فيها هواء هنا هـ تلم تراب مش أكثر) لأنهم بـ يؤمنوا أن الأحلام –الحلو منها والوحش- بـ تبقى موجودة بالليل، والـ Dream Catcher هنا تلعب دورها في تمرير الأحلام السعيدة و"قفش" الكوابيس في شباكها... وبكده تنام نوم هانئ وعميق. شرحنا إيه هي الـ Dream Catcher... ندخل في الموضوع؛ تقدر تلاقي الـ Dream Catcher في أماكن كثيرة، وبأشكال مختلفة، ولكن أكثر حاجة عجبتنا في ثريدز – Threads (البيع من خلال أكونت أنستجرام) أنك ممكن تختار الألوان على ذوقك، ويوصل لك طلبك في خلال أسبوعين. المجموعة اللي وصلتنا كانت متنوعة، أولهاDream Catcher بصورتها التقليدية (65 جنيه)؛ الدائرة قطرها 7 سم ومستخدم فيها خيوط بدرجتين من اللون البنفسجي، وخيط التعليق لونه بني، أما مجموعة المعلقات اللي مربوطة في الدائرة نفسها فهي عبارة عن أصداف بيضاء، خرز خشبي ومعدني وريش لونه بني مائل للبرتقالي، بغض النظر عن أن سعرها أكبر من حجمها، لاحظنا كمان أن خيط التعليق لحامه من فوق ضعيف... يعني وارد جدًا أنه يتقطع وتربطه بنفسك. أما لو عاوز واحدة شكلها غير تقليدي، فيه Dream Catchers دائرتها الرئيسية مصنوعة من فروع الأشجار، وبالتالي شكلها أحلى بكثير، اللي معانا الخيوط الملفوفة عليها لونها تركواز، وفي مركزها صدفة بيضاء وبالتالي شكلها رائع مع لون خشب فرع الشجرة، ونازل من الفرع مجموعة ريش بنفس لون ريش الـDream Catcher اللي في الفقرة اللي فاتت. أما لو عاوز تمشي بالـ Dream Catcher الخاصة بك في كل حتة، ممكن تجيب من مجموعة السلاسل والأساور، حجم الدائرة طبعًا أصغر، ولكن ده معناه أن الشغل أدق وأحلى، قطر الدائرة في السلاسل بـ يوصل لـ 3 سم (50 جنيه) وبـ تبقى مُعلقة في سلسلة من الجلد المضفر أو الخيوط القابلة للضبط حسب المقاس، أما الأساور فهي ممكن تستخدم للقدم برضه لأن رباطها الجلدي قابل للضبط وقطر دائرتها بـ يبقى 2 سم (40 جنيه). إحنا عارفين أن كلمة Dream Catcher كتبت في المقال ده 11 مرة، فنوعدكم أننا خلاص مش هـ نكتبها ثاني، لأن ثريدز بـ يقدم بالتعاون مع Gazb للأحجار مجموعة سلاسل سعرها بـ يوصل لـ 140 جنيه على حسب نوع الحجر: الفلورايت الأخضر، الجمشت، الكوارتز أو الياقوت، الأحجار شكلها رائع وخصوصًا أنها بـ تبقى قطعة خام غير مصقولة وبالتالي مافيش سلسلة شبه الثانية، ده غير أن السلسلة بـ تبقى خيوطها معقودة بـ تكنيك "المكرمية" على الحجر فشكل السلسلة النهائي بوهيمي وغريب. سواء بـ تؤمن بالأسطورة الخاصة بالهنود الحمر، أو بـ تصدق في أن كل حجر له تأثير على صاحبه أكيد هـ تلاقي حاجة تعجبك في ثريدز، وحتى لو ما لكش في الكلام ده، هـ تعجبك حاجات ثريدز حتى كمجرد إكسسوار.

...

