وسط البلد تسوق in Cairo, Egypt

تسوق

لينرت & لاندروك: مكتبة، وجاليري، ودار نشر وكنز مستخبي في وسط البلد
اصدرت في: 14/04/2015

الحقيقة أن "لينرت & لاندروك - Lehnert & Landrock" يعتبر كنز ثمين مستخبي كويس وسط محلات شارع شريف باشا في وسط البلد، بتاريخه العريق من وقت افتتاحه سنة 1936، اسم المحل جاء من أسماء أصحابه، وهم اثنين أصدقاء من مواليد بوهيميا وساكسون، واللي نجاحهم الحقيقي بدأ في تونس سنة 1904. رودولف فرانز لينرت وإرنست هينريك لاندروك كانوا في الأصل مصورين فوتوغرافيا، كٌتَّاب ومسافرين، وبعد سنين من السفر، وصلوا القاهرة وفيها فتحوا محل بـ يعبر عن كل هواياتهم: التصوير، والفن وكتب عن السفر والثقافة. على مدار السنين، المحل قدر يحافظ على شكله تقريبًا، يمكن مع شوية بضاعة وقطع فنية زيادة، وتحديدًا مصنوعات يدوية في صورة منسوجات ممكن تشوفها على الأرض. متوسط تكلفة الشنط هناك 110 جنيه، مع أساور خياطة بسيطة سعرها يبدأ من 10 جنيه. عندك كمان لوحات متعلقة على الحوائط بـ توضح قدر كبير من الصبر والشغل، معروضات ثانية من الخزف موجودة في الدور الثاني على شكل كوبايات، وزجاجات، وأطباق وسلطانيات، ومعظمهم عليه أشكال أو لمسات مصرية. أغلب الكتب الموجودة هناك إنجليزي، وفيه شوية منهم ألماني، وفرنساوي وعربي ممكن تلاقيهم تحت عناوين تخص السفر والثقافة، الأسعار هناك عالية شوية، تبدأ من حوالي 100 جنيه للكتاب، بس كلها عناوين لسه جديدة طازة. ده مش مجرد محل تشتري منه حاجات، يعتبر كمان جاليري نوعًا ما، وفيه قطع يدوية تاريخية من صنع الأستاذين، الفنانين والكتَّاب أصحاب المكان، منها كاميرا من صندوق خشب ومجموعة من الصور القديمة، وكلهم معروضين في كابينة زجاجية كبيرة. دول يعتبروا معرض في حد ذاتهم. معروضات ملونة مبتكرة بـ تملأ الأرفف، وتقريبًا معظم الحاجات بـ تدور حول الثقافة المصرية من الكتب على الأرفف للوحات المتعلقة على الحوائط. أسعار كثير من المعروضات عند لينرت & لاندروك تبان غالية شوية، لكن في نفس الوقت تعتبر مناسبة جدًا لو عملت حسابك أنك مش بـ تشتري حاجة عادية، أنت بـ تشتري قطعة فنية. أكيد المكتبة تعتبر مكان مثالي للهدايا الصغيرة والكبيرة، خصوصًا أنها مليانة إكسسوارات زي قواعد كوبايات، هدايا للكريسماس منحوتة من الخشب، علامات كتب، بطاقات تهنئة، مفكرات، مغناطيس للثلاجات ونتائج، لينرت & لاندروك من المحلات اللي ممكن تلف فيها شوية حلوين.

...

إنكوكو إيجيبت: متجر إلكتروني قاهري لبيع ماركة زينة للأظافر الأمريكية
اصدرت في: 13/04/2015

صحيح كثير من الناس شايفين أن مواقع التواصل الاجتماعي تافهة ومالهاش أهمية، لكن في مصر الموضوع يختلف، عدد اللايكات على صفحات الفيسبوك وإنستجرام أهميتها بـ تزيد للقاهريين مع توجه عدد من الناس لعرض منتجاتهم عليها، من هنا، كثير قرروا يستوردوا منتجات مش متوفرة في مصر، زي مستحضرات التجميل والملابس. "إنكوكو إيجيبت – Incoco Egypt" عمل كده، وبـ يقدم لأهل القاهرة من محبي أفكار تزيين الأظافر ماركة شرائط الأظافر الشهيرة "Incoco". لاقينا حسابهم على إنستجرام، وشوفنا في منتجاتهم بديل هائل لطلاء الأظافر بكل صعوبة تنفيذه وبهدلته، من غير تفكير كلمناهم على WhatsApp، واختارنا ألواننا المفضلة من بين منتجاتهم المعروضة على حسابهم وحددنا ميعاد لمقابلتهم واستلام شرائطنا. اختياراتنا كانت درجة من اللون البنفسجي 'Royalty' بـ (40 جنيه)، 'Passion' باللون الأحمر (40 جنيه) وطقم مانيكير فرنسي تقليدي (50 جنيه). مع عرض 3 بسعر 2، دفعنا في الآخر ثمن اثنين بس (إجمالي 90 جنيه). إنكوكو إيجيبت بـ يقدم مجموعة متنوعة من درجات الألوان، وكمان تصميمات مختلفة، تشمل أشكال ورد، لمّيع وشرائط بلونين. طلباتنا وصلت في الوقت المحدد وشرحوا لنا طريقة استخدامهم، وكمان معاهم مبرد أظافر هدية. علشان نكون صرحاء معاكم، أصعب حاجة في الموضوع كانت تركيب الشرائط، كل مجموعة بـ تتكون من 14 شريط، 7 لكل يد، بحيث يتبقى عندك قطع إضافية علشان الغلطات اللي ممكن تحصل وقت التركيب، أول ما عرفنا نركبهم، حسّينا بسهولة الموضوع، وفي الحقيقة، طلع أسهل بكثير حتى من طلاء الأظافر. الشرائط كانت مضبوطة على الأظافر وشكلها النهائي كان ممتاز- طبعًا على قد ما قدرنا بالنظر لصعوبة تركيبها، كمان بعد تركيبها، نشفت فورًا على الأظافر، طبعًا علشان الشرائط دي أصلًا معمولة من طلاء أظافر بعد ضغطه وتجفيفه، شكلها كان بـ يلمع زي الطلاء بالضبط. عمومًا، شرائط إنكوكو عملية أكثر مما تتخيلي، خصوصًا لو كنت مستعجلة ومافيش وقت علشان تستني طلاء الأظافر ينشف. الأسعار ممكن تشوفيها غالية شوية، خصوصًا أنها للاستخدام مرة واحدة بس، بغض النظر، جودة وكفاءة المنتج، مع الخدمة السريعة والمضبوطة، بـ تعوَّض فرق السعر البسيط.

...

مكتبة الجامعة الأمريكية بالقاهرة: كل الغذاء اللي عقلك محتاجه في وسط البلد
اصدرت في: 25/10/2014

بدون أي تفكير، مكتبة الجامعة الأمريكية بالقاهرة – AUC Bookstore تعتبر من أرقى وأحسن المكتبات من حيث الشكل والمضمون؛ وبالرغم من أن موقعها داخل الحرم الجامعي، فهي مع ذلك متاحة للجميع، مش بس لطلبة الجامعة أو العاملين بها. كل اللي محتاجه علشان توصل لها هو بطاقتك الشخصية، وفرد الأمن هـ يدلك على مكانها بمنتهى البساطة. صحيح المكان يستاهل كل الاحتياط الأمني المفروض عليه؛ لأن المكان يختلف كثير عن الجو الخارجي المعروف لمنطقة وسط البلد، ففي الحرم نفسه المكان هاديء والخضرة في كل مكان مع وجود مقاعد خشبية للجلوس، أما في المبنى نفسه فالصمت هو سيد الموقف، وكل اللي في المبنى محترمين قعدة الصمت دي. مش هـ نكذب عليكم، أسعار الكتب تعتبر غالية، إلا أننا صادفنا كتاب "The Secret" لـ "روندا بايرن" (100 جنيه)، والنسخة الفاخرة من المصحف بالإنجليزية (330 جنيه). عدد الكتب كبير، ومعظمه مرتبط بالأقسام العلمية في الجامعة الأمريكية، ولكن ده ما يمنعش أنها منظمة ومرتبة بترتيب واضح وسهل في عملية البحث، من ضمن الأقسام دي: كتب تعليم اللغة العربية، والدراما والشعر، والكتب الكلاسيكية، والأخير لاقينا فيه مجموعة كبيرة لكتب شكسبير، وهيمنجواي وتشارلز ديكنز. قسم الأطفال مش كبير، ولكن ده ما يمنعش أن فيه عناية كبيرة به، وكعادة أي حاجة متعلقة بالطفولة لاقينا كتب مجسمة ألوانها مبهجة ومغرية جدًا حتى لمجرد الفرجة، بنفس حجم القسم اللي فات لاقينا مجموعة من الأدوات المكتبية زي المذكرات بحجم الـ A5 من الجلد (100 جنيه) وإسكتشات الرسم بحجم الـ A4 بـ 40 جنيه). أجمل حاجة أنك ممكن تأخذ وقتك في البحث على اللي أنت عاوزه في هدوء تام، أو أنك تسحب كتاب وتأخذ فكرة عامة عنه في منطقة مخصصة للجلوس في آخر المكتبة، ده غير أنك لو محتاج مساعدة أو عندك استفسار هـ تلاقي ألف من يدلك.

...