شوبيت: محل ملابس بأسعار قليلة جدًا وجودة متوسطة في الدقي
اصدرت في: 24/02/2015

طبعًا كل البنات بـ تحب وقت التخفيضات جدًا، خاصة أنه بـ يخلينا نشتري حاجات كثير ونحس أننا انتصرنا على غلاء الأسعار وفزنا بحاجة ذوقها راقي وسعرها كويس، وده مش بس متوفر في "شوبيت – Shubette".. لأ دول أسعارهم معقولة وعاملين تخفيضات على التخفيضات. الحقيقة أننا بـ نمر على المحل ده كل لما نتزنق في مناسبة، ونحب نشتري حاجة سعرها معقول وذوقها كويس، ودائمًا بـ يقضى الغرض اللي إحنا رايحين علشانه، المحل مش كبير خالص في شارع التحرير في الدقي، أول ما بـ تدخل بـ تلاقي على يمينك في الوش مجموعة جاكيتات جلد كبيرة سفنج على شكل مربعات أو سمبوكسات وفيه سوستتين على الجنب لونها ذهبي، فيه منه اللون الأسود والبني، وتخيلوا بكام؟ بـ 175 جنيه بس. وكان فيه أنواع بلوزات طويلة كثير صوف بس نصف كم، مزخرفة بألوان كثيرة مختلفة بالطول والعرض وأسعارها تبدأ من 130 جنيه، وكان فيه جاكيتات خفيفة منها اللون البني والأسود طويل لحد الركبة ومفتوح وله حزام من وراء، وكان بـ 130 جنيه، كمان كان فيه بلوفر طويل لحد الركبة سمبوكسات أسود في أبيض في رمادي وصوف خفيف، شكله حلو جدًا، لأنه من اليدين والظهر لونه أسود والشكل ده من أمام فقط، وكان بـ 130 جنيه برضه بدل 175 جنيه. وفيه بلوفر لفت انتباهنا جدًا، كروشيه وعبارة عن سمبوكسات برضه بس صغيرة وممتدة على سطر واحد ومكررة، وما بينهم خط أحمر كبير في النص وبعدين سمبوكسات ثانية بس برسمة مختلفة جواها مفتاح صغير، وكان فيه منه كل الألوان تقريبًا، الأسود والبني والأزرق والبيج، وكان بـ 95 جنيه. كمان كان فيه بلوفر صوف خفيف أبيض في أسود ومن وراء عند الظهر من فوق خالص فيه دانتيل صغير على شكل وردة مفرغة، سادة وبسيط وبـ 95 جنيه، وعنده تشكيلة هاي كول كل الألوان صغير وكبير، بس اللي عجبنا واحد طويل صوف خفيف لونه روز وطويل لحد الركبة وبـ 130 جنيه. وعنده بنطلونات جينز وجيبات وبلوفرات بأشكال ثانية مختلفة، بس دي أكثر حاجات لفتت نظرنا، وكان سعرها مناسب، خاصة أنه عامل قسم كاتب عليه خصم من فوق وكل اللي تحته حاجات بـ 95 جنيه، وقسم ثاني بـ 130 جنيه. بس هتنبسطوا أكيد.

...

لا فى بوهيمى: إكسسوارات يدوية وحليات من الماركة الإلكترونية الساحرة
اصدرت في: 22/12/2014

عزيزتى قاهرة المعز، استعدى لتمرد ضد مظاهر الرأسمالية. وسط عالم بـ تتحكم فيه ثقافة استهلاكية قدرت تسيطر على حياتنا فى كل حاجة من أكل، لبس وأى حاجة ثانية لها علاقة بالشراء، اتولد عندنا رغبة فى الحصول على حياة أبسط وأقل إدعاء. السنة دى ظهر ثلاثة مبدعين ألهمتهم الموجة الفنية المنتشرة فى مصر، ثلاثة شباب تجمعوا لابتكار ماركتهم الخاصة الفريدة من نوعها، من هنا خرج للنور "لا فى بوهيمى - La Vie Boheme"، القائم على مفهوم توصيل الطلبات عن طريق الفيسبوك، وبـ يقدم تشكيلة رائعة من المنتجات يدوية الصنع. منتجات لا فى بوهيمى متنوعة بشكل رائع، وبـ تقدم كل حاجة، بداية من الشال والكيمونو لمفكرات وألبومات الصور مزيّنة برسومات رائعة ومكتوب عليه أقوال مأثورة لغاية شنط يد عليها ورد، كل الحاجات دى يدوية الصنع وصديقة للبيئة وكل قطعة فيهم مالهاش مثيل. لما اتفرجنا على منتجاتهم الرائعة، لفت انتباهنا قطع جميلة لازم نطلبها؛ مفكرة مرسوم عليها يدويًا (55 جنيه)، كيمونو صوف (165 جنيه)، تاج يدوى من الورد حجمه كبير (70 جنيه) ودريم كاتشر مُلوّنة (160 جنيه). طلبنا دريم كاتشر حجم متوسط (45 جنيه) عن طريق صفحتهم على الفيسبوك، ردهم وصل سريعًا، وسألونا عن اللون المطلوب، فطلبنا يكون أزرق وأخضر. فى نفس اليوم، بلغونا أن طلبنا جاهز ونقدر نستلمه من الدقى، مافيش شك أن سرعتهم وكفائتهم أدهشتنا. أكيد تنفيذ الموضوع مش سهل، ده مش شنطة ورق يعنى! الدريم كاتشر كانت مغلفة باحتراف، مُزيّنة بشكل صحيح كان بسيط لكن شكله جميل وعليه جملة Made with Love"". الدريم كاتشر كانت مُزيّنة بحرفية بنفس الألوان اللى طلبناها، لكن الفكرة أن حجمها كان أصغر من الصور، الأحسن أنك تستفسر عن الحجم قبل ما تعمل طلب. لا فى بوهيمى بـ يحضّر خط جديد من المنتجات قريبًا يشمل ملابس يدوية، منها بنطلونات Harem، مع إكسسوارات منها شنط، وحلقان وقلادات. صحيح فيه ناس بـ تستغرب من فكرة شبكات التواصل الاجتماعى، لكن فى مصر، بـ تقدم لكل المصممين المبدعين وسيلة يقدروا من خلالها تقديم مواهبهم. الحقيقة أن المواهب الثلاثة الشابة وراء لا فى بوهيمي يعتبروا مثال حى، وبصراحة أكثر، ليه تتعب وتلبس هدومك وتروح مشوار مخصوص، فى حين أن عندك فرصة التسوق من بيتك بكل راحة؟