الرفاعي: جزارة وتجهيز لحوم بشكل مبتكر في عابدين
اصدرت في: 25/05/2014

مش فاكرين لو كنا كتبنا عن محلات جزارة قبل كدة على صفحات كايرو 360 لكن لاقينا أنه من الضروري نتكلم على المحل اللي اكتشفناه من فترة وبـ يعمل خدمة مميزة، مش مجرد جزارة وثلاجة لحوم وقورمة وساطور، لكن بـ يجهز أكلات ولحوم تأخذها على التسوية مباشرة، فكرة حلوة وممكن تعمم، بس «الرفاعي» سبق الكل وعمل الدعاية اللازمة وأصبح من أشهر محلات الجزارة اللي بـ تعمل الموضوع ده. جزارة «الرفاعي» موجود في بداية شارع الشيخ ريحان اللي فيه أحد أضلاع قصر عابدين العريق، بجواره عدد من محلات اكسسوارات السيارات والأدوات المنزلية، لكن سهل تشوفه بيافطته المضيئة والكراسي والترابيزات اللي راصصها قدام المحل، ده علشان لو حبيت تأكل عنده. هو صحيح مش مطعم بالمعنى المفهوم، لكن ممكن تقعد وتطلب حواوشي، الأكلة الوحيدة اللي بـ يحضرها ساخنة وبـ يعمل شوية سلاطات ومخللات. كل أنواع اللحوم موجودة، البقري الكندوز والبتلو والجملي والضاني، كبدة وممبار وغيره، مافيش أرانب أو طيور، لحوم وبس، أسعار الكيلو هي العادية لكن أعلى شوية من اللي هـ تلاقيها عند أي جزار في منطقة شعبية، البتلو بـ 70 جنيه والكندوز بـ 60 جنيه. وطبعًا بـ تنقي الحتة اللي انت عايز منها في الذبيحة، والخدمة هنا جيدة سريعة حسب ما جربنا أكثر من مرة، يعني ما تتوقعش أنك ممكن يتضحك عليك أو تأخذ حاجة مش زي ما أنت عايز، يعني حتى لو خبرتك قليلة في شراء اللحوم، هنا هم هـ يعملوا لك اللازم. نيجي بقى للجزء المتخصص عند «الرفاعي» وهو اللحوم الجاهزة للتسوية، ممكن تشتري كيلو كفتة متبلة وجاهزة على للسيخ على طريقة الحاتي (60 جنيه) والممبار النظيف على الحشو مباشرة بـ 23 جنيه، ولو مسلوق هـ يبقى بـ 30 جنيه. فيه كبيبة شامي جاهزة للقلي بـ يبقى عبارة عن طبق نصف كيلو بـ 24 جنيه، وكذلك السمبوسك باللحم بنفس السعر. السجق على طريقة محلات الكباب بـ يتباع جاهز بـ 35 جنيه، وفيه بطاطس محشية لحم وكفتة بطاطس بـ 17 جنيه الطبق النصف كيلو. وطبق نصف كيلو كفتة أرز بـ 27 جنيه، وأخيرًا فيه ورق عنب محشي وجاهز للتسوية طبق نصف كيلو بـ 16 جنيه. الحواوشي هو الأكلة الوحيدة اللي تأكلها جاهزة هنا، مش أي حواوشي كمان، حواوشي بالخضروات والجبنة السايحة أو حواوشي بالسجق، لحم بلدي من منتجات المحل وسهل أنك تعرف قد إيه هو فريش ونظيف بمجرد ما تشم الرائحة، قبل وبعد التسوية، الرغيف بـ 7 و بـ 9 وبـ 11 جنيه حسب الحجم والإضافات، والطعم خرافي، مش هـ نبقى بـ نبالغ لو قلنا أنه أحسن حواوشي شعبي في مصر، بـ يتعمل مخدوم ولا أروع، وممكن كمان تأخذه نصف تسوية وتكمل عليه في الميكروويف أو الفرن في البيت، ينفع تعمل به عزومة عشاء سريعة مش شوية بطاطس محمرة وسلاطات. الحقيقة «الرفاعي» عجبنا جدًا بعد ما رشحه لنا أحد الأصدقاء من سكان المنطقة، الجزارة العريقة دي قررت تعمل خدمة من نوع جديد كان لازم نسلط عليها الضوء في كايرو 360، والميزة المهمة كمان أنك تقدر تحدد طلبك بالتليفون وتروح تأخذه في ميعاد معين، لأنه بـ يتم تجهيزه فريش وحسب رغبتك في الإضافات وغيره. جربوا الرفاعي وعلى ضمانتنا.

...

ألوان: أدوات وخامات فنية في وسط البلد
اصدرت في: 19/05/2014

بالرغم من أن نسبة المبدعين في القاهرة بـ تزيد يوم عن الثاني، إلا أن مازالت المحلات اللي بـ توفر الخامات والأدوات الفنية شبه نادرة، يمكن اسم أو اثنين اللي ممكن نفكر فيهم لما نقرر نطلّع البيكاسو اللي نايم جوانا، "ألوان – Alwan" بفرعها الصغير نسبيًا في وسط البلد هـ يوفر لك أي خامة تحتاجها في سبيل الفن. "ألوان" أصبحت قِبلة المبدعين في كل مكان، وانتشرت في أنحاء القاهرة مش بس بفرع وسط البلد، دي كمان لها فروع كثيرة في مدينة نصر، والزمالك ومصر الجديدة والفجالة، وقريبًا في الهرم (يعنى ما لكش حجة، الرك على الموهبة). ألوان بـ تتعامل مع فنانين كبار ومشهورين، فمافيش مجال أنك تأخذ خامة مشكوك فى أصالتها أو جودتها... كل الخامات والدرجات اللونية محفوظة في المخزن اللي في الدور العلوي: من الأبيض الناصع وحتى البني المحروق. وطبعًا الخامات والموهبة مش كفاية: ألوان عندها كل الأدوات اللي هـ تساعدك في الإبداع، من أول الفُرش بمقاساتها المختلفة وحتى أدوات النحت. ده غير الورق، وتوالات الزيت (اللي هي الشاسيهات اللي بـ يترسم عليها وبـ تشوفها في المعارض كلوحات... عارفها دي؟) وإسكتشات بجميع المقاسات علشان أفكارك النيرة ما تهربش منك! هو صحيح فرع وسط البلد صغير، إلا أن بمجرد دخولك هـ تنسى المساحة الضيقة، وهـ تلاقي نفسك أخذت وقت طويل في الفرجة وأنت مش داري من الاستمتاع. القائمين على مساعدتك تحت رهن إشارتك، عارفين كل حاجة فين وبـ تستخدم في إيه وإيه أحسن حاجة في نوعها... لدرجة أننا شكينا أنهم هم كمان فنانين بس مش لاقيين فرصة. زي ما قلنا كل الدرجات اللونية موجودة وفيه جميع الخامات، سواء ألوان مائية واللي مشهورة بشفافيتها، والجواش الأثقل من حيث القوام وطبعًا ألوان الزيت بقوامها الأثقل على الإطلاق، وبما أنها بـ تحتاج جهد في التحضير فهي بالتالي بـ تأخذ وقت في الجفاف، كمان فيه تقريبًا كل الدرجات من البديل الأسهل لألوان الزيت وهي ألوان الأكريليك، واللي بـ تمتاز بسرعة جفافها. مثلًا، أنبوب لون 50 مل سعره (11 جنيه)، بينما العلبة الـ 15 لون سعرها (75 جنيه)، أما العلبة اللي فيها 24 لون (100 جنيه)... العلبة تنفع كهدية لشخص موهوب، أو كنوع من التوفير في سعر الأنبوب الواحد. إسكتش حجم A4 سعره (18 جنيه)، حجم الـ A3 سعره (36 جنيه)، بس خذ بالك أن نوع الورق وسُمكه بـ يفرق في السعر، والاختيار بـ يرجع لنوع الخامة اللي هـ تستخدم لها الإسكتشات دي. بالرغم من ارتفاع الأسعار نسبيًا في ألوان، إلا أننا مستوعبين فكرة ندرة الأماكن اللي بـ توفر الخامات الفنية في القاهرة، وبالتالي ندرة الخامات نفسها. المكان ملىء بكل ما تحتاج لممارسة الفن، وسواء كنت فنان تشكيلي عبقري، أو مجرد هاو مبتدئ هـ تحس داخل المكان إحساس طفل صغير داخل محل لعب.

...

جوهرة الفن: آلات موسيقية وإكسسوارات في وسط البلد
اصدرت في: 09/04/2014

الاسم معروف لكل المزيكاتية اللي في مصر تقريبًا، لأنه بجانب أن فرعه الأصلي موجود في شارع محمد علي، معقل الفنانين والآلاتية من 120 سنة تقريبًا. «جوهرة الفن» موجود قريب من ميدان العتبة في بداية شارع القلعة "محمد علي سابقًا" وله فرع ثاني بجوار النادي الأهلي في مدينة مصر، لكن زيارتنا كانت للفرع الأصلي اللي فيه كذا ميزة تخلينا نرشحه لكم للزيارة حتى لو كنت قريب من مدينة نصر، أولًا هنا المخازن والمصانع والورش الخاصة بالشركة، يعني اللي مش هـ تلاقيه معروض في المحل هـ يجيبه لك في دقائق، وفرصتك في الفرجة هـ تبقى أكبر علشان ممكن تتفرج على المعروضات في أي من الأماكن دي، ثانيًا هنا بس هـ تلاقي أكبر تشكيلة من الآلات الإيقاعية وخصوصًا الدرامز والإكسسوارات الخاصة بها، ثالثًا لأنك في النهاية في شارع محمد علي، يعني لو ما لقيتش اللي أنت بـ تدور عليه هنا في المحل ادخل المحل اللي بعده على نفس الصف، هنا أكبر سوق للآلات الموسيقية في مصر، والأسعار من الآخر، من الآخر يعني أرخص من أي مكان ثاني، لكن ده مش معناه أن مافيش فصال! حاول دائمًا تأخذ أحسن سعر، بالذات لو هـ تشتري حاجات كثير. بنسبة كبيرة كل الآلات الموسيقية موجودة هنا، جيتار أكوستك وإليكتريك وباص جيتار وعود وكمان وتشيللو وأورج واكسليفون وطبول وآلات إيقاعية أفريقية وهندية ودرامز ونحاسات وآلات نفخ خشبية ونحاسية، ده بالإضافة للوازم الصوت ومعدات الحفلات من ميكسرات وسماعات وميكروفونات وأمبلفاير، يعني من الآخر حاجات قليلة قوي اللي مش هـ تبقى موجودة هنا، والمشكلة هـ تواجهك بس لما تكون بـ تدور على نوع أو موديل معين من أي آلة، لأن هنا هم بـ يبيعوا الأساسيات والحاجات اللي تناسب المبتدئين بشكل كبير، أكيد فيه حاجات احترافية، لكن لاحظنا تردد مدرسين الموسيقى اللي بـ يشتغلوا في مدارس جايين يأخذوا آلات بالجملة أثناء وجودنا في المكان، وناس داخلة تشتري آلات موسيقية كهدايا لأولادها، يعني المكان مش غالب عليه الطابع الاحترافي أو المتخصص، لكنه بـ يؤدي الغرض كويس جدًا طالما كنت عاوز سوق آلات موسيقية متنوع وبأسعار معقولة. بـ يبيع جيتار ماركة Cort بأسعار من 400 لـ 1000 جنيه، أكوستك وسيمي أكوستك، وفيه جيتار ماركة Fitness وسوزوكي بـ 300 لـ 500 جنيه، والإلكتريك بـ يبدأ من 1000 جني لحد 2000 جنيه، الماركات دي حصرية عند جوهرة الفن، ونفس الكلام في الدرامز ماركة Mapex اللي يعتبر المستورد الوحيد له في مصر، ودي سعرها 3600 جنيه من غير أي نحاسات، لكن «جوهرة الفن» واخد توكيل ثاني لماركة Sabian العالمية المتخصصة في نحاسات الدرامز، واللي بـ فيها موديلات الـ sbr اللي الطقم بتاعها بـ 1200 جنيه لحد الـ B8 Pro اللي بـ 2400 جنيه، وكل فترة بـ ييجي للمحل موديلات أحدث من الدرامز والنحاسات لكن بـ تخلص أول بأول. وفيه درامز Power Beat بـ 2000 جنيه، وطقم آلات إيقاع لاتينية بـ 700 جنيه. الكمان أو الفيولين فيه منها كل المقاسات، واللي بـ يلعبوا مزيكا عارفين أن فيه أوكتافات ونغمات مختلفة لكل مقاس، بأسعار من أول 200 جنيه لحد 2000 جنيه، والأكسليفون الخشبي الكبير بتاع المدارس ده بـ 135 جنيه، وفيه موديلات صغيرة بس مستوردة وصوتها أجمل بـ 140 جنيه. يمكن أضعف قسم هنا هو الخاص بالأورج اللي فيه موديلات صينية مجهولة وبأسعار من 500 لـ 1000 جنيه، صحيح صوتها مش بطال، بس مش عارفين عمرها الافتراضي ممكن يبقى قد إيه، شكلها ما يشجعش، حتى الموديلات الياماها اللي هنا صيني مش زي الموجودة في توكيل ياماها في مصر الجديدة. ممكن تتصل بالمحل وتسأل عن حاجة معينة موجودة ولا لأ قبل ما تروح، وزي ما وضحنا غالبًا لو موجودة هـ تبقى في فرع العتبة. العاملين في المحل مهذبين وهـ يساعدوك من قلبهم، بس ما تنساش تدفع بقشيش كويس للشخص اللي ساعدك بعد ما تخلص جولة مشترياتك، وخد بالك أن الإدارة هنا مش ودودة زي العاملين، هـ تحس أنهم ساكتين وخلقهم ضيق طوال الوقت، فحاول تتفاداهم لحد لحظة دفع الفلوس، وبالمناسبة ماكينة الفيزا كارد موجودة لكن ساعات بـ تبقى عطلانة، فما تعتمدش عليها قوي، ونتمنى لك جولة موفقة في شارع المزيكا، شارع محمد علي.