...

فيت ناتس: زبدة مكسرات للتوصيل فقط في القاهرة
اصدرت في: 22/10/2014

مهووسي الأكل الصحي في القاهرة عددهم بقى أكبر من أن الأماكن اللي بـ تقدم أكل صحي تكون مجرد ظاهرة، وخصوصًا أن كل مدى عدد الأماكن بـ يزيد. فيت ناتس - FitNuts هو أحدث الأماكن اللي بـ توفر لك سناك صحي في صورة زبدة المكسرات بأنواعها المختلفة. نعترف أن زبدة الفول السوداني اللي بـ نشوفها في السوبر ماركت هي حد علمنا في عالم زبدة المكسرات، ولما اكتشفنا أن فيه مكان بـ يقدم أنواع مختلفة منها وبدون أي إضافات صناعية، كان لازم نجربه. فيت ناتس بـ يقدم 7 أنواع مختلفة من زبدة المكسرات، كل نوع وله سعره؛ زبدة الفول السوداني مثلًا (20 جنيه)، اللوز (35 جنيه)، البندق (35 جنيه)، القرفة باللوز والزبيب (40 جنيه)، القرفة بالسوداني والزبيب (40 جنيه)، السوداني بالشوكولاتة (40 جنيه)، أما الشوكولاتة بالبندق (50 جنيه). سألناهم عن المكوّن اللي بـ يتم تحلية منتجاتهم به، وانبسطنا جدًا لما عرفنا أنهم مش بـ يضيفوا أي مواد تحلية (سكر، عسل... إلخ) على أي منتج عندهم. وبما أنهم ما عندهمش منفذ للبيع فعملنا الطلب من على تطبيق "الواتس آب" بمنتهى السهولة، وممكن بعد كده نأخذ الطلب بعد يومين من مقرهم في الدقي، أو يوصل لنا حتى باب البيت في أي مكان في القاهرة مقابل خدمة توصيل (10 جنيه). بعد يومين بالضبط من الترقب وصل الطلب في برطمانات متوسطة الحجم، كل برطمان عليه ملصق ملوّن عليه المكونات ومعلومات عن المنتج. أول حاجة جربناها كانت زبدة الفول السوداني واللي طعمها مختلف عن اللي بـ نشتريها من السوبر ماركت، لأننا حسينا فعلًا بطعم الفول السوداني من غير ما يتغير بفعل الدهون والسكريات المضافة في المنتج التجاري المعتاد. للأسف زبدة اللوز كان طعمها قديم بالرغم من أنها كانت أخف من اللي قبلها، ومعروف أن اللوز عامة نكهته مش بقوة الفول السوداني فما توقعناش أننا ننبهر منها. ولكن الانبهار الحقيقي كان في زبدة البندق بالشوكولاتة، واللي نقدر نعتبرها من هنا ورايح اختيارنا الأمثل لتحلية من غير إحساس بالذنب، الشوكولاتة اللي في الزبدة معمولة من بودرة بروتين بطعم الشوكولاتة، وبالتالي هي مفيدة. طبعًا إحنا بـ نحاول دائمًا نختار الأكل الصحي، ولو لاقينا حاجة مفيدة وفي نفس الوقت طعمها رائع أكيد هـ تكون هي اختيارنا الأول، لو متعود على طعم الأنواع التجارية هـ تحس بفرق، ولكن يكفي أن منتجاتهم كلها مكوناتها طبيعية، ده غير أن الخدمة ممتازة باستعدادهم أنهم يردوا على أي استفسار والدقة في مواعيد التوصيل.

...