...

شادي علي: إكسسوارات وقطع غيار دراجات نارية في وسط البلد
اصدرت في: 16/02/2014

لما لاحظنا الإقبال اللي حاصل في البلد على شراء السكوتر والموتوسيكلات الصغيرة للتخلص من مشكلة الزحمة، ولاحظنا كمان أنها بدأت تتحول لأسلوب حياة وعشق لكثير من الشباب اللي سنهم صغير نظرًا لرخص أسعارها وسهولة الإنفاق عليها كهواية، بدأنا نستكشف الأماكن اللي بـ تبيع لوازم الدراجات النارية وكمالياتها وقطع غيارها، ولاقينا أن فيه عدد كبير منها موجود في أماكن راقية في المعادي ومصر الجديدة والرحاب والمهندسين، لكن أكيد الوجود في الأماكن زي دي له ثمن، وهـ تدفع فلوس لحد ما تقول يا بس، لأن الكماليات ما لهاش آخر والموضوع بـ يبقى شيق لأقصى درجة، علشان كده كان لازم نلاقي البدائل الأقل سعرًا، واللي مش بالضرورة تكون أقل جودة، لأن في النهاية الموضوع عبارة عن مجموعة مستوردين بـ يجيبوا اللوازم دي من الخارج وبـ يوزعوها على التجار الصغار والمحلات في كل مكان في مصر. ولاقينا ضالتنا في منطقة الوكالة في وسط البلد، تحت كوبري 15 مايو وحي بولاق أبو العلا، لاقينا دهاليز طويلة وممرات جانبية فيه في كل ناصية فيها محل بـ يبيع إكسسوارات الموتوسيكلات ومعارض كبيرة بـ تبيع سكوترز ودراجات بخارية متنوعة. فاختارنا واحد من المحلات الكثيرة اللي شوفناها وقررنا ندخل نعرف هو بـ يبيع إيه وبكام بعد ما عرفنا أننا في سوق كبير للموتوسيكلات وأن كل المحلات أسعارها قريبة من بعض تقريبًا. المحل اللي دخلناه اسمه اسم صاحبه «شادي علي» أو شركة شادي علي لتجارة الموتوسيكلات وقطع غيارها، محل صغير موجود في شارع العيسوي المتفرع من شارع 26 يوليو، هنا سهل توصل لأي محل بسؤال أي من الباعة الجائلين المنتشرين في الوكالة. محل شادي علي متخصص في الكماليات عالية الجودة المستوردة اللي بـ يستخدمها أصحاب الموتوسيكلات الرياضية والموديلات اليابانية زي هوندا وسوزوكي وكاوازاكي، وعنده بعض لوازم السكوتر بس مش متخصص فيها قوي. هنا ممكن تلاقي خوذات بمقاسات وأسعار مختلفة، من ماركات LS2 و MRC بـ تبدأ من 350 جنيه لحد 550 جنيه، منها اللي بـ تغطي الرأس كلها ومنها اللي بـ يغطي نصف الرأس. كل لوازم الحماية وأنت راكب موجودة، أطقم حماية الركبة والكوع البلاستيكية المقواة بـ 100 لـ 250 جنيه حسب المساحة اللي بـ تغطيها من الجسم، قناع من القطن بـ يتلبس على الأنف والفم للحماية من البرد والأتربة بـ 70 جنيه، قفازات بدون أصابع وعادية من 70 لـ 250 جنيه، نظارات برباط مطاطي للحماية من الرياح والأتربة بـ 100 جنيه، وفيه جاكيت جلد رياضي خاصة بالموتوسيكلات بـ يبدأ من 500 جنيه وأنت طالع. فيه ستيكرات ولافتات فسفورية بـ تتحط على الإطارات وجسم الموتوسيكل نفسه لأنواع وموديلات مختلفة، بس أكثرها بـ يحمل شعار هوندا، وأسعارها من 25 لـ 50 جنيه. كمية حلي وكشافات وشكمانات ومقابض وهياكل للموتوسكيلات بأنواعها، هـ تلاقي نفسك عاوز تشتري المحل كله، بس خلي بالك السعر اللي بـ يقولوا لك عليه مش نهائي، فاصل على قد ما تقدر، وخليك فاكر أنك في سوق كبير ممكن تخرج من المحل ده تدخل اللي جنبه وعادي جدًا، تجربتنا في «شادي علي» كانت مقيدة وعرفتنا كثير عن عالم الإكسسوارات والدراجات النارية، كل ما نلاقي نفسنا فاضيين هـ نروح الوكالة ونكتشف محل جديد وأكيد هـ نلاقي كماليات جديدة في السوق، الموضوع مالوش نهاية.