بإيدي هوم ستور: إكسسوارات منزلية يدوية الصنع في المهندسين
اصدرت في: 28/09/2014

المقال كان من المفترض أنه يكون عن مجموعة من الإكسسوارات المميزة، واللي تحت اسم "زنوبيا". وبغض النظر عن أننا حاولنا نوصل للمحل في المرة الأولى بس ما عرفناش لأن العنوان كان موقعه غلط على الخريطة في صفحتهم على الفيسبوك- لما وصلنا أكتشفنا أن المحل اسمه بإيدي هوم ستور – B2eedy Home Store، وأنه بـ يبيع كمان مجموعة مميزة من الإكسسوارات المنزلية الخشبية والمصنوعة يدويًا. كان لازم ننبه أصحاب المكان أن مشكلة العنوان دي لازم تتحل، وضحوا أننا مش أول ناس تشتكي من الموضوع ده... فكر كام شخص ممكن يكون أتبع الخريطة وما وصلش فقرر أنه ما يروحش لهم ثاني. شخصيًا، لو ما كانش المرواح لهم ثاني من صميم شغلنا ما كناش حاولنا ثاني، وخصوصًا أنهم ما ردوش على التليفون في المرة الأولى علشان نستفسر عن العنوان. بس لازم نعترف أن المكان يستحق محاولتنا في الوصول إليه. أول حاجة بدأنا فيها كانت منتجات "زنوبيا"، وهي إكسسوارت حريمي فكرتها قائمة على الحنين لكل ما هو عتيق وكلاسيكي، ولكن في شكل حداثي بسيط وفكاهي في نفس الوقت. زي مثلًا ميداليات مفاتيح عليها لوجو ماركة المصاصات الشهيرة "Chupa Chupas" واللي عمله الفنان السيريالي سلفادور دالي (30 جنيه)، ومجموعة من السلاسل الطويلة منها واحدة عليها "أنا أحب أمي" (45 جنيه). ده غير مجموعة من العلب المعدنية اللي عليها صور ممثلين كلاسيكيين زي أحمد رمزي مثلًا (40 جنيه). المعروضات كثيرة ومتنوعة لازم تتشاف بالعين لأننا ممكن نقعد نحكي عنها للصبح، الجميل كمان أنك ممكن تعمل عندهم إكسسوار بصورة معينة عجباك. بقية المحل مليء بإكسسوارات المنزل، أول حاجة عجبتنا كان طقم فناجين قهوة من الزجاج الأبيض الشفاف المُطعم بالصدف بطريقة الأرابيسك (12 قطعة 850 جنيه)، كان فيه زيّه مجموعة من الكاسات (6 قطع 650 جنيه)، ولكن ما كانوش بجودة صنع الطقم الأول. بنفس تيمة الأرابيسك لقينا صواني خشبية قاعدتها مُطعمة بالصدف متوفرة في 3 أحجام: الصغير (180 جنيه)، الوسط (260 جنيه)، والكبير منها (350 جنيه). وعلشان تكمل الطقم، فيه مجموعة كبيرة من العلب الخشبية المُطعمة بالصدف أصغر حجم منها بحجم كف اليد (40 جنيه)، والوسط (135 جنيه) أما أكبر حجم (190 جنيه). ثاني ركن استكشفناه كان ركن مليء بأطقم الفوط المصنوعة من القطن، الحقيقة أنهم ما أبهروناش لأنك ممكن تلاقي زيهم بالضبط معروضين في أي معرض من معارض شركة العامرية للنسيج بسعر أقل، المهم أن الطقم منهم 3 قطع بمقاسات مختلفة (210 جنيه). الركن الثالث والأخير كان غالب عليه المنتجات الخشبية، واللي بـ تتنوع ما بين أطباق المكسرات متعددة الخانات بأشكال وأحجام مختلفة، منهم مثلًا واحد مربع الشكل ومكون من 5 أطباق قابلة للانفصال (225 جنيه)، ده غير الكوسترز Coasters للأكواب والأواني (80 جنيه)، وألواح التقطيع (85 جنيه). المنتجات كثيرة ومتوفرة بأشكال مختلفة صعب أننا نذكرها كلها هنا، إحنا حتى لاقينا كرسي Stool بدون ظهر من الخشب وقاعدتة من الشبك، صحيح حجمه صغير على سعره (500 جنيه) بس نعترف أن تصميمه عجبنا، آخر المعروضات المبتكرة اللي عجبتنا كانت مجموعة من الأباجورات المصنوعة من زجاجات قديمة الصغيرة (175 جنيه) والأكبر (200 جنيه). زي ما قلنا، لازم تروح تستكشف المكان بنفسك، وخصوصًا لو نفسك تهادي شخص اشترى بيت جديد، أو لو حتى نفسك تشتري لبيتك قطعة مميزة من وحي الطبيعة... وعلى فكرة مش هـ تتوه علشان توصل زيّنا، لأننا معلمين موقع المحل صح على خريطتنا.

...

 صبايا: ملابس حريمي في المهندسين
اصدرت في: 27/09/2014

نعترف أن المقال النقدي ده مكتوب بالصدفة البحتة. هي قصة طويلة ملخصها أننا كنا بـ ندوّر على مكان معيّن، بس منهم لله أصحاب المكان حاطين مكانهم على الخريطة غلط... نحاول نكلمهم على موبايل المحل مش بـ يردوا! فقررنا أننا نستخدم الخطة البديلة، وهي أننا نلاقي أي مكان ما كتبناش عنه قبل كده في المنطقة اللي إحنا فيها، فلاقينا صبايا للملابس الحريمي. كلنا عارفين أن أي محل ملابس مش بـ يقدم ماركة مشهورة، أو على الأقل موجود في مول، فرصته في المنافسة الأيام دي محدودة إن لم تكن شبه معدومة، إلا لو القطع اللي بـ يقدموها مختلفة ومميزة بدون الخروج عن إطار الموضة. كعادة المحلات دي، المعروضات عددها كبير ومتباين في الأذواق، علشان يقدروا يوصولوا لأكبر عدد من المشترين. أول مجموعة صادفتنا كانت عبارة عن بلوزات بسيطة وتفاصيلها بسيطة من الشيفون، قصيرة الطول والأكمام، ألوانها ما خرجتش عن الأبيض، الكريم والوردي الهادئ، أسعارها بـ تتراوح بين 185 و215 جنيه، نتصور أنهم ينفعوا لكتب كتاب صباحي مثلًا. أما اللي بـ يحبوا البلوزات تكون طويلة وبأكمام، لاقينا منهم واحدة أو اثنين منقوشين من الستان، نقشتهم بالنسبة لنا كانت زيادة عن اللزوم، سعر واحدة منهم (213 جنيه). من المعروضات الموجودة بكثرة الفساتين الصيفية الطويلة من الشيفون بنقوش مختلفة، لاحظنا أن كلها بلا حمالات، عجبنا منها واحد لونه سيمون (320 جنيه). فيه كمان عدد محدود من فساتين السهرة القصيرة من الستان، لاقينا منهم واحد سعره (280 جنيه). طبعًا الكلمة السحرية اللي ممكن تبسط أي مهووسة تسوق هي "تخفيضات"، صبايا عامل تخفيضات على مجموعة من التي شيرتات القطن واللي سعر الواحدة منهم بـ يتراوح ما بين (50 و70 جنيه) بعد ما كان سعرهم في حدود (185 جنيه). البنطلونات عددها محدود بالنسبة للقطع الأخرى ومعظمها غامقة وسادة تناسب سهرة أو خروجة مهمة لأن قماشتها لامعة، عدد البنطلونات الجينز قليل وسعرهم لا يقل عن (270 جنيه) للواحد. صبايا بـ يعرض مجموعة من الإكسسوارات اللي بـ تناسب كل أنواع الملابس، منها حلق فضي فيه أحجار زرقاء (50 جنيه)، وعقد طويل فيه دلاية هلالية الشكل (55 جنيه). ده بجانب الإيشاربات بخامتها وأشكالها المختلفة، لاقينا منها قطني مربع الشكل ومنقوش (75 جنيه). ما نقدرش نقول أن صبايا هو أول وجهة ننصح بها لأي مهووسة تسوق، ولكن ده ما يمنعش أنه يستحق الزيارة من آن لآخر يمكن تلاقي قطعة مميزة كده ولا كده.

...