...

عرفة جروب: أذواق مختلفة وبأسعار منافسة في ميدان طلعت حرب بوسط البلد
اصدرت في: 06/01/2014

دائمًا لما بـ نكون ناويين نشترى مجموعة من احتياجاتنا دفعة واحدة، أول حاجة بـ نفكر فيها المولات الكبيرة أو المحلات الأكثر شمولاً علشان على الأقل نوفر تعب التنقل بين الأماكن ونوفر كمان الوقت اللى ممكن نضيعه فى اللف علشان نلاقي حاجه تعجبنا، أو مكان مناسب لأسعارنا.. ده بالضبط اللى حصل معانا لما قررنا نجدد بيتنا، وكل يوم نروح أماكن مختلفة وبأسعار متفاوتة، بالصدفة روحنا "عرفة جروب" رغم أنه فى مكان حيوى في وسط البلد إلا أنه غير معروف بالنسبة لناس كثير، وهو موجود تحديدًا فى ميدان طلعت حرب لو أعطيت ظهرك لحلوانى "جروبى" هـ تلاقيه فى وشك واخد ناصيتين: ناصية شارع قصر النيل وشارع طلعت حرب، وده فرع من ضمن 5 فروع، فرع وسط البلد على مسافة 100 متر تقريبًا من موقف عبد المنعم رياض. عرفة جروب عبارة عن مول متوسط الحجم لكن فيه مجموعة كبيرة جدًا من احتياجات أى بيت وبأسعار منافسة للأسعار على الرصيف، وده على لسان مدير الفرع، يعني في متناول الجميع. عرفة جروب له مدخلين والاثنين بـ يؤدوا لنفس المكان تجنبًا للزحمة، وأول ما تدخل هـ تلاقى فيه 3 كاشير، والأمانات وكمان مكتب المدير لأى استفسارات أو اقتراحات أو حتى للشكاوى. المكان مكون من ثلاثة أدوار: أول دور أو الأرضي هـ تلاقى فيه على يمينك قسم الأدوات المنزلية من الأبرة للصاروخ زى ما بـ يقولوا، وأذواقها مناسبة وراقية جدًا. وعلى الشمال قسم الأجهزة الكهربائية وأغلبها ماركات عالمية ومعروفة زى توشيبا وسامسونج إل جي .. وغيرهم، والأجهزة المُعمرة يعنى زي الثلاجات والبوتاجازات والسخانات.. إلخ. بعد كده هـ تطلع الدور الثانى هـ تلاقى قسم ملابس الأطفال البناتى والولادى وقسم المفروشات، هـ تلاقى مجموعة مختلفة ومتنوعة وعليها عروض كمان. الدور الثالث والأخير هـ تلاقي فيه قسم الملابس الرجالى والحريمي وأغلبها ماركات عالمية زي تومي، كيلفن كلاين، رالف بولو.. إلخ. لو كنت بقى عاوز أثاث هـ تلاقيه فى فرع من فرعين أكتوبر أو العاشر، الأسعار فعلاً منافسة ومناسبة لفئة كبيرة وحاليًا فيه تطويرات في الخدمة زي توفير توصيل الطلبات للبيت. والأذواق مناسبة بنسبة كبيرة ومختلفة، بالإضافة للعروض المستمرة بصفة دائمة كل شهر تقريبًا بـ ينزل فلاير فيه أكثر من 40 قطعة عليهم عرض، وآخر عرض ومازال لحد نصف شهر يناير بمناسبة مرور سنتين على الفرع، العرض كل يوم جمعة اشترى بـ 500 جنيه واكسب كوبون فيه جائزة بـ يبدأ من 50 جنيه كاش إلى بوتاجاز بقيمة 2000 جنيه، خدمة التوصيل مش موجودة لكن ممكن يوفروا لك عربية لو مش معاك، كمان بـ يساعدوك فى أى حاجة محتاجها، بالإضافة أن فيه إمكانية الاستبدال خلال 14 يوم من نفس الفرع أو من فرع آخر بشرط توفير القطعة فى الفروع الثانية، ودى ميزة مش موجودة في أماكن كثير، وكمان ممكن ترجع المنتج نهائي لو اكتشفت أنك مش محتاجه خلال 14 يوم بشرط أنه يكون على حالته اللى اشتريته بها. مواعيد الفرع يوميًا من 11 صباحًا إلى 11 مساءً ماعدا الجمعة من 1 ظهرًا إلى 11 مساءً، ولو فرع وسط البلد بعيد عليك ممكن تروح أقرب فرع لك من خمسة فروع: العاشر من رمضان، أو أكتوبر فى فاميلى مول، أو فرع عباس العقاد بمدينة نصر، أو فرع أسيوط شارع النميس. ممكن كمان تتابعهم على الموقع الإلكترونى.