سبرينج فلاورز: نباتات طبيعية وزهور في الدقي
اصدرت في: 13/05/2014

معلوماتنا عن عالم النباتات والأزهار محدودة لدرجة أننا لما بـ نبقى عندنا مناسبة وعاوزين نشتري ورد بـ نكسل، بس علشان حاسين أننا داخلين على عالم مبهم تمامًا، مش بـ نبقى عاوزين نشتري بوكيه جاهز والسلام، لأ بـ نبقى عاوزين نبقى زي المحترفين اللي بـ يروحوا ينقوا وردة وردة وعود عود، ونبقى فاهمين أسماء الأزهار ودلالتها وموطنها الأصلي، لكن قبل ما نوصل للمرحلة أكيد هـ تيجي مناسبات لازم نجيب فيها ورد، وعلشان كده قررنا نخوض تجربة زيارة أحد محلات الورود ونسأل كل الأسئلة اللي ممكن يسألها واحد مش بـ يفهم أي حاجة في موضوع الورد ده. زرنا محل «سبرينج فلاورز – Spring Flowers» الموجود في بداية شارع مصدق من ناحية ميدان الدقي، محل صغير موجود على الصف اللي في أول محطة بنزين التعاون، وسهل تشوفه من بعيد بكل الشجيرات والأصاري اللي حاطتها خارج المحل. دخلنا نتفرج على الورد المعروض اللي ما كانش كثير قوي لحسن الحظ علشان نعرف نسأل عن حاجات محددة. المحل فيه حوالي 20 نوع من الزهور مرصوصين حسب اللون والمنشأ، البلدي هو الغالب طبعًا، والمميز عند «سبرينج فلاورز» أنه بـ يبيع بأسعار رخيصة مقارنة بمحلات ثانية سألنا فيها بعد كده، وده لأنه عنده المشاتل والمزارع بتاعته بـ يجيب الورد منها، صحيح مش بنفس جودة المستورد اللي شوفناه هناك، لكن أسعاره مغرية جدًا. الجلاديولس والليليان والأرولة والفريسيا، أسماء طبعًا يعرفها المتخصصين، لكن إحنا لوحدنا عرفنا القرنفل وعباد الشمس والفل والياسمين والتيوليب، ودي فعلًا أكثر زهور بـ تُباع زي ما وضح لنا مدير المحل. الزهور بـ تُباع بالعود، العود بـ يبقى فيه زهرتين أو أكثر وشوية أوراق خضراء، العود بـ يتراوح من 2 جنيه لحد 5 جنيه في الأنواع البلدي أو المحلي، الورد الأحمر الهولندي العود فيه بـ 8 جنيه، وعلشان تعمل بوكيه لطيف حجمه صغير من غير أصرية هـ تحتاج مثلًا 20 عود من أنواع مختلفة بـ تختراها على ذوقك، وممكن تختار بوكيهات جاهزة بـأسعار من 50 جنيه لحد 200 جنيه، وكل ما الحجم بـ يزيد ده بـ يحتاج أصرية ولو صغيرة تشيله فيها، والمحل بـ يغلفها بطريقة شيك مناسبة للمناسبة اللي هـ تستخدمه فيها. فيه زهور مجففة ودي موجودة في بوكيهات جاهزة ما شوفنهاش معروضة بشكل منفصل، البوكيه بـ يبدأ من 150 جنيه وبـ يوصل لـ 300 جنيه، بـ يبقى فيه ألوان وقورة وغامقة أكثر، والزهور فيها بـ تبقى شكلها أقرب للحبوب المجففة، بس عجبنا جدًا لدرجة أننا افتكرناه نباتات صناعية. مش بس ممكن تشتري، ممكن كمان تأجر شجيرات وأصاري زرع بالواحدة لو عندك مناسبة ليوم واحد أو عدة أيام، في الحالة دي بـ تتحسب بسعر الجملة، يعني لو هـ تأخذ 5 أصاري مثلًا كبيرة مع شوية زهور ولمبات صغيرة علشان تزين شقة أو مدخل فيلا هـ تدفع على الإيجارات 200 جنيه مثلًا لكن الزهور لازم تشتريها لأنها بـ تذبل وممكن تتلف بفعل المشوار، فأكيد مش هـ تتأجر. ممكن تتفق مع إدارة المحل أن حد ييجي يعاين المكان ويحدد هو هـ يحتاج قد إيه للديكور والزينة، وتتفق على كل حاجة قبل المناسبة اللي عندك بيوم واحد، وممكن تعمل طلبيات كبيرة أو صغيرة بالتليفون بس بشرط تبقى عارف أنت عاوز إيه بالضبط. محتاجين شوية مذاكرة وكام زيارة لمحلات زهور ثانية علشان نعرف معلومات أكثر ننقلها لقراء كايرو 360، نوعدكم نعمل ده الفترة اللي جاية.

...