...

بيت الهدايا: بابا نويل فى انتظارك بهدايا وزينة رأس السنة في وسط البلد
اصدرت في: 23/12/2013

كان من الصعب أنه ما يلفتش نظرنا.. بابا نويل ببدلته الحمراء وذقنه البيضاء وهو واقف ماسك آلة الفلوت بـ يعزف، وعلى يمينه بابا نويل ثانى رافع أيديه فى انتظار زوار محل "بيت الهدايا" في وسط البلد، واجهة المحل كانت سبب رئيسى خلتنا نحاول نركن على جنب ونرجع له، واجهة المحل كانت مبهجة فى حد ذاتها بـ تُشع اللون الأحمر لون بدلة بابا نويل اللى كان له أحجام كبيرة وصغيرة ومتوسطة، واللون الأخضر لون شجرة عيد الميلاد اللى برضه كان لها أحجام مختلفة. اللى ناوى يروح كذا مكان علشان يجيب هدايا الكريسماس لناس مختلفة الأعمار وكمان عاوز يشترى زينة رأس السنة علشان يحطها فى البيت والشغل، ممكن يروح مكان واحد، أمام باب بيت الهدايا هـ تلاقى ستاند مُعلق عليه بابا نويل مقاس صغير بـ 15 جنيه مصنوع من القطن، بدخولك المحل هـ تلاقى بابا نويل بحجمه الوسط فيه منه اللى له موسيقى وبـ يشتغل ببطارية والثانى اللى بـ يطلع من علبة، والثالث على بـ يتشلقب. وأسعارهم بـ تتراوح ما بين 35: 95 جنيه، وفيه كمان بابا نويل اللى لبسه عبارة عن دهان جليتر بألوان الذهبى والأزرق والأخضر. من الهدايا اللى تنفع الأطفال برضه بلورة بلاستيك بـ يجرى جواها بابا نويل والثلج بـ يطير حوله وأسعارها بـ تبدأ من 95 جنيه، وكمان فيه زى بابا نويل خاص للأطفال اللى ممكن يبقى عندهم حفلات تنكرية بمناسبة الكريسماس، وسعره فى حدود 300 جنيه للأولاد والبنات، وبروشات على شكل بابا نويل علشان تتحط على الهدوم. وبما أننا جيبنا سيرة التنكر فيه ماسكات تنكرية بريش ومن غير ريش ترجعك لجو القرون الوسطى فيه منها اللى بـ يغطى منطقة الأنف والعيون، أسعارها بـ تختلف حسب الشكل واللون وهـ تلاقى قبعات تنكرية بألوان مختلفة لو مش عاوز تخبى وجهك، وبالنسبة للبنات فيه سورتيت الشعر عليها صور لشجرة الميلاد وزينتها. أما هدايا البيت فهى كثيرة لو كنت ناوى تهادى شخص كبير، يعنى هـ تلاقى أشجار الميلاد حجم متوسط وكبير أسعارها من 200: 300 جنيه، أطقم الزينة الخاصة بها والمكونة من الأجراس والكور الذهبية وأسعارها بـ تبدأ من 40 جنيه، أو تحف بابا نويل الصغيرة المصنوعة من الخزف ومعلقة فى خيوط رفيعة واللى بـ تتعلق على الحوائط، أو ساعات الحائط على هيئة بابا نويل. هدايا المكتب بلورات المياه اللى جواها بابا نويل وعربيته ومكتوب عليها Merry Christmas أسعارها بـ تبدأ من 29 جنيه، وفيه فواحة العطور والبخور اللى على شكل بيت لبابا نويل، وأقلام غطاها عبارة عن رأس بابا نويل، وبلورة بـ تعكس إضاءة مختلفة حاضنها بابا نويل. قبل ما ننسى تماثيل بابا نويل المطلة على شارع عماد الدين بـ تُباع ودي ممكن تبقى زينة للمطاعم والكافيهات الواحد منهم سعره 1100 جنيه.