كومبيوتر شوب: كمبيوترات وإكسسوارات وحاجات ثانية فى الدقى
اصدرت في: 29/01/2013

فى رحلة شرائنا للاب توب جديد، قررنا نروح فرع كومبيوتر شوب الكبير فى الدقى، يمكن نلاقى عنده اللى بـ ندور عليه. تقدر تشوف اللون الأصفر البراق المميز للمحل الموجود فى شارع محيى الدين أبو العز من على بعد ميل.أول ما عدينا من الأبواب الأوتوماتيكية، قابلنا حائط عليه أحدث تليفزيونات سامسونج الذكية -اللى دائمًا إعلانه شغال على التليفزيون- بأحجام 23 و27 بوصة (2555، و3499 جنيه).قابلنا الموظف المسؤول عند الباب وأخذنا فوق عند قسم الكمبيوترات. طلبنا كان واضح وصريح، عاوزين أحسن وأحدث لاب توب موجود بس فيه نقطة مهمة.. لازم يبقى لونه وردى.كل الكمبيوترات الموجودة عليها بطاقة تعريف واضحة، وعليها لسته طويلة بالمواصفات جنب كل جهاز. وعلشان إحنا مش عارفين إيه الكمبيوتر الأسرع، أو إيه حتى اللى ينفع معانا، كل اعتمادنا كان أن الموظف يوصل لحل الموضوع علشان ما عندناش حل ثانى غير أننا نثق فيه.بدأت الرحلة مع الموديلين الوحيدين باللون الوردى عندهم؛ أول واحد سامسونج لونه وردى زاهى فى أسود موديل NP300 بسعر 3555 جنيه، واثنين سونى فايو زى بعض تقريبًا لونهم وردى فاتح (4995 جنيه و6495 جنيه). بعدها عرض علينا لاب توب نوعه ديل ألترا بوك سعره بـ يبدأ من 4299 لـ 6333 جنيه وممكن يتغير له جراب بـ 199 جنيه. رغم أننا اعترضنا بشدة على الموديل ده بالتحديد، خصوصًا أن مافيش جراب لونه وردى موجود، لكن هو أصر أنه موديل كويس وأننا لازم نشترى واحد منهم، أو الأحسن نختار واحد لونه أسود.صحيح أنه كان فاهم كويس هو بـ يقول إيه، لكن فكرة أنك تحارب علشان توصل لطلبك كانت مزعجة شوية، خصوصًا لما الموضوع يبقى فيه مبلغ مش قليل هـ يتدفع. وفى الآخر، الزبون دائمًا على حق، ولا إيه؟بجانب طرق البائعين فى الإقناع، الحاجة الثانية المهمة أن ولا كومبيوتر فيهم معاه نسخة مايكروسوفت أوفيس. كمبيوتر شوب بـ يبيع حزمة الأوفيس كاملة، بس هـ تكلفك 555 جنيه زيادة. لازم كمان تأخذ بالك أن مش كل الكومبيوترات معاها أحدث نسخة من ويندوز 8، علشان كده تأكد أن اللاب توب معاه نسخة جديدة.بعيدًا عن الاسم، كومبيوتر شوب عنده حاجات كثيرة غير الكومبيوترات وإكسسواراتها، فى الحقيقة بـ يقدم تقريبًا أى جهاز إلكتروني ممكن يخطر على بالك. بجانب الأجهزة السلكية واللاسلكية زى ماوسات الكومبيوتر (99 و300 جنيه) والكيبوردات (192 و492 جنيه)، فيه حائط كامل مخصص لشنط اللابتوب بمجموعة من الألوان والتصميمات، زى شنط مبطنة أنيقة ماركة بيلكن تقدر ترتب فيها كل متعلقات الكمبيوتر (374.99 جنيه). كملنا رحلتنا مع الأقسام المرتبة بشياكة، وشوفنا كل التليفونات السلكية واللاسلكية، والحبارات، والسماعات، والهاردات الخارجية، والسيديهات والديفيديهات الفاضية، وأجهزة الألعاب والتليفزيونات التقليدية.بـ يقدموا كمان عدد من إكسسوارات الـ iPhone والـ iPad زى الحوافظ، والأقلام، والأى ستيشنز وسماعات ماركة أى لوفiLuv تبدأ من 89 جنيه. السماعات القطنية اللى بـ تغطى الأذن سعرها 199 جنيه. معروض كمان عدد من أجهزة الأى باد للبيع، لكن للأسف مافيش أجهزة أى فون. ولسوء الحظ، كل أجهزة كومبيوتر شوب مقفولة وبكده ما تقدرش تجرب المنتج قبل الشراء.تقدر كمان تتفرج على منتجات كومبيوتر شوب أون لاين لكن ميزة الموظف فى المحل أنه يرشدك تشترى إيه، خصوصًا أنه بـ يفهم فى الكومبيوترات أكثر من أغلب الناس. أما بقى لو عندك مواصفات معينة فى دماغك، خليك حازم من الأول بخصوص طلبك علشان تقدر توصل للي أنت عاوزه.

...

أت هوم: إكسسوارات منزلية شيك فى الدقى
اصدرت في: 07/01/2013

"أت هوم - @Home" واحد من المحلات والأماكن الراقية الكثيرة شارع ميشيل باخوم المزدحم والمتخصصة فى مستلزمات البيوت، وتقريباً هو أكبر واحد فيهم. نافذة العرض المبهرة إللى معروض فيها فازات، وأباجورات، ولمبات وديكورات ثانية متنوعة، شدتنا علشان ندخل أت هوم..المحل مساحته كبيرة، طولاً وعرضًا، ومجهز بأرفف مليانة حاجات جميلة. القطع الموجودة مش مقسمة بترتيب معين والأسعار مش واضحة خالص؛ عادة آخر رقمين أو ثلاثة من البار كود هى السعر، وده بـ يخلى البحث متعب شوية ومحير. طول ما أنتى بـ تتمشى هـ تلاقى الموظف ماشى وراكى، وفى حين أن ده مزعج، بس هما حافظين الأسعار ولو مش عارفين، هـ يسألوا ويقولوا لك.بـ يبيعوا فى أت هوم أى حاجة تخطر على بالك تخلى البيت مريح أكثر؛ من كنب كبير لفردين من الجلد (17.000 جنيه) ومخدات ملونة، لغاية بلورات زجاجية صغيرة (سعر كيس وزنه 1.5 كيلو جرام يوصل لـ 75 جنيه). كمان شوفنا مجموعة أنيقة من الورود الصناعية مصنوعة من الأحجار الكريمة المقلدة سعرها يبدأ من 45 جنيه إلى 150 جنيه. وعلشان تقدر تضع الورود دى، عندهم مجموعة كبيرة من الفازات منها الطويل، والقصير، والكبير، والصغير، من الزجاج والبورسلين، أغلبها بألوان خفيفة. فازة أغرب شوية على شكل سمكة سعرها كان 450 جنيه.عندهم كمان مجموعة من الشموع بكل الأشكال والأحجام اللى ممكن تتخيلها. من الحاجات الموجودة شموع داخل الزجاج على شكل قلوب وورود (95 جنيه) مع أسطوانات تقليدية وشمعدانات لامعة. بـ يفخروا أن جزء من الشموع الموجود ممكن تفضل منورة لمدة 90 ساعة، بس حتى لو ده صح، بالمقارنة مع الشمع الثانى دول مالهمش أى رائحة. "أت هوم" كمان عنده مجموعة من الفوانيس، وعصيان الشمع وحوامل للزجاج اللى فيه شمع، كلهم موجودين بأذواق مختلفة، مصابيح مربعة بيضاء رديئة نوعًا ما بباب بـ يتقفل ويتفتح هـ تحبطك بسعرها 260 جنيه، أما مصابيح كلاسيكية من الزجاج والمعدن سعرها بين 390 و450 جنيه على حسب الحجم والشكل.فى وقت زيارتنا كان عندهم حاجات كثيرة للكريسماس، زى كرات تزيين شجرة الكريسماس، وشرائط لامعة، ومصابيح إضاءة ساحرة وزينة للأبواب، كانوا بـ يبيعوا شجرة كريسماس من الصنوبر طولها 2.2 متر ومعاها شوية أكواز صنوبر بسعر مستفز (4500 جنيه). وكنوع من التغيير العصرى على المنتجات التقليدية المتعلقة بالكريسماس بـ يبيعوا شجرة كريسماس معدنية روشة بـ 3200 جنيه. وخلى بالك أن مصابيح الإضاءة الساحرة مش مناسبة لوقت الشتاء بس، بعض منها مزين بأحجار لونها بنفسجى غامق، وشوية منهم بستايل المصابيح الصينية المغلفة بورق سعر الواحد حوالى 1200 جنيه وتقدر تستمتع بهم طوال السنة.بـ يبيعوا برضه منتجات مختلفة الاستخدامات زى كاسات زجاج (65: 80 جنيه للواحد)، مغناطيس للثلاجات على شكل زهور ساحرة مش مألوفة (سعر الأربعة 65 جنيه)، وعلب مجوهرات صينى، علامات للكتب وعلّاقات جميلة للحائط.أت هوم واحد من أغلى محلات الإكسسوارات المنزلية فى القاهرة، علشان معظم المنتجات مستوردة من شركة بارلان العالمية. بس بعيدًا عن الأسعار، المحل بـ يخليك تحس بانتعاش، وبـ يجيب دائمًا أحدث وأرقى وأجمل القطع المنزلية اللى ممكن تلاقيها فى القاهرة.

...

شاهد المزيد
مواضيع خاصة

النهارده في القاهرة: سهرة ميكس مع كل ألوان الفن

رغم البرد اللي مخلي كل الناس عايزة تفضل متدفية في السرير، بس برضه أجندتنا مابتخلاش من الحفلات اللي هتخليك تصحصح وتفرفش، علشان تخرج تقضي ليلة سعيدة بعد الشغل. تعالوا