...

النيل ستوك: تسوق على الطريقة الكلاسيكية في وسط البلد
اصدرت في: 13/10/2013

من وقت للثاني لازم نعمل زيارة لمحلات «النيل ستوك» أو Nile Stock اللي فروعها منتشرة في كل أحياء القاهرة وخاصة الشوارع التجارية المعروفة. المحل له خصوصية فريدة لأنه بـ يجذب كل شرائح المجتمع، أسعاره القليلة عمرها ما كانت سبب في أن الجودة تكون قليلة، ومستوى الخدمة ومواقع فروع المحل الحيوية بـ تخلي الإقبال عليه من جميع الفئات العمرية والمجتمعية كبير جدًا، عنده ملابس رجالي وحريمي وأطفال وبعض الإكسسوارات، وقدر يكون واحد من المحلات المفضلة للمصريين في السنين الأخيرة ودي حاجة مش سهل على محل ملابس عادي أنه يحققها. فرع وسط البلد موجود في ممر بهلر اللي بـ يربط بين شارع طلعت حرب وشارع عماد الدين، مكانه مميز على ناصية واضحة وهو مكون من دورين، الدور الأول للملابس الحريمي والأطفال البنات، والدور العلوي للرجالي والأولادي. عنده ملابس خروج وبيت وملابس داخلية لكن مافيش أحذية. سهل تأخذ بالك أنه بـ يشبه محلات مصرية عريقة زي صيدناوي وعمر أفندي بعد تجديدهم، نفس التصميم ونفس أسلوب رص الملابس ونفس الخدمة، شكل كلاسيكي جدًا للتسوق لكنه مريح نفسيًا، والمهم أنه متطور في نفس الوقت ودائمًا هـ تلاقي موظف قريب منك علشان تسأله على أي حاجة عاوز تعرفها. للحظات ممكن تحس أن المكان ده تابع للحكومة من كثر ما هو كلاسيكي، لكن الحقيقة أنه قطاع خاص عادي جدًا، بس قدر يكون له شخصية مميزة. ميزة «النيل ستوك» اللي كل الناس عارفينها أن عنده ملابس قطنية ممتازة، وثاني حاجة أن أسعاره قليلة قوي، يعني في قسم الرجالي على سبيل المثال التي شيرت القطن السادة بـ 30 جنيه بس، وشكله وتقفيله كويس يعني ممكن يتلبس في الخروج عادي، فين ممكن تلاقي تي شيرت خروج بـ 30 جنيه دلوقت ويبقى بالجودة دي؟ الجينز هنا بأسعار من 70 لحد 120 جنيه، صحيح مش آخر موضة لكن بـ تؤدي الغرض وعملية، وفيه منها كل الألوان، ونفس الكلام على البنطلونات الجبردين والبولو شيرت. ولأن الشتاء داخل كان فيه عدد كبير للبول أوڤرات السادة بكل الألوان، أسعارها 150 جنيه، شكلها بسيط زي كل الموديلات الموجودة في المحل، لكن شيك وممكن ما تقدرش تقاومها وتجيب منها 2 أو 3 لأنها عملية فعلًا وسعرها كويس. فيه ملابس بيت وبيجامات وبنطلونات رياضية وسويت شيرتات للبيت بأسعار من 30 لـ 60 جنيه، وإحنا بـ ننصح أي حد عاوز يعمل عملية إحلال وتبديل لدولاب الملابس المنزلية ييجي على هنا ونوعدك أنك مش هـ تدفع كثير، وهـ تكون راضي عن الجودة والموديلات كمان. قسم الأطفال غني جدًا بالمعروضات رغم أننا في فترة بين موسمين الصيف والشتاء لكن هـ تلاقي كل اللي يناسب طفلك (أولاد أو بنات) خروج أو بيت، من أول البيجامة اللي بـ 10 جنيه بس بعد الخصومات لحد الجاكيت الجلد السميك اللي بـ 130 جنيه، لكن ما عجبناش عدد من المعروضات في قسم الأطفال المصنوعة من التريكو حسيناها قديمة جدًا ومش ملائمة لروح المحل ولا الزمن اللي إحنا فيه، وأحيانًا بـ يبقى فيه نقص في بعض المقاسات لكن أول بأول المحل بـ ينزل الموديلات والمقاسات المختلفة، يعني اللي مش هـ تلاقيه النهارده هـ تلاقيه بعد يومين بالكثير. ملابس البنات والسيدات هنا مش بنفس جودة ملابس الرجال والأطفال، أو بمعنى أصح مش مناسبة لطبيعة السيدات اللي بـ يدوروا على أحدث موضة مش مجرد ملابس عملية بسيطة، ومع ذلك إحنا عجبنا عدد من الفساتين والشيرتات الحريمي رغم بساطتهم وأسعارهم اللي ما زادتش عن 150 جنيه. محلات «النيل ستوك» علامة بارزة في عالم التسوق وله شعبية كبيرة في القاهرة، جولتنا السريعة هناك كانت للاطمئنان على مستوى الخدمة وجودة المعروضات ونشوف إذا كان لسه محتفظ بطبيعته الخاصة ولا لأ، والحقيقة أنه كان عند حسن ظننا وزيادة شوية.

...

شاهد المزيد
مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول